#Article 1: Rumantsch Grischun (653 words)


Il rumantsch grischun (RG) è ina lingua da standard sur las diversas variantas dal rumantsch dal Grischun, creada e derasada a partir dal 1982 per incumbensa da la Lia Rumantscha. Il rumantsch grischun è ina da las quatter linguas uffizialas da la Svizra. El vegn duvrà en il sectur da l'administraziun federala, chantunala e da numerusas instituziuns, sin paginas dad internet e per programs da computer, en las novitads scrittas e legidas da Radiotelevisiun Svizra Rumantscha, per part en la gasetta La Quotidiana, en ovras litteraras ed ulteriuras publicaziuns da tut gener. Grazia a questa lingua da standard è la preschientscha publica dal rumantsch s' augmentada massivamain e cun quella er il stgazi da pleds.

En las scolas vegn il rumantsch grischun actualmain instruì sco lingua d'alfabetisaziun en il Surses, en singulas vischnancas da la val d'Alvra, en la scola da Trin ed en las classas bilinguas a Domat e Cuira. In'emprova, lantschada dal departament d' educaziun chantunal, dad introducir il rumantsch grischun sco lingua d'alfabetisaziun en tut las scolas rumantschas, na ha gì success. Diversas scolas en Val Müstair ed en ils cumins da la Foppa e da Rueun en Surselva ch' avevan decidì a favur dal project èn returnadas a lur decisiun e han reintroducì lur idioms. Tenor il plan d'instrucziun 21 pon tut las vischnancas rumantschas s'occupar cun il rumantsch grischun sin il stgalim superiur.  

Il Rumantsch dal Grischun ha sviluppà ord motivs istorics, geografics e socio-culturals dapi il 16avel tschientaner tschintg differents idioms: il Sursilvan, il Sutsilvan, il Surmiran, il Puter ed il Vallader. 

Ina lingua unifitgada per ils Rumantschs è in vegl postulat: L'emprima emprova è vegnida proponida da Joseph Planta en il 18avel tschientaner. In' ulteriura ha il pader benedictin Placidus a Spescha fatg al cumenzament dal 19avel tschientaner. En la segunda mesadad da quel tschientaner ha Gion Antoni Bühler creà e scrit il romontsch fusionau, enturn 1950 ha Leza Uffer preschentà ses interrumantsch. Tut questas stentas na han dentant per differents motivs mai propi purtà fritg. 

Uschia era a la fin dals onns 1970 il privel pli grond che mai ch'il tudestg surpiglia la rolla sco lingua cuminaivla dals Rumantschs. Il 1981 ha il secretari da la Lia rumantscha, Bernard Cathomas, prendì l'iniziativa per ina lingua da standard tenor ils princips da la planisaziun linguistica ed ha chattà il sustegn dals gremis ed organs da la Lia rumantscha. Ils emprims mais dal 1982 ha professer Heinrich Schmid da l'universitad da Turitg sviluppà las directivas da basa per ina lingua da scrittira per l'entir Grischun rumantsch. El ha fatg quai en discussiun cun ils retoromanists da sia generaziuns Andrea Schorta, Mena Wüthrich-Grisch, Alexi Decurtins e Leza Uffer; cun ils giuvens filologs Hans Stricker, Felix Giger, Georges Darms e Kuno Widmer; e cun pliras studentas e students rumantschs e persunalitads sco Jachen Ulrich Gaudenz e Hendri Spescha. 

Sin fundament da las directivas da basa ha ina squadra, manada da Georges Darms e dapi 1992 dad Anna-Alice Dazzi Gross, elavurà durant onns ils detagls dal rumantsch grischun che sa basa sin il material linguistic dals idioms e da variantas localas. L'elavuraziun dal project è vegnida finanziada per gronda part dal Fond naziunal svizzer per la perscrutaziun scientifica. La derasaziun ed implementaziun dal rumantsch grischun è en in' emprima fasa da circa 15 onns vegnida manada da Bernard Cathomas da la Lia rumantscha. Cun duvrar il rumantsch grischun en scrittiras derasadas en l'entir territori è questa lingua da standard daventada ina novaziun relevanta per l'entira cuminanza, betg mo per la linguistica. 

Il rumantsch grischun ha effectuà discussiuns intensivas e cuntraversas en ed ordaifer il Grischun. Grazia a quellas han blers influenzà la novaziun ed il svilup dal project. E la finala ha quel sveglià ina nova schientscha per ils idioms e las varietads localas en territori rumantsch. Oz èn blers d'accord ch'i dovra ina lingua da standard rumantscha per ils secturs, nua ch'i dat mo in rumantsch u nagin rumantsch.




#Article 2: Svizra (22150 words)


La Svizra (tudestg: Schweiz, franzos: Suisse, talian: Svizzera, latin: Helvetia), uffizialmain Confederaziun svizra, è in stadi democratic e federalistic situà en l’Europa Centrala. 

La surfatscha da la Svizra munta a 41 285 km². Il territori statal cumpiglia territoris da lingua e cultura tudestga, franzosa, taliana e rumantscha. Ils abitants da la Svizra accentueschan lur appartegnientscha al stadi betg mo sco burgais, mabain er en furma d’ina naziun fundada sin la voluntad politica.

La Svizra cunfinescha en il nord cun la Germania, en l’ost cun l’Austria ed il Liechtenstein, en il sid cun l’Italia ed en il vest cun la Frantscha. La Constituziun federala na fixescha bain nagina chapitala; la sedia da las autoritads federalas è però facticamain Berna.

En Svizra vivan 8,4 milliuns abitants, da quai 2,1 milliuns senza dretg da burgais svizzer (25 %). Da l’entira populaziun (resguardond a partir da 15 onns persunas cun e senza dretg da burgais) han 37 % da la populaziun ina biografia da migraziun. Il pajais tutga tar ils stadis da l’Europa populads vaira spess, la gronda part da la populaziun sa concentrescha però en la Svizra Bassa, la zona da batschigl situada tranter il Giura e las Alps. Las set pli grondas citads resp. centers economics èn Turitg, Genevra, Basilea, Berna, Losanna, Winterthur e Lucerna.

La Confederaziun sa divida en 26 chantuns cun suveranitad parziala e dispona a nivel federal – confurm a la populaziun indigena – da quatter linguas uffizialas: tudestg, franzos, talian e rumantsch (lingua parzialmain uffiziala). Quellas furman la basa culturala dal pajais cun sias regiuns linguisticas: Svizra tudestga, Svizra franzosa (u Svizra romanda), Svizra taliana e Svizra rumantscha.

Sco designaziun dal pajais vegn duvrada la furma latina – pia linguisticamain neutrala – Confoederatio Helvetica (abreviaziun: CH). La Confederaziun svizra è resortida dals chantuns originars Uri, Sviz e Silvania. Sco document da fundaziun inuffizial vala il Patg federal dal 1291 che furma il pli vegl document federal ch’è sa mantegnì. En la Pasch da Vestfalia dal 1648 ha la Svizra cuntanschì si’independenza tenor il dretg statal. Il stadi federal odiern consista dapi il 1848. Il num Svizra deriva dal chantun originar Sviz resp. da sia chapitala da medem num.

L’identitad e la coesiun naziunala na sa basan betg sin ina lingua, etnia u religiun communabla, mabain sin facturs interculturals sco la cretta en la democrazia directa, in aut grad d’autodeterminaziun locala e regiunala e la cultura exprimida da chattar cumpromiss en la procedura da decisiun politica. En quest reguard vegn la Svizra savens considerada sco exempel per auters stadis.

Sin l’index dal svilup uman ha la Svizra cuntanschì il 2016 il segund plaz e tutga uschia tar ils pajais autamain sviluppads. Cumbain che la Svizra sa chatta da tut ils pajais areguard la grondezza be sin il 133avel plaz ed areguard il dumber d’abitants sin il 98avel, furma il pajais la 20avel gronda economia publica dal mund (situaziun dal 2017).

La cuntrada svizra è caracterisada da la chadaina da las Alps. Al sid da las Alps giascha il chantun Tessin, al nord la Svizra Bassa e la chadaina dal Giura. En las Alps svizras naschan plirs gronds flums: il Rain, il Rodan, l’En, l’Aara ed il Ticino. Il clima da la Svizra sa lascha caracterisar sco temprà.

En il vest cunfinescha la Svizra cun la Frantscha, en il nord cun la Germania, en l’ost cun l’Austria ed il Liechtenstein ed en il sid cun l’Italia.

La surfatscha da la Svizra cumpiglia 41 285 km². Il punct il pli aut è il Piz da Dufour en il Vallais cun 4634 m s.m. Il punct il pli bass è il Lago Maggiore en il Tessin cun 193 m s.m.

La distanza nord-sid munta a 220 km. Il lieu ch’è situà il pli al nord è Bargen en il chantun Schaffusa; il lieu situà il pli al sid è Pedrinate (vischnanca da Chiasso) en il chantun Tessin. La distanza ost-vest munta a 348 km. Il punct situà il pli a l’ost è il Piz Chavallatsch (chantun Grischun). Il lieu situà il pli al vest è Chancy èn il chantun Genevra.

Il 1291 han ils chantuns dad Uri, Sviz e Silvania renovà ina lia pli veglia. Quest Patg federal era en emprima lingia in’allianza da pasch per garantir la protecziun e l’agid vicendaivel; pli tard ha la lia er servì al cumbat encunter ils Habsburgais ch’eran da quel temp ina da las famiglias las pli pussantas entaifer il Sontg Imperi roman. La victoria cunter l’armada habsburgaisa en la Battaglia da Morgarten (1315) ha fullà via a l’independenza da la Svizra.

En il Contract de Vestfalia da l’onn 1648 han ils pajais europeans renconuschì formalmain l’independenza svizra dal Sontg Imperi roman. L’onn 1798 èn las armadas da la Revoluziun franzosa penetradas en Svizra. En rom dal Congress da Vienna dal 1815 han ils potentats europeicas restabilì l’independenza da quella.

Suenter la Guerra da la Lia separatista (1847) è la Svizra sa constituida sco stadi federal modern. La constituziun è vegnida revedida ils onn 1874 e 1999. Il 2002 è la Svizra daventada commembra da l’Organisaziun da las Naziuns unidas.

Dapi il 1848 furma la Svizra in stadi federal; quel è sutdividì en trais plauns statals: las vischnancas, ils chantuns e la Confederaziun. Las trais pussanzas politicas da la Confederaziun èn: il Cussegl federal sco executiva, l’Assamblea federala (che sa cumpona dal Cussegl naziunal e dal Cussegl dals chantuns) sco legislativa ed il Tribunal federal sco giudicativa.

Ils 26 chantuns da la Svizra èn (en successiun alfabetica): Appenzell Dadens, Appenzell Dadora, Argovia, Basilea-Champagna, Basilea-Citad, Berna, Friburg, Genevra, Giura, Glaruna, Grischun, Lucerna, Neuchâtel, Schaffusa, Soloturn, Son Gagl, Sursilvania, Sutsilvania, Sviz, Tessin, Turgovia, Turitg, Uri, Vad, Vallais e Zug. Cun la Constituziun federala dal 1848 han ils chantuns cedì a la Confederaziun ina part da lur suveranitad. 

Las vischnancas furman il stgalim il pli bass da l’urden statal. Tut ils chantuns èn dividids en vischnancas politicas, però betg tuts attribueschan a las vischnancas in’autonomia communala talmain vasta sco il Grischun.

Il december 2017 dumbrava la Svizra 8 482 152 abitantas ed abitants. La Svizra ha ina da las aspectativas da vita las pli autas dal mund (umens 76, dunnas 82 onns). 74 % da la populaziun abitescha oz en territoris urbans; var la mesadad da la populaziun citadina abitescha en las aglomeraziuns da las tschintg citads grondas da Turitg, Basilea, Genevra, Berna e Losanna. 22 % da la populaziun permanenta en Svizra èn estras ed esters. Dapli che la mesadad dad els è gia naschida en Svizra u viva qua dapi passa 15 onns.

La Svizra ha quatter linguas naziunalas ed uffizialas: il tudestg (65,6 %), il franzos (22,8 %), il talian (8,4 %) ed il rumantsch (0,6 %). Quatter chantuns èn plurilings: il chantun Grischun (tudestg 68,3 %, rumantsch 15,0 % e talian 10,2 %), il chantun Berna (tudestg 84,0 % e franzos 7,6 %), il chantun Friburg (franzos 63,2 % e tudestg 29,2 %) ed il chantun Vallais (franzos 62,8 % e tudestg 28,4 %).

La Svizra n’enconuscha nagina religiun dal stadi, cumbain che la gronda part dals chantuns (cun excepziun da Genevra e Neuschatel) renconuschan baselgias uffizialas. 42,5 % da la populaziun èn protestants, 41 % catolics. Tras l’immigraziun èn l’islam (4,3 %, principalmain Albanais dal Cosovo) e l’ortodoxia (1,8 %) daventads minoritads religiusas d’impurtanza.

Pervi da sia posiziun geografica en il center da l’Europa posseda la Svizra ina rait da vias e viafiers fitg vasta. La traversada da las Alps furma da vegl ennà ina sfida per il traffic da transit europeic. L’onn 1882 han ins inaugurà il Tunnel viafier dal Son Gottard (cun ina lunghezza da 15 km); il 1906 è suandà il Tunnel dal Simplon. Las transversalas las pli novas èn il Tunnel da basa dal Lötschberg, inaugurà il 2007, ed il Tunnel da basa dal Son Gottard, inaugurà l’onn 2016. Cun 57 km furma quest ultim il pli lung tunnel dal mund.

La Svizra è in pajais da l’intern situà tranter il 46avel ed il 48avel grad da latituda. El dispona da regiuns da funtaunas da flums che sbuccan en la Mar dal Nord, en la Mar Mediterrana ed en la Mar Naira. L’extensiun maximala nord-sid munta a 220,1 kilometers (da Bargen a Chiasso), la pli gronda extensiun vers-ost a 348,4 kilometers (da Chancy fin en la Val Müstair).

Il pli aut punct da la svizra furma il Piz da Dufour (4634 m s.m.), situà al cunfin vers l’Italia. Il pli bass punct furma la riva dal Lago Maggiore cun 193 m s.m., medemamain al cunfin talian. Il lieu abità permanentamain situà il pli ad aut è Juf en il chantun Grischun (2126 m s.m.). Il punct central geografic da la Svizra sa chatta en il chantun Sursilvana sin l’Älggi-Alp. 

Il cunfin dal pajais mesira en tut 1935 kilometers (Italia 782, Frantscha 585, Germania 347, Austria 180, Liechtenstein 41).

La Svizra sa lascha divider en trais cuntradas grondas che sa distinguan fermamain ina da l’autra: il Giura, la Svizra Bassa e las Alps cun las Prealps. Radund 48 % da la surfatscha dal pajais tutgan tar las Alps, 12 % tar las Prealps, 30 % tar la Bassa e 10 % tar il Giura.

En il nordvest e nord vegn la Svizra Bassa cunfinada geograficamain sco er geologicamain da las lungas chadainas da collinas dal Giura. En il sid vers las Alps vegn il cunfin per ordinari fixà là nua che las autezzas surpassan l’emprima giada 1500 m s.m. En il sidvest furma il Lai da Genevra il cunfin da la Svizra Bassa, en il nordost il Lai da Constanza ensemen cun il Rain. La spessezza da la populaziun relativamain auta dal pajais deriva da las aglomeraziuns ch’èn tuttas situadas en la Svizra Bassa, cun las duas metropolas relativamain pitschnas, ma tuttina impurtantas Turitg e Genevra. En ils chantuns Turitg ed Argovia, dus tipics chantuns da la Bassa, cuntanscha la spessezza da la populaziun valurs da 600 fin bunamain 800 persunas per kilometer quadrat.

Cun la noziun Prealps vegnan designadas en Svizra las regiuns che marcheschan la transiziun da la Bassa levamain collinusa al territori muntagnard da las Alps. Ensemen cun las Alps furman quellas in artg che s’extenda tranter il sidvest ed il nordost da la Svizra.

Las Alps, situadas «en il cor da l’Europa», furman in impurtant sparta-auas e cunfin climatic e stattan da lur vart sut l’influenza d’ulteriurs effects da l’aura alpins ed interalpins. Uschia è la Svizra, malgrà sia pitschnezza, per ordinari segnada da differentas cundiziuns meteorologicas. Entaifer l’artg alpin svizzer èn situadas enconuschentas destinaziuns da turissem da stad e d’enviern sco er il sulet parc naziunal da la Svizra.

Il sid da las Alps è ina noziun che vegn surtut duvrada en connex cun la previsiun da l’aura, damai che las cundiziuns meteorologicas, il clima e la vegetaziun sa distinguan qua per gronda part dal nord da las Alps. Il sid da las Alps cumpiglia il Tessin, las valladas dal Grischun dal Sid Mesauc, Calanca, Bregaglia, Puschlav e Val Müstair sco er, en il Vallais, la regiun situada al sid dal Pass dal Simplon; ord vista dals spazis natirals appartegnan quests territoris a las Alps.

Il Giura svizzer sa lascha cunfinar approximativamain en l’ost e sidost tras la Svizra Bassa, en il nord tras il Rain ed en il nordvest tras l’uschenumnada Porta burgognaisa. Geologicamain furma il Giura ina muntogna faudada relativamain giuvna che s’extenda sur radund 300 kilometers en furma d’ina mesaglina ch’è averta vers il sidost. Sin la lingia Besançon–Yverdon cumpiglia la pli gronda ladezza da la muntogna radund 70 kilometers. Sper Bienna midan las chadainas lur direcziun adina dapli vers ost, il sistem da muntognas daventa pli graschel ed il dumber da las chadainas situadas ina sper l’auter daventa pli pitschen. La chadaina dal Giura la pli orientala, la chadaina dal Lägern, s’extenda precisamain en direcziun vest-ost e finescha en vischinanza da Dielsdorf, nua che las stresas che furman la muntogna sfundran sut la molassa da la Svizra Bassa.

La structura geologica da la Svizra è surtut segnada da la collisiun tranter las duas plattas tectonicas da l’Africa e da l’Europa durant ils ultims milliuns onns. Las Alps consistan oravant tut da granit, il Giura da crap da chaltschina. 

La topografia da la Svizra odierna è marcada da las immensas massas da glatsch ch’èn penetradas ils ultims dus milliuns onns, durants ils differents temps da glatsch, fin lunsch en la Bassa.

En Svizra datti bundant 3350 pizs ch’èn situads sur 2000 m s.m. Ils sedesch pizs ils pli auts da la Svizra sa chattan tuts en las Alps Vallesanas. Il pli aut furma il Piz da Dufour (4634 m) ch’è situà en il Massiv dal Monte Rosa. Il pli aut piz che sa chatta dal tuttafatg sin territori svizzer è il Dom (4545 m).

Bain la pli enconuschenta muntogna da las Alps svizras è il Matterhorn (4478 m). En la Part Sura Bernaisa furman Eiger (3967 m), Mönch (4107 m) e Jungfrau (4158 m) ina gruppa famusa ch’è er visibla nà da la Bassa. In punct marcant en l’ost dal pajais furma il Piz Bernina (4049 m) ch’è a medem temp il sulet piz sur 4000 m da las Alps Orientalas.

En las Prealps èn las elevaziuns bain pli bassas, ma pervi da lur dominanza n’èn ellas qua betg main imposantas. Exempels furman en la Svizra Centrala Pilatus (2132 m), Mythen (1898 m) e Rigi (1797 m) ed en la Svizra Orientala il Säntis (2502 m).

La pli auta muntogna en il Giura svizzer furma il Mont Tendre cun 1679 m. Ulteriuras impurtantas elevaziuns èn La Dôle (1677 m), Chasseral (1607 m), Chasseron (1607 m) e Suchet (1588 m). 

L’auta muntogna svizra è segnada fitg ferm dals numerus glatschers. Il pli grond e pli lung glatscher da las Alps insumma furma il Glatscher grond d'Aletsch, suandà – areguard la surfatscha – dal Glatscher dal Gorner. L’ultima extensiun maximala han ils glatschers svizzers cuntanschì durant l’uschenumnà temp da glatsch pitschen ch’ha durà da l’entschatta dal 15avel tschientaner fin la mesadad dal 19avel tschientaner. Dapi la mesadad dal 19avel tschientaner sa fa er valair en Svizra, sco quasi dapertut en il mund, ina regressiun cuntinuanta dals glatschers. Ils ultims decennis è la diminuziun da la massa da glatsch anc s’accelerada: tranter il 1973 ed il 2010 ha la surfatscha da tut ils glatschers da las Alps svizras pers radund 28 % da sia surfatscha.

Il Hölloch en il chantun Sviz furma il segund lung sistem da taunas en l’Europa, ed il Lac Souterrain de Saint-Léonard en il chantun Vallais è il pli grond lac sutterran natiral da l’Europa.

En il Massiv dal Gottard naschan cun il Rain ed il Rodan dus dals pli lungs flums da l’Europa. Tras la Svizra tanschan plirs dals sparta-auas principals dal continent: Quels spartan ils intschess idrografics da la Mar dal Nord, da la Mar Mediterrana e da la Mar Naira. Il Rain cun ses affluents maina en la Mar dal Nord, il Rodan ed il Ticino en la Mar Mediterrana e l’En sur il Danubi en la Mar Naira. In sparta-auas tripel sa chatta sin il Pass Lunghin.

A l’intern da la Svizra è il Rain il pli lung flum (375 km), suandà da ses affluent Aara (295 km). Il Rodan maina sur 264 kilometers tras la Svizra, la Reuss sco quart lung flum sur 158 kilometers. Ulteriurs impurtants flums furman la Sarine en il vest, il Ticino en il sid, Birs e Doubs en il nordvest, Linth/Limmat e Thur en il nordost e l’En en il sidost. Sper Schaffusa furma il Rain la pli gronda cascada da l’Europa, la Cascada dal Rain.

Pervi da sia structura topografica e surtut pervi da la vasta glazialisaziun durant ils temps da glatsch, ha la Svizra radund 1500 lais; tar ina gronda part da quels sa tracti da lais da muntogna pli pitschens. Tut en tut cuvran ils lais radund 4 % da la surfatscha dal pajais. A questa summa contribueschan surtut ils lais gronds: Il Lai da Genevra è cun 580,03 km² il pli grond e sa chatta al cunfin franzos; da sia surfatscha sa chattan stgars 60 % sin terren svizzer. Il Lai da Constanza cunfinescha cun la Germania e l’Austria e cumpiglia 536,00 km² (23,73 % da la lunghezza da la riva sa chattan sin terren svizzer). Il Lago Maggiore al cunfin talian (19,28 % sin territori svizzer) furma cun 193 m s.m. il pli bass punct dal pajais. Ils pli gronds lais che sa chattan dal tuttafatg en Svizra èn il Lai da Neuchâtel (215,20 km²), il Lai dals Quatter Chantuns (113,72 km²) ed il Lai da Turitg (88,17 km²).

En ils lais e flums svizzers sa chattan numerusas inslas pli grondas e pli pitschnas. Tar las pli enconuschentas tutgan las Isole di Brissago, l’Insla da Son Pieder e l’Ufenau.

Al nord da las Alps regia in clima temprà ch’è per ordinari segnà da vents oceanics; al sid da las Alps è il clima plitost da tempra mediterrana. Pervi da la topografia dal pajais variescha il clima però vaira ferm da regiun tar regiun.

Areguard las precipitaziuns sa lascha dir en general che quellas èn la stad radund duas giadas uschè amplas sco l’enviern. En la Svizra Centrala, las Alps ed il Tessin munta la quantitad da precipitaziuns radund 2000 millimeters l’onn; en la Bassa èn quai tranter 1000 e 1500 millimeters l’onn. Il lieu cun la pli gronda quantitad da precipitaziuns è il Säntis (en media 2837 mm tranter il 1981 ed il 2010); il lieu il pli sitg è Ackersand en il Vispertal (en media 545 mm tranter il 1981 ed il 2010). 

Tut tenor l’autezza croda ina gronda part da las precipitaziuns d’enviern en furma da naiv. Relativamain darar naivi en las regiuns da Genevra e da Basilea sco er en il Tessin dal Sid; qua poi tuttavia er dar envierns senza cuverta da naiv. La pli gronda autezza da la naiv en Svizra è vegnida mesirada l’avrigl 1999 sin il Säntis cun 816 cm.

Er las temperaturas en Svizra dependan surtut da l’autezza. Ultra da quai èn ellas en il vest statisticamain levet pli autas che en l’ost (ca. 1 °C). En general munta la temperatura media en la Bassa il schaner radund −1 fin +1 °C. Il mais il pli chaud, il fanadur, cuntanscha quella 16 fin 19 °C; la media annuala munta a ca. 7 fin 9 °C. Ils lieus ils pli chauds furman tenor las mesiraziuns Locarno-Monti e Lugano cun ina temperatura annuala da 12,4 °C (media dals onns 1981–2010). Sco quasi tar tut las staziuns da mesiraziun sa mussa er qua ina midada dal clima: en la perioda da mesiraziun 1961–1990 aveva la media anc muntà 11,5 °C (Locarno/Monti) resp. 11,6 °C (Lugano), pia 0,9 resp. 0,8 °C pli bass ch’ils decennis sequents. Il lieu cun las temperaturas medias las pli fraidas è il Jungfraujoch cun −7,2 °C (media dals onns 1981–2010); er qua è la temperatura s’augmentada en congual cun la perioda 1961–1990 per 0,7 °C. Ils records absoluts èn vegnids mesirads a Grono cun 41,5 °C (ils 11 d’avust 2003) resp. a La Brévine cun −41,8 °C (ils 12 da schaner 1987).

Cumpareglià cun auters lieus da medema autezza en la Bassa èn las temperaturas en la Val dal Rodan, la Val dal Rain e la regiun da Basilea en media per in fin dus grads pli autas ed en la Planira da Magadino en il Tessin per dus fin trais grads. Cumbain che l’Engiadina tutga climaticamain tar la Svizra dal Sid, èn las temperaturas là en media diesch grads pli bassas. Il medem vala per las valladas lateralas dal Goms en il Vallais che furman medemamain valladas alpinas.

Sco gia menziunà sa midan en rom da la midada dal clima globala er las relaziuns en Svizra. La temperatura media annuala è s’augmentada en Svizra dapi il 1864 per radund 2 °C (situaziun dal 2018). Quai è dapli ch’il dubel da la media mundiala – la Svizra è uschia pertutgada spezialmain ferm da la midada dal clima. Ina sfida furman surtut ils glatschers che lieuan adina dapli ed il cunfin da la schelira permanenta che sa sposta vers ensi. Ultra da quai èn las summas da las precipitaziuns en la Svizra Bassa creschidas ils ultims decennis a moda significanta; ed er il dumber e l’intensitad da precipitaziuns fitg fermas èn s’augmentads.

In terz da la surfatscha da la Svizra è cuverta cun guaud. En las Alps domineschan plantas da guglias (pign, aviez, laresch e schember). Ils guauds en las Alps èn da grond’impurtanza sco protecziun cunter lavinas ed auazuns (il guaud retegna la quantitad da plievgia e dat giu quella be plaunsieu). En la Svizra Bassa, en il Giura ed al sid da las Alps sutvart 1000 meters creschan guauds maschadads e guauds da feglia. Territoris da guaud spezialmain enconuschents èn l’Aletschwald, il Sihlwald ed il Pfynwald sco er ils guauds selvadis alpins Bödmerenwald (ca. 150 hectaras), il guaud selvadi da pigns da Lac de Derborence (22 ha), il guaud da lareschs Scatlè sper Breil (9 ha) ed il reservat da guaud Val Cama – Val Leggia en il Mesauc. Tamangur en l’Engiadina Bassa è il guaud da schembers il pli autsituà en l’Europa. En il Tessin ed en il Mesauc datti sco particularitad regiunala vasts guauds da chastagners, ils quals giugavan antruras ina rolla centrala en l’alimentaziun da la populaziun dal lieu. Ils trais pli gronds guauds da la Svizra s’extendan en il vest da la Maggia (169 km²), tranter il Monte Tamaro e Roveredo (162 km²) sco er en il Giura dal Col du Mollendruz fin al cunfin dal pajais sper La Dôle (117 km²).

En las valladas tessinaisas e per part en la Svizra Bassa creschan sco plantas decorativas intginas spezias da palmas, per exempel la palma nanina u la palma da la fortuna chinaisa. Quest’ultima daventa selvadia e stgatscha spezias da plantas indigenas, uschia ch’ella vegn en il fratemp taxada sco neofit invasiv.

En Svizra vivan tenor stimaziuns radund 40 000 spezias d’animals, da quai èn ca. 30 000 insects. Almain 40 % da las spezias d’animals èn periclitadas, surtut amfibis e reptils.

Spezias da mammals che vivan en libra natira datti en Svizra radund 100. Tar la gronda part da quellas sa tracti d’utschels-mezmieur e d’auters animals pitschens. Tut ils gronds animals da rapina èn svanids ils ultims tschient onns or da la Svizra. En il fratemp han ins però realisà la muntada dals carnivors per l’ecosistem, uschia ch’il luf-tscherver, il luf e l’urs èn vegnids mess sut protecziun. Il luf-tscherver han ins mess en libertad en Svizra. Il luf è immigrà nà da l’Italia e da la Frantscha e l’urs cumpara puspè da temp en temp en il sidost dal pajais (dapi il 2005), però senza ch’i fiss sa furmada ina populaziun.

Vaira frequenta è la vulp che sa senta er da chasa en las citads svizras. Ils tais abitan savens ensemen cun las vulps en las medemas taunas ed han perquai er gì da patir antruras da la persecuziun da quellas. Sco ulteriur animal che viva en taunas cumpara en tschertas regiuns alpinas la muntanella. Sper il luf-tscherver datti en Svizra anc singulas populaziuns da giats selvadis (en il Giura). Be fitg plaun returna la ludra puspè en tschertas regiuns. D’entupar vaira savens en lieus abitads è la fiergna alva; la fiergna melna percunter è plitost rara e tegna distanza da l’uman.

Tar ils animals ad ungla èn medemamain svanidas intginas spezias or da la Svizra, uschia per exempel il bison europeic e l’elan. Autras spezias extirpadas han ins puspè recolonisà en il fratemp, sco per exempel il capricorn che viva en l’auta muntogna. En il Vallais Sut datti duas colonias da muflons europeics ch’èn immigradas nà da la Frantscha. Il chamutsch è fitg frequent en las regiuns superiuras da las Alps e dal Giura. La pli gronda spezia da tschiervs indigena è il tschierv (cotschen), la pli pitschna è il chavriel. Il chavriel è a medem temp la spezia da tschiervs la pli frequenta e populescha er la Bassa ed il Giura. En la regiun da cunfin da Turitg e Schaffusa, sper il Rafzerfeld, cumpara il tschierv sika. Durant ils scumbigls da la Segunda Guerra mundiala eran intgins da quests animals mitschads da claus en la Germania dal Sid ed han populà da là anora la Svizra. Medemamain vaira frequent en intginas regiuns da la Svizra dal Nord è il portg selvadi. Dals animals ruiders han ins reintroducì il castur.

En Svizra viva in grond dumber da spezias d’utschels. Ils lais e flums svizzers furman impurtants territoris da paus e d’envernada per utschels da l’aua (diversas spezias dad andas, pernischs da l’aua, marels, sfunsellas e.a.). Dals utschels da prada èn surtut frequents il crivel ed il girun da mieurs; ma er milans cotschens e milans stgirs cumparan regularmain. L’evla da la pizza colonisescha en il fratemp puspè l’entir artg alpin. Er ils effectivs da sprers gronds e da sprers pitschens èn sa revegnids e puspè stabils. Il tschess barbet ch’era vegnì extirpà è puspè vegnì recolonisà.

Da las giaglinas dal pe pailus vivan la giaglina da guaud, l’urblauna, la giaglina da draussa e la giaglina selvadia en las Alps svizras e per part en l’artg dal Giura. Ils effectivs da la giaglina selvadia èn però periclitads fitg ferm pervi dal turissem e l’intensivaziun da la selvicultura. Uschia è la giaglina selvadia gia svanida or da bleras parts da las Prealps e dal Giura dal Nord. Organisaziuns per la protecziun da la natira sa stentan da mantegnair la spezia. La pernisch da gonda colonisescha il cunfin dal guaud. Periclitads fitg ferm èn la pernisch, la quaglia ed il fliaun grond.

En Svizra vivan spezias da tschuettas sco la tschuetta da guaud, il piv mesaun, il piv grond, la tschuetta nanina sco er la tschuetta dal pe pailus e la tschuetta velada. En ils vegls guauds da muntogna vivan bleras spezias da pitgalains. Er blers utschels chantadurs èn derasads vastamain en Svizra. Pervi da l’extensiun dals territori abitads, la cultivaziun intensiva en l’agricultura ed il turissem èn però numerusas spezias d’utschels periclitadas. Tut èn tut sa chattan stgars 40 % da las spezias d’utschels en Svizra sin la glista cotschna da las spezias periclitadas.

Tranter ils reptils èn da numnar diversas spezias da serps che sa sentan surtut da chasa en las valladas suleglivas al sid da las Alps (sco la vipra dal Giura); en las Alps ed en il Giura è er da chasa la vipra berus u vipra cruschada. Bler pli frequentas èn però serps betg da tissi sco la natra grischa e la natra quadrigliada. Derasadas vastamain èn diversas spezias da luschards. Sco suletta spezia da tartarugas cumpara en Svizra la tartaruga da palì europeica.

Tranter ils amfibis ils pli derasads tutgan la rauna da prada, il rustg brin e la piutscha cotschna. Bundant pli stgars èn la raunetta da plantas, il rustg spendrer e la piutscha crestada alpina. Il vertebrat il pli tipic da la Svizra è il salamander nair – da quel sa chattan la pli gronda populaziun ed il center da ses territori da derasaziun en las Alps svizras. 

En las auas svizras èn da chasa radund 65 spezias e sutspezias da peschs, tranter quellas ina varietad da ferras ch’è unica en tut il mund.

La protecziun da la natira è reglada en la Lescha federala davart la protecziun da la natira e da la patria. Er organisaziuns privatas s’occupan da la protecziun da la natira, uschia per exempel la Pro Natura che tgira bundant 600 territoris natirals protegids d’ina surfatscha totala da bunamain 600 km² u l’Associaziun svizra per la protecziun dals utschels (BirdLife Svizra).

En Svizra existan stgars 20 parcs natirals d’impurtanza naziunala. Il pli enconuschent da quels è bain il Parc Naziunal Svizzer en il chantun Grischun ch’è vegnì fundà il 1914. Dus parcs èn ultra da quai vegnids distinguids sco reservats da biosfera. 165 cuntradas protegidas èn registradas en l’inventari federala da las cuntradas e monuments da la natira da muntada naziunala. 

Dapi il 1987 èn las palids e palids autas protegidas en la constituziun. L’inventari federal correspundent enumerescha bundant 1700 territoris degns da protecziun cun ina surfatscha totala da radund 21 500 hectaras.

L’unitad politica la pli pitschna furman las vischnancas. Er las citads valan sco vischnancas. Il 2018 existivan en Svizra bundant 2200 vischnancas; lur dumber è sa reducì fermamain ils ultims onns pervi da fusiuns da vischnancas.

La pli gronda citad da la Svizra è Turitg cun radund 409 241 abitants, la pli pitschna vischnanca Corippo cun 12 abitants. Ulteriuras citads grondas èn Genevra (200 548), Basilea (171 513), Losanna (138 905), Berna (133 798) e Winterthur (110 912; tuttas indicaziuns: situaziun dal 2017). Las pli grondas citads cun damain che 100 000 abitants èn Lucerna (81 401), Son Gagl (75 522), Lugano (63 494) e Bienna (54 640; tuttas indicaziuns: situaziun dal 2014).

Resguardond er l’aglomeraziun vivan en las pli grondas citads il suandant dumber da persunas (situaziun dal 2014): Turitg 1 315 700, Genevra 570 200, Basilea 537 100, Berna 406 900 e Losanna 402 900.

Las pli grondas vischnancas tenor surfatscha èn Scuol cun 438 kilometers quadrat e Glaruna Sid ch’èn omaduas sa furmadas tras fusiuns. Tranter las pli pitschnas vischnancas, cun mintgamai radund 0,32 kilometers quadrat, tutgan Gottlieben (chantun Turgovia), Kaiserstuhl (chantun Argovia) e Rivaz (chantun Vad).

Il dretg da burgais svizzer sa lascha be acquistar ensemen cun il dretg da burgais d’ina vischnanca e dal chantun. Cumpareglià cun auters pajais ha la Svizra in dretg da burgais restrictiv ed en ils singuls chantuns existan regulaziuns che divergeschan per part ina da l’autra. Tar persunas da l’exteriur che vivan en il pajais na daventan ils uffants che naschan en Svizra betg automaticamain burgais svizzers.

Ils Svizzers che vivan a l’exteriur vegnan magari numnads la ‹tschintgavla Svizra›; questa noziun sa declera or da las quatter regiuns linguisticas da la Svizra. L’onn 2015 vivevan 761 630 burgais svizzers a l’exteriur. 

Dapi l’entschatta dal 20avel tschientaner è il dumber d’abitants creschì sin dapli ch’il dubel: da 3,3 milliuns (1900) sin 8,4 milliuns (2016). En congual cun il 2008 è la creschientscha tschessada levet sin 1,1 %. Las pli autas quotas da creschientscha han ins segnà tranter il 1950 ed il 1970. Ina diminuziun da la populaziun ha be gì lieu il 1918 pervi da la grippa spagnola e durant ils onns da recessiun economica 1975–1977. Il 2012 èn immigradas en tut 148 799 persunas, e 96 494 han bandunà il pajais.

L’onn 1963 era anc vegnida registrada ina cifra da naschientschas da 2,67, silsuenter è questa valur crudada fin il 2001 sin 1,38. Dapi lura hai puspè dà ina leva creschientscha sin 1,5 (2014). 

L’aspectativa da vita ha muntà il 2013 84,8 onns tar las dunnas e 80,5 onns tar ils umens. Tenor las Naziuns unidas ha la Svizra enconuschì tranter il 2010 ed il 2015 la terz auta aspectativa da vita en tut il mund.

La spessezza da la populaziun è en la Bassa cun ca. 450 persunas per kilometer quadrat sin 30 % dal territori statal vaira auta (per las relaziuns svizras). En las Alps ed en il Giura percunter vegnan cuntanschidas valurs fitg bassas; il chantun Grischun dumbra be ca. 27 persunas per kilometer quadrat.

En Svizra vegn fatg la differenza tranter esters (populaziun senza dretg da burgais svizzer) e persunas cun biografia da migraziun (populaziun cun ragischs estras). Il term secondo è usità per esters da la segunda generaziun.

Il 2015 dumbrava la Svizra 2 041 400 esters u 25 % da la populaziun. Dapi l’entschatta dal 19avel tschientaner è la cumpart d’esters adina stada pli auta en Svizra ch’en ils auters pajais europeics. Motivs furman tranter auter las bleras regiuns da cunfin, la posiziun centrala da la Svizra e la pitschna extensiun territoriala dal pajais.

Tar las vischnancas cun la pli auta procentuala d’esters tutgan per exempel Losanna (42 %), Genevra, Täsch (mintgamai 49 %) Spreitenbach, Pregny-Chambésy (mintgamai 52 %), Kreuzlingen (53 %), Paradiso (54 %), Randogne (60 %) e Leysin (61 %).

Tar la populaziun cun biografia da migraziun tutgan las persunas ch’èn immigradas en Svizra sco migrants e da las qualas ils geniturs èn naschids a l’exteriur. Ultra da quai tutgan tiers lur descendenza directa ch’è naschida en Svizra (e che po esser estra ubain natiralisada). Ina persuna cun biografia da migraziun po oramai esser tant burgais svizzer sco er burgais d’in auter stadi. Betg part da la populaziun cun biografia da migraziun fan pia las persunas estras da la terza generaziun sco er Svizzers ch’han almain in genitur ch’è naschì en Svizra. Per la fin da l’onn 2013 ha l’Uffizi federal da statistica eruì entaifer la populaziun residenta a partir da 15 onns ina cumpart da persunas cun biografia da migraziun da 24,8 % (2 374 000 abitants).

L’onn 2014 han 23 765 persunas dumandà asil en Svizra. La gronda part derivan da l’Eritrea, da la Siria, da l’Afghanistan e da Sri Lanka.

Persunas che vivan en Svizra senza permissiun da dimora vegnan numnadas sans-papiers. Tenor in studi da l’Uffizi federal da statistica vegn lur dumber stimà sin ca. 76 000 (situaziun dal 2015).

Tranter il 14avel tschientaner e l’entschatta dal 19avel tschientaner èn blers giuvens umens emigrads per entrar en servetschs da mercenaris (t.a. da l’imperatur, dals retgs franzos u da citads talianas sco Milaun).

En il 17avel tschientaner, suenter la Guerra da trent’onns, han la fom e la povradad manà ad undas d’emigraziun en la Prussia Orientala. A l’entschatta dal 19avel tschientaner, durant e suenter las Guerras da coaliziun, han gì lieu emigraziuns en Russia e durant ils onns da fomaz 1816–1817 surtut en l’America dal Sid. 

Las crisas agraras dals onns 1840, 1870 e 1880 sco er problems structurals durant l’industrialisaziun han manà ad emigraziuns en massa sco anc mai, e quai surtut en l’America. Vers la fin dal 19avel tschientaner ha l’America dal Nord furmà il lieu da destinaziun per bunamain 90 % dals emigrants. Tranter il 1851 ed il 1860 èn radund 50 000 persunas emigradas surmar, ils onns 1860 e 1870 mintgamai 35 000 e tranter il 1881 ed il 1890 bundant 90 000. Fin il 1930 è il dumber d’emigrants per decenni sa stabilì tranter 40 000 e 50 000. En intgins chantuns han las autoritads necessità persunas basegnusas d’emigrar.

En il Nov Mund han ils emigrants fundà colonias, uschia il 1804 Nouvelle Vevay (oz New Vevay) ad Indiana, il 1831 New Switzerland ad Illinois ed il 1845 New Glarus a Wisconsin. Bain il pli enconuschent emigrant svizzer è stà Johann August Sutter, il possessur da gronds bains funsils en la California ch’è vegnì enconuschent sco general Sutter. Sin ses terren è prorutta il 1848 la fevra d’aur da la California.

Tenor datas empiricas è la bilantscha da migraziun dal territori da la Svizra odierna adina stada negativa tranter la mesadad dal 16avel tschientaner e la fin dal 19avel tschientaner.

Oz è la Svizra – sco bunamain tut ils stadis occidentals bainstants – in pajais d’immigraziun. Dal temp da l’industrialisaziun hai dà ina gronda migraziun interna, surtut nà da las Alps. Dapi la gronda creschientscha economica ils onns 1960 han ins recrutà intenziunadamain lavurers esters, pli tard han adina puspè moviments da fugitivs cuntanschì la Svizra per exempel or da l’anteriura Jugoslavia durant las Guerras da la Jugoslavia. 

Las pli grondas gruppas d’esters tenor stadi d’origin han furmà il 2013: Talians (15,4 %), Tudestgs (15,1), Portugais (13,1), Franzos (5,7), Serbs (4,7), Cosovars (4,5), Spagnols (3,9), Tircs (3,6), Macedons (3,2) e Brits (2,1). 13,7 % derivan da l’ulteriura Europa, 6,5 da l’Asia, 4,3 da l’Africa, 4,0 da l’America e 0,3 dals ulteriurs territoris.

Il 2015 han ins natiralisà en Svizra radund 42 700 persunas, surtut da l’Italia, da la Germania, dal Portugal, da la Frantscha e dal Cosovo.

L’artitgel 4 da la Constituziun federala sa cloma: «Las linguas naziunalas èn il tudestg, il franzos, il talian ed il rumantsch.» En l’artitgel 70 hai ultra da quai num: «Las linguas uffizialas da la Confederaziun èn il tudestg, il franzos ed il talian. En il contact cun persunas da lingua rumantscha è er il rumantsch lingua uffiziala da la Confederaziun.»

Las persunas che discurran jenic e jiddic resguarda la Svizra dapi il 1997 en rom da la Charta europeica da las linguas regiunalas u minoritaras sco cuminanzas minoritaras betg territorialas, senza però renconuscher lur linguas sco linguas minoritaras naziunalas.

La Constituziun federala na determinescha nagin territori linguistic. Tenor art. 70 alin. 2 surdat la Confederaziun als chantuns la cumpetenza da determinar lur linguas uffizialas. En quest connex èn els però obligads da respectar la cumposiziun linguistica istorica e da resguardar las minoritads linguisticas tradiziunalas. Tgi ch’arriva d’in’autra part linguistica dal pajais n’ha nagin dretg da pudair far diever en il contact cun las novas autoritads chantunalas e communalas da sia lingua d’origin; ins discurra en quest connex dal princip da territorialitad. Tranter ils chantuns bilings han be Berna ed il Vallais determinà ils territoris linguistics; il chantun Friburg surdat la cumpetenza da reglar las linguas uffizialas a las vischnancas. Uffizialmain bilinguas tenor la constituziun chantunala èn las vischnancas Biel/Bienne, Evilard/Leubringen e Freiburg/Fribourg. Er intginas autras vischnancas, surtut en il conturn da Murten/Morat e da Biel/Bienne porschan ils servetschs e las scolas en duas linguas per tegnair quint da la minoritad da lingua franzosa.

En il chantun Grischun vala tenor art. 16 da la Lescha da linguas la suandanta determinaziun: «Vischnancas cun ina part da commembers d’ina cuminanza linguistica tradiziunala d’almain 40 pertschient valan sco vischnancas monolinguas. En questas vischnancas è la lingua tradiziunala la lingua communala uffiziala.» Analog valan vischnancas cun ina cumpart d’ina cuminanza linguistica tradiziunala d’almain 20 pertschient sco vischnancas plurilinguas. En questas vischnancas è la lingua tradiziunala ina da las linguas communalas uffizialas. En vischnancas cun ina bassa procentuala da rumantsch sco lingua tradiziunala po quai facticamain muntar ch’il rumantsch è bain lingua uffiziala e da scola, ma ch’i vegn discurrì per gronda part en il mintgadi tudestg svizzer.

Il chantun Tessin definescha sasez sco appartegnent cumplettamain al territori da lingua taliana ed il chantun Giura sco part dal territori da lingua franzosa, e quai cumbain che mintgamai ina vischnanca (Tessin: Bosco/Gurin; Giura: Ederswiler) disponan d’ina maioritad tradiziunala da lingua tudestga.

Tenor la statistica uffiziala dal 2013 è il tudestg cun 64,9 % la lingua la pli derasada. En Svizra tudestga vegnan discurrids divers dialects; sco lingua scritta vegn per ordinari fatg diever dal tudestg da scrittira (cun intginas atgnadads svizras, numnadas helvetissems).

Franzos discurran 22,6 % da la populaziun. Questa part dal pajais vegn numnada Svizra franzosa, Romandia u Suisse romande. Sper il franzos da standard che dominescha en questa regiun, discurra be pli ina fitg pitschna maioritad patois (dialect).

Talian (8,3 %) vegn discurrì en il chantun Tessin, en las quatter valladas dal Grischun dal Sid (Mesauc, Calanca, Bregaglia, Puschlav) sco er a Beiva. Ina gronda part da la populaziun (pli veglia) discurra dialects locals ch’appartegnan al lumbard (‹Ticinées›).

La quarta lingua naziunala, il rumantsch, è derasada en parts dal Grischun e vegn discurrida da be 0,5 % da la populaziun svizra. Praticamain tut las persunas da lingua rumantscha discurran er tudestg. Dapi il 19avel tschientaner è il rumantsch, malgrà diversas mesiras da promoziun, periclità fitg ferm (germanisaziun). Il 1938 – en vista a smanatschas irredentisticas nà da l’Italia faschistica – han ils votants svizzers concedì al rumantsch il status d’ina lingua naziunala. Ed il 1996 è il rumantsch vegnì fixà en la Constituziun federala sco lingua parzialmain uffiziala. Dapi il 1996/2001 dovran la Confederaziun ed il chantun Grischun il Rumantsch Grischun sco lingua da scrittira uffiziala; en las vischnancas è per gronda part en diever in dals tschintg idioms.

Il dumber dals viagiants – tranter ils quals domineschan ils Jenics, sper in dumber bundant pli pitschen da Sinti e Roma – na vegn betg eruì en rom da las dumbraziuns dal pievel. Stimaziuns uffizialas partan d’in dumber da 20 000 fin 35 000. Ils Jenics vivan en l’entir pajais e discurran sper lur lingua interna jenic per ordinari ina da las linguas naziunalas. 

La lingua jiddica (jiddic dal vest) enconuscha en Svizra ina lunga tradiziun en ils vitgs dal Surbtal Endingen e Lengnau (pervi da las cuminanzas gidieuas ch’èn per part sa mantegnidas là fin oz). Ina tradiziun pli giuvna ha la lingua jiddica (jiddic da l’ost) en la citad da Turitg, nua che quella vegn discurrida en circuls ultraortodoxs.

Pervi da l’immigraziun discurran en il fratemp 9 % dals abitants in’autra lingua che las linguas naziunalas. La pli derasada da quellas è il serbocroat cun 1,5 %.

Sco linguas estras emprend’ins en scola ina segunda lingua naziunala e l’englais. I dat adina puspè discussiuns, schebain l’englais duaja vegnir instruì suenter, ensemen u avant la segunda lingua naziunala. Pervi da protestas or da las autras regiuns linguisticas ed a basa da ponderaziuns da princip areguard la coesiun naziunala na vegn instruì nagliur englais senza ina segunda lingua naziunala.

Da la populaziun sur 15 onns eran il 2014 tenor l’Uffizi federal da statistica 37,9 % catolic-romans, 25,5 % evangelic-refurmads, 23 % senza confessiun, 5,7 % commembers d’in’autra cuminanza cristiana (baselgias independentas, vegl catolics ed ortodoxs), 5,1 % muslims, 1,6 % commembers d’autras cuminanzas religiusas (tranter quels 0,2 % Gidieus) ed 1,2 % n’han fatg naginas indicaziuns.

Tenor in studi dal Pew Research Center da l’onn 2017 considereschan 75 % da la populaziun svizra maiorenna sasezs sco cristians – independentamain da la dumonda sch’els appartegnan uffizialmain, p.ex. cun pajar taglia da baselgia, ad ina confessiun cristiana u betg. Ma be 27 % dals cristians frequentan almain ina giada il mais in servetsch divin. 21 % dals intervistads sa sentivan liads a nagina religiun; da quels ha stgars la mesadad considerà sasezs sco ateists.

La libertad da cretta è fixada en la constituziun sco dretg fundamental. Igl è surlaschà als chantuns, schebain els vulan surdar a singulas cuminanzas religiusas il status sco corporaziun da dretg public ed uschia sco baselgias chantunalas. En la gronda part dals chantuns han la baselgia catolic-romana e la baselgia evangelic-refurmada quest status, en blers chantuns supplementarmain la baselgia vegl catolica ed en intgins er la cuminanza gidieua. La baselgia vegl catolica (u cristcatolica) è be da muntada en parts da la Svizra dal Nordvest. En ils chantuns Genevra e Neuschatel na datti naginas baselgias chantunalas, perquai che stadi e baselgia èn separads là dal tuttafatg; ellas èn però renconuschidas sco «organisaziuns d’interess public».

Cun 0,33 è il budissem represchentà en Svizra pli ferm ch’en auters pajais da l’Europa. Sinagogas, moscheas e tempels budistics existan en plirs lieus en Svizra. Che la convivenza religiusa è però magari er segnada d’ina tenuta sceptica mussa il fatg ch’ils votants svizzers han acceptà il 2009 l’iniziativa cunter la construcziun da novs minarets ch’era vegnida lantschada da la Partida populara svizra (PPS).

Istoricamain eran ils abitants dals chantuns Turitg, Berna, Basilea (cun excepziun dal district Arlesheim), Schaffusa, Appenzell Dadora e Vad anc vers il 1850 quasi cumplettamain refurmads; ils abitants dals chantuns Friburg (senza il district Murten), Vallais, Giura, Soloturn (senza il district Bucheggberg), Lucerna, Sur- e Sutsilvania, Uri, Sviz, Zug, Appenzell Dadens e Tessin quasi dal tuttafatg catolics. Confessiunalmain paritetics eran percunter ils chantuns Glaruna, Argovia, Son Gagl, Grischun e Genevra. La repartiziun da las confessiuns è stada il resultat da l’applicaziun dal princip da territorialitad tar l’elecziun da la confessiun suenter las guerras confessiunalas dal 16avel tschientaner; ils chantuns paritetics enconuschevan ubain cunfins chantunals vaira giuvens (Argovia, Son Gagl, Genevra), ubain avevan enconuschì da vegl ennà ina decisiun da vischnanca tar vischnanca en dumondas confessiunalas (Glaruna, Grischun). Er entaifer ils chantuns da duas confessiuns furmavan però lieus paritetics – pia la preschientscha dad omaduas confessiuns en il medem vitg – l’excepziun; ina tala paritad locala valeva en il Toggenburg, en parts dals anteriurs territoris subdits da la Confederaziun (Turgovia, Echallens) sco er en intginas vischnancas dals chantuns Grischun e Glaruna.

Il 1919 han ins manà tras en il Vorarlberg ina votaziun dal pievel areguard la dumonda sch’ins veglia prender si contractivas cun la Confederaziun svizra per daventar commembra da quella. Cumbain che bundant 80 % dals votants han approvà la dumonda da votaziun, èn las ulteriuras contractivas idas ad aua pervi da la resistenza dals refurmads en Svizra: Tras in ulteriur chantun catolic avessan quels pers la maioritad ch’els possedevan da quel temp.

Sco patrun da la Svizra vala Clau da Flia. 

Il territori da la Svizra odierna è populà dapi il temp paleolitic. Fastizs da la Cultura magdaleniana èn per exempel vegnids a la glisch en il Kesslerloch sper Thayngen. Pir suenter l’ultim temp da glatsch, l’uschenumnada glazialisaziun da Würm, è la Svizra Bassa – surtut ils territoris enturn ils lais – vegnida colonisada pli spess tras palissaders. Cun il cumenzament dal temp da fier è suandada la colonisaziun celtica da la Bassa. Chats sper La Tène en il chantun Neuschatel han dà a l’entira perioda dal temp da fier pli nov ses num. Ils Celts han tgirà relaziuns commerzialas fin en l’intschess cultural grec.

Avant la conquista tras ils Romans vivevan tenor Julius Caesar (‹De bello Gallico›) en il territori da la Svizra odierna divers pievels e sterpas da Celts: ils Helvets (en la Bassa), ils Leponts (en il Tessin), ils Seduns (en il Vallais ed al Lai da Genevra) ed ils Rets (en la Svizra Orientala). En rom da l’expansiun da l’Imperi roman sur las Alps è il territori da la Svizra odierna vegnì integrà fin l’emprim tschientaner a.C. en l’Imperi roman e la populaziun è vegnida romanisada. Las pli impurtantas citads romanas da la Svizra eran Aventicum (Avenches), Augusta Raurica, Vindonissa (Windisch), Colonia Iulia Equestris (Nyon) e Forum Claudii Vallensium (Martigny). En l’antica tardiva è la Svizra vegnida cristianisada nà da las citads. Emprimas sedias episcopalas han ins endrizzà a Genevra, Augusta Raurica/Basilea, Martigny/Sion, Avenches/Losanna e Cuira.

Suenter il declin da l’Imperi roman han las stirpas germanas dals Burgognais ed Alemans colonisà la Svizra Bassa nà dal nord ed èn sa maschadadas cun la populaziun romanisada. En ils territoris da la Svizra dal Vest e da las valladas alpinas ch’eran colonisads pli ferm dal temp dals Romans, èn sa mantegnidas las linguas romanas (pli tard franzos, rumantsch e talian) ed il cristianissem, entant ch’èn sa derasadas en la Svizra dal Nord idioms germans. Fin l’onn 746 han ils Francs suttamess ils Burgognais ed Alemans uschia che la Svizra è daventada ina part dal Reginavel francon. Tar la spartiziun da quest imperi è il territori da la Svizra vegnì attribuì al Reginavel ostrofrancon, il Sontg Imperi roman da pli tard. Per gronda part appartegneva il territori da la Svizra da quel temp al ducadi da la lingia svabaisa ed al reginavel da la Burgogna. Fin il 9avel tschientaner èn er ils Alemans vegnids cristianisads nà d’impurtants centers claustrals sco Son Gagl u Reichenau.

En l’istorgia tempriva dal Sontg Imperi roman han famiglias aristocraticas or da la Svizra (t.a. ils da Habsburg, Kyburg e Lenzburg) giugà in’impurtanta rolla. Ultra da quai eran ils pass alpins da muntada centrala en connex cun il domini tudestg en l’Italia. Uschia èn er las valladas da la Svizra Centrala stadas suttamessas directamain a l’Imperi, quai ch’ils abitants han considerà sco privilegi.

A partir dal 12avel fin en il 14avel tschientaner ha gì lieu in moviment migratoric d’abitants dal Vallais Sura en vasts territoris alpins en Svizra, en l’Italia dal Nordvest, en il Liechtenstein e l’Austria dal Vest, per part er en la Savoia ed en la Baviera. Quests emigrants han ins pli tard numnà Gualsers. Sur ina lunghezza da radund 300 km existan anc oz en l’artg alpin radund 150 vitgs ch’èn vegnids fundads dals Gualsers. 

L’onn 1291, suenter la mort dal retg tudestg Rudolf I da Habsburg, han ils chantuns d’origin Uri, Sviz e Silvania fatg ina lia per proteger lur «veglias libertads». In document correspundent, l’uschenumnà Patg federal, è datà sin l’entschatta d’avust 1291. Tenor la legenda è questa lia vegnida fatga sin il Rütli. Vers la fin dal 19avel tschientaner han ins fixà il prim d’avust 1291 sco data da fundaziun da la Veglia Confederaziun ed il prim d’avust è daventà il di da la festa naziunala.

La nauscha relaziun tranter ils Confederads ed ils Habsburgais è d’attribuir per ina buna part a l’elecziun dal retg tudestg il november 1314, cura ch’èn vegnids elegids a medem temp Ludivic il Bavarais da la famiglia da Wittelsbach ed il Habsburgais Friedrich il Bel. Ils Confederads èn sa mess sin la vart da Ludivic. Quai ed in’attatga da lur vart sin la claustra da Nossadunnaun ha furmà per Leopold I da l’Austria motiv avunda per far il 1315 ina campagna militara cunter ils Confederads. En la Battaglia da Morgarten (ch’è per part contestada tranter ils istoriografs) dueva quella però prender per el ina nauscha fin. Per pudair mantegnair lur independenza envers Habsburg, èn las citads imperialas Lucerna, Turitg, Glaruna, Zug e Berna s’alliadas en il decurs dal 14avel tschientaner als chantuns d’origin, furmond uschia ils Otg Vegls Lieus confederals. Pir cura che las citads Turitg, Berna e Lucerna han fatg suenter lur adesiun da la Confederaziun l’instrument da lur cooperaziun, ha la lia federala cuntanschì ina muntada politica stabila, la quala è er vegnida tolerada da vart dals centers curtais europeics a Vienna, Paris e Milaun. 

Igl èn suandadas ulteriuras confruntaziuns cun la chasa Habsburg: En rom da las battaglias dal 1386 sper Sempach (la Lumbardia che veseva periclitada ses interess economics tras ils Habsburgais aveva finanzià las armas dals Confederads) e dal 1388 sper Näfels èsi reussì als Confederads da batter armadas da chavaliers habsburgaisas. Il 1415 han els (intimads da l’imperatur Sigismund) conquistà il pajais d’origin dals Habsburgais en l’Argovia. Pervi da l’ierta dal cont da Toggenburg è prorutta tranter la citad da Turitg ed ils ulteriurs Confederads la Veglia Guerra da Turitg (1436–1450), en il decurs da la quala Turitg è s’allià cun ils Habsburgais. Ma la finala è la citad da Turitg stada sfurzada da returnar en la Confederaziun. En rom d’in’ulteriura guerra han ils Habsburgais stuì surlaschar als Confederads la Turgovia; il zercladur 1474, en vista a las smanatschas tras Carl il Temerari da la Burgogna, è duca Sigismund dal Tirol stà necessità d’acceptar la Veglia Confederaziun sco urden statal independent (en rom da l’Accord etern). Sin giavisch da l’imperatur Friedrich III èn ils Confederads tratgs cunter Carl il Temerari ed han destruì, en uniun cun la Lorena e Habsburg, il reginavel da la Burgogna. Berna e Friburg han expandì da quel temp en il Vad, che steva avant sut controlla da la Savoia e Burgogna, ed han conquistà fin il 1536 quest territori dal tuttafatg.

La victoria militara cunter ils Burgognais ha confermà ils Confederads en lur voluntad da mantegnair l’independenza. Per quest motiv èn els s’opponids a la refurma da l’imperi dal retg tudestg ed imperatur da pli tard Maximilian I. L’emprova da Maximilian da subordinar ils Confederads en rom da la Guerra svabaisa è ida a fin il 1499 cun la Pasch da Basilea. Sco consequenza concreta da quest conflict èn Basilea e Schaffusa s’unids il 1501 cun la Confederaziun, la quala è sa sviluppada vinavant als Tredesch Vegls Lieus confederals.

Vitiers èn vegnids ils uschenumnads chantuns alliads, surtut il Vallais e la Republica da las Trais Lias, ma er monarchias sco la prinzi-abazia Son Gagl u il ducadi da Neuschatel. Sco signuradis cumins han ins designà fin il 1798 territoris ch’èn vegnids conquistads da plirs dals Tredesch Vegls Lieus confederals e ch’èn er vegnids administrads communablamain sco chastellanias. Latiers han tranter auter tutgà territoris en ils chantuns odierns Turgovia e Tessin. Ultra da quai possedeva la gronda part dals lieus terras subditas, vul dir regiuns ch’eran politicamain dependentas da quels.

Las victorias en las Guerras da la Burgogna ed en la Guerra svabaisa e lur tactica d’infantaria moderna han manà al bun renum dals guerriers svizzers ed han fatg flurir ils servetschs da mercenaris. En regiuns ruralas da la Svizra Centrala è il mercenariat sa mantegnì fin en il 19avel tschientaner sco impurtant factur economic.

L’expansiun dals Confederads en direcziun da l’Italia dal Nord ha gì lieu cun l’intent da segirar ils pass alpins. Tras quai è la Confederaziun però vegnida involvida en las guerras talianas tranter Habsburg, la Frantscha, Venezia, il papa, la Spagna e differents potentats talians. Da quel temp deriva er la guardia papala che papa Julius II ha fundà il 1506. Fin il 1513 èsi reussì als Confederads da conquistar il Tessin dad oz e la finala schizunt da suttametter Milaun a lur protecturat. Suenter la sconfitta cunter la Frantscha en la Battaglia da Marignano il 1515 è la dominanza dals Confederads sur l’Italia dal Nord però ida a fin. Il mitus politic dals Svizzers nunsurventschaivels era vegnì refutà ed a l’intern èn sa mussads adina dapli conflicts politics tranter ils singuls chantuns. Quai ha impedì suenter il 1515 ina politica exteriura efficazia ed igl ha cumenzà la fasa che dueva la finala manar a la politica da neutralitad odierna. Il 1516 han ils Tredesch Vegls Lieus confederals fatg in contract da mercenadi cun la Frantscha ed èn vegnids remunerads persuenter cun pensiuns, privilegis da duana e da commerzi e cun sustegn politic en cas da conflicts interns ed externs. Ultra da quai èn ina gronda part dals territoris situads al sid da las Alps vegnids attribuids definitivamain a la Confederaziun.

La refurmaziun che Ulrich Zwingli ha mess ad ir il 1519 a Turitg è sa derasada en la Svizra Bassa ed ha manà a grondas tensiuns tranter ils differents chantuns. Suenter l’Emprima e la Segunda Guerra da Kappel ha la Segunda pasch publica da Kappel dal 1531 manà natiers in cumpromiss: Turitg, Berna, Basilea, Schaffusa e parts dal Grischun èn restads refurmads; ils chantuns originars, Lucerna, Zug, Soloturn e Friburg èn restads catolics. Il 1541, sut Johannes Calvin, è la refurmaziun sa messa tras a Genevra che dueva daventar tras ses operar la ‹Ruma refurmada›. Malgrà quai hai anc dà il 1656 e 1712 en rom da las Guerras da Villmergen conflicts militars tranter las duas gruppas confessiunalas. Ils zwinglians e calvinists èn s’unids il 1536 al confess helvetic, furmond uschia la baselgia refurmada. Quella dueva sa derasar sur l’Engalterra, la Scozia ed ils Pajais Bass en tut il mund.

En vista als scumbigls e las devastaziuns da la Guerra da trent'onns è la Confederaziun sa decidida il 1647, en rom dal Defensiunal da Wil, per la «neutralitad armada perpetna» ed è sa cuntegnida en las guerras dal 17avel e 18avel tschientaner a moda pli u main neutrala. Ils 24 d’october 1648 han ils chantuns svizzers cuntanschì en la Pasch vestfalica lur independenza dal Sontg Imperi roman, uschia che la Svizra è daventada definitivamain in stadi suveran. 

A l’intern ha la spartiziun confessiunala impedì ina refurma da las allianzas cumplitgadas ed anacronisticas tranter ils Confederads. Surtut ils chantuns-citad han consolidà en il 17avel e 18avel tschientaner lur domini a l’intern en il senn absolutistic ed èn per part sa sviluppads economicamain talmain ferm ch’ins po discurrer d’ina protoindustrialisaziun. Malgrà quai è la Confederaziun restada tut en tut davos ils svilups dal temp e vegn recepida en la litteratura contemporana sco sutsviluppada, senza urden e retardada. Cun quai cuntrastescha la preschentaziun da la Svizra sco idilla alpina, arcadia u lieu d’ina democrazia originara (Rousseau), sco ch’ella dominescha en la litteratura e pictura da l’illuminissem.

Ils 5 da matg 1798 ha la Frantscha revoluziunara conquistà suenter curta resistenza la Veglia Confederaziun ed ha incorporà quella sut il num Republica helvetica en ses territori d’influenza. La Republica helvetica è stada l’emprim stadi modern sin il territori svizzer; cuntrari a la tradiziun era quel organisà a moda fitg centralistica. Las differenzas d’enfin qua tranter territoris subdits e las citads ed ils chantuns regents han ins abolì. Tar las innovaziuns progressivas ch’èn vegnidas introducidas l’emprima giada en Svizra han tutgà l’egualitad giuridica, la creaziun d’in spazi economic e monetar unitar sco er la libertad da cretta e conscienza. Sco stadi satellit franzos è la Republica helvetica però vegnida tratga en ils scumbigls da las Guerras da coaliziun ed è daventada pliras giadas in champ da battaglia. Suenter divers culps da stadi e la suppressiun d’ina revolta armada ha Napoleun Bonaparte puspè decretà il 1803, en furma da l’Acta da mediaziun, ina constituziun federala cun chantuns autonoms. Sco num dal stadi han ins fixà ‹Confederaziun svizra›. Ils anteriurs territoris subdits ed ils chantuns alliads èn vegnids recepids en furma dals novs chantuns Son Gagl, Grischun, Argovia, Turgovia, Tessin e Vad.

Il 1815, en rom dal Congress da Vienna, ha la communitad da stadis renconuschì ils cunfins da la Svizra. Ultra dals 19 chantuns da l’Acta da mediaziun èn anc vegnids vitiers Neuschatel, il Vallais e Genevra; ed al chantun Berna è vegnì attribuì il territori dal prinzi-uvestgieu da Basilea. En la Segunda Pasch da Paris dals 20 da november 1815 han las pussanzas grondas exprimì areguard il territori da la Svizra opiniuns divergentas ed incongruentas, uschia ch’ins è la finala sa cunvegnì a fixar la «neutralitad perpetna armada». Cun la constituziun dal medem onn è la Svizra puspè daventada in stadi federativ, uschia che l’epoca da la restauraziun ch’è suandada è stada sut l’ensaina d’in’autonomia chantunala bundant pli gronda che durant l’èra napoleonica. Il Chantun Giura dueva la finala pir sa furmar il 1979 or dal moviment separatistic d’ina part dal territori ch’era vegnì attribuì il 1815 al chantun Berna.

Tranter ils chantuns da tenuta liberala e progressiva ed ils chantuns catolic-conservativs Lucerna, Sviz, Uri, Zug, Sur- e Sutsilvania, Friburg e Vallais èn proruts, surtut en la perioda da la regeneraziun dapi il 1830, conflicts adina pli violents che duevan la finala manar il 1847 a la Guerra da la Lia separatista. La guerra civila ha cumenzà ils 3 da november ed è ida a fin ils 29 da november 1847, cura ch’il Vallais è sa surdà sco ultim chantun catolic-conservativ. Tenor indicaziuns uffizialas ha la guerra custà la vita a 150 persunas; 400 ulteriuras èn vegnidas blessadas. Igl è quai stà fin oz l’ultim conflict militar sin terren svizzer.

Suenter la sconfitta dals chantuns catolic-conservativs en la Guerra da la Lia separatista è la Svizra vegnida transfurmada en il stadi federal modern. La Constituziun federala dal 1848 ha limità l’autonomia dals chantuns, e Berna è daventà la sedia da las autoritads federalas e dal parlament. Dapi lura han gì lieu duas revisiuns totalas da la Constituziun federala, numnadamain il 1874 ed il 1999.

Ils emprims 25 onns da si’existenza ha il giuven stadi federal stuì eleger quatter giadas in general pervi da smanatschas guerrilas. Al general Guillaume Henri Dufour – ch’aveva agì a moda prudenta durant la Guerra da la Lia separatista – ha l’Assamblea federala puspè surdà il commando suprem da l’armada ils onns 1849 (Affera da Büsingen), 1856 (Affera da Neuschatel) e 1859 (Affera da la Savoia). General Hans Herzog è stà responsabel durant la Guerra tudestg-franzosa dal 1870/71 per la protecziun dals cunfins svizzers. Il favrer 1871 han radund 87 000 schuldads franzos da l’armada da Bourbaki ch’era vegnida abattida traversà sut la surveglianza da l’armada svizra en ils chantuns Neuschatel e Vad ils cunfins svizzers ed èn vegnids internads.

Sin iniziativa da Henry Dunant aveva gia gì lieu il 1864 a Genevra la fundaziun dal Comité internaziunal da la Crusch Cotschna (CICC).

Il 1866 han ins concedì als Gidieus svizzers ils dretgs da burgais cumplains e la libertad da domicil en l’entira Svizra. La libertad da cretta cumpletta è però pir suandada en rom da la revisiun da la constituziun il 1874.

Durant la segunda mesadad dal 19avel tschientaner ha ina gronda unda d’industrialisaziun e da construcziun da viafiers tschiffà la Svizra. Sco politicher, manader da l’economia ed impressari da viafier ha surtut Alfred Escher gì da quel temp grond’influenza sin il svilup politic ed economic dal pajais. 

A moda adina pli evidenta èn er sa mussadas las varts sumbrivaunas da l’industrialisaziun, per exempel en furma da la lavur d’uffants. Sco emprims chantuns han Glaruna e Turitg relaschà leschas da fabrica per proteger ils lavurants. Il 1877 ha la Confederaziun surpiglià la cumpetenza da legislaziun correspundenta per cumbatter a nivel naziunal las pli grondas incunvegnientschas.

Sin champ religius e cultural ha la confruntaziun tranter il liberalissem ed il conservatissem chattà sia cuntinuaziun en furma dal cumbat cultural. L’integraziun dals catolics en il nov stadi federal è la finala suandada il 1891 cun l’elecziun da Josef Zemp sco emprim commember catolic-conservativ dal Cussegl federal. Avant era il gremi stà occupà dapi la fundaziun dal stadi federal exclusivamain cun represchentants dals liberals. Dapi lura èn las partidas burgaisas sa posiziunadas per ordinari sco bloc serrà cunter il moviment da lavurants. En rom da la Chauma generala dal 1918 hai dà la confruntaziun la pli critica tranter ils lavurants e la burgaisia en Svizra. Pir suenter l’introducziun da l’elecziun tenor il sistem da proporz il 1919 ha il moviment da lavurants pudì s’etablir en la politica naziunala. En rom da las elecziuns dal Cussegl naziunal l’onn 1943 è la partida socialdemocratica da la Svizra daventada la pli ferma fracziun insumma. Sinaquai è Ernst Nobs vegnì elegì sco emprim socialdemocrat en il Cussegl federal. Cun l’introducziun da l’Assicuranza per vegls e survivents (AVS) è s’accumplida il 1948 in’ulteriura pretensiun da la Chauma generala.

Durant l’Emprima Guerra mundiala ha la Svizra mantegnì la neutralitad armada. Sut general Ulrich Wille èn vegnids occupads ils cunfins.

Il 1923 han la Svizra ed il Principadi da Liechtenstein segnà il contract da duana ch’è en vigur fin oz.

Il 1937 èn las organisaziuns da patruns e da lavurants en l’industria da metal e dad uras sa cunvegnids a la pasch sociala ed a contracts collectivs da lavur. Dapi lura datti be darar chaumas en Svizra. 

Suenter ch’è prorutta il 1939 la Segunda Guerra mundiala è la Svizra danovamain sa referida a la neutralitad armada ed ha ordinà la mobilisaziun generala da l’armada sut il schefcumandant general Henri Guisan. Sin in’eventuala attatga tudestga vuleva l’armada svizra respunder cun sa retrair en il réduit e far resistenza nà da posiziuns situadas en la muntogna. A la populaziun è vegnida intermediada en furma da la Defensiun naziunala spiertala la voluntad da far resistenza.

Durant il temp dal naziunalsocialissem ha la Svizra bain recepì in tschert temp fugitivs, ma ha alura cumenzà a renviar intenziunadamain Gidieus e surtut persunas che valevan sco fugitivs politics. Sco reacziun sin quai è il cusseglier naziunal David Farbstein sa retratg il 1938. La fin d’avust 1938 ha la Svizra smanatschà da desdir la cunvegna che pussibilitava dapi il 1926 da traversar ils cunfins senza visum e la quala vegniva er applitgada dapi l’annexiun sin il territori da l’Austria. Per che persunas «da sang tudestg» possian er entrar en avegnir en Svizra senza visum, èn ins sa cunvegnids la fin da settember 1938 da marcar spezialmain ils pass dals Gidieus. Pass cun in bul dals Gidieus eran be valaivels sch’igl era vegnì concedì oravant in visum da dimora u da transit. Blers fugitivs han ins tramess enavos als cunfins; intgins han ins schizunt mess a ferm e surdà a las autoritads tudestgas. Il pli tard dapi il cumenzament da la guerra èn ils fugitivs ch’ins ha laschà entrar en il pajais vegnids internads en champs. En ils champs da concentraziun dals nazis han er patì tranter il 1933 ed il 1945 radund 1000 burgais svizzers, almain 200 dad els èn vegnids per la vita. Nagin conflict violent dals ultims 200 onns ha pretendì dapli unfrendas svizras.

Acts omosexuals han ins legalisà en Svizra il 1942.

En il suenterguerra han ins elavurà ulteriuras tematicas problematicas sco la persecuziun dals Jenics en rom dal program ‹Uffants da la via›, la problematica dals uffants plazzads, dals plazzaments administrativs, da la sterilisaziun sfurzada, las relaziuns economicas da la Svizra cun l’Africa dal Sid dal temp da l’apartheid ubain la rolla da las bancas svizras en connex cun daners transfugids da dictaturs dal Terz Mund. La fin dals onns 1990 è prorut in conflict en connex cun indemnisaziuns per facultads gidieuas dals onns 1933 fin 1945 ch’eran ids a perder tar bancas svizras. La rolla da la Svizra en la Segunda Guerra mundiala è vegnida elavurada a moda critica en rom dal Rapport da Bergier.

L’onn 1960 è la Svizra daventada commembra da l’Associaziun europeica da commerzi liber. Ed il 1961 è ella stada in commember da fundaziun da l’Organisaziun da cooperaziun e svilup economic en Europa. Suenter pli lungas debattas a l’intern dal pajais – surtut en connex cun la dumonda da la neutralitad – è la Svizra daventada il 1963 commembra dal Cussegl da l'Europa ed ha ratifitgà il 1974 la Convenziun europeica dals dretgs umans. Il 1970 ha il Cussegl federal fatg emprims pass d’avischinaziun a la Communitad economica europeica; da quels è resortida il 1972 ina convenziun da commerzi liber. Suenter in cumbat da plirs decennis han ils votants approvà il 1971 il dretg da votar da las dunnas. Il 1973 è suandada l’adesiun a l’Organisaziun per la segirezza e la cooperaziun en l'Europa.

Il 1969 e 1970 è la Svizra stada pertutgada da trais attatgas da terror cunter l’aviatica. Tut en tut èn mortas 51 persunas e la Swissair ha pers dus aviuns.

La dumonda dal Giura ha medemamain occupà la Svizra sur decennis. La finala è sa constituì il 1979 il nov Chantun Giura or dals anteriurs districts bernais da lingua franzosa Delémont, Ajoie e Franches-Montagnes.

Sco emprima dunna è Elisabeth Kopp vegnida elegida il 1984 en il Cussegl federal.

L’armada ha giudì fin en ils onns 1990 in ferm sustegn en la populaziun. Sco armada da milissa eran las structuras dals caders directivs civils e militars entretschads fitg ferm. Gia a partir dals onns 1970 e surtut en connex cun l’iniziativa per la dismessa da l’armada che la Gruppa per ina Svizra senz’armada ha lantschà il 1989 hai alura dà tensiuns tranter tradiziunalists e vuschs criticas areguard la rolla da l’armada entaifer la societad. Suenter la fin da la Guerra fraida è l’influenza da l’armada svizra sin la societad civila sa diminuida fermamain.

L’adesiun al Spazi economic europeic che la regenza aveva prendì en mira, ha fatg naufragi tar la votaziun dal pievel dals 6 da december 1992. Suenter il 1999 ha il pievel svizzer approvà pliras cunvegnas bilateralas cun l’Uniun europeica. E suenter ch’ina emprima votaziun aveva fatg naufragi il 1986 è la Svizra daventada ils 10 da settember 2002 commembra da las Naziuns unidas.

Il num dal pajais ‹Svizra› è collià en sia versiun tudestga ‹Schweiz› cun il num dal lieu e dal Chantun Sviz. En las guerras dals vegls Confederads cunter ils Habsburgais han las truppas da Sviz giugà in’impurtanta rolla. Ils da Sviz èn ultra da quai stads da grond’impurtanza en connex cun ils servetschs da mercenari europeics. Suenter la Battaglia da Sempach il 1386 è il num ‹Swiz› u ‹Sweiz› daventà legendar. Ils cronists tudestgs han uss duvrà questa denominaziun per tut ils Confederads. L’emprima cumprova en scrit furma in document da dretg dal retg Sigismund da l’onn 1415, en il qual vegn discurrì dals «Schweizer».

A partir da la Guerra svebaisa l’onn 1499 han ils Confederads che vegnivan insultads da «Schweizer» cumenzà or d’ina luschezza stinada a duvrar sezs quest num. Uffizialmain han els però cuntinuà a duvrar la noziun Confederads (‹Eidgenossen›). Pir en il 18avel tschientaner ha il cronist Johannes von Müller introducì la noziun ‹schweizerische Eidgenossen›. Il 1803 han ins duvrà quella uffizialmain en l’Acta da mediaziun.

Il num latin da la Svizra, ‹Confoederatio Helvetica›, sa referescha a la stirpa celtica antica dals Helvets, ils quals vivevan en la Svizra Bassa ed en parts da la Germania dal Sid dad oz.

Suenter la fin da la Veglia Confederaziun l’onn 1798 ha la Frantscha numnà il stadi satellit confurm a la pratica ‹Republica helvetica›. Cura che la Svizra è sa constituida da nova il 1803 sco stadi federal han ins recurrì a la denominaziun Confederaziun svizra (‹Schweizerische Eidgenossenschaft›) per sa cunfinar da la Republica helvetica centralistica e politicamain instabila. L’expressiun ‹Confoederatio Helvetica› è vegnida introducida il 1848 a chaschun da la fundaziun dal stadi federal. Quella vegn applitgada dapi il 1879 sin las munaidas svizras e sa chatta dapi il 1948 sin il sigil da la Confederaziun; medemamain furma el la basa da l’abreviaziun u sigla ‹CH›. Sco num uffizial dal pajais han ins fixà en la Constituziun federala dal 1848 ‹Confederaziun svizra›.

En tschertas linguas vegnan duvradas sco num dal pajais per la Svizra noziuns che na derivan betg da ‹Schweiz›, mabain da ‹Helvetia›. Uschia per exempel en irlandais (an Eilvéis), grec (Ελβετία, Elvetia) e rumen (Elveţia).

Tar ils mitus naziunals da la Svizra sa tracti d’ina retscha da mitus politics e da legendas ch’han marcà la schientscha naziunala svizra e ch’han, grazia a lur funcziun d’identificaziun, contribuì a moda decisiva a furmar la coesiun naziunala, surtut suenter la fundaziun dal stadi federal l’onn 1848. Als mitus naziunals appartegnan tranter auter las suandantas persunas ed eveniments:

La Svizra è segnada dal maletg da sasez sco naziun fundada sin la voluntad politica. L’identitad naziunala na sa basa betg sin ina lingua e cultura communabla, mabain tranter auter sin l’istorgia communabla, mitus communabels, la tradiziun federalistica e directdemocratica sco er per part sin il sentiment da furmar sco stadi pitschen neutral e pluriling in cas spezial en l’Europa. 

A basa da questas premissas è sa sviluppà in sistem politic ch’è unic en sia totalitad, segnà dal federalissem, da vasts dretgs dal pievel resp. d’elements da la democrazia directa, da la neutralitad vers anora e dal consens politic a l’intern dal pajais.

La Svizra è in stadi federal che sa basa sin ina constituziun republicana. D’autras republicas sa differenziescha il pajais tras

Sco usità en democrazias è la pussanza statala repartida sin trais instanzas:

Ina dretgira constituziunala sco en auters pajais n’enconuscha la Svizra betg, ma tuttas dretgiras han la cumpetenza d’exequir en tscherts terms ina giurisdicziun constituziunala. Per il Tribunal federal e las ulteriuras dretgiras èn tenor art. 190 da la Constituziun federala las leschas federalas liantas; ellas na pon betg abrogar u annullar quellas u refusar lur applicaziun.

Il budget da stadi ha cumpiglià il 2016 expensas en l’autezza da 213,4 milliardas dollars ed entradas en l’autezza da 215,9 milliardas dollars. Da quai resulta in avanzament dal preventiv en l’autezza da 0,1 % dal product naziunal brut.

Ils daivets statals han muntà il 2016 45,4 % dal product naziunal brut. 

Il 2006 ha la cumpart da las expensas en il sectur da la sanadad muntà a 10,8 % dal product naziunal brut, en la furmaziun a 5,8 % (2005) ed en il militar a 1,0 % (2005).

Ils retgavs dal 2016 en l’autezza da 67,01 milliardas francs derivan da la taglia sin la plivalur (34 %), da la taglia federala directa (31 %), da la taglia anticipada (8 %), da la taglia sin il petroli (7 %), da la taglia sin il tubac (3 %), da la taxa da bul (3 %), d’ulteriuras entradas fiscalas (8 %) e d’entradas betg fiscalas (7 %).

La Confederaziun ha impundì il 2016 expensas en l’autezza da 66,26 milliardas francs per ils suandants secturs: bainstar social (34 %), finanzas e taglias (14 %), traffic (14 %), furmaziun e perscrutaziun (11 %), defensiun naziunala (7 %), agricultura ed alimentaziun (6 %), relaziuns cun l’exteriur (5 %) ed ulteriuras expensas (10 %).

Las entradas cumuladas dals 26 chantuns han muntà il 2016 89,6 milliardas francs.

La Svizra enconuscha in vast spectrum da partidas organisadas a nivel regiunal, chantunal e naziunal. Las partidas cun ils pli blers electurs èn per ordinari represchentadas en la regenza. Las pli grondas partidas (situaziun dal 2015) èn: Partida populara svizra (PPS), Partida socialdemocratica da la Svizra (PS), Partida liberaldemocratica svizra (PLD), Partida cristiandemocratica svizra (PCD).

Tenor ina retschertga demoscopica dal 2016 han 19 % dals interrogads inditgà d’avair fidanza en lur politichers. En cumparegliaziun cun autras gruppas da professiun è quai bain ina valur plitost bassa, ma la confidenza è bundant pli auta ch’en la media da l’Europa dal Vest che munta a 13 %.

En l’index da democrazia dal 2016 sa chatta la Svizra sin plaz 8 da 167.

La Svizra consista da 26 chantuns (avant la revisiun totala da la Constituziun federala dal 1999: da 23 chantuns, dals quals trais eran mintgamai dividids en dus mez chantuns). Tradiziunalmain vegnan ils chantuns er numnads stans ed a nivel chantunal per part er stadi (franzos: état).

Las regenzas chantunalas han num, tut tenor chantun, Regierungsrat, Regierung, Staatsrat, Standeskommission, Conseil exécutif, Conseil d’État, Consiglio di Stato, Governo u Regenza. Ils parlaments chantunals èn organisads sco parlaments d’ina chombra e sa numnan Kantonsrat, Grosser Rat, Landrat, Grand Conseil, Gran Consiglio u Cussegl grond. 

Il nivel administrativ tranter chantun e vischnanca vegn – là nua che quel exista insumma – numnà en la gronda part dals chantuns Bezirk Verwaltungsregion, Verwaltungskreis, Wahlkreis, Amtei, Amt, district, distretto, regione u regiun. 

Pervi dal federalissem giascha en Svizra la cumpetenza per bleras incumbensas statalas per part u dal tuttafatg tar ils chantuns. Quai vala per exempel per ils fatgs da scola, da sanadad, da finanzas, da polizia e da giustia sco er en il dretg administrativ. Per dumagnar questas incumbensas a moda effizienta e tenor criteris unitars, han ils chantuns fatg numerus concordats interchantunals. Tut ils chantuns appartegnan ultra da quai ad ina da las tschintg conferenzas regiunalas che servan al stgomi d’infurmaziuns vicendaivel, a coordinar l’activitad guvernativa e sco gremi per represchentar a moda efficazia ils interess dals chantuns envers la Confederaziun. Ultra da quai collavuran ils chantuns en rom da las differentas conferenzas da directurs (p.ex. la Conferenza svizra da las directuras e dals directurs chantunals da l’educaziun publica u la Conferenza svizra da las directuras e dals directurs chantunals da sanadad). Ils secretariats da questas conferenzas sa chattan en la Chasa dals chantuns a Berna.

Büsingen am Hochrhein sco er Campione d'Italia èn enclavas situadas en Svizra. La vischnanca tudestga Büsingen è circumdada en il nord dal Rain dal chantun Schaffusa, en il sid cunfinescha ella cun ils chantuns Turitg e Turgovia. La vischnanca taliana Campione sa chatta al Lai da Lugano entaifer il chantun Tessin.

Sur lung temp ha la vischnanca taliana da Livigno furmà in’enclava funcziunala. Dapi ch’ins ha erigì ina via da pass è il vitg er accessibel nà da l’Italia. 

La vischnanca da Samnaun è stada sur lung temp in’exclava funcziunala, damai che la via d’access manava fin il 1912 sur territori statal da l’Austria. Oz furma la vischnanca in’exclava da duana. 

Areguard la politica exteriura considerescha la Svizra sasezza sco neutrala, vul dir ch’ella na sa participescha betg a guerras tranter stadis. La neutralitad svizra è vegnida renconuschida il 1815 en rom dal Congress da Vienna. Ella è permanenta ed armada ed è er oz anc renconuschida explicitamain a nivel internaziunal.

La Svizra è commembra da bleras organisaziuns internaziunalas. Sco in dals ultims pajais è la Svizra daventada il 2002 commembra da las Naziuns unidas; a medem temp ha ella però er furmà l’emprim pajais, en il qual il pievel ha dastgà votar davart l’adesiun. Daspera s’engascha la Svizra en l’Organisaziun per la segirezza e la cooperaziun en l'Europa, en il Cussegl da l'Europa ed en l’Associaziun europeica da commerzi liber. La Svizra sa participescha al Partenadi per la pasch da la NATO ed ha er ratifitgà il Protocol da Kyoto. En pli è la Svizra commembra en il Cussegl dals dretgs umans da las Naziuns unidas. La Svizra è in commember fundatur tant da l’Agenzia spaziala europeica (ASE/ESA) sco er da l’Organisaziun europeica per la perscrutaziun nucleara (CERN); a Genevra sa chatta er l’implant da perscrutaziun dal CERN. Medemamain è la Svizra commembra da la Cunvegna da Schengen.

La Svizra è ni commembra da l’Uniun europeica ni dal Spazi economic europeic; percunter existan impurtants contracts bilaterals tranter la Svizra e l’Uniun europeica. In’adesiun a la NATO na fiss betg cumpatibla cun la neutralitad svizra.

Las relaziuns tranter la Svizra ed il Principadi da Liechtenstein vegnan regladas dapi il 1923 en in contract da duana.

Suenter che l’Austria aveva pers l’Emprima Guerra mundiala e la monarchia austriaca era dada dapart, ha prinzi Johann II schlià il 1919 il contract da duana dal 1852 cun l’Austria ed è sa stentà da s’avischinar a la Svizra. Dapi ch’ils dus stadis han segnà il contract da duana dal 1923 tutga il Principadi tar il territori da duana da la Svizra e la valuta dal pajais è il franc svizzer. In contract monetar uffizial cun la Svizra ha il Liechtenstein però pir fatg il 1980. Il contract da duana garantescha vinavant la cumplaina suveranitad dal prinzi da Liechtenstein. Tras il contract regia fin oz in stretg partenadi tranter ils dus pajais.

En la politica exteriura da la Svizra han ils buns servetschs ina lunga tradiziun. Sper ils mandats da protecziun giogan quels ina rolla centrala en la politica da pasch da la Svizra. Ils buns servetschs na sa limiteschan ozendi betg a metter a disposiziun a las partidas da conflict il territori statal per las contractivas, mabain muntan adina puspè che la Svizra surpiglia la rolla da mediatura en il conflict.

Da tgirar interess esters sco pussanza protectura furma in element classic dals buns servetschs, il qual è stà en il decurs da l’istorgia da gronda muntada per la Svizra. Ils origins da questa tradiziun sco pussanza protectura tanschan enavos fin en il 19avel tschientaner. En la Guerra tranter la Germania e la Frantscha ils onns 1870/71 ha la Confederaziun represchentà ils interess dal Reginavel da la Baviera e dal Gronducadi Baden en Frantscha. Il fundament per sia reputaziun sco pli impurtanta pussanza da protecziun dal mund ha la Svizra alura tschentà en l’emprima mesadad dal 20avel tschientaner. Gia durant l’Emprima Guerra mundiala ha la Svizra surpiglià 36 mandats da represchentanza dals interess; questa tradiziun dueva culminar durant la Segunda Guerra mundiala ils onns 1943/44 cun 219 mandats per 35 stadis. Suenter la fin da las acziuns da guerra è il dumber dals mandats sa diminuì rapidamain. Durant la Guerra fraida han puspè divers pajais laschà represchentar lur interess tras la Svizra. Avant la Svezia e l’Austria è la Svizra il pli impurtant pajais per mandats da protecziun; tranter il 1966 ed il 1974 eran quai per ordinari dapli che 20 mandats. Ils motivs principals persuenter èn la gronda experientscha, la posiziun neutrala sco er ina vasta rait da represchentanzas diplomaticas. Actualmain (situaziun dal 2016) represchenta la Svizra ils interess dals Stadis Unids en l’Iran ed ha ultra da quai divers mandats da caracter plitost formal (tranter l’Egipta, l’Iran e la Saudi-Arabia resp. tranter la Russia e la Georgia). Il mandat dals Stadis Unids en l’Iran è percunter in mandat cumplessiv ch’exista dapi il 1980. Quel va enavos sin il rapiment d’ostagis a Teheran ils onns 1979 fin 1981, il qual aveva manà a l’interrupziun da las relaziuns diplomaticas.

Il 2015 han la Cuba ed ils Stadis Unids puspè reprendì relaziuns diplomaticas directas, uschia ch’il mandat da protecziun da la Svizra è ì a fin suenter 54 onns.

Tenor il Global Peace Index è la Svizra stada il 2017 sin il 9avel plaz dals pajais dal mund ils pli segirs (da 163 naziuns).

L’armada svizra consista da las forzas terrestras e da l’aviatica militara. Il budget annual cumpiglia radund 4,874 milliardas francs (situaziun dal 2011). 

La particularitad da las forzas armadas svizra è lur sistem da milissa. Schuldads professiunals e schuldads a contract temporar cumpiglian be 5 % da tut ils militars; tar tut ils auters sa tracti da burgais tranter 20 e 34 onns obligads al servetsch militar. 

L’obligaziun da far servetsch vala per tut ils burgais svizzers masculins. Dunnas pon s’annunziar voluntarmain per il servetsch militar; per ellas valan dapi il 2007 las medemas pretensiuns corporalas sco per umens. Mintg’onn frequentan ca. 20 000 persunas ina scola da recruta da 18 u 21 emnas. Las persunas ch’èn inablas per il servetsch militar prestan servetsch en la protecziun civila e pajan ultra da quai taglia militara. Refusaders dal servetsch militar han la pussaivladad da prestar servetsch civil, uschenavant ch’els fan valair motivs da conscienza ed èn pronts da cumprovar quai cun absolver in e mez giadas tants dis da servetsch sco ils schuldads. Refusa dal servetsch militar per auters motivs (politics u persunals) maina necessariamain ad in process avant il tribunal militar.

Cun la refurma ‹Armada XXI›, ch’è vegnida acceptada tras votaziun dal pievel l’onn 2003, han ins reducì l’effect da 400 000 sin ca. 200 000 schuldads. Da quels fan 120 000 part da furmaziuns activas e 80 000 tutgan tar unitads da reserva.

Tut en tut han gì lieu trais mobilisaziuns generalas per proteger l’integritad e neutralitad da la Svizra. L’emprima giada èn ils schuldads vegnids clamads sut las armas durant la Guerra tranter la Germania e la Frantscha ils onns 1870/71. Sco reacziun sin l’erupziun da l’Emprima Guerra mundiala e per evitar che truppas tudestgas u franzosas marschian tras territori svizzer, è l’armada danovamain vegnida mobilisada ils 3 d’avust 1914. La terza mobilisaziun ha gì lieu il prim da settember 1939 sco reacziun sin l’attatga tudestga sin la Pologna. Henri Guisan è vegnì elegì sco general ed è sa sviluppà durant ils onns da guerra a la figura d’integraziun principala da la Confederaziun ch’era circumdada da las Pussanzas da l’axa. 

Dapi sia fundaziun l’onn 1848 n’è la Svizra odierna anc mai stada confruntada cun attatgas da forzas terrestras ostilas. Durant la Segunda Guerra mundiala hai però dà repetidamain violaziuns dal spazi d’aria tras aviuns da cumbat tudestgs ed alliads. Tar la pli greva attatga èn morts il prim d’avrigl 1944 a Schaffusa 40 persunas e 270 èn vegnidas blessadas per part grevamain.

Damai che la situaziun da smanatscha en l’Europa odierna è sa midada per la Svizra, vegn l’armada adina puspè messa en dumonda. Surtut la Gruppa per ina Svizra senz’armada sa stenta d’abolir quella, fin uss però – en rom da duas votaziuns dal pievel – senza success. A moda cuntraversa vegn er discutada la dumonda, schebain engaschaments da l’armada svizra a l’exteriur, en rom da mesiras per mantegnair la pasch, sajan cumpatibels cun la neutralitad dal pajais.

L’Organisaziun da protecziun civila è vegnida fundada il 1934 ed è suttamessa al Departament federal da defensiun, protecziun da la populaziun e sport. En cas da catastrofa s’occupa quella (sco segunda squadriglia, pia suenter pumpiers, polizia e servetsch da salvament, ma avant l’armada) da la protecziun, la tgira ed il sustegn da la populaziun civila. Ultra da quai è la protecziun civila responsabla per la protecziun da bains culturals, sustegna ils organs directivs a nivel communal e regiunal e restabilescha l’infrastructura da basa.

Il Servetsch federal d’infurmaziun proveda ils purtaders da decisiuns cun infurmaziuns ed avertiments ch’èn relevants per pudair exequir lur incumbensa directiva. Il servetsch è suttamess directamain al chau dal Departament federal da defensiun, protecziun da la populaziun e sport.

Il Corp da guardias da cunfin è responsabel per la protecziun dal cunfin svizzer. Las guardias da cunfin unifurmadas ed armadas fan part da l’Administraziun federala da duana ch’è suttamessa al Departament federal da finanzas. Ils commembers dals Corp da guardias da cunfin èn staziunads als cunfins sco er a las plazzas aviaticas da Turitg, Basel-Mulhouse, Genevra e Lugano-Agno. Els controlleschan il traffic da persunas e da traffic, cumbattan la cuntrabanda, la criminalitad sur ils cunfins e la cuntrabanda da persunas. 

La suveranitad da polizia cumpeta en Svizra als chantuns. Uschia dispona mintga chantun da si’atgna polizia chantunala, citads pli grondas er d’ina polizia da la citad. L’Uffizi federal da polizia (fedpol) fa lavur da coordinaziun tranter las polizias chantunalas sco er envers ils posts da polizia da l’exteriur.

Il numer d’urgenza da la polizia en Svizra è 117. Cun cumponer il numer d’urgenza europeic 112 vegn ins medemamain collià automaticamain cun la centrala operativa da la polizia chantunala respectiva.

L’organisaziun dals fatgs da pumpiers è en emprima lingia chaussa da las vischnancas. En blers chantuns exista per umens creschids e per part er per las dunnas in duair da far servetsch da pumpiers. Adina dapli vegnan però ils pumpiers locals fusiunads a corps da pumpiers regiunals. Ils pumpiers cuntanschan ins en Svizra sut il numer d’urgenza 118.

La Guardia aviatica svizra da salvament (Rega) è organisada sco fundaziun autonoma d’utilitad publica. Ella collavura stretgamain cun la polizia, ils pumpiers e la sanitad. Per acziuns da salvament alpinas è la Rega ina stretga partenaria dal Club alpin svizzer. En il chantun Vallais n’è betg la Rega responsabla per il salvament or da l’aria, mabain Air Glaciers ed Air Zermatt. La Rega è cuntanschibla sut il numer d’urgenza 1414.

La Svizra furma in stadi social cun ina vasta purschida d’assicuranzas socialas obligatoricas. Igl èn quai l’Assicuranza per vegls e survivents (AVS), l’assicuranza da malsauns, l’assicuranza da maternitad, l’assicuranza d’accidents e l’Assicuranza d’invaliditad (AI). 

L’assicuranza da rentas statalas (AVS), la prevenziun professiunala (cassa da pensiun) e la prevenziun privata furman ensemen il princip da las trais pitgas. Per persunas cun activitad da gudogn è ina prevenziun professiunala obligatorica. La prevenziun privata è voluntaria, vegn però promovida fin ina tscherta summa cun in tractament fiscal privilegià.

Daspera exista in urden da cumpensaziun dal gudogn, uschia che militars survegnan durant il servetsch in sold. Obligatorica è er l’Assicuranza cunter la dischoccupaziun.

En Svizra è mintga abitant – independent da sia naziunalitad – obligà da s’assicurar tar ina cassa da malsauns (assicuranza da basa obligatorica per la tgira da malsauns). Tut las cassas da malsauns en Svizra furman manaschis d’economia privata. Quellas èn obligadas da recepir mintga persuna en l’assicuranza fundamentala. 

Per custs da tractament en cas d’accident è mintga emploià assicurà obligatoricamain sur la Lescha federala davart l’assicuranza d’accidents. Er cunter perdita da paja è la gronda part dals emploiads assicurada. Persunas betg emploiadas ston sezzas s’assicurar cunter custs da tractament en cas d’accident.

Il sistem da scola svizzer ha ina structura vaira cumplexa. Pervi dal federalissem n’èn ils fatgs da scola per gronda part betg en ils mauns da la Confederaziun, mabain dals chantuns. Il 2015 aveva la populaziun sur 25 onns frequentà en media 13,4 onns la scola, quai ch’è la pli lunga durada en tut il mund.

Da princip partan la Confederaziun ed ils chantuns la responsabladad per ils fatgs da scola. Surtut en connex cun la scola populara disponan quests ultims d’ina vasta autonomia. Pli e pli sa stentan però er ils chantuns da coordinar lur sistems e purschidas; da quai dattan perditga ils plans d’instrucziun unitars ch’èn en elavuraziun u en diever (p.ex. Plan d’instrucziun 21 per la Svizra tudestga ed il Grischun).

La durada da la scola primara e dal stgalim secundar I cumpiglia per ordinari 9 onns. Suenter la scola obligatorica fa la gronda part dals giuvenils in emprendissadi (per part cun maturitad professiunala); radund 20 % frequentan in gimnasi che maina a la matura.

La Svizra è il stadi depositar da las Convenziuns da Genevra. La cunvegna interguvernamentala furma ina cumponenta essenziala dal dretg internaziunal umanitar.

Cun l’introducziun dal Cudesch penal svizzer l’onn 1942 ha la Svizra abolì la paina da mort en process penals civils. Dapi il 1999 è il scumond da la paina da mort er francà en la Constituziun federala. 

Il 1974 ha la Svizra ratifitgà la Convenziun europeica dals dretgs umans. 

La Svizra enconuscha in Center da cumpetenza per ils dretgs umans ed ina Cumissiun naziunala per la prevenziun da la tortura. Da vart dad Amnesty International vegn per part crititgada la politica d’asil da la Svizra e la pratica d’expulsiun da persunas estras. 

Cun 122 meters per kilometer quadrat dispona la Svizra da la pli spessa rait da viafier dal mund (cun excepziun da stadis pitschens sco il Vatican u Monaco), e quai cumbain che dus terzs dal pajais sa chattan en territori fitg muntagnard e n’attribueschan nagut a quest record. La rait da viafier a binaris normals cumpiglia 3778 km ed è electrifitgada dal tuttafatg. Ils ulteriurs trajects (viafiers a binaris stretgs resp. a binaris lads) han ina lunghezza da 1766 km, dals quals be 30 km n’èn betg electrifitgads. 

La gronda part da las lingias da viafier (3007 km) vegnan gestiunadas da las Viafiers federalas svizras (VFS). Quellas persulas transportan mintg’onn bundant 300 milliuns passagiers. La segund lunga rait da viafier maina l’anteriura Bern-Lötschberg-Simplon-Bahn, oz BLS, (440 km), la terz lunga la Viafier retica (384 km). Daspera datti en Svizra ulteriuras 47 societads da viafier privatas; ils acziunaris principals da quellas èn per ordinari il maun public. Il 2007 è vegnì avert il Tunnel da basa dal Lötschberg ed il 2016 il Tunnel da basa dal Son Gottard che furma il pli lung tunnel dal mund. 

Il 2007 han ils Svizzers fatg in tras l’auter 47 viadis cun il tren e percurrì ina distanza da 2103 km. La Svizra è uschia en tut il mund la naziun che viagia il pli bler cun il tren.

Dapi ils onns 1990 han ins endrizzà pliras viafiers urbanas. Quellas cuvran en il fratemp la gronda part dal traffic a curta distanza che sa splega sin binaris.

La spessa rait da viafier vegn cumplettada tras bus e trams. En bleras regiuns ruralas e muntagnardas furma l’interpresa Auto da Posta la pitga principala dal traffic public. Trams curseschan en sis citads: Basilea, Berna, Genevra, Losanna, Neuschatel e Turitg. Abstrahà da la Skymetro a la plazza aviatica da Turitg dispona Losanna da la suletta metro en Svizra (Métro Lausanne).

La gronda part da la populaziun en la Bassa abita main che 10 km davent da la proxima autostrada. Bleras regiuns da la Svizra ch’èn abitadas main spess èn accessiblas sur vias principalas, ed ultra da quai existan numerusas vias da pass ch’èn per part serradas l’enviern. Tut en tut cumpiglia la rait da vias 71 298 km, da quai èn 1758 autostradas (situaziun dal 2006).

Quant vasta che la rait da traffic publica è, sa mussa en il fatg che radund in tschintgavel da tut ils tegnairchasas svizzers na disponan da nagin agen auto. En las citads s’augmenta questa cumpart a 43 %, quai che vegn er sustegnì dal fatg ch’il carsharing è derasà vastamain en Svizra. 

Per far diever da las autostradas basegna il traffic individual ina vignetta; per camiuns è ultra da quai en vigur dapi il 2001 ina taxa dependenta da la prestaziun.

La Svizra dispona da trais plazzas aviaticas naziunalas e dad indesch plazzas aviaticas regiunalas. Ils pli gronds eroports èn quels da Kloten sper Turitg e da Cointrin sper Genevra; il terz grond è situà sper Basilea sin territori franzos. Impurtantas plazzas aviaticas regiunalas sa chattan a Sion, Berna-Belp, Lugano-Agno, Son Gagl-Altenrhein. La plazza aviatica a Samedan (Engadin Airport) è ina da las pli autsituadas en tut l’Europa.

Fin il 2001 ha la Swissair furmà la societad aviatica naziunala. La successura Swiss è dapi il 2007 ina societad affiliada da la Lufthansa. Ulteriuras societads aviaticas svizras èn t.a. Edelweiss Air e Helvetic Airways. 

Ils sulets ports internaziunals cun access a la mar sa chattan al Rain en e sper Basilea. Ultra da quai gestiuneschan sis societads da navigaziun en tut 44 bastiments d’auta mar che navigheschan sut la bandiera svizra (situaziun dal 2013).

Vitiers vegnan ils ports dals lais interns. Sper il manaschi da navettas sin il Lai da Turitg, Lai da Constanza e Lai dals Quatter Chantuns, sco er l’access a la vischnanca da Quinten al Lai Rivaun, èn quels surtut da muntada per il turissem.

Il sulet traffic da martganzia sin ils lais furma per ordinari il transport da glera. Sin la gronda part dals lais e flums pli gronds curseschan bastiments d’excursiun (per part be la stad). Populars èn surtut ils bastiments a vapur cun tracziun a roda ch’èn vegnids restaurads e che stattan sut protecziun da monuments.

Pervi da la topografia dal pajais existan en Svizra bleras pendicularas e funicularas. Per part servan quellas sco med public a colliar abitadis giud via, per gronda part però al turissem. La staziun dal tren sin il Jungfraujoch è la pli autsituada en tut l’Europa e la pendiculara sin il Pitschen Matterhorn furma la pli auta teleferica en tut l’Europa.

Intgins lieus en la regiun muntagnarda da la Svizra èn accessibels be parzialmain u insumma betg sur vias. Tar ils abitadis che sa laschan cuntanscher be cun viafier u pendiculara tutgan Belalp, Bettmeralp, Braunwald, Fiescheralp, Gimmelwald, Gspon, Landarenca, Lauchernalp, Mürren, Niederrickenbach, Rasa, Riederalp, Schatzalp, Stoos, Wengen, Wirzweli e Zermatt.

SvizraMobil è la rait naziunala dal traffic betg motorisà, surtut per il temp liber ed il turissem. Il traffic betg motorisà cumpiglia il viandar, ir cun velo e velo da muntogna, ir cun inlineskates ed ir cun il canu. Il project è vegnì lantschà il 1998 e cumpiglia differentas spartas sco ‹Svizra – pajais da velos› u ‹La Svizra a pe› che marcheschan vias e rutas e rendan enconuschentas quellas cun agid da chartas ed apps. Il 2017 han ins cumplettà la purschida da SvizraMobil cun activitads d’enviern sco far gitas cun gianellas, sendas d’enviern, passlung e vias da scarsolar.

La Svizra tutga tar ils pajais ils pli bainstants. Cun in product interiur brut da 659 milliardas dollars sa chattava la Svizra l’onn 2016 sin il 20avel plaz da tut las naziuns e mesirà vi dal product interiur brut per persuna (79 242 dollars) schizunt sin il segund plaz. Il Global Competitiveness Report 2017–2018 dal Forum economic mundial ranghescha la Svizra sin l’emprim plaz avant il Singapur ed ils Stadis Unids. L’economia svizra vala sco ina da las pli stabilas en tut il mund. In dals facturs-clav per il success economic da la Svizra furma tranter auter la stabilitad dals pretschs. L’onn 2008 è la chareschia annuala stada cun 2,4 % per l’emprima giada dapi il 1994 sur ina valur da 1,8 %. Percunter tutgan ils custs da viver tar ils pli auts en tut l’Europa (il 2015 63,3 % sur la media europeica). Las citads da Turitg e da Genevra èn vegnidas taxadas il 2016 sco las pli charas en tut il mund.

Il 2013 ha la Svizra dumbrà 4,3 milliuns persunas occupadas. 3,7 % lavuravan en l’agricultura (sectur primar), 23,9 % en l’industria ed il mastergn (sectur secundar) e 72,4 % en il sectur da servetschs (sectur terziar). La quota da dischoccupads ha muntà ils 31 da december 2015 a 3,7 %.

Las marcas ed interpresas las pli custaivlas en Svizra èn (tenor Interbrand): Nescafé (Nestlé), Credit Suisse, UBS e Zurich Insurance Group. Economiesuisse è la pli gronda federaziun tetgala da l’economia svizra; l’Uniun sindicala svizra represchenta ils interess dals sindicats.

Sin il Global Innovation Index che mesira l’abilitad d’innovaziun da singuls pajais figurescha la Svizra sin l’emprim plaz. 

Tenor in studi da la Credit Suisse han ils abitants da la Svizra cun 561 854 dollars la pli auta facultad per persuna en tut il mund (situaziun dal 2016). Mintga dieschavla persuna creschida dispona d’ina facultad en la valur da sur in milliun dollars.

Il franc svizzer (curt fr. u CHF) furma la valuta uffiziala dal pajais. Suenter dollar, euro, glivra e yen tutga il franc svizzer tar las pli impurtantas valutas pli pitschnas.

La Banca naziunala svizra (BNS) maina sco banca centrala independenta la politica monetara da la Confederaziun svizra. Il 2013 disponiva ella da reservas da valutas en l’autezza da 477,4 milliardas francs e d’in effectiv en aur da 35,6 milliardas francs. Fin il favrer 2018 èn las reservas en furmas da devisas schizunt creschidas sin 779 milliardas dollars, uschia che la Svizra dispona da las terz autas reservas da valutas suenter la Republica populara da la China ed il Giapun.

A nivel internaziunal è l’agricultura pauc cumpetitiva, quai tranter auter per ils suandants motivs: las structuras pitschnas (blers manaschis pitschens e mesauns), il terren ch’è per part difficil da cultivar, l’aut nivel da pajas e las perscripziuns severas areguard la tegnida d’animals e la protecziun da la cuntrada. Pli fitg ch’il martgà agrar s’avra (Organisaziun mundiala da commerzi) e pli fitg che l’agricultura en Svizra vegn sut pressiun. La midada da structura da blers manaschis pitschens en las Alps e Prealps vers manaschis gronds en la Bassa perdura dapi decennis. Be tranter il 2000 ed il 2011 è il dumber da las persunas occupadas a temp cumplain en l’agricultura sa sminuì per 23 280 sin 72 715. Il dumber da manaschis è medemamain ì enavos marcantamain, entant che la surfatscha utilisada n’è strusch sa reducida. La Confederaziun sustegna l’agricultura cun meds considerabels (subvenziuns resp. pajaments directs liads a cundiziuns).

En las regiuns muntagnardas domineschan l’allevament da muvel e l’economia da latgiras. En la Bassa percunter prevala la cultivaziun da granezza (ierdi, avaina, seghel e furment), tartuffels, tirc, ravas e ravun. Tut tenor las relaziuns climaticas al lieu vegnan vitiers la pumicultura e la viticultura.

En Svizra dominescha en l’agricultura la producziun integrada. La cultivaziun biologica cumpiglia radund 14,5 % da la surfatscha agricula (situaziun dal 2019) e crescha fitg ferm. Spezias da plantas modifitgadas geneticamain vegnan cultivadas en Svizra be per intents da perscrutaziun.

La Svizra è povra da materias primas; explotads vegnan glera, chaltschina, arschiglia, granit e sal.

En Svizra vegnan elavurads mintg’onn radund tschintg milliuns meters cubic laina. Quai correspunda a ca. dus terzs dal lain utilisabel che crescha suenter mintg’onn. La Svizra importescha dapli laina e products da laina che quai ch’ella exportescha. Mintg’onn vegnan radund sis milliuns meters cubic laina tratgs a niz energeticamain, elavurads a chartun u palpiri e duvrads per far mobiglias u per la construcziun.

In’impurtanta materia prima en Svizra furma la forza idraulica. Las bundant 500 ovras d’accumulaziun ed implants electrics da flums cuvran radund dus terzs dal basegn d’electricitad dal pajais.

L’energia atomara contribuescha en media 39 % da la producziun d’electricitad svizra, l’enviern fin 45 %. Las tschintg ovras atomaras en Svizra han ina prestaziun totala da 3,2 gigawatt; lur disponibilitad annuala munta a radund 90 %.

Las duas raffinarias d’ieli mineral (Cressier e Collombey) èn colliadas cun la rait da conducts d’ieli europeica.

L’interpresa da commerzi e da transport da gas natiral Swissgas organisescha e transporta gas natiral sur la rait europeica. La pli impurtanta pipeline che maina tras la Svizra collia ils Pajais Bass cun l’Italia. Il 2012 èn 41 % dal gas natiral ch’è vegnì duvrà en Svizra vegnids or dals pajais da l’Uniun europeica, 24 % da la Norvegia, 21 % da la Russia ed ils 12 % restants d’ulteriurs pajais.

La gronda part dal product interiur brut deriva dal sectur secundar e terziar. La cumpart da l’industria a la valur agiuntada è sa reducida dapi il 1970 da radund 30 % sin 22 %. La pli gronda diminuziun ha gì lieu ils onns 1973 fin 1979. L’industria da textilias che dominava antruras è quasi svanida dal tuttafatg.

Las interpresas pitschnas e mesaunas (IPM, firmas cun fin a 249 collavuraturs) èn en Svizra da gronda muntada: tar dapli che 99 % da tut las firmas en il pajais sa tracti dad IPM; quellas cumpiglian radund dus terzs da tut las plazzas da lavur.

In’impurtanta rolla giogan firmas grondas internaziunalas en l’industria da maschinas (sco ABB), en l’industria d’alimentaziun (sco Nestlé, Lindt  Sprüngli e Givaudan), en l’industria farmaceutica (sco Novartis e Roche), en l’industria chemica (sco Syngenta) ed en l’industria d’uras e da products da luxus (sco la Swatch Group e Richemont).

Il 2008 ha la cumpart da l’industria a la creaziun da valur cuntanschì en Svizra il nivel da la Germania e surpassà quel dal Giapun. Il motiv è quel che l’industria svizra producescha bains da fitg auta qualitad sco products medicinals, farmaceutica, instruments da precisiun ed uras da luxus. En cifras absolutas è la producziun industriala en Svizra cun radund 100 milliardas dollars bundant pli gronda che quella da la Belgia, da la Norvegia u da la Svezia e sa chatta pli u main sin l’autezza da quella dal Taiwan e dals Pajais Bass. Midà en ina valur per persuna sa chatta la Svizra schizunt sin l’emprim plaz en tut il mund cun radund 12 400 dollars, avant il Giapun cun 8600 dollars e la Germania cun 7700 dollars.

Da las 1 035 000 persunas occupadas en l’industria e la mastergnanza lavuravan il 2013 31,7 % en il sectur da construcziun, 10,4 % en l’industria d’uras e d’instruments da precisiun, 9,6 % en l’elavuraziun da metal, 9,5 % en la construcziun da maschinas e vehichels, 6,8 % en la chemia, 6,4 % en l’alimentaziun, 1,4 % en l’industria da textilias e 24,2 % en l’ulteriura industria.

Il sectur terziar dumbra per lunschor las pli bleras persunas cun activitad da gudogn (72 %). Da grond’impurtanza èn surtut il commerzi, la sanadad e la furmaziun sco er las bancas ed assicuranzas cun UBS, Credit Suisse, Zurich, Swiss Life, Swiss Re e.a. Ils onns suenter il 2000 èn er diversas firmas che fan commerzi cun materias primas sa domiciliadas en Svizra: Vitol, Glencore, Xstrata, Mercuria Energy Group e.a.

Gia dapi radund 150 onns furma il turissem in’impurtanta branscha economica. Facturs ch’han promovì quest svilup èn las Alps, ils blers lais, la posiziun centrala en l’Europa, la politica stabila, la societad segira e la ferma economia. Tar las destinaziuns e regiuns las pli popularas tutgan Turitg, Lucerna, il Grischun, la Part Sura Bernaisa, il Vallais, Genevra, Basilea, il Tessin, la Svizra Orientala e Berna. Il 2013 devi en Svizra 5129 hotels e manaschis da cura cun radund 250 000 letgs e bundant 25 000 abitaziuns da vacanzas e chombras per giasts classifitgadas. En il turissem lavuran radund 210 000 persunas en 167 590 plazzas cumplainas (4 % da tut ils lavurants). Il 2012 han ins registrà 34,8 milliuns pernottaziuns en hotels. Il turissem (be giasts da l’exteriur) sa chattava il 2012 cun 16 milliardas francs (4,6 %) sin il quart plaz da las entradas da l’export. Surtut en las regiuns da muntogna ch’èn economicamain pli flaivlas, furma il turissem in impurtant factur economic. En ils chantuns da muntogna Grischun e Vallais munta la cumpart al product interiur brut fin a 30 %; en l’entira Svizra èn quai 2,6 %.

Il commerzi en detagl domineschan en Svizra ils dus gigants Migros e Coop. Las duas chadainas da commerzi en detagl tudestgas Aldi e Lidl èn cumparidas pir il 2005 resp. 2009 sin il martgà svizzer.

Ils pli impurtants partenaris da commerzi da la Svizra èn la Germania, suandà en l’export dals Stadis Unids, da la Republica populara da la China, da l’India, da la Frantscha e dal Reginavel Unì resp. en l’import dals Stadis Unids, da l’Italia, dal Reginavel Unì, da la Frantscha e da la China (situaziun dal 2017).

Impurtantas exposiziuns ch’han lieu en Svizra èn Art Basel (ina da las pli impurtantas exposiziuns d’art dal mund), Baselworld (la pli impurtanta fiera dad uras e da bischutaria en tut il mund), il Salun d’autos a Genevra (ina da las pli impurtantas exposiziuns d’autos dal mund), l’exposiziun internaziunala d’invenziuns a Genevra sco er exposiziuns da muntada naziunala sco MUBA (Basilea), OLMA (Son Gagl), BEA (Berna) e Züspa (Turitg).

En la rangaziun da la libertad da pressa dal 2017, che vegn edida da Reporters senza cunfins, figurescha la Svizra sin il 7avel plaz da 180 pajais. Las medias en Svizra tutgan pia tranter las pli libras en tut il mund.

Gasettas da muntada surregiunala èn ‹Neue Zürcher Zeitung› (NZZ), ‹Tages-Anzeiger› e ‹Der Bund›. La gasetta dal di cun il pli aut dumber da lecturs è la gasetta da pendularis gratuita ‹20 Minuten› (franzos ‹20 minutes›), suandada da la gasetta da boulevard ‹Blick› e dal ‹Tages-Anzeiger›. En Svizra franzosa exista la gasetta dal di surregiunala ‹Le Temps›. Las gasettas dal di en lingua franzosa cun ils pli blers lecturs èn ‹24 heures› e l’anteriura ediziun stampada da ‹Le Matin›.

Enconuschents magazins emnils èn ‹Die Weltwoche› e ‹Die Wochenzeitung› sco er en lingua franzosa ‹L’Hebdo› e ‹L’illustré›.

Sper numerus emetturs privats furma la Societad svizra da radio e televisiun (SRG SSR) per lunschor la pli gronda interpresa da radio e televisiun en Svizra. Sco emettur da dretg public cumpiglia la concessiun da la SSR programs da radio e televisiun en tut las quatter regiuns linguisticas dal pajais: Schweizer Radio und Fernsehen (SRF), Radio Télévision Suisse (RTS), Radiotelevisione Svizzera (RSI), Radiotelevisiun Svizra Rumantscha (RTR). Las emissiuns da radio da la SRG vegnan finanziadas exclusivamain sur taxas da radio, las emissiuns da televisiun da la SRG sur taxas da televisiun ed entradas da reclama.

Emetturs da radio privats datti en Svizra dapi il 1983. Emetturs da televisiun privats èn surtut activs a nivel regiunal. Daspera giogan – sper las purschidas da dretg public – ils emetturs privats da la Germania, da la Frantscha e da l’Italia mintgamai in’impurtanta rolla en la regiun linguistica respectiva.

Ils trais purschiders da rait Swisscom, Sunrise Communications e Salt Mobile gestiuneschan mintgin in’atgna rait naziunala per telefonia mobila. Quella è vegnida lantschada a ses temp dal monopolist da telefon PTT (l’interpresa antecessura da la Swisscom e da La Posta Svizra). A la rait da natel A (1978) è suandada il 1983 natel B ed il 1987 natel C. Il 1998 è crudà il monopol statal. Tar il pled ‹natel› sa tracti d’in’abreviaziun da ‹Nationales Autotelefon›; quel vegn duvrà fin oz – sco atgnadad svizra – sco sinonim per la telefonia mobila resp. il telefonin/handy.

La liberalisaziun da la posta è vegnida iniziada l’onn 1988. Il 1997 è la PTT sa spartida en dus concerns: La Posta Svizra odierna (incl. Auto da Posta e Postfinance) e la Swisscom ch’ha surpiglià ils servetschs da telecommunicaziun. Il 2013 han ins transfurmà La Posta en ina societad acziunara; ma possessura resta vinavant la Confederaziun – en la rolla d’acziunara che posseda 100 % da las aczias. La participaziun da la Confederaziun a la Swisscom munta a 51,0 %.

La cultura è segnada dals stadis vischins, ma sur ils onns è sa sviluppada in’atgna cultura svizra. Pervi da la sutdivisiun da la Svizra en pliras regiuns culturalas e linguisticas èsi grev da vulair discurrer d’ina cultura svizra unitara. Las trais grondas regiuns linguisticas èn influenzadas fermamain dals pajais vischins respectivs sco er dals pajais anglosaxons. La cultura rumantscha percunter na dispona da nagina retroterra e s’orientescha per gronda part vers la Svizra tudestga.

Ils usits furman in’impurtanta part da la varietad culturala e da l’ierta immateriala da la Svizra. Per ordinari han quels in caracter local resp. regiunal, en singuls cas er surregiunal. La ierta immateriala cumpiglia differentas furmas d’expressiun sco musica, saut, teater, usits, artisanat, industria, en pli praticas socialas e tradiziuns ch’han ina relaziun cun la savida davart la natira e l’ambient. Exempels èn il tschaiver da Basilea, la grafica svizra, il Chalandamarz u la festa da vendemia. Cun ratifitgar il 2008 la Convenziun da l’UNESCO per la preservaziun dal patrimoni cultural immaterial ha la Svizra suttastritgà l’impurtanza da las tradiziuns vivas ed è s’impegnada d’inventarisar e da tgira quellas. La pagina d’internet www.tradiziunsvivas.ch preschenta la cultura immateriala da la Svizra en tut sia varietad, e quai er en versiun rumantscha.

Il di da festa naziunal, fixà en la Constituziun federala, è il prim d’avust. La regulaziun da tut ils auters dis da festa è chaussa dals chantuns; facticamain èn sper il prim d’avust renconuschids be trais ulteriurs dis da festa en l’entira Svizra: Bumaun, Ascensiun e Nadal (emprim di da Nadal). En vastas parts dal pajais vegnan ultra da quai festegiads il venderdi sontg, il glindesdi da Pasca e Son Steffan (segund di da Nadal). La gronda part dals firads han in context religius. Sontgilcrest, Nossadunna d’avust e Numnasontga èn dis da festa en ils chantuns catolics, il firà da Bumaun (2 da schaner) vegn percunter festivà be en ils chantuns protestants. Betg part da l’onn ecclesiastic fa il prim da matg che vala sco di da cumbat dal moviment da lavurants, ma il qual na vegn betg festivà explicitamain en tut las parts dal pajais.

La cuschina svizra collia influenzas da la cuschina tudestga, franzosa e taliana. Ella variescha fitg ferm da regiun tar regiun; las quatter regiuns linguisticas lubeschan in’orientaziun approximativa. Bleras spaisas han er surmuntà ils cunfins locals ed èn daventadas popularas en l’entir pajais.

Enconuschentas tratgas svizras èn fondue, raclette, macaruns d’alp e rösti. Da quest ultim deriva er la noziun ‹foss dal rösti›: en l’ost da quel è il rösti ina da las spaisas naziunalas las pli popularas, en il vest da quel betg. La buglia da Bircher ch’è oz famusa en tut il mund ha il medi svizzer Maximilian Bircher-Benner sviluppà vers il 1900 a Turitg. Toblerone, la tschigulatta da mel, mandlas e nugat, vegn producida dapi bundant tschient onns a Berna e distribuida en dapli che 120 pajais. La servela furma la liongia preferida dals Svizzers. 

Enconuschents en tut il mund èn surtut la tschigulatta ed il chaschiel svizzer. Spezialitads localas èn per exempel ils Basler Läckerli, vermicelles, la pizieuta emplenida da l’Appenzell, Baiser, la turta cun carottas da l’Argovia u la turta cun kirsch da Zug.

Ina bavronda fitg derasada en Svizra è Rivella che vegn producì en il chantun Argovia. Er l’Ovomaltina è fitg populara; cuntrari a Rivella ha quella pudì sa metter tras er a l’exteriur (per il pli sut il num Ovaltine).

En la glista dal Patrimoni mundial da l’UNESCO èn inscrits en tut dudesch lieus dal patrimoni cultural e natiral che sa chattan en Svizra, numnadamain: la claustra benedictina da Son Jon a Müstair, la claustra benedictina da Son Gagl, la citad veglia da Berna, ils trais chastels e fortificaziuns da Bellinzona, la regiun Jungfrau-Aletsch-Bietschhorn, il Monte San Giorgio, las terrassas da Lavaux, la Viafier retica en la regiun Alvra-Bernina, l’Arena tectonica Sardona, las citads d’industria d’uras La Chaux-de-Fonds/Le Locle, las palissadas preistoricas enturn las Alps e l’ovra architectonica da Le Corbusier.

Bain il pli famus architect svizzer è Le Corbusier (1887–1965). Atelier 5, Mario Botta e Diener  Diener èn ulteriurs impurtants architects dal temp preschent ch’han influenzà l’architectura er a l’exteriur. Ils architects Jacques Herzog e Pierre de Meuron (Herzog  de Meuron) èn vegnids enconuschents cun l’edifizi dal Tate Modern a Londra e cun il stadion naziunal a Peking ed han retschet il Premi Pritzker. Peter Zumthor, dal qual il pli enconuschent edifizi è il bogn termal a Val S. Pieder, è medemamain vegnì onurà cun il Premi Pritzker. L’onn 1928 han ins construì a Dornach sper Basilea il Goetheanum, in dals emprims edifizis da betun armà, il qual tutga cun sia furma sculpturala tar ils pli famus edifizis da l’expressiunissem e da l’architectura organica. 

Cun fitg paucas excepziuns (p.ex. la citad da Schaffusa en la Segunda Guerra mundiala) è la Svizra neutrala stada preservada quasi dal tuttafatg da las guerras destructivas dal temp modern. En tut il pajais è perquai sa mantegnida fin oz blera substanza architectonica istorica.

Las citads prosperantas dal 11avel e 12avel tschientaner han enconuschì in’activitad da construcziun intensiva. En numerusas citads, vitgs e claustras èn vegnidas erigidas da quel temp novas baselgias. Tut las tschintg baselgias episcopalas sin il territori da la Svizra (Basilea, Cuira, Genevra, Losanna, Sion) han ins erigì da nov en la segunda mesadad dal 12avel tschientaner. Sper il repertori da furmas da la romantica ch’era en plaina fluriziun (t.a. Basilea, Sion, Cuira, Genevra e Schaffusa) vegnan però er gia visibels qua emprims svilups vers la gotica (Losanna). 

A Nossadunnaun, Son Gagl e Soloturn dattan baselgias pompusas perditga dal stil abundant dal baroc.

Las pli veglias chasas da lain ch’èn sa mantegnidas en l’entira Europa sa chattan en il chantun Sviz: las construcziuns cun laina radunda Nideröst (1176) e Bethlehem (1287) derivan dal temp avant la fundaziun da la Veglia Confederaziun. En la regiun tranter Arth ed il Muotatal stattan dapli ch’in tozzel da questas chasas da lain vegliandras.

Per la construcziun da chastels monumentals sco ch’els èn uschiglio tipics per la renaschientscha, il baroc ed il rococo, han mancà en Svizra las premissas socialas, politicas ed economicas. Intginas da las paucas excepziuns han furmà las residenzas episcopalas a Cuira, Pruntrut e Son Gagl. Ils chastels en Svizra sa laschan per ordinari manar enavos sin turs medievalas. En il temp tranter il 10avel ed il 15avel tschientaner han ins construì en Svizra radund 2000 chastels, per ordinari tras nobels libers, conts, l’aristocrazia pitschna u chavaliers. Faschond diever pli tard dals chastels per administrar lur terras subditas, han ils Confederads transfurmà quels be modestamain, uschia che la substanza architectonica medievala custaivla è per gronda part sa mantegnida. La classa sociala superiura en las citads e per part er sin la champagna – l’uschenumnà patriziat – ha percunter sviluppà ina vasta activitad da construcziun, tranter auter cun eriger residenzas represchentativas. Tar ils pli enconuschents chastels en Svizra tutgan oz quels da Chillon, Thun, Bottmingen, Tarasp, Grandson, Sargans sco er la Habsburg. Ils trais chastels da Bellinzona appartegnan al patrimoni cultural mundial.

En il decurs dal 18avel tschientaner ha il svilup da la tecnica d’armas fatg daventar adina dapli obsoletas las fortificaziuns citadinas dal temp medieval. Cun disfar quellas han ins pudì schlargiar las citads, quai ch’era daventà necessari en l’emprima mesadad dal 19avel tschientaner pervi da la Revoluziun industriala. Er la construcziun da vias e surtut da la viafier han fatg svanir adina dapli mirs da las citads. En intgins lieus, sco per exempel a Murten, èn las fortificaziuns medievalas sa mantegnidas; en bleras autras regordan be pli singulas parts als mirs medievals, per exempel a Berna (Zytglogge-Turm), a Basilea (Spalentor) u a Schaffusa (Munot). Da quel temp han ins er stgaffì a Turitg la Via da la staziun cun emplenir in foss.

En il temp dal giuven stadi federal, vers la fin dal 19avel tschientaner, èn ils referiments a l’atgna istorgia stads fitg impurtants. L’architectura ha recepì elements istorics da diversas epocas ed ha cumbinà quels ad ina nova unitad. Per intgins decennis ha pudì sa far valair en Svizra l’istorissem sco stil architectonic. Impurtantas perditgas da quest’èra en la Chasa federala a Berna (1857–1864), la chasa municipala da Winterthur (1865–1869), la staziun principala a Turitg (1870–1871), il museum istoric a Berna (1892–1894) sco er il Museum naziunal svizzer a Turitg (1897).

A l’entschatta dal 20avel tschientaner han ins per part erigì edifizis en il stil neoclassicistic, sco il teater da la citad a Berna (1903) u a l’entschatta dals onns 1930 il Palais des Nations a Genevra. Tranter il 1922 ed il 1927 è vegnì construì a Losanna l’edifizi dal Tribunal federal en il stil classicistic.

La cultura da bajegiar purila ha manà ad ina vasta varietad da stils ch’èn mintgamai adattads a las cuntradas e relaziuns climaticas specificas. Ils vitgs da la Svizra Orientala èn segnads da la tipica construcziun cun armadira da travs, en il Vallais domineschan las chasas cun laina radunda embrinidas dal sulegl, en la Planira Bernaisa frunt’ins dapertut sin las chasas da purs cun ils tetgs fitg lartgs ed en l’Engiadina èn tipicas las chasas decoradas ritgamain cun sgrafits. Ina survista cumplessiva dals differents tips da las chasas purilas en Svizra porscha il Museum al liber Ballenberg cun ses bundant 100 exponats originals. 

Il 2013 ha la Lia svizra per la protecziun da la patria tschernì 50 impurtants edifizis dal temp tranter il 1960 ed il 1975 sco perditgas da la cultura da bajegiar pli nova. Objects da quest temp dattan bain la tempra a bleras vischnancas en Svizra, ma ina confruntaziun cun la cultura da bajegiar da quest’epoca – savens sdegnada – n’ha anc strusch gì lieu.

Il Premi Wakker surdat la Lia svizra per la protecziun da la patria dapi il 1972 a vischnancas politicas per la protecziun dal maletg dal lieu. L’emprima distincziun è ida a la citadina Stein am Rhein per la planisaziun urbana che s’orientescha a la substanza medievala avant maun.

En il 16avel tschientaner ha il protestantissem influenzà fermamain l’art figurativ en Svizra. Dapi lura èsi reussì ad intgins artists da sa far valair a nivel internaziunal. Johann Heinrich Füssli ha cuntanschì en il 18avel tschientaner cun ses maletgs grotescs e fantastics renum en l’Engalterra (sut il num Henry Fuseli). Dal 19avel tschientaner meritan surtut menziun Arnold Böcklin, Albert Anker e Ferdinand Hodler. Ed en il 20avel tschientaner èn Alberto Giacometti e HR Giger daventads famus en tut il mund. Savens vegn er Paul Klee numnà tranter ils pli impurtants picturs svizzers. Sophie Taeuber-Arp tutga cun ses art ritmic-geometric tar ina da las impurtantas artistas abstractas dal 20avel tschientaner. E Jean Tinguely ha stgaffì sculpturas cumplexas e muventadas or da metal.

Il Schauspielhaus a Turitg vala sco in dals pli impurtants teaters dal territori da lingua tudestga. Numerus tocs da Bertolt Brecht èn vegnids represchentads qua per l’emprima giada. Er la gronda part dals tocs da teater da Max Frisch e Friedrich Dürrenmatt han gì qua lur premiera. 

L’opera da Turitg ha medemamain furmà il lieu da numerusas primaudiziuns. E numerus stars da l’opera sa preschentan qua regularmain sin tribuna.

Ulteriurs teaters da muntada èn il teater da Basilea, il teater da la citad da Berna sco er il Cabaret Voltaire a Turitg, nua ch’è sa furmà il moviment dal dadaissem.

Dapi il 1957 surdat la Societad svizra per cultura da teater mintg’onn l’anè da Hans Reinhart. Quel vala sco distincziun la pli auta en la scena da teater da la Svizra.

L’istorgia da la musica en Svizra è vegnida influenzada tras dus facturs: Tras la mancanza da curts da prinzis e da citads grondas n’hai mai dà centers en ils quals fissan sa furmads agens stils. Ultra da quai è la Svizra quadrilingua vegnida influenzada en tut las epocas dals circuls culturals che la circumdeschan. Perquai n’è mai sa sviluppà in stil da musica genuinamain svizzer.

En il 20avel tschientaner ha la moderna classica enconuschì en Svizra divers cumponists ch’han cuntanschì renum internaziunal sco Arthur Honegger, Othmar Schoeck e Frank Martin.

Dapi ils onns 1950 exista en Svizra ina scena da musica da rock e pop fitg viva. Surtut dapi la fin dals onns 1970 è s’etablida en Svizra tudestga la musica da rock e pop cun texts dialectals (Mundartrock). Precursurs da questa musica han furmà en ils onns 1960 ils Berner Troubadours, tranter auter Mani Matter, che sunavan lur atgnas chanzuns accumpagnadas sin ghitarra. Oz èn texts dialectals preschents en tuttas direcziuns stilisticas. Enconuschents interprets da la musica dialectala èn Polo Hofer, Toni Vescoli, Züri West, Patent Ochsner, Stiller Has, Peter Reber, Trio Eugster, Vera Kaa, Dodo Hug, Sina, Gölä, Plüsch, Mash, Florian Ast, Sandee ed Adrian Stern. Tranter las paucas interpretaziuns dialectalas ch’èn vegnidas enconuschentas er ordaifer la Svizra tutgan ‹Hemmige› da Stephan Eicher e ‹Nach em Räge schint Sunne› dad Artur Beul.

Populars entaifer il hip-hop da la Svizra tudestga èn Greis, Gimma, Bligg, Wurzel 5 e Sektion Kuchikäschtli, en la Svizra franzosa Stress e Sens Unik.

Musicists da rock e pop ch’èn er vegnids enconuschents a l’exteriur èn DJ BoBo, Patrick Nuo, Stephan Eicher, Krokus, Yello, The Young Gods, Gotthard, Eluveitie, Double, DJ Antoine sco er Andreas Vollenweider (world music). Entaifer la scena da schlagher èn quai tranter auter Lys Assia, Vico Torriani, Hazy Osterwald, Paola Felix, Pepe Lienhard, Nella Martinetti, Francine Jordi, Leonard e Beatrice Egli.

In plaz fix entaifer la vita culturala en Svizra ha cuntanschì la musica da jazz. Las duas persunas dal jazz ch’èn vegnidas enconuschentas sur la scena da jazz ora èn stads George Gruntz e Claude Nobs. Ils festivals da jazz da Montreux, Willisau e Lugano tutgan tar las pli enconuschentas occurrenzas da quest gener insumma.

L’Eurovision Song Contest ha la Svizra gudagnà duas giadas: tar l’emprima ediziun il 1956 cun Lys Assia ed il 1988 cun Céline Dion. Il trio Peter, Sue  Marc è sa participà quatter giadas a l’occurrenza. 

La musica populara tradiziunala da la Svizra appartegna a la musica populara alpina. Questa musica, che vegn er numnada Ländlermusik u be Ländler, è fitg derasada ed appreziada surtut en la Svizra tudestga, ma er en las autras parts dal pajais. Tipics instruments svizzers èn la tiba e l’orgelet da maun da Sviz, ma er gìa, giun e clarinetta giogan in’impurtanta rolla. Cuntrari a l’ulteriur territori da lingua tudestga na designescha Ländler en Svizra betg be melodias da ländler en il tact da trais quarts, mabain en general ina musica da saut e da divertiment ch’è sa sviluppada a l’entschatta dal 20avel tschientaner da la musica populara dal 19avel tschientaner. La musica populara instrumentala vegn tgirada en numerusas gruppas localas, per ordinari d’amaturs. Intginas gruppas e musicists èn er vegnids enconuschents en l’entir pajais, sco pe exempel la Streichmusik Alder Carlo Brunner u ils Swiss Ländler Gamblers. Tar la musica populara sa tracti oravant tut da musica da saut sco ländler u schottisch, la quala vegn però savens er sunada senza chaschun da sautar. Er furmaziuns da musica instrumentala èn derasadas vastamain en l’entir pajais. Medemamain vegn il jodel tradiziunal tgirà en bleras uniuns. Per pudair cunfinar meglier il jodel svizzer dal jodel tirolais ch’era da quel temp popular e per render puspè pli populara la tiba ch’era bunamain svanida, han ins fundà il 1910 l’Associaziun federala da jodladers. En intervals regulars han lieu festas federalas en differentas direcziuns stilisticas, sco per exempel la festa da musica federala che vala sco pli grond festival da la musica instrumentala dal mund.

La Svizra è enconuschenta per ses grond dumber da festivals da musica da differentas direcziuns. Il Lucerne Festival unescha per exempel mintg’onn la scena da musica classica internaziunala. Er en auters lieus vegnan realisadas occurrenzas sumegliantas. Ultra da quai han lieu mintga stad numerusas occurrenzas open air sco il Gurtenfestival, il Paléo Festival u l’Open Air Son Gagl. La Street Parade a Turitg attira mintg’onn var in milliun visitaders e furma uschia la pli gronda occurrenza da tecno en tut il mund.

Cumpareglià cun l’ulteriura Europa è l’istorgia dal film en Svizra relativamain giuvna. Pir ils onns 1930 e be tras l’immigraziun d’artists ed interprendiders ambiziunads ha insumma pudì sa furmar ina scena da film svizra. Ils pli impurtants dad els en l’emprima èra dal film da tun fin ca. il 1950 èn stads ils dus immigrants austriacs Lazar Wechsler, ch’ha fundà la Praesens-Film, e Leopold Lindtberg ch’è stà ses reschissur il pli productiv e quel ch’ha gì il pli grond success. Tut en tut ha la Praesens-Film gudagnà quatter Oscars e numerusas distincziuns a tut ils impurtants festivals internaziunals.

Sco en tut ils pajais europeics è la cinematografia er dependenta en Svizra da la promoziun statala. Ils meds da promoziun tanschan però be per in pitschen dumber da films ad onn. En l’istorgia pli nova èsi perquai reussì be a paucs films svizzers da cuntanscher success internaziunals. En il kino ed a la televisiun domineschan las producziuns dal territori anglosaxon.

Bain il pli enconuschent film or da producziun svizra è ‹Die Schweizermacher›. Ulteriuras comedias ch’han gì in grond resun èn ‹Beresina oder Die letzten Tage der Schweiz› da Daniel Schmid, ‹Les petites fugues› da Yves Yersin e ‹Gekauftes Glück› dad Urs Odermatt. Da tempra bundant pli seriusa èn ‹Höhenfeuer› da Fredi M. Murer e ‹Reise der Hoffnung› da Xavier Koller ch’ha gudagnà il 1991 in Oscar. Renum mundial han er cuntanschì diversas producziuns cun participaziun svizra, per exempel da vart dal producent da films Arthur Cohn, dal reschissur Marc Forster u da l’actur Bruno Ganz. Ils ultims onns han tranter auter gì success las versiuns cinematograficas da cudeschs d’uffants sco ‹Mein Name ist Eugen›, ‹Heidi› e ‹Schellen-Ursli›.

Il premi cinematografic svizzer vegn mintgamai surdà a chaschun dals Dis da film a Soloturn la fin da schaner. Mintg’onn l’avust ha ultra da quai lieu il Festival da film internaziunal da Locarno che furma ina da las impurtantas occurrenzas da film en tut il mund. Il pli giuven festival è il Zurich Film Festival ch’ha lieu dapi il 2005.

La litteratura en Svizra vegn per ordinari sutdividida en la litteratura da la Svizra tudestga, Svizra franzosa, Svizra taliana e Svizra rumantscha. In’impurtanta activitad litterara ha inizià en il temp medieval en diversas claustras: En la claustra da Muri è vegnì scrit vers il 1250 il pli vegl gieu da Pasca dal territori tudestg ed in pau pli tard a Son Gagl l’emprim gieu da Nadal. Cumbain che la litteratura svizra da lingua tudestga è adina stada in pau en la sumbriva da la Germania, datti ovras ch’èn enconuschentas en l’entir territori da lingua tudestga, tranter auter da Friedrich Dürrenmatt, Max Frisch, Friedrich Glauser, Jeremias Gotthelf, Hermann Hesse, Gottfried Keller, Pedro Lenz, Conrad Ferdinand Meyer, Adolf Muschg e Johanna Spyri. Sper la litteratura dominanta en tudestg da scrittira datti er intgins impurtants represchentants da la litteratura dialectala sco Ernst Burren, Pedro Lenz u Kurt Marti. Grond success en Svizra franzosa ha Joël Dicker, dal qual ils cudeschs èn vegnids translatads en dapli che 40 linguas e vegnan vendids en ediziuns da milliuns.

Impurtantas occurrenzas da litteratura en Svizra èn ils Dis da litteratura a Soloturn ed il Festival da cudeschs e da litteratura a Basilea.

Tenor indicaziuns da l’Uffizi federal da statistica dumbrava la Svizra il 2015 radund 1100 museums, ils quals han dumbrà dapli che 12 milliuns entradas. 

Il Museum naziunal svizzer ha sia sedia principala a Turitg e dat suttetg a la pli gronda collecziun istoric-culturala dal pajais. Quella cumpiglia tuttas epocas da la preistorgia fin il 21avel tschientaner. Il segund grond è il Museum istoric a Berna cun 250 000 objects da differenta provegnientscha. Menziun speziala meritan qua ils tarpuns da Carl il Temerari che derivan dal temp da las Guerras burgognaisas.

Il Museum d’art a Basilea è il pli vegl museum public da l’entira Europa. Ses origins èn da chattar en il cabinet da la famiglia Amerbach en il 16avel tschientaner. La collecziun cumpiglia picturas da renum mundial sco er il relasch dad Erasmus von Rotterdam. La Chasa d’art a Turitg posseda la pli gronda collecziun d’ovras dad Alberto Giacometti ed ultra da quai la pli gronda collecziun da Munch ordaifer la Norvegia. Ulteriuras impurtantas ovras sa chattan en il Museum d’art a Berna ed en la Fondation Beyeler a Riehen sper Basilea, la quala è famusa en tut il mund per sia collecziun d’art contemporan. 

In ulteriur impurtant museum furma il Museum anatomic a Basilea. Quel mussa preparats originals e models da tschaira d’organs e da differentas parts dal corp uman. Tranter ils exponats sa chatta il pli vegl preparat anatomic dal mund, in skelet ch’è vegnì preparà il 1543.

Il museum svizzer il pli frequentà furma la Chasa da traffic a Lucerna cun sia gronda collecziun da locomotivas, autos, bastiments ed aviuns.

Il Technorama a Winterthur è il pli grond Science Center da la Svizra. Quel mussa differents experiments ch’explitgeschan connexs tecnics e da las scienzas natiralas.

En la Svizra franzosa tematiseschan intgins museums organisaziuns internaziunalas. Da muntada èn surtut il Museum da la Crusch cotschna a Genevra ed il Museum olimpic a Losanna.

Tar las pli impurtantas festas federalas tutgan la Festa federala da lutga, la Festa federala da jodladers, la Festa federala da gimnastica ed il Tir champester federal. 

Il giavisch da realisar ina festa naziunala è gia sa furmà il 1799 durant il temp da la Republica helvetica. Las Festas d’Unspunnen dal 1805 e 1808 valan sco precursurs da las festas federalas. L’emprima festa federala per propi è lura stada la Festa federala da tir dal 1824. En il 19avel tschientaner han las numerusas festas, organisadas a moda federalistica tras uniuns ed associaziuns, giugà in’impurtanta rolla en la furmaziun da la naziun fundada sin la voluntad politica e dal stadi federal. Las festas communablas exprimivan l’attaschament a la patria da tut ils participants, e quai malgrà lur differenta derivanza linguistica, culturala e confessiunala.

Oz furman las festas federalas ch’han lieu en intervals regulars in impurtant inscunter per sportists e musicists ed in dals puncts culminants entaifer l’activitad da bleras uniuns.

Dapi la fundaziun dal stadi federal han gì lieu las suandantas exposiziuns naziunalas: 1883 a Turitg, 1896 a Genevra, 1914 a Berna, 1939 a Turitg (Landi), 1964 a Losanna e 2002 en la regiun da Biel/Bienne, Neuenburg, Yverdon-les-Bains e Murten (Expo.02). 

Il 1991, a chaschun da las festivitads per il giubileum da 700 onns da la Confederaziun, han ins manà tras festas decentralas en tut las parts dal pajais, uschia per exempel l’exposiziun da perscrutaziun naziunala Heureka a Turitg.

I suonda ina survista da divers ulteriurs temas culturas da muntada naziunala:

En Svizra existan dapli che 700 differents costums. L’uniun tetgala da las uniuns localas e chantunalas furma la Federaziun svizra da costums (FSC).

La Pro Helvetia che vegn finanziada tras la Confederaziun è responsabla per la preschientscha culturala da la Svizra a l’exteriur e per il dialog cultural tranter las differentas parts dal pajais.

Il pli grond circus en Svizra, il Circus Knie, giauda renum internaziunal. Ulteriurs enconuschents circus èn: Circus Nock, Circus Monti e Circus Conelli.

Il Prix Walo, che vegn surdà dapi il 1974, vala sco pli impurtanta distincziun entaifer il showbusiness en Svizra. Il premi han gudagnà numerus acturs, cabarettists e chantadurs.

Il dar jass vala en Svizra sco gieu naziunal. Cun chartas ‹franzosas› vegn giugà en il vest da la lingia Brünig-Napf-Reuss, cun chartas ‹tudestgas› en l’ost da quella.

Cumbats da vatgas, per ordinari vatgas d’Hérens, han lieu mintga primavaira e stad en la part franzosa dal Vallais.

Pervi da la neutralitad da la Svizra, la stabilitad politica e la tradiziun umanitara dal pajais, è la Svizra la sedia da bleras organisaziuns ed associaziuns internaziunalas or da politica, sport, scienza e cultura. Bleras da quellas han lur sedia a Genevra che furma la citad la pli internaziunala dal pajais. 

A Genevra sa chatta ina da las quatter sedias permanentas da las Naziuns Unidas (sper New York, Vienna e Nairobi). Mintg’onn han lieu qua dapli che 2700 sesidas e conferenzas, a las qualas sa participeschan radund 200 000 delegads da tut il mund. Quai fa da la citad il center da la diplomazia multilaterala il pli activ en tut il mund. A Genevra han er diversas organisaziuns da las Naziuns unidas lur sedia principala e gia en il tranterguerras aveva la citad furmà la sedia principala da l’organisaziun precursura da las Naziuns unidas, la Societad da las naziuns.

Tranter las ulteriuras organisaziuns internaziunalas tutgan il Comité internaziunal da la Crusch Cotschna (CICC), medemamain a Genevra, l’Uniun postala universala (UPU) a Berna, il Forum mundial d'economia (WEF) a Cologny ed il World Wide Fund For Nature (WWF) a Gland.

En il sport sajan menziunads Losanna sco sedia dal Comité olimpic internaziunal e la Federaziun internaziunala da ballape (FIFA) ch’ha sia sedia principala a Turitg.

L’emprima universitad en Svizra è vegnida fundada il 1460 a Basilea. Muntada speziala ha gì l’operar dal medi e misticher Paracelsus (Theophrastus Bombastus von Hohenheim). Sin el sa lascha manar enavos la lunga tradiziun da la perscrutaziun chemica e medicinala en Svizra. Ulteriurs accents en la perscrutaziun actuala furman la nanotecnologia, l’informatica, la perscrutaziun da l’univers e la perscrutaziun dal clima. L’impurtanza dal champ da perscrutaziun per la Svizra resulta dal fatg ch’il pajais na dispona strusch da resursas primaras.

En Svizra han perscrutà numerus titulars dal Premi nobel sco per exempel il fisicher Albert Einstein. In impurtant lieu da perscrutaziun internaziunal furma l’Organisaziun europeica per la perscrutaziun nucleara (CERN) a Meyrin en il chantun Genevra.

Attribuidas, ma betg suttamessas al Departament federal da l’intern èn las duas Scolas politecnicas federalas a Turitg e Losanna. La gronda part da las ulteriuras universitads e scolas autas vegnan manadas dals chantuns. Per la coordinaziun tranter la Confederaziun ed ils chantuns procura la Conferenza universitara svizra.

La Svizra è commembra ed in stadi fundatur da l’Agenzia spaziala europeica (ASE/ESA). L’astronaut svizzer Claude Nicollier è sgulà quatter giadas en l’univers en rom d’in program da cooperaziun tranter l’ESA e la NASA.

La topografia muntagnarda dal pajais ha marcà a moda decidida il cumportament da temp liber da ses abitants. Vers la fin dal 19avel ed a l’entschatta dal 20avel tschientaner è l’ir cun skis avanzà al sport il pli popular. Cun il svilup dal turissem en las Alps è la Svizra sa sviluppada ad ina naziun da sport d’enviern per propi. Medemamain sut l’ensaina da las muntognas stattan la stad il viandar, raiver ed ir cun velo da muntogna.

Al svilup da la schientscha naziunala descrit survart è d’attribuir la spessezza surprendenta d’uniuns da gimnastica e da tir en l’entir pajais. Sco sport svizzer il pli tipic vala il lutgar ch’ha pudì mantegnair fin oz sia popularitad.

Fitg derasads en la populaziun èn ils sports da team ballape, ballamaun, ballarait ed unihockey. Sports da profi che vegnan persequitads d’ina gronda part da la populaziun furman ballape e hockey sin glatsch. Il sportist svizzer che dueva daventar il pli enconuschent en tut il mund è Roger Federer che vala sco in dals pli impurtants giugaders en l’istorgia dal tennis.

Ils onns 1928 e 1948 han gì lieu a San Murezzan ils gieus olimpics d’enviern. Il 2008 ha la Svizra realisà ensemen cun l’Austria il campiunadi europeic da ballape. Occurrenzas da sport da muntada internaziunala ch’han lieu mintg’onn èn ils meetings d’atletica leva a Turitg e Losanna, ils turniers da tennis da Basilea, Gstaad e Turitg, ils turniers da sigl d’obstachels a Turitg e Son Gagl, il turnier da hockey Spengler Cup a Tavau, la cursa da velo da pliras etappas Tour de Suisse e las cursas da la cuppa mundiala da skis ad Adelboden (Chuenisbärgli), San Murezzan, Lenzerheide e Wengen (Lauberhorn).




#Article 3: Turitg (315 words)


Turitg (tudestg: Zürich, franzos/englais: Zurich, talian: Zurigo, tudestg svizzer: Züri, latin: Turicum) è ina citad da la Svizra, cun 400.000 abitants (cun aglomaraziun 1,1 milliuns) la pli gronda da la Svizra e ses center economic e cultural. La citad schai al flum Limmat ed a la sortida da lez or dal Lai da Turitg ed è la chapitala dal chantun Turitg. Ils abitants sa numnan Turitgais per rumantsch e Zürcher per tudestg.

Turitg schai sin 408 m.s.m. a la fin dal Lai da Turitg, tranter ils bots Üetliberg en il vest e 
Zürichberg en l'ost. La citad veglia giascha da domasduas varts dal flum Limmat, che sorta qua dal Lai da Turitg, flessegia l'emprim encunter nord e fa lura ina lunga storta vers vest. Curt suenter che la Limmat sorta dal lai da Turitg vegn ella gia unida cun il flum Sihl, che furma uschia in plaz en furma d'ina peninsla, sin la quala sa chattan la staziun principala e la via da la staziun. Da l'autra vart da la Limmat sa chatta il Nieder- ed il Oberdörfli cun la baselgia marcanta Grossmünster enamez.

La vita da notg a Turitg è - en cumparegliaziun cun la grondzzia da la citad - fitg varianta. Entant ch'il Niederdörfli era pli baud fitg admirà per ir en sortida, è quai ozendi plitost il quartier da Züri-West il center da la vita da notg. Sin ils anteriurs lieus industrials sco l'areal Maag u l'areal Löwenbräu èn ils davos onns il clubs creschids sco bulieus or da la tiara, uschia p.ex. la Säulenhalle en l'edifici da la Löwenbräu, il werk21 ni il code club. In dals pli gronds clubs da Turitg, l'X-tra è medemamain en la vischinanza.

A la riva dal Lai da Turitg, en direcziun da Cuira, sa chatta il local alternativ da la Rote Fabrik che è in cunterpol envers tut ils clubs trendys da techno e house.




#Article 4: Austria (7157 words)


L’Austria (tudestg Österreich) è in stadi da l’Europa Centrala cun 8,7 milliuns abitants. Ils pajais vischins èn la Germania e la Tschechia en il nord, la Slovenia e l’Italia en il sid, la Slovachia e l’Ungaria en l’ost sco er la Svizra ed il Principadi da Liechtenstein en il vest. Sco ses vischins Svizra, Tschechia, Slovachia ed Ungaria na cunfinescha er l’Austria betg cun la mar.

L’Austria è in stadi federativ democratic ch’è naschì en la furma odierna suenter l’Emprima Guerra mundiala. Ils nov pajais federativs èn: Vorarlberg, Tirol, Salzburg (en la part occidentala dal pajais); Kärnten, Steiermark [rumantsch er Stiria], Burgenland (en il sidost), Oberösterreich [Austria Auta], Niederösterreich [Austria Bassa] e Vienna (en il nordost). Vienna furma a medem temp la chapitala dal pajais. L’Austria è stà in commember fundatur da l’Organisaziun da cooperaziun e svilup economic en Europa (OECD) il 1961 ed è dapi il 1995 commember da l’Uniun europeica.

Ils cunfins topografics dal pajais furman il Massiv Boemian ed il flum Thaya vers nord, las Caravancas e las Collinas da la Stiria en il sid, la Planira Pannonica en l’ost sco er il Rain ed il Lai da Constanza vers vest. Bundant 62 % da l’Austria èn situads en las Alps.

Il term Austria cumpara l’emprima giada il 996 en sia furma dal vegl tudestg Ostarrichi. Er la furma latina Austria era gia usitada da quel temp. Entaifer il Sontg Imperi roman ha l’Austria cuntanschì il 1556 l’independenza da la Baviera ed è daventada in agen ducadi. Quel cumpigliava pli u main il territori dal pajais federativ Austria Bassa dad oz.

Pli tard han ins transferì il num Austria sin la Monarchia da Habsburg resp. il 1804 sin l’Imperi austriac. Pervi da la terrada en la Battaglia da Königgrätz il 1866 n’ha l’Austria betg fatg part, suenter la dissoluziun da la Confederaziun tudestga, da la restructuraziun da la Germania.

Suenter la sconfitta da l’Austria-Ungaria en l’Emprima Guerra mundiala han las pussanzas victuras impedì in’ulteriura giada che l’Austria sa collia cun la Republica tudestga. Uschia è naschida il 1918 la Republica odierna. Pervi da la predominanza naziunalsocialistica en il pajais ha l’Austria fatg part dal 1938 fin il 1945 dal Reich tudestg. Ils victurs da la Segunda Guerra mundiala han puspè restituì il status da l’Austria sco stadi independent. Suenter che l’occupaziun dal stadi è ida a fin il 1955 ha l’Austria declerà sia neutralitad permanenta ed è vegnida commembra da las Naziuns unidas.

L’Austria s’extenda en direcziun vest-ost sur ina lunghezza da radund 575 kilometers, vers nord-sid da radund 294 kilometers.

Radund 60 % dal territori dal stadi èn d’attribuir a la zona muntagnarda. Be 32 % da la surfatscha è situada sut 500 meters. Las pli autas muntognas da l’Austria èn pizs da passa 3000 m s.m. che sa chattan en las Alps da l’Ost. Il pli aut piz è cun 3798 meters il Grossglockner en las Hohe Tauern. En tut datti en l’Austria var 1000 pizs da passa 3000 m s.m.

La gronda part da la zona muntagnarda appartegna a las Alps da l’Ost (Alps Centralas dal Tirol, Hohe Tauern e Niedere Tauern, Alps da Chaltschina dal Nord, Alps da Chaltschina dal Sid, Wienerwald). 

Al nord dal Danubi, en l’Austria Auta ed Austria Bassa, è situà il plateau da granit e gnais ch’appartegna al Massiv Boemian. Tar quest massiv sa tracti da las restanzas d’ina anteriura chadaina da muntognas che tanschan fin en la Tschechia ed en Baviera. Da l’autra vart dals cunfins orientals dal pajais cumenzan en pli las Carpatas Pitschnas.

Da l’entira surfatscha da l’Austria da radund 83 879 km² furma radund in quart regiuns da planiras e collinas. En pli èn radund 43 % da la surfatscha dal pajais cuverts cun guaud.

Las pli grondas planiras giaschan en l’ost, per lung dal Danubi, surtut en la regiun prealpina ed en il Batschigl da Vienna cun il Marchfeld sco er en la part meridiunala da la Steiermark. Pervi da sia cuntrada pittoresca vegn quest’ultima regiun er numnada ‹Toscana da la Stiria›.

Il Burgenland va a finir en l’ost da l’artg da las Alps e da las Carpatas en la Planira Pannonica. La cuntrada ed il clima èn da cumparegliar cun il stadi vischin en l’ost, l’Ungaria, al qual la regiun ha appartegnì fin il 1921.

Il pli grond ed impurtant flum en l’Austria è il Danubi che nascha en la Germania e cuntinuescha suenter l’Austria en direcziun da la Mar Naira. En il Danubi sbucca er la gronda part dals flums laterals sco Lech, Isar ed En (en il Tirol), Salzach (Salzburg) u Kamp, Thaya, March e Mur (en la part orientala dal pajais). L’aua da la gronda part dal Vorarlberg percunter va en il Rain e cula sur il Lai da Constanza en direcziun da la Mar dal Nord.

Sper il turissem alpin furman ils lais in’impurtanta pitga dal turissem austriac. Tar ils pli enconuschents tutgan il Kärntner See ed il Wörthersee.

Il pli grond lai sin territori austriac è il Neusiedler See en il Burgenland (al cunfin cun l’Ungaria). I suondan l’Attersee ed il Traunsee en l’Austria Bassa. Il Lai da Constanza giascha en la regiun da cunfin dals trais pajais Svizra, Germania ed Austria. Be la pitschna part da quest lai tutga tar l’Austria.

L’Austria sa cumpona da nov pajais federativs; in da quels furma Vienna sco chapitala. En successiun alfabetica èn quai: 

 
Ils pajais federativs cumpiglian 80 districts e var 2350 vischnancas. L’aglomeraziun per lunsch or la pli gronda furma la regiun da metropola da Vienna cun ca. 2,4 milliuns abitants. Radund in quart da la populaziun da l’Austria viva pia en la regiun da la chapitala. 

Ulteriuras grondas regiuns urbanas circumdeschan diversas chapitalas da pajais federativs: Graz (Stiria), Linz (Austria Auta), Salzburg (Salzburg) ed Innsbruck (Tirol). Autras grondas citads èn (dal vest a l’ost): Feldkirch, Dornbirn e Bregenz (Vorarlberg), Villach e Klagenfurt (Kärnten), Wels (Austria Auta), St. Pölten e Wiener Neustadt (Austria Bassa).

Pervi da la topografia ordvart variada da l’Austria viva qua in fitg grond dumber da spezias da plantas ed animals. Per proteger questa varietad han ins installà en il decurs dals davos decennis sis parcs naziunals e numerus parcs natirals da differentas categorias. Numerusas surfatschas degnas da protecziun fan er part dal Patrimoni natiral mundial da l’UNESCO.

Areguard il clima appartegna il pajais a la zona temprada e sa lascha caracterisar sco chaud ed umid. En il vest ed il nord predominescha in clima oceanic cun vents umids nà dal vest. L’ost percunter è marcà d’in clima continental cun damain precipitaziuns, stads chaudas ed envierns fraids. La topografia alpina po dentant midar localmain questas tendenzas climaticas generalas.

L’emprima dumbraziun dal pievel tenor criteris moderns ha gì lieu en l’Austria-Ungaria il 1869/70. Ils resultats dals emprims decennis èn marcads d’ina ferma immigraziun nà da las autras parts da la monarchia (en spezial da la Boemia e da la Moravia) en il territori federal odiern.
Suenter la fin da la monarchia e la fundaziun da la Tschecoslovachia èn blers Tschecs ed auters immigrants returnads en lur patria, uschia ch’il dumber d’abitants è ì enavos.
Dapi il boom economic suenter la fin da la Segunda Guerra mundiala han ins clamà intenziunadamain lavurers en il pajais (en spezial tras cunvegnas cun la Tirchia e la Jugoslavia). Tras quai è il dumber d’abitants creschì fin il 1974 a 7,6 milliuns abitants. Suenter ina fasa da stagnaziun durant ils onns 1980 èn ils davos decennis puspè stads segnads d’ina creschientscha cuntinuanta. Actualmain (2013) dumbra l’Austria 8,48 milliuns abitants. 

Tenor artitgel 8 da la constituziun federala da l’Austria furma il tudestg la lingua statala. Il tudestg è lingua materna da radund 88,6 % da las burgaisas e dals burgais dal pajais. Il tudestg da l’Austria sa differenziescha tras tscherts pleds, tras la pronunzia e tras atgnadads grammaticalas dal tudestg da la Germania. Il Vocabulari austriac vegn edì dapi il 1951 e stat sco ovra directiva sur il Duden. En il mintgadi vegn savens duvrà al lieu da la lingua da standard in dals blers dialects da l’aleman e bavarais.

Ils pievels autoctons dals Croats en il Burgenland sco er ils Slovens ed Ungarais en l’Austria han il dretg d’instrucziun en lur lingua e da far diever da quella en il contact cun las autoritads regiunalas. Tar las linguas minoritaras renconuschidas dal stadi tutgan plinavant il romanes (la linguas dals roma), il tschec ed il slovac.

Tenor ils resultats da la dumbraziun dal pievel dal 2001 han 73,6 % da la populaziun inditgà d’appartegnair a la baselgia catolic-romana e 4,7 % ad ina da las baselgias evangelicas. Sco en auters pajais da l’Europa dal Vest è quest dumber sa reducì marcantamain ils davos onns. La fin dal 2012 era per exempel la cumpart dals catolics crudada sut dus terzs.

La pli gronda cuminanza religiusa betg cristiana furman ils muslims. Tenor stimaziuns dal Fonds d’integraziun muntava lur cumpart il 2009 a 6,2 % da la populaziun. Al giudaissem appartegnan tenor atgnas indicaziuns radund 15 000 persunas en l’entir pajais. La pli gronda cuminanza gidieua (cun radund 7000 commembers) viva a Vienna.

Pervi da svilups politics, linguistics, culturals ed ideologics è sa sviluppà en l’Austria dapi il temp medieval ina schientscha plitost tudestga che austriaca. Durant la lunga epoca en la quala il regent habsburgais era a medem temp imperatur dal Sontg Imperi roman è sa furmà quai che Ernst Bruckmüller numna il svilup da «duas naziuns tudestgas». Quest dilemma haja manà suenter la fin da la monarchia (1918) ad ina crisa d’identitad che saja per part stada la culpa da la fin precipitada da l’Emprima republica e da la reuniun cun il Reich tudestg il 1938.

Suenter la fin da la Segunda Guerra mundiala han la (re-)fundaziun da l’Austria sco stadi independent ed il svilup economic promovì in’atgna schientscha statala. Oz dastga quella valair sco consolidada.

Ils pli vegls fastizs umans sin il territori da l’Austria odierna derivan dal temp paleolitic ed èn d’attribuir a l’uman da Neandertal. Enconuschenta è daventada la figura da la Venus da Willendorf (Wachau) che vala sco ina da las pli veglias statuettas dal mund.

En il neoliticum èn vegnidas colonisadas successivamain tut las regiuns da l’Austria. Quest temp è marcà da la vieuta dal temp dals chatschaders e rimnaders a la cultura dals vitgs purils. Alura suonda ina fasa transitorica marcada da la tschertga suenter giaschaments da metals, en spezial d’arom. Da quest temp datescha Ötzi, la renumada mumia ch’è vegnida chattada il 1991 en in glatscher al cunfin tranter l’Austria e l’Italia.

Tranter il terz e l’emprim tschientaner a.C. han ins erigì adina pli gronds centers da commerzi e fortificaziuns. En il conturn da Hallstatt sa lascha cumprovar in’explotaziun sistematica da sal; quest lieu dat er il num al temp da fier tempriv. Il temp da fier tardiv, er numnà temp da Latène, stat lura sut l’ensaina dals Celts. Quels avevan populà l’ost ed il sid dal pajais, entant ch’il vest è marcà da la cultura dals Rets.

La gronda part da l’Austria ha l’Imperi roman conquistà l’onn 15 a.C. L’imperatur roman Claudius ha stgaffì enturn 50 s.C. la provinza Regnum Noricum che cumpigliava ina gronda part da l’Austria dad oz. La pli gronda citad romana da questa provinza, Carnuntum, era situada a l’ost da Vindobona che correspunda a la citad da Vienna. Ulteriuras impurtantas citads eran Virunum (al nord da Klagenfurt) e Teurnia (en la vischinanza da Spittal an der Drau).

Suenter la derasaziun dal cristianissem en il decurs dal segund tschientaner s.C. ha cumenzà il declin da l’Imperi roman en rom da la migraziun dals pievels. Repetidamain han ils Gots ed auters pievels germans smanatschà la provinza Noricum. A partir dal 6avel tschientaner èn lura arrivads ils Bajuvars, en il Vorarlberg ils Alemans ed en l’ost ils Slavs ed Avars. Al nord da las Alps è sa furmà a partir da la mesadad dal 6avel tschientaner il Ducadi bavarais. Quel era sa sviluppà or da la schlattaina dals Agilofinger ed ha terminà en curt temp las davosas restanzas da pussanza romana en la regiun.

Vers la fin dal 8avel tschientaner appartegnevan vastas parts da l’Austria odierna al ducadi bavarais entaifer l’Imperi francon da Carl il Grond. Suenter la spartiziun da l’Imperi marcava ina Marcha orientalis en l’Austria Bassa dad oz il cunfin al sidost da l’Imperi ostrofrancon. Quest territori da cunfin dueva furmar l’origin da l’Austria da pli tard. Suenter la Battaglia da Lechfeld (955) ch’ha mess ina fin a l’expansiun dals Ungarais, han ils Bajuvars populà ulteriurs territoris.

L’onn 976 ha l’imperatur Otto II surdà la Marcha Orientalis ad in duca da la famiglia dals Babenberger. En in document dal 996 vegn il territori numnà l’emprima giada Ostarrichi. En autras funtaunas vegn discurrì da Ostland (latin Austria) u Osterland. Ils 8 da settember 1156 ha l’imperatur Fadri I (Barbarossa) declerà l’Austria sco agen ducadi, independent da la Baviera. Cun questa data cumenza pia l’istorgia da l’Austria sco territori independent entaifer il Sontg Imperi roman.

Als Babenbergers èn suandads a partir dal 1278 ils Habsburgais. Fin il 1526 han els pudì augmentar considerablamain lur territori (Stiria, Carinzia, Tirol, Krain e.a.) ed èn daventads in factur da pussanza entaifer l’Imperi. A partir dal 1438 han ils Habsburgais er occupà quasi senza interrupziun l’uffizi dal retg roman-tudestg e tras quai da l’imperatur. 

En il 16avel tschientaner è la refurmaziun sa fatga valair relativamain spert, ma en il 17avel tschientaner l’han ins pudì rebatter. Questa defensiun da la veglia cretta consideravan blers regents habsburgais sco lur missiun la pli impurtanta.

Da la fin dal 15avel tschientaner fin il 1690 èn ils territoris habsburgais er vegnids smanatschads cuntinuadamain d’attatgas nà da l’Imperi osmanic. Suenter avair rebattì l’onn 1683 il segund assedi da la citad da Vienna, han ils dus imperis definì en la Pasch da Karlowitz ed en la Pasch da Passarowitz ils cunfins che duevan valair fin il 1908.

Il 1713 èsi sa mussà che la lingia masculina da la dinastia regenta vegnia bainbaud a murir ora. Perquai han ins definì che la successiun ereditara haja da succeder sur la lingia feminina. A l’imperatur Karl VI è uschia suandada sia figlia Maria Theresia. En la Guerra da successiun austriaca han differents stadis bain empruvà d’augmentar lur pussanza sin donn e cust dals Habsburgais. Ma Maria Theresia, ch’ha fundà cun Franz I Stephan da Lothringen la nova chasa da Habsburg-Lothringen, ha per gronda part pudì mantegnair la pussanza ed ils territoris oriunds.

Il 1804 ha Franz II fundà l’Imperi austriac e surpiglià il titel da Franz I imperatur da l’Austria. Quai per pudair mantegnair l’equivalenza da las pussanzas cun il nov imperatur franzos. Il 1806 ha el stuì desister sut pressiun da Napoleon sin il titel da l’imperatur roman-tudestg. Tras quai è l’istorgia dal Sontg Imperi roman ida a fin; la dinastia habsburgaisa percunter ha cuntinuà entaifer l’Imperi austriac.

Il nov Imperi austriac era in stadi multinaziunal, en il qual i vegniva, sper il tudestg, er discurrì ungarais, talian, tschec, polac, ucranais, rumen, croat, serb, slovac e sloven. Las parts ch’avevan appartegnì al Sontg Imperi roman han tutgà a partir dal 1815 a la Confederaziun tudestga; las sesidas da quella presidiava mintgamai il represchentant da l’Austria. Il 1816 han ins er integrà il pajais da Salzburg sco ducadi en l’Imperi austriac. A partir dal 1328 aveva Salzburg furmà in prinzi-uvestgieu.

Il politicher dominant dal temp dal Biedermeier è stà il minister da l’exteriur e pli tard chancelier statal Metternich. Cun agid da censura ed in sistem da spiunadi è el sa stentà durant la restauraziun da mantegnair l’urden vegl, vul dir la monarchia absoluta. La medema strategia persequitavan da quel temp er la Prussia e la Russia; communablamain han las trais monarchias fundà la Sontga Alllianza. Da l’autra vart ha er cumenzà da quel temp l’industrialisaziun da l’Austria. Il 1837 han ins mess en funcziun en vischinanza da Vienna l’emprima viafier a vapur.

Durant la Revoluziun dal 1848 han ils pievels da la monarchia battì per dapli democrazia ed independenza; il chancelier statal Metternich è vegnì stgatschà. Be grazia a l’armada imperiala sut Radetzky, sustegnida da truppas russas, èsi reussì da mantegnair la monarchia. Il december 1848 ha Franz Joseph, ch’aveva da quel temp 18 onns, substituì l’imperatur Ferdinand I ch’era malsaun. Il nov regent ha laschà mazzar ina dunsaina da generals ungarais ed ha mess en vigur il 1849 ina nova constituziun severa. 

En rom dal dualissem prussian-austriac entaifer la Confederaziun tudestga ha la Prussia sut Bismarck sfurzà tras la varianta ‹pitschna› senza l’Austria. En la Guerra tudestga il 1866 ha l’Austria stuì succumber (Guerra da Königgrätz). La Confederaziun tudestga è sa schliada; en l’ulteriur process d’unificaziun tudestga n’ha l’Austria giugà nagina rolla pli.

Gia il 1859 aveva l’Austria pers suenter la Guerra da Solferino la predominanza en l’Italia dal Nord. E suenter la fin da la Guerra tudestga ha ella er stuì surdar il Veneto a l’Italia ch’era s’alliada cun la Prussia.

Tras questas sconfittas sa chattava l’imperatur er a l’intern en ina posiziun flaivlentada. Perquai è el stà sfurzà d’acceptar refurmas. Cunter sia veglia e resistenza han ses cussegliaders transfurmà il stadi en ina monarchia constituziunala (1861).

Il 1867 èsi reussì da rumper il boicot statal da l’aristocrazia ungaraisa; l’anteriur stadi unitar è vegnì transfurmà en la Monarchia dubla Austria-Ungaria. Questa posiziun privilegiada dals Ungarais ha dentant be anc incità ils moviments naziunals da vart dals Tschecs, Slovacs e Croats.

Suenter las retratgas sfurzadas or da la Germania ed or da l’Italia aveva l’imperatur austriac declerà l’Europa dal Sidost sco nova sfera d’influenza. Cun l’annexiun da la Bosnia il 1878 è l’Austria daventada l’inimi dals activists politics sin il Balcan. En pli è la monarchia s’avanzada ad in concurrent da la Russia che veseva sasezza sco protectura da tut ils Slavs.

Suenter l’Attentat da Sarajevo (assassinat dal successur al tron Franz Ferdinand) ha l’imperatur, cun ses 84 onns ed influenzà d’ina ‹partida da guerrists› a Vienna ed a Budapest, declerà a la Serbia la Guerra. Damai che l’Europa era entretschada da quel temp en ina spessa rait d’allianzas è prorutta entaifer in’emna l’Emprima Guerra mundiala.

L’atun dal 1918 era la sconfitta da la Monarchia dubla inevitabla; quai ha a medem temp muntà la fin da la monarchia insumma. La fin d’october 1918 è il reginavel ungarais sa declerà liber da l’uniun cun l’Austria. Senza l’intervenziun da l’imperatur u da la regenza èn er las ulteriuras parts da la monarchia sa furmadas da nov (Tschecoslovachia) u s’associadas a stadis existents (Italia, Pologna, Rumenia, Jugoslavia e.a.).

En la part tudestga da l’Imperi èn ils anteriurs deputads dal cussegl da l’imperi sa constituids la fin d’october 1918 sco assamblea naziunala. L’entschatta november ha l’imperatur empruvà d’integrar questa nova forza politica en las contractivas d’armistizi. Ma la finala ha l’imperatur stuì suttascriver sulet l’armistizi. Quai ha impedì che negoziaders civils vegnian diffamads pli tard sco traditurs, sco quai che l’ala dretga dueva far pli tard en Germania. Ils 12 da november 1918 ha l’assamblea naziunala decidì ch’il nov stadi (cun il num Deutschösterreich) duaja esser ina republica democratica e far part da la republica tudestga. 

En la nova republica han ins concedì a las dunnas il dretg d’eleger. L’aristocrazia percunter è vegnida dissolvida il 1919. Commembers da la famiglia da Habsburg-Lothringen pudevan be restar en l’Austria, sch’els sa decleravan sco burgais da la nova republica e desistivan en tutta furma da lur pussanza da fin qua. L’anteriur imperatur ha refusà questas cundiziuns ed era gia emigrà en Svizra per prevegnir a ses internament.

Il Contract da Saint-Germain dal 1919 ha prescrit il num Republica da l’Austria ed ha refusà l’adesiun dal nov stadi a la Republica tudestga. Intgins territoris cun maioritad tudestga n’han plinavant betg pudì s’alliar a l’Austria, perquai ch’ils victurs da l’Emprima Guerra mundiala avevan qua auters interess. Quai vala en spezial per las regiuns da la Moravia dal Sid e da l’Egerland (ch’èn daventadas parts da la Tschecoslovachia) sco er dal Tirol dal Sid (ch’è vegnì attribuì a l’Italia). La Carinzia dal Sid, ch’avess subì il medem destin, ha percunter pretendì ina votaziun dal pievel ed è la finala tuttina vegnida attribuida a l’Austria (e betg a la Jugoslavia).

Sut las regenzas da coaliziun dal 1918 al 1920 han ins stgaffì impurtantas leschas socialas. Suenter il 1920 han dentant ils cristiansocials furmà la regenza ensemen cun l’ala dretga. Ils socialdemocrats eran la partida maioritara a Vienna, sin plaun naziunal percunter èn els vegnids stuschads pli e pli en l’opposiziun.

Per dar dumogn a l’iperinflaziun dal 1925 è vegnì introducì il schilling che vegniva er numnà ‹dollar da las Alps›. A la Crisa economica mundiala dal 1929 n’è la politica percunter betg stada buna da respunder adequatamain. Il dumber da dischoccupads è creschì massivamain. 

La situaziun instabila ha provocà la furmaziun da defensiuns burgaisas, e quai tant a l’ala dretga sco er a l’ala sanestra. Il fanadur 1927 ha la polizia sajettà a Vienna 89 persunas che demonstravan cunter acts violents commess da l’ala dretga. En il parlament ha il chancelier federal defendì il proceder da la polizia. L’exempel per l’ala dretga furmava il svilup talian sut Benito Mussolini; l’austromarxissem percunter vuleva furmar ina dictatura dal proletariat e starmentava tras quai ils conservativs. 

Suenter dispitas politicas ha il chancelier cristiansocial Engelbert Dollfuss declerà il mars 1933 la dissoluziun dal parlament naziunal. Ina petiziun segnada da varga 1 milliun persunas e drizzada al president dal stadi Miklas n’è betg vegnida da revocar questa decisiun, cumbain che Miklas era conscient ch’il proceder da Dollfuss cuntrafetschia a la constituziun vertenta.

Profitond da la lescha d’autorisaziun ch’era entrada en vigur il 1917 en connex cun l’economia da guerra, ha Dollfuss cumenzà a relaschar u midar leschas en furma da decisiuns da la regenza. Ils 12 da favrer 1934 èsi vegnì ad ina veritabla guerra civila tranter l’extrema dretga e l’opposiziun socialdemocrata. La regenza ha abattì ils opponents cun forzas armadas, ha sentenzià a la mort cumbattants da la sanestra, relaschà il president da la citad da Vienna e scumandà la partida socialdemocratica.

Il prim da matg 1934 ha Dollfuss relaschà ina constituziun autoritara ch’ha transfurmà l’Austria en in stadi corporativ. Per circumscriver questa dictatura vegniva gia utilisà dals contemporans il term ‹austrofaschissem›. Paucas emnas pli tard han adherents da la NSDAP, ch’era scumandada en l’Austria dapi il 1933, fatg in putsch. Dollfuss è vegnì blessà grevamain ed è mort suenter curt temp. Ses successur è daventà Kurt Schuschnigg.

La politica dal stadi corporativ sa stentava da preschentar l’Austria sco ‹meglier stadi tudestg› che la Germania. E propi sa preschenta l’Austria da quel temp sco dictatura bler pli moderada. Numerusas persunas che vegnivan persequitadas en Germania tras ils naziunalsocialists, en spezial acturs e scripturs, èn emigrads il 1934–1938 en l’Austria. Vers anora copiava il reschim elements dal faschissem talian e dal naziunalsocialissem tudestg: paradas pompusas, l’organisaziun unitara Vaterländische Front, il princip dal manader carismatic, il scumond da partidas concurrentas.

Il putsch dal fanadur 1934 aveva gì lieu senza intervenziun directa da la Germania; betg il davos er perquai che Mussolini vuleva mantegnair da quel temp l’Austria sco stadi independent. Ma suenter il 1934 è la pressiun da vart dal Reich tudestg creschida onn per onn. Tar inscunters cun Hitler è Schuschnigg vegnì mess sut pressiun d’integrar ministers ‹naziunals› (vul dir adherents da lAnschluss, l’adesiun a la Germania) en sia regenza. Ma il chancelier vuleva far frunt a questas tendenzas ed ha annunzià per il 1938 ina votaziun dal pievel davart l’independenza da l’Austria. Per prevegnir a questa votaziun ha Göring sfurzà il president dal stadi Miklas da nominar ina nova regenza naziunalsocialistica sut Arthur Seyss-Inquart. Ils 12 da mars 1938 è la nova regenza entrada en uffizi; a medem temp èn truppas tudestgas marschadas en l’Austria. Da quel temp avevan ils naziunalsocialists gia surpiglià en differentas parts dal pajais la pussanza, per exempel a Graz. Ils 13 da mars ha Hitler, incità da l’euforia da ses aderents en l’Austria, relaschà la lescha d’adesiun dal stadi a la Germania. Immediat ha cumenzà en tut il pajais il terrur cunter ils Gidieus ed ils adversaris politics.

A partir da l’avrigl 1939 è l’Austria vegnida transfurmada territorialmain cun l’idea da far svanir il num Österreich. Quel è vegnì transfurmà en Ostmark ed a partir dal 1942 en Alpen- e Donau-Reichsgau. Er al nivel dals pajais federativs hai dà diversas midadas, tranter auter han ins stgaffì Gross-Wien cun ina surfatscha trais giadas uschè gronda sco avant.

Sper Adolf Hitler, ch’era naschì a Braunau am Inn (Austria Auta), èn er blers auters Austriacs sa participads a la politica ed als crims dal naziunalsocialissem. En l’Austria sezza han ins endrizzà ina spessa rait da champs da concentraziun cun Mauthausen/Gusen sco center. Be a Mauthausen èn vegnids per la vita radund 100 000 praschuniers.

Suenter la fin da la guerra il 1945 è l’Austria vegnida restituida sco stadi independent. Gia ils 27 d’avrigl ha la regenza provisorica sut Karl Renner pudì proclamar la Segunda Republica. Cun paucas excepziuns èn puspè entrads en vigur ils singuls artitgels da la constituziun dal 1920/29.

Tant entaifer la populaziun austriaca sco er en la politica èn ils onns da guerra vegnids tematisads sur decennis or da la perspectiva da l’Austria sco l’«emprima unfrenda da Hitler». Pir plaun a plaun è sa derasada l’enconuschientscha d’er esser conculpaivels da la Segunda Guerra mundiala e dal holocaust.
 
Fin il 1955 è l’Austria stada sutdividida en zonas d’occupaziun. La gronda da quella, al nordost dal pajais, furmava la zona sovietica. Ils 15 da matg 1955 han las quatter pussanzas victuras e represchentants da la regenza austriaca segnà il contract statal da l’Austria. Suenter esser s’obligada da betg pli vulair s’alliar a la Germania e suenter avair declerà la neutralitad, è l’Austria puspè daventada ils 27 da fanadur 1955 in stadi cumplainamain suveran. Ils 26 d’october 1955 èn las davosas truppas d’occupaziun sa retratgas; quest di vegn commemorà fin oz sco festa naziunala.

Ils onns 1960 ha l’Austria purtà avant las Naziuns unidas il conflict cun l’Italia pervi dal Tirol dal Sid. Fin il 1918 aveva quel fatg part da l’Austria; suenter l’Emprima Guerra mundiala aveva l’Italia annectà questa regiun cun maioritad tudestga. Il 1969 han ins cuntanschì in status d’autonomia ch’è sa cumprovà e ch’è anc vegnì schlargià ils ultims decennis.

Dapi la fin dal bloc da l’ost (1989/90), a la quala er l’Austria ha contribuì sia part, na sa chatta il pajais betg pli a l’ur da l’Europa orientada al chapitalissem, mabain entamez in continent en moviment. Il 1995 è l’Austria daventada commembra da l’Uniun europeica; il 1994 avevan dus terzs da la populaziun approvà l’adesiun. Il 2002 ha l’euro remplazzà il schilling ed il 1995 ha l’Austria segnà il Contract da Schengen, uschia ch’i na vegnan betg pli fatgas controllas als cunfins tar l’Italia e la Germania. Suenter ch’era ils ulteriurs stadis cunfinants èn s’alliads a questa cunvegna, è l’Austria circumdada dapi il 2011 dal tuttafatg da pajais dal Spazi da Schengen.

Tenor la constituziun dal 1920/29, ch’è puspè vegnida messa en vigur il 1945, furma l’Austria ina republica parlamentara che sa cumpona da nov pajais federativs (tudestg Bundesländer). Schef dal stadi è il president federal (tudestg Bundespräsident). Quel vegn elegì directamain dal pievel per ina durada d’uffizi da sis onns. Sco stadi federativ èn las incumbensas statalas en l’Austria repartidas tant sin la republica sco er sin ils pajais federativs.

L’Austria enconuscha in sistem da duas chombras: il Cussegl naziunal (tudestg Nationalrat) ed il Cussegl federal (tudestg Bundesrat).

Il Cussegl naziunal cumpiglia 183 deputads e furma la chombra politicamain dominanta. Ella vegn elegida da tut las burgaisas e burgais sur 16 onns tenor il dretg d’elecziun da proporz. Per evitar ina sparpagliaziun memia gronda ston las singulas partidas cuntanscher almain 4 procent da las vuschs per pudair far part dal cussegl naziunal. La perioda d’uffizi dura tschintg onns. 

Il Cussegl federal sa cumpona da deputads ch’ils parlament dals singuls pajais federativs pon eleger tenor lur dumber d’abitants. Tenor il princip federal dal stadi represchenta il Cussegl federal ils interess dals singuls pajais federativs. Areguard dumondas d’interess naziunal sa restrenscha ses dretg sin il veto suspensiv; èn dentant tangads dretgs dals pajais federativs, ha il Cussegl federal il dretg d’in veto absolut. 

Schef da la regenza furma il chancelier federal (tudestg Bundeskanzler). Suenter las elecziun vegn per regla incumbensà il primcandidat da la partida victura da furmar la regenza. Silsuenter vegnan il chancelier, il vicechancelier ed ils ministers designads dal president federal. La regenza è dependenta da la confidenza dal Cussegl naziunal; per quest motiv datti be excepziunalmain regenzas da minoritad.

Sin il nivel dals pajais federativs sa numnan ils parlaments Landtag. Er quels vegnan elegids da las burgaisas e dals burgais ch’han accumplì 16 onns tenor la procedura electorala da proporz. La regenza dals singuls pajais federativs ha num Landesregierung e sa cumpona dal president (Landeshauptmann) e dals ulteriurs commembers da la regenza (Landesräte).

In’atgnadad dal sistem politic en l’Austria furman las Chombras d’economia e d’industria. I sa tracta da gruppas d’interess cun commembranza obligatorica. Questas chombras vegnan mintgamai involvidas en la procedura da consultaziun areguard novas leschas. Ellas valan sco partenaris socials en la tschertga da cumpromiss politics. Tras quai datti be darar moviments da chauma en l’Austria. Savens vegnan questas gruppas d’interess dentant er crititgadas sco segunda regenza betg elegida.

Dapi la fundaziun da la Segunda Republica domineschan duas partidas grondas la politica statala: la partida cristian-conservativa ÖVP (Österreichische Volkspartei) e la partida socialdemocratica SPÖ (Sozialdemokratische Partei Österreichs). Malgrà lur orientaziun politica divergenta han ins furmà pliras giadas ina gronda coaliziun, numnadamain il 1945–1966 ed il 1986–1999.

Sco terza forza politica è sa fatga valair a partir dals onns 1990 la FPÖ (Freiheitliche Partei Österreichs). Quest svilup davent dal sistem iperstabil da duas partidas (cun ina da las pli autas quotas da commembranza da tut il mund) era gia sa mussà en ils onns 1980 cura ch’ils Verds eran s’etablids a l’ur sanester dal spectrum politic. Pli tard ha lura la FPÖ fatg il medem a l’ur dretg. Dal 2000 al 2006 ha la FPÖ fatg part da la regenza sco partenari da coaliziun da la ÖVP, quai ch’ha provocà sancziuns da vart da l’Uniun europeica. Er suenter la spartiziun da la FPÖ il 2005 (en FPÖ e BZÖ) han questas duas partidas populisticas da dretga pudì mantegnair lur forza politica. Il 2008 han ellas fatg communablamain tuttina bleras vuschs sco la SPÖ. Las elecziuns dal 2013 han confermà, cumbain cun sperditas da vuschs, la SPÖ e la ÖVP sco ferma e segund ferma partida e sigilà lur coaliziun.

Er l’Austria ha sentì en il decurs dals davos onns la crisa finanziala ed economica mundiala. Pervi dals vasts pachets d’agid a favur dal sectur da finanzas èn ils debits dal stadi creschids il 2011 sin in nov livel maximal. La finamira tenor ils Contracts da Maastricht ch’ils daivets statals na dastgan betg surpassar 60 % dal product naziunal brut n’ha l’Austria mai pli cuntanschì dapi il 1992 (pia avant l’adesiun a l’Uniun europeica il 1995). Actualmain (2013) munta questa quota a radund 72 %.

Per pudair obtegnair l’independenza statala aveva l’Austria consentì il 1955 envers l’Uniun sovietica sia neutralitad. Durant la Guerra fraida ha l’Austria pudì sa posiziunar sco stadi da colliaziun tranter las pussanzas dal vest ed il bloc da l’ost. Vienna è daventà in lieu da conferenzas internaziunal, damai ch’ins na vuleva sa scuntrar ni en in pajais commember da la NATO ni sin il territori dal Patg da Varsovia.

L’onn 1980 è Vienna daventà la terza sedia uffiziala da las Naziuns unidas (suenter New York e Genevra). Dal 1972 al 1981 è plinavant stà en uffizi l’anteriur minister da l’exteriur Kurt Waldheim sco secretari general da las Naziuns unidas. Gia pli baud eran ulteriuras organisaziuns internaziunalas sa domiciliadas a Vienna sco per exempel l’Organisaziun internaziunala d’energia atomara (IAEO), l’Organisaziun per la segirezza e la cooperaziun en l'Europa (OSCE) u l’Organisaziun dals pajais exportaders da petroli (OPEC).

Radund 85 % da la surfatscha da l’Austria vegnan tratgs a niz tras l’agricultura (45 %) e la selvicultura (40 %). L’agricultura è segnada da manaschis pitschens e mesauns ch’han difficultads da star a per cun la concurrenza internaziunala. Perquai èn blers manaschis sa spezialisads sin products da qualitad. Da tut ils pajais da l’Uniun europeica ha l’Austria la pli auta procentuala da producents da bio.

In dals impurtants products d’export entaifer l’agricultura furma il vin. Er qua han ins chattà ils davos onns la storta en direcziun da products da qualitad. La gronda part dal vin austriac che vegn exportà va en Germania, en Svizra ed en ils Stadis Unids.

L’industria en l’Austria è moderna e cumpetitiva. Ils manaschis industrials ch’eran en il maun public han ins per il pli privatisà en il decurs dal temp.

La gronda part da la prestaziun economica deriva oz dentant – sco en ils blers stadis industrials – dal sectur da servetschs. Qua èn da menziunar en spezial il commerzi, las bancas ed il turissem. Il turissem generescha radund 9 % dal product naziunal brut e sa reparta en parts egualas sin las stagiuns d’enviern e da stad. 

Dus facturs marcheschan l’infrastructura da traffic: d’ina vart la posiziun centrala entamez l’Europa, da l’autra vart la topografia alpina. La furma lunghenta dal pajais fa da l’Austria anc supplementarmain in pajais da transit. Quai pretenda savens vias da traffic da grondas dimensiuns, per part er en territoris ch’èn ecologicamain sensibels.

L’entira rait stradala cumpiglia tranter auter 2185 km autostradas e vias directas e 9959 km ulteriuras vias naziunalas. La lunghezza da tut las vias d’autos en il pajais munta a 114 590 km. La gronda part da las vias vegn mantegnida dal maun public.

En l’Austria valan en general las suandantas limitaziuns da sveltezza: 130 km/h sin autostradas, 100 km/h sin vias directas e 50 km/h entaifer ils abitadis. Per utilisar las autostradas dovran autos da persunas ina vignetta.

La gronda part dals trajects da la viafier giascha en ils mauns da la viafier statala ÖBB (Österreichischen Bundesbahnen). La pli impurtanta viafier, la Westbahn che maina da Vienna a Salzburg, vegn actualmain rendida charrabla per trens ad auta sveltezza. Il medem vala er per la Südbahn che maina da Vienna en direcziun Slovenia ed Italia. Il terz element central è la viafier dal Brenner che furma – tant per la viafier sco per il traffic sin via – ina da las colliaziuns las pli directas tranter la Germania e l’Italia.

La via da navigaziun la pli impurtanta, tant per il traffic da passagiers sco er per il traffic da martganzia, furma il Danubi. Gia dal temp da la monarchia habsburgaisa, il 1829, era vegnida fundada l’emprima Donau-Dampfschiffahrts-Gesellschaft. Fin il 1880 era quella creschida a la pli gronda societad da navigaziun sin auas continentalas. Per gronda part serva la via da navigaziun dal Danubi al turissem.

Il Chanal Rain-Main-Danubi, construì tranter il 1960 ed il 1992, collia la Mar dal Nord (Rotterdam) cun la Mar Naira (Constanța, Rumenia). Quest chanal ha augmentà fermamain il traffic da martganzia sin questa via d’aua la pli directa tras l’Europa. Per gronda part vegnan transportads materials sco glera, metal u charvun.

L’Austrian Airlines Group furmava oriundamain la societad aviatica naziunala ed è vegnida privatisada il 2009. Ella offra las pli bleras colliaziuns a partir da Vienna. Ulteriuras impurtantas plazzas d’aviaziun sa chattan a Graz, Linz, Klagenfurt, Salzburg ed Innsbruck.

La gronda part da l’energia electrica – numnadamain radund 60 % – furneschan implants idraulics (ovras idroelectricas ad aua currenta sco er ovras d’accumulaziun). Per curclar il basegn maximal èn en pli en funcziun divers implants da turbinas da gas. Ils davos onns è er s’augmentada en l’Austria la cumpart da las novas energias. Il 2011 vegniva per exempel producida radund 3,3 % da l’energia electrica tras implants eroelectrics. Quels sa chattan per gronda part en las planiras cun bler vent en l’ost dal pajais.

En ils onns 1970 aveva l’Austria er fatg emprims pass en direcziun da l’energia nucleara. Ina votaziun dal pievel memorabla ha dentant impedì il 1978 che l’ovra atomara Zwentendorf, ch’era gia erigida, vegnia messa en funcziun. Il medem onn è entrada en vigur ina lescha da bloccada areguard l’energia atomara che vala fin oz.

La scola vegn per gronda part manada dal stadi, uschia ch’il sistem da furmaziun è en tut ils pajais federativs il medem. Scolas privatas furman plitost l’excepziun.

Il sistem da scola en l’Austria enconuscha ina scola elementara che dura quatter onns. Silsuenter – pia gia cun diesch onns – han las scolaras ed ils scolars da sa decider ubain per l’uschenumnada scola principala che dura 4 onns ubain per il gimnasi che dura 8 onns e che maina a la matura. Suenter la scola principala èn accessiblas las differentas furmaziuns professiunalas fin a la furmaziun professiunala superiura.

Blers usits regiunals ch’èn sa mantegnids en l’Austria stattan en connex cun las stagiuns u cun l’onn ecclesiastic catolic. Exempels enconuschents furman (en lur num original): Aperschnalzen, Glöckler, Kathreintanz, Kufenstechen, Mariä Lichtmess e Fasching. Sper la musica ed il saut vegn tgirada en l’Austria ina ritga tradiziun da costums e surcusidas (Dirndl, Loden).

Durant il 18avel e 19avel tschientaner ha Vienna furmà il center d’ina ritga cultura musicala. Fin oz existan numerusas operas, teaters ed orchesters che tgiran questa tradiziun. Enconuschent en tut il mund è er il Concert da Bumaun dals Filarmonists da Vienna.

Renumads cumponista da l’epoca classica e romantica èn Wolfgang Amadeus Mozart, Ludwig van Beethoven, Joseph Haydn, Franz Schubert, Anton Bruckner, Franz Liszt e Johann Strauss. En pli è s’etablida a medem temp l’operetta che vegn tgirada sco furma artistica elevada.

En il 20avel tschientaner han Gustav Mahler ed ils cumponists da la Nova scola viennaisa (Arnold Schönberg, Alban Berg ed Anton Webern) revoluziunà la musica classica. Tranter ils numerus dirigents da renum internaziunal èn da menziunar Karl Böhm, Herbert von Karajan e Nikolaus Harnoncourt.

Entaifer la musica moderna è sa sviluppà in agen gener, numnà austropop, represchentà tranter auter da Georg Danzer e Reinhard Fendrich. Bain il pli enconuschent ‹export› da la musica da rock e pop è stà Falco ch’ha gì en ils onns 1980 success internaziunals cun chanzuns sco ‹Rock Me Amadeus› u ‹Jeanny›. En l’entir intschess da lingua tudestga èn plinavant Peter Alexander ed Udo Jürgens da numnar tranter ils chansonniers ils pli populars.

Il musicist da jazz Joe Zawinul (piano / orgla electrica), oriund da Vienna, è arrivà ils onns 1960 en ils Stadis Unids ed ha fatg là carriera cun ils musicists ils pli enconuschents (Julian ‹Cannonball› Adderley, Miles Davis e.a.). Si’atgna band Weather Report è daventada ils onns 1970/80 ina da las pli impurtantas furmaziuns da jazz insumma.

Er la musica populara tradiziunala sco er sias furmas pli novas giaudan en l’Austria ina gronda stima. Concerts e producziuns da televisiun sco il ‹Musikantenstadl› attiran mintgamai in grond public.

L’Austria ha ina scena da teater ordvart ritga e viva che vegn er promovida vastamain tras il maun public. La Wiener Staatsoper furma in dals teaters da musica ils pli enconuschents dal mund ed il Burgtheater vala sco ina da las tribunas las pli impurtantas da l’entir territori tudestg. Ma er il teater popular, il cabaret, l’art da tribuna pitschna e la cultura alternativa flureschan.

La litteratura da teater austriaca dals davos decennis tanscha da la legendara ‹Publikumsbeschimpfung› da Peter Handke sur ‹Der Himbeerpflücker› da Fritz Hochwälder, che tracta il temp naziunalsocialistic, fin al drama ‹Heldenplatz› da Thomas Bernhard che tematisescha ils tratgs catolic-reacziunars da l’Austria.

Enconuschentas acturas ed acturs da teater e film oriunds da l’Austria èn: Romy Schneider, Oskar Werner, Curd Jürgens, Maria Schell, O.W. Fischer, Maximilian Schell, Senta Berger e Klaus Maria Brandauer. En pli è da menziunar Arnold Schwarzenegger ch’ha fatg carriera en ils Stadis Unids tant sco actur sco er sco guvernatur da la California.

Tranter ils impurtants auturs dal 19avel e 20avel tschientaner tutgan: Franz Grillparzer, Ferdinand Raimund, Johann Nestroy, Bertha von Suttner (Premi Nobel da la pasch 1905), Marie von Ebner-Eschenbach, Hugo von Hofmannsthal, Rainer Maria Rilke, Georg Trakl, Franz Kafka, Karl Kraus, Ödön von Horvath, Joseph Roth, Stefan Zweig, Robert Musil, Gustav Meyrink, Franz Werfel, Ingeborg Bachmann, Fritz Hochwälder, Thomas Bernhard, Ernst Jandl, Wolfgang Bauer, Johannes Mario Simmel, Peter Handke ed Elfriede Jelinek (Premi Nobel da litteratura 2004). 

In dals puncts culminants ha la pictura cuntanschì en l’Austria enturn il 1900 cura che Vienna furmava il center dal jugendstil. En il decurs da la segunda mesadad dal 20avel tschientaner è sa sviluppà il realissem fantastic sco furma tardiva dal surrealissem. A questa direcziun è er d’attribuir Friedensreich Hundertwasser cun ses maletgs plitost abstracts e decorativs. In ulteriur fenomen d’atgna tempra ha furmà l’acziunissem dals onns 1960, situà tranter pictura e teater.

Impurtants picturs u grafichers furman Ferdinand Georg Waldmüller, Gustav Klimt, Koloman Moser, Oskar Kokoschka, Egon Schiele, Alfred Kubin, Raoul Hausmann, Arnulf Rainer, Gottfried Helnwein e Franz West. Tranter ils impurtants sculpturs èn da menziunar Niclas Gerhaert van Leyden, Franz Xaver Messerschmidt, Fritz Wotruba, Alfred Hrdlicka e Bruno Gironcoli.

En ils emprims decennis dal 20avel tschientaner ha enconuschì l’Austria ina fluriziun sin differents champs da la scienza. Da numnar èn ils fundaturs da la fisica dals quantums Wolfgang Pauli ed Erwin Schrödinger, il matematicher Kurt Gödel, il fundatur da la psicoanalisa Sigmund Freud, ils filosofs dal circul viennais e Ludwig Wittgenstein, il sociolog empiric Paul Felix Lazarsfeld, il bab da la psicologia d’animals Konrad Lorenz, il filosof Karl Popper u er il constructur d’automobils Ferdinand Porsche. La fisicra Lise Meitner ha sviluppà ensemen cun Otto Frisch l’emprima explicaziun teoretica da la fissiun nucleara. Ina part considerabla dals artists e scienziads numnads è emigrada dal temp dal naziunalsocialissem.

La cuschina austriaca enconuscha d’ina vart ina gronda varietad da tratgas regiunalas tradiziunalas. Da l’autra vart è la cuschina adina puspè vegnida influenzada, tras las colliaziuns culturalas e politicas, d’auters pajais sco l’Ungaria, la Boemia, l’Italia e la Frantscha.

Tipicas spezialitads èn Wiener Schnitzel, Backhendl, Brathendl, Gulasch e tratgas da peschs sco carpa e litgiva. Enconuschentas spaisas dultschas èn la turta da Sacher, il strudel cun maila ed il Kaiserschmarrn.

Tenor il model dals Kaffeehäuser da Vienna, endrizzads a partir dal 1683, èn sa derasads cafés en tut l’Austria. Quels tgiran la cultura da café e la cumbineschan oz per regla cun la purschida dal restaurant burgais. 

Grazia a sia situaziun geografica tutga l’Austria tar l’elita mundiala en numerusas disciplinas da sport d’enviern. En spezial il ski alpin giauda en l’Austria ina gronda stima, quai che sa mussa adina puspè er en il grond dumber d’aspectaturs che persequiteschan las transmissiuns televisivas da las cursas. 

In’auter tratg caracteristic dal sport en l’Austria è la spessezza da las uniuns da sport. En tschertas vischnancas e citads è dapli che la mesadad da la populaziun activa en ina u l’autra uniun. Quai vala tant per sports enconuschents sco il ballape sco er per sports pli exotics sco american football u fistball.

Fin uss han gì lieu duas giadas gieus olimpics en l’Austria, numnadamain il 1964 ed il 1976 ils Gieus olimpics d’enviern ad Innsbruck. Il 2008 ha l’Austria realisà communablamain cun la Svizra il Campiunadi europeic da ballape. Il final ha gì lieu a Vienna.




#Article 5: Chantun Grischun (1893 words)


Il Grischun (sutsilvan: Grischùn; tudestg: Graubünden; talian: Grigioni; franzos: Grisons; latin: Grisonia) è in chantun da la Confederaziun svizra. El è situà il pli a l’ost dal pajais e cumpiglia la pli gronda surfatscha da tut ils chantuns. Topograficamain è il Grischun ordvart sparpaglià; el dumbra radund 150 vals, 615 lais e 937 pizs. Plinavant è il Grischun l’unic chantun da la Svizra ch’è uffizialmain triling (cun las trais linguas tudestg, rumantsch e talian).

Il chantun Grischun porta il num da l’anteriura Lia Grischa. Entaifer la Republica da las Trais Lias furmava quella la lia cun la pli gronda paisa politica. Sco num per l’entir territori cumpara il term ‹Grischun› a partir dal 15avel tschientaner (da quel temp però parallel sper diversas autras denominaziuns).

En il 16avel tschientaner han ils umanists er transferì il num antic ‹Rezia› sin il territori dal Grischun. Quest term fa allusiun als Rets, il pievel preistoric sesent en la part orientala dal Chantun odiern, ed al num ‹Raetia› da l’anteriura provinza romana. Il 1799 è il Grischun vegnì integrà sco ‹Chantun Rezia› en la Republica helvetica ed er oz datti anc divers nums che regordan a questa denominaziun: la Viafier retica, il Museum retic e.a. Cun l’acta da mediaziun dal 1803 è ‹Grischun› daventà il num uffizial.

La vopna dal chantun Grischun sa cumpona da las vopnas da las anteriuras trais lias: Lia Grischa (sisum a sanestra), Lia da las Diesch Dretgiras (sisum a dretga) e Lia da la Chadé (capricorn). 

Il chantun Grischun cuvra l’entir sidost da la Svizra ed è caracterisà topograficamain da muntognas e vals. La surfatscha dal Chantun munta a 7105 kmsup2;, uschia ch’il Grischun è il pli grond chantun svizzer. Pervia da las cundiziuns geograficas/topograficas è el dentant be pauc populà. Ordinà tenor abitants sa chatta il Grischun sin la 14avla plazza. Guauds cuvran 20 % da sia surfatscha. Il Chantun è alpin e cumpiglia las muntognas da las vals dal Rain e da l’En. En il Grischun sa chattan 462 pizs che surpassan 3000 meters sur mar ed in che surpassa 4000 meters: il Piz Bernina (4049 m s.m.; cun il piz lateral La Spedla 4020 m s.m.). Il punct il pli bass furma il cunfin cun il chantun Tessin (260 m s.m.).

Il Grischun cunfinescha cun quatter auters chantuns svizzers: en il sidvest cun il chantun Tessin, en il vest cun il chantun Uri, en il nord cun il chantun Glaruna e cun il chantun Son Gagl. Il Grischun ha cunfins naziunals cun trais pajais: cun il Liechtenstein e cun l’Austria (pajais federativs Vorarlberg e Tirol) en il nord, cun l’Italia en l’ost (Tirol dal Sid) ed en il sid (Lumbardia). Sper il Grischun cunfinescha da tut ils chantuns svizzers be anc il chantun Son Gagl cun trais differents pajais vischins.

Las auas dal Grischun sbuccan en trais differentas mars: il Rain cun ses flums da funtauna (il Rain Anteriur ed il Rain Posteriur) curra vers la Mar dal Nord. Or da l’Engiadina en l’ost dal Chantun sburfla l’En che terminescha ses viadi en la Mar Naira. Las vals italofonas dal Grischun dal Sid (la Val Mesauc cun la Val Calanca, la Val Bregaglia e la Val Puschlav) mainan lur aua vers il Po e cun quel en l’Adria. La part la pli orientala dal Chantun, la Val Müstair, maina si’aua en l’Etsch che va medemamain a finir en l’Adria. Ils trais intschess idrografics da la Mar dal Nord, da la Mar Mediterrana e da la Mar Naira sa scuntran betg lunsch davent da la funtauna da l’En datiers dal Pass Lunghin sur Malögia. Da là davent curra en direcziun nord la Gelgia che maina si’aua via il Rain en la Mar dal Nord, vers sid la Maira che maina si’aua sur il Po en la Mar Mediterrana e vers ost l’En che sbucca en il Danubi che finescha en la Mar Naira.

Per la fin da l’onn 2016 dumbrava il chantun Grischun 197 529 abitantas ed abitants permanents. 18,3 % da tut las abitantas e da tut ils abitants permanents en il Grischun han ina naziunalitad estra.

Sco unic chantun da la Svizra ha il Grischun trais linguas uffizialas: il tudestg, il rumantsch ed il talian. Medemamain è el l’unic chantun, en il qual il rumantsch è ina lingua uffiziala. Pervi da quai e pervi da la diversitad culturala, ma era pervia da sia furma e ses caracter, vegn il Chantun era descrit sco pitschna Svizra entaifer la Svizra.

Las vischnancas e las regiuns pon decider autonomamain davart lur lingua uffiziala e la lingua da scola; il Chantun relascha dentant directivas, spezialmain per sustegnair las linguas minoritaras, il rumantsch ed il talian. 

Abitantas ed abitants tenor lingua principala (dumbraziun dal pievel da l’onn 2000):

Ils dialects germans dal Grischun appartegnan a duas gruppas dialectalas dal tudestg svizzer: 

Il rumantsch che vegn discurrì en differents territoris dal Chantun (oravant tut en la Surselva, en parts dal Grischun Central, en l’Engiadina ed en la Val Müstair) sa cumpona da tschintg idioms scrits, numnadamain dal sursilvan, sutsilvan, surmiran, puter e vallader. En pli exista il rumantsch grischun sco lingua da scrittira communabla stgaffida a l’entschatta dals onns 1980.

Ils dialects lumbards da la Val Mesauc, da la Val Calanca, da la Bregaglia, da Beiva e da la Val Puschlav èn varietads dal lumbard alpin. 

En connex cun la realisaziun d’ina lescha davart la mancanza dal dretg da burgais ha la Confederaziun repartì al chantun Grischun enturn l’onn 1850 in grond dumber da Jenics. Dapi lura ha il Grischun era ina populaziun (betg registrada statisticamain, ma stimada sin var 35 000 persunas en tut la Confederaziun) da lingua materna jenica.

En consequenza da l’autonomia communala ha mintga vischnanca pudì decider en il 16avel tschientaner autonomamain davart sia confessiun. Fläsch è stà l’emprima vischnanca refurmada dal Chantun, suenter èn suandads St. Antönien e blers auters vitgs. Il Grischun tutga pia tar ils chantuns paritetics.

Per gronda part catolicas èn la Val dal Rain Anteriur cun la Val Lumnezia (senza Vuorz, la Foppa e la Val Stussavgia), plinavant il Surses (senza Beiva) e la part centrala da la Val Alvra sco er la Val Mesauc e la Val Puschlav. Per gronda part refurmadas èn il Partenz, il Scanvetg ed il Landwassertal, plinavant il Valragn, la Val Schons ed Avras sco era l’Engiadina (senza Tarasp e Samignun), la Bregaglia e la Val Müstair (senza Müstair). Confessiunalmain maschadadas èn las regiuns Tschintg Vitgs, il Plaun e la Tumleastga.

L’istorgia dal Grischun sa lascha divider en las suandantas epocas: il temp preistoric e roman, la Currezia medievala, la Republica da las Trais Lias (1524–1798), il Chantun Rezia (1799–1803) ed il chantun Grischun (a partir dal 1803).

La constituziun chantunala actuala datescha da l’onn 2003. ()

L’autoritad legislativa è il Cussegl grond che dumbra 120 commembers. Las deputadas ed ils deputads vegnan elegids tenor procedura da maiorz mintgamai per quatter onns. Il pievel è ultra da quai participà directamain a la legislaziun: 4000 persunas cun dretg da votar u in settavel da las vischnancas pon pretender ina midada da la constituziun, 3000 persunas cun dretg da votar u in otgavel da las vischnancas pon proponer ina lescha u ina midada da lescha (iniziativa dal pievel), 1500 persunas cun dretg da votar u in dieschavel da las vischnancas pon pretender ch’ina lescha statuida dal Cussegl grond u ina midada da tala stoppia vegnir suttamessa a la votaziun dal pievel. Midadas da la constituziun pretendan ina votaziun dal pievel. 

La Regenza (pli baud: Cussegl pitschen) dumbra tschintg commembras e commembers e vegn elegida dal pievel tenor procedura da maiorz. Ina perioda d’uffizi dura quatter onns; il presidi mida mintg’onn en roda.
Ils cussegliers guvernativs actuals (perioda d’uffizi 2019–2022) e lur departaments èn:

President da la Regenza per l’onn 2021 è Mario Cavigelli, vicepresident Marcus Caduff. Manader da la Chanzlia chantunala è dapi il 2017 chancelier Daniel Spadin.

Las pli autas dretgiras dal Chantun èn la Dretgira chantunala (responsabla surtut per fatgs civils e penals) e la Dretgira administrativa (surtut responsabla per cas da dretg public). Instanzas subalternas èn las dretgiras regiunalas.

En il parlament federal deleghescha il Grischun sco mintga chantun dus represchentants per il Cussegl dals chantuns. En il Cussegl naziunal po il Grischun trametter tenor sia cumpart a la populaziun svizra  tschintg deputadas e deputads.

Il 2016 è entrada en vigur la refurma dal territori che las votantas ed ils votants dal Grischun han approvà ils 30 da november 2014. Tenor quella è il Chantun dividì da nov en 11 regiuns che figureschan sco purtadras da las incumbensas statalas. Ellas stattan a disposiziun tant per incumbensas communalas sco er chantunalas e remplazzan ils 39 circuls, las 14 corporaziuns regiunalas ed ils 11 districts da pli baud.

Grazia al svilup istoric giaudan las vischnancas en il chantun Grischun in’autonomia communala sco en nagin auter chantun.

L’agricultura da muntogna ch’è indispensabla per la colonisaziun duraivla da tschertas valladas surviva grazia a la vendita da products da nischa e subvenziuns generusas tras la Confederaziun ed il Chantun. La branscha la pli impurtanta è oz dentant il turissem.

Il turissem è in factur economic enorm impurtant, tant da stad sco d’enviern, principalmain en las regiuns Engiadina, Tavau/Claustra, Arosa, Lai e Flem, ma era en quasi tut il rest dal Chantun. In turissem particular è quel da cura e bogns a Val S. Pieder, Scuol, Andeer e San Murezzan. 

Il traffic ha segnà dapi l’antica la colonisaziun dal territori dal Chantun odiern. Il traffic da commerzi furmava in impurtant factur economic; gia dal temp dals Romans passavan chars sur il Pass dal Güglia. Il 1387 ha l’uvestg da Cuira incumbensà l’aristocrat bregagliot Jakob von Castelmur da schlargiar il Pass dal Set ad ina via charrabla.

A l’entschatta dal 20avel tschientaner existivan en il chantun Grischun vias d’ina lunghezza da radund 1000 kilometers; ma il traffic individual motorisà è vegnì cumbattì vehementamain. Tranter il 1907 ed il 1919 ha il suveran relaschà repetidamain scumonds correspundents. L’admissiun dals autos a partir dal 1925 ha pretendì in schlargiament da la rait da vias, per il qual i mancavan però al Chantun ils meds finanzials. A partir dal 1935 ha la Confederaziun mess a disposiziun meds finanzials ch’han pussibilità d’avrir ils impurtants pass alpins al traffic motorisà. Il pass grischun il pli impurtant tranter nord e sid è ozendi il San Bernardin che collia la Valragn ed il Mesauc.

La rait da vias chantunala odierna cumpiglia 163 kilometers vias naziunalas, 597 kilometers vias principalas e 835 kilometers vias da colliaziun. Las valladas las pli impurtantas ed ils gronds lieus da turissem dal Chantun èn ultra da quai accessibels tras ina viafier a binari stretg, la Viafier retica. 

L’architectura grischuna ed ils edifizis istorics èn ordvart relevants per il turissem. Il Grischun ha ina gronda spessezza da chastels e posseda cun la claustra da Müstair e la Viafier retica en la cuntrada Alvra/Bernina bains culturals da muntada mundiala (UNESCO). Dapi il 1991 è la punt dal Salginatobel sin via d’Aschera a Schuders l’unic monument mundial da la Svizra tenor la premiaziun da la ASCE (American Society of Civil Engineers).

Il chantun Grischun ha sviluppà in’atgna cuschina che sa differenziescha d’autras cuschinas regiunalas svizras. Products regiunals tipics èn la pulpa setgentada a l’aria ed autras spezialitads da charn setgentada sco l’andutgel. Tratgas tipicas èn capuns, plain in pigna, bizochels, canedels, maluns, la turta da nuschs sco er in scuflà da charnpiertg.




#Article 6: Chantun Appenzell Dadens (100 words)


Il Chantun Appenzell Dadens, mintgatant era scrit Appenzell dadens, (tudestg Appenzell Innerrhoden, franzos Appenzell Rhodes-Intérieures, lingua taliana Appenzello Interno) è in chantun da lingua tudestga en il nordost da la Svizra.

Appenzell dadens è il chantun svizzer cun ils pli paucs abitants (var 15'000 abitants) ed cun la segund pitschna surfatscha (avant Basilea-Citad)

Il chantuna Appenzell dadens cunfinescha cun il chantun Appenzell dador ed è dal rest circumdà dal chantun Son Gagl. 

Il pli ault culm è il Säntis (2503 m. s. m.) en l'Alpstein, sin il qual ils trais chantuns Appenzell dadens, Appenzell dador ed Son Gagl sa tutgan. 




#Article 7: Chantun Tessin (303 words)


La republica ed il chantun Tessin (talian: Ticino) è in chantun da la Svizra. Sco Genevra, Neuchâtel, e Giura, quest chantun dir republica a ella sezza, ina part da la Confederaziun Svizra.

Il chantun Tessin sa chatta en il sid da la Svizra. Il chantunt è quasi dal tuttafatg circunda per l'Italia che giascha en il ost, il vest ed il sid. En il nord giaschan il chantuns dal Vallais ed il Uri, ed en il nordost dal chantun, giascha il Grischun.

Sia surfatscha è da 2,812 km², dal qual trais quarts èn considerà productiv. Guauds cuvreschan in terz dal territori, però era ils lais Maggiore e Lugano cumponan ina part considerabel dal chantun. 

Il Monte Ceneri parte il chantun Tessin en duas parts: il Sopraceneri, al nord ed il Sottoceneri al sid.

L'autoritad legislativa è il cussegl grond (Gran Consiglio) che dumbra 90 commembers e vegn elegì dal pievel tenor procedura da maiorz per quatter onns (tenor la constituziun veglia l'emprim per dus, lura per trais onns). La presidenta dal cussegl grond è Monica Duca Widmer (PCD).

La Regenza dumbra tschintg commembers e vegn elegida dal pievel era tenor procedura da maiorz e medemamain per quatter onns. Il presidi mida annualmain en roda.
Ils cussegliers guvernativs e las cusseglieras guvernativas en uffizi e lur departaments correspundents èn:

La presidenta da la regenza per l'onn 2014 è Manuele Bertoli, vicepresident Norman Gobbi. Manader da la chanzlia chantunala è Giampiero Gianella.

Las suandantas vischnancas dal chantun han dapli che 5'000 abitants (stan: 31. december 2011)

Per ulteriuras vischnancas vesair: Vischnancas dal chantun Tessin

Il chantun Tessin è politicamain partì en otg districts (ils districts èn puspè partids en 37 circuls):

Vesair era: Districts dal chantun Tessin

Dapi il 14 d'avrigl 2013 ha il Tessin 135 vischnancas ed 8 districts.

Vesair Istorgia dal chantun Tessin.




#Article 8: Italia (6547 words)


L’Italia (uffizialmain Republica Taliana, talian Repubblica Italiana) è in stadi situà en l’Europa dal Sid. La pli gronda part dal pajais sa chatta sin la Peninsla Apennina ch’è circumdada da la Mar Mediterrana. La chapitala da l’Italia è Roma.

En l’antica furmava il territori da l’Italia odierna il center da l’Imperi roman. Durant il 14avel e 15avel tschientaner è la Toscana stada la regiun da partenza da la renaschientscha. Il stadi talian modern exista dapi il risorgimento (segunda mesadad dal 19avel tschientaner).

La pli gronda part da l’Italia sa chatta sin ina peninsla ch’ha la furma d’in stival. L’extensiun maximala nord-sid munta a var 1200 km. Ils stadis cunfinants èn la Frantscha (lunghezza dal cunfin cuminaivel: 488 km), la Svizra (734,2 km), l’Austria (430 km), la Slovenia (232 km) sco er las enclavas San Marino (39 km) e Citad dal Vatican (3 km). Campione d’Italia furma in’exclava da l’Italia sin territori svizzer.

La chadaina da las Apenninas s’extenda tras il pajais per lung da l’axa longitudinala e culminescha en il Gran Sasso (2912 m). En il nord appartegna ina part da las Alps a l’Italia: il piz il pli aut è il Mont Blanc (Monte Bianco) cun 4810 m autezza, situà al cunfin cun la Frantscha. Il pli aut massiv muntagnard che sa chatta cumplettamain sin territori talian è il Gran Paradiso cun 4061 m autezza che giascha en las Alps Graias.

Per lung da la costa occidentala taliana chatt’ins dal nord al sid tranter auter la Riviera taliana en la Liguria ed il Golf da Napoli en la Campania. La costa orientala da Triest fin al Gargano en il nord da la Puglia (tenor autras definiziuns: fin al Canal d’Otranto) numn’ins Costa adriatica. La lunghezza totala da la costa taliana munta a 7375 km.

La Planira dal Po (tal. Pianura Padana) en il nord cumpiglia ina surfatscha da 50 000 km². Ella furma la pli gronda planira da l’Italia ed è a medem temp il center economic dal pajais.

Idrograficamain tutga l’Italia quasi exclusivamain tar la Mar Mediterrana. Mo la val dal Lai da Livign e la part sisum da la Val d’Uina mainan lur auas sur l’En ed il Danubi en la Mar Naira; là dreneschan medemamain la Drava che nascha en il Pustertal (Tirol dal Sid) e la Gailitz che percurra la cuntrada enturn Tarvis. Il Lago di Lei maina l’aua sur il Rain en la Mar dal Nord. Ils flums ils pli lungs èn il Po (652 km), l’Adisch (410 km) ed il Tiber (405 km), suandads da l’Adda e da l’Oglio. Als lais ils pli gronds appartegnan il Lai da Garda, il Lago Maggiore ed il Lai da Com che giaschan en il nord da l’Italia sco er il Lago di Bolsena ed il Lago Trasimeno situads entamez il pajais.

A l’Italia appartegnan las inslas mediterranas Sicilia e Sardegna sco er ils archipels da las Isole Eolie ed Isole Egadi situads en il nord respectivamain en il vest da la Sicilia. Enturn la Sardegna giaschan numerusas inslas pitschnas, tranter auter Sant’Antioco, Asinara, San Pietro e la gruppa d’inslas da La Maddalena. Las Inslas da Ponza s’extendan avant la costa da Latium. En la Mar Tirrena sa chattan plinavant l’Archipel Campan (cun l’insla Capri) e l’Archipel Toscan (cun Elba). En l’Adria giaschan las Inslas Tremiti. Las Isole Pelagie che cumprendan era Lampedusa e l’insla Pantelleria appartegnan geologicamain gia a l’Africa.

Il vulcan il pli enconuschent situà sin la terra ferma è il Vesuv en vischinanza da Napoli. Daspera datti sin inslas talianas dus auters vulcans enconuschents, numnadamain l’Etna (en la part orientala da la Sicilia) ed il Stromboli (sin l’insla da medem num situada en il nord da la Sicilia).

Pervi da las cundiziuns geologicas datti en l’Italia adina puspè terratrembels. Il terratrembel il pli grev dal 20avel tschientaner (cun ina fermezza da 7,2 sin la scala da Richter) ha gì lieu l’onn 1908 a Messina e Reggio Calabria ed ha chaschunà var 130 000 morts. Il 1930 ha la terra tremblà sper Avezzano en las Abruzzas, nua ch’igl ha dà 15 000 unfrendas. L’Irpinia, ina regiun en l’Italia Meridiunala, è stada pertutgada l’onn 1980 da plirs terratrembels ch’han irradià da Portici sper Napoli fin a Potenza en la Basilicata; 3000 persunas han pers la vita. Er l’Italia dal Nord è adina puspè pertutgada da terratrembels. Il terratrembel catastrofal ch’ha gì lieu l’onn 1976 en il Friul ha chaschunà 965 victimas. Ultra da quai datti savens squass pli pitschens, tar ils quals ins registrescha per ordinari be donns materials, ma per part era victimas (p.ex. plirs tschients morts il 2009 e 2016 en l’Italia Centrala).

L’Italia giascha en la zona temprada. Be darar creschan las temperaturas sin passa 40 grads la stad respectivamain sut minus 10 grads l’enviern. Il clima variescha dentant fermamain da regiun tar regiun. Il nord da l’Italia è enserrà da las Alps e da las Apenninas toscan-emilianas. In’influenza da la Mar Mediterrana sin il clima n’è perquai strusch perceptibla en questa part dal pajais. Ils envierns èn fraids ed en las citads da la Planira dal Po datti mintgatant naiv; las stads percunter èn chaudas fin fitg chaudas e l’umiditad da l’aria è auta. En las Alps ed en las Apenninas regia en general in clima alpin chaud, la stad è dentant temprada. L’Italia Centrala ha in clima relativamain temprà. Las variaziuns da las temperaturas n’èn qua betg uschè grondas sco en il nord. Il sid dal pajais e las inslas talianas han en general in clima mediterran chaud. La quantitad da precipitaziuns è qua pitschna, quai che po chaschunar periodas da setgira. Ils envierns n’èn betg fitg fraids e durant la primavaira e l’atun èn las temperaturas cumparegliablas cun quellas da la stad.

Actualmain datti en l’Italia 24 parcs naziunals cun ina surfatscha totala da 1 500 000 ha (15 000 km²); quai èn var 5 % dal territori dal pajais. Il Parc naziunal dal Gran Paradiso è vegnì fundà sco emprim l’onn 1922. Il parc natiral il pli grond è il Parc naziunal dal Pollino che s’extenda sur passa 190 000 ha en las regiuns Calabria e Basilicata en l’Italia Meridiunala. Ultra da quai han ins endrizzà 134 parcs regiunals cun ina surfatscha totala da 1 300 000 ha (13 000 km²). Uschia stattan ulteriurs 40 % dal territori naziunal sut protecziun speziala.

L’Italia ha ina populaziun da radund 60 674 000 abitants (prim da schaner 2015) ed è cun quai sin la 23avla plazza da la rangaziun mundiala. Aifer l’Uniun europeica occupava il pajais da quel temp la quarta plazza suenter la Germania, la Frantscha ed il Reginavel Unì.

Var 67 % dals abitants da l’Italia, oravant tut en il nord, vivan en citads. Surtut tranter il 1950 ed il 1960 hai dà ina ferma depopulaziun da las regiuns ruralas sutsviluppadas en direcziun da las citads (fugia da la champagna). Dapi ils onns 1980 datti in svilup cuntrari a favur d’avantlieus e citads pitschnas (suburbanisaziun). Las citads talianas cun il pli grond dumber d’abitants èn (situaziun dal 2008): Roma (2 718 768); Milaun (1 299 633), Napoli (973 132), Torino (908 263), Palermo (663 173) e Genua (610 887). Resguardond l’entira aglomeraziun furma Milaun (4 373 992) la pli gronda regiun metropolitana, suandada da Roma (4 022 723) e Napoli (3 865 701).

Il talian furma la lingua uffiziala naziunala. Daspera datti era linguas uffizialas regiunalas: tudestg e ladin en il Trentino-Tirol dal Sid, franzos en la Val d’Aosta e sloven en il Friul-Venezia Giulia. Ultra da quai preveda la lescha 482 dal 1999 la protecziun da las suandantas linguas minoritaras:

Cun intginas excepziuns n’è questa lescha dentant betg vegnida realisada fin ussa. Uschia mancan per gronda part uffizis plurilings, la scolaziun en lingua materna e la promoziun da programs da radio e televisiun en la lingua minoritara. Be areguard la toponomastica hai dà in tschert svilup. Per exempel mussan numerus signals da traffic en Sardegna er il num en sard.

Il bersntolerisch/mòcheno ed il cimbric furman dialects bavarais ch’èn derasads en intginas inslas linguisticas en il nordost da l’Italia. En il Trentino stattan els sut protecziun sco linguas minoritaras. En singulas vals alpinas en il nordvest dal pajais discurran ins plinavant il dialect autischem aleman dals Gualsers ch’è reconuschì e vegn promovì en la regiun autonoma Val d’Aosta.

Ultra da quai discurran ins en l’Italia bleras variantas neolatinas (‹dialetti›) che n’èn betg renconuschidas da las autoritads. Las tavlas da lieu, oravant tut da vischnancas che vegnan administradas da la Lega Nord, mussan per part er ils nums en la varianta regiunala.

L’Italia ha ina da las pli autas aspectativas da vita dal mund. L’onn 2005 importava ella 80,4 onns (dunnas: 83 onns; umens: 78 onns) ed era cun quai dus onns sur la media da l’OECD da 78,6. Per part vegn l’auta aspectativa da vita attribuida a la cuschina mediterrana cun si’auta cumpart da tratgas da pesch, ieli d’ulivas e legums. Tuttina sa lascha er observar en l’Italia in augment da la quota da persunas cun surpaisa. Questa valur è s’augmentada da 7,0 % l’onn 1994 a 9,9 % l’onn 2005.

Il sistem da sanadad en l’Italia è structurà al stgalim regiunal. Las agenturas da sanadad localas (Agenzie Sanitarie Locali) suttastattan mintgamai a las regenzas da las regiuns. Quai ha per consequenza che la qualitad dals servetschs sa differenziescha fermamain da regiun tar regiun. Igl è da constatar ina differenza nord-sid che chaschuna in «turissem da sanadad» pregnant, oravant tut vers las regiuns Veneto, Lumbardia ed Emilia-Romagna.

L’Italia è marcada dal catolicissem. La Baselgia catolica ha tradiziunalmain ina grond’influenza. Quai sa reflectescha er en il grond dumber da sacerdots (51 259) e cardinals (38). En tut sa decleran 51 milliuns Talians sco catolics.

La segund gronda cuminanza religiusa cristiana furman ils ortodoxs cun 1 178 000 aderents. Lur cumpart è s’augmentada particularmain tras l’immigraziun da Rumens. Ils protestants (tranter auter valdais e baptists) cumpiglian radund 548 000 crettaivels. Var 500 000 persunas che vivan en l’Italia appartegnan ad autras confessiuns cristianas.

Tranter las ulteriuras religiuns furman ils muslims la pli gronda cuminanza. Ultra da quai vivan en l’Italia 198 000 budists e 109 000 hindus. La cuminanza ebraica dumbra var 45 000 commembers. Quatter milliuns persunas en l’Italia èn senza confessiun.

Tranter il 1875 ed il 1915 è l’Italia stada pertutgada d’ina gronda unda d’emigraziun. I vegn stimà che 14 milliuns persunas hajan bandunà il pajais per chattar lur fortuna sco lavurers en ils Stadis Unids u sco purs en l’Argentinia e Brasilia. Quest dumber è tant pli impressiunant sch’ins considerescha che l’Italia dumbrava a la sava dal tschientaner 33 milliuns abitants.

La dictatura faschistica ha empruvà d’impedir l’emigraziun, ma n’ha betg pudì evitar ch’ulteriurs 2,6 milliuns Talians han bandunà il pajais. Tranter las Guerras mundialas eran surtut l’Argentinia e la Frantscha destinaziuns populars, perquai ch’ils Stadis Unids e la Brasilia avevan introducì reglas d’immigraziun pli strictas. Suenter la Segunda Guerra mundiala è l’emigraziun sa drizzada pli e pli vers stadis europeics. Blers ch’èn ids per in tschert temp sco lavurers esters en Belgia, Germania, Frantscha u en Svizra èn la finala sa stabilids per adina en la nova patria.

En il register da persunas consular èn anc adina registrads 4 106 640 Talians che vivan a l’exteriur. Ils pajais cun il pli grond dumber da burgais talians èn (situaziun dal 2009): l’Argentinia (659 655), la Germania (648 453), la Svizra (533 821), la Frantscha (343 197) e la Brasilia (297 137). Ils Talians a l’exteriur dastgan vuschar en las elecziuns dal parlament ed èn represchentads cun 12 deputads e 6 senaturs. Plinavant pon els sa participar a votaziuns dal pievel naziunalas.

Il dumber da persunas estras che vivan en l’Italia è s’augmentà constantamain dapi ils onns 1990. Tenor l’Institut naziunal da statistica ISTAT vivevan il prim da schaner 2011 4 563 000 burgais esters en l’Italia, quai èn 7,5 % da la populaziun totala. Ils pajais d’origin cun il pli grond dumber d’immigrants èn (situaziun dal 2010): la Rumenia (997 000), l’Albania (491 000), il Maroc (457 000), la China (201 000) e l’Ucraina (192 000). Plinavant vivan en l’Italia var 120 000 Roma (70 000 sco burgais talians). 

La plipart dals immigrants viva en il nord ed en il center da l’Italia, nua ch’els importan 10,1 % respectivamain 9,7 % da la populaziun. En il sid da l’Italia munta la quota dals esters a 2,9 %. L’immigraziun clandestina n’è betg resguardada en questas indicaziuns statisticas. L’OECD quinta cun 500 000 fin 750 000, la Caritas schizunt cun 1 milliun persunas estras che vivan illegalmain en l’Italia.

Gia en temps preromans furmava l’Italia, oravant tut l’Italia Centrala (Etruria) e Meridiunala (Magna Graecia), in impurtant center cultural da l’Europa. Silsuenter è ella stada durant tschientaners il center da l’Imperi roman. Durant il temp da Caesar è l’Italia, che tanscheva avant fin al Rubicon sper Rimini, vegnida engrondida cun integrar la provinza Gallia Cisalpina. La Sicilia e la Sardegna (sco era la Corsica) èn pir vegnidas incorporadas en il decurs da la refurma territoriala da l’imperatur Dioclezian en la terra materna taliana.

Suenter l’invasiun dal Gots e Langobards (410 resp. 568) è il pajais sa dividì en ina retscha da dominis separads. En il 8avel e 9avel tschientaner, oravant tut sut Pippin e Carl il Grond, han ils Francs dominà il territori, ma sut ils successurs da Carl è sa furmà in agen reginavel d’Italia. Dapi Otto il Grond appartegneva la pli gronda part da l’Italia al Sontg Imperi roman, entant ch’il sid è restà ditg sut influenza bizantina. Suenter il 827 han l’emprim ils Arabs conquistà la Sicilia e parts da l’Italia dal Sid; en il 11avel tschientaner è questa regiun lura vegnida sut domini dals Normans.

Entras la prosperitad dal commerzi e dal traffic han numerusas citads en l’Italia gudagnà a partir dal 11avel tschientaner adina dapli autonomia. Ils Normans e numerusas citads en l’Italia dal Nord han sustegnì il papa en la dispita d’investitura. Suenter il declin da la dinastia normana èn malreussidas las tentativas dals Staufers da renovar la pussanza imperiala, quai malgrà che Heinrich VI ha surpiglià tras maridaglia il reginavel norman. Dapi il 1268 dominava la dinastia franzosa dals Anjou il sid da l’Italia; il nord è sa dividì en ina retscha da citads-stadi ch’appartegnevan formalmain al Sontg Imperi roman, ma ch’eran en vardad bunamain autonomas.

En il decurs da la renaschientscha (14avel e 15avel tschientaner) èn sa stabilidas tschintg pussanzas che faschevan valair lur dominanza economica e culturala: 
il reginavel da l’Italia Meridiunala, il stadi da la baselgia, Firenza, Milaun e Venezia. Quests dominis partevan la pussanza politica e las resursas da la peninsla en coaliziuns alternantas.

Il declin da l’Italia ha cumenzà suenter la scuverta da l’America cun il spustament dal commerzi en las colonias da surmar. Vitiers è vegnida la controlla osmanica sur la Mar Mediterrana. Politicamain è l’Italia daventada il termagl da pussanzas estras. En il 16avel tschientaner cumbattevan la Frantscha e la Spagna per la posiziun predominanta sin la peninsla. La Battaglia da Pavia (1525) ha decidì la supremazia da la Spagnia ch’ha pudì sa segirar la controlla directa sur l’Italia Meridiunala e la Lumbardia.

Il 1796 han las truppas revoluziunarias franzosas surpiglia la pussanza. Il 1805 è Napoleun sa curunà a Milaun sco retg da l’Italia. Suenter il collaps da ses domini è l’Italia vegnida en la zona d’influenza da l’Imperi austriac. Dal 16avel fin viaden il 19avel tschientaner è la pli gronda part da l’Italia pia stada sut domini ester.

Il moviment naziunal ch’è suandà en la segunda mesadad dal 19avel tschientaner è entrà en l’istorgia sco risorgimento. Sustegnidas da la dinastia da Savoia (sco regents da Sardegna-Piemunt) han gruppas da voluntaris sut Giuseppe Garibaldi cuntanschì en rom da trais guerras d’independenza l’unificaziun da l’Italia. Ils 17 da mars 1861 è Vittorio Emanuele II vegnì proclamà a Turin sco retg da l’Italia. Il 1865 è la citad da Firenza daventada la chapitala. En la Terza guerra d’independenza il 1866 èn er il Veneto austriac ed il Friul vegnids annectads al Reginavel da l’Italia. La citad da Roma è vegnida conquistada l’onn 1870 e tschernida in onn pli tard sco chapitala dal pajais. Ultra da quai empruvava l’Italia – sumegliant ad autras pussanzas europeicas – da fitgar pe sco pussanza coloniala, numnadamain al Corn da l’Africa (Eritrea, pli tard Etiopia) ed en la Libia. Suenter avair terminà l’Emprima Guerra mundiala sco pajais victur da vart da l’Entente, ha l’Italia annectà la Venezia Giulia, il Trentino ed il Tirol dal Sid da lingua tudestga.

L’october 1922 han Benito Mussolini ed ils faschists surpiglià la pussanza en il Marsch sin Roma. Pass per pass ha Mussolini transfurmà il reginavel en in stadi totalitar ed è sa mess a la testa da quel sco duce (manader). Anc avant l’entschatta da la Segunda Guerra mundiala ha l’Italia assaglì ed occupà l’Abessinia. L’occupaziun encunter il dretg internaziunal fascheva part da la finamira da Mussolini da far reviver l’Imperi roman. Cun diversas cunvegnas è Mussolini sa lià al Reich tudestg ed è entrà en la Segunda Guerra mundiala sin la vart da las pussanzas da l’axa. L’invasiun dals Alliads e la cupitga da la regenza l’atun 1943 han fatg fin cun il faschissem talian en l’Italia Meridiunala. En il nord dal pajais han ils cumbats dentant cuntinuà enfin il matg 1945. Suenter la fin da la guerra è la plipart da la Venezia Giulia vegnida attribuida a la Jugoslavia ed il Dodekanes talian a la Grezia. Ultra da quai ha l’Italia pers tut sias colonias.

L’istorgia taliana dal suenterguerra è segnada da numerusas midadas da la regenza. Enfin ils onns 1990 ha la Democrazia cristiana giugà ina rolla dominanta. Silsuenter è l’elita politica vegnida scuada davent dal scandal da corrupziun Tangentopoli e da las mesiras da scleriment correspundentas (Mani pulite). Dapi lura è la politica dal pajais stada marcada da las allianzas politicas enturn Silvio Berlusconi e da coaliziuns alternantas dal center sanester. Ina sfida permanenta per il stadi talian furma plinavant il cumbat cunter la mafia en il sid dal pajais.

Dapi il 1946 furma l’Italia ina republica parlamentara. Schef da stadi è il president. Il parlament consista da duas chombras (Chombra dals deputads e Senat). Quellas vegnan elegidas mintga tschintg onns ed han ils medems dretgs. 

Ultra da quai è l’Italia commembra da pliras organisaziuns internaziunals. L’onn 1949 è l’Italia entrada en la NATO. Dapi il 1955 fa ella part da las Naziuns unidas. Plinavant è il pajais stà in dals commembers fundaturs da l’Uniun europeica dad oz (1952). Il 2002 è la lira vegnida remplazzada tras l’euro.

Politicamain è l’Italia dividida en 20 regiuns (regioni) cun atgna regenza. Questas regiuns èn sutdivididas en totalmain 109 provinzas (provincie) e lezzas en bundant 8000 vischnancas (comuni).

Las regiuns disponan mintgamai d’ina constituziun regiunala che sa numna statut. Tschintg regiuns han in statut spezial (statuto speciale) che conceda ad ellas ina grond’autonomia: la Val d’Aosta, la regiun Trentino-Tirol dal Sid, la regiun Friul-Venezia-Giulia, la Sardegna e la Sicilia. Cun excepziun da las provinzas autonomas Tirol dal Sid e Trentino n’èn las provinzas per regla betg munidas cun cumpetenza legislativa, mabain exequeschan incumbensas administrativas.

L’Italia è in stadi industrial dal qual l’economia publica è vegnida dirigida sur lung temp dal stadi: il concern statal IRI (1933–2002) cumpigliava fin a 1000 societads affiliadas e dumbrava fin a 500 000 emploiads. En il decurs dals onns 1990 èn las interpresas statalas vegnidas privatisadas successivamain – er per pajar ils daivets dal maun public – ed ils martgads èn vegnids averts e deregulads.

Cun in product naziunal brut da 1 618 904 milliardas euro furmava l’Italia il 2013 la novavel gronda economia publica dal mund. Il product naziunal brut per persuna muntava il medem onn a ca. 26 500 euros (27avla plazza da tut ils pajais).

Da remartgar è che l’economia zuppada ha tradiziunalmain ina preschientscha fitg ferma en l’Italia. Da vart dal stadi vegn la cumpart da quella stimada a radund 17 %; auters observaturs quintan cun ina cumpart da fin a 30 %. Facticamain vegn l’economia zuppada però resguardada da vart dal stadi cun eruir il product naziunal brut.

Il pli impurtant partenari da commerzi da l’Italia è la Germania (12,7 % export e 15,9 % import), suandà da la Frantscha (11,2 % resp. 8,5 %). Tar l’export èn ultra da quai la Spagna (6,5 %), ils Stadis Unids (6,2 %) ed il Reginavel Unì (5,2 %) d’impurtanza; tar l’import la China (6,2 %), ils Pajais Bass (5,3 %), la Libia (4,6 %) e la Russia (4,2 %).

Il debit statal muntava il 2009 a 1763 milliardas euros u 112,5 % dal product naziunal brut; fin il 2014 è quel schizunt creschì sin 132,3 %. Ina gronda part dals daivets deriva dals onns 1980 e da l’entschatta dals onns 1990. 

En procents dal product naziunal brut vegnan impundids 9,0 % per il sectur da sanadad, 4,5 % per la furmaziun e 1,8 % per il militar (situaziun dal 2005/2006).

Suenter la Germania e la Frantscha ha l’Italia pajà il 2008 las pli autas contribuziuns en la cassa da l’Uniun europeica (15 milliardas euros, quai che correspunda a radund 13,6 % da l’entir budget da l’UE). Resguardond er ils pajaments ch’ils stadis han retschet da l’UE, sa chattava l’Italia suenter la Germania schizunt sin la segunda plazza.

L’Italia dispona dals pli divers giaschaments da materias primas. Impurtantas ritgezzas natiralas dal pajais furman fluorit, charvun, argient viv, silvin e zinc. En las Alps Apuanas enturn Carrara e Massa vegn gudagnà il marmel da Carrara ch’è enconuschent en tut il mund. Gronds champs da gas natiral sa chattan en la Planira dal Po ed en l’Adria, champs da petroli en la Basilicata ed a Sicilia.

Electricitad producescha l’Italia surtut cun ovras termicas. Quellas vegnan spisgentadas cun 64,4 % gas natiral; il rest deriva da petroli e d’auters combustibels. La fotovoltaica e l’energia eroelectrica creschan da preschent fitg ferm ed han furnì il 2011 11 resp. 10 TWh. Surtut en l’Italia Centrala vegn er tratg a niz la geotermia che furnescha 5,7 TWh. Fitg impurtanta è en pli la forza idraulica; cun 45,2 TWh correspunda quella a radund 15 % da l’entira energia idraulica che vegn producida en ils stadis commembers da l’UE.

Pli baud disponiva l’Italia da quatter ovras atomaras. Suenter la catastrofa da Tschernobyl dal 1986 ha l’Italia abandunà successivamain l’energia nucleara. Il 1990 è vegnida messa ord funcziun la davosa ovra atomara dal pajais. Il 2011 han ins manà tras ina votaziun dal pievel areguard la dumonda da returnar a l’energia nucleara. Quella è vegnida refusada cun betg main che 94,1 % da las vuschs. 

Da l’autra vart furma l’Italia facticamain il pli grond importader d’energia dal mund. Da las bundant 43 milliardas KWh ch’èn vegnidas importadas il 2012 derivavan 24,6 milliardas KWh da la Svizra e 11,37 milliardas KWh da la Frantscha (surtut da producziun atomara). Per clients industrials tutgan ils pretschs da forza electrica en l’Italia tar ils pli auts da tut l’UE.

Entaifer l’entira economia publica gioga l’agricultura bain be pli ina rolla relativamain modesta. Ma ella cultivescha intgins products da renum mundial. Cun 49 milliuns hectoliters è l’Italia – avant la Frantscha – il pli grond producent da vin dal mund (situaziun dal 2015). Suenter la Spagna producescha il pajais er la segund gronda quantitad dad ieli d’ulivas en tut il mund (442 000 tonnas l’onn 2013). Tar las enconuschentas sorts da chaschiel che derivan da l’Italia tutgan Parmesan, Mozzarella, Asiago, Pecorino u Ricotta. En pli è l’Italia in dals gronds producents ed exportaders da fritgs e verduras sco oranschas e citronas, tomatas ed oberschinas, zucchini, salatas, melonas, favs e nuschs.

La fermezza da l’economia taliana giascha en l’industria elavuranta, surtut en manaschis da famiglia pitschens e mesauns. Tenor l’uffizi da statistica statal furman radund 95 % da tut las interpresas manaschis pitschens cun main che 10 emploiads.

L’interpresa taliana cun la pli gronda svieuta è il concern dad ieli e da gas ENI. Impurtantas industrias furman la construcziun da maschinas, d’aviuns e da bastiments; enconuschenta en tut il mund è er l’industria d’autos e motos taliana cun nums sco Fiat, Alfa Romeo, Maserati, Ferrari, Iveco, Piaggio e Pirelli. Vitiers vegn l’industria chemica e la producziun da products electronics. L’industria textila è preschenta cun nums da marca sco Armani, Benetton, Diesel, Dolce  Gabbana, Gucci, Prada u Versace. Medemamain fitg activa en l’export è l’industria d’alimentaziun; la pli grond’interpresa entaifer questa branscha furma Ferrero. 

En il sectur da servetschs è l’Italia surtut preschenta cun bancas grondas sco Unicredit ed Intesa Sanpaolo international; e l’Assicurazioni Generali è la pli gronda societad d’assicuranzas en tut il mund.

Ina da las pli impurtantas funtaunas d’entradas furma dapi decennis il turissem. L’Italia tutga tar las destinaziuns da viadi classicas. Destinaziuns fitg dumandadas furman las Alps, las regiuns da costa a la Mar Ligurica e Mar Adriatica, numerusas citads istoricas, museums, plazzas d’exchavaziun archeologicas ed usits tradiziunals sco il carnaval a Venezia.

Il 1970 sa chattava l’Italia anc sin l’emprima plazza da tut las destinaziuns turisticas; oz sa chatta ella suenter la Frantscha, ils Stadis Unids, la Spagna e la China sin la tschintgavla plazza (cun 48,6 milliuns turists, situaziun dal 2014).

A l’entschatta dal 21avel tschientaner è il dumber dals dischoccupads sa sminuì fermamain en cumparegliaziun cun ils onns 1990. L’OECD ha però constatà che las entradas da gudogn en l’Italia tutgan tar las pli bassas da tut ils pajais industrialisads. Las entradas nettas dals Talians muntan en media a 19 861 dollars, uschia che l’Italia è vegnida surpassada en quest reguard da la Grezia e da la Spagna. La media da tut ils stadis commembers da l’OECD giascha tar 24 660 dollars. Tant pli auta è però la quota da las persunas cun gudogn independent; quella cumpiglia betg main che 33 % da tut las persunas activas (per cumparegliar: en Spagna munta ella a 17 %, en Germania a 10 %).

In tratg caracteristic da l’Italia furma la bipartiziun economica dal pajais. Entant ch’il nord è industrialisà fitg ferm, è la part settentriunala dal pajais sutsviluppada. Ils trais gronds centers d’economia Milaun, Turin e Genua furman il triangolo industriale. L’entira Italia dal Nord dispona d’in sectur da servetschs fitg sviluppà e tutga tar las pli fermas regiuns economicas da l’Europa. L’Italia Centrala è segnada d’ina economia che sa basa sin il sectur da textilias, chalzers e mobiglias; ultra da quai è il turissem fitg ferm en questa part dal pajais. E Roma furma la sedia da l’entira administraziun, da bleras interpresas grondas ed organisaziuns. Il sid percunter, che vegn er numnà Mezzogiorno, furma ina da las regiuns da l’Europa dal Vest ch’èn structuralmain las pli flaivlas. La consequenza da quai èn fitg autas quotas da dischoccupaziun, spezialmain tar ils giuvenils (per part sur 40 %). Collià cun quai è in’auta rata da criminalitad e betg il davos la criminalitad organisada che controllescha surtut en la Campania, Calabria e Sicilia vastas parts da l’economia.

La rait da vias ha ina lunghezza totala da 182 136 km (situaziun dal 2009). Da quai èn 6621 kilometers autostradas che sa chattan per gronda part en maun privat ed èn suttamessas a taxas da vias. Tut las autras vias vegnan administradas dal maun public. I vegn differenzià tranter vias statalas, regiunalas, provinzialas e communalas. 

La rait da viafier ha ina lunghezza da 20 255 km (2009); da quai èn radund dus terzs electrifitgads. Tant la rait sco er il transport sa chattan, cun fitg paucas excepziuns, en ils mauns dal stadi. L’interpresa statala Ferrovie dello Stato ha fatg il 2014 in gudogn da 303 milliuns euros. Dapi il 2012 porscha er la societad da viafier privata Nuovo Trasporto Viaggiatori colliaziuns d’auta sveltezza tranter intginas citads grondas. La rait da trens ad auta sveltezza è vegnida terminada il 2009 e tanscha da Turin sur Milaun, Bologna, Firenza, Roma e Napoli fin a Salerno. D’ina rait da metro disponan las suandantas citads: Milaun, Roma, Napoli, Turin, Genua e Catania; la pli vasta è quella da Milaun cun ina lunghezza totala da 74,6 kilometers.

Ils ports talians cun la pli auta frequenza da passagiers èn quels da Messina e Reggio Calabria, che furman la colliaziun la pli impurtanta tranter la Sicilia e la terra franca, sco er quel da La Spezia. Tut las colliaziuns en la Mar Mediterrana vegnan gestiunadas da la societad da navigaziun Tirrenia di Navigazione cun sedia a Napoli. Ultra da quai dispona l’Italia d’ina vasta rait da ports da containers. Il pli impurtant è qua quel da Gioia Tauro (3 445 337 containers il 2007), ma er quels da Genua, Triest e Tarent han mantegnì vinavant lur muntada.

Las pli grondas plazzas aviaticas dal pajais (tenor dumber da passagiers, situaziun dal 2015) èn Roma-Fiumicino, Milaun-Malpensa, Bergamo-Orio al Serio, Milaun-Linate e Venezia-Tessera. La pli gronda societad aviatica è Alitalia.

L’Italia ha contribuì a moda impressiunanta a l’ierta culturala ed istorica da l’Europa e dal mund. Sco punct da cruschada da las civilisaziuns da l’intschess mediterran, sco center da l’Imperi roman, sco sedia dal papat ed origin da la renaschientscha ha l’Italia adina puspè giugà ina rolla centrala e furmà in punct da partenza da l’art, da la cultura e da la scienza europeica. 

L’entir pajais dumbra radund 100 000 monuments da tut gener (museums, chastels, statuas, baselgias, galarias, villas, funtaunas, chasas istoricas e lieus da chat archeologics). L’Italia è il pajais cun il pli aut dumber da lieus ch’appartegnan al patrimoni mundial da l’Unesco insumma.

La cuschina taliana vala sco ina da las cuschinas naziunalas cun la pli gronda influenza en tut il mund. Products da renum internaziunal èn per exempel ieli d’ulivas, pesto, glatsch, panettone, tiramisu, diversas sorts da chaschiel sco parmesan, mozzarella u gorgonzola, liongias u auters products da charn sco mortadella, salami, schambun da San Daniele u da Parma e sa chapescha differentas sorts da pasta e pizza. Vitiers vegn la vasta purschida da vins indigens sco Chianti e Barolo.

En l’Italia sa chattan intgins dals pli impurtants edifizis da la cultura occidentala sco il Colosseum a Roma, il Dom da Milaun, la Catedrala da Firenza, la Tur enclinada da Pisa ed ils palazs da Venezia.

Gia ils Romans han mess impurtants accents architectonics ed han introducì la construcziun d’artgs e cuplas. Ed er la renaschientscha è stada segnada da teoretichers da l’architectura talians sco Leon Battista Alberti e d’architects sco Filippo Brunelleschi. L’ovra dad Andrea Palladio ha inspirà in stil orientà al classicissem. Dal 17avel tschientaner tardiv fin l’entschatta dal 20avel tschientaner ha il palladianissem influenzà l’architectura en tut il mund ed en spezial en la Gronda Britannia, en l’Australia ed en ils Stadis Unids. Impurtants architects contemporans èn Renzo Piano (Genua), Flavio Albanese (Vicenza) e Massimiliano Fuksas (Roma).

Sculpturs da la Peninsla Taliana han influenzà l’art da tut las epocas: per exempel ils Magistri Comacini la romanica, Arnolfo di Cambio ed auters la gotica (ch’è però vegnida dominada da la Frantscha), Donatello la renaschientscha tempriva, Michelangelo la renaschientscha classica, Giovanni Lorenzo Bernini il baroc talian ed Antonio Canova il classicissem.

Sur tschientaners ha la pictura taliana occupà in’impurtanta posiziun en l’Europa, da l’epoca romanica a la gotica, da la renaschientscha al baroc. Tranter ils pli enconuschents picturs talians tutgan Giotto, Fra Angelico, Botticelli, Michelangelo, Raffael, Leonardo da Vinci, Tizian, Tintoretto e Caravaggio. Cun la fin dal baroc ha la pictura subì en l’Italia in tschert declin. Pir a l’entschatta dal 20avel tschientaner ha il pajais puspè pudì avanzar a l’avantgarda artistica, e quai cun ovras dad Umberto Boccioni e Giacomo Balla ch’appartegnan al futurissem. La ‹Pittura metafisica› da Giorgio de Chirico vala plinavant sco precursura dal surrealissem.

Pervi da si’immensa ritgezza culturala enconuscha l’Italia la pli auta spessezza da museums en tut il mund. Ils museums furman in impurtant fundament dal turissem. Tut en tut datti radund 3800 museums publics e 1800 lieus da chat archeologics. Ils trenta museums ils pli frequentads han dumbrà il 2008 betg main che 23 milliuns visitaders.

Cun si’ovra ‹Divina Commedia› ha il Florentin Dante Alighieri mess il fundament da la lingua taliana moderna e stgaffì ina da las pli grondas ovras da la litteratura mundiala. Il poet Francesco Petrarca ha rendì enconuschent il sonet sco furma poetica. Tranter ils pli impurtants scripturs talians tutgan er Giovanni Boccaccio, Ludovico Ariosto, Torquato Tasso, Carlo Goldoni, Giacomo Leopardi ed Alessandro Manzoni. Titulars dal Premi Nobel da litteratura èn Giosuè Carducci (1906), Grazia Deledda (1926), Luigi Pirandello (1936), Salvatore Quasimodo (1959), Eugenio Montale (1975) e Dario Fo (1997).

Cun si’ovra ‹Il Principe› vala Niccolò Machiavelli sco in dals pli impurtants filosofs dal stadi dal temp modern. Ulteriurs enconuschents filosofs derivants da l’Italia èn Giordano Bruno, Marsilio Ficino e Giambattista Vico. Umberto Eco è plinavant stà in dals pli enconuschents litterats, linguists e filosofs da la segunda mesadad dal 20avel tschientaner.

Leonardo da Vinci, bain il pli enconuschent scienzià universal insumma, ha contribuì prestaziuns surprendentas sin champs uschè differents sco l’art, la biologia u la tecnologia. Galileo Galilei è stà fisicher, matematicher ed astronom ed ha mess ad ir ina revoluziun scientifica. Ulteriurs scienziads en survista: Giovanni Domenico Cassini (astronomia), Alessandro Volta (inventader da la battaria electrica), ils matematichers Lagrange, Fibonacci e Cardano, il medi Marcello Malpighi (confundatur da l’anatomia microscopica), il fisiolog Lazzaro Spallanzani sco er ils titulars dal Premi nobel Camillo Golgi (tenor il qual è vegnì numnà l’apparat da Golgi che fa part da la structura da las cellas), Guglielmo Marconi (cuninventader dal radio) ed Enrico Fermi (perscrutaziun nucleara).

L’Italia dumbra divers cumponists da renum: Palestrina e Monteverdi durant la renaschientscha, Scarlatti, Corelli e Vivaldi durant il baroc, Paganini e Rossini dal temp da la classica, Verdi e Puccini sco represchentants da la romantica.

L’Italia è generalmain enconuschenta sco lieu d’origin da l’opera. Da la plima da Rossini, Bellini, Donizetti, Verdi e Puccini deriva ina part da las pli enconuschentas operas insumma che vegnan anc adina dadas en tut il mund, tranter auter er en la famusa Scala a Milaun. Impurtants interprets classics sco Enrico Caruso, Alessandro Bonci, Beniamino Gigli, Luciano Pavarotti ed Andrea Bocelli han gidà a derasar e francar il renum da l’opera taliana.

Enconuschents chantadurs da la musica da rock e pop taliana èn Domenico Modugno, Adriano Celentano, Gigliola Cinquetti, Paolo Conte, Toto Cutugno, Lucio Dalla, Gianna Nannini ed Eros Ramazzotti. Il Festival da Sanremo, ch’ha lieu mintg’onn (dapi il 1951), è la pli gronda concurrenza da musica dal pajais.

L’industria da film taliana è gia sa sviluppada tranter il 1903 ed il 1908. Durant il temp dal faschissem è il kino vegnì duvrà dal reschim per intents propagandistics. En il sidost da Roma è schizunt vegnida erigida in’atgna citad da film, la Cinecittà.

Impurtants reschissurs dal temp suenter las guerras èn Vittorio De Sica, Roberto Rossellini, Luchino Visconti, Michelangelo Antonioni, Federico Fellini, Pier Paolo Pasolini, Sergio Leone e Bernardo Bertolucci. Acturas ed acturs ch’èn vegnids enconuschents a nivel internaziunal èn tranter auter Anna Magnani, Sophia Loren, Claudia Cardinale, Monica Vitti, Marcello Mastroianni, Giulietta Masina e Vittorio Gassman. Enconuschentas producziuns da film talianas èn ‹Ladri di biciclette›, ‹Roma, città aperta›, ‹Il Gattopardo›, ‹La strada›, ‹La dolce vita› e divers westerns sco ‹C’era una volta il West›.

Ils ultims decennis han films talians be cuntanschì excepziunalmain renconuschientscha internaziunala, sco per exempel ‹Cinema Paradiso› da Giuseppe Tornatore, ‹Il postino› cun Massimo Troisi ubain ‹La vita è bella› da e cun Roberto Benigni.

Il festival da film da Venezia è vegnì fundà il 1932 ed è sa mantegnì fin oz sco in dals impurtants festivals internaziunals.

La moda taliana ha ina lunga tradiziun. Milaun è la metropola da moda taliana ed er Roma, Turin, Napoli, Genua, Bologna, Venezia e Vicenza furman impurtants centers. Tranter ils pli enconuschents labels da moda talians tutgan Armani, Dolce  Gabbana, Fendi, Ferragamo, Gucci, Max Mara, Missoni, Moschino, Prada, Valentino e Versace.

L’Italia è er impurtanta areguard il design, surtut sin il champ da l’architectura d’interiurs. Enconuschents nums sin quest champ furman Gio Ponti ed Ettore Sottsass.

Las gasettas dal di cun la pli grond’ediziun èn il ‹Corriere della Sera›, ‹La Repubblica›, ‹La Stampa› ed ‹Il Messaggero›. In’atgnadad da la pressa taliana furman las gasettas da sport quotidianas. La pli enconuschenta da quellas è ‹La Gazzetta dello Sport›.

La paletta da magazins emnils tanscha da gasettas da boulevard sco ‹Oggi› e ‹Gente› fin a magazins da novitads sco ‹L’Espresso› u ‹Panorama›.

Sper ils trais programs da radio tradiziunals ed ils chanals da televisiun Rai Uno, Rai Due e Rai Tre emetta la Radiotelevisione Italiana, che stat sut controlla statala, deschset ulteriurs emetturs.

Daspera exista in grond dumber d’emetturs privats ch’han lur staziuns en mintga citad pli gronda. Quels sa finanzieschan tras ina fitg auta cumpart da reclama; ils programs consistan per gronda part da musica e shows. Intgins emetturs etablids èn sa colliadas tar ina rait; auters sa restrenschan ad emetter films. En tut existan en l’Italia betg main che 1700 emetturs da televisiun. Correspundentamain è la differenza da qualitad fitg gronda. Sut il num Mediaset èn unids ils emetturs privats Canale 5, Italia 1 e Rete 4; quels cuntanschan mintga di milliuns d’aspectaturs ed èn sa spezialisads sin formats populars sco emissiuns da telerealitad u transmissiuns da sport. Daspera exista cun SKY Italia ina fitg vasta purschida da pay-tv ch’è medemamain fitg populara.

Il sport il pli popular en l’Italia è il ballape (calcio). Ils clubs da ballape ils pli enconuschents èn AC Milan, Inter Milan e Juventus Turin che tutgan tar ils megliers en l’Europa. Ulteriurs enconuschents clubs èn AS Roma, Lazio Roma, S.S.C Napoli ed ACF Fiorentina. La squadra naziunala da ballape è ina da las pli fermas en tut il mund. Ella ha gia participà numerusas giadas al campiunadi mundial ed ha gudagnà quel il 1934, 1938, 1982 e 2006. Il campiunadi europeic han ils Talians gudagnà il 1968.

Il sport motorisà è medemamain fitg popular. En il suenterguerra è Ferrari daventà il team il pli enconuschent en la furmla 1. Cun Giuseppe Farina (1950) ed Alberto Ascari (1952 e 1953) derivan dus campiuns mundials da furmla 1 da l’Italia. Las cursas da furmla 1 en l’Italia han lieu a Monza ed Imola.

En l’istorgia dal motociclissem ha Giacomo Agostini gudagnà las pli bleras concurrenzas insumma. Ed ils constructurs talians Moto Guzzi, Gilera, MV Agusta, Ducati u Aprilia èn enconuschents en tut il mund.

Er il ciclissem è fitg popular en l’Italia. Suenter la Tour de France vala il Giro d’Italia sco segund impurtanta cursa da velos dal mund. Impurtantas cursas d’in di, che fan part dals classichers, èn Milaun-Sanremo ed il Giro di Lombardia. Tar ils pli impurtants ciclists tutgan tranter auter Fausto Coppi, Gino Bartali, Marco Pantani e Mario Cipollini.

Cun excepziun da l’Apulia datti en tut las regiuns talianas vasts territoris da skis. Enconuschentas èn surtut las destinaziuns Dolomiti Superski e Sellaronda. Il skiunz talian ch’è daventà il pli enconuschent a l’exteriur è Alberto Tomba.

Ulteriurs sports fitg populars en l’Italia èn ballanataziun, ballabasket, ballarait e rugby union.

Entaifer las festas catolicas usitadas ha Assunzione di Maria (15 d’avust) ina posiziun speziala. Questa festa che vegn er numnada Ferragosto vala sco il pli chaud di da l’onn e furma per blers Talians il cumenzament da las vacanzas da stad che vegnan passentadas a las numerusas splagias talianas.

Sper il prim da matg celebrescha l’Italia las suandantas festas profanas: Liberazione dal nazifascismo (25 d’avrigl), Festa della Repubblica (2 da zercladur) e la Festa dell’unità nazionale (emprima dumengia dal november).




#Article 9: Roma (8825 words)


 

Roma (latin Rōma; talian Roma [ˈroːma], uffizial Roma Capitale) è la chapitala da l’Italia. Cun radund trais milliuns abitants sin territori da la citad resp. quatter milliuns inclus l’aglomeraziun furma ella la pli gronda citad da l’Italia e la terz gronda da l’Uniun europeica. Roma sa chatta en la regiun Latium al flum Tiber.

En l’emprim tschientaner s.C. ha il poet Tibullus numnà Roma ‹citad eterna›. Questa denominaziun è sa sviluppada en il decurs dal temp ad in num d’onur da la citad – pervi da la muntada da quella en si’istorgia da gia var traimilli onns.

La citad furma oz la sedia administrativa da la regiun Latium e da la citad metropolitana Roma (fin il 2015: provinza Roma). Entaifer la citad furma il Vatican in’enclava sco stadi independent. Il Vatican è la sedia dal papa, vul dir da l’uvestg da Roma e chau da la baselgia catolic-romana sco er da la sedia apostolica (Sontga Sedia). Ultra da quai è Roma dapi il 1834 la sedia da l’urden dals chavaliers da Malta (il qual furma in agen subject da dretg internaziunal, però nunstatal), sco er da diversas sutorganisaziuns da las Naziuns Unidas (t.a. l’Organisaziun da las Naziuns Unidas per l’alimentaziun e l’agricultura, FAO, ed il Fond internaziunal per il svilup agricul, IFAD).

La citad da Roma dispona da fitg blers edifizis e museums da gronda muntada e furma ina destinaziun turistica fitg frequentada. La citad veglia da Roma, il dom da s. Peder e la citad dal Vatican appartegnan dapi l’onn 1980 al Patrimoni cultural mundial da l’UNESCO.

La cumprova latina la pli veglia dal num datescha dal quart tschientaner a.C. (uschenumnada Cista Ficoroni). Percunter fruntan ins gia en il 5avel e quart tschientaner repetidamain sin il num en la furma greca Ῥώμη Rhṓmē, uschia per exempel tar Hellanikos da Lesbos, Antiochos da Syrakus e Damastes da Sigeion (en la furma tradida a moda indirecta per exempel tar Dionysios da Halikarnassos).

L’etimologia dal num ‹Roma› sezza n’è betg sclerida; percunter curseschan en quest connex dapi l’antica differentas teorias. Ina part da quellas mettan la noziun en relaziun cun diversas persunas cun num Romus u Roma e collian la ditga da fundaziun cun la mitologia greca. L’explicaziun ch’ha dominà en l’antica è però stada l’istorgia da Romulus e Remus. Quest raquint ch’è documentà l’emprima giada tar Diokles da Peparethos e che valeva almain per Plutarch sco spezialmain credibel e bain documentà, maina enavos il num sin Romulus, il fundatur da la Roma quadrata, integrond però il ficus Ruminalis, in figher che deva sumbriva, situà sin il Forum da pli tard. Il num da quest ultim vegn da sia vart manà enavos sin Romulus ubain dal pled vegl latin ruma, quai che s’integrescha puspè en l’istorgia dals schumellins che vegnan tezzads da la luffa. Interpretaziuns in pau pli ‹raziunalisticas› colliavan il num da la citad, il qual ils Pelasgs duain avair dà en in temp mitic al lieu fundà dad els, sin il pled grec ῥώμη, ‹forza, fermezza›. E sch’ins refusava ina fundaziun da la citad greca, alura rendev’ins attent che la citad haja purtà antruras il num Valentia (da latin valentia, ‹forza, fermezza›), il qual saja sa midà sut influenza greca en Ῥώμη.

La linguistica moderna enconuscha medemamain diversas avischinaziuns per sclerir l’origin dal num. La varianta la pli derasada parta da la ragisch indogermana *.sreṷ-, ‹cular, currer›, quai che manass a la muntada ‹colonia sper il flum›. La colliaziun che vegn fatga en quest connex tranter il pled latin rūma, ‹pèz feminin›, e Rūmon, sco vegl num dal flum Tiber, sa lascha er gia chattar en la litteratura antica. 

Quasi tuttina derasada è la tesa ch’il num da la citad saja collià cun il num da famiglia nobla etrusc Ruma. Tenor ina proposta dal linguist Wilhelm Schulze dal 1904 pudess il num alura muntar tant sco ‹colonia dals ruma tuscs›. Quest’interpretaziun è surtut derasada tranter ils perscrutaders talians, ma vegn er favurisada da scienziads d’auters pajais. Da vart dals critichers da quest’ipotesa vegn fatg valair ch’il num etrusc da la citad sa clamava bain *Ruma, ma che nums latins cun ragisch etrusca hajan adina mantegnì il sun /u/ da quels. Damai che l’etrusc n’haja però enconuschì a l’entschatta nagin sun /o/, il qual saja pir cumparì suenter ina midada dals suns a l’intern da la lingua etrusca ch’haja gì lieu en il decurs dal 6avel e 5avel tschientaner a.C. – pia tschientaners suenter la fundaziun da la colonia e citad – stuess ins spetgar sco num da la citad er en furma latina ‹Ruma›. Damai che quai na saja betg il cas, saja in origin etrusc dal num da la citad pauc probabel. 

Il poet Tibullus aveva gia circumscrit en la republica tardiva Roma sco ‹Citad eterna›. Silsuenter è quest’idea anc vegnida adattada e sviluppada repetidamain. Uschia per exempel tras il poet roman Vergil (70–19 a.C.), il qual ha scrit tenor l’exempel da Homer l’‹Aeneis› che represchenta en furma da raquint la preistorgia e la muntada da Roma. Quest cudesch è gia daventà da lez temp in’impurtanta lectura a las scolas romanas e vala sco epos naziunal dals Romans. Il dieu Jupiter profetisescha en quest’ovra la perpetnadad da la citad da Roma, a la quala na sajan mess nagins cunfins ni da spazi ni da temp.

Er a la fin dal temp dals imperaturs (vers la mesadad resp. a la fin dal quart tschientaner s.C.) discurran intgins auturs da la Roma che na svaneschia mai. L’uffizier ed istoriograf Ammianus Marcellinus (ca. 333–suenter 391) argumentescha la perpetnadad da Roma cun quai che virtus, ‹forza, virtid› e fortuna, ‹ventira, fortuna› hajan fatg tar la fundaziun da la citad ina lia da pasch perpetna, la quala garanteschia che Roma vegnia ad exister uschè ditg ch’i vivian umans. Il giurist ed aut funcziunari Aurelius Prudentius Clemens (348–suenter 405) cumpareglia l’idea da la Roma eterna cun l’idea da la Roma cristiana. L’Imperi roman haja, uschia Prudentius, unì ils pievels e preparà cun sia pasch als cristians la via. Ed er en sia furma nova na saja Roma betg flaivlentada u daventada veglia, mabain saja anc adina buna da tschiffar las armas, sche las guerras clomian. 

Roma sa chatta entamez l’Italia al Tiber, betg lunsch davent da la Mar Tirrena, en media 37 meters sur il livel da la mar. En pliras serpentinas cula il Tiber en direcziun sid tras la citad. En il nord sbucca en la part da la citad Parioli l’Aniene en quel. Il conturn pli vast da la citad furma la Campagna Romana u en furma curta Campagna. En l’ost da Roma sa chattan las Abruzzas, en il nordost las Muntognas Sabinas, en il sidost las Muntognas Albanas. 

La citad metropolitana Roma cunfinescha en il nord cun la provinza Viterbo e la provinza Rieti, en l’ost cun la provinza L’Aquila en la regiun Abruzzas sco er en il sid cun la provinza Frosinone e la provinza Latina.

Roma sa divida en quatter districts municipals, 15 municipis e 155 parts da la citad.

Ils 15 municipis (fin il mars 2013 eran quai 19) èn: (1) Municipio I (cun la citad veglia Centro Storico, Prati ed autras veglias parts da la citad), (2) Parioli e Nomentano – San Lorenzo, (3) Monte Sacro, (4) Tiburtina, (5) Prenestino e Centocelle, (6) Delle Torri, (7) San Giovanni e Cinecittà, (8) Appia Antica, (9) EUR, (10) Ostia, (11) Arvalia Portuense, (12) Monte Verde, (13) Aurelia, (14) Monte Mario e (15) Cassia Flaminia. 

La citad veglia (Municipio 1) è sutdividida en 22 Rioni (parts da la citad), las qualas tanschan per part enavos fin en l’antica. Administrativamain n’han quels nagina muntada pli.

Il vegl Municipio 14 han ins excorporà l’onn 1992 e furma oz la citad independenta Fiumicino. 

Roma ha in tipic clima mediterran cun stads sitgas (aridas) ed envierns umids. La setgira da stad deriva dal fatg che la zona da pressiun auta subtropica sa sposta vers nord; en questa zona da pressiun auta sa sbassa l’aria e nivels sa schlian. L’enviern sa sposta la zona da pressiun auta subtropica percunter vers sid, e nà dal nord tschiffa ina zona da vent dal vest umida, betg tropica la regiun da la Mar Mediterrana.

La temperatura media maximala munta il fanadur a 30,4 °C, il schaner a 11,1 °C. Las precipitaziuns cuntanschan l’october e november lur maximum cun en media 128 mm ed il fanadur lur minimum cun 14 mm (summa annuala en media 892 mm).

Tenor la ditga da fundaziun è la citad da Roma vegnida fundada ils 21 d’avrigl 753 a.C. tras Romulus. Pli tard duai Romulus avair mazzà ses frar Remus, cur che quel ha fatg beffas dal mir da la citad erigì da Romulus. Ils schumellins eran tenor la ditga ils uffants dal dieu Mars e da la vestala Rhea Silvia. Quels sajan vegnids mess or sin il Tiber, tezzads d’ina luffa ed alura vegnids chattads e tratgs si dal pastur Faustulus al Velabrum sutvart il Palatin.

L’astrolog roman Lucius Tarrutius da sia vart, in ami dal scienzià Marcus Terentius Varro, ha calculà ils 4 d’october 754 a.C. tranter las 14 e las 15 uras sco mument da fundaziun da la citad, e quai partind d’in oroscop da naschientscha da Romulus. Sa mantegnida en al tradiziun è però la data surmenziunada da l’onn 753 a.C.

Exchavaziuns sin il Palatin han manà a la glisch restanzas da colonisaziun dal temp enturn 1000 a.C.; probablamain èn intgins vitgs latins u sabins alura vegnids unids vers 800 a.C. (forsa tras ils Etruscs) ad ina citad ubain èn creschids ensemen a tala. L’uniun da singulas colonias ad ina vischnanca avess, tenor ils istorichers, propi pudì avair lieu enturn il lieu da fundaziun legendar.

Las set collinas proverbialas da Roma èn: Palatin, Aventin, Capitol, Quirinal, Viminal, Esquilin e Caelius. Oz s’extenda il territori da la citad er sur las collinas Gianicolo, Vaticano e Pincio.

A l’entschatta da si’istorgia era Roma in reginavel; sco emprim dals successurs da Romulus – per gronda part legendars – numna Titus Livius Numa Pompilius. Suenter avair stgatschà l’ultim retg etrusc Tarquinius Superbus – apparentamain l’onn 509 a.C. – è Roma daventà ina republica, cumbain che quai è probablamain succedì pir vers l’onn 475 a.C. Il proxim temp è stà segnà da cumbats da classa tranter ils plebeis senza dretgs, schebain libers, ed ils patrizians nobels. Roma ha uss cumenzà ad incorporar en ses domini ils territoris vischins.

Cumbain che Roma ha apaina pudì sa defender l’onn 390 a.C. cunter in’invasiun celtica, ha la citad expandì cuntinuadamain. Sco protecziun cunter ulteriuras attatgas han ins erigì il Mir servian. L’onn 312 a.C. è suandada la construcziun da l’emprim aquaduct sco er da la Via Appia. A l’expansiun da Roma han la finala surtut er contribuì las Guerras punicas (264–146 a.C.) cunter Cartago en l’Africa dal Nord che controllava la part occidentala da la regiun da la Mar Mediterrana. 

Suenter l’assassinat dals frars Tiberius e Gaius Sempronius Gracchus, ch’avevan sco tribuns populars empruvà da realisar ina refurma funsila, hai dà ina fasa d’instabilitad che dueva culminar en guerras civilas. Gaius Iulius Caesar ha realisà sco dictatur ina retscha da refurmas, è però vegnì assassinà l’onn 44 a.C. Da quel temp aveva il Forum Romanum gia cuntanschì ina spessezza da construcziun ch’ha fatg necessari in’extensiun da l’areal. Per quest motiv aveva Caesar cumenzà cun la construcziun dal Forum Iulium.

L’emprim tschientaner s.C. dumbrava Roma probablamain gia in milliun abitants e furmava il center geografic e politic da l’Imperi roman. La citad disponiva d’in sistem cumplessiv d’aua frestga ed aua persa, d’ina vasta rait da vias sco er d’unitads da protecziun da la populaziun (Vigiles) che prestavan servetschs da pumpiers e polizia. Il svilup da la chapitala – ch’è surtut s’intensivà sut Augustus, l’ertavel da Caesar ed emprim imperatur – è vegnì franà per in tschert temp tras il grond incendi da Roma sut Nero l’onn 64.

Sut il domini da la dinastia flavia (69–96 s.C.) han cumenzà vastas activitads da construcziun ch’èn vegnidas finanziadas tras ils imperaturs. Tar quests novs edifizis publics tutgan intgins dals pli enconuschents monuments architectonics sco il Colosseum ed ina part dals Forums imperials. L’ultim da questas forums è vegnì terminà l’entschatta dal segund tschientaner sut l’imperatur Trajan. Quest temp vegn savens considerà sco punct da culminaziun da l’Imperi roman. Grondas termas sco quellas ch’han laschà eriger Caracalla e Diocletian en il terz tschientaner – che cumpigliavan schizunt bibliotecas – furmavan ina part integrala da la vita publica a Roma. Vulend surpassar lur antecessurs, han ils imperaturs erigì edifizis adina pli gronds, sco la basilica da Maxentius. Quai vala magari sco indizi per il cumenzament dal declin da l’imperi, mussa a medem temp però che Roma ha furmà fin l’entschatta dal quart tschientaner la pli impurtanta tribuna per l’autopreschentaziun dals regents. Ultra da quai han ins erigì a la fin dal terz tschientaner il Mir aurelian, essend che la citad era daditg creschida sur ils cunfins dal Mir servian or.

Al cumenzament da l’antica tardiva enturn l’onn 300 ha Roma probablamain cuntanschì per entant ses pli aut dumber da la populaziun (radund 1,2 milliuns abitants). Bainprest ha la citad però pers muntada politica, damai ch’ils differents imperaturs han preferì autras residenzas (t.a. Ravenna, Constantinopel, Milaun, Trier, Thessaloniki, Split). Surtut la citad da Constantinopel è avanzà en il quart tschientaner adina dapli ad ina rivala per Roma.

En il 5avel tschientaner è la part occidentala da l’Imperi alura vegnì pli e pli en in circul vizius da guerras civilas ed attatgas d’ordaifer, quai ch’ha er fatg patir la citad da Roma. In fanal ha muntà la sblundregiada da Roma l’onn 410 tras mercenaris gotics revoltants ed anc ina giada l’onn 455 tras ils Vandals. La guerra civila tranter Anthemius e Ricimer ha surtut gì lieu l’onn 472 a Roma ed ha medemamain chaschunà gronds donns. Ma anc pli decisiv è stà il fatg ch’ins ha pers l’onn 429 la controlla sur l’Africa dal Nord, danunder ch’ins retirava las furniziuns da granezza da la citad. En consequenza è il dumber d’abitants en la citad sa reducì rapidamain, cumbain che imperaturs sco Valentinian III u Anthemius han puspè residià per pli lung temp al Tiber. 

Suenter la fin da l’Imperi roman occidental l’onn 476 han ins l’emprim però tuttina trategnì vinavant impurtants implants citadins sco las termas da Diocletian u il Colosseum; malgrà ch’il dumber d’abitants sa sbassava cuntinuadamain, ha la vita antica pia cuntinuà. Er il Senat ha per entant existì vinavant. Prokopios constatescha ch’ils edifizis da la citad sajan vegnids mantegnids durant il domini dals Ostrogots. Teodoric il Grond ha laschà manar tras chatschadas sin animals e cursas da chars. Vers l’onn 530 vivevan anc ca. 100 000 persunas a Roma. La catastrofa civilisatorica è pir arrivada cun las Guerras dals Gots e la politica da reconquista che l’imperatur da la Roma orientala Justinian ha fatg en quest connex. Las lungas acziuns da guerra han manà a la destrucziun definitiva da prest tut ils aquaducts romans (537), a l’extincziun quasi cumpletta da la classa dals senaturs, la quala conservava l’ierta antica, e d’in’interrupziun da plirs onns da la vita citadina tras cumbats d’assedi da vart roman orientala e gotica. En consequenza da tut quai è il dumber d’abitants crudà sin paucs dieschmilli. L’onn 550 han gì lieu las ultimas cursas da chars en il Circus Maximus.

Bain furmava l’Italia dapi l’onn 554 formalmain puspè ina part da l’Imperi roman oriental; da mantegnair l’urden a Roma han però surpiglià dal temp da la migraziun dals pievels adina dapli ils papas. Il regent da l’exarchat roman oriental-bizantin na residiava betg pli al Tiber, mabain a Ravenna; la citad da Roma è sa sbassada en ses status ad ina citad da provinza bizantina ed ha er pers sia muntada simbolica; sulettamain il papat ha anc procurà per in pau glischur e relevanza. L’ultim monument da l’antica tardiva ch’è vegnì erigì en la citad fermamain depopulada ha furmà l’onn 608 la Colonna da Focas. Pauc pli tard para il Forum Romanum d’avair pers definitivamain sia muntada per la citad; ils monuments antics èn ids en decadenza. 

Dapi Pippin ha Roma cuntanschì ina nova muntada sco chapitala dal stadi pontifical (Patrimonium Petri) e sco pli impurtant lieu da pelegrinadi dal cristianissem sper Jerusalem e Santiago de Compostela. Nova glischur è arrivada en la citad l’onn 800, cur che papa Leo III ha curunà Carl il Grond sco imperatur dal Sontg Imperi roman. Tranter il 843 ed il 849 han trais emprovas da vart d’arabs muslims da conquistar la citad fatg naufragi; la mesadad da la citad situada da la vart dretga dal Tiber è però vegnida sblundregiada l’onn 846.

Tranter il 8avel ed il 11avel tschientaner èn suandads ulteriurs assedis, attatgas e sblundregiadas tras Langobards, Saracens e Normans. Enturn l’onn 800 dumbrava la citad gist anc 20 000 abitants. Tras la sminuziun rapida da la populaziun èn bundant trais quarts dal territori da la citad circumdà dal Mir aurelian ids en muschna; per part èn questas parts da la citad restadas nunutilisadas, per part han ins tratg pli tard a niz il terren per intents d’agricultura. Las parts da la citad populadas spessamain sa concentravan sin las rivas dal Tiber, il Champ da Mars ed il Borgo tranter la baselgia da s. Peder ed il Castel Sant’Angelo. Quai ha manà entaifer ils cunfins dal Mir aurelian al cuntrast caracteristic tranter territori ‹abitato› e ‹disabitato› ch’ha segnà la citad da Roma dal 11avel fin il 19avel tschientaner. Ils centers da la citad dal temp da l’antica sco il Forum Romanum, il Capitol, ils Forums imperials, il Colosseum etc. sa chattavan tuts en il territori ‹disabitato›. Ils novs centers da la citad furmavan uss il Borgo cun la veglia baselgia da s. Peder ed il Campo de’ Fiori. En il ‹disabitato› han existì en il temp medieval per tscherts temps agens pitschens abitadis ch’eran sa furmads enturn las grondas baselgias da Roma situadas ordaifer l’‹abitato›, sco la Basilica San Giovanni in Laterano u la baselgia Santa Maria Maggiore. 

A partir da l’onn 1300 han ins cumenzà a conceder mintgamai als pelegrins durant ils onns sontgs grazias e perduns extraordinaris. La basa per l’affluenza creschenta da pelegrins furmava d’ina vart il fatg che l’apostel Paulus è vegnì executà qua suenter l’incendi da Roma l’onn 64 sut Nero, per l’autra la supposiziun che Simon Petrus saja medemamain vegnì executà ensemen cun Paulus e sepulì a Roma (quai ch’è ordvart contestà tranter ils istoriografs). Ils pelegrins han furmà in’impurtanta pitga d’entradas da la communa da Roma sezza, la quala sa stentava dapi il 12avel tschientaner da cuntanscher dal papat dapli atgna administraziun. In’emprima fluriziun da la communa en il cumbat cun il papat sut participaziun dal refurmatur da la baselgia Arnold da Brescia è però vegnida interrutta cun la forza a chaschun da la curunaziun da Fadri Barbarossa sco imperatur l’onn 1155.

Schebain accumpagnà d’interrupziuns (p.ex. Sacco di Roma, la sblundregiada da Roma tras truppas mercenarias da Karl V l’onn 1527), ha Roma enconuschì dal temp da la renaschientscha e da l’absolutissem in temp da fluriziun cun il papa sco chau da la baselgia catolica e regent secular.

La muntada da Roma sco center dal cristianissem ha manà ad ina nova culminaziun en l’activitad da construcziun. Quai ha gia cumenzà cun la basilica da S. Paul davant las portas sur la fossa da l’apostel Paul en il quart tschientaner, la Basilica San Giovanni in Laterano, medemamain en il quart tschientaner (e pli tard baroccisada tras Francesco Borromini), Santa Maria Maggiore en il 5avel tschientaner e surtut il dom da s. Peder che deriva en sia furma odierna dal 16avel e 17avel tschientaner. 

La renaschientscha ed il baroc n’han però betg be dà a la citad ina nova parita tras edifizis sacrals, mabain er en furma da novas vias represchentativas cun vista sin palazs e plazs cun funtaunas ed obeliscs. En questa furma architectonica è la citad veglia sa mantegnida fin oz. 

Abstrahà dal stadi papal en l’Italia Centrala è l’istorgia politica da l’Italia stada segnada sur tschientaners da la preschientscha da pussanzas estras e da citads-stadi rivalisantas. Quai dueva pir sa midar en la segunda mesadad dal 19avel tschientaner ed er avrir a la citad da Roma novas perspectivas sco chapitala da l’Italia unida. 

L’onn 1849 aveva la Frantscha staziunà truppas en il stadi papal. Il 1870 – durant ina pausa da sesida da l’Emprim Concil Vatican – ha la Frantscha retratg sias truppas da Roma suenter avair declerà a la Prussia la guerra. Il militar talian ha profità da la chaschun ed ha occupà quasi senza resistenza il stadi papal. Il papa è vegnì privà da sia pussanza politica e Roma è daventà pauc pli tard (ils 26 da schaner 1871) la chapitala dal stadi talian ch’era londervi da sa furmar sco stadi naziunal; avant aveva – en rom dal risorgimento – l’emprim Turin furmà la chapitala dal nov reginavel (a partir dal 1861) e pli tard Firenza (a partir dal 1865). Il papat ch’era vegnì privà da sia pussanza seculara e parts da la populaziun catolica han duvrà decennis da sa famigliarisar cun las novas relaziuns politicas. Exempel visibel da quellas dueva daventar il monument naziunal monumental per Vittorio Emanuele II en il nord dal Capitol e dal Forum Romanum ch’è vegnì inaugurà il 1911. Vers la fin dal 19avel tschientaner ha ultra da quai gì lieu nà da regiuns ruralas da l’Italia ina ferma immigraziun vers la nova chapitala, uschia che Roma è per l’emprima giada dapi l’antica creschida sur ils cunfins dal Mir aurelian or.

En consequenza dals conflicts socials ch’èn suandads a l’Emprima Guerra mundiala, han ils faschists sut Benito Mussolini surpiglià l’onn 1922 la pussanza. Sut lur domini han ins terminà il 1929 las differenzas tranter il stadi e la baselgia e fundà la citad dal Vatican sco stadi independent (Contracts dal Lateran). En rom da la glorificaziun propagandistica da l’antica romana han ins ultra da quai renovà da quel temp monuments antics e dà en general paisa a valurisar en la citad las restanzas dal temp da l’Imperi roman. Plinavant è vegnì stgaffì dal temp dal faschissem il quartier da la citad EUR (Esposizione Universale di Roma); il pli enconuschent dals edifizis da tempra futuristica da quest quartier furma il Palazzo della Civiltà Italiana (er Palazzo del Lavoro). Cuntrari per exempel a la Germania n’han ins mai allontanà las inscripziuns ed ils simbols faschistics, uschia che la represchentaziun architectonica e propagandistica dal faschissem è anc adina preschenta en il maletg da la citad.

Ils 19 da fanadur 1943 han ils Alliads bumbardà l’emprima giada Roma. En mira avevan ils 390 bumbardaders americans en emprima lingia la staziun da viafier Tiburtina. Destruì han els però surtut ils quartiers da lavurants en la part da la citad San Lorenzo e la baselgia San Lorenzo fuori le mura. Er durant las ulteriuras attatgas or da l’aria e cur ch’ils Alliads èn s’avischinads il matg 1944 a la citad, è papa Pius XII restà a Roma. Per evitar in segund Monte Cassino u schizunt Stalingrad è el sa stentà da far declerar da tuttas varts Roma sco citad averta. Quai è la finala reussì il zercladur: ils Tudestgs han bandunà la citad ed ils Alliads han occupà quella senza far ulteriur donn a la substanza architectonica da la citad.

Suenter la Segunda Guerra mundiala ha il retg Umberto II bandunà il 1946 il pajais e l’Italia è daventada ina republica.

En il suenterguerra è l’Italia stada segnada d’ina fluriziun economica sco anc mai (miracolo economico) e d’ina ferma fugia da la champagna: milliuns umans da l’Italia dal Sid e da las regiuns muntagnardas da las Abruzzas èn ids a lavurar ed abitar en la chapitala. Per remplazzar las baraccas dals emprims onns suenter la guerra, han ins erigì a partir dal 1962 en la Campagna romana gronds quartiers d’abitar; a medem temp han ins er endrizzà ils onns 1960 e 1970 quartiers d’abitar per la classa sociala mesauna. Fin l’onn 1980 era il dumber d’abitants da la citad quasi sa dublegià.

L’onn 1955 han ins avert l’emprima lingia da metro da la Metropolitana di Roma e l’onn 1960 han gì lieu a Roma ils XVII gieus olimpics da stad.

Las uschenumnadas ‹borgate abusive›, vul dir surbajegiadas illegalas en l’aglomeraziun, na purschevan savens nagin’infrastructura, naginas surfatschas verdas, naginas scolas e scolinas. Ed entant ch’il center da la citad dispona d’in dumber da baselgias che na sa laschan strusch pli mantegnair, mancavan er quellas en il conturn. Ils problems socials da las aglomeraziuns han furmà ils onns 1970 da vart da la sanestra radicala a cumbats socials, occupaziuns da chasas e chaumas. Extremists da sanestra e da dretga èn sa cumbattids sin via cun la polizia; medemamain ha la criminalitad organisada flurì da quel temp. Il punct culminant da la violenza politica dals onns 1970 en l’entir pajais ha furmà il 1978 il rapiment e mazzament dal primminister Aldo Moro tras commembers da las brigadas cotschnas. L’ultim exempel per la planisaziun urbana da quel temp – che vegn savens giuditgada sco malreussida – furma il cumplex d’abitar Corviale (er numnà ‹il serpentone›, ‹la serp gigantica›) ch’è vegnì construì ils onns 1975–1982. Ils proxims onns è la situaziun sa calmada in pau ed ina part da la classa mesauna romana ha bandunà en rom d’ina suburbanisaziun la citad.

Sut il pontificat da papa Gion Paul II ha la citad vis duas giadas ina fulla da glieud sco anc mai: L’onn sontg 2000 èn arrivads al servetsch divin al di da la giuventetgna dal mund dus milliuns umans davant las portas da la citad. E da la sepultura ils 8 d’avrigl 2005 sin la Plazza da s. Peder han prendì part 200 schefs da stadi e da regenza sco er trais fin quatter milliuns umans da tut il mund, dals quals però be 300 000 han chattà plazza, entant ch’ils auters han suandà las ceremonias sin tendas grondas.

Er ils ultims onns n’èsi betg adina reussì als presidents da la citad da schliar ils problems structurals ils pli gronds (traffic, allontanament dal rument). Ultra da quai hai dà scandals da corrupziun ed èn vegnidas a la glisch raits criminalas (Mafia Capitale, 2015). La trumpada da las burgaisas e dals burgais da Roma cun las partidas etablidas ha manà la stad 2016 Virginia Raggi dal moviment da protesta MoVimento 5 Stelle a la testa da l’executiva da la citad.

Ils gronds edifizis dal 20avel tschientaner èn quasi tuts vegnids erigids en ils quartiers exteriurs sco l’EUR; en il center da la citad percunter n’èn mesiras da construcziun savens betg lubidas per motivs da protecziun da monuments. Adina puspè han er lieu qua exchavaziuns e mesiras da conservaziun dals vegls edifizis. En il maletg da la citad modern è il passà anc preschent en blers lieus. Uschia è per exempel sa mantegnì per gronda part il teater da Pompeius dal prim tschientaner a.C. al Campo de’ Fiori, en l’avantcurt dal qual sa radunava dal temp da Caesar la Curia e nua ch’el è probabel er vegnì assassinà. Il mez radund per ils aspectaturs è però vegnì transfurmà en il decurs dal temp en ina zona abitada. Oz sa chattan là tschalers ed ina garascha sutterrana, restaurants e bars, abitaziuns privatas e pensiuns. Pervi da la structura da teater mez radund d’antruras han tut las stanzas in plan en furma da trapez.

La renovaziun e l’ulteriur svilup da la citad èn savens colliads en il mintgadi cun gronds problems. Uschia è la construcziun d’in’immensa garascha sutterrana en ina collina da tuf sper la Plazza da s. Peder l’onn 2000 stada contestada, perquai ch’ins temeva ch’i vegnian destruidas tras quai restanzas archeologicas. Per il medem motiv ha er la terza lingia da metro, ch’era pli che necessaria, pudì vegnir averta pir il 2014/15.

Pli gronds problems ch’il center da la citad istoric chaschunan però las aglomeraziuns pauc attractivas cun lur auta quota da criminalitad. Là mancan savens fin oz surfatschas verdas u implants da sport e la colliaziun cun la rait da traffic public è insuffizienta. Fin oz n’existan strusch bogns publics en la citad ch’era enconuschenta per sias ‹termas per tuts›. Ils Romans che pon sa prestar quai possedan in’abitaziun en ina da las curts internas, savens verdas e tgiradas cun premura, u ch’els disponan schizunt d’ina pitschna villa sin territori da la citad.

En ina rangaziun da las citads tenor lur qualitad da viver ha Roma figurà l’onn 2018 sin plaz 57 da 231 citads en tut il mund.

L’istorgia da Roma ha cumenzà ca. 800 a.C. cun ina lia tranter divers pitschens vitgs cun paucs tschient fin milli abitants. Da qua davent è Roma creschì ils proxims tschientaners successivamain ad ina citad gigantica cun dapli ch’in milliun abitants. Suenter ch’impurtantas funcziuns da chapitala èn vegnidas spustadas en il quart tschientaner a Constantinopel e che l’Imperi roman occidental è ì en ruina en il 5avel tschientaner, è la populaziun sa diminuida fitg ferm ed è crudada fin l’onn 530 sin ca. 100 000 abitants.

En il temp medieval tempriv era Roma cun 20 000 abitants en cumparegliaziun cun oz ina citad pitschna. Pir il svilup dal stadi da la baselgia ha puspè manà en la citad a nova fluriziun, cumbain interrut adina puspè d’epidemias e guerras. Cur che Roma è daventà l’onn 1871 la chapitala da l’Italia reunida, dumbrava la citad bundant 210 000 abitants; trenta onns pli tard era la cifra gia sa dublegiada. En il decurs dal 20avel tschientaner è Roma danovamain avanzada ad ina citad cun bundant in milliun abitants; surtut ils onns suenter il 1945 è il dumber d’abitants creschì fitg ferm. La survista che suonda mussa il dumber d’abitants mintgamai tenor la situaziun territoriala respectiva. Fin l’onn 1858 sa tracti da stimaziuns, dal 1871 fin oz d’indicaziuns da vart da l’institut naziunal per statistica (ISTAT).

(*) Schisma occidental 1309–1376, pestilenza 1348/50
(**) Sacco di Roma 1527

En l’antica era la religiun romana cun ses cults la religiun la pli derasada en la citad. Tuttina eran er represchentadas en quest center cultural autras religiuns sco per exempel il cult da Mitras ed auters cults da misteris. Sin il Palatin sa chattava in tempel da la Kybele u Magna Mater, en il quartier a dretga dal Tiber, il Trastevere, nua ch’era oriundamain er domiciliada la cuminanza gidieua, sa chatta in sanctuari sirian, sin il Capitol avevi in sanctuari dal Serapis, ed in tempel per Isis e Serapis, l’Iseum Campense existiva sin il Champ da Mars.

Gia fitg baud è sa furmada a Roma ina cuminanza cristiana. Malgrà la persecuziun dals cristians è quella creschida svelt. Dal temp da regenza da Constantin il Grond è il cristianissem alura avanzà en tut l’Imperi roman ed ha er survivì la fin da quel. Sco successurs da l’apostel Petrus han ils uvestgs da Roma considerà sasezs sco chaus da la baselgia ed han surpiglià il titel da papa. Suenter che la citad è vegnida sblundregiada e destruida repetidamain da pievels pajauns, è Roma sa mess tras sco center religius da la baselgia occidentala e dapi il 8avel tschientaner sco center dal stadi pontifical. En il decurs dals proxims tschientaners han ins erigì a Roma numerusas baselgias, da las qualas intginas tutgan tar ils pli impurtants sanctuaris dal cristianissem insumma. 

L’onn 1797 è la citad da Roma vegnida conquistada da Napoleun Bonaparte en rom da sia Campagna d’Italia. Suenter il Congress da Vienna (1815) han ins puspè restituì la suveranitad papala. La schientscha naziunala taliana era creschida sut l’occupaziun franzosa (uschenumnà risorgimento). L’onn 1861 è vegnì fundà a Turin il Reginavel d’Italia. Cur che la Frantscha ha retratg pervi da la Guerra tudestg-franzosa sias truppas da protecziun da Roma, han truppas talianas conquistà a partir dals 11 da settember 1870 il stadi pontifical, e quai senza fruntar sin gronda resistenza. Ils 20 da settember è la citad stada occupada dal tuttafatg (Breccia di Porta Pia) ed il domini secular dals papas sur la citad da Roma è ì a fin. Il papa è sinaquai sa retratg en il Vatican, il qual è vegni renconuschì il 1929 en ils Contracts dal Lateran sco stadi independent.

Roma e surtut il Vatican furman fin oz il center spiertal da la baselgia catolic-romana. Cun il grond dumber da baselgias, claustras ed autras instituziuns religiusas, spirituals, muntgs e mungias è quella fin oz ordvart preschenta en il maletg da la citad. Tut en tut datti a Roma dapli che 900 baselgias catolicas; quellas dattan perditga da tut las epocas architectonicas da l’istorgia europeica da l’antica fin oz. En l’uvestgieu da Roma, il qual cumpiglia il territori da la citad cun excepziun dad Ostia, eran l’onn 2017 2 355 984 abitants (82 % da la populaziun) catolics. La cumpart dals catolics è sa sbassada tranter il 2002 ed il 2011 da 97 % sin 82 %, tant pervi da la secularisaziun sco er pervi da l’immigraziun da persunas d’autra cretta. Dapi il 2011 sa tegna la cumpart da catolics però constant tar radund 82 %.

La pli veglia minoritad religiusa a Roma furman ils gidieus, ils quals èn cumprovads en la citad a partir dal segund tschientaner a.C. Dapi il 16avel tschientaner han ils gidieus romans stuì viver en il ghetto, il qual è pir vegnì schlià l’onn 1870 cun la fin dal stadi pontifical. Sco simbol da la conscienza da sasez da la cuminanza gidieua ha quella laschà eriger ils onns 1901–1904 la gronda sinagoga (Tempio Maggiore), la quala n’ha er patì nagins donns dal temp da la persecuziun e deportaziun dals gidieus durant la Segunda Guerra mundiala. Oz vivan a Roma radund 20 000 gidieus (ca. 0,7 % da la populaziun).

Ils protestants da diversas confessiuns furman a Roma be ina pitschna minoritad. Er els giaudan pir dapi l’onn 1870 libertad da cretta; avant avev’ins tranter auter erigì ordaifer ils mirs da la citad il Cimitero acattolico (er ‹santeri protestant›). Suenter che Roma è daventà la chapitala dal stadi naziunal talian, han ils valdais oriunds dal Piemunt erigì la baselgia represchentativa Tempio Valdese di Roma.

Tras immigraziun èn oz er represchentadas duas autras cuminanzas religiusas en in dumber considerabel: ils cristians ortodoxs (surtut da derivanza rumena) cun var 4 % da la populaziun ed ils muslims (radund 4 % da la populaziun) che derivan oravant tut da l’Albania, Maroc, Pakistan e Bangladesch. Ils onns 1984–1995 han ins erigì la moschea da Roma ch’era da quel temp la pli gronda en l’entira Europa. Ulteriuras minoritads furman hindus, budists, testimonis da Jehova e persunas senza confessiun.

Il cussegl communal da la citad da Roma furma l’Assemblea Capitolina che dumbra 48 commembers. Quel tegna sias sesidas en l’Aula Giulio Cesare en il palaz dals senaturs. Chau da l’executiva furma il president da la citad.

La vopna da la citad da Roma mussa in scut cotschen cun l’acronim S.P.Q.R. ed ina curuna cun pedras preziusas.

S.P.Q.R. stat per latin Senatus Populusque Romanus, ‹il Senat ed il pievel da Roma›. Quest’abreviaziun furmava l’emblem da suveranitad gia en la Roma antica; er las legiuns da l’Imperi roman purtavan quels sin lur standartas. Oz èn ils quatter bustabs da chattar sin numerusas tavlas, statuas, indrizs publics ed er sin viertgels da tumbins. 

Sco chapitala da l’Italia furma Roma dapi il 1871 la sedia da bleras instituziuns ed organs statals. La chombra dals deputads, sco pli gronda chombra dal parlament talian, ha sia sedia en il Palazzo Montecitorio en vischinanza dal Pantheon, entant ch’il Senat sa scuntra en il Palazzo Madama.

Il president dal stadi ha sia sedia uffiziala en il Palaz dal Quirinal, il qual furmava antruras la sedia administrativa dal stadi pontifical e ch’aveva furmà dal 1871 fin il 1946 la residenza dals retgs talians. Sez uffizial dal primminister furma dapi il 1961 il Palazzo Chigi, avant aveva quel residià en il Palazzo del Viminale ch’era vegnì erigì il 1925. Ultra da quai han tut ils ministeris da la regenza lur sedia a Roma. 

Tenor la tradiziun è la citad da Roma vegnida fundada l’onn 753 sin ina da las set collinas. Chats archeologics laschan però supponer ch’igl haja gia existì qua 1000 a.C. ina colonisaziun umana. Segnadas fin oz d’edifizis antics èn surtut la collina Palatin e la vallada situada en il nord da quel. Quai è d’attribuir al fatg ch’il Palatin furmava dal temp dals imperaturs la collina residenziala da l’imperatur, entant che s’extendeva en la val tranter il Palatin ed il Capitol il Forum Romanum che furmava en la Roma antica il center da la vita citadina.

Sco center da la citad da Roma vala il territori entaifer il Mir aurelian ch’era vegnì erigì en il terz tschientaner enturn il territori da las set collinas Capitol, Quirinal, Viminal, Esquilin, Caelius, Aventin e Palatin. Il center istoric sa derasa per gronda part per lung da la riva sanestra dal Tiber. Qua sa chattan ils pli blers e pli gronds monuments architectonics da l’antica. Ils edifizis cristians percunter èn repartids sin omaduas varts dal Tiber. La citad dal Vatican cun il dom da s. Peder ch’è visibel lunsch enturn, sa chatta da la vart dretga dal Tiber. Il center istoric da Roma, il dom da s. Peder e la citad dal Vatican tutgan dapi l’onn 1980 tar il Patrimoni cultural da l’UNESCO.

La citad exteriura e la periferia da Roma sa chattan correspundentamain ordaifer il Mir aurelian. La concentraziun d’edifizis antics è qua bundant pli bassa, er sch’ins frunta adina puspè sin tals. Ins chatta sper numerusas baselgias ch’èn er vegnidas erigidas en questas parts da la citad, per exempel la basilica San Paolo fuori le mura.

Sco ina da las grondas citads culturalas da l’Europa enserra il territori da Roma in grond dumber da monuments che tanschan dals Etruscs fin il temp preschent. Perditgas dal temp dals retgs etruscs e da l’istorgia tempriva romana èn plitost stgarsas. Tant pli amplas èn persuenter las restanzas da l’epoca da l’Imperi roman.

Quellas tanschan da Pantheon (fundà l’onn 27 a.C., reconstruì tranter 118 e 128 s.C.) ch’è sa mantegnì quasi a moda cumpletta e che furma la suletta construcziun a cupla da l’antica anc existenta, fin al Colosseum (terminà 80 s.C.), il pli grond amfiteater da l’antica e lieu d’occurrenza da cumbats da gladiaturs e d’auters spectaculs. Dapi l’onn 1999 serva il Colosseum en pli sco monument cunter la paina da mort: Adina cur ch’in stadi abolescha la paina da mort, vegn il Colosseum illuminà durant 48 uras – quai che capita però be darar.

En la citad chatt’ins sper ils mirs da la citad antics artgs da triumf, baselgias e palazs sco er plazzas publicas; menziun speziala meritan il Forum Romanum ed ils Forums imperials, medemamain las termas da Caracalla (construidas vers 217 s.C.), che vegnan duvradas oz la stad sco scenari per represchentaziuns d’operas, las catacumbas – implants sutterrans extendids, en ils quals ils emprims cristians celebravan la s. Messa ed èn vegnids sepulids – ed il Castel Sant’Angelo ch’è vegnì erigì sco mausoleum per l’imperatur roman Hadrian ed extendì en il temp medieval ad ina fortezza.

En il quart tschientaner han ins erigì la baselgia San Paolo fuori le mura, la quala è vegnida reconstruida suenter in incendi l’onn 1823. La Basilica San Giovanni in Laterano datescha dal quart tschientaner ed è per gronda part vegnida reconstruida en il 17avel e 18avel tschientaner. La baselgia San Pietro in Vincoli dal 5avel tschientaner è vegnida restaurada en il 15avel tschientaner; qua sa chatta la famusa statua da Moses da Michelangelo Buonarroti. 

Ulteriurs impurtants monuments furman la Piazza Navona cun trais funtaunas (tranter quellas la Fontana dei Quattro Fiumi, ina da las capodovras dal sculptur Gian Lorenzo Bernini), la Piazza del Campidoglio (la Plazza dal Capitol cun ina statua da bronz da l’imperatur Marcus Aurelius ch’è vegnida terminada en il segund tschientaner s.C.), la Fontana di Trevi (ina funtauna barocca dal 18avel tschientaner, en la quala turists bittan tradiziunalmain munaidas e giavischan insatge) e la Piazza di Spagna cun la famusa stgala spagnola dal 18avel tschientaner che maina tar la baselgia Santa Trinità dei Monti che deriva dal 15avel tschientaner. 

Ulteriurs monuments da la Roma cristiana èn da chattar en l’entira citad. Il center dal cristianissem furma la citad dal Vatican cun il dom da s. Peder (cf. latiers las infurmaziuns detagliadas en l’artitgel davart il Vatican). 

Impurtants edifizis da la Roma moderna sa chattan surtut en ils districts exteriurs da la citad, sco per exempel ils edifizis dals Gieus olimpics da stad 1960 da Pier Luigi Nervi, in dals pli impurtants architects talians dal 20avel tschientaner, ma er monuments d’onur e sgrattatschiels. Repartids sur l’entira citad èn ulteriurs monuments architectonics, plazzas, funtaunas ed obeliscs. En il vest da la citad han ins erigì ils onns 1972 fin 1982 cun il cumplex Corviale la pli lunga chasa d’abitar da l’Europa.

Tranter las numerusas villas noblas che circumdavan la Roma papala existan oz anc, cun lur immens parcs, la Villa Borghese, la Villa Ada e la Villa Doria Pamphili. ‹Villa› designescha a Roma per ordinari il parc, betg l’edifizi. Ulteriurs parcs èn: 

Il pli vegl museum da Roma furman ils Museums capitolins dal 1471. Sper ils Museums vaticans – bundant pli gronds – cumpiglian quels ina da las pli impurtantas collecziuns d’art da la citad.

En la Villa Giulia, la chasa da champagna da papa Julius III, erigida en la mesadad dal 16avel tschientaner, sa chatta ina collecziun extraordinaria d’art etrusc e da la Roma antica. 

La collecziun d’art da la famiglia Borghese pon ins contemplar en lur palaz che deriva da l’entschatta dal 17avel tschientaner. Quella porta il num Galleria Borghese e sa cumpona surtut da maletgs e plasticas.

La collecziun archeologica dal Museo Nazionale Romano, ch’è da muntada mundiala, è repartida sin tschintg differents lieus (Palazzo Massimo alle Terme, Aula Ottagona, Palazzo Altemps, las termas da Diocletian e la Crypta Balbi).

Medemamain d’impurtanza èn las galarias da maletgs en il Palazzo Doria-Pamphilj, il Palazzo Colonna ed il Palazzo Corsini, la collecziun da figuras da bronz en il Palazzo Venezia sco er la collecziun da maletgs en il Palazzo Barberini.

La moderna è represchentada tras il MAXXI. Quest edifizi futuristic da l’architecta Zaha Hadid è vegnì avert l’onn 2009 e vesa sasez sco lieu creativ e labor per architectura ed art contemporan.

Roma gioga ina rolla centrala entaifer la vita culturala taliana. En il Teatro dell’Opera di Roma, che tutga tar las pli grondas operas da l’Italia, han lieu preschentaziuns d’opera e da ballet; la stad han las represchentaziuns lieu en las Termas da Caracalla. Ultra da quai datti a Roma radund 150 teaters e sis grondas salas da concert che porschan in program varià. Durant ils mais da stad han lieu bleras occurrenzas al liber. 

In dals pli vegls teaters da Roma è il Teatro Argentina, dal qual ils origins tanschan enavos en l’onn 1732. Il Teatro Eliseo è vegnì avert l’onn 1900. Il 2002 han ins inaugurà en il nord da la citad l’Auditorium Parco della Musica; quest areal da radund 50 000 meters quadrat cumpiglia tranter auter trais salas da concert – surtut per musica classica – ch’èn vegnidas erigidas tenor plans da l’architect Renzo Piano.

En vista a la muntada extraordinaria da la citad da Roma da quel temp, na fai betg surstar che la citad ha furmà dal temp da la renaschientscha e dal baroc in dals pli impurtants centers da la musica. Betg be en la chapella papala en il Vatican, mabain er en las numerusas baselgias a Roma sez han operà blers impurtants musicists. En il 15avel e l’emprima mesadad dal 16avel tschientaner eran las posiziuns centralas per ordinari en ils mauns da represchentants da la polifonia franco-flama, da Franzos e – surtut en la Chapella sixtina – er da Spagnols. 

L’emprim impurtant cumponist indigen a Roma è stà Costanzo Festa (1490–1545), ma il pli famus dueva daventar il polifonist vocal Giovanni Pierluigi da Palestrina (1525–1594), il qual è vegnì celebrà dal temp da la cuntrarefurma sco renovatur e ‹spendrader› da la musica da baselgia. Ad el è suandà in’entira retscha da cumponists da baselgia, tranter quels Gregorio Allegri (1582–1652), dal qual il Miserere ha gì fin en il 19avel tschientaner in renum mistic ed il qual Mozart è stà bun da nudar l’onn 1770 tenor l’udida. En il 17avel tschientaner ha Giacomo Carissimi (1605–1674) stgaffì l’oratori sco alternativa religiusa a l’opera. Insumma han intgins papas empruvà da cumbatter u da supprimer en il 17avel e 18avel tschientaner dal tuttafatg l’opera (da quai è tranter auter resultà che chastrats han surpiglià las rollas da dunnas); ma da l’autra vart èn adina puspè sa fatgs valair a Roma mecens e promoturs ch’han procurà che la vita musicala na daventia betg l’unfrenda da la rigurusadad religiusa.

En il 18avel e 19avel tschientaner è la citad da Roma stada per l’opera main impurtanta che Venezia, Napoli e Milaun. Tuttina han intginas da las pli famusas operas gì en teaters romans lur primaudiziun, tranter auter da Rossini ‹Il barbiere di Siviglia› (en il Teatro Argentina 1816), da Verdi ‹Il trovatore› (Teatro Apollo, 1853) ed ‹Un ballo in maschera› (Teatro Apollo, 1859) e da Puccini ‹Tosca› (Teatro Costanzi, 1900); il cuntegn da quest’ultima gioga per part er a Roma, tranter auter en il Castel Sant’Angelo.

En il 20avel tschientaner ha operà a Roma Ottorino Respighi (1879–1936), il qual ha mess a la citad eterna cun sias sinfonias in monument musical.

Emprims fastizs da la musica populara romana derivan dal 13avel tschientaner cun la chanzun ‹Sonetto› (er enconuschenta sco ‹Bella quanno te fece mamma tua›), la quala è pli tard daventada in sinonim per la tradiziun musicala romana. 

L’onn 1890 marchescha alura il cumenzament da la chanzun romana moderna cun la publicaziun da la chanzun ‹Feste di maggio› cun text da Giggi Zanazzo e musica dad Antonio Cosattini. Al success da questa chanzun èn suandadas occurrenzas musicalas per chanzuns romanas ch’èn sa mantegnidas fin la Segunda Guerra mundiala.

Las purschidas culinaricas a Roma èn fitg variadas e tanschan da l’auta gastronomia fin la tipica cuschina romana cun spezialitads da bov, portg, agnè, crustaccas e pesch e da numerusas preparaziuns da tomatas u artischoccas, savens accumpagnadas da mozzarella ed agl.

Da Roma derivan er duas enconuschentas tratgas da pasta, bucatini all’amatriciana (pasta chavortga cun panzetta en sosa da tomata) e spaghetti alla carbonara. Tenor la legenda duain questas tratgas esser vegnidas inventadas dal temp d’occupaziun a la fin da la Segunda Guerra mundiala per remplazzar als schuldads americans lur ensolver tipic cun charnpiertg ed ov – cumprovas per ils nums ed ils recepts èn però pir da chattar in pau pli tard. Tar la pizza romana sa tracti, cuntrari a la pizza napoletana, savens d’ina pizza bianca senza tomatas passadas; i dat però tant pizza bianca sco er pizza rossa en las pli differentas variaziuns. 

En la citad existan dus clubs da ballape da renum naziunal ed internaziunal, numnadamain Lazio (fundà il 1900) ed AS Roma (fundà il 1927). Las partida da chasa dad omadus clubs han lieu en il stadion olimpic, situà en il nord da la citad, che porscha plazza a radund 73 000 aspectaturs.

L’onn 1960 han gì lieu a Roma ils gieus olimpics da stad ed ils emprims paralimpics insumma. Ina dumengia da mars ha lieu mintg’onn il Maraton da Roma, intginas emnas avant mintgamai il mez maraton Roma–Ostia.

Tenor in studi da l’onn 2014 ha la regiun da Roma realisà in product interiur brut da 163,2 milliardas dollars. En la glista da las pli fermas regiuns metropolitanas en tut il mund sa chatta la citad uschia sin plaz 76. Il product interiur brut per persuna ha muntà a 38 025 dollars (Milaun: 41 147 dollars).

Roma furma dapi la Segunda Guerra mundiala la plazza economica la pli dinamica en l’Italia. Si’economia sa basa sin il sectur da servetschs e profitescha en spezial da la preschientscha d’interpresas dal stadi sco er dal turissem. Daspera domineschan il commerzi a l’engrossa ed il commerzi en detagl ed en l’industria il sectur da textilias, la producziun da vivondas, products farmaceutics, maschinas, l’elavuraziun da metal e la producziun da palpiri.

Il turissem gioga in’impurtanta rolla per l’economia da Roma. Cun stgars 7,1 milliuns visitaders da l’exteriur è Roma stà il 2016 sin plaz 16 da las citads las pli frequentadas en tut il mund e sin plaz sis en l’Europa. Ils turists da l’exteriur han manà il medem onn ad entradas da 4,5 milliardas dollars. La gronda part dals visitaders èn vegnids da l’Europa, da l’Asia e dals Stadis Unids.

En la regiun da Roma sa chattan trais plazzas aviaticas, las duas pli pitschnas Roma-Ciampino e Roma-Urbe, e la plazza aviatica intercontinentala Roma-Fiumicino. Quest’ultima, situada a la costa, furma la pli impurtanta plazza aviatica da l’Italia ed a medem temp la sedia principala da la pli gronda societad aviatica dal pajais Alitalia. 

Sco in dals centers da la rait da viafier taliana dispona Roma da las staziuns da viafier Roma Tiburtina, Roma Ostiense, Roma Tuscolana, Roma Trastevere, Roma San Pietro, Roma Aurelia sco er da la staziun principala Roma Termini. Termini è ina da las pli grondas staziuns da l’Europa cun radund 400 000 viagiaturs per di. Dapi l’avertura da la viafier ad auta sveltezza en direcziun da Napoli e l’amplificaziun da la staziun Roma Tiburtina na vegnan trens che dovran Roma be sco staziun da passagi betg pli manads a la staziun principala Termini.

Daspera sa chatta a Roma (staziun Roma San Pietro) il pitschen traject da la viafier statala dal Vatican. Quel è vegnì avert l’onn 1856 tras papa Pius IX e serva exclusivamain al traffic da martganzia.

La citad da Roma sa chatta en il center d’ina rait da vias en furma da staila che suonda, partind dal Capitol, il decurs da las vias da l’antica, las qualas colliavan Roma cun ses imperi. Oz vegn Roma circumdà d’in’autostrada circulara (il Grande Raccordo Anulare u GRA) che sa chatta en ina distanza da radund 10 kilometers dal center da la citad. 

La citad ha da sbatter cun gronds problems da traffic, damai ch’il sistem da vias en furma da staila lubescha als abitants be il viadi tras il center istoric ubain sin l’autostrada circulara surchargiada. Er il sistem da metro, ch’è cumpareglià cun autras citads da medema grondezza vaira modest, na furma qua betg propi in agid; ultra da quai hai a Roma sin 10 000 abitants be 21 taxis, bler pli pauc ch’èn autras metropolas europeicas.

En intginas zonas cun diminuziun dal traffic (Zona a Traffico Limitato, ZTL) en il center da la citad pon ins charrar tranter las 6 e las 18 uras be cun ina lubientscha speziala. Questas zonas han ins stgaffì ils onns 1970 e 1980 perquai che las vias eran cronicamain surchargiadas. En las parts da la citad Trastevere e San Lorenzo hai percunter bler traffic la notg, uschia che vala là la regla dal traffic limità durant la notg. 

Il traffic local public a Roma vegn gestiunà per gronda part da l’interpresa da traffic citadina ATAC. Il sistem da traffic public cumpiglia bus, trolleybus, tram, metro e viafier urbana. 

La rait da bus dumbra 350 lingias cun bundant 8000 staziuns. Il tram è vegnì avert a Roma l’onn 1877 e maina oz sin sis lingias sur ina distanza da bundant 51 km cun 192 staziuns. Trolleybus ha la citad enconuschì tranter il 1937 ed il 1972; l’onn 2005 han ins puspè reavert ina lingia. 

La metro (Metropolitana di Roma) dispona da las trais lingias A, B e C cun total 74 staziun sin ina lunghezza da 60 km (situaziun dal 2016). Las duas lingias A e B sa cruschan a Termini. L’emprim traject (oz B) è vegnì avert il 1954 e cumplettà ils onns 1990 resp. il 2012 (B1); la lingia A è suandada l’onn 1980 ed è vegnida prolungada il 1999/2000; l’emprima part da la lingia C deriva dal 2014. Pervi da problems finanzials e chats archeologics ha l’ulteriura construcziun da la lingia C stuì vegnir sistida. Ulteriuras lingias da metro sa chattan en planisaziun.

A Roma sa chattan trais universitads statalas: L’Università degli Studi di Roma La Sapienza è ina da las pli veglias (fundaziun: 1303) e cun radund 147 000 students ina da las pli grondas universitads da l’Europa. Las duas ulteriuras universitads èn Tor Vergata e Roma Tre. Daspera existan pliras universitads catolicas sco instituziuns da la Sontga Sedia u da singuls urdens religius.

Ultra da quai furma Roma la sedia da l’academia naziunala da las scienzas (Accademia Nazionale dei Lincei), da las academias papalas e da diversas academias e conservatoris naziunals da saut, musica e teater. Medemamain a Roma sa chatta l’institut central per la restauraziun d’ovras d’art.

A Roma vegnan edidas pliras gasettas dal di ed emnilas: ‹La Repubblica›, ‹Il Messaggero›, ‹Il Tempo›, ‹Il Foglio›, ‹Il manifesto›, ‹liberazione›. 

La Radiotelevisione Italiana ha medemamain sia sedia principala a Roma. En pli è la citad, pervi dal clima ed ils monuments, in lieu tschertgà per l’industria da film (Cinecittà).

Las administraziuns centralas da diversas interpresas ed organisaziuns centralas han lur sedia a Roma. Latiers tutgan l’Organisaziun da las Naziuns Unidas per l’alimentaziun e l’agricultura (FAO) ed il Fond internaziunal per il svilup agricul (IFAD).

 




#Article 10: Frantscha (12273 words)


La Frantscha (uffizial Republica franzosa, franzos République française [ʁe.py.ˈblik fʁɑ̃.ˈsɛz], en furma curta (la) France [fʁɑ̃s]) è in stadi unitar, democratic ed intercontinental ch’è situà en l’Europa dal Vest e che cumpiglia inslas e territoris d’ultramar sin plirs continents. La France métropolitaine, vul dir la part europeica dal territori statal, s’extenda da la Mar Mediterrana fin al Chanal da la Mongia e la Mar dal Nord sco er dal Rain fin a l’Ocean Atlantic. Pervi da sia furma caracteristica vegn la terra franca dal pajais er numnada Hexagone. Areguard la surfatscha furma la Frantscha il pli grond pajais da l’Uniun europeica e dispona dal terz grond territori dal stadi en l’Europa insumma (suenter la Russia e l’Ucraina). Paris è la chapitala dal pajais e furma ensemen cun l’Île-de-France la pli gronda zona d’aglomeraziun dal pajais, avant Lyon, Marseille, Toulouse e Lille.

En il 17avel e 18avel tschientaner ha la Frantscha occupà ina posiziun egemoniala entaifer l’Europa. Da muntada è stada tant l’irradiaziun politica sco er culturala: La curt da Louis XIV è daventada l’exempel per ils stadis absolutistics en tut l’Europa; la Revoluziun franzosa cun la Decleraziun dals dretgs da l’uman e dal burgais e l’occupaziun tras Napoleun ch’è suandada han mess ad ir en blers pajais il svilup da la democrazia, il qual è però adina puspè vegnì interrut. En territoris d’ultramar ha la Frantscha erigì duas giadas in imperi colonial: l’emprim cumpigliava tranter auter vastas parts da l’America dal Nord ed è per gronda part ì a perder ils onns 1756–1763 durant la Guerra da set onns; il segund ha surtut cumpiglià vastas parts da l’Africa e furmava en il 19avel ed a l’entschatta dal 20avel tschientaner la segund gronda pussanza coloniala dal mund. En il 21avel tschientaner vala la Frantscha ensemen cun la Germania sco forza motorica da l’integraziun europeica.

La Republica franzosa vegn declerada en la constituziun sco indivisibla, laicistica, democratica e sociala. La maxima da quella sa cloma: ‹Regenza dal pievel tras il pievel e per il pievel›. La Frantscha vala sco in dals pajais ils pli sviluppads dal mund. Partind dal product naziunal brut sa tracti da la tschintgavel gronda economia dal mund e da la terz gronda paritad da la capacitad da cumpra en l’Europa. Il standard da viver, il grad da furmaziun e l’aspectativa da vita valan generalmain sco auts. Ultra da quai sa tracti dal pajais dal mund che vegn visità il pli savens: onn per onn visitan radund 83 milliuns turists da l’exteriur la Frantscha.

La Frantscha mantegna la terz gronda armada entaifer la NATO e la pli gronda armada da l’Uniun europeica. Il pajais furma in dals commembers stabels dal Cussegl da segirezza da las Naziuns unidas e disponiva il 2010 sco pussanza atomara dal terz grond arsenal d’armas nuclearas. La Frantscha è stada in commember fundatur da l’Uniun europeica e da las Naziuns unidas, è commembra da la Francophonie, dals G7, dals G20, da la NATO, da l’Organisaziun da cooperaziun e svilup economic en Europa (OECD), da l’Organisaziun mundiala da commerzi (OMC) e da l’Uniun latina.

La terra franca europeica da la Frantscha, cun sia furma hexagonala caracteristica, cumpiglia ina surfatscha da 543 965 kilometers quadrat.

Sco in dals pli gronds pajais da l’Europa è la Frantscha segnada da numerusas furmas da la cuntrada che sa differenzieschan marcantamain ina da l’autra. Per gronda part prevalan en il maletg da la cuntrada planiras u collinas miaivlas. En il sidost ed al cunfin cun la Peninsla Iberica è il pajais segnà da muntognas. Las muntognas principalas furman las Pireneas en il sidvest, il Massiv Central en la part meridiunala da l’intern dal pajais sco er – dal nord al sid – las Vogesas, il Giura e las Alps en l’ost dal pajais. La pli auta muntogna da la Frantscha è il Mont Blanc (4810 m s.m.); quel furma a medem temp il pli aut piz da l’Europa Centrala e dal Vest.

La Frantscha dispona da rivas maritimas en il sid (Mar Mediterrana), sco er en il vest e nord (Ocean Atlantic, Chanal da la Mongia e Mar dal Nord). En il sidvest cunfinescha il pajais cun la Spagna ed Andorra, en il nord ed ost cun la Belgia, il Luxemburg, la Germania, la Svizra e l’Italia sco er en il sidost cun il Monaco.

Tut en tut è la Frantscha dividida en 18 regiuns; da quellas sa chattan 13 en l’Europa e tschintg furman territoris franzos d’ultramar (France d’outre-mer) – Guyana Franzosa, Guadeloupe, Martinique, Mayotte e Réunion. Fin il 2015 eran las parts europeicas da la Frantscha divididas en 22 regiuns, uschia ch’il dumber total da las regiuns muntava a 27.

La zona d’aglomeraziun per lunschor la pli gronda ed impurtanta furma la chapitala Paris cun bundant 10 milliuns abitants en la regiun Île-de-France. Las regiuns grondas enturn Lyon, Marseille, Toulouse e Lille dumbran medemamain bundant in milliun abitants. Las pli grondas citads èn (situaziun dal 2011 senza e cun aglomeraziun): Paris (2 250 000 / 12 300 000), Marseille (850 500 / 1 721 000), Lyon (472 000 / 2 289 000), Toulouse (447 000 / 1 250 000), Nizza (344 000 / 1 004 000), Nantes (288 000 / 884 000), Strasbourg (272 000 / 764 000), Montpellier (264 500 / 561 000), Bordeaux (235 000 / 1 141 000), Lille (227 500 / 1 159 500) e Rennes (208 000 / 680 000).

La Frantscha mantegna territoris da protecziun da la natira da differentas categorias tant en il coc europeic dal pajais sco er en ses territoris d’ultramar. Igl èn quai: 

L’onn 1750 è la populaziun dal pajais vegnida stimada sin ca. 25 milliuns. Cun quai furmava la Frantscha il pajais da l’Europa dal Vest per lunschor il pli populà. Fin il 1850 è il dumber d’abitants creschì sin ca. 37 milliuns; alura è suandada ina stagnaziun ch’era da ses temp senza paregl en l’Europa. Sco motivs vegnan inditgads la bainstanza relativa e la civilisaziun ch’era vaira avanzada. Il cumportament sexual cuntraceptiv era sviluppà pli ferm ch’en auters pajais; a medem temp era l’influenza da la baselgia catolica gia flaivlentada. Uschia è il dumber d’abitants creschì en stgars 100 onns per be trais milliuns: l’onn 1940 dumbrava la Frantscha, malgrà grondas immigraziuns suenter il 1918, be radund 40 milliuns abitants. Questa stagnaziun da la populaziun vegn resguardada sco in dals motivs, daco che la Frantscha ha pudì sa defender durant las duas guerras mundialas be cun stenta cunter la Germania vischina ch’era demograficamain bundant pli dinamica. Ultra da quai aveva l’armada franzosa subì ils onns 1914/18 sperditas relativas che tutgavan tar las pli autas da tut las naziuns cumpigliadas en las acziuns da guerra. Suenter la Segunda Guerra mundiala è alura suandà in augment da las naschientschas e la populaziun è puspè creschida; per ina buna part è quest svilup er stà d’attribuir ad immigraziuns nà da las anteriuras colonias franzosas. L’onn 1990 han ins eruì 56,6 milliuns abitants e per il 2010 han ins stimà 64,7 milliuns abitants incl. ils territoris d’ultramar, da quai 62,8 milliuns en la Frantscha metropolitana.

Suenter la Germania furma la Frantscha il pajais da l’Uniun europeica cun il segund aut dumber da la populaziun; en tut il mund sa chatta ella sin la 20avla plazza. Il 2009 dumbrava la Frantscha entaifer l’Uniun europeica ina cumpart da la populaziun da radund 13 %.

L’onn 2009 èn vegnidas serradas 256 000 lètgs; diesch onns avant eran quai anc stadas 294 000. Persuenter han dapli Franzos elegì l’uschenumnà patg da solidaritad civil sco furma da convivenza. Quests partenadis han ins introducì il 1999; il 2009 èn vegnids serrads 175 000 patgs. La rata da fritgaivladad giascheva il 2008 cun 2,0 uffants per dunna sin il terz plaz europeic suenter l’Irlanda e l’Islanda; ella è però crudada da trais uffants per dunna en ils onns 1960. L’aspectativa da vita muntava il 2008 a 84 onns per dunnas e 78 onns per umens.

Pervi da la creschientscha da la populaziun ralentada ha la Frantscha gia enconuschì vers la mesadad dal 19avel tschientaner il problem da la mancanza da forzas da lavur. Dapi il cumenzament da l’industrialisaziun èn perquai immigrads lavurers esters nà dals stadis vischins (Italia, Pologna, Germania, Spagna, Belgia) en Frantscha, per exempel en l’aglomeraziun da Paris u en las regiuns da minieras e d’industria d’atschal Nord-Pas-de-Calais e Lorena. A partir dal 1880 han uschia vivì e lavurà en Frantscha radund in milliun esters; lur dumber muntava a 7 fin 8 % da las persunas activas. Il fenomen d’ina emigraziun en massa, sco che quai era il cas da quel temp en Germania, en l’Italia ed en auters pajais vischins, n’ha la Frantscha betg enconuschì. Durant l’Emprima Guerra mundiala derivavan radund 3 % da la populaziun da la Frantscha da l’exteriur ed igl èn sa mussadas emprimas tendenzas xenofobas. Fin il 1931 è la cumpart dals esters creschida fin a 6,6 %; silsuenter han ins restrenschì fermamain l’immigraziun e bandischà u internà fugitivs, per exempel da la Guerra civila spagnola. Suenter la Segunda Guerra mundiala ha la Frantscha puspè recrutà lavurers esters da la Spagna e dal Portugal ed ha trategnì fin il 1974 ina politica d’immigraziun fitg liberala. Europeans, surtut Talians e Polacs, avevan cumpiglià il 1931 fin a 90 % da la cumpart dad esters; en ils onns 1970 muntava lur cumpart be pli a radund 60 %; la gronda gruppa furmavan uss ils Portugais.

Il 2006 cumpigliava la cumpart da la populaziun estra 5,8 %; latiers vegnan 4,3 % Français par acquisition, pia umans ch’èn naschids a l’exteriur e ch’han surpiglià la naziunalitad franzosa. L’onn 2008 vivevan 5,23 milliuns immigrants en Frantscha, quai che correspunda a 8,4 % da l’entira populaziun. Da quels avevan 5,23 milliuns acquistà la naziunalitad franzosa. Descendents d’immigrants, dals quals almain in genitur era naschì a l’exteriur, èn vegnids stimads il 2010 sin radund 10,4 % da la populaziun totala. Oz deriva la gronda part dals emigrants da l’Africa dal Nord (Algeria, Maroc, Tunesia), alura suondan ils pajais da l’Europa dal Sid (Portugal, Italia, Spagna). En il decurs dals ultims onns èn vegnids vitiers immigrants da las anteriuras colonias franzosas situadas al sid da la Sahara ed en la Caribica. La pli auta concentraziun d’immigrants viva en il sidost dal pajais ed en l’aglomeraziun da Paris.

La constituziun da la tschintgavla Republica franzosa definescha che l’access a la furmaziun e cultura haja dad esser egual per tut ils burgais e ch’i saja l’incumbensa dal stadi da mantegnair in sistem da scola public gratuit e laicistic. Tenor quai è il sistem da furmaziun en Frantscha organisà a moda centralistica; las corporaziuns territorialas han da metter a disposiziun las localitads. 

La scolina sa numna en Frantscha École maternelle e porscha educaziun prescolara per uffants a partir da 2 onns. Quella vegn frequentada d’ina fitg auta procentuala dals uffants, dura l’entir di ed è be colliada cun custs per ils geniturs, sche quels fan diever da las purschidas opziunalas (gentar, tgira supplementara la damaun u la saira). L’École maternelle vegn resguardada en Frantscha bler pli ferm sco scola che quai ch’igl è il cas en la gronda part dals auters stadis. Las persunas che tgiran ils uffants han frequentà ina furmaziun da magister e vegnan engaschads da l’autoritad da scola naziunala che fixescha er ils plans d’instrucziun.

L’École élémentaire che suonda a la Maternelle dura tschintg onns. Suenter avair finì quella frequentan ils uffants il Collège, ina scola cumplessiva da quatter onns ch’els termineschan cun il Brevet des collèges.

Silsuenter sa porschan al giuvenil differentas pussaivladads. El po frequentar ina scola professiunala, la quala el terminescha cun il Certificat d’aptitude professionelle. Il Lycée correspunda pli u main al gimnasi. Quel maina suenter dudesch onns da scola al Baccalauréat. I vegnan distinguidas differentas direcziuns (cun accent economic, litterar, scienzas natiralas e.a.). Tgi che frequenta in Lycée professionnel u in Centre de formation d’apprentis po terminar suenter 13 onns da scola cun in Baccalauréat professionnel. En l’instrucziun da linguas estras domineschan l’englais ed il spagnol.

La furmaziun academica ha lieu a las universitads e Grandes écoles. Questas ultimas han ina meglra reputaziun, in pli bass dumber da students ed in pli aut grad d’assistenza persunala.

La lingua franzosa è sa sviluppada dal francien che vegniva discurrì en il temp medieval en la regiun Île-de-France odierna. Questa furma uffiziala è sa derasada ensemen cun l’expansiun dal domini dals retgs franzos. Il 1539 ha retg François I fixà che la lingua franzosa duaja esser la suletta lingua en ses reginavel. Tuttina discurriva en il 18avel tschientaner be radund la mesadad dals subdits dal retg franzos la lingua franzosa. Suenter la Revoluziun franzosa han ins cumbattì activamain las linguas regiunalas; pir ina lescha ch’è entrada en vigur il 1951 ha admess l’instrucziun en linguas regiunalas. Er oz determinescha l’artitgel 2 da la constituziun dal 1958 che la lingua franzosa saja la suletta lingua uffiziala da la Frantscha. Quella na furma betg be la lingua discurrida generalmain en Frantscha, mabain è purtadra da la cultura franzosa en tut il mund. Pervi da las migraziuns a l’intern dal pajais ed il diever quasi exclusiv da la lingua franzosa en las medias electronicas èn las linguas che vegnan discurridas a nivel regiunal smanatschadas da svanir. La Charta europeica da las linguas regiunalas u minoritaras ha la Frantscha bain suttascrit, ma betg ratifitgà. Tranter auter ha il cussegl da la constituziun franzos giuditgà il 1999 che parts da la Charta na sajan betg cumpatiblas cun la constituziun franzosa. Dapi il 2008 menziunescha la constituziun en l’artitgel 75-1 las linguas regiunalas sco ierta culturala da la Frantscha.

Linguas regiunalas che vegnan discurridas en Frantscha furman las linguas d’oïl romanas en il nord da la Frantscha – che vegnan per part resguardadas sco dialects franzos (sco picard, norman, gallo, poitevin-saintongeais, vallon e champenois) – il francoprovenzal en il territori da las Alps e dal Giura franzos e svizzer, l’occitan en la Frantscha dal Sid, il catalan en il Département Pyrénées-Orientales, l’alsazian e loren en il nordost dal pajais, il basc e ses dialects en il sidvest, il breton en il nordvest, il cors a Corsica ed il flam en il nord dal pajais. Ultra da quai vegnan discurrids en ils territoris d’ultramar las pli differentas linguas sco las linguas polinesianas, las linguas creolas u las linguas canacas. 

Cuntrari a la situaziun per exempel en l’Italia na datti en Frantscha naginas linguas regiunalas cun in status uffizial. Er tar nums locals e toponims èn sa mantegnidas be parzialmain influenzas regiunalas. Uschia èn anc derasadas vastamain denominaziuns tudestgas en l’Alsazia, ma betg en la Lorena. Analog èn ils nums talians sa mantegnids suenter che l’insla Corsica è vegnida integrada en il pajais, betg però sin la terra franca (Savoia, contadi da Nizza resp. Alpes-Maritimes) – territoris ch’eran pli baud associads cun l’Italia. Il num local Nizza deriva bain dal talian, al lieu vegn però duvrà uffizialmain be la noziun franzosa Nice. Il pli en il nord dal pajais, en ils territoris da cunfin vers la Flandra, datti intgins nums locals neerlandais; en il territori da cunfin cun la Spagna sa laschan distinguer influenzas dal basc e catalan.

Il franzos è lingua da lavur tar las Naziuns unidas, l’Organisaziun per la segirezza e la cooperaziun en l’Europa, en la Cumissiun europeica ed en l’Uniun africana. La Frantscha enconuscha diversas instituziuns e mecanissems che gidan ed evitar che anglicissems prendian suramaun entaifer la lingua franzosa. Las autoritads èn obligadas da far diever dals neologissems che vegnan creads da la Commission générale de terminologie et de néologie e decretads da la Délégation générale à la langue française et aux langues de France.

La Frantscha è uffizialmain in stadi laicistic, quai che signifitga ch’il stadi e las cuminanzas religiusas èn spartids cumplettamain in da l’auter. Il stadi na relevescha er naginas datas davart l’appartegnientscha religiusa; quellas sa basan pia sin stimaziuns u sin indicaziuns da las cuminanzas religiusas sezzas. Tenor ina retschertga da ‹Le Monde› èn 51 % dals Franzos catolics, 9 % muslims, 3 % protestants ed 1 % gidieus. 31 % inditgeschan d’appartegnair a nagina religiun; ils ulteriurs 5 % appartegnan ad autras cuminanzas religiusas (surtut ortodoxs, budists e hindus) u n’han fatg naginas indicaziuns.

Entaifer la cumpart catolica pratitgescha be ina pitschna part activamain la cretta; da l’autra vart èn però er represchentads fitg ferm ils moviments dal tradiziunalissem catolic. Tenor enquistas actualas inditgeschan 58 % dals Franzos da crair en in Dieu; la cumpart dals giuvenils che crain en ina vita suenter la mort è però creschida dapi il 1981 da 31 % sin 42 %. Tenor in studi dal PewResearch Center fan 27 % dals Franzos valair d’esser «religius» e 10 % d’esser «fitg religius». Omaduas valurs èn fitg bassas cumpareglià cun auters stadis.

Istoricamain è la Frantscha stada sur lung temp in stadi en il qual dominava il catolicissem. Dapi Louis XI († 1483) han ils retgs franzos purtà cun il consentiment dal papa il titel d’in roi très chrétien. Dal temp da la refurmaziun è la Frantscha adina stada per gronda part catolica, cumbain ch’i deva fermas minoritads protestantas (ughenots). Il pli tard suenter la mazzacra da la Notg da Baltramieu 1572 han quests ultims però stuì dar si lur speranzas areguard ina Frantscha protestanta. Cur ch’il protestant Henri IV è daventà ertavel dal tron, ha el midà per motivs tactics-politics a la cretta catolica («Paris vaut bien une messe», per rumantsch «Paris vala tuttavia ina messa»); a medem temp ha el però garantì als protestants en furma da l’Edict da Nantes (1598) dretgs spezials e surtut la libertad da cretta. Il 1685 ha Louis XIV revocà l’Edict da Nantes; malgrà ch’igl è vegnì smanatschà cun sancziuns penalas ordvart severas, ha quai manà ad ina fugia en massa dals ughenots en l’exteriur cunfinant ch’era da cretta protestanta. Pir curt avant la Revoluziun franzosa è puspè vegnida admessa als protestants ina libertad da cretta parziala. La Revoluziun franzosa ha alura abolì tut las limitaziuns da la libertad da la cretta. En ils onns suenter la Revoluziun, dal temp da l’emprima Republica franzosa, hai dà ina curta fasa ch’è stada segnada da fitg fermas tendenzas anticlericalas, damai che la baselgia catolica vegniva resguardada sco represchentanta da l’ancien régime. Betg be ils privilegis da la baselgia èn vegnids dismess, mabain schizunt il chalender cristian ed ils servetschs divins e remplazzads tras in chalender revoluziunar resp. tras in «cult da l’esser suprem». Sut Napoleun Bonaparte è il stadi però puspè sa cunvegnì cun la baselgia catolica en furma dal concordat dal 1801. Ed a chaschun da la restauraziun bourbonica suenter il 1815 han las ideas monarchic-catolicas schizunt puspè survegnì il suramaun: las truppas bourbonicas ch’èn vegnidas tramessas il 1823 en Spagna per abatter la revoluziun liberala vegnivan numnadas ils ‹100 000 figls da son Ludvic› ed en ils territoris da surmar han ins promovì la missiun gesuitica.

Dal temp da la Terza Republica è danovamain prorut in conflict tranter la baselgia ed il stadi. Quel ha manà il 1905 ad ina lescha, en la quala è vegnida fixada la separaziun stricta da baselgia e stadi.

La cuminanza giudaica en Frantscha è segnada d’ina istorgia muventada. La preschientscha dals gidieus è documentada dapi il temp dals Romans. En il decurs dal temp medieval han ins però stgatschà quels en duas undas cumplettamain dal pajais: il 1306 sut Philippe IV ed il 1394 sut Charles VI. Sur plirs tschientaners ha silsuenter strusch pli existì en Frantscha ina vita e cultura giudaica. La suletta excepziun han furmà ils territoris en l’ost dal pajais ch’èn vegnids acquistads en il 18avel e 19avel tschientaner – surtut l’Alsazia – ils quals han profità sur lung temp d’in status spezial. La Revoluziun franzosa ha la finala concedì als gidieus l’egualitad burgaisa. Fin l’entschatta dal 20avel tschientaner è la Frantscha però restada in pajais cun ina populaziun gidieua relativamain pitschna. Suenter l’Emprima e surtut suenter la Segunda Guerra mundiala èn blers gidieus immigrads nà da l’Europa da l’Ost, uschia che la Frantscha represchenta oz il stadi europeic cun la pli gronda gruppa da la populaziun gidieua insumma. Pervi da tendenzas antisemiticas creschentas, surtut da vart da muslims, e la stagnaziun economica datti actualmain però ina grond’unda d’immigraziun gidieua. I vegn supponì che be tranter il 2010 ed il 2015 hajan bundant 100 000 gidieus bandunà il pajais, uschia che la cuminanza gidieua en Frantscha dumbra be pli radund 400 000 persunas.

Medemamain dapi la fin da la Segunda Guerra mundiala è la cumpart dals muslims creschida fermamain, e quai surtut pervi da l’immigraziun nà da las anteriuras colonias.

Ins stima che la Frantscha odierna saja vegnida colonisada avant ca. 48 000 onns. Dal temp paleolitic èn sa mantegnids en ils Cuvels da Lascaux impurtantas picturas muralas. A partir da 600 a.C. han ils Fenizians e Grecs fundà basas commerzialas a la costa da la Mar Mediterrana, entant ch’ils Celts – ch’èn pli tard vegnids numnads dals Romans Gals – han colonisà il pajais nà dal nordvest. Ils Gals celtics cun lur religiun da druids vegnan oz savens designads sco ils perdavants dals Franzos e Vercingetorix vegn idealisà sco erox naziunal da la Frantscha, e quai cumbain ch’elements gallics n’èn strusch sa mantegnids en la cultura franzosa. 

Tranter 58 e 51 a.C. ha Caesar conquistà la regiun en rom da la Guerra gallica; sinaquai èn vegnidas installadas las provinzas romanas Gallia Belgica, Gallia Cisalpina e Gallia Narbonensis. En ina perioda da prosperitad e pasch han questas provinzas surpiglià il progress roman sin ils champs da la tecnica, agricultura e giurisdicziun; igl èn sa furmadas citads grondas, elegantas. A partir dal 5avel tschientaner èn immigrads adina pli stedi pievels germans en Gallia; en consequenza dal declin da l’Imperi roman l’onn 476 han quels cumenzà a furmar agens reginavels. Suenter ina dominanza temporara dals Visigots han ils Francs sut Chlodwig I fundà il reginavel dals Merovings. Els han surpiglià diversas valurs ed instituziuns romanas, tranter auter il catolicissem (496). L’onn 732 als èsi reussì, en la Battaglia da Tours e Poitiers, da rebatter l’expansiun islamica nà da la Peninsla Iberica. Als Merovings èn suandads ils Carolings. L’onn 800 è Carl il Grond daventà imperatur; il 843 è il Reginavel dals Francs vegnì repartì entras il Contract da Verdun sin ses biadis; la part occidentala da quel correspundeva pli u main a la Frantscha odierna.

Il temp medieval franzos è stà segnà da l’avanzament da la pussanza roiala en il cumbat permanent cunter l’independenza da la noblezza auta ed ils dominis seculars da las claustras e congregaziuns. Partind da l’Île-de-France odierna han ils Capetings fatg valair l’idea dal stadi unitar; la participaziun a diversas cruschadas ha gidà a consolidar lur pussanza. Nà dal nord èn ils Normans penetrads repetidamain en la Normandia ch’ha perquai survegnì lur num; l’onn 1066 han els er conquistà l’Engalterra. Sut Louis VII ha cumenzà ina lunga seria da conflicts guerrescs cun l’Engalterra, quai suenter che la dunna divorziada da Louis, Éléonore d’Aquitania, aveva maridà il 1152 Henry Plantagenet, uschia che radund la mesadad dal territori statal franzos era crudà a l’Engalterra. A Philipp II Auguste èsi reussì fin il 1299 cun agid dals Staufers da stgatschar ils Englais dal pajais; il retg englais Henry III ha plinavant stuì acceptar Louis IX sco signur feudal. A partir dal 1226 è la Frantscha daventada ina monarchia ereditara; l’onn 1250 era Louis IX in dals pli pussants regents da l’Occident.

Suenter la mort da l’ultim dals Capetings è Philippe VI vegnì elegì l’onn 1328 sco nov retg da la Frantscha; el ha fundà la dinastia dals Valois. La populaziun dal pajais vegn stimada da quel temp sin radund 15 milliuns. Cun la scholastica e l’architectura romana e gotica dominava il pajais impurtants champs culturals e spiertals. Pretensiuns al tron da vart dad Edward III Plantagenet, retg da l’Engalterra e duca d’Aquitania, han manà il 1337 a la Guerra da tschient onns. Suenter che l’Engalterra aveva pudì conquistar l’entir nordvest dal pajais, èsi l’emprim reussì als Franzos da chatschar enavos ils invasurs. Alura hai però dà ina rebelliun da vart da la Burgogna ed il retg da la Frantscha è vegnì assassinà; sinaquai ha l’Engalterra schizunt pudì occupar Paris e l’Aquitania. Pir grazia a la resistenza naziunala che Jeanne d’Arc ha mess ad ir èsi reussì da reconquistar fin il 1453 ils territoris pers (cun excepziun da Calais). Ultra da la Guerra da tschient onns ha furià la pestilenza dal 1348 ch’ha chaschunà la mort da radund in terz da la populaziun.

Cun incorporar la Burgogna e la Bretagna en il territori statal, ha la roialitad franzosa cuntanschì in emprim punct culminant da sia pussanza. Durant la renaschientscha è quest domini però vegnì periclità adina pli fitg da vart dals Habsburgais – l’imperatur habsburgais Karl V regiva sur in imperi, dal qual ils pajais sa gruppavan enturn l’entira Frantscha. Ils calvinists franzos, numnads ughenots, èn vegnids supprimids fermamain en lur exercizi da la cretta; las Guerras dals ughenots e surtut la Notg da Baltramieu 1572 han manà a l’emigraziun da tschientmillis ughenots. Pir l’emprim regent or da la chasa dals Bourbons, Henri IV, ha concedì als ughenots en l’Edict da Nantes il 1598 libertad da religiun.

Il temp da la renaschientscha è er stà segnà d’ina ferma centralisaziun; il retg è daventà independent tant da la baselgia sco er da l’aristocrazia. Als ministers e cardinals Richelieu e Jules Mazarin èsi reussì d’eriger in stad absolutistic. Sin iniziativa da Richelieu è la Frantscha intervegnida il 1635 a moda activa en la Guerra da trent’onns che furiava en l’Europa Centrala; en quest connex è er prorutta la guerra cun la Spagna. En rom da la Pasch da Vestfalia (1648) han ins concedì a la Frantscha l’Alsazia, entant ch’il Sontg Imperi roman e la Spagna han pers ina part da lur pussanza. Igl ha cumenzà l’epoca da la dominanza franzosa en l’Europa. Tut ils regents europeics s’orientavan a l’exempel da la cultura franzosa. La lingua franzosa è daventada la lingua da furmaziun dominanta. Las guerras che chaschunavan gronds custs e l’opposiziun da vart da la noblezza han però manà al bancrut statal (Fronde). Cun l’Edict da Fontainebleau dal 1685 è la libertad da cretta dals ughenots puspè vegnida schliada; danovamain èn fugids tschientmillis ughenots. Sut Louis XIV, l’uschenumnà roi soleil, il qual è vegnì intronisà l’onn 1643 (en la vegliadetgna da quatter onns) ed ha regì fin il 1715, ha l’absolutissem cuntanschì ses punct culminant. Da quel temp han ins erigì il chastè da Versailles.

Las guerras ch’ils retgs absolutistics manavan (p.ex. la Guerra da devoluziun, la Guerra ollandaisa, la Guerra da la successiun ereditara dal Palatinat, la Guerra da la successiun ereditara spagnola, la Guerra da set onns e la participaziun a la Guerra d’independenza americana), ils custs immens da la curt sezza sco er nauschas racoltas han manà ad ina gronda crisa da finanzas, la quala ha sfurzà il retg Louis XVI da convocar ils Stans generals. L’Assamblea naziunala ha elavurà ina constituziun, limità la pussanza dal retg e terminà l’ancien régime. Las cundiziuns da viver dal pievel cumin ch’èn pegiuradas vinavant, han manà il 1789 a la Revoluziun franzosa cun la Decleraziun dals dretgs da l’uman e dal burgais sco prestaziun centrala. La baselgia han ins exproprià ed in nov chalender ha remplazzà il vegl. La Constituziun ch’è vegnida deliberada il 1791 ha transfurmà la Frantscha en ina monarchia constituziunala. Suenter l’emprova dal retg da fugir en l’exteriur, è quel vegnì mess a ferm ed executà il 1793; sinaquai è suandada la proclamaziun da l’Emprima Republica. Las emprimas experientschas cun la furma statala republicana, la quala sa basava sin il princip da l’egualitad, èn però idas a finir en il caos ed en il reschim da terrur sut Robespierre.

En questa situaziun ha Napoleun Bonaparte surpiglià il 1799 cun in culp da stadi la pussanza ed è daventà Emprim Consul; il 1804 ha el curunà sasez sco imperatur. Igl èn suandadas las Guerras da coaliziun, en il decurs da las qualas Napoleun ha dumagnà bunamain l’entira Europa sut sia controlla. Sia campagna militara cunter la Russia l’onn 1812 ha però fatg naufragi; la Battaglia dals pievels sper Lipsia il 1813 ha sigillà la terrada da las truppas franzosas. Durant l’exil da Napoleun sin l’insla d’Elba ha puspè regì in Bourbon, Louis XVIII; il 1815 è Napoleun returnà ed ha regì ulteriurs tschient dis. Suenter la sconfitta en la Battaglia sper Waterloo è el vegnì bandischà definitivamain. La restauraziun ha puspè manà ils Bourbons a la pussanza; quels èn sa mess londervi da reconstruir l’imperi colonial ch’era ì a perder. En Frantscha ha gì lieu a medem temp la Revoluziun industriala ed igl è sa furmada plaunsieu ina classa dals lavurants. La Revoluziun da fanadur dal 1830 ha cupitgà Charles X che regiva a moda despotica, al remplazzond tras il ‹retg dals burgais› Louis-Philippe I. En rom d’in’ulteriura revoluziun burgaisa è vegnida installada il 1848 en Frantscha la Segunda Republica.

Sco president da la Segunda Republica han ins elegì Louis-Napoléon Bonaparte, il qual ha gia laschà curunar sai il 1852 sco imperatur. Sut sia regenza è l’opposiziun vegnida supprimida cun la forza; sin il champ da la politica exteriura ha el però pudì registrar divers success sco l’acquist da Nizza e da la Savoia, l’incorporaziun da l’Africa equatoriala e da l’Indochina en l’imperi colonial e l’erecziun dal Chanal da Suez. A medem temp è sa sviluppada la Germania, sut l’egida da la Confederaziun da la Germania dal Nord, ad in stadi naziunalistic. La Guerra tudestg-franzosa ha Napoléon III mess ad ir cun l’intenziun da metter terms al concurrent pussant areguard l’egemonia en l’Europa; ma la guerra è ida a fin cun la sconfitta da la Frantscha e Wilhelm I è vegnì proclamà en la Galaria dals spievels da Versailles sco imperatur tudestg. La Communa da Paris, in’insurrecziun che sa drizzava cunter la capitulaziun, è vegnida abattida cun la forza.

La Terza Republica ha durà dal 1871 fin il 1940. Durant quest temp è l’imperi colonial franzos s’extendì sin ina surfatscha totala da 7,7 milliuns kilometers quadrat. L’industrialisaziun da la Frantscha ha manà ad in grond svilup economic: ils onns 1878, 1889 e 1900 han gì lieu a Paris exposiziuns mundialas. 

Tranter la Frantscha ed il Reginavel Unì è prorut in conflict pervi da la dominanza en l’Africa. Omadus pajais pratitgavan in imperialissem intensiv. Il punct culminant da questa ‹cursa› ha furmà la Crisa da Faschoda dal 1898 tranter ils dus pajais. Il Reginavel Unì aveva la finamira da conquistar ina zona da colonias che tanscheva dal sid al nord dal continent (l’uschenumnà «Plan Cap-Cairo»). La Frantscha percunter aveva en mira ina zona da colonias che tanscheva dal vest a l’ost, da Dakar fin Dschibuti. Las pretensiuns dals dus stadis èn collidadas en il pitschen lieu sudanais Faschoda. La finala ha la Frantscha dà suenter senza cumbat; il mars 1899 han ils dus pajais definì lur zonas d’interess (Contract dal Sudan). Cun il Scandal da Panama (1889–1893), la Crisa da Faschoda e l’Affera Dreyfus (1894–1905) ha la Terza Republica subì entaifer diesch onns trais grondas crisas. 

La baselgia catolic-romana ha pratitgà sur decennis ina tenuta antimodernistica; pervi da quai ed er en rom da l’Affera Dreyfus è la Frantscha sa sviluppada ad in stadi d’orientaziun decididamain laicistica.

Il 1904 ha la Frantscha concludì cun il Reginavel Unì l’Entente cordiale ed il 1914 è ella entrada en l’Emprima Guerra mundiala cun la finamira da reconquistar l’Alsazia e la Lorena e d’indeblir a moda decisiva la Germania. Suenter la guerra ha la Frantscha bain tutgà tar ils victurs; la Frantscha dal Nord era però devastada per gronda part. Tar ils 1,5 milliuns schuldads ch’eran crudads èn anc vegnids vitiers 166 000 unfrendas da la Grippa spagnola dal 1918/1919.

Il tranterguerra è stà segnà en Frantscha d’instabilitad politica. En rom dal Contract da Versailles è la Germania vegnida obligada il 1919 da prestar a las pussanzas victuras auts custs da reparaziun. Surtut il primminister franzos e minister da l’exteriur Poincaré insistiva che las prestaziuns vegnian ademplidas punctualmain e senza resalvas. Pervi da retardaments èn truppas franzosas penetradas repetidamain en territoris betg occupads. Ils 8 da mars 1921 han truppas franzosas e beltgas per exempel occupà las citads Duisburg e Düsseldorf en la zona demilitarisada. Per in tschert temp han ins silsuenter schizunt occupà l’entir territori da la Ruhr.

Il Front populaire che regiva dapi il 1934 è surtut sa stentà da mantegnair il status quo, uschia che la Frantscha era preparada mal sin l’erupziun da la Segunda Guerra mundiala. En rom da lur champagna dal vest èn las truppas tudestgas guntgidas la lingia da Maginot ed èn marschadas en la chapitala franzosa senza che quella fiss vegnida defendida. Ils 22 da zercladur 1940 ha marschal Pétain stuì segnar il «Segund armistizi da Compiègne» (che vegn numnà en Frantscha Armistice de Rethondes). Il pajais è vegnì sutdividì en ina zone occupée ed ina zone libre, ma er en quest’ultima regiva il reschim da Vichy conservativ-autoritar ch’era dependent dal Reich tudestg. Gia curt temp suenter avair segnà l’armistizi, èn sa furmadas gruppas da la Résistance ed a Londra ha Charles de Gaulle fundà la regenza d’exil Forces françaises libres. En rom da l’operaziun Overlord han ils Alliads reconquistà il 1944 la Frantscha dal Nord. In mais suenter la liberaziun da Paris l’avust 1944 ha de Gaulle furmà ina regenza provisorica. Quella ha tranter auter admess l’october 1944 il dretg da votar da las dunnas che las era vegnì refusà fin qua. 

La constituziun da la Quarta Republica è vegnida concludida ils 13 d’october 1946 tras decisiun dal pievel. La Frantscha, che sa chattava da la vart dals victurs, è daventada in commember fundatur da las Naziuns unidas ed ha survegnì il dretg da veto en il Cussegl da segirezza. Per promover la reconstrucziun dal pajais ha la Frantscha tranter auter pudì profitar da prestaziuns da sustegn or dal Plan da Marshall; l’effect economic da quellas giuditgeschan ils economs a moda cuntraversa. Il boom economic dal suenterguerra è vegnì enconuschent en Frantscha sut il term Trente Glorieuses (per ils onns 1945–1975). Il 1949 è la Frantscha stada in dals commembers fundaturs da la NATO; cun la fundaziun da la Communitad europeica da charvun e d’atschal è vegnì mess il 1951 il crap da fundament da l’integraziun europeica. Il 1957 han ins segnà ils Contracts da Roma ed instituì per il 1958 la Communitad economica europeica, da la quala è resortida en il fratemp l’Uniun europeica; entaifer quella furma la Frantscha in commember activ e dominant.

Il suenterguerra è er segnà dal declin da l’imperi colonial. L’Emprima Guerra d’Indochina (1946–1954) è ida a fin cun la Battaglia da Điện Biên Phủ e la perdita da tut las colonias franzosas en l’Asia dal Sidost. Ina cesura anc pli gronda ha muntà la Guerra d’Algeria (1954–1962); quella ha la Frantscha manà a moda ordvart stinada, ma a la fin ha l’Algeria stuì vegnir relaschada en l’independenza. Tschientmillis pieds-noirs han stuì vegnir manads enavos en Frantscha.

A l’intern dal pajais han ins remplazzà la Quarta Republica, ch’era sa mussada sco instabila, tras la Tschintgavla Republica che prevesa in ferm president che pudeva agir relativamain independent da la legislativa. Questa Tschintgavla Republica è vegnida scurlattada fermamain il matg 1968, quai ch’ha manà a lunga vista a refurmas culturalas, politicas ed economicas. L’onn 1971, pia gia avant la crisa dad ieli dal 1973, ha la Frantscha decidì da daventar pli independenta da l’ieli cun augmentar l’utilisaziun da l’energia nucleara.

In’ulteriura cesura ha muntà il 1981 la surpigliada da la pussanza tras la Partida socialistica e la presidenza da François Mitterrand ch’ha durà fin il matg 1995. Durant quests onns han ins tranter auter realisà vastas statalisaziuns, dismess la paina da mort, introducì l’emna da 39 uras e ratifitgà il 1992 il Contract da Maastricht. Il successur da Mitterand, Jacques Chirac, ha realisà l’introducziun da l’euro e refusà il 2002/2003 da sa participar a la Guerra da l’Irac.

Al president Nicolas Sarkozy ch’ha regì a partir dal 2007 è suandà il 2012 François Hollande, il candidat da la Partida socialista. En rom da la crisa da l’euro han ins discutà a moda critica l’indebitament public e la quota statala. Il 2017 è Emmanuel Macron daventà president dal stadi.

Il 2015 è Paris stà pertutgà da pliras attatgas da terror, commessas tenor atgnas indicaziuns da l’organisaziun da terror Stadi islamic: ils 7 da schaner èn 28 persunas vegnidas per la vita tar in attentat sin la redacziun dal magazin da satira ‹Charlie Hebdo›. E la saira dals 13 da november han terrorists commess en sis differents lieus en la citad attentats, ils quals han chaschunà la mort da 130 persunas. 

Dapi ch’è entrada en vigur il 1959 ina nova constituziun discurr’ins da la Tschintgavla Republica. Quella fa da la Frantscha ina democrazia organisada a moda centralistica cun in sistem guvernamental semipresidenzial. En congual cun constituziuns precedentas han ins rinforzà la rolla da l’executiva e surtut quella dal president. Quai è stà ina reacziun sin l’instabilitad politica dal temp da la Quarta Republica. Tant il president sco er il primminister giogan ina rolla activa en la vita politica; il president è percunter be responsabel envers il pievel. La pussanza dal parlament han ins bain reducì en la Tschintgavla Republica; la constituziun al ha però surdà funcziuns da controlla decisivas.

La constituziun na cuntegna nagin catalog da dretgs fundamentals, mabain renviescha a la Decleraziun dals dretgs umans e da burgais dal 1789 sco er als dretgs fundamentals socials ch’eran vegnids fixads en la Constituziun da la Quarta Republica.

Tenor la constituziun furma il president dal stadi, che vegn elegì dal pievel, l’organ statal superiur. El stat sur tut las autras instituziuns. El surveglia la constituziunalitad da l’agir statal, segirescha che las pussanzas publicas funcziuneschian, procura per la cuntinuitad dal stadi, l’independenza, l’inviolabilitad dal territori statal e guarda che cunvegnas serradas cun auters stadis vegnian tegnidas. En cas da dispitas intermediescha el tranter las instanzas statalas. El proclamescha leschas ed ha il dretg da suttametter quellas al cussegl da la constituziun per examinaziun. El dastga refusar leschas u parts da quellas al parlament per in’ulteriura deliberaziun, na dispona però da nagin dretg da veto. Decrets ed ordinaziuns vegnan decidids dal cussegl dals ministers, il qual vegn manà dal president; envers quels ha il president il dretg d’in veto suspensiv. Areguard la politica da l’exteriur e da segirezza dispona il president dal stadi da la cumpetenza da las lingias directivas e da ratificaziun, uschia ch’el furma a moda decisiva la politica da l’exteriur dal pajais e concluda a moda lianta cunvegnas dal dretg internaziunal. Questa pratica è sa sviluppada durant il temp d’uffizi da de Gaulle e na resorta betg exnum da la constituziun. Sin dumonda da la regenza u dal parlament po il president iniziar votaziuns dal pievel. El nominescha commembers d’impurtants gremis, tranter auter trais dals nov commembers dal cussegl da la constituziun, tut ils commembers dal cussegl superiur per la magistratura sco er ils procuraturs publics. Il president n’è suttamess a nagina controlla tras la giudicativa; envers il parlament è el be responsabel en cas d’auttradiment. Ultra da quai cumonda il president las forzas armadas (incl. las bumbas atomaras); en cas da stadi d’urgenza dispona el d’autoritad quasi illimitada. Il president vegn cusseglià e sustegnì da l’uffizi presidial.

L’autoritad statala ch’al è vegnida surdada dat il president vinavant al primminister ed a la regenza; er quest’ultima ha da sa tegnair vi da las lingias directivas che vegnan dadas avant dal president (e betg sco en blers auters pajais dal primminister). Quests entretschaments e mecanissems pretendan ina stretga collavuraziun tranter president e primminister; quella po esser difficila en il cas d’ina Cohabitation, vul dir sch’il president ed il primminister derivan da champs politics opposts. Il president nominescha formalmain, senza naginas restricziuns, in primminister e, sin proposta dal primminister, ils commembers da la regenza. La regenza dependa silsuenter da la confidenza dal parlament; il president na po betg relaschar ina regenza suenter che quella è vegnida instituida. La regenza sa cumpona da ministers, ministers dal stadi, ministres délegués, pia ministers cun incumbensas spezialas, e da secretaris statals.

Il Parlament da la Tschintgavla Republica consista da duas chombras. L’Assamblea naziunala (Assemblée Nationale) sa cumpona da 577 deputads che vegnan elegids a moda directa per tschintg onns. Il Senat dumbra 348 commembers (dapi il 2011, situaziun dal 2015). Quels vegnan elegids a moda indirecta per in temp d’uffizi da sis onns. L’elecziun dal Senat ha lieu al nivel dals Départements; il collegi d’elecziun sa cumpona dals deputads dals Départements, dals cussegls generals e dals represchentants da las vischnancas.

L’iniziativa areguard l’elavuraziun da leschas po derivar dal primminister u d’ina da las duas chombras dal parlament. Suenter la debatta sto il text da lescha vegnir deliberà dad omaduas chombras. Alura dispona il president dal dretg da refusar il text da la lescha; quai po el però far be ina giada. Il parlament ha ultra da quai l’incumbensa da controllar la lavur da la regenza tras dumondas e discussiuns. L’Assamblea naziunala ha la pussaivladad da cupitgar la regenza. Il parlament n’è betg autorisà da provocar politicamain il president dal stadi. Il president percunter po schliar l’Assamblea naziunala; da quest dretg è vegnì fatg diever repetidamain per terminar fasas da Cohabitation difficilas.

Il 1974 è stà l’ultim onn che la Frantscha ha segnà nagins novs indebitaments. Il 2010 cumpigliava la bilantscha dal stadi expensas da 1094 milliardas euros ed entradas da 957 milliardas euros. Il deficit ha pia muntà a 137 milliardas euros resp. 7,1 % dal product naziunal brut.

Il 2010 eran s’accumulads debits dal stadi da 1591 milliardas euros u 82,3 % dal product naziunal brut. Tant la quota dal deficit annual sco er quella dals debits publics en general sa chattan uschia lunsch sur ils criteris da convergenza che l’Uniun europeica ha relaschà (Criteris da Maastricht) che muntan a maximal 3 % per onn resp. a 60 %. Quest trend ha er cuntinuà ils ultims onns, cumbain sin in nivel in pau pli bass.

Il 2006 ha la Frantscha impundì 11,0 % da las expensas per la sanadad, 5,7 % per la furmaziun e 2,6 % per il militar.

Il spectrum da partidas franzos è ordvart fragmentà e segnà d’ina gronda dinamica. Savens naschan novas partidas e midan partidas existentas lur num. Las partidas franzosas han per ordinari in dumber da commembers relativamain pitschen ed ina structura d’organisaziun plitost flaivla che sa concentrescha sin Paris sco il lieu, nua che vegn prendida la gronda part da las decisiuns.

La sanestra vegn dominada dal Parti socialiste (PS), da la quala derivan ils dus presidents François Mitterrand e François Hollande. Entaifer ils conservativs dominescha la partida gaullista ch’ha midà diversas giadas il num e che sa cloma dapi il 2015 Les Républicains. Sper Charles de Gaulle ha ella tschentà entaifer la Tschintgavla Republica ils presidents dal stadi Georges Pompidou, Jacques Chirac e Nicolas Sarkozy. Bundant pli a dretga èn situads il Mouvement pour la France ed il Front National.

Suenter la Segunda Guerra mundiala han la Germania e la Frantscha renunzià a l’ostilitad ch’aveva dominà dapi il 1870/71 lur relaziun. Tranter ils dus stadis èn sa sviluppadas relaziuns ordvart stretgas. Omadus pajais han appartegnì als commembers fundaturs da l’Uniun europeica; per part è schizunt vegnida discutada in’‹Europa da duas spertadads› cun la Germania, la Frantscha ed intgins auters stadis sco zona centrala da l’avischinaziun.

Ultra da quai s’engascha la Frantscha en l’Organisaziun per la segirezza e la collavuraziun en l’Europa, en l’Organisaziun dal pact da l’Atlantic dal Nord (NATO) ed entaifer las Naziuns unidas, tranter auter sco commember permanent dal Cussegl da segirezza. Sut de Gaulle è la Frantscha sa sviluppada ils onns 1960 ad ina pussanza atomara.

Medemamain da grond’impurtanza en connex cun las relaziuns da l’exteriur da la Frantscha è la politica da cultura e la promoziun da la francofonia. A nivel internaziunal giauda la lingua franzosa ina gronda stima e vegn discurrida da radund 140 milliuns persunas. Quai sustegna il ministeri da l’exteriur cun mantegnair radund 280 scolas en ca. 130 pajais; quellas frequentan radund 16 000 giuvenils. Da la purschida da stgars 1000 localitads da l’Agence française fan diever radund 200 000 students en tut il mund.

Vitiers vegn l’engaschament en l’Africa suenter la fin dal domini colonial. En intgins pajais è la Frantscha restada fin oz la pussanza principala per garantir il mantegniment da l’urden.

La Frantscha dispona d’in dals pli auts budgets d’armament dal mund e tutga tar las pli impurtantas pussanzas militaras insumma. Quella furma dapi la fin dals onns 1990 in’armada da professiun e cumpiglia radund 350 000 umens e dunnas. 20 000 schuldads èn staziunads en ils territoris d’ultramar, ulteriurs 800 en stadis africans, cun ils quals la Frantscha ha fatg cunvegnas da defensiun. Las forzas armadas èn divididas en las trais partiziuns classicas forzas terrestras, aviatica militara e marina. Las forzas armadas nuclearas cun radund 350 detunaturs tutgan per gronda part tar la marina, per ina part pli pitschna tar l’aviatica militara. Ultra da quai è la Gendarmerie nationale, in’autoritad da polizia centrala, suttamessa al ministeri da defensiun. In’enconuschenta secziun entaifer l’armada franzosa furma la legiun estra (légion étrangère).

Sin il pli tard dapi Louis XIII e cardinal Richelieu vala la Frantscha sco stadi centralistic par excellence. Bain han ins prendì diversas mesiras da decentralisaziun; quellas han però plitost gì l’intenziun da manar la pussanza centrala pli datiers al burgais. Pir dapi la refurma administrativa dals onns 1982/83 han ins spustà tschertas cumpetenzas da la regenza centrala sin las corporaziuns territorialas.

Al stgalim superiur è la Frantscha dividida dapi il 2016 en 18 regiuns (régions); quellas collian per part duas da las 27 regiuns d’avant (p.ex. Bourgogne-Franche-Comté u Auvergne-Rhône-Alpes). Las regiuns existan pir dapi il 1964, dapi il 1982/83 han ellas il status da corporaziuns territorialas. Mintga regiun elegia in cussegl regiunal (conseil régional), il qual fixescha da sia vart in president. En pli nominescha il president dal stadi mintgamai in prefect regiunal. Las regiuns èn cumpetentas per l’economia, l’infrastructura e la furmaziun professiunala e gimnasiala. Ellas sa finanzieschan sur taglias ch’ellas incasseschan directamain sco er sur pajaments da transfer da vart da la regenza centrala. La Corsica posseda in status spezial e figurescha tranter las regiuns sco collectivité territoriale. Tschintg regiuns (Guadeloupe, Martinique, la Guayana franzosa, Mayotte e Réunion) sa cumponan da territoris d’ultramar.

Las regiuns èn sutdivididas en departaments (départements). Quels han remplazzà dapi il 1790 las provinzas tradiziunalas per rumper l’influenza dals suverans locals. Dals 101 departaments odierns sa chattan 96 en l’Europa. L’aut dumber da questas unitads d’administraziun relativamain pitschnas vegn adina puspè discussiunà a moda cuntraversa. Ils departaments elegian in cussegl general (conseil général), il qual installescha in president sco organ executiv. La persuna decisiva entaifer il departament furma però il prefect che vegn nominà dal president dal stadi. Ils departaments s’occupan dal servetsch social e da sanadad, dals Collèges, dals indrizs da cultura e da sport sco er da las vias dals departaments. 

Ils 335 arrondissements, da quels 13 d’ultramar, na furman nagina persunalitad giuridica. Quels servan surtut a distgargiar l’administraziun dals departaments. Medemamain servan ils 2054 chantuns (cantons), 72 d’ultramar, be sco districts electorals per l’elecziun dals cussegls generals. Ils arrondissements da las citads da Paris, Lyon e Marseille han il status da chantuns.

L’unitad organisatorica la pli pitschna ed a medem temp la pli veglia furman las vischnancas (communes). Quellas èn suandadas il 1789 a las plaivs e citads. L’entschatta 2012 devi 36 700 vischnancas, da quellas 129 d’ultramar. Malgrà il grond dumber da vischnancas, las qualas dumbran per gronda part be paucs abitants, hai strusch dà ils ultims onns stentas da refurmar quest nivel statal. Mintga vischnanca elegia in cussegl da vischnanca (conseil municipal), il qual nominescha alura da ses mez in president communal (maire). Dapi il 1982 disponan las vischnancas cleramain da dapli dretgs e na vegnan betg pli survegliadas uschè ferm dal stadi. A nivel communal èn organisadas la furmaziun da basa, la planisaziun locala, la gestiun dals ruments e las activitads culturalas; er las vischnancas sa finanzieschan sur atgnas taglias e cun agid da pajaments da transfer.

Ils territoris d’ultramar che n’èn betg attribuids a regiuns u departaments n’appartegnan – cun excepziun da Saint-Barthélemy e Saint-Martin – betg a l’Uniun europeica. Er leschas che vegnan relaschadas en Frantscha valan per quests territoris be sche quai vegn menziunà explicitamain.

Al Cussegl constituziunal cumpeta la funcziun da controlla entaifer il sistem politic. En quest gremi elegian il president dal stadi ed ils presidents da l’Assamblea naziunala e dal Senat mintgamai trais represchentants per in temp d’uffizi da nov onns; quest mandat na po betg vegnir prolungà. Sin dumonda dal parlament examinescha il Cussegl leschas; en pli controllescha el che las elecziuns ed ils referendums vegnian realisads confurm a la lescha.

Tradiziunalmain pratitgeschan ils acturs statals en Frantscha ina politica economica ed industriala vaira activa; las intervenziuns statalas èn relativamain grondas cumpareglià cun auters stadis. Las ideas dal mercantilissem – surtut dal colbertissem – sa fan valair fin oz en Frantscha.

Suenter l’Emprima Guerra mundiala han ins creà il model da l’‹interpresa maschadada›. Quest’allianza tranter chapital privat e public dueva pussibilitar a l’industria naziunala da penetrar sin champs che fissan stads memia ristgads u difficils per s’engaschar be a basa da chapital privat (p.ex. industria d’ieli, chemia). Avant eri usità en cas sumegliants ch’il stadi deva ad ina singula firma ina concessiun exclusiva.

Il 1946 ha la regenza da quel temp mess ad ir in sistem da planificaziun. Il 1981 è François Mitterrand daventà l’emprim president dal stadi socialistic; el ha manà il pajais fin il 1995 e realisà numerusas statalisaziuns.

La Frantscha vala sco economia publica dirigida. Ina paja minimala fixada dal stadi segirescha als emploiads ina paja brutta per ura da stgars 10 euros (situaziun dal 2016).

Ils exports franzos derivan per gronda part da la construcziun da maschinas, da l’industria d’autos, da la tecnica d’aviaziun e navigaziun spaziala, da l’industria farmaceutica, da l’electronica, da la viticultura e da la branscha da victualias.

Il product naziunal brut è creschì tranter il 1995 ed il 2005 en media per 2,1 % l’onn ed ha cuntanschì il 2005 la valur da 1689,4 milliardas euros. En cumparegliaziun cun il product naziunal brut da l’Uniun europeica – exprimì en standards da la capacitad da cumpra – ha la Frantscha cuntanschì il 2014 in index da 107 (EU-28: 100).

Il 2003 lavuravan be pli 4 % da las persunas cun activitad da gudogn en l’agricultura, selvicultura e pestga; en l’industria eran quai 24 % ed en il sectur da servetschs 72 %.

Il 2003 ha la Frantscha exportà 14,9 % da ses volumen d’export en Germania, la quala ha attribuì a medem temp 19,1 % da l’import. Dapi blers onns furma la Germania il pli impurtant partenari da commerzi da la Frantscha. Il 2009 ha la Frantscha importà martganzias en la valur da 532,2 milliardas dollars ed exportà raubas en la valur da 456,8 milliardas dollars, uschia ch’i resulta in deficit da la bilantscha commerziala. Ils ultims onns ha quest trend negativ cuntinuà, cumbain en dimensiun pli pitschna.

Las pli grondas interpresas franzosas eran il 2003 (senza bancas ed assicuranzas; mintgamai cun indicaziun da la svieuta dal dumber d’emploiads): Total (104,7; 111 000), Carrefour (70,5; 419 000), PSA Peugeot Citroën (54,2; 200 000), France Télécom (46,1; 222 000), Électricité de France (44,9; 167 000), Suez (39,6; 171 000), Les Mousquetaires (38,4; 112 000), Renault (37,5; 160 000), Publicis Groupe (32,2; 35 000); Saint-Gobain (29,6; 172 000).

La cumpart che la cultura contribuescha a l’economia è en Frantscha bundant pli auta ch’en auters stadis. Il volumen total munta a 74 milliardas euros (situaziun dal 2012); da quai derivan 61,4 milliardas directamain da purschidas culturalas. L’industria da cultura generescha en Frantscha dapli svieuta che la branscha dad autos u ils products da luxus e sa chatta be stgars davos la telecommunicaziun.

En champs centrals da la cultura han grondas interpresas lur sedia en Frantscha; uschia l’Universal Music Group che furma la pli gronda chasa editura da musica dal mund, la Groupe Lagardère (pli baud Hachette) che furma la segund gronda chasa editura da cudeschs ed Ubisoft, il terz grond furnitur da gieus da computer. La Frantscha sa chatta sin il segund plaz dals pajais che produceschan films e furma il quart grond martgà d’art dal mund.

Pli baud disponiva la Frantscha da vaira gronds giaschaments da charvun. Il 1958 ha l’explotaziun da quels cuntanschì sia culminaziun cun 60 milliuns tonnas; alura ha cumenzà ina fasa da l’ieli bunmartgà e la crisa da la cotgla. Il 1973 han ins anc explotà 29,1 milliuns tonnas, il 2004 ha la davosa miniera da charvun en Frantscha serrà sias portas. Oz vegn il charvun surtut importà da l’Australia, dals Stadis Unids e da l’Africa dal Sid e duvrà en la siderurgia ed en implants per producir energia termica. La Frantscha n’ha però strusch resursas dad ieli u da gas natiral; quellas bastassan teoreticamain per cuvrir sur dus mais il consum total dal pajais. Tant l’ieli sco er il gas natiral ston perquai medemamain vegnir importads en grondas quantitads. 

Pervi dal schoc dal pretsch d’ieli dals onns 1970 ha la regenza franzosa inizià in program nuclear ch’è vegnì extendì cuntinuadamain. Il 2009 eran en funcziun en Frantscha 21 ovras atomaras cun 59 reacturs ed ina prestaziun totala da 63,3 GW. Pervi da l’auta cumpart d’energia atomara da ca. 80 % ston las ovras atomaras er restar en funcziun en cas ch’il consum d’energia sa chatta sut il maximum. La Frantscha posseda ina da las pli grondas raits da conducts en l’Europa; pliras ovras electricas pon uschia egualisar communablamain fluctuaziuns dal consum. Tenor in rapport dal 2012 custan la perscrutaziun, il svilup e la construcziun da las ovras atomaras franzosas tut en tut 188 milliardas euros. Fin qua han pudì vegnir amortisads ca. 75 % da quests custs tras la vendita d’electricitad. Damai che la gronda part da las ovras è anc en funcziun, vegn ins probablamain a pudair cuvrir fin la fin tut ils custs numnads. Percunter èn strusch vegnidas stgaffidas reservas per custs consecutivs e per las consequenzas dal deposit definitiv, las qualas sa laschan strusch calcular.

Actualmain sa stenta la politica da reducir la cumpart da la forza atomara sin 50 %, quai er pervi da la gronda maioritad dals Franzos che s’exprima mintgamai a chaschun d’enquistas a favur d’in augment da las energias regenerablas. Questas ultimas giogan fin qua praticamain be ina rolla en furma da la forza idraulica; l’energia da vent e fotovoltaica vegnan pir promovidas ils ultims onns da vart da la politica. Il 2009 han ins gudagnà 5,5 % da l’energia primara or da la forza idraulica, 8,7 % or da lain, 2,1 % or d’ulteriura biomassa, 1,2 % or da ruments e 0,49 % (2012: 2,7 %) or da l’energia da vent. Il 2011 ha la Frantscha furnì entaifer ils stadis commembers da l’Uniun europeica 15 % da l’energia producida cun forza idraulica. L’ovra idraulica da la serra da Roselend producescha mintg’onn 1070 GWh; l’ovra da cumulaziun a pumpa da la serra da Grand-Maison furma cun ina prestaziun da pumpa da 1200 MW ina da las pli grondas en tut il mund.

Ina spessa rait d’autostradas collia surtut l’aglomeraziun da Paris cun las regiuns cunfinantas. Per quest intent han ins schlargià successivamain dapi ils onns 1960 las vias naziunalas che mainan vers la chapitala. Cun il temp han ins alura er stgaffì colliaziuns traversalas tranter las ulteriuras regiuns grondas. Las vias da traffic tutgan en Frantscha al stadi; la gronda part da las autostradas vegnan però manischadas dapi il 2006 a basa privata. Ultra da quai èn las autostradas suttamessas a taxas (péage).

Ils gronds centers disponan d’ina fitg buna rait da traffic a curta distanza. A Paris na datti nagin lieu che fiss pli lunsch davent d’ina staziun da metro che 500 m. Er autras citads sco Lyon, Lille, Marseille u Toulouse enconuschan vastas raits da viafiers sutterranas. Ordaifer ils gronds centers exista però ina purschida da traffic a curta distanza bundant pli pitschna. 

En tut ils pajais han ins construì a partir dals onns 1980 ina vasta rait da trens ad auta sveltezza (Train à grande vitesse, TGV). Questa rait vegn schlargiada vinavant e cuntanscha oz per gronda part er ils cunfins dals stadis vischins. Dapi il 2003 è la viafier statala (Société Nationale des Chemins de fer Français, SNCF) exposta a la concurrenza privata; de facto dispona ella però anc adina d’in quasi-monopol en tut las regiuns dal pajais.

Il traffic aviatic en Frantscha sa preschenta a moda fitg centralisada: las duas plazzas aviaticas da Paris (Charles de Gaulle ed Orly) han dumbrà il 2008 en tut 87,1 milliuns passagiers. Charles de Gaulle è la segund gronda plazza aviatica da l’Europa; qua sa splega praticamain tut il traffic aviatic a lunga distanza. Las pli grondas plazzas aviaticas ordaifer Paris èn Nizza (cun radund 10 milliuns passagiers), alura suondan Lyon e Marseille. L’Air France ha fusiunà il 2004 cun KLM ad Air France-KLM e furma dapi lura ina da las pli grondas societads aviaticas dal mund; ella fa er part da l’allianza SkyTeam.

Per motivs economics e militars ha la Frantscha sviluppà e schlargià da vegl ennà la rait da las vias d’aua natiralas ed artifizialas a l’intern dal pajais (flums e chanals). Sia culminaziun ha la rait da vias navigablas cuntanschì en il 19avel tschientaner cun ina lunghezza da 11 000 kilometers. Pervi da la concurrenza tras viafier e via è quella sa reducida fin oz sin radund 8500 kilometers. Per gronda part vegnan las vias d’aua ed ils bastiments gestiunads da l’interpresa naziunala Voies navigables de France (VNF).

Il 2007 èn vegnidas transportadas sin las vias d’aua martganzias d’in pais total da 61,7 milliuns tonnas. Resguardond en la statistica er la distanza, resultan da quai 7,54 milliardas tonnas kilometricas. Per ils ultims 10 onns munta quai in augment da 33 %. La navigaziun da persunas è oz be pli da muntada turistica, furma là però in factur economic en cumplain svilup.

Sco pli impurtants meds da massa stampads valan las gasettas dal di naziunalas ‹Le Figaro› (da tempra conservativa), ‹Le Monde› (liberala sanestra) e ‹Libération› (orientà a la sanestra). Ils pli impurtants magazins da novitads èn ‹L’Obs›, ‹L’Express›, ‹Le Point› e ‹Marianne›.

Sco en blers auters pajais da l’Europa datti en Frantscha ina coexistenza tranter emetturs da radio e televisiun da dretg public (France Télévisions resp. Radio France) e privats. Il pli grond emettur da televisiun franzos è TF 1 (fin il 1987 da dretg public, dapi lura privat). ARTE è in emettur che vegn realisà en coproducziun tudestg-franzosa.

La Frantscha deducescha ses renum en l’Europa ed en il mund tranter auter da sias atgnadads culturalas, las qualas sa defineschan er sur la lingua (legislaziun da protecziun e da tgira da la lingua). En la politica da medias vegn l’atgna cultura e lingua promovida tras quotas per films e musica. Entaifer l’Uniun europeica, l’UNESCO e l’Organisaziun mundiala da commerzi s’engascha la Frantscha decididamain per sia concepziun da vulair defender la diversitad culturala: la cultura na saja nagina rauba, cun la quala sa laschia martgadar a moda illimitada. Il sectur da cultura furma perquai in’excepziun cumpareglià cun l’ulteriura activitad economica (exception culturelle).

La tgira e la protecziun da la vasta ierta culturala materiala vegn considerada sco incumbensa da muntada naziunala. Questa chapientscha vegn intermediada effizientamain envers la publicitad tras mesiras organisadas e promovidas dal stadi che servan a furmar ina schientscha culturala naziunala. Dis da l’ierta culturala naziunala, da la musica u dal kino han lur plaz fix en il chalender cultural annual e chattan buna accoglientscha tar la populaziun. Occurrenzas culturalas pulpidas correspundan al maletg da sasez da la Frantscha sco naziun da cultura e da Paris sco metropola da cultura. En ils centers regiunals da las provinzas sustegna il stadi la tgira d’in agen profil cultural. 

Ils origins da la litteratura franzosa èn da chattar en il temp medieval. Da quel temp na disponiva la Frantscha betg d’ina lingua singula ed unifurma; ils scripturs scrivevan en differentas linguas e dialects e faschevan mintgin diever da si’atgna ortografia e grammatica. D’intgins texts medievals n’èn ils auturs betg enconuschents (p.ex. ‹Tristan et Iseut› u ‹Lancelot-Graal›); tar ils enconuschents tutgan Chrétien de Troyes e Guillaume IX d’Aquitania che scriveva en occitan. Bleras ovras litteraras medievalas èn vegnidas influenzadas dal corpus da legendas naziunal, sco la ‹Chanson de Roland› u las diversas chansons de geste. Il ‹Roman de Renart›, scrit il 1175 da Perrout de Saint Cloude, furma in ulteriur exempel per la litteratura franzosa tempriva. Menziun speziala merita er François Villon.

In impurtant scriptur dal 16avel tschientaner è stà François Rabelais cun si’ovra ‹Gargantua e Pantagruel›. Michel de Montaigne è daventà enconuschent cun ses ‹Essais› che valan sco punct da partenza da quest gener. Ils dus poets Pierre de Ronsard e Joachim du Bellay han mess ad ir il moviment litterar da La Pléiade.

En il 17avel tschientaner ha Madame de La Fayette publitgà anonimamain ‹La Princesse de Clèves›, in’ovra che vegn considerada sco ina da las emprimas novellas psicologicas insumma. Jean de La Fontaine è daventà famus da quel temp cun sias fablas. E da Blaise Pascal vegnan legids fin oz sias ‹Pensées›.

Sco ils gronds dramatichers da l’epoca dad aur vegnan considerads Jean Racine, Pierre Corneille (Le Cid) e Molière. Surtut las ovras da Molière (t.a. ‹Le Misanthrope›, ‹L’Avare›, ‹Le Malade imaginaire› u ‹Le Bourgeois Gentilhomme›) èn daventadas talmain enconuschentas ch’ins discurra magari dal franzos sco la ‹lingua da Molière›.

Dal 18avel e l’entschatta dal 19avel tschientaner èn da menziunar – sper ils gronds illuminists Voltaire, Rousseau e Diderot (che n’ha betg mo redigì l’‹Encyclopédie›, mabain er scrit litteratura) – Charles Perrault, Charles Baudelaire, Paul Verlaine e Stéphane Mallarmé.

Sco pli enconuschent scriptur franzos dal 19avel tschientaner vala Victor Hugo (‹Les Misérables›, ‹Notre-Dame de Paris› e.a.). Ulteriurs poets da quest’epoca èn Alexandre Dumas, Gustave Flaubert, Jules Verne, Émile Zola, Honoré de Balzac, Guy de Maupassant, Théophile Gautier e Stendhal.

Impurtants auturs dal 20avel tschientaner èn Marcel Proust, André Gide, Louis-Ferdinand Céline, Albert Camus e Jean-Paul Sartre, en pli ils dramatichers Jean Giraudoux, Jean Cocteau ed Eugène Ionesco. Antoine de Saint-Exupéry ha scrit il Pitschen Prinzi ch’è restà fin oz ina da las ovras las pli populars tant tar uffants sco er tar creschids. Da nagin auter pajais han uschè blers auturs gudagnà fin oz il Premi Nobel da litteratura.

L’art franzos ha enconuschì sur lung temp in svilup ch’è stà segnà da las tendenzas europeicas generalas. Dal temp da la renaschientscha prevalevan surtut las influenzas da l’art talian e flam. En il 17avel e 18avel tschientaner èn sa fatgs valair en Frantscha Jean Fouquet (renaschientscha) sco er Nicolas Poussin e Claude Lorrain (baroc). I suondan il rococo cun Antoine Watteau, François Boucher e Jean-Honoré Fragonard ed il stil neoclassic da la Revoluziun franzosa cun Jacques-Louis David.

En il 19avel tschientaner èn da numnar Théodore Géricault ed Eugène Delacroix (romanticissem) sco er Camille Corot, Gustave Courbet e Jean-François Millet (realissem, natiralissem). Ils pli enconuschents impressiunists da la segunda mesadad dal 19avel tschientaner èn stads Camille Pissarro, Édouard Manet, Edgar Degas, Claude Monet ed Auguste Renoir, suandads da Paul Cézanne, Paul Gauguin, Toulouse-Lautrec, Georges Seurat e dals fauvists Henri Matisse, André Derain e Maurice de Vlaminck. 

A l’entschatta dal 20avel tschientaner han Georges Braque e l’artist spagnol Pablo Picasso che viveva a Paris sviluppà il cubissem. Ulteriurs artists da l’exteriur ch’han vivì e lavurà en la regiun da Paris èn stads Vincent van Gogh, Marc Chagall, Amedeo Modigliani, Wassily Kandinsky ed Alberto Giacometti.

Paris porscha intginas da las pli famusas exposiziuns da maletgs en tut il mund cun il Musée du Louvre, il Musée d’Orsay, il Centre Georges Pompidou u il Musée d’Art moderne de la Ville de Paris.

Ils pli vegls fastizs architectonics en Frantscha han laschà enavos ils Romans, e quai surtut en la Frantscha dal Sidost (p.ex. l’amfiteater da Nîmes u la Pont du Gard). Suenter il declin dal domini roman èn l’emprim vegnids erigids nagins edifizis che fissan sa conservads fin oz. Dal temp medieval èn surtut sa mantegnids edifizis sacrals (sco il battisteri Saint-Jean dal temp dals Carolings), baselgias en il stil roman (p.ex. St-Sernin de Toulouse, Ste-Foy de Conques u Ste-Marie-Madeleine de Vézelay) e baselgias en il stil gotic (p.ex. la catedrala da Beauvais). Daspera han ins erigì citads-fortezza sco Carcassonne u Aigues-Mortes.

Cura che la renaschientscha è er sa fatga valair en Frantscha, han ils architects franzos interpretà questa furma d’art en lur moda ed han erigì en l’entir pajais numerus chastels. Il chastè Ancy-le-Franc è restà il sulet exempel ch’è vegnì erigì dal tuttafatg tras Talians. Dal temp da l’absolutissem è il baroc classicistic daventà il stil dominant; quel serviva a simbolisar la pussanza dal retg. Tar ils pli impurtants edifizis da quell’epoca tutgan il Louvre ed il chastè da Versailles; quels han er figurà sco model per edifizis a l’exteriur, per exempel il chastè da Sanssouci a Potsdam sper Berlin. Il progress tecnic ha lubì d’eriger edifizis sco il Panthéon ch’ha duvrà per lez temp fitg pauc material da construcziun en relaziun cun il spazi che l’edifizi enzuglia.

En il temp suenter la Revoluziun franzosa ha dominà il classicissem ch’è segnà d’in’architectura reservada, disciplinada ed eleganta. Exempels furman l’Arc de Triomphe u la baselgia La Madeleine a Paris. Il 1803 han ins fundà l’Académie des Beaux-Arts. L’architectura franzosa è vegnida imitada en numerus pajais, surtut en ils Stadis Unids. A medem temp han ins introducì en Frantscha novas materialias da construcziun. Igl èn vegnids erigids monuments sco la Tur d’Eiffel u il martgà central Les Halles a Paris; a medem temp han ins cumenzà a restaurar monuments architectonics.

A l’entschatta dal 20avel tschientaner è l’emprim sa fatg valair il jugendstil, dal qual è spert sa sviluppà en Frantscha l’art déco. Da quests stils dattan fin oz perditga numerusas entradas da staziuns da metro a Paris sco er il Théâtre des Champs-Élysées. Il stil internaziunal, il qual è surtut segnà da Le Corbusier, sa distingua tras furmas geometricas senza ornaments; in exempel è la Villa Savoye. Suenter la Segunda Guerra mundiala èn intgins edifizis da prestige en Frantscha vegnids construids per l’emprima giada tras architects da l’exteriur, sco il Centre Pompidou u la piramida en il Louvre. Tar las pli novas ensainas architectonicas tutgan l’Institut du monde arabe e la Bibliothèque Nationale François Mitterrand.

La musica franzosa ha cuntanschì en il baroc in’emprima fluriziun cun cumponists sco Jean-Baptiste Lully, Marc-Antoine Charpentier (17avel tschientaner), François Couperin, Jean-Philippe Rameau (18avel tschientaner), Hector Berlioz, Charles Gounod e Georges Bizet. La musica franzosa classica vala però sco orientada fermamain a la tecnica ed a las furmas. La transiziun a la moderna, tant ord vista sociopolitica sco er musicala, represchenta il meglier Debussy; ulteriurs cumponists da muntada furman en quest’epoca Maurice Ravel ed Erik Satie ch’han omadus lavurà a moda experimentala. Il cumenzament da l’avantgarda en la musica è colliada cun la Groupe des Six. La figura centrala da la musica contemporana furma Pierre Boulez.

Dapi l’entschatta dal 20avel tschientaner è la musica populara sa fatga valair adina dapli. Il gener indigen il pli enconuschent furma il chanson, in gener da chanzun che sa concentrescha fermamain sin il text. Tar ils pli impurtants artists dal chanson tutgan Charles Trenet, Édith Piaf, Gilbert Bécaud, Boris Vian, Georges Brassens, Charles Aznavour ed Yves Montand. Suenter la fin da l’Emprima Guerra mundiala ha er il jazz cumenzà ad influenzar la musica franzosa; artists sco Django Reinhardt e Stéphane Grappelli han cuntanschì renum mundial en quest gener.

Entaifer la musica da rock e pop han per exempel Daft Punk ed Étienne de Crécy marcà il french house, Gotan Project è in precursur da l’uschenumnà electrotango e St Germain cumbineschan jazz e house. In enconuschent represchentant da la musica dad ambient è Air. Er il rap è vegnì adattà a las relaziuns franzosas; il pli enconuschent represchentant da la scena da hip-hop franzosa è MC Solaar. 

Stils da musica derasads a nivel regiunal èn la musica bretona cun artists sco Alan Stivell u la musica corsa cun bands sco I Muvrini. Numerus artists africans e dal Magreb vivan e lavuran en Frantscha; uschia datti per exempel ina viva scena da raï e numerusas occurrenzas cun musica africana. 

Ils tschintg musicists franzos ch’han vendì tranter il 1955 ed il 2009 las pli bleras plattas en Frantscha èn stads Claude François, Johnny Hallyday, Sheila, Michel Sardou e Jean-Jacques Goldman. ‹Samedi soir sur la Terre› da Francis Cabrel è cun bundant quatter milliuns exemplars vendids l’album d’in musicist franzos ch’ha gì il pli grond success en sia patria.

La Frantscha vala sco lieu da naschientscha dal film. L’onn 1895 han ils frars Lumière manà tras a Paris l’emprima projecziun da film commerziala. Industrials sco Charles Pathé e Léon Gaumont han investì grondas summas en la tecnica e realisaziun da films, uschia ch’interpresas franzosas dominavan da quel temp il martgà mundial. A Paris existivan l’onn 1907 gia dapli che 100 hallas da represchentaziun, en l’entira Frantscha eran quai il 1920 dapli che 4500. Suenter l’erupziun da l’Emprima Guerra mundiala èn numerus cineasts emigrads en ils Stadis Unids; quai sco er il fatg che la Frantscha n’ha a l’entschatta betg introducì la tecnica dal film sonor, ha gì per consequenza ch’il center da la producziun da film è sa spustà pli e pli en ils Stadis Unids.

Ils onns 1930 valan sco l’epoca dad aur dal film franzos. La crisa economica ha pretendì da quel temp budgets plitost bass; giuvens reschissurs sco Jean Renoir, René Clair e Marcel Carné e stars sco Jean Gabin, Pierre Brasseur ed Arletty han realisà ovras fitg creativas e per part er fitg politicas (realissem poetic). Er suenter l’erupziun da la Segunda Guerra mundiala ha il film prosperà vinavant; malgrà l’economia da stgarsezza, censura ed emigraziun èn vegnids realisads radund 220 films che sa concentreschan surtut sin l’estetica da quai che vegn mussà.

Suenter il 1945 ha la regenza franzosa prendì en mira da puspè etablir l’industria da film. Ins ha fundà il Festival da film da Cannes e per rumper la dominanza dal film american èn vegnidas fixadas quotas. En ils onns 1950 èn surtut vegnidas realisadas versiuns cinematograficas d’ovras litteraras, e quai cun drizzar ina speziala attenziun sin la qualitad; il 1956 – cun l’apparientscha d’in nov star, Brigitte Bardot, – han ins alura scuvert la sexualitad feminina per il film. 

La nouvelle vague ch’è vegnida purtada a partir da la fin dals onns 1950 d’ina giuvna generaziun da reschissurs sco Jean-Luc Godard, François Truffaut, Jacques Rivette, Claude Chabrol e Louis Malle, ha purtretà antieroxs, tematisà lur vita interna, fatg films plain tempo e cun finiziun averta. Novas tecnicas han pussibilità ina nova estetica e lubì a mez profis da realisar films a basa d’in pitschen budget. La creativitad da la nouvelle vague ha gì grond’influenza a nivel internaziunal, quai ch’è anc vegnì promovì cun endrizzar ils Cinémas d’art et d’essai. Popularitad han er cuntanschì protagonists da divers films da la nouvelle vague sco Jean-Pierre Léaud e Jean-Paul Belmondo. L’onn 1968 ha manà en il film franzos ad ina cesura, da la quala èn resultads films politics ed ina ferma preschientscha da las dunnas.

Durant ils onns 1980 ha la nova regenza socialistica investì fermamain en la cultura; ils budgets per la producziun da films èn creschids, entant ch’ins ha empruvà a medem temp da cumbatter la predominanza americana. Da quel temp èn vegnidas realisadas versiuns cinematograficas da classichers da la litteratura. Parallelamain è sa sviluppà il moviment dal cinéma du look nunpolitic, en il qual las colurs, las furmas ed il stil surcuvrivan l’acziun sco tala.

La cuschina franzosa vala dapi l’entschatta dal temp modern sco ina da las cuschinas naziunalas las pli influentas en l’Europa. Ella è enconuschenta tant per sia qualitad sco er per sia multifariadad. Il mangiar furma en Frantscha in’impurtanta part da la vita quotidiana e la tgira da la cuschina vegn considerada sco part indispensabla da la culturala naziunala. Il ‹past gastronomic dals Franzos› è vegnì approvà il 2010 da l’UNESCO sco bain cultural mundial immaterial.

L’onn 1958, sut Charles de Gaulle ed il minister Maurice Herzog, han ins creà in Ministeri per giuventetgna e sport. Quai ha manà ad in grond svilup tant en il sport da massa sco er en il sport d’elita. Cuntrari a la situaziun en blers auters pajais europeics na furma il ballape betg il numer in incontestà tranter ils sports. L’interess per il ballape dependa fermamain da las prestaziuns da las squadras franzosas a nivel internaziunal. Sco liom che creescha identitad vala surtut la squadra naziunala (Équipe Tricolore, en Frantscha per ordinari be les Tricolores). Sias partidas a chasa gioga quella per ordinari en il Stade de France a Saint Denis sper Paris. Il 1998 ha gì lieu en Frantscha il campiunadi mundial da ballape. Il 2016 ha la Frantscha manà tras per la terza giada suenter il 1960 ed il 1984 il campiunadi europeic da ballape.

Tuttina popular sco ballape è il rugby. Surtut en las regiuns dal sid e sidvest è il rugby per lunschor il sport il pli popular. La squadra naziunala vegn numnada dals fans Les Bleus – in num ch’è pli tard er vegnì duvrà per la squadra da ballape – e furma ina da las meglras squadras da rugby dal mund.

Ulteriurs sports populars èn il ciclissem (surtut il fanadur durant la Tour de France che dura trais emnas), il tennis (French Open), l’atletica leva, la furmla 1, pétanque, judo, ballamaun, ballabasket ed il sport da skis alpin.

En Frantscha èn vegnids realisads pliras giadas ils gieus olimpics: ils gieus da stad il 1900 e 1924 a Paris; ils gieus d’enviern a Chamonix 1924, Grenoble 1968 ed Albertville 1992.

Sper ils dis da festa catolics e seculars (prim da matg) vegnan festegiads ils suandants dis commemorativs:

 




#Article 11: Spagna (6270 words)


La Spagna (uffizialmain Reginavel da la Spagna, spagnol Reino de España [ˈrejno ð(e) esˈpaɲa]) è in stadi situà en l’Europa dal Sidvest che furma ina monarchia ereditara parlamentara. Il territori statal sa chatta per gronda part sin la Peninsla Iberica. La Spagna è sutdividida en 17 communitads autonomas e duas citads autonomas, Ceuta e Melilla. La chapitala furma Madrid. La Spagna è commembra da l’ONU, da l’UE, da l’OECD e da la NATO. Il pajais figurescha tranter las ventg pli grondas naziuns d’export e d’import.

La Spagna sa chatta ensemen cun il Portugal (en il vest) e Gibraltar (en il sid; appartegna al Reginavel Unì) sin la Peninsla Iberica, e quai tranter 36° e 43,5° latituda settentriunala sco er 9° longhituda occidentala e 3° longhituda orientala (senza las Balearas, Inslas Canarias, Ceuta e Melilla). La Spagna cumpiglia stgars sis setavels da la Peninsla Iberica. En il nordost, per lung da la chadaina da muntognas da las Pireneas, cunfinescha la Spagna cun la Frantscha ed il stadi pitschen Andorra.

Tar il territori statal tutgan ultra da quai las Balearas situadas en la Mar Mediterrana, las Inslas Canarias che sa chattan en l’Atlantic sco er las citads da Ceuta e Melilla situadas a la costa da l’Africa dal Nord. En Frantscha posseda la Spagna l’exclava Llívia. En pli appartegnan a la Spagna pliras inslas che sa chattan gist davant la costa marocana: Islas Chafarinas, Peñón de Alhucemas, Isla del Perejil, ultra da quai la peninsla Peñón de Vélez de la Gomera. L’Isla de Alborán è situada 50 kilometers al nord da la costa marocana. In’ulteriura gruppa da pitschnas inslas e grips, las Islas Columbretes, giascha radund 55 kilometers a l’ost da Castellón de la Plana, sin il medem grad da latituda sco Mallorca.

Il punct situà il pli en il nord da la Spagna è Estaca de Bares en la Galizia, sin la terra franca è il punct il pli en il vest Cabo Touriñán (medemamain en la Galizia), il punct il pli en il sid la Punta Marroquí sper Tarifa ed il punct il pli en l’ost il Cap de Creus a la Costa Brava. La pli gronda extensiun dal pajais dal nord al sid mesira 856 kilometers e da l’ost al vest 1020 kilometers. Il punct il pli en il vest ed en il sid da l’entira Spagna sa chatta sin l’insla Canaria El Hierro, il punct il pli en l’ost sin l’insla Baleara Menorca.

L’autezza media dal territori statal da ca. 660 m s.m. è ina da las pli autas en tut l’Europa. La structuraziun spaziala da la Peninsla vegn dominada da sis gronds sistems da muntognas.

Dals sis gronds sistems da muntognas èn tschintg orientads en direcziun vest-ost.

Tranter las chadainas da muntognas curran ils tschintg gronds sistems da flums, dals quals quatter han in’orientaziun ost-vest, sbuccan en l’Atlantic ed han lur origin en il Sistem Iberic che furma il grond sparta-auas sin la Peninsla. Tranter la Muntogna Cantabrica ed il Sistem Central cula il Duero; pli al sid sa chattan Tajo e Guardiana che mainan medemamain da l’ost vers il vest; il medem vala per il Guadalquivir situà en il sid da la Sierra Morena.

En la foppa tranter il Sistem Iberic e las Pireneas cula percunter l’Ebro en direcziun da la Mar Mediterrana. Quest flum nascha en la Muntogna Cantabrica e maina dal nordvest vers il sidost.

En il center da la Peninsla Iberica sa chatta ina planira auta fitg vasta che vegn numnada Planira auta da la Castiglia u simplamain Meseta. En il nord vegn la planira cunfinada da la Muntogna Cantabrica, en l’ost dal Sistem Iberic ed en il sid da la Sierra Morena. En il sidvest maina la planira auta en l’Extremadura ch’è situada in pau pli a bass e n’è betg uschè planiva. Tras il Sistem Central vegn la planira partida en duas parts (la Meseta dal Nord e la Meseta dal Sid), da la quala la settentriunala sa chatta in pau pli ad aut. Las grondas citads en la part dal nord (Valladolid, León, Burgos, Salamanca) èn situadas sin in’autezza da 700 fin 900 meters, quellas en il sid (Madrid, Toledo, Ciudad Real) sin in’autezza tranter 500 e 700 meters.

Bundant pli a bass èn situadas las foppas che vegnan percurridas da Guadalquivir ed Ebro. Damai che las muntognas tanschan bunamain dapertut fin sper la mar, n’enconuscha il pajais strusch planiras pli grondas en vischinanza da las costas.

Il clima en Spagna sa lascha sutdivider suandantamain:

La vegetaziun da la Peninsla Iberica sa divida en trais zonas:

Là nua che vegnan cultivadas plantas da cultura èn necessaris indrizs da sauar.

La fauna spagnola è segnada d’ina fitg gronda diversitad da las spezias. Damai ch’il pajais è relativamain pauc populà, han pudì surviver qua spezias d’animals ch’èn vegnidas extirpadas en l’ulteriura Europa dal Vest. Ultra da quai èn sa furmadas intginas spezias endemicas, cunquai che la Peninsla Iberica è dividida da l’ulteriura Europa tras las Pireneas.

En il nordvest ed en la part centrala da la Spagna e per part er en la Sierra Morena vivan en tut radund 2500 lufs. Il luf iberic (Canis lupus signatus) furma uschia la populaziun da lufs la pli gronda e pli stabila en tut l’Europa dal Vest. En la Muntogna Cantabrica ed en las Pireneas vivan radund 200 urs brins. Entant che la populaziun dals urs cantabrics vala sco stabila, èn ils urs en las Pireneas periclitads acutamain da l’extirpaziun. Il luf-tscherver iberic exista be en Spagna ed en il Portugal; cun main che 300 animals che vivan al liber è el smanatschà fermamain. En il nord da la Spagna èn da chasa intginas da las davosas populaziuns dal visun europeic ch’èn da chattar en l’Europa Occidentala. Ulteriurs mammals caracteristics da la Spagna, ils quals èn uschiglio be da chattar en l’Africa u en l’Asia Anteriura, furman il giat ginestra, il mungo, il capricorn iberic u il chamutsch da las Pireneas. En Spagna vivan gist trais spezias da lieurs: la lieur brina sco er las duas spezias endemicas lieur iberica e lieur da Castroviejo. Animals frequents èn tschierv, chavriel, stgilat, cunigl, portg selvadi, fiergna, tais e vulp. Muflons e muntanellas èn da chattar en regiuns muntagnardas, giats selvadis en guauds pli gronds e ludras en diversas zonas fluvialas.

En las Pireneas ed en la Muntogna Cantabrica èn da chasa tschess barbets; tschess dal chapitsch, tschess cularin e tschess egipzians scuntran ins en vastas parts dal pajais. Ulteriurs utschels gronds caracteristics èn l’evla iberica e l’evla da la pizza. Flamingos coloniseschan territoris da palì sco per exempel Coto de Doñana.

La fauna da reptils da la Spagna sa cumpona da numerus luschards, ghecos, scincs, orvettas, serps, tartarugas da la terra e da la mar. Enconuschents èn ils luschards da las Canarias, surtut il luschard gigant d’El-Hierro (Gallotia simonyi) che po cuntanscher ina lunghezza dal corp da fin a 75 cm.

A partir dals onns 1990 è la populaziun da la Spagna creschida fitg ferm, e quai tant en congual cun auters stadis europeics sco er cun il svilup demografic dals decennis precedents. Be en l’emprim decenni dal 21avel tschientaner è il dumber da la populaziun creschì per 7 milliuns. Ina gronda part da quest augment è d’attribuir a l’immigraziun. La cumpart da la populaziun da l’exteriur è creschida da 0,74 milliuns l’onn 1999 a 5,73 milliuns il 2011. La rata da reproducziun muntava il 2008 a 1,46 uffants per dunna, quai ch’è levet sut la media europeica da 1,6.

L’aspectativa da vita dals Spagnols muntava il 2012 a 82,5 onns, quai ch’è la pli auta valur en tut l’Europa (avant l’Italia cun 82,4 e la Frantscha cun 82,1 onns). Ils umens vegnan en media 79,5 onns vegls, las dunnas 85,5. L’onn 2007 eran 16,7 % da la populaziun pli vegls che 65 onns.

En Spagna vegn surtut discurrì spagnol, catalan, galician e basc. Il spagnol furma en tut il territori statal la lingua uffiziala. Il catalan figurescha sco ulteriura lingua uffiziala en la Catalugna, a Valencia e sin las Balearas, il basc en il Pajais Basc e parts da Navarra ed il galician en la Galicia. En il Val d’Aran ha l’aranais, ina varietad dal gascon, status uffizial.

Daspera existan intginas linguas che vegnan be pli discurridas d’in pitschen dumber da persunas e che n’han betg il status d’ina lingua uffiziala. Tar quellas tutgan l’asturian-leonais e l’aragonais. En la val Jálama (provinza Cáceres) en vischinanza dal cunfin portugais vegn discurrì A Fala, in dialect da la lingua portugais-galiciana. A Melilla discurra la minoritad masirica ultra da quai il dialect berb tamazight.

Las linguas estras las pli derasadas èn l’englais ed il franzos. Spagnols pli giuvens discurran per ordinari englais, pli vegls plitost franzos. En la vasta populaziun furman bunas enconuschientschas d’ina lingua estra però l’excepziun. Tenor in studi dal 2011 inditgeschan 49 % dals creschids (tranter 25 e 64 onns) ch’els na dumognian nagina lingua estra. En il fratemp emprendan però quasi tut ils scolars ina segunda lingua gia en la scola primara (per ordinari l’englais) e 22 % ultra da quai ina segunda, pervi da la vischinanza tar la Frantscha per ordinari franzos. 

En la Catalugna vegn per gronda part fatg diever dal catalan en l’instrucziun a las scolas ed universitads; il spagnol dastga però vegnir duvrà da tut ils scolars e students en l’instrucziun e tar clausuras.

Tranter las minoritads dal pajais èn surtut da menziunar ils Gitanos (ils Roma spagnols) ch’èn immigrads en Spagna ca. a partir dal 16avel tschientaner. Oz vivan en l’entir pajais radund 600 000 fin 800 000 Gitanos. Ils Roma spagnols èn per gronda part da chasa en las citads grondas sco Madrid, Barcelona, Valencia u Sevilla. Da questa gruppa da la populaziun derivan intgins stars da renum internaziunal sco il chantadur Camarón de la Isla u il giugader da ballape José Antonio Reyes. Surtut en la scena da musica spagnola – en spezial entaifer il flamenco – giogan ils Roma in’impurtanta rolla.

Sur lung temp ha la Spagna enconuschì be pitschnas cifras d’immigraziun. Pir en il decurs dals ultims decennis è la situaziun sa midada (cf. survart). Il schaner 2011 vivevan en Spagna 5,8 milliuns esters, quai che correspunda a 12 % da l’entira populaziun; da quels èn 2,4 milliuns burgais d’in auter stadi da l’Uniun europeica. En cifras absolutas sa chatta la Spagna sin plazza dus davos la Germania (cun 7,1 milliuns esters); en procents da l’entira populaziun sa chatta la Spagna sin la tschintgavla plazza europeica, davos il Luxemburg, (43,0 %), la Lettonia (17,4 %) e la Cipra ed Estonia (mintgamai 15,9 %). La gronda part dals immigrants deriva da la Rumenia, dals stadis dal Maghreb u da l’America Latina sco er dal Reginavel Unì e da la Germania; per quests ultims stadis è la Spagna daventada ina residenza per la vegliadetgna ordvart stimada.

Il dumber dals burgais spagnols sesents a l’exteriur muntava il 2016 a radund 2,3 milliuns, da quai vivan stgars 1,5 milliuns en l’America e radund 776 000 en in auter pajais europeic. Entant che be 22,2 % dals Spagnols che vivan en l’America èn naschids en Spagna, giascha questa procentuala tar ils residents en auters stadis europeics tar 52,2 %. Quai è d’attribuir al fatg che las grondas undas d’emigraziun da la mesadad dal 19avel tschientaner fin a la Guerra civila spagnola han manà en l’America Centrala e dal Sid, surtut en l’Argentinia, Venezuela, Mexico, Uruguay e Cuba, entant ch’il Plan de Estabilización dal 1959 ha effectuà fin il 1972 in’unda d’emigraziun en auters stadis europeics, surtut en Frantscha, Germania, Svizra, Belgia ed en il Reginavel Unì. 

Uffizialmain appartegnan 92 % da la populaziun a la baselgia catolic-romana (situaziun dal 2000). La cumpart da las persunas che sa participeschan activamain a la vita religiusa sa diminuescha però cuntinuadamain. En rom d’in studi independent ch’è vegnì realisà il 2015 han anc 68 % inditgà d’esser catolics. Finanziada vegn la baselgia catolica dal stadi spagnol a basa d’in contract cun la Sontga Sedia e betg sur ina taglia da baselgia directa; ina sortida da la baselgia n’è uschia betg colliada cun avantatgs finanzials. Dapi il 2007 ston ils pajataglia però decider sezs, schebain 0,7 % da la taglia sin las entradas duain pervegnir a las baselgias ubain ad auters intents socials u culturals. Na prendan els nagina decisiun, vegn questa cumpart da la taglia obligatorica attribuida directamain als auters intents. La finanziaziun statala directa ch’existiva dapi il 1979 è vegnida abolida dal tuttafatg. L’onn 2008 han 34,3 % dals pajataglia decidì da vulair sustegnair la baselgia catolica; per quella ha quai muntà in augment da las entradas da taglia da 173,8 milliuns sin 252,7 milliuns euros.

La cumpart dals muslims munta a 0,5 %, dals protestants a 0,3 % e dals testimonis da Jehova a 0,25 %. En Spagna è situà l’impurtant lieu da pelegrinadi Santiago de Compostela che furma la destinaziun da numerus pelegrins sin la via da son Giachen.

Madrid e Barcelona furman las pli grondas citads dal pajais. La gronda creschientscha da las citads en il decurs dals davos onns ha però gì per consequenza ch’igl èn sa furmadas metropolas che tanschan per part lunsch sur ils cunfins politics ed administrativs da las singulas citads ora. En las regiuns grondas da Madrid e Barcelona vivan bundant sis resp. quatter milliuns umans, en las regiuns metropolas Valencia, Sevilla e Bilbao mintgamai bundant in milliun.

Il pajais è dividì en 17 communitads autonomas; areguard lur grondezza èn quellas fitg eterogenas. En l’Andalusia, la Catalugna e las regiuns da Madrid e Valencia vivan mintgamai tranter 5 ed 8 milliuns persunas; en las regiuns las pli pitschnas Navarra, Cantabria e La Rioja percunter dumbers lunsch sut in milliun (situaziun dal 2009). 

En il 11avel tschientaner a.C. han ils Fenizians populà la costa dal sid; la pli enconuschenta da lur colonias è stada Cádiz (Gades). Il num ‹Spagna› deriva da la denominaziun latina Hispania (dal fenizian ishapan ‹pajais dals iraxs da la grippa›; quai ch’ils Fenizians tegnevan per iraxs da la grippa eran però en vardad cunigls). Durant la Segunda Guerra punica èn arrivadas l’emprima giada truppas romanas sin la Peninsla; quellas han occupà relativamain svelt il vest ed il sid da quella. Enfin ch’era il nord è stà sut la controlla dals Romans, hai però durà radund 200 onns. En la fasa tardiva da l’Imperi roman occidental èn ils Visigots arrivads en la Gallia ed han furmà là il Reginavel dals Visigots che cumpigliava er vastas parts da l’Iberia. Suenter ina greva terrada cunter ils Francs han ils Visigots rumì per gronda part la Gallia e translocà il center da lur reginavel sin la Peninsla Iberica. Questa segunda ed ultima fasa dal Reginavel dals Visigots vegn numnada – tenor la chapitala – Imperi da Toledo.

A l’entschatta dal 8avel tschientaner han ils Maurs destruì il Reginavel dals Visigots e conquistà l’entira Peninsla Iberica. Lur domini ch’ha durà plirs tschientaners ha segnà il pajais. La ierta araba sa manifestescha tant en l’architectura sco er en la lingua. Als Maurs na duevi però betg reussir da conquistar durablamain er las muntognas perifericas situadas en il nord da la Peninsla. Da là ha lura cumenzà la reconquista. Quella è sa tratga a la lunga sur tschientaners (722–1492). En rom da pliras etappas è il domini mauric vegnì stgatschà enavos dals imperis cristians, e quai fin la Crudada da Granada il 1492 ch’ha muntà la fin da las structuras statalas mauricas sin la Peninsla. Suenter la fin da la reconquista ha gì lieu ina persecuziun da minoritads religiusas. Ils ‹retgs catolics› Isabella I da Castiglia e Fernando II d’Aragon na vulevan tolerar en lur sfera da pussanza naginas persunas che n’eran betg catolicas. Muslims e gidieus èn vegnids sfurzads da sa laschar battegiar. L’onn 1478 è vegnida endrizzada l’inquisiziun spagnola cun l’intent da scuvrir e punir ‹nuncartents› ch’eran be sa convertids exteriuramain e che pratitgavan en il zuppà lur veglia cretta. Ils 31 da mars 1492 han Isabella I e Fernando II relaschà l’Edict da l’Alhambra; quel ha prescrit che tut ils 300 000 Gidieus che n’eran betg pronts da sa laschar battegiar stoppian bandunar la Peninsla Iberica. Da quest’emigraziun è sa furmada entaifer il giudaissem la gruppaziun dals sefardim. Il 1609 ha Felipe III schizunt stgatschà ils moriscos, ils perdavants dals Maurs ch’eran sa convertids al cristianissem.

En il 15avel tschientaner èn s’unids ils dus reginavels da la Castiglia e d’Aragon. Aragon furmava da quel temp gia daditg in’impurtanta pussanza maritima en la Mar Mediterrana. E la Castiglia steva en concurrenza cun il Portugal per la predominanza en l’Ocean Atlantic. Cun la scuverta da l’America tras Cristof Columbus l’onn 1492 è la Spagna avanzada per in tschert temp ad ina pussanza mundiala.

Cun l’imperatur Karl V (sco retg spagnol: Carlos I), in biadi dals ‹retgs catolics›, è vegnì il 1516 in Habsburgais sin il tron spagnol. Fin che la lingia spagnola è morta ora l’onn 1700 èn tut ils retgs spagnols derivads da questa dinastia. La dumonda da la successiun dal davos retg habsburgais Carlos II ha manà a la Guerra da successiun spagnola, en la quala èn stadas involvidas las pussanzas europeicas dominantas da quel temp. En consequenza da la guerra è vegnì in rom dals Bourbons cun Felipe V sin il tron spagnol.

L’imperi colonial spagnol s’extendeva vers il 1600 sur vastas parts da l’America dal Sid ed America Centrala, dals Stadis Unids dad oz e da las Filippinas. Rinforzond però ils Englais e Franzos lur stentas d’obtegnair colonias, è la predominanza spagnola plaunsieu stulida. Las guerras da liberaziun dals stadis americans, surtut la Guerra d’independenza mexicana e las Guerras d’independenza sidamericanas, han manà la gronda part da las colonias en l’independenza. En rom da la guerra spagnol-americana ha la Spagna pers las davosas grondas possessiuns als Stadis Unids, quai ch’ha muntà la fin da l’imperi colonial. Las colonias africanas ch’èn vegnidas vitiers pli tard (il Maroc spagnol, la Sahara spagnola e la Guinea Equatoriala) han la finala cuntanschì en il 20avel tschientaner lur independenza.

A l’entschatta dal 20avel tschientaner furmava la Spagna per gronda part in stadi agrar sutsviluppà e segnà da relaziuns da possess feudalas; la pauca industria avant maun sa concentrava surtut sin la Catalugna ed il Pajais Basc. L’onn 1923 ha il general Miguel Primo de Rivera surpiglià la pussanza ed ha installà ina dictatura militara. Pervi dals problems socials fitg urgents n’ha quella però betg pudì sa tegnair ditg; il 1931 è la Spagna daventada ina republica. Ma ils conflicts politics e socials han engrevgià da l’entschatta ennà la Segunda Republica e gia il 1932 hai dà in’emprova da putsch da vart da militar da dretga sut general José Sanjurjo. L’onn 1934 hai dà intginas sullevaziuns da sanestra e d’anarchists, las qualas èn per part vegnidas abattidas sanguinusamain. L’instabilitad politica vegniva tizzada surtut da represchentants extrems da posiziuns sanestras e dretgas e da lur furmaziuns paramilitaras, ma er da vart da commembers da las forzas da segirezza regularas. La situaziun tendida è be anc pegiurada suenter che la frunt naziunala (che sa cumponiva dals liberals da sanestra, socialists e communists) ha gudagnà ils 17 da favrer 1936 las elecziuns en il parlament.

Il fanadur 1936 han parts dal militar sut il generalissim Francisco Franco fatg in culp da stadi cunter la regenza. Il putsch ha però be gì success en intginas parts dal pajais ed ha fatg naufragi en ils impurtants centers politics ed industrials (t.a. Madrid, Catalugna, Pajais Basc). Sinaquai è suandada la Guerra civila spagnola. En il decurs da quella èn ils putschists vegnids sustegnids a moda decisiva da vart da l’Italia faschista e da la Germania naziunalsocialistica; las democrazias liberalas Frantscha e Gronda Britannia han fatg ina politica da nunintervenziun ed han uschia favurisà l’avanzament da Franco cunter la republica.

Il 1939 è la guerra ida a fin cun la victoria dals naziunalists cunter la Spagna republicana. L’epoca da la dictatura da Franco ha cumenzà cun ina fasa da purificaziuns violentas ch’ha durà plirs onns ed ha manà il pajais en ina letargia politica e sociala da lunga durada. Sco en auters pajais europeics hai er dà en Spagna suenter la Segunda Guerra mundiala – or da la quala igl era reussì a Franco da tegnair il pajais – in grond boom economic. Il 1947 ha Franco restaurà la monarchia en Spagna ed ha fixà il 1969 che Juan Carlos duaja daventar ses successur sco schef da stadi. Suenter la mort dal dictatur ils 20 da november 1975 ha quel inizià in process da democratisaziun (spagnol transición). Cun la constituziun dal 1978 è la Spagna daventada ina monarchia parlamentara. Dapi la fasa finala da la dictatura ed er durant la fasa da transiziun èn l’ETA ed autras gruppas terroristicas da sanestra e da dretga stadas fitg activas. Il 1981 hai anc dà in’ulteriura emprova da putsch (‹23-F›) da vart da militars da dretga e parts da la Guardia Civil paramilitara cunter la regenza democratica.

La transiziun è ida a fin il 1982 cura che la partida socialdemocratica sut Felipe González ha surpiglià la regenza. En il decurs dals onns 1980 è la Spagna daventada commembra da la NATO e da l’Uniun europeica ed è stada segnada d’in ulteriur svilup economic. A medem temp è vegnida installada en il cumbat cunter l’ETA ina gruppa da terrorissem statal (GAL) ch’ha cumbattì il separatissem basc cun tortura e murdraretschs; quest’epoca è enconuschenta en Spagna sco ‹guerra tschuffa›.

Tenor la constituziun dals 6 da december 1978 è la Spagna in stadi da dretg social e democratic. Sia furma statala è quella d’ina monarchia parlamentara. Il titel da retg vegn dà vinavant a moda ereditara. Il retg è schef da stadi e schefcumandant da las forzas armadas. La sedia da la famiglia roiala è il Palacio de la Zarzuela a Madrid.

A la curuna spagnola cumpetan en emprima lingia funcziuns represchentativas. Ultra da quai conferma il retg las leschas e designescha e relascha il schef da la regenza.

L’organ legislativ superiur da la Spagna è il parlament, las Cortes generales. Las cortes sa dividan en duas chombras, la chombra dals deputads (Congreso de los diputados) ed il senat (Senado). Ils 300 fin 400 commembers da la chombra dals deputads vegnan elegids mintga quatter onns en elecziun directa. Il senat dumbra 259 commembers. Da quels vegnan elegids 208 directamain dal pievel, entant ch’ils 51 restants vegnan designads dals parlaments da las communitads autonomas. Er ils senaturs vegnan tschernids per in temp d’uffizi da quatter onns.

Il primminister (presidente del gobierno) vegn elegì da la chombra dals deputads. Ils ministers vegnan designads dal retg sin proposta dal primminister. Il sez uffizial furma il Palacio de la Moncloa a Madrid.

En la chombra dals deputads existan quatter partidas resp. colliaziuns da partidas ch’èn activas en tut la Spagna: il Partido Popular (PP) d’orientaziun dretga-conservativa, la PSOE socialdemocratica, l’Izquierda Unida (IU) che collia la sanestra e l’Unión Progreso y Democracia (UPyD), ch’è vegnida fundada il 2008, da tenuta antiregiunala-liberala. Ultra da quai furma la partida da protesta Podemos ch’è sa furmada il 2014 ina rolla adina pli impurtanta.

La Spagna è partida en 17 communitads autonomas u regiuns (comunidades autónomas). Quellas na disponan da nagina independenza statala (la Spagna n’è pia nagin stadi federativ), ma exequeschan tuttina incumbensas cumparegliablas p.ex. a quellas dals chantuns svizzers u dals pajais federativs da la Germania. Set da questas communitads consistan da be ina provinza (Asturia, Cantabria, Navarra, La Rioja, Madrid, Murcia, Balearas), las ulteriuras da pliras. Tut en tut datti 50 provinzas. Las duas citads autonomas Ceuta e Melilla n’èn attribuidas ni ad ina communitad autonoma ni ad ina provinza. 

Il stgalim administrativ il pli profund furman las vischnancas (municipios). En diversas communitads autonomas datti tranter las provinzas e las vischnancas anc in stgalim intermediar, il qual porta differents nums (comarcas, veguerías, mancomunidades).

Gia dapi daditg existan conflicts nunschliads areguard il status d’autonomia dal Pajais Basc e da la Catalugna. En il Pajais Basc cumbatta l’ETA dapi il 1959 cun violenza e terrur per l’independenza. Las partidas explicitamain bascas resp. catalanas s’engaschan percunter sin via politica per in’extensiun da l’autonomia, per ina ‹colliaziun lucca cun la Spagna› resp. per l’independenza da lur regiuns. Ins sa referescha al dretg d’autodeterminaziun dals pievels e vul realisar votaziuns dal pievel, en rom da las qualas la populaziun da las regiuns respectivas duai pudair decider libramain davart il status. Ils models persuenter furman tranter auter las votaziuns a Québec (1980, 1995) ed en il Montenegro (2006). Las partidas orientadas ad ina Spagna centralistica PP e PSOE èn cunter quests plans.

Pervi da la sutdivisiun politica da la Spagna è il sistem da polizia vaira cumplex. Quel cumpiglia la Guardia Civil (ch’è organisada a moda militara e ch’è suttamessa tant al ministeri da defensiun sco er al ministeri da l’intern), la polizia naziunala, la polizia da las communitads autonomas sco er las polizias da las vischnancas resp. citads.

Il servetsch secret Centro Nacional de Inteligencia (CNI) è vegnì fundà il 2002. Ses precursurs èn stadas differentas organisaziuns statalas dal temp da Franco che n’eran uffizialmain betg enconuschentas e che na purtavan nagin num.

Las forzas armadas sa dividan en las forzas terrestras, la marina cun l’infantaria da marina e l’aviatica militara. Ultra da quai fan part da l’armada la Guardia Civil e l’Unidad Militar de Emergencias ch’è vegnida fundada il 2005. Unitads independentas furman la guardia roiala (Guardia Real) sco er la legiun spagnola ch’è suttamessa directamain al cumond superiur. L’armada dumbra radund 123 000 schuldads (situaziun dal 2014); l’obligaziun al servetsch militar è vegnida abolida il 2001.

Dapi il prim da schaner 1986 furma la Spagna in stadi commember da l’Uniun europeica odierna. En pli appartegna il pajais a diversas organisaziuns europeicas sco l’Organisaziun per la segirezza e la collavuraziun en l’Europa u l’Agentura da defensiun europeica.

Cun sia tenuta proeuropeica ha la Spagna giugà in’impurtanta rolla areguard differentas iniziativas. Da menziunar spezialmain èn: il svilup d’ina Europa sociala; l’instituziunalisaziun da las relaziuns cun l’America Latina; l’Europa dals burgais e l’introducziun da l’iniziativa da burgais europeica; il cumbat cunter la criminalitad organisada internaziunala; il svilup d’ina politica d’immigraziun communabla ed il rinforz dals cunfins exteriurs; l’extensiun da la collavuraziun cun ils pajais dal territori mediterran e nordafrican.

En Spagna devi il 2009 479 autos sin 1000 abitants. 78 % da la populaziun vivan en citads. En tschertas aglomeraziuns è la rait da vias per part surchargiada durant il traffic da lavur. I dat però er citads cun sistem da diriger il traffic, sco per exempel Valencia.

Il pajais dispona d’ina buna rait da vias d’ina lunghezza totala da 663 795 kilometers. La rait da vias da transit cumpiglia vias naziunalas (carreteras nacionales) ed autostradas, las uschenumnadas autovías (libras da taxas) e las autopistas (cun taxa da via, de peaje). Las vias che mainan enturn las aglomeraziuns èn per ordinari libras da taxas, bleras colliaziuns interurbanas èn percunter suttamessas a taxas.

Ir cun velo vegn resguardà en Spagna en emprima lingia sco activitad sportiva. Sco med da traffic vegn il velo pir duvrà l’ultim temp pli savens, cumbain che la cultura da velo n’ha anc betg cuntanschì il nivel da l’Europa Centrala u dal Nord. Surtut en las citads è creschida ils ultims onns la rait da vias per velos; en il fratemp disponan numerusas citads er d’in sistem d’emprestar velos. Barcelona, che dispona d’ina geografia da citad fitg planiva ed è perquai fitg adattada per ir cun velo, ha creà fin il 2013 ina rait da vias per velos da 182 km lunghezza.

Damai che la Spagna dispona d’ina infrastructura da viafier plitost modesta, è la rait da bus interurbans tant pli vasta. En citads pitschnas e pli grondas datti spezialas staziuns da bus. La rait da bus collia surtut citads pli pitschnas e vitgs, ma igl existan er lingias surregiunalas e colliaziuns internaziunalas. 

Ils pli gronds ports da mar sa chattan ad Algeciras, Barcelona, Valencia, Bilbao, Gijón e Santa Cruz de Tenerife. Tranter la Peninsla Iberica e las Balearas resp. las Canarias datti ina retscha da colliaziuns da traffic da navettas. 

Per la navigaziun interna èn vegnids construids en il 18avel e 19avel tschientaner il Canal Imperial de Aragón ed il Canal de Castilla. En il fratemp vegnan quels però be pli duvrads per transportar aua da baiver. Per il provediment cun aua ed energia èn vegnidas construidas en il decurs dal 20avel tschientaner en tut ils curs da flums pli gronds numerusas serras, uschia ch’ins na po betg pli navigar sin ils flums dal pajais. La suletta excepziun furma il Guadalquivir tranter Sevilla e l’Atlantic. Sin quest sectur pon er navigar bastiments d’auta mar.

Tar la rait tradiziunala da la societad da viafier statala Red Nacional de los Ferrocarriles Españoles (RENFE) sa tracti d’ina viafier a binari lad (1668 mm). Quella vegn cumplettada successivamain tras ina rait da tren ad auta sveltezza a binari normal cun num Alta Velocidad Española (AVE). Quest’ultima cumpigliava il 2013 ina lunghezza da 2276 kilometers.

Numerusas citads disponan d’ina rait da trens urbans; ultra da quai datti a Barcelona, Bilbao, Madrid, Valencia, Sevilla, Malaga e Palma de Mallorca viafiers sutterranas.

En radund 40 citads spagnolas datti plazzas aviaticas per aviuns da passagiers. Las pli grondas societads aviaticas spagnolas èn Iberia, Air Europa e Vueling. Las plazzas aviaticas da Madrid e Barcelona tutgan areguard il dumber da passagiers tar las diesch pli grondas en tut l’Europa. Tranter Madrid e Barcelona exista ina punt aviatica, puente aéreo: tranter las 7 e las 23 uras partan numerus sgols entaifer fitg curts intervals.

L’onn 2012 possedevan tenor indicaziuns da l’OECD be 11 milliuns abitants (pia radund 25 % dals Spagnols) in access a l’internet, quai ch’è ina valur fitg bassa en congual cun la media europeica.

La pli impurtanta funtauna d’energia en Spagna è il petroli; quel furnescha stgars la mesadad da l’energia primara. Tut en tut munta la cumpart dals combustibels fossils (petroli, gas natiral e charvun) a bundant 75 %. L’onn 2010 han stuì vegnir importadas 73,9 % da tut las funtaunas d’energia primara.

L’energia electrica ha cumpiglià il 2009 21,5 % da tut l’energia finala. La producziun d’electricitad succeda surtut cun agid d’ovras electricas cumbinadas da gas e vapur (23 %), las sis ovras atomaras han furnì 22 %, mintgamai 16 % derivan d’implants eroelectrics e d’ovras idraulicas, 7 % d’implants d’energia a charvun e 2 % d’implants solars (cumpart restanta: energias regenerablas e.a.). L’onn 2010 ha la Spagna producì il pli bler energia electrica a basa da la forza dal vent en tut l’Europa (43 692 GWh).

Cun il Plan de Estabilización, la vieuta democratica dal temp suenter il 1975, l’adesiun a la Communitad europeica l’onn 1986 e la participaziun a l’Uniun economica e monetara europeica ha la Spagna tschentà il fundament per ina creschientscha economica a lunga durada. L’industria dal pajais è vegnida liberalisada e modernisada successivamain. Da quai èn resortidas intginas interpresas ch’ageschan cun success a nivel internaziunal, sco per exempel Iberia, Seat, Telefónica, Zara u Endesa. L’avertura da la Spagna per la concurrenza internaziunala ha manà a vastas investiziuns directas nà da l’exteriur.

Il pretsch per quest svilup ha però furmà in process da diminuziun entaifer las branschas tradiziunalas, quai ch’è tranter auter sa manifestà vaira ferm en il Pajais Basc. Ultra da quai sa chatta il dumber d’emploiads da las interpresas spagnolas lunsch sut la media europeica (10 il 2011, media europeica 17; per cumparegliar: Grezia 5, Germania 35). 80 % da las interpresas entaifer l’industria che producescha han main che 10 collavuraturs, quai ch’è in indizi per ina capacitad da concurrenza plitost bassa.

Tenor indicaziuns dal Fond monetar internaziunal furmava la Spagna il 2011 la dudeschavel gronda economia naziunala dal mund. La crisa economica dal 2009 ha er tutgà la Spagna ed ha manà in tschert temp ad in aut dumber da dischoccupads. A partir dal 2013 para questa fasa da recessiun e stagnaziun d’esser stada surmuntada. Il product naziunal brut da la Spagna ha muntà il 2014 a 1058,4 milliardas euros.

La structura da l’economia spagnola mussa la repartiziun tipica d’ina naziun industrialisada: 68 % servetschs, 20 % industria elavuranta, 9 % economia da construcziun, 3 % agricultura. Impurtants secturs economics èn il turissem, la branscha da construcziun, la tecnica da communicaziun ed infurmaziun, l’industria da metal, la construcziun da maschinas, l’agricultura e la petrochemia.

La Spagna è segnada da grondas differenzas economicas tranter las singulas communitads autonomas. En regiuns ch’èn industrialisadas fermamain, sco il Pajais Basc, Madrid, Navarra u la Catalugna, sa chattava il product naziunal brut per persuna tranter 8 e 25 % sur la media da l’Uniun europeica; en regiuns plitost agraras sco Extremadura, Castiglia-La Mancha u Andalusia però 28 fin 37 % sut la media europeica.

La Spagna è vegnida visitada il 2013 da 60,6 milliuns turists; suenter la Frantscha ed ils Stadis Unids sa chatta la Spagna uschia sin la terza plazza da la statistica da viadi mundiala. La pli impurtanta destinaziun turistica furma la Catalugna cun la chapitala Barcelona (25,7 % da tut ils turists), alura suondan las Balearas, las Canarias e l’Andalusia.

Bleras famiglias spagnolas possedan sper in’abitaziun en la citad ina chasa da fin d’emna sin la terra u sper la mar. Tenor cifras dal Banco de España devi la fin 2005 en Spagna radund 23,7 milliuns abitaziuns e 15,39 milliuns tegnairchasas. Mintga chasada dispona pia en media da 1,54 abitaziuns, quai ch’è la pli auta rata en tut il mund. Radund 85 % da las abitaziuns vegnan abitadas da lur possessurs, 15 % vegnan affittadas.

La bilantscha dal stadi ha cumpiglià il 2009 expensas en l’autezza da 483 mrd. euros ed entradas da 366 mrd. euros. Da quai resulta in deficit en l’autezza da 117 mrd. euros resp. da 11,1 % dal product naziunal brut. Ils debits dal stadi muntavan il medem onn a 560,6 mrd. euros u 53,2 % dal product naziunal brut. Suenter la crisa da finanzas han las mesiras da spargn gidà a stabilisar in pau la situaziun finanziala dal pajais.
 

La Spagna ha contribuì en tut las spartas culturalas artists ed ovras da renum mundial. Qua ina survista dals nums ils pli impurtants:

In tipic spectacul spagnol furma la corrida. Tenor l’opiniun da ses aderents è quel da resguardar sco in art, en il qual l’eleganza e l’estetica giogan in’impurtanta rolla. En ils egls da blers critichers furma ella però ina tradiziun arcaica e brutala; pervi da la tortura d’animals ch’è colliada cun la corrida na meritia quella betg da vegnir cuntinuada en la furma odierna. Tant en la Catalugna sco er sin las Inslas Canarias è ella scumandada en il fratemp.

La gronda part da las gasettas dal di surregiunalas cumpara en la chapitala Madrid: ‹El País› (ediziun il 2003 radund 561 000 exemplars), ‹El Mundo› (379 000), ‹ABC› (346 000) e ‹La Razón› (205 000). A Barcelona cumparan ‹La Vanguardia› (240 000) e l’impurtanta gasetta regiunala ‹El Periódic› (221 000; er en versiun spagnola sco ‹El Periódico›). Da muntada èn er gasettas da sport che cumparan mintga di sco ‹Marca› (549 000) ed ‹As› (303 000). 

L’emettur da radio e televisiun da dretg public sa numna Radiotelevisión Española (RTVE). L’emettur da televisiun (TVE) cumpiglia ils programs La 1, La 2 e TVE Internacional sco er intgins programs da sparta. Emetturs da televisiun privats furman t.a. Antena 3, Cuatro Telecinco e LaSexta.

Il ballape è en Spagna per lunschor il sport il pli popular, e quai tant sco sport da massa sco er areguard il public en ils stadions e davant la televisiun. Ils pli enconuschents clubs da ballape èn Real Madrid e FC Barcelona che tutgan a medem temp tar ils megliers clubs da l’Europa. Ulteriurs impurtants clubs naziunals furman FC Valencia, Atlético Madrid, Athletic Bilbao, Real Saragossa e FC Sevilla. A l’equipa naziunala èsi fin uss reussì da gudagnar trais giadas il campiunadi europeic, numnadamain il 1964, il 2008 ed il 2012. Il 2010 è la Spagna daventada per l’emprima giada campiun mundial.

Ulteriurs sports da squadra populars èn ballabasket, ballamaun, hockey, futsal (ballape en halla), ballarait e ballanataziun; a las universitads è ultra da quai il rugby ordvart popular. Surtut en las regiuns Catalugna e Galizia è en pli il hockey sin rollas derasà vastamain.

Er il sport motorisà è fitg popular en Spagna. L’interess per la furmla 1 ha culminà cun Fernando Alonso ch’è daventà campiun mundial il 2005 e 2006. 

Il ciclissem è in ulteriur sport fitg apprezià tant sco sport da profis sco er sco sport da massa. Cun Miguel Indurain, Federico Bahamontes, Luis Ocaña Pernia, Pedro Delgado, Óscar Pereiro, Alberto Contador e Carlos Sastre dispona la Spagna da set victurs dal Tour de France. Óscar Freire è ultra da quai daventà diversas giadas campiun mundial. Il pli impurtant eveniment da ciclissem è la Vuelta; ulteriuras cursas da muntada internaziunala èn il Tur dal Pajais Basc, il Tur da la Catalugna e la Clásica San Sebastián.

Il pli impurtant sport individual furma il tennis. Tar ils giugaders da tennis spagnols ch’èn stads u en ils pli enconuschents a nivel internaziunal tutgan Manuel Santana, Carlos Moyá, Sergi Bruguera, Arantxa Sánchez Vicario, Conchita Martínez e Rafael Nadal.

En Spagna vegnan designads mintg’onn 14 dis da festa. Intgins da quels vegnan prescrits dal stadi, intgins da las communitads autonomas e mintgamai in di da festa da las provinzas. I sa tracta dals dis da festa usitads entaifer l’onn ecclesiastic, da dis da festa da patruns da citads, provinzas, regiuns u naziunals sco er da las suandantas festas secularas: di da la lavur (1 da matg), festa naziunala a chaschun da la scuverta da l’America tras Cristof Columbus (Día de la Hispanidad / El Pilar ils 23 d’october) e di da la constituziun che regorda a l’approvaziun da la constituziun dal 1978 (6 da december).




#Article 12: Germania (23352 words)


La Germania (furma uffiziala Republica Federala da la Germania, en la lingua da mintgadi er Republica Federala Tudestga, RFT; tudestg: Bundesrepublik Deutschland, BRD) è in stadi federal situà en l’Europa Centrala. Il stadi da dretg democratic e social consista dals 16 pajais federativs tudestgs. La chapitala da la Germania è Berlin.

La Germania cunfinescha cun nov stadis; ultra da quai vegn il stadi cunfinà da dus spazis natirals: en il nord da la Mar dal Nord e Mar da l’Ost ed en il sid da las Alps. L’entir territori dal pajais è situà en la zona temprada. Cun bundant 81 milliuns abitants è il pajais populà vaira spess.

La Germania è in commember fundatur da l’Uniun europeica ed a medem temp il stadi da l’UE cun il pli aut dumber da la populaziun. Ensemen cun 18 ulteriurs commembers da l’UE furma la Germania l’uniun monetara da la zona da l’euro. La Germania è commembra da las Naziuns unidas, da l’Organisaziun da cooperaziun e svilup economic en Europa, da la NATO, dals G7 e dals G20. En Germania sa chatta la sedia da la Banca centrala europeica, dal Tribunal maritim internaziunal sco er da l’Uffizi da patentas europeic. La Germania è in stadi da grond’influenza politica entaifer l’Europa ed in pajais partenari tschertgà a nivel internaziunal.

Tenor il product naziunal brut è la Germania la pli gronda economia publica da l’Europa e la quart gronda dal mund. L’onn 2012 figurava il pajais sco terz gronda naziun dad export e dad import. L’Indicatur dal svilup uman classifitgescha la Germania sco pajais autsviluppà.

Il svilup istoric da la Germania sa lascha persequitar enavos fin als Indogermans en il temp preistoric. En il decurs dal temp ha il pajais cumpiglià differents territoris e pievels; ad in stadi naziunal è el sa sviluppà pir en la segunda mesadad dal 19avel tschientaner. En rom da la migraziun dals pievels era l’Imperi roman occidental dà ensemen en il decurs dal 5avel tschientaner. Sinaquai èn s’etablids stadis successurs german-romans, dals quals il Reginavel dals Francs ch’è vegnì fundà dals Merovings dueva sa mussar sco il pli impurtant. En il decurs dal temp medieval tempriv ha il Reginavel dals Francs expandì sut ils Carolings; dal temp da Carl il Grond cumpigliava el vastas parts da la Germania dad oz, dal Benelux, da la Frantscha, da l’Italia, da la Svizra e da l’Austria. Suenter la spartiziun da l’imperi carolingic è il Reginavel ostrofrancon daventà l’origin da la Germania da pli tard. Quai però senza ch’i fiss gia sa furmà en il temp medieval ina ‹schientscha naziunala tudestga›: l’imperi roman-tudestg (ch’è vegnì numnà a partir dal temp medieval tardiv Sontg Imperi roman) aveva in caracter surnaziunal ed ha er survegnì pli e pli fitg in caracter surstatal. La pussanza ‹statala› dals retgs ed imperaturs roman-tudestgs era bler main exprimida che quai ch’igl era il cas en ils reginavels da l’Europa dal Vest; ils numerus signurs territorials da l’autra vart sa chattavan en ina posiziun vaira ferma. Quai ha furmà la basa dal federalissem tudestg ch’ha impedì fin la fin dal Sontg Imperi roman ch’i sa sviluppia ina ferma pussanza centrala. Las grondas sfidas per il Sontg Imperi en il temp modern tempriv han furmà la refurmaziun e cuntrarefurmaziun e la Guerra da trent'onns.

Suenter la dissoluziun dal Sontg Imperi roman l’onn 1806 e la victoria cunter Napoleun l’onn 1813 en la Battaglia dals pievels sper Lipsia, è sa furmada il 1815 la Confederaziun tudestga en furma d’ina lia lucca. Durant la Revoluziun dal 1848/49 è sa constituì cun l’Assamblea da Francfurt l’emprim parlament tudestg; pervi da las bleras resistenzas ha quel però be existì durant in onn. La Confederaziun tudestga ha perdurà fin il 1866; alura èn las tensiuns tranter l’Austria e la Prussia per la posiziun predominanta proruttas en in conflict avert. La Prussia ha gudagnà cun meds militars, uschia ch’igl è sa furmada il 1867 la Confederaziun da la Germania dal Nord che steva sut la direcziun da la Prussia. Suenter la Guerra tudestg-franzosa dal 1870/71 han ins proclamà il 1871 l’Imperi tudestg sco emprim stadi naziunal tudestg. 

Durant l’uschenumnà ‹temp da fundaziun› è la Germania daventada la pli gronda pussanza economica da l’Europa. Suenter la sconfitta en l’Emprima Guerra mundiala è prorutta il 1918 la Revoluziun da november; la finala han ins fundà ina republica parlamentar-democratica. La Republica da Weimar ha bain enconuschì ils onns 1920 sco ‹decenni dad aur›, ma è stada segnada d’instabilitad politica. La crisa economica mundiala e la ‹praisa da la pussanza› tras ils naziunalsocialists sut Adolf Hitler han mess ina fin a l’emprim stadi tudestg democratic. Dal 1933 al 1945 è suandà il temp dal naziunalsocialissem; inimis da la dictatura totalitara e rassistica èn vegnids persequitads ed assassinads sistematicamain, entant ch’il reschim sa stentava da schlargiar ils cunfins dal stadi. Questas tendenzas èn idas a finir en la Segunda Guerra mundiala ch’è vegnida iniziada a moda decisiva da la Germania, han manà a mazzaments en massa (incl. il holocaust) ed èn idas a fin ils 8 da matg 1945 cun la capitulaziun senza cundiziuns da la Germania.

Las quatter pussanzas victuras alliadas han sutdividì la Germania e Berlin en ina zona d’occupaziun da l’ost e trais dal vest. En las trais zonas dal vest è sa furmada ils 23 da matg 1949 cun la proclamaziun da la constituziun (Grundgesetz) la Republica Federala Tudestga, entant che la zona da l’ost è sa transfurmada en la Republica democratica tudestga (RDT) socialistica.  Durant la Guerra fraida è la Germania restada dividida, enfin ch’igl è vegnì ils 9 da november 1989 a la crudada dal Mir da Berlin. Quest eveniment ha furmà il resultat d’ina revoluziun paschaivla en la Republica democratica tudestga ch’ha la finala manà al collaps da la dictatura statala. Ils 3 d’october 1990 ha gì lieu la reuniun da la Germania; quest ‹Di da l’unitad tudestga› vegn festivà dapi lura sco festa naziunala. Ultra da quai è la Germania in commember fundatur da l’Uniun europeica ch’è sa furmada il 1992 (a basa da la lavur da las instituziuns antecessuras) e vala sco in dals motors da l’integraziun europeica.

Las prefurmas etimologicas da ‹deutsch› muntavan oriundamain ‹appartegnent al pievel›; l’adjectiv sa referiva l’emprim als dialects dals Germans dal territori continental dal vest. La denominaziun ‹Deutschland› vegn duvrada dapi il 15avel tschientaner, è però gia cumprovada en singuls documents pli vegls. Anc pli baud èn be enconuschentas formulaziuns sco ‹ein deutsches Land› u ‹die deutschen Länder›, ma betg la furma definita singulara ‹das deutsche Land›. Ins manegiava qua pajais cun ina classa dirigenta che sa referiva en la revendicaziun da sia pussanza politica al Reginavel ostrofrancon, il Sontg Imperi roman da pli tard. En in cudesch dal 1487 è per exempel cuntegnida la formulaziun «in teutschen landen lassen machen».

Ils terms vegnivan duvrads sco sinonims surtut per structuras (pre-)statalas ch’eran sa furmadas en territoris da lingua tudestga u che stevan sut domini tudestg. Il Sontg Imperi roman era sa sviluppà en il 10avel tschientaner or da la part orientala dal Reginavel dals Francs. Tranter il 12avel tschientaner ed il 1648 è l’Imperi sa sviluppà ad ina confederaziun da stadis che purtava per part er il num ‹Sontg Imperi roman da naziun tudestga›. Suenter la fin da l’Imperi l’onn 1806 han l’Imperi da l’Austria, il Reginavel da la Prussia e la Confederaziun dal Rain dominà il svilup politic e statal en il territori tudestg. Sco lia statala che dueva segirar la naziunalitad tudestga è suandada suenter il 1815 (Congress da Vienna) la Confederaziun tudestga che steva sut la direcziun da l’Austria. La concurrenza tranter l’Austria e la Prussia per l’egemonia entaifer il territori tudestg è s’agravada al dualissem tudestg. Cun la Guerra tudestga e la Battaglia sper Königgrätz ha la Prussia decidì quel a sia favur.

En dus pass ha la Prussia sinaquai unì a partir dal 1867 en in stadi vastas parts dal territori da lingua tudestga. Quai è succedì en furma d’unitads statalas che sa basavan sin la situaziun da dretg da la Confederaziun tudestga, ma ch’accentuavan la predominanza da la Prussia. La Confederaziun da la Germania dal Nord cumpigliava be ils stadis situads en il nord da la lingia da la Main; en in segund pass è suandada il 1871 la proclamaziun da l’Imperi tudestg ch’enserrava uss l’entir territori da la Germania.

En il decurs da la Revoluziun da november, ch’è prorutta il 1918 suenter la fin da l’Emprima Guerra mundiala, èn ils prinzis federals vegnids sfurzads d’abditgar. Suenter la fin da la monarchia han ins ponderà da numnar la nova furma statala ‹Republica tudestga› u ‹Republica da la Germania›; ma la finala ha er l’uschenumnada ‹Republica da Weimar› mantegnì la denominaziun uffiziala ‹Imperi tudestg›.

Cun la fin da la monarchia habsburgaisa è sa furmada la Republica da l’Austria tudestga. Quella è sa stentada il 1919 da sa colliar cun l’Imperi tudestg; pervi dal scumond da vart da las pussanzas victuras n’ha quest pass però betg pudì vegnir realisà.

Suenter la Segunda Guerra mundiala han las pussanzas victuras duvrà il term ‹Germania/Deutschland› exclusivamain per l’Imperi tudestg (pia senza l’Austria). Il 1949 han ils Stadis Unids e la Gronda Britannia inizià la fundaziun da la Republica Federala Tudestga, entant che l’Uniun sovietica ha mess ad ir la Republica democratica tudestga. Il cussegl parlamentar da la Republica Federala ha discussiunà da cuntinuar cun il diever dal num ‹Imperi tudestg›; ma la finala èn ins vegnì a la conclusiun che quel haja en il fratemp «in accent agressiv» ed ha perquai fatg diever per l’emprima giada uffizialmain da la denominaziun ‹Germania/Deutschland›. La «forza d’integraziun emoziunala dal num e sia paisa areguard il dretg statal» duevan gidar a furmar l’identitad e suttastritgar la cuntinuitad dal nov stadi. La Republica democratica tudestga n’ha bain betg duvrà il term ‹Germania/Deutschland› directamain en il num; tenor l’emprim artitgel da la constituziun dal 1949 dueva el però valair sco noziun sinonima al num ‹Republica democratica tudestga›. Pli tard ha la RDT quasi be pli duvrà l’attribut ‹tudestg› resp. l’agiunta «...da la RDT». L’unificaziun tudestga dal 1990 dueva alura puspè manar ensemen ils territoris oriunds ad in’unitad statala.

En il decurs dals tschientaners èn intgins territoris sa sviluppads independentamain da la sfera da pussanza tudestga ed èn sa schliads dal Sontg Imperi roman. Tranter auter èn quai stads a basa da la Pasch da Vestfalia il 1648 ils Pajais Bass (dals quals las varietads linguisticas eran t.a. sa spartidas dal tudestg tras la stampa da cudeschs), la Confederaziun svizra sco er l’Alsazia e la Lorena dal Nordost (franzos Moselle). Suenter la fin da la Confederaziun tudestga l’onn 1866 èn er sortids il Luxemburg, il ducadi da Limburg, il Liechtenstein e l’Austria (la davosa giada il 1945). En rom da la fundaziun da l’Imperi tudestg ha quel annectà la regiun Alsazia-Lorena, entant che las sconfittas en las duas guerras mundialas èn stadas colliadas cun la sperdita da territoris: Suenter il 1919 ha la Germania stuì surdar, sper l’Alsazia e la Lorena, tscherts territoris al Danemarc, a la Belgia, a la Tschecoslovachia ed a la Lituania sco er las provinzas Posen e Prussia dal Vest a la Segunda Republica da la Pologna ch’era vegnida fundada da nov. Ils ulteriurs territoris a l’ost da la lingia Oder-Neisse, numnadamain la Silesia, Neumark, Pomarania da l’Ost e la Prussia da l’Ost, èn vegnids a partir dal 1945 sut administraziun sovietica e surtut polonaisa. Questas regiuns han ins integrà en ils territoris statals respectivs suenter ch’ins aveva cumenzà a stgatschar la populaziun tudestga. Tar l’unificaziun tudestga l’onn 1990 èn las pretensiuns da la Germania areguard ils anteriurs territoris tudestgs en l’ost vegnidas sistidas formalmain en rom dal Contract dus plus quatter.

Malgrà la cuntinuitad dal term ‹Germania› dal 17avel tschientaner fin en il temp preschent sco er da l’identitad da dretg internaziunal e da la cuntinuitad statala dapi il 19avel tschientaner n’hai de facto betg dà fin il 1990 in svilup linear politic-istoric nuninterrut.

Ils territoris natirals èn dal nord al sid la Planira da la Germania dal Nord, la zona da las Muntognas Mesaunas e la regiun prealpina cun las Alps.

La Germania ha en tut nov stadis vischins: En il nord cunfinescha il pajais cun il Danemarc (sin ina lunghezza da 67 km), en il nordost cun la Pologna (442 km), en l’ost cun la Tschechia (811 km), en il sidost cun l’Austria (815 km; senza il cunfin al Lai da Constanza), en il sid cun la Svizra (316 km; cun il cunfin da l’exclava Büsingen am Hochrhein, ma senza il cunfin al Lai da Constanza), en il sidvest cun la Frantscha (448 m), en il vest cun il Luxemburg (135 km) e la Belgia (156 km) ed en il nordvest cun ils Pajais Bass (567 km). La lunghezza totala dals cunfins munta a 3757 km. La Germania è il pajais cun ils pli blers stadis vischins da tut l’Europa.

Il punct terrester da la Germania situà il pli al nord sa chatta sin l’insla Sylt, en il nord da List am Ellenbogen. Sco punct il pli al nord da la terra franca vegn resguardà d’ina vart il piz da la peninsla Holnis en il Fiord da Flensburg, da l’autra vart la vischnanca Rodenäs en la Frisia dal Nord. Il punct il pli en il sid furma il Haldenwanger Eck en il sid dad Oberstdorf. Dal Ellenbogen fin al Haldenwanger Eck mesira la lingia directa 886 kilometers.

Il punct da la Germania situà il pli al vest sa chatta ad Isenbruch en il Selfkant al cunfin cun ils Pajais Bass en vischinanza da la Maas; il punct il pli en l’ost giascha tranter Deschka e Zentendorf (vischnanca da Neisseaue) en ina serpentina da la Lausitzer Neisse. Dad Isenbruch fin a la serpentina da la Neisse mesira la lingia directa radund 636 kilometers.

Areguard la geologia da la surfatscha sa lascha la Germania sutdivider a moda simplifitgada en trais regiuns grondas: il nord ch’è segnà dal temp da glatsch e che tanscha da las costas fin al Chanal da la Planira, l’Elba Centrala e la Lausitz Superiura; la part centrala e meridiunala ch’è influenzada da l’effect da distanza da la creaziun da las Alps e che tanscha fin a l’ur da las Alps e – sco terza regiun gronda – il pli al sid las Alps. En cumparegliaziun cun las duas autras regiuns grondas cumpiglian las Alps però be ina fitg pitschna part dal territori da la Germania.

Il Nord è cuvert sur grondas surfatschas da sediments da glatscher e dad aua da naiv dal quartar. Tipics èn tranter auter ils sediments sablunus ed ils deposits da morenas che cumpiglian magari blocs erratics da pliras tonnas. La glera e per part er ils sediments pli fins èn vegnids manads durant las periodas fraidas dal pleistocen nà da la Scandinavia vers la Germania dal Nord.

Geologicamain bundant pli variadas èn las regiuns situadas entamez ed en il sid dal pajais. Las cuntradas da las Muntognas Mesaunas èn vegnidas modelladas d’in sochel geologic ch’è sa furmà en il paleozoicum e d’ina cuverta che deriva dal mesozoicum. Las structuras da la surfatscha sco ch’ellas sa preschentan oz furman però in effect secundar d’in process geologic pli giuven, numnadamain da la furmaziun da las Alps en il decurs dal terziar. Ina restanza d’ina fasa da furmaziun primara (perioda carbonifera) èn ils giaschaments da charvun da crap en la Regiun dal Ruhr ch’èn stads da gronda muntada economica surtut en il 19avel e 20avel tschientaner.

Il Foss dal Rain Superiur e la regiun prealpina èn regiuns da sbassament ch’èn relativamain giuvnas e ch’occupan geologicamain ina posiziun speziala entaifer la Germania dal Sid. Tar las Alps sezzas sa tracti d’ina faudaziun dal mesozoicum tardiv e dal terziar che cuntegna pia – cuntrari a las regiuns situadas pli en il nord – er crappa da sediment da questas periodas geologicas pli giuvnas. Las Alps tudestgas sa cumponan surtut da crappa da chaltschina ch’è vegnida transportada sco cuverta tectonica nà dal sid en la posiziun odierna.

La Zugspitze ch’è situada al cunfin vers l’Austria furma la pli auta muntogna da la Germania (2962 m s.m.). Il punct il pli aut da las Muntognas Mesaunas è il Feldberg en il Guaud Nair (1493 m s.m.). Il punct il pli bass da la Germania è situà en ina foppa sper Neuendorf-Sachsenbande en la Wilstermarsch (Schleswig-Holstein) e giascha 3,54 meters sut il livel da la mar.

L’entir territori da la Germania appartegna a la zona temprada da l’Europa Centrala; l’aura stat sut l’influenza dal vent dal vest ed è marcada da la transiziun tranter il clima maritim da l’Europa dal Vest ed il clima continental da l’Europa da l’Ost. Tras l’influenza dal Current dal Golf è il nivel da temperatura surprendentamain aut per quests grads da latituda.

La temperatura media annuala cumpiglia 8,2 °C; la temperatura media mensila variescha tranter −0,5 °C il schaner e 16,9 °C il fanadur. Las precipitaziuns annualas muntan a 789 mm (e varieschan tranter 49 mm il favrer e 85 mm il zercladur). La pli bassa temperatura ch’è vegnida mesirada insacura en Germania è stà −37,8 °C il 1929 a Hüll (Wolznach); la pli auta temperatura, 40,3 °C, è vegnida mesirada il 2015 a Kitzingen.

Dals sis flums cun il pli grond intschess idrografic deflueschan il Rain, l’Elba, la Weser e l’Ems vers la Mar dal Nord e l’Oder en la Mar da l’Ost; il Danubi percunter maina l’aua en la Mar Naira ed è pia d’attribuir idrograficamain a la Mar Mediterrana.

Il Rain nascha en Svizra e dominescha il sidvest ed il vest da la Germania. Sur 865 km curra el tras la Germania resp. per lung dal cunfin statal per sbuccar silsuenter en ils Pajais Bass en la Mar dal Nord. Ses pli impurtants affluents sin territori tudestg èn Neckar, Main, Mosel e Ruhr. Il Rain è da gronda muntada economica e furma la via d’aua la pli frequentada da l’Europa.

Il Danubi cumpiglia en il sid sur ina lunghezza da 647 km quasi l’entira regiun prealpina da la Germania e cula vinavant vers l’Austria e l’Europa dal Sidost. Ses pli impurtants affluents tudestgs èn Iller, Lech, Isar ed En.

La Germania da l’Ost vegn dominada da l’Elba che nascha en la Tschechia e che percurra la Germania sin in tschancun da 725 km. Ses pli impurtants affluents tudestgs èn Saale e Havel.

La Oder e ses affluent principal, la Neisse, furman en tut sur ina lunghezza da 179 kilometers il flum da cunfin vers la Pologna.

Sulettamain il territori idrografic da la Weser ch’ha ina lunghezza da 452 km giascha dal tuttafatg a l’intern dal pajais. Ses intschess idrografic furma la part centrala da la Germania dal Nord; ses affluents principals èn Werra e Fulda.

L’Ems percurra sur ina lunghezza da 371 km il nordvest dal pajais. Ses territori idrografic giascha surtut en ils Pajais Bass.

Ils lais natirals èn per gronda part d’origin glazial. Perquai èn els en emprima lingia da chattar en las Prealps, en la Holsteinische Schweiz ed a Mecklenburg. Il pli grond lai che giascha dal tuttafatg sin territori tudestg è la Müritz che fa part da la planira da lais a Mecklenburg. Il pli grond lai cun ina cumpart tudestga furma il Lai da Constanza che cunfinescha cun l’Austria e la Svizra.

En il vest ed en l’ost da la Germania datti blers lais artifizials ch’èn vegnids furmads tras fluir anteriurs territoris d’explotaziun a la surfatscha (surtut da charvun da crap e da charvun da terra), sco per exempel il Neuseenland a Lipsia u il Lai da Phoenix a Dortmund.

En la Mar dal Nord dominescha la chadaina da las Inslas Frislandaisas. Tar las inslas da la Frisia dal Nord sa tracti da restanzas da la terra franca ch’è sa sbassada e vegnida inundada; las inslas da la Frisia da l’Ost èn percunter sa furmadas tras l’undada da la mar or da bancs da sablun. Helgoland è l’insla tudestga abitada sur onn che sa chatta il pli lunsch davent da la terra franca.

Las pli grondas inslas tudestgas en la Mar da l’Ost èn (dal vest vers l’ost): Fehmarn, Poel, Hiddensee, Rügen ed Usedom; la pli gronda peninsla è Fischland-Darss-Zingst.

Da las inslas tudestgas situadas en lais a l’intern dal pajais èn Reichenau, Mainau e Lindau en il Lai da Constanza e Herrenchiemsee en il Chiemsee las pli grondas e pli enconuschentas.

Areguard il clima fa il spazi natiral da la Germania part da la zona temprada ed areguard la vegetaziun a la zona dals guauds che bittan giu la feglia. Sia flora oriunda è perquai surtut caracterisada da guauds da feglia ed en la muntogna da guauds da coniferas.

Localmain è la flora segnada d’ina gronda diversificaziun tras facturs dal lieu sco il profil, l’autezza e la geologia da la cuntrada e la posiziun mesoclimatica. Dal vest a l’ost marchescha la vegetaziun natirala la transiziun dal clima maritim dal vest al clima continental.

Ils guauds da figlia consistan per gronda part da faus, en territoris sitgs da ruvers. En l’ost fa il guaud da figlia plaunsieu plazza cun singuls tieus al guaud maschadà. Daspera èn caracteristics ils guauds d’ogna a las rivas da flums e lais – ch’èn daventads vaira stgars – ed ils guauds maschadads da ruvers e faus. Las Alps e las Muntognas Mesaunas èn segnadas da guauds da muntogna e da chavorgias. Guauds selvadis per propi n’existan betg pli, cun excepziun da fitg pitschens relicts.

Senza influenza da l’uman consistiss la vegetaziun en la Germania, sco en la gronda part dals pajais situads en la zona temprada, da guaud. L’excepziun furman las pastgiras bassas e cuntradas da palì che cuntegnan be paucas substanzas nutritivas. En pli las regiuns situadas en zonas autas subalpinas (las parts superiuras dal Guaud Nair, dal Harz e da l’Erzgebirge) ed alpinas (Alps Bavaraisas) ch’èn segnadas da pauca vegetaziun e d’in clima moderà-fraid.

Actualmain èn cuverts radund 29,5 % da la surfatscha dal stadi cun guaud. La Germania furma uschia in dals pajais da l’Uniun europeica cun la pli auta cumpart da guaud. La cumposiziun da quests guauds correspunda però als interess da l’economia forestala (pigns e tieus) e betg a las relaziuns natiralas, en las qualas prevalessan – sco demussà survart – ils guauds maschadads dominads da faus.

La gronda part da la surfatscha dal pajais serva a la cultivaziun da plantas da niz. Quai èn surtut granezza (ierdi, avaina, seghel e furment), il tartuffel ed il tirc ch’èn vegnids importads da l’America sco er il mailer e pli e pli er raps. En las vals che vegnan percurridas da flums, tranter auter Mosel, Ahr e Rain, è la cuntrada vegnida transfurmada tenor ils basegns da la viticultura.

En il fratemp è la protecziun da la natira daventada in’incumbensa dal maun public ch’è er vegnida integrada sco finamira statala en la constituziun. Tranter auter han ins endrizzà en tut il pajais 14 parcs naziunals, 19 reservats da biosfera e 95 parcs da la natira.

Sco la flora è er la fauna da la Germania stada suttamessa en il decurs dals ultims 1000 onns a grondas intervenziuns da vart da l’uman. Surtut ils animals gronds èn vegnids decimads enormamain tant en lur dumber sco er en lur varietad. La situaziun odierna preschenta pia be in maletg fragmentar da la varietad oriunda.

La gronda part dals mammals ch’èn da chasa en Germania viva en ils guauds da feglia temprads. Igl èn quai surtut diversas spezias da fiergnas, il dam ed il tschierv, chavriels, portgs selvadis e vulps. Il castur, la ludra ed il giat selvadi èn percunter daventads fitg rars u vegnan per part puspè recolonisads.

La gronda part dals animals gronds che vivevan a moda selvadia en la Germania èn vegnids stgatschads u extirpads: il chaval selvadi (temp medieval tempriv, però intschert, damai ch’el cumpara savens en furma cruschada cun chavals domestics), bov selvadi (1200–1400), bison europeic (15avel tschientaner), elan (derasà en il temp medieval tempriv, quasi extinct fin il 17avel tschientaner, singuls effectivs han pudì sa mantegnair fin la mesadad dal 20avel tschientaner al cunfin tranter la Germania e la Pologna), gulatsch (1700), capricorn (vers il 1720), luf-tscherver (1838), urs brin (1880) e luf (vers il 1900). Dapi il 1962 datti divers indizis che cumprovan il return dal luf-tscherver nà da l’Europa da l’Ost. Ils ultims onns èn er lufs ed elans arrivads sporadicamain nà da la Pologna e da la Tschechia. Il 2010 han ins recolonisà ina populaziun da bisons europeics en il Rothaargebirge (Westfalen dal Sid).

En las regiuns autalpinas viva puspè il capricorn, ch’è vegnì recolonisà, sco er la muntanella. Pli stgars è il chamutsch en las Muntognas Mesaunas sco en il Guaud Nair u sin la Fränkische Alb.

Tranter ils pli enconuschents reptils ch’èn da chasa en Germania tutgan la natra grischa, la vipra berus e la tartaruga da palì europeica. Daspera datti er blers amfibis sco salamanders, raunas, rustgs, rustgets e piutschas; tut questas spezias figureschan però sin la glista cotschna da las spezias d’animals periclitadas.

L’evla da mar cua en las regiuns Mecklenburg-Pomarania dal Vest e Brandenburg (radund 50 pèrs). L’evla da la pizza cumpara be en las Alps Bavaraisas; il tschess barbet era vegnì extirpà là, returna però actualmain en connex cun las recolonisaziuns ch’han gì lieu en Svizra ed en l’Austria. Ils utschels da preda ils pli derasads en Germania èn il girun da mieurs ed il crivel, percunter è l’effectiv dal falcun pelegrin bundant pli bass. Da tut ils milans cotschens cua la mesadad en Germania; l’effectiv sa diminuescha però pervi da l’agricultura intensiva. 

Da l’autra vart profiteschan bleras spezias d’utschels che suondan la cultura da la preschientscha da l’uman. Igl èn quai surtut diversas spezias da columbas che vivan en las citads, la merlotscha (che viveva pli baud en ils guauds), paslers e masets che vegnan savens pavlads l’enviern, sco er corvs e muettas che profiteschan da deponias da ruments. Ina spezialitad èn ils flamingos en il Zwillbrocker Venn che furman en tut il mund la colonia situada il pli al nord.

Il salmun, ch’era pli baud in pesch frequent en ils flums, è per gronda part svanì en il decurs dal 19avel tschientaner (en rom da l’industrialisaziun). Ils onns 1980 èsi reussì d’al recolonisar en il Rain. Il davos sturiun han ins tschiffà en Germania il 1969. En blers lajets vegnan tegnidas carpas, las qualas èn pir vegnidas introducidas en Germania dal temp dals Romans.

La foca u chaun da mar che viva a la riva da la Mar dal Nord e da l’Ost è medemamain quasi stada extirpada. En il fratemp vivan en la mar dal watt puspè intgins milli exemplars. Er la foca grischa arriva puspè da l’Europa dal Nord vers las rivas da la Germania, suenter che questa spezia era svanida dal tuttafatg. Daspera è la mar dal watt surtut d’impurtanza sco plazza da pussar per diesch fin dudesch milliuns utschels migrants per onn. La spezia da balenas la pli derasada en la Mar dal Nord e da l’Ost è la balena-portg. Ultra da quai datti effectivs dad orcas e da delfins.

Sper ils animals autoctons èn vegnids vitiers numerus neozeons sco per exempel l’urset american, il chaun-vulp, il papagagl dal cularin u l’auca egipziana. Per part sa derasan spezias novarrivadas er a moda invasiva, vul dir ch’ellas stgatschan ils concurrents indigens. Quai è per exempel il cas tar il giomber da flum american, tar il raunatsch nordamerican u tar la pertga-sulegl.

En Germania vegnan radund 52 % da la surfatscha duvrads sco terren agricul (situaziun dal 2009), guauds cuvernan ulteriurs radund 29,5 %. 14 % furman surfatscha d’abitadi e da traffic. Las auas cumpiglian radund 2 % ed ils 2,5 % restants furman terrens nuncultivads. 

La Republica Federala consista da 16 stadis commembers che vegnan numnads pajais federativs (Bundesländer u simplamain Länder). Ils dus pajais federativs da Berlin e Hamburg furman citads-stadis e consistan be da la vischnanca dal medem num; Bremen consista da las duas citads-stadi Bremen e Bremerhaven. Tut ils ulteriurs pajais federativs sa dividan en numerusas vischnancas.
 

Las vischnancas (Gemeinden) furman il nivel il pli giudim da la divisiun territoriala. Ellas regleschan tut las fatschentas da la communitad locala a basa dal dretg d’autodeterminaziun. Cun excepziun da las citads autonomas (kreisfreie Städte) èn las vischnancas organisadas en corporaziuns da vischnancas e circuls (Landkreise).

Ils circuls e las vischnancas èn suttamess al dretg communal che vegn reglà dals singuls pajais federativs a moda fitg differenta. Sulettamain la citad dal circul (Kreisstadt) sco sedia dal circul è da chattar en l’entira Germania.

En l’entir pajais existan radund 80 citads grondas, pia citads cun dapli che 100 000 abitants. Da quai han 13 dapli che 500 000 abitants. Ina particularitad da la Germania – per motivs istorics – è il fatg che las citads grondas èn derasadas plitost a moda decentrala u schizunt a l’ur dal pajais. Las zonas d’aglomeraziun situadas en il vest e sidvest dal pajais furman la part centrala dal center da concentraziun da la populaziun europeica che vegn circumscrit cun il term ‹Banana blaua›.

La gronda part da las aglomeraziuns en Germania sa laschan circumscriver sco monocentricas; il territori da la Ruhr percunter furma in exempel classic per in territori da concentraziun policentric.

Il 2015 vivevan en la Republica Federala Tudestga uffizialmain 81 459 000 abitants sin ina surfatscha da 357 34 km². La Germania tutga uschia tar ils stadis da surfatscha populads il pli spess. La vegliadetgna media da l’entira populaziun giascheva il 2010 tar 43,7 onns.

Il dumber dals uffants naschids vivs ha muntà il 2013 682 069. Quai correspunda ad ina natalitad da 1,41 uffant per dunna resp. da 8,4 naschientschas sin 1000 abitants. Igl è quai la pli bassa quota da naschientschas en tut il mund. Malgrà il deficit da naschientschas vivevan en Germania l’onn 2013 radund 244 000 persunas dapli ch’il 2012. Quai è d’attribuir a l’auta rata da migraziun.

Radund 74 milliuns persunas (92,3 %) possedevan il 2011 il dretg da naziunalitad da la Germania. Il medem onn residiavan en l’entir pajais radund 15 milliuns persunas (radund 19 %) cun ina ‹biografia da migraziun›. Sut quest term vegnan subsummads tut ils esters e tut ils Tudestgs ch’èn immigrads suenter il 1955 en la Germania u ch’han almain in genitur ch’è immigrà suenter questa data. La gronda gruppa tranter els furman ils repatriads, vul dir persunas da lingua tudestga ch’èn arrivadas suenter la Segunda Guerra mundiala e pervi da la Guerra fraida nà da l’Europa da l’Ost. I suondan ils burgais da la Tirchia (bundant 1,6 milliuns il 2010), dals ulteriurs stadis da l’Uniun europeica (surtut Italia, Pologna e Grezia) e da l’anteriura Jugoslavia. Tranter il 1950 ed il 2002 èn vegnidas natiralisadas radund 4,3 milliuns persunas ch’èn naschidas en Germania u ch’èn stadas sesentas sur lung temp en il pajais.

En Germania vivan immigrants da praticamain tut ils stadis dal mund. Tenor indicaziuns statisticas dal 2013 vivevan en Germania radund 6,3 milliuns persunas senza dretg da naziunalitad tudestg. Il 2012 ha la Germania furmà suenter ils Stadis Unids il pajais da l’OECD cun la segund auta cifra absoluta d’immigrants. Ils esters e las persunas cun ina biografia d’emigraziun èn repartids fitg inegual a nivel regiunal; las pli autas cumparts vegnan cuntanschidas en las aglomeraziuns da la part meridiunala dal pajais, p.ex. ad Offenbach am Main (25,8 %), Mannheim (23,6 %) e Minca (23,5 %). Las quotas las pli bassas èn da chattar en ils territoris rurals da la Germania da l’Ost e dal Nord. 

Il dumber cumplessiv da l’entira diaspora polonaisa ch’exista en Germania gia dapi il 19avel tschientaner (Ruhrpolen) munta a bundant dus milliuns; la gronda part dad els èn s’assimilads gia dapi generaziuns a la populaziun indigena.

 
La lingua ch’è surtut derasada en Germania è il tudestg, suandà dal tudestg bass (cun radund 4 milliuns persunas che dumognan la lingua bain fin fitg bain). Sper il franzos e l’englais furma il tudestg er ina da las linguas da lavur las pli frequentas entaifer ils gremis da l’Uniun europeica.

Il tudestg vegn duvrà en furma da la lingua da standard sco lingua uffiziala, en las medias surregiunalas e sco lingua da scrittira; er sco lingua che vegn discurrida en il mintgadi cumpara en tschertas regiuns quasi exclusivamain la varietad da standard (savens cun in lev colorit regiunal). La transiziun als dialects tudestgs na succeda betg tenor cunfins fix, mabain cuntinuadamain. 

Minoritads naziunalas tradiziunalas furman ils Danais (50 000), ils Fris (cun in dumber che tanscha, tut tenor calculaziun, da plirs 10 000 fin plirs 100 000), ils Sorbs (60 000) ed ils Sinti e Roma (70 000). Sper il bass tudestg èn er tut lur linguas renconuschidas tenor la Charta europeica da las linguas regiunalas u minoritaras.

En il stadi federativ Schleswig-Holstein possedan las linguas minoritaras bass tudestg, danais e fris parzialmain er il status da linguas uffizialas. Autras linguas tradiziunalas (p.ex. jenic u jiddic) u linguas minoritaras pli novas n’èn betg vegnidas integradas en la Charta.

Tschertas linguas ch’eran derasadas pli baud en il territori odiern da la Germania èn mortas ora (roman da la Mosel il 11avel tschientaner, polab il 18avel tschientaner) u na vegnan strusch pli duvradas (jiddic).

Il diever dals dialects vegn resguardà da tschertas persunas sco macla, dad autras percunter sco enritgiment cultural. En la Germania dal Nord dovran persunas d’in stadi da furmaziun superiur strusch la lingua bass tudestga u auters dialects, en la Germania dal Sid è percunter il diever dals dialects da la Pfalz, da la Franconia, da la Baviera e da la Svevia u er dals dialects alemanics bundant main stigmatisà, e quai er en tschertgels academics. Quai è segiramain er d’attribuir al fatg ch’il tudestg da standard è sa sviluppà da las varietads da l’aut tudestg (tudestg mesaun e tudestg superiur), uschia ch’il bass tudestg è vegnì stgatschà successivamain a l’ur.

Dapi ch’ils Germans èn immigrads en il territori da la Germania odierna, èn adina puspè arrivads novs immigrants d’autras linguas (per exempel ils Romans en las colonias germanas, ils Huns durant la migraziun dals pievels, ils ughenots en il 17avel tschientaner u ils Polonais da la Ruhr en il 19avel tschientaner). En il fratemp èn ils descendents da questas undas d’immigraziun pli veglias pli u main tuts s’assimilads linguisticamain. Ils immigrants ch’èn arrivads en il decurs dals ultims decennis dovran però savens anc lur atgna lingua; quai vala surtut per il tirc, il russ ed il polonais.

La lingua estra che vegn surtut instruida a las scolas è l’englais, suandà dal franzos, dal latin e dal russ. En il decurs dals ultims onns è er il spagnol daventà adina pli popular ed en ils pajais federativs situads en il nordvest er l’ollandais. La decisiun areguard l’instrucziun da linguas estras cumpeta als ministeris da scola dals singuls pajais.

La Germania garantescha la libertad da religiun sco dretg fundamental. Tenor la constituziun sa declera il stadi neutral en dumondas da la concepziun dal mund e statuescha il dretg d’autodeterminaziun da las singulas cuminanzas religiusas. Facticamain exista ina relaziun da partenadi tranter las cuminanzas religiusas ed il stadi; i na dat pia nagina separaziun stricta da baselgia e stadi sco en il laicissem, mabain entretschaments sin divers champs, sco per exempel en furma d’instituziuns socialas, da scola e caritativas che vegnan manadas da las baselgias, ma cofinanziadas tras il stadi. Medemamain sa refereschan tschertas partidas politicas a la tradiziun cristiana dal pajais. Las baselgias cristianas possedan il status da baselgias uffizialas e furman corporaziuns dal dretg public.

Sco la gronda part da l’Europa Centrala e dal Vest è er la Germania segnada dapi l’antica da la cultura cristian-occidental sco er dapi il 18avel tschientaner dal context illuministic-scientific. Il territori da la Germania odierna è vegnì cristianisà a partir dal temp medieval tempriv. Dal temp dal Reginavel dals Francs ha Carl il Grond terminà questa missiun, e quai per part tras mesiras repressivas. Entaifer il Sontg Imperi roman èsi lura vegnì a l’entschatta dal 16avel tschientaner a la refurmaziun. Quella ha Martin Luther mess ad ir ed ella segna fin oz la cuntrada religiusa entaifer il territori da lingua tudestga.

Radund 60 % da la populaziun appartegnan ad ina confessiun cristiana: a la baselgia catolic-romana 29,5 % (tendenzialmain surtut en il vest ed en il sid dal pajais), a la baselgia evangelica (luterans, refurmads e.a.) 27,9 % (surtut en la Germania dal Nord) ed ad ulteriuras baselgias cristianas (ortodox, testimonis da Jehova, baselgias independentas e.a.) radund 3 %. Il dumber dals cartents che frequentan effectivamain il servetsch divin è bundant pli bass. Il 2009 han uschenumnadas dumengias da dumbraziun mussà che radund 3,8 % da l’entira populaziun dal pajais han visità in servetsch divin catolic e 1,1 % in evangelic.

Radund in terz da l’entira populaziun è senza confessiun; quests radund 27 milliuns furman uschia – en cumparegliaziun cun las singulas confessiuns cristianas – la pli gronda gruppa da la populaziun areguard lur orientaziun religiusa resp. concepziun dal mund. En la Germania da l’Ost giaschan las cumparts da las persunas senza confessiun schizunt tranter 67,7 % e 81,7 %. L’anteriura Republica democratica tudestga aveva propagà ina tenuta ateistica e promovì la sortida da la baselgia. Pervi dal process da secularisaziun general avevan però er ils pajais federativs dal vest gì a partir dals onns 1970 cumparts creschentas da persunas senza confessiun. Quest trend ha er cuntinuà suenter la reunificaziun dal pajais.

La cumpart dals muslims sin l’entira populaziun munta a 4,6 fin 5,2 %. Tut en tut dumbran las cuminanzas islamicas en Germania radund 4 milliuns commembers; da quai èn 45 % burgais tudestgs. Sco uniun tetgala per las numerusas organisaziuns islamicas han ins furmà il Cussegl da coordinaziun dals muslims en Germania.

L’Uniun budistica da la Germania quinta en tut il pajais cun in dumber da 250 000 budists activs (quai che correspunda a 0,3 % da la populaziun); la mesadad dad els èn Asiats immigrads.

Radund 200 000 persunas èn gidieus; da quai è la mesadad organisada en cuminanzas gidieuas. Dapi ils onns 1990 nodan quellas in grond augment tras immigrants ch’arrivan dals anteriurs stadis dal bloc da l’ost, surtut da l’Ucraina e da la Russia. Suenter la Frantscha ed il Reginavel Unì dumbra la Germania la pli gronda cuminanza gidieua da l’Europa.

Tschertas baselgias cristianas e la cuminanza gidieua retiran da lur commembers ina taglia da baselgia, la quala il stadi incassescha cunter in’indemnisaziun e dat vinavant a las baselgias correspundentas (resp. al Cussegl central dals gidieus en Germania).

L’instrucziun da religiun è tenor la constituziun in rom d’instrucziun facultativ, ma tuttina ordinari a las scolas publicas (cun excepziun da singuls pajais sco Bremen, Berlin e Brandenburg).

Las pli veglias cumprovas da colonisaziun sin il territori da la Germania odierna han ina vegliadetgna da radund 700 000 onns. Ina colonisaziun permanenta para d’avair existì dapi ca. 500 000 onns. En Germania èn avant maun impurtants lieus da chat paleoantropologics: tenor la plazza d’exchavaziun sper Heidelberg è vegnida numnada la spezia d’ominins Homo heidelbergensis e tenor il Neandertal a Mettmann la spezia Homo neanderthalensis ch’è sa sviluppada or dal Homo heidelbergensis. Avant ca. 40 000 onns è quella vegnida stgatschada dal Homo sapiens, l’uman modern ch’era immigrà da l’Africa.

L’art pitschen dal temp paleolitic tempriv (cultura d’Aurignacien) ch’ins ha chattà en la Schwäbische Alb, en las taunas da Geissenklösterle, Hohle Fels, Hohlenstein ed en la Vogelherdhöhle appartegnan a las pli veglias ovras d’art figurativ da l’umanitad.

En il decurs dal temp neolitic èn sa sviluppads la cultivaziun dad ers, l’allevament da muvel e plazzas da colonisaziun stablas. Da quel temp èn sa mantegnids intgins impurtants chats sco per exempel la Rudella da tschiel da Nebra che lascha supponer ch’i vegniva gia pratitgà qua l’astronomia avant radund 4000 onns.

Gia a l’entschatta dal temp da Hallstatt (1200–1000 a.C.) vivevan en las parts centralas e meridiunalas da la Germania dad oz stirpas celticas. Vers 600 a.C. è sa sviluppada en la Germania dal Nord la Cultura da Jastorf che vegn resguardada sco cultura germana. L’emprima menziun en scrit da stirpas germanas è da chattar tar auturs grecs e romans a partir da l’emprim millenni a.C. (cumenzond probablamain cun Poseidonios). Ils Germans sezs eran però ina gruppa betg omogena che consistiva da pliras stirpas e che n’era er betg segnada d’in spiert da cuminanza surordinà. Gia tar il term ‹Germans› (latin Germani) sa tracti d’ina noziun collectiva vaira nunprecisa ch’era colliada tar ils auturs antics cun in maletg generalisant da ‹barbars›. La noziun ‹Germans› na dastga pia betg vegnir malchapida sco designaziun per in pievel unitar. Cun ils Celts vivevan ils Germans per il pli sco buns vischins; en la zona da contact al Rain devi per part regiuns en las qualas omadus pievels abitavan ensemen. Sur tschientaners ha existì in contact cultural ed economic; tras quai èn per exempel tscherts pleds d’emprest celtics vegnids integrads en ils dialects germans.

 
Da l’onn 58 a.C. fin ca. 455 s.C. han las parts al vest dal Rain ed al sid dal Danubi appartegnì a l’Imperi roman, da ca. 8 fin 260 s.C. er ina part da Hessen (Wetterau) sco er la gronda part dal Baden-Württemberg odiern al sid dal limes. Ils territoris da la Germania odierna che sa chattavan sut domini roman sa repartivan sin las provinzas Germania superior, Germania inferior e Raetia. En quests territoris han ils Romans erigì bleras basas da legiunaris che duevan sa sviluppar pli tard a citads. Impurtantas citads dal temp dals Romans eran Trier, Cologna, Augsburg e Mainz (che furma la pli veglia citad da la Germania). Ils territoris da la Germania dad oz ch’eran situads ordaifer la sfera d’influenza romana vegnivan numnads entaifer l’Imperi roman Magna Germania u Barbaricum.

Per segirar ils cunfins han ils Romans domicilià en las provinzas stirpas germanas ch’als eran bainvulentas. Ultra da quai èn immigrads ulteriurs colonisaturs d’autras parts da l’Imperi roman, surtut da l’Italia, ed èn sa stabilids en il vest dal Rain ed en il sid dal Danubi. A vastas novaziuns ha l’arrivada dals Romans manà surtut en la construcziun da chasas, en l’artisanat, en l’agricultura e viticultura sco er en l’administraziun ed en il militar; per part sa manifesteschan questas influenzas er en il vocabulari tudestg. L’ovra ‹Germania› da Tacitus ch’è cumparida l’onn 98 furma la pli veglia descripziun etnologica da las stirpas germanas. La Battaglia da Varus en il Guaud da Teutoburg l’onn 9 s.C. ha purtà als Romans ina terrada dolurusa. A lur tentativas d’eriger provinzas da la vart dretga dal Rain fin a l’Elba han ils Romans la finala stuì renunziar.

Suenter l’invasiun dals Huns l’onn 375 e la fin da l’Imperi roman occidental (a partir dal 395) cumenza il temp da la migraziun dals pievels. En il decurs da quella èn las stirpas germanas arrivadas adina pli lunsch vers sidvest. A medem temp han cumenzà a sa furmar en il territori da la Germania pliras colliaziuns pli grondas da pievels germans: ils Francs ed Alemans en il vest, ils Saxons en il nord, ils Bavarais en il sid ed ils Turings en l’ost. Quellas èn cun il temp sa messas tras envers las stirpas pli pitschnas dal temp dals imperaturs romans. Ils territoris da la Germania da l’Ost eran da quel temp strusch populads; en quels èn immigrads a partir dal 7avel tschientaner fin a la lingia Elba-Saale pievels slavs. Grondas parts da la populaziun dals stadis federativs da la Germania da l’Ost odierna han damai gì fin en il temp autmedieval ina ferma tempra slava (Germania Slavica). Pir cun la colonisaziun dals Germans vers ost ch’ha gì lieu en il decurs dal temp autmedieval èn els vegnids assimilads ed acculturads. La part principala da l’Europa dal Vest e da l’Europa Centrala, e cun quai er la gronda part da la Germania dals Sid e dal Vest, è vegnida incorporada a partir dal 6avel tschientaner en il Reginavel dals Francs, entant che la Germania dal Nord vegniva dominada dals Saxons e Slavs. Tut las parts da l’anteriur Reginavel dals Francs che fan oz part da la Germania appartegnevan a la part orientala dal Reginavel che vegniva numnada dapi il temp dals Merovings Austrasia. Ina tscherta independenza statala da l’Austrasia è sa manifestada l’emprima giada l’onn 614, cura ch’il retg Chlothar II ha stuì suttascriver l’Edictum Chlotharii; en quest document è vegnì fixà che mintgina da las trais parts dal reginavel (Neustria, Austrasia, Burgognia) suttastettia ad in auter administratur.

Vers la mesadad dal 8avel tschientaner ha la dinastia dals Carolings surpiglià la successiun roiala dals Merovings. Da quel temp ha gì lieu la submissiun sanguinusa e cristianisaziun sfurzada dals Saxons sco er la conquista da l’Italia, da la Spagna dal Nord e dal territori da cunfin en l’ost. Sut Carl il Grond tanscheva il Reginavel dals Francs pia da las Pireneas fin la Mar dal Nord e da l’Austria odierna fin en l’Italia Centrala. Il stadi multinaziunal è vegnì organisà da nov, sin il champ da l’organisaziun da las baselgias e da la cultura èn ins sa referì parzialmain a tradiziuns romanas ed ha accelerà la promoziun da la cultura (uschenumnada renaschientscha resp. refurma da la furmaziun
carolingica). Arrivà sin il zenit, ha il Reginavel francon pretendì il domini en l’Europa dal Vest e dumandà da surpigliar en questa funcziun la successiun da Roma en furma da la translatio imperii. Da Nadal l’onn 800 ha papa Leo III curunà a Roma Carl il Grond sco imperatur roman, quai ch’ha manà a cuntraversas cun l’imperatur bizantin. Suenter la mort da Carl il Grond l’onn 814 èn proruts a l’intern da la dinastia cumbats areguard la successiun. Quai ha manà en il Contract da Verdun (843) a la tripartiziun factica dal Reginavel en il Reginavel francon da l’ost sut Ludivic (numnà pli tard ‹il Tudestg›), il Reginavel francon dal vest sut Carl il Chalv ed il reginavel da Lothar situà tranteren ch’è vegnì numnà Lotharingia.

Entaifer il Reginavel ostrofrancon èn sa furmads vers il 900 tschintg gronds ducadis che sa refereschan en lur nums per ordinari als vegls pievels vestgermans: la Saxonia, la Baviera, la Svevia, la Franconia e la Lorena (a la quala appartegnevan er ils Fris).

En il 10avel tschientaner è la dinastia regenta dals Carolings morta ora tant en il Reginavel ostrofrancon sco er en la part occidentala. Tras quai èn las duas parts da l’anteriur Imperi idas politicamain definitivamain vias separadas. In grond gudogn da prestige per il retg ostrofrancon Otto ha muntà la victoria en la Battaglia da Lechfeld l’onn 955. Quella ha terminà las irrupziuns dals Magiars dals ultims decennis e manà a l’attribuziun da l’archanghel Michael sco patrun protectur dals Tudestgs. 

 
En la perscrutaziun istorica pli nova vegn bain punctuada la muntada dal temp dals Ottons per il svilup dal Reginavel ostrofrancon; ma quest temp na vala betg pli exnum sco cumenzament da l’istorgia imperiala ‹tudestga› sco tala. Anzi ha il process cumplex che dueva manar a quella perdurà almain fin en il 11avel tschientaner. Il term regnum Teutonicum (‹reginavel tudestg›) resp. regnum Teutonicorum (‹reginavel dals Tudestgs›) è er pir sa mess tras plaunsieu dapi l’entschatta dal 11avel tschientaner. 

L’onn 951 aveva Otto I surpiglià la dignitad roiala dals Langobards; tras quai è il Regnum Teutonicorum stà collià cun il Regnum Italiae u Regnum Italicum. L’onn 962 è Otto vegnì curunà sco imperatur ed ha collià cun quai la pretensiun da la roialitad tudestg-romana sin la dignitad imperiala dal vest. Sut ils Ottons ha il Reginavel cuntanschì ina posiziun egemoniala entaifer l’Europa dal Vest. Il 1024 han alura ils Saliers surpiglià la successiun roiala. Il fatg che la pussanza seculara e quella spirituala eran entretschadas fitg ina en l’autra, ha manà da quel temp al conflict cun il papat (Dispita d’investitura). Quel ha cumenzà vers il 1076 ed ha chattà ina schliaziun intermediara en il Concordat da Worms dal 1122. Sco punct culminant vala il Viadi a Canossa legendar dal 1077. In’ulteriura culminaziun ha la dispita tranter l’imperatur ed il papa cuntanschì dal temp dals Staufers. L’imperatur Friedrich I ha bain accentuà la dignitad da l’Imperi ed implorà la honor imperii; ma la finala ha el stuì prender en cumpra en l’Italia grevas sperditas tant envers il papat sco er envers las citads-stadis che vegnivan adina pli conscientas da sasezzas. Il conflict il pli ferm tranter l’imperatur ed il papa è prorut sut il biadi da Friedrich, Friedrich II; la mort da l’imperatur il 1250 ha facticamain muntà la fin da la pussanza roiala dals Staufers.

Sinaquai èn divers dominis feudals sa fatgs facticamain autonoms en furma da stadis territorials, indeblind uschia vinavant la pussanza imperiala e roiala. Ins sto però vesair che quella n’era mai stada sviluppada fitg ferm e ch’ils retgs dal temp medieval èn stads da tut temp dependents dal consens cun ils gronds entaifer l’Imperi per pudair exequir lur pussanza a moda effizienta. L’imperatur Heinrich VI, il figl da Friedrich Barbarossa, aveva gia fatg naufragi la fin dal 12avel tschientaner cun vulair introducir la monarchia ereditara. Entant ch’il Reginavel francon dal vest è sa sviluppà en il decurs d’in lung process al stadi central franzos, èn il Reginavel ostrofrancon resp. l’Imperi tudestg-roman stads segnads da tut temp dals signurs feudals e dal dretg d’eleger il retg. La posiziun da pussanza dals prinzis è be anc creschida en consequenza da l’interregnum. Vers la mesadad dal 13avel tschientaner è sa fatga valair en il Sontg Imperi roman – ina denominaziun ch’è dal reminent vegnida currenta pir da quel temp – l’opiniun che l’elecziun dal retg cumpetia ad in collegi da prinzis electurs. La Bulla dad aur dal 1356 ha fixà definitivamain la furma statala sco monarchia d’elecziun a basa dals prinzis electurs. Cumbain ch’ils retgs ed imperaturs han empruvà repetidamain da rinforzar lur posiziun, è l’Imperi restà ina federaziun supranaziunala che cumpigliava territoris gronds e mesauns sco er blers pitschens e fitg pitschens e citads imperialas libras.

Cuntrari a la perscrutaziun pli veglia na vegn il temp medieval tardiv (ca. 1250–1500) betg pli giuditgà da l’istoriografia pli nova sco temp da declin. Il temp enfin la fin dal 14avel tschientaner è stà segnà fermamain dal dretg d’eleger il retg: trais grondas famiglias, ils Habsburgais, ils Luxemburgais ed ils Wittelsbacher, disponivan da la pli gronda influenza en l’Imperi e da la pli gronda pussanza dinastica. Sco pli impurtant retg tudestg-roman dal temp medieval tardiv vala Karl IV. Sper crisas sco la pestilenza (mort naira) vers la mesadad dal 14avel tschientaner, la crisa agrara ed il Schisma occidental è il temp tuttavia er segnà da las citads flurintas, dal commerzi e da la transiziun en direcziun da la renaschientscha. La finala han ils Habsburgais surpiglià la successiun dals Luxemburgais, ils quals eran morts ora il 1437 en la lingia masculina, ed han tschentà fin la fin da l’Imperi quasi senza interrupziun ils retgs tudestg-romans.

A l’entschatta dal temp modern ha l’imperatur Karl V or da la dinastia dals Habsburgais persequità cun diriger l’Imperi ed il Reginavel spagnol il concept d’ina monarchia universala. El ha cuntanschì ina sfera d’acziun che cumpigliava sper la predominanza en l’Europa er in reginavel colonial spagnol d’ultramar. Il 1517 è Martin Luther passà si cun la pretensiun da refurmar da fund ensi la baselgia ed ha uschia mess il fundament per la refurmaziun. En cumbinaziun cun la tenuta ch’era en vastas parts antiromana (antipapala) han las dispitas areguard dumondas teologicas e las structuras da la baselgia manà a la fundaziun da numerusas confessiuns protestantas. La baselgia catolica ha bain reagì en furma da la cuntrarefurmaziun, ma tuttina ha la baselgia evangelica pudì sa mantegnair en vastas parts da l’Imperi. Bainbaud dueva il signur territorial decider davart la confessiun da ses subdits (cuius regio, eius religio) e la Pasch da religiun e da l’Imperi d’Augsburg ha pudì stgaffir in equiliber provisoric. Ma alura è suandada la Guerra da trent’onns (1618–1648) ch’ha chaschunà bleras unfrendas e devastà numerusas cuntradas. Quella era prorutta tant pervi da motivs confessiunals sco er pervi da differenzas tranter Habsburg e la Frantscha. Da la Pasch vestfalica e da la Dieta imperiala la pli giuvna è l’Imperi tudestg-roman resortì en ina posiziun cleramain flaivlentada; sia posiziun da pussanza sa restrenscheva uss pli u main a la represchentaziun da l’Imperi. Ils prinzis imperials èn percunter resortids da quest conflict cun dapli forza; a chaschun da la Pasch vestfalica als era numnadamain vegnì transferì il dretg da far contracts cun pussanzas da l’exteriur. De facto è l’Imperi daventà tras quai in stadi federativ. Durant la guerra aveva la Frantscha sustegnì ils protestants per flaivlentar ils Habsburgais; ultra da quai ha il pajais fatg ina politica d’expansiun intenziunada en il territori da cunfin ed occupà plirs territoris da l’Imperi, quai ch’ha danovamain manà a tensiuns. A partir dal 1663 han l’imperatur ed ils prinzis imperials alura reglà lur fatschentas politicas a moda permanenta en furma da deputaziuns a la Dieta imperiala eterna cun sedia a Regensburg.

En il decurs dal 18avel tschientaner è la Prussia avanzada politicamain, quai ch’ha manà al conflict cun la chasa da Habsburg. En il 17avel/18avel tschientaner è sa sviluppà l’absolutissem tenor il model franzos. Cuntrari a la pussanza centrala roiala en Frantscha dueva quel però transfurmar qua singuls principadis en stadis premoderns organisads tenor princips birocratics. Intgins regents, surtut retg Friedrich II da la Prussia, ma per part er ses rivals imperials Maria Theresia, Franz I ed Joseph II èn s’averts al spiert dal temp filosofic (absolutissem illuminà).

Questa situaziun ha perdurà fin il 1806, cura che Napoleun I ha conquistà l’Europa Centrala ed ha fatg ir en muschna las restanzas da l’Imperi flaivlentà. Il davos imperatur dal Sontg Imperi roman il qual existiva be pli formalmain, Franz II – ch’era er daventà il 1804 imperatur dal stadi multinaziunal austriac fundà dad el sez –, ha demissiunà ils 6 d’avust 1806. Tras quai ha l’Imperi chalà d’exister.

 
Sut pressiun da Napoleun è il dumber da stadis entaifer il territori dal ‹Vegl Imperi› sa reducì tranter il 1801 ed il 1806 da radund 300 sin ca. 60. Quest svilup ha gì lieu en differents pass ch’han cumpiglià la Pasch da Lunéville dal 1801, il Recess da la Dieta imperiala dal 1803 e l’Acta da la Confederaziun dal Rain dal 1806. Parts da la Germania, surtut en il vest e nordvest, ha la Frantscha annectà ils onns 1790 fin 1793, 1797 fin 1801, 1806, 1808 e 1811. Ultra da quai ha la Frantscha endrizzà stadis vasals sco per exempel il Reginavel da Vestfalia, il Gronducadi da Berg ed il Gronducadi da Francfurt; ils trons da quests dominis ha Napoleun occupà cun commembers da sia famiglia. Stadis tudestgs pitschens e mesauns ha el lià a sia pussanza cun als accordar extensiuns territorialas a donn e cust dals anteriurs territoris ecclesiastics, da citads imperialas e d’auters stans ch’eran suttamess directamain a l’Imperi. Profità da quest process han surtut la Baviera, il Württemberg e Baden.

Suenter avair victorisà sur l’Austria en la Guerra d’Austerlitz (1805) ha Napoleun pudì extender supplementarmain si’influenza en Germania. Ils stadis mesauns ch’ins aveva engrondì èn vegnids unids en la Confederaziun dal Rain e stevan uschia a disposiziun sco alliads. Il resultat da quai è stà che la Frantscha aveva eliminà il rival d’enfin qua, il Sontg Imperi roman, ch’ella aveva annectà grondas parts da sia surfatscha e spartì l’ulteriur territori grosso modo en trais parts: la Confederaziun dal Rain, la Prussia e l’Austria.

Quest temp da la predominanza franzosa ha purtà als stadis da la Confederaziun dal Rain impuls da modernisaziun essenzials, uschia per exempel en la Baviera sut il minister Maximilian von Montgelas. Ina tscherta independenza han pudì mantegnair ils concurrents Austria e Prussia ch’eran però vegnids smuttads malamain. Er en la Prussia èn suandadas a la fin catastrofala da la Battaglia sper Jena ed Auerstedt (1806) refurmas fundamentalas che duevan puspè render il stadi abel d’agir e da sa defender.

A partir dal 1809 è sa fatga sentir la resistenza encunter l’occupaziun franzosa. Enconuschents cumbattants cunter Napoleun e ses alliads èn stads Andreas Hofer en il Tirol austriac, ch’era uss però occupà da la Baviera, e Ferdinand von Schill en la Prussia. A l’entschatta è questa resistenza vegnida rebattida. Pir suenter la sconfitta da Napoleun a chaschun da sia campagna militara en Russia (1812) èsi reussì a la Prussia ed a l’Austria da s’alliar cun la Russia e da stgatschar las truppas franzosas. En il decurs da las Guerras da liberaziun (1813–1815) è naschì in nov spiert da cuminanza dals Tudestgs. Quel è surtut provegnì dals docents e students da las universitads protestantas sco per exempel dal corp da voluntaris da Lützow, il qual vala er sco origin da las colurs nair-cotschen-aur. La gronda part dals stadis da la Confederaziun dal Rain han midà vart en il decurs dal 1813. In emprim grond success dals alliads è stà la victoria en la Battaglia da Lipsia l’october 1813. Igl èn suandads ulteriurs cumbats fin a la sconfitta definitiva da Napoleun il 1815.

Suenter la fin da l’èra napoleonica ha il Congress da Vienna (1814–1815) restaurà per gronda part las veglias relaziuns da pussanza monarchicas. Entaifer la Confederaziun tudestga, ina federaziun che vegniva dominada da l’Austria e da la Prussia, èn s’organisads en tut 38 stadis. La Dieta (Bundestag) cun sedia a Francfurt furmava il gremi da decisiun. Ils onns 1833/1834 è vegnida fundada l’Uniun da duana tudestga, entaifer la quala la Prussia furmava la pussanza dominanta.

Durant l’èra dal Vormärz ha l’auta aristocrazia fatg valair sia pussanza; quella dueva culminar en ils Decrets da Karlsbad ch’èn stads segnads da restauraziun e repressiun. La burgaisia daventava però economicamain adina pli pussanta e n’ha betg tschessà da far valair sia participaziun politica.

L’october 1817 èn professers e students sa scuntrads a la Festa da Wartburg. Sco ‹punct culminant› da quella han ins brischà ovras d’auturs ch’eran cunter in stadi tudestg sco per exempel August von Kotzebue. A la Festa da Hambach dal 1832 èn sa reunidas 30 000 persunas or da differents circuls da la populaziun e da differents stadis. Qua èn vegnidas tratgas si las colurs nair-cotschen-aur che duevan daventar pli tard las colurs naziunalas.

Cun l’occupaziun da la chasa dals stans da la Dieta da Baden a Karlsruhe è prorutta il prim da mars 1848 la Revoluziun da mars. Tras las revoltas dals burgais han blers politichers conservativs stuì rumir lur posts. Uschia er il chancelier statal austriac prinzi Metternich; suenter la fin da Napoleun aveva quel gidà a restaurar la veglia monarchia (a chaschun dal Congress da Vienna) ed aveva marcà dapi lura l’epoca restaurativa.

Sut il squitsch dals eveniments revoluziunars a Berlin dapi ils 6 da mars 1848 ha il retg prussian Friedrich Wilhelm IV l’emprim fatg concessiuns ed acceptà l’installaziun da l’assamblea naziunala a Francfurt. Quella ha elavurà la constituziun da la Baselgia da Paulus ch’avess transfurmà la Germania en ina monarchia constituziunala unida. Il retg l’ha però refusà. Medemamain n’ha el betg vulì acceptar la curuna imperiala ch’al è vegnida proponida da questas varts; per il retg aveva quella il tif d’ina ‹curuna da lumpas› burgaisa.

La revolta dal matg 1849 è vegnida abattida ed è ida a fin ils 23 da fanadur dal medem onn cun l’occupaziun da Rastatt tras truppas prussianas.

Curt suenter èn la Prussia e la pussanza gronda Austria vegnidas en dispita areguard la supremazia entaifer la Confederaziun tudestga. Quest conflict ha manà il 1866 a la Guerra austriac-prussiana (ch’è per part er vegnida numnada pli tard ‹Guerra tudestga›). Suenter ch’igl era reussì a la Prussia da decider questa guerra a sia favur, è la Confederaziun tudestga vegnida schliada. La Prussia ha annectà divers territoris d’adversaris da guerra en la Germania Centrala e dal Nord, uschia ch’il dumber dals stadis tudestgs è sa sminuì supplementarmain.

Il 1866 è sa furmada la Confederaziun da la Germania dal Nord ch’aveva a l’entschatta il caracter d’ina allianza militara. Quella han ins munì il 1867 cun ina constituziun che l’ha transfurmà en in stadi federativ. Cura che questa confederaziun è sa constituida il prim da fanadur 1867 sco stadi cumplessiv suveran sut direcziun da la Prussia, è sa cristallisada la Kleindeutsche Lösung. Tenor l’intenziun dal bab fundatur da la Germania da pli tard, Otto von Bismarck, dueva quella unir ils stadis singuls tudestgs sut la supremazia prussiana, ma senza integrar la pussanza gronda Austria.

 
Ils onns 1870/71 ha gì lieu la Guerra franzos-tudestga. Suenter la sconfitta decisiva da la Frantscha en la Battaglia sper Sedan è vegnì proclamà l’Imperi tudestg. Cun quest pass è stada colliada la proclamaziun dal retg prussian Wilhelm I sco imperatur tudestg ils 18 da schaner 1871 en la Galaria dals spievels a Versailles. Quai ha muntà la fundaziun uffiziala da l’emprim stadi naziunal tudestg.

Cun la fundaziun da l’Imperi han ins incorporà territoris che n’avevan avant insumma betg fatg part da l’anteriur Sontg Imperi roman u ch’eran dapi daditg betg pli stads integrads en quel. Quai ha pertutgà parts da la Prussia dal Vest e da l’Ost, la regiun da Posen ch’era per gronda part da lingua polonaisa sco er la regiun Schleswig. La Frantscha ha cedì parts (bilinguas) da las regiuns Lorena ed Alsazia. Quellas han ins integrà sco territoris suttamess directamain a l’Imperi; ellas na disponivan pia betg dals dretgs dals stadis commembers ordinaris. 

Sco primminister prussian era Otto von Bismarck s’engaschà per la fundaziun da l’Imperi, aveva contribuì a moda essenziala a concepir la constituziun da l’Imperi ed è uss daventà l’emprim chancelier da l’Imperi. Sia politica ha bain sustegnì la pussanza dal stadi monarchic, ha però modernisà impurtants champs da la politica ed è stada ambivalenta en tschertas dumondas. Cun il Reichstag è sa furmà l’emprim parlament da la Germania munì cun funcziunalitad cumplaina e lianta. Cunter la baselgia catolica ha Bismarck manà in uschenumnà cumbat cultural, en consequenza dal qual schizunt uvestgs èn vegnids mess en fermanza. Dal cuntegn ennà eran las leschas ch’èn entradas en vigur durant ses temp d’uffizi savens plitost liberalas (p.ex. concernent la scola u la lètg). Per pudair maiorisar en avegnir ils liberals, ha Bismarck introducì tar elecziuns dal parlament il dretg d’eleger democratic per tut ils umens. Da l’autra vart èn ils naziunalliberals stads sur lung temp ils partenaris da Bismarck. Dapi il 1878 ha el cumbattì ils socialdemocrats cun agid da las leschas socialas, sa stentond però a medem temp da liar ils lavurants al stadi cun agid d’ina legislaziun sociala da tempra moderna.

Oriundamain era Bismarck enconuschent per sia politica da l’exteriur agressiva. Dapi la fundaziun da l’Imperi ha el però midà quella en ina politica da coaliziun ch’ha stgaffì in sistem d’allianzas defensiv cun la Germania sco pussanza mezegemoniala en il center da l’Europa. La Frantscha è vegnida isolada ed intimada da sa concentrar sin sias colonias (e betg sin las regiuns da la Lorena ed Alsazia persas).

Envers l’idea da s’acquistar atgnas colonias e pli tard uschenumnads territoris da protecziun aveva Bismarck percunter ina tenuta sceptica. Pervi da difficultads economicas e la politica coloniala da commerziants tudestgs èsi tuttina vegnì adaquella ch’ina gruppa da Tudestgs ha attribuì a chaschun da la Conferenza dal Congo l’onn 1884 a Berlin parts da l’Africa a la Germania. Uschia è l’Imperi tudestg entrà en il circul da las pussanzas colonialas, quai suenter ch’organisaziuns tudestgas avevan gia acquistà a l’entschatta dals onns 1880 territoris en l’Africa ed en l’Asia.

Il 1888, l’uschenumnà ‹onn dals trais imperaturs›, è Wilhelm II vegnì a la pussanza. Il 1890 ha el sfurzà Bismarck da sa retrair; per l’Imperi tudestg ch’era avanzà tant economicamain sco er militarmain ha el pretendì la renconuschientscha da vart da las pussanzas grondas da fin qua, surtut da l’Engalterra. Quai è savens vegnì exprimì a moda energica cun pretender per la Germania ina «plazza al sulegl» equivalenta; l’acquist da colonias è s’augmentà e medemamain ha la Germania extendì massivamain la flotta. Da quai è l’Engalterra stada pauc intgantada, uschia ch’igl è sa furmà in nov sistem d’allianzas ch’excludeva uss la Germania enstagl da la Frantscha. L’attentat sin il successur al tron austriac Franz Ferdinand ha mess ad ir il 1914 l’Emprima Guerra mundiala. Wilhelm II aveva garantì a ses partenari d’allianza Austria-Ungaria ses sustegn senza resalva, avant che quel ha declerà a la Serbia la guerra. A medem temp aveva la Frantscha empermess durant la Crisa da fanadur a la regenza russa ses sustegn e pretendì persuenter ch’ils Russ avanzian svelt en direcziun da l’Imperi tudestg. Dapli che dus milliuns schuldads tudestgs èn vegnids per la vita durant l’Emprima Guerra mundiala; radund 800 000 civilists èn morts da la fom.

 
Cun la capitulaziun tudestga l’onn 1918 e la Revoluziun da november n’è betg be ida a fin l’Emprima Guerra mundiala, mabain er la monarchia en l’Imperi tudestg. Il Contract da Versailles ha adossà a la Germania cessiuns da territori massivas, l’occupaziun da la Renania tras ils alliads e gronds custs da reparaziun, quai surtut perquai che la Germania è vegnida declerada sco pajais che saja sco sulet la culpa da la guerra.

Cun la proclamaziun da la Republica ils 9 da november 1918 ha l’Imperi chalà d’exister. Ils 30 da november 1918 è vegnida concedida l’emprima giada a las dunnas il dretg da votar activ e passiv (a chaschun da l’elecziun da l’assamblea constituenta). La regenza revoluziunara che sa cumponiva da democrats socials da dretga e da sanestra è sa numnà Cussegl dals deputads dal pievel. Suenter l’elecziun da l’assamblea naziunala constituenta è entrada en vigur ils 14 d’avust 1919 la Constituziun da Weimar.

La dumonda da la culpa da guerra e l’ipoteca dals pajaments da reparaziun han engrevgià da l’entschatta ennà il clima politic en la giuvna Republica. L’extrema dretga ha derasà la legenda dal culp da stilet ch’ha manà ad assassinats politics e tentativas da far in putsch, da las qualas il Putsch da Kapp (1920) ed il Putsch da Hitler-Ludendorff (1932) èn stadas las pli impurtantas. Exponents centrals da las forzas democraticas sco Matthias Erzberger e Walther Rathenau èn vegnids assassinads d’attentaders naziunalistics. L’emprim chancelier da l’Imperi, Philipp Scheidemann, è be mitschà per pauc d’in attent la dumengia da Tschuncaisma 1922. Da l’autra vart hai dà diversas sullevaziuns da vart da communists sco la Revolta da la Ruhr (1920), ils Cumbats da mars en la Germania Centrala (1921) e la Revolta da Hamburg (1923). Perquai che la Republica da Weimar era en retard cun las prestaziuns da reparaziun, han la Belgia e la Frantscha er occupà ils onns 1923 fin 1925 il territori da la Ruhr.

Ils curts ‹onns dad aur› suenter il 1920 han manà ad ina fluriziun culturala e suenter il 1924 er ad in augment da la conjunctura. Berlin era da quel temp cun bundant 4 milliuns abitants la terz gronda citad dal mund (suenter New York e Londra) ed è sa sviluppà ad ina da las metropolas las pli dinamicas insumma.

Questa fasa da prosperitad ha chattà ina fin andetga l’onn 1929 cura che la bursa da New York è dada ensemen. Durant la culminaziun da la crisa economica mundiala devi il 1932 en Germania dapli che 6 milliuns dischoccupads che vivevan per gronda part en miseria. En consequenza da quai han partidas extremas chattà adina dapli sustegn, uschia ch’igl è daventà pli e pli grev per las partidas moderadas da furmar regenzas stabilas. A chaschun da las elecziuns en il Reichstag l’onn 1930 han ils naziunalsocialists cuntanschì ina victoria surprendenta. Sinaquai na disponivan ils chanceliers da l’Imperi, che midavan savens, da nagina maioritad pli. Ils uschenumnads cabinets presidials eran uss dependents dal president da l’imperi Paul von Hindenburg e da las ordinaziuns d’urgenza da quel.

La politica da spargn e da deflaziun dal chancelier da l’imperi Brüning ha anc engrevgià la crisa economica. Ses successur Franz von Papen (zercladur fin november 1932) ha suttamess la regenza democratica da la Prussia ad in cumissari imperial ed ha fatg manar tras novas elecziuns. Quellas han mo anc augmentà la pussanza dals naziunalsocialists. Il chancelier da l’imperi Kurt von Schleicher ha empruvà da prevegnir cun ina ‹front a travers› (che sa cumponiva dals sindicats e da parts dals naziunalsocialists) ad ina surpigliada da la pussanza tras Adolf Hitler. El ha però fatg naufragi perquai che Franz von Papen è vegnì da surmanar Hindenburg – malgrà sia gronda resistenza – d’eleger Hitler sco chancelier da l’imperi.

La regenza da Hitler dals 30 da schaner 1933 è l’emprim stada ina coaliziun da naziunalsocialists cun parts dals conservativs, tranter quels Franz von Papen ed Alfred Hugenberg. Ils 27 da favrer 1933 è brischà il Reichstag per motivs che n’èn fin oz betg sclerids dal tut. Hitler ha nizzegià quest incendiament per relaschar ordinaziuns ch’han mess ord vigur ils dretgs fundamentals per in temp nunfixà. Las arrestaziuns en massa d’adversaris politics (surtut da communists e socialdemocrats) ch’èn suandadas han marcà il temp avant l’elecziun en il Reichstag dal 1933. Malgrà che la Partida naziunalsocialistica (NSDAP) ha gudagnà bleras ulteriuras vuschs, ha ella manchentà il pli absolut ed ha perquai furmà ina coaliziun cun la Partida populara naziunala (DNVP) da caracter reacziunar. La surpigliada da la pussanza definitiva ha gì lieu tschintg dis pli tard: cun sustegn da las vuschs burgaisas, sulettamain cunter las vuschs dals socialdemocrats, ha il Reichstag ch’era sa cumponì da nov deliberà ina lescha d’autorisaziun ch’ha concedì a la regenza da Hitler da concluder davart leschas er senza il Reichstag.

 
Entaifer curt temp ha la NSDAP erigì en il Reich tudestg in stadi d’ina partida totalitar sut la direcziun dad Adolf Hitler. Persunas malvesidas èn vegnidas exclusas da tut las organisaziuns statalas. Ins ha installà emprims champs da concentraziun per allontanar inimis politics, surtut communists, socialdemocrats e sindicalists. In’entira retscha da directivas ha procurà che l’opiniun publica vegnia unifurmada en il senn da la NSDAP. Publicaziuns malvesidas han ins allontanà, per exempel cun brischar publicamain cudeschs. Er il manaschi d’art è vegnì mess en lingia tenor ils basegns da la partida; objects d’art malvis valevan da qua davent sco ‹art degenerà›. Entaifer curt temp è la partida er penetrada en la vita privata: il ministeri da propaganda sut l’egida da Joseph Goebbels era omnipreschent e gia sin uffants vegniva fatg pressiun d’entrar en las organisaziuns da partida. 

Persunalmain è Hitler sa segirà cun laschar assassinar inimis a l’intern da la partida ed anteriurs cumpogns. A chaschun dal Putsch da Röhm presumtiv ha el laschà assassinar ils 30 da zercladur 1934 il manader da la SA Röhm ed ina retscha d’inimis politics a l’intern; tras quai è er la SA vegnida privada da la pussanza. A ses lieu ha el tschentà la SS ch’al obediva senza resalva sco er la Reichswehr, da la quala la generalitad prestava ad el persunalmain il sarament da fidaivladad. La Gestapo è vegnida installada sco polizia politica cun l’incumbensa da cumbatter ils adversaris politics ed ideologics.

Da l’entschatta davent ha Hitler persequità duas finamiras: d’ina vart ina guerra d’attatga e da destrucziun per stgaffir en l’ost nov ‹spazi da viver›; da l’autra vart la persecuziun dals Gidieus ch’ha cumenzà cun discriminaziun, umiliaziun ed exclusiun e che dueva ir a finir en il holocaust. Suenter che Hitler aveva s’atschertà la fidaivladad dal militar, ha el gia cumenzà il 1934 a drizzar ora l’economia sin il stadi da guerra. Las expensas d’armaziun èn vegnidas augmentadas extremamain, e quai entaifer curt temp. Ils instruments politic-economics per cuntanscher questa finamira han furmà programs da lavur, ina politica da daners expansiva e l’economia da debits. Tras quai è il dumber da dischoccupads sa sbassà, quai ch’ha sveglià tar la populaziun l’impressiun sco sche las empermischuns electoralas vegnian tegnidas.

La situaziun dals Gidieus tudestgs è sa pegiurada cuntinuadamain. Il 1935 èn entradas en vigur las Leschas da razza da Nürnberg; quellas han stigmatisà contacts persunals tranter «arians» e Gidieus sco «vargugna da la razza» ed han previs per quest cas grevas puniziuns. Ils Gidieus han l’emprim pers tut ils uffizis publics, èn vegnids persequitads e mess sut pressiun e la finala suttamess ad in scumond da lavur absolut. Sut il pretext da l’«arianisaziun» èn tut las interpresas gidieuas vegnidas expropriadas. Adina pli savens èn uss er Gidieus vegnids tramess en champs da concentraziun. Blers èn sa resolvids d’emigrar, la gronda part però è restada en Germania perquai ch’els sa sentivan sco Tudestgs e na vulevan betg bandunar lur patria.

La concepziun dal mund dals naziunalsocialists sa basava sin in punct da vista rassistic ed intendeva da stgaffir ina cuminanza (Volksgemeinschaft) «sauna» e libra da crims. Da questas intenziuns èn er stadas pertutgadas duas ulteriuras gruppas da la populaziun che vegnivan resguardadas «da razza estra»: ils Roma sco er commembers da las etnias slavas sco Polonais, Russ u Ucranais. Bain betg «da razza estra», ma tuttina sco in privel entaifer la gruppa da la populaziun tudestga èn vegnids resguardads ils omosexuals, ils impedids e las numerusas gruppas dals «asocials»; er els èn stads exposts a repressiuns, violenza ed omicidis.

Entant ha il reschim celebrà intgins success da propaganda. Il 1935 ha il Saarland votà a favur dal return en il Reich ed è vegnì incorporà; il 1936 han ils gieus olimpics meglierà la reputaziun a l’exteriur ed il medem onn ha il Reich puspè occupà la Renania demilitarisada. L’expansiun agressiva sur ils cunfins tudestgs ora ha cumenzà cun l’annexiun da l’Austria l’onn 1938, la quala è vegnida beneventada da grondas parts da la populaziun. Sinaquai è la Germania sa numnada ‹Grossdeutsches Reich› (uffizialmain dapi il zercladur 1943). Cun agid da la Cunvegna da Minca ha Hitler cuntanschì il november 1938 l’annexiun da las Sudetas ch’eran populadas surtut da Tudestgs. 

L’entschatta da mars 1939 è la Germania marschada en la part restanta da la Tschechia ed ha attribuì quest territori al Reich sco Protectorat Boemia e Moravia. Ultra da quai è la Lituania vegnida necessitada da dar enavos il Memelland. Pir uss han ils auters stadis realisà il sbagl ch’els avevan fatg cun lur politica da pacificaziun (appeasement).

Suenter che la Germania aveva cumenzà il prim da settember 1939 ad attatgar la Pologna, han il Reginavel Unì e la Frantscha declerà a la Germania la guerra. La Segunda Guerra mundiala ha chaschunà en sis onns radund 55 fin 60 milliuns morts. Cun ina seria d’acziuns che duevan entrar en l’istorgia sco Blitzkrieg ha la Germania cuntanschì a l’entschatta gronds success militars. L’emprim è la Pologna vegnida dividida confurm al Patg da nunagressiun tranter Hitler e Stalin; silsuenter è l’armada tudestga sa vieuta vers vest, ha attatgà ils stadis neutrals Luxemburg, Belgia e Pajais Bass ed ha occupà en l’interval da sis emnas la Frantscha. Da quel temp ha la popularitad da Hitler a l’intern dal pajais cuntanschì sia culminaziun. La sfera d’influenza dal Reich tudestg tanscheva uss da l’Alsazia (resp. da l’Atlantic) enfin a Cracovia.

Cun l’entschatta da la guerra è er sa pegiurada la situaziun dals Gidieus e da tut las minoritads che vegnivan persequitadas. Ins ha relaschà in scumond da bandunar il pajais, ils Gidieus èn vegnids dischlocads en ghettos e stuevan purtar la «staila da Gidieus » (a partir da l’atun 1939 en la Pologna occupada ed a partir da l’atun 1941 en l’entir Reich). Ad els è vegnida adossada lavur sfurzada a favur da l’economia da guerra, e quai cun in’alimentaziun manglusa e sut nauschas cundiziuns igienicas. Blers èn morts da spussada, da la fom, da maltractaments u dad epidemias.

L’onn 1941 ha cumenzà il mazzament sistematic dals Gidieus – la data precisa u in cumond singul correspundent da vart da Hitler n’èn betg enconuschents. La Conferenza da Wannsee dal schaner 1942 ha reglà la vart organisatorica da quest crim cunter l’umanitad. Cun l’execuziun da tal è surtut stada incumbensada la SS. Quella ha erigì sin il territori da l’anteriura Pologna u Uniun sovietica champs d’extirpaziun. La gronda part da las unfrendas vegniva manada en quels en vaguns da muaglia e gasifitgada immediatamain. Tut en tut munta la cifra cumprovada scientificamain a radund 6,3 milliuns Gidieus assassinads. 

 
En il fratemp aveva Hitler declerà la guerra a l’Uniun sovietica. Dapi il zercladur 1941 marschava l’armada tudestga vers Moscau e pareva betg da franar. Il december dal medem onn ha l’allià da guerra Giapun attatgà la marina americana a Pearl Harbor; sinaquai ha er la Germania declerà als Stadis Unids la guerra. Ma la mancanza da resursas e la surpussanza da l’inimi han bainprest manà natiers ina vieuta. Sco segn pli che evident da quella vegn resguardada la Battaglia da Stalingrad ch’è vegnida manada cun tutta vehemenza e che dueva ir a finir en la ruina totala da la sisavla armada tudestga. 

Pli evidenta che la sconfitta militara daventava e pli stinada che la politica è vegnida manada a l’intern dal pajais: sut givels frenetics dal public ha Goebbels proclamà il 1943 en il Palaz da sport a Berlin la «guerra totala»; quest exempel vegn savens allegà per illustrar la propaganda naziunalsocialistica da quel temp. L’entira producziun han ins uss drizzà ora sin la guerra; a medem temp stuevan las armadas tudestgas sa retrair da quasi tut las fronts e numerusas citads tudestgas èn idas en muschna tras la guerra da bumbas. Pir cura che las armadas sovieticas avevan gia occupà Berlin, ha Hitler prendì ils 30 d’avrigl 1945 a sasez la vita en ses refugi. La capitulaziun senza resalvas da l’armada tudestga è suandada ils 8 da matg. L’arrestaziun da la davosa regenza dal Reich sut Karl Dönitz a Flensburg-Mürwik ha pir gì lieu ils 23 da matg 1945. Ils responsabels principals politics e militars ch’avevan survivì èn vegnids sentenziads pli tard en ils Process da Nürnberg. Il 1988 ha la Germania pajà la davosa rata da debits per la Segunda Guerra mundiala. 

La Germania è vegnida dividida en il cunfins dals 31 da december 1937. En in document supplementar a la Decleraziun da Berlin dals 5 da zercladur 1948 han las quatter pussanzas victuras – ils Stadis Unids, l’Uniun sovietica, la Gronda Britannia e la Frantscha – definì las singulas zonas d’occupaziun. Ils territoris fin a la Lingia Oder-Neisse èn sinaquai vegnids administrads da la pussanza respectiva sco er d’ina cumandantura dals Alliads a Berlin. Ils territoris tudestgs en l’ost han ins zavrà tras ils Conclus da Potsdam e n’eran sinaquai betg pli suttamess al dretg d’occupaziun dals Alliads. A l’entschatta èn las quatter pussanzas anc sa stentadas da realisar ina politica d’occupaziun communabla. Unids eran ins en ils puncts da la demilitarisaziun e da l’uschenumnada denazificaziun. Ma gia areguard la dumonda tge che saja da chapir sut ina democrazia èn sa mussadas emprimas differenzas d’opiniuns tranter l’Uniun sovietica d’ina vart e las pussanzas dal vest da l’autra.

Ils territoris che l’Uniun sovietica aveva pers il 1921 a la Pologna (la Pologna da l’Ost, Kresy) aveva Stalin reconquistà ils onns 1939 resp. 1944; plinavant eran ulteriurs territoris (t.a. la Galizia da l’Ost) vegnids attribuids a l’Uniun sovietica. Per equilibrar questas sperditas ha Stalin insistì d’attribuir a la Pologna ils territoris orientals dal Reich tudestg sco er la citad da Danzig (ch’aveva furmà ina citad libra fin l’occupaziun tras l’armada tudestga il 1939). La Republica populara da la Pologna da pli tard ha resguardà e tractà quests territoris d’administraziun sco territori statal polonais. Uschia èn las regiuns Pomarania da l’Ost, Silesia, Brandenburg da l’Ost (Neumark) e la Prussia da l’Ost meridiunala crudadas facticamain a la Pologna, entant che la Prussia da l’Ost settentriunala è daventada sut il num Kaliningrad ina part da l’Uniun sovietica. Quest proceder han las pussanzas dal vest approvà a chaschun da la Conferenza da Potsdam be cunter veglia. La gronda part dals abitants tudestgs en il territori d’influenza da l’Uniun sovietica èn vegnids stgatschads da lur patria che sa chattava uss en la Pologna, en la Tschecoslovachia etc. Uschia ha la Germania pers in quart da ses territori d’avant il 1937 ed in tschintgavel da sia populaziun èn daventads fugitivs.

En las trais zonas dal vest han ins fundà il matg 1949 la Republica Federala Tudestga (RFT). Quai suenter ch’ils Alliads dal vest eran sa cunvegnids en la dumonda da la Ruhr da suttametter l’industria minerala e metallurgica al Rain ed a la Ruhr, ch’era essenziala per la reconstrucziun, sut in statut spezial. En la zona sovietica (che vegniva l’emprim numnada en il vest Germania Centrala) è sa furmada l’october 1949 la Republica democratica tudestga (RDT). Omadus stadis (cumbain la RDT betg en il cunfins d’avant il 1937) han accentuà la cuntinuitad politic-giuridica tranter sasez ed in stadi tudestg cumplessiv. La RDT è però sa distanziada pli tard da quest princip, damai ch’igl eran er colliads duairs cun quest statut e perquai ch’il pajais na giavischava betg pli ina cuntinuitad en il senn d’in stadi chapitalistic. 

La Republica da l’Austria è vegnida restabilida tenor ils cunfins dal 1938. La fixaziun dals cunfins tranter ils pajais federativs tudestgs è per part vegnida determinada tras ils cunfins da las zonas d’occupaziun, surtut tranter la Saxonia Inferiura e Mecklenburg resp. Saxonia-Anhalt sco er tranter la Turinga e Hessen. Da questa lingia dueva alura resultar il cunfin tranter ils dus pajais tudestgs.

 
La Republica Federala Tudestga furma l’emprim stadi sin territori tudestg che porta il term ‹Deutschland› en ses num. Il stadi è sa constituì ils 23 da matg 1949 en las trais zonas d’occupaziun dal vest. Quest di è la Lescha fundamentala vegnida messa en vigur sco «provisori» (Carlo Schmid) u «transitori» (Theodor Heuss) vers ina constituziun. En il preambel han ins tranter auter determinà il suandant: «L’entir pievel tudestg resta intimà d’accumplir en libra autodeterminaziun l’unitad e libertad da la Germania». Questa offerta ha pudì vegnir realisada bundant 50 onns pli tard en rom da la reuniun statala. Ils 3 da november 1949 han ins declerà Bonn sco chapitala provisorica. 

La fundaziun da la Republica democratica tudestga ha gì lieu ils 7 d’october 1949 en la zona d’occupaziun sovietica. Suenter ina refurma da l’administraziun l’onn 1952 èn resultads da quella 14 districts inclus Berlin da l’Ost.

Entant che la Republica democratica tudestga ha installà in’economia planifitgada, è la Republica Federala Tudestga sa decidida per l’economia da martgà sociala. Cun autas pretensiuns da reparaziun ha la pussanza d’occupaziun sovietica procurà sin il territori da la RDT per cundiziuns da partenza ordvart difficilas. Bain aveva er la part pli gronda da la Germania ch’era occupada dals Alliads dal vest da purtar grevezzas da reparaziun; ma qua è il Plan da Marschall sa mussà sco in instrument efficazi per gidar ils pajais da l’Europa dal Vest a surmuntar las consequenzas da la guerra. Il ‹miracul economic› ch’ha inizià en Germania suenter la Guerra da Corea (‹Boom da Corea›) ha manà cuntinuadamain ad autas ratas da creschientscha, ad occupaziun cumplaina e bainstanza. 

Entras la Guerra fraida èn ils Tudestgs en l’ost ed en il vest vegnids spartids fisicamain adina pli ferm in da l’auter. La tenda da fier s’extendeva tras l’entira Europa Centrala e spartiva la Germania en duas parts. Cun l’erecziun dal Mir da Berlin il 1961 han ins serrà il davos access liber al vest.

Ils 5 da matg 1955 han ils Alliads schlià il status d’occupaziun e la Republica Federala Tudestga è daventada in stadi suveran. Questa suveranitad sa restrenscheva al champ d’applicaziun da la Lescha fundamentala, vul dir ch’ils Alliads sa resalvavan dretgs areguard l’entira Germania sco er areguard la citad da Berlin ch’era partida en quatter secturs. Konrad Adenauer, l’emprim chancelier federal, ha annunzià lezza giada: «Oz, prest diesch onns suenter la sconfitta militara e politica dal naziunalsocialissem, finescha per la Republica Federala Tudestga il temp d’occupaziun.» 

Ils pli impurtants terms da quest’èra sin il sectur da la politica da l’exteriur èn stads l’integraziun en il vest – il 1955 è la Germania dal Vest daventada commembra da la NATO – e la participaziun a l’uniun economica europeica ch’ha cumenzà il 1952 cun la Communitad europeica da charvun e d’atschal e ch’è vegnida amplifitgada il 1957 cun ils Contracts da Roma. La Republica democratica tudestga da sia vart è daventada il 1950 commember cumplain entaifer il Cussegl per agid economic vicendaivel (COMECON) e, suenter avair abattì cun forza l’Insurrecziun dal pievel dals 17 da zercladur 1953 ed avair installà atgnas forzas armadas, er dal Patg da Varsovia.

Ils onns 1960 han intginas afferas politicas e la cumparsa d’ideas criticas clamà surtut tar ils students suenter ina vieuta sociala fundamentala. Las difficultads economicas ch’han inizià il 1967, il moviment studentic dal 68 ed ils success electorals da la NPD han rinforzà l’impressiun d’ina crisa politica. La gronda coaliziun dal 1966 tranter CDU e SPD sut il chancelier federal Kurt Georg Kiesinger (CDU) ha relaschà in’entira retscha da midadas da lescha (legislaziun per stadis d’urgenza) ed ha empruvà da cumbatter las difficultads economicas cun agid da regulaziuns globalas. A medem temp è il moviment da students vegnì mess a pèr pli e pli cun l’opposiziun extraparlamentara.

Cun l’entschatta da la regenza socialliberala sut Willy Brandt (SPD) il 1969 ha inizià ina retscha da refurmas entaifer la politica sociala e da l’exteriur. Per sia ‹nova politica da l’ost› ch’ha tschertgà la conciliaziun – quai ch’è s’exprimì a moda simbolica en la prosternaziun da Varsovia – e ch’ha manà ad in process da detensiun, è Brandt vegnì undrà il 1971 cun il Premi Nobel da la pasch. L’entschatta da questa nova politica aveva marcà l’inscunter suprem dad Erfurt. Questa politica han ils conservativs però crititgà per part vehementamain. L’avrigl 1972 ha Brandt dumagnà in votum da disfidanza e la SPD è sa salvada cun manar tras novas elecziuns.

L’onn 1973 èn la Republica Federala Tudestga e la Republica Democratica Tudestga daventadas il 133avel e 134avel commember da las Naziuns unidas. La maioritad da la fracziun da la CDU/CSU era s’exprimida cunter questa adesiun.

Il segund temp d’uffizi da Brandt (1972–1974) è stà sut l’ensaina da problems economics. A quels avevan attribuì la crisa dad ieli dal 1973 e tendenzas d’inflaziun. Sut questas circumstanzas n’èsi betg stà pussaivel da finanziar las refurmas ch’eran vegnidas empermessas a l’intern dal pajais. Suenter ch’è vegnida enconuschenta in’affera da spiunascha d’in da ses collavuraturs, è Brandt sa retratg.

Ses successur Helmut Schmidt (SPD), en uffizi dapi il zercladur 1974, ha gì da cumbatter l’indebitament creschent, l’aut grad da dischoccupaziun, diversas crisas economicas sco er il terror da la RAF. Stimà dals Tudestgs sco chancelier e sco persuna ha el però pers cun il temp il sustegn da sia fracziun, la quala ha opponì adina pli ferm cunter ses sustegn dal Conclus dubel da la NATO.

Suenter che la coaliziun è rutta dapart, è Helmut Kohl (CDU) daventà il 1982 nov chancelier federal. El ha regì pli ditg che tut ses antecessurs e vala sco il chancelier da l’Unitad tudestga. Quella è daventada pussaivla tras ils process da midament en l’Uniun sovietica (glasnost e perestroika) ed è vegnida accelerada a moda decisiva da las demonstraziuns en massa en la Republica democratica tudestga e dals moviments da bandunar il pajais ch’han gì lieu là. Ils 9 da november 1989 ha la direcziun da la RDT stuì avrir il Mir da Berlin, suenter ch’in pledader aveva mess en moviment per sbagl ina gronda fulla vers ils posts da cunfin.

Tar las emprimas elecziuns libras en la Chombra dal pievel da la RDT dals 18 da mars 1990 ha gudagnà la coaliziun da partidas ‹Allianza per la Germania› sut l’egida da la CDU da l’ost. (Davos) primminister da la RDT è daventà Lothar de Maizière (CDU). Uss era la via libra per la reuniun tudestga. Quella ha gì lieu en enclegientscha cun ils represchentants dals Alliads en rom dals Discurs da dus plus quatter.

 
Cun l’adesiun da la Republica democratica tudestga a la Republica Federala Tudestga èn, tenor artitgel 1 alinea 1 dal contract d’uniun, ils pajais Brandenburg, Mecklenburg-Pomarania dal Vest, Saxonia, Saxonia-Anhalt e Turinga daventads ils 3 d’october 1990 novs pajais federativs da la Republica Federala Tudestga (u uffizialmain: Republica Federala da la Germania). Quest di vegn celebrà dapi lura sut il num Di da l’unitad tudestga sco di da la festa naziunala tudestga.

Il Contract da dus plus quatter dals 12 da settember 1990 ha reglà la dumonda tudestga a moda definitiva: Las quatter anteriuras pussanzas d’occupaziun han cedì lur cumpetenzas da suveranitad, e cun l’entrada en vigur dal Contract ils 15 da mars 1991 ha la Germania reunida reacquistà a moda definitiva suenter la fin da la Segunda Guerra mundiala sia suveranitad statala. Confurm a la cunvegna tranter la Republica Federala Tudestga e l’Uniun sovietica dals 12 d’october 1990 ha la gronda part da las unitads militaras da l’exteriur bandunà fin la fin da l’onn 1994 la Germania – las truppas restantas dals Alliads dal vest na disponan da naginas cumpetenzas da suveranitad ed èn suttamessas al statut da truppas da la NATO. La Germania sezza è s’obligada da reducir si’armada sin il dumber maximal da 370 000 schuldads. Ils 14 da november 1990 han la Germania e la Pologna segnà a Varsovia il contract da cunfin tudestg-polonais. Entras quel ha la Germania acceptà la lingia Oder-Neisse sco cunfin statal. Il territori a l’ost da quel è pia, tenor dretg internaziunal, vegnì attribuì definitivamain a la Pologna. A quest pass è suandada da vart da la Germania ina politica da reconciliaziun, l’emprim il 1991 cun la Pologna, alura il 1997 cun la Republica Tscheca.

Cun ina stgarsa maioritad da 338 cunter 320 vusch ha il Bundestag decidì ils 20 da zercladur 1991 da bandunar Bonn sco sedia da la regenza e da transferir tant la regenza sco er il parlament a Berlin. A Bonn èn sa mantegnidas las sedias principalas da sis ministeris federals e tut ils ulteriurs ministeris disponan là da sedias secundaras. La gronda part da las instituziuns federalas e dals organs constituziunals sa chatta però a Berlin.

La nova sedia dal Bundestag tudestg furma l’Edifizi dal Reichstag a Berlin. Quel è vegnì renovà da rudent ed ha dà ils 19 d’avrigl 1999 l’emprima giada suttetg ad ina sesida dal nov parlament. Gia dal temp da Berlin vest, fin viaden en ils onns 1970, avevan gì lieu là sesidas dal plenum e d’intginas cumissiuns; ed er il president da la Republica Federala Tudestga è vegnì elegì là tranter il 1954 ed il 1969.

Ils onns 1990 èn stads segnads d’in curt boom en consequenza da la reuniun, al qual è però suandà in regress da la dinamica economica, dischoccupaziun en massa e l’impressiun d’ina ‹bloccada da refurmas›. Surtut en ils novs pajais federativs n’è l’economia betg sa sviluppada sco spetgà ed annunzià. Plirs projects da refurma da la regenza han fatg naufragi pervi da la resistenza da vart da la maioritad verd-cotschna en il Bundesrat. En la politica da l’exteriur è Kohl sa stentà da rinforzar la collavuraziun entaifer l’Uniun europeica ed ha promovì l’extensiun a l’ost da quella. 

Cura che l’anteriura Jugoslavia è dada dapart il 1991 è la Germania stada in dals emprims pajais ch’han sustegnì massivamain la renconuschientscha da l’independenza da la Croazia e da la Slovenia tras ils stadis dal vest. Da sa participar a la Segunda Guerra dal Golf per liberar il Kuwait ha la regenza refusà en vista a l’agen burdi istoric. Percunter ha la Germania sustegnì ils partenaris da la NATO a moda logistica. 

Il 1998 ha gì lieu per l’emprima giada en il suenterguerra ina midada cumpletta entaifer la regenza: suenter avair pers lur maioritads en il parlament han las partidas da regenza CDU/CSU e FDP fatg plazza a la coaliziun verd-cotschna sut chancelier federal Gerhard Schröder. La nova regenza ha instradà midadas entaifer la politica sociala, da rentas e da sanadad ed ha er pudì metter accents areguard la protecziun da l’ambient (reducziun da gas cun effect da serra; cumenzament da l’abandun da l’energia nucleara).

L’emprim engaschament da schuldads tudestgs en acziuns da cumbat dapi la Segunda Guerra mundiala – il 1999 en la Guerra dal Cosovo – ha marcà ina vieuta en la politica da l’exteriur da la Germania. Suenter las attatgas da terror dals 11 da settember 2001 ha Schröder empermess als Stadis Unids la ‹solidaritad senza restricziuns›. La Germania ha sinaquai sustegnì l’‹Operation Enduring Freedom› e la Guerra en l’Afganistan, n’è però betg sa participada a la Guerra da l’Irac il 2003. Quai ha chaschunà conflicts, surtut cun ils Stadis Unids, ma ha da l’autra vart manà a manifestaziuns da simpatia da vart da la populaziun tudestga (Schröder sco «chancelier da la pasch»).

La legislaziun Hartz-IV dal 2004 aveva la finamira da reanimar il martgà da lavur; ma ils pertutgads han resentì las adattaziuns sco socialmain malgistas. Quai ha manà a protestas en tut il pajais ed ad ina seria da disfatgas electoralas da vart da la coaliziun cotschen-verda. Sinaquai ha Schröder fatg en il parlament la dumonda da confidenza ed il president da la Republica Federala Tudestga, Horst Köhler, ha ordinà novas elecziuns. Da quella dueva la finala resortir ina gronda coaliziun tranter CDU/CSU e SPD sut la nova chanceliera federala Angela Merkel (CDU).

Suenter las elecziuns dal 2009 è suandada ina coaliziun da CDU/CSU e FPD ed il 2013 ina coaliziun tranter CDU e SPD, omaduas sut Angela Merkel. En la politica d’energia aveva la regenza burgaisa oriundamain bandunà l’intenziun da sortir da l’energia nucleara; suenter la Catastrofa nucleara da Fukushima (2011) ha la regenza però decidì da sortir definitivamain da l’energia atomara e d’accelerar la midada sin il sectur da l’energia. Daspera èn ils ultims onns stads segnads da la crisa da finanzas, en rom da la quala la Germania è s’obligada da purtar ina gronda part da las mesiras da stabilisaziun entaifer la zona da l’euro. Sco nova tematica è da menziunar l’unda da fugitivs nà da l’Africa, ma er nà da las zonas da crisa en il Proxim Orient (Guerra en la Siria e.a.) ch’han cuntanschì dimensiuns ch’occupan la politica tudestga ed europeica.

Sco stadi e subject dal dretg internaziunal vegn la Republica Federala Tudestga resguardada generalmain sco successura da la Lia da la Germania dal Nord; quella è vegnida transfurmada il 1867 en in stadi federativ che porta dapi il 1871 il num ‹Imperi tudestg›. Sin la constituziun dal prim da fanadur 1867 sa basan alura er las constituziuns dal 1871 e 1919 sco er la Lescha fundamentala (Grundgesetz) dal 1949 (che valeva da quel temp anc sco provisorica). 

L’uschenumnada Constituziun da Weimar dal 1919 è er restada formalmain en vigur durant il temp dal naziunalsocialissem 1933 fin 1945; materialmain eran però grondas parts da quella vegnidas annulladas. Ils 23 da matg 1949 vala sco pli impurtant term constituziunal, damai che lura è entrada en vigur la constituziun ch’è anc oz valaivla. La Republica democratica tudestga ha enconuschì trais constituziuns (7 d’october 1949, nova constituziun l’onn 1968 e revisiun da quella il 1974). Ils 3 d’october 1990 è il territori da l’anteriura RDT vegnì sut il champ d’applicaziun da la Lescha fundamentala.

 
La Lescha fundamentala (Grundgesetz, abreviaziun ‹GG›) furma la constituziun da la Republica Federala Tudestga. Chau dal stadi è il president da la Republica Federala Tudestga (Bundespräsident) ch’ha surtut incumbensas represchentativas. Tenor il protocol al suonda il president dal parlament (Präsident des Deutschen Bundestages), il chancelier federal (Bundeskanzler) ed il president da la chombra federala (Präsident des Bundesrates). Berlin furma la chapitala da la regenza e la sedia da la regenza (art. 1 alin. 22 GG).

Tenor artitgel 20 GG vegn statuì a moda lianta che la Republica Federala Tudestga stoppia esser organisada sco stadi federativ democratic e social. Tar quest stadi da dretg federativ sa tracti d’ina democrazia parlamentara. Areguard la concepziun dal stadi federativ fa la Lescha fundamentala pretensiuns explicitas. Tenor quellas existan dus nivels entaifer il sistem politic: il nivel surordinà dal stadi federativ, che represchenta il stadi cumplessiv vers anora, ed il nivel dals 16 pajais federativs. Mintga nivel enconuscha agens organs legislativs, executivs e giudicativs. Ils pajais federativs defineschan da lur vart l’urden da lur citads e vischnancas. Per exempel èn tschintg pajais federativs sutdividids en mintgamai 22 districts administrativs. Ils pajais federativs han er dà a sasezs atgnas constituziuns.

Da princip pervegna als pajais federativs qualitad statala; els èn però be en furma limitada subjects dal dretg internaziunal e dastgan be far agens contracts cun auter stadis cun il consentiment da la regenza federala. La Republica Federala Tudestga po valair sco federaziun da dretg public da ses pajais federativs; pir en furma da questa uniun sa constituescha pia ses caracter statal.

Ils organs legislativs dal stadi federativ furman il Bundestag ed il Bundesrat. Leschas federalas vegnan decididas dal Bundestag cun maioritad simpla. Ellas entran en vigur sch’il Bundesrat n’è betg s’opponì encunter quellas respectivamain – là nua che quai è necessari – ha dà ses consentiment. Midadas vi da la Lescha fundamentala èn be pussaivlas cun la maioritad da dus terzs dals commembers dal Bundestag e dal Bundesrat. A nivel dals pajais federativs decidan ils parlaments dals pajais davart lur leschas. Da princip è la cumpetenza legislativa situada a nivel dals pajais federativs, cun excepziun dals champs per ils quals è definida ina cumpetenza legislativa dal stadi federativ.

L’executiva a nivel dal stadi federativ furma la regenza federativa (Bundesregierung) che vegn manada dal chancelier da la Republica Federala Tudestga (Bundeskanzler). A nivel dals stadis federativs han ils schefs da l’executiva differents nums (per ordinari Ministerpräsident, a Hamburg e Bremen però Präsident des Senats u er Bürgermeister, a Berlin Regierender Bürgermeister).

Il chancelier vegn elegì sin proposta dal president tras il Bundestag. Ses temp d’uffizi è da princip lià a la perioda d’elecziun dal parlament; igl exista però er l’instrument dal votum da disfidanza. Ils ministers federals (Bundesminister) vegnan nominads sin proposta dal chancelier federal; ensemen cun quel furman els la regenza federala (Bundesregierung). Il chancelier federal nominescha ultra da quai il candidat tudestg per l’uffizi d’in cummissari da l’Uniun europeica.

Il budget statal ha cumpiglià il 2013 expensas en l’autezza da 1,223 milliardas euros ed entradas da 1,223 milliardas euros. Da quai è resultà in pitschen surpli en l’autezza da 0,3 milliardas (resp. da 0,01 % dal PNB). Il 2014 ha il surpli cuntanschì l’autezza da 18 milliardas euros (resp. 0,6 % dal PNB). Igl è quai stà il pli aut avanzament dal preventiv dapi 14 onns. 

Ils debits dal stadi han muntà la fin dal 2013 a 2,044 billiuns euros (resp. 78,1 % dal PNB). Questa quota duai sa sminuir marcantamain en il decurs dals proxims onns.

Ils emprests dal stadi da la Germania vegnan distinguids da las impurtantas agenturas da rating cun la pli auta bonitad pussaivla (AAA). La gronda dumonda suenter quests emprests che valan sco investiziun segira han sbassà marcantamain ils tschains en il decurs dals ultims onns e schizunt manà a tschains negativs, quai che furma il motiv principal dal surpli dal preventiv actual da la Germania.

Sper diversas taglias commerzialas (p.ex. taglia sin la svieuta) generescha il stadi ina gronda part da sias entradas sur taglias sin las entradas e sin la rendita.

Tenor il studi da l’OECD dal 2014 han ils Tudestgs da pajar pervi da las autas taglias ed ulteriuras taxas (sco las contribuziuns a l’assicuranza sociala) la pli auta chargia da contribuziuns statalas en tut il mund, pia anc avant ils stadis socials da la Scandinavia.

Il territori statal da la Republica Federala Tudestga resulta da la totalitad dals territoris statals dals singuls pajais federativs. Dapi la fundaziun da la Republica Federala Tudestga è ses territori statal vegnì engrondì pliras giadas. Quai è surtut succedì il 1957 tras l’integraziun dal Saarland ed il 1990 tras l’adesiun da la Republica democratica tudestga incl. Berlin da l’Ost e l’integraziun da Berlin dal Vest tenor il dretg internaziunal. Ultra da quai han divers stadis dà enavos en il decurs dal temp territoris pli pitschens ch’eran l’emprim vegnids resguardads suenter la Segunda Guerra mundiala sco appartegnents a l’agen territori statal. Quai pertutga la Gronda Britannia (Helgoland), ils Pajais Bass (t.a. Elten), la Belgia (t.a. Mützenich), il Luxemburg (in territori tranter Vianden ed Obersgegen) e la Frantscha (Kehl). Er il cunfin maritim en la Mar dal Nord ed en la Mar da l’Ost è vegnì extendì repetidamain.

Il decurs dal cunfin statal da la Germania vala oz sco definì e consolidà, cun fitg paucas excepziuns (en il territori dal Lai da Constanza e dal cunfin vers il Pajais Bass). A l’intern da la Germania n’è il decurs dal cunfin tranter ils pajais federativs Schleswig-Holstein e Saxonia Inferiura en la regiun da l’Elbe Inferiura mai vegnì sclerì a moda definitiva.

Il spectrum politic en Germania stat sut l’ensaina da las partidas ch’èn represchentadas en il Bundestag. Igl èn quai la fracziun communabla da las partidas d’uniun CDU/CSU sco er las fracziuns che consistan mintgamai da be ina partida SPD, Die Linke e Bündnis 90/Die Grünen. La FDP è la partida cun la pli lunga participaziun a la regenza a nivel dal stadi federal; dapi il 2013 n’è ella però betg pli represchentada en il Bundestag. Il medem vala per ulteriuras partidas che n’han (stgars) betg cuntanschì a chaschun da las elecziuns la cumpart minimala da 5 %, sco per exempel l’Alternative für Deutschland (AfD). Las partidas politicas da la Germania èn er represchentadas en las fracziuns dal Parlament europeic.

 
Ils pli impurtants puncts d’orientaziun per la politica da l’exteriur da la Germania furman ils lioms cun il vest e l’integraziun europeica. Ensemen cun la Frantscha ha la Germania contribuì a moda essenziala a stabilir las organisaziuns europeicas. Dapi il 1950 è la Germania commembra dal Cussegl da l’Europa ed il 1957 ha ella suttascrit ils Contracts da Roma che furman il crap da fundament da l’Uniun europeica odierna. In aspect central areguard la politica da segirezza ed a medem mument l’expressiun da la colliaziun da la Germania cun il vest furma la commembranza en la NATO (dapi il 1955).

Durant la Guerra fraida ha la Germania disponì d’in spazi d’agir limità areguard la politica da l’exteriur. Sco ina da las pli impurtantas finamiras da quel temp valeva la reuniun dal pajais. Engaschaments militars a l’exteriur na vegnivan percunter betg en dumonda. Tenor la Lescha fundamentala na dastga l’armada da la Germania (Bundeswehr) betg sa participar a guerras offensivas; si’incumbensa sa restrenscha sin la defensiun dal pajais e da l’allianza militara. 

Dapi la reuniun ha la Germania schlargià ses princips areguard la politica da l’exteriur ed instradà ina via da pli gronda cunresponsabladad internaziunala. Uschia sa participescha l’armada dapi il 1991 cun consentiment dal Bundestag ed ensemen cun armadas alliadas a divers engaschaments da mantegnair la pasch e da sfurzar tras quella ordaifer la Germania ed er ordaifer il territori da la NATO (engaschaments Out-Of-Area).

Sco gia menziunà gioga la Germania tradiziunalmain ina rolla centrala entaifer l’Uniun europeica. Ultra da l’uniun economica e monetara sa stenta la Germania d’unifitgar pli ferm la politica da l’exteriur e da segirezza da l’Uniun europeica.

Suenter la fundaziun dal stadi il 1949 n’ha la Republica Federala Tudestga l’emprim betg dastgà tegnair atgnas forzas armadas. En vista a la Guerra da Corea ed a la politica sovietica en l’Europa da l’Ost han ins alura admess ina guardia da cunfin paramilitara (1951) e forzas armadas en vista a l’adesiun a la NATO (1955). Suenter la reuniun èn parts da l’armada da la Republica democratica tudestga (Nationale Volksarmee) vegnidas integradas en quellas. Dapi la fin da la Guerra fraida han ins reducì successivamain la grondezza da l’armada da 500 000 a 250 000 schuldads. Dapi il 2011 n’exista nagina obligaziun da far servetsch pli.

Per la segirezza a l’intern èn responsablas las polizias dals singuls pajais federativs. Directamain al ministeri da l’intern è suttamess l’uffizi criminal federal che furma uschia la pli auta autoritad d’investigaziun. Ultra da quai existan il Servetsch d’infurmaziuns federal (Bundesnachrichtendienst) sco servetsch da novitads da l’exteriur e diversas instanzas ch’ageschan sco servetschs d’infurmaziun a l’intern dal pajais.

La Republica Federala Tudestga sa definescha sco stadi da dretg, quai che vul dir che tutta activitad statala sto esser fundada sin il dretg ed è er limitada tras quel. Tgi che vegn violà en ses dretgs tras pussanza publica, po recurrer tar las dretgiras. Ils derschaders èn independents e suttamess en la giurisdicziun a naginas instrucziuns.

Da princip vegn la giurisdicziun exequida dals divers tribunals dals pajais federativs. Las instanzas da recurs a nivel statal vegnan dirigidas dal Tribunal constituziunal federal (Bundesverfassungsgericht); las decisiuns da quel pon effectuar vigur legala e liar uschia tut ils auters tribunals.

Adina pli impurtant daventa il dretg europeic e la giurisdicziun da la Curt da giustia da l’Uniun europeica. Quai è surtut il cas dapi ch’il Contract da Lissabon è entrà en vigur il prim da december 2009.

 
Cun in product naziunal brut nominal da 2,7 milliuns euros (situaziun dal 2013) è la Germania la pli gronda economia publica da l’Europa e la quart gronda dal mund. Resguardond il product naziunal brut per persuna sa chatta la Germania a nivel internaziunal sin la 18avla plazza ed entaifer l’Uniun europeica sin la 9avla plazza. La Germania vala sco pajais fitg sviluppà; il standard da viver è actualmain il 5avel aut da 186 pajais intercurids (tenor il Human Development Index). 

Da la prestaziun economica totala en Germania derivan 2,1 % dal sectur primar (agricultura), 24,4 % dal sectur secundar (industria) e 73,5 % dal sectur terziar (servetschs). Il 2014 dumbrava il pajais 42,6 milliuns persunas occupadas e 2,9 milliuns dischoccupads. Cun 4,7 % (schaner 2015) ha la Germania la pli bassa procentuala da dischoccupads da tut ils 28 stadis commembers da l’Uniun europeica. 

La Germania enconuscha ina lunga tradiziun sin il champ da l’industria da minieras e dispona dals pli divers giaschaments da materias primas (cotgla, sals da calium, minerals industrials e.a.).

Branschas da l’industria tudestga che pon concurrer a nivel internaziunal furman l’industria d’autos, l’electrotecnica, la construcziun da maschinas e l’industria chemica. Da muntada internaziunala è er l’economia d’assicuranzas, surtut sin il champ da las reassicuranzas. En Germania han plinavant lieu numerusas fieras e congress da muntada mundiala.

La Germania furma in’impurtanta pitga politic-economica da l’Uniun europeica. Il pajais è mintgamai stà commember fundatur da tut las organisaziuns antecessuras da l’UE dapi ils onns 1950. Medemamain fa la Germania part da la zona da l’euro; quel ha remplazzà il schaner 2002 il marc tudestg (Deutsche Mark).

Las entradas e la facultad en Germania èn repartidas a moda vaira ineguala. Tenor indicaziuns da l’OECD (dal 2005) giascheva l’inegualitad d’entradas levet sut la media da tut ils pajais commembers. Er tenor atgnas calculaziuns da la regenza tudestga (dal 2013) è l’inegualitad fitg gronda e schizunt la pli gronda en l’entira zona da l’euro. Radund dus terzs da la populaziun disponivan il 2007 da nagina u be d’ina fitg pitschna facultad netta. Igl existan er disparitads regiunalas tranter ils pajais federativs da l’ost e quels dal vest ed er la quota da dischoccupads è en general pli auta en ils pajais da l’ost.

L’economia publica tudestga ha nudà sur plirs decennis pli auts exports che tut ils auters pajais, uschia che la Germania è vegnida titulada repetidamain ‹campiun mundial da l’export›. Il 2011 han ins exportà martganzias en la valur totala da 1061,2 milliardas euros, entant che la valur dals imports ha muntà a 902,5 milliardas euros.

Ils pli impurtants partenaris d’export han furmà il 2010 ils stadis commembers da l’UE (exports 60,3 %, imports 56,3 %), la Republica Populara da la China (exports 5,6 %, imports 9,5 %), ils Stadis Unids (exports 6,8 %, imports 5,6 %), la Svizra (exports 4,3 %, imports 4,0 %) e la Russia (exports 2,7 %, imports 3,9 %).

La creschientscha economica ha cuntanschì il 2006 3,7 %; quest trend positiv ha cuntinuà fin l’entschatta 2008. Alura è proruta la crisa da finanzas internaziunala, la quala ha er manà en Germania ad ina sminuziun dal PNB da −5,6 %. Silsuenter è l’economia tudestg puspè creschida ed ha cuntanschì ils ultims onns las suandantas valurs: 4,1 % (2010); 3,6 % (2011); 0,4 % (2012); 0,1 % (2013); 1,5 % (2014).

Da las 500 interpresas che fan la pli gronda svieuta en tut il mund èn 32 domiciliadas en Germania. Las pli grondas (tenor svieuta) èn: Volkswagen, E.ON, Daimler, Siemens, BASF, BMW. 

La tecnologia d’infurmaziun e da telecommunicaziun vala sco impurtant factur per l’attractivitad dal lieu. Da quella fa part l’entir provediment tecnic da radio, televisiun e telefon sco er la hardware e la software per computer, internet, smartphone, raits digitalas, sistems da satellits e tut ils servetschs ch’èn colliads cun questas tecnologias. 

La pli gronda interpresa da telecommunicaziun en Germania furma la Deutsche Telekom. Il 2012 disponivan radund 85 % da la populaziun d’in access a l’internet (media entaifer l’UE: 76 %); radund 82 % disponivan d’ina connexiun a spectrum lartg (media entaifer l’UE: 72 %).

Il 2010 ha la Germania furmà il quart grond producent d’energia primara en l’Europa ed il 24avel grond en tut il mund.

Il provediment d’electricitad è vegnì garantì il 2012 da 1059 interpresas cun sedia en Germania. Las energias regenerablas han contribuì il 2014 27,8 % da la producziun da forza electrica brutta. En rom da la midada sin il sectur da l’energia èsi previs d’augmentar fin il 2050 la cumpart d’energias regenerablas vi dal consum da forza electrica sin 80 %. En il medem interval duai il consum d’energia primara vegnir reducì per 50 % e las emissiuns da gas cun effect da serra sminuidas per almain 80 % fin 95 % en congual cun la situaziun dal 1990. Tut en tut duai il consum d’energia vegnir cuvert il 2050 cun almain 60 % energias regenerablas.

Il turissem furma en Germania in impurtant sectur economic. Da quel profitan sper ils restaurants e las interpresas d’alloschament er il commerzi en detagl ed ils purschiders d’activitads da temp liber e da divertiment. Cun bundant 30 milliuns pernottaziuns ad onn sa chatta la Germania sin la settavla plazza dals pajais ils pli frequentads en tut il mund.

Il turissem da bogn e sport d’aua èn da gronda muntada a las costas e sin las inslas da la Mar dal Nord e da l’Ost. A l’intern dal pajais porschan blers lieus turissem da cura e da sanadad (surtut bogns termals). En la muntogna vegn fatg sport d’enviern resp. vacanzas da viandar. Il turissem da velo è popular en tut il pajais. In sectur creschent furman ils viadis en citads, sco er il turissem da cumpra e da cultura, e quai surtut en las metropolas e lur citads veglias impurtantas. 

Il 2012 ha il turissem cuntanschì en Germania, cun radund 2,8 milliuns persunas emploiadas directamain en quest sectur, ina svieuta da 140 milliardas euros. 125,3 milliuns giasts (101,5 miu. da l’intern, 23,5 miu. da l’exteriur) han generà 351,4 miu. pernottaziuns (da quai 298,5 miu. tras indigens e 52,9 miu. tras persunas da l’exteriur), e quai en 54 166 alloschis cun ca. 2,6 miu. letgs.

 
Pervi da la vasta urbarisaziun e la posiziun centrala en l’Europa è la Germania segnada d’ina gronda intensitad dal traffic. Surtut per il traffic da martganzia furma ella in impurtant pajais da transit. En rom da las raits transeuropeicas duai questa posiziun sco spazi da transfer tranter il spazi economic central en il vest (l’uschenumnada Banana blaua) ed il spazi economic central en l’ost da l’Europa Centrala anc vegnir augmentada. 

Ils ultims decennis è il traffic da martganzia sa spustà cuntinuadamain da la viafier sin la via. Sco cuntrapaisa han ins introducì il 2005 ina taxa d’autostrada (Maut) per camiuns.

L’emprima autostrada dal mund è vegnida bajegiada il 1921 en Germania, numnadamain l’AVUS a Berlin. En il decurs da la segunda mesadad dal 20avel tschientaner ha il traffic sin via substituì la viafier sco pli impurtant med da traffic. La Germania posseda ina da las pli spessas raits da vias dal mund. Quella cumpiglia 12 845 kilometers autostrada e 40 711 kilometers vias federalas (situaziun dal 2012). Vitiers vegnan 86 597 kilometers vias regiunalas, 91 520 kilometers vias cirquitalas e las vias da colliaziun communalas.

La Germania dispona d’ina rait da viafier da ca. 35 000 kilometers. Quella vegn frequentada mintga di da fin a 50 000 trens da persunas e da vitgira. Il 1994 han ins unì las anteriuras viafiers statalas dal vest e da l’ost en la Deutsche Bahn AG che furma in’interpresa da l’economia privata. Daspera existan radund 350 ulteriuras interpresas da viafier. Entant ch’il stadi è sa retratg dal manaschi operativ, finanziescha el la gronda part dal mantegniment e da l’amplificaziun da la rait sco er – en furma da meds da regiunalisaziun – il traffic regiunal.

L’onn 1881 ha Werner von Siemens mess en funcziun a Lichterfelde sper Berlin l’emprim tram electric dal mund. Quest med da transport ha dominà en l’emprima mesadad dal 20avel tschientaner il traffic a curta distanza en las citads pli grondas da la Germania. Suenter la Segunda Guerra mundiala han ins, surtut en la Germania dal Vest, mess ord funcziun u remplazzà blers trams tras viafiers citadinas u metros. Percunter èn vegnidas installadas adina dapli lingias dad omnibus ch’èn er preschentas en regiuns ruralas e che collian praticamain mintga abitadi. 

En l’entir pajais existan radund 550 plazzas aviaticas. 16 da quellas servan al traffic aviatic internaziunal. 

La plazza aviatica da Francfurt è la pli gronda da la Germania e la terz gronda en tut l’Europa areguard il dumber da passagiers (2013: bundant 58 milliuns) e schizunt la pli gronda plazza aviatica europeica areguard il transport da martganzia (2013: 2,13 milliuns tonnas). La segund e terz gronda plazza aviatica èn quellas da Minca e da Düsseldorf. La pli gronda societad aviatica è la Lufthansa, la segund gronda Air Berlin.

Pervi da la cumpart surproporziunalmain auta da commerzi cun l’exteriur dependa la Germania fermamain dal traffic maritim. Il pajais posseda sez intgins ports da mar moderns e fa er diever per ses commerzi d’ultramar da tals situads en ils stadis vischins, surtut en ils Pajais Bass. Ils ports tudestgs cun la pli gronda svieuta èn Hamburg, Wilhelmshaven ed ils ports da Bremen. Ils pli impurtants ports da la Mar da l’Ost èn Rostock e Lübeck. Las vias maritimas las pli frequentadas furman la part inferiura da l’Elbe e l’Unterwese. Il Chanal da Kiel (che collia la Mar dal Nord cun la Mar da l’Ost) è er da muntada per il traffic da transit. A la navigaziun interna servan las vias navigablas da Rain, Main, Mosel, Weser ed Elbe sco er divers chanals. Il Chanal Main-Danubi surventscha il pli grond sparta-auas europeic e porscha uschia ina via da navigaziun directa da la Mar dal Nord e da l’Ost fin a la Mar Naira.

Da l’istorgia d’art e da cultura, da la quala las ragischs tanschan enavos en il temp dals Celts, Germans e Romans, è resortida dapi il temp medieval in grond dumber da persunalitads ch’han influenzà ils pli divers stils ed epocas. Damai che la Germania n’ha sur lung temp betg existì en furma d’in stadi naziunal, è la cultura tudestga sa definida sur tschientaners surtut sur la lingua communabla. Pir en il decurs dal 19avel tschientaner è il term vegnì transferì a contribuziuns culturalas da Tudestgs ed en il territori tudestg. E sur ils cunfins da l’Imperi ora han ins attribuì vers il 1900 al pajais la caracteristica d’ina naziun culturala tudestga.

Sco en auters pajais era, ha la derasaziun dals meds da massa augmentà en il decurs dal 20avel tschientaner la posiziun da la cultura populara. La derasaziun da l’internet en il 21avel tschientaner ha ultra da quai manà ad ina differenziaziun da la cuntrada culturala e posiziunà da nov las scenas culturalas da nischa.

La politica da cultura fa part en Germania dal sectur da cumpetenza dals pajais federativs. Quai duai garantir la pluralitad culturala e l’identitad regiunala. A nivel surordinà è l’incumbensà da la regenza per cultura e medias responsabel per instituziuns culturalas e projects da muntada naziunala.

A la derasaziun da la lingua e cultura tudestga en il mund servan ils Instituts da Goethe. L’onn 2013 eran quels represchentads en 158 lieus repartids en 93 pajais.

 
Il pli impurtant manuscrit che dat perditga dal svilup tempriv da la lingua tudestga ed a medem temp il pli vegl cudesch tudestg furma l’uschenumnà Abrogans cun il Babnoss dal Codex Sangallensis 911 sco er las translaziuns da Notker il Tudestg. Quests documents vegnan conservads en la Biblioteca claustrala a Son Gagl.

La litteratura tudestga tanscha enavos fin en il temp medieval tempriv ch’ha manà ad emprimas bibliotecas medievalas cun manuscrits e picturas da cudeschs. Menziun speziala merita la poesia da trubadurs ch’è tranter auter documentada a moda impressiunanta en il Codex Manesse. Sco pli enconuschent trubadur vala Walther von der Vogelweide. In ulteriur crap da fundament da la litteratura tudestga furma il poem epic da la Chanzun da Nibelungen.

Sco pass revoluziunar dueva sa mussar vers la fin dal temp medieval l’invenziun da la stampa da cudeschs cun letras moviblas tras Johannes Gutenberg. Si’ovra la pli impurtanta è stada la stampa da las biblas da Gutenberg. Ultra da quai ha la pergiamina pudì vegnir remplazzada tras il palpiri ch’era bundant pli bunmartgà.

Sco pli impurtants auturs tudestgs valan tranter auter Gotthold Ephraim Lessing, Johann Wolfgang von Goethe e Friedrich Schiller sco er ils frars Grimm. Heinrich Heine, Kurt Tucholsky, Bertolt Brecht, Thomas Mann e Heinrich Mann sco er Hannah Arendt han mintgamai caracterisà la litteratura da lur epocas.

Purtaders tudestgs dal Premi Nobel da litteratura èn Theodor Mommsen (1902), Rudolf Eucken (1908), Paul Heyse (1910), Gerhart Hauptmann (1912), Thomas Mann (1929), Hermann Hesse (1946), Heinrich Böll (1972), Günter Grass (1999) e Herta Müller (2009).

La Fiera da cudeschs da Francfurt vala sco pli impurtanta scuntrada d’editurs e da la scena litterara internaziunala. 

Sco pli impurtants filosofs tudestgs vegnan considerads Gottfried Wilhelm Leibniz, Nikolaus von Kues, Immanuel Kant, Georg Wilhelm Friedrich Hegel, Arthur Schopenhauer, Martin Heidegger e Friedrich Nietzsche. Diversas impurtantas direcziuns filosoficas èn resortidas da la filosofia tudestga, uschia l’idealissem tudestg ed il marxissem fundà da Karl Marx e Friedrich Engels. En il 20avel tschientaner è surtut la Teoria critica da l’uschenumnada Scola da Francfurt cun Theodor W. Adorno e Max Horkheimer stada impurtanta; en successiun da quella è Jürgen Habermas daventà in dals impurtants filosofs da la fin dal 20avel tschientaner. 

Dal temp baroc han la musica sacrala e la construcziun d’orglas enconuschì in temp da fluriziun. Impurtants cumponists dal baroc èn tranter auter stads Heinrich Schütz, Georg Friedrich Händel e Johann Sebastian Bach. D’impurtanza per la classica viennaisa èn stads da vart tudestga ils cumponists da la Scola da Mannheim, Ludwig van Beethoven e Wolfgang Amadeus Mozart (che vegn surtut considerà sco cumponist austriac). A partir dal temp dal Vormärz han cumponists sco Robert Schumann e Felix Mendelssohn Bartholdy sviluppà il chant da chanzuns accumpagnà ad in agen gener d’art. Ulteriurs impurtants cumponists tudestgs da la romantica èn stads Johannes Brahms, Richard Wagner e Richard Strauss. En il 20avel tschientaner han tranter auter cuntanschì ils cumponists Carl Orff e Hanns Eisler gronda popularitad. Suenter il 1950 è stà impurtant en la Germania dal Vest il svilup da la musica seriala ed electronica tras cumponists sco Karl-Heinz Stockhausen. En la Nova musica ha Werner Henze cuntanschì renum internaziunal. Impurtants cumponists tudestgs temporans èn tranter auter Wolfgang Rihm sco er il cumponist da musica da film Hans Zimmer.

La musica populara moderna è vegnida dominada sur lung temp dal schlagher. Vers la fin dals onns 1960 han diversas furmaziuns tudestgas recepì ed influenzà la musica da rock e pop internaziunala, sco per exempel Kraftwerk, Klaus Schulze e Tangerine Dream. S’etablida sco in agen stil da musica, ch’ha er gì success a l’exteriur, è la musica da rock e pop tudestga a l’entschatta dals onns 1980 sut il num ‹Neue Deutsche Welle› cun artists sco Nena, Hubert Kah e Peter Schilling. Ulteriurs interprets da quest’epoca en Alphaville, Trio, Extrabreit, Joachim Witt, DAF, Ideal, Münchener Freiheit e Spider Murphy Gang.

Impurtants represchentants dal rock da l’ost èn City, Karat, Silly, Keimzeit, Karussell, Electra und die Puhdys. Bleras da las bands da la RDT èn vegnidas censuradas u schizunt scumandadas pervi da lur texts che bramavan libertad e midadas socialas e politicas. Tuttina èsi reussì ad ellas, grazia a concerts secrets, d’etablir in protest politic cunter il reschim; medemamain hai dà diversas resoluziuns da vart da chantauturs e d’interprets da musica da rock. 

Dapi ils onns 1980 datti er ina scena da rock alternativ e da punkrock. Impurtants represchentants èn Die Ärzte, Beatsteaks, Nina Hagen e Die Toten Hosen. Gronds success a nivel internaziunal han las gruppas da hardrock Scorpions e Rammstein. Entaifer la scena da hiphop èn surtut da numnar Die Fantastischen Vier, Fettes Brot, Marteria, Samy Deluxe, Jan Delay, Blumentopf, Bushido, K.I.Z., Casper, Cro, Sido e Deichkind.

Tar ils pli enconuschents interprets tudestgs da la musica da pop dals ultims onns tutgan James Last, Udo Lindenberg, Peter Maffay, Herbert Grönemeyer, Westernhagen, Silbermond, Juli, Ich + Ich, Frida Gold, Tim Bendzko, Andreas Bourani ed il chantadur Xavier Naidoo. Success internaziunals han er gì Frank Farian cun Boney M. e Milli Vanilli, Dieter Bohlen (cun Modern Talking), la band da casting No Angels, la band da metal Blind Guardian, la chantadura Sarah Connor, il violinist David Garrett e la band Tokio Hotel. Er en la scena d’electro e techno giogan producents tudestgs in’impurtanta rolla, sco per exempel Mousse T., Paul van Dyk, Scooter, 2raumwohnung, Tomcraft, Moguai, The Disco Boys, Lexy  K-Paul, Kai Tracid, Tiefschwarz, Blank  Jones e Paul Kalkbrenner.

Enfin il 2010 ha la Loveparade a Berlin furmà ina da las pli grondas occurrenzas da musica en tut il mund. Dals numerus festivals ed ulteriuras occurrenzas da musica sajan numnads Rock am Ring e la Fiera da musica a Francfurt.

Gia dapi la fin dal 19avel tschientaner vegnan producids films en Germania. Il Varieté Wintergarten a Berlin è daventà l’emprim kino en l’istorgia, cura ch’ils frars Skladanowsky han preschentà là il 1895 in film davant public. Il studio da film Babelsberg a Potsdam sper Berlin è vegnì fundà il 1912; el era da quel temp in dals pli gronds studios da film dal mund. ‹Metropolis› da Fritz Lang (1927) è stà l’emprim film da science fiction. Il 1930 è ‹Der blaue Engel› cun Marlene Dietrich daventà in success internaziunal dal film sonor tudestg. 

Ils onns 1933 fin 1945 è il film tudestg savens vegnì duvrà sco medium da propaganda. Ils films da Leni Riefenstahl han etablì da quel temp novs standards areguard il film documentar. Suenter il 1945 ha l’UFA reprendì la producziun; tranter auter èn films regiunals patriotics daventads populars. A partir dals onns 1960 han ils films da Wallace e da Winnetou gì grond success. Alura è suandada ina crisa, damai che la televisiun concurrenzava pli e pli fitg il kino. Impurtants represchentants tudestgs dal film d’autur dals proxims decennis èn stads Rainer Werner Fassbinder, Wim Wenders, Volker Schlöndorff e Werner Herzog. En la RDT ha tranter auter il reschissur Konrad Wolf gì ina gronda influenza. A partir dals onns 1980 han novs models da promoziun lubì da realisar producziuns grondas sco quellas da Bernd Eichinger. 

Impurtants studios da film tudestgs èn actualmain Bavaria Film, Constantin Film, MMC e l’UFA. Tar ils pli impurtants reschissurs e producents da film actuals tutgan tranter auter Roland Emmerich, Wolfgang Petersen, Florian Henckel von Donnersmarck, Caroline Link, Wolfgang Becker e Fatih Akın. In’impurtant eveniment en il mund da film furma la Berlinale, il festival da film da Berlin, ch’ha mintgamai lieu il favrer.

Impurtants artists tudestgs da l’epoca da la renaschientscha èn tranter auter Albrecht Altdorfer, Lucas Cranach il Vegl, Matthias Grünewald, Hans Holbein il Giuven ed Albrecht Dürer.

Dal temp baroc èn surtut da muntada Johann Baptist Zimmermann, ils frars Asam sco er Peter Paul Rubens ch’è naschì a Siegen ed emigrà ad Antwerpen.

Impurtants romantichers èn stads Caspar David Friedrich, Philipp Otto Runge, Carl Spitzweg ed il nazaren Philipp Veit. Artists prussians sco Anton von Werner ed Emil Hünten stattan per la pictura istorica, da muntada internaziunala èn er stadas da quel temp las scolas d’art da Minca e Düsseldorf. Da muntada internaziunala èn alura tranter auter l’impressiunist Max Liebermann, ils surrealists Max Ernst, Hans Richter e Hans Arp, sco er ils expressiunists Max Beckmann, Paul Klee, Gabriele Münter ed Otto Dix. Da grond’influenza èn stadas las duas cuminanzas d’artists expressiunisticas ‹Brücke› e ‹Der Blaue Reiter›.

En il decurs da la segunda mesadad dal 20avel tschientaner è la Documenta a Kassel sa sviluppada tar ina da las pli impurtantas exposiziuns d’art. L’art dal suenterguerra cumpiglia l’ovra multifara da Jörg Immendorff, l’artist d’acziun e conceptualist Joseph Beuys ed ils dus artists Markus Lüpertz e Martin Kippenberger che vegnan attribuids als Novs selvadis.

Durant ils onns 1960 èn sa sviluppadas en la Renania tranter auter cun Nam June Paik, Wolf Vostell e HA Schult novas furmas d’art sco il happening, l’art da video ed il moviment da fluxus. Enconuschents artists da fotografia dal 20avel tschientaner èn stads Helmut Newton, Sigmar Polke e Gunter Sachs.

Entaifer la RDT è surtut stada impurtanta la scola da Lipsia cun Werner Tübke, Bernhard Heisig e Wolfgang Mattheuer. Tar ils pli enconuschents artists contemporans tutgan il neoexpressiunist Georg Baselitz, Anselm Kiefer che stat en la tradiziun da la pictura istorica, Sigmar Polke e Gerhard Richter ch’han marcà il realissem chapitalistic e Rosemarie Trockel ch’è enconuschenta per si’ironia. Artists da l’ost dal temp suenter la vieuta ch’èn daventads fitg enconuschents èn t.a Norbert Bisky, Neo Rauch, Aris Kalaizis e Daniel Richter. 

Tar ils pli impurtants fotografs contemporans tutgan Andreas Gursky, Peter Lindbergh, Wolfgang Tillmans, Horst P. Horst e Thomas Ruff.

La Germania è segnada d’ina istorgia da l’architectura ritga e variada ch’è colliada stretgamain cun ils svilups e las epocas generalas en l’Europa. Ses fundament ha surtut furmà l’architectura da l’antica romana, da la quala èn er sa mantegnids intgins edifizis sco la Porta Nigra a Trier u il teater roman a Mainz ch’è vegnì exchavà a partir dal 1999. Intgins monuments (p.ex. la halla a porta a Lorsch) mussan alura il svilup vers la romanica che cumenza ca. il 1030. La gotica ha inizià en Frantscha e daventa perceptibla en l’intschess dal Sontg Imperi roman a partir da ca. 1230 (per exempel en furma da la Liebfrauenkirche a Trier).

Vers ca. 1520 è la renaschientscha arrivada da l’Italia vers la Germania. Exempels extraordinaris da quest’epoca furman las chasas-cumin dad Augsburg e Bremen.

Il stil dal baroc iniziescha vers il 1650. Ovras prominentas èn quellas da Balthasar Neumann, per exempel la baselgia da Wies u il chastè residenzial Ludwigsburg. Cun il 1770 cumenza il classicissem; exempels furman il Brandenburger Tor da Carl Gotthard Langhans sco er il Vegl museum ed il chastè Charlottenhof a Berlin da Karl Friedrich Schinkel – in architect prussian ch’ha influenzà numerusas generaziuns grazia a ses operar a l’Academia da construcziun a Berlin.

Intginas da las pli enconuschentas ovras da la Germania èn vegnidas erigidas en l’epoca da l’istorissem (ca. 1840 fin 1900). Da numnar èn qua en spezial l’opera da Semper a Dresden, il Dom da Berlin ed il chastè da Schwerin. Impurtants architects da quel temp èn stads Gottfried Semper, Friedrich August Stüler, Friedrich von Gärtner ed ils emprims gronds biros d’architectura sco Cremer  Wolffenstein e Schilling  Graebner. Pervi da l’industrialisaziun, il temp da fundaziun e la gronda creschientscha da la populaziun stat la gronda part da la Germania architectonicamain sut l’influenza da quest temp. Ins ha erigì novs quartiers a l’ur da citads per tut las classas socialas, ma er colonias da villas ed aglomeraziuns fitg populadas. Quartiers dal temp da fundaziun bain mantegnids valan oz en bleras citads sco lieu d’abitar preferì resp. sco quartiers da scena.

A l’entschatta dal 20avel tschientaner èn ils architects tudestgs stads precursurs da la moderna classica. Emprimas ideas en questa direcziun ha sviluppà il Werkbund ch’è vegnì fundà il 1907. Walter Gropius sco fundatur da la Scola da Bauhaus, Ludwig Mies van der Rohe e l’uschenumnà Neues Frankfurt han mess accents areguard la nova moda da bajegiar che duevan influenzar fin il di dad oz l’architectura en tut il mund. Da quel temp han ins er erigì las emprimas chasas autas, surtut a Berlin. In stil modern quasi specific tudestg furma l’expressiunissem. In moviment ch’è sa sviluppà parallelamain al moviment modernistic è stà l’architectura da la protecziun da la patria ch’ha promovì tranter il 1904 e l’entschatta dals onns 1960 in’architectura che s’orientava a las tradiziuns regiunalas. L’architectura dal naziunalsocialissem è stada segnada d’in stil monumental, autocratic; da quel temp han ins erigì edifizis represchentativs sco il Stadion olimpic a Berlin. Il temp da la reconstrucziun suenter la guerra è stà segnà da pragmatissem; igl èn vegnids bajegiads blers edifizis singuls da gronda surfatscha e concepids abitadis sparpagliads. L’architectura da la Republica democratica tudestga è l’emprim stada segnada dal classicissem socialistic, pli tard da la moda da construir industriala a basa da plattas prefabritgadas. La scena d’architectura ha ultra da quai experimentà cun furmas d’expressiun extravagantas per edifizis solitaris. En la Republica Federala Tudestga ha il stadion olimpic postmodern a Minca (1972, architects: Frei Otto e Günther Behnisch) purtà la nova identitad da l’architectura tudestga ora en il mund. Il 1991 è vegnì erigì la Tur da la fiera da Francfurt, cun 256 meters il pli aut sgrattatschiel en tut l’Europa, suandà il 1997 dal Commerzbank Tower che furma fin oz la pli auta chasa auta en Germania. La pli auta structura sin terren tudestg furma la Tur da televisiun da Berlin (1969) cun ses 368 meters.

Ils ultims decennis èn stads segnads d’ina globalisaziun da l’architectura; a medem temp vegnan però er integrads referiments regiunals a models istorics u a la moda da construir locala (quai che vegn er numnà architectura neoclassica). Tras moviments sco il nov urbanissem èn puspè daventadas popularas utilisaziuns maschadadas. Da muntada è en il 21avel tschientaner er la reconstrucziun d’edifizis ch’eran vegnids destruids tras la guerra u ch’eran vegnids demolids, sco la Frauenkirche a Dresden, il chastè da la citad a Berlin, la Potsdamer Mitte cun il chastè da la citad ed il project Dom-Römer a Francfurt. Purtaders tudestgs dal renumà Premi da Pritzker èn Gottfried Böhm e Frei Otto.

La glista dal Patrimoni mundial da l’Unesco enumerescha radund 40 contribuziuns tudestgas. L’emprima ha furmà il 1978 il Dom dad Aachen. Er diversas citads veglias han cuntanschì quest status, tranter auter Stralsund e Wismar, Bamberg, Goslar, Quedlinburg, Lübeck e Regensburg che furma il pli grond cumplex urban dal temp medieval al nord da las Alps. Ultra da quai cumpiglia il Patrimoni mundial er trais cuntradas che fan part dal patrimoni natiral, numnadamain il foss Messel, ils guauds selvadis da faus e la mar dal watt.

En pli exista in program da promoziun per monuments da cultura da muntada naziunala. Tranter il 1950 ed il 2007 han ins promovì 500 monuments cun ina summa totala da radund 280 milliuns euros.

Fitg auts dumbers da visitaders cuntanschan monuments culturals ch’èn colliads cun l’imaginaziun da la romantica tudestga. Igl èn quai tranter auter ils chastels Neuschwanstein, Schwerin e Heidelberg, il chastè Hohenzollern, la Wartburg, la Walhalla, la part superiura dal Rain Mesaun cun ses chastels sco er las citads medievalas da Rothenburg ob der Tauber e Rüdesheim am Rhein.

Adina dapli renconuschientscha e popularitad cuntanschan er ils monuments e maletgs da la citad dal 19avel tschientaner tardiv, per exempel ensembles da l’architectura da bogns u monuments da la revoluziun industriala.

En las citads grondas èn be pli da chattar darar maletgs da la citad istorics, damai che quels èn vegnids destruids durant la Segunda Guerra mundiala u tras reconstrucziuns dal tranterguerras. Excepziuns furman – sper las citads ch’appartegnan al Patrimoni mundial – las citads grondas dad Erfurt, Halle, Heidelberg, Schwerin e Wiesbaden. Citads mesaunas e pitschnas cun in maletg da la citad istoric vaira intact datti percunter numerusas.

En l’entir pajais existan radund 6250 museums (incl. collecziuns publicas, chastels e curtins). La citad da Berlin furma cun ses 170 museums ina da las pli renumadas cuntradas da museums; l’uschenumnada Museumsinsel appartegna schizunt al Patrimoni cultural mundial.

Ulteriurs enconuschents museums sa chattan tranter auter a Minca (Deutsches Museum cun la pli gronda collecziun da las scienzas natiralas e da la tecnica dal mund), Nürnberg (Germanisches Nationalmuseum cun ina ritga collecziun davart la cultura e l’art da la preistorgia) e Dresden (Staatliche Kunstsammlungen).

Perquai che la Germania dispona da la pli lunga tradiziun en la construcziun da l’automobil, è er questa sparta represchentada en furma da blers museums (p.ex. Porsche e Mercedes-Benz a Stuttgart u BMW a Minca).

La festa naziunala ha lieu ils 3 d’october (Tag der Deutschen Einheit). Tut las ulteriuras festas sa drizzan tenor la legislaziun dals singuls pajais federativs. I dat però otg dis da festa che vegnan resguardads en tut ils 16 pajais federativs: venderdi sontg, glindesdi da Pasca, Ascensiun, glindesdi da Tschuncaisma, ils dus dis da festa da Nadal, Bumaun ed il di da la lavur.

La Germania è enconuschenta lunsch enturn per sias ritgas tradiziuns dal temp da Nadal sco fieras da Nadal, pignols da Nadal, decoraziuns tipicas sco chalenders d’advent u piramidas da Nadal ed er spezialitads culinaricas sco brassads, butschelluns u pizieutas.

Ina da las pli grondas attracziuns turisticas è l’Oktoberfest a Minca che furma cun radund 7 milliuns visitaders la pli gronda festa populara dal mund. Daspera attira er il Cannstatter Volksfest (a Bad Cannstatt) mintg’onn in public da radund 4,5 milliuns persunas. Impurtantas occurrenzas da tschaiver han surtut lieu a Cologna, Mainz e Düsseldorf.

A Kiel ha lieu dapi la fin dal 19avel tschientaner la Kieler Woche che furma la pli gronda occurrenza da navigar a vela dal mund ed a medem temp ina da las pli grondas festas da stad da tut l’Europa dal Nord. Ulteriuras grondas festivitads vegnan manadas tras al port da Hamburg (Hamburger Hafengeburtstag e Cruise Days).

 
La cuschina tradiziunala tudestga variescha da regiun tar regiun. Per ordinari è ella colliada cun las culturas dals pajais vischins. Enconuschentas tratgas èn t.a. brassà d’auca cun giabus cotschen, costas-portg cun crut asch, giabus da feglia cun metina sco er diversas plattadas. Surtut en la Germania dal Nord vegnan cuschinads tartuffels en tut las variaziuns, en il sid percunter gnocs, bizochels e tagliarins. Atgnadads regiunalas èn per exempel la liongia alva bavaraisa u las Maultaschen a Baden-Württemberg (ina sort raviolis emplenids cun manizzaditsch e legums).

La Germania è enconuschenta per sia fitg veglia tradiziun da producir biera. Blers Tudestgs prefereschan las sorts producidas en la regiun. Daspera datti er ina viticultura che tanscha enavos en il temp dals Romans (surtut en il sid e vest dal pajais, p.ex. a la Mosel).

Sco ulteriura spezialitad tudestga è da menziunar la turta dal Guaud Nair ch’è daventada enconuschenta ed appreziada lunsch sur ils cunfins dal pajais ora. 

L’istorgia da las assicuranzas socialas en Germania cumenza gia en l’Imperi tudestg dal 19avel tschientaner. Successivamain èn vegnidas vitiers ulteriuras prestaziuns da transfer socialas, uschia ch’il stadi impunda oz ina gronda part da ses budget per quest sectur.

Daspera exista er ina gulivaziun da finanzas tranter ils singuls pajais federativs. Quella duai garantir che las relaziuns da viver en las singulas parts dal pajais na divergeschian betg memia fitg ina da l’autra.

Il sistem da sanadad tudestg è sviluppà autamain, sco che mussan las cifras distinctivas usitadas: la rata da mortalitad dals uffants è fitg bassa cun 3,72 sin 1000 naschientschas, l’aspectativa da vita giascha tar 77,9 onns tar ils umens e 82,9 onns tar las dunnas e la procentuala d’operaziuns che vegnan manadas tras cun success è fitg auta.

Il sistem da furmaziun sa chatta en la cumpetenza dals pajais federativs; a nivel naziunal vegn la lavur però coordinada en la conferenza dals ministeris da cultus. Tut tenor il pajais exista in’obligaziun d’ir a scola che dura tranter nov e tredesch onns. Las scolas da furmaziun generala han ina durada d’almain nov onns. Silsuenter pon vegnir absolvidas scolas cuntinuantas u scolas professiunalas. En la gronda part dals pajais federativs è il sistem da scola sutdividì en scola primara (Hauptschule), scola reala e gimnasi. L’access a las scolas autas (Abitur) vegn cuntanschì – tut tenor il pajais federativ – suenter dudesch u tredesch onns da furmaziun.

Praticamain tut ils giuvens creschids frequentan suenter la scola in’instituziun da furmaziun cuntinuanta. Emprendists en manaschis visitan per ordinari in fin dus dis l’emna la scola professiunala. Students pon tscherner tranter scolas autras universitaras u professiunalas.

Las expensas statals sin il champ da la furmaziun giaschan sut la media dals stadis commembers da l’OECD. Da vart da lezza instituziun vegn surtut er fatg valair ch’ils resultats dals uffants cun biografia da migraziun (a chaschun dals studis da PISA) dumondian suenter in’adattaziun dal sistem da furmaziun.

A la scienza e tecnologia vegn attribuida ina gronda valur en Germania. Il 2011 èn radund 10 % da tut las dumondas da patenta vegnidas inoltradas en Germania; suenter ils Stadis Unids ed il Giapun è la Germania situada uschia sin la terza plazza mundiala. 

Da la Germania derivan numerus perscrutaders da tut las spartas da las scienzas modernas. Dapli che 100 titulars dal Premi Nobel vegnan attribuids al pajais. Albert Einstein e Max Planck han mess cun lur teorias il crap da fundament da la fisica teoretica, a basa da la quala Werner Heisenberg e Max Born han cuntinuà a perscrutar. Wilhelm Conrad Röntgen, l’emprim titular dal Premi Nobel da fisica, ha scuvert ed intercurì ils radis da Röntgen ch’èn vegnids numnads tenor el. Heinrich Hertz ha scrit impurtantas lavurs areguard la radiaziun electromagnetica ch’èn da muntada fundamentala per la tecnica da telecommunicaziun odierna. Las invenziuns da Nikolaus Otto, Rudolf Diesel, Gottlieb Daimler e Carl Benz han revoluziunà il sistem da traffic ed er ils Zeppelins, numnads tenor lur inventader, èn enconuschents en tut il mund.

La perscrutaziun chemica è avanzada a moda decisiva grazia a las lavurs da Carl Wilhelm Scheele, Otto Hahn e Justus von Liebig. Ulteriurs nums ch’èn colliads a moda essenziala cun l’istorgia da la tecnologia èn Johannes Gutenberg (stampa da cudeschs), Philipp Reis (telefon), Werner von Siemens (electrotecnica), Wernher von Braun (tecnologia da rachetas) e Konrad Zuse (computer). Er blers impurtants matematichers derivan da la Germania, uschia per exempel Adam Ries, Friedrich Bessel, Richard Dedekind, Carl Friedrich Gauss, David Hilbert, Emmy Noether, Bernhard Riemann, Karl Weierstrass e Johannes Müller (Regiomontanus). Auters impurtants perscrutaders e sciencists tudestgs èn l’astronom Johannes Kepler, l’archeolog Heinrich Schliemann, il biolog Christiane Nüsslein-Volhard, il scienzià universal Gottfried Wilhelm Leibniz, il perscrutader da la natira Alexander von Humboldt, il scienzià da religiun Max Müller, l’istoriograf Theodor Mommsen, il sociolog Max Weber ed il perscrutader da la medischina Robert Koch.

Sper ils emetturs da televisiun da dretg public ARD e ZDF enconuscha la Germania ina vasta paletta d’emetturs da televisiun privats. Da quella fa part la gruppa ProSiebenSat.1, la RTL Group e divers emetturs regiunals. Igl existan però er blers emetturs da dretg public a nivel dals pajais federativs.

Tar il radio domineschan emetturs regiunals da dretg public sco Westdeutscher Rundfunk (WDR) u Bayerischer Rundfunk (BR). Daspera existan er qua numerus emetturs privats. 

La pressa tudestga è fitg vasta e variada. Las gasettas dal di surregiunalas che vegnan legidas il pli savens èn ‹Bild›, ‹Frankfurter Allgemeine Zeitung›, ‹Die Welt›, ‹Süddeutsche Zeitung›, ‹Handelsblatt› sco er la gasetta emnila ‹Die Zeit›. Magazins da novitads che cumparan ina giada l’emna èn t.a. ‹Der Spiegel›, ‹Focus› e ‹Stern›.

Il sport il pli frequent en Germania è il ballape. Radund 6,8 milliuns commembers èn organisads en radund 172 000 squadras che fan part dal Deutscher Fussball-Bund. Quel ha organisà ils campiunadis mundials da ballape dal 1972 e 2006. L’equipa naziunala è daventada campiun mundial ils onns 1954, 1974, 1990 e 2014.

La Bundesliga da ballamaun vegn savens considerada sco ina da las meglras dal mund. L’equipa naziunala dals umens è daventada il 2007 per la terza giada campiun mundial. 

Tradiziunalmain vegn er il sport motorisà, surtut la furmla 1, persequitada cun grond interess. Qua han tant constructurs sco er manischunzs tudestgs adina puspè cuntanschì gronds success. Michael Schumacher ha gudagnà sco sulet set titels da campiun mundial e Sebastian Vettel è stà il pli giuven campiun mundial insumma.

Er en il sport da skis cuntanschan atlets tudestgs adina puspè medaglias en las pli diversas disciplinas, per exempel Sven Hannawald e Jens Weissflog en il sigl cun skis u Katarina Witt ch’ha gudagnà en il patinadi artistic duas giadas aur als gieus olimpics. En il hockey è la Germania daventada il 2002 e 2006 campiun mundial sco er il 1972, 1992, 2008 e 2012 campiun olimpic.

Il Reich tudestg ha manà tras il 1936 tant ils gieus olimpics da stad (a Berlin) sco er ils gieus olimpics d’enviern (a Garmisch-Partenkirchen). Ultra da quai han ils gieus olimpics da stad gì lieu il 1972 a Minca.

En auters sports dependa la popularitad dal success actual da singuls atlets. Rudi Altig (ils onns 1960) e Jan Ullrich (ils onns 1990, però sumbrivà d’inquisiziuns pervi da doping) han mintgamai dominà il ciclissem; Boris Becker, Steffi Graf e Michael Stich il tennis ils onns 1980/90.




#Article 13: Liechtenstein (5303 words)


 

Il Liechtenstein, uffizial Principadi da Liechtenstein (Fürstentum Liechtenstein), è in stadi situà en l’Europa Centrala. Cun sia surfatscha da 160 km² furma el il sisavel pitschen stadi dal mund. Il Liechtenstein è ina monarchia ereditara constituziunala a basa d’elements democratics e parlamentars. La suveranitad giascha tant tar il pievel sco tar il prinzi che deriva da la chasa von Liechtenstein. Il Liechtenstein è in pajais da las Alps e cunfinescha en il vest cun la Svizra ed en l’ost cun l’Austria. Il territori statal è sutdividì en dus circuls electorals ed en indesch vischnancas. Vaduz è la chapitala ed a medem temp la sedia dal prinzi da Liechtenstein. Triesenberg è la pli gronda vischnanca, entant che Schaan furma la vischnanca cun ils pli blers abitants. La cuntrada dal Principadi è segnada da la Part Sut (Unterland) al nord che vegn cultivada intensivamain e da la Part Sura (Oberland) al sid ch’è pli muntagnarda.

Cun radund 37 000 abitants è il Liechtenstein il pli pitschen stadi dal territori da lingua tudestga ed a medem temp il sulet stadi, en il qual il tudestg è la suletta lingua uffiziala e naziunala. La cumpart dad esters munta a 34 %.

Cun la fundaziun da la Confederaziun dal Rain l’onn 1806 è il Principadi daventà facticamain independent; dapi il Contract da duana dal 1923 è el lià administrativamain ed economicamain ferm a la Svizra. Plinavant è il Principadi commember da las Naziuns Unidas e dal Spazi economic europeic, ma betg da l’Uniun europeica.

Pli baud era il Principadi da Liechtenstein enconuschent sco oasa fiscala. Suenter diversas afferas a l’intern ed intervenziuns da l’exteriur è il Liechtenstein s’associà il november 2013 ad ina cunvegna internaziunala cunter la fugia da taglia.

Il Liechtenstein fa – sco ses vischins Svizra ed Austria – part dals stadis en l’Europa Centrala che na cunfineschan betg cun la mar. Ils cunfins statals èn segnads dal Rain e da las Alps; en il vest giascha il chantun Son Gagl, en il sid il Grischun ed en l’ost il Vorarlberg (Austria). Il cunfin vers la Svizra furma il Rain; il cunfin vers l’Austria è per gronda part situà sin il fil da la chadaina dal Reticon.

Il pajais cuvra ina surfatscha da 160,475 km² ed è uschia il quart pitschen stadi da l’Europa ed il sisavel pitschen dal mund. La lunghezza dal stadi munta 12,35 km, la ladezza 24,77 km.

Il Liechtenstein sa divida en duas cuntradas: en il vest giascha la Val dal Rain che furma la zona da colonisaziun principala; en l’ost è situà la Val Samina cun sias vals lateralas. La part sut da la Val Samina è gia situada da vart austriaca e finescha sper Frastanz en la part inferiura dal Walgau. Questa part orientala dal Liechtenstein è spartida da la Val dal Rain tras ina collina da 1000 fin 2000 meters autezza ed è strusch populà (cun excepziun da Malbun), ma cumpiglia radund in terz da la surfatscha dal pajais.

Ultra da quai sa lascha il pajais sparter en duas regiuns, la Part Sut e la Part Sura. La Part Sut cumpiglia las vischnancas en il nord da Schaan e Planken (ca. sin l’autezza da la muntogna da las Drei Schwestern), entant che la Part Sura cumpiglia la part en il sid incl. la chapitala Vaduz. Areguard la structuraziun dal spazi natiral è la Part Sura pli alpina, entant che la Part Sut giascha per gronda part en la planira da la Val dal Rain.

Radund la mesadad dal territori statal è situà en la muntogna. Il Liechtenstein giascha cumplainamain en il Reticon ed appartegna uschia – tut tenor la divisiun – a las Alps da l’Ost (sch’ins parta las Alps en duas parts) u a las Alps Centralas (sch’ins divida las Alps en trais regiuns).

Il punct il pli aut dal Liechtenstein furma il Vorderer Grauspitz (2599 m s.m.); il punct il pli bass è il Ruggeller Riet che sa chatta sin 430 m s.m.

En tut datti en il Liechtenstein 32 muntognas che cuntanschan in’autezza da 2000 meters. Il punct il pli en il sid è il Falknishorn (2452 m s.m.); il cunfin dals trais pajais Liechtenstein, Svizra (Grischun) ed Austria (Vorarlberg) furma il Naafkopf (2570 m s.m.).

Sper ils pizs da la chadaina alpina che fan part da las Alps da chaltschina, cumpiglia il pajais er duas muntognas ad insla che fan part da la stresa helvetica resp. da la zona da Flysch: il Fläscherberg en il sid (1135 m s.m.) e l’Eschnerberg en il nord che furma in impurtant territori d’abitadi en la Part Sut dal Liechtenstein.

Il Rain è il pli impurtant e pli lung flum en il Liechtenstein. Sin ina lunghezza da radund 27 kilometers furma el il cunfin natiral vers la Svizra. En pli è el d’impurtanza centrala per il provediment d’aua e sco zona da recreaziun locala. Il segund lung flum furma la Samina cun 12 kilometers. Quest torrent nascha al Triesenberg e cula la finala en l’Austria en l’Ill (per sa colliar sper Feldkirch cun il Rain).

Il sulet lai natiral che sa chatta sin il territori dal Liechtenstein è il Gampriner Seele. Quest lai è vegnì furmà pir il 1927 tras in’inundaziun dal Rain colliada cun gronda erosiun. Daspera datti dentant ulteriurs lais artifizials che vegnan per gronda part duvrads per la producziun da forza electrica. In dad els è il lai da fermada Steg che furma il pli grond lai dal Liechtenstein.

Malgrà la situaziun muntagnarda è il clima dal pajais plitost miaivel. El vegn influenzà fermamain dal favugn (in vent che croda da caracter chaud e sitg). Tras quai vegn prolungà il temp da vegetaziun durant la primavaira e l’atun; en pli po in ferm favugn er manar durant l’enviern a temperaturas da var 15 °C. L’aria fraida atlantica e polara retegnan las chadainas da muntognas svizras ed austriacas, uschia ch’il Liechtenstein sa chatta en ina tipica posiziun da protecziun interalpina. Tras quai posseda il Principadi culturas da puma cun prads da sternim ed ina lunga tradiziun da viticultura.

L’enviern croda la temperatura darar sut minus 15 °C; la stad sa mova la temperatura en media tranter 20 e 28 °C. Las precipitaziuns muntan tranter 900 e 1200 mm l’onn (ordaifer la zona interalpina èn quai var 1900 mm). La durada da la radiaziun dal sulegl munta a radund 1600 uras ad onn.

Il Liechtenstein dumbra bundant 37 000 abitants (situaziun dal 2013). Radund dus terzs èn burgais dal Liechtenstein, radund 20 % derivan da l’ulteriur territori da lingua tudestga (10,8 % da la Svizra, 5,9 % da l’Austria e 3,4 % da la Germania), alura suondan mintgamai 3,3 % da l’Italia e da l’anteriura Jugoslavia, 2,6 % da la Tirchia e 4,8 % d’ulteriurs stadis. En tut cumpiglia la populaziun residenta persunas che derivan da radund 90 naziunalitads. La creschientscha da la populaziun sa mova enturn 1,0 %. La spessezza da la populaziun munta a radund 230 persunas per kilometer quadrat.

En il decurs dal temp medieval ha la populaziun dal Liechtenstein – sco da l’entira Rezia Bassa – midà da l’anteriura lingua rumantscha al tudestg. A l’origin rumantsch da la regiun regordan però anc blers nums locals.

La populaziun dal Liechtenstein discurra divers dialects locals alemans che sa differenzieschan per part marcantamain da vischnanca tar vischnanca. Ensemen cun ils dialects vischins dal chantun Son Gagl e dal Vorarlberg èn quels d’attribuir ad ina varietad linguistica da transiziun situada tranter l’aleman mesaun e l’aut aleman. 

L’excepziun furma il dialect autischem aleman-gualser dal Triesenberg. Questa populaziun era arrivada enturn il 1300 en rom da la migraziun dals Gualsers nà dal chantun Vallais odiern.

Lingua scritta e da las medias furma per regla il tudestg da scrittira. Il Liechtenstein è il sulet stadi ch’enconuscha be il tudestg sco lingua uffiziala e naziunala renconuschida. En ils ulteriurs stadis dal territori da lingua tudestga èn er linguas romanas, ulteriuras linguas germanas, linguas slavas u l’ungarais renconuschids sco linguas uffizialas u linguas minoritaras.

Tenor art. 37 II da la constituziun statala è la baselgia catolic-romana renconuschida sco baselgia naziunala e giauda uschia er la cumplaina protecziun statala. Ozendi datti dentant tendenzas creschentas da vulair sparter baselgia e stadi.

Tenor la dumbraziun dal pievel dal 2010 appartegnevan 75,9 % da la populaziun dal Liechtenstein a la baselgia catolic-romana, 8,5 % a la confessiun evangelica e 5,4 % ad ina cuminanza religiusa islamica. 2,2 % eran commembers d’ina autra confessiun cristiana u d’ina autra religiun, 5,4 % èn sa declerads senza confessiun e 2,6 % n’han fatg nagina indicaziun davart lur appartegnientscha religiusa.

Enfin il 1997 ha il Liechtenstein fatg part da l’Uvestgieu da Cuira. Ils 2 da december da lez onn è entrà en vigur l’Archuvestgieu Vaduz, il qual papa Gion Paul II aveva stabilì. Dapi lura è Wolfgang Haas archuvestg e la baselgia parochiala St. Florin a Vaduz è daventada baselgia catedrala. 

Chats archeologics demussan ch’il territori dal Liechtenstein odiern è stà abità dapi il temp neolitic (5avel millenni a.C.). En il fund da la val avess il Rain, che culava libramain, difficultà l’erecziun d’in abitadi; sin las spundas èn percunter sa furmadas las emprimas culegnas. Exempels cumprovads èn la collina dal chastè Gutenberg a Balzers u l’Eschnerberg. L’onn 15 a.C. han ils Romans conquistà las Alps; il territori dal Liechtenstein odiern è daventà ina part da la provinza Raetia. En il decurs da l’emprim tschientaner s.C. han ins construì la via militara Milaun-Briganza che manava per lung da la vart dretga dal Rain sur il Pass da S. Gliezi. Tras quai èn er vegnids endrizzads en il Liechtenstein bains purils e champs fortifitgads.

Suenter la fin da l’Imperi roman dal vest èn immigrads Alemans e la finala è la Rezia vegnida integrada en il 8avel tschientaner en il Reginavel dals Francs ed en il 10avel tschientaner en il ducadi aleman. Da quel temp era il territori dal Liechtenstein dad oz en possess dals conts da Briganza. Ils 3 da matg 1342 han ins dividì l’anteriur domini e constituì il Contadi da Vaduz. En il decurs dals proxims decennis e tschientaners è il contadi daventà repetidamain l’unfrenda da guerras e sblundregiadas, per exempel durant la Veglia Guerra da Turitg (1444–1446) u durant la Guerra svabaisa (1499–1500).

En il decurs dal temp han ils regents da Hohenems fatg adina dapli debits, uschia ch’els èn la finala stads sfurzads da vender il contadi da Vaduz ed il Signuradi da Schellenberg. L’onn 1699 ha prinzi Hans Adam da Liechtenstein acquistà il Signuradi da Schellenberg ed il 1712 il Contadi da Vaduz. Ils 23 da schaner 1719 ha in diplom, emess tras l’imperatur Karl V, collià il Contadi da Vaduz ed il Signuradi da Schellenberg ad in principadi imperial sut il num Liechtenstein. Damai ch’il nov pajais consistiva be da pitschens vitgs purils, han ins installà l’administraziun en la citad la pli vischina, a Feldkirch. Là ha il prinzi laschà eriger per quest intent il Palais Liechtenstein.

Durant las Guerras da coaliziun è il Liechtenstein adina puspè vegnì occupà da truppas estras, quai ch’ha manà ad ina depauperisaziun creschenta da la populaziun locala. Durant l’Emprima Guerra da coaliziun (1792–1797) èn marschadas truppas franzosas en il Principadi; suenter cumbats tranter las truppas austriac-russas e franzosas èn danovamain returnadas durant la Segunda Guerra da coaliziun (1799–1802) truppas napoleonicas. L’onn 1806 ha Napoleoun Bonaparte fundà la Confederaziun dal Rain ed integrà en quella il Principadi da Liechtenstein sco in dals 16 commembers fundaturs. Uschia è il pajais daventà sut prinzi Johann I facticamain independent. Il Congress da Vienna (1814/15) ha confermà l’independenza dal Liechtenstein ed integrà il pajais en la Confederaziun tudestga.

Durant il 19avel tschientaner è il Liechtenstein sa midà be plaun ed è restà sur lung temp sutsviluppà. Ina revoluziun l’onn 1848 n’ha a curta vista betg purtà las midadas giavischadas. Pir il Contract da duana ch’è vegnì concludì il 1852 cun l’Austria ha pussibilità in tschert progress economic; e dapi che la Constituziun dal 1862 è entrada en vigur, na po il prinzi betg pli reger senza restricziun.

Durant l’Emprima Guerra mundiala è il Liechtenstein restà neutral e na fiss betg stà bun da sa defender en cas da guerra, damai che l’armada era gia vegnida dissolvida il 1868 per motivs finanzials. Senza armada n’hai dà nagina mancanza da forzas da lavur, uschia ch’i fiss stà pussaivel da schlargiar l’industria da textilias ch’era vegnida stabilida durant ils decennis precedents. Ma ils alliads han scumandà d’importar fil sur la Svizra, uschia che quest’industria è vegnida interrutta dal tuttafatg. Quai ha manà a l’impovriment da la populaziun. Suenter la fin da la guerra ha il Liechtenstein schlià il Contract da duana cun l’Austria ch’aveva pers la guerra.

Curt suenter ch’il Contract da duana cun l’Austria è vegnì schlià il 1919, è il Liechtenstein s’avischinà a la Svizra ed ha fatg cun quella il Contract da duana dal 1923, il qual è en vigur fin oz. Suenter che l’Austria è s’alliada il mars 1938 al Reich tudestg, ha prinzi Franz Josef II decidì – sco emprim prinzi dal Liechtenstein insumma – da transferir sia sedia a Liechtenstein sin il chastè da Vaduz.

Er durant la Segunda Guerra mundiala è il Liechtenstein sa declerà neutral e n’è mai stà involvì en acziuns da guerra. Il cuntrari ha il Principadi profità da ses avantatgs dal lieu: nagina mancanza da lavurers tras il servetsch militar, posiziun centrala, uniun da duana cun la Svizra neutrala, avantatg da taglia e stabilitad politica. Quai ha manà a la fundaziun da novas interpresas industrialas ed ha inizià ina ferma creschientscha economica.

Suenter la fin da la Segunda Guerra mundiala ha il Liechtenstein pudì sa sviluppar plaunsieu ad in’impurtanta plazza economica segnada da gronda stabilitad politica. Il dretg da vuschar da las dunnas han ins però introducì pir il 1984 ed er a las Naziuns unidas è il Liechtenstein s’associà pir il 1990. 

D’impurtanza per il svilup economic è er stada la participaziun al Spazi economic europeic (SEE). Quella è vegnì decidì il 1992 tras votaziun dal pievel, e quai paucas emnas suenter che la Svizra aveva refusà da daventar commembra dal SEE. La commembranza al Spazi economic europeic ha garantì las quatter libertads economicas (persunas, rauba, servetschs e chapital) tranter il Liechtenstein e l’Uniun europeica sco er ils ulteriurs commembers dal SEE (Norvegia ed Islanda).

Il 2004 ha prinzi Hans-Adam II nominà ses figl e prinzi ereditar Alois da Liechtenstein sco ses substitut ed al ha incumbensà d’exequir ils dretgs suverans che cumpetan al prinzi. Il titel da prinzi vegn però pir a passar a ses figl suenter la mort da Hans-Adam.

L’onn 2008 è il Liechtenstein stà involvì en in’affera da taglia cun la Germania, en rom da la quala è vegnì enconuschent che numerus burgais da la Germania ed er d’ulteriurs pajais hajan defraudà taglia cun deponer lur facultad sin contos bancars en il Liechtenstein. La dumonda co ch’il Liechtenstein vul sa posiziunar en avegnir areguard dumondas fiscalas n’è anc betg respundida dal tuttafatg.

Tenor la Constituziun vertenta sa definescha il Liechtenstein sco «monarchia ereditara constituziunala a basa d’elements democratics e parlamentars». La basa parlamentar-democratica furma il dretg dal pievel d’eleger e relaschar ils represchentants da la legislativa; plinavant po il pievel far dretg da tscherts elements da la democrazia directa.

La pussanza statala vegn exequida tenor art. 2 da la Constituziun «tras il prinzi ed il pievel e vegn exercitada dad omaduas partidas confurm a las disposiziuns da questa Constituziun». Sco schef da stadi po il prinzi schliar la Dieta; medemamain vegn la regenza nominada dal prinzi sin proposta da la Dieta; tras il dretg da sancziun po el en pli revocar leschas decididas dal parlament e dal pievel.

La pussanza legislativa giascha en ils mauns dal prinzi e dal parlament, numnà Dieta (Landtag). La Dieta consista da 25 represchentants che vegnan elegids dal pievel mintga quatter onns tenor il dretg d’elecziun da proporz. En il circul electoral Part Sut vegnan elegids 10 ed en il circul electoral Part Sura 15 represchentants. La legislaziun vegn reglada en l’artitgel 65 da la Constituziun. Tenor quest artitgel na dastgan naginas leschas vegnir decididas u midadas senza la participaziun da la Dieta. Suenter che quella ha deliberà ina lescha, sto quella vegnir sancziunada dal prinzi. Sche quai na succeda betg entaifer sis mais, vala la lescha sco refusada.

La cuntrada politica dal Liechtenstein vegn dominada da duas partidas conservativas, numnadamain da la Vaterländische Union e da la Fortschrittliche Bürgerpartei. La Vaterländische Union è represchentada pli ferm en la Part Sura e vala sco pli liberala ed orientada vers la Svizra, entant che la Fortschrittliche Bürgerpartei è plitost da chasa en la Part Sut e vala sco fidaivla al prinzi e favuraivla a l’Austria. Abstrahà da quai na datti naginas differenzas ideologicas pli grondas tranter las duas partidas grondas. Il 2013 ha la nova gruppaziun Die Unabhängigen gudagnà surprendentamain 15,3 % da las vuschs. 

La regenza che furma l’executiva ha num Cussegl guvernativ (Regierungsrat). Ella sa cumpona dal schef da la regenza e da quatter cussegliers guvernativs. Las fatschentas da la regenza èn repartidas sin 15 ressorts. Ils cussegliers guvernativs vegnan proponids da la Dieta e designads tras il prinzi. Il 2003 è entrà en vigur in nov artitgel constitutiv (ordvart contestà), tenor il qual il prinzi ha il dretg da relaschar da tut temp l’entira regenza u singuls cussegliers guvernativs, e quai senza inditgar motivs.

La davosa instanza entaifer la giurisdicziun statala furma il Tribunal suprem che sa cumpona da tschintg derschaders. Quels vegnan designads d’in gremi electoral cun il prinzi a la testa. Chastis d’arrest da fin dus onns vegnan expiads en la praschun a Vaduz, chastis pli auts percunter en ina praschun en l’Austria; quai è reglà uschia en ina cunvegna bilaterala tranter ils dus pajais.

La paina da mort ha la Dieta abolì formalmain pir il 1987. Damai ch’il dretg penal s’orientava a la veglia legislaziun austriaca dal 1852, era la paina da mort previsa fin là sco chasti maximal, e quai cumbain ch’ella n’era betg pli vegnida exequida dapi il 1784. Anc il 1977 era in assassin vegnì sentenzià tras la dretgira criminala a la mort; il prinzi ha lura transfurmà questa paina en in chasti d’arrest.

Il sistem politic dal Liechtenstein enconuscha in ferm element directdemocratic. 1000 burgais pon pretender ina sesida extraordinaria da la Dieta e 1500 burgais pon pretender ch’i vegnia realisà ina votaziun dal pievel davart sia dissoluziun. Medemamain pon 1000 burgais dumandar la Dieta da relaschar, midar u schliar ina lescha. Mintga lescha vegn suttamessa al pievel sche la Dieta decida quai ubain 1000 burgais resp. almain trais vischnancas. Per midar la Constituziun u contracts internaziunals dovri almain 1500 burgais u quatter vischnancas. La Constituziun dal 2003 ha schlargià marcantamain ils dretgs democratics.

Il dretg da vuschar da las dunnas è pir vegnì introducì tar la terza emprova l’onn 1984. Il 1976 aveva la Dieta relaschà ina midada da la Constituziun, tenor la quala las vischnancas han pudì introducir il dretg da votar da las dunnas a nivel communal.

En temps da crisa èsi admess al prinzi da sa referir ad in dretg d’urgenza (art. 10 da la Constituziun dal Liechtenstein).

L’administraziun dal Liechtenstein (numnada Administrativa) sa cumpona da 46 posts da servetschs ch’èn per gronda part suttamess directamain a la Dieta.

Per mancanza da pussanza militara u politica è il Liechtenstein sa stentà ils ultims 200 onns da mantegnair l’independenza statala tras commembranzas en cuminanzas da dretgs. La cooperaziun internaziunala e l’integraziun europeica furman perquai constantas entaifer la politica da l’exteriur dal Principadi. Per legitimar questa politica da l’exteriur e la render persistenta, èn ils mecanissems da la democrazia directa da grond’impurtanza. Quels èn francads en la Constituziun dapi il 1921.

Impurtantas etappas istoricas en il process d’integraziun e da cooperaziun han furmà l’adesiun a la Confederaziun dal Rain il 1806, a la Confederaziun tudestga il 1815, la cunvegna da duana e da valuta cun l’Austria il 1852 e la finala il Contract da duana cun la Svizra il 1923, al qual è suandada in’entira retscha da cunvegnas bilateralas.

Suenter il restabiliment economic dal suenterguerra è suandada il 1950 l’adesiun al Statut dal Tribunal internaziunal, la signatura da l’Acta finala da Helsinki da l’Organisaziun per la segirezza e la collavuraziun en l’Europa odierna (1975) sco er l’adesiun al Cussegl da l’Europa (1978) ed a las Naziuns Unidas (1990). 1991 è il Liechtenstein daventà commember cumplain da l’Associaziun europeica da commerzi liber ed il 1995 dal Spazi economic europeic e da l’Organisaziun mundiala da commerzi. Il 2008 ha il Principadi plinavant segnà la Cunvegna da Schengen/Dublin.

Las represchentanzas consularas dal Liechtenstein surpiglia per gronda part la Svizra. Atgnas represchentanzas diplomaticas ha il Liechtenstein a Vienna, Berna, Berlin, Brüssel, Strassburg e Washington, D.C. sco er missiuns permanentas a New York e Genevra tar las Naziuns unidas. En il Liechtenstein èn accreditadas represchentanzas diplomaticas da radund 80 pajais; quellas residieschan però per gronda part a Berna.

L’ambassada a Brüssel tgira ils contacts cun l’Uniun europeica, la Belgia e la Sedia papala. Las relaziuns cun la Svizra èn spezialmain stretgas e vastas; per part surpiglia la Svizra incumbensas statalas che fissan strusch da dumagnar per in stadi da la grondezza dal Liechtenstein. L’onn 2000 ha la Svizra er nominà in ambassadur envers il Liechtenstein; quel residiescha però a Berna. 

Il 1866 ha l’Austria pers cunter la Prussia en la Guerra tudestga. Sinaquai ha la Prussia dissolvì la Confederaziun tudestga e fundà la Confederaziun tudestga dal nord, la quala dueva vegnir transfurmada il 1871 – suenter la victoria encunter la Frantscha – en l’Imperi tudestg.

Ils 12 da favrer 1868 ha prinzi Johann da Liechtenstein decidì «en vista a las midadas actualas entaifer l’organissem statal da la Germania» ch’i saja «en l’interess da mes Principadi da desister d’in contingent militar». Dapi lura na posseda il Liechtenstein nagina armada pli. Per la segirezza a l’intern ed il cumbat cunter la criminalitad è responsabla la polizia statala; singulas vischnancas han ultra da quai in’atgna polizia communala.

Durant la Segunda Guerra mundiala vuleva la Svizra integrar il territori dal Principadi da Liechtenstein en il dispositiv da la defensiun da la patria. Il territori dal Liechtenstein avess numnadamain purschì bunas premissas per attatgar la vart svizra da la Val dal Rain. Il Liechtenstein ha dentant refusà questas tentativas, damai ch’el temeva che quai pudess engrevgiar las atgnas relaziuns cun la Germania naziunalsocialistica. Er suenter la guerra ha la Svizra insistì da schliar quest problem. En pliras etappas ha il Liechtenstein la finala surdà – cunter indemnisaziun finanziala e territoriala – puncts d’impurtanza strategica a la Svizra; il davos è quai stà il 1949 l’Ellhorn, situà directamain al Rain.

Enfin oz n’exista nagin contract en il qual i fiss previs il dretg u l’obligaziun d’intervenziun da vart da la Svizra en il cas ch’i dess in’attatga da terzs sin il territori dal Liechtenstein.

Il Liechtenstein sa divida en indesch vischnancas ch’èn repartidas sin ils dus circuls electorals Part Sut e Part Sura. Malgrà che questas vischnancas èn pitschnas, è lur extensiun territoriala per part detg cumplexa. Set vischnancas cumpiglian sper la part principala er ina u pliras exclavas. La divisiun dal pajais en duas parts ha motivs istorics: la Part Sut deriva dal Signuradi Schellenberg, la Part Sura dal Contadi Vaduz.

Da la Part Sut fan part las vischnancas Eschen, Gamprin, Mauren, Ruggell e Schellenberg; a la Part Sura (ch’è tenor la surfatscha bainquant pli gronda) appartegnan las vischnancas da Balzers, Planken, Schaan, Triesen, Triesenberg e Vaduz.

La rait da vias dal Liechtenstein cumpiglia 105 kilometers vias catramadas; vitiers vegnan 25 kilometers vias champestras e vias da guaud. Il Liechtenstein sez na posseda naginas autostradas, l’autostrada A 13 percurra però la Val dal Rain da la vart svizra en proxima vischinanza dal cunfin statal. Tschintg sortidas da quest’autostrada èn er colliadas cun abitadis dal Liechtenstein.

En general èn las raits da vias da la Svizra e dal Liechtenstein colliadas stretgamain ina cun l’autra. Uschia cumenzan resp. fineschan las vias principalas svizras 16 e 28 en il Liechtenstein.

Er areguard las reglas da traffic vala – cun pitschnas excepziuns – il dretg svizzer. Ils numers da l’auto sa tegnan areguard la scrittira e l’arranschament medemamain al model svizzer; cuntrari als numers svizzers sa cumponan quels dal Liechtenstein però da segns alvs sin fund nair.

Il traffic public ha ina rait fitg vasta che collia tut las indesch vischnancas. Il pli impurtant med public furman ils bus da l’interpresa da transport LiechtensteinMobil. En tut mainan 13 differentas lingias tras il pajais e collian er las vischnancas da Sargans e Buchs (staziuns da las VFF) sco er Sevelen e la citad austriaca Feldkirch cun il Liechtenstein. Ultra da quai cursescha la lingia da bus 70 da l’Associaziun da traffic Vorarlberg pliras giadas a di tranter Schaan, Feldkirch e Klaus (en il Vorarlberger Vorderland), e quai da temps che correspundan a la lavur en squadras da las grondas firmas da la regiun.

La suletta lingia da viafier che maina tras il Liechtenstein è quella tranter Feldkirch (Austria) e Buchs (Svizra) che sa chatta en possess da las ÖBB. Sin ils radund 9,5 kilometers che giaschan entaifer il territori dal Liechtenstein tegnan trens regiunals a las trais staziuns Forst-Hilti, Nendeln e Schaan-Vaduz. Ultra da quai curseschan ils trens internaziunals da Vienna/Salzburg a Turitg sin quest traject.

Cun il project da viafier urbana FL.A.CH èsi previs d’augmentar la purschida da traffic regiunal sin il traject Feldkirch–Buchs e d’animar pendularis da far diever pli fitg dal traffic public.

En il Liechtenstein sez na datti nagina plazza d’aviaziun; a Balzers exista in heliport che vegn manà a basa privata. La plazza d’aviaziun ch’è situada il pli datiers dal Liechtenstein è quella da Son Gagl-Altenrhein. La plazza d’aviaziun da Friedrichshafen sa chatta en ina distanza da 90 kilometers da Vaduz, quella da Turitg/Kloten en ina distanza da radund 115 kilometers.

Er areguard l’urden postal è il Liechtenstein collià stretgamain cun la Svizra. Tuttina exista ina posta independenta (Liechtensteinische Post AG), la quala edescha er atgnas marcas postalas. Medemamain posseda il Liechtenstein in’atgna preselecziun telefonica (+423).

L’economia dal Principadi sa concentrescha en emprima lingia sin ils secturs secundar (industria) e terziar (servetschs). L’agricultura attribuescha be 2 % al product naziunal brut (PNB). Quel cumpigliava il 2011 radund 5,14 milliardas francs svizzers.

Da las persunas che lavuran en il Liechtenstein èn bundant 50 % betg domiciliadas en il pajais sez, mabain penduleschan nà da la Svizra (2009: 8631 persunas) e da l’Austria (7470 persunas). Perquai na pon ins en il cas dal Liechtenstein betg trair conclusiuns directas dal PNB areguard la situaziun d’entradas da la populaziun indigena.

Il 2009 lavuravan 261 persunas en l’agricultura, quai che correspunda a 0,8 %. La gronda part dals manaschis è sa spezialisada sin la tegnida d’animals. Dals 123 manaschis dal 2009 eran 25 situads en la zona da muntogna.

Bleras interpresas èn activas sin ils champs da la construcziun da maschinas ed en l’industria d’alimentaziun. Savens possedan ellas er ulteriuras plazzas da producziun a l’exteriur. Impurtantas interpresas che derivan dal Liechtenstein èn: Hilti AG, ThyssenKrupp Presta AG, Hoval AG, Hilcona AG, Ivoclar Vivadent AG ed OC Oerlikon Balzers.

L’onn 2009 eran 57,9 % da las persunas cun activitad da gudogn activas en il sectur dals servetschs. Ina gronda part dad ellas lavurava en l’administraziun publica, en la furmaziun ed en il sectur da la sanadad.

Daspera appartegnevan 17 % da las plazzas da lavur al sectur da finanzas, il qual attribuescha radund 27 % al product naziunal brut. Quest sectur è adina puspè vegnì sut squitsch pervia da l’uschenumnà «dretg da fundaziun» statal che garantiva als investiders anonimitad absoluta. Be l’affera cun la Germania ha gì per consequenza che taglias en l’autezza da radund 807 milliuns euros han stuì vegnir pajadas suenter. Igl è da supponer ch’il squitsch sin pussaivladads da mitschar da la taglia – tant en il Liechtenstein sco er en auters pajais – vegnia anc a crescher en l’avegnir.

Il 2008 ha il budget statal serrà cun expensas da radund 820 milliuns dollars ed entradas da radund 943 milliuns dollars. Da quai resulta in avanzament da 2,6 % dal product naziunal brut. Sco in dals paucs stadis insumma, n’ha il Liechtenstein nagins debits dal stadi.

La vita culturala dal Liechtenstein viva da l’in sper l’auter da tradiziuns localas e d’in intensiv stgomi internaziunal. 

Purtaders da producziuns teatralas e musicalas èn surtut singulas uniuns. Las pli impurtantas èn: Operettenbühne Balzers, Operettenbühne Vaduz, Liechtenstein Musical Company ed Opern Verein Vaduz. Tut las quatter organisaziuns numnadas realiseschan per regla ina nova producziun en il turnus da dus onns.

Il Theater am Kirchplatz (TaK) a Schaan è la pli impurtanta sala da teater e da concerts dal Liechtenstein. Dapi l’october 2003 datti plinavant a Vaduz il Theater Schlösslekeller, nua ch’il «Liechtenstein Gabarett» (LiGa) realisescha mintg’onn in nov program.

Il 1978 han ins fundà il P.E.N.-Club Liechtenstein, uschia ch’er questa enconuschenta federaziun internaziunala d’auturs è represchentada al lieu. Il P.E.N.-Club surdat premis e stipendis ed organisescha prelecziuns.

Il Kunstmuseum Liechtenstein è il museum statal per art modern e contemporan a Vaduz. L’edifizi dals architects Meinrad Morger, Heinrich Degelo e Christian Kerez è vegnì terminà il 2000. La collecziun dal museum cumpiglia art modern e contemporan internaziunal che tanscha dal 19avel tschientaner fin al temp preschent. Plinavant vegnan adina puspè mussadas en exposiziuns spezialas ovras or da las vastas collecziuns dal prinzi. 

Il Liechtensteinisches Landesmuseum è vegnì reavert il 2003 suenter renovaziuns cumplessivas. El preschenta l’istorgia, la cultura e la natira dal pajais. 

Ulteriurs museums èn il Museum da skis ed il Museum da la posta sco er divers museums locals, tranter els il Gasometer che furma il center da cultura da la vischnanca da Triesen.

Ils 15 d’avust è il di da la festa naziunala dal Principadi da Liechtenstein. Per l’ina vegn festivà quest di l’Assumziun da Maria, per l’autra aveva l’anteriur prinzi Franz Josef II (1906–1989) ils 16 d’avust anniversari. Questas duas festas han ins cumbinà l’emprima giada il 1940 ad ina festa naziunala. Ed er suenter la mort dal prinzi han ins mantegnì questa data.

Il Liechtenstein enconuscha in temp da scola da nov onns. Quel è dividì en tschintg onns scola primara ed almain quatter onns scola secundara. Ordavant po vegnir visità voluntarmain la scolina. Il stgalim secundar è partì en ils nivels reala, stgalim aut e gimnasi. Il gimnasi vegn terminà suenter set onns cun la maturitad.

Cun l’Universitad dal Liechtenstein posseda il pajais in’atgna universitad statala. Daspera datti diversas scolas autas privatas.

Ils clubs da ballape dal Liechtenstein fan part dal manaschi da gieus da l’Associaziun svizra da ballape. L’onn 2008 ha il FC Vaduz giugà en la pli auta liga svizra, la Super League; per regla gioga il club però en la Challenge League.

Il FC Vaduz e la squadra naziunala giogan en il Rheinpark Stadion a Vaduz ch’è vegnì avert il 1998.

En la regiun muntagnarda da Malbun pon ins far divers sports d’enviern. En il ski alpin ha il Liechtenstein adina puspè gì gronds success. Tar ils gieus olimpics dal 1980 a Lake Placid ha Hanni Wenzel gudagnà duas medaglias d’aur ed ina d’argient; er ses frar Andreas Wenzel ha gudagnà numerusas cursas da la cuppa mundiala.

A l’entschatta dal 21avel tschientaner han Marco Büchel e Tina Weirather – la figlia da Hanni Wenzel – gì divers success en il ski alpin. En la statistica inuffiziala ‹Medaglias olimpicas tenor dumber d’abitants› è il Liechtenstein schizunt sin l’emprim plaz da tut ils pajais. 

Il Liechtenstein posseda in chanal da radio e televisiun naziunal (Landeskanal / Radio Liechtenstein). Dapi il 2008 datti er in emettur da televisiun privat cun num 1 FL TV

La pli gronda gasetta dal di è il Liechtensteiner Vaterland che cumpara en in’ediziun da radund 18 000 exemplars. Politicamain stat la gasetta datiers da la Vaterländische Union. La pli veglia gasetta dal di (che cumpara dapi il 1878) è il Liechtensteiner Volksblatt che vala sco organ da partida inuffizial da la Fortschrittliche Bürgerpartei.




#Article 14: Luxemburg (7956 words)


Il Luxemburg (uffizialmain Gronducadi da Luxemburg, luxemburgais Groussherzogtum Lëtzebuerg, tudestg Grossherzogtum Luxemburg, franzos Grand-Duché de Luxembourg) è ina monarchia parlamentara ch’è situada al cunfin tranter l’Europa dal Vest e l’Europa Centrala. Dals oriundamain nov gronducadis europeics è el il sulet ch’è sa mantegnì fin oz.

Cun ina surfatscha da 2586 kilometers quadrat è il Luxemburg in dals pli pitschens stadis dal mund, dal qual la surfatscha s’extenda sur las dimensiuns d’ina citad-stadi ora, e (suenter Malta) il segund pitschen commember da l’Uniun europeica. Il pajais cunfinescha en il sid cun la Frantscha (73 kilometers), en il vest e nord cun la Belgia (148 kilometers) ed en l’ost cun la Germania (135 kilometers). Areguard il retgav naziunal brut sa chatta il Luxemburg sin la plazza 70 da tut ils stadis dal mund; il stadi pitschen è pia rangà avant blers stadis ch’èn bler pli gronds e ch’han in dumber da populaziun bundant pli aut, e quai er entaifer l’Uniun europeica. Cun la Belgia ed ils Pajais Bass furma il Luxemburg ils stadis dal Benelux.

Il pajais è stà in dals commembers da fundaziun da la Communitad economica europeica (CEE) e gioga in’impurtanta rolla entaifer il process d’unificaziun europeica. La chapitala da medem num furma la centrala administrativa da l’Uniun europeica. Ella è la sedia da la Curt da giustia, da la Curt dals quints, dal Secretariat dal Parlament, da la Banca europeica per investiziuns, da las partiziuns da la Cumissiun europeica e dal Fond europeic da la stabilitad finanziala. En pli è la citad da Luxemburg lieu da dieta dal Cussegl da l’Uniun europeica. Il 2013 e 2014 ha il pajais fatg part sco commember temporar dal Cussegl da segirezza da las Naziuns unidas.

Il num Luxemburg deriva probablamain da Lucilinburhuc, pli tard Lützelburg (‹lützel› = ‹pitschen›; cf. frislandais ‹lütt›, englais ‹little›), in pitschen chastè, enturn il qual è creschida la citad da Luxemburg. Tenor in’ipotesa pli nova pudess il num Lucilinburhuc er derivar dal pled ‹Letze› e signifitgar ‹nas da grip fortifitgà›.

Il pajais è sa furmà sco ducadi entaifer il Sontg Imperi roman. En il territori da lingua tudestga han ins anc duvrà en il 17avel tschientaner la denominaziun ‹Lützenburg›, sco quai ch’ins po per exempel vesair en la ‹Topographia› da Matthäus Merian. Pli tard è il num lura vegnì remplazzà tras ‹Luxemburg›, quai che n’è nagut auter che la varianta germanisada dal num franzos. A chaschun dal Congress da Vienna è il Luxemburg vegnì auzà ad in gronducadi; Wilhelm I da Nassau-Orange è daventà l’emprim gronduca. Oz è il pajais il davos gronducadi dal mund.

Il nord dal pajais furma ina part da las Ardennas e vegn numnà Ösling. Questa part giascha en media sin 400 fin 500 meters sur mar. La cuntrada en l’Ösling vegn dominada da muntognas cuvertas cun guaud e da collinas sco er da profundas vals che vegnan percurridas da flums (p.ex. la Val dal Sauer). La collina Kneiff a Huldingen furma cun 560 meters il pli aut punct dal pajais. I suonda il Burgplatz (559 meters) ed il Napoleonsgaard sper Wahl en las Ardennas dal Sid (554 meters). En il nordost dal pajais fan 358 kilometers quadrat dal pajais part dal Parc da la natira tudestg-luxemburgais.

En il sid è situà il Gutland fritgaivel che tutga tar la cuntrada en stgalims da la Lorena (Lothringen). Questa part dal pajais è populada pli spess ch’il nord ed è er industrialisada pli ferm. Ils flums principals che percurran il pajais èn la Sauer (dal vest a l’ost), Klerf ed Our en il nord ed Alzette en il sid. Il punct il pli bass dal pajais, numnà Spatz (129 meters s.m.), sa chatta a la confluenza da Sauer e Mosel a Wasserbillig. La Mosel furma en il sidost il flum da cunfin vers la Germania.

Il Luxemburg è segnà dal clima temprà da l’Europa Centrala, il qual vegn influenzà da vents nà da l’Atlantic. Ils envierns èn miaivels, las stads èn tempradas e perquai empernaivlas. L’aria è il pli savens miaivla ed umida; las precipitaziuns annualas muntan a 782,2 mm; las temperaturas giaschan en media tar 9 °C (tranter 0,8 °C il schaner e 17,5 °C il fanadur). En il nord dal pajais èsi per ordinari in pau pli frestg ed i plova er pli savens.

L’Ösling en il nord dal pajais fa part da las Ardennas ed è segnà da muntognas mesaunas cuvertas cun guaud e da profundas vals che vegnan percurridas da flums. Las spezias da plantas derasadas il pli fitg èn il fau, il ruver, l’ischi ed il pign. Ordaifer ils guauds è la cuntrada segnada da prads d’ina cumposiziun fitg diversa. La vegetaziun dal Gutland en il sid dal pajais, ch’è situà in pau pli a bass, è segnada da terren agricul e da la viticultura per lung da la Mosel.

La fauna correspunda pli u main a quella dals ulteriurs pajais da l’Europa Centrala. L’Ösling è segnà d’in grond effectiv da selvaschina, en pli d’utschels da preda e da diversas spezias d’utschels ch’èn plitost raras. Ultra da quai èn ils flums dal Luxemburg enconuschents per lur gronda ritgezza da peschs (t.a. litgiva, glischun, sander, anguilla e carpa).

Per proteger la flora e la fauna existan divers projects da protecziun da la natira ch’èn gia realisads u che sa chattan en planisaziun (territori da protecziun da la natira Prënzebierg, reservat Sonnebierg, regiun da palì Cornelysmillen e.a.).

Il pajais è sutdividì en trais districts (Grevenmacher, Luxemburg e Diekirch) che cumpiglian en tut dudesch chantuns e 105 vischnancas (situaziun dal 2015). Dudesch vischnancas han il status da citads. Las vischnancas furman corporaziuns autonomas ch’èn suttamessas a la tutela administrativa dals cumissaris dals districts. La citad da Luxemburg furma la chapitala dal Gronducadi e la sedia da la regenza.

Ils districts e chantuns dal Luxemburg servan a l’administraziun dal pajais tras ils ministeris. In’incumbensa en il senn da corporaziuns territorialas, per exempel en rom da la furmaziun ed articulaziun da la voluntad politica dals burgais, n’han quests nivels statals betg. En ils lieus principals dals chantuns sa chattan per ordinari instituziuns statalas sco uffizis da construcziun da vias, uffizis da taglia, posts da polizia, scolas cuntinuantas e.a.

Ils cummissaris dals trais districts han l’incumbensa da controllar e per part er d’approvar las activitads da las vischnancas. En quest senn furman els ina sort regenza districtuala. A quest nivel èn er domiciliads ils uffizis dal register funsil e las impurtantas centralas da polizia. En paucs cas na sa cuvran ils cunfins dals chantuns e dals districts betg in cun l’auter.

A la testa da las vischnancas dal Luxemburg sa chatta il Buergermeeschter (tud. Bürgermeister, franz. Maire). El maina las fatschentas da la vischnanca en la posiziun d’in funcziunari d’administraziun. El vegn sustegnì dals Schäffen (tud. Schöffen, franz. Echevins) sco er dal cussegl da vischnanca che vegn elegì democraticamain.

En il Luxemburg pon las vischnancas s’unir libramain a ‹sindicats› (uniuns d’interess) per dumagnar meglier las incumbensas communablas. Tals sindicats datti per exempel sin il sectur da sanadad u tar las scolas da musica. 

Statisticamain enconuscha il Luxemburg be ina citad gronda (cun dapli che 100 000 abitants), numnadamain la chapitala cun radund 142 000 abitants (incl. aglomeraziun). Il grad d’urbanisaziun è però en general fitg aut. Radund 92 % da la populaziun vivan en citads (2003), per gronda part però en citads da provinza u citads pitschnas. La gronda part da las citads giaschan en il sidvest dal pajais; igl èn quai tranter auter Alzette (30 800, incl. aglomeraziun 70 000), Differdingen (22 300) e Düdelingen (18 800). Enturn las duas citads Diekirch (6400) ed Ettelbrück (8000) è sa furmada en il nord la Nordstad (en tut ca. 23 000) che furma sper la chapitala ed Esch-sur-Alzette la terza zona d’aglomeraziun dal Gronducadi.

L’entschatta 2014 dumbrava il Luxemburg 549 680 abitants. En il decurs dals davos decennis è il dumber da la populaziun s’augmentà quasi permanentamain; quai è surtut d’attribuir a la creschientscha economica ed a la situaziun al martgà da lavur che carmalan natiers immigrants.

Il prim da schaner 2013 muntava la quota dad esters 44,5 % (= 238 800). 16,40 % (= 88 200) da la populaziun derivan dal Portugal, 6,55 % (= 35 200) da la Frantscha, 3,88 % (= 19 898) da l’Italia, 3,20 % (= 17 600) da la Belgia, 2,30 % (= 12 400) da la Germania.

En il Luxemburg lavuran ultra da quai bundant 160 000 (2013) cunfinaris che derivan da las regiuns vischinas en la Germania, la Frantscha e la Belgia. Lur cumpart da las persunas occupadas munta a 44 %.

La situaziun linguistica dal Luxemburg è detg cumplexa. La lingua materna dals Luxemburgais è il luxemburgais (Lëtzebuergesch). Igl è quai in dialect tudestg (francon-mosellan) cun ina cumpart da pleds d’emprest franzos in pau pli auta ch’en il tudestg da standard. Il luxemburgais è però pir vegnì declerà il 1984 sco lingua naziunala e lingua uffiziala discurrida dal pajais. Tenor ina retschertga fatga da l’Uniun europeica inditgeschan radund 70 % da la populaziun questa lingua sco lur lingua materna.

Il tudestg da standard ed il franzos furman tenor la lescha da linguas dal 1984 medemamain linguas uffizialas. Il tudestg è stà derasà ditg sco lingua da standard; suenter il temp d’occupaziun durant la Segunda Guerra mundiala ha la lingua però pers in pau da sia reputaziun. Il franzos vala gia dapi daditg sco lingua da prestige ed ha anc pudì augmentar sia preschientscha en il decurs da la segunda mesadad dal 20avel tschientaner. En las scolas fundamentalas e professiunalas dominescha bain vinavant il tudestg sco lingua scritta. Dapi il 1944 fan però l’administraziun ed ils ministeris sco er las scolas cuntinuantas diever dal franzos sco lingua scritta, entant ch’il luxemburgais dominescha sco lingua discurrida. Medemamain il 1944 è il num dal pajais vegnì midà da ‹Luxemburg› en ‹Luxembourg› e tut las leschas vegnan be pli edidas per franzos.

Tipic per la diglossia è che las medias stampadas dovran surtut il tudestg; er la gronda part dals cudeschs cumparan en questa lingua. Il luxemburgais sco lingua naziunala duaja contribuir a mantegnair l’identitad culturala dal pajais sco er ad integrar ils immigrants da differenta provegnientscha e lingua en la societad dal Luxemburg.

En la scola populara èn tudestg e franzos linguas obligatoricas, pli tard er l’englais. La lingua d’instrucziun en las scienzas natiralas mida en il decurs dal temp dal tudestg al franzos. En l’administraziun dominescha, sco gia menziunà, il franzos; sch’in burgais sa drizza a las instanzas per tudestg u luxemburgais, duai el però survegnir resposta en questa lingua. Ordvart multilinguala è la situaziun avant dretgira: lingua discurrida furma il luxemburgais, il protocol da la sesida vegn manà per tudestg e las leschas vegnan citadas per franzos.

En las bancas, ils negozis u en la gastronomia vegn savens discurrì franzos, damai che blers emploiads en il sectur da servetschs derivan da la Lorena (Frantscha) u da la Vallonia (Belgia).

Dapi il 1970 è il Luxemburg commember da l’Organisation internationale de la Francophonie. Da la cumissiun interstatala ch’ha surveglià la refurma da l’ortografia tudestga dal 1996 n’ha il Luxemburg però betg fatg part (ma applitgescha las novas reglas en scola). Per il luxemburgais exista medemamain in’ortografia uffiziala; tar singuls pleds èn però sa mantegnidas differenzas regiunalas.

Tenor la lescha da protecziun da datas fan indicaziuns davart persvasiuns religiusas u filosoficas part da las datas sensiblas che na dastgan da princip betg vegnir eruidas. Perquai na datti nagina statistica uffiziala davart la grondezza da las cuminanzas religiusas. 

Tenor in studi dal 2011 appartegnevan il 2008 radund 68,7 % da la populaziun a la baselgia catolica. Las diversas baselgias evangelicas e protestantas represchentan ensemen radund 3,7 % da la populaziun e religiuns betg cristianas radund 2,6 %. La cumpart da persunas senza confessiun munta a 24,9 %.

L’onn 1988 ha papa Gion Paul II auzà la diocesa da Luxemburg en il status d’in archuvestgieu.

Ils emprims fastizs da colonisaziun sin il territori dal Luxemburg dad oz derivan dals Celts e tanschan enavos en il segund tschientaner a.C. Radund 100 onns pli tard èn penetrads ils Romans en il pajais, numnadamain ils onns 58–51 cura che Caesar ha occupà la Gallia e parts da la Germania fin al cunfin dal Rain. Il territori dal Luxemburg odiern è uschia daventà ina part da l’Imperi roman.

En il decurs dal 5avel tschientaner – dal temp da la migraziun dals pievels – han ils Francs germans chatschà enavos ils Romans. Muntgs viandants han missiunà la regiun e fundà claustras. La claustra Echternach è vegnida erigida l’onn 698 dal missiunar anglosaxon Willibrord.

L’onn 963, cura ch’il pajais fascheva part dal Reginavel francon da l’ost, ha il cont Siegfried I acquistà tras barat cunter l’abazia St. Maximin a Trier il pitschen grip en la Val da l’Alzette cun il chastè Lucilinburhuc. Cun quest pass ha el mess il crap da fundament per il pajais e la famiglia nobla dals da Luxemburg sco er per il Contadi da Luxemburg.

L’onn 1308 è il cont Heinrich da Luxemburg vegnì elegì sco retg dal Sontg Imperi roman. El e ses figl Johann, il qual è daventà il 1310 retg da la Boemia, han etablì la posiziun da pussanza dals Luxemburgais entaifer il Sontg Imperi roman medieval. Il 1354 è il Contadi da Luxemburg vegnì auzà tras l’imperatur Karl IV ad in ducadi. L’emprim duca è daventà Wenzel I. Cun la mort da l’imperatur Sigismund il 1437 è morta ora la lingia principala da la chasa da Luxemburg, uschia ch’er la predominanza entaifer l’Imperi è ida a fin. L’onn 1441 ha la davosa duchessa or da la chasa da Luxemburg vendì ses possess a la chasa franzosa da Burgogna. Tenor dretg statal è il pajais però restà in feud da l’Imperi. Suenter la mort dal davos duca da la Burgogna, Carl il Temerari, l’onn 1477 è il Luxemburg pervegnì ensemen cun l’entira ierta burgognaisa a la figlia da Carl, Maria da Burgogna, ed a ses um, l’imperatur da pli tard Maximilian I da Habsburg.

L’onn 1482 è il Luxemburg vegnì entaifer il Sontg Imperi roman sut il domini dals Habsburgais; il 1555 sut quel da la lingia spagnola da questa famiglia.

En consequenza da la Pasch da las Pireneas ha gì lieu il 1659 l’emprima spartiziun dal Luxemburg: la part meridiunala dal pajais da Diedenhofen enfin Montmédy è vegnida attribuida a la Frantscha.

En rom da la Guerra da successiun spagnola è il Luxemburg crudà als Pajais Bass austriacs ed è uschia puspè daventà in pajais habsburgais entaifer il Sontg Imperi roman. Dal 1795/1801 al 1814 è la regiun vegnida occupada da las truppas revoluziunaras ed è qua tras danovamain vegnida sut domini franzos.

Il 1806 è il Sontg Imperi roman, dal qual il Ducadi da Luxemburg fascheva part, sa schlià. Sco tut las parts tudestgas situadas da la vart sanestra dal Rain è il Luxemburg pervegnì a la Frantscha, e quai enfin che l’Imperi napoloenic è ì a fin. Il Congress da Vienna ha definì il 1815 il Luxemburg sco gronducadi e fixà che quel duaja daventar in stadi federativ entaifer la Confederaziun tudestga ch’era gist vegnida fundada. A medem temp han las decisiuns dal Congress manà ad in’uniun persunala dal Luxemburg cun il Reginavel dals Pajais Bass reunids. Quai ha gì per consequenza la segunda spartiziun dal pajais u, formulà autramain, la restauraziun be parziala dal status quo ante: intginas regiuns en il nord dal vegl Luxemburg èn passadas directamain da la Frantscha als Pajais Bass, regiuns en l’ost percunter èn vegnidas attribuidas a la Provinza renana entaifer la Prussia. Il 1830 è il Luxemburg s’unì a la Revoluziun beltga. Il 1839 ha gì lieu la terza e davosa spartiziun dal pajais: l’uschenumnà ‹quartier franzos›, numnadamain la part occidentala da lingua franzosa ed intgins territoris enturn las citads dad Arel e Martelingen, èn daventads sco provinza Luxemburg ina part da la Belgia. Dapi lura è restà en il Gronducadi da Luxemburg be pli il ‹quartier tudestg›, numnadamain la mesadad orientala da lingua tudestga.

Fin la dissoluziun da la Confederaziun tudestga il 1866 ha il Reginavel dals Pajais Bass represchentà entaifer il parlament tudestg la vusch virila dal Luxemburg.

L’onn 1867 èsi vegnì a la Crisa da Luxemburg. Napoléon III ha empruvà da cumprar il Luxemburg da retg Wilhelm III dals Pajais Bass. La publicitad en il Gronducadi sco er en las autras parts da la Confederaziun tudestga è sa messa cun indignaziun cunter la vendita dal pajais a la Frantscha: il Luxemburg, la patria da la dinastia dals Luxemburgais ch’aveva tschentà quatter regents dal Sontg Imperi roman, na dueva betg crudar a la Frantscha, l’inimi mortal da quel temp. In ferm moviment da protesta ha appellà en ina petiziun al retg e gronduca Wilhelm III da mantegnair il status quo. La parola ‹Mir wëlle [er: wölle] bleiwe wat mir sinn› è daventada populara tar ils abitants dal Luxemburg. Questa crisa è ida a fin cun il Contract da Londra dal 1867, en il qual il pajais è vegnì declerà – sco cumpromiss – neutral per adina. La fortezza tudestga en il Luxemburg han ins sinaquai disfatg.

L’independenza cumpletta ha il Luxemburg obtegnì l’onn 1890 suenter la mort dal retg dals Pajais Bass Wilhelm III. La chasa roiala dals Pajais Bass (Orania-Nassau) era morta ora en la lingia masculina. A basa dal contract d’ierta statuì tranter ils prinzis da la chasa da Nassau tenor dretg privat èn sinaquai vegnids a la regenza ils parents masculins ils pli stretg parents, numnadamain ils ducas da Nassau-Weilburg. Uschia ha il Luxemburg survegnì si’atgna dinastia ereditara, la chasa da Nassau-Weilburg.

Er suenter ch’èn sa constituids la Confederaziun da la Germania dal Nord e l’Imperi tudestg, è il Gronducadi restà fin il 1919 commember da l’Uniun da duana tudestga.

Durant l’Emprima Guerra mundiala (1914–1918) han ils Tudestgs violà la neutralitad dal Luxemburg cun occupar il pajais per pudair laschar passar truppas encunter la Frantscha. A la fin da la guerra èsi vegnì a la crisa statala dal 1818/19: pervi da sia tenuta pro-tudestga è la gronduchessa Marie Adelheid vegnida sut grond squitsch a l’intern dal pajais ed ha la finala demissiunà a favur da sia sora Charlotte.

Il 1919 ha il Luxemburg introducì il dretg da votar da las dunnas. L’onn 1922 han ins fundà l’‹Union Économique Belgo-Luxembourgeoise›; quella ha tranter auter reglà la paritad tranter las duas valutas da la Belgia e dal Luxemburg (francs).

Ils onns 1930 han ils naziunalsocialists cumenzà a resguardar il Luxemburg sco anteriur territori tudestg. Perquai avevan els en mira l’annexiun dal pajais.

En rom da la Segunda Guerra mundiala (1939–1945) han ils Tudestgs danovamain occupà il Luxemburg: il matg 1940 èn truppas tudestgas entradas en il Benelux ed han attatgà da qua anora la Frantscha. La regenza e la gronduchessa èn mitschads en l’exil a Londra. L’emprim han ins installà in’administraziun militara, silsuenter in’administraziun civila sut il manader dal Reichsgau cunfinant Moselland. Ils Luxemburgais èn vegnids sfurzads da prestar servetsch en l’armada tudestga e burgais gidieus èn vegnids deportads en champs da concentraziun tudestgs. L’avust 1942 ha la Germania annectà il pajais occupà e transfurmà ils districts en Landkreise tenor la divisiun territoriala dal Reich tudestg. La Segunda Guerra mundiala ha muntà per il giuven pajais in temp d’emprova ordvart difficil ch’ha gì per consequenza che simbols naziunals sco la monarchia u la lingua luxemburgaisa èn s’ignivads anc pli ferm en la schientscha da la populaziun. Ils 10 da settember 1944 han ils Americans liberà l’emprima giada il Luxemburg. Il december dal medem onn è però succedida da vart dals Tudestgs l’Offensiva da las Ardennas.

Da vart d’istoriografs internaziunals è il Luxemburg vegnì crititgà ditg per betg avair elavurà a moda objectiva l’atgna istorgia dal temp da la persecuziun dals Gidieus. Faussamain haja il pajais adina be stilisà sasez en la rolla da l’unfrenda.

Ils rapports da perscrutaziun dals istoriografs luxemburgais Denis Scuto e Vincent Artuso han silsuenter mussà il suandant: Suenter che la regenza uffiziala dal Luxemburg era ida en l’exil, è vegnida installada ina cumissiun administrativa ch’ha surpiglià las fatschentas guvernativas. Quella è stada participada a moda activa a la deportaziun da Gidieus. Ella n’ha betg be collavurà cun ils nazis, mabain ha, or d’agen impuls, extradì als nazis blers Gidieus, tranter quels numerus uffants.

Gia avant la Segunda Guerra mundiala era sa manifestà en il Luxemburg in antisemitissem evident e fitg derasà. La Terza lescha da razza da Nürnberg ha il Luxemburg surpiglià gia avant la guerra da libra voluntad e scumandà la lètg cun Gidieus. Gidieus ch’eran fugids en il Luxemburg vegnivan registrads separadamain. Els valevan sco umans da segunda classa e vegnivan tranter auter impedids tar la tschertga da lavur. 

Suenter la Segunda Guerra mundiala han ins extendì successivamain l’uniun da duana e d’economia sin ils Pajais Bass (stadis da Benelux). Il 1945 è il Luxemburg er daventà commember da las Naziuns unidas. Il 1948 ha il pajais dissolvì formalmain la ‹neutralitad perpetna› ch’era vegnida fixada il 1867. L’onn 1952 è la citad da Luxemburg daventada la sedia da la Communitad europeica da charvun e d’atschal ed il 1957 ha il Luxemburg fatg part sco in da sis commembers da fundaziun da la Communitad economica europeica. 

Il 1985 ha il Luxemburg segnà ensemen cun quatter ulteriurs stadis da l’Uniun europeica la Cunvegna da Schengen, numnada tenor il lieu luxemburgais situà sper la Mosel. L’onn 1986 ha l’entira populaziun luxemburgaisa retschet il Premi da Carl per merits spezials areguard l’unificaziun europeica. Il 1995 è la Cunvegna da Schengen entrada uffizialmain en vigur. Dapi il 2002 è l’euro en diever sco valuta uffiziala, suenter ch’ins al aveva gia introducì a partir dal 1999 sco valuta da contabilitad.

Dapi la Segunda Conferenza da Londra dal 1867 è il Gronducadi da Luxemburg in stadi suveran ed independent. La furma statala è quella d’ina monarchia parlamentara; la curuna vegn dada vinavant en la famiglia Nassau en moda ereditara.

Per la legislaziun è responsabla la chombra dals deputads (Chambre des Députés) che vegn elegida mintga tschintg onns.

Punct da partenza per l’installaziun da l’apparat statal aveva furmà il 1868 il stadi da funcziunaris a basa monarchica (il gronduca regent e ‹ses› ministers e scheffuncziunaris). Da questa tradiziun è sa mantegnida la denominaziun ‹minister da stadi› enstagl da ‹primminister›, l’inviolabilitad da la persuna e la pussanza politica (teoretica) dal gronduca; a nivel communal plinavant l’in sper l’auter dal Bourgmestre (sco funcziunari d’administraziun dal gronduca) ed ils Schöffen che na valan betg sco funcziunaris, mabain vegnan elegids ‹or dal pievel›. 

Oz po il gronduca per il pli exequir ses dretgs be formalmain. L’artitgel 1 da la constituziun vertenta statuescha ch’il Luxemburg saja in «stadi ... democratic». Quest princip garanteschan la chombra dals deputads che vegn elegida directamain dal pievel e da la quala resorta la regenza, l’elecziun dal Bourgmestre or dal cussegl communal e betg il davos la pussaivladad da votaziuns dal pievel.

La constituziun dal Gronducadi da Luxemburg da l’october 1868 è vegnida publitgada en versiun originala tudestga cun translaziun franzosa. Malgrà numerusas adattaziuns furma ella fin oz la constituziuns valaivla dal pajais.

La devisa u maxima statala è Mir wëlle bleiwe wat mir sinn («Nus vulain restar quai che nus essan»). Quella è sa furmada a chaschun da la Crisa dal Luxemburg il 1867, cur che Napoléon III aveva l’intenziun d’acquistar il Gronducadi che fascheva part da la Confederaziun tudestga e che steva sut il regent Wilhelm III dals Pajais Bass.

La tricolora cotschen-alv-blaua dal Luxemburg exista en sia furma odierna dapi il 1972. Tar la colur blaua en la bandiera dal Gronducadi sa tracti da blau-tschiel, cuntrari a la bandiera dals Pajais Bass cun ses blau ultramarin. Gist pervi da quest privel da scumbigl vegn discussiunà dapi il 2006 en il Luxemburg davart ina midada da la bandiera. Sco emprim pass en questa direcziun han ins decidì ch’er la bandiera cun il liun cotschen (Roude Léiw) saja admessa sin il territori luxemburgais.

La vopna dal Luxemburg è vegnida fixada suenter plirs midaments tras cont Heinrich V ed è sa mantegnida en questa furma fin oz.

L’emprima e la davosa strofa da la chanzun Ons Heemecht (‹Nossa patria›; text original luxemburgais: Michel Lentz, musica: Johann-Anton Zinnen) da l’onn 1864 furman l’imni naziunal dal pajais.

L’artitgel 3 da la constituziun vertenta fixescha che la curuna dal Gronducadi vegnia dada vinavant a moda ereditara entaifer la famiglia da Nassau. Il contract d’ierta che furma la basa per questa reglamentaziun datescha dal 1783.

Il schef da stadi e gronduca dal Luxemburg posseda formalmain vastas cumpetenzas executivas e legislativas. El nominescha e relascha la regenza ed exequescha tut las leschas; ma facticamain surpiglia el quasi exclusivamain duairs da represchentaziun. 

Il 2008 ha gronduca Henri refusà da suttascriver ina lescha che preveseva assistenza al suicidi. Per metter spertamain fin a la crisa statala imminenta, è il gronduca vegnì deliberà tras in midament da la constituziun da stuair sancziunar las leschas; dapi lura sa restrenscha si’incumbensa sin l’act da promulgar las leschas. 

La pussanza executiva giascha en ils mauns dal gronduca e da la regenza. La regenza sa cumpona dal primminister, che porta il titel tradiziunal ‹minister da stadi›, da quindesch ministers e da trais secretaris da stadi.

Tar il cussegl da stadi sa tracti d’in organ consultativ che consista da 21 commembers. El è participà a la lavur legislativa. Sia opposiziun formala ha in effect suspensiv limità a trais mais.

La chombra dals deputads (franzos Chambre des Députés, luxemburgais simplamain Chamber) cumpiglia 60 sedias. Ils deputads vegnan elegids en elecziuns naziunalas per ina durada d’uffizi da tschintg onns.

Las elecziuns en il parlament naziunal han lieu mintga tschintg onns tenor il sistem electoral da proporz. Il pajais è partì en quatter districts electorals; quels correspundan als trais districts statals, cun excepziun da Luxemburg-citad ch’è sutdividì en dus districts electorals. Confurm a la quota da populaziun po mintga district tschentar in auter dumber da deputads. Dapi il 1919 exista per tut ils burgais a partir da 18 onns l’obligaziun d’eleger. La dumonda areguard la participaziun d’esters a las elecziuns stat actualmain en discussiun; las opiniuns divergeschan però fermamain. 

Las partidas dominantas entaifer la politica naziunala cuvran il spectrum enconuschent tranter la dretga e la sanestra e vegnan per gronda part numnadas tenor lur colur da partida: Déi Blo, Déi Roud, Déi Gréng, Déi Schwaarz.

Las ragischs dal dretg privat dal Luxemburg èn da chattar en il Code Civil franzos ch’è sa furmà sut Napoleun Bonaparte. Ensemen cun il dretg franzos e beltg tutga il dretg luxemburgais tar ils urdens giuridics da la famiglia romana ch’èn restads influenzads fin oz il pli ferm dal dretg civil napoleonic. Il medem vala er per il dretg penal. Il dretg administrativ ed il dretg da taglia correspundan percunter pli ferm al dretg tudestg. Linguatg giuridic furma il franzos; avant dretgira po vegnir fatg diever, tut tenor cas, dal luxemburgais, tudestg u franzos.

Sper il tribunal suprem existan en il Gronducadi duas dretgiras districtualas e trais dretgiras da pasch sco er pliras instanzas da dretg administrativ e constituziunal.

Il Luxemburg era il 2014 in dals pajais cun ils pli bass debits en tut l’Europa. Tar tut las economias publicas ensemen – pia il stadi, las vischnancas e las assicuranzas socialas – è resultà il 2010 in deficit da 1,7 % dal product naziunal brut. Uschia sa mova il Luxemburg entaifer ils criteris da Maastricht che lubeschan in deficit maximal da 3 %.

Sper diversas taglias da traffic retira il pajais ina gronda part da sias entradas sur taglias sin las entradas e sin la rendita. Fonds d’investiziun èn liberads en il Luxemburg da la taglia sin la corporaziun, da la taglia da commerzi e da la taglia sin las entradas. La taglia sin la facultad è il 2006 er vegnida schliada per persunas natiralas. Ed er areguard la taglia sin l’ierta enconuscha il pajais ina pratica fitg liberala. La taglia sin la plivalita è vegnida augmentada il 2015 sin 17 %.

Tenor il Contract da Londra dal 1867 na dueva il Gronducadi betg be esser neutral, mabain er senz’armas. Pervi da las experientschas fatgas durant las duas guerras mundialas – occupaziun tudestga malgrà il statut da neutralitad – ha il Luxemburg disditg questa posiziun l’onn 1948. Il servetsch militar obligatoric è però vegnì remplazzà il 1967 tras in servetsch facultativ.

Las forzas armadas dal Luxemburg consistan da radund 1000 commembers ed èn sutdivididas en in battagliun d’infantaria e duas cumpagnias d’exploraziun. Forzas navalas u aviaticas n’enconuscha il pajais betg; percunter è ina furmaziun aviatica d’exploraziun da la NATO staziunada a Luxemburg. Il Luxemburg sa participescha adina puspè a missiuns da pasch internaziunalas (t.a. Cosovo, Bosnia-Erzegovina, Macedonia, Congo, Tschad, Afghanistan e Libanon).

La Police Grand-Ducale furma l’organ da l’executiva per la segirezza a l’intern dal pajais, per mantegnair l’urden public e per far valair las leschas.

Il Service de Renseignement de l’État (SRE) è il servetsch d’infurmaziun dal Luxemburg. El rimna ed evaluescha infurmaziuns che pudessan muntar in privel per il territori dal pajais u per instituziuns internaziunalas ch’han lur sedia en il Luxemburg.

Il Luxemburg fa tranter auter part da las suandantas organisaziuns: Benelux, Uniun europeica, Cussegl da l’Europa, Organisaziun per la segirezza e la cooperaziun en l’Europa, Organisaziun dal pact da l’Atlantic dal Nord (NATO) sco er da las Naziuns unidas e da sias organisaziuns affiliadas.

Il Luxemburg è stà in dals pajais fundaturs da l’Uniun europeica (resp. da sias organisaziuns predecessuras) e furma la sedia da diversas instituziuns europeicas sco la Curt da giustia, la Curt dals quints, il Secretariat dal Parlament, la Banca europeica per investiziuns, las partiziuns da la Cumissiun europeica ed il Fond europeic da la stabilitad finanziala. En pli furma la citad da Luxemburg lieu da dieta dal Cussegl da l’Uniun europeica.

Il Luxemburg sa participescha sco commember activ a la politica da l’Uniun europeica. Il stadi sa stenta per ina represchentaziun adequata er dals pajais pitschens entaifer l’Uniun europeica e s’engascha per refurmas e per il svilup cuntinuant da las instituziuns da l’UE. Il stadi è in aderent passiunà da la collavuraziun en l’Europa ed ha ratifitgà sco emprim stadi insumma il Contract da Maastricht. L’engaschament da la populaziun dal Luxemburg al process d’unificaziun è vegnì remunerà il 1986 cun il Premi da Carl da la citad dad Aachen.

Prioritad ha per il Luxemburg surtut la cultivaziun da bunas relaziuns cun ils vischins Germania, Frantscha e Belgia. Il Luxemburg sa chapescha sco center da gravitaziun da la regiun gronda Saar-Lor-Lux, da la quala fan er part Trier e la Vallonia beltga. 150 000 cunfinaris da la Lorena, la Vallonia, il Saarland, la regiun da Trier e da l’Eifel lavuran en il Luxemburg.

Il Luxemburg enconuscha in temp da scola obligatoric dal quart al 16avel onn da la vita. La scola elementara è partida en quatter ciclus: l’emprim ciclus tanscha dal terz al tschintgavel onn da la vita e cumpiglia l’educaziun prescolara facultativa e la prescola; ils ciclus dus fin quatter correspundan a la scola primara. Alura suonda il stgalim secundar (dudeschavel fin almain sedeschavel onn da la vita).

Tar las grondas sfidas da la scola elementara luxemburgaisa tutga l’instrucziun en las linguas tudestg, franzos ed englais (sper il luxemburgais sco lingua discurrida). Plinavant l’auta cumpart da scolars da l’exteriur, savens da pajais romans, ch’han difficultads da pudair suandar l’instrucziun per tudestg.

Suenter il quart ciclus decida ina cumissiun d’orientaziun (cun dretg da recurs da vart dals geniturs) davart la cuntinuaziun da la furmaziun. Radund in terz dals scolars visitan il liceum che pussibilitescha suenter set onns l’access al studi universitar. Dus terzs dals scolars frequentan il liceum tecnic. Quel prepara sin la furmaziun fundamentala professiunala u sa lascha absolver sco scola media professiunala u da diplom. 

Ultra da las scolas autas professiunalas posseda il Luxemburg dapi il 2003 er in’atgna scol’auta universitara.

Tenor in studi da l’Uffizi statistic da l’Uniun europeica (Eurostat) èn las entradas en il Luxemburg en media duas giadas e mez pli autas che la media europeica. In tras l’auter posseda mintga tegnairchasa luxemburgais ina facultad da 570 000 euros. Residents da l’exteriur èn tendenzialmain bundant pli ritgs; l’excepziun furman però ils Portugais ch’èn la communitad da l’exteriur lunschor la pli gronda. Il product naziunal brut per persuna è, abstrahà dal Liechtenstein e dal Monaco, in dals pli auts dal mund. La valur totala da las raubas e dals servetschs ch’èn vegnids creads il 2009 en l’economia publica luxemburgaisa munta a 104 512 dollars per persuna. En quest ranking sa chatta il Luxemburg sin l’emprima plazza mundiala, cleramain avant la Norvegia (79 085 dollars), il Katar (68 872 dollars) e la Svizra (67 560 dollars).

Igl è però da tegnair quint che la gronda part da las statisticas areguard il Luxemburg èn sfalsifitgadas per il factur dus resp. per 0,5. Il motiv: radund la mesadad da las persunas occupadas èn cunfinaris; quels realiseschan ensemen cun ils abitants dal pajais il product naziunal brut e pajan las medemas taglias e contribuziuns socialas, na cumparan però betg en la statistica statala.

Il 2008 ha cumenzà en blers pajais industrials dal mund ina crisa economica. Quella è vegnida chaschunada da la crisa finanziala ch’è prorutta il 2007 e ch’ha sfurzà blers stadis da pumpar milliardas en il sectur da bancas per evitar il bancrut da questa branscha. En il Luxemburg ha questa crisa mussà a moda evidenta, quant dependenta che l’economia è dal sectur da finanzas.

Pervi da sias cundiziuns fiscalas favuraivlas e sia vischinanza geografica tar la Germania, la Frantscha, la Belgia ed ils Pajais Bass è il Luxemburg ina plazza attractiva per interpresas internaziunalas ch’èn activas en il terz sectur (surtut bancas ed assicuranzas). Il sectur ‹servetschs da finanzas› contribuescha radund 25 % da la valur agiuntada brutta, il sectur ‹immobiglias, locaziun e servetschs ad interpresas› radund 20 %.

La gronda part da las interpresas ch’èn sa domiciliadas en il Luxemburg porschan lur servetschs be per ina fitg pitschna part en il pajais sez; la gronda part da la svieuta vegn generada cun il traffic da servetschs en auters stadis da l’Uniun europeica. 

Sco sedia da diversas autoritads da l’Uniun europeica è il pajais er da muntada sco center d’administraziun internaziunal.

Il sectur da finanzas furma l’accent principal entaifer l’economia publica dal Luxemburg. La plazza da finanzas è surtut sa furmada grazia a bunas cundiziuns da basa legislativas, in’orientaziun internaziunala e tariffas da taglia favuraivlas (‹strategia da nischa›). Gia il 1970 aveva il sectur da finanzas in pais levamain pli aut ch’èn l’economia d’auters pajais; ma surtut en ils proxims onns e decennis dueva il sectur da finanzas daventar il motor per propi da l’economia publica dal Luxemburg.

Il 2010 eran registradas en il Luxemburg radund 150 bancas, e quai praticamain tuttas en furma da societads affiliadas u da filialas da grondas bancas da l’exteriur (en tut da 25 differents pajais; radund in terz da tut las bancas deriva da la Germania).

Ina da las pitgas centralas da la plazza da finanzas dal Luxemburg furma l’industria da fonds. Il 2010 eran domiciliads en il pajais bundant 3500 fonds d’investiziun; quels administravan daners en l’autezza da bundant 2 billiuns euros. Cun quai è il Luxemburg il lieu d’administraziun da fonds principal en l’Europa e sa chatta en tut il mund sin la segunda plazza suenter ils Stadis Unids. Ils pajais d’origin principals dals offeriders da fonds ch’èn preschents en il Luxemburg èn ils Stadis Unids, la Germania e la Svizra.

Il november 2014 èn vegnidas publitgadas 28 000 paginas da documents confidenzials che dattan invista en ils models d’evitar taglia dals concerns globals (‹Luxemburg-Leaks›). La publicaziun da quests documents han preparà 80 schurnalists en 26 pajais.

L’industria greva ha dominà fin en ils onns 1970. Quella era sa sviluppada vers la mesadad dal 19avel tschientaner, surtut cun chapital tudestg, ed aveva furmà la basa per la bainstanza dal pajais. Pussibilità quest svilup avevan ils ritgs giaschaments da metals situads en il sidvest dal pajais. Dapi la gronda crisa da structura en ils onns 1970 cumpiglia quest sectur anc radund 30 % da la producziun industriala e daventa cuntinuadamain main impurtant.

Percunter èn vegnidas vitiers a partir dals onns 1970 industrias sco la chemia, surtut pneus (Goodyear) ed auters products da cautschuc, sco er materias e fibras sinteticas, la construcziun da maschinas e vehichels, l’industria cheramica, vaider sco er la producziun da textilas e da victualias. En tut contribuescha l’industria elavuranta 6,6 % a la valur agiuntada brutta. Ils implants èn per gronda part situads sin l’anteriur areal da l’industria greva en il sidvest dal pajais.

L’industria da construcziun generescha radund 6,3 % da la valur agiuntada brutta (situaziun dal 2008). Ella profitescha surtut da novas industrias, bancas ed assicuranzas che sa domicilieschan en il Luxemburg, sco er d’investiziuns en la rait da vias ed en l’ulteriura infrastructura dal pajais.

L’agricultura cumpiglia be pli 0,5 % da la valur agiuntada brutta. Il dumber da manaschis sa diminuescha vinavant, medemamain la cumpart da la populaziun rurala en general. Percunter crescha la grondezza dals singuls manaschis (1980: 29,63 ha; 1990: 38,37 ha; 2002: 57,18 ha; 2010: 59,6 ha). Malgrà questa grondezza dominescha vinavant il manaschi da famiglia.

Da l’entira surfatscha da producziun agricula da 128 157 ha vegnan duvradas 43,8 % per la cultivaziun dad ers e l’orticultura e 50,7 % sco pastgiras (situaziun dal 2003). La gronda part da las entradas da l’agricultura deriva da la producziun da latg e da l’allevament da muvel. Be 1,0 % da la surfatscha agricula vegn duvrada per la viticultura.

Tenor in rapport da l’OECD dal 2011 è il sistem da sanadad dal Luxemburg in dals pli chars en tut l’Europa (tenor il criteri expensas per persuna). L’aspectativa da vita giascha tar 80,7 onns; la mortalitad d’uffants pitschens è la pli bassa da tut ils pajais da l’OECD.

La pli gronda part dal basegn d’energia vegn curclà tras imports. En il decurs dals ultims onns han ins però investì bler en energias alternativas a l’intern dal pajais, e quai tant da vart industriala sco er da vart da chasadas privatas. Rodas da vent ed implants da biogas sa derasan il pli fitg.

Ils bains d’export ils pli impurtants èn metals e products da metals, maschinas ed apparats, products da materia sintetica e gumma, material da transport, products da crap, vaider e cheramica sco er products chemics.

Ils pli impurtants partenaris da commerzi furman ils stadis vischins Belgia, Germania e Frantscha. En quests pajais van radund 60 % dals exports e bunamain 80 % dals imports derivan da là. La bilantscha da commerzi dal Luxemburg è positiva.

En cumparegliaziun cun ils stadis vischins è il martgà da lavur dal Luxemburg segnà d’intginas atgnadads. El è orientà al ‹model luxemburgais› dal dialog social. Tranter auter na vegn betg pli fatg la differenza tranter ‹lavurers› ed ‹emploiads›, mabain be discurrì da ‹retschaviders da paja›. Per tut las furmas d’occupaziun valan pajas minimalas liantas.

Il Gronducadi da Luxemburg è il sulet stadi europeic che na resguarda betg ils cunfinaris (radund 42 % da tut las persunas occupadas) en sia quota da dischoccupads. Sco gia menziunà, è la quota da dischoccupads perquai bundant pli auta che quai ch’i vegn inditgà en la statistica uffiziala. La quota da dischoccupaziun da giuvenils munta a 12 %.

Il 2013 cumpigliava la bilantscha dal stadi expensas en l’autezza da 14,2 milliardas euros ed entradas da 12,9 milliardas euros. Da quai resulta in deficit en l’autezza da 2,8 % dal product naziunal brut.

Il debit dal stadi muntava il 2009 a 5,46 milliardas euros u 14,3 % dal product naziunal brut. 

La cumpart da singuls secturs a las expensas statalas (en % dal PNB) muntava il 2011 a 7,7 % sanadad, 3,8 % furmaziun e 0,6 % militar.

Il Luxemburg dispona d’ina spessa rait da vias naziunalas (2899 km); da quai èn 52 km autostradas. Per motivs da taglia è il benzin pli bunmartgà ch’en ils pajais vischins, quai che promova in turissem da carburant.

L’entira rait da viafier sin il territori dal Luxemburg ha ina lunghezza da 274 km. La societad da viafier principala furma la Société Nationale des Chemins de Fer Luxembourgeois (CFL).

Il 2002 ha il Luxemburg segnà cun la Frantscha ina cunvegna areguard la rait dal TGV. Il Luxemburg è sa participà finanzialmain a l’erecziun da la lingia tranter Paris e Metz. A medem temp han ins refatg il tschancun tranter Metz e Luxemburg. Dapi il 2009 ha pudì vegnir reducì uschia il temp da viadi tranter Luxemburg e Paris da trais uras e mez a duas uras ed in quart.

En planisaziun èn plinavant trens ad auta sveltezza tranter las chapitalas da l’Uniun europeica Brüssel, Luxemburg e Strasbourg. Medemamain duai il pajais vegnir collià cun la rait da trens ad auta sveltezza en Germania. E la chapitala da Luxemburg duai survegnir ina nova rait da trams che collia la staziun principala cun il center da la citad e cun Kirchberg.

L’eroport internaziunal dal Luxemburg sa chatta a Findel. 16 societads d’aviuns da lingia e da charter offreschan sgols directs en il Luxemburg. La societad aviatica luxemburgaisa sa numna Luxair. Ses pendant en il sectur da vitgira è la Cargolux.

Dapi ch’il chanal da la Mosel è vegnì terminà il 1964 gioga er la navigaziun interna in’impurtanta rolla per il provediment dal Luxemburg (surtut sur il port da la Mosel a Mertert). Sin l’auta mar navigheschan bundant 200 bastiments sut la bandiera dal Gronducadi.

La pressa dal Luxemburg correspunda en sia varietad politica al vast spectrum da partidas dal pajais. La gasetta quotidiana cun la pli grond’ediziun è il ‹Luxemburger Wort› che cumpara per tudestg; i suondan il ‹Tagblatt› ed il ‹Lëtzebuerger Journal›. Sco gasettas da l’emna èn da numnar la ‹woxx› ed il ‹Lëtzebuerger Land›. Per franzos cumparan per exempel ‹Le Jeudi› e ‹La Voix du Luxembourg›.

La plipart da las gasettas e magazins dal Luxemburg èn bilings. La gronda part dals artitgels è mintgamai scritta per tudestg, savens er per franzos e be ina pitschna part resguarda er il luxemburgais.

Igl existan in radio internaziunal, dus naziunals, quatter regiunals e radund 20 emetturs locals (situaziun dal 2002). La liberalisaziun da las frequenzas da radio aveva cumenzà en il Luxemburg il 1992. L’emettur il pli enconuschent è ‹RTL Radio Letzebuerg› cun ina quota d’auditori da 65 % da tut ils Luxemburgais sur 12 onns.

L’actur principal sin il martgà, l’emettur privat ‹RTL Télé Lëtzebuerg›, n’aveva avant il 1996 nagins concurrents. Dapi lura datti supplementarmain intgins emetturs pli pitschens. Tant al radio sco er a la televisiun dominescha la lingua luxemburgaisa. Persunas che s’expriman per tudestg u franzos na vegnan però betg sincronisadas; ins parta dal fatg ch’il public haja enconuschientschas da questas duas linguas. Ultra dals agens emetturs guarda la gronda part da la populaziun dal Luxemburg ils emetturs tudestgs (tranter auter da la ‹RTL Group› che deriva oriundamain dal Luxemburg).

En il pajais datti ca 355 400 attatgs da telefon (2002). La preselecziun internaziunala per il Luxemburg è +352. Preselecziuns localas n’existan betg. Las trais pli grondas societads da telefonia èn ‹Post Telecom›, ‹Tango› ed ‹Orange›.

Il diever da la telefonia mobila è fitg derasada; il 2002 eran registrads 473 000 telefonins. Tenor ina retschertga dal 2006 possedan 93,8 % dals Luxemburgais almain in telefon mobil.

Il 2009 han inditgà 87 % da tut las chasadas privatas d’avair in access a l’internet. 88 % dals tegnairchasa possedevan almain in computer. Tar las cumpras online sa chatta il Luxemburg pli u main a la testa da tut ils pajais en l’Europa. 

L’onn 1994 ha l’Unesco declerà l’ensemble da la citad veglia dal Luxemburg sco Patrimoni cultural mundial. Il 1995 ed il 2007 è la citad da Luxemburg stada la Chapitala culturala da l’Europa.

Antoine Meyer (1801–1857) ha mess cun si’ovra ‹E’ Schrek ob de’ Lezeburger Parnassus› il fundament per in’atgna litteratura luxemburgaisa. Il proxim pass vers ina litteratura naziunala ha fatg Edmond de la Fontaine, numnà Dicks (1823–1891), ch’ha scrit ils emprims tocs da teater luxemburgais. El è però surtut vegnì enconuschent cun sias poesias e chanzuns ch’èn daventadas fitg popularas.

Dapi il 1986 exista l’Archiv da litteratura naziunal; il 2011 è er ì online il Lexicon d’auturs dal Luxemburg. La ‹Bibliothèque nationale de Luxembourg› è la pli gronda biblioteca dal pajais cun radund 750 000 toms. Daspera existan numerusas bibliotecas scientificas u ch’èn colliadas cun las instituziuns da l’Uniun europeica. 

Films en lingua luxemburgaisa vegnan producids be darar. Ma quests paucs films chattan grond resun tar il public naziunal, sco per exempel ‹Perl oder Pica› (2006) da Pol Cruchten. L’onn 2010 ha la promoziun da film statala sustegnì en tut 23 producziuns cun 4,68 milliuns euros.

Savens vegnan er producids films da l’exteriur en il Luxemburg, saja quai pervi da la cuntrada u pervi da las cundiziuns da producziun favuraivlas. Exempels èn ‹Das Mädchen mit dem Perlenohrring› (2003) cun Scarlett Johansson, ch’è stà nominà per trais Oscars, ed il film ‹Shadow of a Vampire›.

La musica classica è represchentada en il Luxemubrg tranter auter cun l’Orchestre Philharmonique du Luxembourg. Bunamain mintga vitg enconuscha sia musica da sturs che suna a chaschun da festas popularas. Il Luxemburg ha gudagnà tschintg giadas l’Eurovision Song Contest, tranter auter il 1972 cun Vicky Leandros (‹Après toi›). La scena da musica moderna dal Luxemburg viva da bleras bands da scolars e students; renum sur ils cunfins naziunals ora ha la scena da metal/rock/hardcore.

Il teater enconuscha en il Luxemburg ina lunga tradiziun. Ils pli enconuschents lieus da producziun èn il teater da la citad (Grand Théâtre de la Ville de Luxembourg) ed il Kapuzinertheater en la chapitala, en pli l’Escher Theater ed il Centre des Arts Pluriels Ed. Juncker a Ettelbrück. En tut il pajais èn activas numerusas gruppas da teater laic ch’attiran mintgamai in grond public.

Spaisas tipicas per la regiun èn Judd mat Gaardebounen (charn-portg fimentada cun bagiaunas grossas) e Bouneschlupp (schuppa da bagiaunas cun tartuffels), plinavant ils Kniddelen, gronds canedels che consistan da farina, aua, ovs e sal. Enconuschents dessert èn per exempel Quetschentaart ed Omelette soufflée au kirsch.

Da la regiun da la Mosel derivan divers vins alvs (t.a. Riesling, Elbling, Auxerrois, Rivaner, Pinot Gris e Pinot Blanc) e sco vin cotschen surtut il Pinot Noir.

En il Luxemburg vivan tradiziuns en furma da numerusas festas profanas e religiusas. La fin d’avust ed entschatta da settember ha lieu il Schueberfouer, ina festa da commerziants da fiera ch’è documentada dapi il 14avel tschientaner. Il di dad Éimaischen, la festa tradiziunala dad Emmaus (glindesdi Pasca), van blers Luxemburgais per in tschivlot da cheramica en furma d’utschè ch’ins survegn be quest di. L’emprima dumengia da curaisma ha lieu en blers vitgs la festa da Buergbrennen, a chaschun da la quala l’enviern vegn brischà simbolicamain.

La pli impurtanta festa religiusa dal Luxemburg è l’Octava da Nossadunna che tanscha da la terza a la tschintgavla dumengia suenter Pasca. Durant quest temp vegn pelegrinà tar Nossaduna, la sontga patruna dal Luxemburg; la festa è er colliada cun ina gronda fiera. La Echternacher Springprozession è ina processiun che vegn mintgamai festivada il mardi suenter Tschuncaisma; ils participants sautan tar melodias da polca tras las vias da la citad dad Echternach fin a la basilica cun la fossa da sontg Willibrord.

Il ballape è il sport il pli popular en il Luxemburg. A nivel internaziunal n’è la squadra naziunala però betg da gronda muntada; ils blers giugaders che fan part da quella èn amaturs.

Il sport ch’ha adina puspè manà a gronds success en il Luxemburg èn las cursas da velo. Il Tour de Luxembourg vegn realisada dapi il 1935 sco preparaziun sin il Tour de France. Cun François Faber (1909), Nicolas Frantz (1927 e 1928), Charly Gaul (1958) ed Andy Schleck (2010) han gia quatter velocipedists dal Luxemburg gudagnà il Tour de France.

Medemamain fitg preschenta en il pajais è l’atletica leva. Surtut en la chapitala da Luxemburg exista in’infrastructura vasta e moderna. Là ha er lieu il Maraton da Luxemburg, in dals paucs dal mund che vegn manà tras la saira, accumpagnà da tizuns ed illuminaziuns bengalas.




#Article 15: Belgia (3630 words)


La Belgia (u Reginavel da la Belgia, ollandais Koninkrijk België, franzos Royaume de Belgique) è in stadi situà en l’Europa dal Vest. Il pajais cunfinescha en il nord cun ils Pajais Bass, en l’ost cun la Germania, en il sidost cun il Luxemburg ed en il sidvest cun la Frantscha. La Belgia dumbra radund 11 milliuns abitants; sia surfatscha munta a 30 528 km². La chapitala dal pajais è Brüssel.

Dapi l’independenza l’onn 1830 è la Belgia ina monarchia parlamentara. Il nord dal pajais cun ils Flams furma territori ollandais, il sid cun ils Vallons territori da lingua franzosa. En l’ost dal pajais è er derasà il tudestg.

Il conflict cuntinuant tranter Flams e Vallons caracterisescha er ils interess divergents entaifer la politica beltga. Dapi ils onns 1970 sa stentan ins da schliar quest problem tras decentralisar ils organs statals. Per quest intent han ins transfurmà la Belgia en in stadi federal che consista da trais regiuns e communitads. Las regiuns Flandra, Vallonia e Brüssel sco er las trais communitads linguisticas (flam, franzos e tudestg) furman oz la basa politica e sociala dal pajais.

La Belgia è stada in dals commembers fundaturs da la Communitad economica europeica, l’Uniun europeica odierna. A Brüssel sa chatta la sedia da las impurtantas instituziuns da l’Uniun europeica. Plinavant appartegna la Belgia, sper ils Pajais Bass ed il Luxemburg, al Benelux.

Il num da la Belgia deriva da la provinza romana Gallia Belgica. En questa part settentriunala da la Gallia vivevan pievels celtics e germans, numnads Belgae. En il 18avel tschientaner vegniva l’adjectiv franzos belge ni belgique duvrà sco translaziun da nederlands (‹ollandais›). Il stadi beltg ch’ha existì per curt temp enturn il 1790 vegniva per exempel numnà per franzos États belgiques unis e per ollandais Verenigde Nederlandse Staten. Pli tard èn ils terms belge e belgique vegnids applitgads pli e pli be per la part meridiunala dals Pajais Bass, la Belgia odierna.

Da la fin dal temp medieval fin il 17avel tschientaner ha la Belgia furmà in center cultural ed economic da gronda fluriziun. Ma a partir dal 16avel tschientaner è il pajais er adina puspè vegnì perturbà da battaglias tranter las pussanzas europeicas (tranter auter la sconfitta da Napoleun a Waterloo il 1815 e numerusas battaglias durant l’Emprima Guerra mundiala e la Segunda Guerra mundiala). En il decurs dal 19avel tschientaner ha la Belgia furmà in dals motors da la revoluziun industriala ed a l’entschatta dal 20avel tschientaner possedeva il Reginavel pliras colonias ordaifer l’Europa.

En il sidost da la Belgia giaschan las Ardennas cun il Signal de Botrange (694 m) che furma il punct il pli aut dal pajais. Uschiglio è il pajais planiv. La riva per lung la Mar dal Nord ha ina lunghezza da 72,3 km. Il pajais è marcà da numerus flums (tr.a. Meuse/Maas e Sambre/Samber) e chanals.

La Belgia ha ina surfatscha da 30 528 km². Da quai vegnan utilisads radund 25 % per l’agricultura. In’ulteriura cifra marcanta or da la statistica dal pajais è il fatg che betg main che 95 % dals abitants dal pajais vivan en citads.

Sco provinza Belgica – in num che Caesar aveva introducì – ha il territori odiern enconuschì numerus dominis romans. A l’entschatta dal temp medieval è la regiun daventada ina part dal Reginavel dals Francs. Tar la spartiziun da quest reginavel è la Belgia odierna medemamain vegnida spartida politicamain. Pli tard ha la gronda part dal territori fatg part dal Sontg Imperi roman ed è sa dividì en singuls ducadis e contadis. 

Dal temp autmedieval fin al temp modern tempriv han las citads da la Flandra cun lur industria da taila furmà in dals centers economics da l’Europa (sper las citads da l’Italia dal Nord). Politicamain èn ils singuls territoris vegnids sut il domini dals Burgognais, il qual han ertà il 1477 ils Habsburgais. A l’entschatta ha il rom spagnol dals Habsburgais regì il territori, pli tard ils Pajais Bass austriacs. L’onn 1794 ha la Frantscha revoluziunara annectà la regiun. Il 1815, en rom dal Congress da Vienna, è la Belgia vegnida attribuida als Pajais Bass.

Suenter la revoluziun beltga dal 1830 è il pajais daventà independent. Ins ha installà ina monarchia parlamentara e Leopold da Sachsen-Coburg è daventà l’emprim retg dals Beltgs. Ses figl Leopold II ha acquistà il Congo en l’Africa sco possess privat. Ma suenter che las atrocitads envers il pievel dal Congo èn vegnidas enconuschentas a nivel internaziunal, ha il monarc stuì ceder il territori sco colonia al stadi beltg. Durant il reschim da terrur en il Congo eran vegnids per la vita radund 10 milliuns persunas tras sclavaria e lavur sfurzada. Il 1960 è il pajais lura vegnì relaschà en l’independenza.

En l’Emprima Guerra mundiala era la Belgia sa declerada neutrala. Ma tenor il Plan da Schlieffen furmava il pajais in impurtant territori da transit per l’armada tudestga ed è perquai vegnì annectà quasi dal tuttafatg. Sin resistenza en furma da guerra da partisans han ils Tudestgs reagì cun vendetga massiva. En il decurs da la guerra da posiziun èn plinavant vegnidas destruidas numerusas citads en la Flandra. E suenter che las forzas da lavur en l’Imperi tudestg vegnivan stgarsas, han ins sfurzà dieschmillis Beltgs da prestar servetsch en l’armada tudestga u da lavurar per l’industria d’armament tudestga.

Suenter la fin da la guerra ha la Belgia annectà las regiuns enturn Eupen e Malmedy, nua ch’abitavan surtut Tudestgs. Ulteriuras pretensiuns territorialas da la Belgia fin al Rain han dentant gì nagin success. Percunter è la Belgia er sa participada pli tard a l’occupaziun dal territori da la Ruhr.

Er durant la Segunda Guerra mundiala era la Belgia sa declerada neutrala ed è puspè vegnida annectada da la Germania. Fin la liberaziun tras ils Alliads dal vest ha il pajais gì da patir sut la dictatura naziunalsocialistica; minoritads sco ils Gidieus, Sinti e Roma han ins deportà en champs da concentraziun. Las citads e las cuntradas da la Belgia èn percunter restadas schanegiadas d’acziuns da guerra (cun excepziun da l’offensiva en las Ardennas l’enviern 1944/45).

Dapi la fin da la guerra è la politica dal pajais caracterisada da la stretga collavuraziun cun ses vischins e dal process d’unificaziun europeic. Il 1960 è entrada en vigur l’uniun economica e da duana da la Belgia, dals Pajais Bass e dal Luxemburg (Benelux). Plinavant ha la Belgia fatg part da l’entschatta ennà (1957) da la Communitad economica europeica. En il decurs dals onns è la chapitala Brüssel daventada la sedia d’organisaziuns internaziunalas sco la NATO e l’Uniun europeica.

A l’intern dal pajais sa stenta la politica dapi decennis da mitigiar las tendenzas secessiunisticas ch’existan tranter ils differents territoris linguistics. Per quest intent èn las structuras statalas vegnidas federalisadas fermamain. Ma adina puspè reusseschi a las partidas politicas che tendeschan vers l’independenza d’ina u l’autra part dal pajais da gudagnar grondas parts da las votantas e dals votants.

La Belgia è ina monarchia parlamentara a duas chombras organisada a moda federala. La legislativa consista dal retg e da las duas chombras parlamentaras (la chombra dals represchentants cun 150 ed il senat cun 71 commembers).

La gronda part da las partidas, en spezial da las pli grondas, han lur basa u en la Flandra u en la Vallonia. Las partidas da lingua tudestga èn be activas a nivel regiunal. 

Il retg fa a medem temp part da l’executiva. Quella consista d’ina regenza federala da 15 persunas cun il primminister sco primus inter pares.

Las instituziuns federalas èn responsablas per la giustia, la politica da finanzas, la segirezza interna, la politica da l’exteriur, la defensiun e la segirezza sociala. 

Dapi il 1993 furma la Belgia in stadi federativ ch’è sutdividì en trais regiuns (Flandra, Vallonia e Brüssel) e trais communitads (franzos, flam, tudestg). Be la chapitala Brüssel e bilingua. Las proximas unitads administrativas furman diesch provinzas e 34 arrondissements. L’autonomia locala vegn exequida da las radund 590 vischnancas.

Tant las regiuns sco las communitads furman members dal stadi federativ beltg. Els sa differenzieschan tras lur extensiun territoriala e lur cumpetenzas. Las regiuns (ollandais gewesten, franzos régions) èn responsablas per ils gronds secturs sco economia, ambient, traffic e politica agrara. Plinavant exequeschan ellas la surveglianza sur las provinzas, ils arrondissements e las vischnancas. Las communitads (ollandais gemeenschappen, franzos communautés; pli baud er numnadas communitads culturalas resp. linguisticas) èn responsablas per l’entir sistem da furmaziun, la politica da cultura ed ulteriuras ‹dumondas liadas a la persuna› (politica da famiglia, da sanadad e sociala).

En cumparegliaziun cun auters stadis federativs èn las cumpetenzas da las regiuns e communitads beltgas ordvart vastas. Er contracts internaziunals basegnan lur consentiment, sch’els tangheschan champs che cumpetan a las regiuns u a las communitads. Quai vala schizunt per las cunvegnas cun l’Uniun europeica. Tar las instanzas naziunalas èn restadas surtut la politica exteriura, la defensiun, la politica da finanzas, la preservaziun dal sistem social sco er la polizia e la giustia.

La determinaziun da las regiuns e communitads succeda tenor criteris linguistics: la regiun flama cumpiglia il territori da lingua ollandaisa, la regiun vallona il territori da lingua franzosa e tudestga. La regiun Brüssel enserra territori franzos ed ollandais. La communitad flama è cumpetenta per il territori flam e biling, la communitad franzosa per il territori franzos e biling, la communitad tudestga per il territori tudestg.

Tant las regiuns sco las communitads possedan mintgamai agens parlaments ed atgnas regenzas. La communitad flama e la regiun flama han percunter fusiunà lur instanzas, uschia ch’i dat be pli in parlament ed ina regenza flama che cumpiglia tut las cumpetenzas da la regiun e da la communitad.

Las diesch provinzas giaschan tuttas mintgamai entaifer il territori da las regiuns. Sin il territori da la regiun flama (ollandais Het Vlaamse Gewest) giaschan las tschintg provinzas Antwerpen (chapitala Antwerpen), Limburg (Hasselt), Flandra da l’Ost (Gent), Brabant Flamais (Löwen), Flandra dal Vest (Brügge). La regiun vallona (franzos: La Région Wallonne) cumpiglia las tschintg provinzas Hennegau (Mons), Lüttich (Lüttich), Luxemburg (Arlon), Namur (Namur) e Brabant Vallon (Wavre). La regiun Brüssel Chapitala (ollandais Brussels Hoofdstedelijk Gewest, franzos Région de Bruxelles Capitale) na furma nagina provinza, mabain exequescha sias cumpetenzas sco regiun. 

Al nivel statal il pli bass èn situadas las radund 590 vischnancas ch’exequeschan l’autonomia locala.

A l’intern dal pajais è la Belgia segnada da dischuniun, en spezial tranter las duas gruppas linguisticas dals Flams e Vallons. Questas tensiuns èn plitost anc vegnidas pli grondas en il decurs dals onns. En spezial ils success che las partidas flamas separatisticas pon adina puspè registrar tar las elecziuns, sveglian la tema ch’i pudess dar en l’avegnir ina secessiun da la Flandra da l’ulteriura Belgia. Problematic fiss en quest cas tranter auter il status da la regiun da Brüssel ch’è segnada da la gruppa linguistica franzosa, ma ch’è orientada geograficamain plitost vers la Flandra. In’ulteriura tematica dispitaivla fiss il status da la Belgia entaifer las organisaziuns internaziunalas. E per finir sa tschentass inevitablamain la dumonda davart l’avegnir da la chasa roiala. 

La Belgia sa chatta en ina situaziun strategia en il cor da l’Europa (dal Vest), entamez ina zona d’aglomeraziun ed en vischinanza dals pli gronds ports da mar. Da quai resulta ina tscherta dependenza dal commerzi internaziunal, quai che fa da la Belgia ina da las economias publicas las pli avertas entaifer l’Uniun europeica. Quest tratg sa mussa en la stretga collavuraziun cun ils stadis vischins Pajais Bass, Germania e Frantscha, en il partenadi dals stadis dal Benelux sco er en la rolla da piunier da la Belgia entaifer il Cussegl da l’Europa, la NATO, l’Uniun europeica e l’Uniun monetara europeica. La chapitala beltga Brüssel è la sedia da la Cumissiun europeica, dal Parlament europeic, dal Cussegl da l’Uniun europeica, da la Cumissiun economica e sociala, da la Cumissiun da las regiuns sco er da numerusas gruppaziuns da lobbying ed organisaziuns nunguvernamentalas ch’èn activas sin il sectur da la politica europeica. Er la populaziun da la Belgia ha ina tenuta fitg positiva envers l’integraziun europeica, quai che sa mussa mintgamai en resultats d’enquistas che giaschan bundant sur la media europeica da radund 50 %. L’ulteriura populaziun consista da persunas emigradas d’ulteriuras parts da l’Europa e da l’Africa.

L’onn 2012 avevan radund 25 % da la populaziun ina biografia da migraziun. Dapi il 1945 èn radund 2,8 milliuns persunas oriundas da l’exteriur daventadas Beltgs. Da quai derivan 1,2 milliuns da l’ulteriura Europa ed 1,35 milliuns da pajais d’ordaifer l’Europa (Maroc, Tirchia, Algeria, Congo). Dapi che la Belgia ha schluccà las cundiziuns per pudair daventar burgais beltgs, han 1,3 milliuns migrants acquistà il dretg da burgais da la Belgia. La pli gronda gruppa furman ils Maroccans cun varga 450 000 persunas. La segund gronda ils Tircs cun radund 220 000 persunas.

En Belgia datti oz trais linguas uffizialas: l’ollandais, il franzos ed il tudestg. Dapi l’independenza dal stadi l’onn 1830 valeva sulettamain il franzos sco lingua uffiziala. L’onn 1873 è l’ollandais bain vegnì renconuschì sco segunda lingua uffiziala, il franzos è percunter restà la lingua da l’administraziun e d’instrucziun en l’entir pajais. Il 1919 è vegnì vitiers il tudestg sco lingua uffiziala entaifer ils novs territoris en l’ost dal pajais. Pir silsuenter han ils Flams pretendì dad er resguardar l’ollandais sco lingua da l’administraziun e d’instrucziun. Il 1921 ha la regenza beltga lura renconuschì la monolinguitad territoriala da ses abitants en las trais zonas regiunalas: la zona ollandaisa Flandra, la zona franzosa Vallonia e la nova zona da lingua tudestga en la Belgia da l’Ost. L’ost dal pajais fascheva pli baud part da l’Imperi tudestg ed era vegnì attribuì a la Belgia en rom dal Contract da Versailles.

Il status da linguas regiunalas possedan dapi il 1990 il loren roman, il champenois, il loren francon (Francique), il picard ed il vallon.

Radund 75 % dals burgais beltgs èn catolic-romans. 1 % appartegnan a las baselgias protestantas e radund 8 % fan part d’ina communitad islamica. La cumpart da persunas senza confessiun munta a 16 %. Il 2011 viveva radund 1 milliun persunas muslimas en il pajais. A Brüssel munta la cumpart dals muslims a radund 30–35 % da la populaziun. 

La regenza beltga federala renconuscha e sustegna sis religiuns ed ina cuminanza betg religiusa: la baselgia anglicana, l’islam, il giudaissem, la baselgia catolic-romana, la baselgia ortodoxa, la baselgia protestanta unida e la cuminanza umanista.

Pervi da las vastas cumpetenzas da las singulas communitads è il sistem da scola beltg structurà detg different da regiun tar regiun. En rom dal process da Bologna è percunter il sistem universitar vegnì unifitgà ed adattà a las pretensiuns europeicas. Areguard las scolas popularas (ch’enconuschan in sistem primar ed in secundar) èn las instanzas federalas cumpetentas per l’obligaziun d’ir a scola (dal 6avel al 18avel onn da la vita), per fixar las pajas da la magistraglia sco er per definir la savida minimala necessaria per pudair acquistar in diplom.

En las scolas da la communitad flama emprendan ils uffants a partir da la 5avla classa franzos sco emprima lingua estra. En las scolas da la communitad franzosa pon ils uffants emprender a partir da la segunda classa ollandais sco emprima lingua estra. Las scolas da la communitad tudestga cumpiglian gia a partir da l’emprima classa er il franzos. A partir da la 8avla classa vegn vitiers sco terza lingua l’englais.

La Belgia enconuscha ina situaziun economica relativamain stabila. Regenza e parlament èn sa stentads ils ultims onns da reducir ils debits dal stadi. Areguard il product naziunal brut, exprimì en standards da la capacitad da cumpra (SCC), cuntanscha la Belgia in index da 118 (25 stadis da l’UE: 100). Las persunas cun activitad da gudogn sa repartan suandantamain sin ils trais secturs: economia agrara 1%, industria 27%, sectur da servetschs 72%.

La Belgia ha ina da las pli autas quotas d’emissiuns da dioxids carbonics per persuna en tut il mund. Quai è tranter auter d’attribuir a la cumpart da producziun industriala ch’è relativamain auta. Ils ultims onns èn las autoritads sa stentadas da dar cuntrapais a questa situaziun cun promover energias regenerablas. En pli posseda la Belgia duas ovras atomaras ch’èn en funcziun. Gia il 1999 aveva il parlament decidì da sortir successivamain da la producziun d’energia atomara; il 2011 è questa finamira vegnida confermada. 

Il turissem gioga en la Belgia ina rolla centrala. Il pajais vegn surtut visità da turists dals stadis vischins (Germania, Gronda Britannia, Luxemburg, Frantscha, Pajais Bass). Ils turists apprezieschan ils lieus da bogn a la riva da la Mar dal Nord (Knokke-Heist, Bredene, De Panne, Nieuwpoort, Oostende ed auters); in’ulteriura regiun da vacanzas furman las Ardennas. Ultra da quai vegnan citads sco Brüssel, Hasselt, Gent u Antwerpen visitadas stediamain. La citad ch’attira ils pli blers turists è dentant Brügge che vala sco Venezia dal nord. En spezial tar ils Brits è plinavant sa sviluppà in turissem da l’Emprima Guerra mundiala. En la Flandra dal Vest sa chattan blers monuments da guerra e santeris. 

Il conflict tranter Flams e Vallons ch’exista gia dapi il 19avel tschientaner ha per part er motivs economics. La Vallonia era oriundamain segnada da l’industria da charvun e da la siderurgia. Ozendi sa chatta questa regiun en ina fasa da recessiun, uschia che la quota da dischoccupaziun è bundant pli auta ch’en la Flandra. Ultra da quai vegnan dus terzs dal retgav naziunal brut generads en la Flandra. Ils Flams pajan perquai ina contribuziun da solidaritad che vegn duvrada en la Vallonia per finanziar prestaziuns socialas. Quests pajaments èn dentant dispitads politicamain en la Flandra. La malcuntentientscha areguard la flaivlezza economica da la Vallonia sa manifestescha en il moviment separatistic da la Flandra che vegn en spezial manà da la partida Vlaams Belang.

La Belgia furma in impurtant pajais da transit tranter l’Europa Centrala e l’Europa dal Vest. Il pajais è stà l’emprim da l’Europa continentala cun colliaziuns da viafier. La societad da viafier statala SNCB/NMBS maina ina da las raits da viafier las pli spessas dal mund. Per l’aglomeraziun da Brüssel è en pli en planisaziun ina rait da viafier urbana.

Ad Antwerpen sa chatta in dals pli gronds ed impurtants ports dal mund. E quel da Brügge-Zeebrügge vala sco in dals ports centrals da l’Europa. Ad Ostende era tradiziunalmain d’impurtanza il traffic da navettas; quel è dentant sa sminuì dapi l’avertura da l’Eurotunnel.

Impurtantas plazzas d’aviaziun sa chattan a Brüssel-Zaventem, Brüssel-Charleroi, Lüttich, Antwerpen ed Ostende-Brügge. La societad d’aviatica tradiziunala Sabena è ida bancrut il 2001, en connex cun la fin da la Swissair. Suenter pliras fusiuns e collavuraziuns è resultada la Brussels Airlines sco societad successura.

Er areguard il traffic sin via posseda la Belgia ina buna infrastructura, tranter auter ina rait d’autostradas fitg spessa.

Enconuschents picturs da la Belgia èn Pieter Bruegel il Vegl (ca. 1525–1669), Peter Paul Rubens (1577–1640), James Ensor (1860–1949) ed il surrealist René Magritte (1898–1967). Da la Belgia derivan en pli Eugène Boch, l’ami da Vincent van Gogh, e sia sora Anna Boch.

Entaifer l’architectura meritan menziun speziala ils dus architects dal jugendstil Victor Horta (1861–1947) e Henry van de Velde (1863–1957).

Scripturas e scripturs da renum mundial èn Charles De Coster (1827–1879), Émile Verhaeren (1855–1916), Maurice Maeterlinck (1862–1949), Georges Simenon (1903–1989) ed Amélie Nothomb (*1966).
    
Enconuschents acturs da film èn Jean-Claude Van Damme (*1960), Benoît Poelvoorde (*1964), Johnny Galecki (*1975) e las acturas da film Cécile de France (*1975), Émilie Dequenne (*1981) e Jasmin Schwiers (*1982). Sco reschissurs èn sa profilads ils dus frars Jean-Pierre e Luc Dardenne (*1951 resp. 1954).

En il decurs dal 15avel e 16avel tschientaner, il temp da la renaschientscha, èn numerus cumponists da la Belgia odierna stads d’impurtanza europeica. A quests uschenumnads ‹Ollandais› sa laschan attribuir: Guillaume Du Fay (ca. 1397–1474), Johannes Ockeghem (ca. 1420–1497), Josquin Desprez (ca. 1450–1521), Heinrich Isaac (ca. 1450–1517), Jacob Obrecht (ca. 1457–1505), Adrian Willaert (ca. 1490–1562) ed Orlando di Lasso (1532–1594).

Er il cumponist da la romantica César Franck (1822–1890) è naschì a Lüttich ed è gia stà activ musicalmain avant che la famiglia è ida a star il 1835 a Paris. Menziun speziala merita en pli Adolphe Sax (1814–1894), l’inventader dal saxofon. 

Entaifer la musica moderna èn enconuschents il chantadur e chansonnier Jacques Brel (1929–1978) ed il chantadur da pop e crossover Helmut Lotti (*1969). Da renum mundial entaifer la scena da jazz èn Toots Thielemans (1922–2016), ghitarra ed orgelet da bucca, sco er il ghitarrist Philip Catherine (*1942). 

Dapi la fin dals onns 1990 è sa fatga valair en la Belgia ina scena da trance ordvart innovativa ed impurtanta a nivel internaziunal.

Da muntada tut speziala èn en Belgia ils comics. Las Bandes Dessinées (franzos, en furma curta er BD) u Strips (ollandais) èn preschentas a moda fitg prominenta en mintga libraria e supermartgà. A l’academia d’art a Brüssel ed en auters lieus pon ins schizunt studegiar comic che vala qua sco ‹novavel art›.

Enconuschents dissegnaders da comic beltgs èn Willy Vandersteen (Suske et Wiske), Jean Graton (Michel Vaillant), Morris (Lucky Luke), Hergé (Tintin), Peyo (Les Schtroumpfs e.a.), André Franquin (Spirou et Fantasio, Gaston et Marsupilami) e Philippe Geluck (Le Chat). Ad els ed a blers auters è deditgà il museum da comics a Brüssel (Centre Belge de la Bande Dessinée).

Ina cuschina tipica da la Belgia na datti betg. Las singulas spezialitads èn plitost d’attribuir u a la cuschina flama u a la vallona. Tuttas duas cuschinas èn mintgamai influenzadas dal stadi vischin. Da la Belgia derivan percunter ils pommes frites che duevan daventar in success en tut il mund. Enconuschentas èn er las guaflas e pralinas beltgas. Ina lunga tradiziun ha plinavant l’elavuraziun da las pli differentas bieras.

In sport apprezià en Belgia furma il ballape. Er en auters sports sco il tennis u l’atletica leva cuntanschan sportistas e sportists beltgs resultats respectabels.

Il sport naziunal furma dentant il ciclissem. Eddy Merckx, Roger De Vlaeminck, Johan Museeuw, Peter Van Petegem e Tom Boonen èn nums enconuschents entaifer quest sport. Impurtantas cursas da velo ch’han lieu en la Belgia èn Lüttich–Bastogne–Lüttich ed il Tur da la Flandra.




#Article 16: Portugal (3989 words)


Il Portugal (uffizial República Portuguesa) è in stadi europeic situà en il vest da la Peninsla Iberica. Vers ost e nord cunfinescha il pajais cun la Spagna; en il sid ed en il vest giascha l’Ocean Atlantic. Dal territori dal stadi fan er part differentas inslas, numnadamain las Azoras e Madeira. Al vest da la chapitala Lissabon giascha Cabo da Roca che furma il punct il pli occidental da la terra franca da l’Europa.

Il num Portugal (latin Portus Cale) deriva da Porto, ina citad da port ch’era vegnida fundada dal temp da l’Imperi roman. Davart la derivanza da la segunda part dal pled datti differentas interpretaziuns. La gronda part dals linguists è da l’avis ch’il num sa refereschia als Gallaecs, il pievel celtic ch’era da quel temp sesent en il nordvest da la Peninsla Iberica. En il decurs dal temp medieval è Portus Cale daventà Portucale e pli tard Portugale. Anc en il 7avel ed 8avel tschientaner sa referiva il num be a las parts en il nord dal pajais, pia a la regiun situada tranter ils flums Rio Douro e Rio Minho. 

En il Portugal dal Nord regia in clima relativamain frestg ed umid. La regiun consista da duas provinzas u cuntradas tradiziunalas, numnadamain il Minho e la regiun Trás-os-Montes. Il Minho situà en il nordvest furma ina da las regiuns las pli populadas da l’entir pajais. Las pli grondas citads dal Minho èn Braga e Viana do Castelo. Pervi da ses clima e da la vegetaziun ritga vala il Minho sco iert verd dal Portugal. Sin las spundas da las numerusas vals vegnan cultivadas en emprima lingia ivas che vegnan elavuradas a l’enconuschent Vinho Verde. Ulteriuras citads dal Portugal dal Nord, situadas al sid dal Minho, èn Braga, Porto, Vila Nova de Gaia e Matosinhos.

En il nordost giascha la regiun Trás-os-Montes (‹davos las muntognas›). Questa part dal nord ch’è orientada davent da la mar è fitg grippusa e segnada da stads fitg chaudas ed envierns fitg fraids. La vegetaziun è baintant main ritga ch’en il Minho e vegn anc pli stgarsa vers ils cunfins da la Spagna. Al cunfin tranter las regiuns Minho e Trás-os-Montes giascha il Parc naziunal Peneda-Gerês cun restanzas da guauds originars.

La part centrala dal Portugal è per gronda part segnada da collinas e muntognas. La Serra da Estrela furma ina muntogna respectabla che porscha pussaivladads da far sport d’enviern. Il Torre è cun 1993 m la pli auta muntogna da la regiun ed a medem temp da la terra franca dal Portugal. Las pli enconuschentas regiuns èn la Beira, il Ribatejo, l’Estremadura e la sbuccada dal Tejo en l’Atlantic. L’entira regiun è ordvart fritgaivla ed ha in clima ch’è fitg adattà per la viticultura. Las pli impurtantas citads dal Portugal Central èn Lissabon, Aveiro, Sintra, Coimbra, Viseu, Leiria, Castelo Branco e Santarém.

Il sid dal Portugal sa cumpona da las trais cuntradas Terras do Sado, Alentejo ed Algarve. L’entira regiun è planiva u levamain collinusa e segnada d’in clima sitg e chaud. L’Alentejo furmava pli baud la pli impurtanta zona da cultivaziun da granezza dal pajais. Sper ils ers caracteriseschan ulivers, ruvers da corc e plantaschas da flurs-sulegl la cuntrada. Pervi dal dumber creschent da periodas sitgas è la regiun segnada oz da depopulaziun. 

L’Algarve marchescha l’entira costa meridiunala dal pajais. Grazia a las citads pittorescas, las costas stippas e las rivas da sablun è la regiun daventada in’impurtanta destinaziun turistica. Las grondas citads dal Portugal dal Sid èn Portalegre, Évora, Beja sco er Faro e Lagos. Il pli impurtant flum en il sid è il Rio Guadiana che furma sur plirs tschancuns il cunfin tar la Spagna.

Tar il Portugal tutgan plinavant las gruppas d’inslas Madeira ed Azoras situadas en l’Atlantic. Cun excepziun da l’insla da las Azoras Santa Maria èn ellas tuttas d’origin vulcanic. La gruppa d’inslas Madeira sa chatta davant la costa da l’Africa (Maroc) ed è segnada d’in clima subtropic fin tropic. La pli auta muntogna dal Portugal, il Ponta do Pico (2351 m), sa chatta sin las Azoras.

Ils pli impurtants flums dal Portugal èn il Tejo, che nascha en Spagna sut il num Tajo, il Douro (spagnol Duero) ed il Mondego che percurra be il Portugal. 

La populaziun originara dal Portugal è fitg omogena, tant areguard la lingua, l’etnia sco er la religiun. Il portugais vegn discurrì en tut il pajais; be en ils vitgs da Miranda do Douro vegn discurrì in dialect (mirandés) che vegn attribuì a l’asturian.

L’urbarisaziun la pli spessa è da chattar per lung la costa tranter il cunfin spagnol al nord e la regiun da Lissabon. Qua vivan var 70 % da l’entira populaziun, entant che la retroterra ed il sid èn pauc populads. En las duas citads grondas da Lissabon e Porto vivan bundant 10 % da la populaziun dal pajais.

Actualmain vivan radund 10,5 milliuns persunas en il Portugal. Cumpareglià cun il 1900 è la populaziun quasi sa dublegiada; quest svilup è dentant adina puspè stà marcà da fasas da diminuziun (grippa spagnola ils onns 1920, undas d’emigraziun dal 1965–1973 e dals onns 1980/90). A l’intern dal pajais han lieu moviments da migraziun cuntinuants en direcziun dals centers industrials (Lissabon, Porto) e da las regiuns turisticas (Algarve, Madeira ed Azoras).

Sur lung temp ha il Portugal furmà in pajais d’emigraziun. Centers da la cultura portugaisa datti en Frantscha, nua che vivan bundant 1 milliun Portugais, ma er en blers auters pajais europeics. En Svizra è l’augment da l’immigraziun portugaisa a partir dals onns 1990 d’attribuir a la Cunvegna davart la libra circulaziun da persunas concludida tranter la Svizra e l’Uniun europeica. Quella ha tranter auter mitigià tschertas restricziuns da dimora ch’existivan pli baud.

Dapi l’adesiun a l’Uniun europeica il 1986 è il Portugal dentant er daventà in pajais d’immigraziun. Dapli che la mesadad da las persunas ch’immigreschan derivan d’auters pajais da lingua portugaisa, èn per gronda part da confessiun catolica e possedan uschia in fundament cultural cumparegliabel a quel da la populaziun residenta.

Il portugais (português) furma cun il spagnol, il catalan ed ulteriuras linguas pli pitschnas la gruppa da las linguas iberoromanas. Ensemen cun il galician sa lascha il portugais manar enavos sin ina lingua d’origin che deriva da l’entschatta dal temp medieval tempriv. Suenter la furmaziun dal Portugal èn sa sviluppadas las duas linguas odiernas. Entant ch’il galician furma ina lingua minoritara entaifer la Spagna, vala il portugais sco lingua mundiala. La lingua è sa derasada en il decurs dal 15avel e 16avel tschientaner en las colonias portugaisas e furma la lingua uffiziala da la Brasilia. Ins quinta che radund 215 milliuns persunas discurrian il portugais sco lingua materna.

Cumbain ch’il portugais ed il spagnol èn linguas parentadas stretgamain, datti tschertas differenzas – en spezial areguard la pronunzia – che pon difficultar la chapientscha vicendaivla. Medemamain datti pitschnas differenzas tranter il portugais europeic e brasilian; quellas sa laschan cumparegliar cun l’englais e l’american che divergeschan medemamain in da l’auter en tschertas nianzas.

La gronda part da la populaziun portugaisa appartegna a la baselgia catolic-romana (tranter 85 % e 95 %). En l’emprima constituziun dal Portugal dal 1822 era il catolicissem vegnì declerà sco religiun statala. La separaziun da baselgia e stadi ha gì lieu il 1910; a medem temp è vegnida francada la libertad da cretta. Tuttina ha la baselgia catolica pudì mantegnair fin oz tscherts privilegis ed ina posiziun dominanta per exempel sin il sectur da la furmaziun.

En cumparegliaziun cun auters pajais vala il catolicissem sco ch’el vegn pratitgà en il Portugal sco uman e relativamain avert envers chaussas charnalas e terrestras en general. In tratg caracteristic furma la ferma veneraziun da Nossadunna. Il pli impurtant lieu da pelegrinadi è Fatima. Là duai la purschella Maria esser cumparida il 1917 a trais pitschens pasturs.

En il decurs dal temp medieval han er duas ulteriuras religiuns giugà in’impurtanta rolla en il Portugal. Per in tschert temp han Maurs ed Arabs dominà la part meridiunala dal pajais. A quest domini ester ha il Portugal d’engraziar differents progress en l’agricultura, la tecnologia e la cultura. Suenter la reconquista han ils Arabs stuì sa suttametter als cristians u èn vegnids sfurzads d’emigrar. Sco segunda gruppa religiusa èn da menziunar ils gidieus che giudevan en il temp medieval la protecziun dals retgs portugais. Il possess da gidieus che faschevan commerzi u ch’occupavan impurtants posts administrativs ha furmà la basa finanziala per la furmaziun da la flotta portugaisa. Il 1504 e 1506 hai dentant er dà pogroms antigiudaics a Lissabon.

Ins suppona ch’il Portugal saja gia vegnì colonisà avant 500 000 onns. Ils pli vegls fossils umans ch’èn vegnids chattads en il pajais derivan d’umans da Neandertal ed han ina vegliadetgna da ca. 100 000 onns. Dissegns sin grip d’ina vegliadetgna da ca. 10 000 fin 25 000 onns tutgan tar ils pli impurtants da l’entir mund.

Emprimas relaziuns da commerzi cun autras regiuns da l’Europa èn cumprovadas a partir dal temp neolitic. Enturn 800 a.C. han plinavant ils Fenizians fundà puncts da commerzi en l’Algarve. Dal 6avel al terz tschientaner a.C. èn immigrads en pliras undas Celts ch’èn sa maschadads cun ils Ibers residents. Dals Celtoibers ch’èn resultads fascheva er part il pievel dals Lusitans; da quel deriva il num da la provinza romana Lusitania.

A partir da 450 a.C. era la part meridiunala dal Portugal dad oz vegnida colonisada da Cartago. Tras ina cunteroffensiva nà da la Peninsla Iberica èsi reussì als Romans da stgatschar dal tuttafatg lur adversaris enfin l’onn 206 a.C. Sco provinza romana ha il Portugal fatg tras ina ferma romanisaziun. Quella ha tranter auter manà a la fundaziun da citads tenor exempel roman, ha purtà il latin vulgar che furma il fundament da la lingua portugaisa ed ha – in pau pli tard – fullà via al cristianissem.

Il domini roman è ì a fin cun il temp da la migraziun dals pievels. A partir da 400 s.C. han Suebs, Alans, Vandals e Visigots furmà reginavels ch’èn dentant betg stads da lunga durada.

L’onn 711 ha in’armada da Berbs sut Tariq ibn Ziyad battì il retg dals Visigots Rodrigo. Ils imperis d’Al-Andalus ed en spezial l’emirat e pli tard califat da Cordoba vegnivan manads da regents fitg potents e tutgavan tar ils imperis ils pli ferms e progressivs da lur temp. Per motivs climatics è l’immigraziun da colonisaturs berbs plitost succedida en il sid dal pajais. L’influenza maurica sin la cultura e lingua portugaisa è stada fitg gronda e da lunga durada.

Nà dal Reginavel d’Asturia (situà en il nord da la Spagna e dal Portugal dad oz) ha cumenzà il 9avel tschientaner la reconquista dals territoris dal Portugal da pli tard. En la regiun da Porto è sa sviluppà il contadi da Portugal sco part dal Reginavel d’Asturia-Léon. En il decurs dal 12avel tschientaner era quest contadi daventà talmain pussant ch’el è vegnì declerà independent ed è s’etablì sco Reginavel da Portugal. Enfin il 1250 ha la reconquista pudì vegnir terminada – sut gronda participaziun da chavaliers d’auters pajais – cun occupar l’Algarve.

Il 1383 è la chasa burgognaisa, ch’aveva regì enfin là, morta ora en il Portugal. Sut la segunda dinastia portugaisa, la chasa Avis, è il Portugal daventà la pussanza maritima e commerziala dominanta en l’Europa. Hendri il Navigatur (1394–1460) ha inizià viadis da scuverta a la costa da l’Africa dal Vest. Quellas han manà a la fundaziun da l’imperi colonial portugais: l’emprim en l’Africa, suenter en l’America dal Sid (Brasilia) ed en l’Asia (India, Ceylon, Malakka, Macao e.a.). Il Portugal è daventà ina pussanza mundiala e la pli ritga naziun da l’Europa. Er culturalmain è resultà in temp da fluriziun.

Il 1580 è la chasa Avis morta ora; per motivs ereditars è il Portugal crudà als Habsburgais spagnols. Il domini dals Spagnols è stà collià cun ina perdita d’independenza e da parts dal territori colonial. Il 1640 ha ina revolta da la noblezza portugaisa terminà la dominanza spagnola ed instituì la chasa Braganza sco nova dinastia portugaisa. En il decurs dal 17avel e 18avel tschientaner è il pajais daventà adina pli dependent da l’Engalterra. Il 1755 ha en pli in terratrembel devastà grondas parts da la chapitala Lissabon. 

L’emprim minister da quel temp, il refurmatur Marquês de Pombal, ha laschà reconstruir la citad ed ha transfurmà il pajais en in stadi absolutistic sclerì. Il 1761 ha il Portugal defendì cun success attatgas militaricas da vart da la Spagna e da la Frantscha.

Il 1807 han truppas napoleonicas occupà il pajais; la famiglia roiala è mitschada en la Brasilia. Suenter avair stgatschà ils Franzos cun agid da la Gronda Britannia, è prorutta ina revoluziun liberala ch’ha manà a l’emprima constituziun dal pajais (1821). Ils 7 da settember 1822 è plinavant vegnida relaschada la Brasilia en l’independenza.

Il 1853 è morta ora la chasa Braganza. Per motivs da maridaglia ha il rom portugais da la famiglia de Sachsen-Coburg e Gotha occupà il tron (fin il 1910). Questa fasa finala da la monarchia portugaisa è stada segnada da povradad, d’ina fitg auta cumpart d’analfabetissem (enfin 80 pertschient), da problems economics (bancrut statal il 1891) sco er da pliras revoltas republicanas. La discrepanza tranter la crisa economica e la vita extravaganta da la famiglia regenta ha la finala disfatg la reputaziun da la monarchia. Il 1908 èn il regent Carlos I e ses figl ereditar vegnids sajettads durant ch’els gievan en charrotscha. In ulteriur attentat ch’ha custà il 1910 la vita al deputà republican Miguel Bombarda ha manà a Lissabon ad ina revolta. Ils 5 d’october 1910 è vegnida proclamada la republica.

Durant l’Emprima Guerra mundiala ha la giuvna republica, ch’era sa declerada neutrala, sustegnì la Gronda Britannia. Il 1916 è ella la finala sezza entrada en guerra ed ha mobilisà varga 56 000 schuldads. En la quarta Battaglia da la Flandra èn vegnids per la vita en il sulet di var 7500 schuldads portugais.

Ils onns suenter la guerra èn stads segnads d’instabilitad politica e da relaziuns anarchicas (revoltas monarchicas e communistas, emprovas da putsch, regenzas da curta durada e senza maioritad parlamentara). Il 1926 ha in putsch militar terminà l’emprima republica. Sut protecziun dal militar è in civilist, António de Oliveira Salazar, daventà primminister. Il 1933 ha el fundà l’‹Estado Novo›, in stadi autoritar cun tendenzas faschisticas, segnà d’ina partida unitara e da la polizia secreta. L’ideologia catolic-autoritara ed antidemocratica dal dictatur aveva en vista in stadi corporativ.

En la politica da l’exteriur ha il Portugal rinforzà ils lioms cun la Gronda Britannia, sustegnì ils naziunalists en la Guerra civila spagnola e tactà avant la Segunda Guerra mundiala tranter las singulas partidas. Durant ils onns da guerra è il pajais sa declerà neutral, ha dentant furnì ad omaduas varts l’impurtanta materia prima volfram (che vegniva duvrada per la producziun d’armas) ed è daventà in’impurtanta plazza da transtgargiada per da tuttas sorts raubas ed agents secrets. Il 1943 ha il Portugal lubì als alliads d’endrizzar basas militaras sin las Azoras.

Suenter la guerra è il Portugal stà in dals commembers fundaturs da l’Organisaziun dal pact da l’Atlantic dal Nord (NATO). L’onn 1960 – l’uschenumnà ‹onn african›, en il qual 18 stadis èn daventads independents – ha cumenzà la guerra coloniala. Quella ha il Portugal manà en l’Angola, a Moçambique ed a Guinea-Bissau, e quai cun tutta direzza. Il 1968 ha Salazar stuì abditgar per motivs da sanadad. Ses successur Marcelo Caetano n’ha betg midà curs, uschia ch’il Portugal è s’isolà pli e pli a l’exteriur. A l’intern han ils custs da guerra chaschunà gronds daivets statals e manà ad ina grond’inflaziun.

Ina part da l’elita militara ha realisà che la guerra coloniala na sa laschia betg gudagnar cun meds militars. Perquai che la regenza n’è betg sa mussada abla da chattar ina schliaziun politica dal problem, hai dà il 1974 in putsch. Pervi da la malcuntentientscha cun il dictatur e rinforzà tras la crisa economica (prorutta suenter la crisa d’ieli dal 1973), han grondas parts da la populaziun simpatisà cun ils uffiziers putschists. In’insurrecziun generala dal pievel, l’uschenumnada Revoluziun da las neglas, ha fatg fin cun l’‹Estado Novo›. Ils onns 1974/75 èn tut las colonias portugaisas (cun excepziun da Macao) vegnidas relaschadas en l’independenza.

L’emprima fasa suenter questa revoluziun è stada segnada da la cuntraversa tranter il moviment conservativ e l’ala socialistica. L’emprim parevi sco sch’ils socialists daventassan ils victurs politics. Parts da l’industria èn vegnidas transfurmadas en proprietad statala, ina refurma funsila è vegnida iniziada e la constituziun dal 1976 preveseva da transfurmar il Portugal en in stadi socialistic.

Gia las emprimas elecziuns presidialas suenter il 1976 han dentant fullà via al return dal pajais tar ina democrazia parlamentara. Il 1986 è il Portugal daventà commember da la Communitad europeica. En il decurs dals onns 1980/90 èn per gronda part vegnids revocads ils elements socialistics ch’eran sa mantegnids en l’organisaziun statala ed en la politica economica dal pajais. Actualmain domineschan – sco en ulteriuras parts da l’Europa dal Sid – t.a. las influenzas da la crisa economica e finanziala la politica dal Portugal.

Dapi la Revoluziun da las neglas il 1974 è il Portugal sa sviluppà ad ina republica parlamentara stabila. Ils organs centrals da la politica furman – sco en bleras autras democrazias parlamentaras – il president, il primminister cun ses cussegl da ministers ed il parlament. La constituziun statala ch’è actualmain en vigur datescha dal 1976; ella è dentant vegnida revedida pliras giadas enfin oz.

Il Portugal è commember da l’Uniun europeica ed è stà commember da fundaziun da la NATO. Ensemen cun la Spagna sa participescha il Portugal als inscunters ibero-americans che duain promover il dialog cun ils pajais da l’America Latina. Il Portugal ha er sustegnì si’anteriura colonia Timor da l’Ost en ses cumbat per l’independenza da l’Indonesia.

Areguard la divisiun territoriala enconuscha il Portugal ina structura ordvart cumplitgada. Ultra da tschintg regiuns e duas regiuns autonomas (las Azoras e Madeira) datti 18 districts, 28 uschenumnadas sutregiuns statisticas, radund 300 circuls e 3100 vischnancas.

Dapi l’adesiun dal Portugal a la Communitad europeica il 1986 è il pajais sa sviluppà pli ferm vers in’economia da servetschs. Sco en auters stadis da l’Europa èn vegnidas realisadas ils davos decennis vastas privatisaziuns per reducir las expensas statalas. Il 1998 è il Portugal sa qualifitgà per l’adesiun a l’Uniun monetara europeica; ensemen cun indesch ulteriurs stadis ha il Portugal introducì il prim da schaner 2002 l’euro sco med da pajament.

Il Portugal vala fin oz sco il pli pover dals vegls commembers da l’Uniun europeica. Sco impediment per ina creschientscha pli gronda ed in augment da la productivitad e dal grad d’occupaziun vegnan considerads en emprima lingia problems structurals. Il sistem da furmaziun è fin oz marcà d’in’auta rata d’analfabets; vitiers vegnan deficits en il svilup da l’infrastructura ed in’administraziun ineffizienta. Per quests motivs vegn il Portugal concurrenzà pli e pli tras pajais da paja bassa (Europa Centrala e da l’Ost, Asia ed Africa dal Nord) e daventa nunattractiv per investiders da l’exteriur.

Tuttina èn las pajas en il Portugal restadas vinavant fitg bassas en cumparegliaziun cun ils ulteriurs stadis da l’Europa dal Vest; ed er il temp da lavur è per part lunsch sur la media europeica. La quota da dischoccupaziun ch’è vaira auta (savens datiers da 10 %) promova be anc l’emigraziun en auters pajais da l’Europa.

Il Portugal vegn magari resguardà sco pajais dals poets. E propi ha la poesia adina dominà en la litteratura portugaisa en cumparaziun cun la prosa. En il temp medieval, cur che la naziun portugaisa è sa furmada, era la poesia derasada vastamain en il nordvest da la Peninsla Iberica. 

La prosa è sa sviluppada in pau pli tard ed è stada dominada a l’entschatta da cronicas e da legendas da sontgs. Il scriptur classic dal portugais è Luís de Camões (ca. 1524–1580) che vegn savens cumpareglià cun Shakespeare. Ses di da la mort, ils 10 da zercladur, è daventà il di da la festa naziunala. Da la litteratura moderna èn da menziunar José Maria Eça de Queiroz e José Saramago ch’ha gudagnà il 1998 il Premi Nobel da litteratura.

La pli impurtanta furma musicala dal Portugal è il fado. Quel po esser fitg melancolic ed ha gidà a furmar il clisché dals Portugais melancolics (en confrunt cun ils Spagnols plain temperament). Il fado è collià cun ‹saudade›, in sentiment da brama, desideri ed encreschadetgna per il qual i n’exista betg propi in pled correspundent ordaifer il portugais (analog a l’expressiun ‹blue› en la cultura afroamericana). Probablamain è il fado naschì da la maschaida da chanzuns dals navigaturs portugais cun ils ritmus dals sclavs africans.

Ins differenziescha duas furmas stilisticas: il fado da Lissabon, ritg da variantas e pli popular, ed il fado da Coimbra ch’è pli academic e che vegn chantà be dad umens. La chanzun dal fado ch’è daventada la pli enconuschenta è Avril au Portugal (Avrigl a Portugal) da Raul Ferrão (1890–1953) cun varga 200 interpretaziuns en tut il mund, tranter auter da Louis Armstrong, Bing Crosby e Julio Iglesias. La pli enconuschenta artista dal fado è stada Amália Rodrigues (1920–1999) che vegn er numnada la ‹regina dal fado›.

Il fado ha mantegnì fin oz si’attractivitad ed ha anc pudì augmentar sia preschientscha en la publicitad grazia al success da giuvnas chantaduras sco Mariza, Camané ni Ana Moura. Sin champ internaziunal è Madredeus cun la chantadura Teresa Salgueiro stada ils davos onns la gruppa la pli enconuschenta dal fado. 

Ma betg mo en il Portugal, mabain er en sias anteriurs colonias è il fado sa derasà e sa sviluppà vinavant. Uschia per exempel a la morna ch’è vegnida enconuschenta tras Cesária Évora (Inslas dal Cap Verd) u al choro brasilian.

Il zercladur han lieu en tut il pajais festas en onur dals trais sontgs populars (Santos Populares) Antoni, Gion e Petrus. La notg dals 12 sin ils 13 da zercladur vegn festivà Sontg Antoni da Padua, e quai spezialmain a Lissabon nua ch’el è naschì ed ha vivì per lung temp. Il pli popular è sontg Gion che vegn festivà spezialmain a Porto e Braga; e la fin dal mais vegn festivà São Pedro, spezialmain a Póvoa de Varzim e Barcelos en furma da festas da la mar accumpagnadas da fieus e carnaval.

Ballape è il sport il pli popular en in Portugal. Il ballape portugais ha enconuschì ed enconuscha giugaders da renum mundial sco Eusébio, Nené, Paulo Sousa, Rui Costa, Nani, Cristiano Ronaldo, Vítor Baía, Deco, Fernando Meira e Luís Figo. Il 2004 ha gì lieu en il Portugal il Campiunadi europeic; davos la Grezia è la squadra portugaisa vegnida segunda. La terza plazza al Campiunadi mundial il 1966 è stà sur lung temp il pli grond success en l’istorgia da ballape dal pajais, fin ch’igl è reussì da gudagnar il 2016 il campiunadi mundial en Frantscha. La liga naziunala la pli auta, la Primeira Divisão, vegn dominada dals clubs da ballape FC Porto, Sporting Lissabon e Benfica Lissabon.

La cuschina portugaisa suonda en tscherts reguards la tradiziun iberica, ha dentant integrà ultra da quai blers elements che derivan da las anteriuras colonias. En pli sa laschan fastizar influenzas da l’Africa dal Nord che derivan dal temp da l’occupaziun maurica.

Sco spaisa naziunala vala il bacalhau, pesch setgentà che vegniva gia preparà il 13avel tschientaner en questa furma. Tipicas èn er schuppas sco caldo verde (a basa da giabus e tartuffels) u la sopa alentejana (paun, ov, coriander, agl ed ieli d’olivas). Pulaster brassà e cundì cun piri-piri (ina sosa da chili) è ina spaisa che deriva oriundamain da las colonias e ch’è oz fitg derasada en l’entir pajais. Ina plazza speziala entaifer la cuschina portugaisa è plinavant reservada a las spaisas dultschas; ed er la producziun da chaschiel ha ina lunga tradiziun.

Il Portugal è dentant er enconuschent per ses vins. Gia dapi il temp roman vegniva il Portugal associà cun Bacchus/Dionysos, il dieu dal vin e da las festas. Tscherts vins portugais tutgan schizunt tar ils pli appreziads en tut il mund. Enconuschents vins èn il Vinho Verde, il vin da Porto ed il Madeira (vinars dultsch).




#Article 17: Stadis Unids (205 words)


Ils Stadis Unids da l'America (engl. United States of America, curt USA), en la furma curta uffiziala Stadis Unids (engl. United States, curt U.S.), betg uffizialmain era be America (engl. America), èn in pajais da l'America dal Nord che consista da 50 stadis federativs. Cun Hawai ed intgins territoris insulars fan ils Stadis Unids era part da l'Oceania.

Il pajais cuvra var 40 pertschient dal territori nordamerican ed è il terz grond stadi dal mund tenor surfatscha davos la Russia ed il Canada.

Ils Stadis Unids èn sa furmadas da tredesch colonias che èn sa decleradas independentas l'onn 1776 dal pajais matern, la Gronda Britannia. Tras l'immigraziun constanta or da l'Europa e pli tard era da l'Asia, la suppressiun dals abitants indigens, l'expansiun territoriala vers il vest, l'annexiun da grondas parts dal Mexico e l'industrialisaziun han ils Stadis Unids a partir da la fin dal 19avel tschientaner cuntanschì ina tscherta influenza sin la politica mundiala. Suenter il declin da l'Uniun sovietica èn ils Stadis Unids la suletta superpussanza restanta.

Ina lingua uffiziala determinada datti betg, ma l'englais predominescha cleramain, en il sidost è era il spagnol derasà. Ultra da quai exista ina gronda quantitad da linguas d'immigrants sco era restanzas da las numerusas linguas indigenas.




#Article 18: Engalterra (104 words)


LEngalterra (englais England) è la part dal pajais pli gronda e pli fitg populada dal Reginavel Unì da la Gronda Britannia ed Irlanda dal Nord. 

Savens vegn Engalterra duvrà per sbagl sco sinonim per il stadi dal Reginavel Unì u per l'entira insla da la Gronda Britannia. 

L'Engalterra cumpiglia la gronda part dal toc dal sid da l'insla da la Gronda Britannia e cunfinescha en il nord cun la Scozia ed en il vest cun la Valisa e la mar. En l'ost cunfinescha l'Engalterra cun la Mar dal Nord, en il sid cun il Chanal da la Mongia ed en il vest cun l'Atlantic.




#Article 19: Norvegia (7222 words)


La Norvegia (uffizial Reginavel da la Norvegia, norvegiais Kongeriket Norge/Noreg, nordic vegl *Norðvegr, Norvegr, Noregr ‹via dal nord›) è in stadi situà en l’Europa dal Nord.

La Norvegia sa chatta sin la Peninsla Scandinava; il pajais cunfinescha en l’ost cun la Svezia ed en il nordost cun la Finlanda e la Russia. La zona economica da la Norvegia en la Mar dal Nord tutga en il sid sin quella dal Danemarc ed en il vest sin quella da la Scozia. La furma statala correspunda a quella d’ina monarchia constituziunala cun ferms tratgs parlamentars. Il Reginavel è organisà sco stadi unitar decentral.

Il Human Development Index classifitgescha la Norvegia sco in dals stadis ils pli sviluppads dal mund.

]

La Norvegia ha ina lunghezza considerabla: la lingia directa da Kristiansand en il sid fin a Hammerfest en vischinanza dal Cap Nord mesira 1572 km, pia 43 km dapli che la lingia directa da Kristiansand fin a Genua a la Mar Mediterrana. Il cunfin cun la Svezia mesira 1619 km, cun la Finlanda 727 km e cun la Russia 196 km.

La cuntrada da la Norvegia è segnada da massivs da muntognas e da planiras autas crivas, ils fjells. 26 pizs tanschan sur 2300 meters sur mar. Il punct il pli aut da la terra franca furma il Galdhøpiggen (2469 m s.m.) ch’è situà en la chadaina da Jotunheimen. Il fund da la Norvegia consista per gronda part d’in grip fitg dir che sa cumpona da silur, cambrium ed eozoicum e ch’è vegnì faudà en in’èra geologica spezialmain veglia (uschenumnada orogenesa caledonica).

La surfatscha dal pajais è vegnida modellada surtut tras las differentas glazialisaziuns dals temps fraids. La furma topografica la pli enconuschenta èn ils fiords situads a la riva. En medema moda èn sa furmads ils lais a l’intern, tar ils quals i sa tracta pia da lais da fiords. Il pli grond lai è il Mjøsa che cumpiglia ina surfatscha da radund 365 km² (quai che correspunda a ca. dus terz dal Lai da Constanza). Sco il Fiord dad Oslo n’è el betg d’origin puramain glazial, mabain fa part d’ina ruttadira da foss.

L’erosiun pli giuvna tras flums ed auals è plitost pitschna. Perquai è il pajais segnà da blers cataracts e d’autas cascadas ed ils flums ch’èn ritgs da peschs culan tras blers lais natirals. En autezzas pli basas existan diversas furmas da collinas da morenas, tranter auter ils esker u ås ch’èn vegnids furmads d’aua da naiv.

Il pli lung flum dal pajais, il Glomma, ha ina lunghezza da 601 km e sbucca a Fredrikstad en il Fiord dad Oslo. Ina pitschna part da ses affluents deriva da la Svezia. La pli gronda regiun da la Svezia che defluescha vers la Norvegia è l’intschess dal Trysilelva (che sa numna en Svezia Klarälv). Er vers nord na suonda il cunfin statal betg exactamain il sparta-auas principal da la Scandinavia; uschia cula l’aua da regiuns norvegiaisas pli pitschnas vers la Mar da l’Ost e quella da regiuns svedaisas pli pitschnas vers la Mar dal Nord. Perquai che blers flums culan tras lais, portan las singulas parts da lur curs savens differents nums.

La costa da l’Atlantic cumpiglia radund 25 000 km (ensemen cun la costa da tut las inslas schizunt sur 80 000 km). Questa immensa lunghezza è d’attribuir als blers golfs da furma graschla e lunghenta, ils fiords che mainan per part l’aua da mar salada fin lunsch viaden en l’intern dal pajais. Senza ils fiords mesirass il cunfin vers l’Atlantic ca. 2650 km.

La terra franca vegn circumdada da radund 150 000 inslas. Las gruppas d’inslas las pli enconuschentas èn las Lofoten e las Vesterålen ch’èn tuttas duas situadas al nord dal circul polar. Ad omaduas gruppas vegn attribuida l’insla Hinnøya che furma cun ina surfatscha da 2204 km² la pli gronda insla norvegiaisa situada en vischinanza da la costa.

Sco quai ch’i n’è betg da spetgar auter per in pajais muntagnard, è la gronda part da las costas grippusa. Be en lieus protegids datti pitschnas rivas da sablun. En tschertas regiuns datti sper inslas che vargan aut sur l’aua ora er muts grippus (skjær u skjer) che s’auzan be pauc sur las undas.

Il cumportament dal fluss e refluss da la mar sa differenziescha marcantamain da la situaziun a la costa meridiunala ed occidentala da la Mar dal Nord. Il livel da l’aua crescha e tschessa en general be pauc e la differenza da temp tranter il livel il pli bass ed il pli aut è en general pli curta che a la costa tudestga.

Dal Reginavel da la Norvegia fan er part, sper il territori principal continental, gruppas d’inslas situadas en l’Atlantic dal Nord resp. en l’Ocean Arctic, numnadamain Svalbard cun Spitzbergen e l’Insla dals Urs sco er l’insla Jan Mayen.

Sut administraziun norvegiaisa sa chatta er l’Insla Bouvet en l’Ocean Antarctic. Ella na vala però betg sco part dal Reginavel da la Norvegia, mabain sco territori dependent. Dus ulteriurs territoris che sa chattan en il sid dal 60avel grad da latituda n’èn betg renconuschids a nivel internaziunal sco territori suveran norvegiais. I sa tracta da l’Insla Peter I en l’Ocean Antarctic e da la Terra da la Regina Maud en l’Antarctica (che furma il sectur dal continent antarctic situà tranter 20° vest e 45° ost).

Sper la chapitala Oslo (626 000 abitants) existan en la Norvegia trais ulteriuras citads cun dapli che 100 000 abitants; igl èn quai Bergen (269 000), Trondheim (180 000) e Stavanger (130 000).

Grondas zonas d’aglomeraziun furman las citads Fredrikstad (77 849) e Sarpsborg (54 136) cun total 131 985 abitants sco er Drammen (66 802) cun parts da las vischnancas da Lier, Nedre Eiker ed Øvre Eiker cun bundant 100 000 abitants.

En la Norvegia spartan las Muntognas Scandinavas la graschla strivla da costa occidentala (umida) dal territori da l’ost ch’è segnà d’in clima continental.

La costa dal vest enconuscha in clima ordvart miaivel ed umid per quests grads da latituda settentriunals. Il motiv furma il Current da l’Atlantic dal Nord che maina aua chauda da grads da latituda meridiunals fin lunsch vers nord. La costa resta pli u main l’entir enviern libra da glatsch; medemamain sa fa l’effect mitigiant da la mar sentir en la temperatura da l’aria (ca. −5 °C fin +2 °C).

L’umiditad che vegn absorbada da la mar plova a terra a la vart occidentala da la muntogna. La citad da Bergen vala uschia sco ina da las citads las pli ritgas da plievgia da l’Europa. Da l’autra vart da la muntogna è la quantitad da las precipitaziuns plitost bassa. En il vest sa sminuescha quella era dal sid vers il nord ed è en general bundant pli bassa la primavaira che l’atun.

Vers l’intern dal pajais sa fa valair il clima continental: las precipitaziuns èn pli bassas, las temperaturas pli autas durant la stad, ma er bundant pli bassas durant l’enviern; l’amplituda da la temperatura è qua pia bler pli gronda che a la costa dal vest.

En la Norvegia vivan bundant 1300 spezias da plantas da sem e da fletga. Bundant la mesadad da questas spezias cumparan en guauds da feglia e guauds da guglias cun lur caracteristicas da spazi da viver specificas. En la Norvegia existan er bundant 40 000 lais e fitg bleras palids e territoris umids cun la flora correspundenta. Plinavant èn quests grads da latituda settentriunals segnads d’in ritg dumber da litgens, mistgels e bulieus.

Sco la flora sa differenziescha er la fauna da la Norvegia fermamain en la part meridiunala ed en la part settentriunala dal pajais. Ils animals ch’èn da chasa en il sid na sa distinguan strusch da quels da l’Europa Centrala. Il chavriel, il tais, il tschierv ed auters animals da guaud n’èn naginas raritads. Vers nord suondan lura animals ch’èn s’adattads a las cundiziuns da viver pli crivas. Derasà vastamain è il ren; ins po er scuntrar l’urblauna, la ludra da naiv, il luf e la vulp polara. Sco en l’entira Europa dal Nord è er l’elan derasà en ils guauds da la Norvegia; per al pudair scuntrar fan ins però il meglier da sa participar ad in dals numerus safaris d’elan che vegnan purschids en tut il pajais. Ils peschs ils pli frequents èn la ringia ed il merluz (en las mars) resp. il salmun, il scarun ed il salmelin (en ils fiords ed en las auas a l’intern dal pajais). In utschè da mar marcant furma la sfunsella (Fratercula arctica) cun ses bec colurà che regorda ad in papagagl.

Da la populaziun dal pajais vivan 75 % en las citads pli grondas e 25 % sin la champagna. Significativ per il pajais è che la spessezza da la populaziun è plitost auta en il sid dal pajais e per lung da la costa dal vest, entant ch’ella è bundant pli bassa en il nord. Anc pli fitg divergescha la cifra sch’ins cumpareglia las regiuns dal pajais situadas a la mar cun quellas a l’intern dal pajais ch’èn bler main populadas (surtut las planiras autas).

En il decurs dal 20avel tschientaner è il dumber d’abitants quasi sa dublegià: l’onn 1900 dumbrava il pajais 2,21 milliuns abitants, il 2013 5,05 milliuns. Actualmain dumbra la Norvegia ina da las pli autas creschientschas demograficas da l’Europa. Quai è d’attribuir d’ina vart a l’auta quota da naschientschas, da l’autra vart a forzas da lavur estras, ma adina pli fitg er a pensiunaris bainstants che vegnan da l’exteriur en la Norvegia a passentar lur saira da la vita.

Cun in dumber tranter 60 000 e 100 000 viva en il nord da la Norvegia la pli gronda cumpart dal pievel indigen dals Sams. Il status da minoritads naziunalas renconuschidas possedan er ils Skogfinner, ils Kvener, ils uschenumnads Tatere (viagiants), ils Roma ed ils Gidieus.

Il prim da schaner 2012 vivevan en la Norvegia 655 170 immigrants (u 13,1 % da la populaziun totala); tenor la definiziun dal pajais èn quai umans dals quals omadus geniturs èn naschids a l’exteriur. Bundant in terz dals immigrants posseda il dretg da burgais norvegiais. La repartiziun sin ils singuls pajais d’origin vesa or sco suonda (situaziun dal 2012): Pologna (72 103), Svezia (36 578), Pakistan (32 737), Somalia (29 395), Irac (28 935), Germania (25 683), Lituania (23 941), Vietnam (20 871), Danemarc (19 823), Iran (17 913), Russia (16 833), Tirchia (16 742).

Tenor indicaziuns da l’uffizi naziunal da statistica eran la fin dal 2012 radund 86 000 persunas senza lavur. Quai correspunda ad ina quota da 3,2 % (immigrants 6,0 %) che giascha lunsch sut la media dals pajais da l’UE e da l’OECD.

La Norvegia enconuscha dapi in tschert temp in manco acut da forzas da lavur qualifitgadas. Perquai vegnan recrutadas intenziunadamain forzas da lavur da l’UE. Per augmentar l’attractivitad per lavurers esters, conceda il stadi norvegiais divers agids da partenza e stimuls finanzials durant ils emprims 24 mais.

La pli gronda cuminanza religiusa furma la baselgia populara evangelic-luterana che vegn manada dal preses da la conferenza dals uvestgs. Dapi il 1851 disponan tut ils Norvegiais dal dretg d’exercitar libramain la religiun. Radund diesch procent prendan part regularmain al servetsch divin u ad autras occurrenzas religiusas. La repartiziun da la populaziun sin las singulas cuminanzas religiusas sa preschenta suandantamain (situaziun dal 2011): commembers da la baselgia norvegiaisa 79 %, muslims, 2 %, baselgia roman-catolica 2 %, auters cristians 4 %, budists 0,3 %, senz’appartegnientscha ad ina cuminanza religiusa 13 %.

En la Norvegia exista in’associaziun umanistica, il ‹Human-Etisk Forbund›, che furma ina cuminanza da la concepziun dal mund areligiusa e senza confessiun. L’organisaziun è vegnida fundada il 1956 e cumpigliava il 2011 radund 80 000 commembers (radund 1,6 % da la populaziun).

L’obligaziun d’ir a scola è vegnida introducida en la Norvegia il 1739. Il 1889 è vegnì fixà ch’il temp da scola obligatoric dura set onns, il 1969 è quel vegnì augmentà sin nov ed il 1997 sin diesch onns. Ils uffants cumenzan la scola en la vegliadetgna da tschintg u sis onns. La gronda part dals scolars frequenta suenter la dieschavla classa ina scola cuntinuanta; quellas sa dividan en scolas che correspundan al stgalim gimnasial superiur e talas ch’èn cumparegliablas cun in emprendissadi cun scola professiunala obligatorica.

Roms d’instrucziun en la scola fundamentala èn: norvegiais, englais (a partir da l’emprima classa), matematica, instrucziun sociala (istorgia, politica, geografia, sociologia), art e lavurs manualas, scienza ed ambient, alimentaziun e sanadad, musica, sport, religiun ed etica, informatica (rom d’elecziun), segunda lingua estra a partir da la 8avla classa (tudestg, spagnol u franzos).

Scolars sams han il dretg da vegnir instruids en sami sch’els èn da chasa en territori samic u sch’els furman ina gruppa d’almain diesch scolars. Per uffants d’immigrants en la vegliadetgna da scola sto il stadi norvegiais porscher en mintga communa curs da lingua gratuits. Per fugitivs datti curs da lingua e d’integraziun gratuits en rom da la furmaziun dals creschids.

Tgi che studegia po retrair en Norvegia in credit da furmaziun, il studielån. Plinavant exista in vast sistem da furmaziun da creschids che stat a disposiziun a tut las persunas che vivan en il pajais.

L’aspectativa da vita muntava il 2011 ad 80,5 onns (umens 78 onns, dunnas 83 onns). Il dumber da naschientschas cumpigliava il 2007 13 sin 1000 abitants, pia bundant dapli che la mortalitad cun 8,3 sin 1000 abitants.

Da las expensas publicas sa repartivan il 2006 17,0 % sin la sanadad, 12,6 % sin la prevenziun per la vegliadetgna, 13,9 % sin furmaziun ed educaziun, 4,0 % sin il militar e 0,4 % sin la protecziun da l’ambient.

Tar il norvegiais sa tracti d’ina lingua nordgermana ch’è per part influenzada fermamain dal bass tudestg mesaun. La lingua scritta sa divida en duas varietads: radund 85–90 % dals indigens scrivan bokmål (verbal: ‹lingua da cudesch›) u riksmål (‹lingua dal reginavel›, senza status uffizial), in idiom che po vegnir resguardà sco varianta dal danais influenzada dals dialects da la Norvegia da l’Ost. Radund 10–15 % scrivan nynorsk (‹norvegiais nov›). Questa varietad, che vegniva numnada fin il 1929 landsmål, è renconuschida dapi il 1885 sco segunda lingua scritta. Ella è vegnida sviluppada dad Ivar Aasen a basa dals dialects che vegnan discurrids en il vest dal pajais e vegn surtut duvrada a la costa dal vest, en la regiun dals fiords ed en parts dal Telemark. En scola ston scolars norvegiais emprender tant bokmål sco er nynorsk. Sco lingua discurrida han ils dialects mantegnì fin oz lur posiziun dominanta.

Sper il norvegiais vegnan discurridas da minoritads naziunalas las suandantas linguas: sami (radund 10 000 fin 20 000 persunas) e kven u finlandais (10 000 fin 15 000) surtut en il nord dal pajais, plinavant romani e jiddic (mintgamai radund 1000 persunas). En las communas cun maioritad samica è il sam dapi il 1992 in rom da scola obligatoric.

En scola emprendan ils Norvegiais englais sco emprima lingua estra e pon silsuenter eleger tranter tudestg, spagnol e franzos sco segunda lingua estra. Enfin ils onns 1950 furmava il tudestg tradiziunalmain l’emprima lingua estra (tant en la Norvegia sco er en l’ulteriura Scandinavia); oz è però l’englais derasà il pli ferm, suandà dal tudestg e spagnol. 

La colonisaziun dal territori da la Norvegia odierna tras l’uman ha cumenzà suenter il davos temp da glatsch, ca. en il decurs dal 8avel millenni a.C. Chatschaders e rimnaders èn suandads il glatsch che luava vers nord; ils pli vegls chats (da ca. 10500 a.C.) derivan da Blomvåg en la communa Øygarden.

Suenter la cultura da megalits scandinava èn suandadas durant il temp da bronz e da fier influenzas germanas. Dal temp dals Vikings (800–1050) è la Norvegia vegnida unida sut retg Harald Hårfagre (ca. vers 900). Da quel temp èn vegnidas colonisadas nà da la Norvegia l’Islanda, las Inslas Feroe e la Grönlanda. Intginas da questas expediziuns – tranter auter sut ils manaders Bjarni Herjúlfsson, Thorvald Eiriksson e Leif Eriksson – han schizunt cuntanschì vers l’onn 1000 sur plirs viadis la Terranova situada davant la costa da l’ost dal continent che dueva vegnir numnà radund 500 onns pli tard ‹America›. Ma er la Normandia en Frantscha è vegnida colonisada dals ‹umens dal nord› ch’èn restads preschents en il num da la regiun. Ed er las inslas Orkney e Shetland (che fan oz part da la Scozia) èn vegnidas prendidas en possess da Vikings norvegiais ed han appartegnì a la Norvegia fin l’onn 1472.

A partir da l’onn 1380 è la Norvegia vegnida regida en uniun persunala cun il Danemarc. Il 1397 è il pajais daventà commember da l’Uniun da Kalmar; entaifer quest’uniun dueva la Norvegia però ‹regredir› ad in commember relativamain nunimpurtant. Il Reginavel da Kalmar ha existì uffizialmain fin la sortida da la Svezia (1523); l’uniun cun il Danemarc ha però perdurà fin il 1814. Perquai ch’il Danemarc aveva sustegnì la Frantscha, è la Norvegia vegnida attribuida a chaschun da la Pasch da Kiel (1814) al retg da la Svezia. Damai ch’i n’ha però betg dà ina surdada immediata, è la Norvegia stada per curt temp independenta. Il pajais ha profità da la chaschun: ils 17 da matg 1814 ha l’assamblea naziunala relaschà ad Eidsvoll ina constituziun ch’è restada valaivla cun pitschnas adattaziuns fin oz. L’onn 1836 ha il Storting arranschà l’emprima festa dals 17 da matg; dapi lura vala questa data sco di da la festa naziunala.

Suenter il curt intermezzo dal matg 1814 èn suandads 91 onns d’uniun persunala cun la Svezia. Quella è vegnida schliada ils 13 d’avust 1905, suenter ch’ina maioritad surprendenta dals Norvegiais era s’exprimida a chaschun d’ina votaziun dal pievel a favur da l’independenza. Prinzi Carl or da la chasa Glücksburg è daventà sut il num Haakon VII il nov retg da la Norvegia.

En l’Emprima Guerra mundiala ha la Norvegia declerà ensemen cun il Danemarc e la Svezia sia neutralitad. Il 1920 è il pajais daventà commember da la Societad da las naziuns.

Er durant la Segunda Guerra mundiala era la Norvegia sa declerada neutrala. Ils 9 d’avrigl 1940 è il pajais però vegnì occupà dal Reich tudestg (uschenumnà ‹Unternehmen Weserübung›). Sco cumissari dal Reich per la Norvegia occupada è vegnì nominà Josef Terboven. Militarmain han ils Tudestgs surtut fatg valair dus motivs per l’occupaziun dal pajais: la sbartgada previsa da truppas britannicas sco er la muntada strategica dals ports norvegiais per pudair garantir il provediment cun minerals da fier nà da Kiruna (Svezia). Surtut la muntada da Narvik per l’economia da guerra da la Germania vegn oz messa en dumonda, damai ch’il Terz Reich era bundant main dependent dals minerals da fier svedais che quai ch’i vegniva supponì pli baud. Bler pli impurtanta era l’intenziun da separar tras l’occupaziun dal port la Gronda Britannia da sias furniziuns da minerals da fier or da la Svezia. Quai vegn confermà en il fatg che Hitler ha cumandà da render nunduvrabels ils stabiliments dal port per ils inimis – e tras quai er per il Reich sez. Bundant pli impurtantas per l’economia da guerra tudestga eran las materias primas norvegiaisas sezzas; il pajais dueva far part d’in spazi economic europeic sut egemonia tudestga. Tar las pli impurtantas materias primas tutgavan aluminium, molibden e pirit. La Norvegia ha bain fatg resistenza, ha però stuì succumber suenter sis emnas, damai che la marina tudestga era memia ferma. Igl ha però er dà en Norvegia naziunalsocialists (tranter els Vidkun Quisling) ch’èn sa liads cun ils Tudestgs e ch’èn uschia vegnids a la pussanza. La gronda part da la populaziun norvegiaisa è però sa distanziada da questas forzas ed ha sustegnì las organisaziuns da resistenza.

Ina consequenza dal temp d’occupaziun tudestg han furmà ils uschenumnads tyskerbarna, ils ‹uffants dals Tudestgs› che schuldads tudestgs han schendrà cun Norvegiaisas. Lur mammas vegnivan numnadas cun spretsch tyskertøser ‹dunnas da levsenn dals Tudestgs›. Ils radund 10 000 fin 12 000 uffants èn vegnids discriminads massivamain en la societad dal suenterguerra. Pir il 1998 è il primminister da la Norvegia sa perstgisà tar ils tyskerbarna per l’entiert ch’è vegnì fatg ad els. Ditg è er la privaziun dals dretgs e la deportaziun dals gidieus norvegiais stada nunperscrutada. Radund 800 dals ca. 2100 gidieus che vivevan surtut ad Oslo e Trondheim èn vegnids exportads ed assassinads en il Champ da concentraziun Auschwitz-Birkenau. Tranter las unfrendas sa chattavan Ruth Maier e la scolara da 15 onns Kathe Lasnik, da las qualas il filosof Espen Søbye ha descrit lur destin.

Il 1949 ha la Norvegia fatg part dals commembers da fundaziun da la NATO ed il 1960 è vegnida fundada dal Danemarc, l’Austria, il Portugal, la Svezia, la Svizra ed il Reginavel Unì l’Associaziun europeica da commerzi liber (AECL, per tudestg EFTA). L’istorgia moderna da la Norvegia dapi il 1969 è segnada da creschientscha e ritgezza tras ils giaschaments da petroli. In’adesiun a l’Uniun europeica è vegnida refusada duas giadas tras votaziun dal pievel (25 da settember 1972 e 28 da november 1994). Sco commember dal Spazi economic europeic sa chatta il pajais però en blers reguards en ina situaziun cumparegliabla a quella d’in commember da l’UE; ultra da quai è la Norvegia commembra da l’Uniun da pass nordica e fa sco tala part da la Cunvegna da Schengen.

Ils 22 da fanadur 2011 han gì lieu attatgas ad Oslo e sin l’insla Utøya ch’han chaschunà la mort a 77 persunas. Il primminister Jens Stoltenberg ha numnà l’attentat ina «tragedia naziunala» ed il pli nausch act da violenza dapi la Segunda Guerra mundiala.

La constituziun norvegiaisa dals 17 da matg 1814 stat sut l’influenza da la constituziun franzosa da la fin dal 18avel tschientaner. In element fundamental ha furmà il princip da la separaziun da las pussanzas tenor Montesquieu. Malgrà questas influenzas liberalas èn gidieus e gesuits vegnids considerads en il Reginavel fin en ils onns 1850 sco minoritads illegalas.

La separaziun da las trais pussanzas ch’è vegnida fixada en la constituziun ha manà en il decurs dal 19avel tschientaner a pliras provas da forza tranter la ‹birocrazia da la regenza› (executiva), che vegniva controllada a moda essenziala tras la chasa roiala svedaisa, ed il Storting (l’assamblea naziunala norvegiaisa sco legislativa). La curuna ha empruvà d’extender ses privilegis sco forza executiva e d’excluder, sa referind a la constituziun, il Storting da las fatschentas da la regenza. Quest conflict è be anc vegnì pli critic en quel mument che l’industrialisaziun ha manà a differenzas da classa tranter l’elita dals funcziunaris e la burgaisia che sa fascheva valair adina dapli. Entaifer la societad è sa furmada in’opposiziun creschenta envers il stadi da funcziunaris roial. A nivel communal era l’apparat da la regenza gia vegnì remplazzà il 1837 tras l’introducziun da l’autonomia administrativa locala. Tant pli ha l’aristocrazia svedaisa empruvà da defender si’influenza a nivel naziunal.

Las tensiuns èn creschidas fin il 1884, l’onn che marchescha en la Norvegia l’introducziun dal parlamentarissem. Encunter la resistenza dal retg Oskar II da la Norvegia ha il represchentant dal Storting burgais-liberal Johan Sverdrup chatschà tras il princip statal che la regenza dependia dal Storting per pudair mantegnair l’atgna pussanza (dretg da relaschada d’uffizi). Tras questa dependenza è facticamain vegnida dissolvida la suveranitad politica da la monarchia che pareva avant d’esser determinada tras il princip da la separaziun da las pussanzas. Quai ha rinforzà marcantamain la posiziun dal parlament, uschia ch’il retg è stà necessità d’incumbensar Sverdrup sco nov primminister cun la furmaziun da la regenza.

Suenter la Segunda Guerra mundiala ha disponì la partida da lavurers socialdemocrata sut Einar Gerhardsen dal 1945 al 1961 d’ina maioritad absoluta. Silsuenter èn per ordinari vegnidas furmadas regenzas da minoritad.

]
Il retg nominescha il primminister e sin proposta da quel er ils ulteriurs ministers. La regenza è dependenta da la confidenza dal retg. En la Norvegia vala ultra da quai il princip dal parlamentarissem: Il parlament che consista da 169 represchentants controllescha la regenza; quella è pia dependenta da la confidenza dal parlament (cf. il svilup istoric descrit survart). Mintga quatter onns vegnan elegids novs represchentants (avant il 1936 mintga trais onns). Il parlament Storting sa cumponiva sur lung temp da duas chombras, Odelsting e Lagting. Questa sutdivisiun vegniva però be resguardada en rom da la procedura da legislaziun, uschia ch’i sa tractava facticamain d’in sistem d’ina chombra. Dapi il 2009 è il Storting er uffizialmain in parlament d’ina chombra.

Schef dal stadi è retg Harald V. La monarchia norvegiaisa desista pli ferm che quella dad auters pajais sin pumpa curtaisa. En rom da las sesidas dal cussegl dal stadi ch’han lieu regularmain sut l’egida dal retg ed a las qualas prendan er part tut ils ministers, è il monarc involvì vaira ferm er en la politica actuala.

En la Norvegia hai fin uss dà sis votaziuns dal pievel: duas il 1905 davart la dissoluziun da l’uniun cun la Svezia e l’intronisaziun da prinzi Carl dal Danemarc sco retg Haakon VII (omaduas cun resultat positiv), il 1916/27 davart il scumond d’alcohol e la dissoluziun da quel ed il 1972/94 davart l’adesiun a la Communitad europeica resp. a l’Uniun europeica (omaduas cun resultat negativ). 

Cumbain ch’il stadi norvegiais è organisà sco stadi unitar, è garantida l’administraziun autonoma a nivel communal.

Da las partidas pli grondas ch’èn represchentadas regularmain en il Storting fan part: Arbeiderpartiet (partida dals lavurers, socialdemocrats), Høyre (dretga, conservativs), Fremskrittspartiet (populists da la dretga), Sosialistisk Venstreparti (partida socialistica), Kristelig Folkeparti (partida populara cristiana), Senterpartiet (partida agrara-ecologica), Venstre (sanestra/liberals) e Miljøpartiet De Grønne (ambient/verds). Daspera datti anc intginas partidas pli pitschnas.

En la Norvegia èn radund 1,33 milliuns lavurants commembers d’in sindicat. Il pli grond da quels furma la federaziun da tetg Landsorganisasjonen i Norge.

L’armada norvegiaisa consista da quatter unitads: las forzas terrestras, la marina, l’aviatica militara e la milissa da la protecziun da la patria. La Norvegia è stada in dals commembers fundaturs da la NATO. L’onn 2007 ha l’aviatica militara da la Norvegia er surpiglià dals Stadis Unids la protecziun dal stadi vischin Islanda che na dispona da naginas atgnas forzas armadas.

Il pajais è sutdividì en 11 provinzas administrativas (fylker) che vegnan subsummadas en tschintg regiuns statisticas (landsdel). Vitiers vegnan las inslas da Svalbard e Jan Mayen ch’èn bain situadas ordaifer la structura da provinza e che na cumpiglian er naginas vischnancas, ma che fan medemamain part dal Reginavel da la Norvegia. La pli pitschna provinza tenor territori furma la chapitala Oslo. I suonda ina survista da las tschintg regiuns e 11 provinzas:

Provinzas 2017:

Sper las regiuns administrativas datti ulteriuras regiuns statisticas che na s’orienteschan betg exnum als cunfins da las provinzas. Actualmain èn ins londervi da planisar ina refurma da l’administraziun che duai manar a set regiuns, tranter auter cun furmar ina regiun da la chapitala Oslo engrondida.

En la Norvegia existan 356 communas (situaziun dal 2006); a quest nivel vegnan elegids mintga quatter onns ils represchentants per l’administraziun locala. Las pli grondas communas èn (cun dumber d’abitants, situaziun dal 2013): Oslo (623 359), Bergen (267 883), Trondheim (179 667), Stavanger (129 175), Bærum (116 938), Kristiansand (84 387) e Fredrikstad (76 839).

Tenor il Human Development Index (HDI) sa chatta la Norvegia ils davos onns sin l’emprim u segund rang mundial (per part suenter l’Islanda). Las entradas per persuna tutgan tar las pli autas, medemamain l’assistenza per uffants. Cumpareglià cun la media dal product naziunal brut dals stadis da l’Uniun europeica (EU25 = 100) ha la Norvegia cuntanschì il 2005 in index da 169.

Sco emprim stadi insumma ha la Norvegia introducì il 2003 ina quota da dunnas. Dapi il 2008 ston interpresas quotadas a la bursa avair en lur cussegls da surveglianza ina cumpart da dunnas d’almain 40 %.

Praticamain l’entir basegn da forza electrica (ca. 98 %) deriva en la Norvegia da la forza idraulica indigena. En l’entir pajais n’existan naginas ovras atomaras ed er naginas ovras d’energia da charvun (cun excepziun d’ina ovra sin l’insla Svalbard). Er il petroli ed il gas natiral che vegn explotà en la Norvegia na vegn betg duvrà per la producziun d’electricitad a l’intern dal pajais.

La forza idraulica ha ina lunga tradiziun en la Norvegia ed ha furmà la basa per l’industrialisaziun dal pajais. Suenter simpels mulins d’aua e martels mecanics è suandà plaunsieu il svilup vers ils generaturs che servan a producir energia electrica. Per pudair stgaffir in provediment d’energia en l’entir pajais sparpaglià èn vegnids erigids a moda decentrala numerus implants da forza idraulica da dimensiun pitschna e pli gronda. Questa structura è sa mantegnida fin oz, uschia ch’igl existan numerus provediders d’energia pitschens e gronds, privats e publics, locals e statals.

Ils pretschs d’electricitad fitg bass per ils consuments finals na porschan nagin stimul per mesiras d’effizienza d’energia e per mesiras da spargn. Perquai è il consum d’energia en general fitg aut; il consum d’electricitad per persuna furma schizunt la valur maximala en tut il mund. Il motiv principal per quest aut consum d’electricitad è bain il fatg che la gronda part dals edifizis vegnan stgaudads directamain cun electricitad. En blers lieus sa chapeschi da sasez che la glisch arda sur pliras uras u schizunt sur plirs dis en stanzas che na vegnan betg duvradas. I dat schizunt edifizis publics che n’èn gnanc munids cun interrupturs da la glisch.

Dapi intgins onns èn bain s’augmentadas las investiziuns en l’energia da vent. Ma pervi dal grond potenzial d’ovras d’accumulaziun a pumpa mantegna la forza idraulica er en avegnir sia posiziun centrala. Actualmain è la Norvegia londervi d’intensivar il stgomi d’electricitad cun auters pajais europeics. 

La Norvegia gudogna radund 3 % da la quantitad da petroli che vegn explotada en l’entir mund; ella sa chatta uschia sin la 13avla plazza da tut ils stadis ch’exploteschan petroli. Il maximum d’explotaziun è vegnì cuntanschì il 2001 e tschessa mintg’onn per radund 4 %. Il 2007 muntavan las reservas restantas a radund 1,3 milliardas Sm³. Actualmain cumpensesch’ins questa digren cun augmentar la producziun da gas natiral.

Las autas entradas per persuna che caracteriseschan l’economia publica da la Norvegia resultan dals auts pretschs da petroli sin il martgà mundial, da l’explotaziun intensiva sco er dal dumber da la populaziun relativamain bass. Ils Norvegiais han però realisà che las reservas dad ieli vegnan probablamain be pli a tanscher paucs decennis; ultra da quai è la rait sociala fitg spessa che caracterisescha il stadi colliada cun auts custs. Perquai è vegnida sviluppada ina strategia che duaja preservar la bainstanza naziunala a lunga vista. Ils onns 1990 è vegnì sviluppà in concept d’investiziun spezial, il fonds dad ieli. En quel vegnan investids ils enorms gudogns che resultan da l’export dad ieli. Quai succeda exclusivamain sin ils martgads a l’exteriur per evitar che l’economia a l’intern dal pajais sa surstgaudia e per impedir che la curuna norvegiaisa saja suttamessa ad ina memia gronda revalitaziun. L’onn 2014 aveva il fonds dad ieli norvegiais ina valita da 653 milliardas euros.

La Norvegia porscha ina natira ordvart impressiunanta che carmala mintg’onn milliuns da turists en il pajais. Tar las attracziuns da turists che vegnan visitadas il pli savens tutgan il Cap Nord ed il Geirangerfjord; medemamain è la lingia dals bastiments da posta tradiziunala per lung da la costa dal vest, la Hurtigruten, sa sviluppada ad in magnet per turists.

Tgi che parta dad Oslo en direcziun da Bergen, pia vers la costa dal vest, percurra la provinza Telemark. Da las vias d’autos u sin il traject da la viafier da Bergen che cuntanschan autezzas da varga 1000 meters sur mar sa laschan er contemplar la stad en proxima vischinanza muntognas cuvertas da naiv. Sper l’enconuschent Holmenkollen cun sias siglieras ed il lieu olimpic Lillehammer dispona la Norvegia – che vala sco lieu d’origin dal sport da skis – er d’in grond dumber d’ulteriurs territoris da skis attractivs.

En il nord da Dombås è situà il parc d’auta muntogna Dovrefjell cun il Snøhetta che tanscha fin a 2286 meters sur mar. Quest parc n’è betg be in’enconuschenta regiun da viandar e da sport d’enviern, mabain er ina da las paucas regiuns da l’Europa nua che vivan anc bovs-mustgat en libertad.

Alpinists prefereschan surtut la muntogna Jotunheimen cun ils dus pizs ils pli auts dal pajais, Galdhøpiggen e Glittertind. En il vest da questa muntogna sa chatta il parc naziunal cun il glatscher Jostedalsbreen che furma la pli gronda massa da glatsch continentala colliada.

Per far turas da trekking da plirs dis sa porscha la cuntrada da tundra muntagnusa dal plateau aut Hardangervidda.

Sin l’insla Røst che fa part da las Lofoten sa chatta il pli grond grip d’utschels da la Norvegia cun radund 2,5 milliuns utschels cuaders. En il sidvest dad Ålesund sa chatta l’insla d’utschels Runde; quella è colliada sur punts cun la terra franca ed è perquai levamain cuntanschibla per turists ed ornitologs.

La Norvegia è ina da las pli grondas naziuns da pestga dal mund. La zona da pestga statala tanscha fin vers la Terranova. I vegnan surtut tschiffads merluzs, ringias, nasels, sgombers e giomberets. Daspera è er s’augmentada en ils davos decennis la piscicultura en aquaculturas (surtut salmun e merluz). Peschs e products da peschs cumpiglian 5,3 % da l’entir export dal pajais; suenter petroli, gas e metal è quai pia il terz grond artitgel d’export insumma. Ultra da quai dispona la Norvegia d’ina fitg veglia tradiziun da chatscha da balenas. Cun il scumond da la chatscha da balenas commerziala l’onn 1986 è quest sectur economic sa reducì fermamain; quai malgrà che la Norvegia aveva recurrì il 1986 cunter la decisiun da la Cumissiun internaziunala da chatscha da balenas e n’è pia betg liada a questa decisiun. Sco in dals paucs pajais insumma lubescha la Norvegia puspè la chatscha da balenas en dimensiuns pli pitschnas. A nivel internaziunal vegn quai crititgà fermamain e betg il davos er da vart da l’Uniun europeica vischinanta.

In’ulteriura gronda tradiziun da la Norvegia furma la navigaziun maritima. Enfin oz mantegna il pajais la quart gronda flotta da commerzi mundiala. Entaifer il product naziunal brut furman la navigaziun maritima e la construcziun da navs il sectur il segund grond. L’onn 2011 eran registrads en la Norvegia 1281 ed a l’exteriur 117 bastiments norvegiais sur 1000 tonnas bruttas. 

En cumparegliaziun cun ils ulteriurs pajais europeics è il consum da gasettas dal di fitg aut en la Norvegia: l’onn 2011 legevan ca. 63 % da la populaziun ina gasetta, e quai en media durant 23 minutas per di. Sco en auters pajais constatesch’ins er en la Norvegia ina tendenza che maina davent da las gasettas stampadas vers in diever augmentà da las purschidas digitalas. Las pli grondas gasettas dal pajais èn las gasettas da qualitad ‹Aftenposten› e ‹Bergens Tidende› sco er las gasettas da boulevard ‹Verdens Gang› e ‹Dagbladet›. La fin 2010 cumparevan en tut la Norvegia betg main che 226 gasettas.

L’emettur da dretg public NRK emetta en tut il pajais programs da radio e televisiun e cumpiglia er purschidas regiunalas. Il pli grond emettur da televisiun privat è TV 2 ch’è collià cun las staziuns da radio privatas da Radio Norge ad ina holding.

Il 2011 possedevan 93 % da la populaziun in computer en l’atgna abitaziun, 92 % avevan access a l’internet (da quai 83 % cun in sistem da transmissiun digital a spectrum lartg). Gia il 2004 possedevan 90 % da la populaziun in telefon mobil. Il pli grond purschider da servetschs da telecommunicaziun dal pajais è Telenor.

La Norvegia enconuscha ina politica d’alcohol fitg restrictiva. La consumaziun d’alcohol è scumandada sin terren public. Bavrondas cun dapli che 4,8 procent alcohol na pon betg vegnir cumpradas en supermartgads u chadainas da discont, mabain be en affars construids aposta dal stadi, ils uschenumnads Vinmonopolet. Tals affars ch’èn vegnids stgaffids il 1922 en rom da la prohibiziun chatt’ins en la gronda part da las citads. Ils pretschs d’alcohol èn bundant pli auts che en auters pajais. En ina posiziun speziala sa chattan bavrondas cun ina bassa cumpart d’alcohol. Davart la vendita da quellas decida mintga vischnanca individualmain; uschia pon t.a. singulas sorts da biera er vegnir acquistadas en ils supermartgads ordinaris. 

En la Norvegia vegnan consumads en media 4,4 l alcohol pur ad onn; quai è in dals pli bass consums d’alcohol per persuna insumma (per cumparegliar: en Germania vegnan consumads 10,2 l per persuna). Las perscripziuns d’alcohol da la Norvegia n’èn betg nunusitadas per l’Europa dal Nord: er la Finlanda e la Svezia enconuschan ina politica d’alcohol restrictiva. En quests dus pajais è il nivel da pretschs però bundant pli bass ch’en la Norvegia, uschia ch’i dat per part in veritabel turissem d’alcohol. 

Il surpli d’exports ha muntà il 2004 a 300 milliardas curunas norvegiaisas. 81 % dals exports van en l’Uniun europeica. Cun prest 70 % èn ils carburants la posiziun la pli gronda.

Ils imports succedan per ca. 70 % sur l’Uniun europeica. Il post il pli grond furman maschinas e vehichels cun ca. 40 %.

Il 2010 ha la bilantscha dal stadi cumpiglià expensas en l’autezza da 178 milliardas dollars ed entradas da 226,8 milliardas dollars. Il debit dal stadi muntava il 2010 a 47,7 % dal product naziunal brut. Il 2006 èn 8,7 % da las expensas dal stadi vegnidas impundidas per la sanadad, 7,2 % per la furmaziun e 1,9 % per il militar.

La geografia da la Norvegia attribuescha a la navigaziun ina muntada tut speziala e munta ina sfida permanenta per il traffic sin via ed il traffic da viafier.

En l’entir pajais existan 91 852 kilometers vias (da quai 71 185 kilometers vias asfaltadas). Il Lærdalstunnel ch’è vegnì avert l’onn 2000 furma cun ses 24,5 kilometers il pli lung tunnel da via dal mund. Il 2008 è vegnì avert l’Eiksundtunnel ch’è cun ina profunditad da 287 il tunnel sutmarin situà il pli a bass dal mund. Surtut en la regiun dals fiords e per lung da la costa èn las navs-fera da grond’impurtanza per il traffic.

La rait da viafier cumpiglia 4077 kilometers; da quai èn 2518 electrifitgads. Tranter il 1883 ed il 1994 ha l’interpresa da viafier statala Norges Statsbaner gestiunà tut il traffic da viafier incl. l’entira rait da viafier. Dapi lura è ella be pli responsabla per il traffic da persunas sin rodaglias.

Al traffic aviatic servan radund 100 plazzas aviaticas da dimensiun gronda u pli pitschna.

La Norvegia vala sco piunier areguard ils dretgs da las dunnas. L’organisaziun naziunala per ils dretgs da las dunnas è gia vegnida fundada il 1884, tranter auter cun participaziun da divers primministers ed autras persunalitads prominentas. L’onn 1978 è vegnì endrizzà l’emprim servetsch da mediaziun per dumondas d’egualitad en tut il mund. 

Il Premi Nobel da la pasch furma ina da las categorias dal Premi Nobel ch’è vegnì stgaffì da l’inventader ed industrial svedais Alfred Nobel. Tenor l’intenziun dal legatur duaja il premi da la pasch vegnir surdà a quella persuna ch’haja «contribuì il pli ferm u il meglier a la fraternisaziun dals pievels ed a la dismessa u sminuziun da las armadas sco er a la realisaziun u promoziun da congress da pasch» e ch’haja uschia «prestà l’onn passà il pli grond servetsch a l’umanitad».

La distincziun vegn surdada dapi il 1901 mintg’onn il di da la mort dad Alfred Nobel (10 da december). Cuntrari a tut las autras categorias dal Premi Nobel n’è – tenor la voluntad da Nobel – betg responsabla in’instituziun svedaisa per la surdada dal premi da la pasch, mabain in comité da tschintg persunas che vegn nominà dal parlament norvegiais. Perquai na vegn il Premi Nobel da la pasch er betg surdà a Stockholm, mabain ad Oslo.

La Norvegia ha enconuschì en la segunda mesadad dal 19avel tschientaner ina prosperitad culturala ch’è stada colliada essenzialmain cun ils auturs Henrik Ibsen, Bjørnstjerne Bjørnson, Alexander Kielland, Jonas Lie, Amalie Skram, Arne Garborg, Hans E. Kinck e Knut Hamsun. Fin ussa han retschet trais litterats norvegiais il Premi Nobel da litteratura: Bjørnstjerne Bjørnson (1903), Knut Hamsun (1920) e Sigrid Undset (1928).

Las pli impurtantas tribunas per inscenaziuns dramaticas e da musica furman il Nationaltheatret ad Oslo, il Den Nationale Scene a Bergen, il teater da Nynorsk Det Norske Teatret ad Oslo ed il Den Norske Opera  Ballett.

Il pli enconuschent cumponist norvegiais è Edvard Grieg. Ulteriurs cumponists da muntada èn t.a. Johan Svendsen, Christian Sinding, Ole Bull, Fartein Valen, Harald Sæverud e Geirr Tveitt.

Enconuschentas furmaziuns da la musica da pop e rock èn a-ha, Apoptygma Berzerk, BigBang, Trail of Tears, Storm, Kaizers Orchestra e Motorpsycho. La Norvegia è er enconuschenta per sias numerusas bands da black-metal.

Spezialmain vitala è er la scena da jazz norvegiaisa. Impurtants represchentants da quest gener èn Jan Garbarek, Nils Petter Molvær, Arild Andersen, Rebekka Bakken, Silje Nergaard, Bugge Wesseltoft, Eivind Aarset, Terje Rypdal, Ketil Bjørnstad, Sidsel Endresen, Solveig Slettahjell, Kirsti Huke e Kristin Asbjørnsen.

Il pli enconuschent pictur artist da la Norvegia è l’expressiunist Edvard Munch (1863–1944). Ina gronda part da sias ovras pon ins contemplar en il Museum da Munch ad Oslo.

Sin il champ da la fotografia, en spezial da la fotografia da paesagis, ha surtut Knud Knudsen influenzà il maletg e l’imaginaziun da la cuntrada norvegiaisa dal 19avel tschientaner. Ses vast relasch sa chatta en la Biblioteca universitara da Bergen.

L’organisaziun da las bibliotecas vegn resguardada sco exemplarica a nivel internaziunal. I dat radund 900 bibliotecas communalas, 340 bibliotecas scientificas, 20 bibliotecas regiunalas e la Biblioteca naziunala norvegiaisa. La lescha da bibliotecas ch’exista dapi il 1834 prescriva l’access gratuit a las bibliotecas.

La cuschina norvegiaisa è segnada dal clima scandinav cun sias curtas stads ed ils lungs envierns sco er da la moda da sa nutrir tradiziunala dals pestgaders e purs. Pesch e products da latg han furmà sur lung temp la basa da questa cuschina, cumplettads da granezza e charn da balena.

La cultivaziun da granezza è però be pussaivla en il sid dal pajais ed er là creschan be avaina e ierdi. Questas sorts n’èn betg adattadas per la producziun da paun cun levon; perquai è tipic per la Norvegia l’uschenumnà flatbrød, in paun plat dir e setgentà, cumparegliabel al paun croccant.

La Norvegia è en emprima lingia ina naziun da sport d’enviern ed enconuscha ina lunga tradiziun, surtut en il sport da skis nordic. Blers svilups dal sport da skis derivan da la Norvegia ed en bleras da questas disciplinas tutga la Norvegia tar las naziuns che domineschan las concurrenzas internaziunalas.

Il center dal sport d’enviern furma il Holmenkollen ad Oslo. Là ha gì lieu il 2011 per la quarta giada il campiunadi mundial da ski nordic; medemamain èn vegnids manads tras là il 1952 ils emprims gieus olimpics d’enviern en tut la Scandinavia. Il 1994 duevan suandar ils gieus olimpics d’enviern a Lillehammer.

La squadra naziunala da hockey na po betg concurrer areguard sia muntada e prestaziun cun ils pajais vischins Finlanda e Svezia; percunter è la Norvegia gia dapi onns ina da las naziuns las pli fermas en il curling.

Il pli grond success da la squadra naziunala da ballape dals umens ha furmà la medaglia da bronz als gieus olimpics dal 1936. Trais giadas ha la squadra pudì sa qualifitgar per il campiunadi mundial (1938, 1994 e 1998) ed il 2000 er per il campiunadi europeic.

En il ballamaun fa surtut la squadra naziunala da las dunnas part da l’elita mundiala. Ella ha t.a. gudagnà ina giada il campiunadi mundial sco er trais giadas il campiunadi europeic.

Ulteriurs sports ch’èn populars en la Norvegia furman il navigar a vela e la cursa d’orientaziun. E per finir: il 2013 è il Norvegiais Magnus Carlsen daventà campiun mundial da schah. Ses numerus success a nivel internaziunal han manà en il pajais ad in veritabel boom da quest sport.




#Article 20: Reginavel Unì (11917 words)


Il Reginavel Unì (englais United Kingdom [juːˌnaɪ̯.tʰɪd ˈkʰɪŋ.dəm], curt UK), en furma lunga Reginavel Unì da la Gronda Britannia ed Irlanda dal Nord (englais United Kingdom of Great Britain and Northern Ireland), è in stadi che sa chatta sin las Inslas Britannicas situadas davant la costa dal nordvest da l’Europa continentala.

Quest pli grond stadi insular da l’Europa furma in’uniun tranter ils anteriurs pajais independents Engalterra, Valisa e Scozia sco er il territori da l’Irlanda dal Nord che vegn administrà a moda ministeriala. L’Isle of Man e las Inslas dal Chanal (u Inslas Anglo-Normannas) èn suttamessas a la curuna britannica en furma da possess da la curuna. Ellas na furman nagins pajais autonoms e na tutgan er betg tar il Reginavel Unì; lur relaziun cun il Reginavel Unì vegn descrit cun il term suzeranitad. Sco monarchia parlamentara tgira il Reginavel Unì en pli relaziuns cun 15 Commonwealth Realms, dals quals il monarc britannic è il schef da stadi. Ultra da quai existan 14 territoris d’ultramar.

Cun radund 64,1 milliuns abitants furma il Reginavel Unì in dals stadis europeics cun la pli gronda populaziun. Sper l’appartegnientscha temporara a l’Uniun europeica (1973–2020) fa il stadi part da la NATO e da las Naziuns unidas. El è ina pussanza atomara, in commember stabel dal Cussegl da segirezza da l’ONU ed in stadi commember da la Gruppa dals set.

Il Reginavel Unì posseda influenza internaziunala pervi da la vasta derasaziun da la lingua englaisa e pervi dal Commonwealth of Nations.

La furma lunga uffiziala dal num dal stadi è Reginavel Unì da la Gronda Britannia ed Irlanda dal Nord. Per simplifitgar vegn per ordinari duvrà il num Gronda Britannia sco sinonim per il Reginavel Unì; quai è er il cas tar politichers, en las medias, tar las instituziuns da furmaziun e tar las ambassadas britannicas.

La Gronda Britannia furma però be la gronda da las Inslas Britannicas u l’anteriur Reginavel Gronda Britannia (enfin il 1801) che cumpigliava be l’Engalterra, la Valisa e la Scozia. Sin la segund gronda insla – l’Irlanda – sa chattan l’Irlanda dal Nord (che fa part dal Reginavel Unì) e la Republica da l’Irlanda (che furma in agen stadi independent).

Il num latin Britannia deriva dal term celtic brith che munta ‹da pliras colurs› u ‹taclà›.

La denominaziun sinecdoca ‹Gronda Britannia› (u er be Engalterra) per il Reginavel Unì è derasada surtut sin la terra franca europeica e sa lascha declerar cun la posiziun dominanta da l’Engalterra entaifer il Reginavel sur blers tschientaners. Il Reginavel Unì ha perquai er il numer da l’auto ‹GB› (‹Great Britain›). Ils Brits sezs numnan lur pajais en la lingua da mintgadi ‹UK› u ‹Britain› e be darar ‹Great Britain›.

Il Reginavel Unì sa cumpona da l’insla principala Gronda Britannia e da ca. in sisavel da l’insla Irlanda. Enturn l’insla principala sa chattan pliras gruppas d’inslas cun bundant 1000 inslettas. Las gruppas d’inslas las pli impurtantas èn Shetland ed Orkney en la Mar dal Nord (en il nord da la Scozia), las Hebridas Exteriuras e las Hebridas Interiuras en l’Ocean Atlantic (en il vest da la Scozia), Anglesey en la Mar Irlandaisa (en il nordost da la Valisa), las Inslas da Scilly en la Mar Celtica (en il sidvest da l’Engalterra) sco er l’Isle of Wight en il Chanal da la Mongia (davant la costa meridiunala da l’Engalterra). Il sulet cunfin statal sa chatta sin l’insla Irlanda vers la Republica Irlanda; quel mesira ina lunghezza da 350 kilometers. Betg part dal Reginavel Unì fan – cumbain ch’ellas suttastattan a la curuna britannica – l’Isle of Man en la Mar Irlandaisa e las Inslas dal Chanal en il Chanal da la Mongia (davant la costa dal nord da la Frantscha).

Il Reginavel Unì sa cumpona da las parts Engalterra, Valisa, Scozia ed Irlanda dal Nord. La pli gronda da questas parts dal pajais è l’Engalterra cun ina surfatscha da 130 395 kilometers quadrat e var 53,9 milliuns abitants. Questa part cuvra radund 59 % da l’insla Gronda Britannia e consista per gronda part da planiras bassas che vegnan percurridas da chadainas da collinas. La Tees-Exe Line, ina lingia imaginara tranter ils flums Tees a Yorkshire ed Exe a Devon divida l’Engalterra en duas differentas regiuns.

Il nordvest ed il nord èn segnads da muntognas mesaunas che consistan da grip metamorf e magmatic. Latiers tutgan ils Cumbrian Mountains e las Pennines. Da crappa da sediment pli veglia consista en il sid da las Pennines il Peak District che giascha en l’Engalterra Centrala. Ulteriuras muntognas mesaunas furman Dartmoor ed Exmoor en il sidvest dal pajais.

En il sid e per lung da la costa da l’ost èn situadas chadainas da collinas ch’èn sa sviluppadas da crappa da sediment pli giuvna. Da quellas fan part d’ina vart las collinas da crap da chaltschina dals Yorkshire Wolds, dals Lincolnshire Wolds, dals Cotswolds e da l’Isle of Purbeck; da l’autra vart las furmaziuns da crida en l’Engalterra dal Sid che sa cumponan da Salisbury Plain, Chiltern Hills, North Downs e South Downs. La pli auta muntogna da l’Engalterra furma cun 978 meters il Scafell Pike che sa chatta en ils Cumbrian Mountains.

Ils pli impurtants flums èn Temsa, Severn, Trent, Great Ouse e Humber. Las pli grondas citads èn Londra, Birmingham, Manchester, Sheffield, Liverpool, Leeds, Bristol e Newcastle upon Tyne.

En il vest da l’Engalterra sa chatta la Valisa (englais: Wales, valisic: Cymru). Cun 20 779 kilometers quadrat e radund 3 milliuns abitants è quai la segund pitschna part dal stadi. La Valisa sa cumpona quasi dal tuttafatg da muntognas mesaunas metamorfas; dal nord vers il sid vegnan las elevaziuns en general pli bassas. La pli auta muntogna è il Snowdon (Yr Wyddfa) cun 1085 meters. Tenor quella è vegnida numnada la muntogna da la Valisa che sa chatta il pli en il nord, la Snowdonia (Eryri); alura suondan en la part centrala dal pajais ils Cambrian Mountains (Elenydd) ed en il sid ils Brecon Beacons (Bannau Brycheiniog).

Il pli lung flum dal Reginavel Unì, il Severn (Hafren), nascha en la part centrala da la Valisa, en ils Cambrian Mountains. La gronda part da la populaziun sa concentrescha sin la graschla stresa da costa per lung dal Chanal da Bristol en il sid, cun las citads da Cardiff (Caerdydd), Newport (Casnewydd) e Swansea (Abertawe), sco er sin las valladas da la Valisa dal Sid che sa sroman da questa stresa da costa.

La Scozia (englais: Scotland, gaelic: Alba) ha ina grondezza da 78 772 kilometers quadrat e dumbra 5,3 milliuns abitants. Questa part da la Gronda Britannia cumpiglia il nord da l’insla. Il pajais sa cumpona da trais parts: ils Highlands en il nord e vest, il Central Belt en il center ed ils Southern Upla en il sid.

La geologia da la Scozia è per gronda part metamorfa; sediments datti be darar. Grip magmatic è surtut da chattar en la part meridiunala dals Highlands sco er en numerusas parts da las Hebridas Interiuras. Medemamain il resultat d’activitad vulcanica dal temp terrian arcaic furma il Ben Nevis en ils Grampian Mountains, cun 1344 meters la pli auta muntogna da la Scozia ed a medem temp da tut las Inslas Britannicas. La part settentriunala dals Highlands, ch’è in pau pli planiva, è spartida dal rest dal pajais tras il Great Glen, ina ruttadira tectonica.

La gronda part da la populaziun sa concentrescha sin il Central Belt, nua che sa chattan las zonas d’aglomeraziun da las citads grondas da Glasgow, Edinburgh e Dundee. La suletta citad gronda ch’è situada ordaifer questa regiun è Aberdeen che giascha a la costa dal nordost. Ils Southern Uplands en la part meridiunala dal pajais èn percunter pauc populads; els s’extendan per lung dal cunfin englais da la Mar Irlandaisa fin a la Mar dal Nord. Il Central Belt e las Southern Uplands vegnan er numnads ensemen Lowlands.

La costa dal vest da la Scozia è fragmentada fermamain; davant la costa sa chattan bleras inslas e lunsch vers l’intern dal pajais tanschan ils numerus fiords che vegnan numnads qua firths. Ils pli enconuschents da quests bratschs da la mar èn il Firth of Clyde ed il Solway Firth. La costa da l’ost è percunter strusch sparpagliada, cun excepziun dals trais fiords Firth of Forth, Firth of Tay e Moray Firth ch’han però plitost il caracter da gronds estuars.

La pli pitschna part dal pajais furma l’Irlanda dal Nord (englais: Northern Ireland, irlandais: Tuaisceart Éireann). Questa regiun è situada en il nordost da l’insla Irlanda, ha ina grondezza da 13 843 kilometers quadrat e dumbra radund 1,8 milliuns abitants. Il territori è per gronda part undegià. La suletta muntogna mesauna furman ils Mourne Mountains ch’èn situads en il sidost; la pli auta muntogna è il Slieve Donard cun 849 meters. Circa en il center da l’Irlanda dal Nord sa chatta il Lough Neagh che furma cun 388 kilometers quadrat il pli grond lai intern da tut las Inslas Britannicas. Las pli grondas citads èn Belfast e Derry (Londonderry).

Il Reginavel Unì giascha cumplettamain en la zona climatica temprada. Il clima è umid e pervi da l’influenza dal Current dal Golf pli chaud ch’èn auters territoris che sa chattan sin quest grad da latituda. Pervi da la posiziun dal pajais en la zona da convergenza d’aria fraida polara e chauda tropica è l’aura fitg variabla. En general è il clima pli chaud e pli sitg en il sid ed en l’ost che en il nord ed en il vest. Las precipitaziuns muntan en il nord en media a 1000 mm per onn, en il sid a 700 mm. Il pli umid èsi en la part occidentala dals Highlands cun bundant 3000 mm ed il pli sitg ad Essex cun 600 mm.

Durant dus terzs da l’onn è il tschiel surtratg, uschia che la durada da la radiaziun dal sulegl è en media relativamain bassa. A la costa dal sid da l’Engalterra munta quella 1750 fin 2100, en la part occidentala da la Scozia savens sut 1000 uras. Il pajais è pertutgà relativamain darar da catastrofas da la natira; surtut d’enviern èsi però da quintar cun ferms vents u schizunt cun orcans e cun inundaziuns. La tschajera cumpara per il pli d’enviern en las regiuns muntagnusas e collinusas sco er a las costas.

Damai che la temperatura media giascha er d’enviern savens sur il punct da schelira, crodi per ordinari be pauca naiv. Excepziuns furman ils Highlands da la Scozia, nua che la cuverta da naiv è per intginas emnas grossa avunda per pudair far sport d’enviern.

Ils guauds da feglia e maschadads da pli baud èn vegnids stgatschads a chantun tras l’agricultura e cuvran oz anc 8 % dal territori. Per part vegn empruvà da replantar anteriurs guauds. Las surfatschas che giaschan tranter las muntognas èn cuvertas cun palids e pastgiras.

Mammals gronds che vivan en libertad èn il tschierv ed il chavriel sco er il dam, il tschierv sika ed il tschierv da l’aua (Hydropotes inermis) ch’èn vegnids colonisads. Il luf ed il portg selvadi ch’eran oriundamain da chasa en il pajais èn vegnids extirpads. Ad Exmoor, sin las Inslas Shetland ed a New Forest datti ponis mezselvadis. Il stgilat vegn stgatschà pli e pli fitg tras il stgilat grisch da l’America dal Nord; en l’Engalterra dal Sid viva en pli il kenguru da Benett ch’è medemamain vegnì importà. In’ulteriura spezia da mammal oriundamain betg indigena furma il mink, in parent nordamerican dal visun. En las regiuns da costa vivan chauns da mar e focas grischas.

La flora e fauna da l’Irlanda dal Nord correspunda per gronda part a quella da l’insla britannica principala. Sulettamain ina spezia d’orchidea selvadia (Spiranthes stricta) ch’è derasada en las vals dals flums laterals Upper e Lower Bann furma ina particularitad.

L’onn 2013 dumbrava il Reginavel Unì 64 106 000 abitants. Ses burgais vegnan numnads Brits. La populaziun sa reparta sco suonda sin las singulas regiuns. Engalterra: 84,1 %, Scozia: 8,3 %, Valisa: 4,8 %, Irlanda dal Nord: 2,8 %.

Il Reginavel Unì n’ha definì nagina lingua administrativa; de facto vegn però duvrà l’englais sco lingua uffiziala e da 95,5 % da la populaziun sco suletta lingua naziunala. Sco lingua da standard pledada vala l’uschenumnada varianta da la Received Pronunciation che vegn però discurrida en il mintgadi da main che 10 % dals Englais, surtut en il sid dal pajais en la regiun enturn Londra. Questa varietad da l’englais vegn per ordinari er instruida a l’exteriur. Percunter enconuschan duas parts dal pajais linguas uffizialas: En la Valisa èn tant l’englais sco er il valisic linguas uffizialas ed en la Scozia è renconuschì dapi il 2005 sper l’englais er il gaelic scot sco lingua uffiziala. En l’Irlanda dal Nord furman l’irlandais ed il scots dad Ulster linguas minoritaras renconuschidas uffizialmain. Daspera datti en il Reginavel Unì divers dialects locals da l’englais; quels n’han però nagin status uffizial e vegnan per ordinari be discurrids. Anc avant paucs onns vegnivan dialects ed ina pronunzia dialectala resguardads en il Reginavel – cun sia ferma conscienza da classa – sco macla sociala. 

Las linguas minoritaras èn renconuschidas e protegidas tras la Charta europeica da las linguas regiunalas e minoritaras. En la Scozia èn quai il scots ed il gaelic scot, a Cornwall il cornic, en l’Irlanda dal Nord l’Ulster scots e l’irlandais. En la Valisa ha il valisic in status egual a l’englais.

Tenor la dumbraziun dal pievel da l’onn 2001 vegn il valisic discurrì en la Valisa da radund 20 % da la populaziun (ca. 600 000 persunas), il gaelic da radund 60 000, l’irlandais da radund 20 000 (7 % da la populaziun da l’Irlanda dal Nord) ed il cornic da ca. 3500 persunas (ca. 0,6 % da la populaziun dal Cornwall).

Independentamain da la naziunalitad vegn la populaziun dal Reginavel Unì registrada tenor gruppas etnicas (ethnic groups u races): alvs – pia Englais, Valis, Scots ed Irlandais sco er in dumber (relativamain pitschen) d’immigrants da l’Europa da l’Ost e dal Sid –, nairs ed Asiats. Questa classificaziun na suonda betg criteris scientifics tenor ina teoria d’etnias, mabain sa basa sin la definiziun persunala che mintgin fa a moda subjectiva. Il 2001 èn per l’emprima giada er vegnids registrads ils Chinais sco atgna gruppa. 92,1 % da la populaziun èn alvs; dals 7,9 % ch’inditgeschan d’appartegnair ad ina da las etnias betg alvas èn bundant 50 % naschids en il Reginavel Unì sez. La cumpart relativamain gronda d’umans che n’èn betg da colur alva deriva en emprima lingia dals moviments d’immigraziuns or d’anteriuras colonias britannicas en la Caribica, en l’Africa e sin il subcontinent indic, e quai surtut pervi da moviments da migraziun ch’han gì lieu en il decurs dals onns 1950 e 1960.

Bundant 1,1 milliuns dals umans che vivevan il 2001 en il Reginavel Unì han denominà sasezs sco Black Caribbean u sco Black African. La gronda part dad els deriva da Jamaica, Dominica sco er Trinidad e Tobago ed è arrivada durant ils onns 1950 per mitschar da la nauscha qualitad da viver en lur pajais d’origin e sperond da chattar lavur en la nova patria. Tar la dumbraziun dal pievel dal 2011 è questa gruppa creschida sin 1 877 000, quai ch’è surtut d’attribuir ad immigraziuns da stadis africans sco Ghana, Nigeria, Somalia u Kongo.

Il 2001 vivevan bundant in milliun Inds en la Gronda Britannia. Quels furman la pli gronda gruppa d’immigrants che derivan dal medem pajais. Lur cumpart a l’entira populaziun munta a 1,8 %. Radund 45 % dals Inds britannics èn hindus, 29 % èn sikhs e 13 % muslims. Per l’emigraziun dals Inds datti diversas raschuns: sper motivs economics sco povradad, tschertga da lavur u il giavisch da cuntanscher in pli aut standard da viver giogan er persecuziuns politicas ina rolla.

La segund gronda minoritad che deriva da l’Asia dal Sid furman ils Pakistans. Blers dad els èn arrivads cun navigaturs en il Reginavel Unì cun l’intenziun da restar be per curt temp per gudagnar daners per lur famiglias e puspè returnar en lur patria. Ma numerus dad els èn tuttina restads en la Gronda Britannia. La gronda part dals Pakistans èn aderents da l’islam.

Dal Bangladesch (2001: bundant 283 000 persunas) èn blers arrivads pervi da la guerra civila e la separaziun dal pajais dal Pakistan il 1971. Er la gronda part dals immigrants dal Bangladesch èn muslims.

La gronda part dals Chinais che vivan en la Gronda Britannia èn immigrads suenter la Segunda Guerra mundiala, surtut pervi da la crisa economica (crudada dal pretsch da ris a Hongkong). Ozendi tutgan ils immigrants da la China tar ils abitants il pli bain furmads e cun las pli autas pajas da l’entir Reginavel. Er radund 150 000 Singhales vivan en la Gronda Britannia. Tar la gronda part dad els sa tracti da budists.

Sut il term englais gypsy u traveller vegnan subsummadas diversas minoritads etnicas. La minoritad che vegn areguard sia moda da viver il pli datiers als ‹zagrenders› (viagiants) tradiziunals èn ils Roma che derivan oriundamain da l’India dal Nord. Il problem principal dals Roma sco er dals Sinti – dals quals i dat relativamain paucs en la Gronda Britannia – è discriminaziun, povradad ed ina mortalitad dals uffants relativamain auta.

Tenor stimaziuns da las Naziuns unidas vivan en il Reginavel Unì plirs tschientmilli umans da derivanza polonaisa. Blers da quests Polonais han servì durant la Segunda Guerra mundiala da la vart dals Alliads ed han battì en l’armada britannica u eran fugitivs. Ina gronda part dad els èn restads en la Gronda Britannia, cura che la Pologna è vegnida occupada suenter la Segunda Guerra mundiala da l’Uniun sovietica e dominada da la partida communistica da la Pologna. Ma er dapi che la Pologna appartegna a l’Uniun europeica èn numerus Polonais immigrads en la Gronda Britannia en tschertga da lavur.

Numerus Cipriots grecs e tircs da la Gronda Britannia vivan en las citads grondas, surtut a Londra (ca. 200 000). Dus enconuschents Brits cun ragischs cipriotas èn ils dus popstars George Michael e Cat Stevens.

En tut vivevan il 2011 tenor indicaziuns da l’UE radund 4,02 milliuns esters en il Reginavel Unì; cun 6,6 % correspunda questa cifra a la media europeica. Praticamain tut ils immigrants che derivan d’anteriuras colonias u da lur stadis successurs han surpiglià la naziunalitad britannica.

La gronda part dals abitants dal Reginavel Unì (ca. 59 %) considereschan sasezs sco cristians.  Statisticas precisas na sa laschan però strusch eruir: sco commembers uffizials d’ina baselgia vegnan per ordinari resguardadas quellas persunas ch’èn prontas da s’engaschar en la plaiv er ultra da la visita casuala dal servetsch divin. L’onn 1995 eran 14 % da la populaziun commembers che sa participavan en quest senn a la cuminanza da la plaiv. Il medem onn han però radund 27 milliuns (45 %) inditgà da sa sentir colliads cun la baselgia anglicana, 11 milliuns (19 %) cun autras baselgias protestantas (presbiterans, refurmads e.a.) e stgars 6 milliuns (10 %) cun la baselgia catolica.

Areguard l’appartegnientscha ad ulteriuras religiuns mundialas cf. las expectoraziuns survart (gruppas etnicas). Ultra da quai appartegnan bundant 9 milliuns abitants a nagina religiun.

En l’antica èn grondas parts da l’insla Gronda Britannia – cun excepziun dal territori da la Scozia odierna – stads occupads durant radund 350 onns dals Romans. Cura che quels èn sa retratgs, èn sa furmads plirs reginavels pli pitschens. Quels èn vegnids dominads da pievels immigrads: dals Angles e Saxons, dals Juts e pli tard er dals Normans. Ils Celts, la populaziun originara che populava l’insla avant l’arrivada dals Romans, è vegnida stgatschada en las regiuns perifericas situadas en il vest da l’insla. En il 10avel tschientaner èn sa sviluppads ils dus reginavels da l’Engalterra e da la Scozia ch’eran independents in da l’auter. L’onn 1066 han Normans franzosisads conquistà l’insla nà da la Normandia e l’han marcà durant ils proxims tschientaners. 

La Valisa che sa chattava dapi il 1284 sut controlla da l’Engalterra, è daventada il 1536 cun l’Act of Union ina part dal Reginavel englais. Cun l’Act of Union dal 1707 èn ils reginavels da la Scozia e da l’Engalterra vegnids unids al Reginavel da la Gronda Britannia; omadus pajais vegnivan regids dapi il 1603 dal medem monarc en uniun persunala. L’Act of Union dal 1800 ha collià il Reginavel da la Gronda Britannia cun il Reginavel da l’Irlanda. Quel era daventà tranter il 1169 ed il 1603 adina pli fitg sut controlla englaisa. Tras quest’uniun è naschì il Reginavel Unì da la Gronda Britannia ed Irlanda.

Ils 21 da november 1806 ha Napoleun imponì sur las Inslas Britannicas ina bloccada continentala ch’è stada en vigur fin il 1814. Quella dueva suttametter la Gronda Britannia cun meds da la guerra economica e proteger l’economia franzosa cunter la concurrenza europeica e transatlantica. A la Gronda Britannia èsi però reussì da render accessibels novs martgads da vendita, surtut en l’America dal Nord.

En il 19avel tschientaner ha il Reginavel Unì furmà la naziun da navigaziun maritima e d’industria dominanta; ed ella ha er giugà da quel temp ina rolla centrala en il svilup da la monarchia parlamentara, da la litteratura e da la scienza. Sin il continent europeic è la Gronda Britannia sa stentada d’equilibrar las pussanzas cun agid da divers patgs d’allianza (uschenumnada Pax Britannica). Sin il zenit cumpigliava l’imperi mundial britannic dus terzs da la surfatscha da terren dal mund; ina gronda part da quests territoris era vegnida conquistada en rom da numerusas guerras.

Il 1922 han 26 contadis irlandais furmà il Stadi liber da l’Irlanda (a partir dal 1937 Éire, a partir dal 1949 Republica da l’Irlanda). Ils ulteriurs sis contadis en la provinza Ulster èn restads tar il Reginavel Unì. Il num da stadi odiern ‹Reginavel Unì da la Gronda Britannia ed Irlanda dal Nord› vegn duvrà dapi il 1927.

Tras las duas guerras mundialas ha la Gronda Britannia pers sia posiziun sco pussanza mundiala, e quai cumbain ch’ella ha appartegnì omaduas giadas a las pussanzas victuras. Betg d’emblidar è en quest connex la resistenza stinada dal Reginavel Unì sut Winston Churchill cunter l’invasiun da vart dal Reich tudestg. En il decurs da la segunda mesadad dal 20avel tschientaner ha gì lieu la decolonisaziun ch’ha manà a la dissoluziun da l’anteriur imperi: l’India britannica è daventada independenta l’avust 1947, quai ch’ha manà a la fundaziun dals dus stadis India e Pakistan. Ed en l’Africa han per exempel cuntanschì la Somalia e la Nigeria il 1961 lur independenza.

En consequenza da quest svilup è il Reginavel Unì stà necessità da s’orientar pli ferm vers l’Europa continentala. Enfin oz è questa politica però segnada d’ina integraziun fitg precauta. Uschia è il stadi bain daventà il 1973 commember da l’Uniun europeica, ma n’ha betg introducì l’euro. Cun votaziun dal pievel dal 2016 è vegnì decidì da sortir da l’Uniun europeica (entrada en vigur: favrer 2020).

Il 1952 è Elisabeth II daventada scheffa da stadi (regina), suenter che Georg VI era mort. Da tut ils regents da la Gronda Britannia è ella gia oz la monarca cun la pli lunga durada d’uffizi. 

Dapi il 1969 è la situaziun politica en l’Irlanda dal Nord stada segnada d’in clima tendì cun relaziuns cumparegliablas ad ina guerra civila. Pir il 1998 èsi reussì da concluder las tractativas da pasch. Ed il 1982 ha la Gronda Britannia reconquistà cun la forza las Inslas Falkland, da las qualas l’Argentinia aveva empruvà da sa patrunar.

La politica da l’intern è vegnida influenzada fermamain da la perioda d’uffizi da la primministra conservativa Margaret Thatcher (1979–1990) ch’ha promovì la deregulaziun economica e reducì l’assistenza sociala statala sa referind a l’atgna responsabladad dal singul individi.

En rom d’ina refurma da la constituziun han la Scozia, la Valisa e l’Irlanda dal Nord survegnì il 1999 agens parlaments. En ina votaziun dal pievel è la Scozia s’exprimida il settember 2014 cunter daventar independenta dal Reginavel Unì (cun 55,3 % da las vuschs).

Formalmain è il Reginavel Unì ina monarchia constituziunala. Il monarc britannic ha teoreticamain la pussaivladad da destituir la regenza; en la pratica (dretg da disa da plirs tschientaners) na vegn però betg fatg diever da quest dretg. De facto sa tracti pia d’ina monarchia parlamentara, damai ch’er il parlament ha il dretg da destituir la regenza. 

Il parlament consista da la Chombra dals Lords (House of Lords, chombra auta) e da la Chombra dals deputads (House of Commons, chombra bassa). Tar ils commembers da la Chombra dals Lords sa tracti oz per gronda part da represchentants d’ina noblezza da merits betg ertavla, da singuls nobels cun titels ereditars sco er da 27 uvestgs anglicans. Ils commembers da la Chombra dals deputads vegnan elegids tenor il dretg d’elecziun da maiorz. Questa chombra ch’è legitimada a moda democratica furma oz la part dominanta dal parlament, en la quala vegnan inoltradas e relaschadas tut las leschas. Sin fundament da la parliamentary sovereignty furma il parlament, sper la regina (de facto la regenza), la suletta instituziun legislativa da la Gronda Britannia. La suveranitad parlamentara è er il motiv daco ch’i na dat nagina giurisdicziun constituziunala.

La Magna Charta dal 1215 ha furmà l’emprima lescha fundamentala dal stadi; ella ha però be concedì tscherts dretgs ad ina pitschna classa superiura (Council of Barons). Malgrà quai resta la Gronda Britannia il stadi da l’Europa cun la pli veglia tradiziun democratica, damai ch’il parlament ha giugà ina rolla adina pli impurtanta il pli tard dapi la Glorious Revolution (1688/89) e la Bill of Rights ch’è resultada da quai

Ina constituziun scritta n’exista betg. De jure sa chatta mintga lescha ad in nivel constituziunal, damai che tut las leschas èn da princip egualas e ch’il parlament ha il dretg da midar u abolir mintga lescha existenta. I dat però leschas ch’han de facto qualitad da constituziun, sco per exempel la Bill of Rights. En general cumpeta a las dretgiras ina gronda libertad da concepir las leschas, damai ch’il sistem giuridic britannic sa basa sin il princip dal dretg da disa (conventions) e da la dretga interpretaziun da cas precedents (common law) tras las dretgiras.

Il Reginavel Unì furma ina da las pli impurtantas pussanzas militaras dal mund. Ella dispona da radund 147 000 schuldads ed ha a disposiziun in budget da bundant 60 milliardas dollars, quai che furma las segund autas expensas militaras en l’Europa dal Vest. Tradiziunalmain e per motivs geografics han la marina e l’aviatica militara ina posiziun dominanta en congual cun las forzas terrestras. Dapi il 1952 posseda il Reginavel Unì bumbas atomaras. Lur dumber è bain vegnì reducì dapi la fin da la Guerra fraida; ma tuttina vegnan questas armas – ch’èn oz staziunadas exclusivamain sin sutmarins atomars – modernisadas cuntinuadamain. Las forzas armadas disponan da bundant 400 chars armads da cumbat; la Royal Air Force trategna ca. 930 aviuns, da quai radund 250 aviuns da cumbat activs; e la Royal Navy furma cun radund 70 bastiments da guerra ina da las pli grondas marinas dal mund.

Las forzas armadas britannicas èn staziunadas sin numerusas basas a l’exteriur. Pliras da quellas sa chattan en Germania (cun ca. 27 000 schuldads) ed en la Cipra (7000 schuldads). Cun excepziun dals Stadis Unids n’ha nagin stadi staziunà uschè blers schuldads a l’exteriur sco il Reginavel Unì.

Cuntrari a blers auters pajais da l’Europa è il Reginavel Unì sa participà ensemen cun ils Stadis Unids suenter il 2000 a la ‹Guerra cunter il terror› ch’ha tranter auter manà ad invasiuns en l’Irac ed en l’Afganistan. Dapi ils attentats dal 2001 en ils Stadis Unids e dal 2005 a Londra èn en vigur en la Gronda Britannia pliras leschas cunter il terror. 

A l’intern dal pajais èn responsablas per la segirtad publica diversas forzas da polizia che suttastattan al ministeri da defensiun u al ministeri da l’intern. Ultra da quai agescha il servetsch secret MI5 a l’intern dal pajais.

La Valisa, la Scozia e l’Irlanda dal Nord disponan dapi ils onns 1990 d’agens parlaments e regenzas. L’Engalterra na posseda percunter nagina administraziun regiunala; enstagl vegnan las fatschentas che pertutgan l’Engalterra exequidas dal parlament e da la regenza britannica. En il fratemp èsi daventà isanza ch’ils represchentants da las ulteriuras regiuns s’abstegnan da la vusch, sch’igl èn da decider dumondas che pertutgan exclusivamain l’Engalterra.

Ils nivels administrativs inferiurs èn vegnids restructurads pliras giadas dapi la fin dal 19avel tschientaner; cun ulteriurs midaments èsi da far quint en l’avegnir. Tradiziunalmain consistiva l’Engalterra dapi il temp medieval da 39 contadis (counties), la Scozia da 34, la Valisa da 13 e l’Irlanda dal Nord da sis. Oz datti sper divers contadis cun funcziuns administrativas er uschenumnadas Unitary Authorities e Metropolitan Counties resp. districts (en l’Irlanda dal Nord). En la lingua dal mintgadi èn per gronda part sa mantegnids en tut las parts dal pajais ils nums dals vegls ducadis.

Ils territoris d’ultramar dependents èn (en successiun alfabetica):

Territoris ch’èn suttamess be a la curuna britannica, betg però al Reginavel Unì (Crown dependencies) èn:

Omadus territoris disponan d’ina atgna legislaziun e d’agens sistems da dretg; sin ils champs da la defensiun militara e da las relaziuns internaziunalas vegnan els però represchentads tras la regenza britannica.

Il monarc britannic n’è betg be il schef da stadi dal Reginavel Unì, mabain er d’ina entira retscha d’ulteriurs stadis dal Commonwealth independents.

La rait da traffic è orientada en direcziun nord-sid e s’extenda a moda radiala enturn la citad da Londra. En il traffic sin via vegn charrà da la vart sanestra, quai cuntrari a la gronda part dals ulteriurs stadis. La rait da vias ha ina lunghezza da radund 388 000 kilometers. Da quai furman ca. 3500 km autostradas, las qualas èn vegnidas erigidas a partir dals onns 1950. Sper las autostradas datti er ina spessa rait da vias da transit separadas a plirs vials. 

La rait da viafier dal Reginavel Unì e vegnida privatisada il 1994 e sa cumpona da duas parts independentas en l’Irlanda dal Nord ed en la Gronda Britannia. Quest’ultima part è colliada dapi il 1994 tras l’Eurotunnel cun l’Europa continentala. La rait en l’Irlanda dal Nord stat en connexiun cun quella da la Republica da l’Irlanda. La rait da viafier ha ina lunghezza totala da stgars 16 000 kilometers; quai è bundant la mesadad pli pauc che anc en ils onns 1950.

Il Reginavel Unì è in dals impurtants centers dal traffic aviatic mundial. Cun radund 200 milliuns passagiers ad onn (da quai 125 milliuns en la regiun da Londra) cumpiglia el la pli gronda circulaziun da persunas da tut l’Europa. La pli gronda plazza aviatica è London-Heathrow, alura suondan London-Gatwick ed il Manchester Airport.

Tras la posiziun insulara dal pajais e la separaziun territoriala da l’Irlanda dal Nord e da las bleras inslas ha la navigaziun tradiziunalmain ina gronda muntada. Impurtants ports èn Felixstowe, Tilbury, Southampton e Teesport.

Il Reginavel Unì tutga tar las economias publicas las pli dereguladas e privatisadas en tut il mund. L’economia britannica furma il lieu d’origin da l’uschenumnà ‹chapitalissem anglosaxon› che sa basa sin ils princips da la liberalisaziun, dal martgà liber, da taglias bassas e da regulaziuns minimalas. Cun in product naziunal brut da 2,94 billiuns dollars (situaziun dal 2014) furma la Gronda Britannia la sisavel gronda economia publica dal mund e la terz gronda da l’Europa (suenter la Germania e la Frantscha). Areguard la paritad da la capacitad da cumpra giascha il pajais sin la settavla plazza. Cun 28 300 euros è il PNB per chau situà en la part superiura dal rom da referenza europeic. Cumpareglià cun il PNB da l’Uniun europeica (exprimì en standards da la capacitad da cumpra) cuntanscha il Reginavel Unì in index da 116,2 (EU-25 l’onn 2003: 100). La creschientscha economica giascheva il 2014 tar 2,8 %.

La Revoluziun industriala dal 19avel tschientaner ha ses origin en la Gronda Britannia. A l’entschatta hai dà ina concentraziun sin l’industria greva (construcziun da navs, industria da minieras da charvun, producziun d’atschal ed industria da textilias). Damai ch’il Reginavel Unì cumpigliava territoris en tut il mund, èsi stà pussaivel da crear in martgà d’ultramar per products britannics, uschia ch’il pajais dominava durant il 19avel tschientaner l’entir commerzi internaziunal. En consequenza da l’aut grad d’industrialisaziun er en auters stadis e damai che l’agricultura na pudeva betg pli furnir ulteriuras forzas da lavur che fissan daventadas danvanz, è l’entir 20avel tschientaner stà segnà d’in declin cuntinuant da l’industria greva. Parallelamain è creschì il sectur da servetschs che cumpiglia uss ina cumpart da radund 73 % dal product naziunal brut.

Il sectur da servetschs vegn dominà da servetschs da finanzas, surtut da bancas ed assicuranzas. La City of London cun ses dretgs spezials furma la pli gronda plazza da finanzas dal mund. Quella cumpiglia tranter auter la London Stock Exchange, Lloyd’s of London, la Bank of England e diversas ulteriuras bancas sco HSBC, Citigroup e Barclays. Pervi da ses caracter sco plazza da finanzas dad off-shore sa chatta a Londra la pli gronda concentraziun da filialas da bancas da l’exteriur en tut il mund. Ultra da quai è Edinburgh, la chapitala da la Scozia, la tschintgavel gronda plazza da finanzas da l’Europa e la sedia principala d’enconuschentas interpresas sco Royal Bank of Scotland e HBOS.

Medemamain da gronda muntada è il turissem: cun bundant 29 milliuns turists sa chattava il Reginavel Unì il 2012 sin l’otgavla plazza da las pli impurtantas destinaziuns turisticas dal mund.

La producziun industriala cumpiglia oz anc radund in sisavel dal product naziunal brut. In impurtant sectur furma l’industria d’autos, cumbain che tut las interpresas sa chattan oz en mauns da l’exteriur. L’industria aviatica e d’armament vegn dominada da BAE Systems e Rolls-Royce che cuvran er ina cumpart essenziala da l’industria astronautica mundiala. In’ulteriura impurtanta pitga è l’industria chemica e farmaceutica. Cun GlaxoSmithKline ed AstraZeneca han il segund ed il terz grond concern da farma lur sedia principala en il Reginavel Unì. 

L’agricultura britannica cumpiglia be 0,9 % dal PNB, quai ch’è pauc en congual cun ils auters pajais europeics. Percunter posseda il pajais grondas reservas da charvun, gas natiral e petroli. L’explotaziun industriala da las ritgezzas natiralas contribuescha 10 % al PNB, quai ch’è ina cumpart extraordinariamain auta per in stadi industrial. Il zenit ha quest’explotaziun però surpassà vers il 2000, uschia che sia cumpart al PNB vegn a sa sbassar ils proxims onns. Dapi il 2005 è la Gronda Britannia daventada netto in’importadra da petroli; il 2010 muntava la quantitad explotada gnanc pli la mesadad dal quantum maximal (peak oil) dal 1999. Er gas natiral e charvun ston vegnir importads dapi in pèr onns en quantitads adina pli grondas. Interpresas britannicas da muntada mundiala ch’èn activas sin quest champ èn BP e Royal Dutch Shell. Las Inslas Britannicas disponan d’in fitg grond potenzial d’energias regenerativas, surtut sin il sectur da la forza dal vent e da centralas da mar; quel è fin uss vegnì duvrà be marginalmain. La cumpart d’energia regenerativa, surtut d’energia solara, a l’entir provediment d’energia crescha però cuntinuadamain.

Il budget dal stadi ha dumbrà il 2009 expensas en l’autezza da 1,14 billiuns dollars ed entradas da radund 908 milliardas dollars. Da quai è resultà in deficit en l’autezza da 232 milliardas dollars resp. da 10,3 % dal product naziunal brut. 

Ils debits statals muntavan la fin 2013 a bundant 87 % dal product naziunal brut. En rom da las crisa da bancas e da finanzas dapi il 2007 èn ils debits statals creschids fermamain.

Il 2006 cumpigliavan las expensas statalas las suandantas cumparts (en % dal PNB): sanadad 8,2 %, furmaziun 5,6 % e militar 2,4 %. 

Ina dumbraziun dal pievel ha lieu mintga diesch onns a medem temp en tut las parts da la Gronda Britannia. L’Office for National Statistics è responsabel per rimnar las datas da l’Engalterra e da la Valisa, il General Register Office for Scotland e la Northern Ireland Statistics and Research Agency fan il medem per lur territoris. Tenor la dumbraziun dal pievel dal 2011 muntava la populaziun totala dal Reginavel Unì a 63 181 775. Tranter il 2001 ed il 2011 è la populaziun creschida cun ina rata annuala da 0,7 %.

La pli veglia litteratura sin il territori dal Reginavel Unì dad oz – abstrahà dad ovras en latin – è vegnida scritta en las diversas linguas celticas da l’insla. Uschia tanscha la tradiziun da la litteratura valisa enavos fin en il 6avel tschientaner; il ‹Mabinogion› dal temp medieval tempriv è ina collecziun da raquints dals bards da la Valisa. Medemamain dapi il 6avel tschientaner sa lascha cumprovar la tradiziun da la poesia irlandaisa. En l’Irlanda dal Nord è surtut da muntada il ciclus dad Ulster. La litteratura da l’englais vegl ha manà ad ovras sco ‹Beowulf› u ils ‹Imnis da Cædmon›, ma l’elita scolada preferiva da quel temp il latin. Impurtants auturs en questa lingua furman Beda Venerabilis e Geoffrey of Monmouth.

Suenter la conquista da l’Engalterra tras ils Normans ha la litteratura anglonormana manà sin las Inslas Britannicas influenzas da l’Europa continentala. La litteratura englaisa per propi è sa sviluppada a partir dal 14avel tschientaner tardiv cun la derasaziun da l’englais central (dialect da Londra). Sco emprim scriptur da la litteratura englaisa ch’è enconuschent cun ses num vala Geoffrey Chaucer, l’autur da las ‹Canterbury Tales›. Suenter l’introducziun da la stampa da cudeschs en l’Engalterra tras William Caxton l’onn 1476 ha la litteratura cuntanschì ina fluriziun en l’èra elisabetiana, e quai surtut en furma da poesias e dramas. Da quell’epoca derivan las ovras da William Shakespeare ch’appartegnan a la litteratura mundiala.

En il 18avel tschientaner ha cumenzà l’epoca dal roman englais. Enconuschents auturs da quel temp èn Daniel Defoe, Samuel Richardson e Henry Fielding. Suenter in temp da declin èsi reussì al Scot Robert Burns da puspè svegliar l’interess per la litteratura en la ‹lingua dal pievel›; uschia èn ils enconuschents ‹Rhyming Weavers› dad Ulster vegnids influenzads tras la litteratura scota dal conturn (Ulster scots). 

A l’entschatta dal 19avel tschientaner ha la poesia da la romantica clamà en memoria quella da la renaschientscha, cun auturs sco William Blake, William Wordsworth, John Keats e Lord Byron. L’epoca victoriana è stada il temp da fluriziun dal roman realistic, represchentà tras Jane Austen, las trais soras Brontë, Charles Dickens, William Thackeray, George Eliot e Thomas Hardy. Spezialisads sin romans istorics eran tranter auter Walter Scott e Robert Louis Stevenson.

Da l’Emprima Guerra mundiala èn resortids ils ‹poets da guerra› Wilfred Owen, Siegfried Sassoon, Robert Graves e Rupert Brooke che scrivan savens en in stil paradox davart lur aspectativas envers la guerra e/u lur experientschas en ils foss da protecziun. En rom dal celtic revival èsi vegnì tar ina renconuschientscha creschenta da la litteratura irlandaisa tradiziunala. Dapi l’independenza da l’Irlanda l’onn 1922 vegn la litteratura irlandaisa resguardada sco ina litteratura ch’è independenta da quella da la Gronda Britannia. La renaschientscha scota da l’entschatta dal 20avel tschientaner ha modernisà la litteratura da lingua englaisa da la Scozia ed ha er manà a l’introducziun da novas furmas en la litteratura dal scot e dal gaelic.

En il decurs dal 20avel tschientaner ha il roman englais sviluppà ina gronda varietad ch’è anc vegnida enritgida tras scripturs immigrads. Enconuschents raquints e romans han scrit Arthur Conan Doyle, D.H. Lawrence, George Orwell, Salman Rushdie, Mary Shelley, J.R.R. Tolkien, Virginia Woolf, Graham Greene, H.G. Wells e Joanne K. Rowling. Ulteriurs impurtants poets èn Elizabeth Barrett Browning, Ted Hughes, John Milton, Alfred Tennyson, Alexander Pope e Dylan Thomas.

Il Premi Nobel da litteratura han gudagnà ils suandants auturs da la Gronda Britannia: Rudyard Kipling (1907), John Galsworthy (1932), T.S. Eliot (1948), Bertrand Russell (1950), Winston Churchill (1953), William Golding (1983), Harold Pinter (2005) e Doris Lessing (2007).

Il Reginavel Unì dispona d’ina lunga tradiziun sin il champ dal teater. Quella tanscha enavos fin en il temp dals Romans ch’avevan erigì teaters en tut las parts dal pajais. Fin en il temp medieval era sa sviluppada la pantomima, cun la furma speziala englaisa dal Mummers Play, ina furma tempriva dal teater sin via. Quel era collià cun il Morris Dance e tractava tematicas sco Son Gieri cun il drag u Robin Hood. Savens sa tractavi da paraulas popularas che sa basavan sin raquints fitg vegls. Ils acturs viagiavan d’ina citad a l’autra; per lur represchentaziuns survegnivan els daners e dimora. Ultra da quai èn da menziunar il gieu da misteri medieval e las moralitads; quests gieus tractavan tematicas cristianas e vegnivan represchentads a chaschun da festas religiusas.

Durant la regenza dad Elisabeth I han ils arts englais e surtut il teater enconuschì in temp da gronda fluriziun. Il pli enconuschent autur da dramas da quel temp è stà William Shakespeare. El ha scrit radund 40 tocs da teater che vegnan represchentads fin oz en tut il mund; tranter ils pli enconuschents tutgan las tragedias ‹Romeo and Juliet› (1595), ‹Hamlet› (1603) ed ‹Othello› (1604), cumedias sco ‹A Midsummer Night’s Dream› (1595/96) e ‹Much Ado About Nothing› (1599) u il drama istoric ‹Heinrich V› (1600). Ulteriurs enconuschents dramatichers dal 16avel tschientaner èn stads Ben Jonson, Christopher Marlowe e John Webster.

Durant l’interregnum (1642–1660) han ils puritans serrà per motivs religius ed ideologics tut ils teaters englais. Cun la reinstallaziun da la monarchia èn ils teaters a Londra vegnids reaverts. Novas attracziuns sco las emprimas acturas professiunalas han puspè manà ad ina nova fluriziun. (Dal temp da Shakespeare vegnivan tut las rollas femininas giugadas da mattatschs). Sco novs geners èn s’etablids il drama eroic, il drama patetic e la cumedia da la restauraziun. Da quel temp èn però restadas en memoria surtut las cumedias, sco per exempel ‹The Country Wife› da William Wycherley (1676), ‹The Rover› dad Aphra Behn (1677), ‹The Relapse› da John Vanbrugh (1696) e ‹The Way of the World› da William Congreve.

En il 18avel tschientaner è il public s’orientà vers la cumedia sentimentala, la tragedia e l’opera taliana. Per trategnair la vasta populaziun èn s’etablidas la burlesca e las variantas precursuras dal varieté (music hall). Quest svilup ha gì lieu a donn e cust dal drama englais ch’ha subì ina lunga perioda da declin. Quai è sa midà vers la fin dal 19avel tschientaner, cura che las tribunas da Londra han mussà ovras dals Irlandais Iren George, Bernard Shaw ed Oscar Wilde e dal Norvegiais Henrik Ibsen. Tut quests auturs eran influenzads fermamain dal drama englais ed han attribuì decisivamain a la renaschientscha da quel.

Ozendi datti a Londra in grond dumber da teaters. Cun ses enconuschents musicals ha Andrew Lloyd Webber dominà durant blers onns il West End. La Royal Shakespeare Company è staziunada en il lieu d’origin da Shakespeare, Stratford-upon-Avon. Impurtants auturs da teater dal temp modern èn Alan Ayckbourn, John James Osborne, Harold Pinter, Tom Stoppard ed Arnold Wesker.

La musica britannica è segnada d’ina gronda varietad ed ha influenzà a moda decisiva il svilup da numerus stils da musica. Quai vala surtut dapi ils onns 1960, cura che musicists britannics han contribuì a render enconuschent il rock’n’roll en tut il mund. Dapi lura èn s’etablidas en il pajais numerusas direcziuns da musica e bands en stils uschè differents sco heavy metal, britpop u drum and bass. A medem temp ha però er la musica tradiziunala, il folc, enconuschì ina renaschientscha. Ultra da quai enconuscha il pajais ina tradiziun da musica classica che tanscha enavos plirs tschients onns.

Mintgin dals quatter stadis parzials (Engalterra, Scozia, Valisa, Irlanda dal Nord) posseda in’atgna musica populara. Ultra da quai han l’Isle of Man, il Cornwall e las Inslas dal Chanal sviluppà agens stils.

La musica tradiziunala englaisa sa basa sin instruments sco la lauta, l’arpret, il cembalo, il corn stort, la lira a roda e la schalmia ed è segnada da differenzas regiunalas vaira grondas. Suenter la Revoluziun industriala è la musica populara en sia furma tradiziunala be anc sa mantegnida en regiuns ruralas; en la segunda mesadad dal 20avel tschientaner èsi però reussì a musicists sco Martin Carthy d’instradar en rom dal roots revival ina renaschientscha dal folk.

La musica populara da la Scozia cumpiglia differents geners da chant sco balladas u laments. Las chanzuns vegnan chantadas d’ina singula persuna che vegn accumpagnada da cornamusas, fiddles e harfas. Tar ils sauts tradiziunals tutgan reel, strathspey e jig. Il roots revival è vegnì inizià qua da Cathy-Ann McPhee e Jeannie Robertson ch’han influenzà da lur vart gruppas sco l’Incredible String Band e The Chieftains.

La musica da la Valisa è stada sutordinada sur lung temp a la cultura englaisa e fiss perquai prest ida a perder. En il 20avel tschientaner la han ins perquai quasi stuì reconstruir. Instruments tipics furman crwth (ina sort lira d’origin celtic), harfa e harfa tripla.

La tradiziun da musica populara la pli viva è da chattar en l’Irlanda dal Nord; quella correspunda pli u main a l’irish folk. Instruments tipics èn fiddle, tin whistle, bodhrán, uilleann pipes ed accordeon.

Musica cumponida che deriva dal territori dal Reginavel Unì odiern sa lascha cumprovar a partir dal temp autmedieval. La pli veglia ovra è ‹Sumer is icumen› da l’emprima mesadad dal 13avel tschientaner. Enconuschents cumponists da la fasa tempriva da la musica classica èn Simon Tunsted, John Dunstable, John Taverner e Thomas Tallis. Ca. tranter il 1580 ed il 1620 è stà il temp da fluriziun dal madrigale englais; impurtants represchentants da quest’epoca èn William Byrd, John Dowland, Orlando Gibbons, Thomas Tomkins e Thomas Campion.

Suenter in temp da declin ha la reintroducziun da la monarchia manà a partir dal 1660 ad ina nova fluriziun ch’è stada tranter auter sut l’influenza da Pelham Humfrey, John Blow e Henry Purcell. Il pli impurtant cumponist englais dal 18avel tschientaner è stà Georg Friedrich Händel che derivava da la Germania, ma ch’ha vivì e cumponì per gronda part en l’Engalterra. Sias operas, ovras per orchester e chorals han influenzà decisivamain la musica classica britannica dals proxims duatschient onns. Il medem temp sco Händel han er operà John Gay e Thomas Arne; impurtants cumponists dal 19avel tschientaner èn stads Arthur Sullivan, Hubert Parry, Charles Villiers Stanford ed Edward Elgar.

L’emprima mesadad dal 20avel tschientaner è stada segnada dals cumponists Frederick Delius, Ralph Vaughan Williams, Gustav Holst, Frank Bridge e John Ireland. Tar ils impurtants cumponists da la musica classica moderna da la segunda mesadad dal 20avel tschientaner tutgan William Walton, Benjamin Britten, Michael Tippett, Robert Simpson, Peter Maxwell Davies, Harrison Birtwistle, John Kenneth Tavener, Mark-Anthony Turnage e Gavin Bryars.

En il Reginavel Unì datti numerus orchesters da renum mundial sco il BBC Symphony Orchestra, il Royal Philharmonic Orchestra, il Philharmonia Orchestra, il London Symphony Orchestra ed il London Philharmonic Orchestra. Il Royal Opera House a Londra appartegna a las pli impurtantas operas dal mund ed en la Royal Albert Hall han lieu mintga stad ils Proms (Promenade Concerts). 

L’emprim gener da la musica da divertiment britannica han furmà a l’entschatta dal 16avel tschientaner las balladas da broadside. Igl eran quai chanzuns popularas, da las qualas ils texts vegnivan publitgads sin palpiris da diversa lunghezza (broadsides), l’emprim scrit a maun, pli tard en versiun stampada. Sin ils fegls era mintgamai inditgà tar tge enconuschenta melodia ch’il text saja da chantar. A partir dal 18avel tschientaner èn ils broadsides vegnids agiuntads als chapbooks (cudeschs populars) fitg derasads. Cun la derasaziun da las gasettas ed il cumenzament da la tecnica da registraziun han ils broadsides pers lur muntada.

Suenter la Revoluziun industriala èn sa sviluppadas bars che purschevan divertiment musical. La gruppa en mira furmava la nova classa da lavurants urbana ch’era spartida da sias ragischs culturalas ed era en tschertga da novas furmas da musica. Tras quai è creschida la dumonda suenter musica da divertiment e da chantauturs professiunals. Las chanzuns da las Music Halls èn segnadas d’in ritmus e da melodias simplas che sa laschan percepir tgunschamain. Ils pli enconuschents stars da las Music Halls èn stads Marie Lloyd, Harry Champion, George Formby e Gracie Fields.

Sco ura da naschientscha dal jazz vala la turnea da l’Original Dixieland Jass Band l’onn 1919. Ma propi popular è quest stil da musica pir daventà durant la Segunda Guerra mundiala, cura ch’igl ha gì num da divertir ils blers schuldads ch’eran preschents en il Reginavel Unì. Ils pli enconuschents represchentants dal jazz britannic èn ils musicists John Dankworth, Humphrey Lyttelton, Joe Harriott, Dizzy Reece, George Shearing, Evan Parker, John McLaughlin, John Surman, Barbara Thompson e Courtney Pine sco er las bands da fusion Colosseum, Henry Cow, If, Centipede, Ginger Baker’s Air Force, National Health e Nucleus. Gruppas sco il Spontaneous Music Ensemble e musicists sco Evan Parker e Derek Bailey han attribuì essenzialmain a furmar ina musica improvisada europeica che sa schlia per part dal jazz.

Ensemen cun ils Stadis Unids era ed è il Reginavel Unì il pajais ch’ha gidà il pli fitg a sviluppar la musica da rock e pop. Curt temp suenter ch’eran cumparidas en ils Stadis Unids las emprimas plattas da quest gener, ha er cumenzà a sa sviluppar en la Gronda Britannia in agen stil ch’è vegnì influenzà da skiffle e da la tradiziun da folk britannica. En ils onns 1960 ha lura cumenzà cun l’uschenumnada British Invasion il triumf mundial da la musica da rock e pop britannica. La band la pli impurtanta entaifer quest svilup han furmà ils Beatles; ed en rom da la beatlemania han er numerusas autras bands gì gronds success, sco per exempel ils Rolling Stones, The Who, The Kinks, The Dave Clark Five, The Searchers u Gerry  the Pacemakers.

La fin dals onns 1960 èn cumparids impurtants represchentants dal folk-rock, per exempel las bands Fairport Convention u Steeleye Span u singer-songwriters sco Donovan, Bert Jansch, Nick Drake u Cat Stevens. A precursurs dal hardrock èn sa sviluppadas diversas bands da blues-rock sco Fleetwood Mac e Free u musicists sco John Mayall ed Alexis Korner. Il psychedelic rock ch’è sa sviluppà en ils Stadis Unids ha er inspirà bleras bands britannicas d’integrar en lur musica sounds experimentals ed instruments exotics sco la sitar. Las pli impurtantas bands entaifer quest stil èn Pink Floyd, ils Beatles, Cream ed ils Pretty Things.

En il decurs dals onns 1970 èn naschids numerus novs stils da musica. Piuniers dal heavy metal èn stads Led Zeppelin, Deep Purple e Black Sabbath; lur musica dira è vegnida sviluppada vinavant en rom da l’uschenumnada New Wave of British Heavy Metal da bands sco Iron Maiden, Motörhead e Judas Priest. Medemamain en il Reginavel Unì e sa sviluppà il progressive rock che stat sut l’ensaina da bands sco Pink Floyd, Genesis, King Crimson, Jethro Tull, Yes ed Emerson, Lake and Palmer. Surtut pervi dals costums e la show è sa distinguì il glam rock cun Slade, T. Rex, Gary Glitter e (almain a l’entschatta da lur carrieras) Elton John, David Bowie e Queen. La musica da punk ha cuntanschì il success commerzial l’onn 1977 cun ils Sex Pistols; a questa band èn suandads The Clash ed Elvis Costello. Ed entaifer la musica da disco han surtut ils Bee Gees gì gronds success.

Ils onns 1980 èn medemamain stads segnads d’ina gronda diversificaziun dals stils. Dal punk èn sa sviluppads il new wave (t.a. Ultravox e The Human League) e diversas furmas da l’indie-rock (t.a. The Cure, The Smiths e The Jesus and Mary Chain). Ils geners madchester e shoegazing han integrà dapli structuras da pop en l’indie-rock; da questa cumbinaziun dueva sa sviluppar a l’entschatta dals onns 1990 il britpop cun represchentants sco Oasis, Blur, Manic Street Preachers e The Verve. Medemamain fitg enconuschenta è daventada la musica da reggae e da soul da la Gronda Britannia cun UB40, Hot Chocolate, Sade, Billy Ocean, Lisa Stansfield, Eurythmics, Culture Club e Simply Red. Tar las pli enconuschentas bands resp. artists dals onns 1980/90, cun gronds success en tut il mund, tutgan plinavant The Police resp. Sting, Rod Stewart, ils Dire Straits e Depeche Mode.

Er diversas furmas da la musica da saut electroncia èn sa sviluppadas en il Reginavel Unì, surtut drum and bass e trip hop. Econuschentas bands da quests geners èn Underworld, Orbital, Massive Attack, The KLF, The Prodigy, The Chemical Brothers e Portishead. Concepidas sapientivamain per pledentar las grondas massas èn las diversas boygroups e girlgroups che sa schlian per ordinari puspè suenter paucs onns. Enconuschentas boygroups èn Bay City Rollers, Wham!, East 17, Blue, Take That e One Direction; enconuschentas girlgroups èn All Saints, Atomic Kitten, Bananarama, Sugababes e Spice Girls. A singuls members da talas gruppas è silsuenter reussida ina carriera sco solists; quai vala surtut per George Michael, Robbie Williams e Melanie C.

Tar las pli veglias furmas artisticas ch’èn vegnidas chattadas sin il territori dal Reginavel Unì tutgan fossas che derivan dal temp neolitic. En il temp da bronz, ca. vers 2500 a.C., è cumparida la Cultura da cups en furma da zains. Ils Brits dal temp primar lavuravan a l’entschatta surtut cun arom; a partir da ca. 2150 a.C. han els er cumenzà a cular bronz, quai ch’è vegnì favurisà tras ils ritgs giaschaments a Cornwall e Devon. A la Cultura da cups en furma da zains è suandada la Cultura da Wessex ch’è surtut enconuschenta per lavurs da ferrer en aur.

Durant il temp da fier han ils Celts colonisà las Inslas Britannicas ed han introducì novas furmas d’art. Lavurs da metal, surtut ornaments dad aur, eran bain anc adina impurtants, ma per gronda part è vegnì duvrà da quel temp crap e lain. Quest stil ha perdurà fin l’arrivada dals Romans ed è puspè renaschì durant il temp medieval. El è er sa mantegnì en las regiuns celticas che n’eran betg vegnida occupadas dals Romans.

Ils Romans han laschà enavos durant lur domini numerusas ovras d’art, surtut monuments da fossa, statuas e bists. Els han er introducì lavurs en vaider e mosaics. L’art cristian britannic sa lascha cumprovar a partir dal quart tschientaner, surtut en furma da mosaics cun motivs cristians. L’art dal temp roman e dal temp cristian tempriv era pli u main il medem sco sin il continent, ma el ha integrà singuls elements da l’art dals Celts.

Il domini roman è vegnì remplazzà tras divers reginavels ch’eran segnads da differentas ragischs culturalas. A l’art celtic èsi puspè reussì da sa derasar sur il territori d’origin en il vest ed en il nord e da sa far valair en l’entira Gronda Britannia. Pievels sco ils Anglosaxons, ils Juts e Danais han introducì furmas d’art germanas e scandinavas. L’art celtic e l’art scandinav han intginas sumeglientschas, sco per exempel musters decorativs entretschads; dals singuls elements è sa sviluppada ina cultura maschadada celtic-scandinava.

A partir dal 6avel tschientaner tardiv ha il cristianissem er cumenzà a sa derasar tranter il pievel cumin. Las cruschs dals Celts furman l’exempel il pli enconuschent per elements celtics ch’han influenzà l’art cristian. Scenas biblicas èn vegnidas represchentadas a moda figurativa, enramadas da musters ornamentals celtics. Sco nova furma d’expressiun artistica cumpara da quel temp l’art mural. Tar ina gronda part dals artists sa tractavi da muntgs che derivavan da l’exteriur u ch’avevan passentà lur temp da furmaziun sin il continent. Per quests motivs è l’art britannic sa vischinà adina pli ferm a quel da l’Europa continentala. In’ulteriura furma d’art ch’è vegnida introducida tras la baselgia ha furmà la pictura sin vaider ch’è era vegnida applitgada per represchentaziuns secularas. Vers la fin dal temp medieval fascheva l’art britannic part dal stil internaziunal resp. ‹lom›. La pictura ed ils objects d’art na sa differenziavan betg pli marcantamain da quels d’auters pajais da l’Europa dal Nord.

Tras l’introducziun da la refurmaziun l’onn 1536 èn ils bains ecclesiastics vegnids sequestrads tras il stadi; quai ha destruì la tradiziun d’art valisa ed englaisa che steva avant sut il protecturat da la baselgia. Ultra da quai hai dà in’isolaziun da plirs decennis dals trends en las parts catolicas da l’Europa. L’iconoclassem ha perdurà fin la fin dal 17avel tschientaner. La renaschientscha englaisa a partir dal 16avel tschientaner tempriv ha gì sumeglientschas cun la renaschientscha taliana, ma è sa sviluppada en autra moda. Ella ha surtut cumpiglià la musica e la litteratura; la vieuta en l’art figurativ ed en l’architectura è percunter stada definida main cler ch’en l’ulteriura Europa. La ‹scola englaisa da la pictura› ch’è sa furmada a l’entschatta dal 18avel tschientaner è enconuschenta per ses purtrets e sias cuntradas e vegn resguardada entaifer l’istorgia da la pictura sco emprima furma britannica independenta. Ils pli impurtants artists da quel temp èn stads Joshua Reynolds, George Stubbs e Thomas Gainsborough. La fin dal 18avel e l’entschatta dal 19avel tschientaner valan sco la perioda la pli radicala da l’art britannic, cun artists sco William Blake, John Constable, William Hogarth e William Turner. Surtut Turner cun sias cuntradas che paran bunamain abstractas ha gì ina grond’influenza sin ils impressiunists da pli tard.

A partir dals onns 1840 è la pictura britannica vegnida dominada dals preraffaelits cun lur maletgs plain colurs che represchentan surtut motivs religius. Da questa direcziun è er vegnì influenzà il designer William Morris, il fundatur da l’Arts and Crafts Movement. Ses musters da tapetas e plattinas han marcà fermamain l’epoca victoriana. Enconuschents illustraturs èn stads Beatrix Potter ed Aubrey Beardsley. La pli enconuschenta direcziun entaifer l’art da l’entschatta dal 20avel tschientaner ha furmà il vorticissem cun ils represchentants Jacob Epstein, Wyndham Lewis e David Bomberg. Tar ils pli impurtants artists britannics dal 20avel tschientaner tutgan er Henry Moore, Lucian Freud, Frank Auerbach e Francis Bacon.

Sco reacziun sin l’expressiunissem abstract è sa sviluppà ils onns 1950 il pop art cun artists sco Richard Hamilton, Eduardo Paolozzi, Peter Blake, Allen Jones e David Hockney. A la fin dals onns 1980 ha il moviment dals Young British Artists (t.a. Damien Hirst, Sarah Lucas e Tracey Emin) influenzà a moda decisiva il svilup da l’art conceptual.

Dapi il 1984 vegn surdà il Turner Prize ad artists britannics sut 50 onns (che vegnan per il pli discussiunads a moda cuntraversa). Tar las pli impurtantas instituziuns dad art tutgan l’Allied Artists’ Association, il Royal College of Art, l’Artists’ Rifles, la Royal Society of Arts, il New English Art Club, la Slade School of Art, la Royal Academy e la Tate Gallery.

Las emprimas perditgas d’architectura en il Reginavel Unì furman ils monuments da megalits sco Stonehenge, Avebury e West Kennet Long Barrow. Skara Brae sin las Inslas Orkney è in dals abitadis dal temp neolitic ch’è sa mantegnì il meglier en tut il mund. Ils Celts han bajegià exclusivamain edifizis en lain, dals quals praticamain nagut n’è sa conservà. Ils Romans han erigì las emprimas citads; las pli impurtantas eran Aquae Sulis (Bath), Camulodunum (Colchester), Deva (Chester), Eboracum (York), Londinium (Londra) e Verulamium (St Albans). Blers edifizis romans èn sa mantegnids fin oz; menziun speziala meritan las termas a Bath.

Als Romans èn suandads ils Anglosaxons ed auters pievels germans. Lur chasas consistivan per ordinari da paraids da pertgas ed arschiglia. Pli ditg èn sa mantegnidas las baselgias erigidas da crap; da quellas sa lascha savens deducir da tge epoca che deriva l’abitadi. In exempel tipic per l’architectura anglosaxona furma la baselgia parochiala da Wing a Buckinghamshire.

Durant ils dus tschientaners suenter la conquista normana l’onn 1066 han ins erigì numerusas impurtantas turs e chastels sco il Tower of London, il Caernarfon Castle en Valisa u il Carrickfergus Castle en l’Irlanda dal Nord; questas fortezzas servivan a tegnair a mastrin la populaziun. Da la medema epoca derivan diversas catedralas ch’èn vegnidas erigidas l’emprim en il stil norman e silsuenter en il stil gotic. La pratica da rinforzar bunamain tut ils edifizis pli gronds cun fortificaziuns ha manà al stil da Tudor ed a residenzas represchentativas sin la champagna sco Montacute House e Hatfield House resp. a chastels sco il Hampton Court Palace.

Durant la Guerra civila englaisa (1642–1649) han edifizis stuì supportar la davosa giada assedis pli gronds. Numerus chastels èn vegnids destruids tar las attatgas da l’armada dad Oliver Cromwell (p.ex. Corfe Castle). Suenter la fin da questa guerra èn pli u main be pli vegnids erigids edifizis d’abitar e da fatschenta; l’aspect da la defensiun è quasi svanì dal tuttafatg. Gia dal temp avant la guerra aveva Inigo Jones sa fatg in num sco impurtant architect britannic e confundatur dal palladianissem. Sias ovras las pli impurtantas èn il Queen’s House ed il Banqueting House.

Suenter la reintroducziun da la monarchia il 1660 ed il grond incendi da Londra l’onn 1666 han ins manchentà a Londra la chaschun da stgaffir ina nova metropola applitgond ils stils architectonics moderns. Christopher Wren, in dals pli impurtants architects britannics da quel temp, era bain vegnì incumbensà da reconstruir la gronda part da las baselgias destruidas; per motivs da spargn è ses plan cumplessiv per reconstruir la citad però vegnì refusà. Sia capodovra furma la St Paul’s Cathedral ch’è vegnida erigida tranter il 1675 ed il 1708.

A l’entschatta dal 18avel tschientaner è il baroc ch’era fitg popular en l’Europa continentala er arrivà sin las Inslas Britannicas. Da quel temp deriva per exempel il Blenheim Palace (architects: John Vanbrugh e Nicholas Hawksmoor). Il baroc è però bainprest vegnì stgatschà dal palladianissem che dueva la finala manar a l’architectura gregoriana. Quella vegn represchentada da residenzas champestras sco Woburn Abbey u Kedleston Hall; impurtants architects da quest stil da bajegiar resp. da las epocas successuras neoclassicissem e romantica èn stads Robert Adam, William Chambers e James Wyatt.

Quasi sco in pass enavos en congual cun la simmetria dal palladianissem para la neogotica cun sias allusiuns al stil da bajegiar dal temp medieval. L’exempel il pli enconuschent da questa fasa furma il Palace of Westminster ch’è vegnì concepì da Charles Barry. Vers la mesadad dal 19avel tschientaner è la tecnologia stada avanzada avunda per pudair far diever da l’atschal sco material da construcziun. En questa moda ha Joseph Paxton construì il Crystal Palace che furma bain il pli enconuschent edifizi dal temp victorian. En il decurs da quest’èra dal progress han ins introducì bleras novas metodas da construcziun, ma ils architects dominants sco Augustus Pugin insistivan plitost sin in stil orientà vers il passà.

A l’entschatta dal 20avel tschientaner è daventà popular il design da l’Arts and Crafts Movement. Quest stil era sa sviluppà or da las ovras d’architects dal 19avel tschientaner sco George Devey; sia curunaziun han las furmas architectonicas da quel temp chattà en ils edifizis dad Edwin Lutyens. Arts and Crafts vegn simbolisà en l’architectura tras la furma informala, betg simmetrica; savens èn ils edifizis ornads cun fanestras a pilasters u giatters, cun culmainas multiplas e chamins auts. Quest stil è sa mantegnì fin la Segunda Guerra mundiala. Suenter la guerra è la reconstrucziun stada segnada dal modernissem resp. brutalissem, surtut da la fin dals onns 1950 fin l’entschatta dals onns 1970.

Il construir modern è restà fin oz la forza motorica da l’architectura britannica, cumbain che si’influenza sa manifestescha bundant pli ferm tar chasas da fatschenta che tar edifizis d’abitar. Ils dus architects contemporans ils pli enconuschents èn Richard Rogers e Norman Foster. Ils pli famus edifizis da Rogers èn l’Edifizi da Lloyd’s ed il Millennium Dome. Foster ha tranter auter construì il sgrattaschiel 30 St Mary Axe (er enconuschent sco ‹cucumera›) e la City Hall da Londra.

L’istorgia dal film da la Gronda Britannia furma ina part impurtanta e variada da la cultura da film internaziunala. A l’influenza decisiva dals cineasts britannics al cumenzament da l’istorgia dal film – e quai tant areguard il svilup tecnic sco er artistic – èn suandads decennis ch’han adina puspè manà a crisas; motivs centrals han furmà las difficultads economicas e la dependenza creschenta dal martgà da film american. Grond success han surtut marcà las producziuns dals reschissurs britannics Alfred Hitchcock, Michael Powell, Laurence Olivier, David Lean, John Grierson e Peter Greenaway. E betg d’emblidar ils films da James Bond che tutgan tar ils pli enconuschents en tut il mund. Ils pli impurtants lieus da producziun furman ils Shepperton Studios ed ils Pinewood Studios. La pli impurtanta distincziun è il British Academy Film Award.

Dapi la ‹Revoluziun scientifica› ch’ha cumenzà vers la mesadad dal 16avel tschientaner, ha il Reginavel Unì fatg part dals pajais ch’han influenzà il pli ferm il svilup entaifer la scienza e la tecnologia. Il fundament ha furmà William Caxton ch’ha manà la stampa da cudeschs en l’Engalterra. Il filosof Francis Bacon ha preschentà il 1620 en ses cudesch ‹Novum Organum› l’uschenumnada ‹metoda da Bacon› ch’ha francà en la perscrutaziun scientifica l’empirissem e la metoda inductiva.

Il pli enconuschent e probablamain il pli impurtant da tut ils scienziads da la Gronda Britannia è Isaac Newton. Cun si’ovra ‹Principia Mathematica› (1687) ha el curunà tenor l’opiniun da blers istoriografs la Revoluziun scientifica. Cun ses axioms ha Newton descrit la gravitaziun universala e las leschas dal moviment; quai dueva furmar il fundament per la mecanica classica e la fisica moderna. Ultra da quai è Newton stà (ensemen cun Gottfried Leibniz) in dals fundaturs da la calculaziun infinitesimala, ha perscrutà sin il champ da l’optica ed ha elavurà leschas davart il conduir chalur. 

Dapi il temp da Newton han divers Brits contribuì a moda essenziala al svilup da quasi tut las spartas da la scienza. A quels appartegnan tranter auter Michael Faraday, ch’ha cumbinà ensemen cun James Clerk Maxwell las forzas electricas e magneticas a las equaziuns da Maxwell, Robert Hooke, il scuvrider da las cellas da las plantas, James Prescott Joule ch’ha perscrutà sin il sectur da la termodinamica e che vala sco scuvrider dal princip dal mantegniment da l’energia, Paul Dirac, in dals piuniers da la fisica dals quantums, Humphry Davy ch’ha scuvert divers elements, Charles Darwin ch’ha descrit il princip da l’evoluziun tras selecziun natirala e Harold Kroto ch’ha scuvert ils fullerens.

Tradiziunalmain ha la gronda part dals perscrutaders britannics perscrutà e docì a l’Universitad dad Oxford ed a l’Universitad da Cambridge. En il decurs dals davos decennis han però las uschenumnadas ‹universitads da Red Brick› e las New Universities gudagnà terren sin divers secturs. La tgira da la scienza cumpeta a la Royal Society; ella è vegnida fundada il 1660 e furma la pli veglia societad da scienziads ch’è anc existenta.

Er areguard il svilup tecnologic è il Reginavel Unì savens stà a la testa. Qua ha cumenzà la Revoluziun industriala ch’è vegnida iniziada tras innovaziuns en l’elavuraziun da textilias, l’inschigneria da construcziun, la maschina da vapur, la producziun en massa d’atschal e la viafier. Enconuschents inschigners ed inventaders da quel temp furman James Watt, Robert Stephenson, Richard Trevithick, Isambard Kingdom Brunel, Henry Bessemer e Richard Arkwright. Dapi lura han blers Brits cuntanschì renum mundial: Charles Babbage (ses calculaturs valan sco antecessurs dal computer), Alan Turing (ha contribuì a moda essenziala al svilup da l’informatica), Alexander Fleming (ha scuvert il penicillin), Robert Watson-Watt (vala sco inventader dal radar), John Logie Baird (piunier da la televisiun) e Tim Berners-Lee (inventader dal world wide web).

En il Reginavel Unì datti ina vasta purschida da medias; pervi da la derasaziun mundiala da l’englais han quellas er gronda influenza a nivel internaziunal.

La BBC furma l’emettur da televisiun da dretg public ed è a medem temp il pli vegl ed il pli grond emettur da televisiun en tut il mund. La BBC vegn finanziada tras taxas d’abunaments e per part tras reclama e maina pliras staziuns tant a l’intern dal pajais sco er a l’exteriur. BBC World, il chanal da novitads internaziunal, vegn emess en tut il mund.

Er tar ils emetturs da radio dominescha la BBC cun diesch staziuns naziunalas e 40 localas. Ultra da quai datti radund 200 emetturs da radio commerzials; per lunsch or il pli impurtant da quels è Capital Radio a Londra.

Tar las gasettas britannicas faschev’ins fin avant paucs onns la differenza stricta tranter gasettas ‹seriusas› en format grond (broadsheet) e las gasettas da boulevard en format da tabloid. En il fratemp han però er divers quality newspapers midà il format, damai che quel vegn apprezià dals lecturs. La gasetta dal di cun la pli gronda ediziun furma ‹The Sun›; la pli auta ediziun tar las uschenumnadas gasettas da qualitad han ‹The Daily Telegraph› e ‹The Times› ch’èn situadas en il spectrum politic dretg da la mesadad, sco er ‹The Guardian› e ‹The Daily Mirror› che stattan sanester da la mesadad. La ‹Financial Times› è la gasetta che dominescha sin il champ da l’economia.

Sco en auters pajais è er la muntada da l’internet ed il diever dals social media creschì fermamain ils ultims onns. Il 2011 cuntanschevan ils social networks 27,2 milliuns persunas en il Reginavel Unì.

Il sport gioga in’impurtanta rolla en tut il pajais. Areguard ils singuls geners da sport datti però per part vaira grondas differenzas regiunalas e socialas. En vastas parts da las classas socialas plitost bassas (working class) da la Scozia e l’Engalterra è ballape per lunschor il sport da squadra il pli popular. En la Valisa ed en las classas mesaunas e superiuras da l’Engalterra (upper class) è percunter rugby union per ordinari il sport da squadra numer in. Cricket è tradiziunalmain medemamain in sport plitost elitar. Quai ha per gronda part motivs istorics: en ils quartiers da lavurants da las citads grondas n’eri strusch pussaivel da giugar rugby, damai ch’i mancavan ils pastgets necessaris; per giugar balla bastava percunter ina curt interna. Las scolas superiuras da l’upper class da lur vart disponivan tuttas da plazzas da pastget, sin las qualas ins pudeva giugar rugby e cricket. En il decurs dal temp è il sport correspundent daventà ina pussaivladad d’identificaziun cun l’atgna classa. 

Ulteriurs sports fitg populars èn rugby league, atletica leva, dar spada, dart, golf, sport motorisà e cursas da chavals. Ils sports d’enviern èn pauc derasads, damai ch’i croda – malgrà ils grads da latituda vaira nordics – per ordinari memia pauca naiv. Las reglas da blers impurtants sports èn sa sviluppadas en il Reginavel Unì. Quai vala tranter auter per ballape, tennis, squash, golf, boxar, rugby, cricket, snooker, bigliard, badminton e curling.

En la gronda part dals sports da squadra possedan las quatter parts dal pajais squadras naziunalas separadas. Als gieus olimpics vegnan però tramessas squadras communablas da tut las quatter home nations.

Sper enconuschents turniers da sport sco la Wimbledon Championship (tennis), il Maraton da Londra, l’Open Championship (golf) u il Grond Premi da la Gronda Britannia (furmla 1) han er gì lieu trais giadas ils gieus olimpics a Londra (il 1908, 1948 e 2012).

La cuschina britannica (e surtut l’englaisa) ha gì ditg il num d’esser monotona, greva da digerir e cundida be pauc. Ina cumbinaziun tradiziunala ch’è sa mantegnida fin oz en numerusas furmas è tartuffels cun charn e verduras. Fitg derasadas èn er pastetas cun emplenida da charn. L’ensolver britannic è ina spaisa fitg pulpida ch’è enconuschenta en tut il mund. Tar las spaisas fraidas èn famus ils sandwiches ed il pli enconuschent fast-food englais furma fish and chips. Sco dessert vegn surtut mangià pettas e tranter las diversas sorts da chaschiel è surtut enconuschent il Cheddar.

Tranter auter han immigrants da l’Asia e da l’Africa attribuì ad avrir ils davos decennis la cuschina englaisa che valeva tradiziunalmain sco conservativa. Enconuschents cuschiniers sco Jamie Oliver han ultra da quai integrà pli ferm la cuschina mediterrana e spezarias. 

La cuschina da la Scozia è influenzada – surtut en las classas socialas superiuras – pli ferm da la cuschina franzosa. Quai deriva da l’Auld Alliance, l’allianza politica ch’ha existì tranter la Scozia e la Frantscha dal 1295 fin il 1560. Cumbain che er la cuschina scota è vegnida influenzada ils ultims decennis da tendenzas internaziunalas, ha ella mantegnì pli fitg ses caracter autocton.

La bavronda betg alcoholica la pli stimada dals Brits furma il té; la cultura da té è enconuschenta en tut il mund e tutga tar la moda da viver britannica. Il café gioga percunter ina rolla main impurtanta. Tar las bavrondas alcoholicas dominescha la biera, surtut Ale e Stout sco er il cider. Las pli impurtantas spirituosas furman il gin ed il whisky. Dapi tschientaners è la Gronda Britannia in dals impurtants cumpraders da vins dultschs sco sherry, porto u madeira.




#Article 21: Republica da l'Irlanda (2685 words)


La Republica da l’Irlanda u simplamain Irlanda (irlandais Éire [ˈeːrʲə], englais Ireland) è in stadi europeic situà sin l’insla da medem num. En il nord cunfinescha el cun l’Irlanda dal Nord che tutga tar il Reginavel Unì. En l’ost giascha la Mar Irlandaisa, en il vest l’Atlantic. La chapitala dal pajais è Dublin. Dapi il 1973 fa l’Irlanda part da l’Uniun europeica. Ina gronda part da la populaziun appartegna a la cardientscha catolic-romana.

L’entira insla – che vegn er numnada Insla verda – ha ina lunghezza da radund 450 km ed ina ladezza da radund 260 km. Cun ina surfatscha da 84 421 km² furma l’Irlanda la terz gronda insla da l’Europa (suenter la Gronda Britannia e l’Islanda). Topograficamain sa lascha l’insla divider en collinas e muntognas situadas a la riva ed en planiras che giaschan en il center. Il Carrauntuohill furma cun 1041 meters la muntogna la pli auta da l’insla; el giascha en il sidvest en il contadi da County Kerry. Il Shannon è il pli lung flum (370 km, da quai radund 250 km navigabel) e percurra l’insla dal nord vers il sidvest. Bundant 80 % da l’insla tutgan tar la Republica da l’Irlanda.

La chapitala Dublin è la pli gronda citad da la Republica da l’Irlanda e giascha a la costa orientala dal pajais. Entaifer ils cunfins da la citad vivan radund 500 000 persunas, en l’entira regiun radund 1,2 milliuns persunas. Cumpareglià cun las parts da l’insla situadas pli en il vest è il clima a Dublin relativamain miaivel e segnà da pli paucs dis da plievgia. Ulteriuras citads cun ina populaziun sur 50 000 èn Cork, Galway, Tallaght, Blanchardstown e Limerick.

Il dumber d’abitants dal pajais ha fatg tras ina diminuziun dramatica enturn la mesadad dal 19avel tschientaner. La culpa èn stadas nauschas racoltas, fominas e repressalias da vart dals regents englais. Bleras persunas èn emigradas en la Gronda Britannia ed en ils Stadis Unids. Il punct il pli bass è stà cuntanschì pir ils onns 1960 cun 2,82 milliuns abitants; en il fratemp ha il dumber dals abitants puspè cuntanschì il nivel da la mesadad dal 19avel tschientaner e cumpiglia radund 4,5 milliuns (resp. 6 milliuns cun l’Irlanda dal Nord ch’è populada pli spess).

In’ulteriura caracteristica da l’Irlanda è la cardientscha catolic-romana, a la quala appartegnan 86,8 % da la populaziun. Quest cuntrast confessiunal tar il Reginavel Unì anglican-protestant furma in dals elements dal Conflict da l’Irlanda dal Nord.

L’istorgia da l’Irlanda cumenza cun la colonisaziun enturn 7000 a.Cr. En in segund pass han colonisaturs celtics purtà vers 300 a.Cr. la lingua e cultura celtica sin l’insla. Dal temp dals Romans cumpara l’insla sut il num Hiberna.

La cristianisaziun è vegnida instradada a l’entschatta dal 5avel tschientaner tras sclavs che derivavan da la provinza Britannia (ch’è stada enfin il 410 sut domini roman). Tranter ils missiunaris figurescha er Patric d’Irlanda, il sontg naziunal da l’insla. I suonda in temp da prosperitad cun numerusas fundaziuns da claustras (caracterisadas t.a. da las enconuschentas turs radundas). Questa fluriziun è vegnida terminada enturn il 800 tras las sblundregiadas dals Vikings.

Cun l’invasiun dals Normans l’onn 1169 ha cumenzà la dominanza cuntinuanta da l’Engalterra en l’Irlanda. Anglo-normans han confiscà il possess dals Irlandais e stgatschà ils indigens en la part occidentala (main fritgaivla) da l’insla. A partir da 1600 ha la curuna englaisa tramess colonisaturs anglicans e presbiterans, oriunds da l’Engalterra e da la Scozia, en il nordost da l’insla. Quest’uschenumnada Plantation furma l’origin dal conflict religius ed etnic ch’ha turmentà l’Irlanda dal Nord fin viaden il 21avel tschientaner.

La politica dals proprietaris da terren englais en Irlanda e la malsogna da tartuffels han manà a la fomina dals onns 1845–1849. Var 1–1,5 milliuns umans èn morts e blers èn emigrads en l’America. Per part han las autoritads britannicas tratg sapientivamain a la lunga las mesiras per mitigiar la fomina. Questa fomina gioga ina rolla centrala en il svilup istoric dals resentiments antibritannics en l’Irlanda. Las reproschas che vegnan fatgas envers ils Englais tanschan da la passivitad fin al genocid sistematic. Er da vart da l’istoriografia vegn la dumonda discutada enfin oz a moda cuntraversa. En mintga cas èsi cumprovà ch’ils colonisaturs britannics n’han betg franà durant la fomina ils exports, quai ch’avess pudì stabilisar ils pretschs da las victualias. Medemamain valan ils Penal Laws relaschads enturn il 1700 sco punct da partenza per il svilup da la situaziun precara. Questas leschas han scumandà a la populaziun catolica da l’Irlanda d’exequir uffizis publics ed als han privà dal dretg d’eleger e da furmaziun superiura. Plinavant han ins scumandà la cumpra u l’emprest da terren e limità il dretg d’acquistar facultad.

Suenter l’Emprima Guerra mundiala è prorut sin l’insla in conflict sanguinus tranter Britans (loialists) ed Irlandais (republicans). Tranter auter è vegnida fundada la Irish Republican Army (IRA) sco organisaziun paramilitara che pretendeva – er cun acts violents – l’independenza cumpletta da l’entira Irlanda. Il Dominion-Status dals 6 da december 1921 ha la finala pussibilità il 1922 la fundaziun dal Stadi liber da l’Irlanda che furma il predecessur da l’Irlanda odierna. Sis ducadis entaifer la provinza Ulster cun la chapitala Belfast èn dentant restads sut domini da la Gronda Britannia. Questa divisiun politica da l’insla è er sa mantegnida suenter che l’Irlanda è sortida il 1949 dal Commonwealth. Il Conflict da l’Irlanda dal Nord per propi è prorut ils onns 1960. Tras acts violents da vart da l’IRA e da l’armada britannica èn vegnidas per la vita dapi l’escalaziun var 4000 persunas (t.a. Bloody Sunday e Bloody Friday dal 1972). Dapi l’armistizi dal 1998 è la situaziun sa calmada in pau. Partidas politicas sco Sinn Féin s’engaschan bain vinavant per in’uniun politica da l’insla – quai ch’era l’armistizi pussibilitescha da princip – ma quai po be succeder a basa d’ina decisiun da maioritad entaifer la populaziun da l’Irlanda dal Nord.

La Republica da l’Irlanda è ina democrazia represchentativa cun president, primminister e parlament. Il primminister vegn nominà dal parlament e designà dal president. Per regla è el a medem temp schef da la partida da maioritad u da la coaliziun entaifer il parlament.

Il parlament (Oireachtas) consista da duas chombras. Il senat (Seanad Éireann) sa cumpona da 60 commembers e vegn elegì tenor gruppas definidas (agricultura e lavurers, industria e commerzi, administraziun publica, universitads, cultura e furmaziun). La chombra dals represchentants (Dáil Éireann) cumpiglia 166 commembers che vegnan elegids tras elecziun dal pievel.

L’Irlanda consista da quatter provinzas (Connacht, Leinster, Munster, Ulster) ch’èn sutdivididas en ducadis u districts (Counties). L’administraziun statala è organisada a nivel dals districts; per quella na giogan las provinzas nagina rolla pli. Sis dals nov ducadis tradiziunals da la provinza Ulster tutgan tar l’Irlanda dal Nord e fan uschia part dal Reginavel Unì.

Tranter l’Irlanda e l’Irlanda dal Nord n’han lieu naginas controllas da cunfin. Per quest motiv na fa la Republica da l’Irlanda betg part dal spazi da Schengen. Cun resguard al cunfin avert sin l’insla verda pudess la Republica da l’Irlanda be far quest pass communablamain cun il Reginavel Unì. 

L’Irlanda fa part dal martgà naziunal europeic e da la zona da l’euro. Fin en ils onns 1990 tutgava l’Irlanda tar ils stadis pauc sviluppads entaifer la Communitad europeica. En tschertga d’in lieu adattà per exportar en il spazi economic europeic, han alura en spezial ils Stadis Unids cumenzà ad investir fermamain en l’Irlanda. A medem temp hai dà ina vaira gronda immigraziun da lavurers, en spezial nà da l’Europa da l’Ost. Pervi da quest svilup vegniva l’Irlanda savens numnada il ‹tigher celtic›.

Ma a partir dal 2007 ha la crisa finanziala tutgà fermamain l’Irlanda. Igl è sa mussà che la bainstanza cuntanschida ils onns precedents sa basava per part sin speculaziuns e sin ina scufla immobigliara. Er la dependenza da l’economia irlandaisa d’investiturs a l’exteriur è sa fatga valair a moda negativa. Bain aveva il sectur da finanzas ch’era regulà be minimalmain attratg bleras bancas; a medem temp è l’Irlanda dentant s’indebitada massivamain a l’exteriur. Il 2010 ha il stadi stuì clamar en agid il sustegn finanzial da l’Uniun europeica.

Ils differents eroports en Irlanda vegnan frequentads da las duas societads indigenas Aer Lingus e Ryanair sco er da societads d’aviatica internaziunalas. La rait da viafier n’è betg spessa, vegn dentant schlargiada cuntinuadamain. Il med da transport public il pli impurtant furman ils bus da l’interpresa naziunala Bus Éireann cun lur colliaziuns enfin en la periferia. Areguard il traffic sin via vala en l’Irlanda (tuttina sco en l’Irlanda dal Nord e sin l’insla britannica) il traffic a sanestra.

Pervi da la bassa spessezza da la populaziun sa chattan las vias il pli savens èn in stadi main bun ch’en autras parts dal continent europeic. Dapi la fin dals onns 1990 è la regenza irlandaisa dentant londervi da renovar la rait da vias cun agid d’in program d’investiziun da pliras milliardas euros. Quai succeda per gronda part betg cun asfalt u betun, mabain cun crappella, uschia che las vias irlandaisas paran groppas e malgulivas.

L’entschatta dal 2005 ha l’Irlanda midà dal sistem da mesira angloamerican al sistem metric. Dapi lura vegnan las limitas da spertadad inditgadas en km/h enstagl da mph e las distanzas en kilometers enstagl da miglias. 

La lingua irlandaisa (irlandais Gaeilge ni Gaolainn, tenor l’ortografia dal 1948 per regla Gaedhilge) è ina da las trais linguas gaelicas (sper il gaelic scot ed il manc da l’Insla Man). Las linguas gaelicas fan part dal rom insulan da las linguas celticas. Tenor artitgel 8 da la constituziun furma l’irlandais «la lingua uffiziala principala» da la Republica da l’Irlanda «damai ch’ella è la lingua naziunala». Texts da leschas vegnan adina er publitgads en ina versiun irlandaisa; en cas da dubi furma questa – e betg la versiun englaisa – la varianta lianta. Dapi il 2007 figurescha l’irlandais sco ina da las 23 linguas uffizialas da l’Uniun europeica.

En furma scritta è l’irlandais preschent en tut il pajais. Inscripziuns uffizialas (p.ex. nums locals u tavlas stradalas) cumparan dapertut, per part er en l’Irlanda dal Nord, en furma bilingua. En parts dals Gaeltacht (cf. sutvart) èn tavlas d’orientaziun be avant maun en furma irlandaisa.

Davart l’origin da la lingua irlandaisa na san ins betg bler. Bain è l’irlandais senza dubi ina lingua celtica, ma cura e co ch’il celtic è arrivà en l’Irlanda n’è betg enconuschent. La preschientscha da l’irlandais sco lingua discurrida è cumprovada a partir dal quart tschientaner s.C. (inscripziuns dad Ogam). Da la lingua che vegniva discurrida avant en l’Irlanda na datti naginas restanzas directas, ella cumpara dentant en l’irlandais en furma da substrat.

Entant che la part meridiunala da l’insla britannica è vegnida romanisada, n’han ils Romans mai prendì possess da la Scozia e da l’Irlanda. Tuttina èn cumprovads contacts tar la Britannia romana che sa mussan er en pleds d’emprest latins. Ulteriurs pleds esters entaifer l’irlandais derivan dals ‹peregrini›, muntgs irlandais e scots ch’han missiunà 600–900 sin il continent ed èn puspè returnads en lur patria.

Dapi l’invasiun dals Vikings a la fin dal 8avel tschientaner ha l’irlandais stuì parter l’insla cun ulteriuras linguas. Questa tendenza ha cuntinuà cun l’invasiun dals Normans e lur lingua galloromana a partir da l’onn 1169. En il temp medieval è er sa fatga valair la preschientscha da l’englais e dal franzos, quai en spezial entaifer l’aristocrazia.

Ma schizunt la colonisaziun sistematica da farmers englais e scots durant il 16avel e 17avel tschientaner n’ha per il mument betg midà bler vi da la predominanza da l’irlandais. La classa sociala inferiura discurriva vinavant irlandais, la classa dominanta englais u irlandais. Pervi da disturbis politics han las restanzas da la veglia aristocrazia irlandais dentant bandunà l’insla l’onn 1607 (Flight of the Earls); tras quai è l’irlandais praticamain svanì sco lingua da la classa superiura.

Sco factur central per la regressiun da la lingua po valair la fomina dal 19avel tschientaner. Tranter il 1843 ed il 1851 è il dumber da las persunas che discurrivan irlandais sa diminuida per radund 1,5 milliuns; la gronda part è morta da la fom, ulteriurs èn emigrads. Uschia è ì a perder radund in terz da la populaziun da lingua irlandaisa.

Emprovas da revitalisar l’irlandais hai dà a la fin dal 19avel tschientaner ed en spezial a partir da l’independenza dal 1922. Ma tut quai sco er l’emprova da megliurar il status social da la lingua n’ha betg pudì retegnair la digren. Oz vegn l’irlandais be pli discurrì en pitschnas parts da l’Irlanda (en spezial en la part rurala en il vest dal pajais) e sporadicamain en las citads. Questas inslas linguisticas vegnan subsummadas sut il term Gaeltacht.

Tenor la dumbraziun dal pievel dal 2006 han 1,66 milliuns persunas (40,8 % da la populaziun) inditgà da savair irlandais. Da quai èn dentant en il meglier cas be radund 70 000 da lingua materna irlandaisa, e be ina part da quels dovra l’irlandais en il mintgadi. Uschia han be 53 471 persunas inditgà il 2006 da duvrar regularmain l’irlandais ordaifer las instituziuns da furmaziun.

La vita culturala sa splega en emprima lingia en ils paucs gronds centers dal pajais (Dublin, Cork, Galway e Limerick). La vita ordaifer las citads (en ils Midlands ed en autras regiuns ruralas pauc populadas) è marcada da l’agricultura e da la pestga. Per part datti tendenzas da sviluppar il turissem, uschia per exempel en la regiun dal flum Shannon.

En il center da la cultura populara stat il St. Patrick’s Day (irlandais Lá Fhéile Pádraig) che regorda a l’uvestg irlandais Patrick ch’è mort ils 17 da mars 461 ni 493. El è stà l’emprim missiunari cristian en l’Irlanda, vegn venerà sco sontg e vala sco protectur da l’Irlanda.

La litteratura irlandaisa è sa sviluppada a partir dal temp medieval tempriv tant en irlandais sco er en englais. La lingua litterara dominanta a partir dal temp modern è cleramain l’englais. L’irlandais ha pudì sa far valair in pau en rom dal naziunalissem irlandais (uschenumnada renaschientscha irlandaisa) dapi il 19avel tschientaner. E pervi da las relaziuns culturalas cun la Frantscha catolica è er il franzos sa mantegnì parzialmain entaifer la litteratura irlandaisa dal 19avel e 20avel tschientaner. Uschia han per exempel Oscar Wilde (‹Salomé›, 1891) e Samuel Beckett (‹En attendant Godot›, 1953) publitgà singulas ovras l’emprim en versiun franzosa. Sco ulteriurs scripturs irlandais da muntada èn da numnar Jonathan Swift ch’ha publitgà il 1726 ‹Ils viadis da Gulliver› ed Abraham ‹Bram› Stoker ch’è vegnì enconuschent cun ses roman ‹Dracula› (1897). E sa chapescha ils numerus purtaders irlandais dal Premi Nobel da litteratura: William Butler Yeats (1923), George Bernard Shaw (1925), Samuel Beckett (1969) e Seamus Heaney (1995).

Irish Folk è la denominaziun dal folk irlandais ch’è popular en tut il mund. La musica è marcada d’elements ritmics, da si’instrumentaziun (gìa, flauta traversa, accordeon, cornamusa e.a.) e dal saut accumpagnant. L’Irish Folk è attestà dapi il 17avel tschientaner. Ensemen cun la musica populara da la Scozia e da la Bretagna vegn quest gener da musica savens numnà ‹musica celtica›. Ina relaziun per propi cun la cultura celtica na sa lascha dentant betg cumprovar. 

Sper la musica tradiziunala è l’Irlanda er ordvart preschenta en la scena actuala da musica da rock e pop. Da Dublin e dad autras parts dal pajais derivan bands e musicists marcants sco U2, Bob Geldof, Sinéad O’Connor ed Enya. Cun set victorias furma l’Irlanda en pli in dals pajais cun il pli grond success en rom da l’Eurovision Song Contest.

La cuschina irlandais tradiziunala è simpla e savurusa. Impurtants products furman charn d’agnè e charn-bov, giaglinom, ovs, paintg ed auters products da latg, litgivas e salmun sco er giombers e conchiglias. Pervi da l’auta umiditad è la cultivaziun da granezza limitada; tant pli impurtanta è la producziun da verdura (en spezial tartuffels e giabus).

In impurtant element da la cultura da mangiar e da baiver irlandaisa furman ils Irish Pubs. Qua vegnan servidas bieras (p.ex. Guinness), differentas sorts whisky – la spirituosa d’origin irlandais u scot – ed Irish Coffee (café dultsch cun whisky e groma). En ils Irish Pubs vegn communitgà e fatg musica ed els furman in impurtant lieu da la socialisaziun sur las generaziuns. Cun l’emigraziun irlandaisa è la tradiziun dals pubs sa derasada praticamain en tut il mund.




#Article 22: Lingua occitana (387 words)


Loccitan (occ. occitan) u lingua d'oc (lenga d'òc) è ina lingua romana.

L'occitan u lingua d'oc, della maniera da dischair gea en l'Edad media (ozendi sa scriva anc oc ma sa di /o/ u oc-be /obbé/, che equival a gebain) sa discurra en curanta dus departaments franzos, ina val da Spagna (la Val d'Aran) e tredesch vals talianas (Val Varacha, Val Estura, Val Maira....)

La populaziun da quellas regiuns è da pli da 17 miliuns da persunas, ma tuttas n'èn betg d'oc: funccionaris franzos, inmigrads, etc....
Pur la maioranza dal pievel na discurra betg pli la lingua. La revista franzosa Courrier International considera che nel territori franzos anc 3,6 miliuns de persunas enconuschan la lingua. I fa basegn da cuntar anc insaquants trais tschients mil burgais talians e set mil burgais spagnols.

Sondaschems pareschìs l'onn 2007 inditgan che la davosa regiun nua che la lingua è anc discurrida da ina maioranza dal pievel è l'Auvergna (setanta per tschient). En Provenza i dat numai 100 000 persunas che discurran anc la lingua, main en Languedoc e Aquitaine, e la trasmissiun familiala è squasi arrestada en Midi-Pyrénées.

Las diferentschas graficas enter las duas linguas èn impurtontas e nascundan la parentà reala.

Occitan pruvensal

Lei diferéncias graficas entre leis doas lengas son importantas e escondon la parentat reala.
(grafia classica)

Li diferencio grafico entre li dos lengo soun impourtanto e escoundon la parenta realo.
(grafia mistralenca)

Occitan d'Auvergna
Las diferéncias graficas entre las doas lengas son importantas e escondon la parentat reala.

Occitan de Gascugna
Las diferéncias graficas enter las duas lengas que son importantas e qu'esconen la parentat reau.

I fa basegn ch'il gal chante ina chansun mintga damaun.

Provençau
Fau que lo gau cante una cançon cada matin.

Chau que lo jal chante una chançon chasque matin.

Que cau que lo poth e cante ua cançon cada matin.

Oc dagli Alps
Chau que lo jal chante una chançon chasque matin.

Ins vescha pia che nel sistem classic o sa pronunza /u/, ed i fa basegn da scriver in accent grafic ò per pudair prononzar /o/.
En ils dus sistems grafics occitans, ch sa pronunza ca en Rumantsch.
Sa veda uschè che il Lemusin, l'Auvergnat e l'Aupenc fan ch sco ils Ladins, e che il Gascun, il Lengadussian ed il Pruvensal fan c sco ils Sursilvans, Sutsilvans e Surmirans.




#Article 23: Pajais Bass (6651 words)


Ils Pajais Bass (neerlandais Nederland, frislandais Nederlân) furman ina monarchia parlamentara ed ina da las quatter parts autonomas dal Reginavel dals Pajais Bass. Il pajais ch’è situà en l’Europa dal Vest vegn cunfinà en il nord e vest tras la Mar dal Nord, en il sid tras il Reginavel da la Belgia ed en l’ost tras la Republica Federala Tudestga.

Ensemen cun la Belgia ed il Luxemburg furman ils Pajais Bass ils Stadis dal Benelux. La chapitala dals Pajais Bass è Amsterdam; la sedia da la regenza sa chatta a Den Haag. Ils Pajais Bass èn in stadi fundatur da l’Uniun europeica e da la Communitad economica europeica.

Tar il territori dals Pajais Bass tutgan sper las dudesch provinzas dal territori europeic er las inslas caribicas Bonaire, Sint Eustatius e Saba che vegnan numnadas ensemen ‹las vischnancas particularas›. Questa construcziun exista dapi la dissoluziun da l’uniun naziunala da las Antillas Ollandaisas l’onn 2010.

Ulteriurs territoris caribics che na furman betg ina part integrala dals Pajais Bass, mabain che fan part dal Reginavel dals Pajais Bass sco parts dal pajais autonomas èn Aruba, Curaçao e Sint Maarten.

Nederland (singular) è il num uffizial dal pajais ed er la furma derasada en la lingua da mintgadi. En autras linguas è però usità il plural (‹Pajais Bass›, ‹Niederlande› etc.) ed en la lingua da mintgadi vegn il stadi savens er numnà ‹Ollanda›, ‹Holland› etc. Il num ‹Ollanda› sa referescha atgnamain be a la part situada en il nordvest dal pajais, vul dir a l’anteriura provinza Ollanda che furmava la pli impurtanta provinza entaifer la Republica dals Pajais Bass reunids. Dapi la mesadad dal 19avel tschientaner è questa provinza sutdividida en las duas provinzas Ollanda dal Nord (cun la chapitala Haarlem) ed Ollanda dal Sid (chapitala Den Haag). En la lingua neerlandaisa vegn l’expressiun ‹Ollanda› surtut duvrada per designar questas duas provinzas. Uschiglio è ‹Ollanda› plitost in’autodeterminaziun ironica. Ma er en il ballape vegn duvrà il term ‹Ollanda›, per exempel en il sbratg da battaglia Hup Holland Hup.

Ordaifer ils Pajais Bass vegnan ils ‹Neerlandais› per ordinari numnads Ollandais ed er l’industria da turissem e l’ulteriura industria commerzialiseschan il pajais tras a tras sco ‹Ollanda› (quai vala per l’englais, il tudestg etc.). Abitants dals Pajais Bass che na derivan betg da la regiun Ollanda han per ordinari ina tscherta antipatia envers l’adiever dals terms ‹Ollanda› per ils Pajais Bass ed ‹Ollandais› per ils abitants dal pajais.

Il num ‹Pajais Bass› (en il plural) resulta da l’istorgia. La fin dal temp medieval furmavan ils Pajais Bass ina part dal domini da la chasa da Burgogna. En il 15avel tschientaner, sut Carl il Temerari, sa dividevan las terras en ina part superiura u auta (il ducadi sco er il franc contadi Burgogna ed ils pajais laterals) ed en ina part inferiura u bassa (Flandra, Artois cun ina part da la Picardie, Brabant, Ollanda, Luxemburg e.a.). Il 1482 è la ierta burgognaisa passada en possess da la chasa da Habsburg. Ils territoris habsburgais cumpigliavan da quel temp gia l’Austria Bassa, l’Austria Interna e l’Austria Superiura (situads enturn ils lieus principals da Vienna, Graz e Puntina), ils territoris situads a la costa da l’Adria (numnads ‹Küstenlande›) ed ils territoris al Rain Superiur (numnads ‹Vorlande›). Ins ha pia cuntinuà cun questa tradiziun da nominar ils territoris betg austriacs cun il term ‹-lande›, numnond ils Pajais Bass ‹Niederlande›, ‹Burgundische Niederlande› resp. ‹Habsburgische Niederlande› (l’emprim ‹Spanische Niederlande›, dapi il 1714 ‹Österreichische Niederlande›). (La part sura da la Burgogna – il ducadi da Dijon ch’era gia adina situà ordaifer ils cunfins da l’Sontg Imperi roman, pia la regiun odierna Bourgogne – è passada il 1493 a la Frantscha; medemamain il 1678 il franc contadi enturn Besançon, la Franche-Comté odierna.) En la lingua neerlandaisa numnan ins las regiuns istoricas er de Lage Landen, pia ils pajais situads a bass u profund, damai ch’i na dat en ils Pajais Bass naginas muntognas e be paucas elevaziuns.

Ils 26 da fanadur 1581 èn las provinzas da la part settentriunala dals Pajais Bass ch’appartegnevan a l’Uniun dad Utrecht (Ollanda, Zeeland, Utrecht, Gelderland, Overijssel, Groningen e Frislanda) sa decleradas independentas da lur signur territorial Felipe II da la Spagna. En ils contracts da la Pasch da Vestfalia dal 1648 è l’independenza vegnida proclamada tras il Sontg Imperi roman; il territori correspundeva pli u main als Pajais Bass da pli tard. La part meridiunala dal territori, inclusiv la Flandra, è percunter restada tar l’Imperi; pli tard è sa furmà da quest territori il stadi da la Belgia. Ins discurriva sinaquai dals Pajais Bass dal nord e dal sid.

Il Congress da Vienna ha anc unì ina giada per curt temp il nord ed il sid sco stadi independent (Koninkrijk der Nederlanden). Ma gia il 1830 è la part meridiunala sa declerada independenta sut il num Belgia. (Belgica è il num d’ina veglia provinza romana; dapi la renaschientscha vegniva l’expressiun er duvrada sco num latin per ils Pajais Bass incl. las provinzas settentriunalas).

En il neerlandais mesaun designavan ils adjectivs duutsc u dietsc (analog a l’expressiun tudestga deutsch) ils dialects da la Germania dal Vest che vegnivan discurrids dal pievel. Il term vegniva duvrà per cunfinar quels dal latin che furmava la lingua da l’administraziun, da la scienza e da la baselgia. Or da quest term è sa furmada la denominaziun englaisa Dutch.

Radund la mesadad dal pajais è situà main ch’in meter sur ed in quart dal pajais schizunt sut il spievel da la mar. Ils territoris planivs vegnan per ordinari protegids tras rempars cunter la mar burascusa; la lunghezza totala da quels munta a radund 3000 km. Il punct il pli aut dals Pajais Bass è cun 877 m il Mount Scenery sin l’insla caribica Saba. Il punct il pli aut da la terra franca, il Vaalserberg, mesira 322,5 meters; el è situà en il sidost en la provinza Limburg, al cunfin cun la Germania e la Belgia. 

Parts dals Pajais Bass, sco per exempel quasi l’entira provinza Flevoland, èn vegnidas creadas cun gudagnar terren or da la mar. Radund in terz da la surfatscha dal pajais è cuverta cun aua; la gronda part da quella tutga tar l’IJsselmeer che furmava fin il 1932 in golf e ch’è alura vegnì enserrà tras in rempar.

Ils pli gronds flums dals Pajais Bass furman il Rain, la Maas e la Schelde. Quels dividan il pajais en ina part meridiunala ed en ina settentriunala e sa scuntran puspè en il delta da Rain e Maas che furma la cuntrada centrala e pli vasta dal pajais. Il Rain sa divida l’emprima giada en vischinanza dal cunfin vers la regiun tudestga Rain dal Nord-Vestfalia. En il delta vegn il num ‹Rain› attribuì surprendentamain a bratschs dal flum main impurtants. Il flum principal sa numna l’emprim Waal, pli tard Merwede, alura Noord e la finala Nieuwe Maas.

Il vent sufla surtut nà dal sidvest. Da quai resulta in clima maritim moderà cun stads frestgas ed envierns miaivels. Spezialmain en il vest dal pajais, a la costa da la Mar dal Nord, è il clima influenzà pli ferm da l’Atlantic. Vers ost sa sminuescha l’influenza dal clima atlantic, da quai resultan envierns pli fraids e stads levamain pli chaudas.

Sper ils parcs naziunals Hoge Veluwe e Veluwezoom en la regiun Veluwe existan divers territoris da protecziun da la natira (p.ex. Oostvaardersplassen u l’insla Texel) sco er terrens da flums e da palids (Hollandse Biesbosch). Menziun speziala meritan er las Ovras dal Delta: Igl èn quai rempars cunter la mar burascusa ch’èn vegnids erigids suenter las inundaziuns dal 1953.

Cun radund 400 abitants per kilometer quadrat surfatscha da terren tutgan ils Pajais Bass tar ils stadis da surfatscha abitads il pli spess (per cumparegliar: la media en tut il mund è 48; en Svizra giascha il dumber tar 201 ed en Germania tar 231). Dals stgars 17 milliuns abitants viva radund la mesadad en la Randstad che furma la part occidentala dal pajais populada il pli spess.

La lingua uffiziala en l’entir pajais furma il neerlandais. En la provinza Frislanda è ultra da quai renconuschì sco lingua administrativa il frislandais u fris ch’è parentà stretgamain cun il neerlandais.

En las parts dal Reginavel situadas en la Caribica è medemamain il neerlandais lingua uffiziala, sper il papiamento u l’englais. In rom dal neerlandais, ch’è sa sviluppà en il fratemp ad in’atgna lingua da standard, furma l’afrikaans en l’Africa dal Sid.

Statisticamain furman ils Ollandais il pievel cun ils pli gronds umans en tut il mund. En media cuntanschan ils umens ina grondezza corporala da 1,83 m e las dunnas da 1,72 m. L’aspectativa da vita munta en media a 77 onns tar ils umens resp. a 82 onns tar las dunnas (situaziun dal 2005).

En ils Pajais Bass èn immigrads umans da tut il mund. Sper blers immigrads dals pajais vischins (t.a. Germania, Belgia ed Engalterra) vivan oz qua blers umans d’auters continents, sco t.a. dal Maroc e da la Tirchia, da las anteriuras colonias Indonesia e Surinam sco er da la Caribica.

En ils Pajais Bass vivan er tranter 6000 e 10 000 Sinti u Roma e radund 30 000 woonwagenbewoners. Quels vegnan numnads a moda depreziativa kampers, entant ch’els sezs sa considereschan sco reizigers. Oz vivan els a moda stabla sin spezialas plazzas per rulottas. Blers dad els vivan da lavurs ambulantas. Per gronda part derivan ils woonwagenbewoners da purs ollandais depauperisads, da lavurers agriculs e chavaturba dal 18avel e 19avel tschientaner. Dapi la fin da la Segunda Guerra mundiala è lur dumber creschì considerablamain, e quai en connex cun la migraziun da lavur ed ils custs per abitar creschents. Tranter els fan els diever da la lingua bargeons che deriva dal neerlandais e che furma ina lingua speziala cumparegliabla en il tudestg cun il rotwelsch u jenic.

La populaziun dals Pajais Bass vala en il fratemp en l’Europa sco ina da las pli pauc religiusas resp. liadas a las baselgias. Bundant la mesadad n’appartegna a nagina cuminanza religiusa e be 18 % inditgeschan da crair en in Dieu. Radund 23,3 % èn catolics e 15 % protestants; ultra da quai datti en il pajais radund 5,7 % muslims, 1,3 % hindus ed 1 % budists (situaziun dal 2005).

Tradiziunalmain appartegneva la gronda gruppa da la populaziun al protestantissem. Tar ils protestants dals Pajais Bass sa tracti surtut da calvinists, tenor il refurmatur Jean Calvin ch’ha operà en il 17avel tschientaner a Genevra. Durant la refurmaziun han ils Pajais Bass er furmà in dals centers dal moviment dals baptists. Instituziunalmain è il calvinissem unì oz ensemen cun ils luterans en la baselgia protestanta dals Pajais Bass.

Il nord ed il vest dal pajais eran tradiziunalmain regiuns protestantas, entant ch’ils catolics furmavan – e furman per part anc oz – la maioritad en il sid e l’ost (per exempel 68 % a Limburg).

Il retg sez è da confessiun refurmada. Pervi da l’organisaziun sinodala da las baselgias calvinisticas na cumpeta al monarc però nagina posiziun da manader religius.

Suenter ch’il Reginavel dals Francs è vegnì dividì l’onn 843, han ils «pajais bass» fatg part dal Reginavel ostrofrancon (Regnum Teutonicum) e silsuenter dal Sontg Imperi roman. Sut l’imperatur Karl V, ch’era a medem temp retg da la Spagna (sco Carlos I), era il territori dividì en deschset provinzas e cumpigliava er la Belgia odierna (cun excepziun dal prinzi-uvestgieu da Lüttich) sco er parts da la Frantscha dal Nord e da la Germania dal Vest.

Sut il successur da Carlos I, Felipe II, ha gì lieu a partir dal 1566 ina retscha da revoltas. Quellas avevan motivs religius, politics ed economics. Felipe II ha tramess il duca d’Alba en ils Pajais Bass cun l’intent da supprimer las sullevaziuns. Ma questa politica da violenza ha be effectuà il cuntrari: l’onn 1572 èn quasi tut las citads da la provinza Ollanda sa messas sin la vart da Guglielm d’Orange-Nassau (Willem van Oranje) che dirigiva la resistenza cunter Alba. En il decurs dals proxims onns èn er las ulteriuras provinzas dals Pajais Bass s’unidas cun ils sullevaturs. 

L’ideal da Willem van Oranje areguard ina coexistenza paschaivla tranter las confessiuns è però ì svelt en stgaglias en vista a las realitads ordvart cumplexas. Il foss tranter ils catolics ch’eran fidaivels a la Spagna ed ils calvinists radicals era memia profund ed ha gì per consequenza che las provinzas calvinisticas Ollanda, Zeeland ed Utrecht èn s’unidas il 1579 ad in’allianza da defensiun, l’Uniun dad Utrecht. Quest contract dueva furmar il document da fundaziun d’in nov stadi, da la Republica dals Pajais Bass unids. L’onn 1581 han ils stadis generals – la radunanza dals stans generala – fatg l’ultim pass cun declerar l’independenza da la curuna spagnola. Quest’acta da renunzia furma l’emprima giada en l’istorgia ch’in retg ch’era vegnì ‹intronisà da Dieu› è vegnì declerà sco destituì. Pir suenter ina guerra dad otganta onns è l’independenza dals Pajais Bass vegnida renconuschida ils 15 da matg 1648 en rom da la Pasch da Vestfalia. Questa data vala sco di da naschientscha dals Pajais Bass odierns, ils quals èn extrads da l’Imperi ensemen cun la Confederaziun svizra. La part meridiunala dals Pajais Bass – la Belgia odierna – è percunter restada tar la Spagna, uschia ch’ils Pajais Bass èn stads dividids da qua davent. 

Silsuenter èn ils Pajais Bass, sco Republica da las set provinzas unidas, sa sviluppads ad ina da las pli grondas pussanzas economicas e maritimas dal 17avel tschientaner. Da quel temp han ins installà en tut il mund posts da commerzi. Quai n’è però betg vegnì inizià dal stadi sez, mabain da las duas emprimas societads acziunaras da l’istorgia, la Cumpagnia ollandaisa da l’India da l’Ost e la Cumpagnia ollandaisa da l’India dal Vest. 

Enconuschenta è er, en l’America dal Nord, la fundaziun da la citad Nieuw Amsterdam che dueva pli tard vegnir renumnada en New York. En l’Asia han ils Ollandais stgaffì lur imperi colonial da l’India Ollandaisa (Nederlands-Indië), l’Indonesia odierna ch’è daventada independenta il december 1949. Er en il nordost da l’America dal Sid han ils Pajais Bass gudagnà colonias. Surinam è daventà il 1975 in stadi independent. Tar il territori statal dals Pajais Bass èn silsuenter be anc restadas intginas inslas en la Caribica.

L’onn 1795 han ins installà cun sustegn franzos la Republica batavica. Il 1806 ha l’imperatur franzos Napoleun I fatg londeror il Reginavel da l’Ollanda. Retg da quel è daventà Louis-Napoléon Bonaparte, in frar da l’imperatur.

L’imperatur Napoleun I n’era però betg cuntent co che ses frar dirigiva il nov reginavel. Il fanadur 1810 ha el perquai schlià il Reginavel da l’Ollanda, integrond ils Pajais Bass en la Frantscha napoleonica.

L’onn 1813, a la fin da l’èra napoloenica, han ils Pajais Bass reacquistà lur independenza. Willem I or da la chasa d’Oranje-Nassau è vegnì declerà prinzi suveran dals Pajais Bass; il 1815 è el daventà retg. Il Congress da Vienna dal 1815 ha agiuntà al Reginavel la part meridiunala dals Pajais Bass, la Belgia dad oz. La finamira era da cunfinar en avegnir la Frantscha en il nord cun in ferm stadi. La constituziun dals Pajais Bass ch’è vegnida relaschada da quel temp è restada en vigur fin oz, schebain cun numerusas midadas. La pli impurtanta da quellas, dal 1848, ha introducì la responsabladad dals ministers, quai ch’ha fullà via al sistem parlamentar.

Ultra da quai ha il Congress da Vienna transfurmà il ducadi da Luxemburg en in gronducadi ed ha attribuì quel a Willem I persunalmain, per cumpensar sias sperditas territorialas en Germania (Nassau-Dillenburg, Siegen, Hadamar e Diez). La part meridiunala dals Pajais Bass ha cuntanschì si’independenza suenter la revoluziun belgica; la renconuschientscha tras Willem I è però pir suandada il 1839.

Dapi il 1815 era il retg dals Pajais Bass er gronduca da Luxemburg, nua che la Lex Salica na lubiva nagin schef da stadi feminin. Laschond enavos Willem III tar sia mort il 1890 be ina figlia (regina Wilhelmina) – ses figls eran gia morts – è il tron luxemburgais vegnì transferì sin in’autra lingia da successiun ereditara entaifer la chasa da Nassau ed il cusrin da Willem, Adolf von Nassau, ha surpiglià la regenza.

Durant l’Emprima Guerra mundiala èn ils Pajais Bass stads uffizialmain neutrals ed han pudì sa tegnair or da las acziuns da guerra. Il pajais ha però tegnì mobilisà las truppas fin la fin da la guerra ed è ultra da quai stà confruntà cun ina gronda unda da fugitivs nà da la Belgia ch’era vegnida occupada da la Germania. Suenter la fin da l’Emprima Guerra mundiala han ils Pajais Bass concedì exil a Wilhelm II, l’imperatur tudestg d’enfin qua.

Er cura che la Segunda Guerra mundiala è prorutta, ha la regenza dals Pajais Bass empruvà l’emprim da sa cumportar a moda neutrala. Hitler però ha cumandà a sias truppas d’invader ils Pajais Bass, la Belgia ed il Luxemburg per pudair occupar la Frantscha guntgind la Lingia da Maginot vers nord. Suenter in cumbat da tschintg dis han las truppas tudestgas sfurzà ils Pajais Bass la saira dals 15 da matg 1940 da sa surdar. Il motiv decisiv per far quest pass è stà il bumbardament da Rotterdam. La famiglia roiala era gia fugida pli baud en l’Engalterra. A partir da quel mument fin l’avrigl 1945 è il pajais stà sut occupaziun tudestga. La Nationaal-Socialistische Beweging (NSB) sut Anton Adriaan Mussert ha collavurà cun las truppas d’occupaziun, senza però cuntanscher in’influenza pli gronda ni entaifer la populaziun ni entaifer l’apparat d’occupaziun. Percunter han ils Pajais Bass tschentà entaifer la Waffen-SS in impurtant contingent da voluntaris da l’exteriur (var 60 000 umens). Suenter l’invasiun han gì lieu las persecuziuns da Gidieus tras ils occupants tudestgs. La chauma dal favrer 1941 cunter las deportaziuns è vegnida rebattida sanguinusamain. Dals radund 160 000 Gidieus dals Pajais Bass a l’entschatta da la guerra e 20 000 fugitivs gidieus vivevan a la fin da la guerra be pli radund 30 000. In dals simbols da la persecuziun dals Gidieus insumma è daventà il cas dad Anne Frank. Er blers Roma e Sinti sesents en ils Pajais Bass èn daventads unfrendas da las deportaziuns en il champ da concentraziun dad Auschwitz-Birkenau.

Ils 11 da schaner 1942 ha cumenzà l’invasiun giapunaisa en l’India ollandaisa. Il prim da mars 1942 han ils Ollandais capitulà. La part meridiunala dals Pajais Bass sezs han las truppas dals Alliads ch’avanzavan vers la Germania liberà durant la segunda mesadad da l’onn 1944; il nord percunter è restà occupà fin la fin da la guerra. Immediat suenter la fin da la guerra han ils naziunalists indonais proclamà ils 17 d’avust 1945 l’independenza. Pir suenter intervenziuns militaras, numnadas «acziuns da polizia», è l’Indonesia vegnida relaschada ils 27 da december 1949 formalmain en l’independenza. Fin il 1954 è anc sa mantegnida in’uniun lucca tranter ils Pajais Bass e l’Indonesia. Als Pajais Bass ha appartegnì fin il 1962 la part occidentala da l’insla Nova Guinea.

Dal 1949 fin il 1963 èn vischnancas da cunfin da la Germania dal Vest (en la regiun da Geilenkirchen-Heinsberg ed Emmerich) stadas sut administraziun ollandaisa. Quai è succedì en rom dals plans d’annexiun ch’ils Pajais Bass han sviluppà suenter la Segunda Guerra mundiala cun l’intent d’incorporar parts da la Saxonia Inferiura e da la part occidentala da la Renania e dal Münsterland. Ma questa finamira, l’uschenumnà plan da Bakker-Schut, n’ha betg sa laschà realisar.

Las experientschas dal temp d’occupaziun han manà ad ina reorientaziun entaifer la politica da l’exteriur dals Pajais Bass. Damai che la politica da neutralitad aveva fatg naufragi, è il stadi s’associà a la NATO ed ha fundà il 1952 ensemen cun la Germania, la Frantscha, la Belgia, il Luxemburg e l’Italia la Communitad europeica da charvun e d’atschal che dueva daventar l’organisaziun precursura da l’Uniun europeica dad oz. L’emprim avevan ils Pajais Bass però prendì en mira exclusivamain finamiras economicas. Per l’ina avevan ins tema ch’in stadi plitost pitschen entaifer in’uniun talmain gronda na possia betg cundecider suffizientamain en dumondas politicas; per l’autra considerav’ins in’Uniun europeica dominada memia ferm da la Frantscha e da la Germania sco smanatscha potenziala per las stretgas relaziuns da l’agen pajais cun ils Stadis Unids. Tradiziunalmain èn ils Pajais Bass numnadamain orientads pli ferm vers l’Atlantic che vers il continent. Ils Pajais Bass èn er sa participads sco stadi fundatur a l’uniun economica dal Benelux. Quella è vegnida planisada gia il 1944, fixada il 1958 e messa en vigur il 1960.

Ils emprims decennis dal suenterguerra èn stads segnads – sco en blers auters pajais da l’Europa dal Vest era – dal miracul economic. Gia il 1950 giaschevan las entradas naziunalas sur il nivel dal temp avant la Segunda Guerra mundiala. Ils Pajais Bass tutgavan da quel temp tar las diesch pli grondas pussanzas economicas dal mund, quai tranter auter grazia a concerns internaziunals sco Royal Dutch Shell, Unilever e Philips. Uschia èsi stà pussaivel, sut l’egida dal primminister Willem Drees, da sviluppar in stadi social segnà da vastas purschidas d’assistenza.

Areguard la situaziun sociopolitica han surtut ils onns 1960 muntà ina profunda cesura. Las differentas ‹pitgas›, vul dir la separaziun stricta dals milieus dals protestants, catolics, liberals e socialists, han cumenzà a sa schliar. Entant che questa vieuta è stada colliada en Frantscha ed en Germania cun confruntaziuns violentas, è ella sa splegada en ils Pajais Bass quasi a la mitta. Uschia n’hai per exempel dà naginas revoltas da students – gia il 1970 ha il parlament a Den Haag deliberà ina lescha davart las scolas autas che concediva als represchentants dals students dretgs da cundecisiun fitg vasts. Il cabinet dal primminister socialdemocratic ha elegì per la perioda d’uffizi dal 1973 fin il 1977 il motto «La fantasia a la pussanza». L’istoriograf James C. Kennedy vegn a la conclusiun: «Analisond la moda e maniera co ch’ils represchentants da las autoritads han tractà las midadas culturalas pon ins be dir: tut respect!» Il pajais ch’era avant segnà d’in calvinissem moralmain rigurus, è uss daventà in propugnatur d’ina societad liberala e pluralistica. Ils Pajais Bass èn per exempel stads in dals emprims stadis ch’han legalisà il consum da pitschnas quantitads da ‹drogas flaivlas› sco haschisch. La relaziun tranter la regenza e l’opposiziun, ma er tranter ils patruns ed ils lavurants era segnada d’ina cultura da consens ch’è daventada enconuschenta sut il term ‹model da Polder›. Quel è vegnì considerà la fin dals onns 1990 sco varianta ollandaisa da la terza via ch’è vegnida propagada dal chancelier tudestg Gerhard Schröder e dal primminister britannic Tony Blair.

Malgrà ils success economics è sa manifestà a l’entschatta dal 21avel tschientaner en la societad ollandaisa in «fluss da malcuntentientscha clandestin» (Christoph Driessen). Quai ha bain divers motivs, ma è tuttavia er d’attribuir ad ina cultura politica che s’orientava permanentamain al criteri da la correctadad politica. Blers burgais han gì l’impressiun che tscherts temas, sco la criminalitad da persunas estras u la mancanza d’integraziun, na vegnian betg discutads avertamain da las elitas politicas. Quant gronda che la malcuntentientscha era daventada, è sa mussà andetgamain la fin da l’onn 2001, sut l’impressiun da las attatgas da terror dals 11 da settember: cun il populist da dretga carismatic Pim Fortuyn è cumparì sin la tribuna politica in politicher da tut auter gener. Entaifer paucs mais è ses moviment sa transfurmà en la partida che cuntanscheva las pli autas cifras tar sondagis da l’opiniun publica. Ma il matg 2002, nov dis avant las elecziuns en il parlament, ha in protectur dals animals fanatic sajettà Fortuyn. Dus onns pli tard ha in ulteriur murdraretsch politic commovì il pajais: il november 2004 ha in giuven ollandais cun ragischs marocanas sajettà il reschissur Theo van Gogh ch’era s’exprimì a moda critica envers l’islam. Quests dus assassinats han manà a debattas fitg intensivas davart il maletg da sasez da la societad ollandaisa. Tut en tut ha l’entschatta dal 21avel tschientaner manà en il pajais ad in spustament a dretga, damai ch’ils temas da Fortuyn e da ses successur Geert Wilders èn er vegnids tractads en autras partidas. 

Dapi l’avrigl 2001 èn admessas en ils Pajais Bass lètgs da medema schlattaina. Cun quai èn ils Pajais Bass stads l’emprim stadi en tut il mund ch’ha surpassà il status dal partenadi registrà da pèrs omosexuals stgaffind in urden da dretg per relaziuns omosexualas.

Cun ina maioritad da 61,6 % han ils Ollandais refusà il 2005 il contract davart ina constituziun per l’Europa. 

Ils Pajais Bass furman ina monarchia parlamentara. Schef da stadi è tenor la constituziun il retg. El nominescha uffizialmain il primminister ed ils ministers che furman ensemen la regenza.

Il parlament, ils ‹stadis generals› (Staten-Generaal), consista da duas chombras. L’emprima sa cumpona dals deputads dals parlaments provinzials, la segunda elegian ils burgais ollandais tenor glistas. Tras quai è la segunda (Tweede Kamer) la chombra la pli impurtanta. Formalmain n’ha il parlament betg da decider davart la cumposiziun da la regenza; facticamain nominescha il retg però ils ministers suenter avair consultà las fracziuns.

La polizia statala (Nationale Politie) è organisada a moda centrala ed occupa radund 63 000 emploiads. La schendarmaria (Koninklijke Marechaussee) dumbra radund 6800 collavuraturs. Organisatoricamain appartegna quest’ultima a las forzas armadas. Sias incumbensas cumpiglian tranter auter la protecziun dals cunfins e da las plazzas aviaticas sco er la protecziun persunala da la famiglia roiala.

Formalmain èn las forzas armadas dals Pajais Bass in’instituziun dal Reginavel dals Pajais Bass e betg be da la part dal pajais Pajais Bass. Damai che la constituziun attribuescha però a la regenza dals Pajais Bass il cumond suprem sur las forzas armadas, suttastattan quellas facticamain a questa part dal pajais. Il servetsch militar obligatoric han ins sistì ad interim il 1996. Tras quai possedan ils Pajais Bass in’armada professiunala. Las expensas per il militar muntan a radund 1,5 % dal PNB (per cumparegliar: Svizra 0,7 %, Germania 1,5 %, Stadis Unids bundant 4 %).

Ils Pajais Bass èn stads in dals stadis ch’han stimulà l’onn 1999 l’introducziun da l’euro sco unitad monetara europeica (en rom dal Contract da Maastricht). Dapi il prim da schaner 2002 è l’euro la valuta uffiziala dal pajais.

En ils Pajais Bass han tranter auter las suandantas instituziuns lur sedia: 

Ils Pajais Bass furman in stadi unitar decentralisà. Sutvart il nivel naziunal èn situadas las provinzas (neerlandais: provincies). Il 1579 hai dà l’emprim set provinzas. Pli tard èn vegnidas vitiers las provinzas Brabant dal Nord e Limburg. Drenthe è medemamain daventà in’atgna provinza e la provinza dominanta Ollanda è sa dividida il 1840 en Ollanda dal Nord ed Ollanda dal Sid. Il 1986 han ins furmà Flevoland sco la provinza la pli giuvna, uschia ch’igl èn actualmain dudesch provinzas.

Savens vegnan las provinzas unidas a quatter gruppas:

Las provinzas sa dividan en stgars 400 vischnancas (gemeenten). In nivel da districts u circuls tranter las provinzas e las vischnancas n’enconuschan ils Pajais Bass percunter betg.

Las provinzas disponan mintgamai d’in parlament (Provinciale Staten) e d’ina regenza (College van Gedeputeerde Staten). Il College sa cumpona dal cummissari dal retg e da represchentants dal parlament da la regenza. En medema moda datti en las vischnancas in cussegl da vischnanca ed ina suprastanza da vischnanca; quest’ultima sa cumpona dal burgamester e da represchentants dal cussegl da vischnanca. 

Ils cumissaris dal retg ed ils burgamesters vegnan designads da la regenza ed elegids tras decret roial, e quai per ordinari a basa da propostas dals parlaments provinzials resp. communals. Blers burgamesters fan carriera en lur mastergn cun far servetsch en pliras vischnancas (mintgamai per ina perioda da sis onns che po vegnir renovada). Tar in burgamester na sa tracti pia betg d’in represchentant dal cussegl da vischnanca u da la populaziun locala. Gia dapi onns datti iniziativas da laschar participar ils abitants da la vischnanca a l’elecziun dal burgamester. 

Dapi il 1986 consistiva il Reginavel dals Pajais Bass da trais pajais: dals Pajais Bass, da las Antillas Ollandaisas e d’Aruba. Aruba aveva survegnì quel onn il status d’in agen pajais. Ils 10 d’october 2010 èn las inslas danovamain vegnidas partidas en da nov:

Ils Pajais Bass disponan d’in sistem economic plitost liberal. Dapi ils onn 1980 ha la regenza reducì tant sco pussaivel sias intervenziuns economicas. La quota da dischoccupaziun giascha sut la media europeica (6,8 % il 2014). 

Entaifer l’industria domineschan la branscha da victualias (Unilever, Heineken), l’industria chemica (AkzoNobel, DSM), las raffinarias da petroli (Shell) sco er la producziun d’apparats electronics (Philips, TomTom, Océ) e da camiuns (DAF). In’impurtanza extraordinaria cumpeta als servetschs. Las grondas interpresas da servetschs da finanzas (ING, Fortis, AEGON), ils ports mundials Rotterdam ed Amsterdam sco er la plazza d’aviaziun Schiphol (Amsterdam Airport) tutgan tar las pli grondas interpresas da servetschs da l’Europa.

L’agricultura è autamain tecnisada ed ordvart productiva. Sper la cultivaziun da granezza, da legums, da fritgs e da flurs da tagl – la cultivaziun da tulipanas dueva schizunt influenzar l’istorgia dal pajais – vegn er tgirada l’economia da latgiras en gronda dimensiun. Quest’ultima furma la basa per la producziun da chaschiel sco impurtant product d’export. L’agricultura occupa be 2 % dals lavurants, ma presta ina gronda contribuziun a l’export. Suenter ils Stadis Unids e la Frantscha furman ils Pajais Bass il terz grond exportader da products agriculs en tut il mund. 

En congual cun il product naziunal brut dals ulteriurs pajais da l’Uniun europeica cuntanschan ils Pajais Bass in index da 126 (situaziun dal 2005).

Ils Pajais Bass disponan da giaschaments da gas natiral che vegnan explotads vastamain en vischinanza da Groningen sco er en la part meridiunala da la Mar dal Nord. Suenter la Russia, ils Stadis Unids, il Canada e la Gronda Britannia èn ils Pajais Bass stads il 1996 il pajais cun la tschintgavel auta explotaziun da gas natiral dal mund (75,8 mrd. m³). Ultra da quai dispona il stadi da reservas da petroli pli pitschnas e da gronds giaschaments da sal. Abstrahà da turba na datti en ils Pajais Bass praticamain naginas ulteriuras ritgezzas natiralas.

Il 2009 ha il budget dal stadi cumpiglià expensas en l’autezza da 410 milliardas dollars ed entradas da 368 milliardas dollars. Da quai resulta in deficit dal budget en l’autezza da 5,3 % dal product naziunal brut.

Ils debits dal stadi muntavan il 2009 a 497 milliardas dollars u 62,2 % dal product naziunal brut.

Il 2006 èn vegnids impundids 9,4 % da las expensas statalas (en procent dal product naziunal brut) per il sectur da sanadad, 5,3 % per la furmaziun e 1,6 % per il militar.

La rait da vias dals Pajais Bass mesira en tut 116 500 kilometers. Las viafiers han ina lunghezza da 2808 kilometers e furman la rait cun la pli auta frequenza en tut l’Europa. Radund 44 % da l’entir transport succeda sin via e 40,5 % sin la viafier.

Ils flums Rain, Maas e Schelde che curran nà da l’exteriur europeic tras ils Pajais Bass vers la Mar dal Nord fan dal pajais in punct central da la navigaziun interna europeica. Sur decennis ha il port da Rotterdam furmà il pli grond port dal mund; il 2004 ha el pers questa posiziun al port da Schanghai, è però restà il pli grond port da l’Europa. Ulteriuras impurtantas citads da port ollandaisas èn Amsterdam, Eemshaven e Vlissingen/Terneuzen.

En ils Pajais Bass sa chattan dus impurtants eroports: Schiphol e Rotterdam-Den Haag. Schiphol furma il pli grond eroport en ils Pajais Bass e gioga er in’impurtanta rolla a nivel internaziunal. El tutga tar ils gronds eroports europeics e sa chatta areguard il dumber da passagiers sin la tredeschavla plazza mundiala.

En l’entir pajais existan trais citads cun in sistem da metro, numnadamain Rotterdam, Den Haag ed Amsterdam.

Fitg derasà en tut il pajais è ultra da quai il velo. Als velocipedists stattan savens a disposiziun agens vials u in’atgna rait da vias. Cun en media 43 morts da traffic ad onn sin in milliun abitants è il traffic en ils Pajais Bass il pli segir da l’entir spazi da l’Uniun europeica. Enconuschents artists d’ulteriuras epocas furman Vincent van Gogh e Piet Mondrian. M.C. Escher ed Otto Heinrich Treumann èn stads enconuschents grafichers.

Architects ollandais han surtut dà impurtants impuls a l’architectura dal 20avel tschientaner. Da menziunar èn Hendrik Petrus Berlage ed ils architects da la gruppa De-Stijl (Robert van ’t Hoff, Jacobus Johannes Pieter Oud, Gerrit Rietveld). Johannes Duiker è stà in represchentant dal moviment modern. Mart Stam è en emprima lingia stà activ en Germania e l’uschenumnada Scola dad Amsterdam (Michel de Klerk, Het Schip) ha contribuì decisivamain a l’architectura expressiunistica.

Er suenter la Segunda Guerra mundiala èn resortids architects innovativs. Aldo van Eyck e Herman Hertzberger han marcà il structuralissem. Piet Blom è enconuschent per sias ‹chasas sin plantas› singularas. Dals architects ch’appartegnan a las tendenzas architectonicas actualas èn da menziunar Rem Koolhaas ed ils biros MVRDV, Mecanoo, Erick van Egeraat e Neutelings-Riedijk.

Scienziads da muntada internaziunala che derivan dals Pajais Bass èn tranter auter Erasmus von Rotterdam, Baruch Spinoza, Christiaan Huygens ed Antoni van Leeuwenhoek. Er René Descartes ha passentà la gronda part da sia perioda activa en ils Pajais Bass. Insumma han numerus scienziads persequitads chattà qua dapi il temp modern tempriv asil e pussaivladads d’activitad.

La sociologia moderna è vegnida fundada ed influenzada decididamain da S. Rudolf Steinmetz. Per la medischina dal temp modern tempriv ha la citad da Leiden furmà in impurtant center. Oz datti en ils Pajais Bass 14 universitads statalas e numerusas scolas autas. A Noordwijk è er staziunada l’Agenzia spaziala europeica (ASE/ESA).

Durant l’epoca d’aur (De Gouden Eeuw) dal 17avel tschientaner n’ha betg be flurì la pictura, mabain er la litteratura. Ils pli enconuschents represchentants da quella èn Joost van den Vondel e Pieter Corneliszoon Hooft.

Tranter il 1942 ed il 1944 ha Anne Frank scrit ses diari che dueva vegnir enconuschent en tut il mund. Durant l’occupaziun dal pajais tras la Germania naziunalsocialistica eran ella e sia famiglia sa zuppads per mitschar da la deportaziun en in champ da concentraziun – la finala adumbatten.

Sco ils trais auturs ils pli impurtants da la segunda mesadad dal 20avel tschientaner valan Harry Mulisch, Willem Frederik Hermans e Gerard Reve. Medemamain enconuschents a l’exteriur èn Maarten ’t Hart, Cees Nooteboom, Jan Wolkers e Hella Haasse.

Entaifer l’epoca da la renaschientscha è er la Scola ollandaisa stada da grond’impurtanza. Quella è però surtut vegnida purtada da Flams, Franzos e d’abitants dal Contadi da Hainaut. La vita musicala ollandaisa sco tala n’ha ditg betg cuntanschì il nivel da l’ulteriura musica classica europeica. Pir vers la fin dal 19avel tschientaner ha gì lieu ina professiunalisaziun ed èn sa furmads orchesters e musicas da chombra. Il pli enconuschent violinist e directur d’orchester contemporan è André Rieu.

Impurtants cumponists ollandais dal temp enturn il 1800 èn per exempel stads Johann Wilhelm Wilms e Carol Anton Fodor ch’èn omadus s’orientads a la classica viennaisa. En il 19avel tschientaner ha surtut la romantica tudestga influenzà la vita musicala, sco che quai sa mussa per exempel tar Richard Hol. Bernard Zweers ha empruvà sco emprim da sviluppar ina musica naziunala specificamain ollandaisa. Ad el èn suandads Julius Röntgen ed Alphons Diepenbrock, cun agid dals quals la musica ollandaisa ha finalmain pudì tegnair pass cun ils svilups musicals internaziunals. Impurtants cumponists dal 20avel tschientaner èn Willem Pijper, Matthijs Vermeulen, Louis Andriessen, Otto Ketting, Ton de Leeuw, Theo Loevendie, Misha Mengelberg, Tristan Keuris e Klaas de Vries.

Golden Earring, bain la band da rock ollandaisa la pli enconuschenta, ha gì ils onns 1970 in grond success cun hits sco ‹Radar Love›. Enconuschentas internaziunalmain eran ils onns 1970 ultra da quai bands sco Ekseption (cun Rick van der Linden), Focus e Shocking Blue. Medemamain naschids en ils Pajais Bass èn Eddie ed Alex Van Halen da la band da hardrock americana Van Halen.

Musicists actuals ch’èn enconuschents a nivel internaziunal èn per exempel Herman van Veen, Robert Long, Nits, Candy Dulfer, Anouk Teeuwe, Ellen ten Damme e Tiësto. Il North Sea Jazz Festival ad Ahoy Rotterdam (pli baud a Den Haag) tutga tar ils pli impurtants festivals da ses gener. 

Dapi intgins decennis è la musica en lingua ollandaisa (nederlandstalige muziek) fitg populara. Il nestor da quest gener è Peter Koelewijn ch’ha gia cumenzà avant 50 onns cun rock’n’roll en sia lingua materna. Pli tard è vegnì vitiers il chantautur Boudewijn de Groot. A l’entschatta dals onns 1980 hai dà in cult da la musica da pop ollandaisa cun Doe Maar, Het Goede Doel u Frank Boeijen. Suenter il 1984 è la popularitad da questa musica sa sminuida per radund diesch onns; alura è suandà in revival che perdura fin oz.

Las pli enconuschentas bands da rock e pop da l’èra pli nova èn Bløf ed il duo Acda en de Munnik ch’è sa fatg in num cun in program d’art pitschen. Anc pli autas cifras da vendita cuntanschan artists da schlagher sco Marco Borsato, Jan Smit e Frans Bauer. Impurtants rappers dals Pajais Bass èn Ali B e Lange Frans. Ultra da quai èn diversas furmas da metal fitg popularas. Enconuschentas bands da quest gener èn Heidevolk, Epica, Within Temptation, Delain, The Gathering u After Forever.

Dapi ils onns 1990 è sa sviluppà en ils Pajais Bass in nov stil da musica ch’è daventà adina pli popular en l’Europa ed en ils Stadis Unids: hardcore techno u gabber. Il trance è arrivà nà da la Germania en ils Pajais Bass ed ha cuntanschì là sia pli gronda popularitad en tut il mund. Dapi intgins onns èn er ils stils successurs jumpstyle, hardstyle e speedcore fitg populars.

Questa furma d’art è ordvart populara en ils Pajais Bass. Er en la conversaziun da mintgadi integrescha la populaziun gugent grapje (pitschnas sgnoccas u spass). Ils gronds maisters dal cabaret suenter la Segunda Guerra mundiala èn stads Wim Kan (cabaret politic), Wim Sonneveld e Toon Hermans sco er Rudi Carrell en Germania.

Las gasettas tradiziunalas las pli impurtantas dal pajais èn ‹De Telegraaf›, ‹AD›, ‹de Volkskrant›, ‹NRC Handelsblad› e ‹Trouw›. Dapi il 1999 vegnan quellas concurrenzadas da diversas gasettas gratuitas; quellas e l’internet han per part manà ad ina ferma diminuziun dals lecturs. Cun ‹De Groene Amsterdammer›, ‹Elsevier›, ‹HP/De Tijd›, ‹Vrij Nederland› cumparan quatter revistas emnilas da caracter politic.

Sco en blers auters pajais europeics differenzieschan ins er en ils Pajais Bass tranter emetturs da dretg public e privats. Tar ils emetturs da dretg public tutgan NPO 1, NPO 2 e NPO 3 sco er BVN per ils Ollandais a l’exteriur. Entaifer ils emetturs privats dominescha la RTL Group. Ils emetturs da dretg public vegnan per gronda part finanziads sur daners da taglia, per part però er sur in sistem da commembranza: oriundamain eran quests emetturs numnadamain vegnids installads da purtaders d’orientaziun ideologica sco la baselgia catolica u organisaziuns da lavurants.

Producziuns americanas u englaisas na vegnan betg sincronisadas (cun excepziun d’emissiuns per uffants), mabain emessas directamain per englais.

Sco sport naziunal vala en ils Pajais Bass il ballape. L’organisaziun precursura da la federaziun da ballape naziunala è vegnida fundada gia l’onn 1889. La squadra da ballape naziunala, che vegn numnada Nederlands elftal u Oranje, tutga tar las pli fermas dal mund. Dapi il 1976 èn ils Ollandais sa participads nov giadas al campiunadi europeic ed han gudagnà l’onn 1988 il titel. Al campiunadi mundial èn els stads preschents dapi il 1934 diesch giadas. Il 1974, 1978 e 2010 èn els daventads segunds, il 2014 terzs.

En il sport motorisà èn surtut enconuschents ils trajects da campiunadi mundial da moto e da speedway sin glatsch ad Assen sco er l’anteriur cirquit da furmla1 a Zandvoort.

En la cuschina tradiziunala ollandaisa prevalan – sco en la cuschina tudestga – tartuffels, legums e liongias (per exempel en il stamppot). Il pli derasads èn frieten u patat, ollandais per pommes frites, cun diversas sosas. Ulteriuras spezialitads èn il gouda (chaschiel) e hollandse nieuwe, ina tratga da peschs.

Enconuschents sur ils cunfins èn er il vla (puding ollandais) e las frikandel (rollas da brassar), plinavant ils kibbeling (buccadinas da peschs che vegnan preparadas sco nuggets da pulaster).

Pervi da la tradiziun sco pussanza maritima èn er influenzas nà da surmar sa fatgas valair en la cuschina ollandaisa. Exempels èn nasibal u bamibal, variaziuns da nasi goreng resp. bami goreng. 




#Article 24: Bulsaun (1327 words)


Bulsaun (tudestg: Bozen, talian: Bolzano, ladin: Bulsan/Balsan/Busan) è ina citad taliana situada en la regiun Trentino-Tirol dal Sid. Bulsaun furma la chapitala da la provinza autonoma Tirol dal Sid. Dapi l’onn 1964 è la citad sedia episcopala da la nova diocesa Bulsaun-Brixen; dapi l’onn 1998 è Bulsaun er citad universitara. La citad cun si’aglomeraziun vala sco in dals gronds centers urbans en las Alps. En pli furma la citad bilingua il cunfin cultural e linguistic tranter tudestg e talian.

Bulsaun giascha a la cruschada da duas transversalas alpinas. La Val da l’Eisack maina en il nordost sur Brixen en direcziun dal Brenner e vinavant a Puntina ed Augsburg respectivamain Minca. Vers nordvest maina la part superiura da la Val da l’Adisch a Meraun e da là sur il Vnuost en direcziun Vuclina / Val Müstair respectivamain sur il Pass da Raisch en direcziun Landeck. Vers sid maina la via sur la part sut da la Val da l’Adisch a Trentino e vinavant sur Verona a Brescia / Bergamo en il vest respectivamain sur Vicenza e Padua en l’ost enfin Venezia. Questa situaziun topografica ha posiziunà la citad da vegl ennà sco center d’ina rait da vias da muntada surregiunala.

Ils bundant tschientmilli abitants da Bulsaun sa repartan sin ils suandants tschintg districts da la citad: Zentrum-Bozner Boden-Rentsch (Centro-Piani-Rencio), Oberau-Haslach (Oltrisarco-Aslago), Europa-Neustift (Europa-Novacella), Don Bosco e Gries-Quirein (Gries-San Quirino). Quests districts cumpiglian mintgamai differents quartiers istorics ed anteriuras vischnancas autonomas. Da muntada èn stadas en spezial las incorporaziuns da Zwölfmalgreien (1911) e da Gries (1925). 

La citad da Bulsaun cunfinescha cun las suandantas vischnancas: Deutschnofen, Eppan an der Weinstraße, Jenesien, Karneid, Laives, Ritten, Sarntal, Terlan e Vadena. Sin las spundas enturn la citad giaschan differents aclauns ch’èn per part accessibels sur telefericas (p.ex. la funiculara da Kohlern). En pli vala Bulsaun sco portal d’entrada per las Dolomitas che giaschan en l’ost da la citad.

En il temp preistoric era la foppa da Bulsaun palidusa e betg abitabla, ma las zonas enturn la citad odierna eran gia colonisadas. Cur che Drusus ha conquistà las Alps l’onn 15 a.C. ha el fundà la colonia romana da Pons Drusi (Punt da Drusus), documentada sin la Tabula Peutingeriana dal quart tschientaner s.C. La colonia romana sa chattava en vischinanza dal dom dad oz. Or da la lingua originara ed il latin vulgar è sa sviluppà in idiom ladin ch’è sa mantegnì en la regiun enfin tar la migraziun dals pievels.

Cun la migraziun dals pievels en il 7avel tschientaner è la regiun da Bulsaun daventada in contadi bajuvar ch’appartegneva ecclesiasticamain a l’uvestgieu da Trento. (En il temp autmedieval era il Tirol dal Sid dividì en las diocesas da Trento cun la regiun da Bulsaun en il sid, da Brixen cun la Val da l’Eisack e la Val da Puster en il nord e da Cuira cun Meraun ed il Vnuost en il vest). 

Durant il temp medieval è Bulsaun daventà in impurtant center da martgà. Il center da la citad veglia dad oz è naschì en il 11avel tschientaner e l’onn 1265 ha Bulsaun obtegnì il dretg da citad. L’onn 1300 dumbrava la citad 3000 abitants. Fin en il 13avel tschientaner furmava Bulsaun la chapitala dal contadi cun il medem num, suenter è la citad daventada part dal Contadi dal Tirol. L’onn 1363 è il Contadi dal Tirol daventà territori dals da Habsburg. (Il num Tirol deriva dal chastè dal medem num situà en vischinanza da Meraun. Quel furmava la residenza dals regents enfin che quella è vegnida translocada a Puntina en il decurs dal 15avel tschientaner). Ils proxims tschientaners è la muntada da Bulsaun sco center da traffic e da martgà anc creschì, e quai en disfavur da Meraun e dad auters lieus da fiera. L’uschenumnà ‹magistrat mercantil›, relaschà da la regenta dal Tirol Claudia de Medici l’onn 1635, ha anc rinforzà ils privilegis da martgà da la citad. La muntada surregiunala da las fieras da Bulsaun è sa persa plaun a plaun durant il 19avel tschientaner. 

Durant las Guerras da coaliziun è Bulsaun vegnì integrà ensemen cun l’entir Tirol dal Sid ed il Trentino en il Reginavel talian (1810). Il center dal departament Haut-Adige furmava da quel temp Trento; il privilegi da martgà da Bulsaun era vegnì stritgà. Suenter la disditga da Napoleun è l’entir territori puspè returnà en l’Imperi da l’Austria-Ungaria (1814).

Il naziunalissem creschent da la segunda mesadad dal 19avel tschientaner ha be anc rinforzà la schientscha ‹tudestga› en il Tirol dal Sid. En quest connex stat l’erecziun dal monument da Walther von der Vogelweide sin la plazza centrala da Bulsaun l’onn 1889. (La teoria ch’il lieu da naschientscha dal poet medieval sa chattia en il Tirol dal Sid vegn dentant refusada oz da la scienza.) Il 19avel tschientaner è plinavant marcà da l’industrialisaziun da Bulsaun e dad in’emprima unda da turissem cun il lieu da cura Gries sco center. 

Suenter la terrada da l’Austria-Ungaria cunter l’Italia en l’Emprima Guerra mundiala ha l’Italia annectà l’onn 1918 Bulsaun ed il Tirol dal Sid. Durant il faschissem è la citad vegnida italianisada. Quest svilup ha culminà en il pact tranter Mussolini e Hitler e l’uschenumnà temp d’‹opziun› tranter 1939-1943: las persunas da lingua tudestga en la citad ed en tut il Tirol dal Sid han stuì tscherner tranter l’assimilaziun rigurusa u l’emigraziun. Las consequenzas da questa politica sa fan valair enfin en il temp preschent. Oz è Bulsaun ina da las tschintg vischnancas dal Tirol dal Sid cun maioritad italofona. (Il svilup demografic mussa che la cumpart da la lingua taliana en il Tirol dal Sid è creschida successivamain a partir dal 1910; il punct culminant marchescha l’onn 1961 cun 35 %; oz giascha la cumpart tar 25 %).

Suenter che l’Italia è entrada en la Segunda Guerra mundiala da vart da la Germania è Bulsaun daventà la chapitala da l’uschenumnada Zona d’operaziuns da la regiun prealpina naziunalsocialistica. Resistenza cunter il naziunalsocialissem è vegnì punì en plirs cas cun violenza massiva. Il matg 1945 è la citad la finala vegnida liberada da truppas americanas.

Er suenter las Guerras mundialas è Bulsaun e tut il Tirol dal Sid restà ina part da l’Italia. En rom dals contracts fatgs a la fin da la Segunda Guerra mundiala a Paris era bain vegnì stipulà in status d’autonomia per il Tirol dal Sid e per las vischnancas germanofonas dal Trentino. L’Italia ha dentant collià las duas regiuns tar ina provinza dominada dals italofons. Quai ha manà a partir dal 1957 ad acts terroristics. Ils iniziants dals attentats vegnivan numnads dals germanofons Südtirolaktivisten, entant che la part taliana als condemnava sco terroristi sudtirolesi. Dapi l’onn 1972 furma Bulsaun la chapitala da la regiun autonoma Tirol dal Sid e la violenza è tschessada.

Bulsaun giascha sper l’autostrada dal Brenner ed è tras quai colliada vers nord e vers sid cun la rait europeica d’autostradas. Sur l’autostrada dal Brenner pon ins cuntanscher directamain Innsbruck, Minca, Milaun, Venezia e Roma. Il medem vala per la viafier sur il Brenner. Tar las viafiers regiunalas è da menziunar en spezial la prolungaziun da la viafier Bulsaun-Meraun tras il Vnuost fin a Mals al cunfin da la Val Müstair. Suenter che questa lingia era vegnida serrada l’onn 1990 tras la Viafier statala taliana, ha la regiun Tirol dal Sid surprendì l’infrastructura, sanà quella da rudent e puspè mess en funcziun la viafier l’onn 2004. En pli posseda Bulsaun ina plazza aviatica cun sgols directs a Roma.

Dapi l’onn 1998 è Bulsaun ina citad universitara. La Freie Universität Bozen porscha divers studis trilings (tudestg, talian ed englais). La fundaziun da l’universitad ha er gì effects positivs sin la gastronomia e la purschida culturala da la citad.

Bulsaun cun ses center medieval, sias baselgias goticas e romanas e la bilinguitad sco ensaina porscha il flair tut spezial d’ina citad situada a la cruschada da la cultura taliana ed austriaca. Quai e las attracziuns culturalas e natiralas fan da la citad ina destinaziun attractiva per visitaders. Tar las attracziuns principalas da la citad tutgan:




#Article 25: Radiotelevisiun Svizra Rumantscha (238 words)


La Radiotelevisiun Svizra Rumantscha (enfin ils 31 da december 2010 Radio e Televisiun Rumantscha) è in'organisaziun da communicaziun per emetter emissiuns rumantschas.

Ils 17 da schaner 1925 vegn emessa l'emprima contribuziun da radio rumantscha. L'iniziant da quest'emissiun è Felix Huonder. Las emissiuns rumantschas regularas cumenzan l'onn 1943. Las Cristallas, la radioscola rumantscha, vegn emessa ils 27 da schaner 1955. Per far emissiuns rumantschas stattan a disposiziun CHF 144'302.50 en 1966.

Il Balcun Tort, l'emprima contribuziun da la televisiun rumantscha, vegn emessa ils 17 da favrer 1963. Quest'emprima contribuziun ha commemorà l'anniversari da 25 onns rumantsch sco quart linguatg naziunal da la Svizra. La Societad Svizra da Radio e Televisiun ha schlargià ils davos onns il Radio e la Televisiun Rumantscha a meds da massa electronics rumantschs impurtants. Dapi 1992 è vegnida dotada la societad purtadra, la SRG SSR Svizra Rumantscha (SRG.R) cun il status e las cumpetenzas da la quarta regiun linguistica da la SSR. Il studio regiunal Grischun, sco residenza da l'organisaziun da program professiunala (RTR), è daventà in'unitad d'interpresa independenta da la SSR.

Emissiuns ch'il Radio e la Televisiun Rumantscha offreschan sco Podcast san ins copiar e tadlar sin il computer sco document. Attractiva è questa pusseivladad spezialmain per copiar las emissiuns sin in MP3-Player mobil. Uschia pon ins tadlar las emissiuns cura e nua ch’ins vul. Cuntrari al Download normal d'ina emissiun vegn il service da Podcast offerì en abunament. Emissiuns novas survegn ins automaticamain.




#Article 26: Lia da la Chadé (118 words)


 
Inimis dal uvestg da Cuira han fundà la Lia da la Chadé (u Chasa da Dieu) il 1367, per tegnair a mastergn l'autoritad da l'uvestg.

Il concluss dalla Lia da la Chadé era, dad evitar la aquisaziun dalla diocesa da Cuira entras la casa dils Habsburgs. Ella ei vegnida fundada ils 29 da schaner 1367 a Cuera. Il document ei vegniu suttascrets dil capitel dalla catedrala,dils mistrals episcopals,dil marcau da Cuira e dallas dertschiras episcopalas dalla Tumleastga,dalla Val Schons,dil Surmeir, l'Engiadina Aulta/Bassa, Bregaglia.Pli tard ein aunc auteras dertschiras suandai, co p.ex. 1408 Puschlav e 1450 ils tschun cumins. L'Engiadina Bassa, Val Müstair e Vnuost eran ditg en discussiun denter il contadi dil Tirol e la diocesa da Cuera.




#Article 27: Societad Svizra da Radio e Televisiun (665 words)


La Societad Svizra da Radio e Televisiun (SSR) è in'uniun tenor l'artitgel 60 ss. dal Cudesch civil svizzer cun sedia a Berna ed organisaziun purtadra da l'interpresa da meds da massa la pli gronda en Svizra. Sia purschida sa referescha principalmain al public svizzer. La SRG SSR lavura sut ina concessiun speziala da la Confederaziun ch'affida ad ella incumbensas vastas en servetsch dal public general («service public»).

A partir dal 1999 è la Societad Svizra da Radio e Televisiun sa preschentada cun il num da fatschenta SRG SSR idée suisse, nua che SRG ed SSR stattan per ils nums uffizials da l'uniun en ils quatter linguas naziunalas ed idée suisse per il concept svizzer dal service public. Cun la davosa restructuraziun ch'è vegnida effectiva il 1. da schaner 2011 han ins allontanà l'agiunta idée suisse dal num da fatschenta e sa preschentà sin plaun surregiunal mo sco SRG SSR. Sin plaun regiunal han ins «reactivà» ils nums tradiziunals en las linguas da las quatter regiuns linguisticas svizras.

La Societad svizra da radio e televisiun è in'associaziun dad uniuns da la quala mintgin po daventar commember. Quest'associaziun dad uniuns furma luniun purtadra da la SRG SSR. Ella funcziuna sco punt tranter il public e l'interpresa. Ils commembers prendan influenza sin la SRG SSR sco ils acziunaris dad ina societad d'aczias.

L'uniun purtadra da la SRG SSR sa cumpona da quatter societads regiunalas ch'en la Svizra tudestga e franzosa èn puspè divididas en singulas cuminanzas da commembers. Questas cuminanzas da commembers pon esser sutdivididas plinavant en secziuns. Las societads regiunalas da la SRG SSR èn las suandantas:

Ils organs da l'associaziun sin plaun naziunal èn:

A la radunanza da delegads ed al cussegl d'administraziun sin plaun naziunal correspundan en las societads regiunalas ils cussegls regiunals e lur cussegls d'administraziun. Ulteriurs organs èn ils cussegls dal public ed ils servetschs da mediaziun elegids dad els.

L'interpresa SRG SSR vegn dirigida da la direcziun generala sut la presidenza dal directur general ed il cussegl d'administraziun. Ad ella suttastattan las uschenumnadas unitads d'interpresa. Dapi il 2011 èn quai:

Las duas unitads d'organisaziun naziunalas «Media Services» (MSC) e «Business Unit Sport» (BUS) èn organisaziuns autonomas ch'executeschan prestaziuns da servetsch per la SRG SSR.

Ultra da quai appartegnan a l'interpresa SRG SSR las suandantas societads affiliadas (stan 2011):

Schebain che la SRG SSR è in'uniun da dretg privat ed in'interpresa independenta retschaiva ella sper la concessiun da la Confederaziun (necessari per tut ils meds da massa electronics) er in'incumbensa legala clera per l'uschenumnà «service public». Quai vul dir che la SRG SSR è responsabla per proveder tut las regiuns linguisticas cun in provediment d'infurmaziuns garantì ed in program da divertiment, educaziun e cultura. Per garantir quai retschaiva ella ina gronda part da las entradas da las taxas da recepziun (70 %) che vegn pretaisas da la Billag.

La SRG SSR e sias unitads d'interpresa produceschan 17 emetturs da radio e set emetturs da televisiun.

Ils 17 da favrer 1999 ha il Cussegl federal dà a la SRG SSR idée suisse la concessiun da crear ina rait da DAB en Svizra. Il medem onn han ils emprims emetturs en la regiun gronda da Berna-Soloturn cumenzà dad emetter programs. Ils onns 1999 e 2000 suondan las regiuns Interlaken-Berna-Bienna e Baden-Turitg-Winterthur sco era la regiun dal Lai da Genevra e l'aglomeraziun da Basilea. Dapi l'onn 2001 vegnan era las pli impurtantas axas da traffic ost-vest (incl. ils tunnels gronds) e parts da l'axa nord-sid provedì cun DAB. Actualmain (stan 2007) pon 80 % da la populaziun svizra retschaiver il radio digital DAB. Per il 2009 è prevedì la cuverta da la Svizra entira cun emissiuns en DAB.

La SRG SSR emetta en ils trais regiuns linguistics mintgamai in agen ensemble da 9 fin 11 emetturs.

Ils indrizs da transmissiun tras ils quals las chanals da la SSR vegnan emessas appartegnan dapi l'entschatta 2002 a la Swisscom Broadcasting (l'anteriura PTT), ch'è era responsabla per il funcziunament dals implants. Ils indrizs da transmissiun ils pli enconuschents èn:




#Article 28: Internet (3718 words)


L’internet (dal pled englais internetwork, furmà dal prefix inter e da network u curt net), en la lingua da mintgadi er rait, è ina colliaziun mundiala da raits da computers autonomas. El furma la basa per far diever da servetschs d’internet sco www, e-mail, Telnet, Usenet u FTP. La rait pussibilitescha a mintga computer da sa colliar cun mintga auter computer. Il barat da datas tranter ils computers ch’èn colliads in cun l’auter sur l’internet succeda a basa dals protocols d’internet ch’èn normads tecnicamain. La tecnica da l’internet vegn descritta en ils RFCs (Request for Comments) da l’Internet Engineering Task Force (IETF).

La derasaziun da l’internet ha influenzà blers champs da la vita a moda fundamentala. En l’economia ha questa nova tecnologia effectuà in stausch da modernisaziun e manà a la furmaziun da novs secturs economics. Er il cumportament da communicaziun ed il diever da las medias en il mund professiunal e privat èn sa midads dal tuttafatg. La muntada culturala da quest svilup vegn per part cumparegliada cun l’invenziun da la stampa da cudeschs en il 15avel tschientaner.

Il term ‹neutralitad da la rait› designescha il fatg che tut las datas vegnan tractadas (vul dir transportadas) en l’internet a moda eguala, pia independent da lur cuntegn, dal speditur u dal destinatur. 

Il term ‹internet› è in anglicissem. El è sa sviluppà en il decurs dals onns 1970 e 1980 sco furma curta dad internetwork. Sut quest term tecnic vegnivan tschertgadas da quel temp pussaivladads da colliar raits da computer existentas ad in sistem pli vast. Da la denominaziun generala englaisa per in internetwork u internet è sa derasà il pled ‹internet› sco num propri per la pli gronda rait da quest gener ch’è sa sviluppada da l’Arpanet. En quel mument che l’internet è daventà adina pli popular, èn er ils terms ‹internet› e ‹rait› entrads en la lingua da mintgadi. La noziun ‹rait› na sa referescha en l’informatica però betg exnum a l’internet, mabain po er designar autras colliaziuns da computers, sco per exempel la rait interna (intranet) d’ina firma.

En differentas linguas hai dà emprovas da remplazzar l’anglicissem ‹internet› tras agens neologissems (sco per exempel ‹Weltnetz› per tudestg). Savens n’han questas variantas però betg pudì s’etablir en la populaziun, uschia che ‹internet› è daventà – analog a quai ch’il pled descriva – in term mundial. 

L’internet è sa sviluppà da l’Arpanet, in project ch’era vegnì inizià il 1969 da l’Advanced Research Project Agency (ARPA), ina partiziun dal Ministeri da defensiun dals Stadis Unids. L’Arpanet è vegnì sviluppà per colliar universitads ed instituts da perscrutaziun. Oriundamain vulev’ins trair a niz a moda pli effizienta las stgarsas resursas da quintar dals calculaturs gronds, l’emprim en ils Stadis Unids, pli tard en tut il mund. Ils computers eran colliads in cunter l’auter sur Interface Message Processors che surpigliavan la communicaziun da rait en furma da transmissiun da pachets (englais packet switching). Ils protocols che vegnivan duvrads per quest intent na sa laschavan però betg applitgar bain en ambients eterogens, damai ch’els eran vegnids optimads per in medium da transmissiun specific. Vint Cerf e Bob Kahn han sviluppà ils onns 1973/1974 ina versiun tempriva da TCP, per er pudair colliar ina cun l’autra raits d’auter gener. Ils proxims onns èn quests protocols vegnids sviluppads vinavant ed èn vegnids enconuschents sco TCP/IP.

Tenor ina legenda fitg derasada duaja la finamira oriunda dal project esser stada da stgaffir durant la Guerra fraida in sistem da communicaziun decentral per pudair garantir ina communicaziun senza incaps en cas d’ina guerra atomara. En realitad èn però vegnids promovids da l’entschatta ennà surtut projects civils, cumbain che l’ARPA ha finanzià ils emprims puncts da colliaziun.

La pli impurtanta applicaziun ha furmà da l’entschatta ennà l’e-mail. L’onn 1971 era il volumen dad e-mails pli grond che l’entir volumen dals ulteriurs protocols da l’Arpanet (Telnet e FTP).

L’onn 1981 èn vegnids specifitgads ils protocols dad IPv4, ICMP e TCP (en furma dals RFCs 790 fin 793). Dapi il 1983 valan questas novas directivas per tut ils hosts (sistems da calculaturs che mettan a disposiziun a clients servetschs); fin oz furman ellas il fundament da la gronda part da las colliaziuns en l’internet. Cun la midada dals protocols da l’Arpanet sin l’Internet Protocol (IP) è er daventà popular il num ‹internet›.

A l’entschatta è la derasaziun da l’internet stada colliada fermamain cun il svilup dal sistem operativ Unix. E grazia al DNS (Domain Name System) èsi stà pussaivel a partir dal 1984 da contactar computers en tut il mund sur nums che sa laschan memorisar bain.

L’internet è sa derasà sur adina dapli universitads ed adina pli fitg er sur ils cunfins dals Stadis Unids ora. Là ha l’Usenet chattà vasta derasaziun ed igl èn er sa sviluppadas emprimas reglas da cumportament (Netiquette), quai che po valair sco in emprim indicatur per in svilup vers ina ‹cibercultura›.

L’onn 1990 ha la National Science Foundation dals Stadis Unids decidì d’avrir l’internet per intents commerzials, uschia che quel è daventà accessibel er ordaifer las universitads. Tim Berners-Lee ha sviluppà enturn l’onn 1989 al CERN a Genevra ils fundaments dal World Wide Web. Ils 6 d’avust 1991 ha el fatg enconuschent ed accessibel quest project d’in servetsch d’ipertext cun plazzar sur Usenet ina contribuziun en la newsgroup ‹alt.hypertext›.

Ina derasaziun rasanta da l’internet ha gì lieu a partir da l’onn 1993. Lura è vegnì publitgà Mosaic, l’emprim navigatur-web che na sa basava betg pli mo sin text, mabain era er abel da mussar grafica. Quest navigatur pudevan ins telechargiar gratuitamain e duvrar per visualisar cuntegns dal www. Surtut tras la firma AOL e sia ‹Software Suite› èn las purschidas commerzialas ed il dumber d’utilisaders creschids marcantamain. Damai ch’il navigatur-web ha stuschà a l’ur tut l’auter, vegn el er numnà l’‹applicaziun assassin› da l’internet. L’internet è sa sviluppà ad in catalisatur essenzial da la revoluziun digitala.

A partir dal 1995 èsi sa mussà ch’il dumber d’adressas IP vegnia bainbaud ad ir a fin. Perquai han ins publitgà il december 1995 emprimas specificaziuns dad IPv6 e laschà suandar a partir dal 2011/12 als davos vegls blocs d’adressa tenor IPv4 ils novs tenor IPv6.

Cun plattafurmas da social media sco Facebook, Twitter u YouTube è il barat da cuntegns bidirecziunal tranter ils utilisaders daventà adina pli impurtant (uschenumnà user-generated content). Cuntrari a pli baud succeda quai uss sur plattafurmas centralas terminadas, faschond diever d’in navigatur-web. Il term web 2.0 signifitga er ch’il web daventa pli interactiv ed integrescha adina dapli elements dad audio e video.

In ulteriur svilup è collià cun la vasta derasaziun da telefonins e tablets che rendan adina pli impurtantas applicaziuns e servetschs accessibels a moda mobila (p.ex. pussaivladads d’arcunar e da retschaiver datas independentamain dal computer a chasa u en biro).

L’internet è adattà per communitgar en scrit sur grondas distanzas spazialas e temporalas. El integrescha en sias furmas scrittas aspects multimedials (emoticons, elements dad audio e video e.a.). En pli èn las furmas scrittas en l’internet suttapostas a midadas cuntinuantas ed èn caracterisadas tras quai ch’ellas na pretendan betg d’esser terminadas u definitivas. Ils products scrits en l’internet sa laschan midar sveltamain e pretendan dals cumpiladers ed utilisaders da pudair s’adattar permanentamain a novas situaziuns e novs cuntegns. Ina da las atgnadads centralas da l’ipertext è er si’abilitad da sa colliar sur links interns u externs e da rumper uschia la linearitad ch’era caracteristica per texts tradiziunals. 

Las atgnadads textualas da l’internet en cumbinaziun cun las pussaivladads da las raits socialas han manà al svilup d’ina atgna cultura da la rait che sa manifestescha en diversas furmas linguisticas/communicativas sco er artisticas (t.a. projects interactivs/participativs).

Blers experts considereschan l’internet sco ina da las pli grondas midadas entaifer il barat d’infurmaziuns dapi l’invenziun da la stampa da cudeschs. La nova Revoluziun digitala ha grondas influenzas sin praticamain tut ils champs da la vita.

Gia a l’entschatta dals onns 1980 eran sa sviluppadas raits da mailbox che sa basavan sin il transferiment da datas a lunga distanza cun agid da la rait da telefon. Analog a las raits da TCP/IP ch’èn ditg stadas reservadas per las universitads, era er questa tecnologia accessibla be ad experts. Cun la derasaziun commerziala da l’e-mail sur l’internet a l’entschatta dals onns 1990 e cun la vasta diffusiun dal World Wide Web a partir da la mesadad dals onns 1990 è l’internet lura daventà pli e pli il standard per distribuir infurmaziuns da tut gener.

A l’entschatta è surtut vegnì fatg diever da l’internet per la communicaziun via e-mail e per preschentar sasez (persunas singulas e firmas). Pli tard duevan funcziuns sco Instant Messaging pussibilitar ina communicaziun quasi senza retardament. E servetschs sco MySpace u Facebook lubeschan da crear vastas raits socialas. Da l’autra vart mussan attatgas da spam che la tecnica n’è anc ditg betg preparada sin tut ils fenomens che pon esser colliads cun questas applicaziuns.

En rom da la New Economy vers la fin dal 20avel tschientaner è lura vegnì instradà il commerzi online. Grazia a las ratas da transmissiun da datas creschentas ed ils pretschs d’access a l’internet adina pli bass (sistem da flatrate: pauschala senza limita dal temp u da la quantitad da datas) serva l’internet adina dapli er a derasar pli grondas quantitads da datas. Cun quai èn savens colliadas violaziuns dal dretg d’autur (films, musica, software e.a.); a talas dumondas è lura er deditgada ina buna part da la legislaziun da l’internet.

Er il schurnalissem online daventa adina pli impurtant e furma oz ina gronda concurrenza per ils meds da massa classics. Observaturs constateschan ultra da quai ch’ils utilisaders da l’internet sa sviluppeschan adina pli fitg dal consument da medias passiv a commentaturs ed auturs activs (user-generated content). Tras quai daventa la cultura da la rait, ch’aveva a l’entschatta in accent plitost tecnic, adina pli vasta e cumpiglia tematicas da tut gener. Tras l’internet svaneschan cunfins geografics e vegnan remplazzads tras gruppas che s’orienteschan a tematicas ed interess communabels. Damai che l’internet porscha funtaunas d’infurmaziun bler pli vastas ch’enfin qua, daventa la cumpetenza da medias in’abilitad adina pli impurtanta.

En il context politic vegn l’internet savens resguardà sco territori senza dretg, damai che leschas naziunalas paran strusch d’esser applitgablas pervi da la structura internaziunala e l’anonimitad da l’internet. Insumma han las autoritads statalas en tut il mund gì sur lung temp be enconuschientschas marginalas davart las funcziuns e pussaivladads da l’internet ed èn er stadas surdumandadas areguard l’applicaziun da las leschas. Quai è pir sa midà a partir dal svilup da la New Economy vers il 1998. Leschas èn vegnidas adattadas e foras en la giurisdicziun èn vegnidas serradas (almain de jure). Ch’il stadi prenda adina dapli influenza vegn per part beneventà sut l’aspect da la segirezza giuridica, per part però er crititgà sco svilup vers in stadi survegliader. 

Dapi la vasta derasaziun da l’internet vegn er adina puspè tematisada la dependenza da l’internet. Schebain in diever excessiv da l’internet saja nuschaivel e possia manar ad ina situaziun da dependenza, è contestà scientificamain. Probablamain vegnan be studis a lung temp a pudair respunder a las dumondas che sa tschentan en quest connex.

La Cumissiun europeica ha planisà da lantschar ina charta globala da l’internet. Las regulaziuns previsas duain servir sco lingia directiva areguard dumondas da segirezza, protecziun da datas e la codaziun; la finamira è da simplifitgar affars internaziunalas. 

L’internet sa cumpona da raits administradas independentamain ina da l’autra, las qualas vegnan colliadas ad ina unitad pli gronda. Tar las singulas raits sa tracti per gronda part da:

Las colliaziuns tranter questas raits, che furman en sasez la part essenziala da l’internet, sa cumponan tant a nivel continental sco er intercontinental da cabels da fibra da vaider. Quels porschan immensas capacitads da transmissiun ed èn vegnids mess sur ils onns en grond dumber tant per terra sco er tras las mars per pudair dar dumogn al traffic da datas creschent. Ultra da quai ha la tecnica d’alimentar las fibras cun glisch fatg gronds progress, uschia che la rata da transmissiun pussaivla è creschida immens; perquai posseda l’internet per part surcapacitads areguard la prestaziun da la rait. Tenor calculaziuns èn vegnids duvrads il 2005 be 3 % da las fibras da vaider che stattan a disposiziun tranter citads europeicas u dals Stadis Unids. La structura globala da l’internet cumpiglia er satellits ed ina rait da radis dirigids, ma la cumpart da quels è bler pli pitschna.

Per la ‹davosa miglia›, pia per la colliaziun cun las singulas chasas, vegn savens fatg diever dal conduct d’arom da l’attatg da telefon u da televisiun; adina dapli succeda quest davos pass er sur staziuns radiofonicas, cun agid da WLAN u UMTS. Fibras da vaider fin en chasa (FTTH) n’è percunter anc betg fitg derasadas. L’access da persunas privatas a l’internet succeda sur in sistem da transmissiun digital a spectrum graschel (p.ex. per modem u ISDN) u lartg (p.ex. modem a cabel u UMTS) d’in provider da servetschs d’internet. Firmas u instituziuns statalas èn percunter savens colliads sur lingias permanentas cun l’internet.

Computers en chasadas privatas vegnan savens duvrads per retschaiver servetschs da l’internet, senza però furnir atgnas purschidas e senza esser cuntanschibels permanentamain. Tals computers (persunals) vegnan numnads calculaturs da client. Tar servers sa tracti percunter da calculaturs che furneschan surtut servetschs d’internet. Quels sa chattan per regla en in center da calculaziun e disponan da colliaziuns fitg spertas; las localitads èn climatisadas ed ils sistems èn protegids cunter interrupziuns dal current e da la rait. Applicaziuns peer-to-peer pussibiliteschan però era a calculaturs da client da furnir per curt temp servetschs ad auters computers che fan part da la medema colliaziun. En quest cas na vala la differenziaziun tranter client e server betg pli en il stretg senn dal pled. 

Las differentas raits localas (raits da backbone) sa cruschan en puncts centrals dal traffic d’internet. Qua èn ellas colliadas ina cun l’autra sur colliaziuns ed apparaturas (routers e switches) ad auta prestaziun; en pli vegnan organisadas e coordinadas en quests puncts las singulas raits e la circulaziun da datas. Savens èn tals puncts centrals da lur vart dependents da servetschs da servers surordinads; be paucs puncts centrals il pli sisum da l’ierarchia da mintga pajais èn independents d’in uschenumnà provider dad upstream.

Ma er quests puncts centrals ils pli impurtants na mettan betg en dumonda in dals princips ils pli fundamentals da l’internet, numnadamain la structura decentrala da la rait. Gia tar la planisaziun da ses predecessur Arpanet avev’ins da pais d’evitar in calculatur central nua che tut las colliaziuns fissan vegnidas ensemen. Grazia a questa structura decentrala ed eterogena è l’internet fitg resistent cunter interrupziuns: Per la communicaziuns tranter dus utilisaders existan normalmain pliras vias pussaivlas sur divers routers che lavuran a basa da differents sistems operativs; pir en quel mument che las datas vegnan effectivamain tramessas, vegn decidì tge via prender. Uschia pon pachets da datas che vegnan tramess in suenter l’auter ir differentas vias; ed il medem vala er per ina dumonda e la resposta. Relevanta è adina la chargia actuala e l’accessibladad da las singulas vias pussaivlas. Uschia n’ha in’interrupziun en la part centrala da l’internet praticamain nagina influenza negativa sin ina singula transmissiun; be disturbis u interrupziuns en la periferia (‹davosa miglia›) na sa laschan betg pli equilibrar, damai ch’i na dat qua nagina via alternativa.

L’internet sa basa sin famiglias da protocols d’internet che regleschan l’adressa ed il barat da datas en furma da standards averts:

Il protocol ch’attribuescha a mintga calculatur ch’è integrà en l’internet in’adressa singulara sa numna Internet Protocol (IP). La communicaziun a basa da quest protocol na s’orientescha betg, sco tar il telefon, tenor la colliaziun, mabain tenor il pachet. Quai signifitga che las datas vegnan transmessas en pachets d’ina grondezza da fin ca. 65 000 bytes (il pli savens però da be 1500 bytes), ils quals cuntegnan mintgamai l’adressa dad IP sco infurmaziun tant davart il speditur sco er davart il destinatur. Arrivadas al lieu, vegnan las datas or dals pachets puspè messas ensemen tenor ina successiun predefinida. In grond avantatg da l’Internet Protocol è ch’ils pachets vegnan transmess independentamain dal sistem d’operaziun e da las differentas tecnicas da rait. Ins po cumparegliar quai cun in container da transport normà che vegn transportà en il traffic da martganzia in suenter l’auter cun bastiment, tren e camiun per arrivar a sia destinaziun.

Per pudair s’adressar ad in computer specific, al identifitgescha l’Internet Protocol cun agid d’ina adressa dad IP. En la versiun IPv4 sa tracti da quatter bytes (32 bits) che vegnan inditgads en furma da quatter cifras decimalas tranter 0 e 255 ch’èn mintgamai spartidas tras in punct, per exempel 66.230.200.100. Tar la nova versiun IPv6 sa tracti da 16 bytes (128 bits) che vegnan inditgads en otg blocs a mintgamai quatter cifras tenor il sistem hexadecimal, ils quals vegnan spartids in da l’auter tras punct dubel, per exempel 2001:0db8:85a3:08d3:1319:8a2e:0370:7344. Ins po s’imaginar questas adressas sco numers da telefon per il computer ed il Domain Name System (DNS) sco cudesch da telefon automatic.

Il DNS furma in’impurtanta part da l’infrastructura da l’internet. I sa tracta d’ina banca da datas structurada a moda ierarchica sur differents secturs administrativs, la quala metta a disposiziun in mecanissem da translaziun: in num da domain ch’è facil da tegnair endament (per exempel ‹wikipedia.ch›) sa lascha translatar en ina adressa dad IP e viceversa. Quai succeda – senza che l’utilisader sa percorschia – adina lura cura ch’el clicca en il navigatur-web sin ina nova colliaziun ipertextuala u endatescha directamain ina adressa-web. Il navigatur dumonda l’emprim in server da DNS suenter l’adressa dad IP dal num ester e baratta alura pachets dad IP cun questa adressa per pudair retschaiver ils cuntegns dals servetschs che vegnan mess là a disposiziun. Il fundament da l’entira ierarchia furman ils uschenumnads Root-Nameserver che cumparan en ils nums suenter il punct (p.ex. ‹.ch› ni ‹.com›).

En la part centrala da l’internet ston ils pachets passar ina rait fitg extendida. Ils posts da diromaziun furman routers che decidan davart la via la pli curta per arrivar a l’adressa dad IP dal destinatur. Per far quai fan els diever da tabellas da routing che vegnan generadas e tegnidas actualas automaticamain cun agid da protocols da routing; uschia èsi era pussaivel da reagir automaticamain sin colliaziuns ch’èn crudadas ora. Entaifer las tabellas da routing vegnan colliadas diversas adressas dad IP a raits da destinaziun; a quellas vegn alura attribuida ina sortida dal router, per exempel en furma d’ina adressa da sigl al proxim router (Next Hop IP Address). Per computers e routers che n’èn betg situadas en la part centrala da l’internet basta percunter ina tabella da routing statica che na vegn betg generada tras protocols da routing. Quella cuntegna ina ruta da standard (Standard- u Default-Gateway) che renviescha per tut las destinaziuns che n’èn betg marcadas autramain vers la part centrala da l’internet – cumparegliabel a la tavla da signalisaziun ‹tuttas direcziuns› en il traffic sin via. Ils routers centrals administreschan actualmain (2014) tabellas da routing cun fin a 540 000 raits da destinaziun per IPv4 e 21 000 per IPv6.

Ensemen cun las datas d’utilisaziun tenor l’Internet Protocol vegnan er transmessas datas da protocols ‹tecnics› surordinads sco TCP (Transmission Control Protocol) u UDP (User Datagram Protocol), cumparegliabel ad ina rauba en il traffic da martganzia che sa chatta en in pachet da posta, il qual vegn supplementarmain transportà en in container. La gronda part da las paginas d’internet fa diever, a basa da TCP, dal Hypertext Transfer Protocol (HTTP) resp. dal Hypertext Transfer Protocol Secure (HTTPS) per paginas codadas. E-mails fan diever dal Simple Mail Transfer Protocol (SMTP), medemamain a basa da TCP, entant ch’il DNS sa splega a basa dad UDP.

En il cas dad IPv4 vegnan las adressas dad IP dals singuls plazs da lavur d’ina firma u organisaziun savens subsummadas cun agid da Network Address Translation (NAT) sut ina adressa da firma generala. Sin quests computers n’han ins nagin access direct nà da l’internet. Savens è quai bain giavischà per motivs da segirezza (firewall), ma i maina er a dischavantatgs evidents. Per IPv6 èn reservadas bler dapli adressas publicas; tenor RFC 4864 pon ins perquai desister en avegnir da NAT, uschia ch’i dat dapli pussaivladads da filtrar il traffic da datas.

Ensemen cun la derasaziun vasta da l’internet è er creschì il basegn da forza electrica per l’infrastructura centrala (servers e.a.) e per ils singuls computers dals utilisaders. En tut il mund fan ins quint ch’i vegn duvrà actualmain radund 1 % da l’entira producziun d’energia per tegnair en funcziun las singulas cumponentas da la rait da datas mundiala.

L’onn 2012 ha la quantitad da datas ch’è vegnida transmessa sur la rait da cabel muntà a bundant 26,7 exabytes (1 exabyte = 1 mrd. gigabytes) per mais, pia a prest 1 exabyte per di. La quantitad da datas cuntegnida en in exabyte è 2500 giadas uschè gronda sco tut ils cudeschs ch’èn insumma vegnids scrits insacura. Il stgomi da datas sur raits mobilas ha muntà il 2012 a radund 1,1 exabyte per mais. Fin il 2017 quintan ins che questas cifras creschian sin 1,4 zetabytes resp. 13,6 exabytes (communicaziun mobila). Bundant la mesadad da las datas èn d’attribuir a servetschs da video (Video-on-Demand).

Il dumber d’utilisaders u d’apparats ch’èn colliads cun l’internet na sa lascha betg eruir exactamain. Ils singuls utilisaders sa collian numnadamain cun l’internet cun agid da differents apparats (PC, apparats mobils) e sur diversas tecnicas d’access, e quai tut tenor be per in curt mument u er sur lung temp. Il 2007 avevan radund 16,9 % da la populaziun mundiala access a l’internet; il 2008 han 1,23 milliardas umans fatg diever da l’internet. En l’Europa ha il dumber dals utilisaders regulars surpassà l’entschatta 2008 il term da 50 %. En ils stadis industrialisads possedan en il fratemp varga 80 % dals tegnairchasa in attatg d’internet. Tar giuvens Europeans ha l’internet cumenzà a stgatschar la televisiun ed autras medias tradiziunalas. Ils Stadis Unids èn stads l’emprim pajais nua che bundant la mesadad da la populaziun ha inditgà da duvrar surtut l’internet sco funtauna da novitads.

En Svizra possedevan il 2012 85 % da la populaziun in attatg a l’internet. Radund 40 % faschevan diever d’in access a spectrum lartg cun ina rata da transmissiun da varga 256 kbit/s. Per il 2013 ha in studi mussà che radund 81 % da la populaziun èn regularmain (mintga di u pliras giadas l’emna) en l’internet.




#Article 29: Tansania (260 words)


La Tansania (uffizialmain Republica unida da la Tansania, swahili Jamhuri ya Muungano wa Tanzania) è in stadi situà en l'Africa da l'ost. Ella giascha a l'Ocean indic e cunfinescha cun Kenia ed Uganda en il nord, cun Ruanda, Burundi e la Republica Democratica dal Congo (Zaire) en il vest e cun Sambia, Malawi e Mosambic en il sid. Tar il stadi tutgan las inslas Pemba ed Unguja (che muntan ensemen la part Sansibar).

La populaziun da la Tansania crescha fitg ferm. Per il mument han circa 44% dals carstgauns sut 14 onns, uschia ch'igl è da quintar cun in'ulteriura creschientscha. Il medem temp ston quintar cun ina rata da mortoris fitg auta a causa da la paupradad e da la malsogna SIDA. Circa 20% da la populaziun èn infectads cun il virus dal HIV (2003).

La regiun da la costa era abitada ditg da martgadants che martgadavan cun ils territoris arabs. En il 16avel tschientaner èn arrivads ils Portugais, pli tard Arabs dad Omar ed a la fin dal 19avel tschientaner ils Tudestgs (Deutsch-Ostafrika, 1891).

Per ils 9 da december 1961 retschaiva la Tansania il dretg d'independenza ed è dapi lura in stadi politicamain relativ stabil. Economicamain è la Tansania in dals pajais ils pli paupers dal mund.

Regiuns en Tansania:
Tansania è partida en 26 regiuns:

Arusha, 
Daressalam ,
Dodoma, 
Iringa,
Kagera, 
Kigoma, 
Kilimandscharo, 
Lindi, 
Manyara,
Mara, 
Mbeya, 
Morogoro, 
Mtwara, 
Mwanza, 
Pemba North, 
Pemba South,
Pwani, 
Rukwa, 
Ruvuma, 
Shinyanga, 
Singida, 
Tabora, 
Tanga, 
Zanzibar Central/South, 
Zanzibar North, 
Zanzibar Urban/West, 
 
Citads en Tansania: (Num, hab 1988, hab 2002, hab 2005, regiun)




#Article 30: Africa dal Sid (162 words)


LAfrica dal Sid è in stadi situà al piz meridiunal da l'Africa ed ina pussanza economica locala. Il pajais cun la chapitala Pretoria sa chatta tranter 22 e 35 grads da ladezza meridiunala e tranter 17 e 33 grads da lunghezza orientala (senza las Inslas dal Princi Edward). En il sid e sidost cunfina el cun l'Ocean Indic ed en il vest cun l'Ocean Atlantic. En il nord sa chattan ils stadis cunfinants Namibia, Botswana e Simbabwe, en l'ost Mosambic e Swasiland. Il reginavel da Lesotho è in'enclava, vul dir ch'el è circumdà cumplettamain da l'Africa dal Sid.

Dapi la fin da l'apartheid ha l'Africa dal Sid 11 linguas uffizialas: englais, afrikaans, isiZulu, Siswati, Ndebele meridiunal, Sesotho, Sotho settentriunal, Xitsonga, Setswana, Tshivenda ed isiXhosa. Il pajais è uschia quel cun las pli bleras linguas uffizialas dal mund suenter l'India.

Tranter ils 11 da zercladur ed ils 11 da fanadur 2010 ha gì lieu il Campiunadi mundial da ballape 2010 en il pajais.




#Article 31: Etiopia (1291 words)


Etiopia (amaric ኢትዮጵያ Ityop̣p̣əya, grec Αἰθιοπία) - da pü bod eir numno Abessinia (insè ün term cultur-historic chi descriva be las regiuns pü otas dal pajais) - es ün stedi i'l ost da l'Africa. El ho cunfins cun Eritrea, il Sudan, Kenia, Somalia e Dschibuti. La festa naziunela es ils 18 da meg, di da la victoria cunter la regenza dictatorica da Mengistu Haile Mariam (1991).

Cunfins in tuot: 5328 km

Daspö l'independenza da l'Eritrea dal 1993 nu ho l'Etiopia pü üngün acces direct ni al mer neir ad ün port.

La pü granda part da l'Etiopia es domineda dal plateau da l'Abessinia cun il Ras Daschen scu pü ota muntagna (4'620 m); in quista vasta regiun da muntagnas as chatta eir la chapitela dal pajais: Addis Abeba (2'370 m). Oters pizs chi surpassan 4'000 meters sun il Talo (4'413 m), il Guma Terara (4'231 m) ed il Guge (4'203 m). Tres la mited dal stedi as extenda dal nordost vers südvest il uschènumno Rift Valley. Da sieu vart südvest vo que inavaunt cul plateau da Somali cul piz Batu (4'307 m). Las parts las pü bassas dal pajais as rechattan illa depressiun da Koba, na lönch dal cunfin cun l'Eritrea (116 m suot la mer). 

Illa zona choda tropicala (fin 1'800 m) es la temperatura in media da 27 gros, cun üna quauntited totela da plövigia da 500 mm per meter quadrat ed an. La zona choda tempereda (1.'00 fin 2'500 m) esa 22 gros cun 500 fin 1'500 mm plövgia. Illa zona da muntagnas (a partir da 2.500 m) esa be pü 16 gros e la quauntited da plövgia vo sü fin 1'800 mm. La granda stagiun da plövgia düra da mited gün fin la mited september, ed a do aunch'üna pitschna stagiun da plövgia traunter favrer e marz.

Il pü grand lej es il Lej da Tana. Aint il Rift Valley do que bgers lejs vulcanics. Il Lej da Shala es il pü grand lej da crater ed eir il pü profuond dal pajais. Pervi da sieu cuntgnieu ordvart ot da soda es il Lej da Langano ün dals pochs lejs i'ls quêls as po pigler bagn, perche ch'el nun es infecziuno cun bilharziosa. 

Il flüms ils pü importants da l'Etiopia sun l'Akobo, l'Awash, il Nil Blouv, il Genale, l'Omo ed il Tekeze.

Pervi da sia topografia varieda cun sias diversas rasedas geologicas et las cundiziuns climaticas ter differentas es l'Etiopia la patria dad ün enorm muond da plantas e da bes-chas. L'Etiopia es ün dals och centers genetics da la terra. La flora etiopiauna cumpiglia var 7000 plantas, 12 pertschient da quêlas sun endemicas. L'Etiopia es il pajais d'origin dal café e da diversas sortas da cereals scu teff u enset (ventricosum Ensete). Pü cu 20 differentas plantas da culura vegnan da quist pajais.

Traunter las bgeras sortas da bes-chas as chattan 30 mammels (12 % endemicas) (traunter oter il luf etiopiaun, la gazella Sömmerring, 16 sortas dad utschèls (2,5 %), 3 reptilias (3,9 %) e 17 amfibias.

Las pü grandas citeds sun (1. 1. 2005): Addis Abeba 2'757'807 avdaunts, Dire Dawa 252'347 avdaunts, Nazret 214'034 avdaunts, Bahir Dar 168'929 avdaunts, Gonder 153'942 avdaunts e Mek'ele 151'752 avdaunts.

L'Etiopia vela scu pajais multi-etnic. Cumbain cha geograficamaing üna part da l'Africa al süd da la Sahara es la cultura scu eir la populaziun etiopiauna profuondamaing caracteriseda dad ün'influenza arabica e semitica.

Fin i'l vainchevel tschientaner d'eiran ils Amharas il pövel da stedi. Cumbain ch'els rivan be fin tar 20 u 30 % da la populaziun, es l'amharic dvanto la lingua naziunela e vain druveda scu lingua da traffic almain da la populaziun urbana da tuot il pajais. Insembel cun ils Tigray chi correspuondan ad arduond 10 % da la populaziun da l'Etiopia, ils Amharas vivan tradiziunelmaing scu purs illas planüras otas dal nord, i'l center historic da l'imperi etiopiaun. Ils duos pövels Amharas e Tigray, chi discuorran linguas strettamaing paraintas (semiticas), paun eir gnir resümos suot il pled Habesha. In lur granda magiurited sune aderents da la baselgia etiopiauna-orthodoxa, ma a do traunter els eir minuriteds da muslims, protestants e da catolics. Daspö ils ans nonaunta es la pitschna minurited güdeva bod cumplettamaing emigreda vers Israel.

Tuottüna sun tenor las statisticas ils Oromos la pü grand'etnia, chi discuorra üna lingua cuschitica scu per exempel eir ils Somalis (la veglia denominaziun Galla, chi vain da l'amharic e chi'd as referescha pü generelmaing eir ad oters pövels cuschitics e minchataunt perfin omotics, stuvess vela scu blatsmeda e stuvess esser s-chivida). Ils Oromos ragiundschan pü cu 40 % da la populaziun etiopiauna ed els sun suvenz Muslims, cumbain cha que detta eir bgers ortodoxs etiopiauns. Lur territori etnic as concentrescha sün la mited dal süd dal pajais.
La populaziun islamica da la cited da Harar ho nom Aderi e posseda our da ragiuns historicas ün'egna identited linguistica e culturela; lur lingua es semitica. La pü importantas ulteriuras etnias da l'Etiopia sun: Somalis (6 %), Shankella (6 %) Afar (4 %), Gurage (3 %), Sidama (9 %) ed Agaw (1 %). Illas regiuns dal vest e dal südvest dal pajais vivan aunch'adüna bgeras etnias niloticas ed omoticas, chi'd haun suvenz preservo lur stil da vita tradiziunel. Las pü cuntschaintas sun ils Mursi, ils Hamer, ils Ometo ed ils Nuer. Varqauntas da quistas etnias sun vivan per part eir i'ls pajais chantunais.

Pü cu 80 linguas vegnan discurridas in Etiopia. Sper la lingua ufficiela, l'amharic, es l'oromo la lingua la pü deraseda. L'englais es la lingua da l'educaziun superiura e vain druvo scu lingua d'instrucziun illas scoulas secundaras ed illas universiteds. Las linguas etiopiaunas paun gnir spartidas linguisticamaing in quatter famiglias da linguas: Las linguas semiticas domineschan i'l nord ed i'l center dal pajais (amharic, tigrinya), la famiglia omotica as rechatta i'l südvest, las linguas cuschiticas vegnan discurridas i'l süd e la gruppa nilo-saharanica es deraseda i'l vest.

La cumposiziun religiusa da l'Etiopia es taunt heterogena scu la cumposiziun etnica: Las cumünaunzas las pü importantas sun la baselgia etiopiaun-ortodoxa (ouravaunt tuot persunas chi discuorran amharic u tigrinya, ma na be) ed ils muslims sunnits (la magiurited dals Oromos). Impü do que auncha la baselgia etiopiaun-catolica, la baselgia etiopiaun-evangelica, bgers adherents da religiuns da natüra scu eir Hindus e Sikhs.

Üna rolla speciela haun ils Falaschas chi sun üna cumünanza da güdevs etiopiaus e pera dad avair origins pü veglias cu il Talmud. Cun üna punt aviatica vaiva Israel evacuo dal 1984 pü cu 25.000 Falaschas our da las regiuns muntagnardas traunter Gondar ed Aksum vers la Terra Saincha. Hoz vivan be pü var 3.800 Falaschas in Etiopia.

Il cristianissem etiopiaun-ortodox es istoricamaing la pü importanta religiun dal pajais. Zieva l'Armenia, l'Etiopa vela sco il seguond pü vegl stedi oriundamaing cristiaun dal muond inter. Las practicas religiusas haun conservo ün caracter orientel fich tradiziunel ed as differenzcheschan profuondamaing da quels da las baselgias catolicas e evangelicas.

Daspö 1830 do que missiunaris evangelics in Etiopia; dal 1855 fin 1868 s'ho ingascho la missiun St. Chrischona da Basilea, in collavuraziun cul uvas-ch anglican da Jerusalem, e da quist ingaschamaint es naschieu traunter oter ün muvimaint protestant traunter ils Falaschas. Las staintas missiunarias dvantaivant alura viepü intensivas, ma ouravaunt tuot illas regiuns cun religiuns tradiziunelas africaunas; ils muvimaints ils pü importants gnivan da la Svecia, da la Norvegia, dals Stedis Unieus e dal Danemarc.
Hozindi existan in Etiopia las seguaintas baselgias protestantas:

baselgia catolica da l'Etiopia

Tenor las pü nouvas estimaziuns, l'Islam pêra dad esser la pü granda religiun dal pajais, cumbain cha's chatta aunch'adüna veglias infuormaziuns cha la dictatura da Mengistu vaiva manipulo in favur dals cristiauns. Congualo culs pajais dal Golf percunter es l'Islam etiopiaun pü liberel. La cited da Harar es ün lö sainch pels muslims dal pajais.

Hauptartikel: Geschichte Äthiopiens

Nationalparks in Äthiopien




#Article 32: Europa (5175 words)


L’Europa (grec vegl Εὐρώπη, Eurṓpē) è in continent che s’extenda sur il tschintgavel occidental da la surfatscha da l’Eurasia. Cumbain ch’i sa tracta pia geograficamain d’in subcontinent, vegn per motivs istorics e culturals per ordinari discurrì da l’Europa sco agen continent. Quai mussa che la noziun ‹Europa› na sa restrenscha betg a sia definiziun geografica, mabain includa er aspects istorics, culturals, politics, economics ed ideals.

Ils abitants da l’Europa vegnan numnads Europeans. Cun bundant 700 milliuns abitants che vivan sin ina surfatscha da ca. 10,5 milliuns kilometers quadrat, tutga l’Europa tar las parts dal mund abitads pli spess. L’Europa è urbanisada vaira ferm, oravant tut en las regiuns da las chapitalas e da la megalopolis ‹banana blaua›. Impurtantas cuminanzas politicas en l’Europa èn surtut il Cussegl da l’Europa e l’Uniun europeica. 

Il num ‹Europa› deriva dal grec vegl Εὐρώπη (Eurṓpē). Entaifer il grec pudeva il num vegnir chapì sco pled cumponì or da εὐρύς, eurýs, ‹vast, lad› e ὄψ, óps, ‹vesida, fatscha› e pudeva oramai signifitgar ‹quella cun la vasta vesida› ubain ‹quella cun la fatscha lada›.

Entaifer la mitologia greca era Eurṓpē il num d’ina princessa feniziana, la quala Zeus, ch’era sa transfurmà en in taur, ha rapinà e manà nudond a Creta, nua ch’el l’ha surmanà. Tenor l’opiniun d’etimologs deriva quest num d’ina lingua semitica ed è alura vegnì grecisà. Discutada vegn ina provegnientscha da l’accadic erebu ‹ir da rendì› (sa referind al sulegl) ubain erob ‹saira, vest›.

En il 5avel tschientaner a.C. ha il scriptur e geograf grec Herodot duvrà il term geografic Eurṓpē – che sa referiva da quel temp be a la Peloponnes – per designar la surfatscha da terra situada en il nord da la Mar Mediterrana e da la Mar Naira, cunfinond quels uschia da l’Asia (Asía) e da l’Africa (Libýe).

En l’ost, vers l’Asia, ha l’Europa nagin cunfin geografic u geologic precis. Perquai èn ils ‹cunfins da l’Europa› ina dumonda da convenziun entaifer la societad. Ina definiziun geografica da l’Europa è adina arbitrara. Tenor in’enconuschenta formulaziun da Bernard-Henri Lévy n’è l’Europa «nagin lieu, mabain in’idea». Oz suondan ins areguard la fixaziun dal cunfin per ordinari la definiziun da Philip Johan von Strahlenberg. Tenor quella furman la muntogna ed il flum da l’Ural il cunfin oriental da l’Europa. Tranter la Mar Caspica e la Mar Naira suonda la lingia da cunfin la Bassa da Kouma-Manytch en il nord da la muntogna dal Caucasus, damai ch’ina via maritima univa qua antruras la Mar Caspica cun la Mar Naira. En il territori da lingua englaisa e franzosa vegn il cunfin savens er tratg qua per lung da la part centrala dal Caucasus.

Tut en tut dumbra l’Europa ina surfatscha da ca. 10,5 milliuns kilometers quadrat ed è uschia suenter l’Australia il segund pitschen continent. Il punct situà il pli en il nord da la terra franca europeica è Kinnarodden en la Norvegia, il punct situà il pli en il sid Punta de Tarifa en Spagna, il punct il pli en il vest Cabo da Roca en il Portugal. L’extensiun nord-sid munta a ca. 3800 km. En direcziun ost-vest mesira la terra franca europeica ca. 6000 km, da la Muntogna da l’Ural en Russia fin a la costa da l’Atlantic en il Portugal.

Il continent è per gronda part situà en la zona temprada. Cumpareglià cun auters territoris che sa chattan en ils medems grads da latituda, è il clima qua pli moderà, quai che sa lascha attribuir a l’influenza dal Current dal Golf relativamain chaud. La temperatura annuala a Bordeaux munta per exempel en media 12,8 °C, entant che a Halifax en il Canada, ch’è situà pli u main sin il medem grad da latituda, cuntanscha la temperatura annuala en media be 6,3 °C.

Grondas parts da l’Europa dal Vest èn segnadas d’envierns miaivels e da stads frestgas. En territoris ch’èn situads lunsch davent da la mar, pia er da si’influenza equilibranta areguard il clima, èn las differenzas da temperatura percunter pli grondas durant las differentas stagiuns. En vastas parts da l’Europa da l’Ost regia in clima continental, damai ch’i na sa chattan qua naginas mars en proxima vischinanza. Da quai resultan en questas regiuns envierns fraids e stads chaudas. 

Pervi da la rotaziun da la Terra e la forza svianta ch’è colliada cun quella vegnan ils vents per gronda part nà dal vest. En las regiuns da costa da l’Europa dal Vest signifitga quai ch’ils vents suflan per ordinari nà da l’Ocean Atlantic, quai che maina quasi l’entir onn a plievgia. En l’Europa Centrala e da l’Ost è la quantitad da precipitaziuns percunter relativamain pitschna, damai che l’influenza da la mar na po savens betg sa far valair en questas regiuns. Ultra da quai influenzeschan las muntognas fitg ferm la quantitad da precipitaziuns. Uschia tutgan parts da las Alps dal nordvest tar las regiuns da l’Europa cun las pli autas precipitaziuns, entant che valladas alpinas centralas èn relativamain sitgas. Las Alps figureschan en quest cas sco barrieras per fronts da plievgia. 

En territoris situads datiers da la Mar Mediterrana regia per gronda part in clima mediterran, vul dir stads sitgas e chaudas, entant ch’ils envierns èn miaivels ed umids. La stad arrivan ils vents per il pli nà dal nord, l’enviern mainan vents dal vest savens precipitaziuns nà da l’Ocean Atlantic. En il nord da l’Europa regia in clima arctic, en il sidost a la Volga percunter in clima continental cun stads chaudas e be paucas precipitaziuns. Uschia poi per exempel esser ch’igl ha anc naiv en la Laponia, entant che la Sicilia schema gia sut la chalira da stad, e ch’i plova d’in cuntin sin las Inslas Shetland, entant che l’Andalusia vegn turmentada sur onns da setgira. 

La vegetaziun en l’Europa sa lascha, a basa dal clima, sutdivider approximativamain en quatter zonas: arctic, boreal, temprà e mediterran. Tras l’utilisaziun sur millennis è la vegetaziun oriunda en la zona temprada e mediterrana vegnida destruida cun excepziun da pitschnas restanzas. En il nord da l’Europa èn da chattar en la tundra arctica be chaglias, mistgel e litgens. Vers sid suondan alura en la Scandinavia ed en la Russia dal Nord guauds da guglias boreals (surtut cun pigns e tieus), en ils quals sa chattan palids extendidas. En la zona temprada creschissan tranter l’Ocean Atlantic e las Carpatas sut cundiziuns natiralas surtut guauds maschadads segnads da faus verds, en la bassa er tals cun ruvers e charpins (faus alvs). En l’ost dal territori da derasaziun dal fau verd, ca. a partir da la Weichsel e dal Dnjestr fin a la part meridiunala da l’Ural, dominassan guauds maschadads cun ruver cumin, tigl d’enviern, tieu cotschen e – en la fasa da transiziun vers la zona da guaud da guglias en il nord – pign. Vers sid, en il nord da la Mar Naira, suonda a questa zona da guaud maschadà ina regiun en la quala fiss avant maun sut cundiziuns natiralas ina vegetaziun da steppa.

Er la regiun da la Mar Mediterrana era oriundamain cuverta cun guaud. Senz’influenza da l’uman fiss la vegetaziun segnada là da guauds da feglia cun spezias da ruvers semperverdas (surtut ruver verd), en las parts las pli meridiunalas e chaudas cun ferma participaziun d’ulivers, pistazias e tieus. Tras l’influenza antropogena creschan là ozendi però surtut plantas da macchie e garigue. En las regiuns pli miaivlas da la zona mediterrana giogan er ina rolla spezias da ruvers ch’han la feglia che croda d’atun. En las regiuns mesaunas e superiuras da las muntognas è la vegetaziun originara sa mantegnida meglier che en regiuns bassas. Qua existan sin spazi relativamain pitschen plirs stgalims d’autezza; las singulas cumponentas da questas zonas da stgalims d’autezza pon, tut tenor il clima, sa differenziar relativamain ferm ina da l’autra. En ils guauds da muntogna dals stgalims d’autezza mesauns èn, sper il fau verd, surtut da muntada spezias d’aviez e da tieus, en muntognas situadas pli vers nord er pign e laresch. Survart il cunfin dal guaud èn situadas en las muntognas pastgiras da chaglias bassas e tschispet alpin ed en la regiun da la Mar Mediterrana er uschenumnada vegetaziun da plimatschs cun guglias. Vers ensi suondan a la vegetaziun serrada singulas plantas da grippa e glera.

Oz è la gronda part da l’Europa segnada da l’utilisaziun agrara ed ils guauds restants servan a la selvicultura. Regiuns influenzadas main ferm tras l’uman existan surtut anc en las autezzas superiuras da las muntognas.

Dals gronds animals da rapina sco l’urs, il luf u il luf-tscherver vivan effectivs pli gronds be pli en il nord ed en l’ost dal continent. En las regiuns situadas il pli lunsch en il nord ed en l’ost, èn er rens ed elans vaira derasads. Il bison europeic era vegnì extirpà en libertad ed è puspè vegnì recolonisà ils ultims onns en l’Europa da l’Ost. Il tschierv, il chavriel ed il portg selvadi chattan ins en la gronda part da las regiuns da l’Europa. In tipic animal grond europeic è il chamutsch, il qual cumpara ordaifer il continent be en l’Asia Minura ed en las parts asiaticas dal Caucasus. En las Alps, las Pireneas ed il Caucasus vivan diversas spezias da capricorns. La saiga (ina spezia d’antilopa) era anc derasada en il temp medieval fin en l’Ucraina, oz sa restrenscha sia derasaziun en l’Europa sin il curs inferiur da la Volga. Bleras spezias èn gia vegnidas extirpadas avant tschientaners (bov selvadi, tarpan). Er ils effectivs d’utschels da preda sco l’evla da la pizza, l’evla da mar ed il tschess cularin èn vegnids decimads fermamain ils ultims tschientaners. Be en l’Europa dal Sid viva – pervi dal clima chaud – in dumber pli grond da spezias da luschards, serps e tartarugas. A la costa vivan chauns da mar ed autras spezias da focas. En las mars nordicas èn l’orca e la balena-portg las spezias da balenas las pli derasadas, en la Mar Mediterrana èn quai diversas spezias da delfins. Ils pli enconuschents peschs d’aua da sal èn diversas spezias da ringia e ton.

Las citads e metropolas furman las unitads administrativas las pli pitschnas entaifer l’organisaziun administrativa dals stadis. Lissabon è stada ina da las emprimas metropolas cosmopolitas dal temp modern, damai ch’ella ha furmà dal temp da l’imperialissem il center d’in grond reginavel colonial. Anc l’onn 1950 sa chattavan quatter citads che fan oz part da l’Uniun europeica tranter las 20 grondas dal mund (Londra sin plaz dus suenter New York, Paris sin il quart plaz suenter Tokio sco er Milaun e Napoli sin ils plazs 13 e 19); dapi lura na creschan las citads europeicas strusch pli, mabain han per part il dumber d’abitants che sa sminuescha. 

En la segunda mesadad dal 20avel tschientaner èn surtut creschidas citads d’autras parts dal mund, en spezial en pajais en svilup, sco per exempel Mexico-City, Manila u São Paulo. Malgrà la stagnaziun en citads pli veglias sa laschan constatar qua en il svilup dal territori dal 21avel tschientaner auters svilups, sco per exempel la revalitaziun (gentrificaziun) dals centers da las citads.

Problematic tar la cumparegliaziun da metropolas è il fatg ch’i dat savens er zonas d’aglomeraziun policentricas, entaifer las qualas las citads centralas èn fitg pitschnas en cumparegliaziun cun l’aglomeraziun, uschia che quellas na cumparan savens betg en las statisticas (p.ex. Rain-Ruhr, la zona industriala da la Schlesia Superiura u la part centrala da l’Engalterra).

Citads en l’Europa cun dapli che 1,5 milliuns abitants èn:

Il Reginavel Unì, l’Irlanda, il Portugal e l’Islanda han attribuì sasezs al temp da l’Europa dal Vest, il qual è identic cun il temp universal coordinà (UTC). Quel correspunda a la posiziun dal sulegl al meridian nulla che maina tras Londra.

Tut ils stadis da l’Europa Centrala ed intgins stadis da l’Europa dal Vest e da l’Europa da l’Ost fan diever dal temp da l’Europa Centrala (UTC + in’ura). Igl èn quai ils suandants stadis: Spagna, Frantscha, Andorra, Monaco, Pajais Bass, Belgia, Luxemburg, Danemarc, Svezia, Norvegia, Germania, Pologna, Austria, Svizra, Liechtenstein, Italia, San Marino, Vatican, Tschechia, Slovachia, Ungaria, Slovenia, Croazia, Bosnia-Erzegovina, Serbia, Montenegro, Macedonia dal Nord, Cosovo, Malta ed Albania.

Il temp da l’Europa da l’Ost (UTC + duas uras) è en diever en ils suandants pajais: Finlanda, Estonia, Lettonia, Lituania, Ucraina, Rumenia, Moldavia, Bulgaria e Grezia.

Il temp da Moscau (UST + trais uras) utiliseschan la Bielorussia, ina gronda part dal territori da la Russia situà en l’Europa sco er la Tirchia.

Las pli veglias cumprovas dal gener Homo derivan tenor las enconuschientschas actualas (situaziun dal 2019) da la Sierra de Atapuerca en Spagna ed han ina vegliadetgna da fin a 1,2 milliuns onns. Chats da fossils anc pli vegls che derivan da la Georgia (ordaifer ils cunfins da l’Europa en diever ozendi) han ina vegliadetgna da 1,8 milliuns onns e vegnan designads sco Homo erectus ergaster georgicus. En l’Europa al nord da las Alps cumenza il pli vegl orizont da colonisaziun cun il Homo heidelbergensis avant ca. 600 000 onns.

Pir avant ca. 40 000 è il Homo sapiens arrivà en l’Europa ed ha remplazzà qua successivamain l’uman da Neandertal. Cun il temp da crap tardiv ed il temp da bronz ha cumenzà en l’Europa ina lung’istorgia da grondas prestaziuns culturalas ed economicas, l’emprim en la regiun da la Mar Mediterrana, pli tard er en il nord ed en l’ost.

Surtut la cultura greca, l’Imperi roman ed il cristianissem han laschà fin oz fastizs. En l’antica ha l’Imperi roman unì dal temp dad Augustus per l’emprima giada l’entira part meridiunala ensemen cun ils auters pajais da costa da la zona mediterrana en in reginavel grond. En l’Imperi roman ha la nova religiun dal cristianissem pudì sa derasar svelt. Malgrà tuttas persecuziuns è la nova religiun vegnida sustegnida en l’antica tardiva da Constantin il Grond (vieuta constantina) e declerada sut Theodosius I sco religiun statala. Cun la fin da l’antica è l’Imperium Romanum dà dapart en il vest, entant che quel ha cuntinuà en l’ost, sco Imperi bizantin da tempra pli e pli greca, fin l’onn 1453. En rom da la migraziun dals pievels è sa derasà a partir dal 5avel tschientaner in grond dumber da stirpas per gronda part germanas (Anglosaxons, Francs, Gots e.a.) en l’Europa dal Vest ed ha mess il crap da fundament da las naziuns futuras (Engalterra, Frantscha, Spagna). 

En il temp medieval tempriv ha l’Epos da Paderborn numnà il regent dal Reginavel dals Francs, Carl il Grond, il ‹bab da l’Europa› (pater Europæ). Il temp medieval è tranter auter stà segnà da la concurrenza tranter il nov imperatur roman en il vest e l’imperatur bizantin a Constantinopel; per lung dal cunfin da lur sferas d’influenza ha cuntinuà pli tard la separaziun da l’Europa en ina part occidentala ed ina orientala (Schisma oriental). Dapi il temp medieval tempriv han missiunaris derasà il cristianissem en l’Europa dal Nord e da l’Ost, uschia che l’entira Europa era en il temp medieval tardiv cristiana. En l’Europa dal Vest ha però perdurà dapi la dispita d’investitura in conflict tranter l’imperatur ed il papa pervi da l’egemonia. Dal temp da la renaschientscha han ins rescuvert en il vest latin la ‹savida da l’antica›, quai ch’ha per part manà ad in temp da fluriziun cultural. La refurmaziun en il 16avel tschientaner ha spartì la baselgia dal vest en ina part catolica ed ina evangelica (la ruptura cun la baselgia ortodoxa aveva gia gì lieu l’onn 1054). La consequenza da quai èn stadas guerras religiusas; dal 1618 fin il 1648 ha la Guerra da trent’onns devastà vastas parts da l’Europa Centrala. 

Dapi il 15avel tschientaner han naziuns europeicas (surtut Spagna, Portugal, Russia, Pajais Bass, Frantscha e Reginavel Unì) stabilì imperis colonials cun grondas possessiuns sin tut ils ulteriurs continents. L’Europa è il continent ch’ha influenzà – cun tut ils aspects positivs e negativs – il pli ferm ils auters continents (p.ex. en furma da la missiun cristiana, da colonias, dal commerzi da sclavs, dal stgomi da rauba e da la cultura).

En il 18avel tschientaner ha il moviment da l’illuminissem mess novs accents cun promover la toleranza, il respect da la dignitad umana, l’egualitad e la libertad. En Frantscha ha la Revoluziun franzosa manà il 1789 la burgaisia a la pussanza. Alura èn suandadas las Guerras da coaliziun tranter la Frantscha revoluziunara e las monarchias europeicas. En rom da quellas duevi l’emprim reussir a Napoleun da conquistar vastas parts dal continent. Suenter sia sconfitta il 1814/15 han las forzas restaurativas empruvà en rom dal Congress da Vienna da restabilir las relaziuns prerevoluziunaras, quai che dueva reussir be per part. L’industrialisaziun ha cumenzà en parts da l’Europa en il 18avel tschientaner ed ha midà a moda rasanta la vita da mintgadi da vastas classas da la populaziun. En consequenza da la depauperisaziun dals lavurants è sa furmà en il 19avel tschientaner il moviment communistic. Daspera è il 19avel tschientaner stà segnà fermamain da la derasaziun da sistems ed ideas liberalas e democraticas, da la reacziun conservativa sin quai e da l’imperialissem da las pussanzas grondas sco resultat d’in naziunalissem sfranà. Tant l’Emprima Guerra mundiala (1914–1918) sco er la Segunda Guerra mundiala (1939–1945) èn proruttas en l’Europa ed han manà ad immensas devastaziuns. Radund 60 milliuns umans han pers en quest’ultima lur vita; tranter quels radund sis milliuns Gidieus, ils quals ils naziunalsocialists han, sper Roma ed omosexuals, empruvà d’extirpar en lur obsessiun rassistica.

Suenter la Segunda Guerra mundiala e durant la Guerra fraida è l’Europa stada dividida en dus gronds blocs ideologics areguard dumondas politics ed economicas: las naziuns socialisticas en l’Europa da l’Ost e las naziuns chapitalistics en l’Europa dal Vest. Ins ha er discurrì da la tenda da fier, la quala separa ils stadis da l’Europa in da l’auter. Tranteren han er existì intgins stadis neutrals. Pir las mesiras da refurma (perestroika e glasnost) en l’Uniun sovietica a partir da la mesadad dals onns 1980 han manà natiers ina vieuta politica. Il 1989 è il bloc da l’ost dà dapart, il Mir da Berlin è crudà, l’Uniun sovietica ed il Patg da Varsovia èn sa schliads. 
 
Dapi ils ultims decennis dal 20avel tschientaner creschan las culturas da l’Europa ensemen pli ferm. Quai sa manifestescha d’ina vart en furma d’instituziuns sco l’Uniun europeica, da l’autra vart en furma da centers economics e dal svilup demografic.

Resguardond ils cunfins da l’Europa tenor la definiziun da Strahlenberg (cf. survart) datti actualmain 46 stadis suverans (senza il Cosovo) ch’èn situads parzialmain u dal tuttafatg en l’Europa.

Daspera datti anc intgins territoris pli pitschens che na furman betg ina part integrada d’in stadi, ma che n’èn er betg autonoms:

Quests territoris furman possess da la curuna britannica. Els na fan betg part dal Reginavel Unì da la Gronda Britannia e da l’Irlanda dal Nord.

Gibraltar è in territori d’ultramar britannic. Sco tal sa chatta quel bain sut la suveranitad dal Reginavel Unì, ma na furma medemamain betg ina part da quel.

Las Inslas Feroe furman ensemen cun la Grönlanda e la terra franca danaisa il Reginavel dal Danemarc.

Quests dus territoris fan part dal Reginavel da la Norvegia e vegnan perquai attribuids per ordinari a l’Europa. Pervi da lur posiziun tranter la Scandinavia e la Grönlanda (Jan Mayen) resp. tranter la Scandinavia ed il Pol dal Nord (Svalbard) è l’attribuziun geografica al continent betg clera. 

Questas duas gruppas d’inslas furman duas regiuns autonomas dal Portugal. Per motivs politics, culturals ed istorics vegnan ellas attribuidas a l’Europa. Geograficamain è Madeira situà pli datiers da la costa africana che da la costa europeica. 

Il Kasachstan sa chatta, tenor la cunfinaziun la pli frequenta al flum Ural, cun 5,4 procent da sia surfatscha en l’Europa. Radund la mesadad dals abitants appartegnan a pievels europeics (Russ, Ucranais, Polonais, Tudestgs). Il stadi è commember da l’Uniun da las Associaziuns europeicas da ballape e sco stadi successur da l’Uniun sovietica er da l’Organisaziun per la segirezza e la cooperaziun en l’Europa. Politicamain e culturalmain vegn il Kasachstan per ordinari attribuì a l’Asia (Centrala).

La Russia sa chatta cun 25 procent da sia surfatscha en l’Europa, sch’ins quinta vitiers il Caucasus dal Nord. En la part europeica vivan, tut tenor l’attribuziun dal Caucasus dal Nord, radund 65 fin 75 procent da la populaziun. Il pajais tutga areguard l’etnografia, l’istorgia e la cultura tar l’Europa. En l’Asia è situada la part orientala dal territori da l’Ural, la Sibiria e l’Orient Extrem da la Russia.

La Tirchia tutga, tenor la cunfinaziun geografica tradiziunala al Bosporus ed a las Dardanellas, cun 3 procent da sia surfatscha en l’Europa. Radund 12 procent da la populaziun vivan en la part europeica, surtut en la citad veglia dad Istanbul che furma la pli gronda citad e la chapitala istorica dal pajais. La Tirchia è commembra dal Cussegl da l’Europa, furma cun l’Uniun europeica in’uniun da duana e vegn per ordinari attribuida a l’Europa tar occurrenzas da sport e culturalas. Politicamain vegn l’appartegnientscha da la Tirchia a l’Europa actualmain discutada a moda cuntraversa en connex cun in’eventuala adesiun dal pajais a l’Uniun europeica. 

Sch’ins considerescha il sparta-auas dal Caucasus sco cunfin tranter l’Europa e l’Asia, alura sa chattan er parts pli pitschnas da la Georgia e da l’Aserbaidschan en l’Europa. Omadus pajais ed er l’Armenia èn commembers dal Cussegl da l’Europa.

Suenter la Segunda Guerra mundiala è vegnida stgaffida sco emprima instituziun europeica il Cussegl da l’Europa; suenter la fin dal conflict tranter ost e vest cumpiglia quel 47 stadis. Medemamain da gronda muntada è l’Organisaziun per la segirezza e la cooperaziun en l’Europa, la quala è vegnida fundada il 1975 sco Conferenza per la segirezza e la cooperaziun en l’Europa, gia da lez temp cun participaziun dad omadus blocs, ed a la quala appartegnan sper pajais europeics er ils Stadis Unids ed il Canada.

L’onn 1951 èn la Belgia, ils Pajais Bass, il Luxemburg, la Germania, l’Italia e la Frantscha s’unids a la Communitad europeica da charvun e d’atschal. L’emprova da stgaffir ina Communitad europeica da defensiun ed ina Communitad politica europeica ha fatg naufragi il 1954 pervi dal veto da l’Assamblea naziunala franzosa. Sinaquai han ins fundà il 1957 cun ils Contracts da Roma la Communitad europeica d’energia atomara sco er la Communitad economica europeica. Dapi il contract da fusiun (1967) enconuschan las diversas communitads europeicas las instanzas communablas cumissiun, cussegl, parlament e tribunal. Cun il Contract da Maastricht (1993) è vegnida fundada l’Uniun europeica ch’enserra las cuminanzas d’enfin qua ed extenda lur champs d’activitad sin la politica da l’exteriur e da segirezza communabla sco er sin la collavuraziun en dumondas da giustia e da la politica interna. Suenter l’extensiun a l’ost ils onns 2004, 2007 e 2013 dumbra l’Uniun europeica actualmain (2019) 28 stadis commembers (27 situads en l’Europa e la Cipra che tutga geograficamain tar l’Asia).

Ina gronda part dals stadis commembers da l’Associaziun europeica da commerzi liber, ch’è medemamain vegnida fundada ils onns 1950, han en il fratemp midà en l’Uniun europeica; commembers èn oz be pli l’Islanda, la Norvegia, la Svizra ed il Liechtenstein. Cuntrari a l’Uniun europeica sa tracti tar quest’associaziun sulettamain d’ina zona da commerzi liber, pia senza cumpetenzas da decider supranaziunalas. 

Ord vista militara è en l’Europa la NATO (Organisaziun dal pact da l’Atlantic dal Nord) da gronda muntada. Quella è vegnida fundada il 1949 en vista a las differenzas ch’èn sa mussadas suenter la Segunda Guerra mundiala tranter ils Alliads dal vest e l’Uniun sovietica. Sper ils 23 commembers europeics fan er part da la NATO ils Stadis Unids, il Canada e la Tirchia.

Intgins stadis na tutgan geograficamain betg tar l’Europa, ma èn commembers d’organisaziuns europeicas:

Cun bundant 700 milliuns abitants tutga l’Europa tar las parts dal mund populadas vaira spess. En media munta la spessezza da la populaziun 65 abitants per km². Surtut en l’Europa dal Vest, Europa Centrala ed Europa dal Sid è la spessezza relativamain auta, entant che quella sa sbassa vaira ferm vers l’Europa dal Nord e l’Europa da l’Ost. La concentraziun da la populaziun en l’Europa dal Vest, Europa Centrala ed Europa dal Sid che s’extenda en furma d’in liom da la Mar Irlandaisa fin la Mar Mediterrana, vegn classifitgada sut il num ‹banana blaua› sco megalopolis da grond’impurtanza areguard l’economia e geografia da colonisaziun.

En l’Europa vivan otg gruppas etnolinguisticas cun dapli che 30 milliuns umans. Questas otg gruppas cumpiglian cun 456 milliuns umans 65 % da la populaziun europeica:

Ulteriuras gruppas etnicas cun 10 milliuns u dapli èn:

Dapli che 90 % dals abitants da l’Europa discurran linguas indogermanas. Derasadas il pli vast èn linguas slavas, germanas e romanas. Er grec, albanais, las linguas balticas e celticas ed il romani tutgan tar las linguas indogermanas. 

Las linguas uralicas furman la segund gronda famiglia da linguas en l’Europa. Quellas sa dividan vinavant en las linguas samoiedas, che vegnan discurridas d’intgins paucs milli umans en il nordost da l’Europa, ed en las linguas ungrofinnicas. Tar questas ultimas tutgan il finlandais, ungarais ed eston sco linguas uffizialas, en pli las linguas samicas che vegnan discurridas en la Laponia ed intginas linguas minoritaras, surtut en Russia.

En la part europeica da la Tirchia è cun il tirc ina lingua tirca lingua uffiziala, medemamain il casac en la part europeica dal Kasachstan. Autras linguas tircas cumparan sco linguas minoritaras en l’Europa da l’Ost e dal Sidost, sco per exempel il gagausic e tatar. Cun il calmuc vegn er discurrì al cunfin oriental dal continent in represchentant da la famiglia da linguas mongolaisa.

Cun il maltais è plinavant represchentada sin l’insla Malta ina lingua dal rom semitic da las linguas afroasiaticas. La lingua basca che vegn discurrida en Spagna ed en Frantscha na vegn attribuida a nagina famiglia da linguas pli gronda; a la linguistica moderna n’èsi betg reussì da reconstruir l’origin da questa lingua, uschia che la derivanza da quella resta vinavant nunenconuschenta. Ultra da quai vegnan discurridas en l’Europa numerusas linguas d’autras famiglias da linguas ch’èn, surtut ils ultims decennis, arrivadas nà qua tras immigrants.

Sch’ins considerescha la chadaina principala dal Caucasus sco cunfin europeic en il sidost, tutgan er numerusas linguas dal Caucasus tar las linguas che disponan en l’Europa d’in territori linguistic serrà (t.a. adygai, kabard, abasin e las differentas linguas dal Caucasus dal Nord). Situadas da princip en il sid da la chadaina principala èn il georgian ed il svan, las qualas surpassan però en singuls lieus la chadaina principala vers nord. Linguas tircas che vegnan discurridas en l’Europa be en il Caucasus dal Nord èn aserbeidschan, karachai-balkar, kumyk e nogai. In’insla linguistica iranaisa en la part centrala dal Caucasus dal Nord furma vinavant l’ossetic, en il Caucasus da l’ost fin en il 19avel tschientaner per part er il tat.

Areguard il dumber d’abitants è en l’Europa la scrittira latina la pli frequenta, suandada da l’alfabet cirillic (Russia, Bielorussia, Ucraina, Bulgaria, Serbia, Montenegro, Macedonia dal Nord ed en parts da la Bosnia ed Erzegovina) e da l’alfabet grec. Entras la baselgia catolic-romana è la lingua latina sa mantegnida fin en il temp modern sco lingua scritta dal continent.

Il cristianissem e l’islam èn las religiuns las pli derasadas en l’Europa. 

Radund 75 % dals Europeans èn cristians (surtut catolics, protestants ed ortodoxs).

Tranter 42 e 53 milliuns, pia 6–8 %, èn muslims; la gronda part dad els (13–20 milliuns) vivan en la part europeica da la Russia. Tar ca. 16 milliuns sa tracti d’immigrants e da lur descendenza en l’Uniun europeica. 9,5 milliuns vivan en il territori europeic da la Tirchia, 2,2 milliuns en la Bosnia ed Erzegovina e 1,4–2,5 milliuns en l’Albania.

Stgars 2 milliuns (ca. 0,3 %) da la populaziun europeica èn gidieus. La gronda part dad els vivan en Frantscha (ca. 520 000), en il Reginavel Unì (ca. 270 000), en Russia (ca. 260 000) ed en Germania (ca. 200 000). Tut las autras religiuns ensemen èn medemamain represchentadas cun stgars 0,3 %.

Radund 17 % dals Europeans èn senza confessiun. Relativamain autas cumparts da persunas senza confessiun dumbran l’Estonia, la Tschechia, ils Pajais Bass, la Russia e la Germania da l’Ost, uschiglio èn las cifras surtut autas mintgamai en las citads.

L’appartegnientscha ad ina confessiun na di però anc betg bler davart il grad da religiusadad effectiv en in pajais. Tenor l’European Values Study sa designescha ca. in terz dals Europeans sco nunreligius e 5 % sco ateists persvadids.

Il cristianissem ha cuntanschì l’Europa l’emprima giada en il prim tschientaner s.C. L’islam è s’extendì en il 8avel tschientaner nà da la Peninsla Iberica, è però puspè vegnì chatschà en rom da la reconquista ch’ha durà dal 13avel fin il 15avel tschientaner.

Tras immigraziun e missiun han ils Europeans er derasà il cristianissem en l’America, l’Australia ed in pau main ferm er sin ils auters continents (parts da l’Asia dal Sidost, da l’Africa e da l’Oceania). Oz è l’Europa per gronda part secularisada.

Pervi da la Revoluziun industriala ch’ha cumenzà en l’Engalterra e ch’è silsuenter sa derasada sur l’entir continent, ha l’Europa furmà en il 19avel tschientaner la forza economica mundiala incontestada. Pli tard han diversas organisaziuns internaziunalas sco l’Associaziun europeica da commerzi liber u la Communitad europeica – l’Uniun europeica odierna – promovì la creschientscha economica, la quala ha perdurà en vasas parts da l’Europa fin en ils onns 1970 e per part 1980. A l’entschatta dal 21avel tschientaner han surtut divers stadis da l’Europa da l’ost enconuschì ina gronda creschientscha economica. 

Cun il Contract da Maastricht han l’emprim 12 stadis da l’Uniun europeica furmà dapi il 1999 in’uniun monetara. A partir dal 2002 è vegnì introducì l’euro en numerus stadis. 

Oz è l’Europa in continent bainstant cun grondas metropolas industrialas, in’agricultura productiva ed in sectur da servetschs creschent. Malgrà quai furma la dischoccupaziun dapi ils onns 1970 in problem ch’è derasà en blers stadis europeics. Impurtants bains d’export èn surtut maschinas, atschal, computers ed autos; importads vegnan tranter auter cacau, té, cautschuc, ieli mineral, gas natiral e metals.

En l’Europa han las differentas spartas culturalas sco la sculptura, la pictura, la litteratura, l’architectura e la musica ina lunga tradiziun. Bleras citads, sco per exempel Londra, Paris, Vienna, Roma, Berlin, Prag u Moscau valan sco centers culturals che disponan d’impurtants museums, teaters ed orchesters. 

A furmar ina schientscha europeica contribueschan er occurrenzas culturalas communablas sco per exempel la Chapitala culturala da l’Europa u l’Eurovision Song Contest.

En tut ils stadis da l’Europa exista in’obligaziun d’ir a scola u almain in’obligaziun da furmaziun che dura per ordinari dal 6avel u 7avel fin il 15avel u 16avel onn da vita. La scola elementara dura en la gronda part dals pajais quatter fin tschintg, en intgins stadis però er set fin otg onns. Alura suondan per ordinari scolas cuntinuantas che pon er cumpigliar differents tips da scola. Pervi da la promoziun intenziunada dal sistem da furmaziun è la rata d’analfabets bunamain en tut ils stadis fitg bassa. En blers pajais existan ultra da quai scolas autas ed universitads renumadas, per part cun in’istorgia da plirs tschients onns.

Bundant pli ferm che la politica han occurrenzas culturalas (cf. survart) e surtut sportivas furmà la schientscha u almain la percepziun da l’Europa sco spazi unitar. Quai è d’attribuir a la popularitad da divers campiunadis europeics (ballape, hockey sin glatsch e.a.), ma er al fatg ch’ins ha gia cumenzà fitg baud a realisar talas occurrenzas – l’emprima giada il 1891 en il patinadi artistic.

 




#Article 33: Lituania (5521 words)


La Lituania (lituan Lietuva) è in stadi europeic che vegn attribuì a l’Europa Centrala ubain a l’Europa dal Nord. Tranter ils trais stadis baltics furma la Lituania il stadi situà il pli al sid. El cunfinescha en il vest cun la Mar da l’Ost ed ha cunfins communabels cun la Lettonia, la Bielorussia, la Pologna e l’oblast russ Kaliningrad.

Davent da ca. l’onn 1253 fin il 1795 ha la Lituania furmà in gronducadi; a partir dal 1569 ha il pajais fatg part da l’uniun polac-lituana. Cun la terza divisiun da la Pologna l’onn 1795 è la Lituania vegnida sut domini russ. Il 1918 ha il pajais declerà si’independenza sco republica. Suenter il temp d’occupaziun sovietic (a partir dal 1940) ha il stadi puspè cuntanschì il 1990 si’independenza. En rom da l’extensiun a l’ost l’onn 2004 è la Lituania daventada in stadi commember da l’Uniun europeica e commember da la NATO. Dapi il 2015 furma la Lituania il 19avel commember da la zona da l’euro. 

La Lituania dumbra radund 3 milliuns abitants (situaziun dal 2017). La chapitala ed a medem temp la pli gronda citad dal pajais è Vilnius; ulteriuras citads grondas èn Kaunas, Klaipėda e Šiauliai.

La Lituania cunfinescha en il nord cun la Lettonia, en l’ost e sidost cun la Bielorussia. Il cunfin tar la Pologna en il sid mesira be radund 100 km, furma però la pli impurtanta colliaziun vers l’Europa Centrala e dal Vest. Vers sidvest suonda sco exclava l’oblast russ Kaliningrad; il cunfin furma per part il flum Memel. En il vest sa chatta la Mar da l’Ost; tar quella ha la Lituania access sur il port da Klaipėda.

Geografs da l’Institut Géographique National da la Frantscha han quintà ora il 1989 il punct central geografic da l’Europa ed han eruì in lieu en il vitg Purnuškės in pau en il nord da Vilnius.

Geologicamain sa chatta la Lituania entaifer la plattafurma europeica da l’ost; la situaziun tectonica sa preschenta uschia dapi in lung temp geologic a moda relativamain ruassaivla. La surfatscha è surtut vegnida modellada tras la massa da glatsch ch’è avanzada pliras giadas en il decurs dal temp da glatsch. Be en singuls cas cumparan perquai furmaziuns da grip pli veglias a la surfatscha. Praticamain l’entira cuntrada da la Lituania è segnada dals process da furmaziun da morenas e da l’erosiun/sedimentaziun da quellas suenter l’ultim temp da glatsch da la Weichsel. Avant 20 000 onns, dal temp che l’englatschament da la Weichsel ha cuntanschì sia culminaziun, è be ina pitschna strivla en il sidost dal pajais restada libra da glatsch.

En il vest cunfinescha il pajais cun rivas da sablun a la Mar da l’Ost. La dorsala da la Lituania Bassa en il vest tutga tar la dorsala baltica. La regiun collinusa en il sidost dal pajais tutga tar la dorsala auta bielorussa. Qua sa chattan cun 294 m las elevaziuns las pli autas da la Lituania (Aukštasis Kalnas e Juozapinės Kalnas). Ils pli gronds flums èn Memel e Neris che naschan omadus en la Bielorussia. En il nordost giascha la platta da lais da la Lituania Superiura. Numerus lais sa chattan er en il sid. Tut en tut cumpiglian ils lais radund 1,5 % da la surfatscha dal pajais. 

Per lunschor la gronda part dal pajais vegn utilisada sco terren agricul. Stgars 30 % èn cuverts cun guauds e bundant 3 % furman palids e morasts. La Lituania sa cumpona en tut da 62 680 km² surfatscha da terren e da 2620 km² surfatscha d’aua.

En la Lituania prevala in clima continental moderà. Il vent dal vest che dominescha a la costa maina aria chauda ed umida nà da la Mar da l’Ost a l’intern dal pajais.

Il mais il pli chaud è il fanadur cun en media 17 °C; il mais il pli fraid è il schaner cun en media −5,1 °C. La temperatura media annuala munta a 6,2 °C. La quantitad da precipitaziuns annuala giascha tar 661 mm – en il sidvest è quai bundant dapli, en il nord pli pauc.

En la Lituania èn endrizzads radund 200 territoris da protecziun da la natira. Da quai fan part tschintg parcs naziunals, divers territoris da protecziun speziala e radund trenta parcs regiunals. Bundant 14 % da la surfatscha dal pajais sa chattan sut protecziun da la natira, sco per exempel la regiun da Praviršulio Tyrelis. Enconuschenta è tranter auter la palì auta Aukštumala, situada tranter Sowetsk e Klaipėda, a la quala è gia stada deditgada a l’entschatta dal 20avel tschientaner – sco emprima palì en tut il mund – ina monografia speziala (C.A. Weber, 1902).

Dapi la fin da l’Uniun sovietica il 1990 sa reducescha la populaziun da la Lituania cuntinuadamain. Il 1992 ha quella cuntanschì il maximum cun stgars 3,7 milliuns. L’onn 2000 eran quai anc 3,5 milliuns ed il 2010 3,32 milliuns abitants. A questa sminuziun contribuescha tant l’emigraziun (cf. sutvart) sco er il surpli da mortoris. Areguard las naschientschas ha l’onn 2002 muntà il punct il pli bass cun radund 30 000 (8,6 per 1000 abitants). Dapi lura è la rata puspè creschida levet (35 625 naschientschas l’onn 2010). Entant ch’il vest dal pajais enconuscha dapli naschientschas che las ulteriuras parts dal pajais, èsi surtut las regiuns da cunfin en l’ost ch’èn segnadas d’envegliament (bundant 20 mortoris per 1000 abitants en ils circuls Ignalina, Švenčionys e Zarasai, entant che la media en l’entir pajais muntava il 2007 a 13,5).

Tenor indicaziun da l’Uffizi da statistica da la Lituania vivan dapi l’avrigl 2012 main che 3 milliuns persunas en il pajais. Il motiv principal furma la migraziun (cf. sutvart). 

Dapi la fin da la Segunda Guerra mundiala è la Lituania stada marcada d’ina vieuta rasanta ad ina societad urbana. Il 1959 vivevan anc 3/5 da la populaziun sin la champagna, il 1970 era la relaziun gulivada ed il 1990 è stada cuntanschida la relaziun da dus terzs populaziun urbana ed in terz populaziun rurala.

Mintg’onn bandunan intginas dieschmilli persunas la Lituania en in auter pajais. Tar la gronda part da questas persunas sa tracti da giuvens creschids che vesan a l’exteriur meglras schanzas sin il martgà da lavur che en la Lituania. Ils pajais da destinaziun ils pli populars èn il Reginavel Unì, l’Irlanda e la Scandinavia. Tenor stimaziuns vivan u lavuran plinavant radund 200 000 Lituans a l’exteriur occidental senza che las autoritads lituanas hajan enconuschientscha da quai. 

Da l’autra vart ha il bun svilup economic en la Lituania manà ad in’emigraziun creschenta or da la Bielorussia vischina. Ed er la procentuala da Lituans che returnan en il pajais crescha en congual cun ils immigrants d’autra naziunalitad.

L’aspectativa da vita en la Lituania è bain creschida in pau ils ultims onns; tuttina giascha quella anc adina cleramain sut la media europeica (2012: dunnas 79,45 onns, en Germania p.ex. 82,1 onns; umens 68,39 onns, Germania 76,6 onns). Surtut tar ils umens èn questas bassas valurs d’attribuir per ina buna part a l’abus d’alcohol. Tenor il rapport da la WHO èn morts en Lituania 2900 umens e 950 dunnas en consequenza dal consum d’alcohol (quai èn 30 % da tut ils mortoris). Il 2013 aveva la Lituania entaifer ils 34 stadis commembers da l’OECD il pli aut consum d’alcohol per persuna.

Tenor la WHO è la Lituania er il pajais cun la pli auta rada da suicidis en tut il mund (38,6 cas sin 100 000 persunas il 2005 resp. 35,6 cas il 2009, suandà da la Russia cun 31,7 cas il 2006). Sco motivs principals vegnan inditgads l’aut consum dad alcohol e l’aut grad da dischoccupaziun da giuvenils. Ultra da quai ha la Lituania la pli auta rata da delicts da mazzament en tut l’Uniun europeica.

Per lunschor la gronda part da la populaziun furman ils Lituans sezs. Igl existan però er en il pajais intginas minoritads naziunalas, surtut Slavs. La minoritad polonaisa da la Lituania, che viva per gronda part en il district Vilnius, è per part sesenta là dapi plirs tschient onns.

Persunas d’origin russ èn oravant tut arrivadas durant e suenter la Segunda Guerra mundiala en la Lituania, cura ch’il pajais furmava ina part da l’Uniun sovietica. La populaziun da lingua russa en la Lituania sa concentrescha sin la chapitala Vilnius (surtut en la part da la citad Naujoji Vilnia), la citad da port Klaipėda, la regiun Mažoji Lietuva e lieus d’industria sco Elektrėnai e Visaginas.

Entant ch’il russ furma per la generaziun mesauna e veglia la lingua franca, surpiglia tar ils giuvens l’englais questa rolla.

Sper 84 % Lituans vivan en il pajais (situaziun dal 2011): 6,58 % Polonais, 5,81 % Russ, 1,19 % Bieloruss, 0,54 % Ucrainais. Ils ulteriurs procents sa repartan sin autras naziunalitads e sin minoritads naziunalas (Gidieus, Roma, Tatars e.a.).

Lituan sco lingua materna discurran radund 2,7 milliuns persunas. Il lituan tutga tar las linguas balticas, a las qualas appartegna er il letton (ma betg l’eston che fa part da las linguas slavas). Areguard bleras atgnadads linguisticas vegn il lituan considerà sco ina lingua spezialmain arcaica che stat perquai fitg datiers da la lingua indogermana oriunda.

Sin la segunda plazza da las linguas che vegnan discurridas en la Lituania sa chatta il polonais. Questa lingua è surtut preschenta en la part orientala dal pajais, en spezial en las regiuns ruralas enturn Vilnius ed en la regiun enturn Dieveniškės. Malgrà las deportaziuns suenter la Segunda Guerra mundiala era sa mantegnida là ina gronda minoritad polonaisa. Pervi da la lunga preschientscha dal russ en la Lituania è il polonais che vegn discurrì en questas regiuns per part sa maschadà cun expressiuns russas; ins numna perquai questa varietad ‹polonais lituan›.

La gronda part dals Lituans (80 %) èn catolic-romans, radund 4,1 % èn ortodoxs. Vilnius furma la sedia d’in nunzi apostolic ch’è responsabel sco represchentant diplomatic dal papa per la Lituania, la Lettonia e l’Estonia. A las baselgias luteranas e refurmadas appartegnan tut en tut ca. 2,1 % dals abitants dal pajais. Tenor ina retschertga dal 2008 han bundant dus terzs dals catolics inditgà ch’els pratitgeschian lur cretta; 10 % da tut las persunas interrogadas han resguardà sasezzas sco betg cartentas.

En la Lituania vivan en pli ca. 21 000 muslims (0,6 %). La cumpart da la populaziun gidieua muntava avant la Segunda Guerra mundiala a 9 %. Durant l’occupaziun tudestga da la Lituania ils onns 1941 fin 1944 èn bundant 90 % dals gidieus vegnids mazzads.

Il num ‹Lituania› cumpara l’emprima giada l’onn 1009 sco ‹Litua› (en las ‹Annalas da Quedlinburg›).

Ils origins da la Lituania sco stadi èn da chattar en il 13avel tschientaner, suenter che stirpas balticas avevan colonisà il territori a partir dal terz millenni a.C. Cun consentiment dal papa è il prinzi Mindaugas vegnì curunà il 1253 sco retg; ad el èsi reussì da suttametter a sia suveranitad las stirpas vischinantas. Ses reginavel cumpigliava tar sia mort l’onn 1263 ca. il territori da la Lituania odierna. La furmaziun dal stadi è gist anc reussida a temp per pudair far frunt als chavaliers da l’Urden teutonic ch’avanzavan tant nà dal nord sco er nà dal sid.

Parallelamain è succedida gia en il 14avel tschientaner l’expansiun vers ost. Suenter che la veglia rus da Kiew era ida en ruina causa l’arrivada dals Mongols, èn sa furmads plirs principadis successurs. Pervi da l’Urden teutonic n’ha la Lituania betg pudì expander vers vest, entant ch’en l’ost aveva l’arrivada dals Mongols (ch’èn vegnids numnads pli tard Tatars) manà ad in vacum da pussanza. En quel è avanzà il gronducadi da la Lituania adina dapli ed è arrivà cun la conquista da Kiew (suenter il 1462) en concurrenza directa cun il gronducadi da Moscau per la predominanza entaifer ils ducadis parzials russ. L’expansiun vers ost da la Lituania ha chattà sia culminaziun en l’emprima mesadad dal 15avel tschientaner. 

L’onn 1386 ha il gronduca Jogaila surpiglià tras maridaglia e conversiun al cristianissem – suenter la mort da Mindaugas era la Lituania puspè daventada pajauna – la curuna polonaisa, fundond uschia l’uniun persunala polonais-lituana. Jogaila (polonais: Jagiello) ha fundà la dinastia dals Jagiellons. Suenter la battaglia victoriusa sper Tannenberg l’onn 1410 è la smanatscha tras l’Urden teutonic stada eliminada definitivamain. Questa battaglia avevan gudagnà las forzas armadas unidas da la Pologna e Lituania.

La stretga uniun politica da la Pologna e Lituania ha manà il 1569 a l’uniun reala da Lublin. Cun quella è ida a fin l’independenza da la Lituania, e quai suenter che l’aristocrazia lituana era gia vegnida ils decennis precedents adina pli fitg sut l’influenza da la cultura e lingua polonaisa. Uschia è la Lituania ida dal temp da la refurmaziun la via polonaisa ed è restada catolica, entant che la part nordica dal Balticum, influenzada pli ferm nà da vart tudestga, è daventada protestanta. Fin las divisiuns da la Pologna ha la Lituania furmà ina part dal stadi polonais; il 1795 è il territori lituan alura vegnì sut domini russ. Duas sullevaziuns da vart dals Polonais e Lituans ils onns 1831 e 1863 ha il zar russ supprimì a moda sanguinusa.

L’Emprima Guerra mundiala cun la Revoluziun d’october e la guerra civila sequenta han manà il favrer 1918 – sut occupaziun tudestga – a la proclamaziun da la republica independenta Lituania; suenter cumbats cunter l’Armada cotschna e truppas polonaisas èsi propi reussì da far valair quella. La chapitala na furmava da quel temp però betg la sedia istorica dal gronducadi, mabain Kaunas, damai che la regiun da Vilnius era occupada da la Pologna (dal 1920 fin il 1939, cumbain annullà da la Societad da las Naziuns il 1923). La democrazia parlamentara, introducida cun la constituziun dal 1922, è vegnida messa ord vigur cun il putsch dad Antanas Smetona il december 1926; Smetona ha silsuenter regì a moda dictatorica fin il 1940. Ins ha relaschà novas constituziuns ch’han confermà il reschim autoritar da Smetona, tranter auter las constituziuns lituanas dal 1928 e 1938. Ils 23 da mars 1939 ha la Lituania stuì ceder il Territori da la Memel al Reich tudestg. Questa regiun aveva appartegnì fin il 1919 a la Germania, era dapi lura dispitada tranter la Germania e la Lituania e steva perquai dapi il Contract da pasch da Versailles sut administraziun franzosa (per incumbensa da la Societad da las naziuns). Ils 10 da schaner 1923 avevan corps da voluntaris lituans occupà la regiun ch’era sinaquai vegnida annectada da la Lituania. 

Cun l’erupziun da la Segunda Guerra mundiala è creschida la pressiun da vart da l’Uniun sovietica. Il zercladur 1940 ha Smetona abditgà e suenter l’invasiun da truppas sovieticas è vegnida nominada ina regenza prosovietica, la quala ha declerà ils 3 d’avust 1940 l’adesiun a l’Uniun sovietica. Suenter l’entschatta da la Guerra tudestg-sovietica han truppas tudestgas conquistà fin il fanadur 1941 il territori statal da la Lituania. Sinaquai han ins mazzà fin il december 1941 la gronda part da la populaziun gidieua. Quai è succedì tras gruppas d’acziun da la polizia da segirezza e dal SD cun sustegn da gidanters lituans e da la polizia auxiliara collavuraziunistica. Ils survivents èn vegnids concentrads en ghettos. 90 % da la populaziun gidieua dal pajais n’ha betg survivì la fin da la guerra.

En rom da si’offensiva da stad l’onn 1944 ha l’Armada cotschna puspè conquistà grondas parts da la Lituania. Sinaquai han ins reinstallà la Republica sovietica socialistica lituana. La resistenza dals uschenumnads ‹frars dal guaud› cunter l’occupaziun sovietica è stada difficila senza sustegn nà da l’exteriur ed è sa reducida a partir dal 1948 sin intginas paucas gruppas da partisans. En ina terza gronda unda da deportaziun ha Stalin fatg manar dieschmillis «inimis dal stadi» en la Sibiria, suenter ch’igl avevan gia gì lieu il 1940/41 e 1945/46 emprimas arrestaziuns e deportaziuns. Blers dals deportads èn morts en ils champs en l’ost da l’Uniun sovietica. 

En rom da la perestrojka, ch’ha manà en il Balticum a la Revoluziun chantanta, è la Lituania sa declerada il 1990 – sco emprima republica da l’anteriura Uniun sovietica insumma – sco stadi suveran, renumnond il soviet superiur en assamblea constituenta. Medemamain il 1990 ha l’Islanda renconuschì sco emprim stadi l’independenza da la Lituania. La dumengia sanguinusa da Vilnius, ils 13 da schaner 1991, han forzas militaras prosovieticas empruvà adumbatten da cupitgar la giuvna democrazia cun chars armads; 14 demonstrants giuvenils èn vegnids per la vita a la tur da televisiun. Sco reacziun sin quai èn 85 % dals Lituans s’exprimids ils 8 da favrer 1991 èn rom d’ina votaziun dal pievel a favur da l’independenza dal pajais. Suenter ch’il putsch da Moscau cunter Gorbatschow ha fatg naufragi l’avust 1991, han ils pajais dal vest renconuschì l’independenza da la Lituania e da ses stadis vischins Lettonia ed Estonia. A l’entschatta è il svilup dal pajais stà segnà d’ina crisa economica e d’instabilitad politica (pervi da la privatisaziun radicala), ma alura ha la politica da refurma fitgà adina dapli pe, surtut suenter avair surmuntà la crisa da la Russia da l’onn 2000. L’onn 2004 è la Lituania daventada commembra da l’Uniun europeica e da la NATO. Dapi il december 2007 fa la Lituania part dal spazi da Schengen.

La Lituania furma ina democrazia semipresidiala. La chapitala e sedia da la regenza da la Republica da la Lituania è la citad da Vilnius. Tenor la constituziun furma il pajais ina republica democratica e constituziunala cun separaziun da las pussanzas. Areguard la dumonda co che la democrazia vegn realisada, è la confidenza dals burgais però plitost pitschna: Tenor ina retschertga dal 2006 è la dumonda «Quant cuntents essas Vus cun il funcziunament da la democrazia en Voss pajais?» be vegnida respundida da 23 % a moda positiva.

Magari vegn la Lituania – tuttina sco l’Israel ed intgins auters stadis da l’Europa da l’Ost e da l’Asia – er descritta sco democrazia etnica, en la quala «la dominanza d’ina gruppa etnica è instituziunalisada».

Schef dal stadi furma il president, al qual na cumpetan betg be incumbensas represchentativas; anc avant il minister da l’exteriur è el numnadamain responsabel per la politica da l’exteriur dal pajais. Ultra da quai dispona el d’in dretg da veto ch’al lubescha da bloccar leschas ch’èn vegnidas relaschadas dal parlament. Tenor il protocol al suondan en l’ierarchia statala il parsura dal parlament ed il primminister.

Il parlament lituan vegn numnà Seimas. Quest num deriva dal term polonais ‹Sejm› e renviescha a la lunga istorgia communabla da la Lituania e da la Pologna. Il parlament d’ina chombra consista da 141 parlamentaris che vegnan elegids per quatter onns. Cun ina maioritad da dus terzs ha il parlament la pussaivladad da midar la constituziun.

Schef da la regenza da la Lituania è il primminister. El dispona da la cumpetenza da dar avant las lingias directivas per la politica da la regenza. 

Abstrahà dals conservativs e dals socialdemocrats na dispona la gronda part da las partidas betg d’in program da partida u d’ina orientaziun ideologica fixa. La gronda part da las partidas pitschnas han ins fundà sco plattafurma per persunas singulas. Perquai ch’i dat relativamain savens crisas da la regenza e midadas areguard las maioritads en il parlament, n’è la muntada politica da questas partidas pitschnas betg da sutvalitar. 

Associaziuns d’interess na giogan en il sistem politic betg ina rolla uschè centrala sco en auters pajais. Ils sindicats èn da pitschna muntada tant en la vita politica sco er sociala. 

La Lituania fa part da bleras organisaziuns internaziunalas. Sco pli impurtantas directivas da la politica da l’exteriur pon valair ils lioms cun il vest, l’integraziun europeica e transatlantica sco er la stabilitad regiunala en l’Europa. Tut quai s’exprima en il fatg che la Lituania è daventada il 2004 commembra da la NATO.

Terms impurtants areguard la collavuraziun cun ils vischins en il vest han er furmà l’adesiun a l’Uniun europeica il 2004, l’extensiun dal spazi da Schengen il 2007 e l’introducziun da l’euro il 2015. Oriundamain vulevan ins gia introducir l’euro il 2007; l’emprima giada insumma ha la Cumissiun europeica però refusà questa dumonda enfin ch’è stada reglada la problematica da l’inflaziun a l’intern dal pajais.

La relaziun tranter la Lituania e la Russia è percunter tendida. Quai sa mussa adina puspè en furma da discharmonias sin il champ economic e politic. Il 2013 ha la regenza russa per exempel scumandà l’import da products da latg da la Lituania; sco reacziun ha la regenza lituana prendì or dal program in emettur da televisiun russ. 

En rom da si’extensiun a l’ost èn la Tschechia, la Pologna e l’Ungaria daventads il 1999 stadis commembers da la NATO. Silsuenter è suandà l’invit als stadis Estonia, Lettonia, Lituania, Slovachia, Slovenia, Bulgaria e Rumenia; tut quels èn s’associads il 2004 a la NATO.

A la Lituania mancan agens aviuns da chatscha moderns. Perquai è staziunada permanentamain ina squadriglia d’aviuns da chatscha dals alliads da la NATO sin la plazza aviatica Zokniai sper Šiauliai.

Il 2015 ha il parlament lituan puspè introducì l’obligaziun generala da far servetsch militar. Quest pass è succedì sut l’impressiun da l’annexiun da la Crim tras la Russia e da la Guerra en l’Ucraina.

Dapi la refurma administrativa dals onns 1990 datti en Lituania be in stgalim da corporaziuns territorialas cun radunanza e president elegì. Igl èn quai las 60 Savivaldybės (‹corporaziuns autonomas›). Il stgalim sutvart furman las radund 600 vischnancas cun incumbensas administrativas, ma senza organs d’autonomia communala. La gronda part da las citads e dals vitgs na furman betg corporaziuns territorialas, mabain be unitads statisticas. 

Sur il nivel d’autonomia exista anc il nivel administrativ. Ils diesch districts administrativs dal pajais èn: 

Fin il 2010 eran ils districts munids cun prefects che vegnivan installads da la regenza; quels na disponivan da nagins organs, ma eran munids cun administraziuns.

Tradiziunalmain vegn la Lituania sutdividida en quatter regiuns istoricas. Igl èn quai la Lituania Superiura (Aukštaitija), la gronda da las quatter regiuns che tanscha dal nordost fin tar la chapitala Vilnius. Questa regiun è ritga da collinas e lais; ed en il center sa chatta il parc naziunal Aukštaitija. Las ulteriuras regiuns èn la Lituania Inferiura (Žemaitija), la regiun Suvalkija u Sūduva en il sidvest, ch’è tradiziunalmain bainstantanta, e la regiun Dzūkija en il sid ch’è tradiziunalmain plitost povra. Ina tschintgavla regiun, la quala vegn per ordinari considerada en la Lituania sco part da la Lituania Inferiura, furma la Lituania Pitschna (Mažoji Lietuva); i sa tracta da la sdrima al vest dal pajais che tutgava fin il 1918 sco part da la Prussia da l’Ost a l’Imperi tudestg. 

La vieuta da l’economia planisada a l’economia da martgà è stada colliada cun midadas structuralas. Quellas èn anc s’intensivadas dapi l’adesiun dal pajais a l’Uniun europeica il 2004. Dapi intgins onns sa chatta l’economia lituana en expansiun (creschientscha annuala da ca. 3 %). Il 2015 ha il product naziunal brut (PNB) dumbrà 37,2 milliardas euros, il PNB per persuna 13 282 euros. La quota da dischoccupads munta a 9,1 % (dischoccupaziun da giuvenils ca. 17 %).

Ils pli impurtants artitgels d’export da la Lituania furman maschinas, artitgels electronics, textilias e victualias.

Il 2011 ha il pajais dumbrà 1,79 milliuns turists da l’exteriur; la pli gronda gruppa tenor pajais d’origin han furmà ils Russ.

Il 2009 ha la bilantscha dal stadi cumpiglià expensas en l’autezza da 16,6 milliardas dollars ed entradas da 13,1 milliardas dollars. Da quai resulta in deficit en l’autezza da 9,6 % dal product naziunal brut. Ils debits dal stadi han muntà il 2009 a 7,6 milliardas dollars ubain 20,9 % dal product naziunal brut.

Dal product naziunal brut èn vegnids impundids il 2006 6,2 % en la sanadad, 5,0 % en la furmaziun e 1,7 % en il militar.

Durant ils onns 1990 e 2000 ha l’ovra atomara Ignalina (ch’è dal medem tip da construcziun sco Tschernobyl) per part furnì bundant 75 % da l’electricitad dal pajais. Da quel temp aveva la Lituania sper la Frantscha la pli auta cumpart d’energia atomara en tut il mund. L’emprim dals dus reacturs han ins mess ord funcziun l’entschatta 2005; il segund la fin 2009 en connex cun las obligaziuns ch’eran vegnidas adossadas al pajais en connex en rom da l’adesiun a l’UE. Il 2008 avevan bain radund 90 % dals votants acceptà in referendum areguard la prolungaziun dal temp da manaschi da l’ovra atomara Ignalina; quel aveva però fatg naufragi pervi da la participaziun memia bassa a las elecziuns (48,4 %). En mintga cas n’avess la cumissiun da l’UE bain betg consentì ad ina midada dal contract d’adesiun. A mesa vista vegn l’implant d’energia a gas da Lietuvos a pudair garantir l’autoprovediment dal pajais. Questa nova situaziun munta però ina gronda dependenza da la furniziun da combustibels fossils (gas, ieli grev) or da la Russia. Per reducir questa dependenza era previs da construir l’ovra atomara da Visaginas. A chaschun d’in referendum èn però s’exprimids l’october 2012 64,8 % dals votants cunter il return dal pajais a l’energia atomara.

Ils ultims onns vegnan nizzegiadas dapli energias regenerablas, surtut a basa da biomassa. Per quai procuran surtut meds da promoziun da l’Uniun europeica sco er organisaziuns nunguvernamentalas ed associaziuns da producents d’energia. 

La Lituania dispona da la meglra rait da fibras da vaider da l’entira Europa. Tenor in studi dal 2013 disponivan radund 32 % da las chasadas da FTTH (Fibre To The Home). Da quels han radund 31 % serrà in contract correspundent. Cun quai sa chattava la Lituania davant la Svezia cun stgars 23 %.

Per ordinari ha il proprietari da la colliaziun da pajar sez l’access a la rait fixa. Perquai datti, surtut en regiuns ruralas, savens be là ina rait fixa, nua che quella era vegnida bajegiada dal temp da l’occupaziun sovietica. Correspundentamain è la rait mobila (telefon ed internet) sviluppada fitg bain e funcziuna per ordinari er sin la champagna ed entamez il guaud.

La Lituania è da gronda muntada sco pajais da transit tranter l’Europa Centrala e l’Europa dal Nord, tranter l’oblast Kaliningrad ed il coc da la Russia sco er tranter la Bielorussia e la Scandinavia. Ultra da quai gioga la Lituania in’impurtanta funcziun sco pajais da transit dad ieli. La chapitala Vilnius sa chatta fitg datiers dal cunfin exteriur da l’Uniun europeica vers la Bielorussia; perquai è la segund gronda citad Kaunas da pli gronda muntada areguard la planisaziun dal traffic.

Cun radund 220 morts en il traffic stradal sin in milliun abitants vala il traffic en la Lituania sco il pli privlus en l’entira Uniun europeica.

La rait da vias da la Lituania vegn amplifitgà actualmain. Las pli impurtantas colliaziuns furman las autostradas Vilnius–Kaunas–Klaipėda e Vilnius–Panevėžys sco er la via da transit E 67 ‹Via Baltica› da Varsovia sur Kaunas e Riga fin Tallinn resp. Helsinki che duai a lunga vista vegnir transfurmada en in’autostrada. 

A Klaipėda sa chatta in impurtant port da mar cun colliaziuns da navs-fera en l’entira regiun da la Mar da l’Ost; adina dapli daventa er il traffic da martganzia impurtant. Flums pli gronds che vegnan tratgs a niz per la navigaziun interna furman Memel e Neris.

La Lituania dispona da quatter plazzas aviaticas internaziunalas: Vilnius, Kaunas (a Karmėlava); be darar resp. stagiunal vegnan purschidas colliaziuns internaziunalas a Palanga e Šiauliai. Ultra da quai è er la plazza aviatica da Riga en Lettonia d’impurtanza per la Lituania.

Fin en ils onns 1990 manavan las colliaziuns da viafier directas tranter Vilnius e Varsovia sur territori da la Bielorussia. Suenter la fin da l’Uniun sovietica han ins – per evitar las formalitads da duana – reavert la lingia che maina sur Šeštokai (LT) e Suwałki (PL).

Sco en l’entira ulteriura Uniun sovietica ed en Finlanda mesira la largezza dals binaris en Lituania 1520 mm (en l’Europa Centrala: 1435 mm). Perquai èn ils trens ch’arrivan nà da la Pologna en il Balticum munids cun indrizs per midar la distanza tranter las rodas. Quai succeda a moda automatica sin tschancuns endrizzads per quest intent.

Tant per il transport da persunas naziunal sco er internaziunal gioga er il traffic da bus in’impurtanta rolla (p.ex. Eurolines, Ecolines u Lux-Express).

La Lituania è segnada d’influenzas culturalas fitg differentas. Da menziunar èn qua la lunga dependenza statala ed il fatg ch’ins ha mantegnì ditg ina religiun statala betg cristiana; alura la lunga istorgia communabla cun la Pologna, las relaziuns cun la Hansa en la Mar da l’Ost e l’appartegnientscha a l’imperi zaristic russ. Da qua derivan las baselgias ortodoxas che n’èn betg da survesair en las citads grondas. En il vest dal pajais èn visiblas fermas influenzas tudestgas, danaisas e svedaisas, per exempel en furma da la gotica da quadrels u en la construcziun cun travs. En l’ost, surtut a Vilnius, èn preschents blers elements culturals da la Pologna.

Tar il patrimoni cultural e natiral mundial da l’UNESCO tutgan la citad barocca da Vilnius, las exchavaziuns archeologicas Kernavė sco er las dunas sin la Peninsla Neringa.

Il diever dal lituan sco lingua litterara cumenza en il 16avel tschientaner. Adina puspè è la litteratura stada segnada da las occupaziuns resp. da las cundiziuns generalas imponidas da las pussanzas d’occupaziun. Impurtants represchentants da la litteratura lituana dal 20avel tschientaner èn Juozas Tumas-Vaižgantas, Antanas Vienuolis, Bernardas Brazdžionis, Vytautas Mačernis e Justinas Marcinkevičius.

Emprims films lituans èn vegnids realisads a partir dal 1909 da Lituans ch’eran emigrads en l’America. L’entschatta dals onns 1940 han ins fundà il Lietuvos kino studija; dal temp da l’Uniun sovietica steva quel sut controlla statala e furmava la suletta centrala per l’industria da film lituana. Mintg’onn vegnivan producids trais fin quatter films dramatics e trenta fin quaranta films documentars.

Suenter l’independenza l’onn 1990 è il dumber da films lituans ì fermamain enavos ed interpresas privatas han surpiglià l’industria da film. Enconuschents en rom da festivals da film internaziunals èn daventads ils cineasts Arūnas Matelis e Šarūnas Bartas.

En l’entir pajais exista in grond dumber da museums; quai betg mo en citads pli grondas, mabain per part er en lieus isolads nua che vivevan enconuschentas persunalitads da la Lituania.

Il museum naziunal è situà a Vilnius sper la catedrala. Ulteriuras filialas èn repartidas en l’entira citad. L’exposiziun è ritga d’exponats archeologics ed etnografics.

A Kaunas sa chatta il museum dal diavel. En la mitologia lituana ed er sco simbol en la vita da mintgadi gioga il diavel in’impurtanta rolla. Cuntrari a l’imaginaziun en l’Europa Centrala na vala quel betg sco persunificaziun dal nausch absolut, mabain plitost sco in rampignader, il qual po er gidar ils umans. Perquai datti er en la publicitad relativamain bleras statuas ed illustraziuns dal diavel.

En il lieu da cura Palanga a la Mar da l’Ost, en il chastè dal cont Tiškevičius, sa chattan collecziuns unicas dad ambra. In pitschen museum dad ambra exista er a Nida.

En il center da Vilnius sa chatta il museum da l’anteriur servetsch secret da l’Uniun sovietica KGB (Komitet gosudarstvennoy bezopasnosti, ‹Comité per la segirtad dal stadi›). Quel è endrizzà en l’anteriura praschun dal KGB.

Dapi l’independenza da la Lituania l’onn 1991, ch’è vegnida purtada da grondas parts da la populaziun, dispona la democrazia d’in vast sustegn. Correspundentamain èn sa sviluppadas instituziuns relativamain stabilas. Medemamain èn sa furmadas entaifer la populaziun gruppas d’interess da tut gener. La muntada dals sindicats è però – sco gia menziunà survart – plitost pitschna. En general ha la populaziun plitost ina tenuta sceptica envers las instituziuns statalas e las decisiuns dal parlament.

L’influenza da la baselgia en la Lituania è creschida fermamain dapi l’independenza dal pajais il 1991. L’omosexualitad è vegnida legalisada il 1993; facticamain vegn ella però anc adina tabuisada.

En la Lituania cumparan radund diesch gasettas dal di cun derasaziun naziunala, tranter auter la ‹Lietuvos rytas› ed er la ‹Baltische Rundschau› da lingua tudestga. L’internet è derasà vastamain è quai a basa d’in’infrastructura fitg sviluppada (cf. survart).

Il sport naziunal da la Lituania furma il ballabasket. La squadra naziunala da ballabasket tutga tar las meglras da l’Europa ed è gia daventada trais giadas campiun europeic. Gia il 1937 e 1939 ha la Lituania gudagnà il campiunadi europeic en quest sport. Questa tradiziun ha chattà sia cuntinuaziun dal temp sovietic, cura che giugaders da la Lituania han adina puspè fatg part da la selecziun sovietica. Enconuschents nums èn Kazys Petkevičius, Modestas Paulauskas, Sergėjus Jovaiša, Arvydas Sabonis, Rimas Kurtinaitis e Šarūnas Marčiulionis. Marčiulionis ha tutgà ensemen cun Sabonis tar la generaziun dad aur dal ballabasket lituan; quella ha cuntanschì a partir da l’entschatta dals onns 1980 numerus success per l’Uniun sovietica ed a partir dal 1991 per la Lituania. Omadus giugaders èn vegnids recepids en la Hall of Fame da la NBA.

Tar ils emprims gieus olimpics suenter avair reacquistà l’independenza ha la squadra dals umens gudagnà il 1992 surprendentamain bronz; quest success ha pudì vegnir repetì ils onns 1996 e 2000. Suenter argient il 1995 è la nova generaziun enturn Jasikevičius ed Arvydas Macijauskas daventada il 2003 campiunadi europeic.

Ulteriurs sports da squadra èn percunter main populars. Il pli grond stadion da ballape dal pajais a Kaunas tschiffa be gist 20 000 aspectaturs. Tar ils sports olimpics ha la Lituania tradiziunalmain ferms bittaders sco er ciclists e rembladers. 

Il di da l’independenza statala vegn festivà ils 6 da fanadur; ulteriurs dis da festa che regordan a l’istorgia politica èn ils 16 da favrer (di da la reconstituziun dal stadi lituan) ed ils 11 da mars (di da la restauraziun da l’independenza statala). Daspera vegnan festivads ils dis da festa cristians ed il prim da matg sco di da la lavur.

 




#Article 34: Lettonia (5169 words)


La Lettonia (letton Latvija) è in stadi situà en il Balticum. Sco stadi d’amez dals trais stadis baltics cunfinescha el en il sid cun la Lituania, en il sidost cun la Bielorussia, en l’ost cun la Russia, en il nord cun l’Estonia ed en il vest cun la Mar da l'Ost. La chapitala ed a medem temp la pli gronda citad dal pajais è Riga.

Dapi che l’extensiun a l’ost da l’Uniun europeica è entrada en vigur l’entschatta da matg 2004, è la Lettonia commembra da l’Uniun europeica. Dapi il prim da schaner 2014 fa il pajais er part da la zona da l’euro.

La Lettonia sa chatta en il center dal Balticum. L’attribuziun da lezza regiun è percunter contestada e vegn influenzada, sper facturs geografics, er d’aspects istoric-culturals e politics. Uschia vegn il Balticum considerà – tut tenor il context – sco part da l’Europa dal Nord, da l’Europa Centrala, da l’Europa da l’Ost u da l’Europa dal Nordost.

La Lettonia consista surtut da las quatter regiuns istoricas Curlandia (letton: Kurzeme) en il vest, Livonia (letton: Vidzeme) en il nordost, Semgalia (letton: Zemgale) sco strivla graschla tranter Daugava ed il cunfin lituan sco er Letgalia (letton: Latgale) en il sidost. Per gronda part sa tracti d’ina cuntrada da collinas da morena cuvertas da guaud e ritga da lais, e d’ina regiun da costa pauc structurada. Ils pli lungs flums da la Lettonia furman la Daugava e la Gauja. Il pli grond lai dal pajais è il Lubāns cun 80,7 km², il Lai Drīdzis è il pli profund lai dals trais pajais baltics (65,1 m). La chapitala Riga furma er geograficamain il center dal pajais pauc colonisà. Il Golf da Riga, situà en la Mar da l’Ost, sa chatta en il nordvest dal pajais.

La Republica da la Lettonia mesira ina surfatscha da 64 589 km². Il pajais cunfinescha en il nordost sur ina lunghezza da 343 km cun l’Estonia, en l’ost sur ina lunghezza da 276 km cun la Russia, en il sidost sur ina lunghezza da 161 km cun la Bielorussia ed en il sid sur ina lunghezza da 588 km cun la Lituania. La costa per lung dal Golf da Riga en il nord e la Mar da l'Ost en il vest mesira ca. 498 km; cunfins maritims ha la Lettonia cun l’Estonia e cun la Lituania. L’autezza sur mar dal pajais furma en media 87 m. La pli auta muntogna è il Gaiziņkalns, situà radund 120 km en l’ost da Riga, che mesira 311 m.

Tut en tut cuvran auas (flums, lais, lais da fermada) ina surfatscha da 2543 km². Dal terren restant servan var 40 %, numnadamain 24 710 km² a l’agricultura e radund 46 %, numnadamain 28 855 km², a la selvicultura.

La Lettonia s’extenda en direcziun ost-vest sur ina lunghezza da 450 km ed en direcziun nord-sid sur ina lunghezza da 210 km.

Tranter il 1920 ed il 1940 era la surfatscha da la Lettonia per radund 1300 km² pli gronda, numnadamain cura che l’anteriura regiun Nova Letgalia enturn la citad Abrene/Pytalowo è vegnida attribuida al pajais (en rom dal Contract da pasch tranter la Lettonia e l’Uniun sovietica). Suenter l’occupaziun tras l’Uniun sovietica han ins attribuì quest territori a la Republica sovietica russa. Questa midada dals cunfins n’è betg vegnida revocada suenter la dissoluziun da l’Uniun sovietica. Per pudair ademplir las pretensiuns d’admissiun a l’Uniun europeica ed a la NATO è la Lettonia stada sfurzada da ceder questa regiun er de jure a la Russia. La Nova Letgalia era oriundamain populada surtut da Lettons. Il num russ per la citad Pytalowo deriva probablamain dal num dal lieu letton istoric Pie Tālavas. 

Sco tut ils stadis baltics è er la Lettonia segnada d’in clima temprà fin frestg cun envierns fraids sut 0 °C e stads cun temperaturas betg fitg autas d’en media tranter 16 e 17 °C. A Riga giascha la temperatura media annuala tar stgars 6 °C; las precipitaziuns mesiran radund 600 mm. Il pli umid èsi vers la fin da la stad, il pli sitg durant la primavaira. Il sulegl sclerescha radund 1800 fin 1900 uras l’onn, quai ch’è ina valur vaira auta.

Las costas da la Mar da l’Ost èn l’enviern per ordinari libras da glatsch. L’avust cuntanscha la temperatura da l’aua fin a 17 °C; chauds dis da stad po quella er crescher en vischinanza da la costa fin a 25 °C. 

Sper tschiervs, chavriels, lieurs, portgs selvadis e vulps cumparan er elans, lufs, lufs-tscherver, casturs e bisons europeics. L’urs brin europeic ha puspè colonisà las provinzas Latgale e Vidzeme.

En la Lettonia existan bundant 700 territoris natirals protegids, tranter quels quatter parcs naziunals. Il pli pitschen ma pli vegl da quels furma il Parc naziunal Slītere che mesira 16 145 ha. Quel è vegnì fundà l’onn 1921, durant l’emprima independenza da la Lettonia. Cun ina surfatscha da 38 114 ha è il Parc naziunal Ķemeri il segund grond ed il pli giuven da tuts quatter. Quel han ins endrizzà suenter che la Lettonia ha reacquistà l’independenza (1997). Il pli grond è il Parc naziunal Gauja. Quel cumpiglia ina surfatscha da 92 261 ha ed è vegnì avert l’onn 1973, pia dal temp che la Lettonia appartegneva a l’Uniun sovietica. Da muntada surtut per utschels migrants è il territori natiral protegì Pape, en il qual ins ha er recolonisà bisons europeics e razzas originaras da chavals e da bovs. La Lettonia ha ina lunga tradiziun da la protecziun da la natira: emprimas ordinaziuns da protecziun èn gia vegnidas relaschadas en il 16avel tschientaner.

La Lettonia enconuscha en tut 17 flums d’ina lunghezza da radund 100 km u dapli. Ils tschintg flums ils pli lungs èn: Gauja (lunghezza 452 km, sbucca en il Golf da Riga), Daugava (lunghezza totala 1005 km, da quai 352 en la Lettonia, sbucca en il Golf da Riga), Ogre (lunghezza 188 km, sbucca en la Daugava), Venta (lunghezza totala 346 km, da quai 178 en la Lituania, sbucca en la Mar da l’Ost) e Iecava (lunghezza 136 km, sbucca en la Lielupe).

Tenor la dumbraziun dal pievel da l’onn 2011 vivevan en il pajais 2,068 milliuns persunas. Tras l’immigraziun massiva nà da l’Uniun sovietica durant ils onns d’occupaziun 1944 fin 1990 era il dumber d’abitants da la Lettonia creschì da 1,9 milliuns sin bunamain 2,7 milliuns. Dapi lura è la populaziun sa sbassada fitg ferm, l’emprim pervi da la retratga da l’armada sovietica e da las famiglias dals schuldads, pli tard er pervi da las bassas quotas da naschientscha e l’emigraziun generala. Tranter il 1989 ed il 2011 è il dumber d’abitants sa sbassà per bunamain 600 000. Ils ultims onns ha quest trend negativ cuntinuà, è crudà il 2014 sut dus milliuns e fin il 2017 sin 1,95 milliuns, quai che correspunda a la situaziun dals onns 1930. En il fratemp datti però er indizis pli positivs. Tranter il 2000 ed il 2014 è la quota da naschientscha creschida en la Lettonia da 1,24 sin 1,65 uffants per dunna, quai che munta per quest interval la pli gronda creschientscha en tut l’Uniun europeica. L’aspectativa da vita munta 68,9 onns tar ils umens e 78,7 onns tar las dunnas (media dals onns 2010 fin 2015).

Sper la populaziun maioritara lettona (62,1 %) viva en il pajais ina gronda minoritad russa (26,9 %) e gruppas pli pitschnas da Bieloruss (3,3 %), Ucranais (2,2 %), Polonais (2,2 %) e Lituans (1,2 %). Vitiers vegnan las minoritads autoctonas dad Estons, Tudestgs, Roma e Tatars. Daspera datti anc ca. 2000 Suiti e 170 Livs (surtut a Riga ed en intgins vitgs da costa en la Curlandia).

Tenor la dumbraziun dal 2011 appartegnan stgars 38 % da la populaziun a minoritads etnicas. La pli gronda minoritad furman ils Russ cun ca. 27 % da l’entira populaziun. Tar quels sa tracti per gronda part da persunas emigradas tranter il 1940 ed il 1990 e da lur descendents. Parts da la minoritad russa vivan percunter gia dapi bleras generaziuns en la Lettonia; uschia furmavan ils Russ gia l’onn 1897 radund 8 % da la populaziun dal pajais (153 000 persunas).

Tranter il 1940 ed il 1990 è la cumposiziun etnica da la populaziun sa midada a disfavur dals Lettons. Lur cumpart è sa sbassada da 77 % l’onn 1935 sin 52 % l’onn 1989. A medem temp è la cumpart dals Russ creschida sin 34 %. La lingua russa ha gì durant quels onns ina posiziun dominanta en il pajais. La pussanza centrala sovietica ha promovì la russificaziun etnica e culturala da la Lettonia. Suenter ch’il pajais è puspè daventà independent, ha la lingua russa pers sia funcziun statala ed il letton è vegnì declerà sco suletta lingua uffiziala. Per la minoritad russa munta quai in problem, damai che blers avevan manchentà u refusà d’emprender durant il temp sovietic la lingua da la maioritad lettona. Fin oz furma l’integraziun da la minoritad russa ina da las sfidas da la politica interna da la Lettonia.

Or dal svilup istoric tranter il 1940 ed il 1990 sa lascha er declerar la regulaziun actuala areguard il dretg da naziunalitad. Suenter avair reacquistà il 1990/91 l’independenza, è la naziunalitad lettona vegnida concedida sulettamain a quellas persunas ch’eran gia avant il 1940 burgais dal pajais sco er a lur descendents. Quasi tut las persunas ch’eran sa tratgas natiers en il fratemp, en tut radund 30 % da la populaziun, èn vegnidas classifitgadas sco na-burgais. Il 2016 muntava la cumpart dals na-burgais a radund 12 %. Tar ils na-burgais da la Lettonia na sa tracti de facto betg da persunas senza naziunalitad. Ad els è garantì il dretg da dimora e da lavur illimità ed er areguard la protecziun sociala vegnan els tractads tuttina sco ils burgais lettons. E cuntrari als Lettons pon els viagiar senza visum en Russia. Ma ils na-burgais na pon betg surpigliar professiuns ch’èn relevantas per la segirtad dal stadi, na pon betg daventar funcziunaris statals ed èn exclus dal dretg d’eleger activ e passiv.

Persunas na-burgaisas pon sa suttametter a la procedura da natiralisaziun. Quella sa cumpona d’in test linguistic sco er d’in examen en istorgia lituana ed en civica. Tgi che vul daventar burgais dal pajais sto pia cumprovar ch’el dumogna la lingua naziunala e ch’el dispona d’enconuschientschas da basa areguard la cultura e l’istorgia dal pajais.

Da vart dal Tribunal europeic dals dretgs umans a Strasbourg è la Lettonia vegnida admonida repetidamain da far il pussaivel che las ratas da natiralisaziun creschian. Sper bundant 140 000 natiralisaziuns dapi il 1995 han 240 000 persunas anc adina il status da na-burgais. Sco impediment per augmentar la rata vegn savens fatg valair ch’ils na-burgais pon entrar en Russia senza visum sco er il fatg ch’els vegnan tractads entaifer l’Uniun europeica tuttina sco ils burgais lettons.

In ulteriur punct dispitaivel furma la chapientscha da l’istorgia da la Segunda Guerra mundiala che divergescha da vart da blers russofons: Per els vala quella, confurm a la tradiziun sovietica, sco ‹gronda guerra naziunala›, entant ch’ils Lettons accentueschan plitost il Patg tranter Stalin e Hitler e l’invasiun da l’Armada cotschna, a la quala è suandà in temp d’occupaziun da 55 onns.

Tar il letton sa tracti d’ina lingua baltica orientala entaifer la famiglia da las linguas indogermanas. Quella furma la lingua materna da ca. dus terzs da la populaziun. Ella è la lingua naziunala constituziunala ed ina da las ventgaquatter linguas uffizialas da l’Uniun europeica. Sin il segund plaz sa chatta il russ che vegn discurrì da radund 37 % dals abitants sco lingua materna. L’onn 1935 avevan be 8,8 % dals abitants da la Lettonia ragischs russas. In’ulteriura lingua baltica minoritara è il letgalian en las parts orientalas dal pajais. Questa lingua moderna è sa furmada suenter la divisiun politica da la Letgalia da l’ulteriur pajais; magari vegn questa lingua considerada sco varietad dal letton e betg sco atgna lingua. Il 2013 è mort ora il livon.

L’auta cumpart d’abitants da la Lettonia cun ragischs russas è surtut d’attribuir a l’immigraziun durant il temp d’occupaziun (1944–1990/1991), la quala è vegnida dirigida da la regenza da l’Uniun sovietica. Per ina part dals Lettons vala il russ perquai anc adina sco ‹lingua d’occupants›. En la chapitala Riga ha dapi il temp sovietic ca. mintga segund abitant ragischs russas (il 1930 eran quai be 7,86 %); en la vita da mintgadi vegn discurrì qua tant letton sco er russ. A Daugavpils, la segund gronda citad dal pajais, è la cumpart dals Lettons anc bler pli bassa (sut 20 %).

La lingua uffiziala dal pajais è il letton. Sper las scolas statalas lettonas maina la Lettonia er scolas en set linguas minoritaras e cuntinuescha uschia cun la tradiziun da la politica da furmaziun plurilingua dal temp avant la Segunda Guerra mundiala. La pli gronda lingua minoritara è il russ. Suenter la fin da l’Uniun sovietica ha questa lingua pers ses status privilegià e na giauda oz nagina protecziun giuridica speziala. Tut las dumondas ed infurmaziuns che vegnan inoltradas als uffizis ston vegnir preschentadas en ina translaziun lettona cun autentificaziun notariala. L’excepziun furman cloms d’urgenza medicinals sco er cloms sin ils numers da telefon da la polizia, ils pumpiers e.a. La Lettonia n’ha betg mess en vigur la Charta europeica da las linguas regiunalas u minoritaras.

La sperdita dal status uffizial da la lingua russa suenter l’independenza da la Lettonia ha per part manà a tensiuns e protests. Blers abitants da lingua russa èn s’opponids a las stentas dal pajais d’etablir la lingua lettona en il spazi public sco lingua principala, per part cun refusar d’emprender letton u da far diever da questa lingua. Da l’autra vart è la politica d’integraziun er segnada cleramain da success, per exempel areguard las enconuschientschas dal letton da vart da la populaziun russa. Il 1996 avevan anc 22 % dals na-Lettons inditgà d’avair insumma naginas enconuschientschas da la lingua lettona; il 2008 eran quai gia be pli 7 %. Il medem onn han 57 % dals na-Lettons inditgà d’avair bunas enconuschientschas dal letton, entant che quai eran stads il 1996 be 36 %. La midada la pli marcanta ha gì lieu tar la generaziun giuvna: Da las persunas tranter 15 e 34 onns inditgeschan 73 % da disponer da bunas enconuschientschas dal letton.

La cumpart obligatorica d’instrucziun lettona en las scolas statalas russas munta en las classas 10 fin 12 almain 60 %. Quai vegn per part considerà dals russofons sco discriminaziun ed ha schizunt manà ad in referendum. Il 2012 han 74,8 % da la populaziun votà cunter l’introducziun dal russ sco segunda lingua uffiziala. Ils na-burgais (da quel temp radund 12 % da la populaziun) n’han gì nagin dretg da votar. 

La gronda part da la populaziun da la Lettonia n’appartegna a nagina confessiun. Dapi la refurmaziun era la part centrala ed occidentala dal pajais per gronda part stada da confessiun evangelic-luterana. A quella appartegnan oz radund 250 000 Lettons, dals quals però be 40 000 sa laschan confirmar, pajan taglia da baselgia e sa participeschan al servetsch divin. Sco la baselgia catolic-romana refusa er la baselgia luterana da la Lettonia tant l’omosexualitad sco er l’ordinaziun da dunnas.

La regiun Letgalia situada en l’ost dal pajais è per gronda part catolic-romana, damai che quella è colliada istoricamain cun la Lituania e la Pologna. Ina minoritad catolica en il vest dal pajais furman ils Suiti. Omaduas baselgias han giugà in’impurtanta rolla durant la ‹revoluziun chantanta› ed han gudagnà da quel temp blers commembers.

La part da la populaziun da derivanza russa appartegna a la baselgia russ-ortodoxa. Igl èn quai fin a 400 000 persunas.

En nov citads lettonas existan cuminanzas gidieuas. La populaziun gidieua munta a ca. 9000. Avant il holocaust giugava la religiun e cultura gidieua en la regiun da la Lettonia in’impurtanta rolla.

Ultra da quai vivan en il pajais radund 6000 aderents da l’islam. Tar la gronda part da quels sa tracti da Tatars, d’Aserbeidschans e da persunas che derivan d’autras anteriuras sutrepublicas da l’Uniun sovietica.

En il segund millenni a.C. han stirpas indoeuropeicas, ils perdavants dals Lettons e Lituans da pli tard, colonisà il territori da la Lettonia. Els han stgatschà u assimilà las stirpas ungrofinnicas che vivevan là pli baud. En scrittiras anticas vegnan ils Balts numnads Aisti u Aesti.

A partir da l’onn 1202 ha l’Urden dals chavaliers portaspada conquistà ils pitschens principadis lettons; dapi il 1237 ha quest urden appartegnì a l’Urden teutonic. Sur tschientaners èn la burgaisia citadina ed ils gronds proprietaris da terren sa cumponids surtut da commembers da la classa sociala superiura tudestga.

En rom da la refurmaziun è la Lettonia daventada luterana. Sut pressiun da las pussanzas vischinas è il territori da la Confederaziun da la Livonia vegnida en il 16avel tschientaner en dependenza da la Pologna-Lituania, quai che declera daco che parts da la Lettonia èn oz catolicas. Fin en il 18avel tschientaner èn la Russia, la Svezia e la Pologna sa cumbattidas per il Balticum. Tras las numerusas guerras ed epidemias è il dumber da la populaziun sa diminuì fermamain. En consequenza da la terza partiziun da la Pologna è il territori da la Lettonia vegnì integrà l’onn 1795 en l’Imperi russ. Entant che la classa superiura baltic-tudestga ha pudì mantegnair ses privilegis, era sa furmada, sut assimilaziun da las stirpas livas, ina classa da la populaziun lettona relativamain omogena.

En il 19avel tschientaner (Giuvens Lettons) e surtut a l’entschatta dal 20avel tschientaner (Nov moviment) ha cumenzà in moviment d’independenza. Suenter la Revoluziun russa e l’Emprima Guerra mundiala ha la Lettonia declerà ils 18 da november 1918 si’independenza ed ha er pudì far valair quella en rom da la Guerra d’independenza lettona. Ils onns 1920 ha la Lettonia vivì in temp da fluriziun economic e cultural. Sulettamain l’onn 1922 han ins avert 300 bibliotecas communalas. Areguard il dumber dals cudeschs publitgads (en relaziun cun il dumber d’abitants) sa chattava la Lettonia – suenter l’Islanda – sin il segund plaz en tut l’Europa. A partir da l’onn 1920 ha il stadi letton avert represchentanzas diplomaticas en blers pajais europeics sco er en China ed en ils Stadis Unids. Ils 7 da november 1922 è entrada en vigur la constituziun ch’ha anc oz vigur legala. La Lettonia è er daventada commembra da la Societad da las Naziuns. La legislaziun areguard las minoritars era fitg toleranta per lez temp; il stadi manava scolas en set linguas minoritaras. Suenter in putsch tras Kārlis Ulmanis ils 15 da matg 1934 è la constituziun per part vegnida messa ord vigur ed il stadi manà a moda autoritara.

Durant la Segunda Guerra mundiala ha l’Uniun sovietica occupà il 1940 la Lettonia ed in onn pli tard il Reich tudestg. Durant l’occupaziun sovietica han gì lieu ils 14 da zercladur 1941 deportaziuns en massa: bundant 15 000 persunas èn vegnidas manadas en gulags ed en l’uschenumnada domiciliaziun speziala. Tenor lur appartegnientscha etnica eran 81,3 % dals deportads Lettons, 11,7 % Gidieus. 40 % dals deportads n’han betg survivì las torturas ed èn morts ubain gia en viadi u en consequenza da la lavur inumana. 700 persunas han ins sentenzià a la mort e sajettà. Durant l’occupaziun naziunalsocialistica è vegnida assassinada quasi l’entira populaziun gidieua restanta da la Lettonia, e quai er cun agid da collavuraturs locals.

Vers la fin da la Segunda Guerra mundiala ha l’Armada cotschna puspè occupà la Lettonia; cunter il dretg internaziunal han ins integrà quella sco sutrepublica da l’Uniun sovietica. Sut il reschim sovietic, surtut il mars 1949, èn vegnids deportads blers Lettons en l’Asia Centrala. Dals stadis baltics han ins manà davent dapli che 90 000 persunas, da quellas bunamain la mesadad da derivanza lettona. La sutrepublica sovietica lettona è stada suttamessa ad ina politica da russificaziun.

Ils 4 da matg 1990 ha il cussegl superiur da la sutrepublica sovietica lettona decidì da puspè metter en vigur l’independenza. De facto ha la decisiun dal parlament però pir sa laschà realisar suenter la fin da l’Uniun sovietica, numnadamain ils 21 d’avust 1991.

Il 2004 è la Republica da la Lettonia daventada commembra da l’Uniun europeica e da la NATO. Il 2014 ha la Lettonia introducì sco segund stadi baltic l’euro. Il 2016 è il pajais ultra da quai daventà commember da l’Organisaziun da cooperaziun e svilup economic en Europa.

La constituziun da la Lettonia furma la versiun modernisada da quella dal 1922. Dal temp dal reschim autoritar sut Karlis Ulmanis (1936) era quella stada parzialmain ord vigur e dapi l’occupaziun sovietica (1940) era ella de facto stada abolida dal tuttafatg. Suenter avair recuperà l’independenza ils 4 da matg 1990 è la constituziun entrada en vigur l’emprim parzialmain e dapi ils 6 da fanadur 1993 dal tuttafatg. Dapi lura han ins cumplettà repetidamain quella.

La constituziun da la Lettonia è ina da las pli veglias ch’èn anc en vigur en l’Europa e vala sco la sisavel veglia constituziun republicana en tut il mund.

La Lettonia furma ina democrazia parlamentara. Il dretg d’eleger da las dunnas han ins introducì il 1918. Il president nominescha e relascha la regenza elegida e represchenta il pajais envers auters stadis. El ha ultra da quai la funcziun dal schef d’armada e dispona dal dretg d’iniziativa da lescha. El sa participescha regularmain a las sesidas dal cabinet e dal parlament.

Il primminister è responsabel per las fatschentas da la regenza e maina il cabinet. Il primminister sto vegnir elegì d’ina maioritad da 100 deputads. Il cabinet sa cumpona da 17 ministers.

La politica exteriura da la Lettonia s’orientescha vers il vest; las relaziuns cun la Russia èn plitost tendidas.

En in referendum dals 20 da settember 2003 han stgars 67 % da las votantas e dals votants approvà l’adesiun a l’Uniun europeica. Quella è entrada en vigur il prim da matg 2004. Gia l’avrigl 2004 era la Lettonia daventada commembra da la NATO en rom da l’extensiun a l’ost da quella; dapi lura è la conferenza annuala ch’ha lieu a Riga daventada in dals forums centrals per discutar dumondas da la politica da l’exteriur e da la segirezza da l’Europa dal Nord. 

Dapi il 2007 dispona la Lettonia d’in’armada da professiun. Il pajais sa participescha a diversas mesiras internaziunalas per mantegnair la pasch. Il 2017 ha la Lettonia impundì 1,7 % dal product naziunal brut per il militar; tenor la recumandaziun che la NATO ha relaschà per ses stadis commembers duai il budget da defensiun vegnir augmentà sin 2 %.

La bandiera duai represchentar il lenziel da sang, en il qual in prinzi letgalian era vegnì sepulì. Las sdrimas cotschnas da la bandiera simboliseschan la bratscha ch’el aveva stendì ora en l’agonia, il stritg alv entamez il lieu, nua che giascheva il corp dal prinzi. Questa bandiera vegn gia menziunada en il 13avel tschientaner sco standarta da guerra.

Il budget statal ha cumpiglià il 2016 expensas da 10,10 milliardas dollars ed entradas da 9,76 milliardas dollars. Da quai resulta in deficit en l’autezza da 1,2 % da la prestaziun economica dal pajais. Ils debits dal stadi han muntà il 2016 34,3 % dal product naziunal brut.

Da las expensas statalas han ins impundì (en % dal product naziunal brut): 6,6 % en la sanadad (2006), 5,1 % en la furmaziun (2004) e 1,7 % en il militar (2017).

La Lettonia è dividida en 110 districts (novads) ed en nov citads ch’èn suttamessas directamain a la republica.

La Lettonia è il pli pover ed il pli pauc sviluppà dals trais pajais baltics. Il pajais è stà pertutgà tant da la crisa russa dal 1998/99 sco er da la crisa da finanzas internaziunala a partir dal 2007. Er il dumber dals dischoccupads è creschì il 2009 sin bunamain 19 %. Tuttina èsi la finala reussì d’introducir il 2014 l’euro.

Ils pajais d’export principals furmavan il 2004 la Gronda Britannia (13 %), la Germania (12 %) e la Svezia (10 %); en il fratemp han ins augmentà il stgomi da martganzias cun ils stadis vischins e cun la Pologna. Ils pli impurtants products d’export èn lain e products da lain (bundant 30 %), metals e products da metals (14 %) sco er textilias (11 %).

A la Daugava sa chattan trais implants idraulics; quels produceschan en tut radund 38 % da l’electricitad dal pajais. L’ulteriura electricitad che vegn producida en l’agen pajais deriva da dus implants da combustiun situads sper Riga; quels ardan gas natiral u, sch’il gas natiral na fiss betg disponibel en cas urgents, ieli grev. Per ina pitschna part vegn l’electricitad importada da l’Estonia. Abstrahà da la forza idraulica èn las energias regenerablas anc pauc sviluppadas.

Sper laina è turba il sulet material dad arder primar che la Lettonia producescha sez. Ieli mineral, gas natiral e charvun ston vegnir importads dal tuttafatg da l’exteriur (per gronda part da la Russia). 

Sper l’agen diever d’energia furma la Lettonia er in impurtant pajais da transit per energia. Da Polazk en la Bielorussia mainan dus conducts d’ieli a Ventspils a la Mar da l’Ost ed ina sut territori letton a Mažeikiai en la Lituania. Actualmain sa stenta la Russia però da cumplettar u remplazzar ils conducts tras pipelines che mainan a ports dad ieli situads en la Russia sezza (Primorsk sper Son Petersburg, Kaliningrad).

La viafier statala sa numna Latvijas Dzelzceļš (LDZ) e gestiunescha surtut il transport da vitgira als ports Ventspils e Liepāja. Il traffic da persunas sa concentrescha surtut sin la viafier urbana enturn la chapitala e sin las colliaziuns a lunga distanza. Pervi da la largezza dals binaris da 1520 mm èn viadis en il vest savens colliads cun midar pliras giadas il tren.

La rait da bus en la Lettonia è bundant pli spessa che quella da la viafier e sa cumpona da diversas lingias naziunalas e da bus a lunga distanza che mainan en ils stadis vischins, ma per exempel er fin a Berlin (Riga–Berlin ca. 18 uras viadi; cun l’auto ca. 12 fin 14 uras).

La pli impurtanta societad aviatica è Air Baltic. Quella sgola surtut en l’Europa dal Nord, Europa Centrala e dal Vest sco er en Russia ed en l’ulteriura Europa da l’Ost. La societad aviatica ha sia sedia a l’eroport da Riga che furma la pli gronda plazza aviatica dals stadis baltics.

La rait da vias è organisada a trais nivels: Las 15 vias principalas èn ordinadas – sco las lingias da viafier – en furma da staila enturn la chapitala. Alura suondan vias da colliaziun statalas d’emprim e da segund rang.

La Lettonia dispona d’ina da las pli spessas raits da vias en l’Europa. La cumpart da las vias statalas munta a 312 m/km². Resguardond er vias privatas e vias champestras munta quella schizunt a 1081 m/km².

Impurtants ports èn Riga, Liepāja e Ventspils (per l’ieli mineral da la Russia). Daspera existan colliaziuns da navs-fera vers la Svezia, il Danemarc e la Germania.

La Lettonia dispona d’ina fitg spessa e fitg svelta rait d’internet. Areguard la cumpart da cabel da fibras da vaider sa chattava il pajais il 2016 sin il segund plaz suenter il Giapun. Medemamain existan en tut il pajais dapli che 4500 hotspots da WLAN gratuits. A Riga èn quai radund trais per kilometer quadrat.

Culturalmain è la Lettonia en emprima lingia segnada d’influenzas da l’Europa dal Nord. Las citads veglias mussan ils tipics elements ch’èn derasads en il territori da la Hansa. Er la cultura lettona actuala dispona da vastas relaziuns vers la Svezia e la Finlanda, surtut però vers la Germania dal Nord.

La Lettonia è enconuschenta en spezial per sia folclora e sia musica populara, en la quala elements da la religiun lettona precristiana giogan ina rolla. Da las dainas tipicas – chanzuns senza rima che tractan ils pli differents temas – han ins gia rimnà dapli ch’in milliun. Da rimnar, sistematisar e publitgar questa tradiziun – oriundamain orala – ha inizià Krišjānis Barons vers la fin dal 19avel tschientaner. La stgaffa da dainas ch’el ha endrizzà per quest intent vala oz sco ina sort sanctuari naziunal. Bleras dainas e tradiziuns tractan la festa da mesastad Jāņi ils 23 e 24 da zercladur che furman dis da festa naziunals.

A Riga (durant il temp sovietic er en divers lieus a l’exteriur occidental) han lieu mintga quatter onns grondas festas da chant. A quellas sa participeschan chors lettons, da Lettons a l’exil ed internaziunals.

Sco en l’Estonia, è la cultura citadina e dals gronds proprietaris da terren stada segnada en la Lettonia sur tschientaners da Tudestgs. Questa predominanza er da la lingua tudestga entaifer l’intelligenza dal pajais è ida a fin cun la refurma agrara dal 1921 e cun il ‹clom a las minoritads tudestgas› da returnar en il Reich (1939).

En la Lettonia cumparan tschintg gasettas dal di derasadas en tut il pajais, tranter quellas ‹Diena›, ‹Neatkarīgā Rīta Avīze› e ‹Latvijas Avīze›. La Lettonia dispona mintgamai d’in emettur da televisiun e da radio statal (Latvijas Televīzija e Latvijas Radio). 

Tenor in’evaluaziun dal 2017 sa chatta la Lettonia areguard la libertad da pressa sin plaz 28 da 180 pajais.

Il sport ha entaifer il pajais ina fitg gronda muntada. Gia il 1924 è la Lettonia sa participada l’emprima giada als gieus olimpics d’enviern ed ha er cuntinuà cun questa participaziun fin l’occupaziun sovietica l’onn 1940. Fin lura avevan sportists lettons gudagnà trais medaglias a chaschun da gieus olimpics. Suenter l’independenza èn las associaziuns da sport sa furmadas da nov; dapi lura han sportists lettons puspè gì divers success tar gieus olimpics. 

Sco sport naziunal letton vala il hockey sin glatsch. L’emprim gieu da hockey en Lettonia è gia vegnì manà tras il 1909. L’onn 2006 ha il campiunadi mundial da hockey gì lieu a Riga. 

Sco ulteriur sport è il ballabasket fitg popular. Il 1935 aveva la Lettonia gudagnà l’emprim campiunadi europeic, il 1939 era il pajais daventà vicecampiun mundial.

Er en il sport da bob e da skeleton tutga la Lettonia tar l’elita mundiala. Il ballape percunter è pir daventà in pau pli popular cura che l’equipa naziunala è sa qualifitgada il 2004 per l’emprima giada per il campiunadi europeic. 

A Riga è, tenor intgins perscrutaders e legendas, cumprovà il 1510 l’emprim pignol da Nadal dal mund. Tenor auters vegn l’origin da quest usit attribuì a la citad da Strasbourg (Alsazia). 

Il pli impurtant di da festa è – sco menziunà survart – son Gion ils 24 da zercladur. Questa festa da solstizi da stad cumenza gia la saira avant, e quai cun sauts, tschupels da flurs, biera e chaschiel. Uschespert ch’il sulegl è ì da rendì ils 23 da zercladur envidan ins dapertut gronds fieus. Durmì na vegn betg durant quella notg, damai che quai portia apparentamain disfortuna fin il proxim solstizi da stad.

Ulteriurs dis da festa, sper las festas cristianas usitadas ed il prim da matg, èn la proclamaziun da la Republica da la Lettonia il 1918 (18 da november, di da la festa naziunala) e la renovaziun da l’independenza il 1990 (4 da matg).

Gronda muntada en Lettonia ha il di dal num. Per blers Lettons, surtut da la generaziun pli veglia e mesauna (en spezial en la Letgalia), è quest di pli impurtant che l’anniversari. Ins envida la famiglia, chanta chanzuns e survegn regals.

 




#Article 35: Patg federal (153 words)


Il Patg federal, datà da l'entschatta d'avust 1291, è il pli enconuschent da pliras patgs federals e vala en l'istoriografia tradiziunala e populara sco in u schizunt sco il document da fundaziun da la Confederaziun svizra.

La Confederaziun da lez temp è vegnida fundada da las elitas dirigentas da las valladas Uri, Sviz e Silvania (u Sutsilvania; il text original menziuna la communitas hominum Intramontanorum Vallis Inferioris) uschia ch'ellas valan per il solit sco ils emprims chantuns da la Confederaziun svizra posteriura. Il Patg federal è mantegnì enfin oz e vegn exponì en il museum dals patgs federals en la vischnanca da Sviz. Il Patg federal è scrit sin in fegl da pergiamina cun in furmat da 320 × 200 mm e cuntegna 17 lingias en lingua latina e dus sigils liads al text. Il sigil da Sviz è ì a perder tranter il 1330 ed il 1920.

La translaziun uffiziala per sursilvan:




#Article 36: Cuira (396 words)


Cuira (sursilvan: ; vallader: ; surmiran: Coira; sutsilvan: Cuera, Cuira; tudestg: Chur; talian: Coira; franzos: Coire), la chapitala dal , citad da suprastanza dal district Plessur. Cuira sa chatta al cunfin dal Rein, tranter 550 e 1888 meters sur il nivel da la mar.

Vischnancas cunfinantas: Churwalden, Domat, Favugn, Haldenstein, Maladers, Malix, Trimmis. 

Cuera ei enconuschent en l'entira Svizra per las numerusas ustrias e bars, che sesanflan fetg spess ina sper l'autra. Il marcau ei posiziunaus fetg central, entras tgei ch' el porscha fetg bia als visitaders. Cuera porscha als habitonts bia differentas pusseivladads da passentar il temps liber.

Il num da questa cidad vegn dal latin , quai vegn d'in num celtic pli vegl, kora, koriace, che signifitga trocca.

Insaquants stgavaments archeologs mussan che Cuira è vegnida fundada var 3000 avant Cristus, ed era medemamain la pli gronda aglumeraziun urbana da la Svizra dal quel temp. Ils Romans van a conquistar la citad in 15 avant Crist. 

Cuira daventa la chapitala da la regiun Raetia prima, la part da sid da la nova provinza. Il 284 è Cuira creschìi al nivel da chapitala da provintga.

La citad e daventadea 450 lieu uvestgal. L'onn 1424 brischa la citad giu totalmain. Il avdants rumantsch bandunan la citad e tudestgs la eregian puspè si. Cuira è pia germanisada ed il rumantsch ha pers sia chapitala. L'onn 1524 ha la refurmaziun lieu lieu er qua, però l'uvestg è restà en la catolic. Damai che la Baseglia s'ha rutta davent dal stadi. L'uvestgiu fascheva gia en il 9avel tschentaner diever dal tudestg sco lingua da scrittira

En 1803 daventa la surfatscha dal chantun Grischun ina parta da la Svizra e Cuira daventa chapitala.

Las linguas da Cuira èn il tudestg (81%), il Rumantsch (5.4%) ed il talian (5,1%).

Cuera ei cun 5000 onns historia d'urbanisaziun il pli vegl marcau dalla svizra. Aschia ei il marcau vegl ina dallas pli grondas attracziuns.
A Cuera dat ei era da veser il museum retic, nua ch'ins survegn investa ella historia culturala e il museum d'art, nua ch'ei vegn presentau picturas e sculpturas d'artists grischuns. La Giger-Bar ch'ei basada sin motivs dil surrealist H.R Giger, che ei sez oriunds da Cuera, sesanfla ella via Comerciala.
Per fans da baselgias ei da cussegliar ina viseta ella catedrala, ch'ei varga 800 onns veglia, ed ella Baselgia da sogn Martin.

La autostrada A13 passa per la citad.




#Article 37: Religiun (vallader) (168 words)


Religiun significha ün cuntegn uman chi s'orientescha vers ün esser divin respectivmaing surnatüral o vers ideas. L'origen dal pled nun es cler ed evidaint derivond probabelmaing da la noziun latina religere, quai voul dir as liar inavo.

L'istorgia da l'umanità cugnuoscha üna pruna da religiuns chi tendscha da religiuns primitivas stand in colliaziun cun superstiziun fin a talas religiuns chi consistan in sistems spirituals o filosofics.

Sper religiuns chi as restrendschan ad ün unic pajais sco p.ex. il giudaïssem daja otras religiuns chi vegnan nomnadas religiuns mundialas perseguitond il böt da's derasar sül muond inter sainza cunfins etnics. I'l cas dal giudaïssem as pudess eir dir d'üna religiun mundiala schabain ch'ella nun es pel solit activa missiunaricamaing. Tuottüna sta il salüd dal muond e da tuots pövels i'l center da la spranza. 

La teoria da plü bod, cha la religiun moura oura plan a plan parallelmaing al svilup da la scienza, nu vala plü. In cuntrari as po verer cha la religiusità s'ha renovada eir in societats modernas.




#Article 38: Jesus da Nazaret (283 words)


Jesus, per puter Gesu, (aram.   u ), cuntschaint eir suot il nom tenor il lö da sia derivanza Jesus da Nazaret, es la figüra centrela dal cristianissem; pervi da la dignited da sieu servezzan scu messias porta el il nom d'onur Gesu Crist. 

La scienzcha chi tratta da Gesu sistematicamaing es la cristologia.

Vivieu ho'l prubabelmaing traunter 4 aunz l'era cristiauna e 33 zieva. Nat in üna stalla sper Bethlehem es Gesu creschieu sü a Nazaret. Il temp da sieu agir public cumainzaiva cur cha Gesu vaiva già 30 ans e düraiva be trais ans.

Sia activited as cumpuonaiva da fer müravaglias a favur dals umauns, pustüt dals amalos, e da predger l'evangeli dal reginam da Dieu chi cumainza cun sia preschentscha. In quist connex pardunaiva'l ils debits dals pchaders chi d'eira ün s-chandel causa cha la remischiun dals pchos es ün act divin.

Cundanno pervi da blasfemia cunter il Dieu dals güdevs e da rebelliun cunter la pussaunza d'occupaziun dals Romauns gniva Gesu sentenzcho a mort e crucificho sün üna collina a l'ur da Gerusalem aviand nom Golgatha (managia: üna collina chi guarda our scu üna testa).

Tenor la cretta cristiauna es Gesu resüsto dals morts zieva trais dis ed ascendieu tar sieu bap celestiel per regner sur da vivaints e morts fin ch'el tuornaro darcho a la fin dal temp. Lura saro il reginam da Dieu accumplieu. Las forzas destructivas chi vöglian separer l'umaun da Dieu - que sun il pcho, la mort e'l diavel - saron privos da lur pussaunza.

Jesus, per arab Isa, vain considero scu ün profet important da l'islam. Invezza refüsa l'islam d'accepter cha Gesu saja sto il figl da Dieu e dimena eir ün adressat d'onuraziun.




#Article 39: Rumenia (8801 words)


La Rumenia (rumen România; [romɨˈnia]) è ina republica semipresidenziala situada al cunfin tranter l’Europa Centrala e l’Europa dal Sidost. Il pajais sa chatta a la Mar Naira e s’extenda vers vest sur las Carpatas fin en il Batschigl Pannonic. La Rumenia cunfinescha cun tschintg stadis: en il sid cun la Bulgaria, en il vest cun la Serbia e l’Ungaria, en il nord ed en l’ost cun l’Ucraina e la Moldavia.

Il stadi rumen modern è sa furmà l’onn 1859 tras l’uniun dals principadis da la Moldavia e da la Valachia. Suenter il 1945 ha la Rumenia fatg part durant la Guerra fraida dal Patg da Varsovia. Sco sulet pajais dal Patg da Varsovia ha la Rumenia trategnì senza interrupziun relaziuns diplomaticas cun l’Israel. Dapi il 1989 è la Rumenia s’avischinada politicamain als stadis da l’Europa dal Vest ed è daventada commembra da la NATO (2004) e da l’Uniun europeica (2007).

Cun 238 391 km² dispona la Rumenia da la novavel gronda surfatscha e cun ca. 19,9 milliuns abitants da la settavel gronda populaziun da tut ils stadis commembers da l’Uniun europeica. La chapitala rumena Bucarest è cun radund 1,84 milliuns abitants la settavel gronda citad da l’uniun europeica, be pauc davos Vienna (1,87 milliuns). Ulteriuras impurtantas citads grondas èn Cluj-Napoca, Timișoara, Iași, Constanța, Craiova e Brașov.

La noziun rumena România deriva da român che va enavos sin il latin romanus (Roman, roman).

En il 16avel tschientaner han viagiaturs talians rapporta ch’ils abitants dal territori da la Rumenia odierna numnian sasezs Romans. En ina brev dal commerziant Neacșu dal 1521 vegn il Principadi da la Valachia numnà ‹pajais rumen› (rumen: Țara românească). Il term correspundent modern România è en diever dapi l’entschatta dal 19avel tschientaner.

Per designar ils Rumens cumparan en documents istorics las scripziuns rumân e român oriundamain a moda sinonima. En il 17avel tschientaner ha rumân survegnì la muntada serv, entant che român ha mantegnì sia rolla sco designaziun dals Rumens. 

Suenter la fin da la serviladad vers la mesadad dal 18avel tschientaner è la furma rumân plaunsieu vegnida ord diever, ma è sa mantegnida sco tschep da ‹Rumenia›, ‹Rumänien› etc.

La Rumenia sa chatta a la zona da transiziun tranter l’Europa Centrala, l’Europa dal Sid e l’Europa da l’Ost. 

Ils cunfins statals cumpiglian ina lunghezza da 3150 km. Da quai èn bundant la mesadad (1817 km) flums, surtut il Danubi che cunfinescha la Rumenia vers sid cunter la Bulgaria e vers sidvest cunter la Serbia. La costa rumena a la Mar Naira mesira 225 km. Il cunfin tranter la Rumenia e l’Ucraina en il nord ed ost vegn interrut tras la Moldavia. In ulteriur cunfin exteriur sa chatta en il vest vers l’Ungaria. 

La cuntrada rumena sa cumpona mintgamai per circa in terz da muntognas, autas planiras e planiras. La chadaina da muntognas marcanta dal pajais furman las Carpatas che spartan ina da l’autra las trais regiuns istoricas Moldavia, Transilvania e Valachia. Il center geografic da la Rumenia furma l’Auta Planira Transilvana ch’è circumdada en il vest da las Muntognas Apuseni ed uschiglio da l’artg da las Carpatas. Las Carpatas da l’Ost furman il cunfin vers l’Auta Planira Moldava che sa chatta en il nordost da la Rumenia. 

Las Carpatas dal Sid, las Subcarpatas Geticas e l’Auta Planira Getica separan la Transilvania da la Planira da la Valachia. Questa regiun sa lascha divider en la Pitschna Valachia (Oltenia) en il vest ed en la Gronda Valachia (Muntenia) che cumpiglia las parts centralas ed orientalas. Vers vest vegn la Valachia cunfinada da las Muntognas dal Banat. Quellas furman ensemen cun las Muntognas Apuseni e cun las Muntognas Poiana Ruscă las uschenumnadas Carpatas Occidentalas Rumenas. En il vest da quellas sa chatta il Batschigl Pannonic cun las regiuns istoricas Banat (sidvest), Crișana (vest) e Maramureș (nordvest). En il nord da la Rumenia sa chatta la Bucovina. En l’ost dal pajais tanscha la regiun Dobrudscha fin a la Mar Naira.

Bunamain l’entira mesadad meridiunala da las Carpatas sa chatta sin territori statal da la Rumenia. Questa muntogna è sa furmada en il trias en rom da l’orogenesa alpidica e tutga tar in sistem da muntognas che s’extenda da las Alps fin al Himalaia. 

Dieschs pizs da las Carpatas cuntanschan autezzas sur 2500 m. Il punct il pli aut da las Carpatas dal sid e da l’entira Rumenia furma il Moldoveanu cun 2544 m. Il punct il pli aut en las Carpatas da l’ost è il Pietros cun 2303 m, il punct il pli aut da las Carpatas Occidentalas Rumenas è il Curcubăta Mare cun 1848 m. Las Carpatas dal Sid furman la muntogna la pli massiva, entant che las Carpatas da l’Ost e dal Vest èn segnadas da bleras foppas e pass. Parts da las Carpatas da l’Ost èn d’origin vulcanic, las ulteriuras parts da las Carpatas rumenas consistan da plattì e crap da chaltschina. La pitschna Auta Planira Dobrudscha mesira maximalmain 467 m. Il Batschigl Pannonic e la Planira Bassa Valacha (Campia Romana) restan sut il cunfin da 200 m.

Il pli impurtant flum da la Rumenia è il Danubi (rumen Dunărea) che cura dapli che milli kilometers tras la Rumania u per lung dal pajais. Il flum è er ina da las impurtantas vias da traffic dal pajais. Il Danubi furma la gronda part dal cunfin meridiunal tranter la part rumena dal Banat e la Serbia resp. tranter la Valachia e la Bulgaria. En il grond Delta dal Danubi sbucca il flum en la Mar Naira. 

Ils ulteriurs impurtants flums da la Rumenia appartegnan a moda directa u indirecta a l’intschess idrografic dal Danubi e mainan davent l’aua da las Carpatas da l’Ost. La Tisa cunfinescha la Rumenia per part vers nord cunter l’Ucraina, il Prut la regiun rumena Moldavia vers nordost cunter la Republica da la Moldova. Il Siret maina tras la Moldavia, l’Olt tras la Valachia, il Mureș (flum lateral da la Tisa) tras la Transilvania.

Ils lais da la Rumenia cuvran 1,1 % da la surfatscha dal pajais. Tut en tut datti 3400 lais. Ils pli gronds èn las lagunas Razim cun 41 500 ha e Sinoie cun 17 100 ha. 

La Rumenia è situada en la zona climatica temprada e l’aura è surtut influenzada dal vent dal vest. Pervi da la barriera natirala da las Carpatas sa differenzieschan las singulas parts dal pajais però climaticamain ina da l’autra. La Transilvania (al vest da l’artg da las Carpatas) è anc segnada dal clima maritim dals vents atlantics. Las Carpatas impedeschan però che quest’aria cuntanschia l’ost ed il sid dal pajais. En la Moldavia (en l’ost da las Carpatas) regia in clima continental. Questa regiun è exposta a currents d’aria fraids nà da l’Ucraina. En la Valachia (en il sid da las Carpatas) sa fan valair influenzas mediterranas; anc pli ferm vala quai per la Dobrudscha. 

Las temperaturas medias annualas varieschan entaifer la Rumenia tranter 11 °C en il sid e 8 °C en il nord. Il mais il pli fraid è per ordinari il schaner, il mais il pli chaud il fanadur. L’enviern muntan las temperaturas en media 0 °C a la costa da la Mar Naira e −15 °C en l’auta muntogna. La stad creschan las temperaturas medias en las regiuns bassas dal pajais sin dapli che 25 °C. La pli bassa temperatura ch’è insumma vegnida mesirada insacura è stà −38,5 °C ils 25 da schaner 1942 a Bod, la pli auta 44,5 °C ils 10 d’avust 1951 sper Brăila.

Las pli fermas precipitaziuns datti tendenzialmain en il nordvest da la Rumenia, las pli flaivlas en il sidost. La pli auta rata da precipitaziuns annuala dumbra l’auta muntogna (1000 mm), la pli bassa la costa da la Mar Naira (300–400 mm). Quest’ultima dumbra en media 2286 uras sulegl ad onn, entant che las regiuns muntagnardas cuntanschan be 1500.

En il Bărăgan (ina part da la Planira Bassa Valacha) ed en la Dobrudscha existan cuntradas da steppa, da las qualas la gronda part servan però a l’agricultura. Uschiglio creschan qua sper singulas plantas da feglia rosas, parmugliers e chagliastretgs. En il Delta dal Danubi sa chattan terrens da palì ch’èn segnads da channa, channatscha, squittarola tissientada da l’aua e nimfas.

La fauna da la Rumenia enconuscha en tut 3600 spezias. Per part sa tracti da talas ch’èn derasadas vastamain en l’Europa, tar autras però da talas che cumparan be qua. En las Carpatas vivan tranter auter chamutschs, tschess barbets, urs brins (radund 6600), lufs (radund 3100), lufs-tscherver (radund 1500) e ludras. En las regiuns superiuras da la zona da guaud èn er da chasa l’evla da pizza, il tschess dal chapitsch, il tschierv e la vulp, en regiuns pli bassas il tais, il chavriel ed il portg selvadi. Il 2012 han ins recolonisà il bison europeic, suenter che quel era vegnì extirpà en la Rumenia vers il 1800. Ils radund 50 animals (situaziun dal 2017) vivan là en cumplaina libertad.

En la Planira Bassa Valacha cumparan populaziuns pli pitschnas da droppas grondas. Il Delta dal Danubi porscha in da chasa a bleras spezias da peschs, amfibis ed utschels migrants. Igl è quai er il sulet lieu en l’Europa nua che cumpara il pelican rosa. Ultra da quai vivan qua tranter auter l’irun cotschen ed il sturiun ch’è enconuschent per ses caviar. En la Mar Naira (Dobrudscha) è da chasa il delfin cumin.

En la Rumenia existan radund 150 reservats d’utschels e stgars 400 territoris da protecziun da la natira. Quai correspunda a 23,4 % da la surfatscha dal pajais. 

Il Delta dal Danubi appartegna al patrimoni mundial da l’UNESCO e cumpiglia tranter auter il pli grond territori da channa en tut il mund. La Rumenia dispona da dapli regiuns biogeograficas che mintga auter pajais da l’Uniun europeica; ma las cuntradas èn influenzadas pli e pli da la modernisaziun da l’agricultura e da la creschientscha da las citads.

Il budget naziunal en il sectur da la protecziun da la biodiversitad è pitschen e savens manca la schientscha areguard il senn e las finamiras da las directivas da protecziun da la natira. La Cumissiun europeica ha er gia admonì la regenza a Bucarest da tegnair las leschas da l’Uniun europeica areguard la protecziun da la biodiversitad. 

In ulteriur problem furman chauns abandunads, ils quals attatgan er umans sch’els èn fomentads. Sulettamain a Bucarest vegn lur dumber stimà sin 60 000.

Tagls da laina illegals als quals na suonda nagina replantaziun smanatschan pli e pli ils guauds. Il motiv furma la dumonda internaziunala suenter lain bunmartgà, grondas firmas d’elavuraziun da laina – surtut da l’Austria – che domineschan il martgà sco er in sistem en furma da piramida entaifer il qual tut las persunas involvidas dal selvicultur sur l’elavuratur fin al politicher profitan da las entradas illegalas. 

Suenter la Segunda Guerra mundiala è la populaziun da la Rumenia creschida cuntinuadamain ed ha la finala surpassà il cunfin da 23 milliuns abitants. Dapi la revoluziun dal 1989 è questa cifra però sa sbassada in pau pervi dal deficit da naschientschas. Tenor la dumbraziun dal pievel dal 2016 vivevan en Rumenia 19,87 milliuns umans; en cumparegliaziun cun il 2002 è il dumber da la populaziun uschia sa sbassà per 8,3 % (1 809 333 persunas). Sin milli Rumens datti actualmain 11,8 mortoris ad onn, ma be 9,4 naschientschas; quai maina ad ina rata da creschientscha negativa da −0,27 %. La rata da fertilitad rumena da 1,3 uffants per dunna giascha uschia cleramain sut la rata da reproducziun netto. Quai ha er consequenzas sin la structura da vegliadetgna: be 15 % dals abitants èn pli giuvens che 15 onns – sco ch’igl è tipic per l’Europa en general – ed ulteriurs 16,1 % da la populaziun èn pli vegls che 65 onns. Medemamain attribuì a la sminuziun da la populaziun ha il fatg che la Rumenia è, pervi da ses problems economics, stà dapi il 1945 in pajais d’emigraziun; grazia a l’economia che daventa pli ferma è questa tendenza sa sminuida in pau dapi il 2002.

Il 2011 han ins registrà 727 500 persunas che vivevan gia pli ditg ch’in onn a l’exteriur. Da quels eran 46,2 % tranter 20 e 34 onns vegls e radund 24,8 % tranter 35 e 44 onns. La gronda part da questas persunas èn emigradas en l’Italia (46,9 %) ed en Spagna (23,5 %), alura suonda ils pajais Gronda Britannia (5,5 %), Germania (4,5 %), Frantscha (3,2 %) e Grezia (2,2 %).

En cumparegliaziun cun la media da tut ils stadis da l’Uniun europeica è la spessezza da la populaziun levet sut la media (84,4 abitants per km²). Las pli bassas valurs segnan las regiuns Banat (56 abitants per km²) e Dobrudscha (57,6 abitants per km²); las pli autas la Moldavia (90,5 abitants per km²) e la Gronda Valachia inclus la regiun da la chapitala (103,2 abitants per km²).

Cun 88,9 % han ils Rumens furmà il 2011 la gruppa da la populaziun cleramain la pli gronda. Daspera existan però diversas gruppas etnicas che furman per part la maioritad a nivel regiunal. Quai vala surtut per ils Ungarais cun 6,5 % (ca. 1,2 milliuns umans); quels vivan oravant tut en il sidost da la Transilvania, en il Pajais dals Siculs sco er en il territori da cunfin vers l’Ungaria. La relaziun tranter ils Rumens ed ils Ungarais è per part stada segnada da tensiuns: Omaduas varts han numnadamain fatg valair en il decurs da l’istorgia lur dretg sin ils territoris numnads. Dapi la revoluziun dal 1989 è la situaziun però sa calmada. L’Uniun democratica dals Ungarais en Rumenia ha dapi lura fatg part repetidamain da la coaliziun guvernamentala dal pajais.

La terz gronda gruppa da la populaziun en Rumenia furman ils Roma cun 3,3 % (ca. 621 000 umans). Quels n’enconuschan nagins centers regiunals, mabain sa repartan sin l’entir pajais. Socialmain ed economicamain è questa gruppa savens situada main bain che las autras. 

Fin la mesadad dal 20avel tschientaner era er la cumpart da las persunas da lingua tudestga vaira auta, ma en il fratemp è quella crudada sin 0,2 % (situaziun dal 2011). I sa tracta surtut dals uschenumnads Saxons da la Transilvania; quels na furman però nagins Saxons en il senn odiern, mabain immigrants ch’èn arrivads durant il temp medieval da la regiun da la Mosel/da la Lorena sco er da Svabais dal Danubi (en il Banat ed en il nordvest da Satu Mare). Tranter il 1968 ed il 1989 èn dapli che 200 000 persunas vegnidas ‹cumpradas libras› da la regenza da la Germania dal Vest e colonisadas en la Republica Federala Tudestga. La media da vegliadetgna dals Tudestgs en Rumenia è vaira auta, uschia che lur dumber da stgars 50 000 vegn anc a crudar vinavant. Daspera existan numerusas autras minoritads sco Ucranais (0,3 %) en la Bucovina e Maramureș; Lipovans immigrads oriundamain da la Russia (0,2 %), Tircs (0,2 %) e Tatars (0,1 %) en la Dobrudscha; Serbs (0,1 %), Slovacs (0,1 %) e Tschecs (sut 0,1 %) en il Banat.

Tar las elecziuns en il parlament èn reservads per 18 minoritads mintgamai in sez, e quai independentamain dal dumber da vuschs.

La repartiziun da las linguas correspunda pli u main a la grondezza da las naziunalitads respectivas. Lingua uffiziala è tenor la constituziun il rumen (limba română), ina da las linguas romanas orientalas che vegn discurrida da 91 % da la populaziun dal pajais. A nivel regiunal gioga er l’ungarais in’impurtanta rolla (cumpart totala 6,7 %). En las regiuns en las qualas ina da las linguas minoritaras vegn mintgamai discurrida da dapli che 20 % da la populaziun, furma quella la segunda lingua uffiziala en l’administraziun, davant dretgira ed en las scolas. Las linguas estras che vegnan emprendidas il pli savens en scola èn l’englais ed il franzos, en la Transilvania ed il Banat er tudestg.

Sco pajais secular n’ha la Rumenia nagina religiun statala. 86,7 % da la populaziun decleran d’appartegnair a la baselgia rumen-ortodoxa. Igl è quai ina baselgia autonoma entaifer l’ortodoxia da l’Europa da l’Ost. La separaziun etnica e linguistica en Rumenia sa mussa er en l’appartegnientscha ecclesiastica: ils Ungarais sa decleran per gronda part sco commembers d’autras confessiuns che da la baselgia rumen-ortodoxa.

Il protestantissem cumpiglia radund 6,7 % da la populaziun. Stgars la mesadad dad els fan part da la baselgia refurmada, ils ulteriurs èn baptists, adventists e.a. 5,6 % da la populaziun èn catolics; la gronda part da quels derivan da la gruppa etnica dals Ungarais.

La cumpart dals muslims a la populaziun dal pajais munta a 0,3 % (surtut Tircs e Tatars en la Dobrudscha). Dals numerus Gidieus che vivevan oriundamain en la Rumenia è be restada suenter la Segunda Guerra mundiala ina pitschna minoritad (oz sut 0,1 %). Il dumber da persunas senza confessiun è, malgrà il lung domini communistic, fitg pitschen (ca. 0,2 %).

Tenor in’enquista represchentativa dal 2005 crain 90 % en Rumenia en in Dieu, 8 % en in’autra forza spirituala, 1 % dals interrogads èn stads indecis. La Rumenia è stada tenor questa retschertga in dals stadis da l’Uniun europeica ils pli religius.

Tenor Herodot è il territori da la Rumenia odierna vegnì colonisà il pli tard en il 5avel tschientaner a.C. dals pievels tracs dals Gets e Dacs. En il decurs dals proxims tschientaners hai adina puspè dà conflicts militars tranter ils Gets e Dacs d’ina vart ed ils pievels che vivevan mintgamai al sid dal Danubi (Odris, Macedons, Romans). Sia pli grond’extensiun ha il Reginavel dals Dacs cuntanschì sut retg Burebista (60–44 a.C.) cun unir pliras stirpas. Suenter sia mort è quest’uniun però puspè sa schliada.

Sut il retg Decebal èn las stirpas dacas danovamain s’unidas. Quel è penetrà l’onn 85 s.C. en la provinza romana Moesia. Pir tranter il 101 ed il 106 èsi reussì a l’imperatur Trajan d’al victorisar en rom da duas campagnas militaras en il nord dal Danubi. Il domini da Decebal han ins integrà en l’Imperi roman sco provinza Dacia cun la chapitala Ulpia Traiana Sarmizegetusa e la populaziun è vegnida romanisada. La provinza cumpigliava pli u main las regiuns odiernas Transilvania, Banat ed Oltenia (Pitschna Valachia). Pervi da ses giaschaments dad aur era la Dacia interessanta per ils Romans, militarmain è la provinza però stada da l’entschatta ennà sut ferm squitsch da vart dals pievels vischins. Perquai l’han ils Romans puspè bandunà sut l’imperatur Aurelian fin l’onn 275 e colonisà parts da la populaziun en il sid dal Danubi.

Durant la migraziun dals pievels èn passads in suenter l’auter Gots, Huns, Gepids, Slavs, Avars e Bulgars tras il territori da la Rumenia odierna. Il destin da la populaziun romanisada en l’anteriura provinza Dacia e l’origin dal pievel rumen ch’è collià cun quella èn dumondas che la scienza moderna tracta a moda cuntraversa. La teoria da cuntinuitad daco-romana parta dal fatg ch’i saja er sa mantegnida suenter la retratga dals Romans a lunga vista ina populaziun daco-romana al nord dal Danubi, or da la quala saja alura sa sviluppada tranter il 6avel ed il 10avel tschientaner la Rumenia odierna. La tesa da migraziun percunter è da l’avis che l’etnogenesa dals Rumens haja gì lieu en il sid dal Danubi e che questa gruppa da la populaziun saja pir immigrada suenter l’invasiun dals Ungarais (9avel tschientaner) davent da la Bulgaria en la Transilvania. 

A partir dal 6avel tschientaner han vastas parts da la Rumenia odierna fatg part dal Reginavel bulgar. Er la cristianisaziun e l’introducziun da l’alfabet cirillic – il qual è stà en diever en Rumenia fin l’onn 1862 – han gì lieu da quel temp.

En la Transilvania han existì en il 12avel e 13avel tschientaner unitads politicas furmadas da Rumens, las qualas eran però dependentas dal Reginavel ungarais sut Árpád. Da l’autra vart da las Carpatas ha l’aristocrat rumen Basarab I stabilì a l’entschatta dal 14avel tschientaner il Principadi da la Valachia. A l’entschatta era Basarab be in vasal ungarais; ma cun sia victoria sur il retg dals Ungarais è el daventà l’onn 1330 facticamain independent. Sumegliantamain è sa furmà il Principadi da la Moldavia, numnadamain cura ch’igl è reussì a l’aristocrat Bogdan I da sa far valair militarmain cunter l’Ungaria. Ils dus principadis rumens èn sa cunfinads supplementarmain vers l’Ungaria catolica cun endrizzar duas metropolas ortodoxas ad Argeș (1359) resp. Suceava (1401). La Transilvania ha medemamain cuntanschì sco principadi entaifer l’Ungaria ina tscherta autonomia. Qua vegniva la pussanza però exequida dals Ungarais e dals Saxons da la Transilvania ch’eran immigrads, entant che la populaziun rumena ortodoxa sa chattava dapi il 1366 – ed anc pli ferm dapi il 1437 – giuridicamain en ina posiziun inferiura.

Dapi l’entschatta dal 14avel tschientaner è la Valachia stada segnada da sia vischinanza tar l’Imperi osmanic ch’expandeva adina dapli. Impurtants prinzis da quel temp èn stads Mircea cel Bătrân (1386–1418) e Vlad III Drăculea (1456–1462, 1476), als quals igl è per part reussì da tegnair militarmain pitg als Tircs. La Moldavia ha stuì sa defender a medem temp tant cunter pretensiuns da vart da l’Ungaria sco er da vart da la Pologna. Sut il prinzi Ștefan cel Mare (1457–1504) è per part er la Moldavia sa participada cun success al cumbat cunter ils Tircs. Vers la fin dal 15avel tschientaner èn ils dus principadis rumens però daventads tributars envers l’Imperi osmanic, cumbain ch’igl als dueva reussir da mantegnair lur independenza politica e religiusa.

Vers la mesadad dal 16avel tschientaner è il Reginavel da l’Ungaria svanì sco pussanza politica independenta. Quai ha gì per consequenza ch’il Principadi da la Transilvania è facticamain daventà independent.

Per la Moldavia e la Valachia ha il declin da l’Ungaria muntà d’esser exponì anc pli ferm a la pressiun da vart da l’Imperi osmanic; la finala èn omadus principadis daventads vasals da quel. L’emprova da metter ad ir ina politica antitirca ha interprendì Mihai Viteazul (1593–1601), il qual ha manà l’onn 1600 dal matg fin il settember ils trais principadis abitads dals Rumens. Questa concentraziun da la pussanza ha però be durà quatter mais, damai ch’ella vegniva refusada tant dals stadis vischins sco er da las elitas a l’intern.

L’Imperi osmanic è la finala s’approprià d’ulteriurs territoris ch’eran per part abitads da Rumens, numnadamain da la Dobrudscha, dal Budschak (1538) e dal Banat (1551). En il 17avel e 18avel tschientaner è la monarchia habsburgaisa s’opponida al regl d’expansiun dals Tircs. Tras quai è il grad d’independenza dals principadis rumens sa pegiurà, damai ch’ils Habsburgais han prendì sut lur controlla la Transilvania (1711), il Banat (1718), l’Oltenia (1718–1739) e la Bucovina (1775).

Suenter il declin da la Pologna ha l’Imperi russ, il qual è sa fatg valair il 1812 en la Bessarabia, prendì sco terza pussanza gronda exteriura influenza sin ils principadis rumens. Er la politica interna da la Moldavia e da la Valachia è stada pertutgada da la situaziun da la politica exteriura, damai che l’Imperi osmanic ha installà fanariots da derivanza greca sco prinzis. 

Ils represchentants da la Revoluziun dal 1848 han clamà suenter in’uniun dals principadis rumens. La chaschun da far quai è sa dada suenter la Guerra da Crimea ch’aveva flaivlentà la Russia. L’onn 1859 è Alexandru Ioan Cuza (1859–1866) vegnì elegì sco prinzi tant da la Valachia sco er da la Moldavia. Ils 24 da december 1861 ha el mess en vigur in’uniun reala tras la proclamaziun dal Principadi da la Rumenia cun la chapitala Bucarest. Pervi da conflicts a l’intern han ils aristocrats, cun consentiment da las pussanzas grondas, sfurzà il 1866 Cuza d’abditgar, al remplazzond cun Carol I (1866–1914) or da la dinastia Hohenzollern-Sigmaringen. En la guerra tranter la Russia e l’Imperi osmanic dals onns 1877/78 ha la Rumenia sustegnì la Russia; sinaquai ha quella confermà en rom dal Congress da Berlin l’independenza dal pajais. Ultra da quai è vegnida attribuida a la Rumenia la Dobrudscha sco recumpensa per la part meridiunala da la Bessarabia ch’è ida a la Russia. Ils 26 da mars 1881 ha gì lieu la proclamaziun dal nov Reginavel da la Rumenia.

L’onn 1907 è prorutta ina sullevaziun da purs. Il 1913 ha la Rumenia battì en la Segunda Guerra dal Balcan cunter la Bulgaria ed ha pudì segirar en la Pasch da Bucarest la part meridiunala da la Dobrudscha. Cura ch’è prorutta il 1914 l’Emprima Guerra mundiala, vuleva Carol I prender partida a favur da las Pussanzas centralas, n’ha però betg pudì sa far valair a l’intern dal pajais. Sut ses nev e successur Ferdinand I (1914–1927) è la Rumenia entrada la stad 1916 en la guerra da vart da l’Entente. La Rumenia ha l’emprim pudì conquistar parts da la Transilvania, è però bainspert vegnida rebattida. Fin il december 1916 han las Pussanzas centralas conquistà ed occupà en rom d’ina cunteroffensiva la Valachia, quai ch’ha necessità Ferdinand I e la regenza da fugir en la Moldavia. 

Suenter la fin da l’Emprima Guerra mundiala èn ils territoris da la Russia e da l’Austria-Ungaria en ils quals abitavan maioritads rumenas s’associads a la Rumenia. Quai è succedì il prim da december 1918 e vegn commemorà fin oz sco di da la festa naziunala. Sinaquai è prorutta il 1919 la guerra tranter l’Ungaria e la Rumenia; quella è ida a fin cun l’occupaziun da Budapest tras ils Rumens. En rom dals contracts da pasch da Versailles (1919) e da Trianon (1920) ha la communitad internaziunala da stadis renconuschì ils novs cunfins da la Rumenia: Da l’anteriura Austria-Ungaria èn vegnids vitiers la Transilvania, la part orientala da la Crișana, la part meridiunala da la Marmuresch, la Bucovina e dus terzs dal Banat; da la Russia bolschevistica è vegnida vitiers supplementarmain la Bessarabia.

Suenter l’Emprima Guerra mundiala eran tant la surfatscha dal stadi sco er il dumber da la populaziun da la nova ‹Rumenia gronda› sa dublegiads. Uschia è la Rumenia sa midada d’in stadi naziunal relativamain omogen en in stadi multinaziunal. Radund in quart dals burgais da la Rumenia appartegnevan ad ina da las minoritads naziunalas (t.a Tudestgs, Ucranais, Bulgars). Sco auters stadis en l’Europa, è er la Rumenia stada segnada en il tranterguerras d’instabilitad politica. Il 1927 è il prinzi ereditar Carol vegnì sfurzà da desister sin il tron e ses figl minoren Mihai I (1927–1930 e 1940–1947) è daventà retg. Ses bab ha però ascendì il tron l’onn 1930 sco Carol II (1930–1940). Quel ha erigì il 1938 ina dictatura roiala cun l’argument da vulair impedir uschia che la garda da fier faschistica sa participescha a la regenza.

En il decurs dals onns 1930 è la Rumenia s’avischinada en sia politica exteriura adina dapli a la Germania naziunalsocialistica. Suenter l’erupziun da la Segunda Guerra mundiala e las midadas territorialas che quai ha manà cun sai (Patg tranter Hitler e Stalin, Sentenzia da cumpromiss da Vienna), ha la Rumenia pers grondas parts da ses territori statal: La stad 1940 èn la Bucovina dal Nord, il territori da Herța e la Bessarabia crudads a l’Uniun sovietica. La Dobrudscha dal Sid è ida a la Bulgaria e la part settentriunala da la Transilvania a l’Ungaria (Segunda Sentenzia da cumpromiss da Vienna). Suenter la sperdita da quests territoris è Carol II ì en l’exil.

General Ion Antonescu ha installà ina dictatura militara ed è s’associà a las Pussanzas da l’axa. L’onn 1941 è la Rumenia sa participada a la campagna militara tudestga cunter l’Uniun sovietica, uschia ch’ils territoris ch’eran ids a perder avant in onn èn puspè daventads rumens. A l’intern da la Rumenia ha il reschim dad Antonescu persequità ed assassinà Gidieus e Roma. Suenter l’offensiva sovietica da l’avust 1944 han ins però cupitgà Antonescu e la Rumenia ha midà la front. Suenter la fin da la Segunda Guerra mundiala ha il pajais bain survegnì enavos da l’Ungaria la Transilvania dal Nord, ma la Bessarabia, il territori da Herța e la Bucovina dal Nord èn vegnids sut domini sovietic. La gronda part da quests territoris furma oz la republica independenta Moldavia, il rest fa part da l’Ucraina. 

Durant la Segunda Guerra mundiala ha la Rumenia pers 378 000 schuldads e civilists. La regenza rumena è stada participada en rom dal genocid naziunalsocialistic activamain a l’execuziun da radund 270 000 Gidieus rumens.

Suenter la Segunda Guerra mundiala è la Rumenia vegnida sut influenza sovietica. Las elitas dal vegl sistem ed ils adversaris politics han ins exproprià, deportà u mazzà. Il 1947 èn tut las partidas burgaisas vegnidas scumandadas e retg Mihai I ha stuì demissiunar. Ils socialdemocrats han ins sfurzà da s’unir cun il Partidul Comunist din România (PCR) ch’era stà fin qua senza gronda muntada, furmond uschia a partir dal mars 1948 la Partida dals lavurers rumena (Partidul Muncitoresc Român, PMR). Quella ha proclamà la Republica populara da la Rumenia, entaifer la quala Gheorghe Gheorghiu-Dej furmava il politicher decisiv. Il 1948 ha gì lieu in’ultima cessiun territoriala, numnadamain cun la surdada da l’Insla da las Serps a l’Uniun sovietica.

Il stadi e l’economia da la Rumenia èn vegnids transfurmads a moda sistematica tenor las ideas communisticas: il 1946 han ins introducì il dretg d’eleger da las dunnas, il 1948 è suandada la statalisaziun da l’industria, a partir dal 1950 er da l’agricultura. Vers la mesadad dals onns 1950 è il provediment economic a l’intern dal pajais sa meglierà, quai ch’ha er stabilisà la situaziun politica. Per mitigiar il cuntrast etnic cun ils Ungarais a l’intern da la Rumenia, han ins endrizzà il 1952 en lur territori da colonisaziun principal il Pajais dals Siculs. Areguard la politica exteriura è Gheorghiu-Dej sa stentà da cuntanscher precautamain ina tscherta independenza envers l’Uniun sovietica. Tuttina è la Rumenia daventada il 1949 commembra dal Cussegl per agid economic vicendaivel (COMECON) ed il 1955 dal Patg da Varsovia.

En ina perioda da marschauna politica en Rumenia ha la partida che sa numnava uss Partida communistica rumena (Partidul Comunist Român, PCR) proclamà ils 21 d’avust 1965 la Republica socialistica da la Rumenia. Nov manader politic dal pajais è daventà Nicolae Ceaușescu, il qual aveva surpiglià suenter la mort da Gheorghiu-Dej il post dal secretari general da la Partida communistica. Ceaușescu è s’emancipà da Moscau ed ha rinfatschà il matg 1961 a l’Uniun sovietica da vulair infiltrar la Partida communistica rumena. Il mars 1968 ha el retratg sia delegaziun da l’inscunter consultativ da las partidas communisticas a Budapest, perquai ch’il manader dals communists en Siria, Chalid Bakdasch, aveva numnà il schef da la delegaziun rumena in «schovinist». Malgrà che la politica exteriura da Ceaușescu stueva provocar il vischin sovietic n’han quels betg chattà sco en la Tschecoslovachia a l’intern dal pajais in pretext per intervegnir. La dictatura da la Partida communistica e sia rolla predominanta entaifer la politica interna da la Rumenia, era numnadamain contestada pli pauc ch’èn la gronda part dals auters stadis dal bloc da l’ost. Ceaușescu ha er accentuà vinavant demonstrativamain l’autonomia naziunala dal pajais e l’independenza da quel da l’Uniun sovietica. Tranter auter ha el fatg quai cun metter ad ir en atgna reschia midadas radicalas en la societad ed en l’economia: leschas per promover famiglias cun blers uffants ed in scumond d’aborts duevan augmentar il dumber da la populaziun en la Rumenia; e cun agid da credits da l’exteriur e la dischlocaziun da parts da la populaziun rurala en las citads dueva il pajais agrar vegnir industrialisà pli ferm.

Questas mesiras han però, suenter in’entschatta empermettenta, betg manà al success giavischà. Il cuntrari: vers la fin dals onns 1970 è prorutta ina crisa da provediment. Pervi da la ruina da l’economia publica e la mancanza da bonitad è il reschim schizunt stà sfurzà d’exportar bains dal provediment da basa, ils quals èn uschia daventads stgars en il pajais sez. Tuttina èsi reussì a Ceaușescu da mantegnair sia pussanza cun agid da la polizia secreta Securitate ed in cult da persuna exprimì. Suenter la crudada dal Mir a Berlin e la vieuta dal 1989 en la Republica democratica tudestga ed en ils ulteriurs stadis dal bloc da l’ost è prorutta la Revoluziun rumena. Demonstrants han pretendì la fin dal reschim da Ceaușescu che regiva cun la forza. La Securitate ha sinaquai fatg diever d’armas da fieu, entant che parts da l’armada regulara han refusà al reschim lur sustegn. Quai ha manà a cumbats sin via cun dapli che 1000 morts. Suenter ch’il commando da l’armada era sa collià cun ils demonstrants, è Ceaușescu vegnì mess ils 25 da december 1989 davant in tribunal militar. Suenter in curt process spectacular èn el e sia dunna vegnids sajettads. 

En l’èra postcommunistica èsi be reussì plaunsieu a la Rumenia da sa revegnir da las consequenzas da la dictatura e dal dischurden economic. La forza dominanta durant ils onns suenter la Revoluziun è daventada la partida socialdemocrata (Partidul Social Democrat, PSD) sut il nov president dal stadi Ion Iliescu. La PSD è sa recrutada per gronda part da las veglias elitas communisticas. Tuttina ha la Rumenia persequità da qua davent in curs democratic ed orientà a l’economia da martgà. En la politica exteriura è il pajais s’orientà vers vest.

Il 2004 è la Rumenia daventada commembra da la NATO e dapi il 2007 furma il pajais ina part da l’Uniun europeica.

Ils onns 2010 èn stads segnads da diversas crisas statalas (t.a. en connex cun scandals da corrupziuns ed adattaziuns dispitaivlas da la giurisdicziun). Il schaner e favrer 2017 han gì lieu las pli grondas demonstraziuns en massa en l’istorgia dal pajais, a las qualas èn sa participadas be a Bucarest radund 500 000 persunas.

La Rumenia è ina democrazia represchentativa cun in sistem guvernativ semipresidenzial. Chau dal stadi è il president (președinte), schef da la regenza il primminister (primministru). La pussanza legislativa sa chatta en ils mauns dal parlament che sa cumpona da duas chombras. 

Il president vegn elegì directamain dal pievel. Il temp d’uffizi dura tschintg onns, admessa è maximalmain ina reelecziun. Sco schef da stadi nominescha il president il primminister ed è schefcumandant da l’armada. 

Il parlament sa cumpona da la chombra dals deputads (Camera Deputaților) che dumbra actualmain (2018) 329 parlamentaris e dal senat (Senatul) cun 136 senaturs. Ils commembers vegnan elegids en in sistem electoral che cumbinescha elements da maiorz e da proporz. Ina perioda legislativa dura quatter onns. Partidas pon be entrar en il parlament, sch’ellas cuntanschan almain tschintg procent da tut las vuschs. Deschdotg sezs èn reservads per deputads che represchentan las partidas minoritaras. 

En l’index da democrazia dal 2016 sa chatta la Rumenia sin plaz 61 da 167 pajais, quai che munta ch’il pajais haja ina «democrazia defecta». Tenor l’Index da percepziun da la corrupziun da Transparency International sa chattava la Rumenia il 2016 da 176 pajais sin plaz 57, ensemen cun l’Ungaria e la Jordania, e quai cun 48 da maximalmain 100 puncts.

La Rumenia è integrada en tut las impurtantas federaziuns europeicas e transatlanticas. Il prim da schaner 2007 è il pajais daventà sut resalvas commember da l’Uniun europeica. L’Uniun europeica pretenda che la Rumenia cumbattia la corrupziun, stgaffeschia ina giustia independenta ed installeschia instanzas transparentas e che funcziunan. Gia ils 29 da mars 2004 era la Rumenia daventada commembra da la NATO ed è dapi lura integrada en la structura da segirezza transatlantica. Il 2004 e 2005 è la Rumenia ultra da quai stada commembra temporara dal Cussegl da segirezza da las Naziuns unidas ed ha presidià quel dal fanadur 2004 fin l’october 2005.

L’armada romana sa cumpona da 75 000 schuldads da professiun e da 15 000 collavuraturs civils. Il budget da defensiun cumpiglia radund dus procent dal product naziunal brut. La Rumenia ha fatg part da las missiuns da la NATO en Bosnia ed Erzegovina sco er en il Cosovo. Ultra da quai sustegna l’armada las operaziuns militaras dals Stadis Unids en l’Afghanistan e l’Irac.

Ils Stadis Unids stattan per la Rumenia surtut en dumondas da la politica da segirezza sin l’emprim plaz. Ils dus pajais han fatg il 1997 in patg strategic ed actualisà quel il 2011. En vista als svilups en l’Ucraina ed en la regiun da la Mar Naira è la muntada da la cooperaziun tranter la Rumenia ed ils Stadis Unids en dumondas da la politica da segirezza anc creschida.

Fin il 1996 ha il stadi controllà ils fatgs da sanadad. Silsuenter han ins introducì in’assicuranza da malsauns obligatorica, dapi il 2004 datti er assicuranzas supplementaras privatas. La cumpart da las expensas da sanadad vi dal product naziunal brut è fitg bass (4 %). Quai è però er d’attribuir al fatg ch’ils medis vegnan pajads fitg mal; perquai van blers dad els a tschertgar lavur a l’exteriur.

En rom da las tractativas d’adesiun a l’Uniun europeica ha la Cumissiun europeica constatà il 2005 che la Rumenia haja fatg progress en connex cun la protecziun dals dretgs umans. Tuttina han il stadi rumen e la populaziun rumena per part anc adina ina tenuta problematica envers minoritads, surtut envers ils Roma. Tenor Amnesty International è er la situaziun en las instituziuns per persunas cun malsognas psichicas insuffizienta e medemamain vegnian discriminadas persunas omosexualas. 

Las regiuns istoricas n’han en Rumenia nagina muntada administrativa. Il stadi è sutdividì en 41 circuls ed en la chapitala Bucarest. Questa structura administrativa centralistica han ins stgaffì en il 19avel tschientaner tenor il model dals Départements franzos. A l’entschatta da l’èra communistica han ins midà quest sistem, ma il 1968 è la Rumenia returnada tar la structura oriunda; pitschnas midadas hai dà il 1981 e 1997. 

En media dumbran ils circuls rumens (inclusiv la chapitala) radund 500 000 abitants sin 5676 km². Cumpareglià cun structuras federalisticas sco en Germania u en ils Stadis Unids, nua che singulas unitads èn dapli che diesch giadas pli grondas che autras, na divergeschan las cifras en la Rumenia betg fitg ferm ina da l’autra. Abstrahà da la chapitala tanscha il dumber da la populaziun dals singuls circuls da ca. 222 000 (Covasna) fin 829 000 (Prahova). La pli gronda surfatscha da tut ils circuls ha Timiș cun 8697 km², la pli pitschna Ilfov cun 1593 km². Questa ultim circumdescha Bucarest ed è cleramain pli pitschen ch’ils ulteriurs; gia il segund pitschen, Giurgiu, s’extenda sur 3526 km².

Parallelamain existan en Rumenia otg regiuns da planisaziun ch’ins ha installà il 1998 en rom da las preparativas d’adesiun a l’Uniun europeica. Quellas n’han naginas cumpetenzas realas, mabain en relevantas en connex cun retschertgas statisticas e servan ad attribuir las contribuziuns da promoziun da l’Uniun europeica.

Il 2013 han ins instradà en la Rumenia in process cumplessiv da decentralisaziun e da regiunalisaziun cun la finamira da modernisar il sistem da l’administraziun publica. Per motivs giuridics ha il tribunal constituziunal però bloccà il sboz da lescha correspundent.

Las pli grondas citads dal pajais èn (situaziun dal 2011): Bucarest (1 883 425), Cluj-Napoca (324 576), Timișoara (319 279), Iași (290 422), Constanța (283 872), Craiova (269 506), Brașov (253 200), Galați (249 432) e Ploiești (209 945).

Per lunschor la pli gronda citad da la Rumenia è la chapitala Bucarest, en la quala vivan en il fratemp (2018) dapli che 1,9 milliuns persunas. Bucarest furma uschia la sisavel gronda citad da l’entira Uniun europeica. Ella furma ultra da quai il center da la Gronda Valachia (Muntenia). 

Tar las citads cun mintgamai radund 300 000 abitants sa tracti per il pli dals centers istorics da las regiuns rumenas:

Tut en tut han 20 citads rumenas dapli che 100 000 ed ulteriuras 21 citads dapli che 50 000 abitants.

Tras la Rumenia mainan ils corridors da traffic paneuropeics nr. 4 e nr. 9; en pli vegn il pajais cunfinà al sid dal corridor da traffic nr. 7 (via d’aua Danubi). 

Il pajais avess nair da basegn da far ulteriuras investiziuns en il traffic da viafier ed en il stadi da las vias. Malgrà che la Rumenia è dapi il 2007 commembra da l’Uniun europeica e po uschia far la dumonda per daners da mantegniment e d’extensiun da la rait da vias, succeda quai be en moda tardivanta. Il motiv è l’administraziun ineffizienta che n’arriva betg a metter ad ir en in temp commensurà ils projects d’infrastructura.

Igl existan duas plazzas aviaticas sper Bucarest, en pli mintgamai ina ad Arad, Baia Mare, Craiova, Sibiu, Târgu Mureș, Constanța, Cluj-Napoca, Timișoara, Oradea, Bacău, Suceava ed Iași. Societads aviaticas rumenas èn TAROM, Carpatair e l’airline bunmartgada Blue Air. 

L’entira rait da vias dumbrava il 2013 ca. 84 185 km; da quai eran asfaltads radund 49 873 km. La rait d’autostradas sa chatta en construcziun. Dals 2710 km planisads èn realisads var 750. 

Impurtanza speziala per colliar la Rumenia cun la rait d’autostradas da l’Europa Centrala ha la A 1. Quella duai manar sur ina lunghezza da 585 km da Bucarest sut Pitești, Râmnicu Vâlcea, Sibiu, Deva, Timișoara ed Arad fin a Szeged en l’Ungaria. Terminads èn 404 km (situaziun dal 2017).

Percunter è la A2 (Autostrada Soarelui, ‹autostrada dal sulegl›) d’ina lunghezza da 202 km che maina da Bucarest sur Fetești e Cernavodă a Constanța a la Mar Naira terminada dapi il 2012 dal tuttafatg. 

La limita da sveltezza sin las autostradas rumenas è 130 km/h. Per far diever da las vias en Rumenia dovran ins ina vignetta. Entant che las autostradas e las grondas vias naziunalas èn en in bun stadi, sa chattan bleras vias en regiuns champestras en in stadi vaira marod.

Las indicaziuns da sveltezza vegnan savens ignoradas da la populaziun indigena ed ultra da quai èn sin via blers chars cun chavals plauns e betg illuminads. Correspundentamain ha la Rumenia da tut ils stadis da l’Uniun europeica suenter la Lettonia la segund auta quota da morts da traffic en relaziun tar l’entira populaziun (situaziun dal 2014).

Grondas parts da la rait da viafier e dal material rudlant da la viafier statala rumena (CFR) basegnan urgentamain ina modernisaziun. Ils ultims onns hai dà meglieraments punctuals. En il traffic a lunga distanza èn en diever dapi il 2003 trens moderns sut il num Săgeata Albastră (‹frizza blaua›). 

Il pli grond purschider da servetschs da telefon (rait fixa) furma Romtelecom, il successur privatisà da la posta rumena. En il fratemp datti però dapli colliaziuns da telefonia mobila. En quest martgà èn activs Orange, Vodafone e Telekom Rumenia.

En la Rumenia disponivan il 2011 be 47 % da las chasadas d’in access a l’internet; igl era quai la pl bassa procentuala da tut ils stadis da l’Uniun europeica. Il 2012 è questa cifra però creschida sin 54 % ed il 2016 sa chattava ella gia tar 72 %.

Entaifer la glista da la libertad da pressa, che vegn edida da Reporters senza cunfins, sa chatta la Rumenia il 2017 sin plaz 46 da 180. Adina puspè datti cas da smanatscha da violenza envers represchentants da las medias.

La purschida da televisiun dominescha dapi daditg il chanal privat Pro TV, avant il chanal privat Antena 1 e la televisiun da dretg public TVR 1. La purschida da radio stat sut l’ensaina da Radio Romania, l’emettur da dretg public che porschan divers programs naziunals e regiunals.

Las pli impurtantas gasettas dal di surregiunalas tutgan per ordinari ad impressaris rumens bainstants, ils quals han savens occupà avant auts posts politics. 

Tar ils stgazis natirals da la Rumenia tutgan charvun (surtut charvun da terra), gas natiral, sal, aur e ieli mineral. 41 % dal terren vegnan tratgs a niz per arar, 29 % en furma da guaud, 21 % sco pastgiras e 3 % en furma da semenza permanenta.

Il 2010 ha il product naziunal brut (PNB) munta a 187 milliardas dollars, quai che correspunda ad in PNB per persuna da 9465 dollars. Cumpareglià cun la media da tut ils commembers da l’Uniun europeica ha la Rumenia cuntanschì in index da 57 (EU-28 = 100). En il Global Competitiveness Index, che mesira la cumpetitivitad economica d’in pajais, figurescha la Rumenia sin plaz 61 da 138 (situaziun dal 2016–17). En l’index per la libertad economica sa chatta il pajais sin plaz 39 da 180 (situaziun dal 2017).
 
Tut en tut mussa l’economia publica in svilup general ordvart positiv. Tranter il 2001 ed il 2008 è il PNB creschì en media per 6 %; ils proxims onns èn stads segnads d’in trend negativ (crisa da finanzas mundiala), ma gia il 2011 è il pajais puspè sa revegnÌ e tutga dapi lura tar las economias publicas cun la pli gronda creschientscha en l’Europa ed il 2017 – cun 7 % – schizunt en tut il mund.

Tenor stimaziuns ha il sectur da servetschs contribuì il 2011 37,8 % al product naziunal brut, il sectur d’industria 37,8 % ed il sectur d’agricultura 12,3 %. 

Ils pli impurtants stadis d’import da la Rumenia èn (situaziun dal 2016): Germania (21,5 %), Italia (11,6 %), Frantscha (7,2 %), Ungaria (5,2 %), Reginavel Unì (4,3 %), Bulgaria (3,2 %) e Tirchia (3,2 %). Ils pli impurtants partenaris d’import èn: Germania (20,6 %), Italia (10,3 %), Ungaria (7,4 %), Frantscha (5,6 %), Pologna (5,2 %), China (5,1 %) e Pajais Bass (4,1 %).

La quota da dischoccupads ha muntà il zercladur 2018 a 4,5 %, quai ch’è cleramain sut la media da l’Uniun europeica. La dischoccupaziun da giuvenils muntava il 2017 a 18,4 %. L’onn 2014 lavuravan 28,3 % da tut las forzas da lavur en l’agricultura, 28,9 % en l’industria e 42,8 % en il sectur da servetschs. 

Il stadi prescriva ina paja minimala da ca. 150 euros. In tschintgavel da la populaziun rumena tutga tar ils working poor. Anc adina tschertgan blers Rumens lavur a l’exteriur, surtut en ils pajais mediterrans Italia e Spagna.

L’industria contribuescha bunamain 35 % al product naziunal brut ed occupa ca. 20 % da tut las forzas da lavur. En Rumenia vegn surtut producida electronica per computers, per la telecommunicaziun e per l’electronica da divertiment; daspera vehichels sco autos (Dacia), bastiments, aviuns, helicopters e chars armads. En pli products da l’industria chemica, atschal, medicaments, textilias, chalzers e mangiativas. Tar in quart dals exports rumens sa tracti da products textils. Dapi il 2013 crescha la producziun industriala en l’Estonia e la Rumenia sco en nagin auter pajais da l’Uniun europeica. 

Il 2015 ha il turissem manà ad entradas da 1542 milliuns euros. Il dumber dals giasts ha muntà il 2016 a 10,9 milliuns. 

Il budget statal ha muntà il 2016 expensas en l’autezza da 62,1 milliardas dollars ed entradas da 56,8 milliardas dollars. Da quai è resultà in deficit en l’autezza da 2,8 % dal product naziunal brut. Il debit statal muntava il 2016 a 73,3 milliardas dollars ubain 39,2 % dal product naziunal brut.

Tranter il 2005 ed il 2007 han ins impundì da las expensas statalas (en % dal product naziunal brut): 4,5 % per la sanadad, 3,5 % per la furmaziun ed 1,9 % per il militar.

Corrupziun ed abus d’uffizi a divers nivels tutga en Rumenia tar il mintgadi. La cultura da corrupziun è enragischada profundamain en il pensar da la populaziun rumena e vegn acceptada en blers cas sco strategia da schliar problems usitada. 

Motivs persuenter furma la povradad derasada tranter la populaziun sco er il fatg che persunas en il servetsch public survegnan pajas memia bassas. Surtut da spirituals ortodoxs, collavuraturs da l’administraziun e dals ospitals sco er da magisters spetgan ins anc adina ch’els fetschian lur da viver cun generar ulteriuras entradas. Er la mentalitad da s’enritgir è derasada vastamain tranter las elitas politicas ed economicas.

Tenor retschertgas èn 96 % dals Rumens da l’avis che la corrupziun saja in dals pli gronds problems dal pajais. In terz da las persunas interrogadas ha pudì inditgar exempels per avair pajà sez daners da corrupziun ils ultims 12 mais. La lingua rumena enconuscha 30 modas da dir per circumscriver daners da corrupziun. Gia en ils pli vegls texts rumens cumparan ils terms (oriundamain slavs e tircs) bacșiș, ciubuc, șperț, șpagă e mită.

Il 2012 sa chattava la Rumenia en l’index da la percepziun da corrupziun, che vegn edì da Transparency International, en la cumparegliaziun mundiala sin plaz 66, anc avant l’Italia (plaz 72), la Bulgaria (plaz 75) e la Grezia (plaz 94). Bain è avant maun a l’intern dal pajais la voluntad e da vart da l’Uniun europeica er il squitsch da metter ad ir refurmas; ma las autoritads da segirezza e la giustia èn savens surdumandadas cun lur incumbensa ubain ch’ellas fan sezzas part dal problem.

La cultura rumena è segnada tant areguard sias diversas furmas istoricas sco er en vista a sia structura odierna d’ina multifariadad ch’è unica en l’Europa. L’originalitad da la cultura rumena, tant en sias furmas tradiziunalas sco er modernas, è d’attribuir a si’abilitad da recepir las pli differentas influenzas e da colliar quellas en ina sintesa creativa. La posiziun da cunfin dal pajais tranter Occident ed Orient, las numerusas minoritads etnicas e religiusas sco er las grondas differenzas geograficas tranter las differentas parts dal pajais han giugà in’impurtanta rolla en quest connex. La cultura tradiziunala parta la Rumenia cun la Republica da la Moldova. L’onn 2007 è Sibiu stada la Chapitala culturala da l’Europa.

Tar las attracziuns culturalas da la Rumenia tutgan surtut ils monuments ch’èn vegnids recepids suenter la vieuta dal 1989 en la glista dal Patrimoni cultural mundial da l’UNESCO. Igl èn quai las claustras da la Moldavia cun lur picturas a la fatschada externa, la claustra Horezu, las baselgias-fortezza en la Transilvania, la citad veglia da Sighișoara, la fortezza dals Dacs en la muntogna d’Orăștie e las baselgias da lain en la Maramureș. La Baselgia naira a Brașov è il dom gotic situà il pli en l’ost da l’Europa ed a medem temp la pli impurtanta baselgia gotica da l’entira Europa dal Sidost. 

Il palaz dal parlament a Bucarest è il pli grond edifizi da l’Europa ed a medem temp in dals pli gronds dal mund insumma. L’edifizi che furma dapi il 1997 la sedia da la chombra da deputads rumena è suenter il Pentagon il segund grond edifizi da l’administraziun dal mund. Stilisticamain vegn il palaz dal parlament attribuì al neoclassicissem. Sin la vart davos da l’edifizi sa chatta il museum naziunal per art modern.

Entaifer l’architectura moderna en Rumenia dattan en egl surtut ils suandants edifizis: Il Circus Globus (il circus statal a Bucarest), il Complexul Expozițional Romexpo (areal da fiera internaziunal), la Sala Palatului (bundant 4000 plazs ina da las pli grondas salas da show, teater e congress dal mund) sco er il teater naziunal futuristic Ion Luca Caragiale a Bucarest che furma il pli grond e modern teater da l’entira Europa.

En Rumenia existan en 18 citads 28 orchesters professiunals: 18 orchesters filarmonics, 9 orchesters d’opera ed 1 orchester d’operetta. 

Suenter il 1989 ha l’industria da film enconuschì in svilup spectacular ch’ha manà a numerus premis per producziuns rumenas. Tranter auter èn vegnids onurads ils reschissurs ed acturs Cristi Puiu (Berlin 2004), Corneliu Porumboiu (Cannes 2005), Cristian Mungiu (Cannes 2007 e 2012), Marian Crișan (Locarno 2010) e Călin Peter Netzer (Berlin 2013). Il critichers da film discurran perquai d’ina ‹unda rumena› en l’industria da film internaziunala.

In dals pli enconuschents scripturs rumens dal temp preschent è Mircea Cărtărescu (t.a. titular dal premi da litteratura internaziunal Chasa da las culturas dal mund 2012). En Rumenia empleneschan prelecziuns litteraras per part entirs stadions. 

Ils pli enconuschents auturs da teater rumens èn ils dus auturs rumen-franzos Eugène Ionesco e Matei Vișniec. En la lirica èn tranter auter daventads enconuschents il cunfundatur dal dadaissem Tristan Tzara sco er Mircea Dinescu.

Il sistem da perscrutaziun rumen ha gì da surpigliar dal temp socialistic gronds problems structurals che sa laschan be allontanar plaunsieu. Menziun speziala meritan l’Institut per fisica atomara ch’è integrà en divers projects da l’Uniun europeica, il New Europe College u en la filosofia la Societad rumena per fenomenologia.

Sper ils dis da festa cristians usitads ed il prim da matg vegn festegià en spezial Nossadunna d’avust (15 d’avust), il di da sontg Andreas (30 da november) ed il prim da december sco di da la festa naziunala.

Dapi il 1909 è il ballape en il pajais organisà en la Federația Română de Fotbal. La liga naziunala vegn surtut dominada da Steaua Bukarest e da Dinamo Bukarest. La squadra naziunala è gia sa participada numerusas giadas a campiuns europeics e mundials. Tar il campiunadi mundial dal 1994 e tar il campiunadi europeic dal 2000 ha ella mintgamai cuntanschì il quartfinal.

Dapi il 1900 sa participescha la Rumenia er als gieus olimpics. Areguard las medaglias dad aur gudagnadas sur tut ils onns tutga la Rumenia tar las ventg naziuns cun il pli grond success. L’onn 1984 a Los Angeles è la Rumenia sa participada sco sulet team dal bloc da l’ost ed ha gudagnà 20 medaglias dad aur. La suletta medaglia tar gieus olimpics d’enviern è stà bronz en il bob da dus a Grenoble il 1968.

La Rumenia è surtut er famusa per sias gimnastas ch’han cuntanschì gronds success a chaschun dals gieus olimpics: Nadia Comăneci ha gudagnà il 1976 e 1980 en tut tschintg giadas aur, Ecaterina Szabó quatter giadas il 1984, Daniela Silivaș trais giadas il 1988, Simona Amânar en tut trais giadas aur il 1996 e 2000 e Cătălina Ponor trais giadas aur il 2004.

Ulteriurs sports en ils quals la Rumenia è stada u è actualmain tranter las meglras squadras èn rugby union, tennis, ballamaun, scrimar e ballarait.

 




#Article 40: Sagogn (329 words)


Sagogn è ina vischnanca en il  en Svizra; ella appartegna al circul da la Foppoa en il district Surselva. Sagogn sa chatta tranter Glion e Laax sin ina planira fritgaivla, che è sa furmada avan circa 10'000 onns entras la bova da Flem. La lingua uffiziala da Sagogn è il Rumantsch, numndadmain l'idiom Sursilvan. 
Proximamain vegn baghegiau ina plazza da golf naven da Sagogn entochen a Schluein.

Tratgs caracteristicas dal vitg èn la baselgia da la sontga Maria sin il mut da la baselgia che vegn datada sin circa 500 suenter Christus, sco era la Ruinaulta che sa chatta en il sid dal vitg. La Ruina Schiedberg dat perditga da la muntada istorica dal vitg. Sagogn era en il temp mediaval in impurtant center da la baselgia. Quai sa mussa era tras il casti d'Aspermont ch'è mantegnì fitg bain. 

populaziun 31. december 2003: 631
populaziun 31. december 2000: 646
abitants tenor dumbraziun dal pievel 1880: 482
abitants tenor dumbraziun dal pievel 1950: 492
abitants tenor dumbraziun dal pievel 1980: 470

Agl ur ost dalla vischnaunca, sin Bregl da Heida, steva el 7. tschentaner ina baselgia-sala carolingica dil temps medieval tempriv cun ina apsida en fuorma d'in fier-caval. Ei setracta dalla el testament dagl uestg Tello dil onn 765 s.Chr. menziunada baselgia dil Sogn Columban. Igl ei da supponer, che la baselgia da Sogn Columban era ina baselgia privata dalla famiglia retica da Cuera dils victorids, che habitavan ella vischinonza da Bregl e possesevan ina gronda curt signiurila, che ei vegnida descretta el testament detagliadamein. La curt cumpigliava speras ina scauldabla casa ed edifezi d'economia cun in conduct d'aua era vegnas, orts da fretgs e verduras. Ruinas da mir sutteranas, che sebasan alla baselgia da Sogn Columban, indicheschan las dimensiuns dalla curt signiurila. Igl areal ei en posses dil cantun Grischun e stattan sut schurmetg dalla Confederaziun Svizra.

Ad ina skizza dil architect Peter Zumthor, ei els onns 60 vegniu construiu ina stela; igl onn 2004 ei ella vegnida renovada.




#Article 41: Giuventetgna Rumantscha (517 words)


La GiuRu (Giuventetgna Rumantscha) è ina uniun rumantscha che ha per finamira da promover la lavur da giuventetgna e furmar contacts tranter giuvenils da las differentas regiuns rumantschas e dad autras minoritads internaziunalas. 

La GiuRu è vegnida fundada l'onn 1991. Ella porscha sustegn finanzial, communicaziun ed agid da planisaziun e realisaziun per projects rumantschs che vegnan realisads da giuvenils u sa drizzan a giuvenils. L'entschatta da l'onn 2009 aveva la GiuRu ca. 185 commembras e commembers. A la radunanza generala 2008 èn suandantas persunas vegnidas elegidas sco suprastants: Gion-Andri Cantieni (president), Annatina Nay (vice-presidenta), Oliver Nyffeler (cassier), Luca Hasler (actuar), Sandro Buchli (assessur).  

Finanzialmain vegn la GiuRu sezza sustegnida per gronda part da la Lia Rumantscha e dal Uffizi federal da cultura. Las entradas da radund 40'000 francs investescha la GiuRu bunamain cumplettamain puspè en il sponsoring da projects. Il pli grond project da quests projects e la gasetta da giuventetgna PUNTS che vegn sustegnida da la GiuRu cun radund 15'000 francs. 

La GiuRu realisescha adina puspè projects per la giuventetgna. Plinavant lavura la GiuRu era vid projects che cuzzan sur lung temp. Intgins da quests chattas qua: 

La GiuRu ha ramassà tut las adressas da las uniuns da giuventetgna rumantschas dal chantun Grischun. Sin la pagina  èn tut questas adressas accessiblas. Plinavant datti er in chalender d'occurrenzas sin questa pagina, uschia che mintga uniun po publitgar sias occurrenzas. Questa purschida è la successura da www.giuventetna.ch - ina pagina surmirana che aveva la medema intenziun.

La posta-rumantscha è ina glista da mail che cuntegna en quest mument circa 600 adressas dad email. Mintga persuna po sa registrar cun sia adressa dad email sin  ed è lura commember u commembra da la glista. Uschè sa ella trametter emails a tut tschels commembers e survegn tut ils emails che ils auters commembers scrivan a la glista. Schebain che la posta-rumantscha è in project da la GiuRu sa drizza ella betg mo a giuvenils. La finamira da la GiuRu è da cuntanscher il pli grond public pussaivel. 

La GiuRu vesa en la posta-rumantscha era la pussaivladad da discutar problems da la politica linguistica cun in grond public. Mumentan vegnan dentant oravant tut annunziadas occurrenzas cun la glista da mail. 

La GiuRu è commembra da la GCEE, la Giuventetgna da cuminanzas etnicas Europeanas. Tras quai ha ella contact cun autras minoritads ord l'entira Europa - davent da la Spagna fin en Russia, davent da Danemark fin en Italia. 

L'onn 2005 ha la GiuRu er organisà il seminari d'atun da la GCEE, l' a Laax. Radund 70 giuvenils ord l'entira Europa che s'engaschan en lur minoritads han participà al seminari che ha gì lieu ils 12-16 d'october 2005.
La GiuRu aveva organisà in program cun differents workshops, in excursiun el conturn dal crap da Flem ed in concert da Corin Curschellas. 

Duas giadas ha la GiuRu era gia organisà il SnowExchange. Quai ils onns 2007 e 2009. Per quest occurrezna èn mintgamain var 20 giuvenils da differentas minoritads da l'Europa viagiadas en il Grischun a passentar in per gis cun ir cun skis, emprender ad enconuscher il rumantsch e barattar ora experientschas. 




#Article 42: Uniuns da giuventetgna (308 words)


Las ragischs da las uniuns da giuventetgna, sco quai ch'ellas sa preschentan oz, tanschan enavos fin l'onn 1801 (document nua che la cumpagnia da mats è vegnida menziunada per l'emprima giada). Da quai temp sa numnava ella cumpagnia da mats. Sco quai ch'il num di, appartegnevan mo giuvens, a partir da la fin da la scola enfin la maridaglia. La cumpagnia da mats aveva l'incumbensa d'inaugurar ils giuvenils en la cuminanza dals creschids. Tschintg elements fundamentals appartegnevan tar las cumpagnias da mats grischunas:

Uschè pudeva la cumpagnia da mats er influenzar las decisiuns politicas dal vitg. Las giurisdicziuns che la cumpagnia da mats fascheva vegnivan temidas, er sch'ellas n'eran betg renconuschidas. La dretgira da Mustér ha remartgà en il 18avel tschientaner, ch'i haja dà truaments exagerads d'ina «dretgira nauscha», dentant hajan quels process illegals magari manà tar meglras consequenzas ch'ils truaments uffizials. Oriundamain prendevan las cumpagnias da mats part a la guerra. Ellas sa furmavan agl ur da lur vischnancas per esser prontas da batter. La revoluziun franzosa ha extirpà en l'entira Svizra las cumpagnias da mats cun excepziun da las cumpagnias da mats dal Grischun.

En l'onn 1920 en las cumpagnias da mats vegnidas reorganisadas ed han survegnì ina tempra ecclesiastica. La recepziun en la cumpagnia succediva en rom festiv da Son Stefan. Quai usit vegn anc oz pratitgà uschia tar l'uniun da giuventetgna da Mustér.

Suenter il segund concil Vatican èn las cumpagnias da mats vegnidas fusiunadas cun las uniuns da mattauns. L'uniun da giuventetgna sco quai ch'ella exista oz en bleras vischnancas dal Grischun è vegnida fundada ils 14 da december 1974. Er las finamiras èn sa midadas e sa datadas al temp. Uschia vegn oz mess dapli pais sin:

Las uniuns da giuventetgna enserran tut la giuventetgna a partir dal 16avel onn da naschientscha fin la maridaglia u enfin il 30avel onn da naschientscha.




#Article 43: Mustér (2945 words)


Mustér (, , num uffizial: Disentis/Mustér) è ina vischnanca politica en il  en Svizra. Il num Mustér deriva dal latin «monasterium» quai che vul dir tant sco claustra, baselgia u catedrala. Il num Disentis perencunter deriva dal pled latin «desertina» quai che munta desert u regiun nuncultivada.

La vischnanca ha ina surfatscha da 9089 hectaras. La staziun da la Viafier retica e da la Viafier Matterhorn-Gottard è sin in’autezza da 1133 m. s. m. L’onn 2006 dumbrava la vischnanca anc 2122 abitants. 80% da quels discurran rumantsch u pli precis: rumantsch sursilvan.

Tar la vischnanca da Mustér na tutgan betg mo il vitg sez mabain era las suandantas fracziuns: Madernal è la fracziun che giascha il pli bas (969 m. s. m.) en l’ost da la vischnanca. Da l’autra vart dal Rain, vul dir da vart dretga, sa chatta Pardomat. In pau pli aut sur Pardomat chattain nus sin in a collina Cavardiras. La chaplutta da Sontg Antoni che paradescha là vesa ins gia da lunsch enturn. Sche nus cuntinuain noss viadi envers il vitg da Mustér, lura vegnin nus tar la fracziun Caprau ora en la quala ch’ins ha blers onns betg pudì abitar durant l’enviern pervi dal privel da lavinas. Uss è quai scumond puspè schlià si. En il cugn nua che il Rain mez, che vegn or da la Val Medel ed il Rain s’uneschan vesan ins Mompé-Medel. Da questa fracziun anora han ins ina bella survista sur prest l’entira vischnanca da Mustér. Bandunain nus la vart dretga dal Rain e vegnin puspè en il vitg da Mustér.  Per cuntanscher la proxima fracziun stuain nus dentant cuntinuar il viadi vinavant vers Sedrun. Cuoz, Buretsch e lura Segnas. Quai è la dretga successiun sch’ins vul visitar ina fracziun suenter l’autra. Cun Segnas avain nus lura era cuntanschì la pli gronda fracziun da Mustér. Quella ha era anc gì sco ultima in’atgna scola. Dapi var insaquants onns vegn quella mo pli duvrada da las uniuns da Segnas. L'ultima e cunquai era la fracziun che giascha il pli aut en la vischnanca da Mustér è la Fracziun da Mompé-Tujetsch.

Ils quartier dal vitg da Mustér sa numnan: Faltscharidas, Sontget, Chischliun, Scaletta, Carcarola, Davos-Mustér, Vitg, Cons, Raveras, Gonda, S. Gions, Dulezi, Latis, Acla da Fontauna, Funs, Clavaniev ed Acletta.

Il lieu nua che Mustér è ussa da chattar èra antruras cuntrada nuncultivada. Quai di gia il num Disentis. L’onn 700 è in pader sa mess sin viadi da la Val dal Rain siadora. El è arrivà a Desertina ed è sa chasà là sco eremit.  Il pader cun num Sigisbert derivava d’ina claustra cun l’urden da Son Martin. Dal num e da l’urden sa resulta che l’um derivava da la Franconia (regiun en il sid da la Germania). 
Sigisbert ha obtegnì agid da Placi ch’era da quai temp in dals pli ritgs indigens. Ensemen han els bajegià ina chaplutta.  Il tiran Victor ha temì che sia pussanza en la regiun pudessi esser en privel ed ha laschà mazzar Placi. La legenda raquinta che Placi saja vegnì stgavazzà e ch’el haja suenter prendi ses chau en ses mauns e purtà quel in toc envers la claustra. El haja deponi quel là avant ils pes da Sigisbert e saja mort. Là nua che quai duai esser capità stat oz la baselgia da Son Placi. En quella baselgia sa chattan era maletgs che raquintan la legenda.
L’avat Ursicin ha fundà en la mitad da l’otgavel tschientaner l’emprima claustra en la quala ch’ils paders vivan tenor l’urden da Son Benedetg. Tenor il cudesch da fraternisaziun da Reichenau-La Punt dumbrava la claustra l’onn 810 gia 93 paders che vivevan actualmain là e 71 ch’eran gia morts. Ils nums dals paders laschan sminar ch’ils paders eran alemans, francs, langobards u indigens. La claustra ha obtegnì bler terren ch’ins ha cumenzà a runcar e cultivar. Uschia è era il vitg da Mustér naschì. La claustra era da quest temp la suletta plaiv per las regiuns da Medel, Tujetsch, Andermatt e Mustér.
Ils buns onns per la claustra da Mustér èn ids a fin cun l’invasiun dals Saracens l’onn 940. Ils paders èn fugids en il Grossmünster a Turitg, èn dentant returnads per puspè bajegiar si tut. La povradad e la politica dal Pass dal Lucmagn che regiva da quai temp ha attratg l’attenziun dals imperaturs tudestgs sin la claustra. Otto I. e Friederich I. Barbarossa èn viagiads sur il Lucmagn. La claustra ha obtegnì grondas donaziuns. La regiun subdita tanscheva en l’ost enfin Breil, en il vest enfin il Pass dal Furca ed en il sid enfin en la Lumbardia.

L’emprim da mars 1799 ha la Frantscha declerà la guerra. Quai è sta la segunda guerra da coaliziun da 1799 enfin 1802. Las truppas austriacas avevan l’incumbensa da sustegnair las truppas da nossa terra ed uschia segirar ils cunfins ed ils pass. Las truppas franzosas han attatgà il Grischun dal sid, dal nord e dal vest. Uschia èsi vegnì ils 7 da mars 1799 tar ina battaglia a Mustér. A Mustér eran in corp da chatschaders e duas cumpagnias austriacas staziunadas. La battaglia en las streglias da Mustér è stada ina victoria per Mustér. Ils Franzos èn vegnids cumbattids enavos enfin il Pass da l’Alpsura. Dals Franzos han mo in quart survivì quella battaglia. La perdita da las truppas austriacas ed indigenas è dentant stada fitg pitschna.
En il nord han las truppas franzosas dentant gì dapli success. Ils 8 da mars eran quellas a Reichenau. Ins è sa cunvegnì cun general Demont tar in armistizi en il qual ins ha garantì la vita ed il possess dals indigens. General Demont è sa retratg cun sia truppa uschia che general Loison ha pudì occupar cun 600 umens il vitg. Il general è sa mussà sco engraziaivel giast da la claustra. El ha cumandà a ses umens da respectar ils indigens sco engraziament ch’els hajan tractà bain ils arrestads ed ils blessads. Cun quella relaziun amicabla èsi dentant spert stà a fin.
Ils 16 da mars 1799 è vegnì pretendì d’in incumbensà da la Frantscha ina contribuziun da guerra da 100’000 francs franzos. La claustra na pudeva betg pajar quella immensa summa ed ha regalà l’entira facultad.
La populaziun sperava sin in success dals Austriacs che vulevan attatgar ils Franzos en la vischinanza da Cuira. L’emprim da matg ha il pievel da Mustér cumenzà a rebellar ed han mazzà tut ils arrestads franzos.  Entant n’han ils Austriacs betg gì success cun lur attatga. Quatter dis pli tard èn ulteriuras truppas arrivadas a Mustér ed han fatg vendetga per lur camarats mazzads e dà fieu a la claustra ed a l’entir vitg. Entras il fieu e las armas dals Franzos han era 20 indigens pers lur vita. Ils Austriacs han danovamain attatgà ils Franzos e quella giada cun success. Ils 17 da matg èn els arrivads a Mustér.
La povradad a Mustér era indescrivibla. Per la populaziun na devi betg la pussaivladad da metter la racolta sut tetg. Il medem onn èn anc ina giada schuldada marschada atras Mustér. General Suwarow è vegnì sur il Pass dal Lucmagn cun 6000 umens ed ì vinavant sur il Pass da l’Alpsura.

L’executiva da la vischnanca da Mustér furma ina suprastanza communala cun tschintg commembers.  1973 han las votantas ed ils votants da Mustér decidì d’introducir in cussegl da vischnanca enstagl da la radunanza da vischnanca che furmava enfin là la legislativa. Il cussegl dumbrava a l’entschatta 21 cusseglier(a)s è lura vegnì redimensiunà sin 15 cusseglier(a)s. Cun Cecilia Maissen-Desax ha il cussegl da vischnanca da Mustér elegì per l’onn 2008 l'emprima dunna sco presidenta dal cussegl da vischnanca. Tar las elecziuns da las autoritads communalas il november 2008 è ella vegnida elegida en la suprastanza communala. Uschia sesa era en l'executiva per l'emprima giada ina dunna.

La tschentada da cumin da la Cadi che ha gì ina tradiziun da passa 600 onns vegniva adina manada atras en il curtin da la claustra da Mustér. Il circul da la Cadi (tud. Kreis Disentis) consista ord las vischnancas da Medel, Tujetsch Sumvitg,  Trun, Schlans, Breil e Mustér. La populaziun da la Cadi ha decidì a l’urna ils 24 da settember 2000 da dismetter quella veglia tradiziun. Cunquai è la tschentada da cumin dals 7 da matg 2000 era stada l’ultima tschentada. Las elecziuns dal mistral e dals deputads che represchentan la Cadi en il cussegl grond dal chantun Grischun vegnan davent da là elegids entras votaziun a l’urna.

A Mustér ha il Pass dal Lucmagn giugà in’impurtanta rolla. En connex cun il Pass dal Lucmagn è era la claustra da Mustér stada entretschada fermamain. Ella valeva sco la protectura dal pass. Per pudair proteger quel ha la claustra construì en il 11 e 12avel tschientaner ils ospizis da Son Gagl, Son Gions e Sontga Maria.
La fin da temp medieval era il Pass dal Lucmagn era la via dals commerziants milanais. Cun la martganzia èn era malsognas ed epidemias vegnidas importadas. Quai mussan las bleras chapellas cun ils patruns baselgia Son Bastiaun, Sontg Antoni, Son Roc e Son Cristoffel che valan tuts sco protecturs da la pesta. 
Cun l’avertura da la Chavorgia da la Scalina (Schöllenenschlucht) ha la concurrenza tranter il Pass dal Gottard ed il Pass dal Lucmagn cumenzà. La Val d’Ursera è uschia daventada pli ritga ed è sa cumprada libra da la claustra da Mustér. 1820 èn las emprimas vias vegnidas bajegiadas. La Via Sursilvana, ch’è oz ina via da viandar, è vegnida construida l’onn 1858 enfin Mustér ed ha cuntanschì l’onn 1863 il cunfin dal chantun sin il Pass da l’Alpsura. In onn suenter cursava la charrotscha da posta federala da Cuira enfin ad Ursera (Andermatt). La construcziun da la via dal Lucmagn è stada a fin da vart grischuna l’onn 1877.

In’ulteriura giada scriva il Pass dal Lucmagn istorgia e quai pervi d’ina viafier. L’istorgia è prest ida en emblidanza. La mitad dal 19avel tschientaner pareva la Svizra d’esser predestinada per ils pioniers da viafier. La Svizra dueva daventar in corridor tranter las naziuns d’industria Germania, Belgia, Engalterra en il nord e l'Italia en il sid. Sco emprim han ins pensà davart ina lingia sur il Pass dal Spleia u sur il Pass dal Son Bernardin. Bain spert ha dentant il Pass dal Lucmagn attratg l’attenziun. 
Gia ils 30 d’october 1845 – quai è gia avant che l’emprima viafier è vegnida messa en funcziun en Svizra -  è vegnì fatg in contract statal cun ils chantuns da Son Gagl, Tessin e Grischun. Il chantun Tessin è dentant sa collià cun ina gruppa d’aderents dal Gottard ch’è sa furmada 1863. Intgins onns pli tard (1869) è la decisiun lura crudada en favur da la viafier dal Gottard. Cunquai n’han ins betg pli discurrì d’ina viafier sur il Pass dal Lucmagn.

Suenter quella sconfitta cun la viafier sur il Lucmagn ha in hotelier da Tavau prendi l’iniziativa. El ha fundà la firma «Rhätische Bahn AG». Uschia è il traject da Cuira a Glion vegnì avert l’emprim da zercladur 1903. En ils onns 1910 enfin 1912 è quella lingia vegnida prolungada enfin a Mustér.
Anc il medem onn han la «Brig–Furka–Disentis-Bahn (BFD)» cumenzà cun la construcziun dals binaris en direcziun d’Ursera (Andermatt). Quella lignia è vegnida averta ils 19 da zercladur 1926 e var in mais pli tard è quella stada averta enfin a Brig. Ozendi è il «Glacier-Express» in’attracziun che cursescha sin las lingias da la Viafier retica (Rhätische Bahn, RhB) e da la Viafier Matterhorn-Gottard (Matterhorn-Gotthard-Bahn, MGB).

Mustér era gia la fin dal 17avel tschientaner enconuschent per la ritgezza da minerals. Oravant tut la funtauna da Son Placi attirava adina l’attenziun per via da sia aua da ruina. Decan Pader Maurus Cathrin aveva laschà endrizzar in bogn e laschava purtar per quel aua or da la Val Son Placi. In’analisa da l’aua è vegnida fatga pir l’onn 1878 da professer Haniman. 1898 ha il tractament cun radium gì ina gronda impurtanza en la medischina. Uschia che la scuverta che l’aua da la funtauna da Son Placi irradiescha radium è stada da gronda impurtanza. Quella irradiaziun da radium, ch’è vegnì numnà pli tard radon, è la pli ferma en l’entira Svizra.

Avant ch’i ha dà ina chasa da cura a Mustér abitavan ils giasts en la claustra u en in dals ulteriurs albierts. 1872 ha la firma «Gebrüder Condrau» vegnida fundada. La firma ha bajegià il hotel Disentiserhof, ch’è vegnì avert l’emprim da fanadur 1877. L’hotel cuntegneva l’entira infrastructura per bogns da cura. 1908 è l’hotel vegnì vendì a la famiglia Tuor. Lezza ha manà l’hotel cun ils bogns enfin 1967. Lura ha ella vendì l’hotel a la societad acziunara «Disentiserhof AG». L’uniun da traffic ha laschà elavurar 1965 in project che preveseva che Mustér dueva daventar in lieu da cura. Il cussegl da vischnanca aveva decidì ils 26 d’avrigl 1970 a favur dal project. Realisà è quel dentant mai vegnì. Il “vegl” hotel Disentiserhof è vegnì siglientà 1978 dad ina truppa da l’armada. Suenter è vegnì construì là in hotel senza bogns da cura. Uschia è l’epoca da Mustér sco lieu da cura stada a fin.

Mustér ha ina lunga tradiziun sco lieu da sport d’enviern e quai er sche l’infrastructura è vegnida construida pir en ils onns 70. La fin da 19avel tschientaner ha la Gasetta Romontscha rapportà da curaschus skiunzs che vegnivan dal chantun Glaruna sur il Sandpass a Mustér. En ils onns 50 manava l’armada atras blers curs alpins a Mustér ed ha uschia mess il crap da fundament per il sport d’enviern. In club da skis è gia vegnì fundà l’onn 1906 a Mustér. 1962 è schizunt vegnì bajegià ina schanza da siglir cun skis. En ils onns 70 è quella vegnida renovada. 1984 ha quella dentant stuì far plaz ad in rempar da lavinas. La confederaziun ha surdà 1963 la concessiun per ina pendiculara. 1969 è lura la societad acziunara Bergbahnen Disentis AG vegnida fundada cun in chapital da var 4 milliuns francs. Ils 23 da december 1971 èsi lura stà uschè lunsch. La pendiculara da Mustér a Caischavedra, ils runals 1 e 2  ed l’ustaria a Caischavedra èn vegnids averts. En ils onns suenter è anc vegnì bajegià dus ulteriurs runals e l’onn 1987 ina sutgera. En ils onns 1995/1996 è vegnì prendi en funcziun las duas sutgeras che han remplazzà ils emprims dus runals (Caischavedra - Gendusas e Gendusas - Lai Alv). Davent da 2005 enfin 2007 èn la staziun da val e la staziun da muntogna vegnidas renovadas. L’atun 2007 è vegnì inaugurà ina nova pendiculara. La capacitad da quella è 90 persunas u 940 persunas per ura.

Gia 1580 manava la claustra ina scola primara per la vischnanca. 1842 ha la vischnanca introducì la scola obligatorica. La scola era gratuita ed ils uffants avevan da frequentar quella davent dal 7avel enfin il 15avel onn da vita e quai durant 24 emnas per onn. 1883 ha la vischnanca bajegià ina nova scola. 20 onns suenter duvravi gia puspè dapli plaz ed uschia vegniva anc da scola en autras chasas. Ils scolasts instruivan mintgamai pliras classas en il medem mument.  Il dumber da scolars è creschì vinavant ed uschia è vegnì bajegià 1952 la «scola veglia» sco quai ch’ella vegn anc numnada oz e 1980 la «scola nova» 

Las ragischs da la scola claustrala chatt’ins en l’otgavel tschientaner. Pervi da l’invasiun dals franzosa mancan ils documents. Enfin il 16avel tschientaner existiva ina scola latina che dumbrava 25 students.  Da quai temp na manava la claustra nagin internat. Ils students avevan suttetg en il vitg. 1804 è ina nova scola vegnida averta. Quella vala sco emprima scola chantunala.  Quatter onns pli tard è quella vegnida dischlocada a Cuira. Davent dal 1833 enfin 1842 è quella scola puspè vegnida manada a Mustér. Davent da 1850 enfin 1856 hai dà a Mustér ina scola episcopala. A partir da 1856 è sulettamain vegnì manà ina pitschna scola privata. Dapi 1880 maina l’abazia benedictina in gimnasi. La scola claustrala a Mustér è ina scola media privata nua ch’ins po far la matura. La scola visitan tant scolaras e scolars da la regiun sco era da l’entira svizra. Dapi 30 onns vegnan era las mattas instruidas. Betg emblidar dastg’ins l’internat.

L’istorgia da Mustér è era colliada cun la forza da la natira che po destruir possess e vita. 1458 ha ina lavina destruì la baselgia da Son Placi, differents bains purils e custà la vita a 16 persunas. Las lavinas da 1899, 1907 e 1951 èn anc enconuschentas e per part en buna memoria. L’avrigl 1975 ha la lavina da la Val Son Placi destruì 15 bajetgs d’economia e 25 ha guaud. Era 1978 ha ella cuntanschi il vitg. 1984 ha la medema lavina destruì il curtin dal hotel Disentiserhof. 1944 ha la lavina da la Val Clavaniev cuntanschì l’aual d’Acletta. En la Val Clavaniev èsi vegnì construì lavineras. Giudim la Val Son Placi gist davos la baselgia da Son Placi è vegnì construì in dam. Sur la Val Son Placi è lura era vegnì installà in sistem d’alarm.

Gronds donns han era auas grondas chaschunà en ils onns 1834, 1868, 1927, 1954 e 1987.

In eveniment da la natira ch’è anc a bleras convischinas e convischins da Mustér e conturn en buna memoria è l’orcan Vivian. L’orcan ha destruì ils 27 e 29 da favrer 1992 aifer secundas 275 ha guaud. Ils onns precedents ha la vischnanca da Mustér manà la pli gronda gestiun forestala. Ils donns èn anc oz da vesair. La vischnanca ha Mustér ha gì cletg che l’orcan n’ha betg destruì il guaud sur vischnanca. Quai è numnadamain in guaud da protecziun. Sche quel fiss betg, stuess la vischnanca far gronds sforz cun construir lavineras che protegian il vitg da lavinas.




#Article 44: Giuvens Socialists (333 words)


La partida da la Giuventetgna Socialista Svizra (GSS) è la partida giuvna da la Partida Socialdemocrata da la Svizra (PSS). Malgrà sia colliaziun cun la PS è la GSS autonoma e decida sezza, co ella s'engascha politicamain. Medemamain prova ella adina puspè da influenzar la direcziun politica da la PS. Sia posiziun politica è circa quella da la part sanestra da la PS che stat datiers als sindicats.

La Giuventetgna socialista Svizra ha oz ca. 2'500 commembras e commembers en passa trenta secziuns en l'entira Svizra; il dumber da secziuns è s'augmentà considerablamain ils davos onns. En tscherts chantuns (pli gronds) datti pliras secziuns dals GS, en auters chantuns pli pitschens (per il solit plitost conservativs) èn las secziuns pir en construcziun.

Las secziuns da la partida da la GS han da bler autonomia. Quai è per part era motivà entras la structura federalistica da la Svizra. Entras la radunanza annuala e las radunanzas da delegads che han lieu nov giadas ad onn han ellas era bler pais (secziuns pitschnas han proporziunalmain blera pussanza en questas radunanzas). 

La direcziun generala è l'organ che maina la GSS. Ella vegn elegida durant la radunanza annuala. La GSS ha in president en plazza parziala da 40 pertschient. Mumentan è Cédric Wermuth da l'Argovia il president da la GSS. El è vegnì elegì sco prim president insumma l'onn 2008. La plazza dal secretari central è la segunda plazza da lavur dals GSS, dotada cun 80 pertschient. Actualmain è Tanja Walliser la secretaria centrala da la GSS (dapi 2009). 

La partida da la GSS edescha ina atgna pitschna gasetta che cumpara 10 giadas ad onn, l'infrarot. 

La partida da la GSS fa part dal moviment internaziunal dals lavurers e dal moviment mundial socialist da la giuventetgna ed è per quai era uniun affiliada da la  International Union of Socialist Youth. Cun quai che la Svizra n'è betg commembra da la Uniun Europeica, èn ils GS svizzers mo in commember assozià da la ECOSY – Jóvenes Socialistas de Europa




#Article 45: Renzo Blumenthal (208 words)


Renzo Blumenthal (* 26 da december 1976 a Vella ella Val Lumnezia) era il Mister Svizra digl onn 2005.

Renzo ei el secund digls quater fegls dad Ursin e Carmen Blumenthal e stat aunc oz en siu vitg da naschientscha. Il lungatg principal dad el ei il romontsch sursilvan che dominescha er fermamein la vallada.

Oriundamein vuleva Renzo daventar profi da ballapei. 1996 giugava Blumenthal ella selecziun da juniors digls Grasshoppers da Turitg e veva persuenter in contract sco profi tier igl FC Sogn Gagl duront in miez onn tocha ch'ina blessura ha empediu el da far vinavont cun sia carriera da profi. El giugava denton aunc adina ballapei - tocha la stad 2005 pigl FC Cuera e dapi lu tier igl CB Lumnezia Degen, il club da sia regiun.

Suenter la disfatga cun la carriera sco giugadur da ballapei ha Renzo Blumenthal empriu il mistregn digl pur. El lavura tier il menaschi puril biologic da ses geniturs a Vella.

Er sco Mister Svizra stava el bugen a disposiziun per ils intents dall'agricultura. El moderescha alternativamein cun l'anteriura Miss Svizra Tanja Gutman l'emissiun Wunschkonzert tier il Buureradio. El ei in digls Misters Svizra cun il pli grond success: Duront siu onn d'uffeci ha el gudignau rodund 420'000 francs.




#Article 46: Argentinia (283 words)


LArgentinia (spagnol Argentina) è ina republica en il sid da l'America dal Sid. Ella è l'otgavel grond stadi dal mund ed il segund grond dal continent; cun reguard als abitants occupa ella qua il terz rang. Pervia da sia gronda extensiun nord-sid cumpiglia il pajais numerusas zonas climaticas e da vegetaziun. Il num dal stadi deriva dal pled latin per argient – argentum – e renviescha als stgazis ch'ils conquistaders han cartì da chattar sin il territori dal pajais. Fin tar sia independenza l'onn 1816 ha l'Argentinia fatg part da l'Imperi colonial spagnol.

La chapitala dal stadi, Buenos Aires, è il center dad ina da las pli grondas aglomeraziuns sin il continent american e vegn resguardà sco in da ses pli gronds centers culturals, nua che tranter auter il tango ha ses origins. A medem temp èn autras parts dal stadi, cunzunt il sid setg, be pauc populads. Politicamain è l'Argentinia ina republica presidenziala, nua ch'ils stadis commembers, las provinzas, han cumpetenzas vastas.

L' Argentinia (per spagnol uffizialmain: República Argentina o Confederación  Argentina)  è in pajais sidamerican fundà l'onn 1810. 
Sia surfatscha munta a 2.701.810 km² (3.761.274 km² cun Antarctica argentina).
Sia populaziun dumbra 43'417'000 (2015) abitants.
La lingua uffiziala è il spagnol.
Independenza: 9 fanadur  da 1816.
Il pli aut culm (il medem mument da tut l'America) è l'Aconcagua cun 6959 m.s.m en la provinza Mendoza,  Punct  pli bass: Laguna del Carbón (medemamain da tut l'America) (103 m.b.m); il pli lung flum è il Paraná cun 3998 km.

L'Argentinia cunfinescha en il vest cun il Chile, cun la Bolivia ed il Paraguay en il nord, cun Brasilia ed Uruguay en il nord-ost.

 
L'Argentina o Argentinia è ina federaziun; ses stadis (provincias) èn:




#Article 47: Iran (130 words)


Iran (Persia, persian: ایران) è in stadi islamic situà en l'Asia dal vest. Cun 68 milliuns abitants dumbra el tar ils 10% da stadis cun ils pli blers abitants.

L'Iran cunfinescha cun 7 stadi e 2 mars: en il vest e nordvest cun l'Irac (ca. 1'458 km cunfin) la Tirchia e l'Aserbeidschan (ca. 500 km), cun l'Armenia (35 km) e cun la Mar Caspica (500 km); en l'ost e sidost cun Turkmenistan (ca. 1.000 km), Afghanistan (936 km) e Pakistan ed a dus bratsch da l'Ocean Indic (Golf dad Oman e Golf Persic).

La pli auta montogna dal Iran è il Damavand (Demawend, Dēmāwend) (5'671 m s.m.) en las muntognas da l'Elbrus sin 35,9° grads nord - in vulcan stiz surtratg da glatschers en il nordost da la chapitala Teheran.




#Article 48: Karl Marx (8740 words)


Karl Marx (* 5 da matg 1818 a Trier; † 14 da mars 1883 a Londra) è stà in filosof, econom, teoreticher da la societad, schurnalist politic, protagonist dal moviment da lavurants e criticher da la societad burgaisa e da la religiun. Ensemen cun Friedrich Engels è el daventà entaifer il socialissem e communissem il teoreticher cun la pli grond’influenza. Sias teorias vegnan discutadas enfin oz a moda cuntraversa.

Karl Marx è naschì il 1818 a Trier sco terz da nov uffants da l’advocat Heinrich (Heschel) Marx (1777–1838) e da Henriette Marx. Da vart da la mamma era Karl Marx in basrin dal poet tudestg Heinrich Heine che derivava medemamain d’ina famiglia gidieua e cun il qual Marx ha tgirà in stretg contact durant ses temp a Paris. In cusrin da Karl Marx è stà Frederik Philips (1830–1900) ch’ha fundà il 1891 cun ses figl Gerard il concern d’electrica Philips. Heinrich Marx derivava tant da vart dal bab sco er da vart da la mamma d’ina famiglia da rabins pussanta. Ils onns 1811–1813 è el stà activ sco interpret giudizial e translatur ad Osnabrück (che fascheva da quel temp part da la Frantscha). Il 1812 è el s’associà a la loscha da framassuns ‹L’Etoile Hanséatique›. Tranter il 1816 ed il 1822 è el sa convertì al protestantissem; sco gidieu n’avess el numnadamain betg pudì cuntinuar sut la regenza prussiana cun ses uffizi d’advocat ch’el aveva surpiglià dal temp da Napoleun. Ils 26 d’avust 1824 èn ils uffants Sophia, Hermann, Henriette, Louise, Emilie, Caroline ed er Karl vegnids battegiads en l’abitaziun dals geniturs. La mamma però ha pir fatg quest pass bundant in onn pli tard, damai ch’ella aveva tema che sia famiglia, surtut ses bab, dischapprovassan quest pass.

Dal 1830 fin il 1835 ha Karl Marx frequentà il gimnasi a Trier; cun 17 onns ha el fatg ensemen cun ses ami e quinà da pli tard Edgar von Westphalen l’abitur, e quai cun ina media da las notas da 2,4. Speziala affecziun ha Marx resentì da quel temp envers il directur Johann Hugo Wyttenbach. Tranter ses magisters èn stads Vitus Loers e Johann Abraham Küpper. In da ses magisters è er stà Johannes Steininger, in scienzià da la natira e geolog da renum internaziunal. Steininger era in aderent dad Alexander von Humboldt. L’onn 1836 è Marx sa spusà a Trier cun la sora dad Edgar, Jenny von Westphalen (1814–1881).

L’onn 1835 è Marx ì a Bonn a studegiar giurisprudenza e cameralistica. Schebain el ha fatg part là da la ‹Landsmannschaft der Treveraner› na sa lascha betg cumprovar. En tutta cas è el però vegnì sentenzià pervi da «far canera da notg e sturnadad» ed ins ha investigà encunter el per avair purtà in sabel. A Bonn ha el visità prelecziuns giuridicas tar Ferdinand Walter, Eduard Puggé ed ulteriuras prelecziuns tar Friedrich Gottlieb Welcker ed August Wilhelm Schlegel. Tenor indicaziuns da Moriz Carrière duai Marx er avair appartegnì ad in circul litterar, dal qual faschevan part Carrière, Marx, Emanuel Geibel, Karl Grün, Karl Ludwig Bernays, Theodor Creizenach e Heinrich Bernhard Oppenheim.

In onn pli tard ha Marx midà a l’Universitad da Friedrich-Wilhelm a Berlin (oz Universitad da Humboldt), nua ch’el ha visità prelecziuns giuridicas tar Eduard Gans (dretg criminal e dretg territorial prussian), Friedrich Carl von Savigny (dretg roman), Henrich Steffens (antropologia), August Wilhelm Heffter (dretg ecclesiastic, procedura civila tudestga), Georg Andreas Gabler (logica), Carl Ritter (geografia generala), Adolf August Friedrich Rudorff (dretg d’ierta), Bruno Bauer (Jesaja) e Carl Eduard Geppert (Euripides). L’accent principal da ses studis è bainspert sa spustà da la giurisprudenza vers la filosofia e l’istorgia. Qua è Marx vegnì en contact cun il circul dals giuvens hegelians u hegelians da sanestra, dal qual ils frars Bruno ed Edgar Bauer han furmà ils represchentants ils pli impurtants. Da quel temp ha el er fatg amicizia cun Karl Friedrich Köppen e cun Adolf Friedrich Rutenberg.

Georg Wilhelm Friedrich Hegel, ch’è mort il 1831, ha gì da ses temp ina grond’influenza sin la vita spiertala en Germania. L’establishment hegelian (er enconuschent sco vegls hegelians u hegelians da dretga) resguardava il stadi prussian sco terminaziun d’ina seria da svilups dialectics, segnada d’ina birocrazia effizienta, da bunas universitads, da l’industrialisaziun e d’in aut grad d’occupaziun. Ils hegelians da sanestra, als quals appartegneva Marx, han percunter fatg quint cun in ulteriur svilup dialectic; problems betg schliads furmavan per els la povradad, la censura statala e la discriminaziun dals umans che na sa decleravan betg sco luterans. 

Suenter la mort da ses bab Heinrich Marx ils 10 da matg 1838 ha Marx survegnì sco avugà uffizial Johann Heinrich Schlink, damai ch’el daventava pir maioren cun 25 onns.

Ils 14 d’avrigl 1841 è Marx vegnì promovì in absentia a l’Universitad da Jena al docter da la filosofia, e quai cun ina lavur davart la differenza tranter la filosofia da la natira da Democrit ed Epicur. Sperond sin ina professura è Marx sinaquai ì a star a Bonn; ma la politica da la regenza prussiana al ha sclaus da la carriera academica – tuttina sco Ludwig Feuerbach, Bruno Bauer ed auters –, valeva el gea sco in dals manaders dals hegelians da sanestra opposiziunals. Sut ses num ha el publitgà il schaner 1841 en la revista dals giuvens hegelians ‹Athenäum› duas poesias sut il titel ‹Wilde Lieder›.

Da quel temp han burgais liberals fundà a Cologna la ‹Rheinische Zeitung für Politik, Handel und Gewerbe› sco organ communabel da las differentas direcziuns opposiziunalas, da monarchists liberals fin a democrats radicals. Marx è daventà in dals collavuraturs principals dal fegl. L’october 1842 ha el surpiglià la redacziun da la gasetta, la quala ha represchentà da qua davent in puntg da vista opposiziunal anc pli radical. Marx, Arnold Ruge e Georg Herwegh han gì da quel temp ina divergenza d’opiniuns cun il circul enturn lur correspundent da Berlin Bruno Bauer; a quel ha Marx fatg la reproscha da duvrar la gasetta «surtut sco vehichel per propaganda teologica ed ateissem etc. enstagl per discussiun politica ed acziun». Cura che Friedrich Engels, che valeva sco ami ed adherent dals hegelians da sanestra da Berlin, ha visità ils 16 da november 1842 la redacziun a Cologna, è quest emprim inscunter cun Marx perquai plitost stà reservà.

Pervi dals Decrets da Karlsbad era l’entira pressa suttamessa a la censura. Areguard la ‹Rheinische Zeitung› era quella spezialmain severa. Las autoritads prussianas han l’emprim tramess in censur spezial da Berlin. Vesend che quai na tanscheva betg, stueva mintga ediziun vegnir suttamessa en segunda instanza al president da la regenza da Cologna. Damai che la redacziun da Marx guntgiva regularmain questa censura dubla, è la gasetta vegnida scumandada per il prim d’avrigl 1843. Marx è sa retratg ils 17 da mars sco collavuratur e redactur, perquai ch’ils possessurs speravan da pudair cuntanscher ch’il scumond vegnia annullà sch’els midian la tendenza da la gasetta.

Il 1843 ha Marx maridà a Kreuznach sia spusa Jenny von Westphalen. Da la lètg èn resortids set uffants, dals quals be las trais figlias Jenny, Laura ed Eleanor han survivì l’uffanza.

Ils 11 u 12 d’october 1843 èn Marx e sia dunna arrivads a Paris, nua ch’els han abità a la Rue Vanneau. Ensemen cun Arnold Ruge ha Marx cumenzà là ad edir la revista ‹Deutsch-Französische Jahrbücher›. Il 1843 ha el emprendì a conuscher a Paris German Mäurer. En connex cun si’activitad per la revista ha er cumenzà la correspundenza cun Friedrich Engels ch’aveva contribuì dus artitgels. Da la revista è però mo cumparì in numer dubel e quel er be en lingua tudestga, damai che Louis Blanc e Proudhon n’avevan furnì nagins artitgels. La cuntinuaziun da la revista ha fatg naufragi per differents motivs: Julius Fröbel na la vuleva betg pli finanziar, ina gronda part da l’ediziun è vegnida confiscada al cunfin e tranter ils dus redacturs èn bainprest sa mussadas differenzas da princip. Ruge è restà obligà a la filosofia da Hegel ed a la democrazia burgaisa; Marx ha cumenzà a sa fatschentar cun economia politica ed a sviluppar in agen puntg da vista (surtut or da la critica envers ils socialists franzos).

La fin 1843 ha Marx emprendì a conuscher a Paris il poet tudestg Heinrich Heine, cun il qual el era parentà da lunsch. Per vita duranta èn els stads colliads amicablamain.

Ils ‹Ökonomisch-philosophische Manuskripte› da l’onn 1844 furman l’emprima emprova da Marx da stgaffir in sistem economic e rendan a medem temp visibel en tge direcziun filosofica che l’autur sa mova. Marx sviluppa qua per l’emprima giada sia teoria da la «lavur alienada», la quala s’orientescha a Hegel.

Marx n’ha però betg terminà quests uschenumnads ‹Manuscrits da Paris›, mabain ha scrit curt suenter – en rom da la culminaziun da la discussiun contemporana areguard ils giuvens hegelians – ensemen cun Friedrich Engels l’ovra ‹Die heilige Familie›. Da lur lavur communabla vi dals ‹Deutsch-Französische Jahrbücher› era sa sviluppà cun Engels – il qual al aveva er visità il settember 1844 per intgins dis – ina viva correspundenza; quella dueva la finala manar ad in’amicizia per vita duranta ed ad ina stretga collavuraziun politica e publicistica. L’emprim resultat da quella, ‹Die heilige Familie›, è stà in pamflet drizzà «cunter B.[runo] Bauer e ses cumpogns»; la cumpart dad Engels vi da quella sa restrenscha però a diesch paginas. Marx polemisescha qua cunter ils giuvens hegelians da Berlin enturn ses anteriur mentur Bruno Bauer. In impurtant commember da questa gruppa na menziunescha el a l’entschatta però betg: Max Stirner. L’october 1844 aveva quel publitgà ses cudesch ‹Der Einzige und sein Eigentum›, il qual Engels aveva l’emprim valità a moda pli u main positiva (en ina brev dals 19 da november drizzada a Marx).

Marx ha giuditgà il cudesch a moda pli critica che Engels ed è vegnì da persvader quel en sia resposta da sia tenuta. Malgrà quai para el d’avair surpiglià per part la critica da Stirner envers Feuerbach ed ha scrit la primavaira 1845 sias famusas ‹Thesen über Feuerbach› ch’èn però pir cumparidas postum. Pir l’atun 1845, suenter avair prendì enconuschientscha da la reacziun da Feuerbach sin la critica da Stirner sco er da la replica da Stirner sin quella, è el sa decidì da scriver sez ina critica da l’ovra da Stirner. El ha fatg quai il 1845–1846 en furma dal chapitel ‹Sankt Max› en la scrittira communabla da Marx ed Engels ‹Die deutsche Ideologie›, il qual è però pir vegnì edì suenter la mort da Marx.

En l’emprim chapitel, deditgà a la critica da religiun dal giuven hegelian Ludwig Feuerbach, sviluppan Marx ed Engels en furma da model in «process dal svilup pratic» da l’istorgia umana. Cuntrari als hegelians na vesan els quella betg sco svilup dal spiert, mabain sco istorgia da la pratica umana e da las relaziuns socialas: «Nus partin d’umans e lur occupaziun per propi e represchentain a basa dal decurs real da lur vita er il svilup dals reflexs ideologics ed ecos da quest process.» Attenziun speziala laschan els prevegnir a la partiziun da la lavur ch’els resguardan sco factur decisiv entaifer il svilup istoric. A Feuerbach, ch’argumentescha medemamain a moda materialistica, reproschan els d’avair chapì l’uman sco esser abstract, ma betg sco subject en si’activitad sensitiva e pratica.

Ils auters chapitels da la ‹Deutsche Ideologie› cumpiglian ina ferma critica dals ulteriurs giuvens hegelians sco represchentants d’ina critica da la societad che saja, uschia Marx ed Engels, oravant tut idealistica. Er als represchentants da l’uschenumnà «vair socialissem» (surtut Karl Grün) è deditgà in chapitel. Dal temp da vita da Marx han però diversas emprovas da publitgar l’ovra fatg naufragi, uschia ch’el ha la finala be pudì edir il chapitel davart Karl Grün (il 1847 en la revista ‹Das Westphälische Dampfboot›). L’ovra cumplessiva è pir cumparida il 1932 en rom da la ‹Marx-Engels-Gesamtausgabe› (MEGA).

Ils fundaments d’in «materialissem istoric» che Marx ed Engels han sviluppà sa distanziond da las direcziuns socialisticas e giuven hegelianas da quel temp, accentueschan las forzas motoricas socialas e materialas da l’istorgia e furman uschia in precursur direct da la sociologia. 

Daspera era Marx sa participà a la redacziun da la gasetta da l’emna tudestga ‹Vorwärts!› che cumpareva a Paris. Quella attatgava l’absolutissem dals pajais tudestgs – surtut da la Prussia –, e quai sut Marx bainprest cun in’orientaziun socialistica. Pervi da quai ha la regenza prussiana mess tras si’expulsiun da la Frantscha. Uschia ha Marx stuì dischlocar l’entschatta 1845 a Brüssel, nua ch’era Engels al è suandà. A chaschun d’in viadi da studi communabel en l’Engalterra la stad 1845 èn els entrads en relaziun cun l’ala revoluziunara dals chartists. Marx ha disditg il december 1845 la naziunalitad prussiana, suenter ch’el era vegnì a savair che la regenza prussiana vuleva chatschar tras tar la regenza beltga si’expulsiun. Uschia è Marx daventà ina persuna senza naziunalitad; emprovas da pli tard da puspè restituir quella (il 1848 e 1861) n’han gì nagin success.

A Brüssel ha Marx publitgà il 1847 la scrittira ‹Misère de la philosophie. Réponse à la philosophie de la misère de M. Proudhon›. I sa tracta d’ina critica da la teoria economica da Pierre-Joseph Proudhon ed ultra da quai da la societad chapitalistica sco tala. En pli ha el scrit da temp en temp artitgels per la ‹Deutsche-Brüsseler-Zeitung›.

L’entschatta 1846 han Marx ed Engels fundà a Brüssel il ‹Kommunistisches Korrespondenz-Komitee›. L’intent da quel era d’unifitgar las finamiras e d’unir organisatoricamain ils communists revoluziunars e lavurants en Germania ed en auters pajais. Uschia vulevan els preparar il terren per furmar ina partida proletaria. La finala èn Marx ed Engels sa mess en contact cun il ‹Bund der Gerechten› socialistic da Wilhelm Weitling ed èn daventads commembers da quel il 1847. Anc il medem onn èsi reussì a Marx da transfurmar quest’organisaziun en la Lia dals communists (‹Bund der Kommunisten›) ed el ha survegnì l’incumbensa da scriver il manifest da quella. Quel è vegnì publitgà l’onn da la revoluziun 1848 ed è daventà famus sco ‹Manifest communistic› (atgnamain: ‹Manifest da la Partida communistica›). Ils 15 settember 1850 ha Marx tschentà la dumonda da transferir l’autoritad centrala a Cologna e da furmar a Londra dus circuls da la Lia. Questa proposta è vegnida acceptada cun la suletta cuntravusch da Karl Schapper. Ils 17 da settember èn Marx, Engels, Liebknecht ed auters extrads dal ‹Londoner Arbeiterbildungsverein›.

Pauc pli tard ha la Revoluziun da favrer franzosa dal 1848 manà en tut l’Europa a stremblidas politicas. Cuntanschend quellas Brüssel, è Marx vegnì arrestà e bandegià da la Belgia. Sin invit da la nova regenza provisorica da la Republica franzosa è el returnà a Paris. E suenter ch’è proruta la Revoluziun da mars tudestga è Marx ì a Cologna. Là è el stà in dals manaders dal moviment revoluziunar en la provinza renana da la Prussia ed editur da la ‹Neue Rheinische Zeitung. Organ der Demokratie›. En quella è tranter auter vegnida publitgada la scrittira ‹Lohnarbeit und Kapital› che dueva restar nunfinida. La gasetta è cumparida l’ultima giada ils 19 da matg 1849 ed è alura vegnida scumandada da la reacziun prussiana.

Marx è l’emprim returnà a Paris. Ma gia suenter paucs mais ha el stuì sa decider da vegnir internà en la Bretagna ubain da bandunar il pajais. Marx è sinaquai ì cun sia famiglia en l’exil a Londra, nua ch’el ha l’emprim vivì en relaziuns simplas da la lavur schurnalistica sco er dal sustegn finanzial da ses cumpogns da cumbat – surtut da vart dad Engels, il qual al è suandà en l’Engalterra. Politicamain è Marx sa fatschentà cun l’agitaziun internaziunala a favur dal communissem, teoreticamain ha el sviluppà elements essenzials da si’analisa e critica dal chapitalissem. 

A Londra è cumparì sco emprim l’ovra da Marx ‹Klassenkämpfe in Frankreich 1848 bis 1850› (il 1859 sco retscha d’artitgels en la ‹Neue Rheinische Zeitung. Politisch-ökonomische Revue›); e sa basond sin quai ‹Der achtzehnte Brumaire des Louis Bonaparte› (1852) areguard la praisa da la pussanza da Napoleun III.

Dal settember 1850 fin il 1853 ha Wilhelm Pieper sustegnì Marx sco ses secretari privat cun translaziuns e contribuziuns per la pressa da chartists en l’Engalterra. Fin il 1853, cura ch’el ha pers questa plazza per esser sa preschentà publicamain cunter il process da communists da Cologna, aveva la famiglia Rothschild engaschà Pieper sco magister privat per il figl Alfred. A chaschun d’in viadi sin il continent ha Pieper tschertgà il contact cun aderents da la Lia ed ha rimnà a Francfurt per incumbensa dad Engels publicaziuns d’istorgia militara.

A partir dal 1852 è Marx stà il correspundent da Londra da la ‹New York Daily Tribune› e sur blers onns er il correspundent per l’Europa continentala. Tar ils artitgels na sa tracti betg da rapports ordinaris, mabain d’analisas cumplessivas davart la situaziun politica ed economica da singuls pajais europeics, savens en furma d’entiras retschas d’artitgels. Il 1853 ha Marx publitgà en la ‹New York Daily Tribune› ed en l’Engalterra en il ‹People’s Paper› la seria d’artitgels pli lunga ‹The Story of the Life of Lord Palmerston›. Ils onns 1855/56 è quest text vegnì restampà a Londra en la ‹Free Press› da David Urquhart, in anteriur diplomat britannic a Constantinopel che s’engaschava en l’Engalterra per l’Imperi osmanic e cunter la politica da la Russia. La collavuraziun cun David Urquhart è sa dada perquai che quel manava ina champagna pli gronda cunter il politicher britannic Lord Palmerston che persequitava en il zuppà interess russ.

La collavuraziun da Marx vi da la ‹Tribune› è ida a fin il mars 1862 cura che Charles Anderson Dana ha desditg quella pervi d’affars a l’intern da l’America. L’onn 1859 ha Marx scrit divers artitgels per la gasetta da lavurants ‹Das Volk›. A medem temp è el daventà correspundent da la ‹Wiener Presse› ed è s’approfundà en il studi da l’economia politica. Il 1861 ha Marx empruvà da recuperar la naziunalitad prussiana, e quai er cun meds giuridics e sustegnì da Ferdinand Lassalle. Ma la regenza prussiana ha refusà tuttas stentas. Durant la sullevaziun dal schaner 1863 ha Marx tschertgà il contact tar ils revoltants en Pologna ed ha procurà per il sustegn da la Pologna da vart dal ‹Deutscher Arbeiterbildungsverein› a Londra.

En il decurs dals proxims onns ha Marx scrit sias capodovras economicas. Sco emprima descripziun sistematica da sias ideas fundamentalas areguard l’economia è cumparì il 1859 ‹Zur Kritik der politischen Ökonomie›. Quest tractat era oriundamain concepì sco emprim carnet al qual duevan suandar ulteriurs. Ma Marx n’era betg anc cuntent cun la realisaziun en detagl dal plan general ed ha perquai cumenzà sia lavur da nov. Pir il 1867 è cumparì l’emprim da trais toms da si’ovra principala ‹Das Kapital›.

Il medem onn è Marx sa trategnì l’avrigl ed il matg a Hannover sco giast dal medi Louis Kugelmann. Qua ha Friedrich Karl Wunder fatg intgins dals numerus purtrets fotografics da Marx ch’èn sa mantegnids.

Durant elavurar ‹Das Kapital› è puspè sa purschida la chaschun da s’engaschar en la pratica a favur dal moviment dals lavurants: Il 1864 è Marx sa participà sco in dals responsabels a la fundaziun da l’Associaziun internaziunala da lavurants (curt Emprima Internaziunala). El dueva er manar quella fin la dissoluziun factica l’onn 1872 (cun dischlocar la centrala en ils Stadis Unids; la decisiun da dissoluziun formala è suandada il 1876). Marx ha formulà ils statuts ed il program general da quella, l’‹Adressa inaugurala da l’Associaziun internaziunala da lavurants›. L’organisaziun enserrava secziuns uschè disparatas sco communists tudestgs, sindicalists englais, anarchists svizzers e proudhonists franzos. A basa da dus referats ch’el ha tegnì il 1865 a chaschun da sesidas dal cussegl general ha sia figlia Eleanor publitgà il 1898 la scrittira ‹Lohn, Preis und Profit›.

Entaifer ils stadis tudestgs è Marx l’emprim sa stentà vinavant da stgaffir ina partida socialistica revoluziunara. El ha fatg quai sa distanziond sapientivamain dal curs refurmatoric da l’‹Allgemeiner Deutscher Arbeiterverein› da ses anteriur scolar Ferdinand Lassalle. En contact cun Marx ed Engels steva er Wilhelm Liebknecht, quai dapi ch’el era ì a star il 1862 a Berlin. Omadus al han sustegnì en furma da contribuziuns en las gasettas ‹Demokratisches Wochenblatt› e ‹Der Volksstaat›. Il 1869 è Wilhelm Liebknecht stà cunfundatur da la ‹Sozialdemokratische Arbeiterpartei›; quella è s’unida il 1875 cun ils aderents da Lassalle a la ‹Sozialistische Arbeiterpartei Deutschlands›, la ‹Sozialdemokratischen Partei Deutschlands› (SPD) da pli tard.

Er suenter la dissoluziun da l’Emprima Internaziunala è Marx restà en contact cun prest tut las impurtantas persunas dal moviment da lavurants europeic ed american; savens èn quels er sa conferids persunalmain cun el. Il zercladur 1869 è Marx vegnì elegì sco commember da la ‹Royal Society for the Encouragement of Arts, Manufactures  Commerce›.

Marx ha cuntinuà a lavurar vi da sias scrittiras economicas, è però vegnì retegnì pli e pli tras sia malsanitschadad. Ils onns 1862 fin 1874 ha el patì d’ina malsogna da la pel, la quala al ha impedì fermamain. Ils onns 1874, 1875 e 1876 ha Marx fatg segiurns da cura a Karlsbad ed il 1877 a Neuenahr. Per pudair viagiar segiramain sin il continent, ha Marx dumandà l’avust 1874 da pudair daventar burgais da la Gronda Britannia. Ma quai al è vegnì refusà cun far valair ch’el saja «a notorius agitator, the head of the International Society, and an advocate of Communistic principles. This man has not been loyal to his own King and Country».

L’entschatta 1879 ha sir Mountstuart Elphinstone Grant Duff tschertgà il contact tar Karl Marx per incumbensa da Victoria, la figlia la pli veglia da la regina da l’Engalterra. Da quai ha el rapportà a si’incumbensadra il prim da favrer 1879.

Ils 2 da december 1881 è morta sia dunna Jenny Marx, ils 11 da schaner 1883 la figlia Jenny. Marx sez è mort ils 14 da mars 1883 en la vegliadetgna da 64 onns a Londra ed è vegnì sepulì ils 17 da mars sin il Highgate Cemetery. Friedrich Engels ha tegnì il pled funeral. Las prestaziuns scientificas da Karl Marx ha Engels resumà en ses pled punctuond duas scuvertas essenzialas:

Ma quai n’è betg tut. Marx ha er sviluppà la lescha da moviment speziala da la moda da producziun chapitalistica dad oz sco er da la societad burgaisa ch’è vegnida stgaffida tras quella. Cun la scuverta da la plivalur èn quests connexs vegnids sclerids (...).» 

A la fossa stevan Eleanor Marx, Carl Schorlemmer, Ray Lankester, Horatio Bryan Donkin, Wilhelm Liebknecht, Charles Longuet, Paul Lafargue, Friedrich Leßner, Georg Lochner, Edward Aveling, Helena Demuth e Gottfried Lembke. Marx sez aveva giavischà che la participaziun a la sepultura sa restrenschia a la famiglia ed ils amis ils pli intims. A quai èn sias figlias Laura ed Eleanor sco er Friedrich Engels sa tegnids.

L’onn 1954 ha la partida communistica da la Gronda Britannia incumbensà Laurence Bradshaw da stgaffir ina mesa statua per la fossa da Marx. Il november 1954 han ins l’emprim spustà la fossa per intgins meters en in lieu pli adattà. Il mars 1956 è alura vegnì inaugurà il bist cun il purtret da Marx e l’inscripziun «WORKERS OF ALL LANDS UNITE» or dal ‹Manifest communistic› e la 11avla tesa davart Feuerbach: «THE PHILOSOPHERS HAVE ONLY INTERPRETED THE WORLD IN VARIOUS WAYS – THE POINT HOWEVER IS TO CHANGE IT».

Ensemen cun sia dunna Jenny ha Karl Marx gì set uffants:

Marx è er stà il bab dal figl illegitim Frederick Lewis Demuth da sia chasarina Helena Demuth che derivava da la Germania; quel è vegnì dà en ina famiglia da tgira. Quatter dals uffants da Marx èn morts en la vegliadetgna d’uffant; Jenny Caroline è morta il 1883 en la vegliadetgna da 38 onns, dus mais avant ses bab. Las duas figlias ch’al han survivì han omaduas terminà lur vita tras suicidi.

Tuttina sco lur geniturs èn er las trais figlias Jenny, Laura ed Eleanor stadas activas en il moviment socialistic. Laura ha maridà il 1868 Paul Lafargue, Jenny il 1872 Charles Longuet, Eleanor ha vivì a partir dal 1884 ensemen cun Edward Aveling; tut ils trais schenders da Marx èn s’engaschads sco agitaturs socialistics, ils emprims dus en Frantscha, il terz en la Gronda Britannia.

Karl Marx vala sco il teoreticher dal communissem cun la pli gronda influenza insumma. Sias scrittiras han marcà il moviment da lavurants dal 19avel e 20avel tschientaner en tut il mund – dals moviments socialistic-communistics da la Russia e da la Germania fin a quels en l’America Latina ed Asia da l’Ost – cumbain a moda fitg differenta. En rom da l’economia publica moderna vegn Marx attribuì als economs naziunals. Er la filosofia ed autras scienzas umanas sco er las scienzas socialas han recepì  Marx. Savens èsi usità da resumar ils aderents da sias teorias, independentamain da la disciplina, sut il term dal marxissem.

Sco blers filosofs dal 19avel tschientaner ha Marx sviluppà fitg ferm sias ideas s’occupond cun la filosofia da Hegel. Hegel, che vegn resguardà sco in dals filosofs dal temp modern cun la pli gronda influenza insumma, ha represchentà ina filosofia da l’istorgia idealistica, teleologica. Ils scolars da Hegel èn sa dividids en hegelians da sanestra e hegelians da dretga. Quests ultims consideravan il process istoric sco cumplenì e terminà en furma da la societad burgaisa; ils hegelians da sanestra percunter eran da l’avis che l’accumpliment da l’istorgia haja pir lieu en l’avegnir. La posiziun da Marx è surtut sa sviluppada en rom da las intensivas debattas ch’èn vegnidas manadas entaifer ils hegelians da sanestra; da quellas èn tranter auter sa participads Ludwig Feuerbach, Bruno Bauer e Max Stirner, ma er Michail Bakunin.

Marx surpiglia da Hegel il model da reflexiun da la dialectica e l’idea che l’istorgia sa sviluppia tenor regularitads cun caracter da lescha. Quellas na maina el, cuntrari a Hegel, però betg enavos sin in «spiert dal mund», mabain sin relaziuns e confruntaziuns materialas e socialas entaifer la societad. Qua vegn visibel il segund grond concept filosofic ch’ha influenzà Marx: il materialissem, surtut en la furma sco ch’al ha sviluppà Feuerbach. Uschia emprova Marx da colliar la dialectica da Hegel cun il materialissem en furma d’in «materialissem didactic» e da metter uschia quella «dal chau sin ils pes»: 

La forza motorica centrala entaifer il svilup istoric da la societad umana d’enfin qua vesa Marx – sper la confruntaziun cun la natira – en il cumbat da classas: «L’istorgia da tut las societads d’enfin qua è l’istorgia da cumbats da classa.»

Ina rolla tut speziala giogan en quest connex vieutas revoluziunaras: «Las revoluziuns èn las locomotivas da l’istorgia.» Cun manar enavos en questa moda l’istorgia sin sias premissas materialas, tschenta Marx al lieu da l’idealissem da Hegel in «materialissem istoric».

In enconuschent element teoretic da quel furma il schema da la basa e da la surstructura. Tenor quella èn las instituziuns da la societad (stadi, giustia, cultura, ideas da las valurs) da resguardar sco ina «surstructura» situada sur ina «basa» che sa cumpona da cundiziuns da producziun economicas (ed a medem temp da relaziuns da classa e da domini) sco er da forzas productivas; e malgrà lur independenza apparenta sajan las singulas parts da quest model unidas ina cun l’autra e dependentas da las caracteristicas specificas da quel. Uschia dovria per exempel la moda da producziun chapitalistica in tschert urden da dretg che lubeschia a possessurs da martganzias da stgamiar lur products al martgà. Quest ultim sto da sia vart vegnir protegì d’ina forza statala superiura etc. Surtut la furmaziun da la basa economica respectiva, uschia Marx, saja stada fin uss – sper il cumbat da classas – la pli impurtanta forza areguard il svilup da las relaziuns socialas.

Il schema ‹basa-surstructura› è savens vegnì malchapì sco model fix cun l’intent da reducir tut ils fenomens politics ed ideologics sin categorias economicas. L’enconuschenta formulaziun da Marx che l’existenza determineschia la schientscha ha be anc promovì questa malchapientscha. En realitad ha Marx percunter accentuà explicitamain la dialectica da l’interacziun reciproca tranter existenza e schientscha. Er la schientscha po midar l’existenza – gist la pussaivladad da far revoluziuns sa basa gea sin questa libertad da l’uman da transfurmar sapientivamain las relaziuns vertentas, enstagl da sa laschar dominar da quellas. Cumbain ch’ella n’è betg libra da tendenzas correspundents, na sa chapescha la filosofia da l’istorgia da Marx betg sco determinissem mecanic, mabain sco emprova da realisar la libertad umana. Ma sco che Marx accentuescha, è questa libertad adina liada a ses conturn material e social.

Durant tut sia vita è Marx sa stentà da furnir in’analisa economica profunda da la societad chapitalistica. Per l’ina vuleva el pertschaiver uschia las premissas, pussaivladads e la moda d’agir adequata dal moviment communistic; per l’autra dueva questa lavur scientifica porscher ils arguments adequats per pudair crititgar las relaziuns existentas e cumbatter meglier quellas. Ses capodovra ‹Das Kapital› (tom 1: 1867, toms 2 e 3 postum) cumpiglia en tut 2200 paginas; en quel suttametta Marx l’economia politica ad ina critica cumplessiva. D’ina vart ha el analisà las furmas dals products, la valur, il chapital e las cundiziuns da producziun e da distribuziun chapitalisticas, en las qualas è entretschada la producziun da la facultad tenor la societad chapitalistica e burgaisa. Da l’autra vart cumpiglia la critica da l’economia burgaisa er la critica da ses teoretichers sco Adam Smith u David Ricardo, ils quals Marx attatga per part a moda polemica. Ina da las tesas centralas da la teoria marxistica dal chapitalissem è quella dal cuntrast da classas tranter proletariat e bourgeoisia, sin il qual sa basia l’antagonissem insuperabel da la societad chapitalistica. Questa sutdivisiun da la societad en chapitalists e lavurants è per Marx d’ina vart ina da las premissas per la furma da producziun chapitalistica insumma – i dovra ina classa da lavurants ch’è sfurzada da vender sia forza da lavur als possessurs dals meds da producziun. Da l’autra vart è la spartiziun da la societad en duas classas er in dals resultats inevitabels d’ina moda da producziun che sa basa sin la producziun da rauba e sin la vendita da la forza da lavur sco rauba. En cuntrast cun Proudhon ed auters accentuescha Marx perquai che la sfruttaziun d’ina part da la societad ed il domini da l’autra sa laschian be surmuntar cun midar las categorias economicas fundamentalas dal chapitalissem. Pertge che quellas mainian – er independentamain da la voluntad dals singuls acturs (chapitalists, lavurants), pia quasi ‹davos lur dies› – a sfruttaziun e domini da classa. «L’autra via fiss sco da dismetter il papa e laschar exister vinavant il catolicissem.»

Marx ed Engels han influenzà a moda decisiva las noziuns da la ‹moda da producziun chapitalistica› resp. dal ‹chapitalissem›, las qualas vegnan preschentadas il pli sistematic en l’ovra principala da Marx ‹Das Kapital›. Sco chapitalissem defineschan els in urden economic ch’è segnà da la pussaivladad d’acquistar meds da producziun en furma da possess privat, da la producziun per in martgà che decida davart il pretsch, dal sa stentar d’in cuntin da maximar il profit e da la cuntradicziun tranter lavur cunter pajament e chapital. Tenor Marx sa mida la furma da producziun da la societad bain a moda decisiva cun la transiziun dal feudalissem al chapitalissem; ma ella mantegna ses caracter da classa. Marx descriva la societad chapitalistica sco societad da la miseria, dal sfruttament e da l’alienaziun.

Partind da las teorias dals represchentants da l’economia naziunala classica, surtut Adam Smith e David Ricardo, interpretescha Marx da nov la teoria da la valur da la lavur e transfurma quella en in instrument cun agid dal qual el emprova da descriver l’explotaziun dal proletariat tras il chapital.

Marx definescha duas classas principalas da la societad:

Formalmain èn tut ils commembers da la societad burgaisa libers ed eguals tenor il dretg. De facto, uschia Marx, pon ils proletaris però be eleger a tgi ch’els vendan lur forza da lavur, vul dir da tge chadainas ch’els vulan sa laschar enchadanar. Uschè ditg ch’igl existia in dretg burgais che permettia da posseder meds da producziun en furma da possess privat, muntia egualitad giuridica necessariamain inegualitad sociala; e cun renconuscher l’urden burgais ed il stadi burgais vegnia quella be anc reproducida e mantegnida vinavant.

Entaifer il chapitalissem succedia l’accumulaziun da la ritgezza sociala pia adina be tras explotaziun da forza da lavur estra en furma da lavur pajada. Il chapitalist paja però al lavurant be ina part da la valur effectiva da quai ch’el haja prestà entaifer il process da producziun – la plivalur reala da la lavur che vegnia prestada da la societad na giaja pia betg a favur da l’entira societad, mabain vegnia accumulada a moda privata. Questa appropriaziun privata da la plivalur, ma er da la forza da lavur creativa da l’individi insumma, condemnescha Marx sco sfruttament.

Ma la rata da profits dals chapitalists sa sbassia tenor Marx adina dapli. Quai saja per l’ina d’attribuir a la muntada creschenta da las maschinas; pertge che tenor la teoria da la valur da la lavur creeschia be la forza da lavur umana ina valur agiuntada e sa sbassia quella cuntinuadamain cun remplazzar umans tras maschinas (chapital fix vs. chapital variabel). Da l’autra vart sa sbassian las ratas da profit er pervi da la concurrenza tranter ils chapitalists sezs, ils quals stoppian adina offrir ad in pretsch pli bass per pudair sa mantegnair sin il martgà. Las entradas sbassantas sforzian il chapitalist da reducir las expensas, e quai surtut cun sbassar ils custs da producziun, vul dir tras pajas pli pitschnas, prolungaziun dal temp da lavur u cun auzar la productivitad da lavur. 

Questa constellaziun mainia ad ina cuntradicziun inevitabla tranter ils interess d’explotaziun dal chapital ed ils basegns dal proletariat. Da qua derivia il caracter antagonistic da la moda da producziun chapitalistica, il qual saja il motiv per las crisas regularas dal chapitalissem ed il qual stoppia la finala er manar a la sullevaziun revoluziunara dals lavurants. Il chapital produceschia uschia ses agens «chavafossas» e vegnia ad ir a frusta il mument da la revoluziun communistica. 

Il problem dal chapitalissem consista tenor Marx betg be en l’explotaziun dal lavurant ed en in cuntrast insuperabel dals interess da classa. L’entira existenza da l’uman, ses esser uman sez, vesa el alienà da sasez e supprimì tras las relaziuns chapitalisticas. Il tratg essenzial da l’existenza umana giascha per Marx – sa referind a Hegel e Feuerbach – en l’abilitad da l’uman da furmar ses ambient a moda creativa e libra. L’element central da la filosofia da Marx è perquai la lavur, la quala Marx definescha sco «metabolissem tranter uman e natira».

En il chapitalissem saja la lavur però alienada e pervertida a moda fundamentala. Pertge che qua na vegnia la lavur betg fatga per stgaffir products da diever ed anc bler main cun l’intent da realisar la forza creativa, mabain sulettamain per acquistar valurs da stgomi. Il lavurant na possia betg disponer libramain da sia forza da lavur, mabain stoppia impunder quella a favur da las finamiras dal chapitalist, per il qual el lavura. Ils bains ch’el producescha en questa moda na resenta il lavurant betg pli sco ses agens, mabain sco esters; el na possia betg pli enconuscher sasez en ils resultats da si’atgna activitad. Quest process designescha Marx, er qua puspè analog a Hegel, sco «alienaziun». 

Schebain la categoria da l’«alienaziun» saja er anc d’impurtanza pli tard entaifer l’ovra da Marx, surtut en sias scrittiras economicas, ubain sch’el haja laschà crudar cun il temp ses concept oriund da l’«alienaziun», è ina dumonda che marxists discuteschan a moda fitg cuntraversa. In fatg èsi che Marx na discurra suenter il 1845 betg pli da l’«essenza» umana, mabain ch’el sbitta explicitamain sco svilup sbaglià da l’idealissem tudestg da vulair tractar l’uman sut l’aspect da noziuns genericas generalas. 

Al lieu dal term da l’alienaziun (il qual è ritg da supposiziuns filosoficas ed implitgescha l’idea d’ina lavur betg alienada) dovra Marx pli tard il term dal «fetischissem da la rauba», il qual el ha sviluppà en l’emprim tom da ‹Das Kapital› en il famus chapitel davart «il caracter da fetisch da la rauba e ses misteris». Cun questa noziun manegia el la dissimulaziun da la lavur umana prestada, la quala n’è betg pli visibla vi d’in product final che circulescha sco rauba commerziala. Er qua sa tracti d’ina furma d’alienaziun, ma en il context dal chapital na serva questa metafra main a tschiffar la miseria dal lavurant, mabain plitost a chapir la structura ideologica da la societad chapitalistica. Per Georg Lukács, il teoreticher marxistic ch’è sa fatschentà da rudent cun questa tematica, cuntegna il chapitel davart il caracter da fetisch da la rauba l’entir materialissem istoric. El ha elavurà quest cuntegn ‹zuppà› en ses tractat dal 1923 ‹Die Verdinglichung und das Bewusstsein des Proletariats› che vegn adina puspè cità.

Pli pauc ch’ils umans enconuschan sasezs en ils products da lur lavur e pon percepir quels sco products fatgs dad els sezs, e pli agens che quests products als cumparan. Surtut en furma dals daners e dal chapital – che furman nagut auter che rauba accumulada en furma abstracta – cumparan ils products da la lavur umana sco «subjects automatics», daventads independents. La transfurmaziun da daners en adina dapli daners, sin il qual princip sa basia il chapitalissem, cumparia sco agen moviment dals daners (p.ex. en furma dal tschains che para d’esser sez activ), e betg sco resultat da la lavur umana. Tras quai, uschia concluda Marx, daventian chaussas subjects ed ils subjects umans sa transfurmian en objects impussants. Ils producents da rauba vegnian dominads da lur products: «Lur agen moviment entaifer la societad posseda per els la furma d’in moviment da rauba che controllescha els enstagl da vegnir controllada dad els.» La societad chapitalistica sa basa en quest senn sin in straviament fundamental dals fatgs, ella stat quasi sin il chau. 

Uschia daventian ils products fetischs, vul dir rauba ch’è apparentamain magica. Ma malgrà questa parita e malgrà che la lavur na vegnia betg pli percepida, restia ella suletta l’instanza da creaziun da valur e la causa da tut moviment. Il caracter da fetisch da la rauba saja in engion, però in che na derivia betg d’in’errur, mabain ch’haja in origin pratic: la spartiziun da la societad en persunas che lavuran ed en persunas che laschan lavurar, vul dir en persunas che produceschan ils products ed en autras che possedan quests products.

Questa transfurmaziun da la rauba en in fetisch analisescha Marx er sco in modus da socialisaziun ch’ha quasi lieu davos il dies dals umans. En rom da quel vegnan lavurs concretas transfurmadas en valurs pecuniaras abstractas che pussibiliteschan insumma pir la producziun da rauba betg privata, vul dir distatgada da l’individi.

La critica da la religiun da Marx è vegnida influenzada da Ludwig Feuerbach. Sco quel s’avischina er Marx a la religiun d’ina perspectiva filosofica che va a finir en critica sociala.

Ils filosofs descriva Marx en general sco producents d’ideas e vesa lur incumbensa principala en surmuntar la filosofia, vul dir en lur realisaziun pratica: «Ils filosofs han be interpretà il mund a moda differenta; quai che quinta però è d’al transfurmar.» 

En quest senn crititgescha Marx tut las furmas d’ina filosofia idealistica e surtut la religiun; quella serva tenor el a render l’existenza dals umans pli supportabla cun siemis e confiert en l’auter mund ed uschia facticamain a legitimar la miseria en quest mund. En in famus citad designescha Marx perquai la religiun sco «opium dal pievel». La religiun na saja betg abla d’explitgar la miseria, mabain saja in’expressiun da quella ch’engionia cun fantasias ed ideas absurdas. Ella na saja pia nagut auter ch’ina faussa schientscha, ch’ina pura ideologia d’umans alienads da sasezs: «L’uman fa la religiun, la religiun na fa betg l’uman.»

A la perversiun da las relaziuns praticas correspunda tenor Marx la faussa schientscha da la religiun; quella na saja nagut auter che la ‹dretga› (vul dir adequata) expressiun d’ina faussa societad. La religiun saja la «mistificaziun» d’in mund che portia sez quasi tratgs mistics. 

Per surmuntar las fantastarias religiusas na bastia critica teoretica però betg; i dovria ina midada fundamentala da las relaziuns materialas che fetschian insumma necessaria la religiun sco «suspir da la creatira turmentada»: «La pretensiun da dar si las illusiuns davart sia situaziun [v.d. da l’uman, red.], è la pretensiun da dar si ina situaziun che basegna illusiuns.»

Perquai che religiun e societad èn colliadas per el uschè stretgamain ina cun l’autra, attribuescha Marx a la critica da la religiun ina rolla ordvart centrala: «La critica da la religiun è la premissa da tutta critica.»

Da crititgar questa faussa schientscha servia però be ad enconuscher il motiv per l’errur, sinaquai ch’ins daventia conscient da la pussaivladad da schliar quella a moda pratica. Schientscha da classa munta en quest senn per Marx da percepir las relaziuns socialas a moda ‹objectiva› e da vegnir conscient e crititgar che l’uman participescha a la reproducziun dal domini chapitalistic. Questa critica filosofica stoppia tschentar al lieu da la mistificaziun e da las «fantastarias» religiusas ils basegns dals umans sezs, per ils basegns dals quals ella haja da cumbatter. La filosofia stoppia sa transfurmar en ina «pratica revoluziunara». 

La filosofia da l’istorgia marxistica è vegnida enconuschenta sco materialissem istoric. Sco element central che fa ir il mund na resguarda quel betg las ideas, mabain las relaziuns materialas che precedan e determineschan il svilup da las ideas. «Betg la schientscha dals umans determinescha lur esser, mabain l’esser da la societad determinescha lur schientscha.»

Ideas filosoficas na sajan perquai betg atemporalas e valaivlas per adina, mabain hajan in origin material-istoric. Uschespert che quest fundament sa midia, sa midian er las ideas. Las ideas filosoficas predominantas correspundian perquai en mintga epoca a las ideas da la classa dominanta; quella definescha Marx sco la classa ch’ha la pussanza da disponer davart ils meds da lavur materials. 

Tuttina sco che las relaziuns materialas influenzeschan las furmas da domini, uschia s’effectueschan er questas ultimas sin las relaziuns materialas. Il materialissem istoric na descriva perquai nagin determinissem da vart da l’aspect material, mabain ina relaziun reciproca dialectica tranter esser e schientscha, necessitad e libertad: «Ils umans fan lur atgna istorgia; ma els na fan quella betg a moda dal tuttafatg libra, betg sut circumstanzas ch’els han sezs elegì, mabain sut talas ch’els han chattà, ch’èn dadas avant u ch’èn vegnidas tradidas.» 

Partind da la situaziun materiala e da las relaziuns da pussanza definescha Marx differentas fasas da l’istorgia da l’umanitad. En l’Europa tanscha il svilup socio-economic da la societad tempriva «libra» sur la tegnida da sclavs e la societad feudala fin a la societad bourgeoisia; da qua duai ella manar tras revoluziun en il socialissem per s’accumplir en il communissem. Favurisada vegn questa revoluziun tras ils tratgs specifics da la producziun chapitalistica che mainan ad in’accumulaziun da la pussanza e dal chapital. En medema moda sco che la classa sociala che vegn explotada s’alienescha a sasezza, s’organisescha il chapital en furma da monopols e da surstructuras repressivas; quai promova entaifer la societad industriala il cumbat da classa e la prontadad da surmuntar las relaziuns vertentas cun far revoluziun.

La revoluziun sociala terminass a medem temp la «preistorgia» da l’umanitad. Da qua davent organisassan ils umans la producziun a moda sapientiva, cuminaivla e raziunala e furmassan sezs l’ulteriur andament da l’istorgia, enstagl che la societad vegnia dominada da mecanissems che sa chattan en ils mauns da paucs.

La forza motorica, il subject da la transfurmaziun da la societad, vesa Marx en la classa sociala dal proletariat. Sco classa che produceschia ils meds disponia quella suletta da la pussanza, da realisar cun success la vieuta communistica. Er saja il proletariat interessà sco nagin’autra classa sociala a far questa revoluziun, damai che quel vegnia supprimì, sfruttà ed alienà tant structural sco pratic tras las relaziuns chapitalisticas. Uschia finescha il ‹Manifest da la Partida communistica› dal 1848 cun ils pleds: «Ils communists refusan da zuppentar lur ideas ed intenziuns. Els decleran avertamain che lur finamiras sa laschian be cuntanscher tras la revoluziun violenta da tut l’urden social d’enfin qua. Possian las classas regentas tremblar davant ina revoluziun communistica. Ils proletaris n’han nagut da perder en quella auter che lur chadainas. Ed els han da gudagnar in mund.» 

L’onn 1872, a chaschun dal pled ch’el ha tegnì al Congress a Den Haag, ha Marx concedì ch’il proletariat possia sut tschertas circumstanzas er cuntanscher sia finamira a moda paschaivla: «Nus savain ch’ins sto resguardar las instituziuns, ils usits e las tradiziuns dals differents pajais e nus na snegain betg ch’i dat pajais sco l’America, l’Engalterra (...) e forsa er l’Ollanda, en ils quals ils lavurants pon arrivar a moda paschaivla tar lur intent. Sche quai è vair, sche stuain nus er renconuscher ch’il levagl per metter en moviment las revoluziuns sto esser en la gronda part dals pajais dal continent la forza; a la forza vegn ins a stuair appellar in di per eriger il domini da la lavur.» 

Il cumbat dal proletariat cunter la bourgeoisia sa fa tenor Marx en furma d’ina «dictatura dal proletariat», vul dir sco domini da la maioritad supprimida sur la minoritad dals anteriurs oppressurs, sco «expropriaziun da quels ch’exproprieschan». La fasa transitorica da la dictatura dal proletariat metta Marx er a pèr cun il socialissem; il term dal communissem è surtut reservà per il stadi pli avanzà da la societad senza classas, en la quala il stadi e cun el tutta forza da suppressiun è daventada inutila ed è pirida e che funcziuna tenor il motto: «Mintgin tenor sias abilitads, a mintgin tenor ses basegns!» 

Ensemen cun ses cumbattant ed ami per vita duranta Friedrich Engels è Marx sa stentà da sviluppar in «socialissem scientific», en il qual el è surtut sa distanzià da las utopias idealisticas dal socialissem tempriv. Marx n’emprova betg da preschentar in’utopia dal communissem sviluppada a fin, mabain vesa la finamira dal communissem sco insatge che sa sviluppa or da las premissas materialas ed istoricas. Il moviment communistic chapescha Marx perquai sco «il moviment autonom da l’immensa maioritad en l’interess da l’immensa maioritad». Purtader da la vieuta revoluziunara inevitabla saja il proletariat organisà en furma d’ina classa da lavurants. Quel saja obligà da conquistar la pussanza politica e d’expropriar la classa dals chapitalists. D’abolir qua tras la pussaivladad da s’acquistar meds da producziun (terren, fabritgas, maschinas etc.) en furma da possess privat saja ina da las premissas centralas per che la societad possia sa sviluppar en direcziun dal communissem. Pass per pass vegnian alura ils cuntrasts da classa e las classas sezzas a svanir. Las conturas da la societad communistica, senza classas, vegnan però savens be circumscrittas a moda generala: «Al lieu da la veglia societad burgaisa cun sias classas e cuntrasts da classa passa in’associaziun, entaifer la quala il svilup liber da mintgin furma la premissa per il svilup liber da tuts.» 

L’ovra da Marx vegn savens dividida en duas fasas: las ‹scrittiras temprivas› (fin il 1848) e ‹l’ovra madira›; igl è però contestà, schebain questas duas fasas represchentian ina ruptura effectiva en il pensar da Marx. Sur lung temp han tant la democrazia sociala sco er il marxissem-leninissem recepì be las ovras tardivas che tractan surtut tematicas economicas; la nova sanestra dal 1968 ha percunter rescuvert las scrittiras temprivas da tempra filosofica, las qualas eran per part pir vegnidas publitgadas il 1932.

Las scrittiras temprivas tractan surtut tematicas ch’èn sa sviluppadas or da l’occupaziun cun la filosofia da Hegel. En il center stat la dumonda da l’alienaziun da l’uman e las pussaivladads da surmuntar quella a favur d’ina emancipaziun politica. Impurtantas ovras da la fasa tempriva da Marx – per part scrittas ensemen cun Friedrich Engels – èn:

Per part vegn er il Manifest der Kommunistischen Partei (MEW 4) che Marx ed Engels han scrit l’onn da la revoluziun 1848 attribuì a l’ovra tempriva. Cun ses caracter programmatic occupa quest’ovra però ina posiziun speziala entaifer l’ovra da Marx.

Impurtantas ovras da la segunda fasa, en la quala Marx s’occupa pli e pli da dumondas economicas, furman:

Plinavant cumpiglia l’ovra da Marx intginas scrittiras, en las qualas el s’occupa d’eveniments contemporans:

Igl existan duas ediziuns cumplessivas da las scrittiras da Marx ed Engels. L’emprima, ch’è restada incumpletta, furma la Marx-Engels-Gesamtausgabe (MEGA1) edida da David Rjasanow. Dapi il 1975 cumpara la Marx-Engels-Gesamtausgabe (MEGA2). Quest’ediziun istoric-critica cumpiglia er la correspundenza tranter Marx ed Engels e brevs da terzas persunas drizzadas ad els. Dals 114 toms (122 toms parzials) previs èn fin uss cumparids radund la mesadad.

En pli è avant maun la Studien- und Leseausgabe Marx-Engels-Werke (MEW) en 43 toms (45 toms parzials). Quella è vegnida edida ils onns 1956–1990 da l’Institut für Marxismus-Leninismus che fascheva part dal Comité central da la SED.

Dals moviments marxistics da pli tard è la teoria da Marx vegnida interpretada a moda fitg differenta. La paletta tanscha da la politica da refurma sociala dals socialdemocrats sur l’interpretaziun dogmatica dal «realsocialissem» da l’anteriura Uniun sovietica u da la Republica Populara da la China e.a. fin ad interpretaziuns nundogmaticas da represchentants da la teoria critica e da la nova sanestra. La tendenza da surpigliar terms e concepts marxistics a moda isolada e senza consultar las funtaunas vegn savens designada sco ‹marxissem vulgar›.

Eugen von Böhm-Bawerk, in dals fundaturs da la Scola austriaca, ha gia crititgà en ‹Zum Abschluss des Marxschen Systems› (1896) che las teorias areguard il chapital sa cuntradian en l’emprim e terz tom da ‹Das Kapital›. Tenor Böhm-Bawerk stattan la rata da profits generala e la teoria dals pretschs da producziun en cuntradicziun cun la lescha da la valur en l’emprim tom. Betg da snegar è il fatg ch’il manuscrit sin il qual sa basa il terz tom è vegnì scrit anc avant che Marx ha elavurà l’emprim tom.

In enconuschent criticher da Marx è stà Karl Popper. El ha fatg valair aspects filosofics e crititgà Marx or da la perspectiva da la teoria scientifica. Surtut al disturba la tendenza da Marx da s’immunisar envers critica.

Per part è vegnì pretendì che Marx haja gì ina tenuta antisemitica, e quai surtut en connex cun sia scrittira ‹Zur Judenfrage› dal 1843 e sa basond sin passaschas or da brevs privatas da l’onn 1862 ch’èn drizzadas cunter Ferdinand Lassalle. Da l’autra vart aveva Marx sez ragischs gidieuas ed el ha er adina puspè tgirà il contact cun Gidieus che s’engaschavan en il moviment da lavurants.

La discussiun actuala sa divida en numerusas direcziuns che sa cuntradin per part dal tuttafatg. Entaifer quellas vegnan praticamain tut ils elements da la teoria da Marx discutads a moda cuntraversa. Tar ils puncts ch’èn spezialmain contestads tutgan:

Diversas ovras n’ha Marx betg pudì terminar (damai ch’el è mort en la vegliadetgna da 64 onns) ed er il marxissem na furma nagin sistem serrà. Quai lubescha d’interpretar l’ovra da Marx ed Engels a moda fitg differenta. Ultra da quai han ils dus auturs revedì en il decurs dal temp intginas da lur ideas. Per exempel datti parairis cuntradictorics areguard la dumonda sch’ina revoluziun socialistica stoppia necessariamain avair lieu en il stadi chapitalistic fitg sviluppà, ubain sche la fasa dal chapitalissem na possia betg vegnir sursiglida en tscherts cas, sco che Marx scriva en ina brev a Wera Sassulitsch.

En la Republica democratica tudestga han ins attribuì a Karl Marx la rolla d’ina figura-clav politica ed ideologica. En blers lieus èn vegnids erigids monuments che regordan a Marx. La citad Chemnitz ha gì num tranter il 1953 ed il 1990 Karl-Marx-Stadt; là è situà l’enconuschent monument da Karl Marx. A Berlin sin il Marx-Engels-Forum, ch’è vegnì installà il 1986, sa chattan las statuas da Marx ed Engels. En blers lieus èn er numerusas vias e plazzas vegnidas numnadas suenter Karl Marx. Medemamain purtava la bancnota da 100 marcs da la Republica democratica tudestga il purtret da Marx. E la Medaglia da Karl Marx furmava la pli auta decoraziun d’onur dal stadi.

Er en la Republica Federala Tudestga èn bleras vias e plazzas vegnidas numnadas suenter Marx, plinavant han ins adina puspè edì marcas postalas (p.ex. il 1968) e munaidas commemorativas (1983). A Trier pon ins visitar la chasa natala da Marx (Karl-Marx-Haus); en quella sa chatta oz in museum.

Ils onns 1920/30 han ins erigì en diversas citads novs quartiers u abitadis che stevan sut l’ensaina da novs accents architectonics a favur da la classa da lavurants. Exempels ch’èn sa mantegnids fin oz èn tranter auter la Karl-Marx-Siedlung a Worms (1932) u il Karl-Marx-Hof a Vienna (1926–1930) cun 1382 abitaziuns per radund 5000 abitants.

A Londra en il quartier Soho regorda ina tavla commemorativa a Marx ch’ha vivì là in temp cun sia famiglia. En pli sa chatta a Londra la Marx Memorial Library ch’è vegnida endrizzada il 1933.

Ed en l’anteriura Uniun sovietica èn divers nums che regordan a Marx sa mantegnids er suenter la vieuta dal 1990: la citad Marx en Russia, l’abitadi Karlo-Marxowe en l’Ucraina, divers lieus cun il num Karla Marxa e la muntogna Pik Karl Marx en il Tadschikistan. 

 

 




#Article 49: Carl Lutz (293 words)


Carl Robert Lutz (*30 da mars 1895 a Walzenhausen (AR); †12 da favrer 1975 a Berna) era in diplomat svizzer.

El ha maridà Gertrud Lutz-Fankhauser(1911 - 1995), che è pli tard stada vicepresidenta da l'UNICEF. Il pèr viagia l'onn 1935 a Palestina, nua che Carl lavura sco funcziunari da consulat enfin l'onn 1941. Els daventan perditgas dals tumults dramatics tranter palestinais ed immigrants gidieus da la Germania. 

Lutz ha lavura èn ils consulats svizzers a Washington (D.C.), Philadelphia, St.Louis, Jaffa e Berlin, avant che vegnir spustà a Budapest l'onn 1942 sco viceconsul. Enconuschent daventa el la entras ses engaschi per gidieus ungarics durant la secunda guerra mundiala, cun il qual el ha salvà a 60.000 carstgauns, circa la mesadad da tut il survivents gidieus ungarics, da las acziuns da destrucziun dals naziunalsocialists. 

El ha cuntanschì quai entras sia posiziun sco manader da la partiziun interess esters en l'ambassadura svizra, cunquai ch'el ha reparti a partir dal 1944 a gidieus che levan emigrar en la Palestina, pass e brevs da protecziun. Quellas protegivan ils gedius da vegnir deportads en champs da concentraziun (Auschwitz), perche che la partiziun da la SS da Eichmann respectava questas brevs. Quai era in resultat da sia lavur diplomatica en Palestina, nua ch'el veva resguardà interess tudestgs encunter ils englais.

Il diplomat svedais Raoul Wallenberg, che è vegni il fanadur 1944 a Budapest, s'ha orienta davart il sa cuntegnair dal diplomat svizzer. Las activitads da Wallenberg èn pli tard vegnidas fitg renumadas, durant che Lutz è ditg stà nunundrà. Suenter la guerra è el vegni admoni dal stadi svizzer per surpassament da cumpetenzas. Yad Vashem ha undrà Carl Lutz e sia prima dunna 1965 cun il titel Gerechter unter den Völkern.

Lutz schai sutterrà sin il santeri Bremgarten a Berna.




#Article 50: Baselgia Vaira da Jesus (106 words)


La Baselgia Vaira da Jesus (True Jesus Church) è ina baselgia independenta che è vegnida fundada a Beijing en China l'onn 1917. Ozendi dumbra ella ver 1.5 milliuns commembers en 45 stadis. La baselgia tutga tar il rom protestantic dal cristianissem che s'ha augmenta durant l'entschatta dal 20avel tschientaner. Nadal e Pasca na vegnan betg festivads. La baselgia n'è betg trinitara e craja che tut las instrucziuns da l'evangeli stoppian avair referenzas biblicas per sustegnair l'urden e per impedir malchapientschas. La baselgia ha l'intenziun da pregiar l'evangeli a tut las naziuns avant il segund return da Jesus.

Las diesch ductrinas da basa da la baselgia èn:




#Article 51: Belmopan (255 words)


Belmopan è la chapitala dal Belize (fin il 1972 las Honduras Britannicas), in stadi en l'America Centrala. La citad dumbra radund 17'000 abitants. Il num Belmopan è in term artifizial cumpost dals pleds Belize e Mopan, in flum da la regiun. La citad da Belmopan è vegnida fundada il 1. d'avust 1970.

Belmopan giascha en l'ost dal flum Belize, sin 17°15' da ladezza settentriunala ed 88°46' da lunghezza occidentala sin in'autezza da 76 meters sur mar. La citad sa chatta en la provinza da Cayo, var 80 km pli a l'intern da la terra che l'anteriura chapitala Belize City. Lezza è vegnida devastada fermamain durant il hurican Hattie dals 31 d'october 1961.

L'onn 1965 han ins decidì definitivamain d'eriger ina nova chapitala en in lieu segir ed il 1970 han ins pudì dischlocar la sedia da la regenza da las Honduras Britannicas a Belmopan. Las edifizis da la regenza èn vegnidas construidas en in stil modern inspirà da l'architectura dals Maya classica. Oriundamain era la chapitala planisada per 40'000 abitants, ma causa sia situaziun geografica ed il clima chaud e stitg, dumbra la citad fin ussa mo 17'000 abitants. La plipart da las grondas interpresas ed organisaziuns sco era las pli bleras ambassadas sa chattan anc adina a Belize City.

A Belmopan sa chatta era l'Universitad dal Belize. Destinaziuns d'excursiuns populars enturn la citad èn il Parc naziunal da Guanacaste ed il Belize Zoo. Davent da Belmopan pon ins era far excursiuns tar il cuvel Actun Tunichil Muknal ch'è in impurtant lieu da chat archeologic.




#Article 52: Adolf Hitler (2091 words)


Adolf Hitler (* 20 d'avrigl 1889 a Braunau agl En Austria - † 30 d'avrigl 1945 a Berlin entras suicidi) era a partir da 1921 schef da partida da la NSDAP, a partir da 1933 chancelier da l'imperi ed a partir dal 1934 sco manader (Führer) e chancelier da l'imperi el medem temp schef da la regenza e schef da stadi dal imperi tudestg.

El ha stabilì en Germania la dictatura naziunalsocialistica il terz imperi (das dritte Reich), ha scumandà tut las partidas d'opposiziun e persequità adversaris politics. Hitler ha chaschunà la segunda guerra mundiala ed ha pratitgà la privaziun dals dretgs ed il mazzament dals gidieus europeics sco era dad autras gruppas religiusas, etnicas e socialas. Sco consequenza da sia politica èn morts en l'Europa tranter 30 e 35 milliuns carstgauns, tranter quels ca. 6 milliuns gidieus. La Germania e l'Europa èn vegnidas destruidas per gronda part e separadas en in territori communistic (en l'ost da la Germania) ed in territori chapitalistic (en il vest da la Germania).

Quasi tut las biografias da Hitler inditgeschan l'enorma discrepanza tranter l'emprima e la segunda part da sia vita. Enfin ses 30avel onn da naschientscha era el in' existenza disditga, mesirà vida las aspectativas burgaisas da ses temp. Senza scolaziun militara, senza lioms da num, suenter la guerra mundiala era sco schuldà senza perspectivas ed oravant tut senza qualitads remartgablas che pudessan declerar plausiblamain sia carriera sequenta. Malgrà tut quest s'auza el en paucs onns al chancelier german e pli tard al regent dictatoric sur grondas parts da l'Europa. Hitler ha manifestà in effect destructiv sco mo paucs avant ni suenter el. 
La dumonda davart la discrepanza tutga il problem central che sa tschenta en connex cun la persuna istorica Adolf Hitler. Co ha in uman cun talas qualitads ed ina tala previta pudì avair in tal effect?

Or da sia provegnientscha e sia vita avant la politica ha Hitler adina fatg in secret. Els n'astgan betg savair, ha el ditg 1930 sur da ses adversaris politics, da nua che jau deriv e da tge famiglia che jau sun.(Citat tenor Krockow). Döllersheim e Strones, las vischnancas da naschientscha da ses geniturs, ha el laschà evacuar e destruir il 1938 gist suenter l'attatga da l'Austria sin la Germania, per stabilir in plaz d'exercizi per truppas (Allensteig). Krockow, Kershaw ed auters biografs da Hitler supponan ch'ils motivs èn da tschertgar en la derivanza nunsclerida e probablamain incestuusa dad Adolf Hitler.

La famiglia da Hitler derivava dal quartier da guaud da l'Austria bassa al cunfin cun la Boemia. La moda da scriver variava anc en il 19. tschientaner tranter Hüttler, Hiedler e Hitler.
Il dictatur posteriur è naschì en la citad da cunfin Braunau agl En en l'Austria auta sco quart da ses uffants dal duanier Alois Hitler e da sia terza dunna - ina nezza tras maridaglia - Klara naschida Pölzl. Da lur ses uffants cuntanschan mo Adolf e sia sora Paula la vegliadetgna da creschids. Alois Hitler aveva latiers anc in figl ordvart la maridaglia (Alois junior) ed ina figlia (Angela) da sia secunda dunna. En il cudesch Mein Kampf descriva Hitler il bab sco sever ed autoritar, per part er vilentà e violent.

Igl è dentant dispitaivel schebain l'educaziun da Hitler è stada pli severa che usità da quel temp. Cumprovas mancan dentant.
Alois Hitler, il bab dad Adolf Hitler, è naschi ordvart la maridaglia da la fantschella da purs Anna Maria Schicklgruber. Pir cun 40 onns e suenter la mort da sia mamma e da ses supponì bab Johann Georg Hiedler, in lavurant da mulin, ha Alois Hitler surpiglià il num Hitler. Ses aug Nepomuk ha dà tar in notar l'engirament che Johann Georg, pli tard il consort dad Anna Maria, saja il bab dad Alois. Quel sez dentant ha mai acceptà ses figliaster Alois sco ses figl. 
Hitler na saveva pia betg cun ultima segirtad tgi che ses tat era. Questa relaziun è evidentamain vegnida brisanta per il propagandist dad ina ideologia rassista, cura ch'el è vegni pli e pli enconuschent a l'entschatta dals onns 1920. Adversaris politics da Hitler han adina puspè empruvà da cumprovar ch'il manader da la NSDAP antisemita ed extremamain naziunalista haja sez perdavants gidieus ni tschecs. Tenor pli novas enconuschientschas è quai pauc probabel, ma per Hitler in bun motiv per zuppar sia derivanza.

Pervi da sia professiun ha Alois Hitler midà savens chasa cun sia famiglia. Da Braunau a Passau, pli tard a Lambach ed a Leonding sper Linz. En las diversas scolas popularas era Hitler in bun scolar, a la scola reala a Linz disdescha el dentant cumplettamain. Gia l'emprim onn da scola (1900/1901) sto el repeter e ses scolasts al attribuischan mancanza da motivaziun d'emprender. 
Hitler ha pli tard preschentà quel temp sco ina sort chauma d'emprender encunter il bab che al vuleva manar ad ina carriera da funcziunari. Hitler perencunter vuleva daventar dissegnader d'art. Quest' interpretaziun è uschenavant vaira, damai che Hitler aveva sia entira vita gì l'impressiun dad esser in artist sconuschì, ch'el sviava lavur regulada e ch'egocentrissem era ina da sias pli fermas caracteristicas. Encunter questa chauma d'emprender stat dentant la mort dal bab da Hitler ils 3 da schaner 1903 cun 65 onn. Il squitsch da l'educaziun aveva pia laschà suenter per il giuven da tredesch onns. Las prestaziuns en scola n'eran denant betg sa meglieradas. Hitler banduna pia la scola cun 16 onns, senza terminaziun. Dapli ch'ina savida superfiziala da diversas funtaunas elegidas senza distincziun ha Hitler mai acquistà. 

A partir dal 1905 pudeva Hitler viver grazia a sia renta da mez-orfen e cun sustegniment da sia mamma ina existenza bohème nunliada. Suenter ch'el è vegni refusà da l'academia d'art a Vienna 1907 e 1908 pervia da mancanza da talent, ha el betg pli mussà sforzs per retschaiver in' occupaziun u almain emprender ina professiun. Ils 21 da december mora sia mamma da cancer dal sain. Sco divers dals raquints commovents sugereschan, viveva Hitler a l'entschatta detg bain da sia renta d'orfen. Ses gudogn, engrondì cun la vendita da maletgs e cartas, surpassava quel dad in scolast primar giuven.
L'onn 1909, cun 20 onns, va Hitler a Vienna. La vegn el en contact cun las scrittiras pseudoscientificas e neoreligiusas da l'ideolog da rassas ed antisemit Jörg Lanz von Liebfels. Era las polemicas antisemitas da politichers sco il manader da la alldeutsche Bewegung Georg Ritter von Schönerer ed il burgamester da Vienna dr. Karl Lueger ha el percepì. Sia imaginaziun d'ina rassa signurila arica predominanta ha el probablamain sviluppà en quest temp, ses idols èn dentant restads nunnumnads. Pli ferm che per politica è Hitler s'occupà tenor ses ami August Kubizek cun operas, en spezial cun quellas da Richard Wagner.

Suenter la segunda refusada entras la suprastanza da l'academia d'art Andreas Walder e Raphael de Rose, haveva Hitler pli e pli problems finanzials. 1909 sa tschenta el en l'asil per persunas senza tetg ed a l'entschatta da 1910 en il Männerheim. Sco pictur da las bellezzas da Vienna gudogna el modestamain. Cunquai ch'el sez era plitost schenà, ha ses cunabitant Reinhold Hanisch surprendì la vendita. Suenter ch'el aveva il sentiment dad esser vegni engianà da Hanisch, surdat el la vendita da ses maletgs ad in cunabitant gidieu. Perquai èsi dispitaivel schebain l'antisemitissem da Hitler era gia accentuà uschè ferm da quel temp, sco che Hitler fa crair en ses cudesch Mein Kampf. Reinhold Hanisch, che ha pli tard scrit in cudesch dals giuvens onns da Hitler, è vegni mazzà ca. 30 onns pli tard en il champ da concentraziun Buchenwald. 
Suenter che Hitler ha survegnì paja ord l'ierta da ses bab 1913, ha el fatg midada da Vienna a Minca. En Mein Kampf scriva el pli tard ch'el haja gì desideri per ina citad germana. A Minca scuvra el sia fascinaziun per l'architectura e legia las scrittiras da l'autur rassistic Houston Stewart Chamberlain. La midada aveva era l'intent da guntgir il servetsch militar. Sch'igl è vair che sia moda da pensar naziunal-tudestga e sia antipatia per il stadi multipopular da l'Austria e l'Ungaria ha giugà ina rolla, sche fiss la midada stada in'emprima decisiun politica vesaivla da Hitler. Che Hitler na leva betg en emprima lingia gungtir il servetsch militar sa mussa 1914: cura che l'emprima guerra mundiala cumenza, s'annunzia Hitler immediat sco voluntari.

Sco appuntà dal 16. regiment d'infantaria da reserva bajuvar List passenta Hitler quasi l'entira guerra mundiala a la front dal vest sco annunziader. El entra ils 16 d'avust 1914 en l'armada e vegn undrà il december da quel onn cun la crusch da fier da segunda classa. En la Frantscha dal nord vegn Hitler blessà l'onn 1916 ad ina chomma. Pir l'entschatta da mars 1917 vegn Hitler puspè a la front. 1918 vegn el undrà cun la crusch da fier d'emprima classa.
Hitler valeva sco schuldà correct che era dentant plitost malvis tar ses collegas pervia da sia tenuta nuncritica envers ils uffiziers. Stimar il superiur, cuntradir a nagin, sa suttametter cun egls serrads uschia ha el sez numnà sia tenuta en quel temp dal process da putschists 1924. Sia rolla dad outsider vegn confermada entras la constataziun dad in camarat da regiment che il prim biograf contemporan da Hitler Konrad Heiden citescha: Nus tuts sdiavlavan e pensavan ch'i saja insupportabel dad avair in corv alv tranter nus.
Ils 15 d'october 1918, pia curt avant la fin da la guerra, vegn Hitler ospitalisà en il lazaret da la citad prepomaraniana Pasewalk suenter ina attatga da gas. La tschorvadad temporana, per la quala el è vegnì tgirà, ha el pli tard manà enavos sin ina blessura dals egls durant quest' attatga da gas. Perscrutaziuns pli novas che sa basan sin datas dal lazaret permettan dentant er la conclusiun, che la tschorvadad era ina reacziun da schoc tardiva ed isterica sin la terrada da la Germania. En mintga cas è Hitler vegnì tgirà dad in medi militaric per psiciatria che l'ha classifitgà sco psicopat che saja dal tuttafatg nunadattà per qualitads da manader. 
Sumegliant s'exprimì è era il cumandant dal regiment che vegn cità da Heiden cun ils pleds: Quest istericher na numn jau mai sco sutuffizier!. I n'era pia betg mo la naziunalitad austriaca ch'era responsabla che Hitler na mai cuntanschì dapli ch'in rang d'in appuntà, malgrà sias blessuras, sias cruschs da fier d'omaduas classas ed autras undradas. Tuttina numna Sebastian Haffner l'experientscha da Hitler a la front sia unica aventura da scolaziun, cunquai ch'el ha pli tard en sia vita tuttina chapì insatge da dumondas militaricas.

Pli tard ha Hitler pretendì che l'indignaziun davart la sperdita da la guerra e dal tradiment dals Novemberverbrecher haja laschà madirar en el la decisiun da daventar politicher. Era quest astga vegnir dubità, en fatscha a la tenuta nunclera tar ils eveniments dal temp che Hitler ha laschà vesair.
Dad ambiziuns politicas na remartg'ins nagut en il temp suenter la guerra. El turna en la caserna da ses regiment a Minca e mussa a l'entschatta mo l'intenziun da betg esser relaschà. Hitler sa lascha eleger pliras giadas sco persuna da fidanza da ses regiment ed era uschia sco um da colliaziun tranter la regenza da cussegls revoluziunara dal president ministerial bajuvar e socialistic Kurt Eisner.
Durant ils scumbigls suenter sia mort ha Hitler betg prendì partida per la republica da cussegls u - sco ch'ins avess pudì spetgar causa sia tenuta politica pli tarda - per ils adversaris, il corp liber cun tenuta anti-democratica e pil pli numnads populars. El para dad esser sa tegnì precautamain davos las culissas. Ina fotografia da quel temp mussa Hitler schizunt en il til da bara per il gidieu Eisner assassinà. Era quai vegn vis da tscherts istorichers sco cumprova la tenuta politica da Hitler na pudeva betg esser uschè furmada, sco ch'el ha descrit sis onns pli tard en Mein Kampf.

Suenter la terrada sanguinusa da la republica da cussegls ha Hitler laschà s'engaschar da l'administraziun da la Reichswehr che era da quel temp il factur decident da la pussanza en la Baviera. I dat indizis che Hitler haja cumprà la bainvulientscha dals novs pussants cun tradir camarats da regiment ch'eran s'engaschads da la vart da la republica da cussegls. Ils umens pussants en la schinumnada Reichswehr naira - p.ex. il chapitani Ernst Röhm - paran dad avair vis en Hitler in pussaivel agitatur. Cun ses agid pudevan els derasar ideas naziunalisticas tranter ils lavurers. Ses superiurs han tramess Hitler a scolaziuns per referents da propaganda ed han dà ad el il pensum da spiunar ora partidas e circuls politics che chatschavan en il Minca postrevoluziunar sco bulieus or da la terra.




#Article 53: Budapest (5525 words)


 
Budapest (pronunzia ungaraisa ['budɒpɛʃt]) è la chapitala ed a medem temp la pli gronda citad da l’Ungaria. Cun bundant 1,7 milliuns abitants furma Budapest la novavel gronda citad da l’Uniun europeica. Tenor Euromonitor International tutga ella tar las ventg citads europeicas che vegnan frequentadas il pli savens da turists. La vischnanca unitara Budapest è sa furmada l’onn 1873 tras fusiun da las citads fin là independentas Buda, Óbuda, omaduas situadas en il vest dal Danubi, e Pest en l’ost dal Danubi. Il num ‹Budapest› sez na cumpara betg fin là; usità en la lingua da mintgadi era ‹Pest-Buda›.

La citad Budapest è situada al Danubi, il qual banduna en quest lieu la Muntogna Mesauna Ungaraisa e curra en la Planira Ungaraisa. Il pli aut punct da Budapest furma la collina János cun 527 meters; daspera existan numerusas autras collinas, numnadamain la collina dal chastè (Várhegy), la collina da rosas (Rózsadomb), la collina dal sulegl (Naphegy), la collina da l’evla (Sashegy), la collina da Martin (Mártonhegy), la collina dals Svabais (Svábhegy) e la collina Széchenyi (Széchenyi-hegy). Ord vista geotectnoica è la citad situada sin ina ruttadira; perquai è surtut Buda ritg da funtaunas termalas. 

Pervi da la posiziun a l’intern dal pajais e l’effect protegind da las collinas è Budapest segnà d’in clima continental relativamain sitg cun envierns fraids e stads chaudas. La temperatura media munta il schaner a −1,6 °C ed il fanadur a 21 °C. L’entschatta da la stad cuntanschan las precipitaziuns lur maximum. La media annuala da las precipitaziuns munta a 500 fin 600 millimeters. 

L’istorgia da Budapest cumenza vers l’onn 89 cun la fundaziun d’in champ militar roman sin territori populà avant da la stirpa celtica dals Eraviscs. Enturn il champ è alura sa sviluppada pass per pass la colonia romana Aquincum, la quala ha furmà tranter il 106 ed il 296 la chapitala da la provinza Pannonia inferior. Sut domini roman ha la citad prosperà: i sa laschan cumprovar in palaz guvernativ, plirs amfiteaters e bogns; ultra da quai è la citad, situada al Danubi che furmava il cunfin da l’Imperi roman, vegnida protegida tras in mir.

A la fin dal quart tschientaner han gì lieu en rom da la migraziun dals pievels adina dapli invasiuns da stirpas dals Germans e dals Hunns ed Alans. Suenter il declin da l’Imperi roman ed a la fin dal temp da la migraziun dals pievels è sa stabilida qua l’emprim ina populaziun slava; a partir da l’onn 896 è quella però vegnida stgatschada d’Ungarais, pievels urals ch’èn immigrads en il Batschigl Pannonic. 

Ils Ungarais ch’èn pli tard vegnids cristianisads e daventads sedentars abitavan en vitgs cun baselgias e vivevan da la cultivaziun da plantas e da l’allevament d’animals. Situà en il center d’impurtantas vias da traffic è Pest daventà adina pli impurtant. Gia da quel temp è sa sviluppà sur il Danubi (ca. sin l’autezza da la punt Elisabet odierna) in viv traffic da navettas vers Buda situà da l’autra vart dal flum. Suenter la curunaziun da Steffan I (il di da Nadal 1000 ubain il prim da schaner 1001) sco emprim retg da l’Ungaria han ils Ungarais extendì lur domini. L’invasiun dals Mongols l’onn 1241 ha però smanatschà seriusamain il reginavel (Battaglia sper Muhi). La residenza roiala han ins l’emprim translocà a Visegrád. L’onn 1308 è la citad vegnida renovada ed il 1361 è ella puspè daventada la chapitala dal reginavel. L’onn 1513 ha gì lieu ina sullevaziun da purs. 

A partir da l’onn 1446 han ils Osmans adina puspè attatgà ils Ungarais, quai che duva culminar en l’occupaziun da la gronda part dal pajais. L’onn 1526 è crudà Pest, 15 onns pli tard Buda ch’era protegì in pau tras la fortezza. Chapitala da l’Ungaria betg occupada, la quala consistiva quasi be pli da l’Ungaria Superiura (che correspundeva pli u main al territori odiern da la Slovachia), ha furmà tranter il 1536 ed il 1784 Bratislava. Entant che Buda è daventà la sedia d’in pascha tirc, ha Pest pers sia muntada ed ina gronda part dals abitants èn tratgs davent.

La finala èsi reussì als Habsburgais, ch’eran dapi l’onn 1526 retgs da l’Ungaria, da stgatschar ils Osmans e da restabilir l’Ungaria. Per la populaziun da Buda e da Pest n’è però betg sa midà bler – els vegnivan er vinavant administrads dad esters e stuevan pajar fitg autas taglias. La populaziun ha empruvà da sa dustar cun ina sullevaziun, ma quella è vegnida abattida. 

Pest era dapi il 1723 la sedia da l’administraziun dal reginavel. Malgrà las cundiziuns disfavuraivlas ed in’aua gronda desastrusa l’onn 1838 cun 70 000 unfrendas, è la citad creschida en il decurs dal 18avel e 19avel tschientaner sco strusch in’autra. L’onn 1780 è il tudestg vegnì introducì dals Habsburgais sco lingua uffiziala. Quai han ins er fatg per pudair controllar meglier ils moviments revoluziunars che sa faschevan adina puspè valair. Tras quai han ins er tegnì quint dals colonisaturs tudestgs che vegnivan adina puspè clamads en il pajais e ch’avevan en il fratemp populà vastas parts da la citad. Il territori central dals Croats, che correspunda pli u main al territori da la Croazia odierna, era suttamess a Budapest. 

In dals motivs principals per il svilup da Budapest ha furmà l’existenza d’ina punt durant la stad; quella sa cumponiva da bartgas fermadas ina vi da l’autra. Sin iniziativa dal refurmatur ungarais cont István Széchenyi han ins remplazzà quella ils onns 1839 fin 1849 tras in’emprima punt stabla. Animà da far quai aveva il fatg ch’el aveva stuì spetgar in’emna per pudair arrivar a la sepultura da ses bab da l’autra vart dal flum. La punt, la pli veglia e pli enconuschenta da las nov punts dad oz, porta alura er cun raschun ses num (Széchenyi Lánchíd).

Durant la Revoluziun ungaraisa dal 1848 ha Budapest furmà in dals lieus principals da las sullevaziuns cun las qualas ils Ungarais battevan cunter la suppressiun habsburgaisa drizzada cunter refurmas. Bain è la sullevaziun la finala vegnida abattida sanguinusamain cun agid da la Russia; ma ils eveniments dal 1849 duevan indirectamain tuttina manar il 1867 al Cumpromiss austriac-ungarais. Tras quel ha l’Ungaria cuntanschì pli u main ils medems dretgs entaifer la monarchia dubla Austria-Ungaria. Simbol da quest cumpromiss ha furmà la preschientscha da pliras emnas ad onn da l’imperatur Franz Joseph a Budapest. Sco retg da l’Ungaria residiava el sin il chastè da Buda ed exequiva da quel temp – en lingua ungaraisa e purtond in’unifurma ungaraisa – cun ils ministers e la dieta da l’Ungaria ses uffizis ungarais.

L’uniun da Buda, Óbuda e Pest era gia vegnida ordinada l’onn 1849 sut la regenza revoluziunara da l’Ungaria. Suenter ch’ils Habsburgais han gì restituì lur pussanza, han els però revocà quest conclus. Pir l’onn 1873, sis onns suenter il Cumpromiss austriac-ungarais, han las duas parts da la citad pudì fusiunar definitivamain. Per preparar quest pass avev’ins gia furmà l’onn 1870 in «cussegl da la chapitala per lavurs publicas», il qual dueva coordinar il svilup da construcziun ed infrastructura da la citad cumplessiva. 

Per il millenni da l’arrivada dals Ungarais en il Batschigl Pannonic l’onn 1896 han ins realisà en connex cun l’exposiziun millennara numerus projects gronds sco la Plazza dals eroxs e l’emprima metro da l’Europa continentala. Il dumber d’abitants en l’entir territori da la citad è creschì tranter il 1840 ed il 1900 da bundant 100 000 sin radund 730 000.

Suenter la sconfitta en rom da l’Emprima Guerra mundiala è l’Ungaria sortida l’onn 1918 da la monarchia dal Danubi. Cun il contract da Trianon ha l’Ungaria pers bunamain trais quarts da ses territori oriund. 

La republica da cussegls communistica, fundada il mars 1919 sut Béla Kun, ha existì be quatter mais. Quella è dada ensemen l’avust dal medem onn cur che truppas rumenas han occupà en rom da la Guerra tranter l’Ungaria e la Rumenia Budapest e vastas parts da l’Ungaria. Sinaquai è il socialist Gyula Peidl stà per curt temp primminister; sia regenza è però vegnida destituida ils 6 d’avust 1919 en rom d’in putsch da la dretga. Stadi successur è daventà il Reginavel da l’Ungaria sut Miklós Horthy. Suenter sia victoria è Horthy entrà ils 16 da november 1919 a la testa da las truppas conservativas en la chapitala ed è daventà regent dictatoric da l’Ungaria, la quala era formalmain anc adina ina monarchia. 

L’occupaziun tudestga da l’Ungaria durant la Segunda Guerra mundiala ha cumenzà ils 19 da mars 1944, e quai suenter che l’Ungaria aveva empruvà da sa schliar da la Germania cun la quala il pajais era stà allià fin qua. Fin la fin da la guerra han ils Tudestgs sinaquai deportà e mazzà – surtut ad Auschwitz – radund in terz da la populaziun gidieua ungaraisa che dumbrava 600 000 persunas. Da l’autra vart ha l’engaschi da plirs diplomats, tranter quels il Svedais Raoul Wallenberg ed il Svizzer Carl Lutz, salvà ad in grond dumber da gidieus da Budapest la vita e protegì els da la deportaziun. Il medem onn èn parts da Budapest vegnidas destruidas tras attatgas or da l’aria americanas e britannicas. Las pli grondas destrucziun duevan alura avair lieu cur che forzas armadas sovieticas han assedi Budapest da la fin december 1944 fin l’entschatta 1945 cur che la citad ha pudì vegnir conquistada. Durant lur retratga sin la vart da Buda han las truppas tudestgas ed ungaraisas entschercladas siglientà tut las punts sur il Danubi. 38 000 civilists èn morts en questa fasa da la guerra. 

Suenter la guerra han ins proclamà il 1946 la republica ed il 1949 la republica populara da l’Ungaria. Ina curta episoda ha furmà ils onns 1945–1951 il project da giuvenils Gaudiopolis. L’onn 1956 ha Budapest furmà il punct da partenza da la sullevaziun ungaraisa drizzada cunter l’Uniun sovietica. Suenter avair abattì quella sanguinusamain, èn suandadas en l’entir pajais acziuns da purificaziun.

Ils 23 d’october 1989 han ins proclamà a Budapest la Republica da l’Ungaria. Quest pass ha tranter auter fullà via a la fin da l’Uniun sovietica e da l’entir bloc da l’ost. L’onn 2000 han gì lieu en l’entir pajais festivitads en connex cun il millennari da la fundaziun dal stadi; en quest connex han ins er investì en la chapitala cun eriger il center da cultura Millenáris ed il quartier dal millenni cun il teater naziunal; medemamain è vegnì modernisà da la vart da Buda il campus da l’universitad tecnica. Festivà en l’entir pajais, e surtut en la chapitala, han ins er l’adesiun da l’Ungaria a l’Uniun europeica il prim da matg 2004.

L’onn 1873, cur che las trais citads Buda, Pest ed Óbuda èn vegnidas reunidas, dumbrava Budapest stgars 300 000 abitants. L’onn 1930 ha il dumber da la populaziun surpassà 1 milliun. In grond sigl ha quel alura fatg tranter il 1949 ed il 1960, e quai pervi da l’incorporaziun da set citads e 16 vischnancas cunfinantas. Uschia è la populaziun creschida il prim da schaner 1950 per 582 000 persunas sin 1,64 milliuns, la surfatscha da 206 kilometers quadrat sin 525 kilometers quadrat ed il dumber dals quartiers da la citad da 14 sin 22. Ils onns 1970 fin 1990 ha la citad dumbrà bundant 2 milliuns abitants; dapi lura è la cifra sa reducida sin 1,7 fin 1,8 milliuns (situaziun dal 2019: 1 752 286 abitants). 

En il 15avel tschientaner era la populaziun da Pest per gronda part ungaraisa. Suenter la fin dal domini osmanic en l’Ungaria è surtut Buda vegnì dominà da Tudestgs. Dals radund 178 000 abitants l’onn 1851 eran 56,4 % Tudestgs, 36,6 % Magiars, 5 % Slovacs, 2 % auters. Silsuenter è la cumpart dals Tudestgs sa reducida cuntinuadamain, entant che quella dals Magiars è creschida (1891: 67,1 % Magiars, 23,7 % Tudestgs).

La situaziun actuala sa preschenta sco suonda (cifras dal 2001): 91,2 % Magiars, 1 % Tudestgs, 0,8 % Roma, 0,3 % Slovacs, 1,5 % ulteriurs, 5,2 % naginas indicaziuns.

L’onn 1870 vivevan en la citad 72,3 % catolic-romans, 4,8 % refurmads, 5,4 % luterans, 16,6 % gidieus ed 1 % commembers d’autras cuminanzas religiusas. Ils proxims decennis è la cumpart dals refurmads e gidieus creschida cuntinuadamain; la cumpart da quests ultims ha cumpiglià il 1920 23,2 %, è alura però sa sbassada cuntinuadamain fin la fin da la Segunda Guerra mundiala (1930: 20,3 %; 1941: 15,8 %, 1949: 6,4 %).

La citad sa cumpona da trais citads ch’eran oriundamain independentas e ch’èn pir vegnidas reunidas il 1873 a la vischnanca Budapest. Da la vart orientala, planiva dal Danubi sa chatta Pest che cumpiglia dus terzs da la surfatscha da la citad; da la vart occidentala, muntagnarda cumpiglian Buda ed Óbuda l’ulteriur terz da la citad. Questas duas ultimas parts, che cumpigliavan antruras autas cumparts da populaziun da lingua tudestga, sa numnavan per tudestg Ofen (Buda) resp. Alt-Ofen (Óbuda).

Administrativamain è Budapest sutdividì en 23 districts. Il prim da schaner 1950 han ins stgaffì 22 districts; il 23avel (XXIII.) è pli tard vegnì separà dal 20avel (XX.). Partind da l’emprim district enturn il quartier dal chastè (Vár) vegnan ils districts numerads en direcziun da l’ura cun cifras romanas, e quai cun sursiglir repetidamain il Danubi.

Blers impurtants edifizis da la citad èn situads a la riva dal Danubi. Sin la vart occidentala, la vart da Buda, s’auza la collina Gellért grippusa cun la statua da la libertad e la citadella. Al pe da la collina sa chatta il hotel Gellért cun ses famus bogn termal sco er dal flum giu l’edifizi principal da l’universitad tecnica. En il nord da la collina Gellért è situada la collina dal chastè cun l’anteriur chastè roial. En il palaz sa chattan la biblioteca naziunala, la galaria naziunala ed il museum istoric. Sper il chastè ha il president dal stadi ungarais sia sedia en il palais Sándor classicistic. Al pe da la collina dal chastè è situà il Várkert Bazár che furma la finiziun dal cumplex fortifitgà vers il Danubi.

En la part settentriunala da la collina dal chastè s’auza la baselgia da Matteus e davantvart, vers il Danubi, la bastiun dals pestgaders. Il quartier dal chastè da Buda ed il panorama dal Danubi fan part dapi il 1987 dal Patrimoni cultural mundial da l’Unesco. Sut il quartier dal chastè maina in sistem da labirint ch’è per part accessibel al public.

A la riva orientala dal Danubi, da la vart planiva da Pest, s’auza l’edifizi dal parlament, l’academia da las scienzas, ina retscha da gronds hotels per lung da l’uschenumnà corso dal Danubi, la sala da concert Pesti Vigadó, l’universitad d’economia ed in pau pli vers sid il teater naziunal ed il palaz d’art. 

Il Danubi furma per sasez l’attracziun principala da la citad e dumbra en tut nov punts che dattan da lur vart tempra al maletg da la citad. La pli impurtanta, perquai ch’ella è la pli veglia ed a medem temp l’ensaina da la citad, furma la punt da chadainas. 

Da qua maina da la vart da Pest il pitschen rintg tar la punt da la libertad, sperasvi la gronda sinagoga, il museum naziunal e la gronda halla da martgà. La sinagoga situada en la Dohány utca marchescha l’access al quartier gidieu istoric, situà tranter il pitschen ed il grond rintg. Il pitschen rintg suonda pli u main il decurs da l’anteriur mir da la citad, dal qual las ultimas portas da la citad èn vegnidas disfatgas la fin dal 18avel tschientaner. Singulas parts dal mir èn però sa mantegnidas. Tranter il pitschen rintg ed il Danubi sa chatta il center da la citad per propi. Parallel tar il flum tanscha la Váci utca, la pli veglia via da commerzi da la citad ed oz la pli enconuschenta via da flanar. Quella collia la halla da martgà gronda cun il Vörösmarty tér. En il nord dal center da la citad, ma anc adina en il 5avel district central, s’auza la pli gronda baselgia da Budapest, la basilica da S. Stefan. 

Il grond rintg (Nagykörút) è vegnì erigì tranter il 1872 ed il 1906. Quel maina da la punt Petőfi tar la punt Margreta e furma in dals pli impurtants ensembles architectonics da ses temp en l’entir’Europa. La staziun da viafier dal vest (Nyugati pályaudvar) che sa chatta qua furma ensemen cun la staziun da viafier da l’ost ina perditga imposanta da l’architectura da staziuns. 

Al rintg grond, ils tschancuns dal qual portan il num da s. Stefan e dals districts cunfinants Teréz-, Erzsébet-, József- e Ferencváros sa chattan plirs teaters (fin la siglientada l’onn 1965 er il teater naziunal) e kinos (dals quals intgins han stuì serrar cur ch’ins ha avert en auters lieus da la citad kinos multiplexs). Tar la plazza Oktogon vegn il rintg cruschà da l’Andrássy út che collia il center da la citad cun il guaudet da la citad.

L’Andrássy út furma in dals projects urbanistics ils pli ambizius en l’istorgia da la chapitala ungaraisa. En be 14 onns, dal 1871 fin il 1885, han ins erigì in’alea d’ina lunghezza da 2,5 kilometers che vegn flancada da chasas d’abitar da sis auzadas en il stil tipic da quel temp (istorissem), da l’opera statala ungaraisa, da la chasa dal terror e da pliras plazzas. Ella maina vers la plazza dals eroxs, la quala vegn da sia vart flancada da la halla d’art e dal museum dals bels arts. Sin questa plazza sa chatta il monument millennari ch’è vegnì erigì il 1896 a chaschun dal giubileum da l’arrivada dals Magyars en il Batschigl Pannonic. En il sid da la Plazza dals eroxs sa chatta la plazza lunghenta cun il monument che regorda a la sullevaziun dal 1956. Quel è vegnì inaugurà precis 50 onns suenter la sullevaziun e sa chatta al lieu nua ch’ins aveva cupitgà il 1956 in monument da Stalin. 

Dapi il 2002 tutga er l’Andrássy út tar il Patrimoni cultural mundial. Sut la via cursescha l’emprima metro da Budapest; igl è quai stà ina da las emprimas metros electricas en tut il mund e suenter la London Underground ina da las pli veglias dal mund.

Vers ost, gist davos la plazza dals eroxs, sa chatta en il guaudet da la citad il chastè Vajdahunyad, ch’è vegnì erigì a chaschun da l’exposiziun millennara l’onn 1896, il zoo, il circus, la patinera ed il bogn da cura Széchenyi. Ensemen cun il bogn Gellért tutga quel tar ils pli enconuschents bogns termals da Budapest. 

Il Mausoleum da Gül Baba sa chatta sin la collina da rosas a Buda. Quest monument en furma d’octogon è vegnì erigì vers il 1545 e furma il sanctuari da l’islam situà il pli lunsch vers nord. Gül Baba è stà in dervisch e poet tirc dal 16avel tschientaner. 

Ordaifer il center da la citad, a la riva dal Danubi occidentala, è situada la colonia romana Aquincum. Ultra da quai sa chatta qua il parc da sculpturas cun statuas dal realissem socialistic. 

A la riva orientala è situà il monument commemorativ Chalzers a la riva dal Danubi che regorda als pogroms cunter ils gidieus en la Segunda Guerra mundiala. 

Il pli impurtant teater è il teater naziunal ungarais Nemzeti Színház che sa chatta dapi il 2002 en il parc Bajor Gizi. En il decurs da si’istorgia ha questa tribuna, la pli impurtanta dal pajais, midà repetidamain sia sedia. L’emprim edifizi sa chattava tranter il 1837 ed il 1908 a la Kerepesi út, oz Rákóczi út visavi l’hotel Astoria. 

Al Hevesi-Sándor-Tér sa chatta il Magyar Színház (teater ungarais). Ad in public giuven sa drizzan las represchentaziuns dal teater Katona József en la Petőfi Sándor-utca. Ina tribuna alternativa per projects da teater extraordinaris porscha il teater Krétakör.

Amis da musical ed operetta visitan gugent l’Operettszínház al ‹broadway ungarais› en la Nagymező utca. Ina tribuna cun ina lunga tradiziun furma il Vígszínház (teater da cumedias) al Körút sin la vart da Pest. Amis da l’opera stiman las represchentaziuns da l’opera statala ungaraisa Magyar Állami Operaház en l’Andrássy-út, in edifizi ch’ha sumeglientschas cun l’opera statala a Vienna.

La pli enconuschenta sala da concerts furma la sala da festa en stil floreal da l’academia da musica al Liszt-Ferenc-Platz. A las pretensiuns acusticas las pli modernas correspunda la halla da concert da Béla Bartók che sa chatta en vischinanza dal teater naziunal. Er en las localitads dal center da congress da Budapest han lieu concerts. 

La pli gronda collecziun d’art, il museum dals arts figurativs da Budapest, sa chatta a la Plazza dals eroxs. Quella cumpiglia ina collecziun egipziana, ina collecziun antica, ina galaria dals vegls maisters, ina collecziun or dal 19avel e 20avel tschientaner, ina collecziun da sculpturas baroccas ed ina collecziun da pictura tudestga, austriaca, ollandaisa e flama. Ultra da las exposiziuns permanentas vegnan realisadas regularmain exposiziuns temporaras da muntada internaziunala, sco il 2006 l’exposiziun d’ovras da Vincent van Gogh ch’ha gì in enorm success.

Visavi il museum sa chatta la halla d’art da Budapest che porscha spazi a projects d’art contemporans. La pictura ungaraisa vegn exponida en la galaria naziunala en il palaz dal chastè. Sper il nov teater naziunal sa chatta ultra da quai il palaz dals arts. 

A l’Üllői út è situà l’edifizi en stil floreal dal museum ungarais per art applitgà ed a la plazza Kossuth il museum etnografic. Dapi il 2004 sa chatta en la sinagoga Páva e gist daspera en il nov edifizi dad István Mányi il center da documentaziun davart il holocaust. 

Sper ils bundant 30 museums da tut gener dispona Budapest sco center cultural da l’Ungaria er da bleras pitschnas galarias, da las qualas la gronda part è situada en il center da la citad u en il quartier dal chastè. 

Mintg’onn han lieu a Budapest dus gronds festivals da cultura, en rom dals quals vegnan surtut purschids programs per ils amaturs da la musica classica: il Festival da la primavaira da Budapest ed il Festival d’atun da Budapest. Per amaturs da film ha lieu il favrer in festival naziunal e l’avrigl il festival internaziunal Titanic ed ultra da quai in festival da teater internaziunal. L’avust ha lieu il festival sin l’insla ‹Sziget› cun blers concerts surtut per in public giuven.

In nov center da cultura da la vart da buda è il Millenáris ch’è vegnì avert l’onn 2000 en rom dal giubileum millennar da la fundaziun dal stadi sin l’areal d’ina veglia fabrica. Qua han lieu la stad concerts, exposiziuns ed autras occurrenzas culturalas. La plazza da gieu per uffants dispona da figuras stgalpradas a maun che derivan d’ina paraula populara. Dapi il 2005 ha er il museum d’uffants ungarais Palaz dals misteris in nov dachasa.

Il conturn muntagnard da Budapest porscha bleras pussaivladads d’excursiun sco per exempel la citadina pittoresca Szentendre en il nord da la citad u il chastè a Gödöllő, il lieu preferì da la regina ed imperatura Sisi. Il Schanugl dal Danubi s’extenda fin ad Esztergom. En il sid da la citad, sin l’insla Csepel sper Halásztelek, s’auza l’antenna d’emissiun Lakihegy.

En las collinas da Buda, da las qualas la pli auta elevaziun è cun 527 meters la collina János, cursescha ina viafier d’uffants. Qua finescha er la senda da viandar internaziunala che maina dad Eisenach (Turinga) a Budapest. Per la citad ch’ha plitost paucs parcs gioga er l’Insla Margreta ina rolla centrala sco lieu da recreaziun.

A Budapest existan numerus clubs da ballape. Il pli enconuschent è Ferencváros Budapest; ulteriurs clubs che giogan en la pli auta liga naziunala èn Újpest Budapest, Honvéd Budapest e Vasas Budapest.

Daspera ha Budapest tradiziunalmain ina gronda muntada en il boxar. Tranter auter han gì lieu qua ils campiunadis europeics ils onns 1930, 1934 e 1985 ed ils campiunadis mundials dal 1997. Il boxist László Papp, oriund da Budapest, è ultra da quai stà l’emprim boxist ch’ha gudagnà aur tar trais gieus olimpics successivs. 

Dapi il 1984 ha lieu mintg’onn il maraton da Budapest, al qual sa participeschan mintgamai plirs milli curriders. 

Impurtantas squadras da hockey da Budapest èn Újpesti TE, Ferencvárosi TC e MAC Budapest.

Sco che quai è usità en bleras chapitalas, han er a Budapest in grond dumber d’interpresas naziunalas lur sedia principala (t.a. Magyar Telekom, Zwack, Orion Electronics, MOL ed Ikarus) ed èn preschentas qua numerusas interpresas internaziunalas cun lur sedia naziunala ungaraisa. 

Las pli impurtantas vias da cumpra da Budapest sa chattan en il 5avel cirquit en il center da la citad. La pli enconuschenta e la Váci utca, nua ch’èn represchentads quasi tut ils gronds labels da moda dal mund. Sin la plazza Vörösmarty ha lieu mintg’onn ina gronda fiera da Nadal. Dals gronds negozis tradiziunals han be paucs pudì sa mantegnair; enstagl vegnan endrizzads en ed ordaifer la citad adina dapli gronds centers da cumpra tenor il muster american (plazas).

L’istorgia dals bogns da Budapest tanscha enavos var 2000 onns. Gia ils Romans han fatg diever da las funtaunas da la citad. Da l’onn 1178 datti indicaziuns davart ina colonia Felhéviz sin il territori da la citad dad Óbuda da pli tard – il num signifitga ‹funtauna termala›. A la collina Gellért vegn menziunada la funtauna dad Elisabet (sontga Elisabet era la figlia dal retg Andreas). Il domini dals Osmans ha tranter auter introducì in’autra cultura da bogn en la citad; ils monuments architectonics da quel temp èn en diever fin oz. En il 18avel tschientaner, a basa d’in decret da Maria Theresia, èn ins s’occupà da l’analisa da las funtaunas termalas da la citad. L’onn 1812 han ins, sin proposta da Pál Kitaibel, cumenzà a sistematisar las funtaunas; el ha er scrit in’idrografia da la citad. L’onn 1930 ha la citad retschet sco citad cun las pli bleras funtaunas curativas il titel ‹citad dals bogns›.

Ils pli impurtants bogns da cura e bogns averts èn: 
Csepeli (bogn avert), Csillaghegyi (bogn avert), Dagály (bogn da cura e bogn avert), Dandár (bogn da cura), Gellért (bogn da cura, bogn avert e bogn da divertiment), Király (bogn da cura, bogn tirc), Lukács (bogn da cura, bogn da nudar, bogn tirc), Palatinus (bogn da cura e bogn avert, edifizi en stil floreal sin l’insla Margreta), Paskál (bogn avert), Pesterzsébeti (bogn avert), Pünkösdfürdői (bogn avert), Római (bogn avert e bogn da divertiment), Rudas (bogn da cura, bogn tirc), Széchenyi (bogn da cura, bogn da nudar), Újpesti (bogn avert), Veli Bej (bogn da cura, bogn tirc). Intgins dals bogns han ina subcultura specifica: En il bogn Széchenyi vegn giugà uras a la lunga schah en l’aua chauda; il bogn Lukács furma tradiziunalmain in lieu d’inscunter d’acturs ed artists ed il Palatinus, numnà Pala, è tradiziunalmain in bogn per giuvenils.

Daspera datti er blers bogns da nudar a Budapest, ils pli enconuschents èn il Császár a Buda e la halla da nataziun sin l’insla Margreta che porta il num dal victur olimpic Alfréd Hajós. Il 2008 ha ultra da quai avert in dals pli gronds parcs tematics d’aua da l’Europa, il Ramada Resort.

Tuttina sco Vienna ha er Budapest enconuschì en il 19avel tschientaner ed a la vieuta vers il 20avel tschientaner ina ritga cultura da cafés. In dals centers litterars furmava il kávéház Café New York che dumbra dapli che tschient onns e ch’ha existì dal temp dal communissem sut il num Hungária Kávéház.

In dals lieus d’acziun da la revoluziun dal 1848 ha furmà il café Pilvax, en il qual sa reunivan ils aderents da Sándor Petőfi. Ils cafés han er servì sco plaz da lavur per scripturs, poets e schurnalists – Ferenc Molnár è per exempel stà in visitader frequent da talas chasas da café. Dal temp dal communissem èn quels vegnids statalisads ed han midà lur funcziun, blers èn svanids u en vegnids negligids sur lung temp. Da quel temp furmavan ils pitschens Presszós (espressos) ils sulets locals en ils quals ins pudeva giudair in Fekete, in pitschen nair café ungarais ch’ins ha laschà coier ditg. 

Il Café Centrál al Ferenciek han ins reavert ils onns 1990 en veglia traglischur. Il Café Museum a la Múzeum körút è daventà in restaurant pli nobel. Sco café il pli bel ed exquisit vala il Café Gerbeaud al Vörösmarty tér. Las duas pli veglias conditorias a Buda èn la conditoria Ruszwurm en il quartier dal chastè e la conditoria August sper la fiera Fény-utca.

In’atgnadad a Budapest, cun in dumber che crescha ad in crescher, furman las uschenumnadas bars en ruinas. Ina da las emprimas è stada la Szimpla kert en il quartier gidieu, il 7avel district da Budapest.

Malgrà l’enorma ladezza dal Danubi (radund 300 meters) è la citad munida cun numerusas punts. Dal nord vers il sid èn quai:

Cumbain che la cumpart dal traffic individual al traffic general è plitost pitschna, datti mintga di colonnas en ed enturn la chapitala ungaraisa. Engrevgiada vegn la situaziun tras la mancanza da chasas da parcar en la citad. A distgargiar la citad dal traffic da transit serva il rintg d’autostradas che sa chatta en construcziun resp. è per ina buna part gia terminà. 

L’enviern patescha la citad da smog, uschia ch’ins ha introducì il 2009 ina lescha tenor la quala l’ir cun auto po vegnir scumandà durant tscherts dis: En cas da concentraziuns da particlas finas memia autas dastgan be cursar ils dis spèrs autos cun cifra spèra, ils auters dis ils autos cun cifra pèra sin il numer da l’auto. La polizia na po betg chastiar cuntravenziuns cun multas, mabain be appellar als automobilists. Cur che quest scumond è vegnì applitgà l’emprima giada è il traffic d’autos sa reducì per radund 18 %. 

La cumpart dals velocipedists al traffic general è a Budapest cun ca. 1–2 % relativamain bassa. Sin l’entir territori da la citad datti damain che 200 kilometers vias da velos (damain ch’in tschintgavel da las vias da velos en la citad da Vienna ch’è pli u main tuttina gronda); tar radund dus terzs da questas vias sa tracti en pli be d’ina lingia da separaziun malegiada sin il trottuar. Duas giadas ad onn demonstreschan a Budapest velocipedists en rom d’ina Critical Mass per meglras cundiziuns per velocipedists. Cun fin a 80 000 participants sa tracti d’ina da las pli grondas occurrenzas da quest gener en tut il mund.

Budapest furma in’impurtanta cruschada dal traffic da viafier e sa chatta al punct final meridiunal da la ‹magistrala per l’Europa›. Tar quella sa tracti d’in impurtant project transeuropeic, en rom dal qual duai vegnir realisada ina viafier ad auta sveltezza tranter Paris e Budapest.

Enstagl d’ina staziun principala dispona Budapest da trais staziuns a chau ch’èn colliads ina cun l’autra tras la metro. La pli impurtanta staziun furma il Keleti pályaudvar (staziun da l’ost). Da qua davent cursescha la gronda part dals trens internaziunals. Ultra da quai existan qua er bleras colliaziuns naziunalas. En il nord da la staziun da l’ost, medemamain da la vart da Pest, sa chatta la staziun dal vest Nyugati pályaudvar cun ses museum da viafier interactiv; da qua davent curseschan ils trens vers l’ost dal pajais ed en direcziun da l’Ucraina. Da vart da Buda sa chatta la staziun dal sid Déli pályaudvar; qua partan ils trens vers il sidvest dal pajais, per exempel en direcziun dal Lai Balaton.

L’interpresa da transports publics da Budapest (BKV) transporta mintga di 3,8 milliuns passagiers sin ina rait da bundant 2000 kilometers. Quella sa cumpona oravant tut da bus (41 % da tut ils passagiers che vegnan transportads cun il traffic public), da trams (26 %) e da lingias da metro (22 %). L’emprima lingia da metro è gia vegnida terminada il 1896 e furma uschia la pli veglia metro sin l’entir intschess continental da l’Europa. Daspera mainan pendiculara, funiculara resp. viafier a roda dentada sin diversas collinas situadas sin il territori da la citad (János-hegy, collina dal chastè, Svábhegy).

La plazza d’aviaziun internaziunala da Budapest, Ferihegy, è situada ca 15 kilometers ordaifer il center da la citad. Quella è cuntanschibla bain cun auto, bus u viafier. Dapi il 2004, cur che diversas airlines bunmartgadas èn s’etablidas entaifer il martgà ungarais, è il dumber da passagiers creschì fitg ferm.

La muntada da la navigaziun è s’augmentada ils ultims onns d’in cuntin. Sper viadis d’excursiun organisads da societads da navigaziun indigenas curseschan navs da lingia vers Bratislava e Vienna. Cruscheras fluvialas, dal flum giu per exempel davent da Passau e dal flum si nà da la Mar Naira, mainan mintg’onn tschientmillis passagiers en la citad. Durant la stagiun da stad pon ins dumbrar a las rivas da la citad fin a 100 navs da passagiers a di. Daspera exista in port per transtgargiar martganzia che cuvra ina surfatscha da bundant 150 ha.

L’emprima universitad ungaraisa è vegnida fundada il 1635 dal cardinal Péter Pázmány sco collegi da gesuits a Trnava, Slovachia (ch’appartegneva da quel temp al Reginavel da l’Ungaria). L’emprim existiva be ina facultad da scienzas umanas ed ina facultad teologica. In pass decisiv en il svilup da l’universitad ha furmà la fundaziun da la facultad da giurisprudenza l’onn 1667. Dapi la fundaziun da la facultad da medischina l’onn 1769 sumeglia la structura da l’universitad quella d’autras scolas autas europeicas. 

L’onn 1777 ha la regina Maria Theresia dà la lubientscha da transferir l’universitad a Buda. Entaifer la facultad da scienzas umanas han ins fundà l’onn 1782 l’institut per inschigneria, il qual è alura vegnì surpiglià l’onn 1857 da l’universitad politecnica e fa part dapi il 1871 da l’universitad tecnica. Daspera existan a Budapest numerusas ulteriuras universitads e scolas autas statalas e privatas. 

 




#Article 54: Londra (10401 words)


 
Londra (pronunzia rumantscha [ˈlɔndɔn], pronunzia englaisa [ˈlʌndən]) è la chapitala dal Reginavel Unì e da la part dal pajais Engalterra. La citad sa chatta a la Temsa en il sidost da l’Engalterra sin l’insla Gronda Britannia. Il territori d’administraziun odiern cun en tut 33 districts è sa furmà l’onn 1965 cun la fundaziun da Greater London. Là vivevan il 2018 radund 8,9 milliuns umans, da quai radund 3,3 milliuns en ils 13 districts municipals da Inner London.

Fundada l’onn 50 s.C. dals Romans sco colonia Londinium, è la citad daventada suenter la conquista normana dal 1066 la chapitala dal Reginavel da l’Engalterra e la sedia da la chasa roiala britannica. Gia en il temp medieval è Londra sa sviluppà ad in’impurtanta plazza commerziala en l’Europa. Sut il domini dad Elizabeth I en il 16avel tschientaner è la muntada sco citad da port en la Mar dal Nord anc creschida. Cun il cumenzament da l’industrialisaziun en il 18avel tschientaner è er la populaziun da Londra s’augmentada, uschia che la citad ha surpassà sco ina da las emprimas insumma il cunfin d’in milliun abitants. Fin il 1900 è la populaziun creschida sin 6 milliuns e Londra n’è betg be daventà en il 19avel tschientaner la chapitala da l’imperi mundial britannic, mabain ultra da quai la pli gronda citad dal mund, quai ch’ella è restada fin il 1925. 

La citad è sa sviluppada ad in impurtant center da tecnica, industria e commerzi, da politica e da cultura e quinta fin oz tar las metropolas mundialas. Sper New York, Singapur e Hongkong furma Londra en pli ina da las pli grondas plazzas da finanzas dal mund. Sper numerusas universitads, scolas autas, teaters e museums sa chattan a Londra er divers edifizis istorics sco il Palace of Westminster u il Tower of London che tutgan tar il Patrimoni cultural mundial da l’UNESCO. Cun bundant 19 milliuns è Londra stà l’onn 2016 suenter Bangkok la citad cun la segund auta frequenza da turists da l’exteriur en tut il mund.

Las coordinatas geograficas dal center da la citad en vischinanza dal Trafalgar Square èn 51° 30′ grads da latituda meridiunala e 0° 8′ grads da longhituda occidentala. La posiziun datiers dal meridian nulla n’è nagina casualitad. Pertge che quel è vegnì fixà tras il Royal Greenwich Observatory e furma il punct da partenza dals grads da longhituda e tras quai da las zonas da temp. 

La citad da Londra s’extenda sur ina lunghezza da radund 44,3 kilometers per lung da la Temsa navigabla e sa chatta en media 15 meters sur il nivel da la mar. Londra è sa sviluppà d’ina colonia situada a la riva settentriunala, la City of London odierna. Fin il 1739 ha la London Bridge furmà la suletta punt sur il flum.

Per quest motiv sa chatta la gronda part da la citad en il nord dal flum. Cun la construcziun d’ulteriuras punts en il 18avel tschientaner e la construcziun da la viafier en il 19avel tschientaner ha la citad cumenzà a s’extender en tuttas direcziuns. La cuntrada è planiva fin levamain ondulada, quai ch’ha pussibilità ina creschientscha quasi illimitada. 

Pli baud era la Temsa bundant pli lada e pli pauc profunda che oz. En il fratemp vegn ella cunfinada quasi dapertut tras rempars e la gronda part dals 15 affluents culan sut terra. Il fluss e refluss da la Mar dal Nord sent’ins anc ferm en la citad; quella è perquai periclitada tras inundaziuns e mar burascusa. Sper Woolwich – en l’ost da Greenwich – han in erigì ils onns 1970 il Thames Barrier per minimar quest privel.

La structura geologica da l’Engalterra dal Sidost è segnada da sediments mesozoics ch’han laschà sa furmar ina cuntrada da stresas structurada generusamain. Nagliur tanschan las autezzas fitg ad aut, uschia che l’entira regiun profitescha dals avantatgs climatics dal sidost. Istoricamain ha Londra profità da sia posiziun amez ina regiun d’agricultura. Il sidost en vischinanza dal continent ha furmà da vegl ennà il center da l’imperi insular. Qua han ils conquistaders ch’èn vegnids nà da la terra franca – Romans, Saxons, Normans – fitgà pe sco emprim. Cun la scuverta da l’America ed il svilup da la navigaziun d’ultramar èn bain las varts exteriuras da l’insla sa sviluppadas dapli pervi da lur posiziun favuraivla; ma er da quel temp ha Londra pudì sa mantegnair sco vegl center cultural e politic ed è restà la porta vers l’insla. 

Londra sa divida en 32 districts municipals (London Boroughs) e la City of London. 

L’Engalterra dal Sidost cun la chapitala Londra furma climaticamain la part da la Gronda Britannia ch’è protegida il meglier cunter las influenzas nà da l’Atlantic. Londra appartegna a la zona climatica temprada. Las stads èn chaudas, ma darar fitg chaudas; ils envierns èn bain frestgs, ma la temperatura croda be darar sut nulla. Il mais il pli chaud furma il fanadur cun en media 16,3 °C, il pli fraid il schaner cun en media 3,9 °C. La gronda surfatscha bajegiada retegna la chalur e stgaffescha uschia in microclima. Magari èsi en la citad fin a tschintg grads pli chaud ch’en la cuntrada circumdanta. 

La temperatura annuala munta en media a 9,7 °C e las precipitaziuns annualas a 611 millimeters. Ils mais october, november e december crodan las pli bleras precipitaziuns cun en media 57 millimeters ed il pli pauc il favrer cun en media 36 millimeters. Naiv datti be darar, tut il pli intgins centimeters ad onn. Eveniments sco la catastrofa da naiv dal 1978 èn ina raritad. Il 2009 hai dà il pli grond caos da naiv dals ultims onns, cur ch’èn crudads 15 centimeters naiv nova. Nagina raritad furman però inversiuns termicas. Ina da quellas ha manà il 1952 ad ina gronda catastrofa da smog. 

L’existenza d’ina colonia preromana dals Celts sin il territori da la City of London n’ha betg sa laschà cumprovar. Probablamain l’onn 47 s.C. han ils Romans fundà la citad Londinium. L’onn 60 u 61 s.C. han ils Icens sut lur regina Boudicca destruì la colonia. Londinium è vegnì reconstruì ed ha destituì a l’entschatta dal segund tschientaner Camulodunum (Colchester) sco chapitala da la Britannia. A partir da 197 s.C. ha Londinium furmà la chapitala da la provinza Britannia superior, a partir da ca. 300 s.C. da la provinza Maxima Caesariensis. Enturn l’entira citad han ins erigì rempars. Las restanzas da l’amfiteater roman ch’è vegnì a la glisch pir il 1988 en il quartier da finanzas odiern han ins rendì accessiblas a la publicitad il 2002.

L’onn 410 s.C. han ils Romans retratg lur legiuns e la populaziun è stada exposta pli e pli a las expediziuns da sblundregiada dals Germans. Suenter la conquista da l’Engalterra tras ils Angles e Saxons, è Londinium scrudà fin la fin dal 5avel tschientaner ad ina citad da ruinas nunabitadas. 

Ils Anglosaxons han l’emprim guntgì la proxima vischinanza da la citad destruida. Vers la fin dal 7avel tschientaner han els fundà en il vest da quella l’abitadi Lundenwic ch’ha l’emprim appartegnì al Reginavel da Mercia, pli tard al Reginavel d’Essex. Sut Alfred il Grond, il retg da Wessex, han ils Anglosaxons reconquistà l’onn 878 dals Danais la cuntrada a la sbuccada da la Temsa. Ils proxims onns è la regiun puspè vegnida colonisada entaifer ils mirs da la citad romans. La citad ch’è sa furmada da nov purtava il num Lundenburgh.

L’onn 1066 han ils Normans conquistà l’Engalterra e Londra ha substituì Winchester sco chapitala. Il nov regent William I ha confermà ils dretgs spezials da Londra. Richard Cor da Liun ha nominà l’onn 1189 l’emprim Lord Mayor (burgamester), il qual è alura vegnì elegì dapi il 1215 directamain da las corporaziuns da commerziants che daventavan adina pli pussantas. L’onn 1209 è vegnida terminada l’emprima punt erigida or da crappa, la London Bridge, che dueva restar fin il 1750 la suletta punt en il center da la citad odierna. Pliras giadas ha Londra stuì supportar sblundregiadas en rom da sullevaziuns da purs, uschia per exempel il 1381 durant la Peasants’ Revolt ed il 1450 durant la Jack-Cade-Rebellion.

Durant la Guerra da rosas, ch’è ida a fin l’onn 1485 cun la curunaziun da Henry Tudor sco Henry VII, è la citad stada sin la vart dals Yorks. La refurmaziun ha rut la pussanza da la baselgia, la quala possedeva fin là raduna la mesadad dal terren; la redistribuziun dals bains ecclesiastics a partir dal 1535 ha manà ad in’èra da fluriziun economica e Londra è avanzà ad ina da las pli impurtantas citads da commerzi.

En il decurs da si’istorgia variada ha Londra stuì vegnir a frida cun baininqual temp da crisa. Suenter che la fundaziun da las emprimas grondas cumpagnias da commerzi e da la Royal Exchange avevan fatg avanzar en il 16avel tschientaner il svilup economic, è la citad vegnida tutgada il 1664/65 da la pesta gronda ch’ha chaschunà bundant 70 000 unfrendas. Ed il settember 1666 ha in grond incendi devastà vastas parts da la citad; radund 13 000 chasas e 89 baselgias èn daventadas l’unfrenda da las flommas.

Suenter l’incendi desastrus han ins reconstruì la citad. Ils plans per ina restructuraziun cumpletta han però fatg naufragi pervi dals auts custs, uschia ch’ins ha pli u main erigì las novas chasas per lung da las veglias vias cun lur blers chantuns. L’architect responsabel per la reconstrucziun è stà Christopher Wren. Da quel temp han bunamain tut ils abitants nobels bandunà definitivamain il vegl center da la citad ed han laschà eriger en il West End che sa chattava en cumplain svilup novas chasas d’abitar represchentativas. Las classas socialas las pli povras da l’autra vart èn vegnidas stgatschadas en l’East End, nua ch’ellas stuevan gudagnar lur da viver en il port en plaina expansiun. La fin dal 17avel tschientaner è Londra avanzà al pli impurtant center da finanzas dal mund.

En il decurs dal 18avel tschientaner è Londra creschì sur ils cunfins istorics or. Novas punts sur la Temsa han purschì la pussaivladad d’extender la citad vers sid. L’onn 1780 han gì lieu a Londra ils Gordon Riots, cur che protestants fanatics èn sa defendids cunter l’egualitad dals dretgs per ils catolics.

En il decurs dal 19avel tschientaner è il dumber d’abitants s’augmentà fermamain. La construcziun da numerusas viafiers d’aglomeraziun e da metros ha pussibilità d’extender svelt il territori surbajegià. Durant l’epoca victoriana ha Londra cuntanschì gronda muntada sco chapitala da l’imperi mundial britannic. L’onn 1851 era Londra tenor dumbraziun dal pievel cun 2 651 939 abitants la pli gronda citad da l’Europa ed il center dal mund industrialisà. Qua ha gì lieu il medem onn cun la Great Exhibition l’emprima exposiziun mundiala. 

L’aglomeraziun che creschiva en gronds pass era sparpagliada en numerus circuls da dretgira e plaivs. Sco emprim consorzi han ins fundà l’onn 1829 la Metropolitan Police, l’onn 1855 è suandà il Metropolitan Board of Works sin il sectur dals fatgs da construcziun. Il sistem d’aua persa da Londra, erigì sut l’egida da Joseph Bazalgette, vala sco pli grond project da construcziun da l’entir 19avel tschientaner. L’onn 1889 han ins stgaffì cun la County of London per l’emprima giada ina regiun d’administraziun unitara per l’entira zona d’aglomeraziun. 

L’emprima mesadad dal 20avel tschientaner è stada segnada da l’extensiun dal territori surbajegià en dimensiuns sco anc mai. Ils novs lieus suburbans sa chattavan quasi tuts ordaifer la County of London: en l’entir Middlesex, en il vest dad Essex, en il nord da Surrey, en il nordvest da Kent ed en il sid da Hertfordshire.

Durant la Segunda Guerra mundiala, surtut ils onns 1940/41, hai dà a Londra numerusas attatgas or da l’aria da vart dal Reich tudestg (las qualas èn vegnidas enconuschentas en l’istorgia da la citad sut il num ‹The Blitz›. A grondas destrucziuns han quellas surtut manà en las zonas industrialas situadas en l’ost da la citad. Ina segund’unda d’attatgas è suandada il 1944/45 en rom da l’interpresa Capricorn sco er cun rachetas dal tip V1 e V2. Bunamain 30 000 abitants han pers la vita, tschientmillis èn daventads senza tetg.

Suenter la fin da la guerra è il dumber d’abitants da Londra sa reducì considerablamain, damai che bleras persunas èn idas a star en novas citads satellit. L’onn 1965 han ins stgaffì la regiun administrativa Greater London, la quala cumpigliava er ils quartiers suburbans ch’eran sa furmads en il decurs dal 20avel tschientaner. A medem temp ha Londra pers sia rolla sco impurtant port; ils implants en ils Docklands èn ids en decadenza. 
 
L’onn 1981 ha inizià in program da svilup urban cumplessiv, dieschmillis plazs da lavur dal sectur da servetschs èn vegnids transferids da la City of London sin l’Isle of Dogs u stgaffids da nov. En la Canary Wharf han ins erigì in vast cumplex da chasas autas. Suenter il punct il pli bass dals onns 1980 è il dumber d’abitants puspè creschì. Ils proxims onns ha Londra pudì consolidar sia posiziun sco ina da las pli impurtantas citads per l’industria da finanzas globalas. 

L’onn 2011 è la populaziun creschida sin bundant 8 milliuns, quai che munta in nov maximum. L’onn 2012 han gì lieu a Londra ils gieus olimpics da stad.

Gia l’onn 140 s.C. vivevan a Londra 30 000 umans, enturn il 1300 eran quai 100 000 e l’onn 1801 ha il dumber d’abitants da la citad surpassà il cunfin dad in milliun. Tranter il 1825 ed il 1925 era Londra la citad cun la pli gronda populaziun en tut il mund, alura è ella vegnida surpassada da New York. Tar la dumbraziun dal pievel dal 2001 han ins registrà 7 172 091 abitants, il 2011 8 173 900. Pervi da la creschientscha cuntinuanta vegn prognostitgà ch’il dumber d’abitants pudess crescher fin l’onn 2040 sin bundant 10 milliuns. 

Londra è da vegl ennà ina metropola ch’attira differentas naziunalitads, culturas e religiuns. Entant ch’arrivavan a l’entschatta dal 20avel tschientaner surtut Irlandais, Polonais, Talians e gidieus da l’Europa da l’Ost, èn immigrads dapi la mesadad dal 20avel tschientaner en emprima lingia umans da las anteriuras colonias britannicas, sco per exempel da l’India, da Pakistan, da Bangladesch u da la Nigeria.

Tar la dumbraziun dal pievel dal 2011 eran 6,6 % da la populaziun residenta naschids sin il Subcontinent Indic, 4,9 % en ulteriuras parts da l’Asia. 7 % dals abitants derivavan da l’Africa e 4,2 % da la Caribica. Tut en tut eran 37 % naschids ordaifer il Reginavel Unì. 

L’aglomeraziun da Londra s’extenda sur il territori da la citad da Greater London or e cumpiglia radund 9 milliuns abitants (situaziun dal 2010). Quai è dapli che la Scozia e la Valisia ensemen. Londra furma uschia ina da las pli grondas aglomeraziuns da l’Europa.

Il cuntrast d’antruras areguard la situaziun d’abitar e da viver tranter la populaziun da naziunalitad britannica cun autas entradas en il Westend e d’immigrants cun bassas entradas en l’East End vegn surpostà actualmain tras tendenzas da svilup cuntrarias.

Ils pretschs d’immobiglias èn en general sa dublegiads en la Gronda Britannia tranter il 2000 ed il 2011; a Londra sez vegn anc vitiers ch’in’immobiglia è en media dubel uschè chara sco en las ulteriuras parts dal pajais. Il 2015 ha il dumber d’abitaziuns dadas en locaziun surpassà per l’emprima giada en l’istorgia moderna da la citad il dumber d’abitaziuns da proprietad. Sco motiv vegn surtut inditgà il dumber da la populaziun che crescha fitg svelt.

Tenor la dumbraziun dal pievel dal 2011 vivevan en la citad 48,5 % cristians, 12,4 % muslims, 5 % hindus, 1,8 % gidieus, 1,5 % sikhs, 1 % budists e 0,6 % aderents d’autras crettas. 20,7 % n’appartegnan a nagina religiuns ed 8,6 % da la populaziun n’han fatg nagin’indicaziun.

La maioritad dals cristians tutga tar la baselgia anglicana da l’Engalterra. La baselgia principala e la sedia da l’uvestg da la diocesa da Londra è la St Paul’s Cathedral. La baselgia da la chasa roiala è Westminster Abbey. La baselgia principala catolica da la Valisia e l’Engalterra e sedia da l’archuvestg da Westminister è la Westminster Cathedral. Suenter che la chasa roiala englaisa ha gì surpiglià la cretta protestanta (baselgia anglicana) hai dà plirs tschientaners naginas baselgias catolicas a Londra. Pir en il decurs dal 19avel tschientaner èn puspè s’etablidas cuminanzas catolicas. Ulteriuras cuminanzas religiusas cristianas èn l’United Reformed Church, l’armada dal salit, ils quecher e la baselgia ortodoxa. 

La citad furma il center da l’islam en la Gronda Britannia. Radund 38 % dals 2,7 milliuns muslims brits vivan tenor la dumbraziun dal 2011 a Londra. La pli gronda moschea da la citad furma la Bait ul-Futuh. Dals var 817 000 hindus britannics viveva il 2011 radund la mesadad a Londra. Il Neasden Temple a Londra ed il Shri Venkateswara (Balaji) Temple a Tividale (West Midlands, Engalterra Centrala) furman ils pli gronds tempels hinduistics ordaifer l’India. Dals 267 000 gidieus britannics vivevan il 2001 var 56 % en la chapitala. 

L’onn 1965 han ins stgaffì la regiun administrativa Greater London, in’uniun da la veglia County of London cun Middlesex e parts dals contadis Essex, Hertfordshire, Kent e Surrey. Greater London è sutdividì en 32 London Boroughs e la City of London. Ils Boroughs èn responsabels per l’administraziun autonoma locala e per il manaschi da la gronda part da las instituziuns publicas sin lur territori. La City of London vegn administrada, per motivs istorics, da la City of London Corporation.

La Greater London Authority (GLA) coordinescha la collavuraziun tranter ils singuls Boroughs, è responsabla per la planisaziun strategica e maina instituziuns publicas ch’èn preschentas en l’entira citad; tar quellas tutgan la London Fire Brigade, la polizia ed il traffic public. La GLA consista dal Mayor of London (president da la citad) e da la London Assembly (parlament municipal cun 25 sezs) ch’han omadus lur sedia en la City Hall. Il Lord Mayor of London, il burgamester da la City of London, ademplescha be funcziuns ceremonialas. 

Ulteriuras autoritads administrativas han furmà la Metropolitan Board of Works (1855–1889), il London County Council (1889–1965) ed il Greater London Council (1965–1986). Quest ultim ha la primministra Margaret Thatcher schlià suenter dispitas tranter la regenza ed il parsura dal GLC da lez temp. 14 onns a la lunga n’ha Londra gì nagin’administraziun surordinada; la gronda part da las incumbensas eran vegnidas delegadas als Boroughs, intginas exequidas directamain da la regenza centrala. Questa mesira ha manà a gronds problems da coordinaziun. Er suenter ch’è vegnida installada il 2000 la GLA disponan ils Boroughs d’ina pli gronda autonomia che dal temp da la GLC.

L’autoritad da polizia dals 32 London Boroughs furma il Metropolitan Police Service. La City of London dispona d’in’atgna autoritad da polizia, la City of London Police.

La citad da Londra porscha ina vasta paletta d’occurrenzas culturalas. En il West End sa chatta ina buna dunsaina da teaters. Preschentà vegn qua tut da la classica fin la moderna. Tranter auter han er gì là lur primaudiziun divers musicals dad Andrew Lloyd Webber (‹Cats›, ‹The Phantom of the Opera›) ed – en il Theatre Royal Drury Lane – producziuns sco ‹42nd Street›, ‹Miss Saigon› e ‹My Fair Lady›. Dal reminent: En il Her Majesty’s Theatre, situà al Haymarket, vegn il musical ‹The Phantom of the Opera› preschentà dapi ils 9 d’october 1986 mintga di, e quai fin oz.

Il Royal National Theatre da la National Theatre Company a South Bank ed il Barbican Centre da la Royal Shakespeare Company tutgan tar ils blers centers dal teater professiunal. Ina tribuna professiunala cun ina lunga tradiziun furma tranter auter il Royal Court Theatre.

Il Royal Opera House a Covent Garden è la pli impurtanta opera da la Gronda Britannia. Igl è quai il dachasa da la Royal Opera e dal Royal Ballet. 

Ulteriurs teaters populars furman il London Palladium, enconuschent tranter auter pervi da Sunday Night at the London Palladium che vegniva emess pli baud live a la televisiun. Ubain il St. Martin’s Theatre en il West End, nua che vegn dà dapi il 1974 il toc ‹The Mousetrap› dad Agatha Christie; quest toc da teater era vegnì preschentà avant 21 onns (dapi il 1952) en l’Ambassador Theatre avant ch’el ha midà senza interrupziun en ses lieu odiern – ‹ The Mousetrap› furma uschia il toc da teater ch’è vegnì preschentà il pli ditg senza interrupziun en tut il mund.

Il Globe Theatre a la riva meridiunala da la Temsa furma ina reconstrucziun dal teater al liber ch’era vegnì concepì l’onn 1599 e per il qual William Shakespeare aveva scrit numerus da ses famus dramas. 

Il London Dungeon na furma nagin teater en il senn classic. En quests tschalers sutterrans, concepids sco stanzas da sgarschur, preschentan acturs als visitaders enconuschents eveniments or da l’istorgia da la citad sco la muria gronda, il grond brischament, Jack the Ripper e Sweeney Todd. 

A Londra existan en tut tschintg orchesters sinfonics professiunals, numnadamain il London Symphony Orchestra, il London Philharmonic Orchestra, il Royal Philharmonic Orchestra, il Philharmonia Orchestra ed il BBC Symphony Orchestra. Punct culminant furma mintg’onn la Last Night of the Proms or da la Royal Albert Hall che la BBC emetta en tut il mund.

Enconuschentas salas da concert èn la Wigmore Hall, la Barbican Hall, la Royal Festival Hall e la Saint John’s Church en il Westminster. Al Trafalgar Square sa chatta la baselgia St Martin-in-the-Fields che vegn medemamain savens duvrada per concerts, saja quai da chors-baselgia, d’orchester u da jazz.

En la City of Westminster sa chattan ils Abbey Road Studios. L’edifizi en la via da medem num ha EMI cumprà il 1929, ils studios èn vegnids averts il 1931. A chaschun da la ceremonia d’avertura ha Sir Edward Elgar dirigì en il studio 1 il London Symphony Orchestra e fatg la famusa registraziun istorica da ‹Land of Hope and Glory›. Sper ils Beatles (cf. lur album ‹Abbey Road› dal 1969) han per exempel Pink Floyd registrà qua durant ils onns 1970 lur albums (t.a. ‹The Dark Side of the Moon›). Dapi ils onns 1980 vegn il studio 1 er duvrà sco studio da registraziun per musica da film orchestrala. Cumenzà ha quai cun la registraziun da la musica da John Williams tar il film ‹Raiders of the Lost Ark›; ed er la musica da ‹The Lord of the Rings› e dals films da ‹Harry Potter› è vegnida registrada qua.

L’arena O2, pli baud enconuschenta sut il num Millennium Dome, furma in cumplex da divertiment cun in’enconuschenta halla da concert, tranter auter han enconuschents artists da rock e pop dà qua concert sco Britney Spears, Justin Timberlake u ils Spice Girls.

Tar ils pli gronds e pli enconuschents museums en tut il mund tutga il British Museum a Bloomsbury. Quel cumpiglia bundant sis milliuns objects d’exposiziun. Enconuschent è er il Reading Room, ina sala da lectura radunda, en la quala gia Karl Marx e Mahatma Gandhi han studegià. Il Queen Elizabeth II Great Court, erigì sin l’onn 2000 (‹millennium›) tenor plans da l’architect Norman Foster, furma la pli gronda curt interna cuverta cun tetg da l’Europa.

Il Victoria and Albert Museum a South Kensington dat suttetg d’ina collecziun da stgazis d’art da tut il mund, tranter auter sculpturas, vestgadira e costums, vaschs da porcellana e da vaider custaivels, mobiglias ed instruments da musica. En vischinanza sa chattan il museum da la scienza (Science Museum) ed il museum da l’istorgia natirala (Natural History Museum).

Il Science Museum preschenta sin tschintg auzadas objects dals champs astronomia, meteorologia, biochemia, electronica, navigaziun, aviatica e fotografia. Tar ils classichers tranter ils objects d’exposiziun tutgan telescops da Galileo Galilei ed in microscop da George Adams, l’emprima locomotiva a vapur Puffing Billy, l’emprim telefon dad Alexander Graham Bell, in Rolls-Royce da l’onn 1909, in apparat da sgular dad Otto Lilienthal e la capsla da commando da la nav spaziala Apollo 10.

Il Natural History Museum cumpiglia var 40 milliuns differents objects or da la flora e fauna, tranter quels divers skelets da dinosaurs, fossils (tranter quels in Archaeopteryx), in skelet da 30 meters d’ina balena blaua u il model da l’utschè dodo ch’è mort ora vers il 1690.

La National Gallery al Trafalgar Square posseda ina ritga collecziun da maletgs che tanscha dals emprims origins en l’Italia fin ad ovras da Cézanne e Seurat. Daspera sa chatta la National Portrait Gallery, en la quala èn exponids bundant 9000 purtrets. L’onn 1897 ha la Tate Gallery, situada a la riva tranter Chelsea e Westminster, avert sias portas. Quella cumpiglia la pli gronda collecziun da maletgs britannics dal 16avel tschientaner fin il temp modern. Visavi la St Paul’s Cathedral han ins avert l’onn 2000 la Tate Modern, ina filiala da la Tate Gallery. Art modern mussa la Saatchi Gallery ch’è situada en vischinanza dal Sloane Square; quella è vegnida averta l’onn 1985 da Charles Saatchi.

L’Imperial War Museum è in dals pli impurtants museums da guerra dal mund. Quel mussa en emprima lingia exponats or da las duas guerras mundialas, sco chanuns e vehichels. Ina da quatter etaschas s’occupa detagliadamain cun il Terz Reich. Partiziuns pli pitschnas tractan intginas ulteriuras guerras dal 20avel tschientaner sco per exempel la Guerra dal Vietnam u la Guerra dal Falkland. Ultra da quai datti exposiziuns temporaras. 

Il cabinet da figuras da tschaira Madame Tussauds è ina da las grondas attracziuns da la chapitala. Exponidas vegnan figuras da tschaira da persunas istoricas e da prominents contemporans (sportists, stars da film e.a.). Survegnir ina plazza en l’exposiziun da Madame Tussauds tutgar tar las pli grondas onurs pussaivlas insumma. Fundatura dal museum ch’ha avert sias portas l’onn 1835 è stada Marie Tussaud (1761–1850).

Directamain en la City è situà il Museum of London che sa deditgescha al svilup da la citad da ses origins fin oz. Ulteriurs enconuschents museums ed exposiziuns èn ils Cabinet War Rooms (inclus il museum da Churchill), il London Transport Museum, Somerset House ed il Sherlock Holmes Museum en la 221B Baker Street. 

Il Trafalgar Square è ina gronda plazza en il center da la citad che vala per blers sco center per propi da quella. Igl è quai la pli gronda plazza da Londra e dapi il temp medieval in lieu d’inscunter central. Amez la plazza sa chatta in monument che London ha tschentà sco engraziament per la victoria d’admiral Nelson cunter ils Franzos en la Battaglia da Trafalgar (1805). La pitga da Nelson (Nelson Column) dal 1842 cun la statua da l’admiral sisum ha in’autezza da 55 meters, quai che correspunda a l’autezza da la nav admirala da Nelson, la HMS Victory, da la carena fin il piz da l’arber. 

Radund dus terzs dal tschancun tranter Trafalgar Square e Parliament Square sa numnan Whitehall, il terz restant Parliament Street. Il Cenotaf, il pli impurtant monument da guerra da la Gronda Britannia, sa chatta entamez la via e furma il lieu da las festas commemorativas annualas a chaschun dal Remembrance Day. La part centrala da la via vegn flancada d’edifizis militars, tranter quels il ministeri da defensiun britannic (Ministry of Defence) ed ils anteriurs quartiers generals da la British Army (oz Horse Guards) e da la marina (Royal Navy u Admiralty).

La Downing Street è la famusa via en il center da la citad, nua che sa chattan dapi bundant 200 onns la sedia uffiziala ed il lieu da domicil da dus dals trais pli impurtants commembers da la regenza britannica, numnadamain dal primminister dal Reginavel Unì e dal chancelier dal tresor. Il pli famus numer da chasa a la Downing Street è la nr. 10. Qua sa chatta la sedia ed il domicil uffizial dal primminister. La Downing Street furma ina via laterala da la Whitehall, be paucs pass davent da l’edifizi dal parlament, e maina en direcziun dal Buckingham Palace.

La via Piccadilly tutga medemamain tar las pli enconuschentas vias dal center da la citad. Quella s’extenda dal Piccadilly Circus en il nordost fin al Hyde Park Corner en il sidvest. Attracziuns furman qua surtut il negozi spezialisà sin mangiativas Fortnum  Mason da l’onn 1707, il hotel Ritz cun si’architectura neoclassicistica dal 1906 e la Royal Academy of Arts da l’onn 1868 en il Burlington House. Il Piccadilly Circus è surtut famus pervi da sia funtauna d’Eros e la gronda paraid da reclama luminusa vi d’ina chasa da chantun. La plazza è vegnida erigida il 1819 per cumbinar la Regent Street cun la via da negozis Piccadilly. Pervi da sia posiziun centrala amez il West End, sia vischinanza tar impurtantas purschidas da cumpra e da divertiment sco er tar las pli impurtantas vias da traffic che sa cruschan qua, furma quella in lieu d’inscunter fitg frequentà.

La Tower Bridge è ina punt da traffic sur la Temsa. Ella collià la City of London en il nord cun la part da la citad Southwark en il sid. I sa tracta d’ina punt plegabla erigida en il stil neogotic e da la punt da la Temsa la pli orientala. A la riva settentriunala sa chattan il Tower of London (dal qual deriva il num da la punt) ed ils St Katharine Docks, a la riva meridiunala è situada la City Hall.

La Tower Bridge ha ina lunghezza da 244 meters, l’autezza da las duas turs da la punt munta a 65 meters. Las duas mesadads da la via pon vegnir auzadas fin in angul da 83 grads per pussibilitar a navs pli grondas il passadi. La punt è vegnida terminada l’onn 1894. 

A la riva settentriunala da la Temsa sa chatta il Tower da Londra, in cumplex ch’è vegnì erigì en il temp medieval che sa cumpona da plirs edifizis fortifitgads per lung dal flum, il qual serviva sco fortezza, chombra d’armas, palaz roial e praschun, surtut per praschuniers da la classa superiura. Ultra da quai sa chattavan là la munaidaria, l’archiv statal, l’arsenal d’armas e l’observatori. 

Fin James I han tut ils retgs e reginas englais vivì intgin temp en il Tower. Igl era usità ch’il monarc durmiva qua la notg avant sia curunaziun e ch’el chavaltgava alura en in til festiv tras la citad fin a Westminster. Oz vegnan conservadas en il Tower ils juvels da la curuna, ultra da quai ina ritga collecziun d’armas. Dapi il 1988 tutga il cumplex tar il Patrimoni cultural mundial da l’UNESCO.

La pli enconuschenta tur a Londra furma cun 98 meters l’Elizabeth Tower, en il qual sa chatta il Big Ben, cun 13 tonnas il pli grev dals tschintg zains che sunan l’enconuschenta battida da Westminister. Savens vegn er la tur sezza numnada a moda simplifitganta ‹Big Ben›. Il clutger fa part dal Palace of Westminster, in edifizi monumental erigì en il stil neogotic, en il qual sa raduna il parlament britannic che sa cumpona dal House of Commons e dal House of Lords. Il palaz sa chatta en la City of Westminster al Parliament Square, en proxima vischinanza da la Whitehall. Dapi il 1987 appartegna quel al Patrimoni cultural mundial da l’UNESCO.

La pli veglia part dal palaz furma la Westminster Hall da l’onn 1097. Oriundamain serviva quella sco residenza dals retgs englais, ma dapi il 1529 n’ha nagin monarc pli vivì qua. Da l’edifizi oriund è be sa mantegnì pauc, damai che quel è vegnì destruì quasi dal tuttafatg tar in grond incendi l’onn 1834. L’architect responsabel per la reconstrucziun è stà Charles Barry. 

Ils pli impurtants edifizis dal palaz furman las salas da cussegl dal House of Commons e dal House of Lords. Daspera datti radund 1100 ulteriuras stanzas, tranter quellas stanzas da sesida, bibliotecas, lobbys, salas da mangiar, bars e hallas da sport. 

Il St James’s Palace sa chatta en la City of Westminster. L’edifizi ha furmà fin l’onn 1837 la residenza uffiziala dal monarc britannic a Londra. Ozendi vegnan accreditads qua ils ambassadurs britannics. Er la proclamaziun d’in nov monarc ha lieu qua. L’edifizi è vegnì erigì tranter il 1532 ed il 1540 per incumbensa da Henry VIII.

Oz vivan qua il Prince of Wales ed auters parents da la regina. L’anteriura sedia da la mamma da la regina, Clarence House, sa chatta entaifer ils mirs dal palaz. Il palaz vegn be spartì tras il St. James’s Park dal Buckingham Palace. In interessant spectacul furma la midada da la guardia al palaz. Ils mais avrigl fin fanadur ha quella lieu mintga di, uschiglio mintga dus dis. 

Il Buckingham Palace en la part da la citad City of Westminster furma la residenza uffiziala dal monarc britannic a Londra. Sper sia funcziun sco abitaziun da la regina Elizabeth II serva quel er sco lieu d’occurrenza per occurrenzas uffizialas dal stadi. Uschia vegnan per exempel retschavids qua ils schefs da stadi da l’exteriur tar lur visita en Gronda Britannia. Daspera furma il chastè in impurtant magnet per turists.

L’equipament interiur oriund era segnà da pictura ch’imitava marmel (‹scagliola›) en colurs traglischantas sc er da lapislazuli da colur blaua e rosa. Sut retg Eduard VII è il palaz vegnì concepì da nov en il stil da la Belle Époque, sa basond sin in concept da colurs che cumbinescha tuns crema cun aur. Bleras da las stanzas d’accoglientscha pli pitschnas èn tegnidas en il stil architectonic regency chinais. Quellas èn vegnidas equipadas cun mobiglias e decoraziuns ch’ins ha manà natiers suenter la mort da Georg IV or dal Royal Pavilion a Brighton sco er or dal Carlton House.

Hampton Court Palace è in chastè situà en la part da la citad Richmond upon Thames, gist sper il Bushy Park. L’edifizi ed il parc èn vegnids midads ed extendids cuntinuadamain sut ils differents abitants, uschia ch’èn mantegnids oz elements architectonics dal stil dals Tudors e dal baroc englais. Il chastè ha furmà il lieu da domicil da numerus retgs e reginas da la Gronda Britannia. 

Dapi il temp da regenza da Georg III han ils monarcs britannics abità en auters chastels a Londra e regina Victoria ha avert il 1838 il palaz per la publicitad. Singulas parts dal palaz èn vegnidas affittadas a veterans meritaivels. Il 1986 è rut ora en ina da questas abitaziuns in fieu ch’ha destruì parzialmain il palaz. Las lavurs da reconstrucziun han durà fin il 1995. 

Il Kensington Palace sa chatta en la part da la citad Kensington and Chelsea. Il chastè furmava pli baud ina residenza da champagna privata ed è vegnì extendì l’onn 1689 sut Mary II e William III (architect: Sir Christopher Wren), per betg stuair supportar d’enviern l’umiditad da la Whitehall. Ils proxims 70 onns è il palaz daventà adina pli impurtant per l’auta societad e la vita politica dal pajais. 

Dal temp da vita da George I e George II è il cumplex vegnì renovà a moda luxuriusa e munì cun ina collecziun da maletgs e da mobiglias pumpusa. Enconuschentas èn surtut las ritgas decoraziuns da palantschieu sura da William Kent. Suenter che George II è mort nunspetgadamain l’onn 1760, ha l’edifizi pers adina dapli muntada. Fin oz n’ha mai pli vivì in monarc regent lien. En parts dal palaz vivan percunter commembers da la famiglia roiala. 

Dapi l’onn 2000 enconuscha Londra in veritabel boom da sgrattatschiels, quai che sa mussa tranter auter en il The Shard cun 310 meters, en il Pinnacle cun 288 meters ed en radund trenta ulteriurs sgrattatschiels d’in’autezza da bundant 150 meters. The Shard ha furmà l’onn 2012 per in temp il pli aut edifizi da l’Europa. 

En l’ost dal center da la citad sa chattan dad omaduas varts da la Temsa ils Docklands, tar ils quals tutga er il quartier Canary Wharf cun il sgrattatschiel One Canada Square. Cun in’autezza da 236 meters e 50 auzadas furma quel suenter The Shard il segund aut edifizi abità en la Gronda Britannia. (La tur da televisiun Emley Moor, il pli aut edifizi liber da l’entir pajais sa chatta sper Huddersfield e mesira 330 meters). L’edifizi vegn flancà da dus ulteriurs sgrattatschiels ch’èn vegnids erigids diesch onns pli tard e ch’han omadus in’autezza da 200 meters: HSBC Tower (8 Canada Square) e Citigroup Centre (25 Canada Square). Ulteriurs sgrattatschiels sa chattan en il center da Londra, tranter quels Tower 42 e 30 St Mary Axe.

A la riva meridiunala da la Temsa, datiers da la Westminster Bridge, è situada la roda panoramica London Eye. Quella è vegnida averta l’onn 2000, ha in’autezza da bundant 135 meters ed è stada fin il 2006 la pli auta roda panoramica dal mund. 

Il London Eye dispona da 32 capslas fatgas quasi dal tuttafatg da vaider, en las qualas han plaz mintgamai fin 25 persunas. La roda sa mova cun ina sveltezza da 0,26 m/s e dovra per in gir 30 minutas. È la visibilitad optimala, pon ins vesair davent da la roda fin en ina distanza da 40 kilometers, tranter auter fin al chastè Windsor situà in pau ordaifer la citad. 

Tar la Battersea Power Station sa tracti d’in’anteriura ovra d’energia da charvun en la part da la citad Wandsworth, la quala è stada en funcziun ils onns 1933 fin 1983. L’edifizi marcant cun quatter chamins sa chatta a la riva meridiunala en vischinanza da la Grosvenor Bridge. 

La Battersea Power Station è perpetnisada sin ils albums da musica da diversas bands da rock e pop britannicas. Il pli enconuschent furma il cover da l’album ‹Animals› da Pink Floyd (1977) che mussa l’implant electric cun in grond portg da plastic che sgola tranter ils chamins. Ulteriurs exempels èn l’album ‹Quadrophenia› da The Who (1973), ‹Adventures Beyond The Ultraworld› da The Orb u ‹Power Ballads› da London Electricity. 

La Thames Barrier sin la Temsa è il pli grond rempar cunter inundaziuns movibel dal mund. La planisaziun ha cumenzà suenter la mar burascusa dal 1953 ch’aveva chaschunà la mort da 307 persunas. La construcziun sco tala è vegnida realisada a partir dal 1974 ed inaugurada il 1984 tras regina Elizabeth II. 

L’ovra da bloccada consista da diesch portas moviblas. Per betg impedir la navigaziun èn las portas sfundradas sin il fund da la Temsa cur ch’ellas na vegnan betg duvradas. Navs cun ina sfunsada da fin a 16 meters pon alura passar senza problems l’ovra da bloccada. Smanatscha ina mar burascusa, sa laschan las portas serrar entaifer 15 minutas. Las quatter portas centralas, tras las qualas sa splega la navigaziun, han mintgina ina ladezza da 60 meters, in’autezza da 10,5 meters e paisan mintgina 1500 tonnas. L’entira construcziun ha ina lunghezza da 523 meters. 

La Millennium Bridge cun si’architectura futuristica porscha dapi l’onn 2000 ina colliaziun directa tranter la St Paul’s Cathedral e la Tate Gallery of Modern Art. 

La St Margaret’s Church è ina baselgia anglicana che sa chatta al Parliament Square gist sper la Westminster Abbey e visavi il Palace of Westminster. I sa tracta da la baselgia parochiala dal parlament britannic. 

Remartgablas èn surtut las fanestras orientalas cun pictura sin vaider flama da l’onn 1509, fatga en regurdientscha dal spusalizi dad Arthur Tudor, il frar vegl da Henry VIII, cun Catarina d’Aragon. Autras picturas sin vaider regordan a William Caxton, l’emprim stampadur englais, Sir Walter Raleigh ch’è vegnì sepulì qua il 1618, ed al poet John Milton, in commember da la cuminanza parochiala. Tar las persunas ch’èn vegnidas sepulidas qua tutga er il gravader d’arom boemais Wenzel Hollar. Numerusas persunalitads èn vegnidas ensinadas en questa baselgia, tranter quellas Samuel Pepys e sia dunna sco er Winston Churchill e Clementine Hozier. Dapi il 1987 tutga la baselgia tar il Patrimoni cultural mundial da l’UNESCO.

Medemamain dapi il 1987 tar il Patrimoni cultural mundial tutga la Westminster Abbey. Qua vegnan curunads e sepulids tradiziunalmain ils retgs da l’Engalterra. Questa baselgia da chapitel tutga tar la baselgia da l’Engalterra, n’appartegna però pervi da sia funcziun speziala a nagina diocesa, mabain furma in’atgna baselgia (royal peculia) da la monarchia britannica. 

L’entrada principala sa chatta da vart occidentala. Il portal vegn enramà da represchentaziuns da las quatter virtits cristianas vardad, giustia, misericordia e pasch sco er da martirs dal 20avel tschientaner. En la nav centrala sa chatta la fossa dal schuldà nunenconuschent. En terra dals champs da battaglia beltgs ruaussa là in schuldà nunenconuschent da l’Emprima Guerra mundiala «entamez ils retgs, perquai ch’el ha servì a ses Dieu ed a sia patria», sco che sa cloma l’inscripziun sin marmel nair. Dals crudads dad omaduas guerras mundialas vegn er regurdà en la chaplutta da St. Georg.

En la nav traversala sanestra (settentriunala) èn sepulids divers enconuschents politichers britannics sco William Pitt, Palmerston, Benjamin Disraeli e William Gladstone. Nà da la vart settentriunala da la nav traversala arriv’ins davos l’altar grond en la Chapella dad Eduard il Confessur. Entamez sa chatta la fossa dal retg ch’è mort l’onn 1066.

Davosvart è situada la sutga da curunaziun, en la quala sa chattava fin il 1996 il crap da Scone. Sin quest crap èn vegnids curunads tschientaners a la lunga ils retgs da la Scozia, fin che Edward I ha prendì davent quel l’onn 1297. Da Nadal 1950 è il crap vegnì engulà e pir puspè vegnì a la glisch suenter lungas retschertgas. L’onn 1996 è il crap vegnì returnà uffizialmain a la Scozia e sa chatta dapi lura en il chastè dad Edinburgh. Il crap vala sco simbol per l’unitad dals reginavels da l’Engalterra e da la Scozia. 

En questa chapella sa chattan ultra da quai las fossas da Henry III, Edward I, Edward III, Richard II e Henry V. 

La Westminster Cathedral furma la baselgia catolica principala da la Valisa e da l’Engalterra. Ella è medemamain situada en la City of Westminster. Cumenzà a collectar per l’erecziun da la baselgia aveva l’archuvestg Nicholas Wiseman (1802–1865) – l’emprim cardinal ed archuvestg catolic-roman en l’Engalterra dapi la refurmaziun. La finala han las lavurs da construcziun pir pudì cumenzar l’onn 1895; l’avertura da la catedrala ha gì lieu l’onn 1903.

Architectonicamain èn ins sa decidì per il stil bizantin. Da dadora dat l’edifizi en egl tras sia fatschada da quadrels custaivla, l’auta cupla e betg il davos pervi dal clutger liber, quai ch’è dal tuttafatg atipic per quests grads da latituda. A l’intern fa la baselgia surstar tras l’effect spazial surprendent e surtut tras ils mosaics vi dals palantschieus sura e las paraids, ils quals vegnan cumplettads cuntinuadamain. En la Holy Souls Chapel en la nav laterala èn vegnidas elavuradas dapli che 100 differentas sorts da marmel. 

En la City of London, radund 300 meters en il nord da la Temsa, sa chatta la St Paul’s Cathedral, la baselgia principala da la baselgia anglicana a Londra. La baselgia è vegnida concepida da Christopher Wren (1632–1723). Las lavurs d’entagl da las sutgas da chor derivan da Grinling Gibbons, il trapart da fier battì ha fatg Jean Tijou. Pir l’onn 1890 ha William Richmond terminà ils mosaics da vaider vi dal palantschieu sura sur il cor. L’altar grond, construì tenor plans da Wren, furma l’ovra da Dykes Bower e Godfrey Allan ch’al han terminà l’onn 1958.

La catedrala ha in fund en furma da crusch orientà en direcziun ost-vest. En il center da questa crusch è situada ina cupla, sin la quala sa chatta ina laterna d’in pais da 750 tonnas che finescha en in’autezza da 111 meters. Per pudair purtar quest immens pais, sa chatta tranter la cupla exteriura e la cupla interiura ina construcziun da crappa conica che ruaussa sin quatter pilasters voluminus. 

A la basa da la cupla, en in’autezza da ca. 30 meters, sa chatta en la baselgia in corridor circular cun in diameter da 34 meters, l’uschenumnada Whispering Gallery, la galaria da scutinar. Tras las paraids inclinadas vegn il tun adina puspè reflectà qua en l’intern dal rintg, uschia ch’in pled scutina po vegnir purtà da l’autra vart da la cupla. Quella ha in’autezza da 365 pes, in pe per mintga di da l’onn.

Muntan ins fin al spitg, cuntanschan ins la Golden Gallery che porscha ina vista panoramica sur la citad da Londra. Sut la baselgia sa chatta ina vasta cripta, en la quala èn sepulidas numerusas impurtantas persunalitads da l’istorgia britannica. 

Il Neasden Temple (Shri Swaminarayan Mandir) en la part da la citad Brent furma suenter il tempel a Tividale (West Midlands) il pli grond tempel hinduistic ordaifer l’India. Quel è vegnì erigì ils onns 1990 d’ina secta hinduistica, la Swaminarayan-Mission dad Ahmedabad (India). Las cuplas e pitschnas turs consistan da marmel da Carrara (Italia) e da crap da chaltschina da la Bulgaria; a l’intern èn ils altars munids cun ornaments da flurs e statuas da dieus hinduistics (Murtis). Mintgin dals 26 300 craps ch’èn vegnids elavurads porta in auter motiv.

L’edifizi è vegnì mess ensemen entaifer trais onns ed avert il 1995. En la construcziun han ins desistì da travs da fier, damai che fier irradiescha tenor chapientscha hinduistica undas magneticas che disturban il ruaus da meditaziun. En il tempel sa chatta er l’exposiziun permanenta Understanding Hinduism (‹chapir il hinduissem›) ed in center da cultura.

La Moschea d’Aziziye sa chatta en la part da la citad Stoke Newington. Quella vegn surtut utilisada da la cuminanza tirca. 

Londra dispona d’in grond dumber da parcs luxurius. Ils Royal Parks eran oriundamain reservads als monarcs englais resp. britannics. A l’entschatta dal 19avel tschientaner han ins alura transfurmà quels en parcs publics. Bundant 200 zonas verdas sa derasan sin ina surfatscha da radund 220 kilometers quadrat.

Greenwich Park è in da quests parcs roials a Londra. El sa chatta en la part da la citad Greenwich situada en il sidost. L’onn 1997 èn il Greenwich Park ed ils edifizis che tutgan tar quel vegnids integrads en il Patrimoni cultural mundial da l’UNESCO. A l’ur settentriunal da l’areal d’ina surfatscha da 73 hectaras sa chattan il National Maritime Museum ed il Queen’s House, in anteriur palaz roial. Sin ina collina amez il parc sa chatta il Royal Greenwich Observatory. La pitschna plazza davant l’observatori ornescha ina statua da general James Wolfe.

Il Hyde Park cun il Marble Arch ed il Speakers’ Corner, che cunfinescha cun ils Kensington Gardens, è vegnì designà sur lung temp sco ‹pulmun da Londra›. Flancà d’edifizis elegants ch’èn vegnids concepids per il prinzi regent è il Regent’s Park che sa chatta en il nord dal West End. En quest parc sa chatta er il curtin zoologic (London Zoo). Amez il center da la citad sa chattan il Green Park ed il St. James’s Park. 

Ils Royal Botanic Gardens (Kew Gardens) furman in parc extendì cun impurtants ierts sut vaider. Quels èn situads tranter Richmond upon Thames e Kew en il sidvest da Londra e tutgan tar ils pli vegls curtins botanics en tut il mund. Ins po vesair là plantas ch’i na dat uschiglio nagliur en l’Europa u schizunt en l’entira emisfera dal nord. Sper las serras victorianas enconuschentas en tut il mund hai a Kew Gardens er vasts parcs cun fitg vegls rododendrons. Il 2003 èn ils Royal Botanic Gardens vegnids recepids en la glista dal Patrimoni cultural mundial da l’UNESCO.

Cun ina surfatscha da diesch kilometers quadrats è Richmond Park il pli grond parc roial. Quel sa chatta en las parts da la citad Richmond upon Thames e Kingston upon Thames en il sidvest da Londra. Oriundamain furmava Richmond Park il territori da chatscha da tschiervs da retg Edward I, oz furma el en l’entira Europa il pli grond parc sin territori d’ina citad ch’è circumdà cun in mir. L’attracziun principala furma ina scossa cun 650 vapitis e dams che pon sa mover libramain sco er l’Isabella Plantation, in territori cun diversas spezias da plantas raras.

L’onn 2001 è vegnì terminà il Thames Barrier Park; quel sa chatta tar ils rempars da la Temsa (Thames Barrier) al lieu da vegls docs. En las parts perifericas da la citad existan anc intginas ulteriuras zonas verdas extendidas, sco per exempel Bushy Park e Hampstead Heath.

A Londra existan bunamain 20 clubs da ballape professiunals. La gronda part da quels èn numnads suenter la part da la citad, en la quala els giogan lur partidas a chasa. Ils pli enconuschents èn – sper il FC Arsenal ch’è daventà las pli bleras giadas campiun naziunal insumma – il FC Chelsea, Crystal Palace, Fulham, Tottenham Hotspur e West Ham United.

A Wembley, en la part da la citad Brent, sa chatta il Stadion da Wembley legendar. Là ha mintgamai lieu il final da la cuppa naziunala da ballape. Medemamain èn vegnids giugads là il final dal campiunadi mundial da ballape dal 1966 e dal campiunadi europeic dal 1996. Sper numerusas ulteriuras occurrenzas da sport han er lieu qua concerts ed occurrenzas spezialas (p.ex. commemoraziuns). L’onn 2007 è vegnì inaugurà il nov stadion da Wembley.

Sports fitg populars a Londra, mintgamai cun squadras che tutgan tar las meglras dal mund, èn rugby e cricket. In’attracziun tradiziunala furma mintg’onn la cursa da remblar (Boat Race) tranter las duas pli renumadas universitads englaisas, Oxford e Cambridge, ch’ha lieu il il mars u avrigl sin la Temsa.

A Wimbledon, en il nord da la citad, ha lieu mintg’onn il zercladur il pli impurtant dals turniers da tennis da Grand Slam. Mintgamai l’avrigl ha lieu il Maraton da Londra, in dals maratons ils pli populars en tut il mund.

Cun la surdada dals gieus olimpics da stad dal 2012 è Londra stà l’emprima citad insumma, nua ch’ils gieus olimpics han gì lieu – suenter il 1908 ed il 1948 – per la terza giada. 

Il prim da schaner ha lieu la parada da Bumaun che maina en direcziun dal Berkeley Square. La festa da Bumaun chinaisa ha mintgamai lieu tranter ils 21 da schaner ed ils 21 da favrer a Chinatown en la part da la citad Soho. 

Cun deponer in tschupè davant il Banqueting House ed ina processiun davent dal St James’s Palace vegn regurdà la fin da schaner a l’execuziun da retg Charles I ils 30 da schaner 1649 (Commemoration of King Charles I.). 

La midada da la guardia (Changing of the Guard) da la Queen’s Guard al Buckingham Palace tutga tar las pli veglias e pli enconuschentas ceremonias ed ha lieu quasi mintga di durant l’onn. La midada vegn accumpagnada da chapellas da militar che sunan marschs tradiziunals, tocs da famusas shows dal West End ed enconuschentas chanzuns da pop.

Tar la ceremonia da las clavs (Ceremony of the Keys) che duai esser 700 onns veglia vegnan las portas principalas dal Tower of London serradas mintga saira dal guardian principal dal Tower (Chief Yeoman Warder) che vegn escortà da gardists. 

Cun salvas vegn commemorà il di da l’ascensiun al tron (6 da favrer), l’anniversari da la regina (21 d’avrigl), il di da la curunaziun (2 da zercladur) e l’anniversari dal Duke of Edinburgh (10 da zercladur). Crodan ils termins sin ina dumengia, resunan las salvas l’auter di. A las 12 uras resunan 41 culps en il Hyde Park (entras la King’s Troop da la Royal Horse Artillery), a las 13 uras 62 culps sper il Tower of London (entras la Honourable Artillery Company). Salvas resunan er tar la parada da bandieras ed a chaschun da l’avertura dal parlament.

La Shakespeare’s Birthday Celebrations han mintgamai lieu a partir da la sonda enturn l’anniversari da Shakespeare ils 23 d’avrigl en il Shakespeare’s Globe Theatre. In festival da musica classic furma il Hampton Court Palace Music Festival ch’ha lieu durant l’emprima mesadad dal zercladur. Il City of London Festival vegn celebrà cun musica, teater e saut da la fin zercladur fin mez fanadur en differents lieus. Concerts da promenada (The BBC Proms) han lieu dal fanadur fin il settember en la Royal Albert Hall.

Il Notting Hill Carnival, il pli grond carnaval sin via da l’Europa cun flair caribic, sa splega la fin d’avust. Il settember han lieu a chaschun dal Thames Festival occurrenzas d’art e da sport sin il flum tranter las duas punts Waterloo e Blackfriars. Mintg’onn l’emprima dumengia d’october vegn tegnida en la baselgia St Martin-in-the-Fields la festa d’engraziament per la racolta dals martgadants da fiera da Londra (Pearly Harvest Festival Service).

La Trafalgar Day Parade sin il Trafalgar Square regorda mintg’onn ils 21 d’october a la victoria da l’admiral Horatio Nelson en la Battaglia navala da Trafalgar (1805). La Bonfire Night è in fieu artifizial che regorda a la scuvrida da la conspiraziun da pulvra da sajettar (Gunpowder Plot) cunter il parlament englais e l’arrestaziun dal chau da quella Guy Fawkes ils 5 da november 1605. Quella ha mintgamai lieu la sonda enturn ils 5 da november en quasi tut las parts da Londra.

En la chapitala britannica datti dapli che 30 000 fatschentas. In’atgnadad da la citad è che tschertas branschas sa concentreschan en tscherts quartiers. Uschia chatt’ins en la King’s Road numerusas fatschentas da moda, en la Old e New Bond Street bleras butias da designer e galarias. Saville Row e Jermyn Street èn enconuschentas per cusunzs da vestgadira sin mesira, Oxford e Regent Street per lur fatschentas da vestgadira e gronds negozis sco per exempel Hamleys u Selfridges. HMV è la suletta fitg gronda fatschenta da CDs e plattas ch’è sa mantegnida a la Oxford Street. 

En la Tottenham Court Road sa concentreschan surtut fatschentas d’electronica e da computer. La Charing Cross Road è enconuschenta per sias librarias. Waterstones, ina da las pli grondas librarias dal mund, sa chatta al Piccadilly Circus. Numerusas fatschentas da vestgadira e da chalzers sa chattan en la Neal Street. Covent Garden è il dachasa da bleras butias spezialas, cafés e stans cun objects d’art.

Grondas passaschas da cumpra èn il Leadenhall Market, la Burlington Arcade e la Piccadilly Arcade. Harrods, a la Brompton Road, è in dals pli enconuschents negozis gronds da la citad. Famusa è surtut la partiziun da victualias situada en il plaunterren cun sias uschenumnadas Food Halls en stil floreal. In’attracziun furma er l’illuminaziun da la fatschada che consista da radund 100 000 pairs electrics. Tar ils pli gronds centers da cumpra da l’entir’Europa tutgan Westfield en la part da la citad Shepherd’s Bush (ch’ha avert sias portas il 2008) e Westfield Stratford sper il parc olimpic (2011).

Cun visitar ils martgads da Londra pon ins emprender a conuscher la cultura locala. Menziun speziala meritan il martgà da la fin d’emna en la Chalk Farm Road (Camden Lock) ed il martgà da pileschs e d’antiquitads en la Portobello Road. Ils martgads da la dumengia en la Petticoat Lane e Brick Lane (East End) porschan quasi tut davent da fritgs e legums fin ad antiquitads e cliniez. In martgà da flurs è da chattar a la Columbia Road, martgads per antiquitads ed artisanadi sa chattan a Spitalfields ed en la Camden Passage (Islington). Il Brixton Market a la Electric Avenue porscha ina grond’elecziun da mangiativas or da la Caribica. 

Tenor in studi da l’onn 2014 realisescha la regiun gronda da Londra in product interiur brut da 836 milliardas dollars. En la rangaziun da las regiuns metropolas cun la pli gronda prestaziun en tut il mund sa chatta ella sin il 5avel plaz davos Tokio, New York City, Los Angeles e Seoul.

A Londra han ils secturs industrials producents pers dapi blers onns cuntinuadamain muntada. Actualmain èn be pli var 10 % emploiads en quest sectur. Pudì mantegnair lur muntada da pli baud han oravant tut l’industria da stampa e las chasas edituras; quellas cumpiglian in quart dals plazs da lavur numnads ed han ina cumpart d’in terz a l’entira producziun a Londra. 

L’industria da hightec, ch’è spezialisada sin products electronics e farmaceutics, lavura cun success e generescha grondas svieutas. Blers dals manaschis industrials, che sa chattan per gronda part en ils districts da la citad perifers, tendeschan da sa retrair dal tuttafatg da Londra. En il sectur da l’industria leva èn represchentadas ovras da vestgadira e bierarias. 

Sur il port da Londra sa splegan ozendi be pli 10  % dal commerzi intern e cun l’exteriur da la Gronda Britannia. Dapi il 1971 è la rata da creschientscha economica da la citad cun 1,4 % pli bassa che quella da l’entir pajais cun 1,9 %. Tuttina è la bilantscha commerziala da Londra positiva, quai ch’è surtut d’attribuir al sectur terziar e qua oravant tut als servetschs da finanzas ed al turissem. Mintg’onn visitan radund 16 milliuns turists la citad. 

L’onn 2004 ha la chapitala contribuì ina cumpart da 19 % al product interiur brut. La cumpart da l’entira regiun metropolitana al product naziunal brut britannic ha muntà il 1999 var 30 %. Dapli che la mesadad dals 100 pli gronds concerns dal pajais e bundant 100 da las 500 pli grondas interpresas en l’Europa han lur sedia principala a Londra. La citad furma ultra da quai vinavant il pli grond dals trais plazs da finanzas globals. Intginas da las pli impurtantas bancas dal pajais, sco per exempel la Bank of England, Barclays, la Barings Bank e HSBC han lur sedia en la chapitala. Pliras tschient bancas internaziunalas disponan da filialas a Londra. Medemamain sa chatta la bursa internaziunala dal Reginavel Unì e da la Republica da l’Irlanda en la City of London. Ulteriuras impurtantas bursas èn la London Stock Exchange e diversas bursas internaziunalas da materias primas (p.ex. metals prezius, petroli). In ulteriur sectur da servetschs fitg impurtant, al qual la citad ha d’engraziar ina buna part da sia bainstanza dals ultims bundant 300 onns, furman las assicuranzas. Lloyd’s of London è qua la pli impurtanta instituziun, betg sco societad d’assicuranzas per propi, mabain sco bursa per contracts d’assicuranza. 

A Londra sa chatta la sedia principala d’impurtants emetturs da radio e televisiun (t.a. BBC, ITV, Channel 4, Five e Sky).

La BBC è vegnida fundada l’onn 1922 a Londra sco emettur da radio independent. Gia il 1926 è ella vegnida transfurmada en ina corporaziun da dretg public. Ozendi è la BBC il pli grond emettur da dretg public en tut il mund. 

Tut las impurtantas gasettas dal di e gasettas emnilas dal pajais han lur sedia a Londra. La Fleet Street ha furmà dapi il 18avel tschientaner tradiziunalmain la patria da la pressa britannica. 

Las gasettas da boulevard ‹The Sun›, ‹Daily Express›, ‹Daily Mail› (conservativ) e ‹Daily Mirror› (d’orientaziun socialdemocratica) furman per gronda part las pli grondas gasettas da la citad, per part cun ediziuns da milliuns. 

Il ‹Daily Telegraph› è ina gasetta dal di conservativa ch’è vegnida fundada l’onn 1855. Anc pli veglia è la gasetta conservativa ‹The Times› ch’è vegnida fundada l’onn 1785 sut il num ‹The Daily Universal Register›. D’orientaziun liberala-sanestra è ‹The Guardian› che cumpara dapi il 1821. E la quarta dals uschenumnads Quality Papers (las gasettas seriusas che sa distinguan dals tabloids, ils fegls da boulevard) furma ‹The Independent›, ina gasetta medemamain d’orientaziun plitost sanestra ch’è vegnida fundada l’onn 1986. La ‹Financial Times› furma ultra da quai ina da las pli impurtantas gasettas d’economia en tut il mund.

Cun Reuters ha ina da las pli grondas agenturas da novitads sia sedia en la chapitala. L’interpresa è vegnida fundada da Paul Julius Reuter l’emprim l’onn 1850 ad Aachen, nua ch’el transmetteva cun agid da columbas da posta datas d’aczias tranter Aachen e Brüssel. Suenter ch’è vegnida installada ina colliaziun da telegrafia tranter las duas citads, è el emigrà a Londra, danunder ch’el transmetteva sur il cabel sutmarin tranter Dover e Calais curs da la bursa a Paris. Er oz realisescha l’interpresa 90 % da sia svieuta cun infurmaziuns da bursa e d’economia. 

Londra furma il center dal traffic sin via, traffic da viafier e traffic aviatic dal Reginavel Unì. Ils fatgs da traffic vegnan delegads dal Mayor of London a la societad da traffic Transport for London (TfL). Quella è responsabla per metro, bus, tram e viafier urbana, betg però per la viafier suburbana e per il traffic aviatic. Ultra da quai reglamentescha la TfL ils fatgs da taxi e mantegna las pli impurtantas vias principalas. 

L’element central dal traffic public citadin furma la London Underground, la pli veglia metro dal mund, da la quala l’emprim tschancun è vegnì avert l’onn 1863. Mintg’onn vegn la metro duvrada da dapli ch’ina milliarda passagiers. Quella collia il center da la citad e la gronda part dals territoris situads en il nord da la Temsa. En il sid da la Temsa exista enstagl ina spessa rait da viafiers suburbanas. 

Cun paucas excepziuns na mainan las viafiers suburbanas ed ils trens rapids interurbans betg tras il territori da la citad, mabain curseschan davent d’ina da las 14 staziuns dal tren principalas ch’èn gruppadas enturn il center da la citad. Ils trens Eurostar collian Londra tras il Channel Tunnel cun Paris e Brüssel.

La rait dals bus da Londra cumpiglia tut las parts da la citad. Mintga di vegnan transportadas sin bundant 700 lingias radund sis milliuns passagiers. Ils bus a duas auzads cotschens èn daventads in simbol internaziunal da la citad, gist tuttina sco ils taxis nairs.

Entant che la gronda part dals viadis en il center da la citad vegnan fatgs cun meds publics, dominescha en las parts exteriuras da la citad l’auto. Qua exista ina rait da vias circularas, las autostradas tanschan percunter be excepziunalmain fin en ils quartiers da la citad. Per reducir il traffic privat en il center da la citad han ins introducì l’onn 2005 ina taxa quotidiana (London Congestion Charge). 

Heathrow è la plazza aviatica la pli frequentada da l’entira Europa. Ensemen cun ils tschintg ulteriurs eroports, Gatwick, Luton, Stansted, City Airport e London Southend Airport, furma la metropola in impurtant center dal traffic aviatic internaziunal. L’onn 2006 han tut las plazzas aviaticas ensemen dumbrà 137 milliuns passagiers. Heathrow e City Airport sa chattan entaifer Greater London, ils ulteriurs en l’aglomeraziun. Divers trens e bus collian ils eroports cun il center da la citad. Heathrow dispona ultra da quai sco suletta plazza aviatica da Londra d’in access direct a la metro.

Las universitads e scolas autas a Londra pon guardar enavos sin ina lung’istorgia. Londra furma er la citad cun ils pli blers students. Las universitads da Londra sa laschan parter en duas gruppas: l’University of London furma cun bundant 100 000 students ina da las pli gronda universitads da l’Europa; tar quella sa tracti d’ina structura federala da bundant 50 colleges ed instituts che disponan d’in aut grad d’autonomia. Ils pli enconuschents èn University College London, King’s College, Queen Mary, la London School of Economics and Political Science e la London Business School. Daspera èn avant maun ulteriuras universitads che n’èn betg unidas sut il tetg da l’University of London, sco per exempel l’Imperial College e la City University. 

A Londra datti plinavant numerusas facultads medicinalas ch’existan per part gia dapi tschientaners (t.a. Queen Mary’s School of Medicine and Dentistry, Guy’s Hospital e St Thomas’ Hospital) e renumads centers da perscrutaziun scientifica, oravant tut l’Imperial College e la Royal Institution. Tranter las scolas da musica ed art sajan menziunads ils quatter conservatoris Royal College of Music, Royal Academy of Music, Trinity College of Music e Guildhall School of Music and Drama sco er il Royal College of Art e l’University of the Arts London che cumpiglia diversas ulteriuras scolas d’art.

 




#Total Article count: 53
#Total Word count: 195395