#Article 1: آلبرخت دورر (218 words)


آلبرخت دورر (بالألمانية: Albrecht Dürer؛  21 ماي 1471 - 6 أبريل 1528) رسام، صانع طباعة، ومُنَظِّر كاينتامي لعصر النهضة الألمانية. تزاد في نورمبرڭ، دورر أسس للسمعة والتأثير ديالو عبر أوروبا فالوقت اللي مازالا فالعشرينات من عمرو نتيجة لجودة نقوشاتو الخشبية. كان فاتصال مع أكبر الفنانين الإيطاليين فالعصر ديالو، بما فيهم رفائيل، جيوڤاني بيليني، وليوناردو دا ڤينتشي، وابتداء من 1512 كان كيّاخد الدعم من عند الإمبراطور ماكسيميليان الأول. تم تشييع دورر فالكنيستين اللوثرية والأسقفية بجوج.

كتشمل مجموعة أعمال دورر الواسعة: النقوش، أسلوبو المفضل في طبعاتو الأخيرة، الأعمال الفنية فالكنائس (Altarpieces)، پورتريهات، پورتريهات ذاتية، لوحات مائية وكُتُب. النقوش الخشبية بحال اللي في سلسلة أپوكاليبس (1498) كتّميز بطابع قوطي أكثر من بقية أعمالو. من بين أشهر نقوشاتو كنتلاقاو: الفارس، الموت والشيطان (1513)، القديس جيروم فالمكتب ديالو (1514)، وميلانكوليا (1514) اللي كانت موضوع كبير للتحليل والتفسير. ألوانو المائية كتميزو كواحد من أوائل الفنانين الأوروبيين اللي تناولو موضوع التصوير الطبيعي فأعمالهم الفنية، وفي نفس الوقت أعمالو الخشبية الطموحة دارت ثورة في الإمكانات والوزن ديال هاد المجال.

إدخال دورر للعناصر الكلاسيكية في الفن الشمالي؛ من خلال معرفتو بالفنانين الإيطاليين والإنسانيين (تيار) الألمان، ضمنات السمعة ديالو كواحد من أهم شخصيات عصر النهضة فشمال أوروبا. وهادشي تعزز من خلال أطروحاتو النظرية، اللي تناولات مبادئ في الرياضيات، الرسم المنظوري، والنسب المثالية.

يُعزى لآلبرخت دورر اختراع المبدأ الأساسي في اقتفاء الأشعة، وهي تقنية كتّستخدم في رسومات الحاسوب الحديثة.




#Article 2: أبراهام سرفاتي (303 words)


أبراهام سرفاتي، تولد فـ16 يناير 1926 فدارلبيضا ؤمات فـ18 نونبر 2010 فمراكش، كان مناضل سياسي مغريبي.

تولد أبراهام فـ 1926 فوسط عائيلة يهودية مغريبية أصلها من طانجا، ؤبدا لمسيرة ديالو فسياسة ف فبراير 1944 ملي دخل لشبيبة شيوعيين لمغاربة، ؤموراها فـ1945 فحيزب شيوعي لفرانصاوي.

خدا ديپلوم من لمدرسة لوطنية لعليا د لمناجم فباريز فـ1949، وفنفس لعام دخل حيزب شيوعي لمغريبي. بسباب لأنشطة ديالو، فـ1952 نفاتو لحوكومة د لحماية لفرانصا هو وختو إڤلين حتال 1956، حيت بنسبة ليها هو ماشي مغريبي والاكين برازيلي. بات أبراهام عاش فلبرازيل 17 لعام قبل ما يرجع للمغريب فـ1923.

مور ستيقلال، خدم سرفاتي كمكلف بمهمة فوزارة لقتيصاد (1957-1960) ؤ مدير ديال لبحت وتطوير ف لمكتب لوطني د لفوسفاط بين 1960 ؤ1968، والاكين جراو عليه من هاد لخدما حيت تضامن معا لعمال د لمناجم ف لإضراب ديالهم بين 1968 ؤ1972.

فـ1970، سرفاتي خرج من لحيزب شيوعي ؤعاون باش تحل لمنضمة لماركسية لينينية إلى لأمام. فيناير 1972 تشد لمرة لولا ؤتعدب، قبل مايطلقوه مورما ناضو موضاهارات طلابية. فداك لوقت لي كان سرفاتي محضي بسباب نشاط ديالو، تخبا فمارس 1972 هو ؤواحد من صحابو، عبدلطيف زروال، عند واحد لؤستادة د لفرانصاوية كريستين دوغ لي عاوناتهوم بجوج.

من بعد شهورا ديال تخبية، أبراهام سرفاتي ؤعبدلطيف زروال تشدو عاوتاني فـ1974 فدرب مولاي شريف، زروال موراها غبروه ؤماعاودش بان. فأكتوبر 1977، تحكم عليه هو ؤخمسا خرين ب لمؤبد بتهمة تهديد أمن دولة، والاكين غالبا سباب لحقيقي هو لموقف ديالو من لقضية ديال صحرا؛ بقا مشدود ف لحبس د لقنيطرة تقريبان 17 لعام حتا عفا عليه لماليك فـ13 شتنبر 1991.

نيشان مورما خرج من لحبس، سلطات صيفطاتو لفرانصا حيت بنسبة ليها هو ماشي مواطن مغريبي والاكين برازيلي، عاش تما هو ؤمراتو كريستين دوغ لي تزوج بها ف لحبس فـ1986، حتال شتنبر 1999 ملي رجع للمغريب ؤردو ليه لپاسپور ديالو.

مات أبراهام سرفاتي نهار 18 نونبر 2010 فواحد لكلينيك فمراكش، ؤتدفن ف لمقبرة ليهودية ديال دار لبيضا.




#Article 3: أحمد البهجة (105 words)


أحمد لبهجة (خلاق ف مراكش ف 6 ديسمبر 1970) كان كوايري مغريبي كايلعب مهاجم ومن بعد ما سالا لكورة خدم مدرب. من أحسن لحرايفيا د لكورة لّي عرفهوم لمغريب، كان معروف ب سّتيل د لّعب ديالو لّي فيه لفراجة و كان عندو كاراكطير ديالو بوحدو وسط تّيران و برا تّيران. هو ولد مراكش و بدا لكاريير ديالو ف لكوكاب لّي دّا ممعاهوم لبوطولة و لكاس قبل ما يمشي يحتارف ف سّعودية لّي تألق فيها مع تّيحاد جدة و نّصر سّعودي. كان لاعب دولي ف لمونتاخاب و شارك معاه ف كاس لعالم 1994 لّي دار فيه ماتشات واعرين بزاف و ب دّات ضد بلجيكا و سّعودية.




#Article 4: أحمد الهيبة (206 words)


أحمد الهيبة بن الشيخ ماء العينين (تولد فالساقية لحمرا ف 1877 - مات ف 1919 فتيزنيت) كان فقيه وشاعر ومتصوف ومقاوم مغريبي ضد ليستيعمار لفرانساوي والصبلويني فلجنوب د لمغريب وموريطانيا.

تولد أحمد لهيبة ف 1877 ف لجنوب دلمغريب, وكان ابَاه هو الشيخ ماء لعينين, اللي كان من الشيوخ لكبار د لقبايل ديال الصحرا. أحمد كان هو الحادش فخًوتو وتعلًم بحالهم، دخل للمسيد وقرا لقواعد د لعربية والشريعة والصوفية. كان تيسافر بزًاف مع ابًاه, وكان تيعاونو فالزيارات اللي كان تيدير للملوك لعلويين. فواحد لوقت غادي يقرروا يرحلو من الصحرا ويسكنو فتيزنيت.

ف 25 أكتوبر 1910، غادي يموت الشيخ ماء لعينين، وغادي يتافقو لعائلة باش يديرو أحمد الهيبة هو لخليفة ديالو وغادي يولي هو اللي تيقود لجهاد ضد ليستيعمار.

ف 1912، ملًي غادي يسيني السلطان عبد الحفيظ معاهدة الاستعمار غادي يثورو عليه لمغاربة. لقبايل ديال سوس و الصحرا غادي يبايعو أحمد لهيبة باش يكون سلطان ديالهم, و غادي يتسمًا السلطان لزرق, حيث كان تيلبس دراعية زرقا. نهار 15 غشت 1912 غادي يدخل الهيبة والجيش ديالو مراكش و يخرجو لفرانسيس منها, وغادي يستقبلوه لمراكشيين بلبارود والزغاريت. موراها غادي يعاود يتجمع لجيش لفرانساوي ويكبر وأيبداو يغلبو الهيبة بشويا بشويا تا أيخرج من مراكش ويمشي يكمًل لمقاومة ديالو فالجبال. غادي يبقا لهيبة مكمُل فلجهاد ديالو حتا غادي يمرض ويموت ف 1919.




#Article 5: أحمد بلافريج (162 words)


أحمد بلافريج، تولد فـ5 شتنبر 1908 ف الرباط ؤ مات فـ14 أبريل 1990 فنفس لمدينة، كان سياسي مغريبي.

تولد أحمد بلافريج فرباط ف 1908، تبع قرايتو ف لقاهرة ف مصر ؤموراها ف صوربون ف باريز. رجع للمغريب باش يدخل معا لحركة لوطنية ضد حوكومة لحماية د فرانصا، بلافريج كان واحد من لمؤسسين ديال حيزب ستيقلال فـ1944. بين 1944 و1946، دخلاتو فرانصا لحبس ؤموراها داوه لمنفى حتا رجع فـ1955.

ملي لمغريب خدا ستيقلال ديالو لعام لي من بعد، بلافريج ولا وزير لخارجية وبقا ف لمنصب حتال 1958. فـ12 ماي 1958، تختار باش يرأس حوكومة لأغلبية ديالها من حزب ستيقلال ولاكين ماكملش بزاف حيت ضطر يحط ستيقالة ديالو فـ3 دجنبر فنفس لعام، مور ما تفاهمش معا رئيس لمجلس لوطني ستيشاري (لغرفة لولا د لبرلامان) ليساري لمهدي بن بركة.

بين 1960 ؤ1961 تعين بلافريج سفير، موراها فـ1963 ولا وزير لخارجية ؤ لممتيل شخصي د لحسن تاني. بقا فهاد لپوسط لخر حتال 1977، ملي قدم ستيقالتو حتيجاجا حيت دخلو ولدو لحبس بسباب مونتيف ديال تخريبات يسارية.




#Article 6: أحمد رضا بنشمسي (182 words)


أحمد رضا بنشمسي (تولد ف19 ماي 1974 فالدار لبيضا) هو صحافي وباحث مغريبي. تيخدم دابا مدير ديال المرافعة والتواصل د شمال إفريقيا والشرق لأوسط فلمنظمة د حقوق لإنسان هيومان رايتس ووتش.

بنشمسي معروف حيث كان هو لمؤسس ولمدير د النشر د جوج د لأسبوعيات مغريبية اللي هي: طيل كيل (بلفرانساوية: TelQuel) و نيشان (اللي كانت بالدارجة).

تولد أحمد بنشمسي فالدار لبيضا ف 1974 وقرا فيها تا خدا لباك. من بعد مشا للرباط وقرا فلجامعة ديالها (جامعة محمد لخامس) وموراها مشا لفرانسا. خدا لإجازة فليقتيصاد ف 1995 من السوربون, و ماسطر على لعالم لعربي ولإسلامي من سيونس پًو ف 1998.

بدا لخدمة فالصحافة من 1996, وشارك مع لاڤي إكو (La Vie Éco) و جون أفريك (Jeune Afrique) وكتب فيهم بزاف د لمقالات.

ف 2001, غادي يكون من لمؤسسين ديال لمجلة لأسبوعية ديال طيل كيل, وبقا الرئيس د التحرير ديالها تال 2010, ملًي مشا للميركيان باش يخدم باحث سياسي فلجامعة د سطانفورد.

ف 2015, بدا بنشمسي خدمة جديدة مع منظمة حقوق لإنسان هيومان رايتس ووتش, واللي عيناتو مدير ديال المرافعة والتواصل د شمال إفريقيا والشرق لأوسط.

بنشمسي ربح واحد لعدد دلجوائز فلمسيرة ديالو, منها:




#Article 7: أحمد رضا ڭديرة (138 words)


أحمد رضا ڭديرة، تولد فـ22 يونيو 1922 فرباط ؤمات فـ14 دجنبر 1995 فنفس لمدينة، كان سياسي مغريبي.

تولد أحمد رضا ڭديرة فـ1922. تبع قرايتو ف لمغريب ؤمن بعد مشا لصوربون فباريز، فين خدا ليسونس ف لقانون فـ1947. ملي رجع للمغريب خدم كموستاشار ديال سلطان محمد لخاميس.

من بعد ليستقلال، فحوكومة لبكاي لولا ولا وزير دولة موراها فتانية ولا وزير لإعلام ؤسياحة.

ڭديرة لعب دور كبير ف لكتابة ديال دستور لمغريب د 1961، ؤخدم كمدير ديال ديوان لملكي ؤعطاه لماليك حاسان تاني سلطات بحال ديال رئيس لحوكومة. فـ13 نونبر 1963، باحنيني تعين رئيس لحوكومة ؤڭديرة ولا فيها وزير لخارجية حتال 1964. مور هاد تجارب، رجع أحمد رضا ڭديرة يخدم ف لقانون خاص والاكين عاود رجع للحوكومة فـ1969 فين ولا وزير تخطيط ؤتكوين لأطر ؤموراها مكلف بقيطاع تعليم لعالي. فـ1977، تختار ڭديرة باش يكون لموستاشار شخصي د لماليك حاسان تاني.




#Article 8: أحمد عصمان (177 words)


أحمد عصمان، تولد فـ3 يناير 1930 فوجدة، هو سياسي مغريبي.

أحمد عصمان تولد فـ3 يناير 1930 فوجدة فين تبع قرايتو لبتيدائية ؤتانوية لي كملها ف لمدرسة لمولوية فرباط فين قرا معا لأمير لحاسان (لي غادي يولو من بعد لحاسان تاني). ملي تخرج، مشا لكلية لحقوق د رباط لي خدا فيها ليسونس ؤموراها كمل فكلية لحقوق د بوردو ففرانصا وخدا دپلوم دراسات لمعمقة ف لقانون لخاص ؤلعام.

مور ستيقلال د لمغريب، دخل يخدم ف ديوان لملكي ديال محمد لخاميس لي عطاه يتكلف بشؤون لقانونية. فـ1957، مشا لوزارة شؤون لخارجية فين ولا رئيس مديرية شؤون لؤروپية ؤلأمريكية، فإطار هاد لخدمة عصمان حضر لبزاف ديال لمؤتمرات ؤلمفاوضات خصوصا معا فرانصا ؤصبانيا، وحتا واحد لمؤتمر على لقانون لبحري.

بين 1967 ؤ1970 كان سفير لمغريب فواشنطن، ؤ فـ2 أكتوبر 1970 تعين وزير شؤون لإدارية. فـ6 غشت 1971، ولا مدير ديوان لملكي لي بقا فيه حتا تعين وزير لأول فـ20 نونبر 1972.

عصمان تزوج فـ19 يوليوز 1964 بخت لحاسان تاني لأميرة للا نزهة لي ماتت بكسيدة حدا تطوان فـ2 شتنبر 1977 ؛ ؤكان عندهوم ولد سميتو نوفل عصمان ؤمات بسباب لمرض فأبريل 1992.




#Article 9: أحيدوس (127 words)


أحيدوس هو واحد من الفنون الغنائية الجماعية لي معروفين بيه الأمازيغ ديال الأطلس فالمغرب. هاد الفن  غالبا كيكون مخلط نسا أو رجال لي كيديرو رقصات متناسقة مصحوبة بالغنا أو الضرب على البندير، الي كيتعتبر الآلة الوحيدة المستعملة فهاد النوع ديال الفن.أحيدوس غالبا كيدار  فالمناسبات الأمازيغية باش إعبرو على الفرح ديالهم بحال مثلا العراسات

المواضيع لي كيتغناو بيها فهاد الفن كتكون مأخودة من الحياة اليومية ديالهم ،أحيدوس بالنسبة ليهم هو واحد متنفس للضغوطات د الحياة و تامًارا ديال الخمدة فالعروبية.باش إدار أحيدوس على حقو أوطريقو خاص إكون شي واحد فالمجموعة هو اللي كيسير الإقاع ديال الشطيح أولي كتكون عندو تجربة كبيرة فهاد الفن .

العدد ديال الفرق لي منخارطة فالمغرب فهاد النوع ديال الفن كيتعدى 80 فرقة.

كيتعتبر موحى أو الحسين أشيبان المعروف بالمايسترو أشهر واحد فالفن ديال أحيدوس.




#Article 10: أرمينيا (132 words)


أرمينيا ولاً لجمهورية د أرمينيا (بلأرمينية: Հայաստանի Հանրապետություն) هي واحد لبلاد فالجبال د لقوقاز جات مابين لغرب د آسيا والشرق د أوروپا. تاتحدًها من لغرب تركيا, من الشمال جورجيا, أزيربيدجان فالشرق وفلجنوب إيران.

أرمينيا هي أول دولة فلعالم اللي ولاًت مسيحية, فاللول د لقرن الرابع. فلقرن 20, كانت أرمينيا جمهورية من لجمهوريات ديال ليتيحاد السوڤياتي تاتفكًك ف 1991 ورجعات جمهورية مستقلة فيها الديموقراطية والتعدد د لأحزاب.

تيسكنو فأرمينيا تقريبا 3 د لمليون د الناس, العاصمة ديالها هي ييريڤان, و لعملة ديالها هي الدرام. أرمينيا هي عضو فبزاف د لمنظمات بحال لأمم لمتحدة ومجلس أوروپا ومنظمة التجارة لعالمية وحتا لمنظمة لعالمية د لفرونكوفونية.

ف 2018 وقعات ثورة فأرمينيا ضد رئيس لوزارا لقديم سيرج ساركاسيان, اللي فاللخر ستاقل من لمنصب ديالو, ولاً رئيس لمعارضة نيكول پًاشينيان هو رئيس لحكومة وباقي فهاد لمنصب تال دابا.




#Article 11: أزيربيدجان (153 words)


أزيربيدجان (ولا ازريبيدجان) ولاً رسميا لجمهورية د أزيربيدجان (بلأزيربيدجانية: Azərbaycan Respublikası) هي واحد لبلاد جات فلقوقاز مابين الشرق د أوروپا ولغرب د آسيا. تيحدًها بحر قزوين من الشرق, روسيا وجورجيا من الشمال, أرمينيا من لغرب, وإيران من لجنوب.

لبلاصة اللي فيها أزيربيدجان دابا كانت تابعة للدولة لعثمانية تال 1918, فين ستاقلاًت وتعلنات لجمهورية الديموقراطية د أزيربيدجان, اللي كانت أول جمهورية علمانية فالتاريخ فبلاد لأغلبية ديالها مسلمين. هاد لجمهورية غاتبقا غي عاماين حيث ليتيحاد السوڤياتي أيحتلًها ف 1920 وّأتولي هي لجمهورية السوڤياتية ليشتيراكية د أزيربيدجان. ف 1991 غادي تستاقل أزيربيدجان و أتولي هي لبلاد اللي تانعرفو دابا, واللي هي لجمهورية د أزيربيدجان.

تيسكنو فأزيربيدجان تقريبا 10 د لمليون د الناس, 89% منهم مسلمين شيعة. لعاصمة ديالها هي باكو, ولعملة ديالها سميتها مانات. اللغة الرسمية فأزيربيدجان هي لأزيربيدجانية, وعاد كاين لغات محلية آخرا, وبزًاف د الناس اللي تيهضرو الروسية. أزيربيدجان عضو فبزاف د لمنظمات دولية بحال لأمم لمتحدة ومجلس أوروپا و الرابطة د الدول لمستقلة.




#Article 12: أشرف حكيمي (140 words)


أشرف حاكيمي، سميتو لكاملة أشرف حاكيمي موح، تولد نهار 4 نونبر 1998 فمدريد فصبانيا، هو كوايري مغريبي كيلعب أريير دروا معا لانطير ميلان ف طاليان، ومع لمونتخاب د لمغريب د كورة.

بدا أشرف لمسيرة ديالو مع الصغار د ريال مدريد، لي لعب معاهم من 2006 ل 2016. ف 2016 عيطلو لمدرب زيدان باش يلعب ف لول مع لفرقة د لاحتياط، ولكن عجبو لعب ديالو ودخًلو دغيا مع لفرقة لًولا. لعب حكيمي أول ماتش رسمي ديالو مع ريال ف 1 أكتوبر 2017 ضد اسبانيول برشلونة.

ف 2018 تسلًفاتو لفرقة د بوروسيا دورتموند فألمانيا لعاماين، و بعدها مشر لانتر ميلان طالياني لي كان مراقبو من 2018 قبل ما تسلف اريال اشرف حكيمي لدورتموند.

فلمغريب، لعب أشرف حكيمي مع لمنتخب د قل من 17 لعام، ومنتخب تحت 20 عام ومنتخب الشبان، وموراها طلع للمنتخب د لكبار اللي لعب معاه كاس لعالم 2018 فروسيا.




#Article 13: أفغانستان (206 words)


أفغانستان هي دولة ف وسط و جنوب آسيا، عندها حدود مع پاكيستان فلجنوب أو شرق، إيران فلغرب، طادجيكيستان، أوزباكستان، أو تركمانستان فشمال، أو الشينوا فأقصى شمال شرقي.

شحال هادي فلقديم، كانو ناس كيتنقلو عبرها بلحيوانات أو سلع حيت هي كتربط الشينوا أو لهند بوسط آسيا أو شرق لأوسط. أما دابا فهي كتعاني من عدة سنوات ديال لحروب أو مابقاوش بزاف د لفرص ديال شغل.

لبلاد فيها تقريبا 652 ألف كيلوميتر مربع ديال لمساحة أو 30 مليون ديال ناس، زيد عليها 3 مليون ديال لاجئين لي لأغلبيا ديالهم مشاو لإيران أو پاكيستان. لعاصمة كابول فيها تلاتة لمليون أو نص ديال ناس حسب إحصاءات 2011.اللغة الرسمية فيها هي الفارسية و پاشتو و الدين الرسمي هو لإسلام.

تايرجع التاريخ ديال الحياة البشرية في أفغانستان للعصر الحجري القديم الوسطاني، وقدر الموقع الاستراتيجي ديالها بحيث أنها جات على طريق لحرير، أنه يربطها بالثقافات ديال الشرق الأوسط ومناطق خرى من أسيا. تاريخيا ديك لارض عاشو فيها بزاف ديال الشعوب وتعرضات لبزاف ديال لحملات العسكرية، بما فيها الحملات العسكرية للي دارها ألكساندر لكبير ومورياس ولعرب لمسلمين والمنغول والسيخ والبريطانيين والسوفييت والولايات لمتحدة مع الدول للي تحالفات معها. كما أنها كانت لأصل ديال بزاف ديال الشعوب بحال الكوشان والهفثاليين والسامانين والسافاريد والغزنافيين والغوريون والخلجيين والمغوليين والهوتاكس ودورانيس وبزاف اخرين للي قدرو إبنيو إمبراطوريات كبيرة.




#Article 14: ألمانيا (234 words)


لجمهورية لفيديرالية د ألمانيا (ب لألمانية: بوندس ريپوبليك دويتشلاند - Bundesrepublik Deutschland) هي واحد البلاد جات فالوسط لغربي د أوروپا. تيحدّوها من الشمال: لبحر د الشمال و الدانمارك و لبحر د لبلطيق، من لجنوب لوطريش و سويسرا، من الشرق پولونيا و التشيك، و من لغرب: فرانسا، ليكسمبورڭ، بلجيكا و هولاندا. ألمانيا هي لبلاد اللي فيها أكبر عدد د السكان ف أوروپا.

ألمانيا بلاد عندها تاريخ قديم و دخلات ف بزاف د الدول بحال لإمبراطورية الرومانية. ف لقرن 16، كان الشمال د ألمانيا هو لبلاصة اللي بدات فيه لإصلاحات ف لمسيحية، و اللي خرج منها التيار لپروطيسطاتني. من مورا ما سالات لحرب لعالمية تانية، تقسمات ألمانيا على جوج: ألمانيا لغربية و ألمانيا الشرقية. ف 1957 كانت ألمانيا لغربية من لبلدان اللي أسسو لإتحاد لأوروپي. ف 1990 عاود تجمعو ألمانيا لغربية و الشرقية ف بلاد وحدا، و اللي هي لجمهورية د ألمانيا.

تسيكنو ف ألمانيا شويا كتر من 83 مليون د الناس، و لعاصمة ديالها هي برلين. اللغة الرسمية ديال لبلاد هي لألمانية، و لفلوس اللي كاتخدّم هي لأورو. النضام د لحكيم ف ألمانيا هو جمهوري فيديرالي، فيه لبلاد مقسومة على 16 فيديرالية، كل وحدا فيهم عندها لحكومة ديالها، و عاد كاينة لحكومة لمركزية ف برلين. ألمانيا عندها أقوى اقتصاد ف أوروپا و رابع أكبر اقتصاد ف لعالم. لبلاد داخلة ف بزاف د لمنضمات عالمية بحال لأمم لمتحدة و لإتحاد لأوروپي و الناطو و جي 7 و جي 20 و لمنضمة د التعاون و التنمية لإقتصادية.




#Article 15: أمينة اللوه (130 words)


أمينة اللوه (خلاقت ف لحوسيما ف 1926 و ماتت ف 18 جويي 2015) كاتبة و أديبة مغريبية. رّواية ديالها الملكة خناتة قرينة المولى إسماعيل كايعتابروها لمؤرخين د لأدب لمغريبي أول رواية مغريبية تكتبات ب لعربية و كتباتها أمينة ف 1954.

أمينة كبرات ف تطوان و فيها قرات تال تّانوي و من بعد مشات كملات قرايتها لجامعية ف سبانيا ف لجاميعة د مدريد و فيها خدات لّيصونص ديالها ف لأدب ف 1957. ف 1978 خدات دوكتورا دّولة ف لأدب.

أمينة اللوه خدمات ف تّعليم و كانت معلمة و أوستادة و مفتشة ف رّباط و خدمات ف صّحافة و كانت عضوة ف لّجنة لملكية د إصلاح تّعليم.

كتبات بزاف د لكتوبا ف لمجال د تّاريخ و خدات بزاف د لجوائز منهوم جائزة لمغريب ل لأدب ف 1954 و وسام لعرش ف 1988.




#Article 16: أنتيڭوا وباربودا (119 words)


أنتيڭوا وباربودا هي دولة جزرية عندها السيادة جات فالهند الغربية فلقارة د أميريكا، وعندها سواحل على لبحر لكاريبي ولمحيط لأطلسي بجوج. كتّكوّن من جوجت الجزر كبار؛ جزيرة أنتيڭوا وجزيرة باربودا، ؤواحد العداد ديال الجزر الصغار (من بينهم ڭريت بيرد، الجزيرة الخضراء، ڭوايانا، لونڭ، مايدن، ؤيورك، وفأقصى الجنوب، جزيرة ريدوندا). عدد الساكنة حسب تقديرات 2018 هو 96,286 نسمة والأغلبية ديالهم ساكنين فجزيرة أنتيڭوا (%97). العاصمة وأكبر ميناء ومدينة هي سانت جونز فأنتيڭوا، أما أكبر مدينة فباربودا فهي كودرينڭتون. الجزر ديال أنتيڭوا وباربودا قراب لبعضياتهم (مطار باربودا الرئيسي ما بعيدش كثر من °0.5 طول، ولا 56 كيلومتر (30 ميل بحري) على مطار أنتيڭوا الرئيسي) ؤجاو فالوسط ديال جزر ليوارد اللي كينتاميو لجزر الأنتيل الصغرى بمحاذاة خط عرض 17 شمال خط الاستواء.




#Article 17: أندورا (397 words)


أندورا، ولا رسميا مديرية أندورا (بلكاطالانية: Principat d'Andorra)، هي بلاد ماعندهاش بحر جات ف جبال لپيريني ف لجنوب لغربي د أوروپا مابين فرانسا و صبانيا اللي حادينها بجوج. عايش فيها تقريبان فيها 80 ألف واحد و لعاصمة ديالها هي أندورا لقديمة. كايحكمها مقيم عام صبليوني أو رئيس ديال فرانسا، و لحوكومة هي ديموقراطية برلمانية.

أندورا هي دولة لاباس عليها بسباب سياحة أساسا؛ كايزورها سنويا 10.2 مليون سائح.

أندورا ماداخلاش فلإتحاد لأوروبي، و واخا هاكاك كاتخدم لأورو.

لوغة رسمية هي لكاطالانية و فنفس لوقت كاتستعمل صبليونية، لفرانساوية، و لبرتغالية.

أندورا معروفة برياضات ديال شتوة، عندها أراضي كبيرة ديال هبطات د سكي ف جبال لپيريني (3100 هكتار و350 كلم ديال لهبطات) و جوج ديال محطات د سكي، ڭراندڤاليرا هو أكبر واحد منهم و لي مشهور كتر. رياضات خرين كيتعلبو فأندورا بحال لكورة، ريڭبي، لباسكيط، ولهوكي بجراير.

بنسبة لهوكي بجراير، أندورا موالفة تلعب فلبوطولة د ؤروپا وكاس لعالم. فـ2011، نضمات أندورا لفاينال أيت د بوطولة د ؤروپا د لفراقي.

فكورة لبلاد متلة ب لمونتاخاب د أندورا د كورة. لفرقة ربحات أول ماتش رسمي ديالها فـ13 أكتوبر 2004 ضد مقدونيا فتصفيات د كاس لعالام، و أول ماتش ربحاتو فتصفيات د كاس ؤروپا كان فـ11 أكتوبر 2019 ضد مولدوڤا. لكورة فأندورا مكلفة بيها لجاميعة لأندورية د كورة لي تأسسات فـ1994، لي كاتنضم لمسابقات د كورة (پريميرا ديڤيزيون، كاس دوستور، و سوپيركوپا) و لفوتصال. أندورا دخلات ليويفا ولفيفا فنفس لعام، فـ1996. إف سي أندورا، لي كاين فأندورا لقديمة وتأسس فـ1942، كيلعب فشومپيونات د صبانيا.

ريڭبي هي رياضة شعبية فأندورا، حيت مأترة بزاف بشعبية ديالها ف لجنوب د فرانصا. لمونتاخاب د أندورا د ريڭبي، لي مسميين عليه إلس إزاردس، كيشارك فنيڤو دولي فريڭبي د سبعة وريڭبي د خمسطاس. ڤي پي سي أندورا 15، لي هي فرقة د ريڭبي فأندورا لقديمة، كاتلعب ف لبوطولة د فرانصا.

شعبية ديال لباسكيط طلعات ف أندورا فتسعينات، ملي فرقة من أندورا بي سي أندورا طلعات لقيسم لول د صبانيا. مور 18 لعام لفرقة عاود رجعات لنفس نيڤو فـ2014.

رياضات خرين كيتلعبو ف أندورا، بحال پيكالات، لڤولي، جودو، لكورة د ؤسطراليا، لهوند، لعومان، جيمناستيك، تينيس، و لماطر. فـ2012، أندورا قادات أول فرقة ديالها د لكريكيت ولعبات ماتش فبلادها ضد فرقة من هولاندا، لي هو أول ماتش ملعوب فتاريخ أندورا فعلو ديال 1300 ميترو.

أندورا شاركات لمرة لولا ف لعاب لؤلمپية فـ1976، من داك لعام ولبلاد ديما مشارك ف لعاب لؤلمپية د شتوة. أندورا كاتشارك حتا ف لعاب ديال لبلدان صغار د ؤروپا، لي نضماتهم جوج د لمرات فـ1991 و 2005.




#Article 18: أندونيسيا (197 words)


لجمهورية د أندونيسيا (بلأندونيسية: Republik Indonesia) هي بلاد أرخبيل جات مابين لجنوب الشرقي د آسيا وأوقيانوسيا. أندونيسيا هي لبلاد اللي فيها أكبر عدد د لجزر فلعالم, حيت فيها 17.508 جزيرة تابعين ليها. أندونيسيا هي رابع أكبر دولة فلعالم من ناحية عدد السكان, وهي أكبر دولة فلعالم اللي لغالبية د السكان ديالها مسلمين. تاتحدًها پاپوا غينيا الجديدة وتيمور الشرقية وماليزيا. من غير داكشي داير بيها لبحر من ڭاع الجوايه.

أندونيسيا جات فبلاصة ستراتيجية خلاتها تعرف بزاف دلحضارات, وعليها فيها سكان مسلمين وآخرين مسيحيين وآخرين بوديين. فالتاريخ ديالها حتلًوها بزاف د لبلدان منهم لبرتغال وفرانسا وبريطانيا, ولكن اللي بقاو بزاف هوما لهولانديين, اللي احتلو اندونيسيا 350 عام. ف 1945 علنات اندونيسيا ليستيقلال ديالها ولكن لهولانديين مابغاوش, وهي تبدا حرب بيناتهم سالات ف 1949, وعتارفات موراها هولاندا بليستيقلال د لجمهورية د أندونيسيا, وهي لبلاد اللي كانعرفو دابا.

تيسكنو فأندونيسيا تقريبا 267.7 مليون د الناس ولعاصمة ديالها هي جاكارطا. اللغة الرسمية هي لباهاسا (لأندونيسية), ومن غيرها تيتهضرو واحد 700 لغة فلبلاد, وهو اللي تيخلي أندونيسيا لبلاد اللي تيتهضرو فيها أكبر عدد د اللغات فلعالم. لعملة اللي تاتخدُم تمًا هي الروپية لأندونيسية. أندونيسيا عضو فبزاف د لمنظمات دولية بحال لأمم لمتحدة وحركة عدم لإنحياز و G20 ومنظمة التجارة لعالمية وصندوق النقد الدولي.




#Article 19: أنطونيو ڭرامشي (180 words)


أنطونيو فرانشيسكو ڭرامشي (بالطاليانية: Antonio Francesco Gramsci ) (تولد ف 22 يناير 1891 فسردينيا - مات ف 27 أبريل 1937 فروما) كان فيلسوف ومناضل وكاتب ماركسي طالياني, وكانت عندو آراء سياسية د الشيوعية. ڭرامشي كان كيعارض النظام لفاشي اللي كان ديك الساعة فالطاليان, و اللي كان تيحكمو بينيطًو موسوليني. ف 1921, كان من لمؤسسين ديال لحزب الشيوعي الطالياني, و ف 1924 ولاً هو الرئيس ديالو وتنتاخب فلبرلمان الطًالياني.

ف 9 نونبر 1926 تعتاقل بأمر مباشر من موسوليني واخا كانت عندو لحصانة لبرلمانية, وتحكم عليه ب 20 عام دلحبس. مورا 11 لعام, ف 1937, غادي يموت فلحبس حيث جاوه بزاف د لأمراض وماتعطاهش لإهتمام اللي خاص باش يتداوا. مات ڭرامشي وفعمرو 46 عام وتدفن الرماد ديالو فروما, لعاصمة د الطاليان.

ڭرامشي كتب فحياتو كتر من 30 كتيب, وأشهر واحد فيها سميتو الدفاتر د لحبس (بالطاليانية: Quaderni del carcere ) واللي هضر فيه على بزاف د لمسائل بحال تاريخ الطاليان ولمفهوم د الوطنية و لهيمنة التقافية وبزاف د لأفكار لماركسية. من أهم لأفكار اللي جاب ڭرامشي هي لفكرة ديال كيفاش لحكًام الرأسماليين كيسيطرو على التقافة باش يقدرو يبقاو محافضين على لحكم ديالهم.




#Article 20: أنڭولا (150 words)


أنڭولا ولاًُ رسميا جمهورية أنڭولا (بلبرتغالية: República de Angola) هي بلاد جات فلجنوب ديال إفريقيا. عندها حدود مع ناميبيا فلجنوب، جمهورية لكونڭو الديموقراطية ف الشمال، و زامبيا ف الشرق. الساحل لغربي ديالها كيطل على لمحيط لأطلسي.

تيسكنو فأنڭولا تقريبا 30 مليون واحد على حساب التقديرات د 2020، ولعاصمة ديالها هي لواندا. اللغة الرسمية د لبلاد هي لبرتغالية، ولفلوس اللي كاتخدًم سميتها ل كوانزا. أنڭولا تاتصدًر لپطرول و بزاف د لمعادن، وهادشي خلاُ لقتيصاد ديالها يطلع بالزربة مورا ما سالات لحرب لأهلية فيها ف 2002.

أنڭولا ستاقلات من لبرتغال ف 1975 من بعد حرب اللي بداتها لحركة الشعبية لتحرير أنڭولا (MPLA) ف 1961. هاد لحزب النيت هو اللي حاكم لبلاد من مورا ليستيقلال تال دابا. الرئيس د أنڭولا من 2017 هو جواو لورينسو.

أنڭولا هي عضو ف لأمم لمتحدة، ليتيحاد لإفريقي، لأوپيك، مجلس الدول اللي تيهضرو بلبرتغالية، لإتحاد اللاتيني، منطقة تسامح أو تعاون لجنوب لأطلسي، و لمجلس تنمية لدول جنوب أفريقيا.




#Article 21: أوزباكستان (138 words)


لجمهورية د أوزباكستان (بلأوزبيكية: Oʻzbekiston Respublikasi) هي بلاد فآسيا لوسطانبة دايرين بيها غي بلدان اللي ما فيهاش لبحر. تاتحدها من الشمال كازاخستان، من الشرق كيرڭيستان، من لغرب تركمانستان، ومن لجنوب طاجيكستان وأفغانستان. أوزباكستان وليختنشتاين هوما الجوج بلدان فلعالم اللي ضايرين بيهم بلدان اللي كاملين ماتيطلوش على لبحر.

أوزباكستان عندها تاريخ قديم وبزاف د لمناطق فيها خلاو أتر ملي دخلهوم لإسلام بحال بخارى وسمرقند وتاشقنت وخوارزم. بزاف د الناس اللي لأصل ديالهم من أوزباكستان كان عندهم دور مهم فلحضارة لإسلامية بحال لبخاري ولخوارزمي ولبيروني والنسائي والترمدي.

ف 1924 دخلات أوزباكستان لليتيحاد السوڤييتي وكانت سميتها لجمهورية ليشتيراكية السوڤييتية لأوزييكية. نهار 31 غشت 1991, و من مورا ماطاح ليتيحاد السوڤييتي، تعلنات لجمهورية د لأوزباكستان اللي تانعرفو دابا. لعاصمة د أوزباكستان هي تاشقنت (اللي هي أكبر مدينة) و اللغة الرسمية هي لأوزبيكية ولكن الروسية كاتخدًم بزاف إداريا. لعملة د لبلاد هي السوم.




#Article 22: أوسطرالوپيتيك (156 words)


لأوسطرالوپيتيك (سّميتو لعلمية Australopithecus) هو واحد لگنس د لقرودا لفوقانيين لّي عاشو بين هادي 2 و 4 د لملاين د سّنين ف لمناطق لبركانية لّي معروفة ب شّقة لكبيرة د ريفت لّي شادا من لهضاب د إتيوبيا تّال جنوب إفريقيا و من جيهت لغرب عاشو حتا ف لمناطق ديال تّشاد و لكونغو و ناميبيا. كان ب لأساس نباتي (ميخالي ما كايعرفش لفلاحة) و يمكن كان قاريت (Omnivore) و كان كايقدر يصاوب شي دوزان بساط باش يقطع ما ياكل.

أول أوسطرالوپيتيك تلقا كان ف 1924 ف جنوب إفريقيا و لّي كان حفر عليه هو لعالم لأوسطرالي رايموند دارت. من داك تّاريخ قدرو لعولاما و لباحتين يجبدو بزاف ديال لحفريات. أشهر حفرية كانت هيا لوسي لّي تلقات ف إتيوپيا ف لبيعتة د لعالم لفرانصاوي إيف كوپينس ولّي تسمات ب هاد سّمية حيت فاش كانو خدامين ف لموقع كانو طالقين دّيسك د لبيتلز Lucy in the sky ف لّحضة فاش جبدوها.

كاينين 8 د نّواع د لأوسطرالوپيتيك لّي تكتاشفو:




#Article 23: أوكرانيا (139 words)


أوكرانيا (بلأوكرانية: Україна) هي بلاد جات فأوروپا الشرقية وهي تاني أكبر بلاد فلمنطقة. تاتحدًها من الشرق روسيا, من الشمال بيلاروسيا, من لغرب پولونيا وسلوڤاكيا وهنڭاريا, ومن لجنوب رومانيا ومولداڤيا ولبحر لكحل.

فعام 1922, كانت أوكرانيا من لمؤسسين ديال ليتيحاد السوڤياتي, اللي كان هو لمنافس د ميريكان وقت لحرب لباردة. ف 1991 طاح ليتيحاد السوڤياتي وخرجو منو بزاف د لجمهوريات, منها جمهوريةأوكرانيا كيما كانعرفوها دابا. أوكرانيا عضو مؤسس د لأمم لمتحدة ف 1945 واخا كانت باقا داخلة فليتيحاد السوڤياتي.

أوكرانيا ساكنين فيها تقريبا 42 د لمليون د الناس والعاصمة ديالها هي كييڤ. لعملة اللي كاتخدًم فلبلاد هي لهرييڤنيا. اللغة الرسمية د أوكرانيا هي لأوكرانية, ولكن الروسية باقا تاتخدًم فلبلاد فبزاف د لقطاعات. أوكرانيا عندها تاني أكبر جيش فأوروپا مورا روسيا. هي عضو فلأمم لمتحدة ولمجلس د أوروپا ولمنظمة د لأمن والتعاون فأوروپا ومنظمة ڭوام للتطوير الديمقراطي والاقتصادي ورابطة الدول المستقلة.




#Article 24: أڭادير (502 words)


أڭادير هي مدينة كبيرة فالمغرب وجات تقريبا فالوسط ديال الساحل الأطلسي المغربي. المدينة كتبعد بواحد 508 كيلوميتر على الدار البيضاء. أڭادير هي العاصمة ديال جماعة أڭادير إداوتانان أو العاصمة ديال المنطقة ديال سوس. الشلوح ديال أڭادير كيهدرو بتَشلحِيت. هدي المدينة جماعة ترابية حضرية كاينة في إقليم أڭادير، جهة سوس ماسة.

أكادير هي واحد من لمراكز لحضرية ف لمغريب. لبلدية د أكادير مسجلة ساكنة تعداد ديالها 924.000 فلإحصاء ديال 2014. حسب لإحصاء ديال 2004, كانو 346.106 ديال السكان فداك لعام و 487.954 ديال سكان فلعمالة ديال أكادير إداوتنان.

لغات للي كايهضرو بها فأكادير هي: تاشلحيت (لوغة لولة ديال لأغلبية), دارجة ولفرانساوية.

لمدينة تدمرات بواحد زلزال ف1960. تعاودات تبنات كولها بمعايير زلزالية إجبارية. هي دابا أحد أكبر المنتجعات لبحرية فلمغريب, للي كايجيو ليها عدد كبير من سياح لأجانب وداخليين للي كاعجبهوم لجو ديالها زوين على مدار سنة.

أڭادير هي واحد الكلمة من الأمازيغية للي تتعني لمخزن لمحصن.

كاين بزاف ديال لمدن فلمغريب سميتهم أكادير. سمية لكاملة ديال أكادير بتاشلحيت هي أكادير ن يغير (ⴰⴳⴰⴷⵉⵔ ⵏ ⵢⵉⵖⵉⵔ), حرفيا لحصن ديال تلة (the fortress of the cape), زعما على حساب لخليج لي حداها. يغير بتاشلحيت كايقصدو بيها كدية ولا جبل.

ساكن ديال أكادير كايتسما بتاشلحيت ڭ أوڭادير, بلجمع آيت أوڭادير. لمؤنت ديالها هو أوت أوڭادير,بلجمع إست أوڭادير.

تاريخ ديال أڭادير لمسجل قبل لقرن 12 مامعروفش عليه بزاف.

أقدم دكر لأكادير فلخرائط كايرجه لعام 1325. مع نهاية ديال لقرون لوسطآ أڭادير ولات مدينة مشهورة ومعروفة.

ف1505, لبرطقيز للي كانو ديجا مأنستاليين فساحل لمغريبي, أسسو واحد لمقر تجاري ف تلة, سميتو Santa Cruz do Cabo de Aguer فلبلاصة لي معروفة دابا ب فونتي, وكان عندها حاكم.

لبرطقيز ماطولوش بزاف حيت كانو ديما كايهجمو عليهم لقبائل لمحلية. من 1530, كانو محاصرين ف سانتا كروز. ضعق لبرتغالي بين راسو ف 12 مارس 1541 فاش سلطان سعدي محمد الشيخ شد لحصن ديال سانتا كروز دي أڭير. 600 برطقيزي لي بقاو عايشين خداوهم ك أسرى, من بينهم لحاكم, Guterre de Monroy, وبنتو Dona Mecia, لي راجلها تقتل فلمعركة, ولات زوجة ديال محمد الشيخ لكن ماتت فلولادة سنة 1544. فنفس سنة, محمد الشيخ غادي يطلق Guterre de Monroy, للي ولا عشيرو.

من مورا ما لبرطقيز مشات ليهوم أڭادير, بداو كايخسرو بلايص أخرين, بحال أزمور و أسفي. من مورا 1550, لبرطقيز ما بقاو كايكسابو والو فلمغريب من غير مازاڭان (الجديدة), طنجة و سبتة.

فسنة 1570, لقصبة دأڭادير أوفلا غادي تبنا من طرف السلطان محمد لغالب, للي شد لحكم مورا محمد الشيخ السعدي. كانت سميتها أڭادير ن يغير, للي كاتعني حرفيا لحصن ديال التلة بتاشلحيت.

فلقرن 17, تحت لحكم ديال السلالة لأمازيغية ديال تازروالت, أڭادير كانت ميناء عندو أهمية كبيرة, وكانت عندو تجارة مع أوروبا. أڭادير كانت كاتاجر أساسا فالسكر, شمع, نحاس وجلد. لأوروبيين كانو كايجيبو سلعة ديالهم, للي غالبا ما كاتكون سلاح ولا نسيج. احا لحكم ديال لإمبراطور مولاي سماعيل وللي جاو موراه, تجارة مع فرنسا, للي كانت شريك تجاري نشيط تراجعات وخداو بلاصتها النڭليز ولهولانديين.

ف1731, لمدينة تدمرات كليا بسباب زلزال. لميناء ديال أڭادير ديك ساع تسد فاش الصويرة تبنات فشمال ديالها.

ف1911 كانت أزمة أڭادير بين فرنسا وألمانيا.

ف1960, لمدينة تدمرات بسباب زلزال.

ساكنين فيها 420،288 نسمة، على حسب الإحصاء العام 2014.




#Article 25: ؤسطراليا (137 words)


ؤسطراليا (بلينڭليزية: Commonwealth of Australia) هي واحد الدولة فلجنوب الشرقي د آسيا ولغرب د لمحيط لهادي, لعاصمة ديالها هي كانبيرا. ؤسطراليا بلاد فيها بزاف د لجزر منها لجزيرة لكبيرة د أسطراليا وطازمانيا وبزاف د لجزر خرا. لمساحة د ؤسطراليا 7.69 مليون كم² هي مساحة كبيرة, وخلاتها تكون سادس أكبر بلاد فلعالم من ناحية لمساحة.

تيسكنو فؤسطراليا تقريبا 25.6 مليون د الناس, لأغلبية ديالهم (60%) ساكنين فلمدون, وبالضبط فلمدون لكبار د لجنوب الشرقي بحال سيدني وميلبورن.

سكن بنادم فؤسطراليا من هادي 65.000 عام, قبل ما يجيو ليها لبحًارة لهولانديين فاللول د لقرن 17 (ف 1606) وسمًاوها هولاندا الجديدة. ف 1788 حتلاتها بريطانيا وولاًُت مستعمرة ديالها. ف 1 يناير 1901, تجمعات لمستعمرات لبريطانية اللي فديك النواحي وأسسات اتحاد فيديرالي اللي تسمًا لكومونويلت د ؤسطراليا, اللي هي بلاد عندها نظام ديموقراطي ليبيرالي, و هو النظام اللي تابعاه لبلاد تال دابا.




#Article 26: إتيوپيا (168 words)


إتيوپيا, رسميا لجمهورية لفيديرالية الديموقراطية د إتيوپيا (بلأمهاريك: የኢትዮጵያ ፌዴራላዊ ዴሞክራሲያዊ ሪፐብሊክ) هي واحد لبلاد جات فالشرق د إفريقيا وماتاطلش على لبحر. هي تاني أكبر بلاد من ناحية السكان فإفريقيا, ولعاشرة فلمساحة. تيحدًوها من الشرق دجيبوتي والصومال, من الشمال إيريتيريا والسودان, من لغرب جنوب السودان, ومن لجنوب كينيا.

التاريخ د إتيوپيا قديم بزاف وفيها تلقا أقدم هيكل د بنادم اللي لعمر ديالو 4.4 مليون عام. إتيوپيا معروفة باللي هي أكثر دولة كانت مستاقلة فإفريقيا حيث فتاريخها كامل تستعمرات غي 5 سنين (من 1936 ل 1941) من الطاليان. إتيوپيا هي جمهورية برلمانية, ولكن فالتاريخ ديالها كانت مملكة قديمة, حتال 1974, فين تدار نقيلاب عسكري على لماليك هايلي سيلاسي, من ديك الساعة ولبلاد جمهورية.

تيعيشو فإتيوپيا شويا كتر من 109 مليون د الناس ولعاصمة ديالها هي أديس أبابا (تاتعني لوردة الجديدة). اللغة الرسمية هي لأمهاريك, وكاين بزاف د اللغات إقليمية. لفلوس اللي تاتخدًم هي بيرً. إتيوپيا داخلة فبزاف د لمنظمات دولية, هي عضو مؤسس د لأمم لمتحدة و ليتيحاد لإفريقي (لمقر ديالو جا فيها), حركة عدم لإنحياز ومنظمة لوحدة لإفريقية.




#Article 27: إرلاندا (158 words)


لجمهورية د إرلاندا (بلإرلاندية: Poblacht na hÉireann - بلينڭليزية: Republic of Ireland) هي بلاد جات فالشمال لغربي د أوروپا، ولأراضي ديالها جات فلجزيرة د إرلاندا، اللي مقاسماها مع لبلاد د إرلاندا الشمالية، اللي تاتحدًها من الشمال. من الجوايه لاخرا كلها تيحدًها لمحيط لأطلسي وبحورا مرتابطين بيه بحال بحر الشمال ولبحر لإيرلاندي.

كانت إرلاندا تابعة لبريطانيا من 1801, ولكن من 1914 بدًاو بزاف د لإرلانديين تيطالبو بليستيقلال وناضت تمردات وموراها حرب، اللي سالات ف 1922. النتيجة ديال ديك لحرب كانت هي التأسيس ديال لجمهورية د إرلاندا لمستقلة. ف 1955 دخلات إرلاندا للأمم لمتحدة، وف 1973 دخلات للتيحاد لأوروپي. لعلاقات مابين إرلاندا وإرلاندا الشمالية كانت فيها مشاكل بزاف، وماكانتش بيناهتم علاقات دپلوماسية تال 1998, ملًي سيناو اتفاقية د التعاون بيناتهم.

تيسكنو فإرلاندا تقريبا 5 د لمليون د الناس ولعاصمة ديالها هي دابلين. اللغات الرسمية فلبلاد هوما لإرلاندية ولينڭليزية ولفلوس اللي كاتخدًم هي ليورو. إرلاندا جمهورية برلمانية داخلة فبزاف د لمنظمات دولية بحال لأمم لمتحدة، ليتيحاد لأوروپي ومنظمة التعاون لإقتصادي والتنمية.




#Article 28: إزنزارن (115 words)


إزنزارن (بالشلحة: ⵉⵣⵏⵣⴰⵔⴻⵏ) هي واحد لمجموعة موسيقية مغربية تاتغني بلأمازيغية, تأسسات ف 1972 فأڭادير.

شويًا من مور ما تأسسًات لمجموعة, ماتفاهموش شي أعضاء فيها على كيفاش باغين يخدمو, حيث كاين اللي بغا يخدم فلموسيقا لملتازمة, وكاين اللي بغا يخدم على لموسيقا د النشاط ولعراس. ف 1975, تقسمات لمجموعة على جوج مجموعات, اللي هوما: إزنزارن عبد الهادي, و إزنزارن الشامخ.

إزنزارن تاتعني بالشلحة لأشعة د الشمش. ملًي كانت أتبدا لمجموعة, كان خاصهم يختارو سمية. فاللول كانت عندهم تلاتا د ليختيارات, اللي هي: إزنزارن, لمجاديل ولاً إمنارن. ختارو إزنزارن, وهي السميًة اللي باقا عندهم تال دابا.

لأعضاء اللًي أسسو لمجموعة فاللول كانو هوما:

لأعضاء اللًي جاو جداد من بعد هوما:

إزنزارن عندهم بزاف د لأغاني لمعروفة بحال:




#Article 29: إسحاق نيوتن (192 words)


إسحاق نيوتن (ب لونݣلي : Isaac Newton) هو عالم نݣليزي من أكبر لعلما لي عطاو ف لماط ؤ لفيزيك ؤ من بين رموز د ثّورة لعلمية. نيوتن كان رئيس ديال لجمعية لملكية ؤ كان عضو ف لبرلمان د نݣليز، نيوتن كتب لكتاب ديالو لأصول دلماط ف لفلسفة ديال طّبيعة. عام 1687، لي كيهضر علا لميكانيك كلاسيك، نيوتن عطى حتا ف ضومين د لبصريات، ؤ هو (مع لايبنِـتز) لي حط لاباز د تّفاضل ؤ تّكامل.

تزاد ف 25 دجنبر 1642 ؤ مات ف 20 مارس 1727، ف وولسثورب-كلوستروورث؛ ف إقليم لينكونشير ف نكليز من بعد ما مات باه بشي تلت شهور, ولي كان كيخدم فلاح وحتى باه اسمو اسحاق نيوتن.

فاش عمل اسحاق 13 عام, تزوجت الام ديالو براجل اخور وخلاتو مع جداتو تربيه لي كان اسما مارغريت آيسكوف.

اسحاق مكانش كيبغي الام ديالو فديك الوقيتة حيت تزوجات براجل اخور .

منين كان عندو 12 عام تال 17 عام كان كيقرا فمدرسة لملك في جرانتهام, ومن بعد خرج منها ف أكتوبر 1659 ورجع بحالو ل مزرعة وولسثورب. بحيت لقا الام ديالو أرملة ولقاها كتخطط باش تخدمو فالفلاحة بحال الوليد ديالو. ولكن هو مكانش كتعجبو الفلاحة.

إسحاق نيوتن خرج بزاف د لكتوبة هما :




#Article 30: إسطونيا (168 words)


لجمهورية د إسطونيا (بلإسطونية: Eesti Vabariik) هي واحد لبلاد جات فلمنطقة د لبلطيق فالشمال الشرقي د أوروپا. تيحدًها من الشمال لخليج د فينلاندا, من لغرب لبحر د لبلطيق, من لجنوب لاتڤيا, ومن الشرق روسيا.

بزاف ديال الدول احتلًو لبلاصة اللي فيها إسطونيا دابا, منهم ألمانيا, الدانمارك, السويد, پولونيا و لإمبراطورية د روسيا. مورا حرب مع روسيا, ستاقلات إسطونيا ف 1920, ولكن أيدخلها ليتيحاد السوڤياتي فيه ف 1940, و ماغادي تولي مستاقلة عاود تال 1991, من بعد ماتدرات الثورة د لغنا. من ديك الساعة وإسطونيا جمهورية ديموقراطية برلمانية.

تيسكنو فإسطونيا تقريبا 1.3 مليون د الناس ولعاصمة ديالها هي طالين. اللغة الرسمية د لبلاد هي لإسطونية, ولفلوس اللي تاتخدًم هي لأورو. تاتعتابر إسطونيا من بين الدول اللي عندها مؤشر د التنمية طالع بزاف, واقتصاد تيكبر بالزربة, وهو اللي خلاها تدخل للمنظمة د التعاون لإقتصادي والتنمية. إسطونيا داخلة لبزاف د لمنظمات عالمية بحال لأمم لمتحدة و ليتيحاد لأوروپي وحلف الشمال لأطلسي.

ف 2005, كانت إسطونيا أول بلاد فلعالم اللي نظمات انتخابات فأنترنت, وف2014 كانت أول بلاد اللي بدات تاتعطي لإقامة لإلكطرونية.




#Article 31: إسلاندا (136 words)


لجمهورية د إسلاندا هي واحد لبلاد وجزيرة جات فالشمال د لمحيط لأطلسي. تيسكنو فيها كتر من 300 ألف واحد ولمساحة ديالها 102.775 كم². لعاصمة د إسلاندا هي رايكياڤيك وهي أكبر مدينة فلبلاد. إسلاندا بلاد فيها بزاف د لبراكين والتكوينات الجيولوجية اللي خارجة منها بحال لفوًارات السخان (ڭييسر).

أول ناس سكنو فإيسلاندا وبقاو فيها كانو هوما النورڤيجيين اللي جاوليها فعام 874, وكانت خاوية قبل, واخا كانو ناس آخرين كيمشيو ليها ولكن ماسكنوش فيها للدوام. من 1262 تال 1918 كان إسلاندا تابعة للملكة د النورڤيج والدانمارك, من موراها ستاقلات وولاًت جمهورية ف 1944.

إسلاندا تاتعتابر من أقدم وأعرق الديموقراطيات فلعالم, ولبرلمان ديالها هو أقدم برلمان فلعالم. هي من لبلدان اللي كاترتب ديما مع اللًولا فلعالم فبزاف د لمؤشرات بحال مؤشر السلام العالمي ومؤشر حرية الصحافة ومؤشر التنمية البشرية وبزاف د لمؤشرات خرا د الديموقراطية والتعليم والجودة د لعيشة.




#Article 32: إسواتيني (163 words)


لمملكة د إسواتيني (بالسوازي: Umbuso weSwatini - بلينڭليزية: Kingdom of Eswatini), واللي كانت سميتها مملكة سوازيلاند, هي واحد لبلاد فلجنوب د إفريقيا، تاتحدًها جنوب إفريقيا من الشمال ولجنوب ولغرب، وموزمبيق من الشرق، إسواتيني هي وحدا من أصغر لبلدان فإفريقيا ولمساحة ديالها هي 17.364 كم².

سّكان د إسواتيني هوما سًوازي، وكانت عندهم مملكة فلقرن 18. ف 1903, حتلاًت بريطانيا لبلاصة اللي فيها إسواتيني دابا, وبقات تابعا ليها تا استاقلات نهار 6 شتنبر 1968. ف 1973 تمنعو لأحزاب السياسية فبلاد وباقي ممنوعين تال دابا. ف 1986 ولاًت لبلاد ملكية مطلقة تيحكمها لماليك مسواتي 3. ف 2018 بدلات لبلاد سميًتها الرسمية من لمملكة د سوازيلاند للمملكة د إسواتيني.

تيسكنو فإسواتيني تقريبا 1.1 مليون واحد, ولعاصمة ديالها هي مباباني. للوغات رسمية دلبلاد هوما لينڭليزية والسوازي, ولعملة اللي كاتخدًم فيها هي ليلانڭيني سوازيلندي, وكاين اللي تيخدًم الراند لجنوب إفريقي تاهو. إسواتيني مملكة داخلة فبزاف د لمنظمات الدولية بحال لأمم لمتحدة وليتيحاد لإفريقي ومجموعة التنمية دإفريقيا لجنوبية ولكومنويلث.

لمملكة د إسواتيني ماكاتقبلش زواج لي ماشي مدني، بحال زواج لإسلامي.




#Article 33: إسپرانطو (211 words)


لإسپرانطو، هي واحد لوغة صطيناعية ختارعها واحد سًيد سميتو لودڤيک لايٓتزّر تزامّنهوف ف لقرن 19 (مابين لًخر د 1870 و لًول د 1880) باش ڭاع ناس ف لعالم يبداو يهضرو نفس لوغة ويتفاهمو بيناتهم.

تزامّنهوف كان دكتور وطبيب د لعينين پولوني من عائلة يهودية أصلهم من مدينة بياليَسطوك (بياوٓوْسطوك), لي كانت شحال هادي د لإمبراطورية روسية و دابا تابعا لپولونيا. هاديك لمدينة كانو ساكنين فيها ناس من بزاف د القوميات بحال ليهود، لپًولونيبن، لالمان و لبيلاروس, وكانوا تيوقعو بيناتهم لمشاكيل بزاف حيث ماتيتفاهموش وماتيهضروش نفس لوغة. تزامّنهوف لاحظ هاد لمشاكيل, وعليها فكًر باش يختارع شي لوغة لي تقدر توحًدهم كاملين.

فيوليوز 1887, نشر تزامّنهوف لمشروع ديالو لي سمًاه لينگڤو ينطيْرناتسيا (لغة عالمية) فواحد لكتاب بالرًوسية لي كانت سميتو ونوا ليبرو (لكتاب لًول). ملًي كتب لكتاب كان مسمًي راسو دوكتورو يْسپيْرانطو, وهاديك هي سًمية لي تشهرات بيها تا لوغة ديالو مبعد.

لإسپرانطو مديورة باش تكون ساهلة, عليها فيها غير 16 د لقواعد لوغوية, ومافيهاش ڭاع الاستثناءات. لكلمات ديالها مصنوعين, و لأصل د لأغلبية ديالهم ماجي من الكلمات د لوغات لأوروپية (الأكثرية منهم لوغات هيندو-ٔوروپييَا).

ماكاينش احصائيات رسمية ديال شحال د ناس ف لعالم تيهضرو لإسپرانطو, ولكن كاين شي تقديرات لي تاتقول مابين 60.000 تال 2 د لمليون د ناس تيهضروها. لأكثرية د هاد ناس ماشي لإسپرانطو هي لوغة لأم ديالهم, غي تعلموها.




#Article 34: إفريقيا (277 words)


افريقيا كاتعتابر ثاني أكبر قارة من ناحيت الكثافة ديال السكان. لمساحة ديالها تقريبا شي 30.3 مليون كلم2 (11.7 مليون ميل مربع) بما فيها الجزر للي تابعين ليها, كاتغطي شي 6% من المساحة ديال لارض و 20% من المساحة القارية ديالها. فيها شي 1.2 مليار ديال الناس عام 2016, كايمتلو 16% من الساكنة ديال العالم. القارة داير بيها لبحر لبيض لمتوسط من جيهة الشمال, وقناة السويس والبحر الأحمر من الشمال, المحيط الهندي من الجنوب الشرقي ولمحيط لأطلسي من الغرب. القارة فيها ماداڭاسكار وشحال من أرخبيلات اخرين. كاتضم 54 دولة معترف بها (دول)، وتسعود ديال الأقاليم وجوج دول مستقلين بحكم الأمر الواقع عندها اعتراف محدود ولا معندهاش اعتراف. أغلبية القارة والدول ديالها كاينين الجزء الشمالي.

أغلبية السكان ديال أفريقيا صغار فالعمر; متوسط العمر ف 2012 هو 19.7, ملي متوسط العمر فالعالم كان هو 30.4. الجزائر هي أكبر دولة فافريقيا من ناحيت المساحة, ونيجيريا هي الكبيرة من ناحيت عدد السكان. كاتعتابر أفريقيا وخصوصا أفريقيا الشرقية, الأصل ديال الإنسان و(القردة العليا), وللي كايدل عليه الإكتشاف ديال الهومينيد والأسلاف ديالهم وحتى هادوك للي تايرجع التاريخ ديالهم لشي 7 د لمليون عام, بما فيهم إنسان الساحل التشادي، وأوسترالوبيتيكوس الافريقي، وأوستراليبيتيكوس أفرنسيس، وهومو إريكتوس، وهومو هابيليس وهومو إركاستر والهومو سابيينس الأولين (الإنسان ديال دابا)، للي تلقا فإتيوبيا, تايرجع تقريبا ل 200,000 عام. جات أفريقيا فوق خط الإستواء وكاتضم بزاف ديال المناطق المناخية; وهي القارة الوحيدة للي كاتمتد من المناطق المعتدلة الشمالية حتى للمناطق المعتدلة الجنوبية.

إفريقيا فيها مجموعة كبيرة ومتنوعة من الأعراق والثقافات واللغات. ف الأواخر ديال القرن التاسع عشر، استعمرت الدول الأوروبية إفريقيا كلها تقريبًا؛ أغلبية الدول للي كاينين دبا فأفريقيا جاو من بعد ما سالا الاستعمار في القرن العشرين. تتعاون الدول الإفريقية بيناتها بليتيحاد ليفريقي، اللي كاين المقر الرئيسي ديالو فأديس أبابا.




#Article 35: إلحاد (541 words)


لإلحاد ؤلا تاملاحديت هوّا، ف لمعنى لعام، غياب لإعتقاد ب لوجود د لآلهة. ؤ ف تعريف منتاشر قل، كنلقاو بلي لإلحاد هوّا رفض لعتيقاد ب لوجود د لآلهة. ؤ ب معنى قريب نقدرو نڭولو؛ لإلحاد هو رّي لّي كيڭول بلي لآلهة ما كاينينش. لإلحاد هوّا ضّد ديال لألوهية، لّي، ف لمعنى لعام، كتعني لإعتقاد بوجود إلاه واحد عل لأقل.

ف لعربية ؤ حسب لسان العرب، لإلحاد هوّا «المَيْلُ عن القصْد، ولحَدَ إِليه بلسانه: مال. […] وأَصل الإِلحادِ: المَيْلُ والعُدول عن الشيء» يعني ب دّاريجة أن لواحد يزيغ ؤلا يبعد علا شي حاجة، أما ف أغلب لغات لعالم ؤ علا حساب صيونص د لإيتيمولوجيا، فا لكلمة جاية من لجدر ليوناني ἄθεος (أتِيُوس) لي كيرجع تاريخ ديالو ل لقرن لخامس قبل لميلاد ؤ كيعني بلا إله أولا بلا آلهة. ف لقديم، لكلمة كان عندها بزاف د لاستيعمالات بحال عبارة تنقيصية كتڭال علا هادوك لي كانو ما كيآمنوش ب لآلهة لي لأغلب ديال لمجتمع كان كيعبدهم، هادوك لي تخلاو عليهم لآلهة، ؤلا هادوك لي ما عندهومش حتى لتيزام باش يآمنو ب لآلهة. لكلمة لصقات واحد لفيئة ديال لمجتمع داروها دينيين لأرطودوكس فيها كامل هادوك لي ما كانوش كيشاركو لمعتقدات دينية ديالهم. فلونڭلي لكلمة atheism ما ضهراتش حتال لقرن سطاعش. مع نتيشار لفكر لحر، لحركة لشكوكية، ؤكترو لّي تبعوهم ف نقد دين ولات لكلمة ضاهرة على سطح. أول وحدين غادي يعرّفو على نفوسهم بكلمة atheist (ملحد) عاشو ف لقرن تمنطاعش خلال عصر تنوير. تميزات تورة لفرانساوية ب لإلحاد لماشي مسبوق ديالها، وشهدات أول حركة سياسية كبيرة ف تاريخ كدافع على سمو ديال لعقل د بنادم.

لحجج على لإلحاد كتراوح من بين لمقاربة لفلسفية حتال لمقاربات تاريخية ؤ لاجتماعية. لحجج لعقلانية على عدم لإيمان ب لآلهة كتضمّن حجج بوجود نقص ف دليل تجريبي، لمشكلة د شّر، لحجة د لوحي لماشي متناسق، رفض لمبادئ لي ما يمكنش تكون غالطة، ؤ حجة د عدم لإيمان. ناس لي ما كيآمنوش كيدافعو على كون لإلحاد موقف أكثر قتيصادية من لألوهية ؤ بأن لإلحاد هو لأصل يعني أن أي واحد تزاد بلا إيمان ب لآلهة؛ داكشي علاش كيڭولو بأن لإلزام ب لإتبات ما كاينش على لملحدين باش يبينو بأن لآلهة ما كينينش، وإنما كاين علا لألوهيين باش يوفرو شي دليل عقلاني علا لألوهية. وخا بعض لملحدين تبناو فلسفات علمانية (بحال لإنسانية لعلمانية)، فما كاينش إيديولوجية وحدة ؤلا قانون واحد كيخضعو ليه لملحدين كاملين.

بسباب تعدد د مفاهيم لإلحاد، صعيب باش نحصلو علا تقديرات دقيقة ديال عدد لملحدين لحاليين. حسب دراسات لي شملات لعالم كاملو ديال وين-ڭالوپ الدولية؛ %13 ديال المستجوَبين ڭالو بأنهم ملحدين مقتانعين ف2012، %11 كانو ملحدين مقتانعين ف2015، ؤف2017 كانو %9 ملحدين مقتانعين. واخا هاكا، باحثين خرين وصاو بتوخي الحذر مع معطيات وين/ڭالوپ حيت الاستقصاءات لوخرا اللي استخدمات نفس الطريقة لعقود مع عينة أكبر ديال الناس بقاو كيتوصلو بأرقام أصغر كل مرة. استقصاء قديم ديال لإداعة لبريطانية (بي بي سي) ف 2004 جا فيه بأن لملحدين كيشكلو %8 ديال سّكان د لعالم. تقديرات خرا قدم ڭالت بأن لملحدين كيشكلو %2 من سّكان د لعالم، بينما لادينيين مشاو بعيد عليهم بشي %12. حسب هاد لستيطلاعات كانت ؤروپا ؤ شرق آسيا هوما لمناطق لي فيهم أكبر لمعدلات ديال لملحدين. ف 2015، %61 ديال ناس ف شينوا ڭالو بأنهم ملحدين. لمعطيات ديال واحد ليوروباروميتر ديال ليتيحاد لؤروپي ف 2010 جا فيها بأن %20 ديال سّكان د لتيحاد لؤروپي ڭالو بأنهم ما كيآمنوش ب أي شكل ديال لأرواح، الله، ولا قوى فوق طبيعة.




#Article 36: إمارة نّكور (148 words)


إمارة نّكور ولا إمارة بني صالح هي دولة أمازيغية كانت ف شّمال د لمغريب ف لمنطقة د أريف بين لقرون 8 و 11. تأسّات ف 710 م وكان أول حاكم ديالها صالح بن مصور و سالا لوجود ديالها (من بعد ما قضاو عليها لمورابيطين) ف عام 1019 م. لمؤرخين كايعتابروها أول دولة إسلامية ف لمغريب لّي ستاقلات على المشرق.

لعاصمة ديالها كانت كاتبدل بين تمسمان و نّكور (ف جوايه لموقع لحالي د لحسيمة).

لإمارة تأسّات من بعد بداو تورات ف لمغريب ضد لحكم د لأمويين لّي كانو كتيتكرفصو بزاف على لمغاربة ب ضّرائب و لولاة ديالهوم كايخطفو منهوم بزاف د لعبيد و كايصيفطوهوم ل لمشرق. ف هاد ضروف ناضت سّيبة ف لمغريب ضد لأمويين و بدات ف طنجة ب تّورة ديال مسيرة لمدغري ولّي خلات بزاف ديال لمناطق تعلن لستيقلال ديالها و تعتانق مذهب لخوارج صّفريين.

إمارة نّكور كانت ستيتناء ب حيت أنها بوحدها بقات مالكية و سنية.




#Article 37: إمانويل ماكخون (209 words)


إمانويل ماكخون (ب لفرانسوية: Emmanuel Macron) تزاد ف أميان ف 21 دجنبر 1977، هو سياسي ؤ مصرفي ديال ستيتمار فرانساوي. هو تامن رائيس د لجمهورية لفرانسوية لخامسة. خدا لمنصب ديالو نهار 7 ماي 2017. تيتعتابر أصغر رئيس داز على التاريخ د فرانسا.

بدا ماكخون لمسيرة السياسية ديالو ف 2006 ملي دخل للحزب ليشتيراكي لفرانساوي، و ف 2012 تعيًن نائب د لأمين لعام د الرئاسة د لجمهورية لفرانساوية عند فرونسوا هولاند، و من موراها وزير د ليقتيصاد والصناعة وليقتيصاد الرقمي، وبقا ف ديك لمنصب تال 2016. فديك لعام النًيت غادي يأسس لحزب ديالو إلى لأمام ويترشح معاه للينتيخابات د 2017 اللي غادي يكون فيها ضد مارين لوپين وغايربحها مورا ماجاب 66% د لأصوات ويولًي الرئيس د فرانسا ف 14 ماي 2017.

ماكخون متزوج ب بريجيط طرونيو (ب لفرانسوية: Brigitte Trogneux) الي كبيرة عليه ب 24 عام تقريبا, وهاد المرا كانت المعلمة ديالو ف مدرسة لا بروفيدنس الثانوية ف أميان, تلاقاو بجوج بيهم فاش كان كيقرا عندا ماكخون ملي كانت عندو 15 عام, وتصحابو فاش ولا عندو 18 عام.

الواليدين ديالو فلول حاولو يبعدوهوم على بعدهوم وسيفطوه لباريس باش يكمل العام اللخر ديالو فالقراية حيت شافو هاد العلاقة ماشي تا لتما, ولكن ماكخون وبريجيت بقاو على علاقة حتى تخرج, وتزوجو ف 2007. ودبا كيعيشو بجوج بيهم مع ولادا من راجل السابق.




#Article 38: إيران (170 words)


لجمهورية لإسلامية د إيران ولاً إيران (بلفارسية: جمهورى اسلامى ايران) هي دولة فلجنوب لغربي ديال آسيا. هي تاني أكبر بلاد من ناحية السكان فالشرق لأوسط من مورا مصر, وتيسكنو فيها 83 مليون واحد. إيران تاني أكبر بلاد تا من ناحية لمساحة فالشرق لأوسط, من مورا السعودية. لمساحة ديالها هي 1.648.195 كم². تيحدوها من الشمال أرمينيا وأزيربيدجيان وتوركمانيستان وبحر قزوين, من الشرق أفغانستان وباكستان, من لغرب لعراق وتركيا, ومن لجنوب لبحر د لخليج.

العاصمة ديال إيران هي طهران. اللغة الرسمية فيها هي الفارسية و الدين الرسمي هو لإسلام. لفلوس اللي تاتخدًم فإيران هي الريال لإيراني.

إيران عندها تاريخ قديم ودازو منها بزاف د لحضارات اللي أتروا عليها. بزاف ديال لعلماء ولفلاسفة والشعراء اللي أتروا فالتقافة ولحضارة لإسلامية كانو من إيران. ف 1501, الدولة الصفوية غادي تحكم إيران وتفرض فيها لمدهب الشيعي, اللي غادي يولي هو أهم مذهب فلبلاد. ف 1979, غادي تنوض فلبلاد ثورة ضد الشاه ديالها اللي غادي يهرب, ويخلي لحكم لواحد السيد سميتو لخميني. هاد الثورة تسمات التورة لإسلامية. وهي اللي حدًدات النظام اللي باقي تيحكم إيران تال دابا.




#Article 39: إيريطيريا (191 words)


إيريطيريا (ب التيڭرينية: ሃገረ ኤርትራ) هي بلاد ف شرق إفريقيا، و بالضبط ف لقرن لإفريقي. تاتحدّها السودان من لغرب، إتيوپيا و دجيبوتي من لجنوب، و لبحر لحمر من الشمال والشرق.

لأرض اللي فيها إيريطيريا عندها تاريخ سياسي قديم. مابين لقرن اللول و التاني د لميلاد كانت تابعة للمملكة د أكسوم، اللي دخّلات لمسيحية ف لقرن الرابع. ف لعصور لوسطانية، كانت لمملكة اللي حكمات تما هي مدري بحري (لبلاد د لبحر). ف 1890 ستعمرات الطاليان إيريطيريا و بقات تابعا ليها تال 1941، اللي هو لعام اللي خداو لبريطانيين لأرض من الطاليانيين و ستعمروها. ف 1950 دخّلات إتيوپيا لأرض د إيريطيريا معاها. هاد التدخيلة جابت حرب بقات 40 عام حتا دارت لأمم لمتحدة ستيفتاء صوتو فيه لأغلبية على لإستقلال، و ولاّت إيريطيريا بلاد مستاقلة ف 1993.

تيسكنو ف إيريطيريا تقريبا 6 د لمليون د الناس و لعاصمة ديالها هي أسمارا. الدستور د لبلاد ما فيه تا لغة رسمية، و لكن اللغات اللي كاتخدّم ف لإدارة هي التيڭرينية و لعربية و لينڭليزية، و عاد كاين 9 د اللغات اللي كلّها لغات وطنية. لفلوس اللي كاتخدّم هي النقفة. إيريطيريا داخلة مع لأمم لمتحدة و ليتيحاد ليفريقي، و هي عضو مراقب ديال الجامعة د الدول لعربية.




#Article 40: إيلون موسك (412 words)


أيلون موسك (تزاد ف 28 يونيو 1971) هو رجل اعمال ومستتمر فالتكنولوجيا، ومهندس. عندو الجنسية ديال جنوب إفريقيا و كندا و الميريكان، وهو المؤسس والرئيس التنفيدي والشاف ديال المهندسين والمصميين ديال شركة سبيس ايكس؛ مشارك فتأسيس شركة تيسلا ومدير تنفيدي ومهندس منتج ديالها ؛ شارك فتأسيس شركة نوراليك؛ المؤسس ديال شركة ذا بورنج كمباني؛ مشارك فتاسيس أوبن أي آي وواحد من رؤساء مجلس الإدارة ديالها؛ مشارك فتأسيس شركة بايبال. ف ديسمبر 2016 كان تكلاسا هو 21 فاللائحة د فوربس ديال أقوى الناس فالعالم. عندو واحد القيمة ديال 22.8 مليار دولار ميريكاني، وكلاساتو فوربس 40 فالائحة ديال أغنى الناس فالعالم.

تزاد وتربا فبريتوريا فجنوب أفريقيا، ومشا لكندا ملي كانت عندو 17 عام باش يقرا فجامعة كوينز، ومن بعد عامين تحول لجامعة بينسلفينيا، وتما خدا الإجازة ديالو فالاقتصاد من مدرسة وارتون وباكالوريوس اخرا فالفيزيك من مدرسة الفنون والعلوم، وبدا كيوجد الدوكتورا ديالو فالفيزيك التطبيقية وعلم المواد فجامعة ستانفورد ف 1995 ولكن خرج من القراية من بعد يومين باش يلتاحق بالمسار ديالو فالأعمال الحرة. من بعد غايشارك فتأسيس زيب2، واحد الشركة ديال البرمجيات دالويب، لي من بعد غاتشريها شركة كومباك ب 340 مليون دولار ف 1999. مسك من بعد غايأسس شركة ايكس.كوم، واحد البانكة أونلاين، لي تشركات مع شركة كونفينيتي ف 2000 ومن بعد فنفس العام ولات بايبال، لي غاتشريها إي باي ب 1.5 مليار دولار ف2002.

فماي 2002، مسك أسس شركة سبيس إيكس، واحد الشركة كتهتم بتصنيع الصوارخ والرحلات فالفضاء، لي هو المدير التنفيدي والمصمم الرئيسي ديالها. انضم لشركة تيسلا ، واحد الشركة كتصايب طونوبيلات كيخدمو بالضو، ف 2004، عام من مورا ما تأسسات، وولا هو المدير التنفيدي ومهندس المنتج ديالها. ف 2006 الهم انشاء شركة سولار سيتي، واحد الشركة ديال الطاقة الشمسة (لي ولات دابا تابعة ل تيسلا)، وخدم رئيس مجلس الإدارة فيها. ف 2015، مسك شارك فتأسيس اوبن أي آي، واحد شركة تقلاب غير ربحية لي كتهدف لترويج ذكاء اصطناعي ضريف. ف يونيو 2016، شارك مسك فتأسيس نورالينك، واحد الشركة ديال التقنية العصبية مركزا على تطوير واجهة مخ-حاسوب (تقنية كتهدف للاتصال المباشر بين مخ بنادم والحاسوب). فديسمبر 2016 مسك أسس ذا بورنج كمباني، لي هي شركة ديال البنية التحتية وكتهتهم بحفير الأنفاق.

فوق من المساعي التجارية ديالو، مسك تصور نظام ديال الترونسبور عالي السرعة سماه هيبرلوب، واقترح الفكرة ديال طيارات نفاتة اسرع من الصوت كتطلع وتهبط عموديا بالدفع ديال فرفرات كتخدم بالضو. مسك ڴال بلي الهذف ديال سبيس ايكس، تيسلا وسولار سيتي كتدور حول الرؤية ديالو لتغيير المستقبل ديال بنادم. الأهذاف ديالو فيها النقيص من الإحتباس الحراري بالانتاج والاستهلاك ديال طاقة المتجددة والنقيص من الخطر ديال الانقراض ديال بنادم ببناء مستوطنات فالمريخ.




#Article 41: ابن بطوطة (105 words)


محمد بن عبد الله بن محمد اللواتي الطنجي، اللي معروف بابن بطوطة (تولد فطانجا ف 24 فبراير 1304، ومات فيها ف 1377) كان رحالة ومؤرخ وقاضي أمازيغي تسمّى أمير الرحالة لمسلمين. كان من أول الناس اللي تساراو لعالم، وسافر 27 عام متّابعة. مشا لبزاف د لبلايص منها لمغريب لكبير ومصر ولحبشة و الشام و الحجاز ولعراق ووصل تال شي بلايص فالشينوا و لهند و إفريقيا.

فعام 1355، كتب كتاب تحفة النظار في غرائب الأمصار وعجائب الأسفار، اللي تيهضر فيه على الأسفار ديالو، واللي تعرف فلعالم كلّو واتّرجم لبزاف داللغات بحال لفرانساوية ولبرتغالية ولينڭليزية.

مات ابن بطوطة فمدينتو طنجة ف 1377، وتدارليه ضريح فلمدينة لقديمة ديالها.




#Article 42: ابن خلدون (151 words)


عبد الرحمن بن محمد ابن خلدون أبو زيد ولي الدين الحضرمي الإشبيلي (تولد ف تونس لعاصمة ف 27 ماي 1332 - مات ف لقاهرة ف 1406) و اللي معروف بسميًت ابن خلدون, كان مؤرًخ تونسي, ومشهور حيث كيتعتابر هو اللي أسس بزاف د لعلوم بحال السوسيولوجيا و الديموڭرافيا.

كبر ابن خلدون فتونس وتخرًج من جامعة الزيتونة, وموراها تسارا فلمغرب لكبير و لأندلس وكوًن راسو وخدا بزاف د لمناصب. كان حافظ لقرآن وقاري علوم لأحياء ولفلسفة وتا لإقتصاد, وداكشي اللي كان تيخلًي بزاف د لملوك يبغيوه ويعرضو عليه لبلدانهم باش يڭلس معاهم فلمجالس لعلمية. أشهر كتاب كتب ابن خلدون سميتو المقدمة, وهو كتاب بحال موسوعة فيه معلومات على بزاف د لحوايج على علم لإجتماع, بحال شناهو مفهوم الدولة وعلاش الدول تيمشيو ويجيو, وشنو هو مفهوم قبيلة وكيفاش كيتطور بنادم و لمجتمع.

ابن خلدون عاش اللخر د حياتو فمصر, وكان هو لقاضي ديالها, وبقا تما حتى مات وتدفن فباب النصر فلقاهرة ف 1406.




#Article 43: لارجونتين (120 words)


لارجونتين، رسميا لجمهورية د الأرجنتين هي دولة عندها سيادة جات فلجزء الجنوبي دل قارة د أمريكا لجنوبية. كتشارك لمخروط لجنوبي مع شيلي اللي جات فلغرب ديالها، وعندها حدود حتى مع بوليڤيا وپاراڭواي فالشمال، لبريزيل فالشمال الشرقي، أوروڭواي ولمحيط لأطلسي لجنوبي فالشرق، وممر دريك فالجنوب. بمساحة 2,780,400 كم² كتعتابر الأرجنتين ثامن أكبر دولة فلعالم، رابع أكبر دولة فالأمريكيتين، ثاني أكبر دولة فأمريكا لجنوبية مورا لبريزيل، وأكبر دولة تاتهضر الصبليونية فالعالم. لأرجنتين مقسومة لـ 23 إقليم ومدينة فيها حكم ذاتي وحدة، هي بوينس آيرس، اللي هي العاصمة الفدرالية ديال الدولة كيفما تقرر ف لكونڭرس. العاصمة وكل إقليم عندهم الدستور ديالهم بوحدهم ولكنهم كاملين مجموعين بنظام فدرالي. لأرجنتين كتطالب بطرف من أنتاركتيكا، جزر فوكلاند، وجورجيا الجنوبية وجزر ساندويتش باش يكونو تحت السيادة ديالها.




#Article 44: الأعمدة ديال هيركوليس (217 words)


الأعمدة ديال هيركوليس هي العبارة اللي كاتّستعمل باش توصف الدخلة من المحيط الأطلسي للبحر البيض المتوسط. هاد الوصف جا من عند القدماء اللي كانو كيتنقلو ف هاد المنطقة. هاد الأعمدة كيتواجدو ف مضيق جبل الطّر. العمود الشمالي، اللي السمية الأسطورية ديالو هي كالپي، هو الجبل اللي كاين ف جبل الطّر (مستعمرة بريطانية ف الجنوب د الصبليون) و واخد نفس السمية. و العمود الجنوبي (آبيلا) هو جبل موسى (60 كيلوميتر ف الشرق ديال طانجا)، ف الوقت اللي كاينين مصادر، صبنيولية ف الأغلبية ديالها، كيقولو بيلا جبل هاتشو ف سبتة (مدينة صبنيولية ف الشمال د المغريب) حتى هو مرشح باش يكون العمود الجنوبي ديال هيركوليس.

ملي كان هيركوليس باغي يمشي للجردة ديال هيسپيريديس ف جزيرة إيريتيا، كان خاصو ضروري يقطع واحد الجبل كانت سميتو أطلس. فعوض ما يتسلق الجبل، ستعمل القوة الخارقة ديالو و اخترق وسط الجبل حتى خرج من الجهة الخرا. ب هاد الفعلة هادي، هيركوليس لاقا للمرة اللولة البحر البيض المتوسط مع المحيط الأطلسي و خلق المضيق ديال جبل الطّر. هادشي كيعني بيلا، على حساب هاد الأسطورة، جبل موسى و جبل الطّر ما هوما غير بقايا ديال الجبل القديم د أطلس.

ديودوروس سيكولوس، مؤرخ إغريقي، كان كيحكي بيلا هيركوليس ضيّق الممر البحري اللي كان ديجا كاين بلحاق كان واسع بزاف (ماشي بحال الأسطورة د الرومان) باش يمنع الوحوش ديال المحيط الأطلسي من أنهم يدخلو للبحر البيض المتوسط.




#Article 45: الإبادة الجماعية ديال الأرمن (317 words)


الإبادة الجماعية ديال الأرمن، (بالأرمينية: Հայոց ցեղասպանություն؛هايوتس تسيڭهاسپانوتيون، بالتركية: Ermeni Soykırımı/Ermeni Kırımı، بالفرونسي: Génocide arménien) كتسمى عاوتاني الهولوكوست الأرمني هي الإبادة الواسعة الممنهجة والترحيل القصري ديال 1،5 المليون واحد من الإتنية الأرمينية فالإمبراطورية العتمانية (الأغلبية ديالهم كانو مواطنين) بواسطة الحكومة العتمانية من تقريبا 1914 حتال 1923. من المتفق عليه بللي تاريخ بداية هاد الأحدات كان نهار 24 أبريل 1915، النهار فاش جمعات فيه السلطات العتمانية، وڭفات، ؤرحّلات من 235 حتال 270 متقف ؤقائد مجتمع أرمني من القسطنطينية (دابا إسطنبول) لمنطقة أنڭورا (أنقرة)، ؤالأغلبية ديالهم قتلوهم فنهاية المطاف.

الإبادة الجماعية ديال الأرمن تنفدات فالوقيتة ديال الحرب العالمية اللولة ؤمن بعدها، ؤتنجزات على جوجت المراحل؛ القتيل الجماعي ديال الدكور اللي عندهم قدرة بدنية من خلال المجازر ؤتعريضهم للخدمة القسرية فاش كانو فالعسكر، ؤتبعاتها الترحيل ديال العيالات، الدراري الصغار، الناس الكبار، ؤالعجزة فمسيرات الموت اللي كتوصل للصحرا السورية. كانو واڭفين عليهم العسكر فهاد المسيرات، ؤكانو مانعينهم من الماكلة والما ؤكانو كيتعرضو للشفرة، الاغتصاب، ؤالمجازر بشكل دوري. الأغلبية ديال مجتمعات الأرمنيين فبرّا كانو السباب المباشر ديال هاد الإبادة الجماعية.

تستهدفات مجموعات عرقية خرى بالإبادة بنفس الطريقة بحال الإبادة الجماعية ديال الأشوريين ؤالإبادة الجماعية ديال اليونانيين، ؤهاد المعاملات عتابروها بعض المؤرخين على أنها كتندارج تحت نفس السياسة ديال الإبادة الجماعية.

رافائيل ليمكين تحرك خصيصا على حساب الإفناء ديال الأرمن باش إعرّف قانونيا الإبادات المنهجية والمخطط ليها، ؤهو اللي خرج كلمة genocide اللي كتعني إبادة جماعية ف1943., United States Holocaust Memorial Museum الإبادة الجماعية ديال الأرمن تعرفات على أنها وحدة من أولى الإبادات الجماعية فالتاريخ المعاصر، حيت الباحتين كيشيرو للطريقة المنضمة ديال القتيل. راها تاني أكتر متال كيتدرس على الإبادات الجماعية من بعد الهولوكوست.

تركيا كتنكر بللي كلمة إبادة جماعية هي الكلمة الدقيقة للتعبير على هاد الجرائم، ولكن فالسنوات اللخرة تم التصدي لهاد الموقف مع الارتفاع ديال دعوات الاعتراف بأنها إبادة جماعية. اعتبارا من 2019، كان المجموع ديال حكومات ؤبرلمانات الدول اللي كتعتارف بهاد الأحدات على أنهم إبادة جماعية هو 32 بما فيهم الميريكان، روسيا، ألمانيا وغير تلاتة الدول العربية؛ سوريا، لبنان، ؤليبيا.




#Article 46: الإدريسي (180 words)


أبو عبد الله محمد الإدريسي القرطبي الحسني السبتي، اللي معروف بلإدريسي (تولد فسبتة ف 1099، ومات فصقلية ف 1166) كان رحالة وطبيب وشاعر وجغرافي مغريبي, من المؤسسين د لعلم د لجغرافيا فلعالم. لإدريسي معروف باللي رسم بزاف د لخرائط د لعالم فيها تفاصيل بزاف ودقة عالية, وتخدًمات هاد لخرائط فلعصر د النهضة فأوروپا.

تسارا الإدريسي فبزاف د لبلدان د لعالم ملًي كان تيتعلًم, وختار يعيش فصقلية, حيث لماليك ديالها ديال ديك الساعة (روجيرو التاني) كان عزيز عليه لعلم و لعولالما وتيعطيهم لإمكانيات بزاف وتيعاونهم. فصقلًية لقا الإدريسي لجو مزيان باش يخدم, وكتب كتابو لمشهور نزهة المشتاق في اختراق الآفاق اللي هضر فيه على لجغرافيا د بزاف د لبلايص فلعالم ورسم فيه تا لحدود ما بين لبلدان د ديك لوقت. دوز الإدريسي 15 لعام باش يكتب هاد لكتاب, اللي ولاً من بعد مصدر مهم عند ڭاع لأوروپيين لي جاو موراه.

مات الإدريسي عام 1166 فصقلية, وماكاينش بزاف د لمعلومات على فين مدفون بالضبط.

ف 2015, سمًات النازا واحد السلسلة د الجبال فلكوكب د پلوتو بسميت الإدريسي باش تعتارف بلمساهمات اللي دار فلجغرافيا و اللي عاونات يوصل بنادم لليكتيشافات اللي كاينة دابا.




#Article 47: البشير الدامون (234 words)


البشير الدامون (خلاق ف تطوان) كاتب و روائي مغريبي صدر أول رواية ديالو ف 2008، سرير الاسرار، و لّي لقات نجاح كبير ف لمغريب و دّول لعربية. لعالم رّوائي ديال الدامون فيه تخليطة زوينة بين الفانتازيا (الخيال و لأساطير) و تّاريخ و لواقع لمعاصر. تطوان و تّاريخ ديالها و لحومات شّعبية ديالها حاضرين بزاف ف لأعمال ديالو و كاتميز حتا ب لخطوط سّردية لمتوازية ف أوقات و أزمنة مختلفة.

كبر البشير الدامون ف حومة شعبية ف تطوان و كان مبلي ب لقراية و لأدب من صغرو. كانت عندو محاولات أدبية ف شّباب ديالو و ب دّات ف لقصة لقصيرة و شّعر.

فاش وصل لجامعة قرا لقتيصاد و فاش تخرج خدم موظف ف لبوسطة. واخا خدم، كان باقي عندو طموح باش يحقق لحلم لأدبي ديالو، عاود لباك أدبي و عاود تقيد ف لجامعة ف كلية أصول الدين و من بعد كمل ف كلية الآداب و اختار الأدب الفرنسي.

لقصة ديال أول رواية ديالو غريبة، حيت فاش سالاها عيا ما يقلب على شكون ينشرها و صيفط طلب ل وزارة تّقافة لمغريبية باش يستافد من برنامج دعم الكتاب الأول و ماتسوقوش ليه. زعم البشير وصيفط لكتاب ديالو ل دار نّشر لّبنانية دار الآداب البيروتية، لّي كاتعتابر من أقدم و أعرق ديور نّشر ف لعالم لعربي و لّي ما كاتنشرش ل من والا. و هاكا تنشرات سرير الأسرار ف 2008 و لّي لقات نجاح كبير ف دّول لعربية. ف 2013 تحولات ل فيلم سينمائي من إخراج الجيلالي فرحاتي.




#Article 48: التاريخ د المغرب (2178 words)


تاريخ ديال المغرب من بعد الثقافات لي بانو قبل التاريخ بحال لي تلقاو الأثار ديالها ف جبل إيغود وتافوغالت تايرجع لألاف السنين. وتيبدا من تاسيس ديال مملكة موريطينية والممالك الأمازيغية القديمة، حتى لتاسيس ديال الدولة المغربية من طرف سلالة الأدارسة ومن بعد جاو سلالات اسلامية اخرين، ومن تما لعهد الحماية وتالفترات مابعد الإستقلال.

الأثار لي تلقاو فالمغرب بينو بلي هاذ المنطقة كانو عاشو فيها الناس قبل 400000 سنة عل الاقل. ولكن التاريج المسجل ديال المغرب تيبدا مع الإستعمار الفينيقي للسواحل المغربية مابين القرن الثامن والتاسع قبل الميلاد. ولكن المنطقة عاشو فيها الامازيغ شي ألاف السنين قبل من الفينيقيين. والقرن الخامس قبل الميلاد، وسعات مدينة قرطاج السيطرة ديالها على السواحل. وبقاو تما حتى لافان ديال القرن الثالث قبل الميلاد، من بعد ولاو الملوك الأصليين تايحكمو دوك المناطق. ومن القرن الثالث قبل الميلاد حتى للقرن الرابع بعد الميلاد كانت المنطقة تايحكموها الحكام الأصليين الأمازيغ.

تعرضات المنطقة للغزو من المسلمين فلول ديال القرن الثامن الميلادي، ولكن انفصلت على الخلافة الاموية من بعد ما ناضت الثورة البربرية عام 740. من بعد نص قرن، تاسسات الدولة المغربية من طرف الأدارسة. وفالعهد ديال لمرابطين ؤ لموحدين كان المغرب كايسيطر على المغرب الكبير واسبانيا. أما السعديين فحكمو المنطقة من عام 1549 حتال 1659، تبعوهوم العلويين من 1667 حتى لدابا، لي مازالين تايحكمو المغرب.

ف 1912 ومن بعد الازمة المغربية وأزمة أكادير، تسنات المعاهدة ديال فاس، وقسمات المغرب مابين الحماية دالفرنسيس والحماية دصبليون. وف 1956، ومن بعد 44 عام ديال الحكم الفرنساوي، حصل المغرب على الإستقلال ديالو من فرنسا. ومن بعد وقت قصبر رجع أغلبية الأراضي لي كانو تحت السيطرة ديال سبانيا.

بيينات الحفريات الأثرية بلي المغرب عاشو فيه لاسلاف ديال الهوموسابيينس، وحتى شي أنواع بشرية مبكرة. فعام 1971 تم ليكتيشاف ديال شي عظام متحجرة لواحد سلف بشري عمرو 400،000 عام في سلا. وفعام 1991 تجبدات العظام ديال العديد من الهوموسابينس ف جبل إيغود، وملي تدار ليها التأريخ بالتقنيات الحديثة في عام 2017 تبين بلي لعمر ديالهم مكايقلش على 300000 عام، هادشي للي كايجعلها أقدم الأمثلة على الهوموسابيينس في العالم. فعام 2007، تم ليكتيشاف ديال شي حبات ديال صدف صغيرة مثقبة في تافوغالت كايوصل لعمر ديالها لشي 82000 عام، هادشي للي كيجعلها أقدم دليل تلقى على الزينة الشخصية فالعالم.

في العصور لحجرية الوسطى، ما بين 20،000 و5000 سنة، كانت لجغرافيا ديال المغرب كاتشبه لسافانا أكثر من المناظر الطبيعية القاحلة للي كاينة دابا. واخا كانعرفو غير شوية على المستوطنات في المغرب فداك الوقت، ولكن الحفريات للي تدارو فبلايص خرين فالمنطقة المغاربية بيينات بللي كان فيها بزاف ديال الحيوانات والغابات مناسبة للصيادين والملتقطين ديال العصر الحجري الوسيط بحال دوك ديال لحضارة لقبصية.

ففترة العصر الحجري الحديث، للي تبعات العصر الحجري الوسيط، كانت سافانا كايحتلوها الصيادين والرعاة. زداهرات ثقافة ديال هاد الصيادين ورعاة ديال العصر الحجري الحديث حتى بدأت هاد المنطقة كاتجف بعد 5000 ق.م. بسباب التغيرات المناخية. كاتشتارك المناطق الساحلية ديال لمغرب الحالي في للول ديال العصر الحجري الحديث في ثقافة ديال فخار الكارديوم اللي كانت شايعة فمنطقة البحر المتوسط كلها. وبيينات الحفريات الأثرية بللي تدجين الماشية وزراعة المحاصيل طرات فالمنطقة فديك الفترة. في فترة العصر النحاسي، وصلت حضارة القدور الجرسية للساحل الشمالي ديال لمغرب.

لوصول د لفينيقيين ل الساحل لمغريبي كان دليل على أن الشمال د لمغريب غاتحكمو قوى برانية بزاف د لقرون. التجار لفينيقيين اخترقو لغرب د لبحر لأبيض لمتوسط قبل القرن الثامن قبل الميلاد، ومن بعد بناو ديبووات د لملحا ولخام على جنب الساحيل وعلى لأنهار ف لمغريب. ومن بين المستوطنات لقديمة د لفينيقيين كاينا شالا وليكسوس وموغادور. ؤموكادورمعروفة على أنها أقدم مستعمرة فينيقية من اللوول د لقرن السادس قبل من الميلاد.

مللي دخل لقرن الخامس قبل الميلاد، وسعات لولاية د قرطاج السيطرة ديالها على أغلب الشمال د إفريقيا. ؤطورات قرطاج لعلاقات التجارية ديالها مع لقبائل لأمازيغية الداخلية، ووكانت كاتعطيهوم واحد الضريبة سنوية باش إضمنو التعاون ديالهم معاهوم ف لإستغلال د لمواد لخام

كانت موريطنية مملكة أمازيغية مستاقلة من لقرن الثالث قبل لميلاد كأقل تقدير، في حين أنه كاينين أدلة من مراجع قديمة كتوثق أن مملكة موريطانيا كانت موجودة بالفعل فالقرن السادس قبل الميلاد، بل أنها دخلت فحرب مع قرطاج فأواسط القرن الخامس حسب جستانو فأواخر نفس القرن كيقول ديودوروس الصقلي بلي جيش قرطاج كان فيه جنود موريين و حنا عارفين أن الملك القرطاجي حانون طلب مساعدة عسكرية من الموريين على حساب ما قال جستان، و جغرافيا موريطانيا هي لمنطقة للي ف شمال لمغريب دابا. كان أول ملك معروف لموريطنية حسب كتابات تيتوس ليفيوس هو الملك باگا. لبعض من التاريخ ديالها لمسجل كيتعلق بلمستوطنات لفينيقية ولقرطاجية بحال ليكسوس ؤشالا. حكمو لملوك لأمازيغ لمناطيق دخلانية ؤكانو كايسايطرو على لمناطيق لإستيطانية الساحلية د قرطاج ؤروما، غالبا على أساس أنها تابعة ليهم، وسمحوا بتواجد د لحكم الروماني. فعام 33 قبل الميلاد ولات عميلة للإمبراطورية الرومانية، من بعد تحولات لمقاطعة كاملة من بعد ما الإمبراطور كاليجولا عدم آخر ملك ديالها، اللي هو بطليموس لموريطني، (40 م).

سايطرت روما على لأراضي الشاسعة اللي ما كانتش محددة، بالتحالفات اللي دارتها مع لقبائل عوض لإحتلال لعسكري، ؤوسعات السيطرة ديالها غير على لمناطيق اللي كانت نافعة من الناحية لإقتصادية ؤلا اللي كانت يمكن تدافع عليها بلا ما تزيد لقوة لبشرية. وداكشي علاش، لإدارة الرومانية ما عمرها فاتت دوك لمناطيق لمحصورة ف السهل الساحلي الشمالي والويدان. شكلت هاد لمنطقة لإستراتيجية جزء من لإمبراطورية الرومانية، اللي تحكمات على أنها موريطنية الطنجية، وكانت لعاصمة ديالها هي مدينة وليلي.

ف لفترة د لإمبراطور الروماني أوغسطس، كانت موريطنية دولة تابعة، وكانو لحكام ديالها، بحال يوبا الثاني، كايسيطرو على كاع لمناطيق اللي جات ف لجنوب د وليلي. ولكن السيطرة الفعالة د الفيلق الروماني وصلات لحد منطقة شالا كولونيا (كاسترا Exploratio Ad Mercurios جنوب شالا هي أقصى لجنوب اللي تكتاشف حتى لدابا). بعض المؤرخين كايعتاقدو بللي لحدود الرومانية وصلت حتا ل الدار البيضاء، واللي كانت ديك ساعا معروفة بسميت أنفا، واللي استقرو فيها الرومان كمرسى.

ف لعهد د جوبا الثاني، أسس أوغسطس ثلاثة د لمستعمرات، بمواطنين رومانيين، ف موريطنية حدا الساحل د لمحيط لأطلسي اللي هوما: يوليا كونستانتيا زيل، يوليا فالنتيا باناسا، ؤإوليا كامستريس باببا. أوغسطس غايأسس فاللخر 12 مستعمرة ف لمنطقة. ف ديك لفترة، عرفات لمنطقة اللي كاتسيطر عليها روما واحد التطور اقتصادي كبير، بلفضل د الطرقان الرومانية اللي تبنات. فاللول مكانتش لمنطقة كاملها تحت السيطرة د روما، ؤغير ف لوسط د لقرن الثاني فاش تبنا واحد الليمس ف لجنوب د سالا للي كبر وليلي. تقريبا ف عام 278 م حولو الرومان لعاصمة ديالهم لإقليمية ل طنجة ؤوليلي بدات كاتفقد لأهمية ديالها.

دخلات لمسيحية للمنطقة ف لقرن الثاني لميلادي، وتحولو ليها الناس ف لمدن من لعبيد وحتى من لمزارعين لأمازيغ. وف لافان د لقرن الرابع لميلادي، ولات لمناطق الرومانية مسيحية، وكانت غزوات على لقبائل لأمازيغية، اللي تحولوا بعض لمرات بشكل جماعي. كيما تطورات لحركات لإنشقاقية ولهراطقة، اللي كانت غالبا واحد الشكل من لأشكال د لإحتجاجات السياسية. كان ف لمنطقة عدد كبير من السكان ليهود حتاهوما.

بدا لغزو لإسلامي للمغريب لكبير فوسط لقرن السابع لميلادي، ؤما كمل تال اللول د لقرن الثامن. ؤجاب معاه اللغة العربية ؤلإسلام. وخا كان لمغريب طرف من لإمبراطورية لإسلامية االكبيرة، كان فاللول غير إقليم تابع لإفريقية، ؤكانو لحكام كايعينهم لحاكم المسلم اللي كاين ف لقيروان.

دخلات لقبايل لامازيغية ف لإسلام، ولاكينهم بقاو محافظين على لقوانين لعرفية ديالهم. كيما كانو كايخلصو الضرائب ولجيزية للحكام لمسلمين الجداد.

ف عام 740 ميلادي، دارو لأمازيغ ثورة ضد لخلافة لأموية اللي كانت حاكمة، ؤاللي بداوها لخوارج. بد التمرد ما بين لقبائل لأمازيغية ف لغرب دلمغرب، وانتشر بالزربة ف كامل لمنطقة. واخا وقف هاد التمرد ؤتلاشى عام 742 م قبل ما يوصل للقيروان، ولاكين الحكام الأمويين ف دمشق ولا حتى لخلفاء ديالهم لعباسيين ما عمرهم قدرو باقي إفرضو لحكم ديالهم على لمناطق اللي جات ف لغرب د إفريقية. خرج لمغريب من السيطرة لأموية ولعباسية، ووتقسم لبزاف ديال الدول أمازيغية صغيرة ؤمستقلة بحال بورغواطة وسيجيلماسا ونكور، وحتى تلمسان وتاهرت اللي كانو ف لغرب د لجزائر. ؤصاوبو لامازيغ نسخة خاصة بيهم من لإسلام. شي وحدبن منهم، بحال بنو إيفرن، حافطو على علاقتهم بالطوائف لإسلامية لمتشددة ؤالراديكالية، وشي وحدين خرين، بحال بورغواطة، صابو دين جديد سينكريتي أو مخلط خاص بيهوم.

لبرغواطين كانوا واحد لإتحاد د للمجموعات دلقبائل لأمازيغية اللي كانت كاتعيش جنب الساحل د لمحيط لأطلسي د لمغرب، لي كاينتاميو لقبيلة مصمودة لأمازيغية. من بعد ما تحالفو مع التمرد ديال لخواريج الصفرية ف لمغرب ضد لأمويين، قدرو يأسسوا دولة مستقلة (744 - 1058) ف منطقة تامسنا جنب الساحل د لمحيط لأطلسي ما بين أسفي ؤسلا تحت لحكم د طريف المطغري.

سيجيلماسة كانت مدينة مغربية من لقرون الوسطى ومركز تجاري على لحافة الشمالية د الصحراء لكبرى. كاينين الأنقاض د لمدينة على جنب نهر زيز ف واحة تافيلالت حدا مدينة الريساني. تميز التاريخ د لمدينة ببزاف د لغزوات من سلالات لأمازيغية. كانت حتى للقرن ربعطاش، لمحطة الشمالية د الطريق التجارية د الصحراء لكبيرة، ؤكانت وحدة من لمراكز التجارية لمهمة ف لمغرب لكبير ف لعصور لوسطى.

كانت مملكة نكور واحد لإمارة متمركزة ف منطقة الريف ف لمغرب. كانت لعاصمة ديالها ف اللول ف تمسمان، من بعد انتقلت لنكور. تأسست لمملكة ف عام 710 ميلادي واللي أسسها هو صالح بن منصور. ف لحكم ديالو، دخلات لقبائل لأمازيغية لمحلية للإسلام، ولكن طيحوه من بعد وبدلوه بواحد أخر من الزيديين من قبيلة نافزة. بدولو من بعد الرأي ديالهم وعاودو رجعو ابن منصور. حكمات سلالة د بني صالح، من بعد حتى ل عام 1019.

ف عام 859، دخل للمملكة مجموعة من 62 د الباطوات من لفايكنج، اللي غلبو واحد لقوة مورية ف نيكور اللي حاولو يتدخلو ف النهب ديالهم ف لمنطقة. من بعد ما بقاو ثمانية يام ف لمغرب، رجعو لفايكنج ل سبانيا ؤمشاو مع الساحل الشرقي

كانت سلالة لأدارسة نظام إسلامي تأسس ف لمغرب، واللي حكم من عام 788 حتال عام 974. تسما على سميت لمؤسس ديالو إدريس للول، ولد حفيد لحسن بن علي، ؤكايعتاقدو بعض لمؤرخين بللي لأدارسة هما لمؤسسين د الدولة لمغربية للوولى.

ختل هاد التوازن ف لبدايات د 900، مللي وصلو لفاطميين للمغرب لكبير. من بعد ما ستولو على السلطة ف إفريقية بوقت قصير، غزاو لمغرب، ؤفتحوا كل من فاس وسجيلماسة. كان لمغرب مقسم ديك ساعا، حيث كانو لحكام لفاطميون ولمجموعات لمتشددة الجديدة والتدخل من الأمويين لأندلس كلهم كايتقاتلو على لمنطقة. لحكام المحليين لإستغلاليين باعو ؤعاودو باعو الدعم ديالهم لأعلى مزايد. ف عام 965، غزا لخليفة لفاطمي لمعز المغرب مرة أخيرة ونجح ف تأسيس ديال واحد النظام. من بعد بوقت قصير، نقلو الفاطميين لإمبراطورية ديالهم للشرق ف مصر، بعاصمة جديدة ف لقاهرة.

عيينو الفاطميين الزيريين، اللي هما قبيلة من زناكة متمركزة ف إفريقية، باش يراقبو لمناطق لقربية اللي كايسايطرو عليها. واخا هاكداك، الزيريون ما قدروش يمنعو لمغرب من أنه يخرج من السيطرة ديالهم وطاح بين يدين د مجموعة من مشايخ زناتة لأمازيغية لمحلية، وأغلبهم من عملاء لخليفة د قرطبة، بحال مغراوة ف منطقة فاس ولمنافسين ديالهم الرحل، بنو يفرن ف الشرق.

كان المغرب ف أقوى لحالات ديالو مللي حكماتو واحد سلسلة من السلالات لأمازيغية، للي طلعات للحكم من لجنوب د جبال الأطلس ووسعات الحكم ديالها لجيهة شمال، وخداو بلاصت لحكام المحليين. ف القرن حظاش وطناش تأسسات بزاف ديال السلالات الأمازيغية المهمة واللي أسسوهوم المصلحين الدينيين، كل سلالة منهوم كانت مبنية على كونفدرالية قبلية واللي سيطرو على المغرب الكبير والأندلس لكثر من 200 سنة. عطات السلالات الأمازيغية (المرابطين، الموحدين، المرينيين ؤالوطاسيين) للأمازيغ واحد لقدر من الهوية الجماعية والوحدة السياسية.

سلالة المرابطين (c.1060-1147) لأصل ديالهم من قبيلة لمتونا الأمازيغية اللي تابعة لصنهاجا. قدرو أنهم يوحدو المغرب من بعد ما تقسم بين شحال إمارة ديال زناتة ف لأواخر ديال القرن العاشر، وضموا لإمارة ديال سيجلماسا وبرغواطا (تامسنا) للحكم ديالهم.

ف لحكم ديال يوسف بن تاشفين، دعاو لأمراء ديال الطائفة المسلمة ف الأندلس المرابطين باش إدافعو على الاراضي ديالهم من الممالك المسيحية. كانت لمشاركة ديالهم حاسمة بحيت أنهم منعو سقوط الأندلس. بعد ما قدر يوسف يصد القوات المسيحية عام 1086، رجع لأيبيريا عام 1090 وضم أغلبية الطوائف الكبيرة. أمازيغية تأسست في القرن طناش.

بدات الحركة د الموحدين من بين القبايل د مصمودة ف الجنوب د المغرب من طرف ابن تومرت. ف اللول أسسو الموحدين دولة أمازيغية ف تنمل ف جبال الأطلس ف عام 1120 تقريباً. وقدرو يطيحو المرابطين من الحكم د المغرب من عام 1147، مللي غزا عبد المؤمن الغومي (حكم ما بين 1130-1163) مراكش وعلن راسو كخليفة. من بعد وسعو السلطة ديالهم على المغرب الكبير كاملو من عام 1159. وتبع الأندلس نفس لمصير د المغرب ؤإيبيريا الإسلامية كاملها، اللي ولات تحت لحكم د الموحدين من عام 1172. أصلهم من قبيلة زناتا الأمازيغية اللي حكمات المغرب الكبير من القرن تلطاش حتا للقرن خمسطاش.

طييحو المرينيين سلالة الموحدين اللي سيطروا على المغرب عام 1244، وسيطروا واحد الفترة قصيرة على المنطقة المغاربية كلها ف المنتصف د القرن ربعطاش. دعموا المملكة د غرناطة في الأندلس في القرن تلطاش وربعطاش. حاولو يلقاو ليهوم بلاصة ف الجانب الأوروبي من مضيق جبل طارق ولكن خسرو ف معركة ريو سالادو ف عام 1340 وسالات من بعد الغزو القشتالي للجزيرة الخضراء في عام 1344.

كانو الوطاسييين واحد السلالة اللي حكمات لمغرب. أصلهم من زناتا الأمازيغية، بحال المرينيين. كانو جوج د لعائلات قراب بيناتهم، وجندو المرينيون بزاف د الوزراء من الوطاسيين.

ابتداء من عام 1549، لمغريب حكماتو مجموعة من السلالات اللي كانو كاينسبو راسهم للشرفا، وادَّعاو بأنهم من النسب ديال النبي محمد. أول وحدين من هاد الأنظمة السياسية كانو هوما السعديين اللي كانوا في الحقيقة امازيغيين من منطقة اقا فسوس و اختارو فالبدية تارودانت عاصمة ليهم ومن يعد مادخلو لمراكش رجعوها عاصمتهم، حكمو المغرب من 1549 حتا ل 1659. من 1509 حتال 1549، كانو الحكام السعديين كايسيطرو غير على المناطق الجنوبية. وْمن جهة خرا كانو كايعتارفو بالحكم ديال الوطاسيين حتال 1528، بسبب تزايد القوة ديال السعديين هجمو عليهم الوطاسيين، ومن بعد واحد لمعركة بيناتهم، دارو معاهدة تادلة عتارفو فيها الوطاسيين بالحكم ديال السعديين على الجنوب د المغرب.

ف عام 1659، تعلن على محمد الحاج بن أبو بكر الدلائي، شيخ الزاوية الدلائية، كسلطان المغرب من بعد ما طاحت سلالة السعديين.

لعلويين




#Article 49: الجاپون (221 words)


الجاپون ولّا الجبّان (بالجاپونية: 日本، نيپون ولا نيهون) هي دولة جزرية كاينة ف شرق آسيا. كيحدها بحر الجاپون من جيهة الشرق ؤالمحيط الهادي من جيهة الغرب، ؤكتمتد 3000 كيلومتر على طول ساحل القارة من بحر أوخوتسك فالشمال حتال بحر الشينوا الشرقي ؤبحر الفلپين فالجنوب. الجاپون هي جزء من حلقة العافية ديال المحيط الهادي، ؤهاكا كولها كتضمن أرخبيل بُركاني طبقي ديال شي 6852 جزيرة بخمسة جزر رئيسية (هوكايدو، هونشو، كيوشو، شيكوكو، ؤأوكيناوا) كتشكل %97 من مساحة الدولة الكلية اللي كتبلغ 377975 كيلومتر مربع.

الجاپون مقسمة رسميا لـ47 محافظة ؤتقليديا مقسمة لـ8 المناطق. تقريبا الثلثين ديال تضاريس البلاد هي مناطق جبلية وغابات كثيفة، ؤأقل من ثمن المساحة هي اللي صالحة للزراعة. نتيجة لهادشي، الجاپون وحدة من الدول الأكثر كثافة سكانيا ؤالأكثر تمدنا فالعالم، مع أكثر من %90 من الساكنة ديالها كيعيشو فالمناطق الحضرية. أكبر هاد المناطق الحضرية هي المنطقة الميتروپولية اللي المركز ديالها العاصمة مدينة طوكيو، واللي هي أكبر وحدة فالعالم من ناحية السكان ؤعايشين فيها 38 مليون واحد. الجاپون براسها كاينة فالمرتبة حداعش من بين أكثر الدول من حيث السكان بـ126.2 مليون نسمة، من بينهم %97.8 من إثنية جاپونية.

الكانجي (ولا المقاطع الشينوية) اللي كَيْكُوّْنو سمية الجاپون فـاللوغة الجاپونية كتعني منبع الشمس؛ فالعالم الغربي، البلاد معروفة فبعض الأحيان بـالسوبريكي البلاد ديال الشمس الطالعة. تاريخ الجاپون تميز بفترات ديال التأثر من مناطق خرى، الشينوا بالأساس، تبعاتها فترات ديال العزلة خصوصا من أوروپا الغربية.




#Article 50: الحاج بلعيد (154 words)


الحاج بلعيد رايس أو شاعر ديال الأغنية الأمازيغية، أومن الروايس اللولين لي أسسو الأغنية الأمازيغية.

تولد الحاج بلعيد فسوس فالمغرب ،العام فاش تولد  ممعروفش بالضبط ولكن على حساب ماكيقولو شي فرانساويين لي كتبو عليه أنه تولد مابين 1870 أو1875.الحاج بلعيد تولد و كبر فوسط فاميلة فقيرة ، فبلاصة خارجة على المدينة كيكول ليها أنو ن عدو فالجماعة ديالويجان لي كاينة فشرق إقليم  تزنيت فسوس. اباة الحاج بلعيد توفى و خلاه مازال صغير، ملي كبر شوية مو دخلتو المسيد لعل و عسى يتعلم يقرا و يكتب ولكن الظروف الصعيبة لي عاش فيها مسمحاتش ليه يكمل و خرج باش يخدم ويعاون مميمتو على الزمان و خدم فالسرحة مودة، كان ملي كيمشي يسرح كيدي معاه العواد ديالو باش يلهي راسوو. ومن تم بانت الموهبة ديالو ف لغنى.

لحاصول الحاج بلعيد من الناس ليعطاو بزاف للأغنية الأمازغية ولي معمرو يتنساو فالداكرة  الأمازيغية.

توفى الحاج بلعيد ف عمرو ستين عام، جوايه 1945م على حساب ما قالو شي باحثين فرانساويين.  




#Article 51: الحروف د الدارجة (116 words)


الحروف اللي كتكتب بها الدارجة العربية هي الحروف العربية في النصوص و التوجيهات و بعض المرات بالحروف اللاتينية في الشات و الجمل القصيرة بحال شي رموز و صافي

حروف الدارجة هي نفسها حروف اللهجات العربية الاخرى و كاتختالف من منطقة لاخرى بحال القاف مثلا ينطق غالبا مثل القاف العربية الفصيحة و لكن في بعض المناطق كيتنطق قاف ناشفة بحال القاف اليمني و كاين اللي كينطقو بحال الهمزة كيما المصريين و هاذي الحالة ديال الفاسيين و لكن كيتكتب -ق- بطريقة موحدة و كل واحد عندو الحق يقراه كي بغا

هي الحروف اللي ما كانطقوا قبل منها لام التعريف حيت تكوكن ف اللول ديال الجملة و هي نفسها الحروف الشمسية في المستوى الفصيح و كانزيدوا حتى حرف الجيم




#Article 52: الحسين التولالي (125 words)


لحاج لحسين التولالي (تولد ف 1924 ف تولال - مات نهار 7 دجنبر 1998 فمكناس) كان فنان مغربي ديال لملحون.

الحسين التولالي تولد فتولال حدا مكناس, وكانو تيهضرو بالشلحة فدارهم. كان تيمشي بزاف لمكناس باش يتعلم الصنعة, وتما فين تعلًم الدارجة و تعلًم معاها لمحلون مع الصنايعية اللي خدم معاهم حتى ولاً مولوع. واخا ماكانش قاري, كان تيحفظ لقصايد بالزًربة ومزيان, وداكشي علاش ختارًوه الشيوخ باش يخدم معاهم حتى ولاَ فنان محترف د لملحون.

التولالي من أكثر لفنانة دلملحون اللي معروفين, وتسارا لعالم وغنا لمحلون فبزاف د لبلدان بحال فرانسا وهولاندا. ف 1994 كتبات عليه لجريدة لفرانساوية د لوموند ملًي مشا يغني فباريز.

مات الحاج الحسين التولالي فمدينة مكناس ف 7 دجنبر 1998 و خرجات عليه واحد لقصيدة د لملحون اللي تسمًات بسميتو باش تكرًمو.




#Article 53: الدار البيضا (371 words)


كازا بلانكا (كازا بالمختصر) اولا (الدار البيضاء بالعربية) واحد المدينة مغربية كاينة في وسط-غرب المغرب. و هي المدينة لي معروفة بانها اكبر مدينة من ناحية السكان. و كذلك معروفة بالمعاملات التجارية حيت كازا كضم عدد كبير من الشركات و المقاولات. بالإضافة علا هدشي كازا كتعتبر العاصمة الاقتصادية ديال المغرب.

كازابلانكا لي ب لعربية الدار البيضاء جات من تسمية ديال صبليون و لبرطقيز (لبرتغاليين). وخداو هاد السمية من واحد لمنارة ديال لبحارة كانت كاتضوي ب ليل باش تڭيديهم. هاد لمنارة تهدمات و مابقا فيها غير لملامح ديالها. وحيت كانت كتشبه ل دار ملونة ب لبيض سماو لمنطقة Casabranca (كاسابرانكا) ولي كتعني دّار لبيضا ب لبرطقيزية ؤ طّرجمات ب صبليونية ل Casablanca (كاسابلانكا).

لمغاربة لقدام كانو كيعيشو من أزمنة سحيقة ف لمنطقة ديال كازا، حيت تلقاو ف لمحيط ديالها آتار كترجع ل عصور ما قبل تّاريخ. ف لقرن لعاشر قبل لميلاد تبنات قرية ؤلا مدينة ف ديك لمنطقة تسمات أنفا (كتعني لكدية  ب لأمازيغية) ؤ كانت تابعة ل مملكة موريطانية. بحكم لموقع لستراتيجي ديالها، غادي يستعملو لفينيقيين لمرسا ديالها باش يتاجرو معا لمور، ؤ موراهوم رّومان فاش شدو لمنطقة ؤ ولات تابعة ليهم.

ف لبدية ديال لقرون لوسطى معا دخول ديال لإسلام ل لمغريب غادي تولي أنفا عاصمة ديال برغواطة، ؤ غادي تبقا هكاك، حتا قضاو لموحدين علا لبرغواطيين ف لقرن 12 ميلادي.

ف 1468 لبرطقيز غادي يدمرو أنفا، ؤ ف 1755 غادي تعاود تدمر ب زلزال، لّي غادي تخلي سّكان ديالها يهجروها. مي ف 1770 سّلطان محمد تالت بن عبد الله غادي يعاود يبني لمدينة ب سمية جديدة: دّار لبيضا.

كازا كتوجد فالشاوية المعروفة بالفلاحة ديالها من قديم الزمان، و اللي باقة لدابا محافضة على هاد الصفة، و حيت كازا كطل على البحر ،فهي كتوفر كدلك على الموارد السمكية اللي كاتدخل للمغرب بزاف ديال الارباح المالية. لا من ناحية الصيادة ولا من المراسي لي كتستقبل بزاف ديال الباطوات السياحية و حتى التجارية.

الجو فكازا غالبا كايكون عادي و بعض المرات كايكون بارد حيت يمكن توصل الحرارة بعض المرات فالعام لقل من 8 الدراجات سيلسيوس و كاترتفع حتل 27 درجة مئوية سلسيوس كمعدل عام.

الجو ديال كازا بدا كيعاني هاد السنوات الخيرة نظرا لاعمال ديال لوزينات زائد الاحوال المناخية لي كيعرفها العالم، وممكن نشوفو هاد التغير فالشتا لي مابقاتش كاتطيح في الوقات ديالها، فالامراض لي بدات كتنتاشر، فالدخان لي ديما كيغطي السما فكازا.




#Article 54: الدارجة (267 words)


لوغة لمغريبية ؤلا دّارجة لمغريبية، هي وحدا من لوغات لي كايهدرو بيها لمغاربة. دّارجة د لمغريب قريبة بزاف لدارجة د دزاير، و كاتشبه شوية تا لدارجة ديال تونس. دّارجة د لمغريب عندها تركيب لغوي جاي من لأمازيغية، و لكلمات من لأمازيغية و لعربية. فالتاريخ ديالها تأترات ب بزاف د لوغات منها لبرتغالية ولفرانساوية وصبليونية.

فدوستور د لمغريب، لوغة لعربية هي رسمية، ولكن ماكاينش وضوح واش هي لعربية لفصحى ولا دارجة. لفصحى كاتخدًم فشي حوايج رسمية بحال لخطب دينية ولوراق د لإدارات ولأخبار د تلفازة. دارجة تاتخدًم ف لحياة ليومية، وكاتستعمل بزاف ف لبرامج ترفيهية ديال تلفازة وسينيما ولإشهارات.

كاين بزاف ديال لهجات فدارجة، و كلهم تيفهمو بعضياتهم مزيان. لهجات ديال الدار البيضا والرباط وفاس هوما لي معروفين بزاف، وكايتستعملو فوسائل لإعلام كتر من لاخرين بحال ديال طنجة و وجدة.

دارجة هي لوغة لأم ديال مابين 50 تال 75 فالمية ديال لمغاربة. لوغة لأم لاخرا لي كاينا هي لوغة لأمازيغية. بزاف ديال ناس لي لوغة لأم ديالهم هي لأمازيغية تعلمو دارجة من بعد و تيعرفو يهضرو بيها.

تكونات لوغة لمغربية من بزاف ديال لهجات لي جاو من جوج ديال لمجموعات مختالفين وراتيا لي هما: لقبل هلالية ولهلالية.

كاتمييز اللغة المغريبية بتكوينها اللي جاي من للوغة لامازيغية.
من بعد الفتح لإسلامي بقاو بزاف ديال الناس كايهضرو بالامازيغية. وفالفترة ديال التعريب بزاف ديال الامازيغ ولاو كايهضرو جوج لوغات لأجيال قبل ما يخليو لوغتهوم ويبداو يخدًمو لعربية بوحدها، ولكن بقاو مثأترين باللوغة الامازيغية هاد الثأثير لي كاتزايد من الشرق للغرب ديال المغرب، اللي خلا اللوغة المغريبية تأتر بزاف بالأمازيغية كثر من لاخرين.

اللهجات د لمدن لقدام تأترات بالصبليونية علاوداش سكنو فيها بزاف د الناس ديال الاندلوس والموريسكيين اللي كانو كايهضرو بالصبليونية




#Article 55: الراس لخضر (159 words)


لجمهورية د الراس لخضر (ب لبرتغالية: República de Cabo Verde) هي بلاد جزيرة جات ف إفريقيا، و تابعين ليها 10 د لجزر بركانية كلها ف لمحيط لأطلسي. أقرب بلاد للراس لخضر هي السينيڭال اللي جات على 570 كيلوميطر منها.

تا واحد ماكان تيسكن فالراس لخضر تال 1470 اللي كان لعام اللي كتاشفو فيه لبرتغاليين ديك لجزر و ستعمروهم. موراها بداو كيخدًموهوم باش يدوًزو منهم لعبيد اللي كيتسيفطو للميريكان. ملًي تمنع لبيع و الشرا د لعبيد ف لقرن 19 هبط لقتيصاد د الراس لخضر، ولكن ولاًت طريق مهمة د لباطًويات اللي غادة ما بين إفريقيا و لميريكان. من مورا قرون د ليستيعمار د لبرتغال ستاقلاًت جمهورية الراس لخضر رسميا ف 1975.

تيسكنو فالراس لخضر تقريبا نص مليون د الناس و لعاصمة ديالها هي پرايا. اللغة الرسمية ف لبلاد هي لبرتغالية، و لفلوس اللي كاتخدًم هي إسكودو د الراس لخضر.

الراس لخضر عضو ف بزاف د لمنضمات بحال لأمم لمتحدة و ليتيحاد ليفريقي، و ليقتيصاد ديالها كيخدم بزاف بالسياحة و لخدمات.




#Article 56: الرباط (689 words)


 
الرَّباط (بالعربية: الرِّبَاطُ - بلأمازيغية: ⵔⵔⴱⴰⵟ) مدينة ف الشمال لغربي د لمغريب ف لجيهة د الرباط سلا قنيطرة. هي لعاصمة د لمغريب من عام 1912م. ما بينها و ما بين مدينة سلا كاين واد بورڭراڭ لي كايخوي ف لمحيط لأطلسي, و اللي كيطلُو عليه بجوج. على حساب آخر إحصاء دارتو المندوبية السامية للتخطيط ف عام 2014، العدد ديال الناس لي كيسكنو ف الرباط هو 577.827.

دازو على سلا و الرباط بزاف ديال الشعوب، بحال لفينيقيين و لقرطاجيين لي دارو سوق ديال لبيع والشرا مع السكان ديال المنطقة. ولاً الرومان لي أسسو مستوطنة فبلاصة السوق و سماوها سلا كولونيا و لي مزال الآتار ديالها كاين فموقع شالة. ولكن أول تاسيس رسمي د لمدينة د الرباط بدا معا لمرابطين ف وقت يوسف بن تاشفين لي دار قلعة (سميتها دابا قصبة لوداية) باش يحبس لهجمات د لبرغواطيين. ف 1140 فلوقت د لأمير تاشفين بن علي تحولات لقلعة لرباط تسما قصر بني تارڭة.

التاريخ لقديم د الرباط ماكانش معروف بزاف, حيث گاع لباحثين ولمؤرخين اللي كانوا خدمو على الرباط فاللول كانو متبعين التأسيس ديالها فالزمان لوسطاني وداكشي اللي جا مبعد.

أول مرة غادي تكون لهضرة على شنو كان فالرباط فما قبل التاريخ هو ملّي غادي يتّلقاو بالزهر شي عضوما د بنادم تاتًكون من التحتاني د لفك و طراف ديال لفك لفوقاني و د لجمجمة ف 1933 فواحد لكاريير جا فلمنطقة د لقبيبات مابين الرباط و تمارة.

ف 1934, قال لباحت لفرانساوي جان مارسيل بلي هداك بنادم اللي تلقاو لعضوما ديالو كان هومو إيريكتوس.

هاد ليحتيمال كيعني باللي كاين شي ناس اللي يقدرو يكونو سكنو فلمنطقة د الرباط ما بين 1.9 د لمليون عام و 300.000 عام قبل زيادة لمسيح.

ف 1942, قالو لباحتين لفرانساويين رولمان ونوفيل باللي هداك بنادم اللي تلقاو لعضوما ديالو عاش ف الدور بين الجليدي: ريس - فورم،و للي بدأ هادي 380.000 عام.

ف 1958/59 قال لباحث لفرانساوي قالوا باللي بنادم لي تلقا ف الرباط هو تخليطة مابين هومو إيريكتوس بيكينينسيس و هومو نيانديرطالينسيس.

هاد ليحتيمال كيعني باللي كاين شي ناس اللي يقدرو يكونو سكنو فلمنطقة د الرباط ما بين 350.000 عام 35.000 عام قبل زيادة لمسيح.

من بعد هاد ليكتشاف، جاو باحتين وحداخرين باش يدرسو لمنطقة د الرباط. فلوقت اللي بداو خدمتهم, بدات لمدينة الجديدة د الرباط لي تانعرفو دابا تتبنا(لبني د الديور ، د لعيمارات ، د لقوادس …)
هاد لباحثين لقاو أدوات د لحجر ف بزاف د لبلايص فوسط لمدينة و بالخصوص ف لبلايص الأترية بحال: دوار الدوم، لغيران د دار السلطان واحد و جوج ، لهرهورة، والمناصرة و زيد و زيد.

هاد لأدوات د لحجر لي تًلقاو تنسبو لبزاف د لحضارات لحجرية بحال:

لخلاصة ديال هاد لأبحاث كاملة لي نقدرو نقولو هي بلي لبلاصة اللي فيها الرباط تسكنات هادي آلاف السنين و دازو عليها بزاف د لحضارات قبل ماتولي الرباط هي لمدينة اللي تانعرفو دابا.

ف عام 1150 دخلو لموحدين للمنطقة د الرباط ورجًع عبد لمومن لقلعة د بني تارڭة لقصبة فيها ديور و جامع. تسمات ف اللًول ب لمهدية ومن بعد ب رباط الفتح. الهدف د لقصبة كان هو تحمي الجيوش لي كانت تتمشي ف حملات جهادية لأندلس.

يعقوب المنصور، لحفيد ديال عبد لمومن بغا يرد رباط لفتح عاصمة لدولة ديالو. من تما حكم باش اتحصًن لمدينة بسوار مزيانة، و كبًرها و بنا فيها بزاف د لمعالم ,بحال الجامع د حسان .

مورا عام 1269, بدلًو لمرينيين لعاصمة ديالهم من الرباط لفاس, وهبط الشان للرباط, اللي دخلات فمرحلة د التراجع. ف 1515 كان زارها لمؤرخ لموريسكي الحسن الوزان, اللي كتب باللي ماكانتش فيها كتر من 100 دار مسكونة فديك لوقت.

مورا ماخرج لمرسوم د فيليبي التالت ف 1609, اللي طرد بيه لموريسكيين من لأندلس, مشاو بزاف منهم (13.000) سكنو فالرباط و أسسو مع الناس د سلا لجمهورية د بورڭراڭ. حيت سلا كانت قدم من الرباط, وحيث لموريسكيين هوما اللي عمًرو الرباط, تسمًات الرباط بسميت سلا الجديدة, وهي السمية اللي بقات معروفة بيها تال لقرن 19.

ف 1912, مورا ما دخل ليستيعمار لفرانساوي, ردً ليوطي الرباط هي لعاصمة د لمغريب بلاصة فاس, اللي كانت دايرا بيها لقبائل لأمازيغية اللي تاتحارب فرانسا. من مورا ليستيقلال ف 1956, بقات الرباط هي لعاصمة د لبلاد.

ف 2012, تسجلو بزاف د لبلايص فلمدينة د الرباط مع لمواقع الترات لعالمي د ليونيسكو.

ف 2013, جات الرباط هي التانية فالترتيب اللي دارتو سي إن إن على أحسن الوجهات السياحية د عام 2013.




#Article 57: الرجاء البيضاوي (545 words)


الراجا هو نادي مغريبي كاين في الدارالبيضاء، تأسس في عام 1949 نهار 20 فشهر مارس، لي أسو هاد النادي هوما نقابيين مغاربة فحي درب سلطان، الرجاء مع الوداد الغريم التقليدي ديالو هما الفرق لي عمرهم ما نزلو من القسم اللول في المغرب مني تاسسات فعام 1956، وتتلعب هاد الفرقة فملعب دونور مني تصايب فعام 1955

واخا التاريخ ديال الرجاء قريب شوية مقارنة بفراقي خرين ديال كازا، الرجاء كفرقة جا باش يجمع ثمنية ديال الفراقي هاوين كاينين فدرب السلطان، وبدات الفكرة باش يكون نادي قوي يجمع هاد الفراقي والمواهب للي فيها، هادشي ماكانش ساهل، وهادشي ماتطبق تال عام 1949، للي جاء بعد ماكان مجموعة من الإجتماعات في القهوة ديال بويا صالح و قهوة العشفوبي و حتى فمطبعة بن أبادجي، أسوه مجموعة من المقاومين الوطنيين والنقابيين المعارضين المغاربة ككريم الحجاج والمحجوب ابن الصديق مؤسس أول نقابة في تاريخ المغرب و محمد المعطي بوعبيد و اللي غايتناوبو على الرئاسة من ورا هادشي...

ولاكن ارتابط التأسيس ديال الفرقة بظروف تاريخية سبيسيال سوية، والعلاقة ديالو مع الأحياء الشعبية المغريبية فمدينة الدارالبيضاء مني كانت الحماية الإستعمارية الفرنسية،وفالمرحلة لي بانت الحركة الوطنية للمطالبة بالإستقلال فبداية الخمسينيات، و ارتباط الإسم ديالو بالأب الروحي للكرة البيضاوية محم بن الحسن التونسي العفاني (الأب جيكو)، عطا الرجاء شعبية وقاعدة جماهيرية كبيرة. والتجربة ديالو في الميدان الصحافة ساهمات حتاهي في شعبية الرجاء، كيتعتابر الأب جيكو أول مغربي عندو ديبلوم رياضي في ميدان التدريب، اللي حصل عليه في إنجلترا، ومن اللولين في المغاربة للي حصلوا على شهادة البكالوريوس الحديثة، هاذ المدرب اللي غايصنع من بعد طفرة كروية في الرجاء و الكرة المغربية بشكل عامة. گاع هاذ الأمور خلات الفريق الأخضر يّاخد مكانة قوية وتابثة فالقلوب والذاكرة ديال مدينة الدار البيضاء واللي عرفات فذيك الوقت بزاف الأحداث السياسية والرياضية وكان أهم واحد فيها هو مني اجتامع ليلة 19 مارس 1949 المُأسّسين ديال الرجاء ف القهوة ديال بويا صالح فدرب السلطان باش يأسّوا الفرقة ديال الرجاء البيضاوي وتافقوا باش تكون الفرقة مستقلة وبعلامة المغربية ماشي فرنسية، وقدروا يوصلوا لصيغة باش يتحايلوا على الشرط اللي وضعوا المستعمر على للي بغاو يأسّوا فراقي رياضية فگاع دول المغريب العربي، وهو أنه يكون الرئيس ديال الفرقة فرنسي، وهاذ النقطة هي الأهم في تأسيس الفراقي الرياضية والإشكالية ديال الاستقلال ديالها فذيك الوقت على السلطة وتأثير المستعمر الفرنسي. ولاكن وصلوا لطريقة ذكية باش يتحايلوا على هاذ القانون، للي اجتامعوا بمقهى بويا صالح تقدموا بملف طلب تأسيس الفرقة والرئيس هو حجي بن عبّادي الملقب بابن أبادجي الجزائري والأصول العثمانية، كان من مواليد مدينة تلمسان وعندوا جنسية فرنسية، و ترأّس الفريق لسَت أشهر.

الهداف التاريخي الأول للرجاء هو سعيد غاندي ولاكن عدد الأهداف لي ماركا مامعروفاش حيت ماكانش تاتحفظ فذيك الوقت ديال السبعينات، إذا الهداف التاريخي للفرقة هو صلاح الدين باصير ب 147 بيت ماركاهم من فترة التسعينات وكلهم في الماتشات الرسمية.

اللعاب ديال الميليوه الدولي المغريبي المرحوم عبد المجيد الضلمي أكثر لاعب لعب للرجاؤب 568 ماتش رسمي، للإشارة ف آخر ماتش رسمي لعبو مع الفرقة كان ف موسم (1990-1991)، الضلمي هو أكثر لاعب مغربي حمل قميص المنتخب الوطني المغربي.
ومن بعد سنة من الاعتزال ديالو نهائيا، حصل على جائزة اللعب النظيف من منظمة اليونسكو لي اعترفت بالأخلاق الرياضية العالية ديالو، وهو أول لاعب في العالم خداها، وتسنا سنوات طويلة قبل ما يكرموه في البلاد ديالو ف لحظات درامية عاشها مع صحابو ف الكورة.

من يونيو 2017، الشركة الإيطالية ليجيا هي اللي تاتستورد المعدات الرسمية للنادي، و الرجاء هو الفريق الوحيد في المغرب الذي كيقتارح تصميم التونيات ديالها.




#Article 58: الرقم الدولي المعياري ديال الكتاب (231 words)


الرقم الدولي المعياري ديال الكتاب (ردمك) (بلونڭلي: International Standard Book Number (ISBN)) هو مُعَرِّف رقمي تجاري ديال الكتوبا مصمم باش يكون وحيد، يعني كل كتاب عندو رقم ديالو بوحدو. الناشرين كيشريو الردمكات من شي فرع ديال الوكالة الدولية ديال الردمك.

كل طبعة ولا طريقة نشر مختالفة ديال الكتوبا عندها ردمك ديالها الخاص (ما عدا إلى كان تنشر قبل وعاوتاني دابا رجع). مثلا طبعات كتاب إلكتروني، غلاف بالوراق، غلاف فني ديال نفس الكتاب كل وحدة غادي يكون عندها ردمك ديالها الخاص. الردمكات اللي قبل من 2007 كان فيهم عشرة الأرقام، ؤالردمكات اللي خرجو من بعد 1 يناير 2007 كلهم فيهم تلاتعش رقم. كيفاش كيتحطو الردمكات كتختالف من دولة لدولة ؤكل دولة عندها طريقتها، ؤغالبا هاد الطريقة كتكون مرتابطة بصناعة النشر فالدولة واش صغيرة ولا كبيرة.

الصيغة التعريفية اللولة ديال الردمك بانت ف1967، معتامدة على الترقيم المعياري ديال الكتاب (تمك) (Standard Book Numbering (SBN)) اللي كان فيه تسعوت الأرقام وبان ف1966. صيغة 10-أرقام ديال الردمك طوراتها المنظمة الدولية ديال المعايير (آيزو) ؤنشراتها ف1970 على أساس معيار دولي آيزو 2108. التمك ديال 9 أرقام ممكن يتحول للردمك ديال 10 أرقام إلى زتي ليه '0' فاللول.

الكتوبا اللي كيتنشرو بشكل شخصي بعض المرات ما كيكونش عندهم الردمك. الوكالة الدولية ديال الردمك كتعطي الردمكات لبحال هاد الكتوبا كمبادرة من عندها.

معرف آخر، هو الرقم الدولي المعياري التسلسلي (ردمت) كيكون عند المنشورات الدورية بحال المجلات والجورنالات. أما الرقم الدولي المعياري ديال الموسيقى (ردمم) فكيكون عند القطع الموسيقية.




#Article 59: السكات د الخرفان (195 words)


السكات د الخرفان (بلونكلي: The Silence of the Lambs) فيلم ميركاني خرج فعام 1991 بطولة د أنثوني هوبكنز فدور هانيبال ليكتير لي ربح لجائزة دالأوسكار كأفضل ممثل على دور ديالو فهاد لفيلم. ؤشاركات معاه جودي فوستر فثمثيل فدور كلاريس ستارلينغ ؤلي حتى هي ربحات لجائزة دالأوسكار دأفضل ممثلة. ؤشارك معاهوم حتى سكوت غلين فدور جاك كروفورد ؤتيد ليفين فدور لقتال لمتسلسل بافالو بيل,لفيلم دار الإخراج ديالو  جوناثان ديم. .

فمكتب التحقيقات الفدرالي. السطاجيرة كلاريس ستارلينج (جودي فوستر) خدامة من نيتها باش تأڨونصي فلكريار ديالها ، ؤفنفس لوقت كتحاول تخبي الأصل ؤلحقيقة ديالها فغرب فرجينيا حيث إلى جاب الله شي واحد عرف الأصل ديالها غيحكرها وإنقص منها، من بعد ما تسالي التكوين ديالها كلاريس ستارلينج كطمح باش تخدم مع لفرقة لمختصة بعلوم السلوك .لي كيسيرها جاك كروفورد (سكوت جلين).ؤهي مازال سطاجيرة طلب منها روفورد تطلب من الدكتور هانيبال ليكتر (السير أنتوني هوبكنز) باش إعونها فواحد لقضية خدامة عليها ديال وحد لقتال متسلسل، الدكتور هانيبال ليكتر لي هو طبيب دنفس كاين فلحبس مدة ثمن سنين ؤفبلاصة لي فيها لعسة بزاف.على ود كيقتل الناس ؤكيكلهوم ,غيرفض فلول إعونها من بعد غيتعاون معها ولكن بشروط... .من هنا غتبدا لقصة لحقيقية دلفيلم ؤوحدا من أجمل مشاهد دثمثيل لي دازو فسينيما.




#Article 60: الشاب حسني (251 words)


حسني شقرون, اللي معروف تا بالشاب حسني (وهران: 1 فبراير 1968 - 29 شتنبر 1994) كان مغني د الراي جزائري وواحد من أكبر لمغنيين د الراي فالتاريخ. كان تيتسمًا بلملك د الراي سونتيمونطال وبأسطورة الراي. الشاي حسني حطًم بزاف د لأرقام قياسية فالزربة اللي كان تيخرج بيها لألبومات (175 ألبوم) و لعدد د شحال كانو تيتباعو منها.

تولد حسني شقرون فوهران نهار 1 فبراير 1968 فعائلة فقيرة. كان ابًاه حداد, وكانو عندو 7 د الدراري حسني واحد منهم. ملًي دار 9 سنين, تقيد حسني مع لفرقة د كورة د لجمعية الرياضية لمدينة وهران (ASMO), اللي كانت تاتلعب فالدرجة التانية د لجزائر. ملًي دار 15 لعام, تضرب ضربة خايبة ومشا للصبيطار وبقا فيه بزاف د السيمانات. منين خرج من الصبيطار, غلاض وماقدرش يكمل اللعب د لكورة. قرر ديك الساعة يعتازل لكورة.

ملًي كان فالصبيطار, كان حسني كيسمع بزاف لفريد الأطرش, وبدات كاتعجيو لموسيقى لعاطفية وبغا يجرب يغنيها. أيبدا فاللول يغني فلعراسات ولكاباريات تا تعرف شويا كتر وسجًل أول كاسيطة ديالو ف 1986. ف 1987 غنا مع الشابة الزهوانية ومن ديك الساعة تعرف بزاف. غادي يتعرف حسني لدرجة أنه غادي يكون هو لمغني اللي كان تيبيع أكبر عدد د لكواسط فلجزائر ديك لوقت.

الشاب حسني كان تيغني على مواضيع بحال لحب ولعلاقات لغرامية, اللي ماكانتش تاتعجب بزاف د الناس ديك لوقت. نهار 29 شتنير 1994, كان حسني تيتمشًا فحومتو, حتا بعثو عليه ناس مجهولين وقتلوه. الجماعة الاسلامية لمسلحة تبنات لمقتل ديالو, ولكن ماتعتاقل تاواحد وباقي هاد لجريمة لغز تال ليوما.

الشاب حسني عندو بزاف د لأغاني اللي معروفين بزاف. من ديك لأغاني كاين:




#Article 61: الشريف محمد أمزيان (220 words)


الشريف محمد أمزيان (بلأمازيغية: ⴰⵎⵖⴰⵔ ⵎⵓⵃⴰⵏⴷ ⴰⵎⵥⵢⴰⵏ) (تولد فزغنغن ف 1859 - مات ف 1912) كان مقاوم مغريبي اللي حارب ليستيعمار الصبليوني فالريف, خاصة فلمنطقة د سلوان فالنواحي د الناظور.

تولد محمد أمزيان القلعي ف 1859 فزغنغن, وكانت عائلتو عندها زاوية سميتها زاوية ولاد عبد السلام القلعي. قرا فصغرو فلمسيد ومن بعد قرا فجامعة لقرويين من 1887 ل 1891. ملًي سالا قرايتو رجع للريف وبدا تيخدم فالبيع و الشرا د لبغال ولبڭر مابين لمغريب و لجزئر, اللي كانت محتلاًها فرانسا ديك الساعة.

كان الشريف أمزيان محتارم بزًاف فالريف الشرقي وكان معروف باللي هو من لقادة د لمنطقة. ف 1903, غادي يدخل بوحمارة للريف وغاتبدا روينة مابين بزاف د لقبايل, شي معاه وشي ضدًو. الشرف أمزبان كان ضدو و كان من الناس اللي حاربوه تا جراو عليه ف 1908. فأكتوبر 1908 غادي يختاروه لقبايل د الريف الشرقي باش يكون هو الشاف ديالهم, باش تحبس لفتنة. أول مهمة ديالو كانت هي يحارب التوغل د الصبليون اللي بداو تيدخلو لشي بلايص فالريف وتيحتلوها. غادي يدوز الشريف أمزيان و لمجاهدين اللي معاه 3 سنين من 1909 ل 1912 و هوما تيتحاربو مع الصبليون, وغلبوهم فبزاف د لمعارك بحال إغزر ن ووشن (لواد د الديب) حدا مليلية, اللي تقتل فيها جينيرال صبليوني وبزاف د لكولونيلات ولقادة ديالهم.

ف الصيف د 1912 غادي يعطيو لبرڭاڭة معلومات للصبليون على فين كان ڭالس الشريف أمزيان, وغادي يحاصروه ويقتلوه.




#Article 62: الشيفور دطاكسي (فيلم) (125 words)


الشيفور دطاكسي (بلونكلي:Taxi Driver) هو واحد لفيلم د دراما ؤلجريمة  ميركاني خرج فعام 1976 ، لمخرج ديالو مارتن سكورسيزي وؤلعب  لبطولة ديالو روبيرت دي نيرو ؤجودي فوستر. لقصة دلفيلم دايرة على واحد السيد سميتو ترافيس بيكل (روبيرت دي نيرو) شيفور د دطاكسي وؤ سبق ليه كان عسكري  فلبحرية لمريكانية  فيامات د لحرب د فيتنام، هاد ترافيس بيكل بغا  ينقي لمدينة ديالو  من لفساد لكثير لي نتاشر فيها ؤ  فواحد لحظة غضب منو نتقم  كاع دوك الناس لي كيحس بلي هما السبب فهاد الفساد.

على حساب النقاد ؤالمخرجين ؤالجمهورهاد لفيلم كيتعتابر واحد من أعظم الأفلام  فتاريخ السينيما.ترشح لفيلم لربعة دلجوائز دلأوسكار، منبينها أفضل فيلم. ؤخذا جائزة دالسعفة الذهبية فمهرجان كان السينمائي. معهد لفيلم لمريكاني صنف شيفور د طاكسي فالرتبة 52 فيليستا ديال  أعظم 100 فيلم ميريكاني.




#Article 63: الشينوا (135 words)


الشينوا بال(شينوية: 中国؛ پينيين: Zhōngguó؛ كتنطق: تْشُونْڭْ-خْواَ؛ كتعني حرفيا: الدولة المركزية ولا المملكة الوسطى)، رسميا جمهورية الشينوا الشعبية، هي دولة ف شرق آسيا ؤهي الدولة اللي فيها أكبر عدد ديال الناس فالعالم، مع شي 1.428 مليار نسمة ف2017. الشينوا كتغطي تقريبا مساحة 9,600,000 كيلومتر مربع، ؤهاكا كتعتابر تالت ولا رابع أكبر دولة من ناحية المساحة. الدولة كيحكمها الحزب الشيوعي الشينوي، ؤكدير تشريعاتها على 22 محافظة، خمسة مناطق متمعة بالحكم الذاتي، ربعة البلديات مُداَرَة بشكل مباشر (پيكين، تيانجين، شانڭهاي، ؤتشونڭتشين)، ؤالمناطق الإدارية الخاصة ديال هونڭ كونڭ ؤماكاو.

الشينوا تعرفات على أنها من أولى حضارات العالم، ؤبانت فالحوض الخصيب ديال النهر الصفر فسهل شمال الشينوا. لآلاف السنين، النظام السياسي ديال الشينوا كان معتامد على الملكيات الوراثية، ولا السلالات، بداية من سلالة شيا شبه الأسطورية فالقرن 21 ق.ح.ع. من تما ؤالشينوا بقات كتوسع، كتقسم، ؤكتعاود توحد بزافت المرات.




#Article 64: الصالڤادور (168 words)


الصالڤادور (ب الصبليونية: República de El Salvador) هي أصغر بلاد ف أمريكا لوسطانية و لوحد اللي عندها أكتر كتافة د السكان. تيحدها من لغرب و لجنوب لمحيط لهادي، من الشمال ڭواطيمالا، و من الشرق هوندوراس. لكلمة ديال الصالڤادور تاتعني بالصبليونية هاداك اللي كيعتق، و تسمّات بيها لبلاد من الصبليون اللي جاو لتمّا و عطاوها السمية ديال لمسيح عيسى.

سكنو بزاف د لحضارات ف لبلاصة اللي فيها الصالڤادور دابا، منهم اللينكا و لمايا. ف اللول د لقرن 16 دخلات لإمبراطورية الصبلونية ل ديك لأرض و حتلاتها. بقا هاد ليستيعمار تال لعام 1821، اللي ستاقلات فيه ديك لأرض و تدخّلات مع لأراضي د لإمبراطورية لميكسيكية، و ف 1823 مع لجمهورية لفيديرالية د أمريكا لوسطانية. ف 1841، ستاقلات لجمهورية د الصالڤادور و ولاّت بلاد عندها سيادة.

تيسكنو ف الصالڤادور تقريبا 6 د لمليون و نص د الناس، و لعاصمة ديالها هي سان سالڤادور. اللغة الرسمية د لبلاد هي الصبليونية، و لفلوس اللي تاتخدّم هي الدولار لميريكاني. كانت لعملة د لبلاد من 1892 هي لكولون الصالڤادوري، قبل ما تتبدّل للدولار ف 2001.




#Article 65: الصبليون (166 words)


المملكة الصبليونية ولاً صبانيا ولاً الصبليون ؤلا الصبنيول ؤلا سپانيا هي واحد البلاد فالجنوب د ؤروپا. ضايرين بيها فرانسا و أندورا فالشمال, لبحر لبيض لمتوسط فالشرق و الجنوب, لمغريب (بوغاز جبل طارق و بحر البوران) فالجنوب, والبرتغال والمحيط الأطلسي فالغرب.

صبانيا ساكنين فيها 46 مليون د الناس والعاصمة ديالها هي مدريد. دخلات للاتحاد الأوروپي ف 1986, وكاتخدًم الأورو. لماليك د صبانيا د دابا سميتو فيليپي. اللغة الرسمية فالبلاد كاملة هي الصبليونية, ولكن كاين بزاف د اللغات اللي تيتهضرو فبزاف د البلايص, بحال الكاطالانية والباسكية و الڭاليسية. الصبليون هي الدولة الثانية من حيث المساحة فالاتحاد الأوروپي مورا فرانسا.

سبانيا عندها نظام حكم ملكي دستوري.

الملك عندو سلطات سياسية ورمزية ،كاتحددها المادة 62 من الدستور: كاتقول بلي رئيس الدولة والجيوش ، وكايصدق على القوانين ، وكايعين رئيس الحكومة ، ويمكنليه يحل البرلمان الى اقتارحو رئيس الخكومة. وهو من الفوق ممثل الدولة الإسبانية فالعلاقات الدولية ، وخصوصا مع الدول اللي تايهضرو بالصبنيولية. الملك اللي كاين دابا هو فيليبي السادس. و وخا كاع هادشي السلطة التنفيذية كاتبقى عند رئيس الحكومة.




#Article 66: الطاهر لخلج (309 words)


الطاهر لخلج (خلاق ف مراكش ف 16 يونيو 1968) كوايري مغربي دولي كان كيلعب ف لوسط دّفاعي. الطاهر ولد لمدرسة د لكوكاب و لعب لكورة بين 1987 و 2003 ف لمغريب و لبرطقيز و النڭليز. لعب 61 ماتش دولي مع لمونتاخاب و شارك معاه ف 2 كيسان د لعالم ف 94 و 98.

الطاهر ولد لحومة د لقصبة ف مراكش. بدا لكاريير ديالو ف فراقي صغار د لأحياء و كانت أول فرقة ديالو هي لتيحاد لمراكشي لّي كانت كاتخرج بزاف د لعايبية صغار ف مراكش. فاش كانت عندو 14 لعام دخل ل لمدرسة ديال لكوكاب و تما تفورما مزيان على يد مدربين بحال مولاي هاشم، بنصالح، المنصوري و بوستة.

فديك لوقيتة لكوكاب كان كايدربها مدرب برازيلي سميتو فلافيو لّي كان متبع لّعايبية د شّبان و قرر باش يدخل الطاهر يطريني مع لكبار. أول ماتش ديالو مع لكبار كان ف موسم 85-86 ضد ليفار، ولعب الطاهر ماتش كبير مع لعايبية أسطوريين ديال لكوكاب بحال جنينة، قيدّي، شليحة و بياض.

ف 87 دّا لبوطولة د شّبان مع لكوكاب و كاس لعرش مع لفرقة د لكبار. ف لعام لّي من بعد مشا مسلف باش يلعب مع الكمال المراكشي، وف لعام لّي من بعد رجع ل لكوكاب لّي دوز فيها 6 سنين ديما رسمي وكان كايلعب مدافع أوسط و وسط دفاعي. بين 87 و 94، دوز الطاهر مواسم كبيرة مع لكوكاب لّي كانت من أحسن لفراقي ف لمغريب و دّا معاهوم بوطولا (92) و 2 كيسان د لعرش (91 و 93). من بعد لمشاركات ديالو مع لمونتاخاب، مشا حتارف ف لبرطقيز فين دوز مواسم كبيرة مع بنفيكا لّي ربح معاهوم لبوطولا و لكاس د لبرطقيز.

مع لمونتاخاب، الطاهر كان ف تّسعينات من رّكايز لمهمين د لمغريب ف لوسط و لعب كاس عالم كبيرة ف 98 لّي تألق فيها و كان مورا 3 د لبيوت د لمونتاخاب: كان هو لّي عطا تّمريرات لحاسمة باش ماركاو حجي و هدا ضد النرويج و بصير ضد سكوتلاندا.




#Article 67: الفيمينيزم (250 words)


النسوية ولا لفيمينيزم، هي واحد لمجموعة د لحركات لجتماعية وسّياسية ولإيديولوجيات لي كاتبغي تعرف وتنشئ وتوصل لتّساوي سّياسي ولقتصادي وشّخصي ولجتماعي ديال لجنسين. لفيمنيزم كايتّاخد لموقف لي كايقول بلّي لمجتمعات كاتعطي لأولوية لوجهة نّظر ديال راجل، وبلّي لمرا كاتظلم فهاد لمجتمعات. من بين لمجهودات باش هاتشي يتغير كاين محاربة لأفكار لمسبقة على لجندر وإنشاء فرص ونتائج تعليمية، مهنية و د تّعامل للمرا متساوية مع لّي عند رّاجل.
   
لكلمة ديال فيمينيست ولا نسوي تتقال على الراجل ولا لمرا اللي تيكافحو باش المرا يكونو عندها نفس الحقوق فلمجتمع بلا ميتفرق بينها وبين الراجل على اساس الجنس ديالهم.
حقوق بحال الحق ف الاجهاض ولا الحق فلورت قد قد مع الرجل هي أمثلة د حقوق اللي تشهر بها هاد الفكر و اللي ناداو بيه شي نسويات ونسويين. ولكن كاين حقوق اخرى اللي بفضل هاد النوع من الافكار بدلات الشكل د مجتمعات و السياسات د بلدان، بحال الحق فالتصويت و اللي باقي نسا كتار فالعالم محرومين منو تال ليوم.

من الحقوق اللي تيناضلو عليها الفيمينيست ولا النسويين و النسويات فالعالم كاين:

الفيمينيست تيناضلو حتا ضد التحرش و العنف الاسري، الاغتصاب، وڭاع انواع العنف ضد المرا.

كاين بزاف د الأنواع ديال النسوية بحال النسوية المسيحية اللي تطالب بحق المرأة ف قيادة الكنيسة ولا النسوية لإلحادية اللي تتعتبر باللي الدين هو السبب فظلم المرا وأشكال اخرى، اللي تاتقول كلها باللي الهدف ديالها هو يتحيًدو ڭاع أنواع الحڭرة اللي تيتمارسو على المرا.

شارل فوريي، فيلسوف وشتراكي يوطوبي فرانساوي، عندو لفضل فتصويغ د لكلمة فيمينيزم (بلفرانساوية: féminisme) ف 1837. لكلمة فيمينيزم بانت لأول مرة ف فرانسا وهولندا ف 1872.




#Article 68: لقنطرة د بروكلين (145 words)


لقنطرة د بروكلين هي واحد القنطرا فالمدينة د نيو يورك فالميريكان, و تاتلاقي مابين المنطقة د مانهاطن و بروكليين. تادوز فوق من واحد الواد سميتو إيستيرن ريڤر.

القنطرا د بروكلين هي وحدا من القناطر اللٌوالا اللي تبناو معلًقين فلميريكيان. بقات تاتًبنا 14 لعام, و تفتاتحات نهار 24 ماي 1883. فنهار الافتتاح ديالها دازو فيها 1800 طونوبيل و 150.300 ديال الناس. المهندس د هاد القنطرة كانت سميتو دجون آوڭوسطوس روبلينڭ. هاد المهندس ماكانش عندو الزهر حيث غير 3 إيام من بعد ما بدا البني د القنطرا دخل فيه باطًو وعنفجليه الصبعان د رجليه. جاه الطيطانوس ومات من بعد 13 ليوم من ديك الكسيدة.

واشينطون روبلينڭ, ولد آڭوسطوس, هو اللي كمًل المشروع من مورا ما مات بًاه, ولكن تا هو مرض (بواحد المرض سميتو مرض تخفيف الضغط), و كان خاصو يتبًع المشروع غي من بعيد. عاوناتو مراتو إيميلي روبلينڭ, وهي اللي قبطات المشروع تا سالا على خير.




#Article 69: كورة (203 words)


لكورة هي رياضة جماعية كيلعبوها جوج ديال لفراقي ضد بعضياتهم. كل فرقة د لكورة تيكونو فيها 11 لعًاب تيلعبو برجليهم بكورة مكورة. تاتًعتابر لكورة هي الرياضة اللي شعبية ڭاع فلعالم. كاتلعب لكورة ف تيران مستطيل فيه جوج ديال الشبكات ف لقنات ديالو. الهدف ديال هاد الرياضة هو كل فرقة تدخًل لكورة فالشبكة د لفرقة لخرا.

الحارس هو الاعب لي بوحدو يمكن ليه يشد الكورة بيدو و لا بدراعو ، ولكن خاصو يكون ف منطقة لعمليات. اللعابة من غير لحارس خاصهم يخدًمو رجليهم باش يهجمو ولا يمرًرو، و شي مرات تيخدًمو تا راسهم. الفرقة اللي كاتماركي أكبر عدد د لبيوتا فلماتش تا تربح. يقدرو شي مرًات جوج فراقي يساليو قد قد و أيكون التعادل. فلماتشات اللي خاص ضروري وحدا من لفراقي تربح تايدًارو أشواط زايدة، ويلا بقا تعادل تايدًارو پيلانتيات.

تصايبت لقوانين د لكورة ف لينڭليز و دارها ليتيحاد د لكورة د لينڭليز ف 1863. لمنظُمة اللي تاتحكم ف لكورة فلعالم هي ليتيحاد الدولي ديال كورة، اللي كيتسمًا فيفا. أكبر بطولة عالمية ديال لكورة هي كأس لعالم.

تطورات لأساليب ديال لكورة مع لوقت وتبدًلات معاها بزاف د لقوانين حتا وصلنا للكورة لحديثة. فهاد لمرحلة، ولات لفراقي تاتخدم تا على الطكتيك و لمهارات د اللعب، و هوما حوايج تيخدمو عليها لمدربين باش يربًحو لفراقي ديالهم.




#Article 70: المعطي منجب (208 words)


المعطي منجب، تولد فـ6 مارس 1962 ف بنسليمان، هو ؤستاد جاميعي ومؤرخ وحقوقي وناشط سياسي مغريبي تيخدم على تّاريخ السياسي لمعاصر ومسائل حقوق لإنسان.

تولد لمعطي منجب ف 1962 فبن سليمان وكبر فيها. قرا التاريخ فكلية لأداب فالرباط و موراها كمًل قرايتو ففرانسا.

لمعطي منجب عندو جوج دكتورات: اللًولا من فرنسا فالشؤون السياسية فمنطقة شمال إفريقيا (1989)، والثانية من السينيڭال فتاريخ السياسة لإفريقية (2005).

ف شتنبر 2015، تمنع من سفر ل لخاريج بسباب ختيلالات مالية ف واحد من لمراكز لي خدام فيهم علا حساب ماقالت وزارة داخيلية. موراها دار إضراب علا لماكلة من 6 أكتوبر حتال 29 أكتوبر مورما تحيد عليه هاد لمنع. تهمة لي كانت عندو د أنه قاس سلامة داخيلية د دولة، نصب ؤ بلي خدا معاونات من منضمات برانية بلاما يحتارم لقانون دازت ف لمحكمة لبتيدائية د رباط ف 19 نونبر 2015 لي أجلاتها حتال 27 يناير 2016 ؤ موراها خمسة د لمرات خرين، حتال 28 يناير 2021 فين تحكم عليه غيابيا ف هاد لقضية ب عام د لحبس ويخلص خمسطاس ألف درهم.

ف7 أكتوبر 2020، النيابة العامة في المحكمة الإبتدائية ديال الرباط حلات تحقيق مع المعطي منجب و لفاميلة ديالو علا شي تحويلات ديال فلوس كثيرة وغسيل د لفلوس.

أسس لمعطي منجب بزاف د لمراكز ولجمعيات منها:

كتب لمعطي منجب عدد د لكتوبا منها:




#Article 71: المغريب (367 words)


لمغريب، (ب لأمازيغية: ⵜⴰⴳⵍⴷⵉⵜ ⵏ ⵍⵎⵖⵔⵉⴱ - تاڭلديت ن لمغريب) واحد لبلاد فالشمال لغربي د إفريقيا، العاصمة ديالها هي الرباط ولمدينة الكبيرة ديالها هي الداربيضا، ولي هي مدينة ديال لقتيصاد والخدمة.

لمداين الكبار لاخرين ولمعروفين هوما ، فاس، مراكش, سلا، مكناس، طنجة، أڭادير، آسفي، تطوان، وجدة، لعيون، الحسيمة، بني ملال، قنيطرة، وارزازات والداخلة. تايلاگيها من الشمال لبحر لبيض لمتوسط والصبليون، من لغرب لمحيط لأطلسي، من الشرق الجزائر، ومن لجنوب موريتانيا . لمساحة د لبلاد هي 710.850 كم²، و تيسكنو فيها 36.5 مليون د الناس على حساب التقديرات د 2019. لمغريب دولة عضو فالامم لمتحدة من عام 1956 و جاميعة الدول لعربية من 1958, وهو من الدوال اللي أسسات اتحاد المغريب لكبير فعام 1989. 1989

المغرب عندو واحد النظام ملكي فيه الملك محمد السادس هو اللي كيحكم البلاد من عام 1999 من بعد موت باه لحسن الثاني، عندو دوستور توافقت عليه أغلبية كبيرة ف 2011 ومنها عندو برلمان كتصوت الناس على لأعضاء ديالو.

رئيس لحكومة ديال المغريب هو سعد الدين لعثماني لي كينتامي لحيزب العدالة و التنمية.

 لأمازيغ فلقرن لول قبل لميلاد دارو مملكة مقابلا لبحر لبيض لمتوسط، وسماوها مملكة موريطانيا، اللي سميتها جات من كلمة فليغريقية (موري) واللي هي باش كانو كيسميو الناس الي ساكنين فغرب شمال إفريقيا ، هاد لمملكة تقسمات عام 40 ميلادية لجوج مماليك: موريطانيا الطنجية فلمغريب وموريطانيا لقيصارية فالجزائر. هاد السمية كاتعطا ليوما لبلاد موريطانيا. من بعد ما دخل ليسلام لمغريب ولات كاتسمى هاد لارض لمغريب لاقصى. اللوغات الرومانسية (بحال لفرونسي ولونكلي) خدات السمية من واحد لكلمة لاتينية (مرك)، وهي طريقة غالطة نطقو بيها هاد الناس كلمة مراكش لي كانت عاصمة للدولة ديال لمورابيطين. الناس بكري كان تايحساب ليها بلي الشمس كاطلع من الجابون (بشينوية نيهون: البلاصة لي كاطلع منهاالشمس) وكاتلاح فلمملكة دلمغريب (بلعربية لفوصحى المغرب: البلاصة لي كاتلاح فيها الشمس). الناس لي كانت كاتكتب التاريخ ديال لعرب كانت كتفرق لمغرب لكبير لتلاتة دلبلدان: لمغريب لقريب (فتونس)، لمغريب لوسطاني (فالجزائر) ولمغريب لبعيد (اللي هو المغريب). الناس من بعد عرفات لمغريب بسميات خرا بحال سميات ديال لعواصيم ديالو كيبحال مملكة مراكش ومملكة فاس، حيتاش السلاطين ديك الساع كانو كايسينيو لتيفاقيات والمعاهدات إما بـ سلطان فاس أولا سلطان مراكش. الصبليون خداو السمية ديال هاد لبلاد (Marruecos) من سمية مدينة مراكش، نفس لحاجة داروها لفرانصيص (Maroc) واخا بعض لمرات كيسميو لبلاد بلمملكة الشريفة (Le Royaume cherifien).




#Article 72: المهدي بنعبود (182 words)


المهدي بنعبود (تولد ف سلا ف 1919 - مات ف الرباط ف 1999) كان طبيب وفيلسوف ومفكر وكاتب مغريبي.

تولد المهدي بنعبود فسلا ف 1919 وكبر فيها. مات ليه بًاه وهو عندو 7 سنين, و ربًاتو مًو ومن بعد خاه لكبير زين العابدين. دخل للمدرسة وقرا فيها مزيان, حتا خدا لباك ديالو وبدا يقرا الطب ف 1940. مشا للجامعة د مونپوليي ففرانسا باش يكمل قرايتو, ومن بعد كمًل فباريز ف 1945. ف 1950 خدا الدكتورا ديالو وحلً عيادة فالدار لبيضا. فنفس لوقت اللي كان تيقرا, نخارط فلعمل لوطني ودخل فحزب ليستيقلال.

ف 1951 مشا للميريكان وحلً فيها مكتب باش يدافع على استقلال لمغريب. من مورا ليستيقلال نيشان, ايعينو محمد لخامس أول سفير دلمغريب فلميريكان, وغادي يبقا سفير 6 سنين (من 1956 ل 1962) حتا غادي يبدًلوه حيث ساند موظفي وزارة لخارجية فلإضراب ديالهم. موراها رجع عاود لمغرب وحلً عيادة فسلا, و من 1966 ولاُ أستاد دلعلم النفسي ولمداهب لفكرية لمعاصرة ولعقيدة لإسلامية فلجامعة د محمد لخامس فالرباط, وخرًج بزاف د لكتوبا والتحاليل فهاديك لوقيتة.

مات المهدي بن عبود نهار 12 يونيو 1999 فالرباط.

كتب المهدي بزاف د لكتوبا فبزاف د لمواضيع, منها:




#Article 73: المهدي بنعطية (180 words)


المهدي بنعطية (تولد نهار 17 أبريل 1987 فكوركورون ففرانسا) كوايري مغريبي (مدافع) تيلعب فلفرقة ديال الدحيل فقطر, وكان تيلعب مع لمنتخب د لمغريب د كورة.

بدا المهدي بنعطية المسيرة ديالو فأولمپيك مارسيي ف 2005, ولكن مالعبش فيها تقريبا ڭاع و صيفطوه إعارة لبزاف د لفراقي. ف 2008, غادي تشريه كليرمون فوط, اللي كانت فالدرجة التانية د فرانسا, وتما فيه بدا يلعب ديما. فنفس العام (2008) لعب أول ماتش ديالو مع لمنتخب د لمغريب, وكان ماتش ضد زامبيا ربح فيه لمغريب ب 3 ل 0.

ف 2010 غادي يمشي بنعطية للبطولة د الطاليان وغادي يلعب مع لفرقة ديال أودينيزي تلت سنين, اللي كان عندو فيها مستوى مزيان, خلًا روما تشريه ف 2013. غادي يبقا بنعطية غادي وتيطلع و ف 2014 أيمشي لبايرن ميونيخ. فلعام التاني ديالو تمًا غادي يهبطلو النيڤو ويتضرب بزاف د لمرات, تا مشاتو بلاصتو فالدفاع. غادي يسلًفو لباريين ف 2016 ليوڤانتيس, اللي غادي تشريه ف 2017. فيوڤانتيس غايلعب تلت سنين فلمجموع, و ف 2019 أيمشي لقطر يلعب فلفرقة د الدحيل, و هي لفرقة اللي تيلعب فيها تال دابا. فنفس العام (2019) اعتازل بنعطية اللعب مع لمنتخب د لمغريب.




#Article 74: النادي دلمدابزة (145 words)


النادي دلمدابزة (بلونكلي: Fight Club) هو واحد لفيلم ميركاني ألماني خرج ف 1999 تبنى على الرواية ديال تشاك بولانيك لي عندها نفس السمية، ؤمن الإخراج ديال ديفيد فينشر، ؤلبطولا د براد بيت ، ادوارد نورتون،ؤ د هيلينا بونام كارتر.

الراوي (إدوارد نورتون) ديال القصة لي مكيذكرش السمية ديالو هو موظف فشركة ديال الطوموبيلات،كيسفر بزاف ؤفيه الأرق.الطبيب ديالو مبغاش إكتب ليه الدوا عوض هادشي كينصحو باش إحضر للإجتماعات ؤلكروبات ديال الناس لي كتعاني كثر منو، فكان كيحضر بزاف دلكروبات ددعم بحال لكروب ديال الكونسير ؤكيدعي بلي حتى هو فيه،ؤهو على هاد الحال كيتلاقى بنصابة بحالو مارلا سينغر (بونهام كارتر).تعصب ؤغضب فاللول من بعد غيتفاوض معاها باش ميحضروش  لنفس لكروبات. من بعد واحد المدة غيتلقى واحد السيد كيبيع الصابون سميتو تايلر (براد بيت)  ؤغيجرو لواحد النادي  دلمابزة ؤبجوجهوم غيتعاونو باش هاد النادي إكبار،لكن من بعد الراوي  غيعرف الأهداف الخفية ؤالحقيقية ديال تايلرؤمن تما لحياة دبطل لقيصة غترون.




#Article 75: النظام الشمسي (649 words)


النظام الشمسي أولا المجموعة الشمسية هو النظام اللي مربوط مع بعضياتو بفعل الجاذبية واللي كيتكون من الشمس ؤالأجسام اللي كيدورو عليها سوى بشكل مباشر سوى بشكل غير مباشر. هاد الأجسام كيتسماو بالأجرام السماوية ؤمن بين الأجرام اللي كيدورو على الشمس بشكل مباشر كنتلاقاو، أكبرهم الكواكب التمنية، ؤالباقي كلهم أجرام صغيرة؛ الكواكب القزامية وأجرام صغيرة ديال النظام الشمسي. من بين الأجرام اللي كدور على الشمس بشكل غير مباشر كنتلاقاو الأقمار اللي جوج منهم كبر من أصغر كوكب؛ عطارد.

النظام الشمسي تكون 4.6 مليار عام هادي، بواسطة انهيار جاذبي ديال واحد السحابة جزيئة عملاقة بين النجمية. الغالبية العظمى ديال كتلة النظام كاينة فالشمس، والكتلة اللي بقات الأغلبية ديالها كاينة فالمشتري. الكواكب الدخلانية الصغيرة الربعة، عطارد، الزهرة، الأرض، والمريخ، كلهم كواكب أرضية، يعني أنهم كيتكونو من الصخر والمعادن بشكل أولي. الكواكب الخرجانية الربعة هوما كواكب عملاقة ؤكلهم الكتلة ديالهم فعليا كبر من الكتلة ديال الكواكب الأرضية. أكبر وحدين، المشتري وزحل، هوما عمالقة غازية، يعني كيتكونو أساسيا من الهيدروجين ؤالهيليوم. أما أبعد وحدين، أورانوس ونپتون هوما عمالقة جليدية كيتكونو من مواد بنقط انصهار عالية نسبيا إلى قارناهم بالهيدروجين والهيليوم، كيتسماو مواد متطايرة، بحال الما، الأمونيا والميثان. كامل الكواكب التمنية عندهم تقريبا مدارات دائرية كاينة على قرص مسطح تخيلي كيتسمى مسار.

النظام الشمسي كيضم حتى الأجرام الصغيرة. حزام الكويكبات اللي جا ما بين المريخ والمشتري، كيضم فغالبتو أجرام كتكون – بحال الكواكب الأرضية – من الصخر والمعدن. مورا المدار ديال نبتون كنتلاقوا حزام كيپلر ؤالقرص المتفرق، اللي هوما ساكنة ديال الأجرام مورا النپتونية كتكون الغالبية ديالهم من الجليد، ؤموراهم ساكنة مكتاشفة مؤخرا ديال السيدنويدات. من بين هاد الساكنة، كاينين أجرام كبيرة بما فيه الكفاية باش يكونو مدورين بفعل الجاذبية ديالهم، وراه كاينين مناقشات محتارمة فهاد المجال بحال مثلا شحال غادي يكون العدد ديالهم. بحال هاد الأجرام تصنفات على أنها كواكب قزامية. ؤوحدين خرين تم التعريف ديالهم ولا تقبلو على أنهم كواكب قزامية بما فيهم سيريس ؤالأجرام مورا النپتونية پلوتو وإريس. بالإضافة لهاد جوجت المناطق كاينين بزافت الساكنة ديال الأجرام الصغيرة بما فيهم المذنبات، القنطورات، ؤسحاب الغبرة بين الكواكب اللي كيسافرو بحرية بين المناطق.

ستة من بين الكواكب، أكبر ستة كواكب قزامية، ؤالعديد من الأجرام الصغيرة كيدورو عليهم أقمار طبيعية، عادة كيڭولو ليهم غير أقمار نسبة للقمر. كل واحد من الكواكب الخرجانية ضايرة بيه خواتم كوكبية ديال الغبرة وأجسام صغيورة خرى.

الريح الشمسية، هي تدفق ديال الجزيئات المشحونة كيخرج من الشمس، كدير واحد المنطقة كتشبه للفقاعة فالوسط بين النجوم كتسمى بالهيليوسفير. الهيليوپوز هي النقطة فين كيتساوا الضغط من عند الريح الشمسية مع الضغط المعاكس ديال الوسط بين النجوم؛ راه كيتمدد حتال حافة القرص المتفرق. سحابة أورت اللي كيتعتاقد بأنها المصدر ديال المذنبات اللي عندها دور زمني كبير إمكن تكون بعيدة تقريبا ألف مرة من الهيليوسفير. النظام الشمسي كاين فذراع الجبار، 26,000 سنة ضوئية من مركز مجرة درب التبانة.

فمعظم تاريخها، البشرية ما فهماتش ؤما تعرفاتش على مفهوم النظام الشمسي. أغلب الناس حتال أواخر العصور الوسطى–عصر النهضة كان كيسحاب ليهم بللي الأرض ساكنة فمركز الكون ؤبللي هي مختالفة من ناحية التصنيف على الأجسام الإلهية ولا الأثيرية اللي كتحرك فالسما. واخا الفيلسوف اليوناني أرسطرخس الساموسي فكر فنظام فيه شمس مركزية غادي تعاود تنظم الكوسموس، كان نيكولاس كوپرنيكوس هو أول واحد غادي يطور شي نظام يتوقع فيه رياضياتيا مركزية الشمس.

فالقرن 17، اكتاشف ڭاليليو بللي الشمس فيها شي نقاطي كحلين، ؤ بللي المشتري عندو ربعة الأقمار كيدورو عليه. كريستيان هوڭنز غادي يتبع على اكتشافات ڭاليليو فاش غيكتاشف تيتان القمر ديال زحل ؤالشكل ديال الحلقات نتاعو. عرف إدموند هالي ف1705 بللي الظهورات المتكررة ديال واحد المذنب كانت كتسجل نفس الجسم، اللي كيرجع بانتظام مرة وحدة كل 75–76 عام. هادا كان أول دليل على شي حاجة من غير الكواكب كدور على الشمس. فهاد الوقت (1704) بان المصطلح ديال Solar System (النظام الشمسي) فلونڭلي. فعام 1838، فريدريش بيسل غادي يقيس بنجاح التزيح النجمي اللي هو تغير ظاهري فالموقع ديال شي نجم معين كينتج على الحركة الدورانية ديال الأرض على الشمس، ؤهاكا قدم أول برهان تجريبي مباشر على مركزية الشمس. مللي بدات التحسنات فالفلك الرصدية ؤبدا الاستعمال ديال المركبات الفضائية بلا طيار ولا ممكن التحقيق المفصل فأجرام خرى كاينة فمدار على الشمس.




#Article 76: النيجر (173 words)


لجمهورية د النيجر (بلفرانساوية: République du Niger) هي بلاد مافيهاش لبحر جات فلوسط د إفريقيا و بالضبط فلمنطقة د الساحل. تسمًات بالنيجر علاود لواد د النًيجر اللي تيدوز من لأراضي ديالها. تيحدًوها من الشمال لجزائر وليبيا, من لغرب مالي وبوركينا فاصًو, من الشرق تشاد ومن لجنوب نيجيريا وبينين. 80% من لأراضي د بلاد هي صحراوية, ولأراضي لاخرا اللي قريبة مهددًة بالتصحر. النيجر وحدا من أفقر لبلدان فلعالم ولقتيصاد ديالها تيعتامد غالبا على لفلاحة وعلى التصدير د مواد خام بحال ليورانيوم.

فاللخر د لقرن 19 بدات فرانسا تاتحتًل لأراضي ديال النيجر, و ف 1904 دخُلات النيجر فإفريقيا لغربية لفرانساوية. بقا هاد ليستيعمار تال 1960, وهو لعام اللي أتستاقل فيه لجمهورية د النيجر, وغادي تبدا موراها فترة مافيهاش لإستقرار و أيكون حكم د لعسكر تال 1999 اللي تدار فيها قانون نتيخابي باش يبدا يطلع رئيس لبلاد بلينتيخابات.

تيسكنو فالنيجر تقريبا 22.5 مليون د الناس (لأغلبية ديالهم فلجنوب د لبلاد) و لعاصمة ديالها هي نيامي. اللغة الرسمية هي لفرانساوية, ولعملة اللي كاتخدًم فلبلاد هي لفرنك لغرب إفريقي. الرئيس د النيجر من 2011 لدابا هو محمدو يوسوفو.




#Article 77: الوداد البيضاوي (318 words)


لوداد لبيضاوي ولا لوداد الرياضي، هي واحد لفرقة د كورة فداربيضا تأسسات نهار 8 ماي 1937 فوقت الاستعمار لفرانساوي لي كان في لمغريب، ؤ هو فريق قديم معروف بأنو فريق مقاومين وحتا ناس ليكانو فيه عاونو بلاد و لأكترية ديالهم مقاومين مغاربة بحال لمؤسس لحاج محمد بنجلون تويمي (حصل على الوسام بعد الاستقلال من طرف الملك المرحوم محمد الخامس).

لعبات لوداد لماتش لول ديالها فشتنبر 1939 ضد تيحاد رياضي لمغريبي (لياسام)، وخسراتو بجوج لواحد. أول واحد ماركا فتاريخ لوداد كان هو لخميري.

الفوز ديال الوداد ديك الوقت على اليسام لي كانت هي فرقة ديال ستيعمار ديك الوقيتة كان بحالا الا قولتي فوز المنتخب المغربي على المنتخب الفرنسي كانت الوداد كايشجعوها جميع المغاربة قبل الاستقلال حيت كان فريق مسلم ميا فالميا و تأسس من اجل المقاومة

لوداد هي اكتر فرقة رابحا البطولات المغربية (20 مرة)،

ايام ستيعمار الفرانساوي فالمغرب، تأسسات الوداد، فهاد الوقيتة، المرسة ديال دارالبيضا كانو ضايرين بيها المسابح و الا بغيتي تدخل ليهم خاصك تكون مقيد فشي نادي لي كانو تابعين للفرانسويين، من 1935 ل 1936 بزاف ديال المغاربة دخلو شي لي خلع المستعمر لي بداو تايجريو عليهوم، من بعد هادشي طاحت الفكرة على المقاومين باش يصابو نادي 100% مغريبي والكين فشلو، غايجي تذخل ديال عائلة بنجلون لي قررو يتاصلو بالجمعية الفرانكو مغربية، من تماك تأسسات الوداد نهار 8 ماي 1937

الأصل ديال سمية الوداد و تايختالفو فيها لمؤرخين والاكين وحدة لي معروفة بزاف هي ديال أحمد لحريزي لي كتب كتاب ملحمة الوداد، و تاتقول بلي واحد من المؤسسين تعطل بسباب الفيلم وداد ديال أم كلثوم و من تماك تسمى النادي  لي غايهز راية المغرب بسمية نادي الوداد الرياضي

أول فرع فالنادي هو فرع ديال كورة د لما و ف 1938 تأسيس فرع لباسكيط و ف 1939 غايتأسس فرع د كورة لي غايولي هو لي معروف فيهم.

الوداد غايلعب أول ماتش ليه قدام عملاق الكرة المغربية (الياسام) لي كان بطل المغرب ف سبتومبر 1938، تخسر الماتش ب 2-1، ماركا فيه لخميري لي غايكون أول هداف فتاريخ الوداد




#Article 78: الوليد ميمون (173 words)


الوليد ميمون (بلأمازيغية: ⵍⵡⴰⵍⵉⴷ ⵎⵉⵎⵓⵏ) (تولد نهار 19 مارس 1959 فبني سيدال - إقليم الناظور) هو واحد لمغني مغريبي تيغنًي بالريفية, ومعروف بسميًت لماليك د لأغنية الريفية.

تولد الوليد ميمون فبني سيدال فإقليم الناظور ف 1959 فأسرة ديال لفلاحة أبا عن جد. من صغرو وهو تاتعجبو لموسيقا, وكان متبع بزاف إمديازن, اللي هوما لفنانا والشوعارا اللي تيغنيو فالريف. قرا الوليد الثانوي فالناظور وملًي خدا لباك مشا للجامعة د ظهر المهراز ففاس, وتمًا دار وعي سياسي ونضالي.

خرًج أول ألبوم ديالو ف 1981, وكانت سميتو أجاج, اللي هي الرًعد. من بعد ماخرج لألبوم قبطوه لبوليس وستنطقوه ومنعو لألبوم يتباع وجراو على الوليد ميمون من لجامعة. واخا هاكا بقا تيغنًي بالتخبية وخرًج ألبوم آخر ف 1986, اللي سميتو أمتلوع (الشمكار), و اللي تباع عادي وماتًمنعش.

فاللول ديال التسعينات هاجر الوليد ميمون لهولاندا, وخرًج جوج ألبومات تمًا. ف 1997 مشا يعيش فالكاناري, ولكن ماطوًلش فيها ومشا لبلجيكا ف 1998, وهي اللي عايش فيها من ديك لوقت تال دابا.

الوليد ميمون معروف بزاف عند الناس اللي تيسمعو لأغاني الريفية, وعندو عدد د لأغاني لمعروفة, منها بحال دابا:




#Article 79: اولاد عياد (185 words)


اولاد عياد (بالأمازيغية : ⵓⵍⴰⴷ ⴰⵢⴰⴷ) هي واحد المدينة ف اقليم الفقيه بن صالح ف جهة بني ملال خنيفرة، كيسكن فيها شي 21,466 ديال بنادم عل حساب ليحصا ديال 2004.

كاينة اولاد عياد ف لأحداثيات: 32° 12' 0 دشمالا و 6° 48' 0 غربا. وعلى طّريق لوطنية رقم 8 لي كتربط مدينة بني ملال بمدينة مراكش. لوزين دسكر هو معلمة ديال لمدينة حيت كاين ف لخرجة ديالها علا طريق كيسهل علا لي دايز يعرف لمدينة .

كتصنف اولاد عياد ف لمناخ لمتوسطي لقاري لي ناشف، لي فيه شتا باردة، ؤ صيف سخون، كتوصل لموايان د لحرارة لماكس 29.71 ومينيموم ل 13.05، لموايان د شتا لي كاتطيح هو 438.42 مليمتر ف لعام، لي هاد شتا مانضماش ف لعام.

اما لعجاج لي كاين هو لعجاج د شرقي ديال صيف لي كاتجي من لجنوب وكيخلي واحد لموجة د سّخونية.

لمدينة ضاير بها سلسلة دجبال لأطلس لمتوسط من جهة لجنوب ؤ من شمال أراضي زراعية سقوية كبيرة لي معروفة بسهل تادلة (محليا : لبلان) هادشي حيت عندها جوج د لويدان صطيناعية كيعتمدو عليهم ف لفلاحة.

لأغلبية دسكان كيعتمدو علا لفلاحة بشكل رئيسي؛ تّجارة حتى هي كتعرف رواج كبير.

www.ouledayad.com




#Article 80: باب دارنا (233 words)


باب دارنا هولدينڭ، معروف كتر غير بسميت باب دارنا، هي واحد شريكة مغريبية ديال لإنعاش لعقاري، كيقولو أنها بدات فـ1990، ولاكين ماتحلات رسميا حتال 18 أكتوبر 2019،  مولاها هو سيدي محمد الوردي لي من قبل كان موضاف معا وفاسلف ؤوفاكاش.

لقصة كاتبدا بالضبط فـ2013 ملي باب دارنا بدات كاتبان ف ساحة بلإشهارات ف تلفزة وسوشل ميديا كيبينو فيهم أنهم عندهم مشاريع ديال ديور فبزاف د لمدن د لمغريب ؤبعروض مختالفة كاتناسب كلشي، ؤكيديرو حتا تسهيلات ف لخلاص.

هاد لإشهارات، لي شاركو فيهم ممتيلين ؤفنانين، كانو كيدوزو فيهم لعروض لي كاينا بحال مثلا تشري جوج ديور وتالتا فابور ولا ڤيلا بتامان برطمة، هادشي لي خلا ناس يتيقو ؤيزعمو يشريو.

حاجة خرا، هاد شريكة حضرات لبزاف د لمعارض داخل لمغريب ولا ف لخاريج، وهادشي خلا حتا لمغاربة لي ساكنين برا يزعمو ف شريان ديال ديور.

ف لول ديال نونبر 2019، تقريبان شي 20 واحد لي دافعين تسبيق باش ياخدو ديور مشاو كيطالبو قدام لماقر د شريكة باش يردو ليهم فلوسهم حيت تعطلو باش يعطيهم ديورهم؛ ومن بعد ليالي من لمفاوضات، الوردي عطاهوم شيكات. نهار 7 نونبر واحد من هاد الناس ؤفنفس لوقت محامي دار شكاية ضد رئيس لمدير لعام ديال باب دارنا الوردي حيت شيكات بلا رصيد.

فـ21 نونبر، الوردي تشد وتحط ف لحراسة نضرية. معا لبوليس لقضائي الوردي عتارف أنه ماكانش عندو ترخيص ديال لبني.

فـ30 دجنبر، نائب لمدير لعام ؤراقم 2 ديال باب دارنا عثمان البوكفاوي تشد ؤهو هربان فأبيدجون ب لكوط ديڤوار.




#Article 81: باربيدوس (122 words)


باربيدوس (بلينڭليزية: Barbados) هي واحد لبلاد جزيرة جات فلكاريبي. لمساحة ديالها صغيرة بزاف وماتاتفوتش 439 كم². الطول ديال لبلاد كاملة هو 34 كم ولعرض ديالها 23 كم. أقرب بلدان لباربيدوس هوما سانت ڤينسنت و لڭرونادين (168 كم) وطرينيضاض ؤ طوباڭو (400 كم).

ستعمرو بزاف د لبلدان باربيدوس منها لبرتغال وصبانيا وبريطانيا (اللي ستعمراتها ف 1625). ستاقلات لبلاد نهار 30 نونبر 1966, ومن ديك الساعة وهي تابعة للمنظمة د لكومونويلث بحال لأغلبية د لبلدان اللي ستعمراتهم بريطانيا, ودخلات عضو مع لأمم لمتحدة.

تيسكنو فباربيدوس تقريبا 280.000 ديال الناس ولعاصمة ديالها وأكبر مدينة فيها هي بريدج تاون. اللغة الرسمية فلبلاد هي لينڭليزية, ولفلوس اللي تاتخدًم فيها هي الدولار د باربيدوس. باربيدوس معروفة بالسياحة وتيجيوليها الناس من لعالم كامل باش يستافدو من لبحر ولجو ديالها.




#Article 82: باريز (108 words)


باريز, (يلفرانساوية: Paris) ؤلا لعاصمة د الضواو, هي العاصمة د فرانسا وأكبر مدينة فيها. هي من أكبر المدن د ؤروبا, ؤ كايسكن فيها ؤ نّواحي ديالها كثر من 12 لمليون بنادم.

باريز معروفة فالعالم كلًو بالمعالم الحضارية والثقافية اللي فيها, بحال برج إيفل, وقوس النصر والمتحف داللوڤر. هاد المعالم كلُها تيخليو الناس من ڭاع البلدان يزوروها, وهي وحدا من المدن السياحية الكبار فالعالم.

ياريز معروفة من بزاف دالنواحي فالرياضة, فالكورة مثلا الفرقة ديالها پاري سان جيرمان ربحات بزاف د البطولات متًابعة, ولا الطينيس, حيث كاتنظم البطولة د رولون ڭاروس فيها كل عام فشهر ماي.

كاين فباريز جوج د المطارات دوليين كبار, وهوما مطار شارل دو ڭول, ومطار أورلي.




#Article 83: بانڭلاديش (188 words)


بانڭلاديش (ب لبينڭالية: গণপ্রজাতন্ত্রী বাংলাদেশ) هي واحد لبلاد فلجنوب الشرقي ديال آسيا. تاتحدها لهند من ڭاع الجوايه، من غير لجنوب الشرقي، اللي عندها فيه حدود مع بورما، و لجنوب اللي تاطًل فيه على لخليج د لبنڭال. بانڭلاديش تاتعني لبلاد د لبنڭال باللغة لبينڭالية.

ف 1947، مورا ما خرجات بريطانيا من شبه لقارة لهندية، تقسمات ديك لمنطقة على جوج: لمنطقة د لهندوس هي لهند، و لمنطقة د لمسلمين هي پاكيستان، اللي كانت فيها پاكيستان لغربية ( هي پاكيستان ديال دابا)، و پاكيستان الشرقية (هي بانڭلاديش). علاود لحڭرة و لإهمال ليقتيصادي و السياسي و اللغوي، دارو الناس ديال پاكيستان الشرقية ثورة على پاكيستان لغربية، و وقعات حرب بيناتهم سالات بليستيقلال ديال پاكيستان الشرقية، اللي ولات هي لجمهورية الشعبية د بانڭلاديش ف 26 مارس 1971.

تيسكنو ف بانڭلاديش تقريبا 161 مليون واحد (هي الدولة التامنة من ناحية عدد السكان فلعالم) و لعاصمة ديالها هي داكًا. لعدد لكبير د السكان ديالها تيخلًيها هي الدولة لمسلمة التالتة من ناحية الناس فلعالم. لفلوس اللي كاتخدًم فلبلاد هي تاكا، و اللغة الرسمية هي لبينڭالية. بانڭلاديش داخلة مع لأمم لمتحدة و منظمة لكومنويلت و ليتيحاد د جنوب شرق آسيا د التعاون لإقليمي و مؤتمر لقمة لإسلامي.




#Article 84: باهاماس (154 words)


لباهاماس، لمعروفة رسميا بلكومونويلث د لباهاماس (بلينڭليزية: Commonwealth of The Bahamas) هي واحد لبلاد جات فلكاريبي ولأراضي ديالها كلها جزر فلبحر. لباهاماس فيها تقريبا 700 جزيرة منها لكبار والصغار، جاو كلهم فلمحيط لأطلسي. لباهاماس جات فالشمال د كوبا وجمهورية الدومينيكان و هايتي، وقريبة للولاية د فلوريدا ف ميريكان.

باهاماس هي أول أرض وصل ليها كولومبوس من أوروپا ف 1492، ولكن الصبليون ماستعمروهاش وكملو للجزيرة د هيسپانيولا. لبريطانيين هوما أول بلاد ستعمرات لباهاماس ف 1718 وجابولبها بزاف د لعبيد من إفريقيا. ف 1807 حبسات بريطانيا التجارة د لعبيد وولاًو بزاف د الناس اللي كانو عبيد تيمشيو لباهاماس يسكنو فيها، وزادو كتر من مورا ما تحبسات لعبودية النيت فلبلاد ف 1834.

تيسكنو فلباهاماس 332.634 واحد، 90% منهم عندهم أصول من إفريقيا. اللغة الرسمية فلبلاد هي لينڭليزية والعاصمة هي ناساو. لعملة اللي كاتخدًم فلباهاماس هي الدولار لباهامي. لقتيصاد د باهاماس تيضور بزاف على السياحة اللي تادخًل 60% من الناتج لخام د لبلاد وتاتخدًم النص د لباهاميين تقريبا.




#Article 85: بروناي (180 words)


اتحاد بروناي دار السلام (ب لونڭلي: Nation of Brunei, the Abode of Peace - بلمالاي: Negara Brunei Darussalam) هي واحد لبلاد ف لجنوب الشرقي د آسيا جات فالشمال د لجزيرة د بورنيو اللي تاتقاسمها معا ماليزيا و أندونيسيا. بروناي تاتحدًها ماليزيا من ڭاع الجوايه من غير الشمال اللي كاطًل فيه على لبحر د الشينوا لجنوبي.

بروناي تاتَعتابر دولة صناعية و متقدًمة و هي مرتًبة الرابعة ف مؤشر التنمية البشرية من مورا سنغافورة و كوريا لجنوبية و الجاپون. كانت مستعمرة ديال بريطانيا من 1888، و ستاقلات ف 1 يناير 1984 من بعد ثورة مسلحة. مورا ليستيقلال ديالها خدات لبلاد تجاه ديال الصناعة و لحداثة، و هادشي خلاً لقتصاد ديالها يطلع بزاف، بدرجة وصلات تال 56% ما بين 1999 و 2008. ف 2011، على حساب صندوق النقد الدولي، كانت برواني هي الدولة لوحيدة (مع ليبيا) اللي ما عندها تا كريدي.

تيسكنو ف بروناي تقريبا 442.000 واحد و لعاصمة ديالها هي بندر سيري باڭاوان. اللغة الرسمية د لبلاد هي لمالاي و لفلوس اللي كاتخدُم فيها هي الدولار د بروناي. لإسلام هو الدين الرسمي د بروناي و تقريبا 79% د الناس ف لبلاد مسلمين.




#Article 86: بلغاريا (135 words)


لجمهورية د بلغاريا (بلبلغارية: Република България) هي واحد لبلاد جات فلجنوب الشرقي د أوروپا وتاطًل على لبحر لكحل. تاتحدًها رومانيا من الشمال, تركيا وليونان من لجنوب, وصربيا ومقدونيا الشمالية من لغرب.

بلغاريا عندها تاريخ طويل وكانو فيها بزاف د لحضارات منهم لإغريق والرومان والصلاڤ والدولة لعثمانية. ف 1946, عام من مورا لحرب لعالمية التانية, ولات بلغاريا دولة اشتراكية فيها حزب واحد. ف 1989, غادي يطيح لمعسكر الشرقي وغادي يخلي لحزب الشيوعي لبلغاري أحزاب خرا باش تتكون وتشارك فلينتيخابات, ومن ديك الساعة أتولي بلغاريا بلاد ديموقراطية.

تسيكنو فبلغاريا تقريبا 7 د لمليون د الناس ,لعاصمة ديالها هي صوفيا واللغة الرسمية اللي تاتًهضر فيها هي لبلغارية (اللي تاتًكتب بحرف سيريليك). لعملة د بلغاريا هي الليڤ. بلغاريا عضو فليتيحاد لأوروپي ودخلات ليه ف 2007, وهي عضو فبزاف د لمنظمات اخرى بحال حلف الشمال أطلسي (الناطو) و لأمم لمتحدة.




#Article 87: بهيجة إدريس (149 words)


بهيجة إدريس، وسميتها لحقيقية بهيجة العلمي الإدريسي (خلاقت ف مكناس ف 1938) مغنية مغريبية من رّواد د لغنية لمغريبية لعصرية بين خمسينات و سبعينات لقرن لعشرين.

بهيجة بنت عائلة مكناسية عطات بزاف د لفنانين، خوها هو الملحن محمد الإدريسي، اللي كان لحن أغاني مشهورة بحال عندي بدوية و بنت بلادي زينة. ختها هي لمغنية أمينة إدريس مولات لأغنية المشهورة التيليفون. راجل ختها أمينة هو الملحن محمد بنعبدسلام و بنتهوم هي لمغنية غيثة بنعبدسلام.

راجل بهيجة هو الملحن عبد الرحمن الكردودي وبنتها تا هيا كانت مغنية موهوبة، جعاء عبد الرحمن.

بهيجة كانت من لفنانات لولات لّي هاجرو للمشرق و دارت كاريير و شهرة كبيرة ف لعالم لعربي، بحيت أنها غنات أغاني و قصائد ب الفصحى (د نزار قباني) و أغاني ب لمصرية.

بهيجة عندها كتر من 100 غنية و من أشهرها لما يجري قدامي و ماهو جاري ولا قريب لدواري لّي ولات من لخالدات د لموسيقى لمغريبية لعصرية و شّعبية.




#Article 88: بوروندي (183 words)


بوروندي (ب لكيروندية: Republika y'Uburundi، ب لفرانساوية: République du Burundi) هي بلاد ماكاطلش على لبحر جات فلجنوب الشرقي د إفريقيا. تاتحدًها رواندا من الشمال، طنزانيا من لجنوب و الشرق، و جمهورية لكونڭو الديموقراطية من لغرب. بوروندي جات فلمنطقة اللي فيها ضايات بزاف و لحدود ديالها ف لجنوب تاطًل على الضاية ديال طانڭانيكا.

بوروندي كانت مملكة مستقلة تاتعيش فيها الشعوب ديال التوا و لهوتو و التوتسي، حتا للول د لقرن 20 فين حتلاًتها ألمانيا. مورا لحرب لعالمية اللولا اللي خسرات فيها ألمانيا، حتلاًت بلجيكا لبلاد و بقات مستعمرة ديالها تا ستاقلاًت ف 1962. مورا لستيقلال وقعو بزاف د لمشاكل و لينقيلابات تا طاح النظام لمكلي و ولاًت لبلاد جمهورية فيها حزب واحد ف 1966. من ديك الساعة و لبلاد باقي ما فيهاش ستيقرار د السياسة ولا لقتيصاد. ف 2016، كانت تكلاسات بوروندي أتعس بلاد فلعالم.

تيسكنو ف بوروندي تقريبا 11 مليون د الناس و لعاصمة ديالها هي بوجامبورا. اللغات الرسمية ف لبلاد هي لكيروندية و لفرانساوية و لينڭليزية، و لفلوس اللي كاتخدًم هي لفرانك د لبوروندي. غير 13.7% د السكان د لبلاد اللي تيسكنو ف لمدون، و هي من النسب لقلال ڭاع ف لعالم.




#Article 89: بورڭراڭ (180 words)


بورڭراڭ هو واحد لواد فلغرب د لمغريب, الطول ديالو 240 كلم, تيخرج من لأطلس لمتوسط (جبل متورزڭان حدا مولاي بوعزة) وتيصبً فلمحيط لأطلسي, مابين لمدن د سلا والرباط.

لمعدل د الصبيب د بورڭراڭ هو 23 ميطرو مكعب فالتانية, ولكن فوقت لفيضانات, يقدر يوصل تال 1500.

كاين بزاف د النظريات على سميت بورڭراڭ ولأصل ديالها. من بينهم كاين هادو:

بورڭراڭ عندو تاريخ قديم ومرتابط بزاف بلمدن د سلا والرباط. ما بين أهم لأحدات اللي وقعو فبورڭراڭ:

ف 1974, تبنا السد ديال سيدي محمد بن عبد الله على بورڭراڭ, ف 17 كلم من المصب ديالو. كاين 7 د السدود خرا صغيرة عليه. لهدف دهاد السدود هو أولا تجمع لما اللي تيعاون فالشريب ولفلاحة, وثانيا باش ينتج الضو اللي تيمشي للمصانع.

بدا لمشروع د لمارينا د بورڭراڭ ف 2006, و لهدف ديالو هو تتقاد الضفة د لواد من الجوايه بجوج د الرباط وسلا, ويكونو فيه بزاف د لحوايج ولأنشطة اللي يقدر يديرهم الواحد إما سائح ولا تا اللي ساكن تمًا.

بزاف د لمغنيين غناو على بورڭراڭ حيث عندو تاريخ كبير كتيرشي حيت تيجمع مابين سلا والرباط. من بين لإنتاجات اللي كانو عليه كانلقاو:




#Article 90: بوصنا ؤلهرسك (142 words)


لبوصنا ؤلهرسك (بالبوصنيا، الكرواتية ؤالصربية اللاتينية:Bosna i Hercegovina ؛ الصربية السريلية: Босна и Херцеговина) هي واحد الدولة جات فلبلقان ف لجنوب الشرقي د أوروپا، هي كانت ؤحدة من لجمهوريات د يوڭوسلافيا. جات فجنوب أوروپا. كاتحدها من الشمال ؤالغرب ؤلجنوب كرواتيا، من الشرق صربيا ؤمن الجنوب لغربي جمهورية الجبل لكحل.

خدات لبوصنا ؤلهرسك ليستيقلال ديالها ف 1992 من بعد ما تفكًكات يوڭوسلافيا، و دوزات 3 سنين د لحرب لأهلية سالات ف 1995.

تيسكنو فلبوصنا ولهرسك تقريبا 3.5 مليون د الناس و لعاصمة ديالها هي صاراييڤو. كاين تلاتة د اللغات الرسمية ف لبلاد و هي لبوصنية و لكرواتية و الصربية، و لفلوس اللي كاتخدًم هي ل مارك. لبوصنة عندها ترتيب مزيان فالتنمية لبشرية و داخلة مع بزاف د لمنظمات دولية بحال لأمم لمتحدة و لمجلس ديال أوروپا و منظمة لأمن و التعاون د أوروپا و عضو مؤسس د ليتيحاد من أجل المتوسط ف 2008.




#Article 91: بوطان (248 words)


لمملكة د بوطان (بالدزونڭخا: འབྲུག་རྒྱལ་ཁབ་) هي واحد لبلاد ما كاطلش على لبحر جات فلجنوب د آسيا. تاتحدُها من لجنوب و الشرق و لغرب لجمهورية د لهند، ومن الشمال الشينوا. تاتفرقها على نيپًال لولاية د سيكسم لهندية، و على بانڭلاديش لولاية د لبنڭال لغربية. تيسمًيو الناس د لبوطان بلادهم دروك يول، و اللي تاتعني لأرض د التنين.

لبوطان فيها الجبال د لهيمالايا و بزاف د لمرتفعات فوق 7000 ميطرو. ف 2006، تكلاصات لبوطان أسعد بلاد ف آسيا و تامن أسعد بلاد فلعالم، على حساب دراسة دارتها لجامعة د ليستر ف لينڭليز.

تيسكنو ف لبوطان تقريبا 741.000 واحد و لعاصمة ديالها هي تيمفو، اللي هي تا أكبر مدينة فلبلاد. من 2008، ولات السلطة ف لبوطان عند الشعب، من مورا ما رد لماليك النظام د لحكم من ملكية مطلقة ل ملكية دستورية. اللغة الرسمية هي الدزونڭخا و لفلوس اللي كاتخدًم هي نڭولتروم. لبوطان عضو ف لأمم لمتحدة و الرابطة د جنوب آسيا د التعاون لإقليمي (سارك).

مقدر بين تلتين و تلات رباع ديال سكان لي فبوطان أنهم تابعين دين لبودي د ڤاجرايانا، لي هو دين ديال لبلاد. تقريبان بين ربع و تولوت تابعين دين لهيندوسي. ديانات لخرين مافايتينش %1 ديال سكان. لإطار لقانوني لي كاين دابا، من ناحية لمبدأ كيضمن لحرية د دين؛ والاكين تبشير ممنوع بقرار ملكي و بتأويل قانوني لدوستور.

لبودية دخلات لبوطان ف لقرن سابع لميلادي. لماليك تيبيتي صونڭطسين ڭامپو (حكم بين 627 ؤ 649) رجع بودي ؤ طلب باش يتبناو جوج د لمعابد بودية، واحد فبومطانڭ فوسط بوطان ؤ لاخور فكييشو لهاكهانڭ (حدا پارو) ف لواد پارو.




#Article 92: بوطسوانا (327 words)


بوطسوانا (بالتسوانية:Lefatshe la Botswana) هي بلاد ماكاطلش على لبحر جات ف لجنوب د إفريقيا. بوطسوانا بلاد واطية و 70% من لمساحة ديالها هي الصحرا د كالاهاري. تاتحدًها من لجنوب جنوب إفريقيا، من الشرق زيمبابوي، من لغرب ومن الشمال ناميبيا، و زامبيا من الشمال.

بوطسوانا كانت مستعمرة د بريطانيا من 1885 تال 30 شتنبر 1966، اللي كان هو النهار اللي ستاقلاًت فيه و دخلات فيه عضو للمنظمة د لكومنويلث.

بوطسوانا بلاد تأترات بزاف بلمرض د السيدا اللي جا لتقريبا 20% د الناس ديالها على حساب لإحصائيات د 2014.

تيسكنو ف بوطساونا تقريبا 2.3 مليون د الناس و لعاصمة ديالها هي ڭابورون. اللغات الرسمية د لبلاد هي لينڭليزية و التسوانية و لفلوس اللي كاتخدًم هي پًولا. بوطسوانا عضو د لأمم لمتحدة و ليتيحاد لإفريقي و لمجموعة د التنمية د إفريقيا لجنوبية.

فبوطسوانا لمجموعة لإتنية د لأغلبية هي طسوانا بـ79% من سكان، ولأقليات لكبار كاين لباكالانڭا، صان ولا أباطوا، لي معروفين ب باصاروا. لقبايل خرين هوما بايي، بامبوكوشو، باسوبيا، باهيريرو، و باكڭالاڭادي. زيد عليها لبويض ولهنود، لي قلال وتقريبان قد قد. لهنود ديال بوطسوانا مكونين من أجيال مختالفة، شي وحدين كانو هاجرو من لموزامبيق، كينيا، طانزانيا، جزر لموريس، و جنوب إفريقيا، ؤ وحدين خرين هوما لجيل لول لي هاجر من لهند نيشان. من بعد 2000، وبسباب لوضعية لقتيصادية فزيمبابوي، لعاداد ديال زيمبابويين فبوطسوانا طلع لكتر من عشرالاف.

قل من عشرالاف واحد من صان مزالين عايشين بطريقة تقليدية ديال صيادة ولقطف. من لخر ديال تسعينات، لحوكومة د بوطسوانا كاتحاول تخرج صان من لأراضي ديالهم تاريخية. جايمس أنايا، لمقرر لخاص د لأمم لمتحدة على لحالة د حقوق لإنسان ولحريات ديال ناس لأصليين، فـ2010 وصف بلي لخصارة ديال لأراضي هو واحد من لمشاكيل لي كيعاني منها ناس لأصليين د بوطسوانا، وعطا لميتال ديال صان لي جراو عليهم من لمحمية د كالاهاري لوسطانية. من بين لقتيراحات د أنايا لي عطاهم للمجليس د حقوق لإنسان فلأمم لمتحدة هو أنه هو خاص يدارو برامج ديال تنمية لي غادي تعاون ناس بحال صان وباكڭالاڭادي، ويتشاورو معاهم باش يديرو ليهم أنشطة داخلة فتقافة ديالهم بحال صيادة تقليدية ولقطف.




#Article 93: بوليڤيا (159 words)


بوليڤيا, رسميا الدولة لمتعددة لقوميات د بوليڤيا (بالصبلوينية: Estado Plurinacional de Bolivia) هي بلاد فأمريكا لجنوبية ماكاطلش على لبحر. تاتحدًها من الشمال ومن الشرق لبرازيل, من لغرب لپًيرو, ومن لجنوب پاراڭاوي ولارجونتين والشيلي. بوليڤيا عندها 37 لغة رسمية, منها الصبليونية اللي كاتًهضر فلبلاد كلًها, وبزاف د اللغات اللي تيتهضرو فبزاف د لمناطق د لبلاد.

سميت بوليڤيا جات من لجنرال سيمون بوليڤار اللي حرًر بزاف د لبلايص فأمريكا لجنوبية من ليستيعمار الصبليوني, وتسمات لبلاصة اللي فيها بوليڤيا على سميًتو. ستاقلات بوليڤيا من صبانيا ف 1825 وتبدلات لحدود ديالها مع لوقت. ف 1879, خدات ليها الشيلي ڭاع لبلايص اللي كاطًل بيها على لبحر, ومن ديك الساعة وبوليڤيا بلاد مسدودة ودايرين بيها غي لأراضي.

تيسكنو فبوليڤيا تقريبا 11.5 مليون د الناس. عندها 2 عواصم: لعاصمة الدستورية سوكري ولعاصمة التنفيذية اللي فيها لمقر د لحكومة لاپًاز. لعملة ديال لبلاد سميتها بوليڤيانو. بوليڤيا داخلا فبزًاف د لمنظمًات الدولية بحال لأمم لمتحدة, صندوق النقد الدولي, حركة عدم لإنحياز, منظمة الدول لأمريكية, و اتفاقية التعاون لأمازوني.




#Article 94: بيتهوڤن (104 words)


لودفيك فان بيتهوڤن (16 ولا 17/12/1770 - 26/03/1827) هو واحد المؤلف ألماني ديال الموسيقى فرق بينات الوقيتة لكلاسيكية ولوقيتة الرومنسية فالموسيقى الغربية. بيتهوڤن كيتعتبر شي حاجة مهمة بزاف فالتاريخ ديال الموسيقى وأكترية الموسيقى ديال الغرب.

فالخر دالتسعينات ديال القرن تمنطاش، السمع ديال بيتهوڤن بدا كيقلال شويا بشويا حتى مبقاش كيسمع كاع. وخى هيداك بقى كيألف حتى مورا ما صماك.

بيتهوڤن عندو تسعود ديال السيمفونيات و عشرة ديال الكونسيرتات و تنين وتلاتين سوناتا ديال البيانو و بزاف ديال القطع آخرين. شحال من هاد القطع معروفين حتى عند الناس اللي مكيتسنتوش للموسيقى كلاسيكية، بحال السيمفونية التاسعة اللي واحد الطريف منها هو النشيد الوطني ديال الاتحاد دأوروپا.




#Article 95: بيتويناتنا (133 words)


بيتويناتنا Betweenatna  گروب د لموسيقا مغريبي تأسس ف 2011. سّتيل د لگروب كايجمع بين رّوك و لميطال و لفيزيون لمغريبية و لميزة ديال لكلمات ديالهوم هي سّخرية و لفكاهة لّي كاتلعب على تفاصيل من ثّقافة لمغريبية و لفنون شّعبية لمغريبية. لگروب مكون من 4 د لأعضاء: أوبيز (لمغني رّئيسي) و عبد صّمد ف لگيطار و سعيد ف لباص و أمين حاما ف لباطري. لأعضاء د بيتويناتنا كانو ف گروبات خرين من رّواد د لموسيقى لمغريبية لبديلة Alternative لّي بدات ف سنوات 2000 بحال هوبا هوبا سبيريت (ف لحالة ديال أوبيز).

أول ديسك د لگروب، لّي تشهر بيه، كان هو عبدة لّي كايشير ل لمحاكمة د 2003 لّي تحبسو فيها، ظلما، 13 شاب كازاوي مبليين ب رّوك ب تهمة عبادة الشيطان.

من أشهر دّياسك د بيتويناتنا: لهندية، لّا يشافي، عبدة. باكية مارلبورو، إيزابيل ماطيشا.




#Article 96: بيلاروسيا (124 words)


بيلاروسيا (بلبيلاروسية: Рэспубліка Беларусь) اللي كاتسمًا تا روسيا لبيضا هي واحد لبلاد فأوروپا الشرقية ماتاطلش على لبحر. تاتحدًها من الشرق روسيا, من لجنوب أوكرانيا, من لغرب پَولونيا ومن الشمال ليتوانيا ولاتڤيا.

لبلاصة اللي فيها بيلاروسيا دابا كانت تابعة لبزاف د لبلدان فالتاريخ, آخر وحدا فيهم هي ليتيحاد السوڤييتي, اللي دخل ديك لمنطقة ف 1920, و سماها لجمهورية لبيلاروسية السوڤييتية ليشتيراكية. ف 1991, مورا ماتفكًك ليتيحاد السوڤييتي, ستاقلاًت لجمهورية د بيلاروسيا, وهي لبلاد اللي كاينا تال دابا.

تيسكنو فبيلاروسيا 9.4 مليون د الناس و لعاصمة ديالها هي مينسك. اللغات الرسمية فلبلاد هوما لبيلاروسية و الروسية, وتاتعتارف الدولة ب 3 د اللغات كلغات أقلية, هي: لپَولونية, لييديش و لأوكرانية. لعملة د بيلاروس هي الرًوبل لبيلاروسي, و الرئيس د لبلاد من 1994 تال دابا هو آليكساندر لوكاشينكو.




#Article 97: بيليز (120 words)


بيليز (بلينڭليزية: Belize, بالصبليونية: Belice) هي مملكة دستورية جات فأمريكا لوسطانية. هي لبلاد لوحيدة فأمريكا لوسطانية اللًي فيها لينڭليزية لغة رسمية. تاتحدًها من الشمال لميكسيك, ومن لجنوب ولغرب ڭواطيمالا ومن الشرق لبحر لكاريبي.

من بعد ماجاو لأوروپيين لأمريكا, تحاربو صبانيا وبريطانيا بجوج على بيليز, وربحات بريطانيا. ولات بيليز مستعمرة بريطانية ف 1840 وتسمًات هوندوراس لبريطانية. كانت هي لمستعمرة لوحيدة د بريطانيا فأمريكا لوسطانية. خدات لبيليز ليستيقلال ديالها نهار 21 شتنبر 1981, ولكن بقات تابعة للتاج لبريطاني ولملكة ديالها دابا هي إيليزابيط الثانية.

تيسكنو فبيليز شويا كتر من 400.000 واحد. لعاصمة ديالها هي بيلموپان, ولعملة اللي كاتخدًم فيها هي الدولار د بيليز. بيليز عضو فبزاف د لمنظمات الدولية بحال منظمة لأمم لمتحدة ولمجتمع لكاريبي ولمجتمع د أمريكا اللاتينية ولبلدان د لكاريبي.




#Article 98: بينين (182 words)


بينين ولاً لجمهورية د لبينين (بلفرانساوية: République du Bénin) هي بلاد جات فلغرب د إفريقيا. تاتحدًها من لغرب الطوڭو، من الشرق نيجيريا، من الشمال بوركينا فاصًو والنيجر، ومن لجنوب لخليج د بينين.

فاللًول دلقرن 17 كانت لمنطقة اللي فيها لبينين كاتسمًا بالساحل د لعبيد حيث كانوا بزاف د لعبيد كيتسيفطو من تمًا للقارة د أميريكا. ف 1892 تمنعات التجارة د لعبيد وضعاف ليقتيصاد د ديك لبلاصة. حتلاتًها فرانسا وسمًاتها داهومي لفرانساوية. ستاقلات بينبن من فرانسا ف 1960 و دارت حكومة ديموقراطية. ف 1972، غادي يوقع نقيلاب عسكري و غادي تتأسس لجمهورية الشعبية د بينين، اللي كانت جمهورية ماركسية لينينية. ف 1990 غادي يحبس هاد النظام وغادير بينين دستور جديد اللي ولاًت موراه جمهورية بينين, وفيها تعدد لأحزاب.

تسيكنو فينين تقريبا 11.5 مليون د الناس، ولعاصمة ديالها هي پورطو نوڤو (لمرسى الجديد), ولكن لمقر د لحكومة كاين فلمدينة د كوطونو، اللي هي أكبر مدينة ولعاصمة ليقتيصادية د لبلاد. اللغة الرسمية هي لفرانساوية، وكاين بزاف د اللغات محلية تيتهضرو فبلاد بحال فون ولا يوروبا. لبنين جمهورية داخلة فبزاف د لمنظمات عالمية بحال لأمم لمتحدة و ليتيحياد لإفريقي ومنظمة لمؤتمر لإسلامي ولمنظمة الدولية د لفرونكوفونية.




#Article 99: تاريخ بلغاريا من 1989 (245 words)


التاريخ ديال بلغاريا من بعد 1989 هي الفترة من التاريخ البلغاري لّي بدات بعدما طاح النظام الشيوعي وبدات الديمقراطية

الإصلاح ف اتجاه التحرير، ف المجال الاجتماعي، السياسي والاقتصادي، ف دول شرق اوروپا بدا بالبرنامج الإصلاحي ديال ميخاييل ڭورباتشيڤ ف الاتحاد السوڤياتي، ولّي وصل تأتيرو لبلغاريا ف اللخر ديال التمانينات. ف الحقيقة، السمطا بدات ترخف ف اللخر ديال الفترة السطالينية، وبقات كترخف شوية بشوية حتى ولاو بزاف ديال الكتوبا لّي كانو ممنوعين كيترجمو، وحتى أفلام هوليوود ... الخ. والبوتيكات بداو يبانو وبداو كيبيعو منتوجات غربية يديرو ليها الإشهار (الإشهار لّي كان عموما ما معروفش ومامستعملش ف دول الكتلة الشرقية حيتاش كلشي كان كيقدر يشري غير منتوج واحد). هاد التحول ف اللخر ديال سنوات الشيوعية بين لناس حلف وارسو بالأهمية ديال تدمير الريدو د الحديد. هادشي كلو والسياسة ديال ڭورباتشيڤ خلق حرية ومطالب بالديمقراطية بين الناس.

ف نونبر 1989، بداو مظاهرات ف صوفيا لأسباب بيئية، لّي من بعد تطورو ولاو حملة عامة كطالب بإصلاح سياسي. ومنين الشيوعيين ما تدخلوش باش يفرقو المظاهرات، بان بلّي كاين احتمال يكون شي تغيير. ف الواقع، الحزب الشوعي تفاعل مع المظاهرات وقال تودور جيڤكوڤ من رئاسة الحزب ومن رئاسة البلاد وعوضو ب پيتار ملادينوڤ. ولكن هاد الحركة ربحاتهم غير شوية ديال راحة البال. ف فبراير 1990، المظاهرات ف الشارع بززات على الحزب الشيوعي يتنازل على السلطة و ف يونيو 1990 دّارو أول انتخابات حرة من 1931، لّي ربح فيها الحزب الاشتراكي البلغاري (السمية الجديدة ديال الحزب الشيوعي). ف يوليوز 1991 تكتب دستور جديد، للي دخل المناصب المنتخبة ديال الرئيس، ورئيس والوزراء والحكومة.




#Article 100: تازمامارت (117 words)


تازمامارت، كان واحد لحبس سري مشهور بزاف تبنا فغشت 1973 فصحرا شرقية د لمغريب، بضبط فجماعة گرس تيعلالين.

كان معروف على لحبس ديال تازمامارت أنه من بين أقسى السجون لي تبنات فلمغريب. هاد لحبس كانو فيه العسكر ؤ ضباط لي كانت عندهم علاقة مع جوج محاولات دل نقيلاب، لمحاولة ديال صخيرات أو لمحاولة نقيلابية ديال ؤفقير. لحبس د تازمامارت كانو فيه حبًاسة خرين لي ماكانوش متًافقين مع نيضام لملكي ف لمغريب وكانوا ضدًو.

بزاف ديال الناس من مورا ماخرجو منو كتبو كتوبا كيعاودو فيهم على المعانات ديالهم ؤعلى ماداز عليهم فلحبس. من الكتوبا المشهورة على تازمامرت كاين الكتاب د أحمد مرزوقي الزنزانة 10، ؤ لكتاب د محمد رايس تازمامارت.

لحبس د تازمامارت تسد رسميا ف15 شتنبر 1991. 




#Article 101: تركيا (273 words)


لجمهورية د تركيا (بالتركية: Türkiye Cumhuriyeti) هي واحد البلاد جات ما بين لغرب د آسيا والشرق د أوروپا. هاد الطراف بجوج مفروقين بيناتهم بلبحر د مرمرة و لمضايق د لبوصفور والداردانيل. لعاصمة التاريخية د تركيا وأكبر مدينة فيها هي إسطنبول. ولكن لعاصمة د لبلاد دابا هي أنقرة. تركيا تاتحدها من الشمال ليونان وبلغاريا ولبحر لكحل، من الشرق جورجيا وأرمينيا وإيران، من لجنوب سوريا ولعراق ولبحر لبيض لمتوسط، ومن لغرب لبحر د إيجي.

دازو بزاف د لحضارات على لبلاصة اللي فيها تركيا دابا، بحال لأناضول ولآشوريين وليونانيين ولبيزنطيين والسلاجقة ولعثمانيين. لإمبارطورية لعثمانية اللي كانت لعاصمة ديالها هي إسطنبول، كانت فواحد لوقت هي أكبر إمبراطورية فلعالم وكانت عندها أراضي فإفريقيا وأوروپا وآسيا. ف 1923، طاحت لإمبراطورية لعثمانية وتأسسات لجمهورية د تركيا، اللي قادها مصطفى كمال أتاتورك. هاد لجمهورية هي لأصل د تركيا د دابا ووقعات فيها تبديلات بزاف مقارنة مع لوقت لعثماني، بحال أن تركيا دابا دولة علمانية وتيكتبو التركية بلحرف اللاتيني.

لفلوس اللي كيتخدًمو فتركيا هوما الليرة التركية واللغة الرسمية هي التركية. تقريبا 70 تال 80% د لمواطنين د تركيا تيعًرفو راسهم باللي هوما أتراك، ومابين 15 و 20% تيقولو على راسهم باللي هوما أكراد. تركيا عضو فبزاف د لمؤسسات بحال لأمم لمتحدة والناطو وصندوق النقد الدولي ولبنك الدولي ومنظمة التعاون لقتيصادي والتنمية و جي 20. الرئيس ديال تركيا دابا هو رجب طيب أردوڭان.

يمكن لينا نقسمو السمية ديال تركيا على جوج ت المكونات؛ (Türk) اللي كتعني دولة ديال قومية الترك، ؤ(iye) اللي كتعني ديالنا.

تركيا جاية فواحد البلاصة استراتيجية؛ ما بين آسيا وأوروبا، اللي كيفرق بيناتهم هو بحر مرمرة ؤمضايق البوسفور ومضيق الدردنيل

تركيا جاية فالشمال الشرقي ديال البحر المتوسط، هادشي علاش فيها المناخ المتوسطي. فالشتا كيكون رطب، ؤفالصيف كيكون سخون ؤ ناشف..




#Article 102: تشاد (167 words)


تشاد, رسميا لجمهورية د تشاد (بلفرانساوية: République du Tchad) واحد لبلاد جلت فوسط إفريقيا وماكاطلش على لبحر. تاتحدًها من الشمال ليبيا, السودان من الشرق, لكاميرون, نيجيريا والنيجر من لغرب, و جمهورية وسط إفريقيا من لجنوب. تشاد هي خامس أكبر بلاد فإفريقيا من ناحية لكبر.

ستعمرات فرانسا التشاد ف 1920 وبقات فيها 40 عام تا استاقلاًت ف 1960. من ديك الساعة, وقعات حرب أهلية فلبلاد ووقعو بزاف د التمردات ولمشاكيل, اللي خلاو لوضع السياسي فلبلاد باقي مامستاقرش تال دابا. بزاف د لمؤشرات والتقارير تاتعتابر تشاد من لبلدان لفقيرة ڭاع و اللي فبها أكبر النسب د لفساد فلعالم.

ف 2003 تكتاشف لپطرول فتشاد وولاًُ هو أول مصدر د لفلوس لليقتيصاد ديالها, وفات الصادرات التقليدية ديال لبلاد بحال لقطن.

تيسكنو فالتشاد 13.6 مليون د الناس ولعاصمة ديالها هي ندجامينا. اللغات الرسمية فلبلاد هي لعربية ولفرانساوية, وعاد كاين تقريبا 200 لغة وإثنية مختالفة فيها. تقريبا 55% من التشاديين مسلمين, و 40% منهم مسيحيين. لفلوس اللي تيتخدُمو فتشاد هوما لفرانك لوسط إفريقي. الرئيس ديال الدولة من 1990 تال دابا هو دريس ديبي.




#Article 103: تشارلز داروين (172 words)


تشارلز داروين (ب لونݣلي : Charles Robert Darwin) هو عالم ديال تّاريخ طّبيعي ؤ جيولوجي نݣليزي تزاد ف نݣليز ف 12 فبراير 1809 ف شرو سبوري ف واحد لعائلة نݣليزية علمية ؤ مات ف 19 أبريل 1882. لأب ديالو هو دكتور روبرت وارنج داروين، ؤ كان جدو ارازموس داروين عالم ومؤلف حتا هو.

داروين تشهر بنظرية ديال تطور لي كتقول ݣاع لكاينات لي عايشة عندها نفس لأصل لمشترك، ف لوسط لعلمي تعرف بانو اول واحد هضر علا اهم ميكانزم ف تطور لي هو لانتخاب طّبيعي.

كان داروين هو سّبب رّئيسي باش بان ضومين جديد ف لعلوم د لوراثة ؤ رسيم دلخرائط لوراثية لكاع نواع ديال لحياة من بنادم حتال لكاينات لي مكتبانش. ؤ مني نشر داروين لكتاب ديالو لأصل ديال لأنواع ناض ݣاع لعلما ؤ بداو ف رسيم ؤ تخطيط ؤ ليكتشاف شكال ؤنواع د لحياة ؤ شكال ديالها تطورية بواحد درجة مكانتش غاطيح على بال داروين، نظرية ديالو قلبات ݣاع لعلوم.

ملاحضات جيولوجية ف أمريكا لجنوبية (1846)

أصل لأنواع (1859)

في تحدر لإنسان ولإنتقاء لجنسي (1871)

أوطوبيوڭرافي ديال تشارلز داروين (1887)




#Article 104: تشي ڭيڤارا (302 words)


إرنسطو ڭيڤارا دي لا سيرنا (بالصبليونية: Ernesto 'Che' Ernestico Guevara de la Serna) (14 يونيو 1928 - 9 أكتوبر 1967) و اللي معروف بتشي ڭيڤارا, كان مناضل ثوري وطبيب وكاتب وسياسي أرجونتيني كان معروف فلعالم حيث كان تيشجع على الثورة. ڭيڤارا كان من لقادة ديال الثورة فكوبا على الديكتاتور فولخينسيو باتيسطا, وملًي نجحات الثورة اللي قادها فيديل كاسطرو, عطاو لڭيڤارا لجنسية د كوبا وولاً وزير تما. تشي ڭيڤارا كان تيشجع الثورات فلعالم كلًُو ودار محاولات خرا بحال فلكونڭو (ولكن ماصدقاتش) وفبوليڤيا, اللي شدُّوه فيها وعدموه ف 1967, وهو كانت عندو غي 39 عام.

خلاق إرنيسطو ڭيڤارا فلمدينة د روزاريو فلأرجونتين نهار 14 يونيو 1928, وكان هو لكبير من بين 5 د الدراري (3 د لولاد و جوج بنات). لعائلة ديالو كانت من الطبقة لمتوسطة وماكان خاصًو تا شي خير.

ف 1948, دخل للكلية د الطب فبوينوس آيريس, وكان تيقرا مزيان و تيدير الرياضة بحال الريڭبي. فلعام اللخر ديال قرايتو (1953) سافر هو و صاحبو ألبيرطو ڭرانادو بموطور فأمريكا اللاتينية كاملة, و تما كتاشفو الظلم لإمبريالي ولفقر وبزاف د لمشاكيل اللي خلاتهم مصدومين. من ديك الساعة, قرر تشي ڭيڤارا باللي ماغاديش يخدم طبيب و باللي أيدير أي حاجة اللي قدر باش يحبس الظلم ويكون من جيهت لمظاومين, وعليها بدا يشجع الثورات.

ف 1959, عرض لوزير اللُول د لمغريب عبد الله ابراهيم على تشي ڭيڤارا باش يجي. وفعلا جا فغشت وزار سلا والرباط و مراكش وتلاقا بزاف د المسؤولين. عجباتو بزاف مراكش اللي ڭلس فيها 18 ليوم.

ف 1960, ملًي مشا ڭيڤارا لمصر, زار السفارة د لمغرب فلقاهرة وتلاقا مع محمد بن عبد الكريم الخطابي, وقاليه باللي كان معجب بزاف بالتجربة ديالو فحرب لعصابات, و باللي جا خصيصا باش يتعلًم منو.

حيث تشي ڭيڤارا هو رمز د التحرر ومحاربة الاستبداد, قررو لأولترا ديال لفرقة د لجيش لملكي يسمًيو راسهم كورڤا تشي, نسبة لتشي ڭيڤارا, وتيهزًو ديما تصويرتو فڭاع لماتشات و لمناسبات د لفرقة ديالهم.




#Article 105: تطوان (181 words)


تطوان ولاً تيطًاون هي واحد المدينة فالشمال د لمغريب, و تاتسمًا تا الحمامة البيضا. تيطاون هي كلمة بالأمازيغية د غمارة, وتاتعني العينين. تيسكنو فتطوان تقريبا 380.000 واحد, و المنطقة ديالها معروفة بالبحورا الزوينين لي تيجيوليهم بزاف د الناس فالصيف.

سمية ديال تيطوان جاية من لأمازيغية تيطاوين (ⵜⵉⵟⵟⵇⵡⵉⵏ) للي كاتعني العيون.

تبنات لمدينة لقديمة د تطوان على جبل درسة و كانت من ديما عندها أهمية كبيرة ف التاريخ د لمغريب لإسلامي حيت كانت محطة ف التحركات بين لمغريب لإسلامي و لأندلس.

فوقت الاستعمار الصبليوني للشمال د لمغريب كانت تطوان هي لعاصمة د المنطقة . ديك المنطقة كانت تاتسمى المنطقة الخليفية وكانت تاتحكمها صبانيا بالتنسيق مع واحد السيد لي تيمثل الملك وكانت سميتو الخليفة السلطاني.

لجماعة لحضرية تابعة ل عمالة تطوان، جهة طنجة تطوان الحسيمة، ساكنين فيها 377866 واحد، على حسب لإحصاء لعام 2014.

من بعد ما سالا لوجود لإسلامي ف لأندلس، ولات مركز ديال لأندلسيين اللي لجؤو ل لمغريب و هادشي اللي عطا ل لمدينة روح أندلسية ف لمعمار و لبني ديالها. داكشي علاش فيها بزاف ديال لمعالم و دخلات لمدينة لقديمة ل لّيستا د معاليم التراث العالمي د ليونيسكو من 1997.




#Article 106: تعاويد لحليلات (105 words)


تعاويد لحليلات ولا تواتر الجين (ب لونكلي : Allele frequency) هو تردد ولا فريكونص نسبي للحليل ف بلاصة كروموزومية محددة فشي كروب سكاني، علا شكل نسبة مئوية. ولا أكثر تحديدا، تواتر لحليل هو نسبة ديال كل لكروموزومات في كروب سكاني لي هاز هذا الحليل. تطور صّغير هو تبدال في تعاويدات الحليل لي كيوقع مع الوقت فشي كروب سكاني.

إلى خدينا هادشي :

ادن تعاويد الحليل غا يكون نسبة كاع الكروموزومات (ب) لهذا الحليل و لعدد لكلي ديال نسخ لكروموزومات ف كاع الكروب سّكاني.

كنخدمو ب تعويد لحليل ف لوراثيات لسكانية باش نوصفو كمية دياا تغير ف بلاصة كروموزومية معينة ولا في بزاف د لبلايص مختلفة.




#Article 107: توحد (220 words)


التوحد، أو لوتيزم، واللي كايسميو المختصين باضطرابات الطيف التوحدي (بالفرانساوية :Troubles du spectre autistique) داخلين فيه بزاف ديال اضطرابات النمو النفسي والعقلي عند بنادم، واللي العلامات ديالهوم كايبانو من الصغر. الاضطرابات فيها بزاف ديال الأنواع إلا أنه اللي كايجمع بينها هو أنها كاملة كاتعطل (أو كاتصعب) التعلم ديال الأطفال والتواصل الطبيعي مع المحيط ديالهوم.

المصاب بهاد الاضطرابات يسمى متوحد أو أوتيست.

لوتيزم ما عندوش شكل واحد والأسباب ديالو باقا ما معروفاش مزيان. واخا هاد الصعوبة والعدد الكبير ديال الشكال ديال الاضطرابات، الأطباء والباحثين قدرو يميزو عدد من العلامات المشروكة فأغلبية أشكال لوتيزم المعروفة، بدراسات وبائية إحصائية كاتحاول تعاود مسار حياة الناس اللي ثبت أنهم أوتيست خصوصا فالصغر ديالهوم.

وهاكا، قدرو يوضعو لوائح علامات كاتراقب فالصغر واللي يلا تلاحضات عند الأطفال (في أغلبيتها) خاصها تكون إنذار للوالدين أو المربيين أو الأطباء اللي متبعينهوم باش يزيدو يحضيو النمو ديال الطفل ويعمقو التشخيص وحتى يبداو العلاج والمساعدة ديال الطفل المتوحد.

من أهم العلامات :

كاينين علامات خرى اللي يلا تجمعات مع هادو اللي تذكرو يمكن يعنيو ريسك ديال أشكال أوتيزم أخرى، غير هو العلامات خاصها تلاحظ مجموعة وفمدة طويلة شوية، حيت علامة وحدة ماكاتعنيش لوتيزم ولاكين يلا تلاحضو بزاف (أكثر من النص) كايفتحو الباب ديال الشك وخاص الطفل تعطالو المواكبة والمراقبة الطبية اللازمة.

على حساب الإحصائيات الوبائية ديال منظمة الصحة العالمية ففي كل 10000 طفل كاينين 60 عندهوم لوتيزم يعني 1 على 166.




#Article 108: تونس (105 words)


تونس (رسميا الجمهورية التونسية) هي واحد لبلاد فشمال إفريقيا. حابسها من الشمال و من الشرق لبحر لبيض لمتوسط, ومن لجنوب الشرقي ليببا, ومن لغرب دزاير. لعاصمة ديالها هي تونس لعاصمة. لمساحة ديال تونس هي 163.610 كم², و تيسكنوا فيها 11.7 مليون د الناس على حساب لإحصائيات د 2019.

تونس كانت تابعة للدولة العثمانية, وكانت سميتها لإيالة التونسية. ف 1881, ولاًت مستعمرة د فرانسا حتى استاقلات ف 1956 و كانت سميتها لمملكة التونسية. ف 1957, غادي تولي جمهورية, وغادي يكون أول رئيس ديالها هو لحبيب بورڭيبة.

اللغة الرسمية فتونس هي العربية, و لفلوس اللي تيخدًمو سميتهوم الدينار التونسي. الرئيس ديال تونس ديال دابا سميتو قيس سعيد.




#Article 109: تيليطوبيز (172 words)


تيليطوبيز (ب نّگليزية: Teletubbies) مسلسل تلفازي بريطاني ديال دّراري صّغار من 365 حلقة (كل حلقة فيها تقريبا 25 دقيقة) داروه آن وود و أندرو دافنپورت و نتجاتو شركة نگليزية سميتها راگدول.

هاد لمسلسل كان داز بين 31 مارس 1997 و 5 يناير 2001 ف لبي بي سي. ف لمغريب كانت دوزاتو دوزيم ف نفس لفترة.

هاد لمسلسل موجه ل لوليدات صّغار بزاف (بين عاماين و 6 سنين) كايدور ف واحد لعالم خيالي لّي فيه 4 ديال شّخصيات: تينكي وينكي، ديپسي، لالا و پو. هاد شّخصيات عندهوم شّكل ديال نونوسات ملونين و كايدويو و كايتصرفو بحال وليدات صغار، عندهوم واحد تّلفزة ف لكريشة ديالهوم لّي كايدوزو فيها فيديوهات برامج قصار كايعلمو فيهوم لوليدات شي حوايج من لحياة ليومية بحال لألعاب و رّياضة.

هاد شّخصيات (لّي هوما تّيليطوبيز) عايشين ف واحد لأرض سميتها تيليطوبيلاند Télétubbyland و ساكنين ف واحد دّار شكلها غريب فيها واحد لقبّة كبيرة على شّكل ديال لبني د لخيال لعيلمي. دارهوم دايرين بيها كديات عامرين ب لورد و رّبيع و لخضورة و فيهوم عايشين قنيات و شي شكال ديال نوار كايدويو.




#Article 110: تيمور الشرقية (215 words)


تيمور الشرقية (ب لبرتغالية: República Democrática de Timor-Leste) هي بلاد د بزاف د لجزر جاو فشرق آسيا. أكبر طرف د لبلاد هو النص الشرقي د لجزيرة د تيمور، وعاد كاين لجزر د أتاورو و جاكو و أوكوسي. تيمور تاتحدّها أندونيسيا من لغرب، و لبحر د تيمور من الجوايه لاخرا. لبلاد ما بعيداش بزاف على ؤسطراليا، تقريبا ما بين تيمور الشرقية و لمدينة د داروين شي 640 كيلوميطر.

تستعمرات لبلاصة اللي فيها تيمور الشرقية من لبرتغال ف لقرن 16، و بقات تابعا ليها تال نهار 28 نونبر 1975، اللي هو النهار اللي علنات فيه تيمور ليستيقلال ديالها. فنفس لوقت، دخلو لقوات ديال أندونيسيا للبلاد و علنوها طرف من أندونيسيا و لمقاطعة رقم 27 ديالهم. هاد لوضعية دارت حرب بين الناس ديال تيمور و لعسكر د أندونيسيا، اللي بقات تال 1999، فين تدار ستيفتاء ديال لحكم الذاتي نظماتو لأمم لمتحدة. النتيجة د ليستيفتاء كانت هي لإستقلال د تيمور الشرقية، اللي ولات هي أول دولة تاتستاقل ف لقرن 21، و دخلات مع لأمم لمتحدة نهار 20 ماي 2002.

تيسكنو ف تيمور الشرقية تقريبا 1.3 مليون د الناس، و لعاصمة ديالها هي ديلي. كاين جوج لغات رسمية ف لبلاد هوما لبرتغالية و التيتوم، و لفلوس اللي كاتخدّم هي الدولار لميريكاني. تيمور الشرقية هي وحدا من الجوج بلدان ف جنوب شرق آسيا اللي فيها لمسيحيين أغلبية. الدولة لاخرا هي لفيليپين.




#Article 111: تّقسيم تّرابي د لمغريب (252 words)


تّقسيم تّرابي د لمغريب هو تّقسيم لّي كايحدد لمجال لإداري لّي كاتنتمي ليه كل نقطة جغرافية ف لمغريب، من أصغر مستوى (لجماعة) ل أعلى مستوى (لجيهة). هاد تّقسيم وقعو فيه بزاف ديال تّطورات و تّبديلات من نهار خدا لمغريب لستيقلال ديالو. تّقسيم تّرابي كايتحدد ب قوانين و مراسيم و تايتنشر ف لجريدة رّسمية.

ف لوقت لحالي، وعلى حسب لمرسوم رقم 2.15.40 لّي خرج ف 20 فبراير 2015، لمغريب مقسّم ل 12 جيهة ول 75 إقليم/عمالة و ل 1538 جماعة (حضرية ولا قروية ولا مقاطعة).

على حسب دّستور لمغريبي، ف لفصل 71، لمفهوم ديال لجماعة تّرابية كايشير ل لجيهات و لعمالات/لأقاليم و لجماعات، و هاد لجماعات تّرابية كاملة عندها مجالس منتخبة و لقانون كايحدد لمجالات لّي كاتدخل ف سّلطات ديالها و كيفاش و منين كاتجيب فلوس لميزانيات ديالها. غير هو هاد لجماعات تّرابية كاتخدم وكاتسير تحت لوصاية ديال وزارة دّاخلية و لموظفين ديالها لّي هوما لقياد و لباشاوات و لعمال ولولاة، ولّي كايتعينو من طرف لحوكومة.

يامات لحماية لإسبانية ف شّمال د لمغريب (بين 1913 و1956)، تّقسيم كان على حساب لمجال تّاريخي ديال لقبايل د أريف و لمنطقة د جبالة. لمغريب لإسباني (لّي كانت سميتو رّسمية لمنطقة لخليفية) كان مقسم ل خمسة ديال لأقاليم:

تّقسيم صّغير كانو هوما لقبايل(كابيلاس Cabilas على حسب تّسمية لإدارية سّبنيولية) و لّي كان لعدد ديالهوم 44 قبيلة. ةاحد لملاحظة مهمة هنا، لقبايل هنا كانو ب معنى جغرافي و ماشي دموي/عرقي.

ف لجدول لّي لتحت لجيهات ال 12 ديال لمغريب ب لأقاليم و لعمالات ديالها، على حسب لمرسوم رقم 2.15.40 لّي تنشر ف لجريدة رّسمية ف 5 مارس 2015:




#Article 112: ثريا الحضراوي (117 words)


ثريا الحضراوي، تزادت ف عام 1957 ف الدار البيضا، هي مغنية مغريبية د لملحون و كاتبة.
خدمات ف بزاف د لمجلات ف التعليم, الصحافة و ف جمعيات نسائية و تقافية.

تولدات ثريا الحضراوي ف وسط عائلة تقليدية و محافضة .و قبل ماتحتارف لغنا, خدمات ك أستادة د لفلسفة غي تخرجات من كلية الآداب والعلوم الإنسانية ف الرباط. من بعد خدمات كصحافية ف التمانينات ف مجلة كلمة و بقات فيها حتى حبسو النشير د لمجلة حيت تتهضر على مواضيع حساسة بحال الضعارة و لا لحرية د التعبير ف لمغريب. ف عام 1989 بدات لمسار ديالها دلغنا و تخصصات ف لملحون. شاركات ف بزاف د لحفلات و لمهرجنات ف لمغريب و ف لخاريج. و سجلات شي عشرا ديال لالبومات.




#Article 113: ثريا شاوي (244 words)


ثريا شاوي، تولدات فـ14 دجنبر 1936 ف فاس ؤماتت مقتولة فـ1 مارس 1956 ف دارلبيضا، كانت أول پيلوطا مغريبية.

ثريا شاوي تولدات فـ14 دجنبر 1936 ففاس فوسط عائيلة معروفة، بّاها عبدالواحد كان مدير د مسرح ؤصحافي ب لفرونصي فجورنال لو كوريي دو ماروك، ؤمها سميتها زينة، ؤخوها صغر منها صلاح الدين لي تولد فـ1944 ولا رسام عايش ف ڤيشي ف فرانصا.

فـ1946، متلات ثريا معا باها ف لفيلم لباب سابع ديال لمخرج لفرانصاوي أندري زڤوبادا لي جا لفاس باش يصورو.

فـ1948 لعائيلة رحلات من فاس لدارلبيضا فين كان خدام بات ثريا.

فـ1950، دخلها باها لمدرسة طيران لي كانت فتيط مليل، لمدرسة كانت مخصصة غير لفرانصاويين وكان صعيب للمغاربة يدخلو ليها ؤكفس إلا كانو بنات. لإدارة د لمدرسة ماكانوش باغيينها دخل وحاولو يمنعو، والاكين حيت ماكاين حتا قانون كيمنع هاد القضية فلخر قبلوها ودارو فبالهم أنها ماغاديش تقدر تكمل.

موراها بعام فـ17 أكتوبر 1951، دوزات ثريا لمتيحان ديال پيرمي ديال طيران ؤنجحات فيه واخا عمرها ماكاملش 15 لعام، وهاكا ولات أول پيلوطا مغريبية.

نهار1 مارس 1956، نهار قبل مايشد لمغريب ستيقلال ديالو، معا جوايه ستة وتولوت فدارلبيضا ؤبضبط فزنقة بيرجوراك تقتلات ثريا قدام دارهوم ؤهي هابطة من طوموبيل معا خوها من بعد ما تيراو عليها فراس، كان فعمرها ديك ساعة 19 لعام. تدفنات ثريا شاوي فمقبرة أهل فاس فدارلبيضا.

لي قلتها كان سميتو أحمد طويل، ؤكان مشارك ف لمقاومة ضد فرانصا ؤتعين كوميسير معا لأمن لوطني ؤكان هو رئيس ديال عصابة كاتخطف ؤتقتل ناس معروفين، والاكين ساباب لموت ديال ثريا شاوي مازال مامعروف حتال دابا.




#Article 114: جامايكا (221 words)


جامايكا (ب لينڭليزية: Jamaica) هي بلاد جزيرة جات ف لبحر د لكاريبي. جامايكا هي تالت أكبر جزيرة ف لكاريبي، مورا كوبا و هيسپانبولا. جامايكا محدودة من لبحر د لكاريبي من ڭاع الجوايه. جات تقريبا 145 كيلومطر ف لجنوب ديال كوبا، و 191 كيلومطر من لغرب ديال هايتي.

لجزيرة ديال جامايكا تحتلات من صبانيا ف 1494، و كانت من لبلايص اللّولا اللي وصل ليها كريسطوف كولومبوس. لأغلبية ديال السكان لأصليين ماتو من مورا ديك لمجية، إما من لمستعمرين نيشان، و لا بلأمراض اللي جابوها معاهم. بداو الصّبليون موراها كيجيبو لزاف د لعبيد من إفريقيا يخدمو تمّا ف لفلاحة. ف 1655، خدات بريطانيا لجزيرة من صبانيا، و سمّاتها جامايكا. ف لوقت ديال لستعمار لبريطاني، ولاّت جامايكا من لمصدرين لكبار ف لعالم د السّكار. ف 1838، عطات بريطانيا لحرّية لڭاع لعبيد اللي فيها، و بزاف من هادوك اللي كانو ف جامايكا ختارو يولّيو فلاحة تيخدمو لراسهم.

ستاقلات جامايكا من بريطانيا نهار 6 غشت 1962، و لكن راها تابعا للكومنويلث، و للتاج لبريطاني، و لملكة ديالها دابا هي إيليزابيط التانية.

تيسكنو ف جامايكا تقريبا 2.9 مليون د الناس، و لعاصمة ديالها هي كينڭسطون. اللغة الرسمية د لبلاد هي لينڭليزية، و لفلوس اللي كاتخدّم هي الدولار الجامايكي. جامايكا تعرفات عالميا ب لموسيقى ديال الريڭي، و الدين الراسطافاري. من أشهر الجامايكيين ف التاريخ كان لمغنّي بوب مارلي، و الجرّاي أوساين بولط، اللي كيتعتابر أسرع راجل ف لعالم.




#Article 115: جايحة فيروس كورونا 2020 ف لمغريب (1451 words)


جايحة ديال فيروس كورونا وصلات رسميا للمغريب فـ2 مارس 2020.

حتال ليوم، 19 نونبر، تسجلات 311554 د لحالات من بينهم 5090 ماتو و 257992 براو.

حالة تالتة تزادت نهار 10 مارس ديال واحد توريست فرانصاوي جا لمراكش. فنفس نهار، لمرا لي كانت هي لحالة تانية ماتت.

فـ11 مارس، بنت ؤمرات داك توريست لفرانصاوي حتا هوما صدق عندهوم لمرض، ؤ ف لمجموع ولاو 5 ديال لحالات. فنفس نهار، حالة ساتة تعلنات عليها ديال واحد لمرا فرانصاوية عندها ستينات جاتها مشاكل فتنفس فـ7 مارس.

فـ13 مارس، جوج حالات تزادو، وحدا ديال مغريبي عندو 39 عام رجع من صبانيا ؤلخرا ديال فرانصاوية عندها 64 عام؛ فلعشية علنات وزارة صحة على أنه لمريض لول برا ؤغادي يخرج.

فـ14 مارس، 9 د لحالات تأكدو ، زيد عليهم لحالة ديال لوزير ديال تجهيز ؤنقل عبدلقادر عمارة.

لغد ليه، 10 د لحالات جداد تزادو.

فـ16 مارس، تزادو 9 د لحالات جداد.

فـ17 مارس، فصباح علنات وزارة صحة أن حالة جديدة بانت ؤواحد من ناس لي مراض مات، فليل تزادو 6 د لحالات جداد.

فـ19 مارس، تعلن فصباح على 4 د لحالات جداد ؤموراها ف لعشية على 3 خرين، ؤف ليل على جوج جداد، ف لمجموع ولاو 63 حالة. ؤنفس لوقت حالة تانية ديال واحد سيدة من دارلبيضا برات.

فـ20 مارس، تعلن فصباح على 3 د لحالات جداد ؤموراها ف لعشية على 8 خرين، ؤف ليل على تلاتا جداد؛ ف لمجموع ولاو 77 حالة، ؤنفس لوقت تالت مريض مات.

فـ17 مارس، بانت أول حالة فجيهة ڭلميم واد نون بضبط فمدينة ڭلميم ديال واحد سيد فسبعينات، موراها بشهر فـ16 أبريل تعلن على أنه برا ؤخرج من سبيطار.

فـ23 مارس، قررات وزارة صحة تداوي ناس لي مراض ب لكلوروكين ولا هيدروكسيكلوروكين مخلط معا لازيطروميسين؛ موراها فـ10 أبريل، عممات وزارة صحة ستيعمال ديال هاد لپروطوكول على لحالات كاملين حتا هادوك لي ماباينش فيهوم لأعراض.

فـ7 أبريل، لباس ديال لكمامة ولا ضروري علا أي واحد خارج لزنقة.

فـ13 يونيو، قررات وزارة صحة ؤ وزارة داخيلية أنهم ڭاع لحالات لي مازال فسبيطارات غادي يجمعوهوم فجوج مدون، لي هوما بنسليمان ؤ بنڭرير، ؤ غادي يتزاد عليهم لحالات جداد لي غادي يبانو، ولاكين هاد لقرار ماشدش بزاف بسباب لحالات لي بداو كيتزادو مورما بانو بؤر ف بزاف د لمدون، شي لي خلا سلطات يديرو سبيطارات ميدانية.

فـ26 يوليوز، خرّجات لحوكومة واحد لقرار ف لعشية كيمنع دخول ؤ لخروج من لمدون ديال طانجا، تطوان، فاس، مكناس، دارلبيضا، برشيد، سطات، ؤ مراكش، غادي يتطبق من طناش د ليل؛ شي لي خلا ناس تجري ؤ تقبط طريق بزربة، تسمات علا ديك ليلة بليلة د لهروب لكبير.

عل أقل 5 ديال طبا ماتو بسباب ڤيروس كورونا ؤهوما خدامين، جوج ديال حالات لولا كانو فـ4 أبريل ديال طبيببة مريم أصياد لي خداما فسبيطار محمد لخاميس فدارلبيضا ؤ ديال دكتور نوردين بنيحيى فمكناس. لحالة تالتة كانت فـ8 أبريل ديال طبيب جينيراليسط رويمي عمرام فدارلبيضا. فـ20 يوليوز، طبيب عبدلطيف لكنزي مات ف مراكش. فـ5 غشت، طبيب مصطفى حاكي ف سيدي مومن.

بين 20 ؤ21 مارس، طايفة ليهودية ديال دارلبيضا حتافلو بعيد پوريم حضر ليها تقريبان 300 واحد، ؤ45 واحد منهم بانو فيهم لأعراض ديال لڤيروس.

ڤيروس كورونا نتاشر بزربة فدارلبيضا ؤ جوايه ديالها خصوصا فوسط لوزينات ؤ لمعامل لي بقاو خدامين واخا كاينة حالة طوارئ.

فسيدي لبرنوصي، بانت ف لول ديال ماي كتر من 150 حالة فسيدي لبرنوصي فتلاتة ديال لوزينات متقاربين ديال صبابط كي صضرو للخاريج: پريتي شوز، كوشازور، شوز ديفوزيون. موراها فـ21 ماي، 32 حالة بانت فلوزين صوماكا ديال رونو.

ف لحي د لاجيروند، بانت فـ28 ماي 18 لحالة ف لمعمل د شكلاط إڭبيل.

فبرشيد، فـ21 ماي 45 حالة بانت فلوزين ديال كاپلاج ليوني.

فـ10 مارس، واحد لڭروپ ديال 58 سياح مغاربة رجعو من مصر لمكناس، ؤلقاو فـ47 منهم بلي راهم تعاداو ب لڤيروس.

فـ14 أبريل، تكتاشفات بؤرة ف لحي ديال لبرج بضبط فكارفور فين تعاداو 68 واحد من بين ناس لي خدامين فيه.

فـ15 أبريل خرجو تقارير بلي 66 عساكرية ديال لاباز ديال لقوات لجوية د بنڭرير جاهم لڤيروس ؤداوهم لسبيطار لعسكري ديال مراكش، ؤموراها طلع عاداد ناس لي تعاداو لـ208.

فـ7 ماي، بانو جوج حالات وسط لخدامة فواحد لأرض فيلاحية ديال لفريز فدلالحة جيهت مولاي بوسلهام؛ فديك لوقيتة لخدامة لخرين، لي فايتين 200 واحد، طالبو باش يدار ليهم تحليلات باش يعرفو واش فيهم لمرض ولا لا. واخا هاكاك ناس بقاو خدامين ف لفيرمات حتا عاود بانت حالة خرا فـ2 يونيو، موراها قررات سلطات باش دير تحليلات لتقريبان 100 واحد طلعو منها 18 فيهم لڤيروس، من تما ؤ لحالات بداو كيتزادو. حتال 19 يونيو، جوج ؤزينات صبلونية ديال تغليف ديال لفريز خدامين فنواحي ديال لالة ميمونة ولاو هوما لبؤرة ديال نتيشار لڤيروس فديك لبلاصة: لوزين فريڭودار بـ457 حالة ؤ لوزين ناطبيري ماروك بـ103 د لحالات.

فـ31 يناير، لارام حبسات طيارات ل پيكين حتال 29 فبراير، ؤفـ2 مارس زادو ف لمدة ديال توقيف حتال وقت أخور.

فـ14 مارس، لمغريب حبس طيارات ألي روتور معا 21 بلاد: لوطريش، دانمارك، ليونان، سويسرا، سويد، نورڤيج، توركيا، لوبنان، مصر، لبحرين، لإمارات، عومان، لأردن، تونس، سينيڭال، موريطانيا، نيجر، مالي، تشاد، كانادا، ؤ لبرازيل.

لغد ليه، ڭاع ريحلات دولية تمنعو.

فـ21 مارس، حبسات لارام ڭاع ريحلات داخيلية.

فـ13 مارس، علنات وزارة تربية لوطنية أنه لقرايا غادي تحبس ف لمدارس ؤلجاميعات كاملين، ؤغادي تعوضها لقرايا عن بعد بتيداءا من نهار 16 مارس.

فـ4 مارس منعات وزارة داخيلية جوقات ديال كتر من ألف واحد من غير لماسم، موراها فـ14 مارس نفس لوزارة قررات باش تمنع جوقات ديال كتر من خمسين واحد.

فـ11 مارس قررات وزارة لأوقاف باش تمنع لماسم دينية، ؤلمجليس لعيلمي لأعلى دار فتوى فـ16 مارس باش يتسدو جوامع ؤماتقامش فيهم صلا.

فـ20 مارس، علنات وزارة داخيلية بلي لكيران بين لمدون غادي يحبسو بتيداءا من 24 مارس. نفس لقارار خداه لمكتب لوطني د سكك لحديدية بنسبة لطرانات والاكين خلاو شي خطوط د لقرب: دارلبيضا-قنيطرة، دارلبيضا-ماطار محمد لخاميس، دارلبيضا-سطات، دارلبيضا-جديدة.

فـ2 فبراير 2020، لحوكومة رجعات 167 مغريبي كانو ساكنين فيوهان فشينوا، لبلاصا لي بان فيها لڤيروس، ؤفرقاتهم على جوج صبيطارات واحد فمكناس ؤلاخور فرباط. ؤمن بعد عشرين يوم حتا واحد فيهم ماصدق مريض بڤيروس كورونا.

مورما سد لمغريب لحدود ديالو معا صبانيا بزاف د لمغاربة بقاو واحلين ف لخزيرات ؤماقدروش يفوتو لحدود، ؤباش يتحل هاد لموشكيل لقنصل د لمغريب ف لخزيرات فرق لفلوس على شوافرية ؤناس لي راكبين باش يرجعو لطاليان منين جاو.

فـ15 ماي، لمغريب دخل أول فوج فيه تقريبان 200 واحد بقاو واحلين فمليلية، و دار ليهم لحجر صحي فسعيدية، ناضور و سلوان.

موراها بسيمانة فـ22 ماي، 304 ديال لمغاربة رجعو من سبتة ؤلغد ليه 100 واحد.

فـ17 مارس، دارت لحوكومة صندوق خاص بتدبير جايحة ڤيروس كورونا بعدما طلب لماليك يدار ؤيكون فيه 10 د لملاير د درهم باش يعاون صبيطارات ؤلقتيصاد لوطني لي تضرر. لوزارا، لبرلامانيين ؤلموضافين ديال لويزارات ؤمؤسسات ديال دولة تبرعو فيه بشهر د صالير.

نهار 15 مارس، تلاتا من أكبر لمهراجانات ديال لبلاد تعلنو أنهم تلغاو، مهراجان موازين فرباط لي كان غادي يكون بين 19 ؤ27 يونيو ، مهراجان تيميطار فأڭادير لي كان مبرمج بين 3 ؤ6 يوليوز، ؤ مهراجان فاس د لموسيقا روحية بين 12 ؤ20 يونيو.

قررات لجاميعة لملكية ديال لكورة فـ4 مارس باش يتلعبو لماتشات كاملين بلويكلو (بلا جمهور)، والاكين عشريام من بعد قررات باش مايتلعب حتا ماتش.

لفرقا ديال نهضة زمامرة تبرعات بصاليرات د شهر ديال لعابا ؤلمسؤلين باش تعاون صندوق دعم لي دارتو لحوكومة.

مورما تحل صندوق دعم بزاف د شاريكات تبرعو ليه، بحال لوصيپي لي عطات 3 دلمليار درهم، لهولدينڭ لمدى لي عطا 2 دلمليار درهم، أفريقيا ڭاز ؤبانك ؤف أفريكا ؤلبنك شعبي ؤسي دي جي عطاو مليار درهم، لقرض لفيلاحي بـ200 مليون درهم، سياش بانك بـ150 مليون درهم، پيتروم ؤ كوزومار ؤ إم دي جي إس ؤ وينكسو بـ100 مليون درهم، لابيل ڤي بـ50 مليون درهم، ؤڭروپ أزورا لي عاون بـ25 مليون درهم، أطلس صحرا بـ15 مليون درهم، نوڤاتيس ڭروپ بـ10 مليون درهم، لاماليف ڭروپ ؤڭروپ كليم ؤميدي 1 بـ2 مليون درهم.

لاموتوال مامضا-إم سي إم أ عاونات لفلاحا لمتضررين بمليار درهم ؤحطات فصندوق دعم 500 مليون درهم.

فـ19 مارس حبسات رونو لخدمة ف لوزينات ديال طانجا ؤدارلبيضا لي خدام فيهم تقريبان 11 ألف موضاف. بي إس أ دارت نفس لحاجة بنسبة لوزين د لقنيطرة.

فواحد ديراسة ديال سي إف جي بانك ف مارس 2020، لمغريب غادي يتأتر فضومين ديال تيجارة لخارجية ؤسياحة، بحيت غادي يخسر تقريبان 5 د لمليون ديال سياح ؤغادي تنقص ليه فكل شهر 2,6 مليون طن فلامپور إكسپور ديال سلعة.

من ناحية ليلات ديال لمباتا غادي ينقصو بـ%20 ؤسياح لي جايين غادي يهبطو بـ%39، أما بنسبة لتبادل سلعة لمجموع لأحجام غادي ينقص بـ%20.

فنفس لوقت، لمغريب غادي يستافد فشريان ديال لبترول من سوق لعالمي حيت تامان ديال لبرميل طاح بزاف.

بسباب هاد لأزمة، شاريكة ديال طيارات لخطوط لملكية لمغريبية خسرات 98% من شيفر دافير ديالها (تقريبان 50 مليون درهم كل نهار)؛ هادشي لي خلا لمسؤولين فـ25 غشت يجريو علا 140 واحد خدام معاهوم (من بينهم 65 شيفور ديال طيارات).

فـ4 مارس، رائيس لحوكومة د صلوڤينيا ماريان صاريك علن على أنه أول حالة د كورونا ف لبلاد جات من واحد جا من لمغريب ؤداز من طاليان.

فـ16 مارس، علنات وزارة صحة ساعودية على أنه جوج د لحالات جديدة بانو عندهم جاو من لمغريب.




#Article 116: جايزة نوبل (125 words)


جائزة د نوبل (ب لونڭلي : Nobel Prize) (ب سويدية : Nobelpriset)
هي واحد لمجموعة من ستة د لجوائز دولية كلا عام كتعطى للأكادميين و لمتقافين ؤ لعولما من عند لمؤسسات سّويدية، سّيد لي تسمات هاد لجايزة بسميتو هو لمخترع سويدي لي ختارع ديناميت، ألفريد نوبل قبل ما يموت وصا ف لوصية ديالو انه خاص تبقا تعطا جايزة نوبل من لفلوس ديالو لكاع ناس لي ساهمو فتطور د بشرية ف شي ضومينات، ؤ تعطات لجايزة أول مرة ف لفيزيك، شيمي، لأدب، سلام، ؤ لمدسين عام 1901.

ف عام 1968، غادي يأسس لبنك صونطرال د سويد جايزة اخرا ف ليكونومي؛ وخا ما وصاش عليها ألفريد نوبل.

من بعد غادي تولي جايزة نوبل من أهم لجوايز لي كايتعطاو ف ضومينات د لأدب، لمدسين، لفيزيك، شيمي، ليكونومي، سلام.




#Article 117: جردة د لماجوريل (107 words)


جردة د لماجوريل (بلأمازيغية ⵓⵔⵜⵉ ⵎⴰⵊⵓⵔⵉⵍ) هي حديقة نباتية ديال جوج ونص فدّان د لأرض وحديقة منظر طبيعي ديال فنان جات فمدينة مراكش فكليز. تسمات بلماجوريل على سمية هداك اللي بناها و اللي هو الرسام لستشراقي لفرانساوي جاك ماجوريل، واللي بدا التأسيس ديالها فعام 1924.

ف 2017 صبغ الرسام الديور و لحيوطا دياول الجردة بالصباغة الزرقة (زرق ماجوريل)، بعد هادشي دار الرسام كسيدة وداوه لفرنسا فين مات. ليوما هاد الجردة كاتعتبر من لمعالم لمهمة فمدينة مراكش و اللي فيها بزاف د شجر و لورد اللي قليل فين تلڭا بحالو ف لعالم. ولكن هاد لبلاصة معروفة كتر بالنواع ديال الضرڭ اللي اتخاد من بزاف د لبلايص ف لعالم.




#Article 118: جزر لقومور (165 words)


جزر لقومور (بلقومورية: Umoja wa Komori - ب لفرانساوية: Union des Comores) هي بلاد ديال لجزر جات ف لمحيط لهندي قبالت الشرق د إفريقيا. أقرب لبلدان لجزر لقومور هي موزامبيق، طنزانيا، ماداڭاسكار و سيشيل. لأصل ديال السمية ديال الدولة ماجي من لڭمرة (لقمر) ب لعربية.

تيسكنو ف جزر لقومور تقريبا 850.000 د الناس و لعاصمة ديالها هي موروني. اللغات الرسمية د لبلاد هي لقمرية و لفرانساوية و لعربية، و لفلوس اللي كاتخدًم فيها هي لفرانك د لقومور. جزر لقومور كانت مستعمرة فرانساوية من اللخر د لقرن 19 تال 1975، اللي كان هو لعام اللي ستاقلات فيه. من نهار ستاقلات فيه تال دابا وقعو ف لبلاد كتر من 20 نقيلاب و لا محاولات د نقيلاب عسكري، و حتا محاولات باش يقتلو الروايس، و هادشي خلاها دولة ما فيهاش ليستيقرار بزاف.

حيت لعربية لغة رسمية فيها، جزر لقومور داخلة مع جامعة الدول لعربية، و هي أكثر دولة جات ف لجنوب و داخلة ف ديك لمنظمة، و لبلاد لوحيدة اللي جات كاملة تحت خط لإستواء و داخلة معاها.




#Article 119: جمهورية لكونڭو ديموقراطية (192 words)


لجمهورية د لكونڭو الديموقراطية (بلفرانساوية: République démocratique du Congo) هي واحد لبلاد جات فلوسط دإفريقيا. كانت سميًتها زايير من 1971 تال 1997, قبل ماتبدًل السمية. لكونڭو الديموقراطية هي أكبر بلاد من ناحية لمساحة فإفريقيا جنوب الصحرا, وتاني أكبر بلاد فإفريقيا من مورا لجزائر. تاتحدها من الشمال جمهورية إفريقيا لوسطانية وجنوب السودان, من الشرق أوڭاندا, رواندا, بوروندي وطنزانيا, من لجنوب زامبيا و أنڭولا, ومن لغرب لمحيط لأطلسي ولجمهورية د لكونڭو.

أول آثار ديال بنادم سكن لبلاصة اللي فيها لكونڭو الديموقراكسية كاترجع ل 90.000 عام.

ف 1885 تنظًم مؤتمر فبرلين قسًم إفريقيا ما بين لأوروبيين وتعطات لأراضي دلكونڭو الديموقراطية للماليك د بلجيكا ليوپولد التاني, وولاًت لملك لخاص ديالو. كان فديك لوقت استغلال خايب للناس وماتو لملايين بسبابو. ف 1908 أتولي لكونڭو تابعة للدولة د بلجيكا بلاصة ماتكون د الماليك, وأتولي سميتها لكونڭو لبلجيكية. ف 1960 أتستاقل لبلاد وغايكون پاطريس لومومبا هو أوًل رئيس وزراء ديالها.

تيسكنو فجمهورية لكونڭو الديموقراطية تقريبا 101.7 مليون د الناس, ولعاصمة ديالها هي كينشاسا. اللغة الرسمية هي لفرانساوية, ولكن كاين بزاف د اللغات اللي تيتخدًمو كل نهار بحال لكونڭو و اللينڭالا والسواحيلي واللوبا كالانڭا. لعملة اللي كاتخدُم فلبلاد هي لفرنك لكونڭولي, والرئيس ديال لبلاد من 2001 لدابا هو جوزيف كابيلا.




#Article 120: جمهورية وسط إفريقيا (201 words)


لجمهورية د وسط إفريقيا (ب لفرانساوية: République centrafricaine - ب السانڭو: Ködörösêse tî Bêafrîka) هي بلاد ماكاطلش على لبحر جات ف وسط إفريقيا. تاتحدها تشاد من الشمال، السودان من الشمال الشرقي، جنوب السودان من الشرق، جمهورية لكونڭو الديموقراطية و جمهورية لكونڭو من لجنوب، و لكاميرون من لغرب.

لبلاصة اللي فيها لجمهورية د وسط إفريقيا كانت مسكونة من الناس من بزاف د لوقت، ولكن لبلاد ديال دابا و لحدود ديالها تدارو من وقت ليستسعمار لفرانساوي، اللي بدا ف اللخر د لقرن 19. بقات لبلاد مستعمرة د فرانسا تال لعام 1960، و هو لعام اللي ستاقلاًت فيه (نهار 13 غشت). من لوقت د ليستيقلال تال دابا دازو بزاف د لمشاكيل السياسية ف لجمهورية د وسط إفريقيا و كانو بزاف د لمحاولات د لينقيلابات و لمدابزات. من 2012 كاينة واحد لحرب أهلية ف لبلاد اللي داخلين فيها بزاف د لحركات مسلحة.

تيسكنو ف إفريقيا لوسطى تقريبا 4 د لمليون و نص د الناس، و لعاصمة ديالها هي بانڭي. اللغات الرسمية د لبلاد هوما لفرانساوية و السانڭو، و لفلوس اللي كاتخدًم هي لفرنك سي إف آ د وسط إفريقيا. واخا فيها احتياطات كبيرة ديال ليورانيوم و الذهب و لماس، كاتعتابر جمهورية وسط إفريقيا من أفقر لبلدان فلعالم و من 10 د أفقر لبلدان ف إفريقيا.




#Article 121: جنوب إفريقيا (147 words)


جنوب إفريقيا هي واحد لبلاد جات فلجنوب ڭاع د إفريقيا. تيحدًوما من الشمال ناميبيا وبوطسوانا وزيمبابوي, ومن لغرب إسواتيني ولموزمبيق. جنوب إفريقيا معروفة باللي هي الدولة اللي عندها أقوى قتيصاد فإفريقيا, وباللي فيها بنية تحتية مقادة فلبلاد كاملة.

ف 1948, دخلات جنوب إفريقيا فواحد السياسة ديال التفريق العنصري (آپارتايد) اللي كانت تاتفرق بين لبويض ولكوحل وخلقات بزاف د لمدابزات ولمشاكيل, حتا بدات تاتفكك هاد السياسة فاللول د التسعينات. هي من الدول لقلال فإفريقيا اللي ماعمرو ماوقع فيها نقيلاب عسكري. من 1994, ولاًت جمهورية جنوب إفريقيا بلاد ديموقراطية تاتًنظم فيها نتيخابات حرة وشفافة, وتيتنتاخب فيها اللي ربح أكبر عدد د لأصوات كيما كان لأصل ديالو.

تيسكنو فجنوب إفريقيا كتر من 58 مليون واحد. لبلاد عندها تلاتة د لعواصم, كل وحدا على شي موضوع: پريطوريا (لعاصمة لإدارية) - بلومفونطين (لعاصمة لقضائية) - كيپ تاون (لعاصمة التشريعية). لفلوس ديال جنوب إفريقيا هوما الرًاند, والرئيس ديالها ديال دابا هو سيريل رامافوزا.




#Article 122: جورجيا (201 words)


جورجيا (ب لجورجية: საქართველო) هي بلاد جات ما بين الشرق د أوروپا و لغرب د آسيا، بالضبط ف لمنطقة د لقوقاز. تيحدّها من لغرب لبحر لكحل، من الشمال روسيا، من لجنوب تركيا و أرمينيا، و من الشرق أزيربيدجان.

جورجيا من الدول اللوالا ف لعالم اللي دخلو ف لمسيحية، و كان داكشي ف لقرن الرابع لميلادي. فاللول د لقرن 19 دخلات جورجيا مع لإمبراطورية و بقات تابعا ليها تا طاحت ف 1917. من مورا 4 سنين د ليستيقلال، دخلات لجيوش ديال لبولشوڤيك للبلاد و دخّلوها مع ليتيحاد السوڤياتي ف 1922. ملّي طاح ليتيحاد ف 1991 ستاقلات لجمهورية د جورجيا و دخلات فأزمة قتيصادية و مشاكل فالتسعينات. ف 2003 وقعات تورة ف لبلاد تسمّات التورة د لورد كانت كاطّالب بإصلاحات ديموقراطية. النتيجة د هاد التورة كانت هي باللي لعلاقة د لبلاد مع روسيا خيابت و وقعات بيناتهم حرب ف 2008.

تيسكنو ف جورجيا تقريبا 3.7 مليون د الناس و لعاصمة ديالها هي تبيليسي. اللغات الرسمية ف لبلاد هوما لجورجية و لأبخازية، و لفلوس اللي كاتخدّم فيها هي اللاري. النضام د لحكيم فيها هو جمهورية برلمانية. جورجيا داخلة مع بزاف د لمنضمات دولية بحال لأمم لمتحدة و لمجلس لأوروپي و منضمة التجارة لعالمية، و عاد باغا تدخل لمنضمات آخرا بحال لإتحاد لأوروپي و الناطو.




#Article 123: جوق لعميين (112 words)


جوق لعميين، فيلم درامي رومانسي مغريبي دارو محمد مفتكر ف2015.

فسنين لولا دل حوكم دل حاسان تاني، حسين اللي عزيز عليه لماليك جديد، خدام رايس د واحد لجوق شعبي. هو ومراتو حليمة ساكنين فدار لعائيلا، دار اللي عايشين فيها بزاف د ناس على الروتين ديال جوايقية وشيخات.

لموغنيين رجال ديال هاد لجوق، بعض لمرات كي كونو مضطرين يديرو راسهم عميين باش يحضرو للمناسبات اللي فيهم غير لعيالات ودايرينهم عائيلات مغريبية موحافيضا.

حسين هو بات واحد لولد سميتو ميمو، وواخد دور ديالو مزيان وباغي لخير لولدو. من لمدرسة لبتيدائية وهو باغيه يكون لول دل قيسم. ولاكين ميمو دغيا بدا كيبغي شامة، لخداما جديدا ديال جارتهم، وباش مايقلقش باه ميمو غادي يزور النوقاط ديالو.




#Article 124: جون رونالد رويل تولكين (161 words)


جون رونالد رويل تولكين، معروف كتر بسميت ج. ر. ر. تولكين، تولد فـ3 يناير 1892 فبلومفونتين ؤ مات فـ2 شتنبر 1973 فبورنموث، كان كاتب، شاعر، فيلولوجيست و بروف دل جامعة.

تولكين معروف ب لكتابات ديالو فنوع لهاي فانتازي. من ابرز الاعمال ديالو فهاد المجال كاين الهوبيت، سيد الخواتم و سيلماريليون.

من بعد ما كمل قرايتو ف بميرنكهام ؤ ؤكسفورد و من بعد الخدمة ديالو ف لجيش ف لحرب لعالمية لولا، تولكين خدم ك بروفيسور مساعد ف مادة نكليزة فجامعة ليدز ف 1920.

من بعد ولا بروفيسور ديال نكليزة لقديمة فل جامعة د ؤكسفورد ف 1925 و ف نفس لجامعة خدم ك بروفيسور ديال لغة و الادب نكليزي. تولكين شد تاقاعد ديالو ف 1959.

منين كان بروفيسور فل جامعة كان من اشد المدافعين على تعلم ديال لغات خاصة لغات لي اصلها جرماني.

تولكين خلق تورة ب دراستو لقصيدة الانكلو ساكسونية بيولف بلكونفيرونس ديالو لي عنوانها هو بيولف : الوحش و النقاد و بل مقالة ديالو لي عنوانها هو في مايخص لحكاية لخرافية




#Article 125: جينيراتور أحادي لحالة (211 words)


جينيراتور أحادي-لحالة ؤلا مولد أحادي-طور (ب لونڭلي : Single-phase generator) هو جينيراتور د ضّو ب تيار لمعاود كيخلق واحد جهد معاود ب شكل مستمر، كنخدمو بهاد لجينيراتورات باش نخلقو ضو ف سيستيمات دضو لي أحادية-لحالة، وخا هكاك كنقدرو نخدمو حتا بجينيراتورات متعددة-لحالات (كيتزادو مراحل الى خدمنا بيه)، داكشي علاش كاينة جينيراتورات أحادية-لحالة ف بزاف ديال ابليكاسيونات لي كاتكون فيها لحالات خفيفة شوية ؤ ممتصلاش ب توزيع تلاتي-لحالة بحال لجينراتورات لي كتهْز، زيد عليها نقدرو نخدمو بها كتر ف سيستيمات ديال جرّان أحادية-لحالة بحال سكة د تران.

ديژاين د ديناموات دوارة هو يكون جزء لي كيتحرك على دينامو ؤ لجزء لمجال لمغناطيسي على لجزء لي مكيتحركش. تصميم الأساسي لي نقدرو نسميوه لجينيراتور لأولي ، هو يكون ليه طرف دإنتاج دورة مستطيلة باش تقطع لخطوطة د لقوة بين لقطب شمالي ؤ لجنوبي. هادشي كيوقع الى قطعنا لخطوطة دلقوة ب دوران ، كيخلاق تيار د ضو. كيتصيفط تيار علا برا لجينيراتور من جوج كروبات د دورات د لانزلاق ؤلفرش ، كنخدمو بواحدة منهم من كل طرف من طراف د لجينراتور. ف هاد ديژاين د جوج أقطاب، دينامو كيدور دورة وحدة، داكشي علاش كيخلق دورة وحدة د تيار لمعاود أحادي-لحالة (AC). باش نخلقو تيار معاود ، كندورو دينامو بزربة تابتة مع لعدد د دورات ف الثانية باش نطابقو تعاويد لمطلوب (ب لهرتز) د تيار لمعاود.




#Article 126: حادة أوعكي (272 words)


حادة أوعكي (خلاقت ف 1953 ف آيت يسحاق - إقليم خنيفرة) مغنية مغريبية كاتغني ب شّلحة د لأطلس لمتوسط و دّاريجا، و هي من لمغنيات لمغريبيات لكبار ف نّص تّاني د لقرن لعشرين و من رّموز د لغنية لأمازيغية. رتابطات سّمية ديالها بزّاف ب بناصر أوخويا.

حادة خلاقت و كبرات ف زّاوية د آيت يسحاق ف جوايه د خنيفرة، جدودها كانو فيهوم سادات دينيين و هو لّي خلا لعائيلة ديالها تكون محافضة و رافضة لكار د لغنا. حادة عمرها ما قرات ف لمدرسة و تعلمات لغنا و لعيوط و لميزان د لموسيقا د شّلوح غير ب سّمع فاش و كان كايعجبها تگلس ف لمجامع د نّسا لّي كايغنيو ف لقساير و لعراسات.

فاش كانت عندها 14 لعام جوجوها دارهوم صحة ب واحد رّاجل عندو 70 عام، و كانت ديك تّجويجة غير سبة ديال لعائيلة ديالها باش يتهناو منها و من طّريق د لغنا لّي كانت حادة باغية تمشي فيها. ماقبلاتش حادة ب هاد ظّلم و مشات عند لقاضي باش تطلب طّلاق و قدرات تحرر راسها من بعد 15 يوم من جّواج.

هاد لقضية بدلاتليها حياتها حيت كان ما بقا ليها گعاد ف آيت يسحاق من بعد ما وقفات ف وجه عائيلتها و هاكدا هربات من دارهوم، و هي بنت 16 لعام، و مشات ل دّار لبيضا و تما وقف معاها بناصر أوخويا، لّي كان من شّيوخ لكبار د لموسيقا لأمازيغية وكان كايآمن ب لموهيبة ديالها.

حادة أوعكي و بناصر أوخويا شكلو تنائي فني كبير ب فضل صّوت لقوي و لفريد ديال حادة و لحرفة لكبيرة ديال بناصر ف لكتابة و شّيعر و لموسيقا. خدمو بجوج ل مدة 12 لعام قبل ما تدير حادة لگروپ ديالها ف 1981 مع شّاعير عبد الله زّهراوي.




#Article 127: حليمة مبارك ورزازي (178 words)


حليمة مبارك ورزازي، تولدات فـ17 أبريل 1933 ف دارلبيضا، هي ديپلوماسية ؤمناضلة د حقوق لإنسان مغريبية.

ملي كانت عندها 14 لعام، صافطها باها لي كان رجل أعمال لمصر باش تقرا فواحد لمدرسة فرانصاوية ف لقاهرة. عشر سنين من بعد، فـ1957 تخرجات بباشلور ف لأداب من جامعة لقاهرة، ؤسفير لمغريب فمصر لي كان هو عبدالخالق طوريس دار حفلة باش يحتافلو بتخرج ديالها.

ملي رجعات للمغريب، دفعات بتخبية باش تخدم فوزارة لخارجية حيت باها كان باغيها تخدم معاه، تقبلات ؤولات كاتيبة رابعة ف لقيسم لي خدامة فيه. ديك ساعة يالاه 3 ديال لعيالات لي كانو خدامين ف لوزارة، ؤكانو كيشوفوهم بحال متطفلات. بهاد لعقلية سماو على حليمة بنت باها، حيت جاتهم فشكل شي وحدة من طبقة غنية حتا هي تكون كاتخدم.

فـ1959، دارت كسيدة لي مات فيها خطيبها، عبدالرحمان أنڭاي، لي كان مدير ديوان لملكي ؤكان غادي يتعين باش يولي سفير فواشنطن. ملي خرجات من سبيطار تلاقات ب لماليك محمد لخاميس ؤغتانمات لفرصة باش طلب منو باش تعوض خطيبها ف لپوسط ديپلوماسي لي كان غادي ياخد. لماليك قبل ؤولات فـ1959 أول مرا مغريبية مسؤولة تقافية فسفارة لمغريب فواشنطن حتال 1961.




#Article 128: حمار لوحش (110 words)


حمار لوحش (ب لونݣلي : Zebra) هو حيوان بزولي(كيولد)، هو من بين لحيونات لي كتشبه لعاود ؤ كيعيش ف كروبات ف لخلا ف لبلايص سخونة ف إفريقيا لجنوبية ؤ شرقية، جلد ديالو معروف ب للون لبيض و لخطوط لكحلين،لحمار دلوحش كياكل ربيع بحال لحيوانات لي من صينف ديالو.

كتولد نثوا ديالو ف أي وقت ف لعام، ؤ كترضع ولدها لمدة ديال عام، وخا دّحش ديالها كيبدا ياكل ربيع مورا يامات قليلة من لولادة ديالو.

وخا لحمار د لوحش حيوان كيجري مزيان ؤ معروف عليه كيستعمل رجليه ف ركيل، وخا هكاك كيتعتبر فريسة ساهلة للحيوانات لاخرا خصوصا فاش كايكون كيشرب.

بزاف د نواع من لحمار د لوحش معرضة للانقراض بسباب :




#Article 129: حميد المهداوي (222 words)


حميد المهداوي (تولد ف1 يناير 1979 ف لخنيشات) هو صحافي مغريبي معروف ب لفيديويات لي تيدير ف ليوتوب، وبلهضرة ديالو اللي تاتكون نيشان فلمواضيع اللي تيهضر عليها. المهداوي كان عندو سيت ديالو سميتو بديل، اللي تسد ف 2017.

المهداوي تعرف بواحد الستيل متميز من بين الصحفيين دالحرائد الالكترونية سوا من الفيديوهات الاسبوعية اللي عبارة عن افتتاحيات ،او الحوارات اللي كان كايدير مع فاعلين سياسيين و حقوقيين من دارو.

حميد المهداوي كان من الصحافيين لقلال اللي غطُاو حراك الريف بحيادية، وكان تيمشي بزاف للحسيمة باش يتبع لخبار. نهار 20 يوليوز 2017، قبل من واحد لمظاهرة د حراك الريف، قبطوه لبوليس، واتًحكم عليه ب 3 شهور د لحبس بتهمة تحراش الناس باش يديرو مظاهرة، والغوات فمكان عمومي. هاد لحكم ديال تلت شهور بدلاتو لمحكمة مبعد لعام. من بعد، وبيدمان المهداوي فلحبس، اتاهماتو محكمة خرا فالدر لبيضا بتهمة خرا هي أنه ماعلمش الدولة بجريمة تاتمس لأمن، هاد الجريمة هي واحد عيطلو من هولاندا (اللي أصلا قال باللي ماعيطلوش) وقالو باللي باغي يدخًل السلاح والدبابات من روسيا للمغريب. مورا هاد التهمة تحكم عليه ب 3 سنين د لحبس.

من مورا ما تعتاقل المهداوي ومشا للحبس، دافعو عليه بزاف د لمنظمات ولهيئات، وطالبو باش يتطلق السراح ديالو، بحال منظمة مراسلون بلا حدود، هيومان رايتس ووتش وآمنيستي إنطرناشيونل.

ف صباح د 20 يوليوز 2020، خرج لمهداوي من لحبس د تيفلت 2 مورما دوز تلت سنين ؤ هو مشدود.




#Article 130: خالد إزري (115 words)


خالد يشًو, اللي معروف بسميًت خالد إزري (بلأمازيغية: ⵅⴰⵍⵉⴷ ⵉⵣⵔⵉ) (تولد فمليلية ف 1969) هو مغني مغريبي تيغنًي بالريفية. لأغاني ديال خالد إزري معروفة باللي هي أغاني ملتازمة وتاتهضر على الهوية لأمازيغية.

تولد خالد يشَو فمليلية ف 1969, و كانت تاتعجبو لموسيقا من صغرو. كان عمًو تيشجعو باش يسمع للموسيقا لأمازيغية, وكانو تيعجبوه بزاف د لفنًانا بحال إيدير ودجورجورا والوليد ميمون وجمال علاًم. ف 1984 غادي يبدا أول مجموعة ديالو مع صحابو, و ف 1987 غادي يخرج أول ألبوم ديالو تامورت إنو. من موراها خرًج بزاف د لأغاني اللي تعرفات بزًاف, وشارك فبزًاف دلمهرجانات ولحفلات, فلمغريب وفلخاريج.

خالد إزري معروف بزاف عند الناس اللي تيسمعو لأغاني الريفية, وعندو عدد د لأغاني لمعروفة, منها بحال دابا:




#Article 131: خندق ماريانا (144 words)


خندق ماريانا ولا خندق المارياناز كاين فغرب المحيط الهادي على بعد 200 كيلومتر شرق جزر ماريانا؛ هو أعمق خندق فالعالم. الخندق كاين على شكل هلال ؤالطول ديالو شي 2 550 كلم والعرض ديالو شي 69 كلم. أكبر عمق معروف فهاد الخندق كيبلغ 10 984 ميترو (± 25 ميترو) فاللافان الجنوبي ديال واحد الوادي داير بحال شي شقة فالطبقة ديال هاد الخندق ؤهاد الشقة معروفة بسمية تشالنجر ديپ. ولكن كاينين شي قياسات ما تعاودوش تلاقاو فيهم بللي أعمق نقطة فالخندق هي 11 034 ميترو. إلى بغينا نديرو شي مقارنة: إلى حطينا جبل إڤرست فهاد الخندق، القمة ديالو غادي تبقا مازال جوج كيلومتر تحت البحر.

فالقاع ديال خندق ماريانا عمود الما فالفوڭ كيطبق الضغط ديال 1 086 بار، يعني 1 071 مرة كتر من الضغط الجوي القياسي فالمستوى ديال البحر. فهاد الضغط، الكثافة ديال الما مرتافعة بنسبة %4،96. الحرارة فالتحت كتراوح مابين °1 حتال °4 سيليسيوس.




#Article 132: خوصي ماريا ليرشوندي (181 words)


خوصي ؤنطونيو رامون ليرشوندي، تولد ف24 فبراير 1836 فؤريو ومات ف8 مارس 1896 فطانجا، معروف كتر بسميت خوصي ماريا ليرشوندي، كان رهيب فرنشسكاني صبليوني تعلم لعربية وكتب بزاف على داريجا ديال لمغاربا.

خوصي ماريا ليرشوندي تولد نهار 24 فبراير 1836 فواحد لمدينا فل باصك سيمتها ؤريو. لولادا ديالو كانت فوصط لحرب لكارلية لولا، اللي هي حرب أهلية رونات بلاد لباصك بين 1833 و1839. هو ولد ماشي شرعي وباه مامعروفش، علاحساب مامكتوب فل وتيقا ديال تسمية ديالو. ف1856 دخل للطريقة لفرنشسكانية، وولا من بعد 3 سنين قس، وموراها ف1862 مشا للكنيسة ديال طانجا باش يخدم معا لبيعتا لكاتوليكية فل مغريب. ف1877، ولا محافظ رسولي (préfet apostolique) حتا مات. بين 1862 و1878، عاش فتطوان، ودار لمعارف معا ناس لمدينا وتعلم مزيان لعربية.

خوصي ماريا ليرشوندي مدفون فل كاتدرالية ديال طانجا.

خوصي ماريا ليرشوندي كان لموترجم رسمي ديال الصيفارات بين ملوك صبانيا والسلطان الحسن اللول، وفنفس الوقت لموترجم بين سلطان لمغريب ولبابا ليون طلطاش. كان صلح وبنا بزاف ديال الكنيسات وديور لبيعتا نصرانية، وحل مدارس ديال لحرفة وفتطوان بنا مدرسة باش يتعلمو الناس الداريجا والصبليونية.

لكتوبا ديالو على لعربية وداريجا مكتوبين بصبليونية، وهوما :




#Article 133: دجيبوتي (146 words)


دجيبوتي (ب لعربية: جمهورية جيبوتي - ب لفرانساوية: République de Djibouti) هي بلاد جات ف لقرن لإفريقي اللي جا ف شرق إفريقيا. تاتحدها إيريطيريا من الشمال، إتيوپيا من لغرب و لجنوب، الصومال من لجنوب الشرقي، و لبحر لحمر و خليج عدن من الشرق.

فاللخر د لقرن 19 ستعمرات فرانسا لبلاصة اللي فيها دجيبوتي دابا، و سمّاتها الصومال لفرانساوي. بقا هاد ليستيعمار تال 1977، اللي هو لعام اللي ستاقلاّت فيه لجمهورية د دجيبوتي. ف 1990 دخلات لبلاد ف حرب أهلية مورا ما دابزو بزاف على شكون أيحكم، و بقات هاد لحرب تال 2000 فين دارو اتفاقية باش يتقاسمو لحكم.

تيسكنو ف دجيبوتي شويا قل من مليون د الناس، و لعاصمة ديالها هي مدينة دجيبوتي. اللغات الرسمية د لبلاد هوما لعربية و لفرانساوية، و لفلوس اللي كيتخدّمو هوما لفرنك د دجيبوتي. دجيبوتي داخلة ف بزاف د لمنضمات بحال لأمم لمتحدة و لإتحاد لإفريقي و لجامعة د الدول لعربية.




#Article 134: دليلة (148 words)


دليلة (خلاقت ف دّار لبيضا ف 18 ماي 1968) ممتلة د لپورنو مغريبية. هي أول مغربية دخلات ل مجال لپورنو و كانت من أنجح لممتلات ف تّسعينات ب دّات ف طّاليان و فرانسا و عندها ف لكاريير ديالها 53 فيلم. سبقليها تنومينات 18 مرة ف أعرق و أهم جوائز صناعة لپورنو لعالمية و ربحات 12 مرة لجوائز لولا ف European X Awards و Venus Awards.

دليلة هاجرات من لمغريب ف تّمانينات د لقرن لعشرين ومشات ل فرانسا باش تكمل لقراية لجامعية ديالها ف لمجال د لجغرافيا. باش تضبر على راسها و تقدر تجمع مصاريف لقراية بدات كاتخدم ك عارضة (موديل) ل رّسامين و من بعد بدات كاتخدم موديل ف مجلات إباحية (إيروتيكية) فرانساوية بحال كولور كليماكس ولا سيني سيكس.

لبدية ديالها ف لپورنو كانت ف طّاليان ف 1994 ف فيلم Concetta Licata وستامرات لمسيرة ديالها تال 2003 بحيت متلات مع ممتلين كبار بحال روكو سيفريدي و ناتشو بيدال.




#Article 135: دوريس ليسينڭ (156 words)


دوريس ماي ليسينڭ Doris May Lessing (خلاقت ف 22 أكتوبر 1919 ف قرمانشه ف إيران و توفات ف 17 نونبر 2013 ف لندن) كاتيبة روائية نڭليزية كانت ربحات جايزة نوبل د لأداب ف 2007، و لّي خلداتها، على حساب هدرة أكاديمية نوبل، ب صّفة ديال راوية ملحمية ديال لحياة د نّسا لّي عندها روح نقدية و شوفة د لموستقبال على كيفاش لحضارة ديال ليوم مقسومة.

دوريس واليديها بجوج نڭليزيين و خلاقت ف إيران ب سباب لخدمة د باها، ف سن صغيرة تحولو ل روديزيا (زيمبابوي ديال دابا) و تما دوزات صغرها و داكشي لّي كايفسر علاش لموضوع د لعونصورية كان حاضر بزاف ف لكتابة ديالها. دوريس مشات أول مرة لنڭليز حتال فاش دارت 31 عام.

دوريس ليسينغ تشهرات ب رّواية لّولة ديالها لعشب كي غني (The Grass is singing) لّي نشراتها ف 1950 و لّي كان لموضوع ديالها لعنصرية.

دوريس ليسينغ كانت مرا أديبة و مناضلة ماركشية و كانت كاتعارض لستيعمار و سّياسة لميز لعونصوري (لأبارطايد).




#Article 136: دومينيكا (119 words)


دومينيكا (ب لينڭليزية: Commonwealth of Dominica) هي بلاد جزيرة جات ف لبحر د لكاريبي. أقرب جزر ل دومينيكا هوما ڭوادلوپ من الشمال و لمارتينيك من لجنوب، و هوما بجوج جزر تابعين ل فرانسا.

أول مرًة وصلو لبويض للجزيرة د دومينيكا هي مع كريسطوف كولومبوس، و هو اللي سمًاها دومينيكا (اللي تاتعني نهار لحدً باللاتينية) حيت وصلو لتما نهار لحدً 3 نونبر 1493. كانت فرانسا أول بلاد حتلات دومينيكا و موراها عطاتها لبريطانيا، اللي حتلاتها من 1763 تال 1978.

تيسكنو ف دومينيكا تقريبا 74.000 واحد، و لعاصمة ديالها هي روسو. اللغة الرسمية هي لينڭليزية و لفلوس اللي كاتخدًم هي الدولار د شرق لكاريبي. دومينيكا معروفة بالطبيعة ديالها، و بالطير ديال باباغيو اللي هو الرمز لوطني اللي كاين فالشعار د لبلاد.




#Article 137: دونالد طرامپ (136 words)


دونالد جون طرامپ (بلينڭليزية: Donald John Trump) (تولد ف 14 يونيو 1946) هو رجل أعمال وسياسي ميريكاني. كان هو الرئيس لخامس وربعين ديال لميريكان, و حكم فيها من 2017 حتال 2021. قبل ما يدخل طرامپ للسياسة, كان خدام رجل أعمال وشخصية ديال التلفازة.

تولد دونالد طرامپ وكبر فنيو يورك, وكان ابًاه تا هو رجل أعمال. ف 1971, غادي يعطيه باه لمسؤولية ديال الشركات ديالو, اللي غادي يسميها دونالد لمنظمة د طرامپ. غادي تبدا لمنظمة تبني ناطحات السحاب ولوطيلات ولكازينويات والتيرانات د لڭولف. بهاد الاستثمارات كاملة, أيولي طرامپ رجل أعمال عندو بزاف د لفلوس. ف 2019, قدًرات فوربس الثروة ديالو ب 3.1 مليار دولار.

دخل طرامپ للسياسة ف 2016 مع لحزب لجمهوري, وترشح باش يولي رئيس د لميريكان. ربح نيشان من الدقة اللًولا ف 8 نونبر 2016. بزاف د الناس تيعتابرو لإيديولوجيا ديالو باللي هي شعبوية وحمائية.




#Article 138: ديكتاتورية (243 words)


الديكتاتورية هي سيستيم ديال نظام الحكم اللي كاتكون فيه السلطات كاملة أو تقريبا مجموعة ف يد واحد أو مجموعة قليلة ديال الناس، بلا ما يكونو محدودين بشي قانون أو بشي ناس اخرين أو مؤسسات يمكن توقفهوم أو تحاسبهوم.

السيستيم الديكتاتوري يمكن تكون عندو مؤسسات و قوانين وتا برلمان و انتيخابات، غير هوما تايكونو غير منظر، أو غير باش يبان أنه عندو مؤسسات و حياة ديموقراطية من برا، و ف الغالب ما كاتكونش عندها سلطة مضادة حقيقية.

من أشهر الناس اللي خدمو على تاريخ الديكتاتوريات وكيفاش كاتبان وشنو اللي تايعاونها باش تبقا وتطغا المؤرخة حنا أريندت، اللي بينات ف لكتوبا ديالها كيفاش أن الديكتاتوريات كاتكون ف أكترها فاسدة على المستوى الأخلاقي و ماشي سيستيم ديال الحكم اللي يمكن ينفع الدول والناس.

أصل الكلمة جاي من اللاتينية dictatura اللي كانت سمية واحد السيستيم ديال الحكم اللي كان كايتدار، غير ب شكل موقت فيه 6 شهور، ف الإمبراطورية الرومانية و اللي كان تايعطي السلطة كاملة لواحد الإمبراطور. كانو شي إمبراطورات عيقو بيها وعاودوها بزاف ديال المرات و أشهرهوم يوليوس قيصر. هاد السيستيم بقا عندهوم حدو حد القرن 3 قبل الميلاد.

باقيين بزاف ديال الدول ف العالم فيهوم الديكتاتورية، غير هي غادا وكاتنقص، واخا مرة مرة كاينين دول يمكن يرجعو اللور وتعاود تبان عندهوم الديكتاتورية من بعد ما كانو ديموقراطيات (الحالة ديال الأرجنتين فاللخر ديال السبعينات).

أهم إنديكاتور ف هاد الضومين هو لانديس ديال ذي إيكونوميست اللي تايصنف الدول على حسب شي مؤشرات ل ربعة ديال المجموعات:

ف 2019، من 167 بلاد كانو ف التصنيف، 54 ديكتاتوريات.




#Article 139: ديكسيونير (102 words)


ديكسيونير (ب لإغريقية: λεξικό) هو كناش كيجمع لكلمات دشي لغة ؤ لمعاني ؤ شرح ديالها، ؤ فشي ديكسيونيرات حتى ترجمة ديالها لشي لغة اخرى، ؤ كاين ديكسيونيرات اخرى كيكون فيها حتى طريقة د نطق ؤ شي معلومات على لاصل دلكلمة ؤ كيفاش كتخدم، ف ديكسيونيرات كاين ديكسيونير لعام لي كيكون جامع كاع لكلمات د لوغة، ؤ ديكسيونير متخصص ف شي مجال معين ولا عيلم معين بحال لميدسين، ليكونومي، لفيزيك، ولا لقانون.

لكلمة د ديكسيونير دخلات للدارجة من لفرانصوية Dictionnaire ف لعهد د لحماية، لي حتى هي دخلاتها من للاتينية dictionarium لي تشتق منو dictio ؤ لي كانت كتعني فعل، قول، طريقة دلتعبير.




#Article 140: رامن (113 words)


الرامن هو واحد النوع ديال الماكلة  مشهورة بزاف فالجاپًون. هاد الاكلة هي واحد النوع ديال الحسوًة ديال الشعرية. كيتم التوجاد ديالها بالمرقة ديال اللحم أولا ديال الحوت، أوكيزيدو معاها طراف ديال لحم الحلوف أولا الدجاج أولا  الطحالب البحرية المنشفة فالشمس ، أولا البصلة الخضرا، أولا الدًرا على حساب كل واحد أوذوق ديالو.

هاد النوع ديال الماكلة كاينة فكاع  المناطق ديال الجاپًون, أو كل منطقة كيفاش كطيبها. إمكن حتى الواحد إشري هاد الماكلة مصوبا مقادا فسوبر مارشيات أولا فالمكينات ديال البيع لي متواجدة تقريبا فكل بلاصة فالشوارع أو الزناقي ديال الجاپًون. الأصل ديال الرامن أوالتاريخ ديالو ممعروفش ،كاينة مصادير كتكول بلي النشأة ديالو فالشينوا ،أوكاينة مصادير اخرى كتكول بلي تاخترع فالجاپًون فالأوائل ديال العشرينات.




#Article 141: ربيع لأبلق (200 words)


ربيع لأبلق (بالريفية: ⵔⴰⴱⵉⵄ ⴰⴱⵍⴰⵇ)، تولد ف 1987 ف لحسيمة، هو صحافي ناشط سياسي مغريبي، و واحد من ناس د لحراك د ريف، لي هو حراك كانت فيه حتيجاجات سلمية وتاطًالب بواحد لعدد د لمطالب قتيصادية وجتيماعية لمنطقة د لحسيمة. نهار 28 ماي 2017، تعتقال ربيع وتحكم عليه ب 5 سنين د لحبس.

تعرف ربيع لأبلق بلإضرابات ديالو على لماكلة، لي كانت أطول إضرابات على لماكلة ف تاريخ د لمغريب (فاتت ف لمجموع 284 يوم).

تولد ربيع لأبلق ف لحسيمة ف 1987 وكبر فيها. خدم مراسل صحافي ف لجريدة لإلكترونية د بديل (لي أسسها الصحافي لمهداوي)، وشارك ف لحراك د ريف ملًي بدا.

تعتاقل ربيع نهار 28 ماي 2017 ف مدينتو، وعلى حساب لمنضمة د لعفو دولية، كاين اشتباه بلي يكون تعذًب هو و65 معتاقل أخور د لحراك د ريف. تحكم على ربيع ب 5 سنين د لحبس باش يدوًزها ف لحبس د طنجة 2.

من نهار تعتاقل ربيع وهو تيدير لإضرابات على لماكلة، على بزاف د لمطالب منها يتحسًن لوضع ديالهم ف لحبس، وتكون عدالة كتر ف تعامل معاهم.

فـ29 يوليوز 2020، خرج ربيع من لحبس ب عفو مالاكي مورما دوز تقريبان تلت سنين ؤ هو مشدود.

دار ربيع لأبلق بزًاف د لإضرابات على لماكلة من نهار تعتاقل. منها:




#Article 142: رجاء بلمليح (283 words)


رجاء بلمليح (خلاقت ف 22 أبريل 1962 ف رّباط و توفات ف 2 شتنبر 2007) مغنية مغريبية تشهرات ف لبداية ديالها ب غنيات عصرية ب لعربية لفصحى و من بعد ما هاجرات لمصر تشهرات بزاف ف دول لعربية، وكاتعتابر من أهم لمغنيات لمغريبيات لّي كان عندهوم نجاع عالمي واخا كانت عندها كاريير قصيرة.

رجاء خلاقت ف رّباط ف 1966 و كانت لبدية ديالها ف لموسيقى مع لمسابقة لكبيرة د أضواء المدينة لّي نظمها لمغريب ف تمانينات لفرن لعشرين باش يقلب على لمواهب ف لغنا و لموسيقى و لمسرح. رجاء كانت دات لمرتبة لّولا ف ديك لمسابقة.

ف لمرحلة لمغريبية ديالها، خدمات رجاء مع كتاب كلمات كبار بحال محمد لجاي و عبد الرفيع الجواهري و مع أحسن لملحنين لمغاربة لّي ميزو لفترة دهبية ديال لموسيقى لمغريبية لعصرية ف نّص تاني د لقرن لعشرين بحال لمفضل لعذراوي و أحمد لبيضاوي و عبد القادر الراشدي و عبد الله عصامي و حسن القدميري.

أول ألبوم ديال رجاء كان ف 1987 (يا جار وادينا) و لّي كانت فيه غنيات ديالها لّي بقاو مخلدين ف تاريخ لأغنية لمغريبية و لّي كايجمع بينها هو أنهوم كانو ب لعربية لفصحى: يا جار وادينا، مدينة العاشقين، الحرية و أطفال الحجارة.

من بعد هاجرات رجاء ل ميصر باش تزيد تلونصي لكاريير ديالها و تما خدمات مع ملحنين كبار و كان أهم واحد فيهوم هو حميد الشاعري لّي خدم معاها أول ألبوم لّي نجحات بيه بزاف ديال صبري عليك طال و كملات من بعد ب ألبومات ناجحة بحال يا غايب و اعتراف لّي خدمات فيهوم مع ملحنين مصريين كبار بحال صلاح الشرنوبي و حلمي بكر و محمد ضياء و جمال سلامة.

ف 1999 عطاتها ليونيسيف تّيتر ديال سفيرة النوايا الحسنة.

تصابت ب مرض لكونسير لّي بيه ماتت ف 2007 و هي عندها 45 عام.




#Article 143: رشيد أورقية (138 words)


رشيد أورقية (بلأمازيغية: ⵔⴰⵛⵉⴷ ⵓⵔⵇⵉⵢⴰ - تولد ف 6 يوليوز 1990 فورزازات) هو ويكيپيدي مغريبي وواحد من لمؤسسين د ويكيپيديا بالدارجة ومن الناس اللي حطًوا لقواعد ديالها وكتبو فيها بزاف د لمقالات.

تولد رشيد أورقية فورزازات ف 1990, وموراها مشا مع عائلتو لآيت ملول, فين قرا ليبتيدائي وليعدادي والثانوي. رشيد تولد من بين 11 د لخوت, 7 منهم توفاو. عندو دابا واحد خوه وجوج خواتاتو, وهو لكبير فيهم.

من مورا لباك, قرا رشيد عام دلهندسة الكهربائية فالمدرسة العليا للتكنولوجيا فأڭادير, وعامين ديال الهندسة المعلوماتية فالمدرسة العليا للتكنولوجيا فالصويرة. موراهم كمًل الإجازة المهنية ديال الهندسة المعلوماتية فكلية المتعددة التخصصات فالراشيدية. دابا تيخدم رشيد فلبرمجة الحرة وساكن فآيت ملول.

دخل رشيد للعالم د ويكيپيديا ف 2018, وخدم فبزاف د لمشاريع اللي عندها علاقة بلمغريب, بحال مشاريع التصوير: ويكي تهوى المعالم, ويكي تهوى إفريقيا, وكان من لمؤسسين د مشروع ويكيپيديا بالدارجة.




#Article 144: رشيد اليزمي (342 words)


رشيد اليزمي هو واحد لعالم ؤ باحث مغريبي عندو جنسية مغريبية ؤ جنسية فرانصاوية، تولد فمدينة فاس فالمغرب،ؤهو عالم متخصص فعلم لمواد مكنت الخدمة لي دارها على الحجرات ؤ على البتريات بشكل عام باش  نحصلو على التليفونات الذكية لي كنستعملهوم اليوم فالحياة اليومية ديالنا.الحاجة لي ساهم بها رشيد اليزمي  بالظبط فلعالم ديال التليفونانات أنه أكتشف أولا إمكن نقولو أخترع طريقة باش إمكن ندمجو بين الليثيوم ؤ الكرافيت ؤهكا إختراع القطب السالب د لحجرات ديال الليثيوم بهاد الإختراع ؤديال واحد لعالم بريطاني  سميتو ستانلي ويتينغهام تمكنو ليابانيين باش اختراعو الحجرات ديال الليثيوم ألي كنخدمو بيهم فالتيليفونات ديالنا اليوم.

رشيد  اليزمي ربح بزاف ديال لجوائز من بين هاد الجوائز خدا لجائزة ديال تشارلز درابر ف2014 لي هي جائزة  كتعطيها الأكاديمية الوطنية دلهندسة فواشنطن فميريكان أولي هي بحال لجائزة ديال نوبل فلقيمة غير هاد لجائزة كتعطى لمهندسين.

رشيد اليزمي قرا الثانوي فليسي مولاي رشيدأ أوليسي مولاي إدريس ففاس منين خدا الباكالوريا ديالو فسيونس ماط فعام 1971،من بعد مشى للرباط فين قرا فكلية محمد الخامس أولي مطولش فيها حيث من بعد عام واحد دفع للأقسام التحضرية للمنهندسين ففرنسا لي مكناتو باش إدخل ل معهد دغرونوبل فتكنولوجيا ففرنسا سنة 1978،من بعد دار الدكتورا فلابوراتوارديال المركز الوطني الفرنسي فلبحث العلمي فعيلم لمواد.

ف1998، ترقا اليزمي فلمركز لوطني دلبحث العلمي الفرنسي أوولى مدير ديال الأبحاث. أوخدم حتى كأستاذ زائر فكلية كيوطو (1988-1990) أو كلية د كاليفورنيا دتكنولوجيا (2000-2010) أوكلية نانيانغ فسنغافورة (من 2010).

ف2007، أسس اليزمي CFX Battery (سيفكس باتري) أو هي شركة  فكاليفورنيا متخصصة فتطوير أوتسويق براءات د  الإاختراعات ديالو ، خصوصا، هاديك لي عندها علاقة بالحجرات د أيون الفليور.

ف2014، ربح  هوأو لباحثين جون كودناف ويوشيو نيشي وأكيرا يوشينو بجائزة  ديال درابر لي كتعطيها الأكاديمية الأمريكية د لهندسة فواشنطن، كاعتراف  ليهم على الخدمة ديالهم أودورهم الكبير فتطوير حجرة  الليثيوم أيون لي كيستعملها الناس فالعالم كولو.حيث كاينة فالبورطابلات ،فالبيسيات فلبرايات دالتصاور أوحتى السماعات الطبية لي كيسمع بيها الناس لي عندهوم مشكلة فالسمع.

فمارس 2016، تعطاط لرشيد اليزمي  جائزة  اخرى لهي ماريوس لافيت  دلمُهندسين لمُخترعين، فباريس، ففرنسا .

عند ليزمي أكثر من 100 براءة اختراع مسجلة فسميتو وأكثر من 200 إصدار علمي.

حاليا اليزمي خدام  فكلية نانيانغ د التكنولوجيا فسنغافورة.




#Article 145: روتن توميتوز (119 words)


روتن توميتوز (بلونكلي: Rotten Tomatoes) (ولي كتعني حرفياً: ماطيشة لخاسرة) هو واحد السيت فالأنترنيت متخصص فالتقييمات، الأخبار ؤ لمعلومات دلأفلام. معروف فكاع لعالم على أنه كيجمع نخبة من نقاد مشهورين لي كيعطيو الأراء ؤالتقيمات ديالهوم على شي فيلم هاد التقيمات كتحول من بعد لنسبة مئوية كتمثل التقيمات الإيجابية دلفيلم. ؤغير مؤخرا ولى كيشمل حتى لمسلسلات. لفيكرة ديال السيت تخدات من واحد التقليد تاريخي فين كان الجمهور كيشير على لممثلين فلمسرح بماطيشة لخاسرة ؤلخضرة إلى كانت لمسرحية عيانة ؤحامضة. لمؤسس ديال هاد السيت هو سين دوانغ ف 1998.ؤف2010 شراتو شَركة Flixster لي ولات من بعد شركة تاع وارنر برذرز لمشهورة ف 2011.السيت كاين بالنسخة لبريطانية ؤلأسترالية ؤحتى لهندية.ف2015 صنفو السيت د أليكسا (سيت خاص بالتصنيفات) من بين أشهر 500 سيت.




#Article 146: روسيا (176 words)


لفيديرالية د روسيا ولاً ليتيحاد الرًوسي ولاً روسيا (بالرًوسية: Российская Федерация) هي واحد لبلاد جات فالشمال د أوروپا وآسيا. روسيا هي أكبر بلاد فلعالم من جيهت لمساحة, اللي هي كتر من 17 مليون كم², وتيسكنو فيها شويا كتر من 146 مليون د الناس. حيت روسيا بلاد كبيرة بزاف, كيحدًوها بزاف د لبلدان من لغرب ومن لجنوب. هاد لبلدان هوما: النورڤيج, فينلاندا, إسيطونيا, لاتڤيا, ليتوانيا, بولونيا, بيلاروسيا, أوكرانيا, جورجيا, آزيربايدجان, كازاخيستان, الشينوا, مونڭوليا وكوريا الشمالية.

لجمهورية د روسيا هي فيديرالية فيها 85 كيان اتحادي (كيتسمًاو أوبلاسط) بحال لجمهوريات لمحلية ولا لأقاليم, اللي عندها لبرلمان ولحكوامت لمحلية ديالها. لعاصمة د روسيا هي موسكو, وهي لمقر د لحكومة لمركزية. لفلوس ديالها هي الرًوبل, الرئيس ديالها هو ڤلاديمير پًوتين.

روسيا هي واحد لبلاد اللي أترات فلمسار د لعالم من بزاف د الجوايه. فلقرن 18 كانت لإمبراطورية د روسيا كبيرة لدرجة تعتابرات تالت أكبر إمبراطورية فالتاريخ.

فعام 1922, كانت روسيا من لمؤسسين ديال ليتيحاد السوڤياتي, اللي كان هو لمنافس د ميريكان وقت لحرب لباردة. ف 1991 طاح ليتيحاد السوڤياتي وخرجو منو بزاف د لجمهوريات, منها جمهورية روسيا ليتيحادية كيما كانعرفوها دابا.




#Article 147: روكو سيفريدي (215 words)


روكو سيفريدي Rocco Siffredi، و سميتو لحقيقية روكو طانو، (خلاق ف 4 ماي 1964 ف أورطونا ف طّاليان) ممتل و مخرج و منتج طالياني ديال أفلام لپورنو. كايتعتابر من أهم سميات ديال لپورنو ف لعالم و عندو ف رّصيد ديالو 714 فيلم ك ممتل و 341 فيلم ك مخرج.

سمية لفنية ديالو خداها من 2 شخصيات متلهوم لممتل لفرانساوي آلان دولون روكو باروندي و روخ سيفريدي. روكو دوز تّجنيد ف لبحرية د طّاليان و 1984 دخل ل لمجال د لپورنو من بعد ما تعرف على گابرييلي پونطيلو، لّي كان ممتل پورنو محترف، ف واحد لحفلة ديال لجنس لجماعي، و هو لّي لينكاه مع مارك دورسيل لمنتج لكبير ديال لپورنو. من تما كانت لنطيلاقة د لمسيرة ديالو لّي دازت بين إيطاليا و فرانسا و هنغاريا و ميريكان، و لّي حصد فيها أهم لجوائز لعالمية ف هاد لمجال.

روكو مجوج من ممتلة لپورنو لهنغارية روزا كاراتشيولو، لّي كانت ملكة جمال هنغاريا، و عندهوم 2 دراري: لورينزو و ليوناردو.

روكو متل 8 د لأفلام ماشي پورنو بين 1993 و 2012 و ف 2016 خرج فيلم وثائقي على لكواليس ديال حياتو و لّي دار لإخراج ديالو لمخرج لفرانساوي تييري دوميزيير.

ف 2006، نشر سّيرة داتية ديالو روكو برواية روكو لّي دوا فيها على حياتو لخاصة و لخدمة ديالو و تّطور ديال مجال لپورنو من تّمانينات ل عوام ال 2000.




#Article 148: روني ديكارط (133 words)


روني ديكارط ؤلا ديكارت (ب لفرانسوية : René Descartes) تزاد ف 31 مارس 1596 ؤ مات ف 11 فبراير 1650، هو فيلسوف، ؤ عالم دلماط ؤ لفزيك فرانساوي، كيسميوه بـبات لفلسفة لحديثة، ؤ بزاف من لأطروحات د لفلسفة لغربية لي جات موراه، هي مبنية لأطروحات ديالو، ؤ لي مازالا كتقرا حتال ليوم، خصوصًا لكتاب (شوفات ف لفلسفة للولا-1641م) لي مازال هو لاباز ل أكثرية د لافاكات دلفلسفة. من جها خرا ديكارت عندو تأتير كبير ف لماط، حيث قدر اختارع سيستيم دلماط تسمى ب سميتو (سيستيم لإحداثيات دّيكارتية)، لي هو لاباز للولا لـ(لهندسة تحليلية)، هادشي لي خلاه من شّخصيات لمهمة ف تاريخ ثّورة لعلمية.

ديكارط هو مول لمثال لمعروف ب لكوجيطو د ديكارط لي كال فيه أنا كنفكر، ادن انا كاين.

لكوجيطو جات ف لبدية د لمثال ب لاتينية لي هي Cogito, ergo sum.




#Article 149: زينب أفيلال (123 words)


زينب أفيلال (تولدات فتطوان ف 31 أكتوبر 1990) هي مغنية مغربية ديال لموسيقا لأندلسية, اللي كاتسمًا تا لموسيقا د لآلة.

تولدات زينب أفيلال فتطوان ف 31 أكتوبر 1990 وكبرات فيها. كانت عزيزة عليها لموسيقا من صغرها, وبدات تاتحفظ وتغني مقطوعات ملًي كانت عندها 4 سنين. تعلمات لأصول د لموسيقا فلمعهد لموسيقي ديال تطوان, ودخلات للجوق ديال محمد العربي التمسماني, اللي تيسيًرو لأستاد محمد الأمين الأكرمي, وتمًا فين بانت لموهبة والصوت لقوي ديالها.

شاركات زينب مع لجوق د التمسماني فبزاف د لحفلات ولمهرجانات فلمغريب ولخاريج, وغنات فبزاف د لأفلام بحال نوبة من ذهب ونور و موال (2004) و زمن الرفاق (2008) و أفراح صغيرة (2016) ديال لمخرج محمد الشريف الطريبق.

زينب أفيلال ماحبساتش قرايتها واخا تاتغنًي, وتاتوجد دابا الدكتورا ديالها فلجامعة ديال سرڭوسطة فصبانيا.




#Article 150: سارة البكري (155 words)


سارة البكري (خلاقت ف دّار لبيضا ف 2 يوليوز 1987) عوّامة مغريبية من أحسن لعوّامات لمغريبيات ف تاريخ رّياضا د لعومان و شاركات جوج مرات ف لألعاب لأولمپية ف بيجين 2008 و ف لوندون 2012.

سارة بدات لمسيرة ديالها ف لكلوب د لعومان د لويداد لبيضاوي و من بعد مشات ل رّاجا فاش كانت عندها 12 لعام. من بعد ما شدات لباك ديالها مشات تكمل قرايتها ف فرانسا ف لهندسة و تما كملات لمسيرة ديالها ف لعومان ف لكلوب ديال راسينغ آراس ف ليون و بدات كاتشتارك ف بطولات حتيرافية ف فرانسا و أوروپا.

سارة شاركات مع المغريب ف بزاف ديال لمسابقات لعربية و لإفريقية و كانو أحسن لإينجازات ديالها ف 2010 فاش ربحات 2 ميدياليات دهبية ف بطولة إفريقيا ف دّار لبيضا و ف 2011 ربحات 5 د لميداليات دهبية ف لألعاب لعربية ف دّوحة.

سارة كانت دّات تّيتر ديال أحسن رساصية ف لمغريب ف 2010 و 2011 و أحسن رساضية عربية ف 2011.




#Article 151: سالڤادور دالي (146 words)


سالڤادور دومينڭو فيليبي خاثينتو دالي إي دومينيتش، ماركيز دالي دي پوبول (  11 ماي 1904 – 23 يناير 1989) رسام إسپاني سريالي تزاد في فيڭيراس، كتالونيا، إسپانيا.

دالي كان رسام تقني موهوب، معروف بزاف برسوماتو ذات الانطباع القوي والغريبة. المواهب ديالو في الرسم المهمل للخطوط كانت غالبا كتّميز بالتأثر بكبار فناني عصر النهضة. العمل ديالو الأكثر شهرة إصرار الذاكرة تكتامل في غشت 1931، وهو واحد من أكثر الرسومات السريالية القابلة للتعرف عليها. المجموعة الفنية ديال دالي حاضرة بين الناس بما فيها من أفلام، منحوتات، تصوير، والأعمال اللي كان كايديرها مع نخبة من الفنانين في مختلف وسائل الإعلام.

كان عند دالي حس تخيلي عالي، وكان كيستمتع في التماشي مع الرغبة ديالو في التصرف بطريقة غير اعتيادية ومبالغ فيها؛ باش ما يرخيش التعلق ديال الناس اللي كايقدّرو العمل ديالو، والهروب من الازعاج ديال النقاد. طريقة التعامل والتصرفات ديالو غير العادية كانت كاتجذب الانتباه أحيانا كثر من العمل الفني.




#Article 152: سان مارينو (120 words)


هاذه الجمهورية الصغيرة سان مارينو شعار ديالها هي الحرية ديماً و دات استقلالها بعد تهديدات على مر تاريخها.خضعت سان مارينو لثلث غزوات عسكرية،اللولا عام 1503م احتلها سيزار بورجيا و ضمها لجمهوريته شهر حتى مات.طاح عليها احتلال آخر عام 1944م بالقوات الالمانية و من ثم الحلفاء اللي احتلوها سيمانات.في 8 اكتوبر 1600 دارو اول دستور مكتوب.فيه تشريعات قانونية نستعملو اليوم مع انها فاتت بتقلبات سياسية.كانت فرانسا في وقت نابليون ندافع عن الجمهورية من وقت طويل.

بما انها دولة صغيرة قريبة من الطاليان ف راه لمناخ ديالها هو بحال لمناخ ديال ايطاليا النيت (مناخ متوسطي، جبلي).

سان مارينو عندها غي دوري د لكورة وصافي .ماعندهاش حاجة وحداخرة، تا تشارك في السباقات د فورمولا وان ولكن السباق كيديروه في ڤيلاج طلياني قريب منها.




#Article 153: ستار أكاديمي (128 words)


ستار أكاديمي هو برنامج مسابقات تلفزيوني غنائي عالمي كايتدار كل عام و كايستمر لعدة اشهر. دارتو شركة اندمول الهولندية و كايتدار ف50 بلد فالعالم

الفكرة ديالو هي انها تقدم للناس مواهب غنائية جديدة كايديرو تمارين و حصص يوميا و كاينميو القدرات ديالهم الفنية، و هادشي كايتم بطريقة تلفزيون الواقع. كاتبث حياة الطلاب فبلاصة وحدةلمدة 15 سيمانة.

كاتدار ف ستار أكاديمي حفلات غنائية استعراضية اسبوعية فواحد المسرح كبير قدام مذالمئات ديال المشجعين و كاتذاع مباشرة كل سيمانة

أما بالنسبة للطلاب فليهم قناة خاصة كاتبث البلاصة اللي هما ساكنين فيها 24 ساعة على 24 و حتى كاينين يوميات بمثابة اخبار لداكشي اللي كايطرا معاهم يوميا. كل سيمانة كايخرج من بينهم واحد الطالب على حساب تصويت الجمهور للنومينيز، و اللي وصل حتى للخر و خذا اعلى تصويت للجمهور هو اللي كايربح.




#Article 154: سعيد حجي (136 words)


سعيد حجي (سلا، 29 فبراير 1912 - 2 مارس 1942) كان مفكر ؤ صحافي مغريبي، تعرف ب لي هو لًلول د صّحفيين لمغاربة، ؤ أول واحد كيبدا صّحافة لوطنية فلوقت د ليستيعمار لفرانساوي للمغريب.

تولد سعيد حجي فسلا نهار 29 فبراير 1912، شهر قبل ما يتستعمر لمغريب، ؤ كان هو صّغير ف خوتو. ف 1923 أسس جمعية لوداد مع صحابو، ؤ كانوا كيخًرجو بيها جرائد كل سيمانة تينتاقدو فيها ليستسعمار لفرانساوي.

ف 1930 صيفط سعيد وخاه برية لمحمد بن عبد لكريم لخطابي تيشجعوه فيها، ولكن لفرانسيس ماخلاُوهاش توصل.

ف 1937 أسس سعيد مطبعة سميتها مطبعة لمغريب و كانت تاتخرًج لجريدة د لمغريب من سلا تلاتة د لمرًات فالسيمانة. من موراها ولاًت تاتخرج فالرباط وعندها أعداد كل نهار.

مات سعيد حجي وهو صغير (فعمر 30 عام) نهار 2 مارس 1942 بسباب مرض خطير اللي ما براش منًو.




#Article 155: سعيد زدوق (256 words)


سعيد زدوق (خلاق ف رّباط ف 1954) صحافي رياضي مغريبي. هو من أقدم و أشهر صّحافيين رّياضيين لمغاربة و تّشهر ببرامج لعالم رياضي ؤسمر رياضي.

زدوق ولد حي توارگة ف رّباط. فاش كان ف لّيسي دفع ل مدرسة لمعلمين و ف نفس لوقت ل واحد لكونكور د تقني ف لإذاعة و تّلفزة لمغريبية (لإتم) و تقبل فيهوم بجوج، و ختار يخدم ف تّلفزة غير حيت كانت قريبة ل دّار ديالو ف توارگة.

هاكدا خدم سعيد تيكنيسيان ف لإتم ف 1975 ومن بعد ما شد لباك كمل قرايتو ف لجامعة (خدا ليسونص د لحقوق ف 1979) و ختار يخدم ف لمصلحة د رّياضة، ومن بين نّاس لّي عاونوه باش يندمج ف لخدمة كانو صحفيين كبار بحال عبد المجيد زهيد و الحسين الحياني.

أول ماتش علق عليه زدوق كان ف لقاهرة بين لمغريب و مصر ف 1982 ف إقصائيات كاس لعالم، وهاكدا بدات لمسيرة ديالو ك معلق رئيسي للماتشات د لمنتخب ف تّمانينات و تّسعينات و رتابط صّوت ديالو عند لمغاربة ب أحدات مهمة بحال ألعاب البحر المتوسط ف 1983 و كؤوس لعالم 86، 94 و 98 و كؤوس إفريقيا للأمم و بدّات لّي تنظمات ف لمغريب ف 1988.

زيادة على تّعليق، رتابطات سميت زدوق ب لبرنامج تّاريخي د تّلفزة لمغريبية العالم الرياضي و لّي بداه هو و محمد لحمر ف 1979 و بقا تا يقدمو تا ل 2006.

من بعد ما خرج تقاعد نسبي، بقا كايقدم برنامج سمر رياضي لّي كايعرض فيه على رياضيين قدام ماركاو تّاريخ رّياضي لمغريبي.

من 2017 خدم مع ر اديو بلوس و عندو فيها برامج رياضية و حوارية مع رّياضيين و لجماهير.




#Article 156: سعيدة المنبهي (186 words)


سعيدة المنبهي (مراكش, شتنبر 1952 - الدار لبيضا, 11 دجنبر 1977) كانت شاعرة ومناضلة ماركسية مغربية, ماتت من بعد 36 يوم د لإضراب على الطعام فلحبس, وكانت هي أول مرأة عربية اللي ماتت مورا إضراب على الطعام فإطار النضال.

تولدات سعيدة المنبهي فمراكش ف 1952, وكبرات فيها. خدات لباك ديالها ف 1971 فثانوية أبي العباس السبتي ومن بعد مشات لكلية لآداب فالرباط باش تكمًل قرايتها. خدات الإجازة فلينڭليزية ومن بعد دخلات لمركز التربية والتكوين حتا ولاًت أستاذة ديال لفرانساوية فلإعدادي.

دخلات للنضال وقت قرايتها وكانت عضو نشيط فالاتحاد الوطني لطلبة المغرب, وموراها دخلات للحركة ديال إلى الأمام, اللي كانت حركة ماركسية لينينة. نهار 16 يناير 1976, غادي اتًخطف هي و 3 دلمناضلات آخرات, وغادي يتعدًبو 3 شهور فلمعتقل السري ديال درب مولاي الشريف فالدار لبيضا. من مورا داكشي غادي يتحكم عليها هي واللي معاها فلمجموعة ب 5 سنين لكل واحد.

ف 8 نونبر 1977, غادي تبدا هي والرفاق ديالها إضراب لامحدود على الطعام باش تعتارف بيهم الدولة كمعتقلين سياسيين وباش يقادًولهم ليهم لحالة اللي كانو عايشين فيها. مورا 34 نهار د لإضراب, غادي تسخف سعيدة و آتمشي للصبيطار حتا غادي تتوفًا تمًا نهار 11 دجنبر 1977.




#Article 157: سكينة الصفدي (155 words)


سكينة الصفدي (خلاقت ف دّار لبيضا ف 1952) مغنية مغريبية كانت من لأعضاء لمؤسسين د مجموعة جيل جيلالة و هي أول صوت نسوي بان ف لمجال د لمجموعات لغيوانية.

سكينة كبرات ف كازا و تيتمات من مها و هي صغيرة (كانت عندها 11 لعام) و رباها خالها. سكينة كانت نشيطة بزاف ف صغرها و كانت كاتدير لمسرح و كاتلعب لكورة و كان الأب جيگو قتارح عليها تكون فرقة د لكورة نسوية.

دّخلة د سكينة ل لعالم لفني جات من لمسرح بحيت مارساتو بين 1964 و 1970 و متلات مسرحيات غنائية تراثية مع سميات كبيرة بحال نعيمة لمشرقي و حبيبة لمذكوري و شّعيبية لعذراوي، و زيد عليهوم بوجميع و لعربي باطما لّي كانو ف ديك لفترة كايفكرو يشكلو مجموعة ناس لغيوان.

سكينة كانت من لمؤسسين ديال جيل جيلالة ب لقيادة د حميد الزوغي لّي كان مور لفكرة د تّأسيس وكانت سكينة مع محمود السعدي و محمد الدرهم و مولاي الطاهر الأصفهاني هوما لأعضاء لّوالا د لمجموعة.




#Article 158: سلا (265 words)


سلا (ب لأمازيغية : ⵙⵍⴰ) هي واحد لمدينة قديمة ف شمال لغربي د لمغريب ؤ تاطًل على لمحيط لأطلسي. هي لعاصمة د لعمالة د سلا, ؤ مفارقها على رباط لواد د بورڭراڭ. على حساب لإحصاء د 2014، كيسكن فسلا تقريبا مليون ديال بنادم. سلا فيها جوج د لمحطات ديال تران ؤ جوج خطوط د طرامواي، ؤ مطار دولي.

ماكاينش معلومات محددة ؤ دقيقة على شكون أسس لمدينة د سلا، ولكن بزاف د لمصادر تاتقول باللي لفينيقيين اختارو لبلاصة لي فيها سلا ؤ رباط ؤ دارو فيها مرسى د لبيع ؤ شرا. لفينيقيين تيقولو فلكتوبا ديالهم ب لي ناس لي كانو فديك لبلاصة كانو أمازيغ. ف لقرن لّول بعد لميلاد، أسسو رومان فنفس لبلاصة واحد لمستوطنة سمًاوها لمستوطنة د سلا (ب للاتينية Sala Colonia سلا كولونيا)، هاد لمستوطنة كان عندها مرسى مروًج. مازال كاين آثار عليها: هي لمدينة لأثرية ديال شالة (ب لأمازيغية : ⵛⴰⵍⵍⴰ) لي تابعة دابا إداريا للرباط.
ملًي جا لإسلام للمغرب، كانت لبلاصة لي فيها سلا مامسكوناش، ومن بعد ما بداو الدول تيتأسسو فلمغريب كانت ديك لمنطقة فيها حروب حيث جات على لحدود ديال فين كانو مدابزين لأدارسة مع برغواطة.

فعام 1030، دولة لأمازيغية ديال بني يفرن غادي تأسس لمدينة د سلا لي كنعرفو دابا، ؤ غايردًوها هي لعاصمة ديالهم. ف 1145، غادي يدخلو لموحدين لسلا ؤ غادي تولي تابعة ليهم، ؤ فهاداك لوقت فين أيتًبنا جامع لكبير د سلا.

فلعام 1627، غادي يتحالفو ناس ديال سلا ؤ رباط وغادي يأسسو دولة مستقلة ديالهم لي كانت سميتها لجمهورية د بورڭراڭ, وكانت لعاصمة ديالها هي لقصبة د لوداية. غادي تبقا لجمهوية د بورڭراڭ مستقلة 41 عام، حتال 1688، ملًي غادي تدخل الدولة لعلوية لسلا.




#Article 159: سلام أمزيان (261 words)


محمد لحاج سلام أمزيان (تولد ف 1925 فآيت بوخلف نواحي لحسيمة - مات ف 9 شتنبر 1995 فهولاندا) كان مناضل مغريبي من الريف واتًعرف حيث هو اللي كان الشاف ديال لينتيفاضة د الريف ف 1958-1959.

تولد سلًام أمزيان ف 1925 فدوار بني بوخلف اللي تابع للقبيلة د بني ورياغل فالريف. قرا فاللول فلمسيد ومن بعد كمًل فلمعهد لأصيل (ثانوية الإمام مالك) د لحسيمة. رحل من بعد لفاس وقرا فلجامعة د لقرويين, وخدا شهادة العالمية. ملًي تخرًج ولاً موعلًيم وقرا فبزاف د لبلايص منها قرية بامحمد, طنجة وتطوان.

ملًي كان سلاًم أمزيان تيقرا فلقرويين, ولاً متبع السياسة ودخل مع لمناضلين اللي طالبو بليستيقلال د لمغريب. دخل من ديك الساعة لحزب الشورى و الإستقلال. ف 1955, دخل مع جيش التحرير, وكان تينسًق مابين الخطابي ولعسكر ديالو اللي بقاو فالرًيف. ف 1956, ملًي استاقل لمغريب, مابغاوش الناس دجيش التحرير يحطًو السلاح حيث ماكانش لمغريب كلو مستاقل وبغاو يحرروه كلًو. الدولة ماكانتش متافقة معاهم وتقبطو بزاف د ناس جيش التحرير فلحبس, منهم سلام أمزيان, اللي دوز عاماين د لحبس مابين لحسيمة والرباط وقنيطرة.

ف 1958, غادي تبدا لينتيفاضة ديال الريف, اللي وقعات حيث الناس سخطو على التهميش اللي كان فلمنطقة ديالهم, وبداو تيظاهرو. الدولة ماتجاوباتش مع هاد لمطالب وبقات لحڭرة والتهميش, وهوما يهزو لمحتجين السلاح. سلام أمزيان كان هو الشاف ديالهم وكان تيعطيهم التعليمات ديال كيفاش يحاربو حرب لعصابات. تحامات الدولة مع حزب لاستقلال وهرًسو هاد لحركة وتقتلو بزاف د الناس. فمارس 1959 هرب أمزيان لمليلية وموراها مشا عاش فمصر والجزائر ولعراق. ف 1994 مشا لهولندا باش يتداوا وبقا تما تا مات ف 1995. تدفن سلًام أمزيان نهار 16 شتنبر 1995 فالدوار ديالو, آيت بوخالف.




#Article 160: سليمة الزياني (104 words)


سليمة الزياني (بالريفية: ⵙⴰⵍⵉⵎⴰ ⵣⵉⵢⴰⵏⵉ) (تولدات ف 1994 فلحسيمة), واللي معروفة بسميت سيليا هي مغنية وفنانة مسرحية مغربية, ووحدا من النشطاء د لحراك د الريف. تاتغنًي سيليا لموسيقى الثراتية د الريف.

تولدات سليمة ف 1994 فلحسيمة وكبرات فيها. من مورا ماخدات لباك مشات للجامعة د محمد اللًول فوجدة وقرات فيها الدراسات لأمازيغية. فنفس لوقت بدات فلغنا ولمسرح وتعرفات محلًيا فالريف بلغنا د لأغاني التقليدية د لمنطقة.

ف 2016 دخلات سيليا فلحراك د الريف اللي كان تيطالب بالتنمية لإجتماعية وليقتيصادية د لمنطقة. نهار 4 يونيو 2017, تعتاقلات وحققات معاها لفرقة لوطنية فالدار لبيضا. نهار 29 يوليوز, من مورا شهراين تقريبا فلحبس, خرجات سيليا بعفو ملكي.




#Article 161: سويسرا (205 words)


سويسرا (ب الألمانية: Schweiz; ب الفرونسي: Suisse; ب الطاليانية: Svizzera; ب الرومانشية: Svizra; ب الألمانية السويسرية: Schwiz) هي دولة صغيرة ف غرب أوروپا. السمية الرسمية ديال سويسرا هي Confoederatio Helvetica، هاد السمية ب اللاتينية و هي غالبا ما كتستعملش غير ف الوتائق الرسمية. سويسرا هي كونفدرالية مكونة من 26 ولاية صغيورة كتسمى كانتون (الجمع: كانتونات).

سويسرا معروفة ب الحياد ديالها. شي دولة كتكون محايدة مللي ما كتاخدش شي موقف بين الدول اللي متحاربين. سويسرا كانت محايدة من 1815. بزافت المنضمات الدولية كاينين ف سويسرا. الأمم المتحدة عندها مكتب رئيسي (و لكن ماشي مقر) ف جنيڤ. المنضمة السابقة ديال الأمم المتحدة اللي كانت كتسمى عصبة الأمم كان عندها المقر ديالها ف جنيڤ.

كاينين ربعة اللغات رسمية ف سويسرا: الألمانية، الفرونسي، الطاليانية، و الرومانشية. بعض الكانتونات وحتى القرى ڭاع كيهدرو فيهم ب جوجت اللغات، و أكبر كانتون من ناحية المساحة، ڭراوبوندن (ڭغيزون)، فيه تلاتة. تقريبا التلتين ديال السكان كيهدرو بالألمانية؛ الفرونسي كيهدرو بيها ف الغرب ديال البلاد، و الطاليانية كيهدرو بيها ف الكانتون ديال تيتشينو والرومانشية فشي بلايص ف ڭراوبوندن.

العاصمة ديال سويسرا هي برن.. أكبر مدينة ف سويسرا هي زيوريخ.

ف الشمال ديال سويسرا كنتلاقاو ألمانيا. ف الشرق ديال سويسرا كنتلاقاو لوطريش و ليخطنشطاين. ف الجنوب ديال سويسرا كنتلاقاو الطاليان. ف الغرب ديال سويسرا كنتلاقاو فرانسا.




#Article 162: سّعديين (229 words)


سّعديين ؤلا إسعديين (لأمازيغية : ⵉⵙⵄⴷⵉⵢⵢⵉⵏ) هما سلالة أمازيغية كاينسبو راسهوم للشرفة، بانو ف لجنوب د واد درعة حدا تارودانت؛ حاربو لوطاسيين ؤ دخلو مراكش عام 1525م، دارو لمقاومة على لبرطقيز (لبرتغال) ؤ غلبوهم ف معركة واد لمخازين لي غاتكون سباب ف لمقتل ديال ملك لبرتغال سبستيان ؤ سقوط لإمبراطورية البرتغالية من بعد، ؤ وقفو لمد لعثماني بلقيادة د محمد شيخ لّي هو واحد من سّلاطين السّعديين لمعروفين بزاف.

غاتوصل دّولة للوقيتة لمخيرة ولقوية ديالها ف عهد أحمد لمنصور دّهبي (1578-1603) لي أمن رخا ف لبلاد ب تزيار ديالو ف اقتصاد د دولة، ؤ ف لعهد ديالو خرج سيستيم د لإدارة جديد، ؤ سماه لمخزن.

من ورا عام 1603 تقسمات لمملكة ؤ من تما بدات معها لمرحلة ديال لعيا .حكم فرع من سعديين ف فاس (1610-1626)، تقتل آخر سلطان من سلاطين سّعديين ف مراكش عام 1659، حتا داز لحكم ل لأسرة لعلوية (لفيلاليون).

هادي ليستة د سلاطين سعديين لي حكمو لمغريب :

القائم بأمر الله (1509-1517).

أحمد الأعرج (1517-1544).

محمد شّيخ (1544-1557).

عبد الله الغالب (1557–1574).

محمد المتوكل (1574–1576).

عبد الملك الأول السعدي (1576–1578).

أحمد لمنصور ذّهبي (1578–1603).

أبو فارس عبد الله (1603–1608).

زيدان الناصر بن أحمد (1603–1627).

أبو محلي ثائر حكم مراكش في الفترة: (1610-1613).

أبو مروان عبد الملك الثاني (1627–1631).

الوليد ابن زيدان (1631–1636).

محمد الشيخ الصغير (1636–1655).

أحمد العباس (1655–1659).

محمد الشيخ المأمون بن أحمد (1604-1613).

عبد الله الواثق (1613-1623).

عبد الملك بن عبد الله (1623-1627).




#Article 163: شارج د ضو (157 words)


شارج د ضو ؤلا شارج د تريسينتي (لونكلي : Electric charge) هي واحد لمزية د لفيزيك مربوطة ب لمادة لي كتعطيها واحد لقوة كتسمى لمجال لإليكتري-ميغناطيسي، كاين جوج ت نواع د شارجات؛ شارج زايدة ؤ شارج ناقصة. شارجات لي مشابهة كتنافر بينتها ؤ شارجات لي مامشابهينش كتقارب، كنكولو على أي حاجة معندهاش شارج بأنو متعادل، كنعبرو شارج د ضو ب لوحدة د لكولوم (C)، ؤ كنرمزو لشارج ب Q ؤلا q. لعليم لي كيقرا لمزيات ديال شارج كيتسمى لإليكترومغناطيسية.

كتهز شارج ناقصة علا لإليكطرون ؤ شارج زايدة علا لپروطون بواحد شارج ابتدائية ديال 1.602×10−19 كولوم.

شارج د ضو تادير واحد لمجال سميتو لمجال د ضو ؤ الا كانت كتحرك تادير مجال مغناطيسي. الا جمعنا بين لمجال د ضو ؤ لمجال لمغناطيسي كيعطيونا لمجال إليكترو-مغناطيسي ؤ تفاعل ديالو مع شارجات هو لمصدر د لقوة إليكترو-مغناطيسية ؤ هي من بين لقوات ربعة ف لفيزيك. لعيلم لي كيقرا لجسيمات لي مشارجية ؤ كفاش كيتفاعلو ب مع لفوطونات كيتسمى إليكترو-ديناميك كوانتيك.




#Article 164: شيفرة مورس (368 words)


شيفرة مورس هي طريقة فالاتصال عن بعد ديال تشفير رموز النصوص على شكل تتابعات قياسية ديال جوجت الإشارات المختالفة؛ كتسمى نقاطي وشرطات ولا نقاطي وشراطي. تسمات شيفرة مورس بسمية سامويل مورس، المخترع ديال التلڭراف.

شيفرة مورس الدولية كدير التشفير ديال الحروفا الستة والعشرين ديال لونڭلي من A حتال Z، شي حروفا خرين، الأرقام العربية ؤمجموعة صغيرة ديال علامات الترقيم والإشارات الإجرائية (prosigns)، ما كاينش الفرق ما بين الحروفا الكبار والحروفا الصغار. أي رمز فشيفرة مورس كيتصاوب بنقاطي وشراطي متابعين. النقطة هي الوحدة الأولية ديال قياس الوقت فمراسلات شيفرة مورس. المُدَّة ديال شرطة وحدة هو تلاتة الأضعاف المُدَّة ديال نقطة وحدة. كلٌ نقطة وشرطة فالرموز كتبعها فترة ديال انقطاع الإشارة كتسمى إصپاص، كتساوي المُدَّة ديالها المُدَّة ديال نقطة وحدة. الحروفا ديال نفس الكلمة كيكونو مفرقين بإصپاص كتساوي المُدَّة ديالها المُدَّة ديال تلاتة النقاطي، ؤالكلمات كيكونو مفرقين ما بيناتهم بإصپاص كتساوي المُدَّة ديالها المُدَّة ديال سبعة النقاطي. باش تزاد الفاعلية ديال التشفير، تصممات شيفرة مورس باش تكون المدة ديال أي رمز هي تقريبا العكس ديال تردد التواتر ديالو فنصوص اللغة الإنجليزية. هاكا، الحرف الأكثر استعمالا فلونڭلي؛ الحرف E، عندو أقصر مدة: نقطة وحدة. حيت العناصر ديال شيفرة مورس محددين على حسب التناسب ؤماشي على حسب مدد زمنية محددة، الشيفرة عادة كتوصل بمعدل أعلى من داكشي اللي قادر عليه المستلم باش إحيد ليه التشفير. معدل الإرسال ديال شيفرة مورس (السرعة) كتحدد بمجوعات فكل دقيقة، عادة كيڭولو ليها شحال من كلمة فالدقيقة.

شيفرة مورس عادة كتسيفط بطريقة شعل–طفي ديال شي وسيط حامل للمعلومة بحال التيار الكهربائي، موجات الراديو، الضوء المرئي، ولا موجات الصوت. التيار ولا الموجة تيكونو حاضرين في فترة الوقت ديال النقطة والشرطة، ؤتيكونو غايبين فالوقت اللي تيكون مابين النقاطي والشراطي.

شيفرة مورس إمكن ليها تميموريزا، ؤتيكون إرسال شيفرة مورس بطريقة كتكون مفهومة للإنسان، بحال موجات الصوت ولا الضوء المرئي، ؤيمكن أي واحد مدرب وعندو المهارة يترجمها مباشرة.

حيت بزافت اللغات من غير لونڭلي كتستعمل حروفا خرين بلا هادوك الحروف الـ26 الرومانية، تم تطوير حروفا خرين ديال مورس لهاد الغاية.

فالطوارئ، يمكن لشيفرة مورس تجينيرا بطرق مرتاجلة بحال تبقا تشعل وطفي فالضو، تبقا ضرب فشي حاجا ولا دير الصوت بالبوق ولا الصفارة، وهاكا كتولي وحدة من أبسط ؤأكثر طرق التواصل عن بعد تنويعا. إشارة المحاين الأكثر انتشارا هي SOS - تلاتة النقاطي، تلاتة الشراطي، ؤتلاتة النقاطي - راها معروفة دوليا بالتوافق.




#Article 165: شيلي (148 words)


لجمهورية د شيلي (بالصبلوينية: República de Chile) هي واحد لبلاد فلجنوب لغربي ديال أمريكا اللاتينية, عندها ساحل طويل على لمحيط لهادي (4828 كيلوميطر). تاتحدًها من الشمال پًيرو, من الشرق بوليڤيا ولارجونتين, ومن لغرب لمحيط لهادي.

دخلو الصبليون للبلاصة اللي فيها دابا شيلي فالنًص دلقرن 16 وحتلوها كاملة. ف 1818, ستاقلات الدولة ديال شيلي اللي بدات من اللًول جمهورية. فاللخر ديال 1960 واللول ديال 1970 كانت مدابزات بزاف فلبلاد على لحكم مابين ليمن وليسر سالات باقلاب عسكري ف 1973 طيًح الرئيس اليساري د ديك لوقيتة سالڤادور آلييندي. من موراه حكم ديكتاتور سميتو پًيونشي حتال 1990. من بعد منًو خدات لبلاد الطريق ديال الديموقراطية عاوتاني.

تيسكنو فشيلي تقرييا 17.5 مليون د الناس, ولعاصمة ديالها هي سانتياڭو. اللغة الرسمية هي الصبليونية, ولعملة اللي كاتخدًم هي لپًيزو ديال الشيلي. شيلي هي عضو مؤسس ديال لأمم لمتحدة واتحاد دول أمريكا لجنوبية وتحالف لمحيط لهادي, ودخلات عضو لمنظمة التعاون لإقتصادي والتنمية (OECD) ف 2010.




#Article 166: صبليونية (144 words)


الصبليونية ولاً لقشتالية, هي واحد اللغة لاتينية من الأسرة الهندو-أوروپية. الأصل ديالها هو الدارجة د اللاتينية اللي كانت تاتهضر فلمنطقة د قشتالة, فالشمال د صبانيا. على حساب الإحصائيات د 2019, كاين 483 مليون واحد فالعالم اللي اللغة الأم ديالو هي الصبليونية, وفلمجموع تقريبا 580 مليون واحد تيهضرو الصبليونية يا إما كلغة أم, ولا تعلموها من بعد.

كاين بزاف د لبلدان من غير صبانيا اللي فيها الصبليونية لغة رسمية, حيث صبانيا استعمرات بزاف د لبلايص فلعالم وكانت تاتفرض اللغة ديالها عليهم. من لبلدان اللي فيها الصبلوينية رسمية كاين صبانيا ولأغلبية د لبلدان د أمريكا اللاتينية وغينيا الاستوائية.

على حساب فريدة لوداية, السفيرة د لمغريب فكولومبيا, كاين تقريبا 7 د لمليون دلمغاربة اللي تيهضرو الصبليونية. لمغريب عندو علاقة قديمة مع الصبليونية, حيث صبانيا احتلات بزاف د لمراسي فلمغرب من لقرن 15, واحتلات الشمال د لمغرب كامل من 1912 ل 1956 و الصحرا من 1884 ل 1975.




#Article 167: طائفة الأنانيين (146 words)


طائفة الأنانيين (بالفرنسية: La secte des égoïstes) هي أول رواية كتبها الأديب الفرانساوي إيريك إيمانويل شميت، خرجات عام 1994.

الرواية كاتعاود القصة ديال واحد الباحث لقا، غير بالزهر، واحد المخطوطة كاتعاود على واحد الشخصية غريبة عاشت فالقرن 18. واحد الفيلسوف اللي تا واحد ما تايعرفو فالوقت الحالي واللي كانت سميتو گاسبار لانگينهارت. هاد گاسبار كانت عندو واحد الفلسفة ديالو بوحدو، الأنانية، وكان كايآمن بأن الحاجة الحقيقية الوحيدة اللي كاينة فالكون هي الوعي ديال بنادم براسو، تا ما باقي غير تخيلات وگاع ماكاين.

الرواية فيها جوج ديال الخطوط السردية: من جهة كاينة مغامرات الباحث المعاصر، اللي دايرة بحال شي بحث بوليسي، ومن جهة أخرى وقائع من الحياة ديال لانگينهارت والرباعة ديال المؤمنين بالفلسفة ديالو اللي جمع، واللي عامرة بالنويطات والمواقف المضحكة وحتا التراجيدية، كتير شي فاش نعازلو على العالم.

الرواية ترجمات لبزاف ديال اللغات، منهوم العربية، اللي ترجمها أحمد اللويزي ونشراتها دار المركز الثقافي العربي فالدار البيضا.




#Article 168: طانجا (1496 words)


طانجا، هي مدينة مغريبية جات فشمال لغربي د لمغريب، مابين لبحر لبيض لمتوسط ولمحيط لأطلسي. طانجا جات فضفة لجنوبية ديال مضيق د جبل الطًر وقريبة بزاف من صبانيا.

تيسكن فطانجا تقريبا مليون واحد، و هي لمدينة السادسة فعدد السكان فلمغريب. المدينة هي العاصمة ديال جيهة طانجا-تيطوان-الحسيمة على حساب التقسيم الإداري ديال 2011.

لبلاصة لي جات فيها طانجا خلاًتها تكون موطع استقروا فيه بزاف د لبدان و الحضارات، بحال الإغريق والرومان ولينڭليز والصبليون و لبرتقيز. ملًي تستعمر المغرب، كانت طانجا منطقة دولية (من 1924 ل 1956) وكانت حاكماها 9 د البلدان. بزاف د التقافات والحضارات أتّرو على التاريخ ديال طانجا، من القرن العاشر قبل الميلاد، مابين الوقت اللي كانت فيه مدينة أمازيغية ستراتيجية والوقت اللي كانت فيه مركز تيجاري مهم عند الفينيقيين وحتال اليوم، طانجا كانت ديما عندها أهمية كبيرة عند بزاف د التقافات. ف 1923، طانجا تعتابرت مدينة دولية من عند القوات الستيعمارية و ولات وجهة لبزاف ديال الأوروبيين والميريكانيين، سوا كانو فنانين، رسّامين، مغنيين، ديبلوماسيين، بزنازا ولا ڭاع جواسيس.

طانجا كاتعرف دابا واحد التطور مزروب و عصرنة قوية، المشاريع الجديدة كاتهم السياحة والقتيصاد ديال المدينة باش ولات قطب مهم ف التنمية ديال المغريب. مؤخرا ولاًت طانجا مركز صناعي وتجاري كبير فشمال إفريقيا، وفيها واحد من أكبر لمراصي فلبحر لبيض لمتوسط، اللي هو لمرصا ديال طانجا-ميد.

كاينين طرق متنوعة ديال السميات د طانجا كيفما تسجلو ف المصادر الإغريقية و الرومانية (طينجا و طيتجا هوما اللي باينين بزاف)، و السمية الأمازيغية القديمة هي طينجي، الكلمة اللي كيربطوها شي د العولاما بكلمة طينجيس اللي كاتعني المستنقع. المصادر الإغريقية كاتقول بيلا السمية جات من طينجيس اللي كاتشير للبنت ديال الطيطان أطلس ف الميتولوجيا الإغريقية. هاد السمية وصلات للغة اللاتينية وهي اللي عطات السميات المختالفة ف اللغات الرومانسية ديال دابا

طانجا تأسسات كمستعمرة فينيقية في القرن العاشر قبل الميلاد. الأغلبية ديال القبورا الأمازيغيين ف طانجا كان فيهم أكسيسوارات بونيقية قبل القرن السادس ق.م. الشي اللي كيدل على التيجارة القوية ديال داك الوقت. و ما وصل القرن الخامس ق.م. حتى كانو القرطاجيين طوّرو المدينة باش تولي مرصا مهمة ف الامبراطورية ديالهوم. المدينة حافضات على التقاليد الفينيقية لواحد المدة طويلة بزاف حيت صدرات عملات برونزية ف العهد ديال الملوك الموريطانيين كانو فيهوم كتابات بونيقية، و ف العهد ديال الرومانيين كانو العملات فيهوم تصاور ديال الريوس ديال أڭوسطوس (العسكري الروماني) وديال أڭريپا (أرشيتيكت روماني) و كتابات باللغة اللاتينية.

الإغريقيين، من جيهة خرا، عرفو المدينة ب السمية ديال طينجيس و حافضو، معا شوية ديال التغييرات، على الأساطير الأمازيغية المتعلقة ب التأسيس ديال طانجا. بالنسبة ليهوم، طينجيس (البنية ديال أطلس، و أرملة ديال أنطايوس) نعسات مع هيركوليس و حملات منو ب سيفاكس. من مور الموت ديال طينجيس، سيفاكس قرر يبني مرصا و سمّاها على السمية د الأم ديالو باش يشرّفها. الهيكل العضمي العملاق و القبر ديال أنطايوس كانو وجهات ديال بزاف د الزوّار القدامين، و المغارة ديال هيركوليس ف طانجا، فين كاتقول الأوسطورة بيلا سيفاكس ڭلس باش يرتاح ملي كان كيبني المرصا، مازالا كاينة حتال دابا.

طانجا طاحت ف اليد ديال موريطانيا الحليفة الرومانية ف العهد ديال الحروب البونيقية. الجينيرال الروماني كوينتوس صيرطوريوس ف الحرب ديالو على النضام ديال سولا ف روما، خدا طينجيس للمدة ديال أعوام في السبعينات ق.م، قبل ما ترجع للموريطانيين بلحاق هاد المرة كمدينة حورّا تحت الحكم ديال بوكوس التالت ف العام 38 ق.م.

طينجيس خدات بزاف د المتيازات تحت الحكم ديال أڭوسطوس و ولات مستعمرة رومانية تحت الحكم ديال كلاوديوس، اللي ردّها عاصمة ديال مقاطعة موريطانيا طينجيطانا (أولا موريطانيا الطنجية). طينجيس ف هاد الوقت كانت مسرح ديال الإعدامات و الستشهادات ديال القديس مارسيلوس و القديس كاسيان ف عام 298. طينجيس بقات هي أكبر تجمع ديال المستوطنات ف المقاطعة و تطورات بزاف ف القرن الرابع.

ف العشرينات ديال القرن الخامس، الڤانداليين قتاحمو شمال إفريقيا و ستعمرو طينجيس و موريطانيا و وصلو حتال كالاما ف نوميديا. الڤانداليين خسرو طينجيس من بعد بسباب النتفاضات الأمازيغية.

طينجيس عاوتاني تستعمرات من طرف بيليساريوس، الجينيرال ديال الإمبراطور البيزنطي جوستينيان اللول، ف عام 533. بلحاق طينجيس ما بقاتش هي العاصمة اللي تحولات لمدينة سيپتيم (سبتة دابا) اللي كانت عندها حماية كتار من طينجيس.

المؤرخين كيعتاقدو بيلا الكونت ديال سبتة، يوليان، كان آخر واحد دافع على طانجا ضد الغزوات ديال الأمويين ف شمال إفريقيا. الأدب الرومانسي الوسيط عتابر الخيانة ديالو للعالم المسيحي نتيقام ضد الملك القوطي روديريك، بلحاق طانجا ف الأخّر طاحت ف اليد ديال القوات ديال موسى بن نوصير ف 711. من مور ما كمل هو للجنوب باش يمشي للوسط ديال المغريب، خلّا النايب ديالو طارق بن زياد ف طانجا باش يطلق الغزوة ديال شبه الجزيرة الإيبيرية.

تحت الحكم ديال الدولة الأموية، طانجا كانت هي العاصمة ديال منطقة المغرب الأقصى ف المقاطعة ديال إفريقية. الأمويين ف الغزوات ديالهوم ف شمال إفريقيا و شبه الجزيرة الإيبيرية كانوا كيقلّبو على العبيد، و على داكشي كانو كيعتابرو الأمازيغيين وثنيين باش يفرضو عليهوم الجزيات وخا مور ما بزاف منهوم عتانق الديانة الإسلامية. ف المنطقة ديال طانجا، هاد الجزيات كانو كيتخلصو على الشكل ديال جاريات عبيد. هادشي سبّب ف المقتل ديال الحاكم يازيد على اليدين ديال الحراس ديالو اللي كانو أمازيغيين ف عام 720، و من تما بدات الانتفاضة ديال الأمازيغ ضد الأمويين. ف المعركة ديال النبلاء، قائد الحرب عند البرغواطيين، خالد بن حميد الزناتي، دبح النخبة ديال العرب ف شمال إفريقيا. و حيتاش البرغواطيين كانو متمركزين ف الجنوب. طانجا طاحت ف الفوضى حتال عام 785.

ملي جا دريس اللول للمغرب كلاجئ، تزوج من القبايل ف مولاي دريس و جمع الجيش ديالو اللي ف واحدة من الغزوات ديالو، قدر ياخد مدينة طانجا ف عام 790. من بعد، طاحت طانجا ف اليد ديال قاسم اللي هو الإبن ديال دريس التاني اللي الموت ديالو شعلات صراع كبير على شكون غادي ياخد السلطة. من بعد عاوتاني، سيطر عليها عمر، الأخ ديال قاسم. ف عام 874، علي، الإبن ديال عمر، ولا هو السلطان ديال المغرب وحكم حتال عام 883، و من وراه جا يحيى اللي كمل الحكم حتال 904. بجوجهم حكمو من فاس اللي خداوها عاصمة ديال المغرب.

من ورا بزاف ديال الحروب مع الدولة الأموية اللي ما ستاسلماتش على الأطماع ديالها باش تبسط السيطرة ديالها على طانجا و التدخلات ديال الخليفة عبد الله المهدي. قدر يوسف بن تاشفين يسيطر على طانجا ف عام 1077 وتما دخلات المدينة للدولة المرابطية و من بعد للدولة الموحدية ف 1147 فين عرفات زدهار كبير و المرصا ديالها للمرة اللولا رجعات للنشاط الكتيف ديالها.

ملي البرطقيز بداو التوسعات الستعمارية ديالهم و خداو سبتة ف 1415، طانجا كانت هدف كبير ليهم. و ما قدروش ياخدوها ف بزاف د المناسبات، سيرتو ف 1437، 1458 و 1464. بلحاق ف الاخّر قدرو يسيطرو عليها ف 14 غوشت 1471 و حوّلو الجامع ديالها لكاتيدرائية. الوطّاسيين حاولو يرجّعو طانجا ف 1508، 1511 و 1515 بلا ما ينجحو. فالقرن 17، البرتڭال و الصبنيول تّاحدو و من تمّا دازت طانجا للحكم ديال الصبنيول بلحاق حافظات على الإدارة البرطقيزية اللي كانت فيها.

الحكم الإيبيري بقا حتال 1661، ملي طانجا تّعطات للنڭليز تحت الحكم ديال الملك تشارلز التاني كجزء من الصداق ديال البرطقيزية إينفانطا كاترين. تشارلز عتابر طانجا جوهرة وعطاها قيمة كبيرة. بلحاق الناس المحليين ما كانوش مرتاحين و كانو دابا و ساعة كيدخلو ف حرب مع الحكام المحليين و كانو كيعتابرو ريوسهوم مجاهدين. القايد ديالهوم كان هو الخدير غيلان من القبيلة ديال بنو ڭرفة. جميع المحاولات ديالهم فشلات.

ف 1679، السلطان المغريبي مولاي سماعيل حاول يسيطر على طانجا، بلحاق حتى هو فشل عاوتاني. جا هو دار واحد الحصار قوي على المدينة تكلف بيه الجيش الريفي جعل النڭليز يخرجو من المدينة ف 7 فبراير 1684 من بعد ما دمروها بطريقة ممنهجة.

ف القرن 18، طانجا كانت هي العاصمة الديبلوماسية د المغريب، فين الميريكان بنات أوّل قنصلية ديالها ف الفترة د الحكم ديال جورش واشنطون. التوري الطالياني، جوسيپي ڭاريبالدي عاش منفي ف طانجا مابين 1849 و 1850 بعد ما طاحت الجمهورية الرومانية

الموقع ديال طانجا عطاها قيمة كبيرة عند الأوروبيين. ف 1923، من ورا ما تقسّم المغريب لمنطقة حماية فرانساوية و منطقة حماية صبنيولية. طانجا تعتابرات منطقة دولية تحت الحكم المشترك ديال فرانسا، بريطانيا، الصبنيول. من بعد، دخلات دول خرا للمعاهدة بحال الطاليان، البرتڭال، و بلجيكا ف 1928، و هولاندا ف 1929.

طانجا هي تاني أهم مدينة ف المغريب من الناحية ديال الصناعة مع ورا الدار البيضا. ف هاد الساعة، المدينة عندها ربعا ديال المناطق صناعية، جوج منهوم مناطق حورا.

القتيصاد ديال طانجا كيعوّل بزاف على السياحة، العدد ديال المنتجعات البحرية كبر بزاف مع المشاريع اللي تموّلات من طرف ستيتمارات خارجية. و حتى الشركات ديال البني و العقار ستتمرو ب شكل كبير ف البنية التحتية السياحية.

المرصا ديال طانجا-ميد بدا الخدمة ف 2007. الموقع ديالو كيلعب دور كبير حيتاش هو نقطة د لتيقاء ديال بزاف د المناطق البحرية و جا ف واحد الموقع جوهري ف المضيق ديال جبل طر اللي كيربط أوروبا ب إفريقيا.

الفلاحة ف طانجا كاتعوّل بشكل كبير على زراعة د لحبوب.

المدينة كبرات بزربة كنتيجة للهجرة القروية من مدون و دشورا صغارين. العدد د السكان ف 2014 هو كتار من تلاتة د الأضعاف ديال هادي 32 عام (850 ألف ف 2014 مقابل 250 ألف ف 1982). هاد الضاهرة أدّات للضهور ديال بزاف د الضواحي.

تّيحاد طانجا هو الفريق اللي دابا كيمتّل طانجا ف البطولة الوطنية. الملعب الرسمي ديالو هو ملعب بن بطوطة. الفريق ديال طانجا ربح أول بطولة ف التاريخ ديالو ف الدورة ديال 2017/2018.

الملعب الوطني ديال الكريكيت هو الملعب الوحيد اللي كاين ف المغريب و اللي مخصص لهاد الرياضة. هاد الملعب ستاضف أول بطولة عالمية ف 2002. پاكيستان، جنوب إفريقيا، و سريلانكا لعبو ف البطولة التلاتية.




#Article 169: طناش رجل غضبان (126 words)


طناش رجل غضبان ؤلا 12 رجل غضبانصفحة دلفيلم فسيت لمدب دلفيلم فسيت ففيلم أفينيتي دلفيلم فسيت روتن توميتوز Angry Men ) هو واحد لفيلم درامي مريكاني خرج ف1957 لي للمخرج ديالو سيدني لوميت ؤ الكاتب دسيناريو ديالو ريجنالد روز، الأصل ديال هاد لفيلم هو مسرحية تعرضات فالتلفازة ؤلي كتبها نيت ريجنالد روز.لقيصة دلفيلم باختصار كدور على واحد لكروب ديال هيئة د لمحلفين مكونة من 12واحد كلهم رجال كيتشاورو ؤتناقشوفلقضية دواحد الشاب متاهم فجريمة قتل من الدرجة الأولا .هاد لفيلم تشهر بزاف بواحد لقضية لي هي أنه تصور فبلاصة وحدة ،من غير اللول دلفيلم ؤشي بركة قليلة د لمشاهد ولكن لبلاصة لمهمة فلفيلم كدور فصالة وحدة لي مخصصة لهيئة د لمحلفين.

لمدة دلفيلم هي 96 دقيقة ،ثلاث د دقايق منها برا دصالة.ؤلباقي كولو فصالة د هيئة لمحلفين.




#Article 170: طُفيلي (فيلم) (112 words)


طُفيلي ؤلا پارازايت (بلونڭلي: Parasite) هو واحد لفيلم د لكوميديا لكحلا د كوريا لجنوبيا تنتج فعام 2019 ، دار لإخراج ديالو بونج جون هو، ؤدار لبوطولا ديالو سونغ كانغ هو، لي سون كيون، تشو يو جونغ، ؤ ممثليين وحدين خرين.

لفيلم ربح بزاف دلجوائز من بينهوم سعفة ذهبية فمهرجان كان دسينيما ف 2019، ؤهو أول فيلم دكوريا لجنوبيا ربح بحال هاد لجائزة. لفيلم ربح لجائيزة د لؤسكار كأفضل فيلم أجنبي ف2020 فالدورة الـ92 ديال هاد المهرجان ؤربح حتى لجائزة دأحسن سيناريو، ؤربح لمخرج دلفيلم بونج جون لجائزة دأحسن مخرج.

كيهضر لفيلم على الفوارق الاجتماعية لي كاينة فكوريا الجنوبيا ؤهاد لموضوع عالجو انطلاقا من الظروف دجوج دلعائلات ، اللولة لاباس عليها ؤالثانية فقيرة.




#Article 171: ظهير (142 words)


ظّهير ف لقانون لمغريبي هو نص قانوني يمكن يكون قانوني (ب معنى أنو عندو لقوة ديال قانون) و لا تنظيمي، بحال ف حالة ظّهائر ديال تنفيذ لقوانين.

ظّهير كايسنيه لماليك و يمكن يسني معاه ب لعطف رئيس لحوكومة ف لحالات لّي كايسمح بيها دّستور.

ظّهير شّريف كايصدرو وكايسنيه لماليك ف لحالات لّي مسموح ليه، على حسب دّستور، يدير تّشريع بوحدو بلا ما يتشاور مع لبرلمان و لا ف لحالات لّي كايعين فيها مؤسسات ولا مناصب دستورية بحال لقضاة ولا تا يعلن حالة لستيثناء متلا. ب صفة عامة، لحالات لّي كايكون فيهوم ظهير شريف هوما:

من بعد ما كا يخرج شي قانون من لبرلمان وكايكون ناضي، ما كايكون رسمي ويمكن يتنفذ حتا كايخرج ظهير تّنفيذ ديالو ف لجريدة رّسمية. هاد ظهير تّنفيذ كايصدرو و كايسنيه الملك وكايسنيه معاه ب لعطف رئيس لحوكومة ولا لوزير لّي معني بموضوع لقانون لّي خايخرج على ودو ظّهير.




#Article 172: عباس لمساعدي (173 words)


محمد بن عبد الله بن الطيب بن لحبيب، لمعروف بعباس لمساعدي (تولد ف 1925 ف تازارين نواحي زاڭورة ؤ تقتل ف فاس ف 27 يونيو 1956) كان قايد ديال جيش التحرير ف لمغريب.

تولد عباس لمساعدي ف 1925 ف تازارين نواحي زاڭورة ف لجنوب شرقي د لمغريب. كان باه فقيه و عطّار، وكان عباس تيمشي معاه هو و خوتو باش يتعلمو لحرفة.

ف لول ديال لخمسينات دخل لحبس وعدبوه فيه لفرانساويين. ملي خرج منو، قرر باش يولي مناضل للاستقلال د لمغريب، لي كان مآمن ب لي ماغادي يكون غي ب سلاح. ف 1955 مشا لريف ونظم جيش تحرير مع بزاف د ناس لي كانو متافقين معاه فلأفكار، و لي كانوا تيدًربو ب سلاح.

طريق لي خدا عباس لمساعدي ماعجباتش حزب ستيقلال، وكانت لعلاقة بينو وبين لمهدي بن بركة ماشي تال لهيه. لمساعدي قدم ليستيقالة ديالو من لحزب نهار 16 ماي 1956.

ف 27 يونيو 1956، تقتل فظروف مامعروفاش بقرطاسة ماتعرفش شكون تيراها. تدفن ب تخبية ف لول ولكن عرفوها ناس وتعاود تدفن ف فاس ف 3 يوليوز 1956 وحضر لڭنازة ولي لعهد حسن.




#Article 173: عبد الجليل هدّا (322 words)


عبد الجليل هدّا، وكان معروف ب سمية كاماتشو (خلاق ف مكناس ف 23 مارس 1972)، كوايري مغريبي و لعايبي دولي د لمونتاخاب كان كايلعب ف لپوسط د قلب هجوم. كاماتشو كان من أحسن لمهاجمين لمغاربة ف تّسعينات و ماركا جوج بيوتا ف كاس لعالم 98 ضد نّرويج و سكوتلاندا.

عبد الجليل ولد مكناس وبدا لكورة ف لفراقي د لحومات. دخل للكوديم ف لفريق د شّبان و من بعد سلفوه عام ل إسمنت مكناس. من بعد ما رجع للكوديم داز نيشان ل سّينيور و تألق ف لقسم تاني ف لعام لّي رجعات فيه لكوديم ل لقسم لوطني لّول (1992-1993) و ف لعام لّي من بعد دّا لبوطولة د لمغريب مع لكوديم لّي كانت عندها فرقة كبيرة ب لعايبية كبار بحال: بيدان، بودومة، لمنطيح، ليوسفي و بلعمري و لخوت الغالي و جمال الدريدب. وتما شدات فيه لكنية ديال كاماتشو حيت ديك لفرقة تّاريخية ديال لكوديم كان لجمهور ديالها كايسمي لّعايبية بسميات لعايبية قدام د ريال مادريد بحال كاماتشو و بوطراگينيو.

ف لعام لّي من بعد لعبو تشامپيونز ليگ د إفريقيا كبيرة و تقصاو ب صعوبة ف ربع نّهاية ضد الزمالك المصري.

ف ديك لوقت كان بدا عبد الجليل كايفرض راسو ف لمونتاخاب و لعب أول ماتش ديالو ضد مصر ف 1995 و ف 1996 بدات لكاريير ديالو لحتيرافية، و لّي بداها ف الاتحاد السعودي، لّي جاور فيه أحمد البهجة و دارو بجوج موسم كبير ف السعودية، من بعد مشا لتونس ل لكلوب أفريكان لّي دار فيه موسم كبير (ماركا 39 بيت) و ما زال كايتعتابر من أحسن لّعايبية تسعود لّي لعبو ف تونس.

من بعد حتارف ف سپانيا ف سپورتينغ خيخون، لّي لعب معاهوم جوج مواسم و بان ب مستوى كبير. رجع من بعد لتونس، ل نّادي لإفريقي ل موسم واحد و سالا لكاريير ديالو ف لمغريب مع لماص و لكوديم.

مع لمونتاخاب، لعب كاماتشو 48 ماتش ماركا فيهوم 19 لبيت. أول بيت ديالو كان كونطر تونس ف 1996 و كايبقاو 2 بيوتا ديالو ف كاس لعالم 1998 من أهم لبيوتا ف لكاريير ديالو.




#Article 174: عبد السلام لغريسي (120 words)


عبد السلام لغريسي، خلاق ف 5 يناير 1962 ف لقصر لكبير، لعايبي د لكورة مغريبي كان كايلعب ف لمركز ديال مهاجم. لعب ف لفراقي ديال الجيش لملكي (من 1982 ل 1993 و بين 1994 و 1998) و رّاجا (1993-1994) و سالا لكاريير ديالو ف سلطنة عمان ف لفرقة ديال سّويق لعوماني (بين 1998 و 2000).

عبد السلام لغريسي خدا لقب هداف لبوطولة 3 ديال لمرات، كاملين بيهوم مع ليفار: ف 1982-83 (14 لبيت) و 1989-90 (22 بيت) و 1994-95 (15 لبيت).

لعب 17 ماتش مع لمنتخب لوطني لمغربي و شارك مع لمنتخب فالألعاب الأولمبية 1984 و ف كاس لعالم 94 ف ميريكان. عبد السلام لغريسي هو لّي ماركا لبيت تّاريخي ف 93 ضد زامبيا لّي أهل لمغريب ل كاس لعالم.




#Article 175: عبد الكريم الرايس (148 words)


عبد الكريم الرايس (تولد ففاس ف 1912 - مات ففاس ف 30 غشت 1996) كان فنان موسيقي و كاتب مغريبي, ومن الناس اللًي جدًدوا لموسيقا لأندلوسية وحافظو عليها. كان تيتسمًا بلعميد د لموسيقا لأندلسية.

تولد عبد الكريم الرايس فدرب الطويل فلمدينة لقديمة دفاس. ملًًي كان صغير, خدم فلمطبعة د ابًاه, اللي كانت عندو مطبعة من لمطبعات اللوالا فلمغريب. فنفس لوقت, شجعاتو ختو باش يتعلم للأندلسي, و دخل يتعلم مع لمعلين محمد لبحيري, ومحمد لبريهي, حتا ولاً تاهو معلًم وتيعرف مزيان للرباب.

ملًي غادي يموت البريهي ف 1945, غادي يولًي عبد الكريم هو الرايس د لجوق, وهاد لجوق غادي يخدم بزًاف مع لإذاعة لوطنية.

من غير لغنا, كان عبد الكريم الرايس مهتم بزاف بالتوثيق د لكلمات والنوبات د لموسيقا د لآلة, وكتب بزًاف د لكتوبا منها:

خدا عبد الكريم الرايس جوج أوسمة على لخدمة ولمسيرة ديالو فلموسيقا د لآلة, واحد من لمغريب (درجة فارس) وواحد من فرانسا (درجة فارس).




#Article 176: عبد النبي الكاس (129 words)


عبد النبي الكاس (بالشلحة: ⵄⴱⴷⵏⴱⵉ ⵍⴽⴰⵙ) (مريرت: 1963 - 18 مارس 2013) كان واحد المغني مغربي من لأطلس لمتوسط تيغني بالشلحة والدارجة وكيخدًم الآلة د لوتار.

تولد عبد النبي لكاس عام 1963 فمريرت فلأطلس لمتوسط. ملي دخل للإعدادي, تبلا بلوتار وحبس قرايتو ومشا لخنيفرة. تما تعلم مع لأستاذ اللول ديالو محمد ستيتو, وموراها تعرًف على محمد مغني, اللي بقا معاه بزاف وعلًمو لقواعد د لوتار.

ف 1997, شارك عبد النبي لكاس فالسهرة اللي افتاتحو فيها دوزيم للعموم, ومن بعد سجل جوج كواسط وحدا بالداريجا (د الشعبي) ووحدا بالشلحة, وبجوج تعرفو بزاف. شارك الكاس تا فسمفونية فزاز, اللي كانت سمفونية جمعات كاع لفنانة د لأطلس لمتوسط, منهم محمد رويشة ومحمد مغني.

مات عبد النبي لكاس نهار 18 مارس 2013 فلعشية فمريرت, من بعد واحد لمرض صعيب اللي ماكان عندو دوا.




#Article 177: عبد لكريم لحضريوي (133 words)


عبد لكريم لحضريوي (خلاق ف تازة ف 6 مارس 1972) كوايري مغريبي لعب بين 1989 و 2005 و كان كايلعب مدافع ف ليسر. هو من أحسن لمدافعين لعسريين لّي عرفاتهوم لكورة لمغريبية. لحضريوي بدا لكاريير ديالو ف ليفار لّي لعب معاهوم 7 سنين قبل ما يمشي يحتارف ف أوروپا مع بينفيكا لبرطقيزي و آلكمار لهولندي وشارلوروا لبلجيكي.

لحضريوي لعب 72 ماتش دولي معا لمونتاخاب و 2 كيسان د لعالم ف 94 و 98. لحضريوي خلاها متورخة حيت هو لّي كان مورا 2 د لبيوت لحاسمين ف تّأهل د لمغريب ل كاس لعالم و تقريبا ب نفس طّريقة: ف 93 كان هو لّي صونطرا ل لغريسي فاش ماركا ب رّاس لبيت د تّاهل كونطر زامبيا و عاودها ب نفس طّريقة ف 98 ف لماتش لّخر د لإيقصائيات ضد غانا فاش سونطرا ل خالد رغيب.




#Article 178: عبد لمجيد ضّولمي (155 words)


عبد المجيد ضّولمي (خلاق ف دّار لبيضا ف 20 غشت 1953 و مات ف دّار لبيضا ف 27 جويي 2017) كوايري مغربي كان تايلعب مدافع أوسط (ليبيرو) ولا ف لوسط دّفاعي. دوز أغلبية لكاريير ديالو مع رّاجا، لّي لعب معاها 568 ماتش رسمي، و لعب 140 ماتش دولي مع لمونتاخاب لوطني لمغريبي. هو من أحسن لّعايبية لّي دازو ف تاريخ لكورة لمغريبية و كان معروف ب تامعلميت ديالو ف لوسط و ب رّوح رّياضية لعالية ديالو.

ضّولمي كان معروف ب لقب لمايسترو و الأستاذ. ف 1992 عطاتو ليونيسكو جائزة اللعب النظيف لّي جازات ضّولمي على شّخصية لميتالية ديالو لمعروفة ب لمعقول و لحتيرام لّي كان كايبينو ف لّعب ديالو ولّي خلاه لعايبي محبوب و محترم بزاف من عند لّعايبية لّي لعبو معاه ولا ضدو.

ضّولمي مع لمونتاخاب ربح كاس إفريقيا 1976 و لميدالية دهبية د ألعاب لبحر لمتوسط ف 1983. معا رّاجا ربح يالاه 3 د لكيسان د لعرش و عمرو ما ربح معاهوم لبوطولا.




#Article 179: عبداللطيف زروال (187 words)


عبداللطيف زروال، تولد فـ15 ماي 1951 فبرشيد ؤغبروه فـ4 نونبر 1974 فدارلبيضا، كان ؤستاد د لفلسفة ؤمناضل مغريبي.

تولد عبداللطيف زروال فبرشيد فوسط عائيلة شعبية، باه عبدالقادر كان شارك ف لمقاومة لمسلحة ضد لفرانساويين.

مور ما خدا شهادة ديال لبتيدائي، مشا لدارلبيضا ؤموراها لرباط باش يكمل قرايتو، ؤخدا لباكالوريا ؤهو فعمرو 17 لعام. دخل لكلية لأداب د رباط ؤدار شعبة لفلسفة لي خدا فيها ليسونس، ؤموراها مشا لمدرسة لعليا د لأساتذة ؤتعين ؤستاد فسطات.

بدا نضال فلول معا لڭروپ ديال أنيس بلافريج (لي هو ولد زعيم ستيقلالي أحمد بلافريج)، ؤمن بعد منها دخل فـ1970 لمنظمة 23 مارس لماركسية لينينية ؤموراها مشا معا إلى لأمام فـ1973. ؤكان مناضل حتا فتيحاد لوطني لطلبة لمغريب.

فهاد لوقيتة، سلطات دارو حملة ضد لموناضلين ديال لحركات شيوعية ؤضطر عبداللطيف يتخبا معا أبراهام سرفاتي عند واحد لمناضلة فرانساوية سميتها كريستين دوغ. والاكين فشتنبر 1973 فدارلبيضا تحكم عليه غيابيا ب لإعدام، بعدها بعام فـ4 نونبر 1974 تشد ؤداوه لكوميسارية ديال درب مولاي الشريف فكازا (لي فنفس لوقت كانت معتقل سري) ؤموراها غبر.

كاين روايات أنه من بعد سيمانة من لعتيقال ديالو لقاو لجتة ديالو فسبيطار ابن سينا فرباط مسجلة بسميت عبداللطيف بن عبدالقادر البارودي.




#Article 180: عبدالله براهيم (170 words)


عبدالله براهيم، تولد ف24 غشت 1918 فمراكش ومات نهار 11 شتنبر 2005 فدار لبيضا، كان سياسي مغريبي.

تولد عبدالله براهيم فدرب حمان فحي لمواسين د لمدينة لقديمة د مراكش ولا فتامصلوحت نهار 24 غشت 1918 فوسط عائيلة غنية، باه مولاي براهيم شريف إدريسي بن أحمد كان خدام فل بيع وشرا ديال ماكن دل فلاحة وكانت عندو دار دباغة ؤمصبانة، زيد عليها لأراضي لي كانت عندو فؤريكا، أغمات، أمزميز ؤحتا فمراكش؛ مو سميتها فاطمة سنتيسي أصلها سوسي.

ف47-1946، كان هو لمغريبي لوحيد لي مقيد ف لمدرسة تطبيقية ديال دراسات لعليا فباريز.

فـ7 دجنبر 1955 تعين عبدالله براهيم كاتيب دولة ف لإعلام فحوكومة لبكاي لولا، موراها فـ3 دجنبر 1956 فحوكومة لبكاي تانية ولا وزير ديال شغل ؤشؤون جتيماعية حتال 1958.

فـ24 دجنبر 1958 تعين براهيم رئيس دل مجليس (حوكومة)، ؤدار إصلاحات قتيصادية مهمة فلبلاد.

فـ25 يناير 1959، عبدالله براهيم معا يساريين وحداخرين نشقو من حيزب ليستقلال، ودارو حيزب جديد سماوه تيحاد لوطني للقوات شعبية. عبدالله براهيم بقا فهاد لحيزب ؤرفض ينضم لتيحاد شتيراكي للقوات شعبية حتا مات فـ11 شتنبر 2005 فدار لبيضا.




#Article 181: عزيز السحماوي (145 words)


عزيز السحماوي (تولد ف 1962 فمراكش) هو مغني مغريبي مختص فبزاف دلأنواع دلموسيقى بحال الدجاز وڭناوا, وتيخلط بعض لمرات بيناتها.

تولد عزيز السحماوي فمراكش ف 1962 وكبر فيها. بدا تيسمع لموسيقى د ڭناوا من صغرو, وكان تيشجعو عليها بًاه.

من بعد ماخدا إجازة فلأداب مشا لباريز ففرانسا وطوًر لموهبة ديالو فلموسيقى. فلوسط د التسعينات كان من لمؤسسين د لأوركيسطرا لوطنية د باربيس (Orchestre National de Barbès) اللي كانت مجموعة تاتخلط الترات لمغاربي مع أنواع عالمية بحال الدجاز والريڭي ولبلوز.

من مورا جوج ألبومات, خرج السحماوي من لمجموعة د باربيس ودار لمجموعة ديالو ف 2010, اللي سمًاها لجامعة د ڭناوا (University of Gnawa) و اللي تيشاركو فيها فنانة من لمغريب, فرانسا و السينيڭال.

ف 2014, كانت بزاف ديال لهضرة والنقاشات على السحماوي حيث كان طلب باش ياخد لجنسية ديال لجزائر.

خرًج عزيز السحماوي بزاف د لأغاني ولألبومات مع بزاف د لمجموعات ولفنانين اللي غنًا معاهم. منًها:




#Article 182: عسو أوباسلام (147 words)


عسو أوباسلام، هو واحد المقاوم مغربي أمازيغي من قبائل آيت عطا،تولد ف1890 م بقصر تاغيا فالجنوب د تنغير .عسو أوباسلام كان متصوف وزعيم ذكي بزاف أو هادشي راجع للدور القيادي ديال بًاه لي تاثر بيه بزاف.

ف1919 ت تعين أو هو مزال  صغير (29سنة) شيخ د قبيلة  إيلم شان ،كان معروف على عسو أوباسلام المحاربة ديالو للإستعمار الفرانساوي أو كان الزعيم أو القائد ديال المقاومة المغربية بالجنوب الشرقي. عسو دخل فبزاف ديال المعارك مع القوات ديال فرانسا. أشهر وحدا فيهم هي المعركة د بوگافر لي كانت ف 1933 . فديك المعركة ربحوا المغاربة إنتصار ساحق على االفرانساويين أوخلاًت أوباسلام إتعرف فالعالم كلًو أو إتحسب ليه آلف حساب أوحساب.

توفى المقاوم المغربي عسو أوباسلام نهار 16 غشت 1960م من بعد واحد الصراع طويل مع لمرض ديال السكار، أو تدفن فالمقبرة لي تدفنو فيها كًاع جدودو بالجماعة ديال تاغيا المشان.

جريدة ملفات  تادلة 24  يوليو 2014 على لموقع ديال 




#Article 183: عطارد (159 words)


عطارد هو واحد لكوكب من لكواكب د لمجموعة شمسية ديالنا. هو أقرب كوكب ل شمش، وهو أصغر واحد ف لكواكب د لمجموعة. لقطر د عطارد تيدير تقريبا 4880 كلم، و لوزن ديالو هو 0.055 من لوزن د لأرض. عطارد كيكمُل ضًورة ديالو على شمش ف 87 يوم و 23 ساعة (إذن لعام ف عطارد فيه تقريبا 88 يوم أرضي). لعام لعطاردي (لي هو لوقت لي كيضور فيه عطارد ضورة كاملة على شمش) كيساوي يا الله نهار ونص عطاردية، حيث عطارد تيضور على راسو بشوية، ماشي بحال لأرض لي تادًير ضورة على راسها كل نهار. مايمكنش تكون دابا عيشة فعطارد حيث الحرارة اللي فيه كاتكون كبيرة بزاف فوسط النهار (427 درجة) وباردة بزاف فالليل (-173 د الحرارة).

عطارد كيشبه بزاف ف شكل ديالو ل لقمر ديال لأرض حيث تاهو فيه حفاري بسباب نيازك. عطارد ماعندوش أقمار ديالو, وماعندوش شي غلاف جوي. عطارد عندو نواة من لحديد, وهادشي تيخلًيه يدير واحد لحقل مغناطيسي اللي كيسوى 1% من لحقل لمغناطيسي د لأرض.




#Article 184: علال لفاسي (350 words)


محمد علال لفاسي، تولد ف فاس نهار 10 يناير 1910 ومات ف بوخاريست نهار 13 ماي 1974، كان واحد سياسي، كاتب، شاعر وعالم دين مغريبي.

ف لوسط سياسي ؤلحزبي، علال لفاسي كانو ملقبينو بسميت زعيم.

علال لفاسي تولد فوسط عائيلة لفاسي لفهري من مدينة فاس، ؤتزوج ملي كانت عندو 20 عام بزهرة لفاسي لفهري لي ماتت فـ24 مارس 2016 ؤولد معاها 3 دلبنات و2 دراري: ليلى، أم لبنين (تزوجات بعباس لفاسي)، عواطف (تزوجات بمحمد لوافا)، عبد لواحد (كان وزير الصحة فحكومة اليوسفي و عضو مهم فحزب الاستيقلال)و هاني.

من بين حفايدو، كانلقاو نزار بركة لي هو لأمين لعام د حيزب ليستقلال من 2017.

تولد ف فاس ف لمغريب فعائلة معروفا بعلاقتها بدار المخزن, كبرجع اصلها للقبايل العربية و اللي كتوصل لصحابة الرسول محمد, و فنفس الوقت عندها اصول يهودية دخلات للايسلام فالقرن 16, بات علال كان قاضي و عالم و أستاد فالقرويين.

قرا العلوم ديال الدين فالقرويين ف1927, ومن تما بدات التحركات اللولة ديالو مع الوطنيين, بسباب هادشي غادي يجريو عليه من الجامعة ف1932 و غادي يدخل المدرسة الناصيرية.

غادي يبدا السياسة ف 1933 مور المشاركة ديالو فالمظاهرات ضد الفرانسيس بسباب الظهير البريري, اللي دار باش يفرق فالمحاكم بين المغاربة العرب و الامازيغ, موراها غادي يأسس مع محمد لحسن الوزاني و أحمد بلافريج كتلة العمل الوطني, اللي هو اول تنظيم وطني غادي يجمع الدراري الوطنيين ديال فاس.

أسس حيزب ليستقلال لي كان عنصر مهم ف لحركة لوطنية ضد ليستعمار لفرانصاوي باش لبلاد ياخد ليستقلال ديالو. فنص ديال لخمسينات خرج من لحيزب باش يتبع توار لمسلحين ؤلموقاتيلين ف لمدن ضد لفرانسيس، ف لوقت لي كانت فيه لإديولوجيا د لحيزب كاتفضل حل سياسي وديبلوماسي.

فعام 1956، ملي لمغريب حدا ستيقلال ديالو، لفاسي رجع لحيزب ليستقلال ودافع على لموقف ديالو فجورنال لعلم باش لمغريب يرجع لأراضي لي كانت تابعة ليه من قبل.

فـ1959، ليساريين د لحيزب نشقو وأسو حيزب جديد سماوه تيحاد لوطني للقوات شعبية، ؤموراها لفاسي ولا رئيس دحيزب ليستقلال.

فـ1962، لفاسي تعين وزير شؤون لإسلامية لفترة قصيرة، ؤموراها بعام دخل للبرلامان كنائب من حيزب ليستقلال. تما ولا هو زعيم ديال لموعاراضا من لخر ديال ستينات حتال لبدية ديال سبعينات.

مات فعام 1974، فزيارة لرومانيا اللي كان خاصو يتلاقا برئيس نيكولاي تشاوشيسكو.




#Article 185: علي يعتا (104 words)


علي يعتا، تولد فـ25 غشت 1920 فطانجا ؤمات فـ12 غشت 1997 فدارلبيضا، كان سياسي مغريبي.

تولد علي يعتا فطانجا فعام 1920 فوسط عائيلة مغاربية حيت باه جازائيري ؤمو مغريبية، ؤتبع قرايتو ف ليسي ليوطي فدارلبيضا.

كان ف لول عضو نشيط ف لحيزب لوطني، ؤعاون فيوليوز 1943 باش يتحل لحيزب شيوعي لمغريبي، فـ1945 خدا رياسة دل حيزب لي عاش بزاف ديال نقيسامات: حيزب شيوعي لمغريبي (1943-1968)، حيزب تحرر ؤشتيراكية (1968-1974)، حيزب تقدم ؤشتيراكية (من 1974)؛ بقا فرياسة دل حيزب حتا مات.

تعتاقل بزاف د لمرات فعهد لحيماية ؤلحوكم ديال لحاسان تاني، علي يعتا بعّد من تيحاد شتيراكي ؤلحركات ليسارية لي تاهموه أنه تقرب من لملكية.




#Article 186: عمر بنجلون (104 words)


عمر بنجلون، تولد فـ1936 فوجدة ؤمات مقتول فـ18 دجنبر 1975 فدارلبيضا، كان سياسي مغريبي.

أصلو من وجدة، عمر بنجلون قرا تيصالات ؤلقانون.

شارك فتأسيس تيحاد لوطني للقوات شعبية ؤكان عضو نشيط ف ليسار لمغريبي بين 1959 ؤ1975. فهاد تاريخ، شارك فإنشاء تيحاد شتيراكي للقوات شعبية ؤكان مكلف بجورنال لحيزب لي هو المحرر.

كان نشيط حتا معا نقابات، خصوصا تيحاد لوطني لطلبة لمغريب ؤتيحاد لمغريبي لشعل، ؤتشد موراها بزاف د لمرات وتعتاقل.

تعرض فـ1973 لأول محاولة غتيال عن طريق رسالة ملغومة، ؤموراها فـ18 دجنبر 1975 تقتل مور ماطعنوه واحد لمجموعة تابعة للشبيبة لإسلامية.

خوه أحمد بقا فحيزب تيحاد شتيراكي حتال 1989 فين أسس حيزب طليعة.




#Article 187: عمر واهروش (140 words)


عمر واهروش (1926- 27 أكتوبر 1994) كان واحد المغني وشاعر مغربي من سوس تيغني بالشلحة وكيخدًم الآلة ديال الرباب ولوطار.

تولد عمر واهروش عام 1926 أولا 1933 بدوار تيحونان فمزوضة جوايه مراكش فالمغرب.

تأثر بباه ملي كان صغير حيت كان رايس وعلمو الرباب والشعر والغنا.

بدا عام 1952 ملي غنا قصيدة الضابط على المقاومة ديال للاستعمار ديال فرنسا، وداوه عليها للحبس دوز فيه ثلث شهور فإمنتانوت، واستنكر فيها التي فرضها المستعمر أنذاك، بحضور الحكام العسكريين وقائد المنطقة في حفل أقامه أحد الأعيان.

تعرف الرايس واهروش بالغنا ديالو على لاستعمار والوطنية والضرائب والفقر. شارك فمهرجانات فالمغرب أو الخارج، مشا لفرنسا ف 1963 و بلجيكا ف 1964 أو الحج ف 1968.

آخر مرة سجل فيها عمر واهروش كانت ف 1987 قبل ما يمرض ودخل سبيطار الأمراض العقلية ف 1991.

مات الحاج واهروش نهار 27 أكتوبر 1994 فمراكش وخلا بزاف ديال الأغاني الأمازيغية.




#Article 188: عمى الألوان (234 words)


عمى الألوان اللي معروف عاوتاني ب سمية نقص الشوف ديال الألوان هو انخفاض القدرة على الشوف ديال الألوان ولا على الاختلافات بين الألوان. المهمات البسيطة بحال العزيل ديال الديسير اللي طايب، ولا الحوايج، ولا حتى باش تقرا علامات المرور كيولي واحد النوع ديال التحدي. إقدر ل عمى الألوان عاوتاني يخللي بعض الأنشطة التعليمية أكتر صعوبة. واخا هاكا، المشاكل اللي ناتجة عليه هي نوعا ما بسيطة و المعضم ديال الناس كيشوفو بللي هم قادرين يتكيفو معاه. الناس اللي عندهم عمى الألوان الكلي (أكروماتوپسيا) إقدر يكون عندهم حتى نقص حدة الشوف ؤ يكونو ما مرتاحينش ف البلايص اللي فيهم الضو مجهد.

السباب ديال عمى الألوان اللي منتاشر بزاف هو مشكلة وراتية ف التطور ديال واحد ولا كتر من المجموعات التلاتة ديال الخلايا المخروطية اللي كتستشعر اللون ف العين. الدكور أكتر عرضة من الإنات باش إتصابو ب عمى الألوان، هادشي حيت الجينات المسؤولة على أكتر نوع ديال عمى الألوان شيوعا كاينين ف كروموزوم إكس. حيت الإنات كيكون عندهم جوج ديال كروموزومات إكس، فاش كيكون الخلل فواحد فيهم لاخر كيعوض عليه، بالتالي الإنات ممكن يكونو حاملين لهاد الاضطراب واخا ما يكونوش متصابين بيه. الدكور عندهم غير واحد كروموزوم إكس داكشي علاش فاش كيكون فيه شي خلل كيبان الاضطراب الوراتي. ممكن يكون السبب ديال عمى الألوان عاوتاني هو شي ضرر فيزيائي ولا كيميائي للعين، العصب البصري ولا أجزاء من الدماغ. التشخيص كيكون هو هاداك باستعمال اختبار إشيهارا اللوني؛ مع دلك، كاينين طرق أخرى ديال التشخيص بما فيها الفحص الجيني.




#Article 189: عيشة بلعربي (135 words)


عيشة بلعربي (خلاقت ف سلا ف 1946) سوسيولوگ و سياسية و ناشطة حوقوقية و ديپلوماسية مغريبية. سبقلها كانت وزيرة (كاتبة دولة ف لخارجية مكلفة ب تّعاون) ف حكومة ليوسفي د 1998 و من بعد دوزات 4 سنين سفيرة د لمغريب ف لتّيحاد لأوروپي.

عيشة بلعربي عندها دكتورا دولة من لجاميعة د سّوربون ف باريس و خدمات بين 1976 و 1998 أستادة باحيتة ف لافاك د عولوم تّربية ف رّباط. هي عضوة ف لتّيحاد لشتيراكي من 1965 و أوائل نّسا لّي وصلو ل لّجنة لإيدارية د شي حزب (ف 78) و ف 2001 كانت عضوة ف لمكتب سّياسي د لحيزب.

عيشة بلعربي من أهم نّسا لمغريبيات لّي ناضلو ف لمجال د لحقوق د لمرا و كانت من بين لّي دافعو على خطة إدماج لمرا ف تّنمية ف لبدو د لقرن 21 و على لإيصلاح د لمدونة.




#Article 190: غانا (142 words)


غانا, رسميا لجمهورية د غانا, هي واحد لبلاد فلغرب د إفريقيا. تيحدها من لجنوب خليج غينيا ولمحيط لأطلسي, من الشمال بوركينا فاصًو, طوڭو من الشرق, وكوط ديڤوار من لغرب. غانا ستاقلات من بريطانيا ف 1957, وكانت هي أول دولة فإفريقيا جنوب الصحرا اللي ستاقلات من لستيعمار لأوروپًي فالتاريخ لمعاصر. قبل ما تستاقل كانت سميتها ساحل الدًهب, حيث كان فيها الدًهب بزاف. السمية ديالها ديال دابا ماجة من لإمبراطورية د غانا, اللي كانت إمبراطورية تاريخية فلغرب دإفريقيا, واخا هي ماشي نيشان فلبلاصة اللي فيها لبلاد دابا.

تيسكنو فغانا تقريبا 31 مليون واحد من بزاف د لإثنيات ولقبايل. الديانات الجوج لكبار فلبلاد هوما لإسلام (فالشمال) ولمسيحية (فلجنوب), وعاد كاين تقريبا 5% اللي متبعين لأديان لمحلية ديالهم. اللغة الرسمية د غانا هي لينڭليزية, ولعملة ديالها سميتها السيدي. غانا دولة عضو فبزاف د لمنظمات بحال ليتيحاد ليفريقي و لمجموعة ليقتيصادية د غرب إفريقيا والدول د لكومونويلث.




#Article 191: غينيا (164 words)


لجمهورية د غينيا (بلفرانساوية: République de Guinée) هي بلاد جات ف غرب إفريقيا. شحال هادي كانت كاتسمّا غينيا لفرانساوية، و لكن دابا كاتسمّا غينيا كوناكري، باش تتفرّق مع غينيا بيصًاو و غينيا ستيوائية. غينيا تايحدّها لمحيط لأطلسي من لغرب، غينيا بيصًاو و السينيڭال و مالي من الشمال، كوط ديڤوار من الشرق، و سييرا ليون و ليبيريا من لجنوب.

لمنطقة اللي فيها غينيا كانت تابعة لبزاف د لإمبراطوريات إفريقية ف التاريخ، تال لعام 1890، اللي كان هو لعام اللي حتلاتها فيه فرانسا. بقا لإستعمار لفرانساوي للبلاد 68 عام، تال نهار 2 أكتوبر 1958، اللي هو التاريخ ديال لإستقلال ديال لجمهورية د غينيا.
 
تيسكنو ف غينيا 12.7 مليون د الناس و لعاصمة ديالها و أكبر مدينة فيها هي كوناكري. اللغة الرسمية د لبلاد هي لفرانساوية، و عاد كاين بزاف د اللغات لمحلية اللي ما عندها تا وضع قانوني و لا دستوري. لفلوس اللي كاتخدّم ف غينيا هي لفرانك ديال غينيا. النضام د لحكيم ف لبلاد هو جمهوري، و الدين ديال لأغلبية د الناس (85%) هو لإسلام.




#Article 192: غينيا بيصًاو (203 words)


لجمهورية د غينيا بيصًاو (بلبرتغالية: República da Guiné-Bissau) هي بلاد جات ف لغرب د إفريقيا وتاطّل على لمحيط لأطلسي. تاتحدًها السينيڭال من الشمال و غينيا من لجنوب و الشرق، و لمحيط لأطلسي من لغرب.

غينيا بيصًاو كانت تابعة للإمبراطورية التاريخية د مالي، و موراها للمملكة د كابو. شي بلايص بقاو تابعين لديك لمملكة تال لقرن 18، و لكن شي بلايص ستعمراتهم لبرتغال من لقرن 16. ف لقرن 19 ولاّت لمنطقة كاملة مستعمرة ديال لبرتغال، و تسمّات غينيا لبرتغالية. ملّي ستاقلات لبلاد ف 1974، زادت بيصّاو لسميتها باش ما تتخلّطش مع غينيا لفرانساوية، اللي سبقاتها وستاقلات ف 1958، و خدات السمية د غينيا.

تيسكنو ف غينيا بيصًاو تقريبا 1.8 مليون د الناس و لعاصمة ديالها و أكبر مدينة فيها هي بيصّاو. اللغة الرسمية د لبلاد هي لبرتغالية، ولكن تيهضروها غي 2% د الناس. الناس لاخرين تيهضرو بيناتهم اللغات لمحلية د لبلاد بحال لكريول اللي تيهضروه 54% د السكان. لفلوس اللي كاتخدّم ف غينيا هي لفرنك لغرب إفريقي، و لأديان اللي كبيرة ف لبلاد هي لمسيحية (62%) و لإسلام (38%).

غينيا بيصًاو داخلة مع بزاف د لمنضمات دولية بحال لأمم لمتحدة و ليتيحاد ليفريقيو لمجتمع لقتصادي د الدول د غرب إفريقيا، منضمة التعاون لإسلامي، لمجتمع د الدول د اللغة لبرتغالية، و لمنضمة لعالمية د لفرونكوفونية.




#Article 193: غينيا ستيوائية (178 words)


غينيا ستيوائية (ب الصبليونية: República de Guinea Ecuatorial) بلاد ف وسط إفريقيا و من أصغر لبلدان د لقارة. تاتحدّها لكاميرون من الشمال و لڭابون من الشرق و لجنوب، و لخليج د غينيا من لغرب. السمية د لبلاد جات من حيت تاطّل على لخليج د غينيا و جات على خط لإستواء.

أول بلاد أوروپية حتلات لبلاصة اللي فيها غينيا ستيوائية كانت هي لبرتغال، ف 1472. ف 1778 تّافقات لبرتغال و صبانيا باش الصبليون يستعمرو ديك لمنطقة، و بقاو قابطينها تال 1968، اللي هو لعام اللي ستاقلات فيه لجمهورية د غينيا ستيوائية. فالنص ديال التسعينات د لقرن ل 20، ولات لبلاد من أكبر لمنتجين د لپطرول ف إفريقيا جنوب الصحرا، وعندها مدخول كبير ماجي منو. ولكن ف نفس لوقت تاتعتابر لبلاد من أكفس لبلايص من ناحية لحتيرام د حقوق لإنسان على حساب بزاف د لمنظمات.

تيسكنو ف غينيا ستيوائية تقريبا 1.3 مليون د الناس و لعاصمة ديالها هي مالابو. هي لبلاد لوحيدة ف إفريقيا اللي اللغة الرسمية ديالها هي الصبليونية، و عاد فيها لفرانساوية و لبرتغالية تا هي رسمية. لفلوس اللي تاتخدّم ف غينيا ستيوائية هي لفرانك د وسط إفريقيا.




#Article 194: فاروق المراكشي (125 words)


فاروق المراكشي التاقي أستاد د لفيزيك وكاتب مغريبي معروف باللي هو أول مغربي كتب كتوبا علمية بالدارجة.

تولد فاروق التاقي ف مراكش وكبر فيها تا خدا لباك ديالو فلعلوم التجريبية. ف 1998 مشا يكمًل قرايتو ففرانسا وخدا ماسطر من المعهد لوطني د لإحصاء ولإقتصاد التطبيقي ف تولوز (INSA Toulouse). بقا ساكن فنفس لمدينة وولاً أستاد د لفيزيك فواحد الثانوية تمًا.

جاتو لفكرة باش يكتب كتوبا علمية بالدارجة ف 2009, حيث من قبل كان ماتيقدرش يشرح بالدارجة للدراري الصغار اللي تيسوًلوه, وكان تيعرف يشرح غي بلفرانساوية. ملًي بغا يتعلم كيفاش يبدا يشرح بالدارجة, كتاشف لعالم د اللسانيات ولكلمات لقدام فالدارجة, ومن تما جاتو لفكرة باش يبدا يكتب كتوب بالدارجة وحتا يختارع كلمات ديالو.

تال دابا كتب فاروق لمراكشي ربعا د لكتوبا على مواضيع علمية, اللي هي:




#Article 195: فاس (355 words)


فاس (بلأمازيغية: ⴼⴰⵙ،بالفرانسوية:fez ولا fes ) مدينة فالوسط الشمالي ديال المغرب و بالضبط فسهل سايس على ملتقى  واد سبو مع واد فاس، و هي العاصمة ديال جهة فاس-مكناس، و تاني اكبر مدينة مورا كازا، حيت فيها 1.22 مليون واحد.

فاس تبنات فعهد لأدارسة عام 789. و كانت فاللول مقسومة على جوج مدن مستاقلّات وحدة على لاخرى، و اصل سكانها كانو من عرب تونس (عدوة القرويين) و من الاندلس (عدوة الاندلسيين). و بقات فاس مقسومة تال القرن حضاش فعهد السلطان المرابطي، يوسف بن تاشفين، عاد توحدو العدوات فمدينة فاس البالي، مدينة فاس تبنات فعهد الادارسة مابين القرن التامن و التاسع. و كانت فاللول مقسومة على جوج مدن مستاقلّات وحدة على لاخرى، و سكانها اللولين كانو من عرب تونس (عدوة القرويين) و من الاندلس (عدوة الاندلسيين). و بقات فاس مقسومة تال القرن حضاش فعهد السلطان المرابطي، يوسف بن تاشفين، عاد توحدو العدوات فمدينة فاس البالي. تحت حكم المرابطين فاس ولّات معروفة بالعلم و الفقه و الدين و التجارة.

فاس وصلات للدروة ديالها فعهد المرينيين (القرن 13 و15)، فاش ولات عاصمة عاودتاني. بزّاف ديال المدارس و الجوامع جداد تبنات، و كتيرتهوم باقيين لدابا، و شلّا بني ترمم. و هاد البنايات كاتعتابرو دابا من احسن ما نتجو المور (المغاربة) فالمعمار.

فعام 1276، السلطان ابو يوسف يعقوب بنا حي فاس الجديد،  فين القصر الملكي باقي لليوم، و اللي تزاد عليه شلا جرادي، و فهاد العهد فاش تزاد عدد اليهود و بناو الملّاح ف الجنوب ديال فاس الجديد، ولكن مورا سقوط المرينيين، المدينة نقصات قيمتها و ولات كاتنافس مع مراكش على السلطة

فاس كانت لعاصمة د لمغريب بزاف د لمرات ولبزاف د الدول. أخر مرة كانت عاصيمة كانت ف 1912، من موراها ردً ليستعمار لفرانساوي الرباط هي لعاصيمة.فاس فيها بزاف د لمأتر التاريخية لمعروفة بحال جامع لقرويين ولمدراسة لبوعنانية، وهادشي اللي خلاها موقع د ترات لعالامي د ليونيسكو.

سمية فاس جات من كلمة فاس، و هو واحد الاداة ديال الحفير و الفلاحة، و تسمات هكّا علاحقاش الخرّيفة كاتڭول بللي مولاي ادريس التاني استعمل فاس من الدهب و النقرة باش يرسم حدود المدينة

بحكم كونها فدير الاطلس فاس جوه كايتعتابر سخون الصيف متوسطي ( على حساب تقسيم كوبن)

لمدينة لقديمة د فاس مسجلة ف الليستا د التراث العالمي د ليونيسكو من 1981.كازا.




#Article 196: فاطمة الفهرية (200 words)


فاطمة لفيهرية (خلاقت ف لقيراوان ف 800 و ماتت ف فاس ف 880) و سميتها لكاملة فاطمة بنت محمد الفهري و كانت معروفة ب كنية أم البنين شخصية تاريخية مهمة د مدينة فاس و هي لّي بنات لجاميعة د لقرويين لّي هي أقدم جاميعة ف لعالم.

فاطمة لفيهرية أصلها من قبيلة بنو فهر لّي هي من قريش ف لجزيرة لعربية. هي نفس لقبيلة لّي جا منها عقبة بن نافع لّي كان جينيرال د دّولة لأموية و كان عندو دور كبير ف تّوسيع د دّولة لأموية ف شمال إفريقيا. عقبة كان هو لّي بنا لقيراوان (ف تونس ديال دابا) و جاو معاه بزاف د نّاس د لقبيلة ديالو. من حفاد هاد لجيل د لفيهريين طان محمد لفيهيري، بّاين فاطمة، لّي كان تاجر كبير و ملعّق و تآنسطالا ف فاس ف عام 825. هاد محمد لفيهيري فاش مات ورتو فلوسو جوج بنات لّي كانو عندو، مريم و فاطمة.

فاطمة كانت ديانية و عزيز عليها دّير لخير و عزمات أنها توهب فلوسها كاملين ل لخير ، و هاكدا بنات جّامع د لقرويين ف فاس لّي بدا لبني ديالو ف عام 859 و كانت كاتصوم ليّام كاملة ديال لمدة د لبني. ختها مريم كانت بحالها و هي لّي بنات جّامع د لأندلسيين ف فاس.




#Article 197: فاطمة تحيحيت (130 words)


فاطمة بانو أولا تحيحيت (زيادة فتمنار ف 1969) مغنية وممثلة مغربية تتغني بتاشيلحيت.

تزادت فاطمة بانو عام 1969 فتمنار فمنطقة حاحا فالنواحي ديال الصويرة وهادشي علاش تلقبات بتحيحيت لي تتعني بتاشيلحيت المرا اللي من حاحا.

كبرات وسط عائلة ديال 7 ديال الدراري وبززو عليها تزوج واخا كان عمرها غير 8 سنين بواحد الراجل كان فعمرو 60 عام. طلقات ومن بعد تزوجات بواحد من ولاد عمها ولكن طلقات عاود ملي كان فعمرها 15 عام وعندها دريا.

دارت سنة 1986 مجموعة ديالها وخدمات مع فنانين كبار بحال الحاج عمر واهروش و آيت بونصير.

شاركات فاطمة تحيحيت فبزاف ديال المهرجانات فالمغرب بحال تيميار فأكادير وفبرا ديال المغرب بحال فرنسا وأندونيسيا والولايات المتحدة الأمريكية والسعودية.

شاركات فالتمثيل حتا هوا وبانت فبزاف ديال الأفلام والمُسلسلات المغربية بحال فيلم المحبة الزايدة (2014) مسلسل أمان إروفان (2016).




#Article 198: فاطنة بنت الحسين (248 words)


فاطنة بنت الحسين (زيادة فسيدي بنور ف 1935، توفات ف 6 أبريل 2005) مغنية عيطة مغربية. هي من أهم فناني العيطة في القرن العشرين فالمغرب، وكانت متخصصة فالعيوط العبدية والمرساوي والعيوط الحوزية والحصباوية. فاطنة ارتبطات بزاف بمجموعة ولاد بنعكيدة لدرجة أن السمية الفنية ديالهوم كانت لمدة طويلة فاطنة بنت الحسين وولاد بنعكيدة.

بدات فاطنة لغنا فاش كانت صغيرة، وكانت كاتغني فالمواسم العراس فمنطقة دكالة. العائلة ديالها ماكانوش راضيين على أن بنتهوم تغني، عليها مشات هاجرات لليوسفية باش تخدم وتغني مع فرقة الشيخ المحجوب ومراتو الشيخة خدوج العبدية.

من بعد تلاقات مع فرقة ولاد بنعكيدة، فوسط السبعينات، اللي دارت معاهوم مسار طويل وارتابط الإسم ديالهوم بجوج فأغاني نجحات نجاح كبير فالمغرب.

في غشت 2005، أي ربع شهور من بعد ما ماتت، تم التكريم ديالها من طرف وزارة الثقافة وجهة عبدة دكالة خلال المهرجان الوطني لفن العيطة فآسفي.

قال عليها المفكر والكاتب المغربي حسن نجمي: رغم أن بنت الحسين اشتغلت مع شيوخ وشيخات عديدين، فإنها بعد مجموعتها الغنائية الأولى التي سجلت معها عددا من الأسطوانات، عثرت في مجموعة أولاد بن اعكيدة على أسرتها الفنية الحقيقية الثانية وسجلت معهم أكثر من مائتي أغنية، سواء من قصائد وبراول العيطة أو من الأغاني الشعبية. ولم تبتعد عن المجموعة إلا بعد أن تقدمت في السن وتعب الجسد والصوت، ثم قررت الاعتزال بعد عودتها من الديار المقدسة قبل ثلاث سنوات، كما أكدت لي ذلك في لقاء جمعنا معا ببيت الفنان حجيب فرحان بالرباط.

فاطنة بنت الحسين خلات أكثر من 100 أغنية منها أغاني ديالها أو إعادة غناء أغاني تراثية مشهورة وقديمة ديال العيطة، من أهمها:




#Article 199: فرانثيسكو ڭويا (580 words)


فرانثيسكو خوسي دي ڭويا إي لوثيينتيس (بالإسپانية: Francisco José de Goya y Lucientes؛  30 مارس 1746 – 16 أبريل 1828) رسام رومانسي إسپاني وصانع طباعة. كيتعتابر من أهم الفنانين الإسبان في أواخر القرن 18 وبدايات القرن 19، وعلی طول مسارو الطويل كان مؤرخ ومعلق تاريخي للعصر ديالو. والنجاح ديالو في حياتو، جعل الناس إشيرو لڭويا علی أنه آخر معلم قديم وفي نفس الوقت أول الحداثيين. زيد علی هادشي أنه واحد من أعظم رسامي الپورتريهات في الوقت ديالو.

تولد ڭويا في عائلة من الطبقة المتوسطة الدنيا في 1746، في قرية فوينديتودوس في أراڭون. قرا الرسم ملي كان عندو 14 عام علی يد خوسي لوزان إي مارتينيز، من بعد انتاقل لمدريد اللي غادي يقرا فيها علی يد أنطون رفائيل مينڭز. تزوج جوزيفا بايو في 1773؛ تميزات حياتهم بسلسة (نڭولو ثابتة) ديال حالات الحمل والإجهاض، وغير مولود واحد، دري، هو اللي نجا حتی سن البلوغ. ڭويا ولی رسام القصر لصالح التاج الإسپاني في 1786، وهاد الجزء اللول من مسارو تميز بعدة پورتريهات لشخصيات من الطبقة الأرستقراطية والعائلة الملكية، وبرسومات الروكوكو المصممة للقصر الملكي.

علی الرغم من الحفاظ علی كتاباتو ورسائلو فالقليل اللي تّعرف علی أفكارو والخواطر ديالو. ڭويا عانی من مرض شديد وما مشخصش فعام 1793، الشي لي خلاه إفقد القدرة ديالو علی السمع. المرض وفقدان الأمل جعل الأعمال ديالو من بعد سنة 1793 أكثر قتامة وتشاؤما شوية بشوية. رسوماتو الأخيرة ومطبوعاتو عكسات نظرة قاتمة علی المستوی الشخصي، الاجتماعي، والسياسي واللي كانت دائما علی النقيض من حالة نجاحو وصعودو في سلم المجتمع. في 1795 تم تعيينو رئيس الأكاديمية الملكية، فالعام نيت فاش وقع مانويل ڭودوي علی معاهدة غير منصفة مع فرنسا. وفي 1799 ولی ڭويا هو Primer Pintor de Cámara؛ أعلی لقب بالنسبة لرسام في البلاط الملكي. وفي أواخر 1790، وبتكليف من ڭودوي، كمل فرانثيسكو La maja desunda (الماخا العارية)؛ لوحة جريئة بالنسبة لداك الوقت، وتم الاستلهام ديالها بشكل ملحوظ من أعمال دييڭو ڤيلاثكيث. ورسم في عام 1801 كارلوس الرابع ملك إسپانيا هو وعائلتو، وحتی هي تأثرات بأعمال ڤيلاثكيث.

في 1807 قاد نابليون الجيش الفرنسي في حرب شبه الجزيرة ضد إسپانيا. بقا ڭويا في مدريد خلال الحرب اللي كايبان بأنها اثرات فيه بعمق. علی الرغم من أنه ما فصحش علی أفكارو في العامة، إلا أنه يمكن الاستنتاج ديالها من سلسلة مطبوعات كوارث الحرب (تنشرات 35 عام من بعد الوفاة ديالو) ولوحاتو في عام 1814: الثاني من ماي 1808 والثالث من ماي 1808. أعمال أخری من فترة منتصف العمر شملات سلسلة التنميشات Los Caprichos وLos Dispartas، ومجموعة واسعة من اللوحات المتعلقة بالجنون، المصحات العقلية، الساحرات، المخلوقات الخيالية، والفساد الديني والسياسي، وهادشي كلو كيشير بأنه كان خايف علی مصير بلادو وصحتو العقلية والجسدية في نفس الوقت.

تتوجات فترة حياتو الأخيرة باللوحات السوداء في 1819-1823، المرسومة بالألوان الزيتية في جدران الڭبص في المنزل ديالو Quinta del Sordo (ڤيلا الأصم)، فين عاش تقريبا في عزلة من بعد ما خاب الأمل ديالو من التطورات السياسية والاجتماعية في إسپانيا. في نهاية المطاف، ڭويا خوا إسپانيا فعام 1824، باش إتقاعد في مدينة بوردو الفرنسية، برفقة خادمتو ورفيقتو ليوكاديا وايس اللي صغيرا منو بزاف، واللي كانو كيڭولو بأنها الحب ديالو. تماك كمل سلسلة La Tauromaquia وعدد من اللوحات القماشية الأخری. علی إثر إصابتو بسكتة دماغية، ڭويا ولی مشلول من جنبو الليمن، وكان كيعاني من ضعف البصر والقدرة الضعيفة علی الوصول لأدوات الرسم. في 16 أبريل 1828 توفی ڭويا عن عمر يناهز 82 عام وتم الدفن ديالو. من بعد تمت إعادة دفن الجثمان ديالو في كنيسة سان أنطونيو دي لا فلوريدا الملكية في إسپانيا. وأثناء عملية نقل الجثمان تبين بأن جمجمة ڭويا كانت مفقودة، وعلی الفور أبلغ القنصل الإسپاني رؤساؤو في مدريد بالواقعة، اللي ردو عليه: صيفط ڭويا بالراس ولا بلا راس.




#Article 200: فريدا كاهلو (437 words)


ماڭدالينا كارمين فريدا كاهلو إي ثالديرون (بالإسپانية: Magdalena Carmen Frida Kahlo y Calderón؛  6 يوليوز 1907 – 13 يوليوز 1954) رسامة مكسيكية تعرفات بالپورتريهات، الپورتريهات الذاتية، والأعمال المستمدة من الطبيعة والآثار المكسيكية. التأثر ديالها بالثقافة الشعبية ديال بلادها خلاها تستخدم أسلوب الفن الفطري والشعبي باش تستكشف الأجوبة ديال أسئلة متعلقة بالهوية، ما بعد الاستعمارية، الجنس، الطبقات، والأعراق في المجتمع المكسيكي. رسوماتها غالبا كتحمل عناصر قوية ديال الأوتوبيوغرافيا والواقعية المختالطة بالخيال. بالإضافة لانتمائها لحركة مكسيكايوتل، اللي كتسعی باش تعرّف هوية مكسيكية، تم وصف كاهلو بأنها سريالية ولا واقعية سحرية.

كاهلو تولدات من أب ألماني وأم مستيزو، ودوزات معظم فترة الطفولة والبلوغ في La Casa Azul (البيت الأزرق) الدار ديال عائلها في كويوأكان، واللي دابا مفتوحة في وجه العموم باسم متحف فريدا كاهلو. علی الرغم من العجز ديالها وهي طفلة صغيرة بسبب إصابتها بشلل الأطفال إلا أنها كانت تلميذة نجيبة كتحلم باش تدخل شي مدرسة ديال الطب حتال النهار اللي طرات ليها كسيدا في سن 18 الشي اللي سبب ليها ألم ومشاكل صحية طول عمرها. أثناء التعافي ديالها رجعات للموهبة ديالها في الطفولة؛ الرسم، وهي دايرا في راسها باش تكون فنانة.

الاهتمام ديال كاهلو بالسياسة والفن قادها باش تنضم للحزب الشيوعي المكسيكي في 1927، فين تلاقات مع زميلها الفنان المكسيكي دييڭو ريڤيرا اللي غادي يتزوج بيها في 1928. قضی الزوجان أواخر العشرينات وبدايات الثلاثينات في السفر بجوج في المكسيك والولايات المتحدة. وفخلال هاد الفترة، طورات كاهلو أسلوبها الفني، اللي تميز بالتأثر بالثقافة الشعبية المكسيكية، ورسمات فالغالب پورتريهات ذاتية صغيرة مزجات فيها عناصر من المعتقدات قبل الكولومبية والكاثوليكية. لوحاتها أثارت اهتمام الفنان السريالي أندري بريتون، واللي نظم لكاهلو أول معرض منفرد ليها في جوليان ليڤي ڭالري في نيويورك سنة 1938.

كان المعرض ناجح وتبعو واحد آخر في باريس سنة 1939. المعرض ديال فرنسا كان أقل نجاحا، وواخا هاكاك شرا اللوڤر واحد اللوحة من عند كاهلو، الإطار، وبهادشي ولات هي أول فنان مكسيكي كتدخل أعمالو فتشكيلة اللوڤر. شاركات كاهلو فالأربعينيات فمعارض أخری في المكسيك والولايات المتحدة، وخدمات فالتعليم ديال الفن. قرّات في المدرسة الوطنية للرسم، النحت، وصناعة الطباعة لا إزميرالدا وكانت عضو مؤسس لندوة الثقافة المكسيكية. الصحة الضعيفة ديال كاهلو بدات كتضعف كثر في نفس العقد؛ دارت أول معرض ديالها منفرد في المكسيك عام 1953، قبل وقت قصير من الوفاة ديالها عام 1954 فعمر 47 سنة.

أعمال كاهلو كفنانة بقات بشكل نسبي ما معروفاش حتال أواخر السبعينات، ملي تم إعادة الاكتشاف ديالها من قبل مؤرخي الفن والناشطين السياسيين. فأواخر التسعينات، كاهلو ما ولاتش غير شخصية معترف بها فتاريخ الفن وصافي، ولكن ولات كتعتابر أيقونة لحركات الشيكانو، النسوية، ولمجتمع الميم. كيتحتافل بالعمل ديال كاهلو علی المستوی الدولي علی أنه رمز للتقاليد الوطنية وتقاليد السكان الأصليين في المكسيك، وحتی من قبل النسويين اللي كيشوفو فيه بأنه مثال ما فيهش المساومة للتجربة والشكل الأنثوي.




#Article 201: فوريسط ڭامپ (193 words)


فوريسط ڭامپ (بلونكلي: Forrest Gump) هو واحد لفيلم ميريكاني ددراما ،الرومنسية ؤ لكوميديا  تنتج فعام 1994 لقيصة دلفيلم تخذات من واحد الروايةٍ لي عندا نفس السمية ؤلي لكاتب ديالها  ونستون جروم فعام 1986. لفيلم دار الإخراج ديالو روبرت زيميكس ولعب  لبطولة ديالو  توم هانكس، ؤروبين رايت، ؤغاري سينيز ؤسالي فيلد.

فوريسط ڭامپ هو واحد راجل درويش مدمدم مكلخ بزاف ولكن نية واحدة مسكين.فورست دوز الطفولة ديالو مع صاحبتو الوحيدة جيني ؤلي كانت كتشوفو ؤكتعتابرو كصديق بحالها بحالو  ماشي شي واحد عندو إعاقة فعقلو ؤكتحكرو كما كيحكروه كاع الدراري دلحومة ديالهوم  . فصغرو  لوليدة ديالو علماتو شحال من حاجة على لحياة ؤلمعيشة ؤغتخليه هو يختار لحياة لي بغى إعشها. ملي كبر فورست ؤولى شاب غيدخل للعسكر ؤيمشي  للفيتنام ، ؤتم غيتلقى بصحاب جداد دان ؤبوبا،ؤغيربح بزاف دلميدليات ، ؤغيأسس شريكة كبيرة ديال الصيد ، ؤأنسبيري بزاف ناس غير بالجرى، ؤينشر الإبتسامة بين الناس، ؤيتصدق على الناس ؤيتلقى مع رايس دميريكان شحال من خطرا . كاع هادشي دارو ؤشحال من حاجة أخرى ، ولكن لحاجة الوحيدة لي برزطاطو فدماغو ؤلي عمرو ينساها هو صاحبتو جيني لي كانت عزيزة عليه بزاف ؤلي عمرو ينساهاؤلي مكتبغيهش كما كيبغيها هو ، ؤلي خرجات على حياتها بالسهير ؤالصحاب الخايبين.




#Article 202: فوطون (108 words)


لفوطون (بلونڭلي : Photon) هو واحد نوع من لجسيمات لأولية. ؤ لكوانتيم د لمجال إليكتري-مغناطيسي؛ ؤ حتا لإشعاع إليكتري-مغناطيسي بحال لمّاج د ضو ؤ راديو ؤ كيهز طاقة د لقوة إليكتري-مغناطيسية. لفوطونات معندهاش لوزن، ؤ ديما كتحرك بسرعة د ضو ف لخوا، 299792458 m/s.

ألبرت أينشتاين هو لي طور هاد لكونصيپت د لفوطون بشوية بشوية من لملاحظات ديالو لي مكانتش كتنطابق علا نمودج لكلاسيك ديال ضو، ؤ حاول إفسر نمدج د لفتون ب طاقة د ضو ؤ تعاويد ديالو، ؤ قال بلي ممكن لمادة ؤ شعى اقدر يكون بيناتهم مرافكة دلحرارة. ؤ ضحض كاع لأفكار لي قدموها ناس د لفيزيك بحال ماكس پلانك علا لحالات شاد د لفوتون.




#Article 203: فيدجي (178 words)


فيدجي (ب لفيدجية: Viti - ب لهندية د فيدجي: फ़िजी) هي بلاد ديال 330 جزيرة (منها 110 مسكونين) جات ف لجنوب د لمحيط لهادي، و بعيدة ب 2000 كيلوميطر من الشمال الشرقي د نيوزيلاندا. أقرب لبلايص ليها هوما ڤانواتو ف لغرب و كاليدونيا الجديدة (تابعة لفرانسا) ف لجنوب لغربي و نيوزيلاندا ف لجنوب الشرقي، و طونڭا ف الشرق، و واليس و فوتونا (تابعين لفرانسا) و صاموا ف الشمال الشرقي، و توڤالو ف الشمال.

أول علاقة ديال فيدجي مع لأوروپيين كانت ملّي دخلوها مستكشفين هولانديين ف لقرن 17، و موراها دخلو ليها بريطانيين، حتا ستعمراتها بريطانيا ف 1874، و بقات مستعمرة تال 1970. من مورا بزاف د لينقيلابات، ولاّت فيدجي جمهورية ف 1987، و تاتسمّا رسميا من ديك الساعة لجمهورية د لجزر د فيدجي.

تيسكنو ف فيدجي تقريبا 900 ألف واحد و لعاصمة ديالها هي سوڤا. لبلاد عندها تلاتة د اللغات الرسمية هي لفيدجية و لينڭليزية و لهندية د فيجي، و لفلوس اللي كاتخدّم هي الدولار د فيدجي. لقتيصاد ديال فيدجي تيتعتابر طالع مقارنة مع لجزر لاخرا د لمحيط لهادي، و تيرتاكز على السياحة و على الصدرات د السكّار.




#Article 204: ڤيروس كورونا (101 words)


فيروس كورونا ولا كوروناڤيروس (ب لونݣلي : Coronavirus) هو واحد لفاميلا د لڤيروسات لّي كاتمرّض ثّديّـات و طّيور. ف لحالة د بنادم هاد لڤيروسات يقدر ضّرر ديالهوم يبدا من لتهابات بسيطة و دايزة ديال لجهاز تّنفسي بحال رّواح و يمكن يوصل تال شي مواصل خايبة ف لحالة ديال شي فيروسات بحال سّارس SARS و ميرس MERS و كوڤيد-19. هاد لفيروسات لّخرين واخا كايكونو قلال غير هوما ف لعوام لّخرة كايتسببو ف جايحات كبار ف لعالم كامل، و ضّرر ديالهوم كبر من فيروسات رّواح لعادية حيت كايضربو تا لجهاز لهضمي و لمصارن و لقلب و لجهاز لعَصَبي و يمكن يوصّلو ل لموت.




#Article 205: فيسبوك (170 words)


فيسبوك (بلينڭليزية: Facebook) هو واحد لموقع د أنترنت اللي كيتشاف كأكبر موقع د التواصل لإجتماعي فلعالم, وفنفس لوقت هو السمية د الشركة اللي كاتحكمو, و اللي كاين لمقر ديالها فلميريكان. فيسبوك سيط فابور ويقدر أي واحد فوق 13 لعام يتقيد فيه ويدير فيه حساب. اللي عندو فيسبوك يقدر يتواصل مع الناس لاخرين ويقرا وينشر لخبار ولمعلومات والتصاور ولڤيديويات, ويقدر يصيفط ميساجات وأوديويات وبزاف د لحوايج وحداخرا.

تأسس فيسبوك ف 4 فبراير 2004 من خمسة د الطلبة د لجامعة د هارڤارد (مارك زوكربيرڭ - داستين موسكوفيتز - كريس هيوز - آندرو ماك كولوم - إدواردو ساڤرين) اللي خدًموه فلجامعة ديالهم باش يكون موقع د التواصل مابين الطلبة د لجامعة, قبل ما يتشهر ويكبر بشويا بشويا ويولي عمومي فلعالم كلًو. التطبيق د فيسبوك هو أكثر تطبيق تيطيليشارجا فالتيليفونات (مابين ڭاع التطبيقات), و عدد الناس اللي تيخدًمو فيسبوك وصل فدجنبر 2019 ل 2.5 مليار د الناس.

ف 2010, خرج فيلم سميتو الشبكة لإجتماعية (بلينڭليزية: The Social Network) اللي عاود على لقصة ديال تأسيس فيسبوك من اللًول ولمشاكيل والدعاوي لقضائية اللي وقعات فديك لوقيتة.




#Article 206: فيليكس مورا (239 words)


فيليكس موغا هو واحد الظابط فرانساوي اللي خدم فبزاف ديال المناطق فالأطلس الكبير أو سوس أوحتى الأطلس الصغير فلمغريب فلوقيتة لي كان فيها لمغريب مستعمر. من بعد ما تقاعد أو خدا المغرب الإستقلال ديالو ،اتًختار موغا باش إتوسًط للوزينات أو المناجم ديال فرنسا أو إجيب ليهم لي بغا يخدم من الناس ديال هاد البلايص حيت كانت عندو تجرية كبيرة فيها.

موغا مشهور بزاف عند المغاربة خصوصا الأمازيغ أو الشلوح حيت هو اللي كان كيدي ناس للخاريج باش إخدمو. الطريقة لي تيدير هي أنه كيمشي مع مراتو أو الناس لي كيعاونوه أوكيقصدو شي قرية من القرى ديال المغرب من بعد ما كيعلم الشيخ ديال القبيلة أو السلطة. الشيخ كيعلم ناس القبيلة أو كيتفقو على شي نهار. ملًي كيجي موغا كيلقى الناس شادين الصف أو معريين على الصدر ديالهم. كيبدا موغا يقلبهم واحد واحد. لي طبع ليه على صدرو بالخضر راه كيدوز للمرحلة لي من بعدها, أو لي طبع ليه بالحمر كيرجع لدارو. الناس لي عندهوم الكاشي لخضر كيمشيو عند الطبيب باش إدوز ليهم أو إشوف واش نيت أقدرو إخدمو أولا لا. اللي نجح فيهم كياخذ الباسبور ديالو أو كيمشي ياخدم، يا إما فالمناجم أولا لوزينات ديال فرانسا على حساب فين كاين النقص .

تولد ف1891 م ففرنسا و تمًا كبر و قرا حتا تخرًج من المعهد الحربي. من بعد ألتاحق بالجيش لفرانساوي و بقا تيترقًا حتى ولى ظابط على بزاف ديال مناطق المغرب (الأطلس الكبير أو سوس والأطلس الصغير و حتى واد نون).

توفى فليكس موغا فعام 1982 فبلادو فرانسا.




#Article 207: قائمة بلعوشي (151 words)


قائمة بلعوشي (خلاقت ف وهران ف دزاير ف 1965) صحفية رياضية مغريبية. هي أول مرا ف لمغريب خدمات صحفية ف رّياضة و أول مرا علقات على ماتشات و منافسات رياضية و دارت تّغطية د أحدات مهمة ف تاريخ رّياضة لمغريبية و ب دّات ف لاطليتيزم و لألعاب لأولمپية.

قائمة خلاقت ف تارگا ف لولاية د وهران ف دّزاير ف عائيلة مغريبية. فاش كانت عندها عشر سنين، ف 1975، و ب سباب صّراع بين لمغريب و لجزائر على ود صّحرا، جراو على لعائلة ديالها (مع لآلاف ديال لمغاربة) من دّزاير، وتما دخلات ل لمغريب و كبرات ف وجدة.

عندها ليصونص و ديو إيس ف تّاريخ، و من بين لأساتيدة لّي قراوها كان احمد التوفيق، و قرات حتا لمسرح مع ممتلين بحال رشيد لوالي و عبد لكبير رّگاگنة و بنعيسى لجيراري.

دخلات ل تّلفزة ف 1985 و كانت أول صحفية رياضية مغريبية و غطات 3 ديال لألعاب أولمپية ف 1996، 2000 و 2004.




#Article 208: قارة (186 words)


لقارة هي وحدة من بزاف د لكتل لأرضية. بشكل عام لقارات مقسمين غير بالعــُرف ؤماشي متبعين ف تقسيم ديالهم على شي معايير صارمة. المهم، سبعة المناطق كيتشافو على أنهم قارات؛ إلى رتبناهم من الكبير حتال الصغير فالمساحة غنتلاقاو: آسيا، أفريقيا، أمريكا الشمالية، أمريكا الجنوبية، أنتاركتيكا، أوروپا، ؤأستراليا.

جيولوجيا، القارات كيتافقو بشكل كبير مع مساحات القشرة الأرضية اللي كاينين فوق الصفائح القارية. واخا هاكا، بعض المساحات من القشرة القارية هوما مناطق مغطيين بالما ؤما كيكونوش عادة فلاليست ديال القارات. زيلانديا هي وحدة من هاد القارات (شوف §قارات غارقة فالتحت). هاد النوع ديال الكتل الأرضية معروف بأنه كاين غير فكوكب الأرض.

الجزر كيتجمعو بشكل متكرر مع القارة اللي حداهم باش تّقسم كامل الأرض ديال العالم لمناطق جيوسياسية. تحت هاد المخطط، أغلب الدول ؤالمقاطعات القارية اللي كاينين فالمحيط الهادي كيتجمعو مع قارة أستراليا باش يشكلو منطقة جيوسياسية كتسمى أوقيانوسيا.

كاينين بزافت الطرق باش نميزو القارات:

المصطلح ديال أوقيانوسيا كيشير لمجموعة من الدول الجزرية ؤالمقاطعات فالمحيط الهادي، كاملهم مجموعين مع قارة أستراليا. جزر المحيط الهادي (بحال الجاپون، هاواي ولا جزيرة الفصح) كيكونو فرابطة مع قارات خرين ؤغالبا كيتجمعو معاهم ماشي مع أوقيانوسيا. هاد المصطلح كيتستعمل فبزافت النمادج القارية عوض أستراليا.




#Article 209: قلعة السراغنة (101 words)


قلعة السراغنة جماعة ترابية حضرية كاينة ف إقليم قلعة السراغنة، جهة مراكش آسفي، ساكنين فيها 93927 واحد، على حسب لإحصاء لعام 2014. كايعتامد اقتصاد المدينة بزّاف على الفلاحة، و بالخصوص على شجر الزيتون

على حساب بعض المراجع التاريخية، السلطان العلوي، مولاي اسماعين هو اللي رد القلعة مدينة صغيرة باش يقدر يردع القبايل السايبة دياول الجبل فالقرن 17، و وتايق اخرى كاتڭول بللي القلعة الاصلية(القصبة) كانت تبنات فعهد المرابطين، وكانو مسميينها ڭاينو ولّا لڭْرار، و كان دورها هو تحمي و تحضي الطريق بين فاس و مراكش، و بعض كنانش مكتوب فيها باللي السعديين هما اللي بناوها و سماوها قلعة لڭْرار.

الوداد السرغيني




#Article 210: كائن حي (232 words)


ف لبيولوجيا، لكائن الحي ولا لمتعضي (ج. المتعضيات) (من اليونانية: ὀργανισμός، أورڭانيسموس، يعني عضو) هو أي كيان فردي كيجسد خاصيات الحياة، ؤ هو مرادف ل شكل حياة.

لكائنات لحية كيتكلاساو على حسب علم التصنيف ل بزاف د لمجموعات بحال لحيوانات، نباتات ؤ لفطريات متعددة الخلايا؛ ولا لميكروبات وحيدة لخلية بحال الپروتيستا، البكتيريا و الأركيا. كامل أنواع الكائنات الحية قادرين على التكاتر، التنمية ؤ النمو، الاستقرار الداخلي (الصيانة)، و بعض درجات التجاوب مع المنبهات. البشر، الكالامار، الشومپيون ؤ النباتات الوعائية هم أنواع من الكائنات الحية متعددة الخلايا اللي كتطور من خلايا عادية خلال النمو أنسجة ؤ أعضاء متخصصة.

الكائن الحي ياإما يكون پروكاريوتا ياإما يكون يوكاريوتا، الپروكاريوتا كيتمتلو ف جوجت الدومينات – البكتيريا و الأركييا. الكائنات الحية اليوكاريوتية كتميز ب امتلاكها ل نواة خلوية مغلفة ب الغشا و كتحتاوي الخلايا ديالها على حيزات إضافية مغلفة كتسمى عُضَيّات (بحال الميتوكوندريونات عند الحيوانات ؤ النباتات ؤ الپلاستيدات عند النباتات ؤ الطحالب، كلهم كيتعتابرو جاو من البكتيريا داخلية التعايش). الفطريات، الحيوانات ؤ النباتات هم أمتلة على ممالك ديال الكائنات الحية عند اليوكاريوتا.

التقديرات على عدد الأنواع الحية الحالية ديال كوكب الأرض كتراوح مابين 2 مليون حتال 1 تريليون، من بينها 1.7 مليون توتقو. كتر من 99% ديال ڭاع الأنواع الحية – واصلين كتر من خمسة مليار نوع حي – اللي كانو عايشين شي نهار هم منقارضين دابا.

ف 2016، تم التعرف على مجموعة من 355 جين من آخر سلف مشترك عالمي (LUCA) ديال كامل الكائنات الحية.




#Article 211: كازاخستان (161 words)


لجمهورية د كازاخستان (بلكازاكية: Қазақстан Республикасы - بالروسية: Республика Казахстан) هي واحد لبلاد جات مابين أوروپا وآسيا, وبالضبط فآسيا لوسطى. هي أكبر دولة فلعالم اللي ماكاطًلش على لبحر, وتاسع أكبر دولة فلعالم من ناحية لمساحة. تاتحدًها من الشمال ومن الشرق روسيا, من لغرب الشينوا, ومن لجنوب كيرڭيستان و أوزباكيستان و تركمنستان.

كازاخستان عندها تاريخ قريب من التاريخ ديال دول آسيا لوسطانية اللي حداها, ودازو منها بزاف د لحضارات. من لحضارات اللي أثروا فلبلاد لمغول اللي حكمو فيها كثر من 300 عام, و الرًوس اللي دخًلوها للإمبراطورية الروسية فلقرن 19, وفليتيحاد السوڤياتي ف 1936. ف 1991, ملي طاح ليتيحاد السوڤياتي ستاقلات كازاخستان وولاًت هي لجمهورية د كازاخستان.

تيسكنو فكازاخستان تقريبا 18.5 مليون د الناس ولعاصمة ديالها سميتها نور سلطان (على سميت الرئيس نور سلطان نازارباييڤ). اللغات الرسمية فلبلاد هوما لكازاكية والروسية ولعلمة اللي كاتخدًم تما سميتها الطًينڭي (теңге). تيعيشو فكازاخستان 131 إثنية, أكبر لوحدين فيهم هوما: لكازاك, الروس, لأوزبيك, لأوكران, لألمانيين,التتار ولأويڭور. تقريبا 70% د السكان د لبلاد مسلمين و 26% مسيحيين.




#Article 212: كامبودج (165 words)


لمملكة د لكامبودج (باللغة د ل خمير: កម្ពុជា) هي واحد لبلاد ف لجنوب الشرقي د آسيا. تاتحدًها طايلاند من لغرب و الشمال لغربي، لاووص من الشمال، ڤييطنام من الشرق و لجنوب الشرقي، و من لجنوب لخليج د طايلاند. لجغرافية د لكامبودج تيأتًر فيها لواد د ميكونڭ (و لاً لواد لكبير) و الضاية د تونلي ساپ (الضاية د لما لحلو).

لبلاصة اللي فيها ل كامبودج دابا كانت فيها إمبراطورية ديال لخمير، اللي كانت إمبراطورية معروفة فلعصور لوسطى. عام 1863 ستعمرات فرانسا ديك لبلاصة، و دخلاتها فلأراضي ديالها اللي كانت مسمًياهوم لاندوشين. ف 1953 ستاقلات لمملكة د ل كامبودج من فرانسا.

تيسكنو ف لكومبودج تقريبا 16 لمليون واحد و لعاصمة هي پنوم پين. اللغة الرسمية هي ل خمير، ولفلوس اللي كاتخدًم هي الريال. الديانة الرسمية د لبلاد هي لبوذية و هي الدين ديال 97% د الناس. لكومبودج عضو ف بزاف د لمنضمات عالمية بحال لأمم لمتحدة، الرابطة د دول جنوب شرق آسيا، لقمة د شرق آسيا، منظمة التجارة لعالمية، حركة عدم لإنحياز، و لمنظمة لعالمية د لفرانكوفونية.




#Article 213: كاميرون (159 words)


لكاميرون ولاً لجمهورية د لكاميرون (بلفرانساوية: République du Cameroun) هي واحد لبلاد جات فوسط غرب إفريقيا. تاتحدًها نيجيريا من لغرب, التشاد من الشمال, جمهورية إقريقيا لوسطانية من الشرق, و غينيا ليستيوائية ولڭابون وجمهورية لكونڭو من لجنوب.

السمية د لكاميرون جات من لبرتغالية (لقيمرون), حيث لبرتغاليين كانوا أول أوروپيين وصلو تمًا, ولقاو لقيمرون موجود. ف 1884 ستعمرات ألمانيا لكاميرون, ولكن غادي تخليها مورا ماتخسر لحرب لعالمية اللًولا, وغادي يتقاسمو فرانسا وبريطانيا لكاميرون. غادي يستاقل الطرف اللي كان تابع لفرانسا ف 1960 و اللي تابع لبريطانيا ف 1961, وغادي يتوحًدو بجوج فالدولة د لكاميرون اللي كانعرفو دابا.

تيسكنو فلكاميرون شويا كتر من 25 مليون د الناس. لعاصمة ديالها هي ياووندي وأكبر مدينة ولعاصمة ليقتيصادية هي دوالا. لفلوس اللي تاتخدًم فيها هي لفرنك لوسط إفريقي, واللغات الرسمية جوج: لفرانساوية ولينڭليزية. ولكن لكاميرون هي من لبلدان اللي معروفة بالتنوع اللغوي ديالها حيث تيتهضرو فيها كتر من 250 لغة مابين ڭاع لقبايل اللي فيها. لكاميرون جمهورية والرئيس ديالها من 1982 لدابا هو پًول بيَا.




#Article 214: كانادا (166 words)


كانادا (بالفرنسية والإنكليزية : Canada) هي بلاد فالشمال ديال أمريكا الشمالية قابطا لعرض ديالها كامل من لمحيط لأطلسي فالشرق تال لمحيط لهادي فلغرب. تيحدًها من الشمال لمحيط لمجمًد الشمالي, ومن لجنوب ومن الشمال لغربي تاتحدًها لميريكيان. لمساحة ديال كانادا هي 9.9 مليون كم², وهي لبلاد اللي عندها تاني أكبر مساحة فلعالم من مورا روسيا.

كانادا كانت مسكونة من بزاف د الشعوب لأصلية من هادي لآلاف د لعوامات. فاللخر د لقرن 15 وصلوليها لفرانساويين ولبريطانيين اللي حتلُوها وتقاسموها بيناتهم. ستاقلات كندا ف 1867 وولاًت فيديرالية اللي عندها حكم ذاتي ولكن تابعة للملكة د بريطانيا. لملكة إيليزابيط هي لملكة تا ديال كانادا. قانونيا, تاتعتابر كانادا ديموقراطية برلمانية ومملكة دستورية, فيها لملك و رئيس لوزراء تيتقاسمو السلطات فالرئاسة د لحكومة.

تيسكنو فكانادا تقريبا 38 مليون د الناس, ولعاصمة ديالها هي أوطاوا. كانادا فيها جوج لغات رسمية هوما لفرانساوية ولينڭليزية. لفلوس ديال كانادا هوما الدًولار لكانادي, ورئيس لوزراء ديالها دابا هو جاستين طرودو. كانادا عضو فبزاف د لمنظمات عالمية بحال لأمم لمتحدة والناطو والنافطا ومجموعة الدول الصناعية السبعة (جي 7).




#Article 215: كرواتيا (106 words)


لجمهورية د كرواتيا (بلكرواتية: Republika Hrvatska) هي بلاد جات فلجنوب الشرقي د أوروپا, وبالضبط فلمنطة د لبلقان. تايحدًوها من الشمال سلوڤينيا وهنڭاريا, من الشرق صربيا, من لجنوب لبوصنة ولهرسك, ومونطينيڭرو, ومن لغرب لبحر آدرياتيك.

كرواتيا وحدا من لبلدان اللي كانو مكونين يوڭوسلاڤيا, اللي تفككات ف 1991 وخرجو منها بزاف د الدول مستقالة فلمنطقة د لبلقان.

كرواتيا هي جمهورية برلمانية لعاصمة ديالها هي زاڭريب. تيسكنو فلبلاد شويا كتر من 4 د لمليون د الناس, اللغة الرسمية فيها هي لكرواتية, ولعملة ديالها هي لكونا. كرواتيا داخلة فبزاف د لمنظمات منها لأمم لمتحدة وليتيحاد لأوروپي ولمجلس د أوروپا والناطو ومنظمة التجارة لعالمية وعضو مؤسس د ليتيحاد من أجل لمتوسط.




#Article 216: كريستوفر نولان (206 words)


كريستوفر جوناثان جيمس نولان (بلونكلي: Christopher Jonathan James Nolan) هو واحد لمخرج ؤمنتج ؤكاتب فالدومين ديال السينما عندو جنسية بريطانية ؤمريكانية ،خلاق ف 30 يوليوز 1970 فلندن.نولان كتب ؤدار الإخراج ديال شحال من فيلم لي كانو ناجحين بزاف ،الأفلام ديالو بعشرة لي دار دخلو بزاف دلفلوس فات 4.7 مليار د دولار مريكاني فالعالم كاملو. ترشح 26 مرة باش ياخد لجائزة د لأوسكار لكن مخدا حتى وحدة فيهوم لكن عوض هادشي خدا سبع د لجوائز عندها علاقة بالسينيما.

أول فيلم ليه كان هو تتبع ف 1998،من بعد هاد لفيلم دار واحد ٱخر لي سميتو سوفونيغ ف2000.هاد جوج دالأفلام جابو ليه كرتيك إيجابي ؤبدات الناس كتهضر عليه ؤ كتعرف شكون هو كريستوفر نولان ؤعلاش قاد .من بعد هاد التجربتين لي كانو ناجحين وخا كانت الميزانية ديالهوم صغيرة. طلع النيفو ؤ دار الإخراج ديال فيلم أرق ف2002 لي كانت لميزانية الو كبيرة بزاف .لكن الأفلام لي شهرات نولان بزاف ؤدارت بوم ملي يلاه خرجات هي : الأفلام بثلاثة ديال باتمان 2005، زراعة دالأفكار2010 ،بين النجوم ف 2014،دونكيرك 2017.

كريستوفر كتب بزاف ديال الأفلام مع خوه جوناثان نولان ؤأسس حتى شركة ديال لإنتاج سميتها سينكوبي ؤلي كتعاونو فالإدارة ديالها مرتو إيما توماس, من بين الأفلام اللي خلاو نجاحات كبار هو باتمان في 2006 اللي كانت البداية ديالوا في مجال الاحتراف.




#Article 217: كريستيانو رونالدو (149 words)


كريستيانو رونالدو دوس سانطوس أڤييرو (تولد ف فونشال فلبرتغال ف 5 فبراير 1985) واللي معروف بسميت كريستيانو رونالدو, ولا كريستيانو, هو لعًاب د لكورة برتغالي تيلعب دابا مع لفرقة د يوڤانتوس فالطاليان ومع لمنتخب لوطني د لكورة د لبرتغال. تيتعتابر كريستيانو رونالدو من أحسن اللعابة فهاد لوقت, وكاين تا الناس اللي تيقولو باللي هو أحسن لعًاب فلعالم.

كريستيانو عندو بزاف ديال لأرقام لقياسية فلعالم ديال كورة, منها بحال دابا:

تولد كريستيانو رونالدو نهار 5 فبراير 1985 ففونشال فلجزيرة د ماديرا, اللي تابعة للبرتغال. هو الصغير فخًوتو, اباه كان جاردينيي, و مًو طيابة. سمًاوه واليديه رونالدو حيث كان عزيز عليهم الرئيس لميريكياني رونالد ريڭان, و بلبرتغالية رونالد تاتًقال رونالدو. ف 1995, لعب مع الصغار د لفرقة د لجزيرة ديالو (ناسيونال ماديرا), و ملًي دار 12 لعام, مشا ف 1997 يلعب مع الصغار د سبورتينڭ لشبونة وبقا طالع فلمراحل تا لعب مع لفرقة د لكبار ديالهم فلبطولة د لبرتغال ف 2002.




#Article 218: كريستين دوغ (338 words)


كريستين دوغ، ولا كريستين دوغ-سرفاتي، تولدات فـ12 نونبر 1926 ف مونپوليي ؤ ماتت فـ28 ماي 2014 ف باريز، كانت كاتيبة ؤ مناضلة د حقوق لإنسان فرانصاوية.

تولدات فـ1926 ف مونپوليي، كريستين كبرات ف لوقيتة ديال لمقاومة لفرانصاوية ف لحرب لعالامية تانية. باها پيير دوغ كان فيزيائي ؤ عميد ديال لجاميعة د كون حتا جرا عليه ڤيشي حيت مابغاش يطبق قوانين ضد ليهود، موراها فـ1944 عينو دو ڭول پريفي ديال كالڤادوس. خالها فرونسوا كولي كان ديپلوماسي دخل ف لحركة ديال فرانصا حورا ؤ تعين فـ1944 كوميسير ديال لجومهورية ف نورموندي.

تزوجات كريستين ب پيير أڭيطون، لي كان قاضي ؤ تعين ف لمحكمة د لأمن لعسكري ف لجزاير، ؤ كان قريب من تيارات ليمنية، ف لوقت لي هي كانت كاتدافع على لموناضلين ديال ل ف.ل.ن. حاولات كريستين تدي ولادها بجوج كريسطوف ؤ ليز لجزاير والاكين باهم كان رافض لفكرة، وبسباب هادشي طلقاتو.

موراها عاودات تزوجات كريستين ب هنري جوڤان، ؤ رحلات معاه ؤ ولادها بجوج للمغريب. ولادات معاه بنت سميتها لوسيل.

فـ1963 ملي جات للمغريب، خدمات كريستين ؤستادة ديال تاريخ ؤ لجغرافيا ف طانجا، ؤ مشات موراها تقري لفرانصاوية ف ليسي محمد لخاميس ديال دارلبيضا. داك ليسي كانو فيه بزاف ديال لموناضلين ديال 23 مارس ؤ إلى لأمام.

فـ1972، خبات كريستين جوج ديال لموناضلين يساريين، عبدلطيف زروال ؤ أبراهام سرفاتي، لي كانو بجوج كي قلب عليهم لمخزن. والاكين موراها بعاماين عاودو تشدو بجوج، زروال غبروه ؤ ماعاودش بان ؤ سرفاتي تحكم عليه ب لمؤبد. ؤ بقات كريستين كاتدافع على سرفاتي باش مايطيحش ف نفس لمصير د زروال. فـ1986، تزوجات بيه ؤ هو مسجون باش تقدر تبقا تزورو ف لحبس ديال لقنيطرة، مورما تدخلات فهاد لقضية مرات رائيس لفرانصاوي ميطيرون.

فـ1989، عاونات جيل پيرو ف توجاد ديال لكتاب صاحبنا لماليك، ؤ عطاتو معلومات على لوضعية د حقوق لإنسان ف لمغريب ؤ شي تفاصيل على لحباسات لي كاينين، من بينهم تازمامارت لي مازال ماكان معروف. لكتاب واخا تمنع ف لمغريب، خلا سلطات تعفي على ڭاع لموعتقالين سياسيين، من بينهم أبراهام سرفاتي، ؤ تسد لحبس ديال تازمامارت فـ1991.

ماتت كريستين دوغ فـ28 ماي 2014 فسبيطار طينون ف باريز، ؤ كان عندها 87 عام.




#Article 219: كسكسو (113 words)


كسكسو، و كايتسما تا سكسو، طّعام، كوسكوس، لكسكسي، هو ماكلة ديال لمنطقة لمغاربية (لمغريب و دّزاير و تونس) كاتدار ب سميد ديال زّرع و لخضرة و لعطرية و زيت لعود و لّحم (ديال دّجاج و لا لبگري و لا لغنمي) و كاينة شي مناطق ف لمغريب كايديروه تا ب لحوت.

سمية كسكسو يمكن تعني هاد لماكلة و لا داك نّوع ديال سّميد لّي كاتصاوب بيه، و هو سميد كايكون محضر يا ف دّار يا كايكون مصنع.

كسكسو ماكلة قديمة ف لمنطقة لمغاربية بحيت تلقاو مواعن ديال تطياب ديالو (كسكاس) ف حفريات ديال لقرن 3 قبل لميلاد ف دّزاير. هو من أشهر لماكلات لمغريبية و جرات لعادة أنه يتكال ديما ف لغدا نهار جّمعة.




#Article 220: كسيدا طران د بوقنادل (113 words)


كسيدا طران د بوقنادل، هي كسيدا ديال واحد طران خرج من سكا ديالو حدا بوقنادل ف لمغريب ووقعات نهار 16 أكتوبر 2018.

جوايه لعشرا وتولوت بتوقيت لمغريب (GMT+1)، طران لجيهوي راقم 9 ديال لمكتب لوطني د سكك لحديدية اللي كان غادي بين دارالبيضا و لقنيطرة خرج على سكا ديالو ودخل فواحد القنطرة جيهت بوقنادل.

وصل عاداد ناس لي ماتو ف لكسيدة لـ7 د ناس و125 واحد مجروح، سبعا منهم حالتهم صعيبة من بينهم شيفور. لماليك محمد ساديس تكلف بدفين ديال ضحايا.

شي ساعات قليلة من بعد لكسيدا، لقصر دار بالاغ كيقول فيه أنه غادي يحلو تحقيق باش يعرفو ساباب. ف لخر تحقيق لقا ساباب هو سورعا، ونيابا لعاما تاهمات شيفور بأنه هو لمسؤول.




#Article 221: كلب (137 words)


الكلب (سمية لعلمية : Canis lupus familiaris) هو حيوان من الحيوانات الثدية (لي كيولدو او كيرضعو)، او كاياكل هاد الحيوان اللحم. كيسمي شحال من واحد الكلب أحسن صاحب ديال الإنسان حيت كيقدر يتفكر مولاه واخا تدوز مدة طويلة او هما مفارقين. كاينين بزاف دالنواع ديال الكلاب او كايعاونو بنادم على بزاف دالحوايج بحال الصيد او العسة او كاينين كلاب كايعاونو البوليس او كلاب ديال السباق او كلاب كايعاونو الناس العميين او كلاب كايجرو الكرويلات فالبلايص لي فيهم الثلج.

الكلب من الثديات اللوالا الي رباهم بنادم، و بان قبل شي 60 مليون عام و عاشت معاه قريبا شي 14 الف عام.

و راها بانت عضام ديال شي كلاب فالدنمارك، لالمان، شينوا و جابون كانت قبل التاريخ.

كاين بزاف الأنواع ديال الكلاب و هدي أكثر السلالات المَنْتَشْر:

الكلاب كايتوالدو بحال الحيوانات الثدية و ما عندهمش موسم تزاوج خاص بيهم.




#Article 222: كوبا (244 words)


لجمهورية د كوبا (بصبليونية: República de Cuba) هي واحد لبلاد جات فلبحر لكاريبي ف دخلة د خليج لميكسيك. كوبا هي أرخبيل ديال لجزر ضاير بيهم لبحر، منهم جوج د لجزر كبار اللي هوما جزيرة كوبا وجزيرة لا خوڤنتود.

لبلاصة اللي فيها كوبا دابا كان ساكن فيها واحد شعب سميتو تاينو من هادي 4000 عام قبل لميلاد حتى جاو صًبليون ف لقرن 15. صًبليون احتلو كوبا تال 1898 من موراها حتلاتها لميريكان تال 1902. من موراها أيدوزو بزاف د رؤساء على لبلاد، منهم فولخينسيو باتيسطا لي كان ديكتاتور و ثارو عليه ناس ف 1959. ديك تورة لي تزعمها فيديل كاسطرو خلات لبلاد تولي متبعا نيضام شتيراكي ماركسي لينيني، فيها حزب واحد (لحزب شتيراكي لكوبي)، وهي من لبلدان لقليلة ف لعالم لي باقي فيها هاد نيضام تال دابا.

تسيكنو فكوبا 11.2 مليون د ناس، ولعاصمة ديالها هي هاپانا. لوغة رسمية ف لبلاد هي صبليونية, ولعملة اللي تاتخدًم فيها هي لپيزو لكوبي. رئيس د كوبا من 2018 لدابا هو ميڭيل دياس كانيل.

لوغة رسمية د كوبا هي صبلونية، ؤ لأغلبية لكبيرة د لكوبيين كيهضرو بيها. صبلونية لي مستعملة ف كوبا معروفة بسميت صبلونية لكوبية، ؤهي واحد شكل من صبلونية د لكاريبي. لوسيمي، لي هي واحد لهجة ديال لوغة د يوروبا د غرب إفريقيا، كيستعملوها ناس لي تابعين دين ديال صانطيريا بحال لوغة مقدسة، والاكين غير بحال لوغة تانية. لكريول د هايتي هي تاني لوغة لي مستعملة بزاف ف كوبا، ؤ كيهضرو بيها لموهاجيرين لهايتيين ؤ ولادهوم. لوغات لخرين لي كي هضرو بيها لموهاجيرين كاين لڭاليسية ؤ لكورسيكية.




#Article 223: كورالين (فيلم) (127 words)


كورالين (Coraline)، فيلم ميريكاني ديال رّوسوم Animation لّي دار لإخراج ديالو هنري سيليك. لفيلم متلو فيه لأدوار رّئيسية داكوطا فانين و طيري هاتشر و جون هودغمان.

لفيلم موخود من رّواية د نيل گايمان كورالين د 2002، و كايعاود لقصة د واحد لبنيتة لّي كاتتحول هي و واليديها لواحد دّار جديدة. واليديها ديما مشغولين ب خدمتهوم و ب شّغال ديال رّحيل و لإيصلاح د دّار جّديدة و ما كايديوهاش فيها. كوارلين غادي تكتاشف واحد لباب مسحور ف دّار لّي كايدي ل واحد لعالم موازي لّ فيه دار كاتشبه ل دّار ديالها و واليدين أحسن من واليديها و كايتهلاو فيها و تا جّيران حسن من جّيران ديالها ف دّار لحقيقية، غير هي غادي تبدا تفهم بشوية بشوية أن هاد لعالم لميتالي فيه شي دغل، و تما غادي يبداو لمشاكيل




#Article 224: كوريا الشمالية (100 words)


كوريا الشمالية، أو بلإسم الرسمية لجمهورية الديموقراطية الشعبية د كوريا (بلكورية: 조선민주주의인민공화국) هي بلد ف شرق اسيا. هي الأن عندا لحكم ف نصف شمال ديال شبه لجزيرة لكوريا. بحق فحل كوريا لجنوبية، كت قول هي عندا لجوريسديكسيون ف شبه لجزيرة لكوريا كاملة.

لعاصمة ديال لكوريا لشمالية هي پيونڭ يانڭ. لقائد د كوريا لشمالية سميتو كيم جونج أون.

بين 1910 و 1945، كانت كوريا تحت لإحتلال لجاپونية. بحق بعد لحرب لعالمية لثانية، صبحت كوريا مقسمة بين لميريكان ف الجنوب و لإتحاد لسوڤيتي ف الشمال. و بعد، جات استقلال ديالوم. ف1950 بدات لحرب لكورية بين لجوج لبلاد كوريا. تسالات ف1953 ب لهدنة.




#Article 225: كوسطاريكا (105 words)


 لجمهورية د كوسطاريكا (ب الصبليونية: República de Costa Rica) هي بلاد ف أمريكا لوسطانية. تاتحدًها من الشمال نيكاراڭوا، من لجنوب پاناما، من لغرب لمحيط لهادي، و من الشرق لبحر د لكاريبي. السمية د كوسطا ريكا ب الصبليونية تاتعني الساحل لغني.

كوسطا ريكا هو أول دولة فلعالم اللي حيدات لجيش ديالها ف مرة، و هادشي ف لعام 1949، و هي لبلاد لوحيدة ف أمريكا اللاتينية اللي داخلة ف اللائحة د أقدم 22 ديموقراطية ف لعالم.

تيسكنو ف كوسطا ريكا تقريبا 5 د لمليون د الناس، و لعاصمة ديالها هي سان خوسي. اللغة الرسمية د لبلاد هي الصبليونية، و لفلوس اللي كاتخدًم هي لكولون ل كوسطا ريكي.




#Article 226: كوط ديڤوار (143 words)


كوط ديڤوار، ولأّ ساحل لعاج (ب لفرانساوية: Côte d'Ivoire) هي بلاد جات ف لغرب د إفريقيا. تاتحدّها من الشرق غانا، من لغرب غينيا و ليبيريا، من الشمال مالي و بوركينا فاصو، و من لجنوب لمحيط لأطلسي.

ولاّت لبلاصة اللي فيها لكوط ديڤوار دابا محمية دبال فرانسا ف 1843، و رجعات من بعد مستعمرة كاملة ف 1893. ستاقلات لبلاد ف 1960 و كان لقايد د ليستيقلال هو فيليكس هوفوي بوانيي، اللي بقا رئيس ديال لبلاد من لإستقلال تا مات ف 1993.

تيسكنو ف كوط ديڤوار تقريبا 24.2 مليون د الناس، لعاصمة ديالها هي ياموسوكرو، و أكبر مدينة ف لبلاد و لعاصمة لقتيصادية هي آبيدجون. اللغة الرسمية ديال لبلاد هي لفرانساوية. كاين بزاف د اللغات محلية ف كوط ديڤوار، تا توصل ل 78 لغة، و لكن تا وحدا فيها ما عندها شي إطار قانوني ولا دستوري. لفلوس اللي كاتخدّم ف لبلاد هي لفرنك لغرب إفريقي.




#Article 227: كولومبيا (162 words)


لجمهورية د كولومبيا (بالصبليونية: República de Colombia) هي واحد لبلاد جات فالشمال د أمريكا لجنوبية. تيحدًها من الشمال لبحر لكاريبي, من الشرق ڤينيزويلا ولبريزيل, من لجنوب پًيرو وليكواطًور, من لغرب لمحيط لهادي و پًاناما. كولومبيا هي لبلاد لوحيدة فأمريكا لجنوبية اللي مقابلة مع لمحيط لهادي ولبحر لكاريبي وجات شوكة بيناتهم.

دخلُو الصبليون للبلاصة اللي فيها كولومبيا ف 1499 وحتلُوها من ديك الساعة. ف 1819 ستاقلات كولومبيا, ولكن ف 1830 خرجو منها شي بلايص اللي ولاًو هوما الدول ديال فينيزويلا وليكواطًور. ف 1903 أتخرج منها پًاناما وأتولي لجمهورية د كولومبيا هي لبلاد اللي عندها لحدود اللي تانعرفو دابا.

تيسكنو فكولومبيا شويا كتر من 50 مليون د الناس, ولعاصمة ديالها هي بوڭوطا. اللغة الرسمية ديال لبلاد هي الصبليونية ولعملة هي لپيزو لكولومبي. نظام لحكم فلبلاد هو جمهوري دستوري ولبلاد فيها 32 إدارة لامركزية. الرئيس د لبلاد د دابا هو إيڤان دوكي.

كولومبيا داخلة فبزاف د لمؤسسات الدولية بحال لأمم لمتحدة ومنظمة التعاون لإقتصادي والتنمية (OECD) ومنظمة التجارة لعالمية, وعندها شراكة مع لحلف الشمال أطلسي.




#Article 228: كيريباتي (138 words)


كيريباتي، رسميا لجمهورية د كيريباتي (بلكيريباتية: Ribaberiki Kiribati - بلينڭليزية: Republic of Kiribati) هي بلاد أرخبيل جات ف لمحيط لهادي و تابعة للقارة ديال أوقيانوسيا.

كيريباتي فيها 32 جزيرة منشورة على 3.5 كيلوميطر مربع ديال لبحر. كيريبيتي هي لبلاد لوحيدة ف لعالم اللي جات فالطراف ب 4 د لعالم (الشمال، لجنوب، الشرق و لغرب)، حيت تيدوز منها خط لإستواء و تا لخط ديال لوقت (اللي تيقسم ما بين السوايع اللي قبل 	ڭرينيتش و اللي موراها).

تسيكنو ف كيريباتي شويا كتر من 116.000 واحد، و لعاصمة ديالها هي جنوب طاراوا. اللغات الرسمية ديال لبلاد هوما لكيريباتية و لينڭليزية، و لفلوس اللي كيتخدّمو هوما الدولار د كيريباتي. كانت لبلاد مستعمرة ديال بريطانيا، و ستاقلات منها ف 1979، من بعد دخلات مع لكومنويلت. ف 1999، دخلات كيريباتي ف لأمم لمتحدة، و هي داخلة تا مع لبنك الدولي و صندوق النقد الدولي.




#Article 229: كيرڭيستان (334 words)


كيرڭيستان (بلكيرڭيزية: Кыргызстан، بالروسية: Кыргызская Республика) هي بلاد جبلية ما كاطلش على لبحر جات ف لوسط د آسيا. تاتحدّها من الشمال كازاخستان، من لغرب و لجنوب لغربي أوزباكستان، من لجنوب الشرقي طادجيكيستان، و من الشرق الشينوا.

كيرڭيستان عندها تاريخ طويل، و جات ما بين بزاف د لحضارات. كانت ف الطريق ديال لحرير، و حكموها بزاف ديال الدول منها لأويڭور و لمغول. ف 1876، ستعمرات لإمبراطورية الروسية لبلاصة اللي فيها دابا كيرڭيستان. ملّي طاحت لإمبراطورية الروسية، تبعات لمنطقة للإتحاد السوڤياتي، و بقات فيه تا طاح ف 1991. نهار 31 غشت 1991، علنات كيرڭيستان على لإستقلال ديالها من موسكو، و ولاّت رسميا لجمهورية د كيرڭيستان.

تسيكنو ف كيرڭيستان تقريبا 6.2 مليون د الناس، و لعاصمة ديالها و أكبر مدينة فيها هي بيشكيك. اللغات الرسمية د لبلاد هوما لكيرڭيزية و الروسية، و لفلوس اللي كاتخدّم ف لبلاد هي السّوم. كيرڭيستان داخلة مع بزاف د لمنضمات دولية بحال لأمم لمتحدة و منضمة التعاون لإسلامي و منضمة التعاون د شانڭاي و لكومنويلث د لبلدان لمستاقلة و لمجلس التركي.

كيرڭيستان هي وحدة من جوج جمهوريات فوسط آسيا اللي كانت سوڤياتية، و اللي باقي اللغة الرسمية ذيالهم هي الروسية. الدولة الثانية هي كازاخيستان. اللغة لكيرڭيزية ولات رسمية ف 1991. من بعد ضغط ديال الأقلية الروسية فالبلاد، كيرڭيستان ردات الروسية لغة رسمية ف 1997، و هو لي خلاها تكون بلاد عندها جوج لغات رسمية.

لكيرڭيزية هي لغة تركية من الفرع ديال كيپتشاك، قريبة بزاف من لكازاخية، كاراكالپاك، ونوڭاي طاطار. كانت مكتوبة بالحرف العربي حتال القرن العشرين. الحرف اللاتيني دخل ف 1928، وتبدل للكتابة السيريليكية اللي فرضها سطالين ف 1941.

على حساب الإحصاء ديال 2009، 4.1 مليون واحد كيهضر لكيرڭيزية بحال لوغتو الأولى ولا الثانية، و 2.5 مليون كيهضروا الروسية بحال اللغة الأولى ولا الثانية. لؤزباكية هي ثاني لغة كاتهضر بحال لغة الأصلية، تابعاها الروسية. الروسية هي اللغة اللي مستعملة بزاف بحال لغة تانية، تابعاها لكيرڭيزية والأوزبكية.

الروسية مستعملة بزاف فالاقتصاد وفي السياسة. حتال مؤخرا، لكيرڭيزية كانت تستعمل غير بين الناس وقليل فاش كيخدموها فالاجتماعات ولا اللقاءات. و لكن، الاجتماعات في البرلمان دابا ولاو كيخدمو لكيرڭيزية، وكيديرو معاها ترجمة للناس اللي ماكيهضروش بيها.




#Article 230: كينيا (165 words)


لجمهورية د كينيا (بالسواحيلي: Jamhuri ya Kenya - بلينڭليزية: Republic of Kenya) هي بلاد جات ف الشرق د إفريقيا و تيدوز عليها لخط ديال لإستواء. تيحدّها من الشرق لمحيط لهندي، من لغرب أوڭاندا، من لجنوب طنزانيا، إتيوپيا و جنوب السودان من الشمال، و الصومال من الشمال الشرقي.

أول علاقة ديال لبلاصة اللي فيها كينيا مع لأوروپيين كانت ف لقرن 15، ملي وصلو ليها لبرتغاليين. و لكن أول وحدين ستعمرو بالصّح لبلاد كانو هوما لبريطانيين، و اللي ردّوها محمية ديال لإمبراطورية لبريطانية ف 1895. هاد لحماية ولاّت ستعمار كامل ف 1920. ف 1952، دارو لكينيين تورة تسمّات التورة د ماو ماو و تحاربو مع لبريطانيين تا خداو ستقلال ديالهم ف 1963.

تيسكنو ف كينيا تقريبا 48.5 مليون د الناس، و لعاصمة ديالها هي نايروبي. اللغات الرسمية ديال لبلاد هوما السواحيلي و لينڭليزية، و لفلوس اللّي كاتخدّم فيها هي الشيلينڭ لكيني. النضام د لحكيم ف كينيا هو جمهوري، و لبلاد داخلة مع بزاف د لمنضمات دولية بحال لأمم لمتحدة و ليتيحاد ليفريقي و لكومنويلت و لبنك الدولي.




#Article 231: لأردن (193 words)


لمملكة لأردنية لهاشمية، لمعروفة ب لأردن، هي بلاد جات ف لجنوب لغربي ديال آسيا، ف لمنطقة د الشام ف الشرق لأوسط، فالشمال د شبه لجزيرة لعربية. تاتحدّها سوريا من الشمال، فلسطين من لغرب، لعراق من الشرق و السعودية و لبحر لحمر من لجنوب. تسمّات لأردن على لواد د لأردن اللّي تيدوز ف لغرب ديالها.

لبلاصة اللي فيها لأردن كانت تابعة لبزاف د لبلدان فالتاريخ، منها لإمبراطورية الرومانية و الدولة لأموية و الدولة لعبّاسية و الدولة لعتمانية. مورا التورة ديال لعرب ف 1916 على الدولة لعتمانية، تقسمات لممتلكات د لعتمانيين ما بين فرانسا و بريطانيا. تأسسات لإمارة ديال شرق لأردن بلمعاونة د بريطانيا ف 1921، و كان حاكمها لأمير عبد الله بن حسين. ف 1946، ستاقلات لإمارة رسميا من بريطانيا، و ولاّت مملكة لأردن لهاشمية، اللي كان أول ملك ديالها هو عبد الله النيت. النضام ديال لحكيم ف لأردن هو نضام ملكي دستوري، و فيه حكومة تمتيلية.

تيسكنو ف لأردن تقريبا 10.5 مليون د الناس، و لعاصمة ديالها هي عمّان. اللغة الرسمية ديال لبلاد هي لعربية، و لفلوس اللي كاتخدّم هي الدينار لأردني. لأردن معروفة باللي فيها أهبط نقطة ف لعالم، و اللي هي لبحر لميت، اللي هابط 428 ميطرو تحت من سطح لأرض.




#Article 232: لأرض (147 words)


لأرض هي ثالث كوكب ف لمجموعة الشمسية و هي لكوكب اللي كانعيشو فيه. كنرمزوا للأرض بدوارة وفيها زائيد.

الأرض هي الكوكب الثالث من ناحية البعد على الشمش، قبل منها كاين عطارد و زهرة، أما من وراهم فكاين لمريخ، لمشتري، زحل، أورانوس، ؤ نيبتون، ؤ پلوتو للي مابقاش محسوب على لمجموعة شمسية مُأخرا.

تكونات الأرض هادي 4.54 مليار عام تقريبا، وبانت عليها الحياة غير في 3.8 مليار عام الآخرة، كوكب الأرض هو الكوكب الوحيد للي فيه الحياة في المجموعة الشمسية على حسب المعلومات للي عند العلماء دابا، حيت هو بوحدو للي فيه الأوكسيجين و الما و الغلاف الجوي وبزاف ديال الحوايج للي تتعاون باش تكون الحياة في الأرض.

لأرض كاينا فلمجموعة شّمسية للي حتاهي كاينة مع بزاف بحالها باش تيكَوْنوا مجرة سميتها درب التبانة للي كبيرة بزاف، , في اللول كانت الأرض قارة وحدة سميتها Panjya/Pangaea ومن بعد تفارقو ولاو سبعة ديال لقارات كيفما كاينين دابا للي هوما:




#Article 233: اللوغات لأمازيغية (610 words)


لأمازيغية ؤلا تمازيغت (ⵜⴰⵎⴰⵣⵉⵖⵜ)، هي لوغة لأصلية د شمال إفريقيا، ؤ لي هي فرع من لعائلة د لوغات الأفرو-آسياوية. لأمازيغية لوغة رسمية ف لمغريب ؤ لجزائر ؤ مليلية، ؤ لوغة وطنية ف نيجر ؤ مالي، وتاتهضر فبزاف د لبدان آخرين لي هوما: تونس، ليبيا، موريتانيا، مصر، مالي، نيجر، بوركينا فاصًو، جزر الكناري ؤ حتا ف شي بلدان بحال فرانسا و صبليون و هولاندا...

ماكاينش إحصائيات رسمية ديال شحال د نّاس تيهضرو لوغة لأمازيغية، ولكن تقديرات تاتكول بلي مابين 25 تال 30 مليون واحد ف لعالم تيهضرو على لأقل وحدا من لهجات لأمازيغية. على حساب لإحصا د 2014، كاين تقريبا 16 د لمليون د الناس لي كيهضرو لأمازيغية غي ف لمغريب بوحدو
.

تّاريخ نتاع اللغات الأمازيغية قديم بزاف، و كاع علماء اللسانيات متافقين بلي كاع هاد اللغات الأمازيغية لي منتاشرة دبا فشمال إفريقيا كترجع للوغة وحدة، كيسميوها الأمازيغية البدائيةباللونغليproto-berber ،رغم أنه كاين خلاف على تأريخ هاد اللغة و لكن كاين إجماع على أن انفصال هاد لّوغة على الفروع الأفروآسيوية لاخرين، كيرجع لشي 9000 عام تال 10000 عام قبل الحاضر، إيلا جانب هادشي فهاد اللوغة عرفات جوج مراحل فالتطور نتاعها لي هوما:

واخا الدراسات متعارضة فهاد الموضوع و لكن الحاجة لي حنايا متأكدين منها هي بلي فالألفية الثالثة قبل الميلاد هاد اللوغة كانت حية و كتستعمل فالأراضي لي كيمتدو من غرب النيل حتال المغرب و جزر الكناري.

و مننساوش أيضا بلي كاينين خبراء كيدعموا فرضية تطور الأمازيغية البدائية بشكل ذاتي و منعزل، يعني ضحد فرضية التفرع على اللغة الأفروآسيوية.

لمؤرخين كيتافقو أن اللغات الأمازيغية كانو كيهضروها سكان شمال إفريقيا فتّاريخ لقديم و كثر من هادشي كانت هي لّوغة الرسمية فبزاف تاع الممالك.
لوغة لأمازيغية فتّاريخ القديم كتعرف علميا بلّوغة الليبية و بشكل عام السلف نتاع گاع التنوعات الأمازيغية الحالية هي البروتو-بربرية و كانت لغة منتشرة على الأقل قبل 2000 عام هادي، و غادي تنقاسم من بعد باش تعطينا بزاف د لوغات على الشكل التالي:

( التنوع اللساني غوانش مازال ماكاينش تقدير تاريخ الإنفصال تاعو حيت السباب هو قلة المعلومات لي عارفينها عليه و لكن ممكن يترشح يكون انفاصل هادي 2000 عام حسب علم الإبيغرافيا).

كاين تلاتة د للهجات معروفين و كبار لأمازيغية فمغريب لي جات من للغة لأمازيغية، بحال:

اكاديميا كنسميو لهجة رّيف ب أمازيغية زناتة ؤ لهجة تاشلحيت ؤ تمازيغت د لأطلس لمتوسط ب أمازيغية صنهاجة أو مصمودة.

من 2011، ولاًت لأمازيغية لغة رسمية فالدستور د لمغريب (هي ولعربية)، وكاين واحد لعدد د لمداريس ديال الدولة لي تيقرًيوها من 2001 .

لأمازيغية لفصحى (لي معيرها لمعهد لملكي د ثّقافة لأمازيغية فالرباط) تاتًكتب بحرف تيفيناغ وكتجمع بين كاع لمتغيرات لسانية دالامازيغية ؤ هي لي تاتقرًا فلمدارس د لمغريب ؤ كيتكبو بيها لبلايك ف شارع ؤ لموسسات، ؤ كيتنشرو بها لكتوب ؤ لمؤلفات.

كاين بزاف د اللهجات لأمازيغية فالدزاير, منهم: لقبايلية, الشاوية, لمزابية و لأمازيغة ديال التوارڭ د الصحرا وكتعتبر من أبعد اللهجات د لأمازيغية وبعض المختصين كيصنفوها على أنها لغة بوحدها.

ف 2002 رجعات لأمازيغية ف الدزاير لغة وطنية, و ف 2016 بدًلات الدستور و ردًاتها لغة رسمية هي و لعربية.

بزاف د الناس فلجزائر (خاصة لقبايل) تيكتبو لأمازيغية بلحرف اللاتيني وكتكب بتفيناغ عند الشاوين.

لأمازيغية ف ليبيا مشي لغة رسمية، ولكن المجلس الاعلى لأمازيغ ليبيا علن بأن لأمازيغية رسمية فلمناطق ؤ لمدن لي كيسكنوها لأمازيغ، فعام 2011 من بعد ما طاح نظام لقذافي لأمازيغية دخلات للمدراس د ليبيا، لأمازيغ د ليبيا كيعتمدو أساسا إصدارات المعهد الملكي للثقافة لأمازيغية بالمغرب كمرجع لتدريس لأمازيغية بحرف تيفيناغ، لأمازيغية فليبيا كتواجد اساسا فزوارة ؤ نفوسة ؤ جنوب (توراق).

لغة لأمازيغية عندها تأثير كبير على لوغات لمغاربية بحال الدارجة المغربية لي كتشكل الصانطاكس و لفونولوجي ديالها بشكل اساسي كما ان جزء كبير من لمفردات ديال لدارجة جاي منها، لأمازيغية أثرات بزاف على لنطق د لحروف عند بنادم لي كيتكلم ب للغات مغاربية.

للغة لأمازيغية عندها كذلك تأثير كبير على لغة الهوسا لمنتشرة فدولة نيجر ونيجريا.




#Article 234: لأمم لمتحدة (114 words)


لأمم لمتحدة واحد لمنظمة عالمية كاتجمع تقريبا ڭاع لبلدان اللي مستاقلة فلعالم. تأسسات لأمم لمتحدة نهار 24 أكتوبر 1945 فسان فرانسيسكو فلميريكان, من مورا لحرب لعالمية التانية. لهدف علاش تأسسات كان هو تحافظ على السلام فلعالم, وتدافع على حقوق الانسان وتعاون الناس اللي محتاجين فلعالم كلًو.

لأمم لمتحدة عندها بزاف د لمقرات مفرقة على لعالم, من بين لمقرات لكبار ديالها كاين: مقر لأمم لمتحدة فنيو يورك - مقر لأمم لمتحدة د حقوق لإنسان فجونيڤ - محكمة لعدل الدولية فلاهاي, وبزاف د لبلايص خرا فلعالم كلًو. كاين دابا 193 عضو كامل لعضوية فلأمم لمتحدة, و جوج د لأعضاء ملاحظين, اللي هوما لڤاتيكان وفلسطين.

لأمين لعام د لأمم لمتحدة من 2017 لدابا هو لبرتغالي أنطونيو ڭوتيريش.




#Article 235: لإكواطًور (141 words)


لإكواطّور (ب الصبليونية: República del Ecuador) هي بلاد جات ف أمريكا لجنوبية، تاتحدها كولومبيا من الشمال، پيرو من لجنوب و الشرق، و لمحيط لهادي من لغرب. لإكواطّور هي و الشيلي هوما الجوج بلدان ف أمريكا لجنوبية كاملة اللي ماعندهومش حدود مع لبريزيل.

سكنو بزاف د الشعوب فلأرض اللي فيها لإكواطّور، و كانو داخلين مع لإمبراطورية د لأنكا ف لقرن 15. ف لقرن 16 ستعمرات صبانيا لمنطقة و بقات محتلاها تال 1820، فين ستاقلات و ولاًت طرف د كولومبيا لكبيرة. ف 1830 ستاقلاًت لإكواطّور اللي كانعرفو دابا و ولاًت بلاد عندها سيادة.

تيسكنو ف لإكواطّور تقريبا 17.1 مليون د الناس و لعاصمة ديالها هي كيطو. اللغة الرسمية ف لبلاد هي الصبلوينية، و عاد كاين 13 لغة معتارف بيها بحال لكيشوا و الشوار و لغات أصلية وحداخرا. لفلوس ديال لإكواطّور هي الدولار لميريكاني و النضام د لحكيم فيها هو نضام جمهوري ديموقراطي تمتيلي.




#Article 236: لاتڤيا (172 words)


لاتڤيا (باللاتڤية: Latvijas Republika) هي بلاد جات ف لمنطقة ديال لبلطيق ف الشمال ديال أوروپا. تاتحدّها من الشمال إسطونيا، من لجنوب ليتوانيا، من الشرق روسيا، من لجنوب الشرقي بيلاروسيا، و من لغرب لبحر د لبلطيق.

تاريخيا، بزاف د الدول ف أوروپا حكمو لبلاصة اللي فيها لاتڤيا دابا، منها السويد و پولونيا و لإمبراطورية الروسية. نهار 18 نونبر 1918، خدات لجمهورية ديال لاتڤيا لإستقلال ديالها، و لكن هجم عليها لإتحاد السوڤياتي و دخّلها للأراضي ديالو ف 1940. ف 1941، حتلاّتها ألمانيا النازية، و لكن من مورا خسرات لحرب لعالمية التانية، رجعات لاتڤيا عاود للسوڤيات. مورا بزاف د لمظاهرات و تورة سلمية، و ملّي طاح لإتحاد السوڤياتي، خدات لاتڤيا لإستقلال ديالها، و ولأّت لجمهورية د لاتڤيا اللي كانعرفو دابا.

تيسكنو ف لاتڤيا تقريبا 2 د لمليون د الناس و لعاصمة ديالها هي ريڭا. اللغة الرسمية ديال لبلاد هي اللاتڤية، و لفلوس اللي كاتخدّم من 2014 هي لأورو. دخلات لاتڤيا للإتحاد لأوروپي ف 2004، و هي داخلة ف بزاف د لمنضمات دولية بحال لأمم لمتحدة و الناطو و لمنضمة لعالمية د التجارة و مجلس أوروپا.




#Article 237: لاووص (169 words)


اللاووص، (باللغة د اللاو: ລາວ)، رسميا لجمهورية الديموقراطية الشعبية د لاووص، هي بلاد ماكاطلش على لبحر جات ف ف لجنوب الشرقي د آسيا. تيحدّوها من الشمال لغربي بورما و الشينوا، من الشرق ڤييطنام، من لجنوب كامبودج، من لغرب طايلاند.

لبلاصة اللي فيها لاووص تابعة لهوية ديالها للملكة د لان شانڭ، اللي كانت ف هاديك لمنطقة ما بين لقرن 14 و 18، و كانت من أكبر لمملكات ديال جنوب شرق آسيا. ف 1893، ستعمرات فرانسا هاديك لأراضي و تسمّات بسميت لاووص. ستاقلات لاووص من فرانسا ف 1953، و ولاّت مملكة دستورية. ولكن مورا حرب أهلية طويلة، سالات مع لحرب د ڤييطنام، ربح لحزب الشيوعي الثوري، و ولاّ حاكم لبلاد من 1975. من ديك الساعة، ولاّت لاووص جمهورية اشتراكية فيها حزب واحد، و متبعة لمبدأ ديال لماركسية اللينينية.

تيسكنو ف اللاو تقريبا 6.8 مليون د الناس، و لعاصمة ديالها هي ڤيينتان. اللغة الرسمية ديال لبلاد هي اللاووص، و لفلوس اللي كاتخدّم هي كيپ. اللاوص داخلة مع بزاف د لمنضمات دولية، بحال لأمم لمتحدة، منضمة التجارة لعالمية، و لمنضمة لعالمية د لفرونكوفونية.




#Article 238: لبحر شامي (139 words)


لبحر لبيض لمتوسط ولّا لْبحر شّامي ؤلا لبحر دّخلاني ؤلا لبحر لجوّاني ولاًُ لميديطيراني هوّا واحد لبحر مرتابط ب لمحيط لأطلسي و تادور بيه تلاتة د لقارات لّي هيّا: إفريقيا من لجنوب، أوروپا من شّمال، وآسيا من شّرق. لمساحة د لبحر لبيض لمتوسط هي تقريبا 2.5 مليون كم², ولكن فشي بلايص لعرض ديالو صغير بزاف، بحال ف لمضيق د جبل طّر (جبل طارق)، لي فيه غي 14 كم. أغرق بلاصة فهاد لبحر كاتوصل ل 5267 ميترو (أعماق كاليپسو حدا ليونان), و لغرق لمتوسط ديالو هو 1500 ميترو.

لبحر دّخلاني فيه بزاف ديال لجزر، شلّة منهم تابعين ل بلدان (بحال سردينيا، قرشيقة، صقلية ؤ جزر لبليار),ؤ وحدين خرين بلدان مستاقلة (بحال قبرص ؤلا مالطا).

لبلدان لي تاطًل على لبحر دّخلاني (معاها شي بلدان خرة) تجمعات ف واحد لمنضمة سميتها ليتيحاد علا ود لمتوسط، لي لمقر ديالها ف برشلونة ف صبانيا.




#Article 239: لبحرين (117 words)


لبحرين (رسميا: لمملكة د لبحرين) هي واحد الدولة أرخبيل جات فلخليج لعربي فالشرق د شبه لجزيرة لعربية. لبحرين فيها 33 جزيرة طبيعية و 51 جزيرة صناعية. أكبر جزيرة فيها هي لجزيرة د لبحرين اللي تيسكنو فيها 83% د لبحرينيين. لبحرين عندها حدود مع السعودية, وهي لقنطرة اللي بينياتهم, اللي سميتها لقنطرة د لملك فهد.

تكتاشف لپيطرول فلبحرين ف 1932, وديك الساعة كانت مستعمرة ديال بريطانيا. ف 1971 ستاقلات لبحرين و ف 2002 تدار استفتاء اللي صوتو فيه الناس باش تكون سميت لبلاد هي لمملكة د لبحرين.

تيسكنو فلبحرين مليون ونص د الناس, منهم كثر من نص مليون اللي ماشي مواطنين. لعاصمة ديالها هي المنامة, ولعملة تمًا هي الدينار لبحريني. اللغة الرسمية فلبحرين هي لعربية, والنظام ديالها ملكي.




#Article 240: لبرتغال (112 words)


لجمهورية د لبرتغال ولاً لبرطقيز (ب لبرتغالية: República Portuguesa) هي واحد لبلاد فلجنوب لغربي د أوروپا. تاتحدًها صبانيا من الشمال ومن الشرق, ولمحيط لأطلسي من لجنوب ومن لغرب. لبرتغال عندها جزر تابعين ليها فلمحيط لأطلسي, وعندهم لحكم الذاتي وحكومات محلية ديالهم. هاد لجزر هوما ماديرا و لآزور.

لبرتغال ساكنين فيها 10 د لمليون د الناس والعاصمة ديالها هي لشبونا. دخلات للاتحاد الأوروپي ف 1986, وكاتخدًم الأورو. اللغة الرسمية فالبلاد كاملة هي لبرتغالية، وهي لغة اللي تيهضرها 270 مليون فلعالم.

لبرتغال بلاد اللي كان عندها تاريخ طويل فليحتيلال و التوسع لبحري، وكوًنات وحدا من أكبر لإمبراطوريات ليستيعمارية فلعالم. هادشي اللي خلا اللغة ديالها تنتاشر فبزاف د لقارات منها إفريقيا و آسيا وأمريكا اللاتينية.




#Article 241: لبريزيل (179 words)


لبريزيل (و كاتسمى حتى البرازيل) ولًا لجمهورية لفيديرالية د لبريزيل, هي أكبر بلاد فأمريكا اللاتينية وخامس أكبر دولة فلعالم لا من جبهت السكان, ولا من جيهت لمساحة. لبريزيل هي أكبر بلاد فلعالم تاتًهضر فيه لبرتغالية, ولبلاد لوحيدة فأمريكا لجنوبية اللي تيهضروها فيها.

لبريزيل تيحدًها من الشرق لمحيط لأطلسي, من الشمال ڤينيزويلا و ڭوييانا وسورينام وڭوييانا لفرانساوية, من لغرب كولومبيا وبوليفيا وپًيرو ولارجونتين وپاراڭواي, ومن لجنوب أوروڭواي. لبريزيل تاتحدً ڭاع لبلدان ديال أمريكا لجنوبية, إلا ليكواطًور والشيلي.

أول تأسيس ديال دولة فلبريزيل كان فعام 1500 ملًي وصليها البرتغالي پيدرو ألڤاريس كابرال, وبقات مستعمرة د لبرتقيز تال 1815. من بعد توحدات مع لبرتغال فبلاد وحدا وكانت لعاصمة ديالهم بجوج هي ريو دي جانيرو. ف 1822 أتستاقل لبريزيل تماما من لبرتغال وغاتولي مملكة سميتها لإمبراطورية د لبريزيل. أتبقا بحال هاكاك تال 1889 اللي وقع فيها نقيلاب عسكري وولاًت جمهورية. لبريزيل دابا جمهورية فيديرالية فيها 26 ولاية. كل وحدا فيها عندها لحكومة ديالها, وعاد كاينا لحكومة لمركزية اللي جا لمقر ديالها فلعاصمة.

لعاصمة د لبريزيل سميتها برازيليا, لفلوس ديالها هي الريال, تيسكنو فيها تقريبا 210 مليون د الناس, والرئيس ديالها هو جايير بولزونارو.




#Article 242: لجريدة رّسمية (146 words)


لجريدة رّسمية (ب لفرنسية: Bulletin officiel) هي منشور قانوني رسمي كاين عند أغلبية دّول و عندو أهمية قانونية كبيرة حيت أي قانون ولا مرسوم ما كايولي رسمي و تولي خدامة بيه دّولة تا لنهار كايتنشر ف لجريدة رّسمية. هادشي كايعني مثلا أن لقانون واخا يصادق عليه لبرلمان و يتسنا ظهير تّنفيذ ديالو، ف لحالة ديال لمغريب مثلا، ماكايولي رسمي تا لنهار كايتنشر ف لحريدة رّسمية، وما يمكن يتحاكم بيه تا شي حد ولا يتستعمل ف شي قضية قانونية قبل ديك تّاريخ.

تّسميات ديال لجرائد رّسمية، وحتا لأهمية لقانونية ديالها، يمكن تختلف بين لبلدان، بحيت كاين لّي كايسميهوم Bulletin/Boletín ولا :

لجريدة رّسمية د لمغريب سميتها ب لعربية الجريدة الرسمية للمملكة المغربية و ب لفرنسية Bulletin officiel du royaume du Maroc. كاتصدر ب لعربية و لفرنسية و لوزارة لمسؤولة عليها هي لأمانة لعامة د لحكومة. لجريدة رّسمية د لمغريب كاتخرج فيها بزاف ديال نّواع ديال نّصوص لقانونية:




#Article 243: لجمهورية د الدومينيكان (208 words)


لجمهورية د الدومينيكان (ب الصبليونية: República Dominicana) هي بلاد جات ف لجزيرة د هيسپانيولا اللي تابعا للجزر د لآنتيل ف لبحر د لكاريبي. تاتقاسم الدومينيكان لجزيرة د هيسپانيولا مع الدولة د هايتي، اللي تاتحدّها من لغرب. لبحر د لكاريبي تيحدّ لبلاد من ڭاع الجوايه لاخرا. لجمهورية د الدومينيكان هي تاني أكبر بلاد ف لمنطقة د لكاريبي من جيهت لمساحة (مورا كوبا) و تالت أكبر بلاد من جيهت السكان، و تاني أكبر بلاد ف لإقتصاد.

لبلاصة اللي فيها لجمهورية د الدومينيكان كانت مسكونة من لقرن السابع و كان ساكن فيها الشعب ديال تاينو. وصل كريسطوف كولومبوس ل تما ف 1492 و كانت هاديك أول مرة تلاقاو فيها تاينو مع لأوروپيين. بناو لأوروپبيين لمدينة د سانطو دومينڭو، اللي ولاًت أول مدينة أوروپية ف لقارة د أمريكا كاملة. ستعمرات صبانيا لبلاد تال 1821، موراها حكماتها هايتي تال 1844، و وقعات حرب بيناتهم اللي سالات ب ليستيقلال د الدومينيكان. مورا ليتسيقلال، وقعو مشاكل بزاف ف لبلاد و عاود ستعمراتها صبانيا 72 عام عاود، و موراها ستعمراتها لميريكان من 1916 ل 1924. من 1924، ماعمر الدومينيكان ما تستعمرات عاود ودابا النظام ديالها هو جمهورية رئاسية.

تيسكنو ف لجمهورية د الدومينيكان تقريبا 10.5 مليون د الناس، و لعاصمة ديالها هي سانطو دومينڭو. اللغة الرسمية هي الصبليونية، و الفلوس اللي كاتخدّم هي لپّيزو ديال الدومينيكان.




#Article 244: لحامونية (229 words)


لحامونية، و سميتها لحقيقية فاطمة الكوط (خلاقت ف دوار حامون ف شّياضمة ف 1937 و توفات ف 2 يوليوز 2013 ف آسفي) مغنية مغريبية د لعيطة و كاتعتابر من سميات لكبار د لعيطة لحصباوية ف لقرن لعشرين، هي و فاطنة بنت لحسين، و كانت عندها مسيرة فنية كبيرة بدات من عوام 1950.

فاطمة خلاقت ف شّياضمة و توجات ولد عمها لّي داها معاه و سكنو ف الصويرة. هاد جّواج ما كملش و تفارقو. من بعد مشات ل آسفي و تما دخلات ل مجال لعيطة ف رّباعة ديال الشيخ الجيلالي العبوشي الرحماني لّي كان من شّيوخ لكبار د لعيطة ف عبدة.

لحامونية تعلمات بزاف من الشيخة عبوش الهداوية لّي كانت أستاذة و قدوة ديالها و هي لّي علماتها لأصول د لعيطة و لميزان و لقصايد د هاد نّوع لفني.

تجوجات فاطمة ب الشيخ الجيلالي و كملو ربعين عام د لعشرة و كونو مجموعة د لعيطة مع ناس حرايفية كبار بحال الشيخ الكاوي و الشيخة المعاشية و الشيخة السعدية. الحامونية كان كايميزها تّنوع لكبير ديال نّواع د لعيطة لّي كانت كاتغني و لهتيمام ديالها باش تحافظ على لأصالة و لغنا د شلا براول و و رفود صعيبة لا من حيت لكلام و لا لميزان، زيادة على تّويشيات لخفاف ديالها لّي بقاو مخلدين ف سمع ديال لمغاربة لّي عزيزة عليهوم لعيطة، بحال تويشية يانا يانا.

لحامونية كانو دواقة ديال لعيطة كايلقبوها ب حانوت العطار حيت كانت كاتضبط بزاف ديال نواع د لعيطة:




#Article 245: لحرب لعالمية تانية (200 words)


لحرب لعالمية تانية (كنرمزو ليها ب WWII ولا WW2) من اكبر لحروب لي دازت، بدات من 1939 حتال 1945، هاد لحرب عرفات مشاركة مجموعة من دّول ف لعالم هادشي لي خلاها تخلف بزاف دلقتلى، مات فيها من 70 تال 80 مليون دبنادم الاكثرية ديالهم من يهود ف أوروپا.

هاد لحرب ناضت فالعالم كامل تقريبا ما بين جوج تحالفات كبار اللي هوما المحور (فيه لالمان و الطاليان و الجابون) و الحلفاء (فيه فرانسا و بريطانيا و الاتحاد السوفياتي و ميريكان), و بدات ف1 سبتومر 1939 ملي هتلر احتل اوروبا والاتحاد سوفياتي و اجزاء من افريقيا وآسيا و سالات ف 2 سبتومبر 1945, الحرب خلات ما بين 70 مليون و 85 مليون مقتول , وهي أكفس حرب دازت فالتاريخ من ناحية الموت و الدمار.

الحرب بدات فالفجر ديال نهار 1 سبتومر 1939 منين دخلو العسكر ديال لالمان بقيادة هتلر لبولونيا, الشي اللي خلا فرانسا و بريطانيا اللي هوما حلفاء بولونيا باش يعلنو الحرب من مورا ساعات قليلة.
من بعد اعلان الحرب علي المانيا ناض هتلر واحتل فرانسا وهولندا وبلجيكا والكسمبورغ وطرد عسكر دالحلفاء(بريطانيا) للبحر بالضبط ف1940.
منبعد هتلر غادي يدير واخد خطوة لي خطيرة بزاف ولي هي الهجوم علي اتحاد سوفياتي 1942 خوفا من دخول ميريكان للحرب مما غيتسبب فاشتعال العالم بكامله




#Article 246: لطيفة أحرار (116 words)


لطيفة أحرار، خلاقت ف 12 نونبر 1971، فنانة، ممثلة، ؤمخرجة مغريبية شاركات فبزاف د الأفلام ؤمسلسلات ؤسيتكومات مغريبية.

لفنانة ؤ الممثلة ؤ المخرجة لمغربية لطيفة احرار، دارت شحال من دور ؤبزاف د لبطولات ؤ مشاركات ف مسلسلات ؤ افلام مغربية كثيرة ، ؤلمسلسل ابنت الفشوش حل ليها الطريق ؤالبيبان لخدمي فنية وحدين خرين كما أنها شاركت فبزاف دلمهرجانات عالمية ؤوطنية.ؤربحات بزاف دلجوائز فنية بحال لجائزة دأحسن ممثلة

ف المهرجان الدولي دلافلام على الدور ديالها  ففيلم منى لي خرج ف2001،ؤلجائزة  دأحسن ممثلة

فالمهرجان المغربي دلافلام ف2003 على نفس الدور،ؤلجائزة دأحسن ممثلة مسرحية فالمهرجان الوطني دلمسرح ف 2003 .لطيفة دارت  ؤلا ترجمة ديال شحال من سيناريو د الأفلام، لعشق ديالها للتليفزيون ؤالأدوار لي كتلعبها كسبها الحب دلجمهور.

أفلامها

سيتكومات

مسلسلات




#Article 247: لطيفة رأفت (232 words)


لطيفة رأفت (خلاقت ف 25 نونبر 1965 ف قنيطرة) مغنية مغريبية د لموسيقا لمغريبية لعصرية. بدات لكاريير ديالها ف 1982 و عندها شعبية كبيرة ف لمغريب و دزاير و تونس.

لطيفة خلاقت ف قنيطرة و أصلها من وزان. بانت فاش كانت صغيرة و دازت ف برامج د لمواهب ف تّلفزة لمغريبية غنات فيهوم غنيات مشرقية و ب دّات د أم كلثوم. أو أغنية سجلاتها كانت ف 1982 و سميتها موال الحب.

ف 1984 تجوجات ب لملحن لمغريبي لكبير حميد العلوي و هو لّي لحن ليها غنية خويي لّي كانت تختارت أحسن غنية مغريبية ف 1985. ف تّمانينات و تّسعينات د لقرن لعشرين كانت من أكبر لمغنيات لمغريبيات و وحدة من لمغنيات لّي رفضو يهاجرو ل لمشريق و بقاو شادين ف لغنا ب دّاريجا و ف لمغريب بحال نعيمة سميح. ديك لفترة عرفات أهم لأغاني لخالدة ديال لطيفة بحال مغيارة، أنا فعارك يا يما، يا هلي يا عشراني و الحمد لله.

ف 1993 تفارقات هي و حميد العلوي و كانت فترة صعيبة عليها ب حيت مرضات نفسيا، ب سباب أن حميد مابغاش يطلق لكونطرا لّي كان كاخليه يحتاكر لأعمال ديالها، و وقفات لكاريير لموسيقية ديالها 3 سنين.

من بعد ديك لمحنة، رجعات لطيفة ل نّشاط لفني ديالها : ف لّول عاودات ب توزيع عصري غنيات مغريبية قديمة بحال العود والناي د اسماعيل احمد، و فعوام ال 2000 خرجات غنيات ب شكل دويتو، لّي نجحو بزاف، بحال توحشتك بواف مع لمغني دّزايري محمد لامين.




#Article 248: لعراق (220 words)


لجمهورية د لعراق (بلكردية: کۆماری عێراق) هي جمهورية برلمانية اتحادية جات فلغرب د آسيا وتاطًل على لخليج. تاتحدًها من لجنوب لكويت والسعودية, من الشمال تركيا, من لغرب سوريا ولأردن, ومن الشرق إيران. لعراق بلاد فيها تنوع سكاني كبير حيث تيسكنو فيها ناس من ديانات بزاف: لمسلمين سنة وشيعة, لمسيحيين, لمندائيين, ليزيدين, وفيها تا إثنيات بزاف منهم. لعرب, لأكراد, لأرمن, التركمان, الصابئة إلخ.

التاريخ ديال لعراق طويل ودازو فيها بزاف د لحضارات. لبلاصة اللي فيها لعراق دابا معروفة باللي هي لبلاصة اللي كانت فيها وحدا من أقدم لحضارات فلعالم, واللي هي لحضارة السومرية. من موراها جاو بزاف د لحضارات و الدول اللي حكمو لمنطقة منهم لبابلين ولأشوريين و لإمبراطورية الرومانية والدولة لأموية والدولة لعباسية ولمغول والدولة لعثمانية و بريطانيا. ستاقلات لعراق من بريطانيا ف 1932, وكانت مملكة, ولكن عام 1958 وقع انقلاب ضد لمملكة وولاًت جمهورية. ف 2003, هجمات لميريكان على لعراق وطيًحات الرئيس ديالها صدام حسين. من ديك لوقت ولعراق فيها حالة ديال عدم لستقرار ولمشاكيل.

تيسكنو فلعراق تقريبا 38.5 مليون د الناس ولعاصمة ديالها هي بغداد. اللغات الرسمية فلبلاد هوما لعربية ولكردية, وكاين لغات خرا تاتًهضر بحال التركمانية ولأرامية. لعملة الرسمية د لعراق هي الدينار لعراقي. لإقتصاد د لعراق تيدور على لپيطرول, اللي هي من أكبر لمصدرين ديالو فلعالم, وعليها هي عضو فمنظمة أوپيك. لعراق عضو تا فمنظمات دولية آخرا بحال لأمم لمتحدة وجامعة الدول لعربية ومنظمة التضامن لإسلامي.




#Article 249: لعربية (109 words)


اللغة لعربية هي واحد اللغة أفرو آسياوية من لعائلة د اللغات السامية, و تيهضروها تقريبا 467 مليون واحد, إما حيث اللغة لأم ديالهم هي وحدا من الدارجات ديالها, ولا حيث تعلموها من بعد.

لأصل ديال لعربية هو شبه لجزيرة لعربية. ملًي جا لإسلام تما, نتاشرات معاه لعربية حيث كانت هي اللغة ديال لقرآن و لحديث, وتعلًموها الناس د بزاف د لبلايص ملًي كانو تيسلمو. دابا لعربية لغة رسمية ف 26 بلاد فلعالم, و هي وحدا من اللغات الرسمية الستة ديال لأمم لمتحدة.

لعربية فيها 28 حرف وتاتًكتب من ليمن لليصر, ومن لفوق للتحت.

ليوم لعالمي ديال اللغة لعربية على حساب لأمم لمتحدة هو نهار 18 دجنبر ديال كل عام.




#Article 250: لعلويين (187 words)


لعلويين (لأمازيغية: ⵍⵄⴰⵍⴰⵡⵉⵢⵏ) هي سلالة من تافيلالت كتنسب لشرفة حكمات لمغريب من 1666، سلطان لول لي حكم منهوم هو مولاي شريف، ؤ كيحكم منهوم لمغريب دبا لماليك محمد ساديس بن لحسن، تبناو لمذهب لمالكي ف لفيقه لي معروف ب لوسطية ؤ لإعتدال ؤ تسامح.

تطور لمفهوم د دولة ف لعهد مولاي سماعيل بن شريف (1672-1727) لي غايبني بزاف د لمؤسسات جديدة، ؤ يدير بزاف د لإصلاحات، زيد عليها لفتوحات لي دار حيت ف لوقت ديالو وصل لمغريب لأقصى امتداد ديالو، ؤ غايقدر يوحد دّولة، هادشي كامل بفضل لجيش ديالو لي شكلو من لعبيد لكحلين ؤ لحرطانين لي تسمى ب عبيد لبخاري، ولكن مورا لموت ديالو غاتنوض مدابزات سياسية بين ولاده و عيالاته علاود لعرش.

ف لعهد ديال محمد تالت (1757-1790)، غايقدر يعاود يوحد لمملكة مرة خرا ؤ غا يعاود يگاد لمخزن، زيد عليها أنو قضا علا لمركزية ؤ خلا لقبايل يحافضو على ليستقلالية ديالهم، ف لعهد د عبد رحمان (1822-1859) لمغريب غا يطيح ف لأطماع لؤروپية من بعد ما عاون لحركة ليستقلالية د دزاير بلقيادة د لأمير عبد لقادر، لمغريب غايخسر قدام [لفرنسيس] ف معركة إسلي عام 1844، شّي لي غا يخلي للي غايزعم لوروپيين على لمغريب.




#Article 251: لكويت (228 words)


لكويت (رسميا: الدوبة د لكويت) هي بلاد جات ف لغرب د آسيا، و بالضبط ف الشمال لغربي د لخليج لعربي. تايحدّها من الشمال و من لغرب لعراق، من لجنوب السعودية، و من الشرق لبحر ديال لخليج.

لمنطقة اللي فيها لكويت كانو ساكنين فيها ناس كيهضرو لعربية، و كيخدمو إما فالتجارة ما بين شبه لجزيرة لعربية و لهند، ولاّ فلغطيس و الجميع ديال اللؤلؤ من قاع لبحر. كانت لإمارة ديال لكويت مستاقلة، من نهار تأسسات ف 1613 تال 1871، و هو لعام اللي حكموها فيه لعتمانيين، و دخّلوها للإمبراطورية ديالهم. ف 1889، ولاّت لكويت محمية ديال بريطانيا.

ستاقلات لبلاد من بريطانيا نهار 19 يونيو 1961. ف 1990، من مورا ما دخل لعسكر د لعراق للكويت، بدات لحرب اللولا ديال لخليج، اللي كانت حرب قادتها لميريكان، شاركو فيها بزاف د لبلدان ف لعالم، و سالات ف 1991.

تيسكنو ف لكويت تقريبا 4.6 مليون د الناس (70% منهم برّانيين)، و لعاصمة ديالها هي لمدينة د لكويت. اللغة الرسمية د لبلاد هي لعربية، و لفلوس اللي كاتخدّم فيها هي الدينار لكويتي. النضام ديال لحكيم ديال لبلاد هو ملكي دستوري، و هي داخلة ف بزاف د لمنضمات دولية بحال لأمم لمتحدة و لجامعة د الدول لعربية و لمنضمة د التعاون لخليجي و منضمة التعاون لإسلامي. لقتيصاد د لكويت تيضور بزّاف على لپطرول: هي خامس أكبر مصدّر د لپطرول ف لعالم (تكتاشف فيها ف 1936)، و هاد لميدان كيشكّل 80% ديال لمداخيل ديال لبلاد.




#Article 252: لمؤسسة د ويكيميديا (138 words)


مؤسسة ويكيميديا (بلينڭليزية: Wikimedia Foundation ولاً WMF) هي منظمة عالمية غير ربحية كاين لمقر ديالها فسان فرانسيسكو فميريكان. لمؤسسة تاتسيًر بزاف د لمشاريع اللي عندها علاقة بلمحتوى لحرُ, وتاتملك النطاقات و السيرڤورات ديالها, بحال لمشروع د ويكيپيديا, اللي هو خامس أكبر موقع فلعالم من الناحية ديال شحال من واحد تيدخليه. لمؤسسة ماتاتحكمش فلمحتوى دديك لمشاريع وماتقدرش تبدلو, هاداكشي تيديروه لمتطوعين فلعالم, أما لمؤسسة خدمتها هي تتأكد باللي كلشي خدام وتعاون لمتطوعين فأي حاجة حتاجو.

لمؤسسة د ويكيميديا تأسسات ف 20 يونيو 2003 من عند جيمي وييلز و لاري سانجر. لمديرة ديالها من مارس 2016 هي كاطرين ماهر.

مؤسسة ويكيميديا تأسسات لبزاف د لأغراض. لهدف لمهم ڭاع ديالها هو تعاون لمشاريع ديالها د الثقافة لحرًة والناس لمتطوعين اللي خدامين عليها. من بين لحوابج اللي تادير لمؤسسة باش توصل لهاد لهدف:

مؤسسة ويكيميديا واقفة على بزاف د لمشاريع, اللي هي:




#Article 253: لماهاطما ڭاندي (139 words)


موهانداس كرمشاند ڭاندي (بلڭوجارلتية: મોહનદાસ કરમચંદ ગાંધી - تولد ف 2 أكتوبر 1869 - مات ف 30 يناير 1948) ولمعروف بسميت لماهاطما ڭاندي, كان واحد السياسي هندي والشاف الروحي د لحركة د الاستقلال د لهند من بريطانيا. سميت لماهاطما تاتعني الروح لعضيمة, وعطاهالو الشاعر لهندي طاڭور. كان ڭاندي تيطالب بلمقاومة دلإستعمار بلعصيان لمدني و بطريقة سلمية. الطريقة ديالو كان ممنوع فيها يهزَ السلاح ولا يدابز, و لفكرة ديالها كانت هي يقاوم لبريطانيين بالسلمية.

لعيد ميلاد د ڭاندي, اللي هو نهار 2 أكتوبر, هو عطلة فلهند, و عالميا هو النهار لعالمي ديال اللاعنف.

بزاف د الناس كانوا باغين يقتلو ڭاندي, وكان غادي يتًقتل 6 د لمرًات. لمرة السادسة نجح فيها القتًال, و تقتل ڭاندي فدلهي ف 30 يناير 1948. كانو لهندوس لمتطرفين باغين يقتلوه حيت كان تيجيهم باللي تيجي من لمسلمين و باللي هو خان لهندوسية وتيشجع التقسيم د لهند.




#Article 254: لمحجوب بن صديق (133 words)


لمحجوب بن صديق، تولد فـ20 فبراير 1922 فمكناس ؤمات فـ17 شتنبر 2010 فباريز، كان نقابي مغريبي.

تولد لمحجوب فـ1922 فمكناس، فين تبع قرايتو لبتيدائية ؤتانوية قبل مايدخل لمكتب سكك لحديدية فين خدم ملي كانت عندو 16 لعام كرئيس د لمحطة د سوق لاربع.

فـ1951، تشد ؤحكمات عليه حوكومة لحماية بعاماين د لحبس، دوز فيها عام ؤعاود رجع فـ1952 مور ما دار إضراب عام بسباب لموت ديال نقابي تونسي فرحات حشاد. ف لخروج ديالو فـ1954، ولا من زوعاما ديال لحركة لعمالية بحيت فـ20 مارس 1955 حل تيحاد لمغريبي لشغل ؤولا لكاتب لعام ديالو.

فـ1957، تعين نائب أول ديال رئيس لمجلس لوطني ستيشاري لي كان هو لمهدي بن بركة. فنفس لعام، تعين كعضو ف لمكتب دولي د شغل.

مات لمحجوب بن صديق نهار 17 شتنبر 2010 فواحد سبيطار فباريز ففرانصا، ؤتدفن فمقبرة شوهادا فدار لبيضا.




#Article 255: لمحجوبي أحرضان (211 words)


لمحجوبي أحرضان (ب لأمازيغية : ⵍⵎⵃⵊⵓⴱⵉ ⴰⵃⵕⴹⴰⵏ)، لي معروف بسميت زّايغ، تولد فـ 1921 ولا 1922 ف والماس ؤ مات ف 15 نونبر 2020 ف الرباط، كان عسكري ؤ سياسي مغريبي.

أصلو من لقبيلة د أيت عمار لي تابعة لأيت سڭوڭو، لمحجوبي أحرضان قرا ف لكوليج د أزرو ؤ موراها ف لمدرسة لعسكرية د مكناس. شارك لمحجوبي معا لجيش لفرانصاوي ف لحرب لعالامية تانية، ؤ فديك لوقيتة ديال لحيماية لفرانصاوية تعين قايد د والماس بين 1949 ؤ 1953.

مور ستيقلال، كان بين ناس لولين لي دخلو لسياسة، خدا بزاف لمناصب ف لحكومة، ؤ تعين والي د رباط، من بعد ولا لكاتيب لعام د لحركة شّعبية ف1962، أحرضان قدر يشارك ف8 لحوكومات مغريبية، من بين لوزارات لي كان شاد؛ وزارة دفاع (1961-1964)، وزارة لفلاحة (1864)، وزارة لفلاحة ؤ لإصلاح زراعي (1965)، وزارة دفاع (1966-1967)، وزارة دولة (1977)، وزارة لبريد ؤ لمواصلات (1977)، وزارة تعاون (1979) ؤ وزارة دولة (1983).

دافع لمحجوبي أحرضان فاش كان ف لحركة شعبية علا ناس د لبلاد. مورا ماوقع نشيقاق لول ف لحركة شعبية عبر لمحجوبي أحرضان علا توجهات ديالو لأمازيغية ف لبرامج ؤ لخطابات ديالو، مفتاخر ب لأصول لأمازيغية ؤ ب تّرات لأمازيغي د لمغاربة، طالب باش تقرا لوغة لأمازيغية ؤ واجه تّيارات ديال تعريب ف لمغريب. عند لمحجوبي أحرضان شي روايات ؤ شعر كيتعلق بتقافة لأمازيغية.




#Article 256: لمحيط لأطلسي (102 words)


لمحيط لأطلسي ولاً بحر رّباط ؤلا لبحر لمحيط هو تاني أكبر محيط فلعالم من مورا لمحيط لمهدًن (الهادي). لمساحة د لمحيط لأطلسي هي 106.460.000 كم², وهو اللي تيخليه ياخد تقريبا 20% من لمساحة ديال لكرة لأرضية, و 29% من لمساحة ديال لبحورا ولمحيطات فلعالم. لمحيط لأطلسي تيحدًوه من الشرق إفريقيا وأوروپا، ومن لغرب أمريكا الشمالية ولوسطانية ولجنوبية. فالشمال هو مرتابط مع لمحيط لمجمَّد الشمالي, وفلجنوب مع لمحيط لمجمَّد لجنوبي (اللي تيوصل تال لقطب لجنوبي).

خط ليستيواء تيقسم لمحيط لأطلسي على جوج: لمحيط لأطلسي الشمالي, ولمحيط لأطلسي لجنوبي. تيتقال باللي لمحيط لأطلسي هو الحدً مابين لعالم لقديم (إفريقيا، أوروپا، آسيا) ولعالم الجديد (أميريكا).




#Article 257: لمخزن (189 words)


لمخزن (لأمازيغية : ⵍⵎⴻⵅⵣⴰⵏ) هو واحد لكلمة عندها معنى خاص ف دارجة ؤلا لأمازيغية ف لمغريب، ؤ غالبا ما كيعني طبقة لي حاكمة بحال لمليك ؤلا سلطان ؤلا لقياد ؤ شيوخة دلقبايل، ؤ لعساكرية، ؤ لأمن، ؤ صحاب ضريبة ؤ أي واحد تابع للإدارة لمركزية.

تستعملات لكلمة د لمخزن أول مرة ف لعهد د سّعديين ف لقرن 16 ؤ كيعنيو بيه لحكومة د سلطان، ؤ بقا كيتستعمل حتا ف لعهد د لعلويين حتال لعهد دلإستعمار .

تسمات لبلايص لي تابعين لسلطان ب بلاد لمخزن ؤ لعكس لبلايص لي ماتبعينش لحوكم د سلطان كتسمى بلاد سّيبة لي كانت القبائل أمازيغية ديالها مكتخلصش ضريبة خصوصا في الأطلس والريف

كلمة د «لمخزن» كتعني حرفيا «المستودع بالعربية» ولكن كانت كتعني ف لمغريب نخبة لي حاكمة. ؤ غالبا خدات لمعنى ديالها من ضرائب، ؤ لي كانت كتجمع ؤ تخزن ف لمخازن د سلطان.

دخلات لكلمة د لمخزن ف لوغة لفرانسوية ب ماغازين (magasin)، ؤ لوغة طاليانية ب ماغازينو (magazzino). ؤ دخلات ل لونكلي من الفرانسوية لوسيطة ب (magazine)، وكان فللول كيعنيو بيه لمخزن دسلاح، ولكن تحول من بعد باش اعنيو بيه مجلة. ولكن مازال ف لوغة صبنيولية كلمة د (Almacén) لي عندو نفس لمعنى.




#Article 258: لمكسيك (166 words)


لولايات لمتحدة د لمكسيك (بالصبلوينية: Estados Unidos Mexicanos), واللًي معروفة بسميت لمكسيك هي جمهورية دستورية فيديرالية جات فلجنوب د أمريكا الشمالية. تاتحدًها من الشمال لميريكان, من لغرب لمحيط لهادي, من الشرق خليج لميكسيك, من لجنوب ڭواطيمالا وبيليز.

لمسكيك عندها تاريخ قديم ودازو فيها بزاف د لحضارات قبل مايجيو ليها لأوروپًيين, منها لأولميك ولأزطيك ولمايا. ف 1521 دخلو الصبليون للمكسيك وحتلًوها وسمًوها صبانيا الجديدة. بقات لمكسيك تابعة للمملكة د صبانيا تال 1821, وهو لعام اللي ستاقلاًت فيه. من مورا ديك لوقيتة ماكانش ستيقرار بزاف وكانت تاتحارب لمكسيك مع لميريكان وتاتمشيليها لأراضي. بقات لوضعية بحال هاكا تال 1910, وهو لعام اللي وقعات فيه الثورة لمكسيكية, اللي خرج منها الدستور د 1917, والنظام لجمهوري لفيديرالي اللي كاين فلبلاد تال دابا.

تيسكنو فلمكسيك 128.6 مليون د الناس, ولعاصمة ديالها هي ميكسيكو. اللغة الرسمية هي الصبليونية, ولعملة اللي كاتخدًم هي لپًيزو لمكسيكي. لمكسيك عضو فبزاف د لمنظمات دولية بحال لأمم لمتحدة, منظمة التجارة لعالمية, جي 20, ومنظمة التعاون والتنمية ليقتيصادية (اللي كانت هي أول دولة تادخليها من أمريكا اللاتينية, ف 1994).




#Article 259: ملحون (212 words)


لملحون هو فن مغريبي اصيل د لغنا د لقصايد تيناقش مواضيع و قضايا دينية و لا اجتماعية ولا سياسية. ف لملحون، الشاعر هو لي كينظم لكلام و كيلحنو.
زداهر هاد لفن ف لمدون لقديمة بحال فاس، مكناس، مراكش، وسلا ف لمغريب. و تلمسان ف لجزائر.

بدا لملحون ف تافيلالت لي كانو يدوزو منها لكًفلات د لبيع و الشرا و هادشي ساهم باش يبان هد لفن تماك.

ف لول ضهرات لقصيدة الزجلية لي هي شعر بالدارجة مخلطة بكلمات ب لعربية لفصحى. و تكنات ببزاف د السميات: لفن لموهوب (لحقاش بزاف د زجالين كانو اميين و كانو تيقولو هدي هيبة من عند الله)،الساكًية، النضم، لوزن، لكلام، لغا... ف لقرن تسعود هجري، بان لملحون. و ولات لقصيده تتغنا. جوج د الشعرا اصلو هد الفن و عطاو الركائز دياولو: الشيخ عبد العزيز المغراوي و المصمودي.

من واحات تافيلالت، نتاشر لملحون ف بزاف د لبلايص ف لمغريب و ف لجزائير.و هاد ل انتشار ساهم ف التطوير ديالو. من الناس لي ساهمو ف لانتشار د لملحون هما لحرفيين و لي تيديرو الصناعة التقليدية (النجار، اللباط، الخراز، الدباغ، الدراز...) و علي يديهم خرجو بزاف د لميازن (الدقة ديال لمهراز، لمرمًا، لقياس...)

لملحون دوا على مواضيع مختلفة.

ف لمواضيع ديال الدين، تنضموا قصايد ف التوحيد و ف السيرة النبوية. كان تيتخدم لملحون باش يوصل بعض الرسائل و يعلًم الناس.

.




#Article 260: لمملكة لمتحدة (192 words)


لمملكة لمتحدة د بريطانيا لعظمى وإيرلاندا الشمالية (بلينڭليزية: United Kingdom of Great Britain and Northern Ireland), اللي معروفة بسميًت لمملكة لمتحدة, هي بلاد جات فالشمال لغربي د أوروپا. لمملكة لمتحدة تاتجمع بريطانيا لعظمى و إيرلاندا الشمالية. عندها حدود وحدا اللي أرضية وهي مع لجمهورية د إيرلاندا. من غير داكشي, تيحدًوها غي لبحورا: لمحيط لأطلسي وبحر الشمال و لكانال لينڭليزي و النفق د لمانش اللي تيربطها بفرانسا.

لمملكة لمتحدة ملكية دستورية وهي دولة اتًحادية من عام 1800. فيها 4 د لأقاليم هوما: لينڭليز, سكوطلاندا, إيرلاندا الشمالية و ويلز. لحكومة لمركزية كاينة فلعاصمة لندن, ولكن كاين حكومات فلعواصم لمحلية تاهي, واللي هي: بيفاسط و كارديف و إيدينبرا. اللغة الرسمية هي لينڭليزية, وعاد كاين لغات وطنية بحال لسكوطلاندية ولويلزية ولكورنية ولإيرلاندية.

لمملكة لمتحدة كانت تاريخيا بلاد استعماري, ستعمرات كثر من الرًبع د لعالم, وهو اللي خلاها فواحد لوقت تكون أكبر امبراطورية فالتاريخ, واللي خلا لينڭليزية لغة منتاشرة بزاف فلعالم وتاتًهضر فبزاف د لبلدان.

لمملكة لمتحدة عندها قتيصاد قوي, هو السادس فلعالم, وعندها الطاقة النووية. هي داخلة فبزاف د لمنظمات دولية بحال لأمم لمتحدة (عضو دائم فمجلس لأمن) ومنظمة التجارة لعالمية
وحلف الشمال لأطلسي. كانت داخلة تا فليتيحاد لأوروپي من 1973, ولكن خرجات منًو فيناير 2020.




#Article 261: لموحدين (255 words)


لموحدين ؤلا إموحيدن (لأمازيغية : ⵉⵎⵡⵃⴷⵉⵢⵏ - Imweḥdiyen) هما سلالة أمازيغية مصمودية غا يأسسو لإمبراطورية لموحدية، بزعامة بن تومرت (لأمازيغية : ⵓ ⵜⵓⵎⴰⵔⵜ)، غاتكون لعاصمة ديالهم هي مراكش من بعد ما غلبو لمرابطين عام 1146، ؤ غادي اتوسعو علا لمغريب د لوسط (لجزاير دابا) و إفريقية (ليبيا ؤ تونس دابا)، ؤ يحكمو لأندلس (صبانيا ؤ لبرطقيز دابا)، ؤ يقاومو لقشتاليين، ويتبتو لوجود لموري ف إبيريا من بعد ما طييحو مملكة أراڭون ؤ ناڤارا.

دخلو تلمسان ؤ وهران ف لمغريب د لوسط عام 1144.

لإمبراطورية لموحدية غادي تاخد ڭاع لبلايص لي بقاو ف لمغريب.

لموحدين غاديين يدخلو لمدينة جزاير عام 1153.

فعام 1160، لموحدين غايدخلو على إفريقية ؤ شرق إقليم طرابلس (ليبيا دابا) ؤ رجعو لمهدية ؤ جزيرة جربة (تونس دابا) ؤ ڭاع سواحل إفريقية من نورمان.

وخا لقسوحية ديال لإصلاحات دلموحدين؛ لإنتاج لأدبي بقا مستمر، ؤ لجاميعات دلموحدين بقاو كيقريو لمعرفة د لعولما لمغاربة ؤ لأندلسين ؤ لكتوبة ديال ليونانين ؤ رومان.

ف لعهد دلموحدين بانو بزاف ت لعولما ؤلأدابا، بحال بن روشد، حفصة بنت لحاج لركونية، بن طوفيل، بن زوهر، بن لعبار، بن عميرة، ؤ بزاف ت لفلاسفة ؤ لعولما لخرين.

ولكن تشدد ديالهم مع أهل لكيتاب خنق لمشهد ثقافي لأندلسي ليهودي لي كان مجهد من قبل، ؤخلا موسى بن ميمون يمشي للشرق ؤ مشاو بزاف ت ليهود ل توليدو لي كانو حاكمينها لقشتالين.

لموحدين كانو معروفين ب لبني دجوامع علا طريقة لمغريبية لمورية لي كانت معروفة بلزخرفة ؤ زواق ديالها ؤ لقسوحية ديالها داكشي علاش باقي منهم شي وحدين تال دبا فلمدن لي كانو حاكمين بحال مراكش، رباط، تنمال اشبيلية، تلمسان، ؤ قرطبة.




#Article 262: لهند (158 words)


لهند, رسميا لجمهورية د لهند (بلهندية: भारत गणराज्य - بلينڭليزية: Republic of India) هي واحد لبلاد كبيرة جات فلجنوب د آسيا. هي السابعة فلعالم من حيث لمساحة, والتانية من جيهت السكان. تاتعتابر لهند أكبر جمهورية ديموقراطية فلعالم من عدد الناس اللي ساكنين فيها. تيحدًها لمحيط لهندي من لجنوب، پاكيستان من لغرب، الشينوا ونيپًال وبوتان من الشمال، و بنڭلاديش وميانمار من الشرق.

لهند عندها تاريخ وحضارة طوال ودازو منها بزاف د لبلدان ولإمبراطوريات. خرجات من لهند 4 د لأديان كبيرة هي لهندوسية ولبودية ولجاينية والسًيخية، و وصلوليها بزاف د لأديان فلألفية اللولة بحال ليهودية ولمسيحية ولإسلام. ف 1858 بدات بريطانيا تاتسعمر لهند, وبقات فيها تال 1947, وهو لعام اللي ستاقلاًت فيه لهند لبريطانية وتقسمات للجمهورية د لهند و لجمهورية لإسلامية د پاكيستان.

لهند دولة فيديرالية فيها 28 ولاية و 7 د لأقاليم تًيحادية. تيسكنو فلبلاد تقريبا مليار و 352 مليون د الناس, ولعاصمة ديالها هي نيو ديلهي. اللغات الرسمية د لهند هوما لهندية ولينڭليزية, ولعملة د لبلاد هي الروپًية.




#Article 263: لو كوغبوزيي (126 words)


شاغل-إدوارد جونيغي معروف بـِ لوكوغبوزيي (بالفرنسية: Charles-Édouard Jeanneret ولا Le Corbusier؛ 6 أكتوبر 1887 – 27 غشت 1965) هو مهندس معماري سويسري-فرنسي، مصمم، رسام، مخطط حضري، كاتب، وواحد من المؤسسين ديال ما يسمى بالعمارة الحديثة. تزاد فسويسرا وخدا الجنسية الفرنسية في 1930. راكم الخبرة ديال خمسة عقود، وصمم مباني في أوروبا، اليابان، الهند، أمريكا الشمالة والجنوبية.

السعي ديالو باش إقدم شروط عيش أحسن لسكان المدن المزدحمة خلاه إتأثر بالتخطيط الحضري، وكان عضو مؤسس في المجلس العالمي للعمارة الحديثة (CIAM)، لو كوغبوزيي صايب المخطط الرئيسي ديال مدينة شانديغار فالهند، وساهم في التصميمات ديال عدة مباني تما وخاصة المباني الحكومية.

في 17 يوليوز 2016، 17 مشروع ديال لو كوغبوزيي في سبعة الدول دخلو لقائمة اليونسكو للتراث العالمي تحت عنوان العمل المعماري ديال لو كوغبوزيي، مساهمة متميزة فالحركة العصرية.




#Article 264: ليبيا (133 words)


ليبيا (رسميا: دولة ليبيا) هي واحد لبلاد فشمال إفريقيا. تيحدها من الشمال البحر لبيض لمتوسط, من الغرب الجزئر و تونس, من الشرق مصر و السودان, ومن لجنوب التشاد و النيجر. لعاصمة ديالها هي طرابلس. لمساحة ديال ليبيا هي 1.759.541 كم², و تيسكنوا فيها 6.6 مليون د الناس على حساب لإحصائيات د 2018.

ليبيا كانت تابعة للدولة العثمانية, وكانت سميتها إيالة طرابلس. ف 1911, ولاًت مستعمرة د الطاليان حتى استاقلات ف 1943 و كانت سميتها لمملكة د ليبيا. ف 1969, غادي تولي جمهورية, وغادي يكون أول رئيس ديالها هو معمًّر لقدافي, اللي دار انقلاب على لملك د ليبيا إدريس اللول السنوسي. ف 2011, غادي تنوض الثورة د 17 فبراير, اللي غادي تطيح النظام ديال القذافي (اللي غايتقتل ف 20 أكتوير 2011). من ديك الوقت و الحالة مروًنة فليبيا وماكاينش طرف اللي حاكم لبلاد كاملة.




#Article 265: ليتيحاد ليفريقي (116 words)


ليتيحاد ليفريقي (بلينڭليزية: African Union) هو واحد لمنظمة دولية تاتجمع 55 عضو أغلبيتهم دول كاينا فإفريقيا. تأسس ليتيحاد لإفريقي ف 9 يوليوز 2002. قبل منًو كانت منظمة خرا سميتها لمنظمة د لوحدة لإفريقية (1963 - 2002), و اللي كانت هي أول منظمة بغات تجمع ڭاع لبلدان د إفريقيا مورا لستيقلال ديالهم.

لمقر ديال ليتيحاد لإفريقي ولأمانة لعامة ديالو كاينبن فأديس أبابا فإتيوپيا.

لمغريب من بين الدول ال30 اللي أسسو لمنظمة د لوحدة لإفريقية ف 1963. ف 1984, عتارفات ديك لمنظمة بلپًوليزايو عضو فيها, وهو يخرج منها لمغريب باش يحتجً.

ف 2017, غادي يرجع لمغريب للتيحاد لإفريقي عاوتاني, وغايقبل بلقوانين ولأعضاء ديالو بلا تا شروط. 39 من 54 عضو د ليتيحاد ليفريقي صوتو باش يرجع ليه لمغريب.




#Article 266: ليونان (172 words)


اليونان (ولا الڭريڭ؛ سمية قديمة) و رسميا لجمهورية د ليونان (بليونانية: Ελληνική Δημοκρατία) هي بلاد جات فلجنوب الشرقي د أوروپا. ليونان عندها موطع ستراتيجي مابين أوروپا وإفريقيا والشرق لأوسط. تاتحدًها من الشمال ألبانيا ومقدونيا الشمالية وبلغاريا, من الشرق تركيا, و من لجنوب ولغرب لبحر لبيض لمتوسًط. ليونان فيها أرخبيل ديال بزاف د لجزر, منها 227 اللي ساكن فيها بنادم.

التاريخ د ليونان كدولة من أطول تواريخ لبلدان د لعالم, و تيتعتابر هو لأصل د لحضارة لغربية. بداو فليونان بزاف د لحوايج اللي أثروا فلعالم بحال الديموقراطية, لفلسفة لغربية, التاريخ, الرياضيات, لأدب والدراما لغربية و حتا لألعاب لأولمپية. حكمو فليونان بزاف د لبلدان منها لإغريق, الدولة الرومانية, لبيزانطيين و الدولة لعثمانية. مورا حرب ف 1830, غادي تستاقل ليونان من الدولة لعثمانية وأتولي لجمهورية لحديثة اللي تانعرفو دابا.

تيسكنو فليونان تقريبا 10.7 مليون د الناس, ولعاصمة ديالها هي أتينا. اللغة الرسمية هي ليونانية, ولعملة اللي كاتخدًم هي ليورو. ليونان عندها أقوى قتيصاد فلبلقان, وهي عضو مؤسس د لأمم لمتحدة. هي داخلة فبزاف د لمنظمات الدولية بحال ليتيحاد لأوروپي ومنظمة التجارة لعالمية ولحلف الشمال أطلسي.




#Article 267: ليونيل ميسي (171 words)


ليونيل أندريس ميسي كوتشيتيني (تولد ف 24 يونيو 1987 فروزاريو فلارجونتين), واللي معروف بسميت ليو ميسي, ولا ميسًي, هو لعاب د لكورة أرجونتيني تيتعتابر من بين أحسن اللعابة د كورة فالتاريخ. ميسي لعب لمسيرة لاحترافية ديالو كاملة ففرقة وحدا هي إف سي برصلونة (لبارصا), و تيلعب مع لفريق لوطني د كورة ديال لارجونتين.

ميسي عندو بزاف ديال لأرقام قياسية فلعالم ديال كورة, منها بحال دابا:

تولد ليونيل ميسي فمدينة روزاريو فلارجونتين نهار 24 يونيو 1987, وهو التالت من ربعة د لخًوت. ملًي دار 6 سنين, دخل يلعب مع لفرقة د مدينتو نيويلز أولد بويز ولعب معاهم ست سنين. فصغرو كتاشفو عندو لأطبا مشكل فالنقص ديال لهرمونات د النمو, و فرقتو جاها غالي باش تخلص عليه الدوا فالدوام.

بداو واليديه تيحاولو يقلبو على شي طريقة باش يحلو لمشكل, وفشتنبر 2001 مشا مع ابًاه و سكنو فبرصلونة, باش يشوفو واش ليو يقدر يسيني مع إف سي برصلونة, و فنفس لوقت يخلصو عليه الدوا ديالو. فنونبر 2003, لعب أول ماتش ديالو مع لفرقة د لكبار د لبارصا ضد پًورطو, و كانت عندو 16 لعام.




#Article 268: لڭابون (181 words)


لڭابون (ب لفرانساوية: République Gabonaise) هي بلاد جات ف لغرب د وسط إفريقيا على لخط ديال لإستواء. تيحدّها لخليج د غينيا من لغرب، غينيا ستيوائية من الشمال لغربي، كاميرون من الشمال و جمهورية لكونڭو من الشرق و لجنوب.

ف 1885 ولاّت لبلاصة اللي فيها لڭابون دابا مستعمرة د فرانسا، و بقات هاكاك تال 1960، اللي هو لعام اللي ستاقلات فيه لجمهورية د لڭابون. من نهار ستاقلات لبلاد تال دابا حكموها غي تلاتة ديال الروآسا. ف اللول ديال التسعينات دارت لڭابون دستور جديد و خلاّت فيه لفرصة باش يتدارو بزاف د لأحزاب باش تولي لإنتخابات ديموقراطية و شفافة كتر.

تيسكنو ف لڭابون شويا كتر من 2 د لمليون د الناس، و لعاصمة ديالها و أكبر مدينة فيها هي ليبروڤيل. اللغة الرسمية ديال لبلاد هي لفرانساوية، و عاد كاين 40 لغة اللي تاتهضر ف لبلاد ولكن ماعندها تا وضع قانوني. لفلوس اللي كاتخدّم ف لبلاد هي لفرنك سي إف آ ديال وسط إفريقيا.

لأصل د السمية ديال لڭابون ماجي من لبرتغالية، حيت لكلمة ديال ڭاباو تاتعني كبّوط، و هو الشكل اللي تيبان عليه لواد د كومو ملّي تيصب ف لمحيط لأطلسي ف ليبروڤيل.




#Article 269: لڭناوي (153 words)


محمد منير (تولد فسلا ف 28 أكتوبر 1988) و اللي معروف بلڭناوي ولا السيمو لڭناوي, هو راپور مغريبي معروف بلأغاني ديالو اللي تيزعم فيها بزًاف.

تولد السيمو لڭناوي فحي الانبعاث فسلا ف 1988, و سمًا راسو لڭناوي حيث عزيزة عليه لموسيقا د ڭناوة من صغرو.

بدا الراپ ف 2011, و كانت عندو فرقة سميتها آرمي سلا, وموراها بدا تيبان فقنوات التواصل لإجتماعي ودار لقناة د يوتوب ديالو ف 2015.

ف 29 أكتوبر 2019, خرًج لڭناوي هو و جوج راپورات آخرين (ولد لڭرية ولزعر) واحد لأغنية سميتها عاش الشعب, ونتاقدو فيها لحالة د لمغريب من بزاف د الجوًايه. لأغنية دارت لبوز وشافها كثر من 23 مليون واحد.

نهار 1 نونبر 2019, عتاقلو لبوليس لڭناوي, وكان السباب على ماقالو هو باللي دار إهانة موظفين عموميين حيث عاير لبوليس فواحد اللايڤ كان داير فانترنت ملي كان سكران, وقالو باللي هادشي ماعندو تا علاقة بلأغنية د عاش الشعب. نهار 25 نونبر 2019, تحكم عليه بعام د لحبس.




#Article 270: مالي (183 words)


لجمهورية د مالي (بلفرانساوية: République du Mali) هي دولة فلغرب د إفريقيا ماكاطًلش على لبحر. تاتحدًها من الشمال لجزائر, من لغرب موريتانيا والسينيڭال, من الشرق النيجر, ومن لجنوب غينيا وبوركينا فاصًو وكوط ديڤوار.

لبلاصة اللي فيها مالي دابا كانت تابعة لتلاتة د لإمبراطوريات إفريقية, اللي هي لمملكة د غانا ولمملكة د مالي ولمملكة د صونڭاي. دخلات فرانسا للمنطقة فاللًخر د لقرن 19, ودخلاًتها مع لمستعمرات ديالها فإفريقيا جنوب الصحرا, اللي كانت مسمًياهم السودان لفرانساوي. ف 1959 ستاقلات مالي من فرانسا وتجمعات هي والسينيڭال فبلاد وحدا اللي كانت سميتها ليتيحاد د مالي, وكانت لعاصمة ديالو داكار. ف 1960, نساحبات السينيڭال من هاد ليتيحاد, و ولاًُت مالي هي لجمهورية د مالي اللي كانعرفو دابا.

تيسكنو فمالي 19.3 مليون د الناس, ولعاصمة ديالها هي باماكو. اللغة الرسمية د مالي هي لفرانساوية, وعاد كاين لغات اللي كيهضروهوم بزاف د الناس فلبلاد بحال لبامبارا ولفولا. لعملة اللي كاتخدًم فلبلاد هي لفرنك لغرب إفريقي. مالي فيها 8 د لمناطق كبار, اللي تاتوصل فالشمال للصحرا, وفلجنوب للواد د النيجر ولواد د السينيڭال. ليقتيصاد د لبلاد تيرتاكز على لفلاحة و الصيادة د لحوت, وعاد كاين موارد طبيعية بحال الدهب وليورانيوم ولملحا.




#Article 271: مامفاكينش (113 words)


مامفاكينش كان واحد السيت د لإعلام لمواطن فلمغريب تأسس ففبراير 2011 فوقت الربيع الديموقراطي باش يتبًع لإحتجاجات د 20 فبراير.

تأسس مامفاكيش ففبراير 2011 من مناضلين كانو باغين تكون فلمغريب منصة د الصحافة لمواطنة باش مايبقاش التهميش د لأصوات اللي تاتنتاقد. ملًي تأسسات, علنات مامفاكينش باللي كانت مستاقلة على أي هيأة سياسية ولاحزب ولاتنظيم.

ف 2012, نشرات لمجلة لميريكانية فوريين پوليسي تحقيق على الحضية والتبرڭيڭ فأنترنت. هضر ديك التقرير على لقرصنة اللي تدارت للحواسيب د شي أعضاء د مامفاكينش. كان تصيفط ليهم واحد لڤيروس اللي قرا لمييلات مابين الناس د مامفاكينش وتيسرق كلمات السًر ديالهم وتيحل لكاميرات ولميكروفونات ديالهم تاهوما. من مورا تحقيقات, تًلقا باللي لحكومة هي اللي كانت تادًير هاد التجسس عليهم.




#Article 272: مانڭا (100 words)


المانڭا هي السمية ديال واحد النوع د لقصاص لمصورين(حجايات مصورين) فالجاپون، ؤ كاتستعمل نفس سّمية حتى برا الجاپون على نفس نوع د لقصاص سوا كانت جّاپونية ؤلا لا, بشرط تكون بنفس الستيل.

كتعتبر لمانڭا واحد الضاهرة اجتماعية لي كتبقشش تقريبا فكاع المواضيع (الرومانسية، المغامرات، الخيال العلمي، التكوميك...). ؤ فيها نواع لكاع لعمار (سوا صْغار ؤلا لكبار). يمكن لينا نعتبرو لمانڭا من أنجح تجارب لعالمية  فضّومين ديال لحجايات لمصورين لحقّاش كاين رّواج عليها ؤ كاتدخل فسيمانة فالجاپون فلوس كتيرة كتساوى مع العائدات ديال مريكان.

الجاپون و فرانسا هما اكتر بلدان كايستهلكو المانڭا.

من بين لمانڭات لمعروفة بزاف و لي عندها المحبين فلعالم كله:




#Article 273: مايكل فراداي (101 words)


مايكل فاراداي (ب لونڭلي : Michael Faraday) هو عالم د الكيمياء ؤ لفيزيك نڭليزي، كان من بين لي طورو لعلم د لمجال كهر-مغناطيسي ؤ كهر-كيميائي، كان أول واحد غا يكتاشف لبنزين، ؤ لقوانين د تحليل لكهربائي، ؤ لكاطود ؤ لأنود، ؤ لقطبية، ؤ لأيون.

وخا ماقراش مايكل فاراداي لماط ف لمدرسة كان كيتقال عليه انو كان عالم مجهد، حيت تصنف بأنو من أوعر لعولاما ف تاريخ. ف سيستيم د لوحدات دولي كنحسبو لقيمة د لكونديكتور ب لفاراد لي تسمات بسميتو. ؤ كاين تابت فارادي لي حتا هو تسمى بسميتو لي كيساوي 96,485 كولومب لي هي شارج د مول واحد د لإلكترونات.




#Article 274: مبارك لبكاي (167 words)


مبارك لبكاي، لي سيمتو ف لحقيقة هي مبارك بن مصطفى لبكاي لهبيل، تولد ف18 أبريل 1907 فبركان ومات نهار 12 أبريل 1961 فرباط، كان سياسي ؤعسكري مغريبي.

مبارك لبكاي تولد فقبيلة بني يزناسن نهار 18 أبريل 1907، بضبط فمدينة بركان. قرا ف لمدرسة لعسكرية ديال مكناس ودخل للجيش لفرانساوي، ؤشارك معاهوم فلحرب لعالامية تانية ؤطلع لڭراد ديال ليوطنون-كولونيل. فلحرب، لبكاي تصاب بجروح خطيرة ؤمشات ليه رجل فواحد لمهمة ف فرانصا. مور لحرب، ولا باشا ديال صفرو، ؤقدم ستيقالتو فـ1953 ملي فرانصا نفات سلطان محمد بن يوسف. لبكاي كان عنصر مهم ف لمفاوضات معا فرانصا باش يرجع سلطان فنونبر 1955.

فـ7 دجنبر 1955 تعين لبكاي كرئيس د أول حوكومة فتاريخ لبلاد، ؤكمل لمفاوضات معا فرانصا لي خلات لمغريب ياخد ستيقلال ديالو ف2 مارس 1956، ؤبقا رئيس د لوزارة حتال 15 أبريل 1958 ملي حيزب ستيقلال شكل حوكومة جديدة. لبكاي عاود رجع فماي 1960 للحوكومة لي رئسها لماليك محمد لخاميس، وخدا فيها منصب ديال وزير داخيلية حتا مات بسكتة قلبية نهار 12 أبريل 1961 فرباط وكان عندو 54 عام.




#Article 275: محمد البريهي (157 words)


محمد بن عبد السلام البريهي (تولد ففاس ف 1850 - مات ف 1945) كان فنان ديال لموسيقى لأندلسية. أسس لجوق ديال لبريهي اللي كان هو لجوق الرسمي د لإذاعة و التلفزة المغربية. تسمًا الشارع اللي فيه لباطيما د التلفزة فالرباط بشارع البريهي, و دار التلفزة بدار البريهي باش يعتارفو بالدور ديال هاد الفنان فلموسيقا د لمغريب.

تولد محمد بن عبد السلام البريهي ف 1850 ففاس فعائلة أصلها من لقبيلة د حميان فالنواحي د تازة. تعلم لموسيقا لأندلسية من صغرو مع بًاه عبد السلام البريهي, اللي كان فنان معروف و كان مع اللجنة ديال الشيوخ اللًي راجعو كنًاش الحايك ف 1882.

تعلم محمد البريهي فدار الجامعي ودخل مع واحد لفرقة د لموسيقا, فين حفظ مزيان لقصايد, وولاً تيعرف يلعب مزيان للرباب. فوقت ليستعمار, غادي يأسس لجوق ديالو اللي تسمًا جوق البريهي, وغادي يتساراو لمغريب ويولًيو معروفين. محمد البريهي كان ضابط ڭاع النوبات ديال الآلة ووثقها. تعلُمو على يديه بزاف د الموسيقيين لكبار بحال أحمد الوكيلي وعبد الكريم الرايس.




#Article 276: محمد بن سعيد آيت إيدر (227 words)


محمد بن سعيد آيت إيدًر (تولد ف 1 يوليوز 1925 ف تين منصور - شتوكة آيت باها) هو سياسي ومناضل مغريبي. تيتعتابر رمز من الرموز د ليسار د لمغريب.

تولد محمد بن سعيد آيت إيدر ف 1925 فدوار تين منصور فاشتوكة آيت باها فسوس. قرا فاللول تما, ومن بعد مشا يكمل فمراكش, وتما فين تعرًف على النضال لوطني ضد ليستيعمار وتلاقا ناس بحال عبد الله براهيم والمهدي بنبركة. ف 1951, شارك فمظاهرة ضد لاستعمار وتسجن 3 شهور.

بدا آيت إيدر لعمل لمسلًح فلخمسينات, وهو من لمؤسسين د جيش التحرير. كان هو الشاف ديال جيش التحرير فجنوب لمغريب, واللي بقا مكمًل واخا جا لاستقلال, اللي كان تيسمًيه آيت إيدر استقلال ناقص. ف 1958 تحالفات الدولة مع فرانسا وصبانيا باش يحاربو جيش التحرير وهرًسوه فواحد لعملية سمًاوها عملية الشطابة - operation écouvillon.

من بعد ماتحل جيش التحرير, بقا ينسعيد تيعارض النظام, وتحكم عليه بالإعدام ف 1963. قبل ما يتقبط هرب للجزائر, ومن بعد مشا لفرانسا ودخل مع لمنظمة ديال 23 مارس. رجع ينسعيد للمغرب فاللول د التمانينات و أسس لحزب د منظمة العمل الديموقراطي الشعبي ف 1983. ودخل بلحزب ديالو للبرلمان من 1984 تال 2007.

ف 2005, كان من لمؤسسين ديال لحزب ليشتيراكي لموحًد, اللي جمع بزاف د لأحزاب ليسارية الصغيرة فلمغريب.

ف 2001, خرًج بنسعيد آيت إيدر كتاب سميتو صفحات من ملحمة جيش التحرير بالجنوب المغربي, اللي هضر فيه على التاريخ ديال جيش التحرير فسوس ولجنوب د لمغريب.




#Article 277: محمد بن عبد الكريم الخطابي (188 words)


محمد بن عبد لكريم لخطابي (تولد فأجدير ف 1882، مات ف لقاهرة فمصر ف 6 فبراير 1963)، و لي معروف بسميت مولاي موحند، ولا عبد الكريم، كان قائد سياسي وعسكري د لمقاومة فلمنطقة د الريف فوقت لإستعمار صبليوني و لفرانساوي للمغريب.

تولد فوسط عائيلة ديال لأعيان، باه عبدلكريم لخطابي كان خدام قاضي.

لخطابي معروف باللي كان تيخدًم تقنية د حرب لعصابات، لي خلاتو يربح بزاف د لمعارك، منها لمعركة د أنوال، لي ماتو فيها كتر من 10.000 عسكري صبليوني. من 1921 ل 1926، أسس الخطابي لجمهورية د ريف، و كان هو رئيس ديالها. ف 1926، تحبسات هاد لجمهورية من بعد ماتحالف سلطان مولاي يوسف مع فرانسا وصبانيا وخدًمو لأسلحة لكيماوية باش يقضيو على لمقاومة فريف.

من مورا ما استسلم لخطابي، نفاتو فرانسا لجزيرة لاريينيون، اللي ڭلس فيها 22 عام، حتى مشا لمصر وخدا فيها اللجوء ف 1948، وبقا ساكن ف لقاهرة حتا مات وتدفن فيها ف 1963.

لخطط ديال لخطابي فحرب لعصابات أترات على بزاف د لقادة لي غايجيو من موراه وتعلمو منو بحال شي ڭيڤارا وهو شي مين و ماو تسي طونڭ. لخطابي كان هو أول مغربي بان فالصفحة اللولا ديال مجلة تايم لميريكيانية، ف غشت 1925.




#Article 278: محمد بنعمر الزياني (131 words)


محمد بنعمر الزياني (تولد ف 1938 فالرباط) مغني مغريبي فلفن ديال لعيطة. تيتسمًا جيمي هاندريكس ديال لكامانجة, حيت تيعرفها مزيان وتيبدع فالجرًة اللي تيدير.

تولد محمد بنعمر الزياني ف 1938 فالرباط ولأصل د عائلتو من لقبيلة د ولاد زيان فالشاوية. ملًي كان صغير, كان مولوع ببزاف دلأنواع د لموسيقا بحال لملحون ولأندلسي ولغرناطي, وكان تيمشي بزاف للقهوة د لبارودي فسلا, وتعرف فيها على بزاف د لمغنيين بحال المعطي بنقاسم، أحمد البيضاوي، أحمد الغرباوي وإسماعيل أحمد.

خدم الزياني موظف فلولاية د الرباط, وموراها ترجمان فالرماني مابين 1958 و 1959. من بعد خدم فمكتب الصرف ف 1961.

ف 1964, حتارف لموسيقا ومن دبك الساعة وهو خدام مغني. داز بزاف د لمرًات فالسهرات د التلفازة وشارك فبزاف د لمهرجانات فلمغريب وتا فلخاريج.

محمد بنعمر الزياني لكًريا عندو بزاف د لأغاني اللي معروفة فلمغريب, منها:




#Article 279: محمد زفزاف (151 words)


محمد زفزاف (خلاق ف سوق لاربع لغرب ف 1945 و مات ف كازا ف 13 جويي 2001) كاتب قصة قصيرة و روايات مغريبي. هو من أهم لكتاب و رّوائيين لمغاربة ف لقرن ل 20 و مشهور بزاف ف لعالم لعربي و ترجمات رّوايات ديالو ل لوغات كتيرة. رّوايات و لقصص د زفزاف كاتميز ب أنها كاتدور ف لمغريب لمنسي (لهامشي) و شخصياتو ناس مقودة عليهوم و مقصيين من لمجتمع. لعالم رّوائي ديال زفزاف واخا كايدور ف سياقات قاسحة إلا أنه عامر ب لإنسانية و شّاعرية، و زيد على دلك أن لأدب ديالو كايعكس ب واقعية كبيرة تّغيرات لجتيماعية و لمشاكيل ديال لمغريب ف نّص تّاني د لقرن لعشرين.

زفزاف كايسميو نّقاد لعرب ب شاعر رّواية لمغريبية.

صدرات وزارة تّقافة لمغريبية لأعمال لكاملة ديالو مجموعة (لقصصية و رّوائية) و كل 3 سنين كاينة جائزة عالمية بسميتو ديال رّواية، كاتعطا ف مهرجان أزايلا، و كان أول واحد دّاها هو رّوائي سّوداني الطيب صالح.




#Article 280: محمد شكري (174 words)


محمد شكري (خلاق ف آيت شيگر، نّاظور ف 15 جويي 1935 و مات ف طنجة ف 15 نونبر 2003) كاتب و روائي مغربي. كايتعتابر من أشهر و أنجح لكتاب لمغاربة على لمستوى لعالمي ب حيت ترجمات لكتوبة ديالو ل كتر من 20 لغة. أهم كتوبة ديالو هوما سّيرة داتية ديالو لّي كتبها ف 3 د رّوايات: الخبز الحافي، زمن الأخطاء و وجوه. شكري كاينتامي ل تيار أدب لهامش، لّي هو من رّموز ديالو مع محمد زفزاف، هاد سّتيل لّي ميز لأدب لمغريبي انطلاقا من سبعينات لقرن لعشرين. لكتابة ديال شكري كاتميز ب لواقعية ديالها و لجرأة ديالها من حيت لّغة ديالها و عرض لحميمية ديال العوالم لهامشية لّي كاتدور فيها لأحداث. شكري من رموز تيار رواة طنجة، هاد لمدينة لّي حاضرة ب قوة ف لكتوبة ديالو ب لأماكن ديالها و شّخصيات لّي ميزات سّاحة لأدبية ديالها.

شكري كتب كتوبة خرين مهمين من غير رّوايات خصوصا ف نّقد لأدبي حول تصورو ل لأدب و تّوتيق ديالو ل تّجارب لحياتية و لأدبية ديال شخصيات لّي ماركات حياتو لأدبية ف طنجة خصوصا بول بولز و جان جيني.




#Article 281: محمد مغني (131 words)


محمد مغني (بلأمازيغية ⵎⵓⵃⴰⵎⴻⴷ ⵎⵖⵏⵉ ) هو واحد المغني مغربي من الأطلس المتوسط تيغني بالشلحة و الدارجة وكيخدًم الآلة د لوتار.

تولد محمد مغني فلقبيلة ديال آيت بوحدو فالنواحي د خنيفرة ف 1950. اباه كان عسكري د فرانسا فوقت الاستعمار وصيفطوه لمدينة مغنية. ملًي رجع للمغرب, ولاو صحابو وعائلتو تيعيطولو أو مغنية, اللي تاتعني بالشلحة ولد مغنية. ملًي تقيد محمد فلمدرسة ف 1957 سجلوه بسميت محمد مغنية, ولكن جاتهم مبنتًة, وبدًلوها لمحمد مغني وولاًت مغني رسميا هي لكنيًة د لعائلة.

تعلم محمد مغني لوتار مع لوقت حتا ولاً مزيان فيه وبدا تيغني رسميا من 1970. ف 1973, تعتاقل حيث كتب واحد الشعر تيهضر فيه على الضحايا ديال أحداث مولاي بوعزة ومشا للحبس فوقت سنوات الرصاص.

غنًا مغني على بزاف د لمواضيع بحال باضاض (لحب) والنوسطالجيا ولفولكور التقليدي ديال زايان (لأطلس لمتوسط).




#Article 282: مراكش (226 words)


مراكش (بتمازيغت: ⴰⵎⵓⵔⴰⴽⵓⵛ اموراكوش، أرض الله.) كاتسمًا حتا المدينة الحمرا و مدينة سبعة رجال و عاصمة النخيل ، هي مدينة مغربية جات فجنوب الوسط د البلاد و بضبط ف سهل الحوز على الضفة الجنوبية من واد تانسيفت. تيسكن فمراكش جايّة لمليون واحد على حساب الإحصاء د 2014.

مراكش وحدة من المدون اللي كانت معروفة ف لعالام حيت كانت عاصمة د المغرب، داكشي علاش تسمى المغرب بالفارسية مراكش، وحتى ب الصبليونية (Marruecos - مارويكوص) و الفرانساوية (Maroc - ماغوك) و لبرتغالية (Marrocos - ماروكوش) والنڭليزية (Morocco - مورًوكو) و هما اسميّات د المغرب اللي أصلهم كلمة مراكش.

تبنات مراكش ف 1062 مبعد ما قرر يوسف بن تاشفين تكون هي العاصمة د لإمبراطورية لمرابطية. كانت هي لعاصمة ديالهوم ف بين 1056 و 1147.

مراكش كانت لعاصمة تا ديال الموحدين، بين 1147 و 1269، و السعديين.  

لمدينة لقديمة د مراكش فيها بزاف ديال لمعاليم لمهمة بحال الجامع د لكتبية، لقصبة، السّوار د لمدينة و لبيبان ديالها، لقبور د السعديين، لقصورة بحال لبديع و بزاف ديال لمداريس بحال لمدرسة د بن يوسف. فيها كاينة الساحة د جامع لفنا اللي داخلة تا هي ف التراث الإنساني.

ف لوقيتة ديال دابا، مراكش معروفة بسياحة ديالها وكيجيو ليها الناس من لعالام كامل باش يفوجو فجو زوين و يشوفو المآثر و المعالم اللي فيها، و يتساراو فبلايص بحال ساحة جامع الفنا و جامع الكتبية و قصر لبديع و قصر الباهية و جردة ماجوريل.




#Article 283: مرسوم (303 words)


لمرسوم (ب لفرنسية: Décret) هو ب صفة عامة وثيقة تنفيدية و تنظيمية، ب معنى أن لوزن القانوني ديالها قل من لقانون.

كلمة مرسوم ف لقانون لمغريبي يمكن تشير ل 4 ديال لوثائق لقانونية: لمرسوم، مرسوم لقانون، لمرسوم لملكي و لمرسوم لملكي لّي بحال قانون.

هادا هو شّكل شّايع ديال لمراسيم، كايصدرو لوزير لّول و كايسني معاه ب لعطف لوزير ولا لوزرا لّي لقطاعات ديالهوم كايقيسها لموضوع د لمرسوم ولا كايكونو مكلفين ب تّنفيذ ديالو.

لمراسيم ديال لوزير لّول كاتقيس غير لمسائل تّنفيذية ولا تّنظيمية وكاتكون ف لغالب تقنية ولا كاتشرح لفهم ديال لإدارة لشي قانون. يمكن هاد لمرسوم يتطعن فيه قدام لقضاء يلا شاف شي حد ولا شي مؤسسة أنو مخالف لشي قانون ولا شي وثيقة قانونية فوق منو (ظهير ولا گاع شي فصل من دّستور مثلا).

لمرسوم د لوزير لّول ما يمكن يتلغى غير بشي مرسوم بحالو ولا شي قرار و لا شي نص قانوني اعلى منو.

ف لفترة لّي كايكون فيها لبرلمان عطلة (بين دّورات لبرلمانية)، يمكن لحوكومة تحتاج تخرج شي نص قانوني ب زّربة ولا ب صورة مستعجلة. بما أنها ما يمكنش تخرج قانون على حسب لمسطرة العادية (حيت ما كاينش برلمان لّي غادي يصوت عليه)، كاتخدم على واحد نّص سميتو مرسوم لقانون، لّي يمكن ليها تدوزو تشريعيا غير مع لّجان لبرلمانية، غير هو لازم عليها تدوزو ل لمصادقة د لبرلمان فاش يالاه تبدا دّورة لبرلمانية لّي من بعد، و إلا غادي يخسر صّفة لقانونية ديالو.

مرات قليلة ف تّاريخ ديال لمغريب لّي كان فيهوم مراسيم ملكية، وأشهر فترة لّي عرفات هاد نّصوص لقانونية كانت فيامات حالة لستيثناء لّي فرضها لحسن تاني ف 1965. ف حالة لسيثناء، ما كايبقا برلمان ولا حوكومة ولماليك كايكون هو سّلطة تّشريعية وتّنفيذية، يعني ديكتاتورية كاملة. لقوانين لّي صدرات ف ديك لفترة تسمات مراسيم ملكية. ف لفترات لّي ما كانش فيهوم غير لبرلمان، تسماو مراسيم ملكية لّي بحال قانون (ب لعربية: مرسوم ملكي بمثابة قانون).




#Article 284: مسابقة يوروفيجن د لأغنية (324 words)


مسابقة يوروفيجن د لأغنية () هي واحد لمسابقة دولية د لأغاني كاتدار كل عام، بدا التنظيم ديالها من عام 1956 من طرف هيئة يوروفيجن للبث، ولمشاركين فيها أغلبيتهم من الدول لأروبية. كل دولة كاتقدم أغنية أصلية باش تتغنى وتتعرض مباشرة على شاشات التلفازة ؤالراديو، وتصوت على لأغاني د لبلدان لاخرى باش يحددو شكون الرابح. كاينين عل لأقل 50 دولة يقدرو يشاركو من بينهم لمغريب اللي سبق ليه شارك مرة وحدة فعام 1980؛ ؤ من عام 2015، سمحو لأستراليا حتا هي باش تشارك.

مبني على مهرجان سانريمو د لموسيقى اللي كايتقام ف إيطاليا من عام 1951، وكايتعرض يوروفيجن كل عام من لإفتتاح ديالو ف عام 1956، هادشي اللي ردو أطول مسابقة تلفزيونية دولية كاتدار كل عام ؤأطول لبرامج التلفزيونية الطويلة ف لعالم. ؤحتى أنه من بين أكثر لأحداث اللي ماشي رياضية اللي تشافت بزاف، عدد الناس اللي كايشوفوه كايتراوح ما بين 100 مليون ؤ 600 مليون على مستوى لعالم. تم لعرض ديالو ف بزاف ديال لبلادات واخا مامشاراكين فيه، بحال لميريكان وكندا ونيوزيلندا والشينوا. ؤمن عام 2000، ولا كابتث ف لانترنت ف موقع يوروفيجن.

إرلاندا هيا اللي عندها الرقم القياسي ف عدد الإنتصارات، بحيت أنها ربحات سبعة د لمرات، بما فيها د لمرات ف خمس سنين متابعة 1992 ؤ 1993 ؤ 1994 ؤ 1996. على حساب نظام التصويت اللي كاين دابا، ؤاللي خدامين بيه من عام 2016، كان سلفادور سوبرال لبرتغالي مول أكبر عدد ديال النقط اللي ربح ف لمسابقة د 2017 ف كييف، أوكرانيا، برصيد 758 نقطة؛ ؤ على حساب النظام لقديم، حصل ألكسندر ريباك من النرويج على أكبر عدد من النقط بحيث حصل على 387 نقطة ف عام 2009. وآخر واحد اللي ربح هو دنكان لورانس من هولندا اللي ربح ف 2019 بأغنية أركاد. الرباح ف هاد لمسابقة كايعطي للفنانا واحد الدعم مهني محلي ونجاح دولي بعض لمرات. بحال أبا ABBA (من السويد)، باكز فيز ؤ لولو (من لمملكة لمتحدة) سيلين ديون (من سويسرا)، جوني لوغان (اللي ربح ف لمسابقة جوج د لمرات من إرلاندا)، دانا إنتيرتاشيونال (من إسرائيل) ؤ لينا (من ألمانيا).




#Article 285: مسعود بوحسين (114 words)


مسعود بوحسين، هو ممتل ؤمخرج مغريبي تولد ف 1974. هو رئيس نقابة لوطنية ديال مهنيي لفنون درامية لي كانت كتسما نقابة لمغريبية د محترفي لمسرح .

خدا دوكتورا ديالو فعلم لمسرح من لكية لوطنية د لفن لمسرحي فبوخارست (رومانيا) ف 2003، ؤ أستاذ فالمعهد العالي دفنون لمسرح ؤ تنشيط سينمائي ؤخريج نفس لمعهد فسنة 2007.

شارك فبزاف د لمسرحيات لي نجحات على لمستوى لوطني، من بينها لمسرحية د لهواوي قايد النسا  لي كتبها أحمد الطيب العلج.

ؤشارك فتأطير واحد لورشة دولية ديال تكوين لممتيلين فمسرح بيكولو المشهور فيملانو، ؤ دار لإخراج  لمسرحية «سميرة» لي هي خدمة مشتركة بين لمعهد لعالي دلفن لمسرحي ؤ تنشيط تقافي فرباط ؤ لمدرسة لملكية ديال دراما فمدريد ؤ مسرح بيكولو فميلانو.




#Article 286: مصر (133 words)


مصر (رسميا: جمهورية مصر العربية) هي واحد لبلاد جات فشمال إفريقيا, وفيها جيهة تابعة لأقصى غرب آسيا (شبه جزيرة سيناء). تيحدها من الشمال البحر لبيض لمتوسط، من الغرب ليبيا, من الشرق فلسطين, ومن لجنوب السودان. لعاصمة ديالها هي لقاهرة. لمساحة ديال مصر هي 1.010.408 كم², وتيسكنوا فيها تقريبا 100 د لمليون د الناس على حساب التقديرات د 2020. اللغة الرسمية فمصر هي لعربية.

مصر عندها تاريخ قديم ووحدا من أقدم لحضارات فلعالم, اللي هي لحضارة د لفراعنة. من مورا لحكم ديالهم دازو بزاف د الدول على مصر بحال لفرس والرومان وبزاف د الدول الإسلامية, آخر وحدا فيهم كانت الدولة لعثمانية, موراها حتلًو لينڭليز مصر. استاقلات مصر ف 1922 و ولاًت مملكة, ولكن ف 1954 وقع انقلاب عسكري ومن ديك الساعة وهي جمهورية. الرئيس د مصر د دابا تاهو عسكري وسميتو عبد الفتاح السيسي.




#Article 287: مصطفى حجي (256 words)


مصطفى حجي (خلاق ف إيفران لأطلس صّغير ف 16 نونبر 1971) كان كوايري مغريبي و دابا خدام كادر تقني مع لجاميعة لملكية لمغريبية د لكورة معا لمونتخبات لوطنية.

مصطفى حجي لعب معا لمونتاخاب 64 ماتش (ماركا فيهوم 12 لبيت) بين 1993 و 2002 و شارك ف جوج كيسان د لعالم معا لمغريب ف 94 و 98.

مصطفى حجي كان تختار أحسن لاعب إفريقي ف 1998 و حطاتو لكاف ف ليستا ديال اساطير لكورة لإفريقية ف 2011.

مصطفى هاجر معا عائيلتو ل فرانسا فاش كانت عندو عشر سنين و عاشو ف لّول ف سانتيتيان و من بعد ف كروتزفالد ف شّمال شّرقي د فرانسا. مصطفى تفورما ف لكلوب د نانسي و فيه بدا لكاريير پروفيسيونيل ديالو ف 1992. ف ديك لعام بان مزيان و عيطولو فرانسا و لمغريب باش يلعب ف لمونتاخبات ديالهوم ف نفس لفترة، و ختار مصطفى يلعب مع لمغريب و هاد لقرار كان خلقليه مشاكيل مع فرقتو ف فرانسا.

أول ماتش ديالو كان صعيب بزاف حيت كان هو آخر ماتش د لإقصائيات د كاس لعالم 94 ضد زامبيا. عبد الله بليندا، لمدرب د لمونتاخاب ديك لوقت، دخلو رسمي من لّول و دار ماتش كبير

مصطفى بان مزيان و من ديك لماتش ولا من ركايز د لمونتاخاب د لمغريب ف تّسعينات.

مصطفى شارك ف لمونديال د 94 و كان هو لّي پاصا لكورة د لبيت د حسن ناضير ضد هولندا، ف 98 كان دار كاس عالم تاريخية و كان ماركا بيت واعر ضد نّرويج ف أول ماتش. من أهم لبيوتة ديالو مع لمونتاخاب كان لبيت لّي ماركاه ب سيزو ضد ميصر ف كاس إفريقيا 98.




#Article 288: مغاربة يهود (158 words)


المغاربة اليهود (بالعبرية: יהדות מרוקו) ولا اليهود المغاربة (بالعبرية: יהודים מרוקאים يْهُودِيمْ مَارُوكَائِيمْ) هما يهود كيعيشو ولا عاشو فالمغريب. اليهود هاجرو للمغريب وعاشو مع الأمازيغ ؤفوقت آخر جات موجة تانية ديال الهجرة من الجزيرة الإيبيرية فالفترة اللي تبعات صدور مرسوم الحمراء مباشرة فـ 1942 فاش جراو عليهم من ممالك الصبليون ؤمن بعد فترة وجيزة حتى من البرتقيز. هاد الموجة التانية ديال هجرة اليهود للمغريب بدلات بشكل كبير تاريخ اليهودية فيه؛ حيت ليهود جابو معاهم الشعائر السفاردية الأندلسية الشي اللي خلا معظم اليهود فالمغريب يتحولو للهوية السفاردية.

وصل العدد ديال اليهود فالمغريب للأوج ديالو فالربعينات ؤكان تقريبا حوالي 250 ألف يهودي فالمغريب داك الوقت، ولكن بسباب الهجرة ديالهم لإسرائيل ؤدول خرى بما فيها عملية ياخين من 1961 حتال 1964، نقص هاد العدد ؤبقا غير شي 5000 يهودي. الغالبية العظمى ديال المغاربة اليهود كيعيشو دابا فإسرائيل، فين كيشكلو تما ثاني أكبر مجتمع يهودي؛ تقريبا نص مليون. كنتلاقاو تجمعات خرى في فرانسا، الصبليون، كندا، لميريكان، وأمريكا الجنوبية، خصوصا ڤنزويلا، البرازيل، والأرجنتين.




#Article 289: موحا أوحمو الزياني (198 words)


محمد بن حمًو بن عقًا بن حمد, و اللي معروف بموحا أوحمُو الزياني (تولد ف 1857 فآيت حركات - مات ف 1921 ف تاوجكالت) كان قايد ومقاوم مغريبي ضد ليستيعمار لفرانساوي فزايان.

تولد موحا أوحمو الزياني ف 1857 فوسط عائلة أمحزون, اللي تابعة لقبيلة آيت حركات فالنواحي د خنيفرة, و اللي هي طرف من لقبايل د زايان فلأطلس لمتوسط.

ف 1886, من مورا ما مات خوه سعيد, عيًنو السلطان الحسن اللًول قايد (أمغار) ديال زايان وعطاه 300 عسكري وثلاثة د لمدافع. السلطان عاون موحا حيث كان الحسن اللًول محالف مع لقبيلة ديالو وتيعطيهم السًلاح باش يحاربو لقبايل اللي ماباغينش السلطان فبلاد السيبة.

ف 1908, غادي يبدا موحا يحارب لفرانساويين اللي كانو احتلًو ديك لوقت الشاوية و الدار لبيضا. ف 1913, غادي يبداو يدخلو لفرانساويين للأطلس و غادي يحاربهم موحا وجيشو فلقصيبة. فنونبر 1914, غادي يغلبو لقبايل د زايان فرانسا فلمعركة د لهري, اللي تقتل فيها جينيرال فرانساوي و 33 من الضباط ديالو. من بعد هاد لمعركة غادي تزيد فرانسا فلعسكر ديالها وغادي تحتل خنيفرة. موحا و لجيش ديالو كمًلو لمقاومة ديالهم فالجبل.

نهار 27 مارس 1921, فلمعركة د أزلاك ن تازمًورت, غادي يموت موحا أوحمو الزياني من بعد ماتيرا فيه واحد من ولادو بلغلط, وجاب فيه قرطاسة فلعنق.




#Article 290: موريطانيا (130 words)


موريطانيا ولاً موريتانيا ولاً موريتان (رسميا: الجمهورية الإسلامية الموريتانية) هي واحد لبلاد فالشمال لغربي د إفريقيا, نيشان تحت من لمغريب, وجات لأغلبية ديالها فالصًحرا. موريطانيا تيحدًوها من الشمال لمغريب ولجزائر, من لغرب لمحيط لأطلسي, من الجنوب السينيڭال, و من الجنوب و الشرق مالي.

موريطانيا كانت مستعمرة فرانساوية من 1902 تال 1960, وموراها خدات الإستقلال ديالها. اللغات الرسمية فموريطانيا هوما لعربية ولفرانساوية, وكاين بزاف د الناس اللي تيهضرو لغات إفريقية, ومنها الأمازيغية. الرئيس د موريطانيا ديال دابا هو محمد ولد الغزواني، ولعاصمة ديال لبلاد هي نواكشوط.

قبل من لاستعمار لفرانساوي, كانت لأراضي د موريطانيا تابعة للمغريب. ملي استاقلات موريطانيا ف 28 نونبر 1960, مابغاش لمغريب يعتارف بيها, وكان باقي تيعتابرها إقليم د لمغريب. بقات الأمور 9 سنين بحال هاكا حتا بدل لملك لحسن التاني الرأي ديالو واعتارف لمغريب بموريطانيا ف 1969.




#Article 291: موسكو (112 words)


موسكو, (بالروسية: Москва) هي العاصمة د روسيا وأكبر مدينة فيها. هي من أكبر المدن د لعالم, وتسيكن فيها و النواحي ديالها كثر من 12 لمليون واحد. هي أكبر مدينة فأوروپا من ناحية لمساحة.

جات موسكو على لواد ديال موسكڤا, وكانت لعاصمة ديال بزاف د لبلدان بحال لإمبراطورية الروسية, روسيا القيصرية, الدوقية د موسكو, و ليتيحاد السوڤياتي.

موسكو فيها بزاف د لمواقع د التراث لعالمي د ليونيسكو بحال: الميدان لحمر, لكاطيدرالية د سان بازيل, ولكريملين, اللي تيسكن فيه الرئيس ديال روسيا.

موسكو مركز قتيصادي كبير فلعالم, وعليها فيها بزاف د الراواج. كاينين فيها ربعة د لمطارات الدولية, تسعود د لمحطات د الطران, وتاني أكبر شبكة د لميطرو من ناحية الزحام فلعالم (مورا طوكيو).




#Article 292: موضهارات مارس 1965 ف لمغريب (207 words)


موضهارات مارس 1965 ف لمغريب، هي موضهارات طلابية وقعات ف لمغريب خصوصا فدارلبيضا ؤماتو فيها ناس.

فلول ديال شهر مارس 1965، وزير تربية لوطنية يوسف بلعباس خرج مدكرة كيمنع فيها تلامد لي عندهم كتر من 16 لعام باش يعاودو لبروڤي، لعام لخر د لكوليج.

ديك ساعة تلامد كانو مسييسين بزاف ؤلأغلبية ديالهم داخلين فتيحاد لوطني ديال طلبة لمغريب لي كان عندو علاقات معا تيحاد لوطني لقوات شعبية.

فـ22 مارس معا جوايه لعشرا، تجمعو دراري فتيران د لكورة ديال ليسي محمد لخاميس فدارلبيضا باش يديرو مسيرة حتيجاجية حتال لمندوبية ديال تعليم، والاكين فطريق لبوليس فرقهم.

لغد ليه فـ23 مارس، عاودو رجعو طلبة ل ليسي محمد لخاميس ؤمشاو موراها لدرب سلطان ؤباب مراكش فين ساكنة طبقة لعاميلة، ؤبداو كيهاجمو لمحلات ؤيحرقو طوبيسات ؤطوموبيلات. لعسكر خرج دبابات ديالو ؤمعا جوايه 3 بدا كيطلق لقرطاس على ناس.

من بعد تلت شهور، فـ7يونيو 1965، لماليك لحاسان تاني علن على حالة ستيتناء ؤسد لبرلامان.

ؤفـ29 أكتوبر 1965، زعيم ديال حيزب تيحاد لوطني لقوات شعبية لمهدي بن بركة خطفوه ؤغبروه فباريز.

فـ1968، واحد لمجموعة ديال زوعاما ليساريين من بينهم محمد بنسعيد أيت يدر، أحمد حرزني ؤ سيون أسيدون حلو منضمة ماركسية لينينية سماوها منضمة 23 مارس باش يتفكرو ضحايا ديال داكشي لي وقع فدارلبيضا، لهدف ديالهم كان هو يديرو تغيير ف لبلاد باستعمال سلاح.




#Article 293: مولاي أحمد لوكيلي (182 words)


مولاي أحمد لوكيلي (تولد ففاس ف 1908 - مات فالرباط ف 25 نونبر 1988) كان موسيقار مغريبي ديال لموسيقا لأندلسية, اللي كاتسمًا تا لموسيقا د لآلة. كان لوكيلي تيتسمًا بلعميد ديال موسيقا لآلة فلمغريب, حيث كان ضابطها مزيان وواعر فيها.

تولد مولاي أحمد لوكيلي ففاس ف 1909 وكبر فيها. قيدوه دارهم فلمسيد وحفظ لقرآن وتعلم يقرا ويكتب. موراها مشا يكمل قرايتو فجامعة لقرويين, وتما فين بدا يتولع بالأندلسي وتعلمو من بزاف د الأساتدة. لوكيلي كانو عندو نشاطات مع الوطنيين بحال علال لفاسي ومحمد بلحسن الوزاني, وداكشي دارلو مشاكيل مع لاستعمار. خرج لوكيلي من فاس ف 1937 ومشا لطنجة, وبغا ينسا لفن ومشا حل حانوت د لبيع و الشرا يعيش بيه. ولكن بزاف د الناس فطنجة عرفوه مجهد فلأندلوسي وبقاو عليه حتا قنعوه باش يرجع للفن. ف 1940, غادي يأسس لجمعة د إخوان لفن فطنجة, وغايكون هو الرئيس ديالها.

مورا ما مات محمد البريهي (1945) والمطيري (1946) غادي يرجع الوكيلي لفاس وغادي يأسس لجوق لأندلسي د فاس ف 1947 اللي غايكون هو الرئيس ديالو.

ف 1952, ولاً هو الرئيس د لوركيسطرا د لإذاعة لوطنية فالرباط, وبقا قابط ديك لخدمة تا مات ف 1988.




#Article 294: مومن الديوري (284 words)


مومن الديوري (تولد ف 20 فبراير 1938 فقنيطرة - مات نهار 16 ماي 2012 فالرباط) كان كاتب ومعارض سياسي مغريبي كان تيطالب بجمهورية فلمغريب. عاش من 1971 ل 2006 ففرانسا منفي, ورجع للمغريب موراها, وتمًا عاش تال 2012.

تولد مومن الديوري ف 1938 ف قنيطرة, وكان بًاه محمد الديوري مقاوم ضد ليستيعمار داخل مع حزب ليستقلال, وكان واحد من اللًي سيناو لوثيقة د لمطالبة ب ليستقلال ف 1944. تعلم مومن من صغرو النضال, وتعرف على بزاف د لمناضلين اللي تعلًم معاهم, منهم: شيخ لعرب, أحمد بن بلة, لمهدي بن بركة, لفقيه لبصري, و تشي ڭيفارا.

ف 1957 مشا مومن لفرانسا باش يقرا لعلوم السياسية ومن موراها كمًل فسويسرا. من مورا ما تلاقا لمهدي بن بركة, قنعو باش يمشي يعاون الثورة لجزائرية, وولاً تينسق باش يتلاقاو لقادة د الثورة فالجزائر مع الثوار لأممين بحال تشي ڭيفارا.

ف 1963, تعتاقل الديوري حيث كان مع لمجموعة د شيخ لعرب وتحكم عليه ب لإعدام. خرج بعفو ف 1965 ومن موراها بقا عايش ف السرية وتجوج مع لمخرجة فريدة بليزيد اللي ولدات معاه جوج بنات. مشا لفرانسا ف 1971 وخدا تمًا اللجوء السياسي. واخا كان عندو لجوء ف فرانسا جراو عليه ف 1991 للڭابون, وكان السبب هو باللي خاصو يدير الرقابة لداكشي اللي تيقول. هادشي دار فضيحة ف فرانسا اللي مشات ليها بزاف من السمعة ديالها ديال الدفاع على حقوق لإنسان, وفاللخرً رجعاتو بلا شروط.

ف 2001, بغا يرجع الديوري للمغريب وطلب منو السفير د لمغريب ف باريز حسن أبو أيوب باش يكتب رسالة د اعتذار على أنه كان تيعارض النظام باش عاد يعطيه پاسپور ديالو, ومومن مابغاش. ف 2004 غادي ياخد پاسپور يلا تا شرط, وغادي يدخل لبلادو ف 2006.

أهم كتاب كتب مومن الديوري كان ف 1992, وهو لكتاب ديال: ديالمن لمغريب؟ (A qui appartient le maroc).




#Article 295: ميديطيرّانيو (فيلم) (116 words)


ميديطيرانيو (Mediterraneo لبحر لمتوسط)، فيلم طالياني لّي دار لإخراج ديالو گابرييلي سالفاطوري. لفيلم متلو فيه لأدوار رّئيسية دييگو أباطانتيونو و كلاوديو بيگاگلي و گيزيپي سيديرنا. هاد لفيلم ديال لكوميديا

لفيلم كان دا جايزة لأوسكار ل أحسن فيلم ب لوغة أجنبية ف 1992، لقيصة ديالو كاتدور ف لحرب لعالمية تانية و هي ديال واحد لگروپ دلعسكر طاليانيين حصلو ف واحد لجزيرة يونانية ف يامات لحملة لإيطالية على ليونان. كايتقطعو على لعالم فاش كايخسرو ليهوم أجهزة لتيصال و كايغراق لباطو ديالهوم و كايعيشو مع سكان ديال ديك لجزيرة ف واحد لجو كوميدي لّي ما عندو علاقة ب لحرب. لفيلم فيه نتيقاد ل لفكرة د لحرب و كايحتافل ب لإنسانية و ب لقيم ديال لحب و صّداقة بين شّعوب




#Article 296: ميكرونيزيا (241 words)


ميكرونيزيا (بلينڭليزية: Micronesia) هي دولة مستاقلة فيها بزاف د لجزر جات ف أوقيانوسيا، و بالضبط ف لمحيط لهادي، ف الشمال الشرقي د پاپوا غينيا الجديدة. لجزر ديال ميكرونيزيا كانت طرف من لإقليم د لمحيط لهادي اللي كان تابع للميريكان. ف 1979 دارت ميكرونيزيا دستور ديالها و مورا 7 سنين (ف 3 نونبر 1986) علنات لإستقلال ديالها.

تيسكنو ف ميكرونيزيا شويا كتر من 105.000 واحد، و لعاصمة ديالها هي پاليكير. اللغة الرسمية د لبلاد هي لينڭليزية و عاد كاين 4 د اللغات محلية اللي معتارفين بيها لغات جهوية. لفلوس اللي كاتخدّم ف ميكرونيزيا هي الدولار لميريكاني، و النضام د لحكيم هو نضام فيديرالي، فيه 4 ديال لولايات. 607 د لجزر تابعين ل ميكرونيزيا و لمجموع ديال لأراضي ديالها هي 702 كم².

نشاط لقتيصادي فميكرونيزيا كيعتامد على زراعة ديال لمعيشة وصيادة. لجزر عندهم حقول ديال لمعادن لي يتسحقو لاستغلال، ماعدا لفوسفاط لي نيڤو ديالو طالع. صيادة ديال طون ب لخيوط طوال خدام مزيان خصوصا معا لباطوات ديال شينوا لي موجودين من تسعينات. لإمكانيات ديال سياحة موجودة، والاكين لبعد ديال لبلاصة و لقلة ديال تجهيزات ماكيعاونش فتنمية. لمعاونة ب لفلوس من لميريكان هي لمصدر لول ديال لمدخول، معا لميريكان صرفات 1.3 مليار دولار ف لجزر بين 1986 و2001؛ ملي لكومپاكط تبدل فـ2004، لميريكان لتازمات باش تعاون بـ110 مليون دولار فتنمية حتال 2023. لكتاب د لحقائق د سيا عتابر لاعتماد لكبير ديال ميكرونيزيا على لمعاونة د لميريكان بلي راه واحد من لمشاكل ديال لبلاد. لعزلة لجغرافية وتجهيزات ضعيفة هوما لعقبات لكبار لتنمية على لمدى طويل.




#Article 297: ناروتو (276 words)


ناروتو (بالجاپونية: ナルト؛ كتعني حرفيا الطبل) هي سلسلة مانڭا جاپونية كتبها ورسمها ماساشي كيشيموتو. كتحكي المانڭا القصة ديال ناروتو أوزوماكي، نينجا شاب كيقلب باش ينال الاعتراف من عند ڭرانو ؤكيحلم عاوتاني باش يولي هوكاجي؛ الزعيم ديال الڤيلاج ديالهم. القصة مقسمة على جوجت الأجزاء، اللول طرا فاش كان ناروتو باقي صغير، والتاني طرا فسنوات المراهقة ديالو. السلسلة مأخودة من جوجت المانڭا وان شوت ديال كيشيموتو: كاراكوري (1995) – اللي خدا عليها كيشيموتو هضرة مُشرِّفة فالمجلة الشهرية Hop Step Award ديال شوئيشا فالعام اللي تبعها –، ؤناروتو (1997).

المانڭا ديال ناروتو دازت فمجلة شونن جامپ الأسبوعية ديال شوئيشا من 1999 حتال 2014، ؤخرجات فتانكوبون (كتاب) فيه 72 مجلد. المانڭا ولات سلسة أنيم فالتلفازة دارت ليها الإنتاج پيئيرو وأنيپلكس، ؤكانت فيها 220 حلقة دوزوها فالجاپون من 2002 حتال 2007؛ دار مركز الزهرة الدبلجة بالعربية ديال 151 حلقة وتعرضات فسپيسپاور وسپيستون من 25 غشت 2007 حتال 1 نونبر 2015 ولكن باقين كيعاودوه حتى لدابا.  هو الجزء التاني ديال السلسة الأصلية، بدا فالجاپون ف2007 وسالا ف2009 من بعد 500 حلقة كانت فيه. بلا الأنيم، طورات پبئيرو حداعش فيلم وحداعش أوڤا (ڤيديو أنيم أصلي). سلعات خرين مرتابطين بناروتو كنتلاقاو روايات خفيفة، ڤيديو ڭيمزات، ؤبطاقات تجارية طوراتها شحال من شركة.

القصة ديال ناروتو كملات مع الولد ديالو بوروتو أوزوماكي، في . بوروتو كيتمنى يخلق طريقة النينجا الخاصة بيه عوض ما يتبع الطريقة ديال باه.

ناروتو هي رابع أحسن سلسلة مانڭا فالمبيعات فالتاريخ، حيت باعت 235 مليون نسخة فالعالم ف35 دولة. النقاد مدحو تطور شخصيات المانڭا، تطور أحداث القصة القوي، ؤمشاهد المدابزة اللي تنفدو مزيان، واخا شي وحدين شافو بأن مشاهد المدابزة نزلات القصة لتحت. الانتقادات جا فيها بأن المانڭا، اللي فيها موضوع ديال بلوغ سن الرشد، كتستعمل مراجع ثقافية من الميثولوجيا اليابانية ؤالكونفوشية.




#Article 298: ناصر الزفزافي (188 words)


ناصر الزفزافي (بالريفية: ⵏⴰⵙⴻⵔ ⵣⴻⴼⵣⴰⴼⵉ) (تولد نهار 4 نونبر 1979 فالحسيمة) هو ناشط سياسي مغربي, وواحد من لقيًاد د لحراك د الريف, اللي هو حراك كانت فيه احتجاجات سلمية وتاطًالب بواحد لعدد د لمطالب قتيصادية وجتيماعية للمنطقة د لحسيمة. نهار 29 ماي 2017, تعتقال ناصر وتحكم عليه ب 20 عام دلحبس.

تولد ناصر الزفزافي ف 1979 فلحسيمة فالشمال د لمغريب. لأصل ديالو من لقبيلة ديال بني ورياغل, اللي هي لقبيلة ديال محمد بن عبد لكريم لخطابي.

حبس ناصر لقراية ديالو فالثانوي, وموراها خدم فعدد من لخدامي الصًغار بحال السيكيريتي, لإصلاح ديال التيليفونات, وتا لفلاحة. هاد لخدامي كلها كانت مؤقتة, ومن غيرها كان تيكون ناصر بيطالي وماخدًماش.

نهار 28 أكتوير 2016, من مورا ما تقتل محسن فكري, كان ناصر الزفزافي من الناس اللي حتجًوا وقادو لحراك د الريف. بقا الزفزافي تينظم لمظاهرات السلمية اللي كانو لمطالب ديالهم تيركزو على لعدالة ولحرية والشفافية والتنمية د لمنطقة د لحسيمة.

نهار 29 ماي 2017, تعتاقل ناصر فالنواحي د لحسيمة, ومورا حكم بتيدائي ف 2017, وحكم ستيئنافي ف 2018, تحكم عليه ب 20 عام د لحبس, وعلى بزاف د الناس آخرين د لحراك بأحكام وصفاتها بزاف د لمنظمات باللي هي أحكام قاصحة بزاف.




#Article 299: نبيل أحمجيق (173 words)


نبيل أحمجيق (بالريفية: ⵏⴰⴱⵉⵍ ⴰⵃⴰⵎⵊⵉⵇ) (تولد نهار 31 دجنبر 1984 فلحسيمة) هو ناشط سياسي مغربي, وواحد من لقيًاد د لحراك د الريف, وكان تيتلقًب بالدينامو ديالو. نهار 5 يونيو 2017, تعتقال نبيل وموراها تحكم عليه ب 20 عام دلحبس.

تولد نبيل أحمجيق نهار 31 دجنبر 1984 فلحسيمة وكبر فيها.خدا لباك فلعلوم التجريبية ومن موراها خدا ديپلوم فتسيير لمقاولات. دوًز واحد لوقيتة بطالي, ومن موراها لقا خدمة د محاسب.

ملًي بدا لحراك د الريف, شارك فيه نبيل بزاف وكان واحد من لمنظمين لأساسيين د لمظاهرات فلحسيمة وفلخارج ديالها. كان معروف باللي كان تيطلق بزاف د الشعارات سلمية فلمظاهرات وكان تيحفز الناس اللي مشاركين فيها بالصوت ديالو. بقوة ما شارك فڭاع ليجتيماعات ولمظاهرات فلداخل ولخارج د مدينتو, وحيث كان تيخدم ويوجًد بزاف فالليل والنهار, تسمًا بالدينامو ديال لحراك.

تعتاقل نبيل أحمجيق نهار 5 يونيو 2017 فلخمسة ونص د الصباح من دارهم, ومورا محاكمة بتيدائية وستيئنافية, تحكم عليه ب 20 عام دلحبس ببزاف د التهم منها المشاركة في تدبير مؤامرة للمس بالسلامة الداخلية للدولة والمساهمة في تنظيم مظاهرات غير مصرح بها وعقد تجمعات عمومية بدون تصريح.




#Article 300: نجاة عتابو (378 words)


نجاة عتابو (خلاقت ف 9 ماي 1960 ف لخميسات) موسيقية و مغنية مغريبية ديال شّعبي لمغريبي، كاتغني ب دّاريجا و شّلحة د زايان و كاتعتابر من أهم لمغنيات ف تاريخ لموسيقا لمغريبية. نجاة بدات لكاريير ديالها ف 1983 و غنات بزاف د لأغاني لّي نجحو بزاف بحال جوني مار، شوفي غيرو و كدبة باينة و لّي ولاو مخلدين ل درجة أن بزاف د لمغنيين عاودوهوم من بعد منها.

نجاة عتابو بنت لخميسات و ب دّات من جماعة لغندور، قرات ف ليسي موسى بن نصير و كان عندها بزاف مع لغنا ف لحفلات لمدرسية و كانت نشيطة ف الألعاب المدرسية حيت كانت مزيانة ف لهونض. نجاة كانت مزيانة ف قرايتها و كانت كاتحلم تكون محامية.

كانت لمواهيب ديالها ف لغنا باينة من صغرها ب فضل صّوت لقوي لّي عندها و طريقة لغنا ديالها ب سّتيل ديال لعيوط د شّلوح د زايان.

نجاة بدات لغنا ف لعراسات د لمنطقة و كانت كاتغني عيوط زايانية و بانت لموهيبة ديالها تا قدرات تسجل أول كاسيطة ديالها، ب تّخبية، مع أوركسترا لمعروفي، و كانت أول سمية فنية ديالها هي نجاة المعروفي وكانت غنية جوني مار ف ديك لكاسيطة و تشهرات و نجحات بزاف. فاش وصلات خبار لكاسيطة ل دارهوم كعاو عليها حيت لعائلة ديالها كانو محافضين و ما كانوش قابلين باش بنتهوم تمشي ف لكار د لغنا.

نجاة خوات دارهوم و هربات منها فاش كانت عندها 17 لعام، و كانت هاد لهربة سباب أن لبوليس جاو عند دارهوم باش يتأكدو واش ب صّح قتلوها و دفنوها ف دّار حيت وصلاتهوم تبرگيكة ف هاد لقضية.

مشات نجاة ل دّار لبيضا و تما تلونصات لكاريير ديالها و كان أول ألبوم ديالها عالمي خرجاتو ف فرانسا و باع 3 د لملاين د لكاسيطات. هنا كاتبان واحد لميزة لّي نفعات نجاة بزاف ف لكاريير ديالها حيت كانت كاتخدم و كاتدير لإنتاج ب طرق حتيرافية و حاضية مع لقضية د حقوق لمؤلف و هو شّي لّي ما كانوش كايديروه أغلبية لمغنيين شّعبيين.

جّواج ديالها من حسن ديكوك زادها بزاف ف لكاريير ديالها حيت حسن كان من عائلة فنية و ملحن كبير و بجوج بيهوم كتبو و لحنو و نتجو أغاني نجحات مزيان.

غنات نجاة ف بزاف د لمهرجانات و لقاعات و لمسارح لعالمية و ب دّات ف لأولمبيا ف باريز و مسرح فلورنسا ف طّاليان و لميلينيوم بارك ف شيكاگو.

ف لمجموع، غنات نجاة كتر من 500 غنية.




#Article 301: نجوم بورڭون (118 words)


نجوم بورڭون، مجموعة غنائية مغريبية ديال شعبي تأسسات عام 1985 مكونة من 4 ديال لمغنيين، ولاد حي بورڭون فكازا: مصطفى السمرقندي، يوشعيب، رشيد حياك والزيتوني بوركون. نجوم بوركون منتوج ديال أضواء المدينة اللي كانت مسابقة كبيرة تنظمات في مغرب الثمانينات باش يبانو مواهب فالغنا والمسرح والفكاهة من شباب اقاليم المغرب.

المجموعة معروفة بأغانيها ديال الشعبي التقليدي (العيطة) وحتا العصري. فالبدايات ديالها، كانت المجموعة كاتخدم بآلات أكوستيك (غير كمنجة وبندير)، وكانو بربعة بيهوم تايغنيو، شوية بشوية تميزو مصطفى والزيتوني كمغنيين أساسيين. فالتسعينات تفرقات المجموعة من بعد ما اختار الزيتوني يكمل بوحدو، وهي المرحلة اللي عرفات دخول ستيل عصري (الأورڭ والباطري).

حاليا المجموعة ما بقاتش وغير جوج مغنيين اللي باقيين، مصطفى السمرقندي (اللي ولات سميتو الفنية مصطفى بورڭون) والزيتوني بورڭون.




#Article 302: نزهة بيدوان (177 words)


نزهة بيدوان (خلاقت ف رّباط ف 18 شتنبر 1969) رياضية مغريبية ف لاتليتيزم كانت متخصصة ف لمسافات لقصار و ب دّات ف 400 ميترو حواجز. هي من أحسن رّياضيات ف تّاريخ د لمغريب وكانت دّات تيتر بطلة لعالم ف 400 حواجز 2 مرات ف 1997 و 2001.

نزهة بنت لحومة د يعقوب لمنصور ف رّباط و بدات ف رّياضة لمدرسية و كانت لمواهب رّياضية ديالها باينة من صغرها و هادشي لّي شجع لأساتيدة د رّياضة ديالها أنهم يدفعوها باش تدوز تيست د لاتليزيم ف مركب مولاي عبد الله ف 1986، و بدات كاتطريني مع نادي الأولمپيك الرباطي.

نزهة بدات لكاريير ديالها و تألقات ف لمسابقات لوطنية و ف 1991 دخلات ل لمعهد لوطني د لاتليتيزم لّي كان كايشرف عليه لمدرب لكبير لحسن صمصم عقا لّي خدم معا بزاف ديال الأبطال لمغاربة. نزهة ستافدات بزاف من لخدمة لحتيرافية لّي كانت ف لاتليتيزم لمغريبي ديك لوقت ب لوجود ديال مدربين و خبراء كبار بحال عزيز داودة، محمد سنداوي، سعيد بلمغارية و لبطلة لكبيرة فاطمة لفقير لّي كانت كل لمؤشرات كاتقول أن نزهة غادي تكون لخليفة ديالها ف 400 حواجز.




#Article 303: نضرية د نسبية (117 words)


نّضرية د نّسبية كتشمل جوج د نّضريات: نسبية لخاصة ونسبية لعامة. نّضرية جابها آلبرت أينشتاين ف لول د لقرن لعشرين، ملي كانو كيزعمو على لاتناسق لّي كاين ما بين لميكانيك ديال نيوتن ؤ لكهرومغناطيسية.

نّضرية د نّسبية لخاصة اللي تصاوبات ف 1905، كتهتم ب لحركة ديال لكسادي ملًي ماكاتكونش قوة لجادبية من بعد ما جاو معادلات د ماكسويل ؤ تعاودات صياغة ديال لقوانين د لحركة لمتناسقة.

نّضرية د نّسبية لعامة لي تنشرات ف 1915، هي نّضرية ديال لجادبية لي جات بلاصت لجادبية نيوطونية. واخا هوما راهوم بحال بحال ملي كيتعلق لأمر بحقول د لجادبية ضعاف ؤ سرعات صغار.

حتال 3 مارس 2010 عاد تنشرات لكتبة لأصلية ديال آينشتاين من طرف أكاديمية د إسرائيل ديال لعلوم ؤ لإنسانيات.




#Article 304: نظرية تّطور (292 words)


نظرية تّطور (ب لونكلي : theory of Evolution) هي نّّظرية لعلمية لي كتشرح تبديلات لوراتية لي كتوقع فواحد مجموعة ديال لكاينات ف بزاف ديال جّيال فواحد لمدة كبيرة.

تّنواع (ب لونغلي : genitic diversity) كيعني بالخصوص درجة ديال تنواع ديال شي جين فشي نوع (حيوان ولا نبات).

يمكن نميزو عموما بين جوج انواع هما تنواع ظاهري وتنواع لجيني.

طفرة (ب لونغلي : mutation) هي شي تبديلات كيوقعو ف DNA ديال جينوم ديال شي سيلول. فاش كتوقع طّفرة تقدر ما يكون عندها حتا شي تاتير، ولا تقدر دير تاتير كبير، ولا تقدر توقف لجين لي هي وقعات فيه.

طفرات كتصنف ل تلاتة، طفرات كضر، طفرات مامسوقاش و طفرات نافعة.

كيوقعو طفرات ف بزاف دالمرات ب ضوبلاج ديال الكروموزم، هادشي كينتج عليه زيادة ديال شي جين ولا بارتيات منو.

من جهة داروينية جّديدة (ب لونغلي : Neo-Darwinism) ، تطور كيخدم فاش كيتبدل تعاويد لحليلات فشي كروب كيكونو فيه نّواع كتوالدو، لميكانزيمات لي كتخلي تعاويد لحليلات يتبدل هي : انتخاب طبيعي، انحراف لوراثي، لمرافكة لجينية، طفرات، و لفلو دلجينات.

انتخاب طبيعي

انتخاب طبيعي (ب لونغلي : Natural selection) هو لميكانزيم لي كايخلي طفرات لي كتنفع هي لي تكون باينة اكثر ف جيال لي كتجي من بعد، كيتوصف هاد لميكانزم علا انو منطقي حيث هو اصلا كيوقف علا تلات حقايق لي ساهلة :

هاد ظروف كتخلق واحد تنافس فوسط لكروب كتخلي كاينات لي عندها الافضلية هي لي دوز وتوالد وتعطي لجينات ديالها لي جيل لي جاي.

انحراف وراثي

انحراف لوراثي (ب لونغلي : genitic drift) هو تبدال تعاويد لحليلات بشكل عشوائي من جيل لاخر.

لمرافكة لجينية

هو لميكانزيم لي كتخلي تعاويد شي حليل يكتار غا حيت ارتبط مع حليل اخر لي كايعونو انتخاب طبيعي.

لفلو دلجينات

ف لوراتة لفلو دلجينات (ب لونكلي : flow genitic) هو فاش كيتنقل جين ولا حليل من كروب لشي كروب اخر.




#Article 305: نعوم تشومسكي (116 words)


نعوم تشومسكي (بلينڭليزية: Noam Chomsky) (تولد نهار 7 دجنبر 1928 ففيلاديلفيا فلميريكان) هو عالم لسانيات وفيلسوف وعالم منطق ومؤرخ وناشط سياسي ميريكاني. تشومكسي معروف باللي هو من أكثر لعولاما اللي نتجو لعلم فلعالم: كتب تال دابا كتر من 100 كتاب فاللسانيات والسياسة ولإعلام, وكان ما بين 1980 و 1992 هو أكتر واحد حي اللي تستشهدو بيه لباحثين فلعالم.

تيتعتابر تشومسكي باللي هو لأب ديال علم اللسانيات المعاصر, ولخدمة ديالو أترات بزاف فمجالات آخرا بحال لانفورماتيك والرياضيات وعلم النفس.

تشومسكي ناشط سياسي وعندو بزاف دلآراء اللي كاتعتابر آناركية لاسلطوية, تينتاقد بزاف السياسة لخارجية د لميريكان, والرأسمالية ديال الدولة, وتيضامن مع لقضية لفلسطينية.

تشومسكي كتب بزاف دلكتوبا فبزاف دلمواضيع كتيرشي اللسانيات والسياسية. من لكتوبا لمشهورة اللي كتب كاين:




#Article 306: نعيمة المشرقي (117 words)


نعيمة المشرقي هي واحد لممثلة مغربية خلاقت فعام 1943 بمدينة الدار لبيضا فلمغريب، مثلاث فبزاف دلأفلام ؤمسلسلات مغريبية.

لبداية ديال نعيمة المشرقي كانت فلمسرح  فين بدعات ؤخدمات مع فرق مسرحية مشهورة فلمغرب،بحال لفرقة دلمعمورة، د لبساتين، دمسرح الأنس، ؤ حتى لفرقة دالإذاعة ؤالتلفزة لمغربية؛من 1964 ؤنعيمة بدات كتبان فبرامج ؤمسلسلات مغربية ،لعبت أول دور نسائي ليها  فمسسلعائلة رام دام،مثلاث فكثر من 20 فيلم طويل  فرنساوي ؤطلياني   ، ؤمثلث ؤلا فبزاف دلمسلسلات ؤدلأفلام المغربية بحال عرس الدم، فاتن، حرب ديال الثلاثة دلملوك، لالة حبي، ؤ ؤزنقة السنونو.  ف1998 ربحات لجائزة دأحسن    صوت فمسلسل أمينة فمهرجان دالإذاعات العربية فالقاهرة.

نعيمة المشرقي هي كذلك سفيرة النوايا الحسنة ف اليونسيف،مستشارة دلمرصد الوطني دحقوق الطفل،

ؤرئيسة مساعدة فالنقابة لوطنية دمحترفي لمسرح.




#Article 307: نعيمة سميح (317 words)


نعيمة سميح (خلاقت ف 1953 ف دّار لبيضا) مغنية مغريبية. هي من أهم لمغنيات لمغريبيات ف ستيل ديال لموسيقى لعصرية لمغريبية، بدات لمسيرة ديالها ف سّبعينات د لقرن لعشرين و غنات بزاف د لأغاني لّي نجحو ف لمغريب و عندها شعبية كبيرة برا لمغريب و ب دّات ف دزاير و تونس و لمشريق.

نعيمة بنت درب السلطان، من عائلة أصلها من لجنوب د لمغريب، ف كازا و كبرات ف حومة بوشنتوف وكان درب سّلطان ف ستّينات نشيط بزاف تقافيا و خرج بزاف ديال سّميات ف لمجالات د لموسيقا و رّياضا و لأداب. نعيمة بانو لمواهب ديالها ف لغنا ف سن صغيرة حيت بدات كاتغني و هي عندها 9 سنين.

نعيمة ما كملاتش قرايتها، وقفات ف شّهادة لبتيدائية، و ما قراتش لموسيقى و كانت خدامة ف لحلاقة و تّجميل و كان عندها صالون ديالها خاص. كان عزيز عليها لغنا و كان لواليد ديالها ضد أنها تولي مغنية. واخا هاكاك بقات نعيمة شادة ف لحلم ديالها و شاركات ف برامج ديال لمواهب لّي كانت كاتنضمهوم لإيداعة وتّلفزة لمغربية. أول برنامج بانت فيه كان خميس الحظ لّي كان كايقدمو محمد لبوعناني غير هو فين بانت مزيان كان ف برنامج لمسابقات مواهب ديال عبد النبي الجيراري لّي خرج واحد لجيل متميز ديال لمغنيات بحال سميرة بنسعيد و عزيزة جلال.

كان لواليد د نعيمة متبع لمسيرة ديالها و شرط عليها أنها تغني غير ف لموسيقى لعصرية و تخدم مع كتاب كلمات و ملحنين ف أغاني معقولة ب كلمات محترمة. هاد لمراقبة د لواليد ديالها صعبات عليها ف لّول لمسيرة ديالها و لّي سهل عليها لقضية كانو تّدخلات ديال ملحنين وصحفيين كبار بحال محمد بنعبد السلام و محمد البوعناني و خالد مشبال لّي دواو مع لواليد ديالها و توسطو ليها حيت كانو مآمنين ب لموهبة لكبيرة ديالها.

و هاكدا خرجات أول غنية ديالها نوارة لّي نجحات بزاف و تبعوها غنيات خرين لّي نجحو و ولاو من لخالدات د لأغنية لمغريبية بحال الله عليها قصارة و ياك أجرحي لّي كتبها زّجال لكبير علي الحداني.




#Article 308: نوال المتوكل (122 words)


نوال المتوكل (خلاقت ف 15 أبريل 1962 ف دّار لبيضا) رياضية مغريبية سابقة ف ألعاب لقوى و مسيرة ف رّياضة. هي أول مرا عربية و إفريقية كاتربح ميدالية ف لألعاب لأولمپية نهار دات لميدالية دهبية ف لألعاب د لوس أنجلس 1984 ف 400 ميترو حواجز. من بعد ما سالات لكاريير ديالها خدمات ف بزاف د لمناصب لإدارية و سياسية ب حيت سبقلها كانت وزيرة د رياضة ف لمغريب (2007) و عضوة ف لّجنة لأولمبية لوطنية و لّجنة لأولمبية دّولية و ف لتّيحاد دّولي د ألعاب لقوى.

نوال بدات لمسيرة د لألقاب ديالها ف لبدو د تمانينات د لقرن 20، كانت ربحات ميداليات دهبية ف لألعاب لمتوسطية و لبطولات لإفريقية و لعربية قبل ما تمشي ل ميريكان باش تكمل قرايتها لجامعية ف رّياضة.




#Article 309: نور الدين النيبت (272 words)


نور الدين النيبت (تزاد ف الدار لبيضا ف 10 فبراير 1970) كوايري مغربي دولي كان كايلعب ف لبوسط د مدافع أوسط و من أحسن لّعايبية لمغاربة عبر تّاريخ. لعب 115 ماتش دولي مع لمونتاخاب لمغريبي و شارك ف 2 كؤوس عالم (94 و 98).

نور الدين النيبت بدا لكاريير ديالو ف لوداد لبيضاوي، لّي ربح معاه 3 د لبوطولات و كأس إفريقيا د لأبطال ف 1992. النيبت كان من رّكايز د لجيل دهبي د لوداد ف لبدو د تسعينات لقرن 20 ف لفرقة تّاريخية لّي دربها لأوكراني يوري مع لعايبية كبار بحال رشيد الداودي، فخر الدين الرجحي، مجيد بويبوض و لحسن بنعبيشة. فاش كان ف لوداد، كان النيبت عندو واحد لبوليفالونس كبيرة بحيت كان كايلعب ف بزاف د لبلايص و وصل أنه لعب قلب هجوم ف لفينال د سّوبر كوب د إفريقيا ضد أسيك ميموزا. هاد لقوة هي لّي خلاتو يكون من أحسن لمدافعين لّي دازو ف لعالم، حيت كانت عندو شوفة هجومية و كايزعم ف صنع لعمليات و كايفهم كيفاش كايتحركو لمهاجمين.

من بعد حتارف ف فرانسا ف إف سي نانط عام واحد (1993-94)، و لّي تختار فيه ف طّوب 10 د لبوطولة د فرانسا. من بعد سنا مع سبورتينغ لشبونة لبرطقيزي لّي لعب معاه عاماين (1994-1996) قبل ما يسني مع ديبورتيفو لاكورونيا سّبانيولي ف 1996. طّرانسفير ديال ل سوبير ديبور كان ف ديك لوقت أغلى بيعة د لعايب مغريبي (6 د لمليون د لأورو). ف سبانيا دوز النيبت 8 سنين تألق فيها ب شكل كبير و تختار بزاف د لمرات ف لفرقة لمتالية د لّيغا. ربح لّيغا مع دّيبور ف 2000 ودّا معاهوم لكاس ف 2002.

النيبت سالا لكاريير ديالو ف طوطنهام نّگليزي لّي لعب فيه بين 2004 و 2006.




#Article 310: نيجيريا (114 words)


نيجيريا, اللي سميتها رسميا لجمهورية لفيديرالية د نيجيريا, هي واحد لبلاد فغرب إفريقيا وأكبر بلاد فإفريقيا من ناحية السكان (تيسكن فيها كتر من 204 مليون واحد). تيحدًها النيجر من الشمال, بينين فلغرب, تشاد وكاميرون فالشرق, ولخليج د غينيا فلجنوب. لعاصمة د نيجيريا هي أبوجا وأكبر مدينة فيها هي لاڭوس. لفلوس اللي كيتخدًمو فنيجيريا هوما النًايرا والرئيس د نيجيريا د دابا هو موحمادو بوهاري.

نيجيريا عندها قتيصاد واعر وتيتنافس مع جنوب إفريقيا على أقوى قتيصاد فلقارة د إفريقيا. الصادرات د لپطرول عاونات بزاف باش توصل نيجيريا لهاد ليقتيصاد الصحيح.

نيجيريا فيها تلاتة ديال لإثنيات أساسية هي ليوروبا ولإيڭبو و لهاوسا. لبلاد مقسومة تقريبا مابين لمسيحيين ولمسلمين. لمسيحيين تيسكنو فلجنوب ولوسط, ولمسلمين تيسكنو فالشمال ولجنوب لغربي.




#Article 311: نيلز بور (102 words)


نيلز بور (ب دانماركية: Niels Henrik David Bohr)، تولد فـ7 أكتوبر 1885 فكوپنهاڭن ؤ مات فـ18 نونبر 1962 فنفس لمدينة، كان عالم د لفيزيك دانماركي، عاون بزاف باش يقاد نماذج نفهمو بها شكل د ذرة، زيد عليها داكشي لي عطا ف ميكانيك كوانتيك كان من بين لي قبلو ب طبيعة لاحتمالية لي كتطرحها ميكانيك كوانتيك ؤ عطا ليه تفسير لي معروف بتّفسير د كوبنهاغن، تسمى على سميتو لمعهد نيلز بور ف كوبنهاغن، خذا دكتورة ديالو ف لفيزيك عام 1911، بور غايفتح لمعهد دلفيزيك نظري ف كوپنهاڭن ؤ غادي يعطي نظرية ديالو لمشهورة د تركيب ذرة لي غايخد عليها جايزة نوبل عام 1922.




#Article 312: نيلسون مانديلا (120 words)


نيلسون روليهلاهلا مانديلا (تزاد ف 18 يوليو 1918 ف مڤيزو و مات ف 5 ديسمبر 2013 ف جوهانسبرڭ) هو سياسي إفريقي و رئيس جنوب إفريقيا ما بين 1994 و 1999.
ف عام 1943 دخل نيلسون مانديلا لحزب لمؤتمر لوطني لأفريقي. تعرف بالنضال ديالو ضد نظام لعزيل على حساب لون د لبشرة تيتسما ب لأبارتايد. ف للول كان النضال ديالو سلمي و لكن من بعد مجزرة شاربفيل ف 21 مارس 1960, كون و ترأس شعبة عسكرية تبعة للحزب سميتها رمح الأمة. كان لهدف ديالها تنوض لفوضة و طيح بالنضام العنصري.
ف 5 غشت 1962, شدوه بوليس د جنوب أفريقيا و تحكم عليه يبقى ف الحبس حياتو كاملة.

تزاد نيلسون مانديلا ف عروبية سميتها مڤيزو بمقاطعة أوماتاتا ف ترانسكاي ب جنوب إفريقيا.




#Article 313: نڭليزية (182 words)


لينڭليزية ولا النڭليزية ؤلا لونڭلي (ب لونڭلي : English) هي لغة أوروپية، وبالضبط جرمانية غربية اللي لأصل ديالها من لينڭليز. تاتًهضر لينڭليزية فڭاع القارّات د لعالم وتاتعتابر حاليا هي اللغة اللولا فلعالم من الناحية د لانتاج لعلمي. تقريبا مليار ونص د الناس فلعالم تيهضرو لونڭلي، منهم مابين 360 و 400 مليون اللي هي اللغة الأم ديالهم.

لينڭليزيا هي واحد اللغة جرمانية. هي ثالث اكثر لغة كيهضرو بها الناس فالعالم اما اكثر لغة كيهضرو بيها هي الشينوية (ماندارين) ؤ تابعاها الصبليونية.

نتاشرات لينڭليزية فلعالم من بعد لقرن 17، مع الإمبراطورية لبريطانية ولميريكان. مورا لحرب لعالمية الثانية، وحيث ولاًت لميريكان قوة عضمى، فرضات لينڭليزية راسها كلغة عالمية، ؤ ولاًت هي لوغة للولا ف لعالم فبزاف د لانتاجات ولميادين. لينڭليزية هي لغة رسمية فبزاف د لهيئات ولمؤسسات فلعالم بحال لأمم لمتًحدة وليتيحاد لأوروپًي.

نڭليزية هي لوغة رسمية ف54 بلاد. ماكاينش شي فرق كبير ما بين لينڭليزية ديال ميريكان و لينڭليزية ديال بريطانيا ف لمفردات ؤ لقواعد.

لينڭليزية هي لوغة لأجنبية تانية من حيت عدد ناس لي تيهضروها فلمغريب، من بعد لفرانساوية. تقريبا 6 د لمليون د لمغاربة قالو على راسهم باللي تيهضرو لينڭليزية ف 2014.




#Article 314: هايتي (209 words)


هايتي (ب لفرانساوية: Haïti - ب لكريول: Ayiti) هي بلاد جات ف لكاريبي، و تاتقاسم لجزيرة ديال هيسپانيولا مع لجمهورية د الدومينيكان. هايتي تاتحدّها الدومينيكان من الشرق، و لبحر د لكاريبي من ڭاع الجوايه لاخرا. هايتي عندها تالت أكبر مساحة ف لمنطقة د لكاريبي، و أكبر عدد ديال السكان (فيها تقريبا 11.4 مليون د الناس).

هايتي بلاد عندها تاريخ خاص. كانت لجزيرة اللي هي فيها (هيسپانيولا) هي أول بلاصة وصل ليها كريسطوف كولومبوس ف 1492، و دار فيها قاعدة عسكرية صبليونية. صبانيا كانت هي أول بلاد حتلاّت هايتي من الدقّة اللولا اللي وصلاتليها، و لكن ف 1626 خداتها منّها فرانسا، و ما عتارفات صبانيا بهاد لإحتلال تا 1679. ف لوقت اللي تستعمرات فيه هايتي، جابو ليها لأوروپيين بزاف د لعبيد و خدّموهم ف لفلاحة. ف 1791، ف وسط التورة لفرانساوية، تارو لعبيد لأفارقة على لفرانساويين، و هرّسو لمزرعات و لمدن. بقات التورة ديالهم تال عام 1803، اللي غلبو فيه لجيش د فرانسا، و ف 1 يناير 1804 ستاقلات رسميا لجمهورية ديال هايتي، اللي كانت أول جمهورية كحلا ف لعالم، و تاني بلاد ستاقلات ف النص لغربي د لكرة لأرضية، مورا لميريكان.

لعاصمة ديال هايتي هي پور ؤ پرانس (لمرسى للأمير) و اللغات الرسمية اللي فيها هي لفرانساوية و لكريول ديال هايتي. لفلوس اللي كاتخدّم ف لبلاد هي ل ڭورد.




#Article 315: هشام نوستيك (237 words)


هشام نوستيك (ازداد ف لقنيطرة ف 1976)، لّي مشهور بسمية كافر مغربي، و لّي سميتو لحقيقية يمكن تكون هشام بوليمان (على حساب بعض لمقالات صّحفية) هو كاتب مغريبي و منتج محتوى ف إنترنيت عايش ف كانادا. نوستيك معروف ب لبرامج ديالو (ولا لّي كاينتجها و يساهم فيها مع ناس خرين) لّي كاتشد ف لأديان. نوستيك كايعرف راسو على أنو لاأدري (أگنوستيك) و ملحد ب لإلاه لإبراهيمي لّي كايتشاركو فيه لإسلام ولمسيحية و ليهودية. نوستيك ألف كتوبا ب دّاريجا كاتعاود على سّيرة داتية ديالو و كيفاش تطورات لأفكار ديالو و لّي كايفصل فيها لمواقف ديالو على لأديان و لإسلام ب دّات.
، بلا مايكون حتا تأكيد ولّا نفي من عندو.

نوستيك خلاق ف لقنيطرة و دوز صغرو ف ضروف صعيبة و ماتو واليديه و هو صغير و تكلفات بيه ختو و راجلها لّي رباوه مع ولادهوم. ف لمغريب كان نوستيك ف شّباب ديالو متأتر ب لحركات لإسلامية و دخل مع منظمات بحال دّعوة وتّبليغ و لعدل و لإحسان. من بعد لباك هاجر ل ألمانيا و تما دخل مزيان ف لجماعات لإسلامية سّلفية و مشا بعيد ف أفكار لجهاد و جراتو ديك تّجربة تال لبوسنة ف تسعينات لّي كانت كاتعرف حرب أهلية. من بعد داتو ظّروف باش يدرس لأدب لألماني و من بعد لمسيحية، تما بدات مرحلة شّك عندو و لّي كملات ب أنو ولا إنسان لاأدري و بدا كايخدم ف إنتاج محتويات كفرية على حساب كيفاش كايسميها. هاد لإنتاجات ديالو لقات متابعة كبيرة ف لمغريب و دّول لعربية.




#Article 316: هنڭاريا (218 words)


هنڭاريا (بلهنڭارية: Magyarország) ولا لمجر، هي بلاد جات ف لوسط د أوروپا وماكاطلش على لبحر. تاتحدّها من الشمال صلوڤاكيا، من الشمال الشرقي أوكرانيا، من الشرق رومانيا، من لجنوب كرواتيا و صربيا و صلوڤينيا، و من لغرب لوطريش.

هنڭاريا عندها تاريخ قديم و دازو عليها بزاف د لحضارات بحال السيلتيك و الرومان و لجرمان و السلاڤ. لأصل ديال لبلاد ديال دابا تيرجع للعصور لوسطانية،و بالضبط للقرن التاسع، ملي سكنو لمجريين (هوما شعب أصلهم من روسيا) ف ديك لأرض. بقات لمملكة د لمجريين تقريبا 946 و دارزو عليها بزاف د لأحدات. من 1541 ل 1699 حكمات الدولة لعتمانية على طراف من هنڭاريا. ف لقرن 18، تحالفات هنڭاريا و لوطريش، و كوّنو لإمبراطورية النمساوية لهنڭارية، اللي كانت قوة عضمى فأوروپا، و لكن تفككات مورا لحرب لعالمية اللولا. من 1947 ل 1989 كانت هنڭاريا بلاد شيوعية تابعة للمعسكر الشرقي، و لكن ملّي طاح لحكم الشيوعي، ولاّت لبلاد جمعهورية ديموقراطية و قوة اقتصادية فيها خلصة طالعة.

تيسكنو ف هنڭاريا تقريبا 9.7 مليون د الناس، و لعاصمة ديالها هي بوداپيسط. اللغة الرسمية د لبلاد هي لهنڭارية، و لفلوس اللي كاتخدّم فيها هي ل فورينت. هنڭاريا دولة عضو ديال الاتحاد الأوروپي من 2004 و داخلة ف لفضاء ديال شينڭين من 2007. هي داخلة تا ف بزاف د لمنضمات دولية بحال لأمم لمتحدة و الناطو و منضمة التجارة لعالمية و لبنك الدولي و لمجلس ديال أوروپا.




#Article 317: هو شي مين (163 words)


نڭويين سين كونڭ اللي معروف بسميت هو شي مين (بلڤييطنامية: Hồ Chí Minh ) (تولد ف 19 ماي 1890 ف هوانڭ ترو - مات ف 2 شتنبر 1969 ف هانوي) كان مناضل شيوعي وسياسي ڤييطانمي, ولأب الرًوحي د لإستقلال دلاندوشين من فرانسا والجاپًون ولميريكان.

هو شي مين كان هو لوزير لأول د شمال ڤييطنام من 1945 ل 1955 وأول رئيس د لجمهورية الديموقراطية د ڤييطنام من 1945 ل 1969. كان هو حتا الرئيس ولكاتب لعام د حزب لعمال د ڤييطنام (واللي كيتسمًا تا لحزب الشيوعي لڤييطنامي), اللي كان حزب ماركسي لينيني.

سايڭون, اللي هو أكبر مدينة ف ڤييطنام, بدلات سميتها ف 1975 للمدينة د هو شي مين من مورا ما دخلوها الثوار لڤييطناميين اللي غلبوا لميريكان.

هو شي مين كان تيخدًم التقنيات د لحرب د لعصابات اللي خداها من محمد بن عبد لكريم لخطُابي, و كان ڭاع طلب منًو باش يهضر فالراديو د ڤييطنام باش يقول للمغاربة اللي تيتحاربو فلجيش د فرانسا مايحاربوش فلاندوشين, حيث تيخدمو لمصالح د لاستعمار وتيقتلو شعب مستعمر بحالهم.




#Article 318: هوكاساي (146 words)


كاتسوشيبا هوكاساي (باللغة اليابانية: 葛飾北斎؛ 31 أكتوبر 1760 – 10 ماي 1849) فنان ياباني، رسام أوكييو-إه، وصانع طباعة كينتامي لفترة إيدو. كاتسوشيبا تزاد في إيدو (دابا طوكيو)، وهو معروف بزاف بأنه هو اللي كتب سلسلة الموكوهانغا: ستة وثلاثين مشهد لجبل فوجي (富嶽三十六景 فوڭاكو سانجوروكو-كاي، 1831) واللي كتحتاوي علی المطبوعة الأيقونية الدولية، الموجة العظيمة قبالة كاناڭاوا (神奈川沖浪裏 كاناڭاوا-أوكي نامي أورا)

هوكاساي صايب المشاهد الستة والثلاثين علی قبل الانفجار اللي عرفو مجال السياحة الداخلية، وعلی قبل الهوس ديالو الشخصي بجبل فوجي في نفس الوقت. هاد السلسلة، وخاصة مطبوعة الموجة العظيمة وفوجي الأحمر هي اللي ضمنات الشهرة ديال هوكاساي في اليابان وفي برا. كيڭول المؤرخ ريتشارد دوڭلاس: في الواقع، إلی كان عمل واحد هو اللي اصنع سمية هوكاساي في اليابان وفي برا، فهو بالتأكيد هاد سلسلة المطبوعات الهائلة. وعلی الرغم من أن عمل هوكاساي قبل هاد السلسلة مهم بالتأكيد فهو ما حصلش علی الاعتراف واسع النطاق قبل ما يصاوبها.




#Article 319: هولاندا (150 words)


هولاندا ولاً لمملكة د هولندا (بالهولندية: Koninkrijk Nederland) هي دولة فلغرب د أوروپا، تاتحدها ألمانيا فالشرق، و بلجيكا فلغرب. من غير لأرض د هولاندا اللي كاينا فأوروپا, عندها تا تلاتة د لجزر تابعا ليها جات فلكاريبي. هولاندا معروف عليها باللي هي بلاد مرتابطة بلبحر, وكان عندها تاريخ طويل فالرحلات لبحرية وليحتيلال ولحروب اللي بدات كلها من لبحر. السمية ديالها أصلا (نيديرلاند) تاتعني لأرض لهابطة, حيت بزاف من لأراضي د هولاندا جات تحت من لرتيفاع د لبحر. لعلاقة د هولاندا مع لبحر تاتبان تا ملًي تانعرفو باللي أكبر مرسى فأوروپا هو لميناء د روطيردام, اللي كان تا أكبر مرسى فلعالم من 1962 ل 2004.

تيسكنو فهولندا 16 مليون ديال الناس، ولعاصمة الرسمية ديالها هي أمسطردام، واخا لمقر د لحكومة كاين ف لاهاي. اللغة الرسمية فلبلاد كلها هي لهولاندية، وعاد كيتهضرو فيها لغات خرا محلًية. هولاندا من بين لمؤسسين ديال ليتيحاد لأوروپي ف 1957. لماليك ديال هولندا د دابا سميتو ڤيلهم آليكساندر.




#Article 320: هومو إيريكتوس (216 words)


هومو إيريكتوس (سّميتو لعلمية Homo Erectus و لّي كاتعني: هاداك لّي ناض و وقف على رجليه) هو واحد لگنس د لقرودا لفوقانيين لّي عاشو بين هادي 2 د لمليون و 300 ألف عام.

هو أول گنس كان ميا ف لميا كايمشي على جوج رجلين (لگنوس بحال لوسطرالوبيتيك و لهابيليس كانو بين و بين و لأغلبية د لوقت كايتحركو على ربعة). لإيريكتوس كان كايسرح بزاف و كايغامر ل مسافات طويلة و هادشي لّي خلانا ليوم نلقاو لعضوما و لحفريات ديالو ف واحد لمساحة كبيرة: إفريقيا كولها، لجزيرة لعربية و شّام و لعراق و إيران و لهند و صّين و جنوب شرق آسيا. لعولاما كايرجحو أنه هو أول گنس د بنادم عمر آسيا.

لهوم إيريكتوس كان صياد واعر زيادة على أنه كان ميخالي و هو لّي خلا ماكلتو تكون منوعة. كان معلم ف تّصياب ديال دوزان و لأدوات د صّيادة من لحجر و لخشب و كتاشف كيفاش يصاوب لعافية هادي 400 ألف عام.

أول شانتيو ديالو تكتاشف ف إندونيسيا ف 1891 و كان لقاه لعالم لهولندي يوجين دوبوا. وكان ديال هومو إيريكتوس مرا.

كايشبه بزاف ل لهومو سابيانس (بنادم لّي كاين دابا) غير هو مختلف عليه ف شّكل ديال لفك ديالو ب حيت كان مگدر على ديال لهومو سابيانس و تقل ب لعضام و زيد عليها أنه ما كانتش عندو لگادومة و كانت عندو جبّهة مسطحة و عريضة.




#Article 321: هومو هابيليس (149 words)


هومو هابيليس (سّميتو لعلمية Homo Habilis و لّي كاتعني: هاداك لّي كايعرف يصاوب شي حوايج ب يديه) هو واحد لگنس د لقرودا لفوقانيين لّي عاشو بين هادي 2.4 و 1.6 د لملاين دسنين. أول حفرية تلقات د هاد لگنس كانت ف موقع أولدوفاي ف طانزانيا ف 1960 و لّي كان لقاها لعالم جوناطان ليكي. لهومو هابيليس كان كايعيش ف شّجر و ميخالي نباتي غير هو كان أول گنس د لقرودا لفوقانيين لّي قدر يخدم يديه مزيان باش يصنع دوزان و لعيبات من لحجر، كان كايتعملهوم ب دّات ف تقطاع الشجر و نّباتات سوا باش ياكلهوم و لا يصاوب لعشاش ديالو.

لحفريات و لعضوما لّي تلقاو د هومو هابيليس (كتر من 200 فرد) كايرجحو أنو كان عايش ف جّوايه ديال شّقة لكبيرة د ريفت لّي غادا من إتيوبيا ل جنوب إفريقيا.

راسو كان كبير و وجهو ما كانش خارج ل قدام بزاف (ب لمقارنة مع لگنوس لّي سبقوه بحال لوسطرالوبيتيك)




#Article 322: هوندوراس (180 words)


لجمهورية د هوندوراس (بالصبليونية: República de Honduras) هي بلاد جات ف أمريكا لوسطانية. تاتحدّها من لغرب ڭواطيمالا، من لجنوب لغربي الصالڤادور، من لجنوب الشرقي نيكاراڭوا، من لجنوب لمحيط لهادي، و من الشمال لبحر د لكاريبي.

دازو من لهوندوراس يزاف د لحضارات قدام بحال لحضارة ديال لمايا، قبل ما يدخل لإستعمار الصبليوني للبلاد ف لقرن 16. ملّي دخل لإستعمار للبلاد، دخّل معاه الدين لمسيحي و اللغة الصبليونية، اللي ولاو من بعد منتاشرين ف لهوندوارس. ستاقلاّت لهوندوراس من صبانيا ف 1821، و ولاّت من ديك الساعة جمهورية. من بعد لإستقلال، دازو بزاف د لمشاكل جتماعية و سياسية ف لبلاد، و باقي تال دابا فيها لفقر، و تاتعتابر وحدا من أفقر لبلدان ف النّص لغربي د لأرض. هندوراس هي لبلاد اللي تيوقعو فيها أكبر عدد ديال جرائم د لقتيل ف لعالم.

تيسكنو ف هوندوراس شويا كتر من 9.5 مليون د الناس، و لعاصمة الرسمية ديالها هي طيڭوسيڭالپا. اللغة الرسمية د لبلاد هي الصبليونية، و لفلوس اللي كاتخدّم هي الليمپيرا. 90% د السكان د هوندوراس من لإثنية ميستيسو، و اللي تاتعني باللي أصلهم مخلط و عندهم جدودهم أوروپيين و جدود من السكان لأصليين بجوج.




#Article 323: هيدروجين (482 words)


لهيدروجين (ب نّݣليزية: Hydrogen من ليونانية ὕδωρ هيدور ما ؤ لفرانساوية gène جين يخلق، يصاوب ب معنى لّي كيخلق لْما) هو عنصر كيماوي أساسي ، رّمز ديالو هو H و نمرة درية ديالو 1
ف لجدول الدوري، هاد لعنصر مستّف ف سّطر (دّورة) 1 و لعمود (لمجموعة) 1. هاد لعنصر داخل ف لݣروپ ديال لّافلزّات.
ف ضّروف لمعيارية د ضّغط و لحرارة، هاد لعنصر كيكون ف لحالة د غاز و هو معروف من 1766.

ف لبدية ديال لقرن 16، لخيميست پاراسيلسوس لاحض أن لْفوقاعات لّي كيطلعو فاش نّشارة د لحديد كتزاد ل لْحمض لْكبريتي قابلين ل ليشتيعال. ف 1671، روبرت بويل غادي يدير نفس لْملاحضة. حتا واحد من هاد جّوج ما قدر يستنتج لْوجود ديال لهيدروجين، داكشي علاش ليكتيشاف ديالو كيتنسب ل كاڤنديش. ف 1766، قدر يجمع هاد لفوقاعات ؤ يبين أنها مشكلة من غاز مختالف علا لغازات لْخرين. من بعد غادي يبين أن لهيدروجين ملّي كيتحرق كيعطي لْما، ؤ ب هادشي غادي يسالي معا لعتيقاد لّي كان منتاشر أن لْما عنصر أساسي ف طّبيعة. هاد لغاز غادي تعطا ليه سّمية ديال هيدرو-جين، ب معنى لّي كيخلق لْما من طرف عالم شّيمي لفرنساوي أنطوان لاڤوازيي.

ف 1931، هارولد أوري ؤ لمساعدين ديالو ف جامعة كولومبيا ف لميريكان، كتاشفو نوع آخور نادر ديال لهيدروجين. هاد نّوع، لّي هوّا ليزوطوپ هيدروجين-2، ؤ لكتلة ديالو ضوبل ديال لهيدروجين-1، تسمّا دوتيريوم.

لهيدروجين كيكون علا شكل غاز ف درجة لحرارة لْعادية، ؤ ماعندوش لون ؤلا ريحة، ؤ عندو أصغر كتافة ما بين لغازات كاملين. كيولي سايل ف 252.879- درجة سيلسيوس، ؤ كيتجمد ف 259.16- درجة سيلسيوس.

لهيدروجين هوّا أكتر عنصر موجود ف لْكون ب نسبة ديال 73%، عاد تابعو لهيليوم ب 25%، ؤ لعناصر لخرين مجموعين 2%. أغلبية ديال هاد لهيدروجين كاين ف نّجوم. كوكب لمشتري حتا هو مكون أساسا من لهيدروجين.

لخاصيات لفيزيكية ديال لهيدروجين-1، لّي هوّا أكتر نضير د لهيدروجين متوفر ف طّبيعة هيّا كتّالي:

لهيدروجين كيعتابروه بعض نّاس هوّا مصدر د طّاقة نّقية ديال لمستقبل، حيت نقدو نجيبوه من لْما، ؤ فاش كيتحرق كيولّي ما مرة خرة. كاينين ديجا خلايا د لْفيول كتخدم ب لهيدروجين، كتستعمل دابا ف بعض طّوبيسات ؤ طّوموبيلات.

لهيدروجين كيتستعمل ف لهندسة زّراعية باش ينتج لْأمونياك لّي كيتخدم ف تّخصيب زّراعي، ؤ ف إنتاج لپلاستيك ؤ بعض دّوايات. كيتستعمل أيضا ف تكرير لپيترول باش يتحيد منو لْكبريت، ب لإضافة ل صّناعة لغدائية متلا ف إنتاج سّمن صّناعي.

ف صّناعة د جّاج، كيتستعمل لهيدروجين ك مناخ حامي باش يتصنّعو لواح ملسة ديال جّاج، ؤ ف ليليكترونيك كيتخدم ف تصنيع رّقاقات سّيليكونية.

لكتافة ضعيفة ديال لهيدروجين خلاتو يكون أول ختيار ك غاز باش كيتعمرو لمنطادات، مي فاش نفاجر لْمنطاد لْمعروف هيندنبورڭ ف نيوجيرسي ف لميريكان، توقف هاد ليستخدام.

ليزيطوپ هيدروجين-1 كيتسما پروتيوم، ؤ كيكون مكون من پروتون ف نّواة ؤ إلكترون. دّوتيريوم ؤلا هيدروجين-2 نّواة ديالو مكونة من پروتون ؤ نيوترون، ؤ تريسيوم (هيدروجين-3) عندو جوج نيوترونات ؤ پروتون ف نّواة. لإزوطوپات لخرين كاملين صطناعيين تصاوبو غير ف لمختبر ؤ ماشي مستاقرين، بحيت كيتلاشاو ف أجزاء قليلة من تانية من بعد ماكيبانو.




#Article 324: ولد لڭريا (133 words)


يوسف محيوت (تولد نهار 31 يوليوز 1987 ففاس)، و اللي معروف بسميت ولد لڭريا - Weld L'Griya هو راپور مغريبي معروف بالزعامة ديالو فبزاف د لأغاني.

تولد ولد لڭريا ف 1987 فلمدينة لقديمة د فاس، وكبر فظروف صعيبة لي خلاتو يحبس قرايتو ملًي وصل للتامنة. فديك لوقت دخل لعالم ديال لإجرام ولمخدرات، وبدا تيبزنس فيها. فواحد ليستيجواب معاه، قال يوسف باللي راه مشا للحبس 28 ولا 29 مرة، وداكشي علاش تسمًا ولد لڭريا، زعما بقوة ما ولًف على لڭريا ديال لحبس.

ف 2013، كتاشف محيوت الراپ وبدا تيراپًي مع واحد لمجموعة سميتها هاش وورلد. ف 2017، ولاً كيغني بوحدو وخرًج بزاف د لأغاني اللي تعرفو بزاف فلمغريب وتا فلخاريج.

فـ27 ماي 2020، تشد ولد لڭريا ف فاس بسباب تهم ديال لعنف وتهديد بسلاح.

ولد لكًريا عندو بزاف د لأغاني اللي معروفة فلمغريب, منها:




#Article 325: ويكيپيديا (243 words)


ويكيپيديا هي موسوعة رقمية متعددة اللغات تصاوبات وتحافظ عليها كمشروع تعاون مفتوح من قبل مجتمع من المحررين المتطوعين باستخدام نظام تحرير قائم على الويكي. ويكيپيديا هي أكبر وأشهر عمل مرجعي عام على شبكة الويب العالمية، وهي عاوتاني وحدة من 15 المواقع الأكثر شعبية لي صنفاتها أليكسا باعتبار يونيو 2020. الموسوعة كتعرض حصريا محتوى مجاني بلا إعلانات تجارية، وهي مملوكة ومدعومة من قبل مؤسسة ويكيميديا؛ منظمة غير ربحية كتمول أساسا من التبرعات.

بدا الموقع ديال ويكيبيديا ف 15 يناير 2001 ولي بداوه هما جيمي ويلز ولاري سانجر. وسانجر هو لي سماه وسميتو كاتكون من كلمة ويكي وكلمة إنسكلوبيديا بمعنى موسوعة. وملي بدات بدات غير بلونجلي، ولكن بزربة بانو نسخ اخرين بلغات خرين لي كانو مختلفين فالمحتوى وطريقة الكتبة ديالهم. دابا كاينين شي 290 ويكيبيديا، ويكيبيديا ديال لونكلي هيا الكبيرة فيهم وفيها كثر من 5 دلمليون مقال. وفالمجموع ويكيبيديا كاملة فيها شي 40 مليون مقال وف299 لغة. وفتاريخ ديال فبراير 2014 ويكبيديا كاتشاف شي 18 مليار مرة وتقريبا 500 مليون فيزيت كل شهر.

فمارس 2017 ويكيبيديا فيها كثر من 40 ألف مقال واعر بمعنى مكتوبين مزيان كيتسماو بالمقالات المخيرة والمقالات .المزيانة لي كاتهضر على مواضيع حيوية. ف 2005 نشرات مجلة ناتشر واحد ريفيو كاتقارن فيه مابين 42 مقال ديال سيونس من موسوعة بريتانيكا وبينها وبين موسوعة ويكيبيديا، ولقات بلي الدقة ديال لمقالات ويكيبيديا قريب لدقة ديال بريتانيكا. مجلة مكازين تاهيا قالت بلي السياسة ديال ويكيبيديا أنها تخلي أي واحد يكتب فيها ردات ويكيبيديا أكبر وربما أفضل موسوعة فالعالم. وهي شهادة على الرؤية ديال جيمي ويلز




#Article 326: ويكيميديا لمغريب (207 words)


مجموعة مستخدمي ويكيميديا لمغريب ولاً ويكيميديا لمغريب هي مجموعة د الناس اللي تاتشجع وتعاون التخدام د مشاريع ويكيميديا فلمغريب. لمجموعة رسمية وتاتعتارف بيها لمؤسسة د ويكيميديا فميريكان, اللي هي لمؤسسة اللي تاتسيًر لمشاريع د ويكيميديا كاملة.

تأسسات ويكيميديا لمغريب نهار 6 أكتوبر 2015, وأسسوها رضا بنخضرة واسماعيل زنيبر وأناس السدراتي. لهدف د لمجموعة هو لمعاونة د ڭاع لمشاريع د ويكيميديا اللي هي إما كاينا فلمغريب ولاً عندها علاقة بلمغريب بشكل مباشر ولاً لا. بحال دابا, بزاف د لأعضاء د ويكيميديا لمغريب هوما من الناس اللي تيكتبو فويكيپيديا بالدارجة وتيطوروها باش تكبر.

الرئيس د ويكيميديا لمغريب د دابا هو رضا بنخضرة.

لهدف لأساسي د ويكيميديا لمغريب هو تساهم فالتنقيح و التحسين و الدعم د لمعرفة والثقافة لحرًة. هادشي تادًيرو بالتطوير د لوسائط لمعرفية خصوصا أي محتويات اللي مصايبة باللغات اللي كاتًهضر فلمغريب بحال الدارجة ولأمازيغية ولعربية ولفرانساوية ولينڭليزية والصبليونية على حساب لحاجة ولمواضيع.

تاتنظم ويكيميديا لمغريب بزاف د لأنشطة فإطار لأهداف ديالها, منها أنشطة تاتعاود, وأنشطة اللي كانت غي فوقت واحد.

نظمات ويكيميديا لمغريب عدد د لأنشطة اللي كانت فوقت واحد وحضروليها بزاف د الناس. هاد لأنشطة هي:

تاتنظم ويكيميديا لمغريب بزاف د لأنشطة اللي تاتًعاود, يعني را تدارت وغادي تعاود تًدار. منها:

ويكيميديا لمغرب مكلفة ببزاف د لمشاريع اللي عندها علاقة بلبلاد, إما أونلاين ولاُ فلحقيقة, بحال:




#Article 327: يوليوس إيڤولا (144 words)


البارون جيوليو سيزاري أندريا إيڤولا اللي كان معروف بيوليوس إيڤولا (بالطاليانية: Julius Evola - روما 19 ماي 1898 - 11 يونيو 1974) كان فيلسوف طالياني معروف بلفلسفة لخاصًة ديالو اللي كانت داخلة فلمدرسة التقليدية. إيڤولا كان قريب من لفاشية د الطاليان, ومورا لحرب لعالمية التانية, ولاً رمز عند الناس د النيو فاشية, واخا هو ماكانش متًافق مع شي أفكار د لفاشية, لا قبل لحرب ولا موراها.

إيڤولا ماكانش غي فيلسوف, كان حتا شاعر ورسًام وعسكري شارك فلحرب لعالمية اللولا والتانية. فلوقت د لحرب لعالمية التانية, كان كيتسارا واحد النهار فروما وقاسو واحد الطرف د واحد لقنبولة سوفياتية فالسًنسول, ومن ديك الساعة وهو مشلول من النص التحتاني ديالو.

كتب إيڤولا بزاف د لكتوبا, تلاتة منهم اللي مهمين ڭاع ومعروفين, هوما: التورة ضد لعالم ديال دابا (Rivolta contro il mondo moderno), بنادم وسط الرًدم (Gli uomini e le rovine), و ركب فوق النًمر (Cavalcare la tigre).




#Article 328: پيپا پيگ (121 words)


پيپا پيگ Peppa Pig ولا پيپا Peppa، مسلسل تلفازي بريطاني ديال رّوسوم داروه نيفيل آستلي و مارك بيكير و نتجاتو شركة إنترتينمنت وان. لإنتاج ديالو بدا ف 2004 و بقا 6 د لمواسم تال 2011.

ف لمجموع فيه 420 حلقة كل وحدة فيها ما بين 10 د دّقايق و ربع ساعة.

لمسلسل كايدور على واحد لعائلة د لحلالف عندهوم بنيتة پيپا  و ووليد، خوها الصغير جورج ف عالم بسيط و ملون بزاف شخصيات ديالو كاملين حيوانات. هاد رّوسوم موجه ل لوليدات صّغار باش يتعلمو لهدرة و لكلمات و كيفاش يتعاملو مع ناس، و ب دّات ف صّواب و كيفاش يتعاونو بيناتهوم. لحوار و لكلام د لمسلسل فيه لمعاودة ب زّايد ديال لهدرة باش يستافدو تا لوليدات لّي عندهوم موشكيل باش يتعلمو.




#Article 329: ڤلاديمير پوتين (156 words)


ڤلاديمير ڤلاديميروڤيتش پوتين (بالروسية: Влади́мир Влади́мирович Пу́тин) (تولد ف 7 أكتوبر 1952 فسان پيطيرسبورڭ) هو سياسي وضابط قديم د لمخابرات روسي, اللي دابا عندو لمنصب د رئيس روسيا من 2012. كان رئيس روسيا تا من 2000 ل 2008, ومن 2008 ل 2012 كان رئيس لووزارا تحت من الرئيس ديميطري ميدڤيديڤ.

تولد ڤلاديمير پوتين نهار 7 أكتوبر 1952 فسان پيطيرسبورڭ, اللي كانت سميتها ديك لوقت لينينڭراد. قرا لقانون فلجامعة د مدينتو وتخرًج منها ف 1975. من موراها نيشان خدم مع لمخابرات ديال ليتيحاد السوڤياتي (КГБ) وبقا فيها 16 لعام فبزاف د لمناصب تا وصل لرتبة ليوطنون كولونيل, وستاقل ف 1991 باش يبدا السياسة فمدينتو نيت.

ف 1996, مشا پوتين لموسكو ودخل مع لإدارة د الرئيس بوريس ييلتسين, فين خدا لمنصب د رئيس لمخابرات الروسية (ФСБ), قبل ما يولًي رئيس وزراء روسيا فغشت 1999. فدجنبر 1999 ستاقل ييلتسين من الرئاسة د روسيا وولاً پوتين هو الرئيس لمؤقت, حتا تنظمات نتيخايات وولاً هو الرئيس لفعلي د روسيا فعام 2000.




#Article 330: ڤينسنت ڤان ڭوخ (544 words)


ملف:Vincent van Gogh - Sunflowers - VGM F458.jpg|تصغير|يسار|دوار الشمس (F.458)، إعادة للنسخة الرابعة (خلفية صفراء)، غشت 1889. متحف ڤان ڭوخ، أمستردام|alt=ڤاز ديال السيراميك فيه زهور دوار الشمس على سطح أصفر ومع خلفية صفراء لامعة.

ڤينسنت ويليام ڤان ڭوخ (بالهولندية: Vincent Willem van Gogh؛ 30 مارس 1853 – 29 يوليوز 1890) رسام هولندي كاينتامي لتيار ما بعد الانطباعية، وهو واحد من أكثر الشخصيات شهرة وتأثيرا في الفن الغربي. غير فخلال عقد تقريبا استاطع انتج 2100 عمل فني، من بينهم 860 لوحة زيتية، والأغلبية ديالهم كيرجعو لعامين الأخيرة من حياتو. تنوعات الأعمال ديالو من بين مناظر طبيعية، أساليب الحياة، بورتريهات، وبورتريهات ذاتية، وتميزات بالألوان الغامقة، الطلاء المندافع، الحركي، والتعبيري واللي ساهمات فبناء الفن الحديث. ڤان ڭوخ ماكانش ناجح على المستوى التجاري، والانتحار ديالو فعمر 37 جا من مورا سنوات من المرض العقلي والفقر.

ترعرع ڤان ڭوخ في أسرة من الطبقة المتوسطة العليا، وكان جِدّي، هادئ، وعميق التفكير. ملي كان شاب، كان كيخدم تاجر فني، وكان كيسافر بزاف، ولكن ملي حولوه للندن تصاب بالاكتئاب. من بعد لقى راحتو فالدِين ودوز الوقت مبشر بروتستانتي في جنوب بلجيكا، ومع ذلك انجارفات حالتو الصحية وتصاب هاد المرة بالعزلة قبل ما يقرر باش إبدا يرسم فعام 1881، ورجع للديار ديالو مع والديه. دعمو شقيقو الصغير ثيو ماديا، وكانو كيتراسلو بيناتهم بالرسائل لمدة طويلة وفي الكثير من الأوقات. الأعمال ديالو المبكرة كانت معظمها كتصور أساليب الحياة ديال الفلاحين والعمال البسطاء، وكانت كتحتوي على القليل من الآثار ديال الألوان الزاهية اللي ميزات أعمالو اللاحقة. في عام 1886، انتاقل لباريس فين تلاقا مع أعضاء من الطليعية بحال إميل برنارد وبول ڭوڭان واللي كانو كينتاقدو التحسس ديال الناس من التيار الانطباعي. مع تطور العمل ديالو، استاطع ابتاكر مقاربة جديدة لمواضيع أساليب الحياة والمناظر الطبيعية المحلية. ولات لوحاتو أكثر إشراقا من حيث الألوان خصوصا ملي بدا كايطبق أسلوب طورو خلال إقامتو في أرل في جنوب فرنسا في عام 1888. خلال هاد الفترة، وسع من موضوعاتو باش تشمل أشجار الزيتون وحقول القمح وعباد الشمس.

عانى ڤان ڭوخ من نوبات ذِهان وأوهام و واخا كان ما مرتاحش من جيهت استقرارو العقلي، كان غالبا كيهمل صحتو الجسدية، وما كانش كياكل بشكل صحي وكافي وكان كايشرب الخمر بشكل كبير. انتاهت صداقتو مع ڭوڭان من بعد واحد المدابزة بآلة الحلاقة، واللي فلحظة غضب حيد فيها جزء من وذنيه اليسرى. دوز شي وقت في مستشفيات ديال الطب النفسي، بما في ذلك فترة في Saint-Rémy. من بعد ما خرج منو بمحض إرادتو، انتاقل لـ Auberge Ravoux في مدينة Auvers-sur-Oise حدا باريس وخضع لرعاية طبيب المعالجة المثلية بول ڭاشي. استمرات حالة الاكتئاب عندو، وفي 27 يوليوز 1890، طلق ڤان ڭوخ النار على صدرو بمسدس Lefaucheux وتوفا من بعد يومين متأثر بجراحو.

ما كانش ڤان ڭوخ ناجح فحياتو، وكان كيتعتابر رجل مجنون وفاشل. ولى مشهور من بعد الانتحار ديالو، ودابا راه موجود في العقول ديال الناس على أنه عبقري ما تفهمش مزيان، وهو الفنان فين كيتلاقاو الخطابات حول الجنون والإبداع. بدات سُمعتو كتنمو في أوائل القرن العشرين ملي تم دمج عناصر من أسلوبو في الرسم من قبل الوحشيين (تيار) والتعبيريين الألمان. حقق نجاح نقدي، تجاري، وشعبي على مدار العقود التالية، وتذكر على أنه رسام مهم ولكن مأساوي، اللي شخصيتو المضطربة كتمثل الصورة المثالية والشاعرية للفنان المعذب. أعمال ڤان ڭوخ اليوم هي من أغلى اللوحات الفنية التي كتباع في المزادات العلنية على الإطلاق، وتم تكريم الإرث ديالو عبر متحف كيحمل الاسم ديالو، متحف ڤان ڭوخ في أمستردام واللي كيضم أكبر مجموعة في العالم من لوحاتو ورسوماتو.




#Article 331: ڤييطنام (170 words)


ڤييطنام ولاً لجمهورية لإشتراكية د ڤييطنام (بلڤييطنامية: Cộng hòa xã hội chủ nghĩa Việt Nam)هي واحد لبلاد اشتراكية فلجنوب الشرقي د آسيا. تاتحدًها من الشمال الشينوا, من الشرق ولجنوب خليج طونكين (بحر الصين لجنوبي), ومن لغرب لاووس وطايلاند ولكامبودج.

ڤييطنام عندها تاريخ طويل والتاريخ لمعاصر ديالها معروف. فاللول د لقرن 20, كانت مستعمرة فرانساوية, وستاقلات منها ف 1945. من مورا داكشي غادي تهاجم فرانسا على ڤييطنام فلحرب دلاندوشين اللي سالات ف 1954. فهاداك لوقت تقسمات لبلاد على 2: الشمال الشيوعي ولجنوب الرأسمالي. غادي تدخل موراها ميريكان فحرب باش تعاون لجنوب, وغادي تبقا هاد لحرب تال 1975 وأتسالي باللي الشمال الشيوعي أيربح وأتخسر لميريكيان. من 1975 توحدًات ڤييطنام فبلاد وحدا جمعات الشمال ولجنوب وهي لجمهورية لإشتراكية د ڤييطنام.

تيسكنو فڤييطنام تقريبا 96 مليون د الناس. لعاصمة ديالها هي هانوي, وأكبر مدينة فيها هي مدينة هو شي مين, اللي كانت كاتسمًا سايڭون تال 1975. اللغة الرسمية فيها هي لڤييطنامية, ولعملة اللي تاتخدًم فيها هي الدونڭ. ڤييطنام داخلة فبزاف د لمنظمات دولية بحال لأمم لمتحدة ومنظمة التجارة لعالمية ورابطة دول جنوب شرق آسيا.




#Article 332: ڭامبيا (166 words)


لجمهورية د ڭامبيا (ب لينڭليزية: Republic of the Gambia) هي بلاد جات ف لغرب د إفريقيا. هي أصغر بلاد من ناحية لمساحة اللي جات فلأرض د إفريقيا. تاتحدها السينيڭال من الشمال و لجنوب والشرق، و لمحيط لأطلسي من لغرب. لبلاد تيدوز منها لواد ديال ڭامبيا اللي عاون باش اتّرسم لحدود د لبلاد وقت ليستيعمار، حيت تدرات لحدود بين ڭامبيا و السينيڭال هي 10 كيلوميطر من الشمال و لجنوب ديال لواد.

ستاقلات ڭامبيا من بريطانيا ف 1965 و ولاّت جمهورية ف 1970. ما بين 1982 و 1989 كانت السينيڭال و ڭامبيا بلاد وحدا سميتها سينيڭامبيا ولكن تفارقو عاود. ف 1991 سيناو اتفاقية ديال الصحبة و لمعاونة بيناتهم. ف 2015 علن الرئيس يحيى جامع باللي ڭامبيا ولاّت جمهورية إسلامية حيت لأغلبية د السكان (90%) مسلمين.

تيسكنو ف ڭامبيا شويا كتر من 2 د لمليون د الناس، و لعاصمة ديالها هي بانجول. اللغة الرسمية د لبلاد هي لينڭليزية و عاد كاين 5 د اللغات وطنية (ماندينكا، فولا، وولوف، سيرير، جولا). لفلوس اللي كاتخدّم ف لبلاد هي الدالاسي د ڭامبيا.




#Article 333: ڭرينادا (169 words)


ڭرينادا (ب لينڭليزية: Grenada) هي بلاد جات فلجزر د لهند لغربية ف لبحر د لكاريبي. جات ڭرينادا فالشمال لغربي د طرينيضاض ؤ طوباڭو، و 140 كلم على الشمال الشرقي د ڤينيزويلا، و جات تحت (ف لجنوب) ديال لجزر د سانت ڤينسنت و لڭرونادين.

لأصل ديال السمية ديال ڭرينادا هو لمدينة د غرناطة ف صبانيا، و تسمات بيها ف 1498 ملي داز كريسطوف كولومبوس على لمنطقة فالسفر التالت ديالو. ماعمّر الصبليون ما ستعمرو لجزيرة، و كانو لفرانساويين هوما أول أوروپيين اللي ستعمروها ف 1650. ف 10 فبراير 1763، مورا ليتيفاقية ديال باريز عطات فرانسا ڭرينادا لبريطانبا، اللي بقات مستعمراها تال 7 فبراير 1974، اللي هو التاريخ د لإستقلال د لبلاد.

تيسكنو ف ڭرينادا شويا كتر من 100.000 واحد، و لعاصمة ديالها و أكبر مدينة فيها هي سانت جورجز. اللغة الرسمية د لبلاد هي لينڭليزية، و لكن لكريويل د لفرانساوية و ديال لينڭليزية معتارفين بيهم لغات جهوية. لفلوس ديال ڭرينادا هي الدولار د شرق لكاريبي. ڭرينادا تابعة للمنضمة د لكومونويلث و نضام لحكيم فيها هو ملكي، عندو نفس لملك ديال بريطانيا.




#Article 334: ڭواطيمالا (322 words)


ڭواطيمالا (ب الصبليونية: República de Guatemala) هي بلاد ف أمريكا لوسطانية. تاتحدّها لمكسيك من الشمال و لغرب، لمحيط لهادي من لجنوب لغربي، بيليز من لجنوب الشرقي، لبحر د لكاريبي و هوندوراس من الشرق، و الصالڤادور من لجنوب الشرقي. ڭواطيمالا هي لبلاد اللي فيها أكبر عدد د السكان ف أمريكا لوسطانية.

قبل ما يدخلو لأوروپيين للمنطقة اللي فيها دابا ڭواطيمالا، كانو السكان تابعين للحضارة ديال لمايا. ف لقرن 16 ستعمرات صبانيا لمنطقة، و بقات حاكماها تال 1821، اللي هو لعام اللي ستاقلات فيه و كانت طرف من لجمهورية لفيديريالية د أمريكا لوسطانية، اللي تفككّات ف 1841 و خرجات منها لجمهورية د ڭواطيمالا.

فاللخر د لقرن 20 (من 1960 تال 1996)، وقعات حرب أهلية ف ڭواطيمالا بقات 36 عام، و تدخلات لأمم لمتحدة باش تحبسها تا سيناو ڭاع لأطراف اتفاقية د السلام بيناتهم.

تيسكنو ف ڭواطيمالا شويا كتر من 17 لمليون د الناس، و لعاصمة ديالها و أكبر مدينة فيها هي ڭواطيمالا سيتي. اللغة الرسمية ف لبلاد هي الصبليونية، و أكتر دين كيتبّعوه الناس هو لمسيحية (88% د الناس مسيحيين). لفلوس ديال ڭواطيمالا هوما ل كيتزال.

لموسيقا لڭواطيمالية فيها بزاف ديال شكال وستيلات. تغيير جتيماعي فڭواطيمالا تقوى ب لموسيقا، بحال نويبا كانسيون، لي كاتجمع بين لقيصات لقدام ولمشاكل ديال دابا، ولقيم سياسية وحتا نضال ديال ناس لعاديين. شعب ديال لمايا كان عندو معا تقافة ديال لموسيقا، كيما باين فرموز ديالهم. ڭواطيمالا كانت وحدا من لبلايص لولا ف لعالم جديد لي دخلات ليها لموسيقا لؤروپية، من 1524. بزاف ديال لملحنين من ستيلات مختالفة ديال لموسيقا بحال نهضة، باروك، رومانسية، ولمعاصرة شاركو فبزاف ديال لأعمال. لماريمبا، لي كيشبه لكزيلوفون ب لخشب، هي لألة ديال لبلاد ولموسيقا ديالو كاينة فڭواطيمالا كاملة، وطورات ريپيرطوار كبير د لأغاني لي ولات شعبية لكتر من قرن.

لا هيسطوريا خينيرال دي ڭواطيمالا نشرات واحد سيري ديال سيديات جامعين تاريخ لموسيقا فڭواطيمالا، لي فيه ڭاع ستيلات، من لفترات ديال لمايا، ستيعمار، ستيقلال ولجمهورية حتال دابا. بزاف ديال لڭروپات لمعاصرة فڭواطيمالا كيلعبو لموسيقا لكاريبية، صالصا، لپونطا د ڭاريفونا، لاتين پوپ، لموسيقات د لمكسيك، ولمارياتشي.




#Article 335: ڭود (119 words)


ڭود هو جورنال إلكتروني مغريبي مكتوب بداريجة و لفرانصاوية بدا نهار 14 فبراير 2011 بصحافيين اللي كانو خدامين ف مجلة نيشان قبل ما تسد. ڭود قابطاها شريكة ڭود ميديا لي أسسها وشادها صحافي أحمد نجيم.

ف 8 شتنبر 2014، تهاكا السيت ديال ڭود من طرف شي ڭروب سميتو لجيش لإلكتروني لإسلامي حيت كيقولو كينشر التفاهات وكيدعي للإنحلال الأخلاقي.

نهار 22 يونيو 2015، لمحكمة لبتيدائية د كازا حكمات علا جورنال باش يخلص 500 ألف درهم لموستاشار د لملك منير الماجيدي، اللي رفع عليهم دعوا علاود مقال كيهدر عليه.

ف غشت 2016، رجل لأعمال كريم بناني دخل شريك ف ڭود بتقريبان 83% باش يعاون السيت اللي كان كيعاني باش يزيد لقدام، ولاكين ف أكتوبر ڭود وبناني قررو باش مايكملوش معا بعضياتهم.




#Article 336: ڭووڭل (264 words)


ڭووڭل (بلينڭليزية: Google) هي واحد الشركة ميريكانية كاتعطي بزاف د لخدمات ف أنترنت بحال محرًك ديال التقلاب ولإيميل (جيميل) والجميع د لمعلومات (درايڤ) والتنظيم دلوقت (ڭووڭل كالندر) ولخرائط والطرقان (ڭووڭل خرايط) ولڤيدييويات (يوتوب) وبزاف د لحوايج آخرا. ڭووڭل هي الشركة اللي تاتحكم تا فالنظام د أندرويد ديال التيليفونات لمطوًرة و الطابليطات، اللي هو أكبر نظام تيتخدًم فلعالم.

السمية د ڭووڭل ماجة من واحد السمية د واحد الرقم كبير بزًاف (1 متبوع ب 100 زيرو)، وتاترمز للعدد د لمعلومات اللي كاينة فلانترنيت.

تأسسات ڭووڭل ف 1998 من جوج د الطلية د الدكتورا فلجامعة د سطانفورد فلميريكان: لاري پييج و سيرڭيي برين. ف 2015, تجمعات الشركات د ڭووڭل وشي شركات خرا د نفس لمؤسسين فشركة كبر اللي سميتها ألفابيت، اللي لمدير ديالها هو لاري پييج والرئيس هو سيرڭيي برين. ڭووڭل ولاًت تحت من هاد الشركة، ولمدير ديال ڭووڭل ديال دابا هو سوندار پيتشاي.

ڭووڭل.كوم, اللي هو موقع تابع للشركة د ڭووڭل، هو أول موقع فلعالم من حيث شحال من واحد تيدخلو كل نهار، وكاين مواقع خرا تابعة للشركة اللي تاهي مكلاسيا مزيان بحال يوتوب اللي هو الثاني فلعالم.

ف يناير عام 1996, بدات شركة د ڭووڭل على هيأة مشروع د بحث من عند لاري بيج وكان معاه سيرجي برن, بحيت كانو كيوجدو لدكتورة ف جامعة ستانفورد بولاية كاليفورنيا.

و فترضو على أن هاد المحرك د بحث غيقوم بتحليل العلاقات ما بين مواقع الشبكة باش يعطي نتائج مزيانة بحيث كتقوم بترتيب النتائج على حسب الظهور د الكلمة لي كيقلبو عليها فهاد المحرك.

فاش خرج هاد المحرك فلول سماوه باك رب (بلونغلي: BackRub) حيت السيستيم ديالو كان كيفحص الليانات الي دازو من قبل باش يعطيو تقييم لأهمية الموقع.




#Article 337: ڭويانا (177 words)


لجمهورية التعاونية د ڭويانا، اللّي معروفة ب ڭويانا (ب لينڭليزية: Guyana)، هي بلاد جات جغرافيا فأمريكا لجنوبية، و لكن تاريخيا و تقافيا تاتعتابر طرف من لمنطقة د لكاريبي حيت عندها علاقة كتر مع ديك لبلدان. ڭويانا تيحدّها من الشمال لمحيط لأطلسي، لبريزيل من لجنوب و لجنوب لغربي، ڤينيزويلا من لغرب، و سورينام من الشرق.

لمنطقة اللي فيها ڭويانا جات فالشمال ديال لواد د لأمازون و كانو ساكنين فيها 9 ديال لقبايل د السكان لأصليين. لأوروپيين اللوالا اللي حتلو لمنطقة هوما لهولانديين، و لكن من بعد (فاللخر د لقرن 18)، ولاّت تابعة لبريطانيا. بقات لبلاد (اللي كانت سميتها ديك لوقت ڭويانا لبريطانية) مستعمرة تال 1966، اللي هو لعام اللي ستاقلاّت فيه.

ڭويانا هي لبلاد لوحيدة ف أمريكا لجنوبية اللي اللغة الرسمية فيها هي لينڭليزية. لأغلبية د لمواطنين تيهضرو لكريول و هي اللغة لأم ديالهم. تيسكنو ف لبلاد تقريبا 778.000 ديال الناس، و لعاصمة ديالها هي جورج تاون. لفلوس اللي كاتخدّم ف ڭويانا هي الدولار د ڭويانا. ف 2017، كانو 41% د السكان د ڭويانا محسوبين تحت من لعتبة د لفقر، و هادشي تيخلّيها من أفقر لبلدان ف لعالم.




#Article 338: جدوان (194 words)


لمختار جدوان لمعروف بجدوان ولاً الشاب جدوان (تولد فالرباط ف 1967) كان مغنًي مغريبي د الشعبي عتازل ف 2008 وبدا تيدير الدعوة لإسلامية.

تولد لمختار جدوان ف 1967 فالرباط وكبر فأسرة فنية, كان كل واحد من خُوتو التلاتة عندو مجموعة موسيقية ديالو, وكانوا كلًهم كيتدرًبو فالدار. كبر لمختار فهاد لجو وكان تيسمع لبزاف د لمغنًيين منهم ناس لغيوان وجيل جيلالة ومحمد لمراكشي ومحمد بنعمر الزياني.

بدا جدوان لمسيرة ديالو فلغنا ف 1987 وخرًج أول ألبوم مع لمجموعة ديالو وكانت سميتو: أنا لمسيكينة. من ديك لوقت بانلو باللًي حياتو أتكون فلموسيقى ووقًف قرايتو فلعام التاني د لجامعة. من بعد دخل للمعهد لموسيقي ديال الرباط وبدا تيخرج أغاني جداد مع لفرقة ديالو اللي كانت سميتها أوركيسطرا جدوان. تعرف بزاف فلمغريب وولاُ تيشارك فلمهرجانات ولعراسات, وغنًا ببزاف د اللهجات باش يبيًن التنوع د الثقافة د لمغريب كامل.

جدوان كان معروف باللي كان دياني, ومشا للحج جوج مرات ف 1992 و 1993, وواعد راسو باش يعتازل ملًي يوصل ل 40 عام. فعلا, ف 2008 عتازل لموسيقا ومابقاش تيغني. من ديك الساعة ولاً لمختار جدوان مقرئ ديال لقرآن فبزاف د الجوامع وداعية تيشارك فبزاف د لمناسبات الدًينية.

جدوان عندو بزاف د لأغاني لمعروفة عند لجمهور لمفريبي, منها بحال دابا:




#Article 339: لقضية د ليلهامر (482 words)


لقضية د ليلهامر، كاتعني بيها لقتيلة لي وقعات فـ21 يوليوز 1973 ف ليلهامر (نورڤيج) د أحمد بوشيخي، سرباي مغريبي-نورڤيجي خو شيكو بوشيخي ديال جيپسي كينڭ، لي دارتها لموصاد ف إطار عملية غضب رب. لموخابارات لإسرائيلية سحابليهم هو علي حسن سلامة، زعيم ديال منضمة أيلول لكحل، لي مسؤولة على لقتيلة ديال لعاب لؤلمپية د ميونيخ. ستة من خمسطاش لعميل د لموصاد شاركو فهاد لعملية شداتهم سلطات د نورڤيج ؤ تحكم عليهم. هاد لقضية طيحات من سمعة ديال لموصاد. سلامة لحقيقي قتلاتو لموخابارات د إسرائيل حتال 1979.

من بعد لقتيلة ديال لعاب لؤلمپية د ميونيخ فـ1972 لي مات فيها حضاش لعايبي إسرائيلي، لوزيرة لولا د إسرائيل ڭولدا ماير عطات ضو لخضر باش تدار عملية غضب رب باش يتقتلو ناس لي كانو مور ديك لقتيلة. علي حسن سلامة، زعيم ديال منضمة أيلول لكحل ؤ مسؤول ديال لقوة 17، كان من بين لوحدين لي لموصاد خاصها تصفيهم.

فيوليوز 1973، لموصاد سحابليها لقات لأتر د سلامة مورما تبعات واحد لجازائيري، كمال بنامان، لي حسباتو بلي راه وسيط ديال أيلول لكحل. هاد لخر مشا ل ليلهامر من جونيڤ، ؤ لموخابارات لإسرائيلية سحابليها بلي راه غادي يتلاقا سلامة بتخبية فديك لمدينة نورڤيجية صغيرة. خمسطاش لعميل تصافطو لتما، من بينهم لمدير لعام د لموصاد زڤي زامير ؤ مدير لعملية ميكايل هراري. فـ20 يوليوز 1973، سحابليهم سلامة هو بوشيخي حيت لجازائيري لي تابعينو بدا يهضر معاه. هاد سرباي لمغريبي-نورڤيجي تولد فـ13 أبريل 1943 ؤ هو لخو لكبير د شيكو بوشيخي، لي هو من لمؤسسين د جيپسي كينڭ. كان عايش ف ليلهامر هادي تسع سنين ؤ مزوج بنورڤيجية سميتها طوريل لارسن، لي كانت حاملة ببنتهم. أحمد ماكانتش عندو علاقة ب لمونضامات لفيليسطينية.

لغد ليه فليل، بوشيخي ؤ مراتو لحاملة كانو راجعين من سينيما. واحد طوموبيلة صايڭينها إسرائيليين وقفات حدا دار ديالهم. جوج منهم تيراو على بوشيخي 13 لمرة بسلاح كاليبر 22 قدام مراتو. هربو موراها بزبة من مسرح لجريمة فطوموبيل ديالهم. ملي لبوليس نورڤيجي جا، لقاو بوشيخي مات.

هاد لقتيلة أترات ف سكان د ليلهامر، حيت كانت أول جريمة د دم وقعات ف لمدينة من هادي 36 عام. لإسرائيليين مافهموش لقضية مورما نشرات صحافة نورڤيجية لخبار.

ستة د لإسرائيليين شدهوم لبوليس بتهمة لقتيلة. وحدا من لي خدامين ف لموصاد، سيلڤيا رافايل، ستعلملات پاسپور كانادي بسميت، پاطريسيا روكسبورو، لي كاينة بصح ؤ تسرق ليها پاسپور ديالها ف موريال.

جوج من ناس د لموصاد لي شاركو ف لقتيلة، دان إرت ؤ ماريان ڭلادنيكوف، كانو كراو طوموبيل بسميتهم لحقيقية. تشدو ؤ هوما غاديين يردو طوموبيل ف ماطار ؤصلو. مور ستينطاق، هاد جوج عطاو للبوليس لادريسة ديال واحد دار فين كاينين ربعة ديال لمخبرين إسرائيليين، من بينهم سيلڤيا رافايل، لي كانت وحدا من لعناصر لمهمة د لموصاد، ؤ تحكم عليها بتهمة لقتيلة فهاد لقضية.

سلامة لحقيقي ف لخر قتلاتو لموصاد ف بيروت فـ1979.

فـ1996، لحوكومة د إسرائيل صرفات واحد تعويض لعائيلة بوشيخي، والاكين ماعتارفاتش ب لجريمة. خمسة من لمخبرين دغيا خرجو من لحبس. ؤ سيلڤيا رافايل من بعد شي أعوام ف لحبس تعطاتها حرية مسبقة مورما تدخل لموحامي ديالها أنايوس شوت، لي تزوج بيها من بعد.




#Article 340: جهة فاس مكناس (543 words)


جهة فاس مكناس (بلأمازيغية: ⵜⴰⵎⵏⴰⴹⵜ ⵏ ⴼⴰⵙ ⵎⴽⵏⴰⵙ، بالفرانساوية: Fès-Meknès) وحدة من لجيهات ديال لمغريب اللي تصايبو عام 2015، من مورا ما نقصو عدد لجيهات من 16 لـ 12. لجيهة كاينة فالشمال الشرقي ديال البلاد، و لعاصيمة ديالها هي فاس، و مابين لمدون اللي كاينين فلجيهة: مكناس وبولمان وصفرو وإيفران وتازة. عدد السكان على حساب لإحصاء اللي تدار فـ2014 وصل فهاد لجيهة لـ4,236,892. لميساحة ديال لجيهة هي 	40,075 كم².

هاد لجدوال كايبين لأقاليم ديال لجيهة والسكان ديالها:

هاد لجدوال كايعطي التطور ديال سكان لجيهة مابين 1994 و2004.

جهة فاس مكناس محاديها من الشمال جهة طنجة تطوان الحسيمة ومن لجانوب جهة درعة تافيلالت ومن الشرق جهة الشرق ومن لجانوب لغربي جهة بني ملال خنيفرة ومن لغرب جهة الرباط سلا القنيطرة. هاد لجيهة فيها بزاف ديال لخصائص لجغرافية بحال أنه دايز منها جبال لأطلس لمتوسط ؤويدان بحال واد سبو وهضاب من متوسطة لعلو حتى لعالية، وتيلال دلبدو ديال الريف فالشمال، تلال ميسور وسهول سايس. لميساحة ديال لجيهة واصلة لـ40,075 كم². لجهة ديال فاس مكناس فيها تلاتة ديال لأنواع د لموناخات:

هاد لجدوال كيعطي لمعلومات على لحرارة والشتا فمدينة فاس اللي هي لعاصيمة ديال لجيهة.

مطار فاس الدولي (مطار فاس سايس) هو مطار كاين فمدينة فاس وكايسيرڤي لجيهة ديال فاس مكناس. كيبعد لمطار على الصونطرڤيل ديال لمدينة بـ 11 كيلوميتر، وقريب من لوطوروت ديال الرباط-وجدة. كيتعتابر رابع أكبر مطار فلمغريب من ناحية عدد لمسافرين. تفتاتح لمطار فـ1960 فعهد محمد الخامس بلحضور ديال ملك الأردن الحسين بن طلال وكايقدر يهز 2.500.000 مسافر.

كاينة واحد لوطوروت اللي دايزة من لجيهة هي لوطوروت التالتة اللي كاتدي من الرباط حتال مدينة وجدة والطول ديالها 496 كيلوميتر. هاد لوطوروت كادّوز من مكناس وفاس وتازة.

بالنسبة للطرقان لوطنية لجيهة دايزين فيها سبعة واللي هوما الطريق لوطنية 4 والطريق لوطنية 6 والطريق لوطنية 8 والطريق لوطنية 13 والطريق لوطنية 15 والطريق لوطنية 27 والطريق لوطنية 29.

كاتوصل لميساحة الصالحة للزيراعة فجيهة فاس مكناس لـ1.340.826 هيكتار، ما بينها 184.162 هيكتار مسقية، بقيمة زايدة وصلات لـ9.1 مليار ديال الدرهم. لجيهة كاتنتج زيت الزيتون فـلمطة، عزابة، زرهون ووطات لحاج، حب لملوك فعين اللوح، اللوز فأكنول، التفاح فتافجيغت ولكبّار فزرهون وفاس. فلمجال ديال التربية دلبهايم لجيهة فيها لبݣر ولغنام ولمعاز والجمال ولخيول، واللي غالب بزاف هما لغنام اللي وصل عدد الريوس ديالهوم فعام 2015 لتلاتة دلمليون و532 ألف راس، واللي عطاو قيمة زايدة 3.5 مليار ديال الدرهم.

فجيهة فاس مكناس الصيناعة واقفة على لينتاج ديال لاغدية الزيراعية والتواب والجلد بنيسبة واصلة لـ60% من لقيمة الزايدة ديال لجيهة. كاينة 997 وحادة صيناعية فلجيهة مخدّمة 47 ألف واحد، أولا 9% ديال لپيرصونيل فلمغريب. 61% ديال هاد لوحادات كاينين ففاس و18% كاينة فمكناس. كاينين 4 ديال لوحادات الصيناعية فلجيهة. الصيناعة التقليدية هي شي حاجة اللي معروفة بيها لجيهة ديال فاس مكناس، واخا ماكايناش معطايات كاملة ولايني مايمكنش لينا نتاجهلو هاد لحقيقة. هاد النوع ديال الصيناعة كاينتج فالساس ديالو لحوايج اللي مصاوبين من الجلد (26.3% ديال الشيفر دافّير) ولموجوهارات (22.3%) والصبابط (14.2%).

كاين بزاف مايتشاف فجيهة فاس مكناس، بحال لمدينة لقديمة ديال فاس ومدينة وليلي لقديمة. كاينين حتى لحامات ديال مولاي يعقوب ولغابات ديال لارز فإيفران اللي فيها 115.920 هيكتار وبزاف ديال الضايات بحال ضاية عوا. فصفرو كاينين بزاف ديال لمناضير الطبيعية بحال غابات تاݣلتونت وجبال بويبلان، وكاينين بزاف ديال لمآتير التاريخية فمكناس اللي بناوها لمرابطين أولا تاونات اللي بناوها لموحدين. جات كتر من مليون ديال السياحة لفاس فعام 2015 لواحد لجيهة اللي فيها 335 أوطيل بكتر من 19 ألف فراش.




#Article 341: تعليم (197 words)


تعليم هو عملية لي كاتخليك تشد مجموعة من لمهارات ولمعارف. وكاتعني حتا كيفاش تعاون ناس يديرو شي حاجة وتدعمهم باش يفكرو فشنو تعلمو.

ب تعليم، لمعرفة ديال شي مجتمع ولا دولة ولا حتا لعالم كولو كاتنتاقل من جينراسيون لجينيراسيون خرا. هادشي داخل فيه تعليم ديال لأخلاق، متلا تعلم كيفاش تعامل مع ناس وكيفاش تولي مواطن مزيان.

تعليم ممكن يعاون ويوجه لأفراد من مستوى لمستوى. ناس لي قاريين يقدرو يديرو بزاف د لحوايج، بحال أنهم يعاونو ناس لي ماقاريينش، ويشجعوهم باش يتعلمو.

كاينين بزاف ديال طرق باش تصنف تعليم، متلا لعمر ولا لمادة. وحدا من هاد طرق هي واش راه نيضامي ولا ماشي نيضامي.

بزاف ديال لمدارس كتوفر لقراية فابور من دعم ديال دولة. لعائلات يمكن ليهم يسيفطو ولادهم يقراو ف لبريڤي، ولكن كايخصهوم يخلصو كولا شهر. فشي بلايص لي مافحالهمش، دراري ميمكنش ليهم يمشيو للمدرسة حيتاش دول ديالهم ماموفراش ليهم لمدارس، ولا حيتاش لأسر ديالهم ميقدروش يوفرو لفلوس باش يقريو ولادهم، ولا حيتاش لولاد خاصهم يخدمو وهوما صغار، وفشي مجتمعات كاينا واحد نضرة سلبية ل تعليم ديال لبنات.

فأغلب لبلايص ف لعالم تعليم ل بتيدائي وتانوي تايكون فابور حيتاش مدعوم من دولة، وفشي بلدان تايكون حتا تعليم لجامعي فابور، ولكن والاكين ف بلدان خرا تايكون ب لفلوس.




#Article 342: لهوية لجندرية (232 words)


لهوية لجندرية أو نوع لإجتماعي (بالإنجليزية: gender identity)، ف سوسيولوجيا كتوصف النوع لي شخص كايشوف بيه راسو. بزاف ديال الناس كايشوفو راسهم يا إما راجل أولا مرا، دري ولا بنت. ف لأغلبية ديال لحالات، لجندر لي كيوصفو بيه ناس روسهم هو نفسو لي وصفهوم بيه دكتور فاش يالاه تزادو. ولكن بنسبة لبعض ناس، فاش يالاه تولدو قالو ليهم نتوما لجندر ديالكم كدا ولكن من بعد ما كبرو حسو بلي هوما كاينتاميو لجندر اخر. هاد ناس كايتسماو متحولين جنسيا. بعض لمرات ناس خرين كايتسماو متحولين جنسيا فاش لأدوار لإجتماعية ديالهم، لي فرضها لمجتمع، ماكاتناسبش مع لجندر ديالهم،

أغلب ناس كايسحاب ليهم بلي كاينين غير جوج تصنيفات جندرية، ولي كاتسما تنائية جندرية، أي راجل ومرا. ولكن ف لعقود لأخيرة، ناس عرفو بلي ماكاينينش غير هاد جوج، وإنما كاينين تصنيفات خرا. ولي ساهم أكتر ف أن هاد لموضوع باش ياخد قيمة كبيرة ف لعالم هو ضهور ديال حركات مجتمع لميم، لي ساهمات عبر تعليم ونضال لحقوقي، ف أنها تبين للناس بلي كاينين بزاف ديال تصنيفات لجندرية لي لواحد يقدر ينتمي ليها.

تعبير لجندري كاتعني كيفاش شخص كيلبس، كايبان، وكيتصرف، بطريقة لي تخلي ناس لخرين يعرفو لجندر ديالو. شخص لي كيلبس وكيتصرف بطريقة دكورية، يمكن نقولو عندو تعبير جندري دكوري. بينما شخص لي كيلبس وكيتصرف بحال أنتوية، نقدرو نقولو عندو تعبير جندري أنتوي. وهادشي راه مختالف على لهوية لجندرية، حيت ناس تقدر تختار كيفاش تبان ولا تصرف بطريقة معينة، واخا ماشي هادا هو لإحساس داخلي ديالهم.




#Article 343: مجتمع لميم (116 words)


مجتمع لميم أو مجتمع لإل جي بي تي، بالإنجليزية (LGBT)، هو مجموعة من ناس لي كاتمتل توجهات جنسية بحال لمتليين، ليزبيانات، لمزدوجين جنسيا، ولمتحولين جنسيا. هاد لكلمة ديال مجتمع لميم كاتشمل أي واحد ماشي مغاير.

هاد لمصطلح ديال مجتمع لميم تستعمل أول مرة ف تسعينات، ووقعو فيه مجموعة ديال تغييرات حتا وصل للشكل لحالي ديالو، لي ولا كايشمل واحد لعدد كبير من توجهات لجنسية.

بعض ناس لي منتامين لمجتمع لميم مايقدروش يقولوها قدام ناس، حيت ممكن يكون هادشي خطر على حياتهم. بزاف ديال ناس عندهم عنصرية وأحكام مسبقة على لمتليين، هادشي كايتسما لهوموفوبيا، أي لخوف لي ماعندو حتا معنى من لمتليين. بزاف ديال دول عندها قوانين عنصرية ضد مجتمع لميم، بعض دول كاتوصل لدرجة أنها كتعدمهم.




#Article 344: هوموفوبيا (118 words)


لهوموفوبيا هي لخوف و لمعاملة لخايبة ل لمتليين وناس ديال مجتمع لميم بصفة عامة. هاد لمصطلح ستعملو أول مرة ف ستينات واحد طبيب نفسي سميتو جورج واينبرغ.

كلمة هوموفوبيا كاتستعمل ف لوتائق و تقارير لي كتشرح لنتهاكات ديال حقوق مجتمع لميم ف لأمم لمتحدة و مجلس أوروبا.

كاينين بزاف ديال لأشكال لي كايديروها لمتليين باش يوقفو لهوموفوبيا، أشهر نشاط كايديروه هو مسيرة لفخر، وليوم لعالمي ضد لهوموفوبيا ف 17 ماي كل عام. أول مرة تحتافل بهاد لمناسبة كان ف 17 ماي 2005، ف كتر من 40 دولة.

بزاف ديال لمدارس دارو شي طرق فعالة ف أنها تنقص من لهوموفوبيا، بحال أنهم يقريو تلامد على شخصيات تاريخية مهمة لي كانو متليين، وعلى لمعاناة ديال ناس بسبب لميولات لجنسية ديالهم.




#Article 345: لمجلس ديال أوروپا (112 words)


ما تخلطش مع لمجلس لأوروپي و مجلس ليتيحاد لأوروپي.

لمجلس ديال أوروپا (ب لفرونصي: Conseil de l'Europe) و (ب لونڭلي: Council of Europe) هو واحد لمنضمة عالمية فيها 48 دولة لي ف أوروپا. واحد من أهم نجاحات ديال هاد لمجلس هو ليتيفاقية ديال حقوق لإنسان عام 1950، لي شكلات لا باز ديال لمحكمة لأوروپية ديال حقوق لإنسان.

لينضمام لهاد لمنضمة مفتوح ل كاع دول لأوروپية ديمقراطية، لي كتوافق على لمبادئ ديال حكم لقانون، ولي كتضمن حقوق لإنسان لأساسية، لحقوق لمدنية، و لحريات ديال لمواطنين، لي داخلين فيهم حتا لأقليات.

ماخاصش يكون خلط بين لمجلس ديال أوروپا ولمجلس ديال ليتيحاد لأوروپي، أو لمجلس لأوروبي، حيتاش هاد لمجلس راه منضمة مستقلة على ليتيحاد لأوروپي.




#Article 346: هواية د راديو (112 words)


هواية د راديو ولا راديو د لهواة، هي واحد لهواية ديال لهضرة بين ناس عاديين بواحد الراديوات ، ؤ هي هواية منتاشرة ف لعالام، ؤ لي كيمارسها تقريبان خمسة د لمليون واحد فيهم لي ليمارسها بحال هواية ؤ كاين لي غير مفوج بيها ؤ غير كيسمع ، هاد لهواية عندها جمعيات وإتحادات كاتنضمها، و عندها قوانين ديالها ؤ فريكونسات خاص بها لي هي مختالفة على لفريكونسات ديال الاداعات لعاديين.

كاتحسن لعلاقات بين ناس ؤ شعوب د لعالام، ؤ كاتعاون باش يتبادلو تجاريب ؤ يعاونو إلا طرا شي مشكيل.

هاد لهواة ديال الراديو فايت ليهم عاونو ف بزاف ديال لكوارت طبيعية بحال لإعصار د لكاريبي ف 1989 والزلزال لي ضرب لجزائر ف 1980.




#Article 347: ليتيفاقية لأوروبية ديال حقوق لإنسان (136 words)


ليتيفاقية لأوروبية ديال حقوق لإنسان هي واحد لإتفاق بين دول لي داخلين ف لمجلس ديال أوروبا، ولي لهدف ديالها هو لحماية ديال حقوق لإنسان. تدارت ف 4 نونبر 1950

هاد لإتفاقية هي لا باز ديال لمحكمة لأوروبية ديال حقوق لإنسان، وبناءا على لمادة 46 من هاد لإتفاقية، لمحكمة لأوروبية عندها سلطة قانونية قوية.

لمحكمة لأوروبية ديال حقوق لإنسان دارت بزاف ديال لبروتوكولات، متلا، لبروتوكول 2 ديال لحق ف تعليم، و لبروتوكول 12 ضد كاع لأنواع د لعنصرية، ولبروتوكول 13ديال إلغاء عقوبة لإعدام. لبروتوكولات هي مجموعة من لقوانين لي خاص كاع دول تلتازم بيهم.

لمحكمة لأوروبية ديال حقوق لإنسان تقدر تقرر ف كاع شكايات ولقضايا لي كاترفع ليها. إيلا شي مواطن أوروبي حس بلي دولة ديالو نتاهكات ليه لحقوق ديالو، يقدر هاد لمواطن يمشي للمحكمة لأوروبية، وإيلا صدر شي قرار، خاص لحكومة ديال ديك دولة تلتازم بيه.




#Article 348: لمحكمة لأوروپية ديال حقوق لإنسان (170 words)


لمحكمة لأوروپية ديال حقوق لإنسان (ب لونڭلي: European Court of Human Rights) هي أكبر جهاز قضائي ف أوروپا مكلف ب حقوق لإنسان. يمكن لأي مواطن أوروپي يرفع شكاية للقضاة ديال لمحكمة، وهي كاتقرر، ولقرارات ديالها كاتكون ملزمة لدول لأوروپية. هاد لمحكمة كاينا ف مدينة ستراسبورڭ ف فرانسا.

لمجلس ديال أوروپا هو لي أسس هاد لمحكمة باش تكلف ب ڭاع الشكايات لي متعلقة ب حقوق لإنسان. وهاد لمحكمة كاتعتامد ف لخدمة ديالها على ليتيفاقية لأوروپية ديال حقوق لإنسان.

لمحكمة عندها 7 ديال لقضاة، ولكن فاش كاتكون شي قضية كبيرة تايولي لعدد ديالهم 21، وتايكونو جايين من جميع دول لي داخلين ف لمجلس ديال أوروپا. ليوم كاينين 47 دولة ف لمجلس ديال أوروپا. كل دولة فيهم يمكن يكون منها واحد من لقضاة، ولكن هاد لقضاة كايخدمو لصالح لمحكمة ماشي لصالح دول ديالهم.

لمحكمة لأوروپية ديال حقوق لإنسان دارت بزاف ديال لبروتوكولات، متلا، لبروتوكول 2 ديال لحق ف تعليم، و لبروتوكول 12 ضد ڭاع لأنواع د لعنصرية، ولبروتوكول 13ديال إلغاء عقوبة لإعدام. لبروتوكولات هي مجموعة د لقوانين لي خاص ڭاع دول تلتازم بيهم.




#Article 349: ؤروپا (194 words)


ؤروپا هي واحد لقارة ملاصقة مع أسيا من جوج جيهات: جبال ديال لأورال ف روسيا، ومضيق لبوسفور ف تركيا.

ؤروپا ضاير بيها لما من تلاتا ديال جوايه. ف لغرب لمحيط لأطلسي، من شمال لمحيط لقطبي شمالي، ومن لجنوب لبحر لبيض لمتوسط.

كاينين عل أقل 43 دولة فؤروپا، أغلبهم داخلين ف ليتيحاد لأوروبي.

لميساحة ديال ؤروپا فيها 10,180,000 كيلومتر مربع، لي هي 2% ديال لمساحة د لأرض، و 6.8% ايلا ماحسبناش لبحورا.

ف 2017، ناس لي عاشين ف ؤروپا وصل عددهم ل 510 مليون.

ؤروپا تسمات على واحد لأميرة ف لميتولوجيا ليونانية سميتها يوروبا. لأسطورة كاتقول بلي زيوس حطاطف يوروبا و داها لجزيرة سميتها كريت، وتما ولات أم ديال لملك مينوس.

كلمة يوروبا تستعملات من بعد باش توصف ليونان، ومن بعد ؤروپا كاملا.

لجو فؤروپا تايكون بارد فوقت شتا ومعتدل ف باقي لأوقات د لعام. 

لبلدان لي عندهم لأراضي ديالهم ولا طرف منها، ولا مرتابطين تقافيا ب ؤروپا بيهم 51 (علا حساب لحدود لجغرافية لي محددة):

ليتيحاد لأوروبي هو واحد لمجموعة ديال 27 دولة. هاد دول تافقو بيناتهم يديرو واحد لقانون مشترك، و بتالي يمكن لأي مواطن أوروبي يمشي لأي دولة كاينة ف ليتيحاد ويعتابرها بحال بلادو. 19 دولة من ليتيحاد عندهم نفس لعملة: لأورو.




#Article 350: ليزبيانة (184 words)


ليزبيانة هي لمرا لمتلية، يعني لمرا لي عندها ميول جنسية ل عيالات، وماشي ل رجال. كلمة ليزبيانة أصلها من ليونانية (Lesbos) كتنطق ()، لي هي واحد لجزيرة ف ليونان. واحد شاعرة يونانية سميتها صافو كانت ساكنة ف ديك لجزيرة، وكانت كاتكتب شعر رومنسي لي لأغلبية ديالو كان موجه ل عيالات، ف من هنا جات هاد سمية ديال ليزبيانة.

ليزبيانات كانو داخلين ف لحركة ديال ل فيمينيزم مني يالاه بدات. لفيمينيزم هي مجموعة من لحركات سياسية و لإجتماعية لي كدافع على لحقوق ديال لعيالات. ولكن وقع واحد صراع بين لفيمينيست لي هوما ليزبيانات ولفيمينيست لي هوما مغايرات ف ستينات وسبعينات. لفيمينيست لي مغايرات قالو بلي ليزبيانات ماكانش قابلهم ل مجتمع، و ب تالي لوجود ديالهم داخل لفيمينيزم غايضر ب هاد لحركة. هاد صراع ليوم مابقاش كيما لول حيتاش لمجتمع بدا كايتقبل مجتمع لميم ككل.

بزاف ديال لي كوبل لي ليزبيان كايبغيو يكونو عندهم ولاد ديالهم باش يربيوهم. هاد لي كوبل بعض لمرات كايديرو تبني. ولكن ف بعض لبلايص ف لعالم ما مسموحش فيها ل مجتمع لميم يدير تبني.
بعض لي كوبل تايكونو عندهم ولاد بيولوجيين. كايتبرع واحد راجل ب لماني ديالو، و كايديرو تخصيب صناعي.




#Article 351: صافو (121 words)


صافو هي واحد شّاعيرة يونانية قديمة. تولدات تقريبا ف 630 قبل لميلاد، ف جزيرة سميتها ليزبوس. صافو كتبات تقريبا 10000 بيت ديال شعر، ولكن لي وصلنا منها هو 650 بيت. وحتا لمعلومات على حياتها قلال بزاف.

شعر ديال صافو كايركز على رومنسية، و لوصف ديال لعلاقات لجنسية بين لعيالات.

لعائلة ديال صافو ما معروفاش، ولكن بعض لمراجع تايقولو بلي لأم ديالها سميتها كليس. أما ب نسبة ل لأب ديالها ف كاينين 7 ديال لأسماء مختالفة ف لمراجع لقديمة. واحد لقصة كاتقول بلي بات صافو مات فاش كانت هي مازال صغيرة. صافو عندها 3 ديال لخوت حسب واحد لقصيدة ديالها تكتاشفات ف 2014

أغلب شّعر ديال صافو كايركّز على لحب بين لعيالات، ولكن كتبات بعض لقصائد على لعائلة، وبعض لأغاني ديال لعراسات.




#Article 352: لمرا (394 words)


لمرا هي إنسان أنتى لي بالغة، كاتخدًم لكلمة د مرا ف لمفرد، و نسا ولاَ مراوات ولاَ عيالات ف لجمع فاش كانهضرو على لجنس لبيولوجي. بعض لمرات كاتخدًم لكلمة د مرا بصفة عامة كيما كان لعمر، بحال دابا: حقوق لمرأة.

لمرا غالبا تيكون عندها رحم، لي فيه كيتكون لجنين.

ف لوقت لي قدرات لمرا أنها تربح بزاف ديال لحقوق و لحريات ف لعالم لمتقدم مني بدا لقرن 20، مازال بزاف د لعيالات كايعانيو من لعنصرية و تحرش لجنسي تال دابا.

ف لقرون لي فاتت، ماكانش عند لمرا لحق ديال تصويت. وعلا مر تاريخ، لأدوار لجندرية لكلاسيكية هي كانت كاتحدد وكاتقلص نشاطات و لفرص ديال لمرا. بزاف د لعقائد دينية كاتحدد قوانين للمرا. مع تقليص ديال لقيود ف لقرن 20 فبزاف د لمجتمعات ولات لمرا كاتوصل لمسارات مهنية من غير ربة لبيت. لعنف ضد لمرا، سواء فلعائلات أولا ف لمجتمعات، عندو تاريخ قديم وفلأغلبية كايتمارس من عند رّجال. بعض نسا ممنوعين من حقهوم ف لإنجاب. لحركات ولإيديولوجيات ديال لفينيزم عندهوم هدف مشترك لي هو لوصول للمساواة بين لجنسين.

لمرا لمتحولة جنسيا كاتحدد كاراجل منين كاتزاد، شيء لي ما كايتوافقش مع لهوية لجنسية ديالها، بينمّا لمرا لمتحولة جنسيا كاتّزاد بخاصيات جنسية لي مختالفة على داكشي لي معتاد ف لبيولوجيا دلمرا.

لحبل عند لمرا كايتسما لحمل، وكايدوز 9 شهور. لمرا لي كاتكون حلبلى كاتسمى حاملة.

كاين بعض لأمراض لي كايصيبو لمرا بدّرجة لولة، بحال ذئبة لحمامية.

ف لعصور لقديمة، كان دور ديال لمرا هو تحمي ولادها فقط.

ف بعض لمجتمعات لمعاصرة، هاد لأدوار تبدلو، وولا ممكن ل لمرا أنها تاخد أدوار خرا ف لمجتمع بحال راجل.

لعنف ضد لمرا باقي مشكل كبير حتا ف دول لمتقدمة. بزاف ديال لمجتمعات مبنية على قيم أبوية، لي كاتعطي ل راجل قيمة أكبر من لمرا.

بعض لعقائد دّينية حددات شروط متعلقة بلأدوار لجندرية ولمعاملات سياسية وشخصية مابين لجنسين و لباس لي لمرا لازم تلبس وبزاف دلمسائل لي كاتأثر فلمرا و ف لمكانة ديالها ف لمجتمع. فبزاف ديال دول، هاد تّلقينات دّينية عندها تأثير علا لقانون لجنائي أولا لقانون لعائلي ديال هاد سلطات تشريعية (بحال مثلا شريعة لإسلامية). تأثير ديال دين على حرية لمرأ ولعنف لي كايتمارس علا لمرا بحجج دينية كايتدرس وكايتناقش من طرف منظمات دولية.

قبل من لمجتمعات لمعاصرة، تعليم ديال لمرا كان محدود بزاف. ف لمجتمعات لمتقدمة، كاع لعيالات موفرين ليهم تعليم، و كاينين دراسات لي قالو بلي لعيالات عندهم أداء حسن من رجال.

على طول تاريخ، لعيالات دارو بزاف ديال لمساهمات ف لميادين ديال لأدب، لفن، و لعلوم.




#Article 353: تمازيغت (وسط لمغريب) (1860 words)


تمازيغت ديال وسط لمغريب (لي كتسمى ف لمغريب بعض لمرات شلحة زايان) هي لوغة أمازيغية من لعائيلة ديال لوغات لأفروأسيوية كيهدرو بيها 5 د لملاين د ناس ف لمغريب، خصوصا ف جبال وسط لمغريب، وحتى ف مدن وسط لمغريب و بين لمغاربة د وروپا.تمازيغت ديال وسط لمغريب هي من لوغات لأمازيغية لي كيهدرو بها أكتر عدد د نّاس، مع لقبايلية، سوسية، ريفية، شاوية وتوارڭية. ف لمغريب، كتنافس سوسية علي شكون أكتر وحدة فيهم متداولة.

ڭاع لهجات ولا لوغات لأمازيغية يمكن لواحد يسميهم تمازيغت، ولكن تمازيغت ديال وسط لمغريب هي لوحيدة لي ناسها كيعيطو ليها غير تمازيغت. مادامها لغة أفروأسيوية، تمازيغت فيها بلعا د لحروف المفخمة (يعني كاين ت وط، ولا د و ض)، د لحروف لهوية (لي كتخرج من لها ديال لحلق: ق، خ، غ) ود الحروف الحلقية (ح، ع) وما فيهاش صوت پ. تمازيغت فيها تلاتة ديال لحروف لمتحركة، ولكن فيها عاداد ديال لكلمات ما فيهمش حتى حرف متحرك وكلها سكون.

بعكس السوسية (ولا تشلحيت)، ما كانتش تمازيغت ديال وسط لمغريب موتقة بالكتابة حتى للقرن 20. ولكن حاليا ف وسط لمغريب كتكتب رسميا بتيفيناغ ف لكتوبة د لمدرسة متلاواخا كاين كتوبة عليها كيستعملو الحروف اللاتينية ولا العربية.

ترتيب لعادي ديال لكلمات ف لجملة هو فعل-فاعل-مفعول، ومرة مرة فاعل-فعل-مفعول. لكلمات ف تمازيغت كيتبدلو على حساب لجنس ديالهم ( مؤنت ولا مدكر)، لعدد ديالهم (جمع ولا مفرد) ومحلهم ف لجملة. وهاد التبدال كيدار بحروف كيتزادو ف الاول ديال لكلمة ولا ف لخر ديالها، ولا فيهم بجوج ف نفس الوقت.

تمازيغت ديال وسط لمغريب هي وحدة من لوغات الأمازيغية لي منتشرة بزاف وكتنافس سوسية (تشلحيت) على شكون أكتر وحدة متداولة ف لمغريب. ولكن صعيب عموما لواحد يفرق بين هاد لوغات خصوصا بزاف منهم كيسميوهم ماليهم تمازيغت. ولفرق كيكون لأغلبية ف نطق بعض لكلمات وليكسيك لي كيستعملو ماليها. ومن لفوق، تمازيغت ديال وسط لمغريب فيها حتا ختيلافات من منطقة لمنطقة.

ناس لي كيهدرو بتمازيغت ديال وسط لمغريب كيسميو راسهم أمازيغ (إمازيغن ف لجمع) وهي كلمة متداولة خصوصا بين لأمازيغ ولأصل ديالها ما معروفش، ولكن حتيمال كتعني رجال/ناس لحرار. مصطلح تمازيغت. لي هو مؤنت أمازيغ، كيعني لوغة لأمازيغية. وهاد لمصطلحات ديال أمازيغ للشخص وتمازيغت للوغة كيستعملوهم حتى ف باقي لمناطق لأمازيغية، بحال ريف و سوس، ف بلاصت كلمات أريفي/تاريفيت ولا أشلحي/تشلحيت. ولكن بين أمازيغ وسط لمغريب كيتستعملو غير كلمات أمازيغ وتمازيغت ديما كيف ما كان سياق لهدرة.

ف ديراسات لقديمة، كانت تمازيغت ديال وسط لمغريب كتسما مرة مرة برابر، وهي كلمة عربية مدرجة، ولا تبربريت. و هاد جوج كلمات مرتابطين بالمصطلح لعربي بربر لي كيتنعتو بيه ڭاع لغات/لهجات لأمازيغية، واخا لإستعمال ديالو غادي وكينقص حيت بزاف كيجيهم كلمة كتنتاقص من لأمازيغ.

تمازيغت ديال وسط لمغريب كتنتامي للفرع البربري ديال لعائيلة د لوغات الأفروأسيوية، لي فيها لوغات خرين د شمال إفريقيا وجنوب غرب اسيا، منهم لوغات سامية، لوغة لمصرية، تشادية ولوغات لكوشية. بحال لأغلبية ديال لوغات البربرية، حتافضات تمازيغت ديال وسط لمغريب بخاصيات د لوغات الأفروأسيوية، بحال سيستيم فيه مؤنت ومدكر، ترتيب فعل-فاعل-مفعول، حروف مفخمة، ستيعمال ديال جدر باش يتبناو كلمات جداد منو، زيادة ديال س ف لحالة ديال لكوزاتيف (فغ : خرج، سوفغ : خرج *شي حاجة*) (وهاد ضاهرة لخرا كاينة حتى ف عائيلات خرين، بحال لوغات نيجر كونڭو). ف لعائيلة ديال لوغات البربرية، تمازيغت ديال وسط لمغريب كتنتمي، مع تشلحيت/السوسية، للفرع الأطلسي ديال لوغات لأمازيعية شمالية.

تمازيغت ديال وسط لمغريب جاية وسط سنسلة د لهجات شادة من تاريفيت ف شمال شرقي لتشلحيت ف لجنوب لغربي. ليكسيك ديالها فيه ختيلافات باينة مع سوسية، وسيستيم ديال لأفعال فيها قرب لريفية كتر من قربو لسوسية. وتمازيغت ديال وسط لمغريب كاين تنوع بين مناطقها ف لهدرة كتر من السوسية. لهجات ديال تمازيغت د وسط لمغريب كتقسم لتلاتة ديال لمجموعات جوغرافية: لهجات لأطلس لمتوسط، لهجات لأطلس لكبير ولهجات جبل صاغرو وتيلال لي ضايرين بيه. واخا ضاهرة ديال تحريف بعض لأصوات كاينة ف لوغات لأمازيغية ديال وسط وشمال لمغريب و ف دزاير، وحتى ف بزاف ديال لهجات لأطلس لمتوسط، هاد ضاهرة نادرة بزاف بين أمازيغ لأطلس لكبير، وما كايناش مارة عند أمازيغ جبل صاغرو. فلهجات لجنوبية (بحال ديال أيت عطا) كيقدر يكون فيها بعض لختيلاف ف سانطاكس: ف تمازيغت د وسط لمغريب كيتستعمل پريفيكس د ف لجملة لخبرية (متال : هاداك/راه راجل دارڭاز)، لهجات لجنوبة كتستعمل لپريفيكس تيپيك ديال السوسية، لأطلس لكبير وجبل صاغرو، إيڭا (متال، هاداك/راه راجل إيڭا ارڭاز). ولكن كتبقى أغلبية ديال لختيلافات بين لهجات وسط لمغرب ف نطق.

من لمجموعات لي كتهدر ب تمازيغت ديال وسط لمغريب كاين أيت عياش، أيت مرغي، أيت يوب، مرموشا، أيت يوسي، أيت مڭيلد، زيان، زمور، أيت رباع، أيت سري، ڭروان، أيت سڭوڭو، أيت يافلمان، أيت سيخمان، أيت نضير.

لحد شرقي ديال لمنطقة لي كيهدرو فيها ناس بتمازيغت د وسط لمغريب ما محددش مزيان. لهجات ديال أيت سغروشن وأيت واراين كيتكلاصاو عموما ف لهجات وسط لمغريب، وكيتقال بلي لهجة د أيت سغروشن مفهومة لجيرانهم أيت

عياش. ولكن، جينيا، أيت سغروشن كينتميو للفرع زناتي ديال لوغات البربرية شمالية، وماشي للفرع لأطلسي بحال باقي لهجات د وسط لمغريب. دكشي علاس بعض لمصادر ما كتجمعهومش مع لأمازيغية ديال وسط لمغريب.

لأمازيغ كيعيشو ف شمال إفريقيا ما بين مصر ولموحيط لأطلسي من قبل ما يبدا تاريخ ديال لمنطقة كيتسجل هادي 33 قرن. ف لقرن لخامس قبل لميلاد، مدينة قرطاج لي أسسوها لفينيقيين كانت متحكمة ف أغلبية لمناطق ديال شمال إفريقيا. ومن بعد لحروب لبونيقية، ولات ف بلاصتها روما هي لي متحكمة. لمنطقة ديال وسط لأطلس بقات مستقلة على طول لحقبة لكلاسيكية، ولكن مرة مرة بعض لكلمات ف تمازيغت ديال وسط لمغريب، بحال أيوڭو (تور ديال لحرت)، لي جاية من لاتينية iugum إيوڭوم (مجموعة ديال تيران)، و أزاليم (لبصلة) من لبونيقية Bsal-im بصال-إم، كتبين بلي كان كونطاكط بين أمازيغ وسط لأطلس وهاد شعوب لي كانت مستعمرة شمال إفريقيا.

لعرب ستولاو على لأرض لي فيها لمغريب ودزاير حاليا ف لقرن سابع، وهاجر عدد منهم للمنطقة ودخلو لأمازيغ للإسلام. وخصوصا مورا ما جاو بنو هلال للأرض لي فيها تونس حاليا ف لقرن 11، بدات كتنتاشر لعربية ف شمال إفريقيا كتر. واخا هاكاك، ناس ف لأطلس لمتوسط بقاو كيهدرو بالأمازيغية، بحالهم بحال ناس لمناطق لي فيها جبال ف شمال إفريقيا.

بين لقرن 12 و 15، كان وسط لأطلس بحال باقي لبلايص ف لمغريب تابع للحكم ديال سلالات لأمازيغية ديال لمرابطين، لموحدين ولمرينيين. ومن لقرن 17 لدابا، لمنطقة تابعة لحكم لعلويين. ولكن، لحد لقرن 20 كانت سيطرة على لمنطقة محدودة وكانو أغلب جوايه ديالها ف بلاد سيبة، يعني كيعتارفو ماليها بالحكم لملكي ولكن ما كاين حتى خضوع سياسي ليه. ف لقرن 16، رجعات تمازيغت لمنطقة تافيلالت لي كانت معربة، وكان رجوعها على يد أيت عطا لي مدو سيطرة ديالهم ف لمنطقة، و خلاو قبايل خرين يجتمعو ف تحالف ديال أيت يافلمان باش يدافعو على راسهم.

ف 1912، معاهدة فاس ردات لمغريب تحت لحماية د فرانسا و صبانيا، لي بداو يحتلو لبلاد عسكريا. خلات لمعاهدة لعرش لعلوي ف بلاصتو، ولكن لفرانساويين بداو يدخلو بعسكرهم لمناطق لأطلس. واخا هاكاك لمقاومة ديال لقبايل لأمازيغية فيه كانت صعيبة بزاف، لي عكسات وبلوكات دخول د لفرنساويين حتى ل 1933 ف بعض لبلايص، بحال ف مناطق أيت عطا.

مورا ليستيقلال ديال لمغريب ف 1956، طغات بزاف نعرة لعروبية فلبلاد، ونضام تعليمي لي بدا يتبنا كلو معرب، ولوغات لأمازيغية، لي منهم تمازيغت ديال لأطلس، كانت مقصية منو مرة. ولكن، ف 1994، مورا ما بداو لمطاليب ديال لأمازيغ باش يتعتارف بيهم كتكبر، قررات لحكومة تبدا تعلم لأمازيغية ف لمدرسات، وطلقات برامج ف تلفازا بلوغات لأمازيغية، لي منها تمازيغت ديال لأطلس.

]
تمازيغت ديال وسط لأطلس وحدة من لوغات لأمازيغية ربعة لي منتاشرة كتر (تلاتة لاخرين هما ريفية، سوسية ولقبايلية)، وكتنافس سوسية على شكون أكتر وحدة متداولة ف لمغريب. تمازيغت ديال وسط لأطلس كيهدرو بها ناس ف لأطلس لمتوسط كامل ونواحي ديالو، من تازة ف شرق لحتى لمناطق ف جهة رباط سلا قنيطرة ف لغرب. و كيتهدر بها حتى ف وسط وشرق لأطلس لكبير. يعني لبلايص فين منتاشرة متنوعة بزاف إيكولوجيا، من جبال وغابات لأطلس لمتوسط، لواحات تافيلالت ف شمال غرب الصحرا.

لأمازيغية ف لمغريب مقسمة على تلاتة ديال لجيهات : ريفية ف شمال، تمازيغت ديال وسط لمغريب ف لوسط، وسوسية ف لجنوب/لجنوب لغربي. تمازيغت ديال وسط لمغريب مفهومة شوية لريافة، ولأمازيغ ديال وسط لمغريب يقدرو يفهمو شوية ريفية، ولكن كيفهمو سوسية حسن. دكشي علاش تمازيغت ديال وسط لمغريب قنطرة لغوية بين ريفية وسوسية، لي ما كاينش بيناتهم فهم متبادل.

تمازيغت ديال وسط لمغريب، بحالها بحال باقي لوغات لأمازيغية، عندها وضع صوصيولوغوي هابط، واستعمالها منحصر خصوصا ف الدار، ونادر بزاف ف شي حاجة رسمية. كاين إنتاج لراديو وتلفازا بها، و موسيقى حتى هي، وكاينة سياسة ديال تدريس ديالها.

ما بين أمازيغ وسط لمغريب، 40 ل 45% كيهدرو غير بيها، ولباقي كيهدرو حتى بالدارجة كلوغة تانية. ناس لي كيهدرو غير بيها أغلبيتهم شراف، ولا دراري صغار. لعيالات لي لأغلبية كيهدرو بها بوحدها، حيت هما ليا كيبقاو ف دواور و ف جبال، و رجالهم لي كيمشيو يخدمو ولا يتسوقو ف لمدينة. مدام تمازيغت كتستعمل بزاف ف دار، لبنات كيكبرو كيهدرو بيها و كيدوزوها لولادهم من بعد، و بهاد طريقة كيحافضو عليها. لأمازيغ لي بيلانڭ، تعلمو دارجة من لمدرسة، ولا حيت هاجرو لمدينة، ولا من تلفازا و راديو، ولا من لإدارة ما كتعاملش بتمازيغت. لكن لأغلبية ديال دراري صغار ف لمناطق لقروية كيهدرو غير بتمازيغت، وفاش كيمشيو للمدرسة كيعانيو بزاف من تمييز، خصوصا فاش لؤستاد ما كيهدرش بتمازيغت، وخصوصا ف لمدرسة كيخصهم يتعلمو دارجة، ولعربية لفصحى ولفرونسي.

لمناطق لقروية ف لمغريب، ومنها وسط لأطلس، فيها بزاف ديال لفقر. تمازيغت ديال وسط لمغريب، بحال سوسية، كينقص ستيعمالها، حيت لعائيلات لأمازيغية كتهاجر للمدينة لأسباب اقتصادية وما كيبقاوش يستعملو لأمازيغية. هدشي لاش بزاف ديال لمتقفين كيحدرو من لخطر ديال تراجع ديالها. ولكن، لأمازيغ ديال وسط لمغريب كيهاجرو لمناطق ديالهم قل من غيرهم، على حساب دراسات. ومن لفوق، كاين خزان ديموغرافي مهم ديال ناس لي كيهدرو بها لي كيخليها ماشي مهددة بلينقراض ڭاع، واخا لأمازيغ ديال وسط لمغريب كيولدو قل من باقي لمغاربة عموما.

على حساب دستور لي تصوت عليه ف 2011 ف لمغريب، لأمازيغية لوغة رسمية مع لعربية. ف 1994، قال لحسن التاني بللي لهجات لأمازيغية غادي يولي عندها وضع رسمي؛ تلفازا بدات كتدوز برامج بللهجات ب تلاتة (تمازيغت ديال وسط لمغريب، ريفية، و سوسية) تلاتة د لمرات ف نهار؛ وبداو كيطورو كتوبة للتدريس ديالها. ف 17 ؤكتوبر 2001 وقع لماليك محمد ساديس ضهير 1 01 299 لي حدت و نضم بيه لمعهد لملكي للتقافة لأمازيغية، ليركام. هاد لمعهد مسيرو مجلس فيه خبراء، فنانين و ناشطين أمازيغ كلهم كيعينهوم لماليك. لمعهد لي لمقر ديالو ف رباط، لعب دور مهم باش تقنن وترسم لكتابة ديال تيفيناغ.
لمعهد ما كيخدمش باش يعوض للهجات ديال تمازيغت بلوغة أمازيغية موحدة. ولكن لمعيرة كتحافض على لخصوصية ديال لهجات بتلاتة، وغير كتعوض لمصطلحات لي موخودة من لعربية ولا لفرونسي بمصطلحات أمازيغية، وكتزيد لمصطلحات لي هما ناقصين. متلا ف لمعجم رسمي ديال لمعهد، لكلمة ديال بلاد كترجم تامازيرت، لي هو لمصطلح لي متداول ف سوس لأطلس، وتامورت، لي هو لمصطلح لمتداول ف ريف.

لحد لقرن 20، تمازيغت ديال وسط لمغريب ما كانتش مكتوبة وغير لوغة شفوية، ماشي بحال سوسية لي كاين كتوبة ديالها قدام، واخا حتى ف لحالة ديال تمازيغت ديال وسط لمغريب كاين شي كتوبة قلال بزاف و ب لحرف لعربي. يعني حتافضو ناسها عليها بالهدرة ف لمناطق لقروية خصوصا لي معزولة على لمراكز لحضرية. لمتقفين ديال لأطلس لمتوسط، بحال غيرهم ف شمال إفريقيا، كانو كيفضلو يكتبو بالعربية، ولا لفرونسي، حيت كينضرو ليهم كلوغات راقية مقارنة بتمازيغت.

حاليا كاين تلاتة ديال طرق باش كتكتب لوغات لأمازيغية : تيفيناغ، لحرف لاتيني و لحرف لعربي. ليختيار كيكون عموما مرتابط بالخلفية سياسية و/ولا لفكرية ديال لي كيكتب. ولكن ف لمغريب لكتابة ب بتيفيناغ هي لي رسمية ولكتابات رسمية كتكون بلوغة معيارية و ماشي بلهجة ف حد داتها. واخا هاكاك، كاين كتب مهمة على تمازيغت ديال وسط لمغريب بالحرف لاتيني، بحال ديكسيونير ديال طايفي (1991).




#Article 354: راجل (124 words)


راجل هو لإنسان دكر لي بالغ. هو لعكس ديال لمرا. ناس كايستعملو كلمة راجل ف لمفرد، و رجال ف لجمع فاش كيهضرو على لجنس لبيولوجي. رجولة هي لوقت فاش تايكبر لإنسان دكر و ماتايبقاش دري. دري هو واحد لإنسان دكر لي قل من 18 عام. لإنسان لأنتى لي قل من 18 عام سميتها بنت. فاش كايوصل دري ل لبلوغ، كايولي يتسما راجل.

بحال ڭاع تدييات دكورا لخرين، راجل كايورت لكروموزوم X من لأم ديالو، و كروموزوم Y من لأب ديالو.

شي شخص لي بدل لجنس ديالو ل دكر، حتا هو كايتسما راجل.

كاينين بعض لإختلافات لجنسية بين راجل و لمرا.

راجل و لمرا عندهم نفس لأمراض لجنسية، ولكن كاينين بعض لأمراض لجنسية لي تايكونو غير عند راجل، أولا تايكونو عند راجل كتر من لمرا.




#Article 355: لفلسفة (1083 words)


لفلسفة (جات من φιλοσοφία ب ليونانية، وكاتقرا philosophia، وكاتعني حب لحكمة)  هي دراسة ديال لأسئلة لأساسية ديال لوجود، لمعرفة، لأخلاق، لمنطق، لعقل، و لوغة. هاد لأسئلة غالبا كاتكون على شكل دي پروبليم  لي خاصك تحلهم. أول واحد لي يمكن ستعمل لمصطلح ديال فلسفة هو ڤيتاغورس (لي عاش تقريبا ما بين 570 و 475 قبل لميلاد).

لمناهج ديال لفلسفة فيها لإستجواب سقراطي، لمنهج سقراطي، ديالكتيك، و تقديم لمنهجي.

لأسئلة لفلسفية لكلاسيكية ممكن تكون شي حاجة بحال: واش ممكن نعرفو؟ ايلا كان لجواب اه واش ممكن نتأكدو؟

لفلاسفة كايطرحو بزاف ديال لأسئلة لخرا لي متعلقة ب لواقع، متلا: واش كاينا شي طريقة لي باش نعيشو لماكسيموم د لحياة؟، واش ممكن تسما انسان مزيان ايلا قدرتي دير حاجة خايبة بلا ما يعرف تا شي واحد؟، واش ناس عندهم حرية لإرادة؟.

شحال هادي، لفلسفة كانت كاتشمل ڭاع لأنواع ديال لمعرفة. من أرسطو حتال لقرن 19، كانت لفلسفة طبيعية فيها علم لفلك، طب، و لفيزيك. متلا، اسحاق نيوتن كتب واحد لكتاب ف 1687 سميتو لمبادئ رياضية د لفلسفة طبيعية. هاد لكتاب من بعد تكلاسا مع لكتوبا د لفيزيك.
ف لقرن 19، فاش ولاّ رّوشرش سيونتيفيك كتير فهاد لفروع ديال لفلسفة، بدات هاد لفروع كاتخصص، وشوية شوية بدات كاتنفاصل من لفلسفة. ليوم، تخصصات بحال لبسيكولوجي، سوسيولوجي، لسانيات، و ليكونومي، ولاو كولهم مستقلين على لفلسفة. من جهة خرا، كاينين شي نخصصات لي مازال قراب من لفلسفة، بحال لعلم، لفن، و سياسة. متلا، واش لجمال داتي ولا موضوعي؟ واش كاينين بزاف ديال لمناهج لعلمية ولا غير واحد؟ واش ليوتوپيا شي حاجة ممكنة ولا غير خيال ما يمكنش يتحقق؟

مبدئيا، كلمة فلسفة كاتشير لأي مجموعة من لمعارف بهاد لمعنى، لفلسفة قريبة ل دين، لماط، لعلوم طبيعية، تعليم، و سياسة.

بزاف ديال لمناضرات لفلسفية لي بدات ف قديم زمان مازال كاتعاود ليوم. لفيلسوف نڭليزي كولين ماكڭن (1933) تايڭول بلي ما وقع حتا شي تقدم فلسفي فهاد لمدة كاملة. لفيلسوف لأسترالي ديفيد تشالمرز (2013) من جهة خرا تيشوف بلي لفلسفة تقدمات بنفس لوتيرة ديال تقدم ديال لعلم. فلاسفة خرين بحال بروور (2011) تايڭولو بلي لمقياس ديال تقدم أصلا ماشي صحيح باش نحكمو بيه على نشاط لفلسفي.

بمعنى عام، لفلسفة مرتابطة ب لحكمة، تقافة، و لبحت على لمعرفة. بهاد لمعنى، ڭاع تقافات و لمجتمعات كايسولو أسئلة فلسفية، بحال: كيفاش نقدرو نعيشو؟ و شنو هي طبيعة ديال لحقيقة؟.

لفلسفة لغربية هي تقاليد لفلسفية ديال لعالم لغربي. تاريخ ديالها كايرجع ل عهد لفلاسفة لي قبل سقراط، لي كانو أكتيڤ ف ليونان ف لقرن 6 قبل لميلاد، بحال طاليس و ڤيتاغورس.

لفلسفة لغربية ممكن تقسم ل 3 د لأنواع

لمعرفة ديالنا ب لعصور لقديمة بدات معا طاليس ف لقرن 6 قبل لميلاد، واخا لمعرفة ديالنا عموما ب لفلاسفة لي قبل سقراط قليلة. لفترة لقديمة كانت محكومة من لفلاسفة ديال ليونان، لي كانو تأنسپيراو بزاف من لأفكار ديال سقراط. واحد من هاد لفلاسفة لي معروفين هو أفلاطون، لي دار لأكاديمية، و تلميد ديالو أرسطو  لي دار لمدرسة لمشّائية. كانو مدارس فلسفية خرا بحال تشاؤمية، رّواقية، شكوكية، و لأبيقورية.

لمواضيع لي كانو كايناقشوها ليونان كانت متنوعة: متلا، لميتافيزيكس، علم لفلك، لمنطق و لمعرفة.

مع صعود ديال لإمبراطورية رومانية، حتى لفلسفة ليونانية ولا عندها دور كبير عند لفلاسفة رومان بحال سيسيرو و سينيكا.

لفلسفة ديال لعصور لوسطى (بين لقرن 15 و 16) هي لفترة لي جات بعدما طاحت لإمبراطورية رومانية لغربية، و لي بدات كاتنتاشر فيها لمسيحية بقوة، ولكن بقا واحد شوية ديال لأفكار ليونانية و رومانية. دي پروبليم بحال لوجود، طبيعة ديال الله، طبيعة ديال لإيمان و لمنطق، لميتافيزيكس، و معضلة شر كانو كايتناقشو ف ديك لوقت. بعض لمفكرين لي كانو فديك لوقت سان أوڭستين، طوما لأكويني، روجر باكون، و بوطيوس. هاد لفلاسفة كانو كيعتابرو لفلسفة ديالهم واحد لحاجة لي كاتعاون لإيمان (ancilla theologiae)، و ب تالي حاولو أنهم يوفقو ما بين لفلسفة و تأويل ديالهم ل نص ديني. هاد لفترة عرفات تطور ديال لفلسفة لمدرسية، لي هي واحد لميطود كاتقرّا ف لجامعات، وكاتستعمل لمناهج دينية لمسيحية ف تحليل نقدي. فعصر نهضة، بداو ناس كايرجعو ل نصوص لاتينية و رومانية لقديمة، و بانت لفلسفة لإنسانية.

لفلسفة لمعاصرة بدات كاتبان ف لعالم لغربي مع مفكرين بحال طوماص هوبس و ريني ديكارط (1596-1650). مع تقدم ديال لعلوم طبيعية، لفلسفة لمعاصرة هتمّات ب أنها تطور واحد لأساس منطقي و علماني ديال لمعرفة، وتبعد من لبنيات تقليدية ديال سلطة، بحال دين، لفلسفة لمدرسية، و لكنيسة. من أكبر لفلاسفة لمعاصرين لمعروفين كاين: سپينوزا، لايبنيتس، لوك، هيوم، و كانط.

لفلسفة ديال لقرن 19 تأنسپيرات من واحد لحركة لي كانت ف لقرن 18، ولي كاتسما عصر لأنوار، ولي كاتشمل فلاسفة بحال هيڭل، أشهر فيلسوف ديال لمتالية لألمانية، كيركڭارد لي ديڤالوپا لا باز ديال لوجودية، نيتش لي تشهر ب معاداة لمسيحية، دجون ستيوارت ميل لي روّج ل نفعية، و كارل ماركس لي طور لأسس ديال شيوعية. ف لقرن 20 وقعات واحد تفريقا بين لفلسفة تحليلية و لفلسفة لقارّية. و بانو بزاف ديال لمدارس فلسفية بحال لفينومينولوجيا، لوجودية، لوضعية لمنطقية، لبراڭماتية، و لإنعطاف لوغوي.

لمنطقة ديال لهلال لخصيب، إيران و لمنطقة لعربية كانو مناطق لي بانت فيهم لفلسفة فوقت مبكر. وليوم هاد لمناطق كاملة محكومة ب تقافة لإسلامية.
أول نوع ديال لفلسفة لي بان فمنطقة لهلال لحصيب كان متعلق ب شخص وتصرفات ديالو، وكيفا يقدر لواحد يتصرف بطريقة أخلاقية. هادشي نتاشر عبر حجّايات و أساطير و حكم. ف مصر لقديمة، هاد نصوص كانو معروفين ب sebyat لي كاتعني تعاليم. هاد تعاليم هوما لي خلاونا نفهمو لفلسفة لمصرية لقديمة. علم لفلك لبابلي حتا هو هضر على بزاف د لإفترضات فلسفية على لكون، ولي كان عندها تأتير على ليونان لقديمة. لفلسفة ليهودية و لمسيحية هوما فلسفات دينية لي بانت ف شرق لأوسط و أوروبا، ولي بجوج كايتشاركو ف مراجع قديمة بحال تاناخ و توحيد. لفلسفة لإيرانية قبل لإسلام بدات مع زرادشت، لي كان واحد من لولين لي هضرو على توحيد، وتنائية ديال لخير وشر. هاد لأفكار هي لي تأنسپيراو منها ديانات خرا بحال لمانوية، لمزدكية، و زورانية.
بعد لغزوات لإسلامية، لفلسفة لإسلامية لقديمة طورات لفلسفة ليونانية بشكل جديد. لعصر دهبي ل لإسلام كان عندو تأتير على تطور تقافي ف أوروپا. لفلاسفة لي عاشو ف ديك لوقت بحال لكندي (لقرن 9) ، ابن سينا (980-1037)، و ابن رشد (لقرن 12) تأترو ب أرسطو. فلاسفة خرين بحال لغزالي كانو ضد أرسطو و لمناهج ديالو. لفلاسفة ديال ديك لوقت قدرو يطورو لمنهج تجريبي نضرية ديال لبصريات، و لفلسفة ديال لقانون. ابن خلدون كان واحد من أهم لفلاسفة ديال تاريخ فديك لوقت. ف إيران، عداد من لمدارس لفلسفية لإسلامية ستامرّات ف لخدمة ديالها، واخّا سالا لعصر دهبي ديال لإسلام. ف لقرن 19 و 20 بانت واحد نهضة ف لعالم ناطق ب لعربية، ولي أترات على لفكر لإسلامي ديال ليوم.

لفلسفة لهندية كاتشمل بزاف د تقاليد لفلسفية لي بانت ف لقارة لهندية من لقديم، لجينية و لبودية بانو ف لخّر ديال لفترة لڤيدية، و لهندوسية بانت من بعد واحد لمرحلة ديال لإندماج ديال بزّاف ديال تقاليد.




#Article 356: پيدوفيليا (392 words)


الپيدوفيليا هو اضطراب نفسي فين كيمر شي بالغ ولا مراهق كبير من انجداب جنسي اولي ولا حصري اتجاه الاطفال قبل سن البلوغ. واخا البنات عادة كتبدا عندهم عملية البلوغ ف عمر 10 ولا 11، و الدراري ف عمر 11 ولا 12، كنتلاقاو أن معايير الپيدوفيليا كتمدد سن ما قبل البلوغ حتى لاج ديال 13 العام. باش يتم التشخيص ديال الپيدوفيليا عند الشخص خاص يكون عندو على الاقل 16 عام، و يكون كبر من الطفل لي قبل سن البلوغ ب 5 سنين على الاقل.

الپيدوفيليا كتسمى ف الدليل التشخيصي و الاحصائي ديال الاضطرابات العقلية (DSM-5) ب الاضطراب الپيدوفيلي، هاد الدليل كيعرفها ب أنها پارافيليا كتميز ب رغبات جنسية متكررة و شديدة و تخيلات اتجاه و حول الاطفال قبل سن البلوغ، سوا تم التصرف بناء على هاد الرغبات و التخيلات، سوا كانت غير كتسبب ل الشخص محنة جدب ولا صعوبة ما بين الناس. التصنيف الدولي ديال الامراض (ICD-11) كيعرف الپيدوفيليا على أنها: نمط استتارة جنسية مستمرة و مركزة و مكتفة—كيفما كتجلى ف استمرار الافكار الجنسية، التخيلات، الدوافع، ولا السلوكيات—كتشمل الاطفال دون سن البلوغ.

ف الاستخدام الشعبي، غالبا كتطبق كلمة پيدوفيليا على أي اهتمام جنسي ب الاطفال ولا على فعل الاعتداء الجنسي على الاطفال. هاد الاستخدام كيخلط ما بين الانجداب الجنسي ل الأطفال قبل سن البلوغ مع الاعتداء الجنسي على الاطفال، و كيفشل ف التمييز ما بين الانجداب ل القاصرين قبل سن البلوغ، ف سن البلوغ، و بعد سن البلوغ. الباحتين كيوصيو باش يتم تجنب هاد الاستخدامات غير الدقيقة، حيت واخا بعض الناس لي كيرتكبو الاعتداء الجنسي على الاطفال هم پيدوفيليين، المرتكبين ل الاعتداء الجنسي على الاطفال ماشي پيدوفيليين ما عدا الى كان عندهم اهتمام جنسي اولي ولا حصري ب الاطفال قبل سن البلوغ، و كاينين بعض الپيدوفيليين لي ما كيتحرشوش ب الاطفال.

اول مرة تم التعرف على الپيدوفيليا و تسميتها ب شكل رسمي كان ف أواخر القرن التاسع عشر. و تم اجراء قدر مهم من البحوت ف هاد المجال من التمانينات. على الرغم من أن معضم الحالات الموتقة كانت عند الرجال، راه كاينين حتى النسا لي كيبان عندهم هاد الاضطراب، الباحتين كيفتارضو ان التقديرات لي متاحة كتقلل من العدد الحقيقي ديال الإنات الپيدوفيليات.

ما تم تطوير حتى شي علاج ل الپيدوفيليا، و لكن كاينين تيراپيات يمكن ليهم يقللو من احتمالية الشخص باش يرتكب اعتداء جنسي على الاطفال. الاسباب الدقيقة ديال الپيدوفيليا ما تمش التأسيس ليها ب شكل قاطع. بعض الدراسات ربطت الپيدوفيليا عند المرتكبين ديال الجرائم الجنسية ب شدود عصبي و امراض نفسية مختلفة.




#Article 357: روبير لا كاز (118 words)


روبير لا كاز، تولد فـ26 فبراير 1917 ف باريز ؤ مات فـ1 يوليوز 2015 ف لو كاني، كان سواڭ مغريبي-فرانساوي ديال رالي.

تزاد روبير ف وسط لحرب لعالمية للولا ف 1917 ف مدينة باريز، هو سائق سباقات فورمولا وان مغربي-فرنسي ولكن المثير للدهشة هو أنه اختار يلعب كمغربي و ماشي كفرنسي، و ب هادشي راه هو أول سائق فورمولا وان ف المغرب و ف أفريقيا. شارك ف الجائزة الكبرى ديال المغرب 1958 تاع الفورمولا وان ف الدار البيضاء ب استعمال سيارتو الخاصة كوپر (Cooper)، و لكن ما حالفوش الحض و سالا ف المرتبة 14. روبير لا كاز توفى سنة 2015 عن عمر يناهز 98 سنة، و كان كيتعتابر أقدم سائق فورمولا وان على قيد الحياة قبل ما يموت.




#Article 358: بوكوس لول (752 words)


بوكوس (ب لاتينية Bocchus) هو ماليك ديال مملكة موريطانية (موروسيا عند ليونان)، ما بين 110 ؤ 80 قبل لْميلاد، لّي لمؤرخين سماوه بوكوس لول. كان مْتناسب معا يوغرطن ماليك نوميديا، ؤ تحاربو بجوج كحلفاء ضد رّومان، ف لْحروب لّي تسمات لحروب د يوغرطن. فلّخر بوكوس غادي يدير معاهدة ديال صّلح معا روما، ؤ غادي يعتاقل يوغرطن ؤ يسلّْمو ل رّومان ف 105 ق.م.

مامعروفش بزاف علا بوكوس لول ؤ لْمملكة ديالو من لْمصادر تّاريخية. لْمؤرخ ؤ سّياسي رّوماني سالوستيوس فكتابو حروب يوغرطن كيڭول: لْمور كانو كاملين تحت لْحكم ديال لْماليك بوكوس، لّي ماكانت عندو حتا معرفة ب شّعب رّوماني من غير سميتو، ؤ ماكنا كنعرفو عليه والو قبل من هاد زّْمان لا ف سّلام وْلا ف لْحرب.
علا حساب شّهادة ديال سالوست، بوكوس كانو عندو بزاف ديال لعيالات، كيفما كانت لْعادة عند لْمْلوك ؤ رّؤساء ديال لقبايل لْمورية لأمازيغية ؤ نّوميدية. من بين لْولاد ديال بوكوس، كاينين غير ربعة لّي دكرهم تّاريخ: واحد لبنت، مامعروفش سميتها، تْجوجات ب يوغرطن، ؤ تلاتة ديال دراري، سوسوس ؤلا ماستانيسوسوس، لي غادي يولي ماليك من موراه، ڤولوكس، لي كان قائد ديال جيش، ؤ ولد آخور سميتو بوڭود. بوكوس لول كان فلْغالب ولد ولا حفيد ديال لْماليك باڭا، لّي كان فنفس لعصر ديال لْماليك ماسينيسا، ؤ كان عاونو باش يرد مملكة نوميديا من سيفاكس فاش كانت ضايرة لحرب لبونيقية تانية.

واخّا صّيغة لي تدكرات بيها سميتو ف لمصادر رّومانية بحال لحروب د يوغرطن تاع لمؤلف سالوستيوس ، بصيغة bocchus كتختالف قرايتها بين بوكوس أو بوخوس، لكن لأرجح هو بوكوس.

إيلا رجعنا ل لوغات لأمازيغية، غادي نلقاو بلي كلمة بوكوس ممكن نعطيوها معنى، و من خلال تحليل تاعها غادي نستنتجو بلي كتكون من جوج مقاطع:

وهكا كيولي معنى لكلمة هوّا: مول لميرات، ومعروف أن بوكوس بنسبة كبيرة غادي يكون ورت لملك على ملك قبل منو لي هوا لملك باڭا.

ف 108 ق.م لماليك بوكوس غادي يتردد مابين أنه يساند يوغرطن ولا رّومان. غادي يتحالف معا يوغرطن علا شرط أنه يواعدو يعطيه تلت ديال لأراضي د نوميديا مورا ماتسالا لحرب. لجيش ديالهم غادي يخسر قدام رّومان ف معركة سيرتا تّانية. مورا لحرب، يوغرطن غادي يرفض ييفي بلْوعد ديالو لبوكوس، ؤ هاد لأخير غادي يبدا لمفاوضات معا رّومان، ؤ مورا واحد لّقاء معا لجنرال رّوماني لوسيوس كورنليوس سولا، غادي يسيفط سفراء لروما. مورا سلسلة ديال لمشاورات، غادي يسيفط بوكوس ل يوغرطن باش يجي ل عندو، ؤ غادي يطيح يوغرطن فلْفخ ؤ يتشد بسلاسل ؤ يتعطا لسولا. كمكافأة للمعاونة ديالو، رّومان غادي يعطيوه لأراضي لّي كان كيطالب بيها، ؤ مملكة موريطانية غادي تولي شادة من لْمحيط لْأطلسي حتال مدينة صالداي (بجاية ف دزاير). باش يزيد يعمّق تّحالف ديالو معا رّومان، بوكوس غادي يسيفط مجموعة ديال تّحف كتبينو كيسلم يوغرطن لسولا. هاد لْهْدية غادي تخلق أزمة ما بين سولا ؤ لجنرال ڭايوس ماريوس، لّي ف إطار مجموعة ديال صّراعات غادي تأدي لسقوط نضام لجمهوري فروما.

لماليك بوكوس لول غادي يحافض علا علاقات مزيانة معا روما، ؤ غادي تولي مملكة موريطانية ممول رئيسي ديال لإمبراطورية رّومانية فعدد ديال لمنتوجات، بلإضافة ل لْحيوانات ل تّفراج ؤ لْمتعة بحال نمورا، سبوعا، لفيولا، ؤ غيرهم.

من بين لحوايج لقليلة لّي كنعرفوها على داكشي لي وقع فمملكة موريطانية و بضّبط فعهد لماليك بوكوس لّول هي أن واحد من بين لمستشارين تاع بوكوس كان سميتو ماڭودولسا (Magudulsa) وهو من نخبة لحاشية وقع فخلاف مع لماليك و كان خلاف كبير داكشي علاش هاد لمستشار هرب من موريطانية و مشا لروما، ولكن من بعد واحد لوقيتة واحد النقيب روماني كان سميتو ليوْيُوس دروسوس Livius Drusus كان باغي يقوي العلاقة مع لماليك بوكوس و يرد ليه لمزيان لي دارو بوكوس معاه فاش قدر يدير حدّ لتمرد يوغرطن على رّومان ،هادشي علاش هاد نقيب دار ڭاع جهدو و قلب علا موكدولوسا حتى لقاه و شدّو و رجعو ل موريطانية و سلمو ل بوكوس. ومن بعد ما طاح موكدولوسا ف يد بوكوس، هاد لّخّر عطا أمر باش ماڭودولسا يتعدم ب طريقة غريبة، ليعدام تاعو كان ب ستيعمال فيل، أم تأريخ تاع هاد لواقعة فا لمؤريخ ستيفن ڭسيل كيڭول بلي وقعات ما بين عام 104 ق. م و 91 ق.م.

بوكوس لول كان بّات ماستانيسوسوس، ؤ لْجد ديال بوكوس تّاني ؤ بوڭود، لّي غادي يقسمو مملكة موريطانية بيناتهم. بوكوس تّاني من بعد غادي يستاغل لغياب ديال خوه ف سپانيا، ؤ غادي يسيطر علا لْمملكة بوحدو. مورا ما مات بوكوس تّاني ف 33 ق.م، ماغادي يكون حتا حد يخلفو، ؤ مملكة موريطانية غادي تولي تابعة ضمنيا ل رّومان، وخا غادي ينصبو يوبا تاني ؤ مراتو كليوپاترا سيليني، لي كانو ترباو فروما، ماليك ؤ ماليكة علا موريطانية. مورا ما تقتل ولدهم لْماليك پطليموس بأمر من لإمبراطور كاليڭولا، غادي تولي مملكة موريطانية رسميا تحت سّيطرة ديال رّومان، ؤ غادي تقسم لجوج مقاطعات، موريطانية طّنجية ؤ موريطانية لْقيصرية.




#Article 359: تقرير المصير (283 words)


حق الشعوب ف تقرير المصير هو مبدأ اساسي ف القانون الدولي الحديت (عادة كيتعتابر قاعدة آمرة (ڭيوس كوڭينس))، هاكا، هو ملزِم ف الأمم المتحدة ك تفسير سلطوي ل معايير الميتاق. هاد الحق كيڭول ان الشعوب، استنادا ل احترام مبدأ المساواة ف الحقوق و تكافؤ الفرص العادل، عندهم الحق باش يختارو ب كل حرية سيادتهم و وضعهم السياسي الدولي بلا حتى تدخل.

هاد المفهوم اول مرة تم التعبير عليه كان ف الستينات ديال القرن 19، و نتاشر من بعدها ب الزربة. خلال و من بعد الحرب العالمية اللولة، تم تشجيع هاد المبدأ من قبل ڤلاديمير لينين و الرئيس ديال الميريكان وودرو ويلسون. ملي علن ويلسون على المبادئ الربعتاعش ديالو ف 8 يناير 1918، ڭال نهار 11 فبراير 1918: «التطلعات الوطنية خاصها تحتارم؛ دابا ما يمكنش الهيمنة و حكم الناس ما عدا ب موافقتهم الخاصة. تقرير المصير ماشي غير مصطلح؛ و لكن هو مبدأ حتمي ديال العمل.»

تم تضمين هاد المبادئ خلال الحرب العالمية التانية ف ميتاق الأطلنتي لي تم الاعلان عليه ف 14 غشت 1941 من قبل رئيس الميريكان فرانكلين روزفلت و رئيس وزراء المملكة المتحدة ونستون تشرشل لي تعهدو ب النقاط الرئيسية التمنية ف الميتاق. و تم الاعترف به ك حق قانوني دولي من بعد إدراجو صراحة كحق ف ميتاق الأمم المتحدة.

هاد المبدأ ما كيحددش كيفاش خاص القرار يتخاد، ولا اشنهما النتائج لي خاص يكونو، سوا استقلال، فيديرالية، حماية، ولا شي شكل من أشكال الحكم الداتي ولا الاستعاب الكامل. نفس الشيء ما كيبينش كيفاش خاص يكون تعيين الحدود بين الشعوب، ولا حتى اشنو لي كيشكل الشعب. كاينين تعاريف ومعايير قانونية متضاربة ل تحديد المجموعات التي عندها الحق باش تطالب بحق تقرير المصير ب صورة مشروعة.

ب التالي، ولى مصطلح تقرير المصير كيعني الاختيار الحر ل افعال الواحد الخاصة به بلا اكراه خارجي.




#Article 360: لعبة ديال Beat Legend: AVICII لتلفون اندرويد و أبل ايوس (230 words)


هد لعبة جديدة تصوبات من طرف اتاري و هيلو تير غامس. لعبة كتحتوي على العديد من الآغاني ديال أفيسي.
بيت ليجوند أفيسي تقدر تحملها من غاوغل بلاي أولا أبل ستور. لعبة خرجات فهاد ليبلاتفورم ف 23 يوليوز 2020.
اللعبة حاليا متوفره على هادوك لبلاتفورمات ب2.99 دولار أي ما يعادل تقريبا 500 دريال(25 درهم) مغربية.

لمود ديال اللعب
بيت ليجوند أفيسي هي من للآلعات لي كتكون كتحكم فمركبة فضائية و خاصك تمشي مع الريتم ديال الموسيقى. كلما كيطلع الريتم كل كتطلع السرعة و الصعوبة. اللعبة هيل من أنواع السباقات ديال الخيال العلمي في الموبايل و نت كلاعب كيبغي الموسيقى و السرعة غادي تعجبك هاد المغامرة فهاد اللعبة بزاف. حد الأن كاين غير 15 لأغنية ديال أفيسي فهاد اللعبةو لكين كاين أمال بلي غادي يزيدو أغاني كثر و كثر و ربما غادي يخليو اللعاب يزيد لأغاني راسو بشي فونكسيون ديال أبلود.
سلسلة ديال ألعاب بيت ليجوند
بيت ليجوند أفيسي هي أول لعبة فسلسلة كبيرة غادي تصاوبها أتاري و هيلو تير غامس. هاد اللعة كرمت الفنان أفيسي و باقي لألعاب غادي تمسي فنفس الطريقة.موسيك رواياليتيس غادي يمشيو لمِسسة ديال تيم بيرغلينغ للتصدي لانتحار و المحافظة على الصحة النفسية.
كيفاش نقدر نحمل لعبة
لعبة كاينة فغوغل بلاي و أبل ستور بثمن المذكور و أيلا مكانش عندك هداك الثمن فلكومبت فتقدر دخلها فابور من السيت لتحت و فأقل من دقيقة و بلا حتى اغوغ.

معلومات كثار على هاد اللعبة تقدر تلقاهم [freegenerator.best/downloadbeatlegend-avicii-apk ف هاد السيت].




#Article 361: موريطانية (1101 words)


موريطانية ؤلا موروسيا هي سّْمية ديال منطقة ؤ مملكة أمازيغية كانت ف شّمال لْغربي ديال لْمنطقة لّي كتسما ليوم ب لْمغريب لْكبير، جات من لّاتينية Mauretania ؤلا Mauritania. عند لْيونان لْقدام كانت كتسما موروسيا Maurusia - Μαυρουσῐ́ᾱ. لْمجال لْجغرافي لّي كانت كتشغلو هاد لمملكة تطور معا مرور لْقرون، ؤ فأقصى مْتداد كانت موريطانية شادّا من لْمحيط لأطلسي تال شرق دزاير، فلعهد ديال لماليك بوكوس تاني.

لكتبة ديال موريطانية ب تّا مربوطة هُوّا باش تميز علا دولة موريطانيا (بلّيف د لْمد) لّي جغرافياً ماعندها حتا علاقة بيها، حيت وخا لحدود ديال موريطانية فلْجنوب ماكانوش واضحين، ماعمرها وصلات بعد من جنوب لأطلس جيهت لبلاصة فين غادي تبنا مدينة مراكش. دولة موريطانيا تسمات بهاد سّْمية من طرف لمستعمرين لفرانساويين، مي قبل من داكشي كانت معروفة بسميت بلاد شنڭيط.

موريطانية جات من سّْمية لّاتينية لي سْتعملوها رّومان ؤ خداوها من عند لْيونان لْقدام، لّي كانو كيسميو لمنطقة ديال شمال لمغريب موروسيا Μαυρουσῐ́ᾱ ؤ سّكّان ديالها موروسيوس Μαυρούσιος ؤ منها جات لكلمة لّاتينية موري Mauri لّي تسمات علا شعب لْمور. كاينين تلاتة ديال لْفرضيات رئيسية ديال لْاصل د هاد لْكلمات:

بعض جّْماعات لايديولوجية بحال لأفروسنتريك، كيركزو علا لفرضية لّوْلا باش يڭولو انها كدل علا نّاس لّي لْبشرة ديالهم كْحلا، شّي لّي بنّسبة ليهم كيتبت ان سّكان لْقدام ديال موريطانية كانو كوحل، ؤ ان لْمغاربة ديال دابا جاو من بعد من اوروپا ؤ شّرق لْأوسط. ولاكن هادشي بينات دّراسات لجينية انه ماشي صحيح، ؤ زيدون ماكاينش دليل علا ان لكلمة ليونانية كتشير ل لّون ديال لْبشرة، ؤ ف لّخر كتبقا غير فرضية بلا دليل مْلموس.

وبغض نّظر على الدراسات الجينية لي نفات لهضرة نتاع الأفروسنتريك فمننساوش بلي كلمة موري كانت كتطلق على أصحاب اللون المائل للسمرة وليس الأسود و الدليل هو بلي الإغريق و الرومان بجوجهم كانو كيفرقو بين موري و إثيوبي و هاد لّخرة كتعني ساكن إثيوبيا ، و ماشي من المنطق نگولو أن القدماء ستعملوا جوج سميات ( موري و إثيوبي) باش يعنيو نفس العرق، و القدماء كانو واعرين فهاد القضية نتاع تمييز الأعراق بتسميات دقيقة، فالجغرافي المشهور كلاوديوس بطليموس مثلا، فالكتاب تاعو لي ذكر فيه شّعوب لي سكنات جنوب إقليمي موريطانية وقع ليه شوية تاع الصعوبة فتصنيف شعوب لگيتول و لگرمنت و الإيثيوبييون لي كانو ساكنين فديك لوقيتة، و كنلقاوه بلي سمّى سّكان گيتوليا لبيضين بمصطلح گايتولي فقط أما سكان گيتوليا لي لبشرة نتاعهم كحلة فباش يميزهم ستعمل مصطلح ميلانو گايتولي لي كتعني الگيتول السود و كيزيد بطليموس يأكد لينا بلّي گاع هاد تّسميات معندهاش علاقة بلعرق بل بالإنتماء الجغرافي و نمط المعيشة، لي كيخلينا متأكدين من هاد لفكرة هو هاد الإقتباس من لكتاب تاعو، لي كيقول:

نقدرو نشوفو بلي هاد لوصف نتاع كلاوديوس كيتجاهل تماما المعنى العرقي نتاع مصطلح إثيوبي لي من المفروض إكون كيعني كحل البشرة و كنسجلو ما يلي:

وهكذا كنستنتجو أن التسميات لي ستعملها بطليموس كتعني:

وهادشي كيبين بلي كلمة موري بكل بساطة كتعني مواطن مملكة موريطانية ومعندهاش مدلول عرقي.

لأصول ديال مملكة موريطانية مامعروفينش مزيان، حيت قلال لكتوبا ؤ لوتايق لّي بقاو من ديك لفترة لّي كيهضرو عليها. لأدلة لأركيولوجية، خصوصا من معلمة مزورا ؤ معالم خرين، كتبين أن لمملكة تأسسات ف لقرن لخامس ؤلا لقرن رّابع قبل لميلاد. بعض لمزاود كتهضر علا ماليك أسطوري سميتو أطلس لموري، لّي واقيلا عندو علاقة معا لأسطورة ديال أطلس لإله لّي كانو لأمازيغ ؤ ليونانيين لقدام كيعبدوه. هاد لماليك ماكاين حتا شي تأكيد تاريخي علا لوجود ديالو، ؤ ربما لأسطورة ديالو عندها نفس الأصل ديال لإله أنطايوس، حامي أرض لأمازيغ، لّي تقدر تكون تّبنات علا شّخصية ديال شي ماليك موري حقيقي، تدفن ف مزورا.

حسب پلين لقديم لمور كانو ف لأصل قبيلة قوية لّي سيطرات علا شّمال د لمغريب، ولاكين ب سباب لحروب، مابقاو منها غير بعض لفاميلات. لحاجة لّي مأكدة هيّا أنه من بعد ما مات لماليك بوكوس تاني مابقا حتا حد موراه لّي عندو لحق باش يحكم.

أقدم ماليك مأكد تاريخيا هوّا باڭا لّي دكرو تيتوس ليويوس، حيت كان عاون ماسينيسا باش ياخد لملك ديالو من ولد عمو لاكومازيس، ب 4000 فارس موري، ؤ من بعد عاون ف لحرب لبونيقية تانية ضد قرطاج.

حسب ڭابرييل كامپ هادشي كيبيّن أن باڭا كان ماليك قوي ؤ مسيطر علا مجال جغرافي كبير، غالبا كان محدود ف لغرب ب لمحيط لأطلسي، ف شّرق ب واد مولوكا (لّي غالبا هوّا نيت واد ملوية). ف لجنوب، لحدود ماكانوش واضحين ولاكين غالبا كانو واصلين حتال لجنوب د جبال لأطلس.

لماليك بوكوس لول ورت هاد لمملكة علا باڭا ؤلا من شي ماليك أخور لّي ورتها من باڭا. ؤ غادي يزيد يوسعها لجيهت شّرق ف 105 ق.م.، فاش غادي ياخد تلت ديال مملكة نوميديا، من بعد ما سلّم يوغرطن ل رّومان. موراه غادي يحكم ولدو ماستانيسوسوس، لّي علا ما كيبان ماكانش شاد سّلطة مزيان، حيت لمنطقة ديال طنجيس كانت ستاقلات واحد لمدة تحت لحكم ديال فاميلة أمازيغية كيتزعّمها لْأمير ييفطاس ؤ موراه ولدو أسكاليس، حتا جا لجنرال رّوماني كوينتوس سيرطوريوس ؤ سالا معاهم.

ف 49 ق.م. غادي تقسّم مملكة موريطانية لجيهة شرقية حاكمها بوكوس تاني ؤ جيهة غربية حاكمها بوڭود. هاد لملوك بجوج كانو خوت ؤ ولاد ماستانيسوسوس، ؤ لحدود بيناتهم كانت ف واد ملوية. حسب سطرابو، بوڭود حارب لإتيوپيين، ؤ هادشي كيدل علا أنه غالبا كان وسّع مملكتو جيهت لجنوب، ولاكين مامعروفش بضّبط فين كانت واصلة. ف خلال لْحرب لْأهلية لْقيصرية، لخوت بجوج غادي يساندو يوليوس قيصر ف لحرب ديالو لّي كانت ضد تحالف فيه ڭنايوس پومپيوس ماڭنوس ؤ لماليك د نوميديا يوبا لول ؤ وحدين خرين. فاش غادي يخسر هاد تّحالف، بوكوس تاني غادي ياخد من لأراضي ديال نوميديا ؤ يزيد يوسع مملكتو ل شّرق، ؤ لْماباقي غادي يولّي مقاطعة تابعة ل رّومان.

ولاكين ف لحرب لأهلية لأنطونية، بوكوس ؤ بوڭود ماغاديش يتافقو علا شكون يساندو. بوكود تّاني غادي يساند ڭايوس أوكطاويوس، لّي من بعد غادي يولّي أوڭوستوس قيصر، مي بوڭود ساند ماركوس أنطونيوس ؤ كليوپاترا سابعة فيليپاطور لمليكة د مصر. ف 38 ق.م. بوكوس تاني غادي يهرف علا مملكة خوه ؤ يولي لماليك ديال موريطانية كولها حتال 33 ق.م. فاش غادي يموت.

لعرش ديال موريطانية هنا بقا خاوي حتال 25 ق.م. فاش لإمبراطور رّوماني أوڭوستوس قيصر غادي يعطي لحكم لصاحبو ؤ عشيرو يوبا ؤ مراتو كليوپاطرا سيليني بنت كليوپاطرا سّابعة.

مملكة موريطانية غادي تعرف لأوج ديالها ف لعهد ديال لماليك يوبا ؤ ولدو پطوليمايوس لموري لّي غادي يطورو لقتيصاد ديالها، ؤ يجيبو فنانين ؤ أدباء ؤ صناع من روما ؤ ليونان. أغلبية ديال لمعالم تّاريخية لقديمة ف لمغريب ؤ لغرب ديال دزاير كترجع ل هاد لفترة.

من بعد ما تقتل پطوليمايوس بأمر من لإمبراطور ڭايوس ڭيرمانيكوس لّي معروف ب سمية كاليڭولا، ف 40 ميلادية، غادي تولي موريطانية تابعة ل روما، ؤ غادي تقسّم ل جوج مقاطعات: موريطانية طّنجية ؤ موريطانية لقيصرية، لّي لحدود بيناتهم كانو بحال موريطانية شرقية ديالت بوكوس تّاني ؤ موريطانية لغربية ديالت بوڭود.

من خلال خريطة أگريبا لي صاوبوها الرومان فعهد لماليك يوبا تاني و من نصوص رافين لي كترجع للقرن السابع نقدرو نجبدو واحد ليست مابيهش تاع مدن مملكة موريطانية لي هوما:




#Article 362: لانترناسيونال (139 words)


لانترناسيونال، ولي معروف حتا ب نشيد لأممية، (ب لفرونصي: L'Internationale) هو أشهر نشيد يساري، تشهر ك رمز ديال لحركات لإشتراكية من لقرن 19، فاش لأممية تانية عتامداتو ك نشيد رسمي. هاد سمية ديال لانترناسيونال جات من لأممية لولة، لي هي واحد تحالف ديال لعمال ف 1864. سيد لي كتب هاد نشيد سميتو أوجين لا پواتيي، لي كان مناضل أناركي ف لمؤتمر ديال لأممية لولة.

لانترناسيونال تترجم ل بزاف د لوغات، و كايتستعمل عند لأناركيين، شيوعيين، و لإشتراكيين. ما بين 1912 و 1944 تستعمل هاد نشيد ك نشيد رسمي د لحزب لبلشڤي. و فاش ولات روسيا دولة شيوعية تستعمل ك نشيد رسمي ديال ليتيحاد سوڤييتي، قبل ما يبدلو سطالين لواحد نشيد لي كايمجد روسيا. لانترناسيونال تستعمل ك نشيد رسمي ديال جمهورية صين سوڤييتية، جمهورية باڤاريا سوفييتية، لجمهورية سلاڤية سوڤييتية، و لجمهورية لهنڭارية سوڤييتية. لانترناسيونال هو أكتر نشيد تترجم ف تاريخ.




#Article 363: كود مصدري (153 words)


الكود المصدري ولا السورس كود ف الحوسبة هي أي مجموعة من الكودات/الشيفرات لي تكتبو ب استخدام لغة برمجة كيفهما الانسان، و يقدر تتضمن تعليقات، وهادشي ف معضم الوقت على شكل نص خالص.

الكود المصدري ديال شي برنامج كيكون مصمم خصيصا ل تسهيل الخدمة ديال مبرمجي الكمبيوتر، لي بدورهم كيحددو الإجراءات لي خاص يديرهم الكمبيوتر عن طريق كتابة كود مصدري (غالبا).

بعض المرات كيتم تحويل الكود المصدري ل لغة آلة تنائية يمكن ليها تنفد ب الحاسوب، و هادشي عن طريق مُجمِّع ولا محول برمجي، و هاد لغة الآلة يمكن ليها تخزن باش يتم التنفيد ديالها ف شي وقت آخر. عوض هاد الطريقة، يمكن تفسير الكود المصدري و ب التالي تنفيدو ف ديك الساعة.

معضم البرمجيات و التطبيقات كيتم توزيعها ب واحد الشكل باش تشمل غير الملفات التنفيدية. الى تم ادراج الكود المصدري غادي يكون هادشي مفيد ل المستخدم، المبرمج و مدير النضام ف حالة اي واحد فيهم الى كان باغي يدرس ولا يعدل البرنامج.




#Article 364: ديمقراطية لإلكترونية تّعاونية (111 words)


ديمقراطية لإلكترونية تعاونية هي واحد لكونصيپط لي كيجمع بين ديمقراطية لمباشرة، ديمقراطية تمتيلية، و ديمقراطية لإلكترونية (يعني فاش كاتستعمل تكنلوجيا ف لعملية ديمقراطية).

ديمقراطية لإلكترونية تعاونية هي واحد سيستيم ف سياسة، لي تايخلي لمسؤولين سياسيين ديال لحكومة، بحال لووزارا، لبرلمانيين، و لأحزاب، من جهة، و لمنضمات لغير حكومية من جهة خرا، يتعاونو ف طريقة ديال تطوير لقوانين و تشريعات. هاد لعملية كاتكون ف واحد سيت حكومي ديال تواصل لإجتماعي، لي ڭاع لمواطنين أعضاء فيه.

واخا لممتلين ديال شعب هوما لي كايديرو تقريبا ڭاع لخدمة لي متعلقة ب لقوانين وتشريعات (ديمقراطية تمتيلية)، ولكن راه لمواطنين هوما لي ب يدهم لقرار لخّر (ديمقراطية مباشرة). ب لإضافة لأن أي مواطن يقدر يقتارح قوانين جديدة.




#Article 365: سارة حجازي (596 words)


سارة حجازي (تزادت ف 1989، و توفات ف 14 يونيو 2020) هي واحد لكاتبة شتيراكية مصرية، وتعرفات كتر ب توجه جنسي ديالها، و دفاع ديالها على حقوق مجتمع لميم ف مصر. تشدات حجازي ف مصر ودخلات ل حبس، و تعدبات 3 شهور، حيتاش هزات ضراپو د لمتليين فواحد لحفلة ديال مشروع ليلى ف 2017 ف لقاهرة. فاش خرجات حجازي من لحبس عانات من اضطراب لي بعد صدمة من كترت تعديب. تعطا ل سارة حجازي حق لجوء ف كانادا، وبقات عايشة تما حتال نهار لوفاة ديالها.

سارة حجازي تزادت ف 1989 ف أسرة محافضة من طبقة لمتوسطة. كانت هي لكبيرة ف خوتها ربعة. سارة عاونات لواليدة ديالها باش تربي خوتها من بعد ما مات بّاها، لي كان أستاد ديال سيونص ف لّيسي. سارة علنات على أنها ليزبيانة ف 2016.

ف 2010، سارة حجازي تخرجات من معهد طيبة ب باكالوريوس ف أنظمة لمعلومات، و من لجاميعة لميريكانية ف لقاهرة ف 2016. سارة حجازي شدات بزاف ديال ديپلومات عن بعد: نضال من أجل لمساواة 1950-2018 ، لفيمينيزم و لعدالة لإجتماعية ، لمناهج ديال لبحت ، و فهم لعنف، ف جامعة كولومبيا، جامعة كاليفورنيا سانتا كروز، جامعة لندن، جامعة پيتسبرغ، و جامعة إيموري.

حجازي كتعتابر راسها شيوعية، وكانت كادعم حزب لخبز و لحرية فاش كانت ساكنة ف مصر، و كانت معا شبكة ربيع شتيراكي ف كندا. حجازي قالت بلي جراو عليها من لخدمة حيت كانت ضد نيضام ديال سيسي ف مصر. بعد 9 سنين من تورة لمصرية د 2011، سارة كتبات: نيضام لقديم غادي يحاول يدير أي حاجة، حتا تضحية ب رموز ديالو، باش يبقا ف صولطة، و وصفات رئيس سيسي بلي هو أعنف ديكتاتور ف تاريخ لحديت، وكتبات بلي توّار كايآمنو بلي ل معركة هي معركة ديال طبقات، حجازي كتبات بلي من نتائج ديال تورة لي مكملاتش أن أغلبنا دابا يا إما ف لقبر، ف لحبس، ولا ف لمنفى.

ف 22 شتنبر 2017، سارة حجازي حضرات لواحد لحفل ديال واحد لفرقة لبنانية سميتها مشروع ليلى، لي رئيس ديالها متلي. حجازي كانت مع لمجموعة تعتاقلو بتهمة أنهم رفعو ضراپو د مجتمع لميم. تحاكمات سارة بتهمة لإنضمام لمجموعة ماشي قانونيةـ بغرض أنها دير أعمال لي ماشي أخلاقية. لإعتقال ديالها كان جزء من سياسة ديال مصر، لي ماكاتسامحش مع مجتمع لميم. سارة حجازي تشدات 3 شهور ف مخفر سيدة زينب، تما فين حرضو لحبّاسا لمحابسية باش يضربوها و يتعداو عليها جنسيا. ف 24 شتنبر 2018، سارة حجازي عاودات قصتها ف واحد لارتيكل ف جورنال سميتو مدى مصر. سارة ڭالت بلي تعتاقلات من دارها وقدام واليديها، و ف تحقيق سولوها على ديانة ديالها، وعلاش حيدات زيف، و واش هي ڤييغج. سارة حجازي قالت بلي بوليسي دور ليها عصابة على عينيها باش ماتشوفش، ومن بعد داها ب طوموبيل لواحد لبلاصا ماعرفتهاش. بقات مربوطة ف واحد لكرسي، و فمها مكمم. تعرضات للصعق ب ضو حتى سخفات. تعرضات سارة للتهديد بأن لواليدة ديالها غادي تعدب ايلا عاودات هادشي لي وقع ليها لأي واحد. سارة حجازي تطلقات من لحبس ف 2 يناير 2018، وخلصات 56 دولار غرامة. عانات سارة من ليكتئاب، نوبات ديال دعر، اضطراب لي بعد صدمة. لخوف من اضطهاد اخر، خلا سارة طلب لجوء ل كندا ف 2018. سارة فقدات لواليدة ديالها شهر من بعد حيت كانت مريضة ب لكونصير.

سارة حجازي ماتت نهار 14 يونيو 2020 ف طورونطو، كانادا. ف 15 يونيو لمحامي ديالها خالد المصري أكد لوفاة ديالها أنها انتحار. سارة حجازي خلات واحد رسالة قصيرة ب لعربية، ولي نتاشرات ف سوشال ميديا. سارة حجازي كاتڭول ف هاد رسالة: ل خوتي، حاولت باش نعتق راسي مي ماقدرتش، سمحو ليا. ل صحابي، تجربة لي دوزت كانت قاسية بزاف، وأنا ضعيفة بزاف باش نقاومها، سمحو ليا. ل لعالم، كنتي قاشي عليا بزاف، ولكن أنا كانسامح. لوفاة ديالها داز ف بزاف ديال لقنوات لإعلامية ف لعالم.




#Article 366: لعالم ناطق ب لعربية (156 words)


الوطن العربي  هوما مجموعة من 22 دولة لي لوغة رسمية ديالها هي لعربية، ولي هوما أعضاء ف جامعة دول لعربية. لأغلبية د هاد دول كاينين ف غرب اسيا، شمال افريقيا، و لقرن لإفريقي. لعالم ناطق ب لعربية كايمتد من لمحيط لأطلسي ف لغرب، تال لخليج لعربي ف شرق، و من لبحر لبيض لمتوسط ف شمال، تال لمحيط لهندي ف لجنوب شرقي.

واخا مالطا، لي هي جزيرة ف لبحر لبيض لمتوسط، عندها لوغة مشتقة من لعربية، ما كاتعتابرش من دول ناطقة ب لعربية، ونفس شيء ب نسبة ل تشاد، ايريتريا، و اسرائيل، لي كايتعارفو ب لعربية ك وحدة من لغات رسمية ديالهم، ولكن ما كايتعتابروش دول عربية، حيتاش هوما ماشي دول أعضاء ف لجامعة لعربية، (واخا تشاد و ايريتريا طلبو عضوية كاملة ف لجامعة ف 2014).

لعالم العربي فيه 422 مليون د ناس (حتال 2012)، وناتج داخلي اجمالي ديال 2.782 تريليون دولار (2018). لمنطقة شرقي كاتسما لمشرق العربي، و لمنطقة لغربية كاتسما لمغرب العربي أولا لمغرب لكبير.




#Article 367: محمد مشالي (100 words)


محمد مشالي، (تزاد ف 1944 و توفى ف 28 يوليوز 2020) هو طبيب مصري، متخصص ف طب لباطني، وتعرف ب طبيب لفقراء. باه كان أستاد. من بعد نتاقلو مجموعين ل محافضة لغربية، و ستاقرو فيها. تخرج محمد مشالي من كلية طب قصر العيني لي ف لقاهرة ف 1967، وتخصص ف طب لباطني، و أمراض لأطفال و ريجيم. من بعد خدم ف بزاف د لمراكز ديال وزارة صحة لمصرية. ف 1975، فتح مشالي لعيادة ديالو ف مدينة طنطا. بقا محمد مشالي كايدير دياڭنوص ب تمن رمزي، و شحال من مرة كايعفي لفقراء من لخلاص، وبعض لمرات كاشري ليهم دوا من جيبو.




#Article 368: ليلة الهروب الكبير (947 words)


ليلة الهروب الكبير، هو مصطلح تنتاشر ب شكل كبير ف صحافة لمغريبية ؤ حتا لعربية مورما ضطرو لألاف د لمواطنين مغاربة يساليو لعطلات ديالهوم ؤ يقبطو طريق باش يرجعو لمدون ديالهم مورما دارت لحوكومة لمغريبية قرار كيمنع دخول ؤ لخروج من 8 د لمدون مور طناش د ليل د 26 يوليوز 2020 ف إطار لقرارات لي كاتخدهم باش تحد من ڤيروس كورونا ف لمغريب. لموشكل هو أنه هاد لقرار تعلن عليه غير بشي سوايع قبل مايتطبق، هادشي خلا بزاف د طرقان ؤ لوطوروطات يكون عليهم زحام، ؤ بسباب هادشي وقعو بزاف د لكسايد لي ماتو فيها ناس.

صدرات السلطات الحكومية المغربية، ممتلة ف وزارة داخيلية و وزارة صحة نهار 26 يوليوز 2020 بيان مشترك جا فيه قرار كيقضي ب منع التنقل من و ف اتجاه 8 مدن: طنجة، تطوان، فاس، مكناس، الدار البيضاء، برشيد، سطات و مراكش.

هاد لقرار جا قبل أيام قليلة من لعيد لكبير لي صادف ف سنة 2020 نهار 31 يوليوز ب هدف الحد من انتشار ڤيروس كورونا عن طريق منع تنقل المواطنين بين المدن لي موالفين كيقضيو العيد عند حبابهم و أسرهم، خصوصا من بعد التحديرات ديال اللجنة العلمية الاستشارية الخاصة ب ڤيروس كورونا المستجد ف المغرب لي توقعات احتمال ارتفاع عدد الحالات موازاة مع العيد الكبير ولا بعدو احتمال وارد بزاف، بحال لي طرا ف لعيد صغير.

السلطات المغربية دعات المواطنين ل الالتزام التام بهاد التدابير، و إلا ف المخالفين غادي يتعرضو ل إجراءات صارمة، طبقا ل القانون.

علا حساب لبيان وزارات داخيلية و صحة، ساباب علاش هاد لقرار تخاد هو حيت لمواطنين ماحتارموش دوك تدابير لي موصيين عليهم، بحال تباعد لجسدي، لباس د لكمامة، ؤ تعقيم د ليدين، واخا هاد جوج لخرين موجود ف سوق؛ هادشي لي خلا لعدوا تزيد تنتاشر ؤ حالات جداد تزاد.

ف نهار 26 يوليوز تسجل أكبر عاداد د لموتا ف نهار واحد ملي بان ڤيروس كورونا، وصلات لـ8 د لموتا، ؤ تسجلات تاني كبر حصيلة د لحالات بـ633 حالة جديدة. هاد لحالات جداد بانو ف بزاف د لمدون من بينهم: : 168 حالة ف برشيد، 114 ف طنجة، 66 ف مراكش، 48 ف الدار البيضاء، 11 ف فاس، ؤ 4 ف تطوان ؤ الحسيمة، هادشي لي خلا داك لقرار ديال لمنع يخرج.

وفق البيان ف قد تم استتناء الاشخاص دوي الحالات الطبية المستعجلة و الناس الخدامين ف القطاع العام ولا الخاص و المكلفين ب أوامر ب مهمة مسلمة من طرف المسؤولين ديالهم، مع شرط الحصول على رخص استتنائية من السلطات المحلية ل التنقل. نفس الشيء، هاد قرار المنع ما كيشملش حركة نقل البضائع و المواد الاساسية لي كتم ف ضروف عادية و انسيابية، باش يتم ضمان تزويد المواطنين ب كامل حاجياتهم اليومية.

ب فعل فجائية القرار لي جا فيه أوامر ب سدان المنافد البرية لي كتدي ل بعض المدن، الآلاف ديال المغاربة لي كانوا زربانين باش يرجعو ل ديورهم و المئات ديال الطونوبيلات تحركات مرة وحدة و خلال فترة الدروة، الشي قلب الدنيا، و أدى ل وقوع حوادت و انزلاقات كتيرة على مستوى التنقل. و تزاد طلب و تهافت المواطنين على تداكر الترانات، الشي لي فاقم حالة الزحام ف وسائل النقل العمومي، و المحطات، و كان الزحام بزاف عاوتاني على مستوى محطات الأداء ديال الشركة الوطنية ديال الطرق السيارة، وخصوصا ف محوري الدار البيضاء الرباط و طنجة القنيطرة. هاد الحالة دفعات السلطات ل إصدار تحدير من تفشي الوباء ب سباب هاد التجمعات.

بزاف ديال المغاربة و خصوصا الناس لي كانو معنيين ب القرار انتاقدو السياق و التوقيت ديال الإعلان على قرار المنع، و اعتابرو ب أن الحكومة فشلات فشل دريع ف اجتياز امتحان السيطرة على تفشي وباء كورونا، و وصفو القرار ب العشوائي و الفوضوي و ب أنه جا ف توقيت خاطىء و ڭالو؛ كن أنه تم الإعلان على القرار بكري كن تم اجتناب الاكتضاض و الزحام بين المسافرين لي اضطرو باش يخرجو ل المحطات الطرقية و السككية دقة وحدة قبل التناعش ديال الليل حيت كانو خايفين من السدان ديال الطريق، خصوصا أن الزحام كيساعد على انتشار الڤيروس.

على هادشي طالبات مجموعة من المواطنين ب استقالة رئيس الحكومة سعد الدين العتماني، باعتبارو المسؤول السياسي اللول على القرار لي خداتو مختلف القطاعات الحكومية، حيت ب موجب الفصل 90 من الدستور، هو لي كيمارس السلطة التنفيدية، و يمكن ليه يفوض بعض سلطو ل الوزراء، و هو لي كيرأس مجلس الحكومة لي كيتداول ف القضايا و النصوص المتعلقة ب السياسة العامة ل الدولة.

ب دورو، نتاقد الراپور المغربي توفيق حازب المعروف ب البيڭ قرار الحكومة الارتجالي لي تخاد ف آخر لحضة، و كتب ف ستوري ديالو على الانستڭرام: الحكومة كانت غادية مزيان ف تدبير كورونا و لكن ل الأسف فرنسا ما عندهاش عيد الاضحى”. هاد التغريدة حسب تفسير جريدة ڭود الالكترونية؛ تاهمات الحكومة المغربية ب تبعية ل فرانسا خلاتها تخربق ف قراراتها قبل العيد، حيت فرنسا ما كتحتافلش بالعيد الكبير يعني ما كضربش حساب ليه أصلا.

ڭال رئيس الحكومة سعد الدين العتماني ف افتتاح الاجتماع التالت ديال اللجنة الوزارية ديال تتبع و تيسير البرنامج الحكومي نهار 28 يوليوز 2020 ب أنه كيتحمل مسؤولية قرار منع التنقل من وإلى 8 مدن، و كدلك الحكومة كتحمل المسؤولية ب شكل تضامني. و ڭال ب أن الجميع خاصو يلتازم ب الإجراءات الضرورية و قواعد النضافة على قبل الوقاية من الوباء و هادشي باش ما يتمش اتخاد قرارات أصعب ف المستقبل. وزاد رئيس الحكومة بلي قرارات الحجر الصحي، و منع الخريج من الدار، و الحبيس ديال ملايين المواطنين على خدمتهم قبل إجراءات التخفيف، كانو أصعب من قرار منع التنقل ديال نهار 26 يوليوز.

نشر سفيان بحري صاحب صفحة الملك محمد السادس ف الفيسبوك لي ماشي صفحة رسمية، نشر فيها خبر زائف مفادو أن الملك محمد السادس تدخل باش يمنح مهلة 48 ساعة ل التنقل بين المدن. هاد الخبر تمات مشاركتو ب شكل واسع و تار ضجة كبيرة، الشي لي خلى سفيان بحري يتراجع على الخطأ ديالو ب حدفو ل الخبر و إغلاق الصفحة. فتحات الشرطة القضائية ديال الرباط تحقيق باش تستامع ليه على غرار باقي ناشري الاشاعات و الاخبار الزائفة من البدية ديال الجايحة.




#Article 369: محمد لعروسي (152 words)


محمد لعروسي (14 يناير 1934, بني دركول - 14 فبراير 2014) كان فنان مغريبي ديال الطقطوقة الجبلية ولعيطة والشعبي, وكان تيعرف يضرب لكمانجة مزيان. هو من الناس اللي شهرو الطقطوقة الجبلية فلمغريب مع أحمد لڭرفطي وحاجي السريفي وشامة الزاز. لعروسي شارك فبزاف د لمهرجانات فلمغريب وفلخاريج, وربح بزاف د لجوائز فحياتو.

تولد محمد لعروسي ف 1934 فدوار بني دركول فالدائرة د غفساي فلإقليم د تاونات. كنيتو لعروسي حيث لأصل د عائلتو من بني عروس واخا هو تولد وكبر فلقبيلة د بني زروال. بدا لعروسي لموسيقا من صغرو وخرج من لمسيد باش يكمل فلغنا وتعلم من شيوخ لمنطقة بحال مولاي المفضل الطريرف، وأحمد بلمكي، وبن التهامي اللي علًمو لملحون.

ف 1958 شجل أوًل أغنية ديالو مع لإذاعة لوطنية, ومن موراها بدا تيخرج لأغاني ديال الطقطوفة, فبزاف د لمواضيع. تاتميز بزاف د لأغاني د لعروسي باللي فيها الضحك ولمعاني وعليها تاتعجب لجمهور.

غنا محمد لعروسي 526 أغنية, منها اللي تعرفو بزاف عند لجمهور بحال:




#Article 370: مسرح سيرڤانطيس (طنجة) (112 words)


المسرح ديال سيرڤانطيس (ب الصبنيولية: Gran Teatro Cervantes) هو واحد المسرح ف طنجة (الشمال ديال المغرب) اللي مسمّي على الكاتب الصبنيولي ميڭيل دي سيرڤانطيس. المسرح بناوه الصبنيول ف 1913 ملي كانت طنجة منطقة دولية. كان مسرح سيرڤانطيس كيتعتابر واحد من المسارح اللي مهمين و راقيين ف أفريقيا، و فنانين كبار دارو عروض فيه. الإصلاحات بقاو كيتأجلو مدة طويلة بسباب الخلافات مابين المسؤولين ديال المدينة و الدولة الصبنيولية.

إيسپيرانزا أوريانا هي اللي تكلفات ب العملية ديال البني ديال المسرح مع الزوج ديالها، مانويل پينيا و مول المسرح أنطونيو ڭاييڭو. البني بدا ف 2 أبريل 1911 و كمل ف 1913 اللي كان هو العام ديال الافتتاح ديالو ب واحد القدرة استعابية ديال 1400 بلاصة.




#Article 371: آنڭيلا ميركيل (114 words)


آنڭيلا دوروتيا ميركيل (ب لألمانية: Angela Dorothea Merkel) (تولدات نهار 17 يوليوز 1954 فهامبورڭ - وكانت سميتها فلولادة كاسنر) هي سياسية ألمانية واخدا لمنصب ديال لمستشارة د ألمانيا من 2005 تال دابا. من 2000 ل 2018 كانت ميركيل هي الشافة ديال لحزب ديال ليتيحاد الديموقراطي لمسيحي (CDU).

ميركيل تعرفات ببزاف د السميات بحال: الشافة د ليتيحاد لأوروپي، أقوى مرا فلعالم، ولاً لقايدة د لعالم لحرً. خدات السمية د أقوى مرا فلعالم 9 د لمرات على حساب التصنيف د فوربس (رقم قياسي)، وتكلاصات جوج مرات تاني أقوى واحد فعالم مع فوربس نيت، وهو أعلى ترتيب دارتو مرا فالتاريخ.

ف 2015، ختارت لمجلة لميريكانية د التايم ميركيل هي الشخصية د لعام، ووصفاتها بلمستشارة د لعالم لحرً.




#Article 372: بوجلود (174 words)


بوجلود ولا بيلماون ولا بو ايسليخن ولا بو البطاين ولا بو هيضور ولا الشويّخ ولا هرّْمة، هو واحد لإحتفال أمازيغي سنوي، كايجي مورا لعيد لكبير، و تايكون ف بعض لمناطق د لمغريب. ف هاد لإحتفال واحد شخص ولا كتر، كايلبسو جلود ديال الحوالا ولا المعاز لي تدبحات ف لعيد.

بوجلود عندو أصول ف لميتولوجيا لأمازيغية، ولي من بعد ولا تقليد مرتابط ب لعيد لكبير.

لإحتفال كايبدا ف نهار لوّل د لعيد، و كايستامر ل 3 أيام بعد لعيد ف لقرى، و حتال سيمانة ف بعض لمدن. ف هاد لإحتفال، مجموعة د ناس كايلبسو جلود ديال لحولي د لعيد، و كايصبغو وجوههم، ولا كايديرو ماصك، وتايكونو هازين لكرعين ديال لحولي ف يديهم، و تايقيسو بيهم ناس لي محتافلين معاهم. و كاتكون معاهم واحد لفرقة موسيقية. لهدف من هاد لإحتفال هو أن ناس تخلق سعادة و تفرح.

أتناء هاد لإحتفال، بزاف ديال ناس كاتبرع ب فلوس، باش يديرو فيستيڤال موسيقي، لي كايحضرو ليه ڭاع ناس د لمنطقة. أكبر فيستيڤال ديال بوجلود ف لمغريب، هو بيلماون بيدماون، لي تايكون ف مدينة الدشيرة الجهادية، اقليم انزڭان أيت ملول.




#Article 373: قيس سعيد (109 words)


قيس بن المنصف بن محمد سعيًد (تولد نهار 22 فبراير 1958 فتونس لعاصمة) هو سياسي وأستاد جامعي تونسي، ومن أكتوبر 2019، هو الرئيس ديال لجمهورية ديال تونس.

قيس سعيد كان هو الرئيس د لجمعية التونسية د لقانون الدستوري من 1995 تال 2019، اللي كان هو لعام اللي ترشح فيه للينتيخابات كمرشح حر. فلينتيخابات الرئاسية مابغاش سعيد ياخد تمويل من الدولة فلحملة ديالو حيت قال باللي هاديك فلوس الشعب، ودار لحملة كلها بفلوسو لخاصة وعاونوه بزاف د لمتطوعين الشباب. فالدور التاني د لينتيخابات تلاقا مع رجل لأعمال نبيل القروي، وربح قيس سعيد بنسية كبيرة (كتر من 72% د لأصوات) و ولاً هو الرئيس د تونس من نهار 23 أكتوبر 2019.




#Article 374: ديلما روسيف (144 words)


ديلما ڤانا روسيف (ب لبرتغالية: Dilma Vana Rousseff) (تولدات نهار 14 دجنبر 1947 ف بيلو هوريزونتي) هي سياسية و قتصادية بريزيلية، وهي لمرا لوحيدة اللي كانت رئيسة د لبريزيل. كانت روسيف هي الرئسية رقم 36 د لبلاد (مابين يناير 2011 و غشت 2016).

تولدات ديلما روسيف فبيلو هوريزونتي فلبريزيل نهار 14 دجنبر 1947 وكان بًاها مهاجر من بلغاريا. دخلات من صغرها لليسار لمتطرف وناضلات ضد لقمع وليستيبداد، حتى تعتاقلات ف 1970 ودوزات 3 سنين د لحبس.

دخلات روسيف لحزب لعمال وبقات طالعا فيه تال 2005 فين عيًنها الرئيس لولا دا سيلڤا وزيرة د الطاقة. ف 2011 ولاًت روسيف أول مرا رئيسة د لبريزيل من بعد ما جابت 58% د لأصوات فلينتيخابات الرئاسية د 2010.

ف 2016، صوت مجلس الشيوخ د لبريزيل ب 60 صوت ل 20, بلعزل د روسيف من لمنصب د رئيسة، وجا بلاصتها رئيس مؤقت، ميشيل تيمير، اللي كان هو النائب ديالها.




#Article 375: العتيراف الدولي ب الجمهورية العربية الصحراوية الديموقراطية (427 words)


جّبهة د لپوليزاريو علنات علا لجمهورية لعربية صّحراوية دّيموقراطية نهار 27 شهر 2، 1976 ف بير لحلو، هاد لجمهورية صّحراوية كاتطّالب ب سّيادة على ڭاع صّحرا لغربية، لّي كانت مستعمرة د صّبليون، ولكن حاليّا لحكومة د لجمهورية صّحراوية كاينة ف لمنفى ف دزاير، لأمم لمتحدة وقوات حفظ سّلام شادّا واحد 20% تال 25% من لأرض ديال صحرا لغربية، و لباقي تابع ل ليدارة لمغربية.

حتال دابا، 84 دولة لّي محسوبة مع لأمم لمتحدة عتارفات ب لجمهورية لعربية صّحراوية دّيموقراطية. منهوم 44 دولة لّي جمّدو ولّا سحبو لعتيراف ديالهوم. ف واحد لوقيتة، (43.5%) من دّول لّي محسوبة مع لأمم لمتحدة عتارفو ب لجمهورية لعربية صّحراوية دّيموقراطية، 38 من دّول لّي محسوبة مع ليتيحاد ليفريقي لّي فيه 54 دولة (70%)، ؤ 18 لدولة من لمنضمة ديال تّعاون لإسلامي لّي فيه 57 دولة (32%)، ؤ 5 ديال دّول لّي محسوبة مع لجامعة ديال دّول لعربية لّي فيها 22 دولة (23%). بزاف ديال دّول لّي مامعتارفاش ب لجمهورية صّحراوية معتارفة ب جّبهة د لپوليزاريو بلّي هي لممتّل شّرعي ل سكّان ديال صّحرا لغربية، ولكن مامعتارفاش بلّي لپوليزاريو واحد لحكومة ف لمنفا د واحد دّولة عندها سّيادة.

كانت لجمهورية صّحراوية محسوبة مع ليتيحاد ليفريقي، لّي كان سميتو منظمة لوحدة لإفريقية، من 1984. لمغريب نساحب من منظمة لوحدة لإفريقية علا ود هاد البلان، حتا عاود رجع مرة اخرا ف 2017. لجمهورية صّحراوية كاتشارك ضيفة ف لإجتماعات د حركة عدم لإنحياز ولّا شّراكة لإستراتيجية لأسيوية – لإفريقية جّديدة، واخّا لمغريب كايعتارض لمشاركة ديالها.

لجامعة ديال دّول لعربية كاتأيّد سّلامة لإقليمية ديال لمغريب، بلا ما تزيد تحدّد بضّبط. كاين شي دول لّي كايدعمو صّحرا لغربية تكون تابعة لمغريب ؤ عندها حكم ذاتي ف لموستقبال، ؤ كاين شي دول عتارفات ب لمغربية د صّحرا ؤ فتحو قنصليات ف لعيون ؤ داخلة بحال كوت ديڤوار ؤ جزر لقمر.. الخ.

معا لمكسيك، دزاير، إيران، ڤينيزويلا، ڤييطنام، نيجيريا ؤ جنوب إفريقيا، لهند كانت هي لقوة لوسطا لكبيرة لّي عتارفات ب لجمهورية صّحراوية، منين خلّاتها تحل سفارة ف نيوديلهي ف 1985. غير هو لهند سحبات لعتيراف ديالها ف ل2000.

نهار 9 شهر 7، 2011، جنوب سودان كانت هي آخر دولة كاتعتارف رسميا ب لجمهورية صّحراوية.

هادي ليسطة ديال ڭاع دّول لّي عتارفات ب لجمهورية لعربية صّحراوية دّيموقراطية.

بزاف د لبرلمانات ديال بزاف د دّول لّي ما معتارفاش ب لجمهورية لعربية صّحراوية دّيموقراطية، دعاو لحكومات ديالهوم باش يعتارفو بيها، لبرلمان ديال سّويد كان هو أوّل برلمان ف لإتحاد لأوروپي كايصوّت ل لعتيراف ب صّحرا لغربية ف شهر 12، 2012، ولكن لحكومة سويدية ما خداتش بيه ف لخّر، ؤ حتا لبرلمانات د شيلي ؤ لبريزيل ديكلاراو.

ؤ هادي ليسطة ديال دّول لّي لبرلمنات ديالها عتارفو ب لجمهورية لعربية صّحراوية دّيموقراطية.

__لصق_فهرس__
__فهرسة__




#Article 376: سڤيتلانا تيخانوڤسكايا (360 words)


سڤيتلانا تيخانوڤسكايا، (ب لبيلاروسية: Святлана Ціханоўская، و ب روسية: Светлана Тихановская) (تزادت نهار 11 شتنبر 1982)، هي ناشطة سياسية بيلاروسية، و مرشحة ل لإنتخابات رئاسية ديال بيلاروسيا 2020.

قبل ما تكون مرشحة ل رئاسة، تيخانوڤسكايا كانت أستادة و مترجمة. و هي مزوجة من واحد ليوتوبر، مدون، و ناشط سياسي لمعتقل، سيرجي تيخانوڤسكي.

تعتاقل زوج ديال سڤيتلانا ف 29 ماي، بعدما ترشح ل لإنتخابات رئاسية. من بعد هادشي، علنات سڤيتلانا تيخانوڤسكايا بلي غادي ترشح بلاصتو. ف تسجلات نهار 14 يوليوز 2020 ك مرشحة مستقلة. من بعد ما تسجلات، حضات ب لمساندة ديال لحملة د ڤالري تيپكالو و ڤيكتار باباريكا، لي هوما جوج من أكبر شخصيات لمعارضة ف بيلاروسيا، و لي تمنعو من ترشح ل رئاسة. واحد تصويرة ديال تيخانوڤسكايا مع ماريا كوليسنيكوڤا، لي هي لمسؤولة د لحملة ديال ڤيكتار باباريكا، و زوجة ديال ڤالري تيپكالو، ولات رمز ديال لحملة لنتيخابية ديالها.

ف يونيو، نشرات واحد لڤيديو كاتڭول فيه بلي تعرضات ل تهديد ب لإعتقال، و أن ولادها غايتخادو منها ف حالة ستامرات ف لحملة لإنتيخابية ديالها. بعد هاد لحادتة، صيفطات ولادها ل برا د لبلاد، باش يبقاو ف أمان مع جداتهم.

قبل لحملة لينتيخابية، رئيس د بيلاروسيا ألكسندر لوكاشينكو ڭال بلي لبلاد ما مستاعداش ل رئيسة أنتى. لحملة ديال سڤيتلانا تيخانوڤسكايا جات بعد تقرير ديال أمنستي، لي ندد ب لمعاملة لعنصرية ديال ناشطات سياسيات ف بيلاروسيا.

تيخانوڤسكايا ڭالت بلي سبب ف ترشح ديالها ل رئاسة هو لحب، و رغبة ديالها ف أنها تحرر زوج ديالها من لمعتقل. و ڭالت بلي لهدف لأساسي ديالها هو تخلق انتخابات نزيهة و حرة. تيخانوڤسكايا كاتشوف بلي لإنتخابات لحالية ما عندهاش شرعية حيتاش لحكومة كاترفض تسجل لمنافسين سياسيين رئيسيين ديال لوكاشينكو. سڤيتلانا تعهدات أنها تدير بلان باش تولي لإنتخابات ف لبلاد أكتر شفافية وخاضعة ل لمسائلة ف 6 شهور بعدما تنجح تولي رئيسة.

ب رغم من أن سڤيتلانا تيخانوڤسكايا مرشحة مستقلة، قدرات أنها تجدب عدد كبير من لأنصار ف ڭاع لمناطق د بيلاروسيا، و ڭاع لمعارضين كيفما كانت توجهات ديالهم كايدعموها. ڤيتال ريماشوسكي، زعيم ديال لحزب لمسيحي ديمقراطي لبيلاروسي، علن على دعم ديالو ل تيخانوڤسكايا، و نفس شيئ ب نسبة ل حزب ديمقراطي لإجتماعي لبيلاروسي، لحزب لمدني لموحد، لحزب نسائي لبيلاروسي. سڤيتلانا تيخانوڤسكايا تدعمات حتى من لمرشح رئاسي سابق ديال لإنتخابات رئاسية 2010، ميكولا ستاتكيڤيتش.

__فهرسة__




#Article 377: محمد (606 words)


محمد، سميتو لكاملة هي أبو القاسم محمد بن عبد الله بن عبد المطلب، هو زعيم ديني سياسي وعسكري جا من قبيلة قريش. هو لي أسس لإسلام وكايعتابروه لمسلمين هو نّبي لخر ولوحيد ديال لإسلام. على حساب ما جا فتٌّراث لسلامي، محمد تزاد فمكة مابين 570م و مات فلمدينة ف632م. عادة تينطقو لمسلمين لعبارة د صلى الله عليه وسلم مورا ماتيقولو سميًتو.

كان ابًاه ميت قبل مايتزاد, وماتت مًو وهو صغير بزاف. ربًاه جدو عبد المطلب, و من بعد عمو أبي طالب. ماعمرو مامشا للمدرسة وماكانش تيعرف يقرا ويكتب. بدا يخدم صغير بزاف. فاللول خدم سرًاح ومن بعد داز للبيع و الشرا. كان معقول فخدمتو، وملًي دار 25 عام تجوج مع واحد السيدة كانت مخدًماه, سميتها خديجة.

محمد مات فعام 632 وكان فعمرو 61 عام, وخلًا لعرب مجموعين وموحًدين وكمًلو موراه النشر ديال لإسلام اللي وصل تال الأندلس فلغرب والشينوا فالشرق.

لمسلمين كايعتابروه هو لخر فلأنبياء ديال ديانات التوحيدية. وخا هوكاك، لوجود ديالو مازال محط نقاش من قبل لمؤرخين لمعاصرين. ماكاينش دليل مؤكد علا لوجود ديالو فتاريخ حيت أغلب لمصادر تَّاريخية لي كاتهدر عليه عندها طابع ديني.

 

حسب لمصادر لإسلامية، تولد محمد فلمدينة لعربية مكة. مكة كانت واحد لمدينة قافلية كايدوزو منها طرقان لسوريا، بلاد رَّافدين وليمن. محمد تولد كعضو فلعائلة ديال بنو هاشم من لقبيلة لمهيمنة قريش. باه عبد الله مات واقيلا قبل زيادة ديالو فعام 570. ماماه آمنة بنت وهب ماتت فلعام 577.

فبزاف دلمصادر لإسلامية كايتسما لعام لي تزاد فيه محمد عام لفيل، ولي تحددات فبعض لأبحاث ما بين 547 و 552. توافق مع تواريخ لوخرا ديال حياة محمد تاتثير نقاش.

طبري (مات ف 923) كايسيتي لمؤرخ وجينيالوجي بن لكلبي (مات ف 819) لي قال بلي محمد تزاد 42 عام قبل ما يوصل لإمبراطور ساساني كسرى لول للحكم. يعني زيادة ديال محمد كانت عام 573.

لأصل د محمد كان من زّواج ديال عبد لله بن عبد لمطّلب وأمينة بنت وهب. عبد لله كان ولد عبد لمطلب، وكان متكلف بعين ماء زمزم وبتفراق دلما فلوقيتة د لحج ديال مكة. لقبيلة د قريش هي واحد لقبية لقديمة عربية نازلا من غالب، ولد فهر، لي كانو نّاس مسمين عليه قريش، وكان معروف بأنّو واحد لمحارب صحيح ومرعب. أمينة كانت لبنت ديال وهب بن عبد لمناف، شّاف ديال واحد لقبيلة كانت سميتها بنو زهرة. لعائلة ديال محمد كانت هاشمية علا حساب بات جدّو هاشم بن عبد مناف. لقبيلة ديالو بلحاق فقدات لمتياز ديالها ومن بعد ولات لقبيلة ديال بنو أمية (لقبيلة د أمية بن عبد شمس، خو جد محمد) لي كاتحكم فمكة. قريش كانو كايحميو لكعبة، واحد لحرم لي بناواه براهيم وولدو سماعيل علا حساب ما جا ف تّراث لإسلامي.

ممكن تكون لموت ديال بّاه عبد الله وقعات قبل لولادة د محمد ف يثرب (ولّي غاتولي مسميا المدينة المنورة). سميتو، لي ماكانتش معروفة تماما ف داك لوقت، تّعطات بعدما حلمات مّاين محمد واحد لحلامة.

محمد كان كايدير خلوات روحية (تحنث) بحال لي كايديرو لحنفيين. محمد كان بتَّالي كايعيش واحد تجربة روحية قوية. تٌّراث لإسلامي كايقول بلي فيوليوز أو غشت 610 ف ليلة لقدر جاء عندو لملاك جبريل ف غار حراء فين كان موالف كايختلي بوحدو ودوزلو، حسب رِّواية لإسلامية، لوحي، يعني لكلام ديال الله. من بعد، لوحي غادي يتجمع ويتحفظ من عند لمسلمين فكتاب سميتو لقرآن.

محمد فلول خاف أنو يكون حماق، وماعاود تجربة لي داز منها غي لمراتو خديجة، وولد عمو علي وولدو بالتبني زيد. حسب لمؤرخ طَّبري، خديجة هي أول وحدة تحولات للإسلام وورقة بن نوفل غايكون إذن هو تاني. غايكون تبع محمد لأنه كان عارف بلي بعض ليهود و لمسييحيين ليهود كانو كايتسناو واحد نّبي وجوج مشيحين.

من بعد ماجاه الوحي, دوز النبي محمد ڭاع وقتو تيدعي الناس باش يدخلو فالدين الجديد اللي جاب, اللي كانت سميتو لإسلام, و سافر مع بزاف د الناس اللي كانو مآمنين بيه لبزاف د لبلايص باش ينشرو هاد الدين.




#Article 378: منصف السلاوي (411 words)


منصف محمد السلاوي ( تزاد نهار 22 يوليوز 1959 فأڭادير ) هو باحت و خبير فصناعة الأدوية تزاد فالمغرب و عندو الجنسيتين الأمريكية و البلجيكية كايعيش فالميريكان و كان مدير ديال قسم اللقاحات فشركة كلاكسو سميث كلاين،هاد الشركة لي خدم معاها لمدة تلاتين عام قبل ماياخد التقاعد ف 2017. و ف15 ماي 2020 طرامپ علن بلي السلاوي غادي يكون شاف د لفريق لي كلفاتو الحكومة الأمريكية باش يوجدو لقاح لڤيروس كورونا.

تزاد منصف ف 22 يولبوز 1959 فأكادير فالمغرب، الوالد ديالو كان رجل أعمال عندو مقاولة فالمجال ديال السقي الفلاحي
، و الوالدة ديالو ربة بيت عندو جوج ديال الخوت صغر منو ( واحد منهوم توفى ) و عندو ختو كبر منو.
قرا منصف فالليسي ديال محمد الخامس فكازا تما خدا الباك عام 1976 من بعد كان باغي يدير الطب ففرنسا ولكن فاتت عليه الوقيتة د التسجال حيت كان ملاهي مع المرض ديال الوالدة ديالو فديك لوقيتة،داك شي علاش قرر يدير بيولوجي فبلجيكا و من بعد عام واحد يغير التخصص باش يكمل فالطب ففرنسا، لكن من بعد عام قرر يكمل فنفس التخصص دلبيولوجيا الجزئية حتى خدا الدكتورا فالبيولوجيا الجزئيةو علم المناعة من الجامعة دبروكسيل كان عنوان الأطروحة ديالو هو Etude de la diversité et de la sélection des répertoires idiotypiques dans le système immunitaire.

من بعد ماخدا الدكتوراه انتقل منصف للميريكان مع الزوجة ديالو لي كانت كاتوجد بحث حول الإنفلونزا، و هو كان كايقري علم المناعة فالجامعة دهارفرد،و ف1988 غاينضم لشركة كلاكسو سميث كلاين كباحث في مجال اللقاحات،و من بعد ف 2006 غايولي هو رئيس قسم البحث و التطوير فالشركة.
بقا منصف خدام مع هاد الشركة المدة ديال 30 سنة،فهاد المدة ساهم فإكتشاف لقاح لمجموعة من الأمراض منها سرطان عنق الرحم، إلتهاب المعدة و الأمعاء، إيبولا، المالاريا ...
ف 30 يونيو 2017 غادر منصف شركة دكلاكسو سميث كلاين و إنضم لشركة ميديكسي Medicxi فأوروبا و شركة موديرنا moderna فماساتشوستس فميريكان.

ف 22 ماي 2020 الرئيس دلميريكان دونالد نرامب علن رسميا على إطلاق مشروع Operation Warp Speed لي الهدف منو هو يوجدو 300 مليون جرعة من اللقاح ضد كورونا فيناير 2021،و تعين منصف على رأس الفريق اللي تكلف بهاد المشروع، و فاللقاء الصحفي باش يعلنو على المشروع صرح منصف بلي إكتشاف لقاح فمدة مابين 12 ل 18 شهر صعيبة و لكن ممكنة، و باش يتجنب تضارب المصالح قرر منصف يستاقل من شركة موديرنا moderna لي حتى هي كانت كاتطور لقاح للفيروس.

منصف السلاوي مسلم الديانة،كايدوي بطلاقة بالدارجة،الفرونسي و الأنجليزية.
عندو تلاتة لولاد، الأخ ديالو محمد دكتور متخصص فطب الجهاز الهضمي،و الأخت ديالو هادية أستاذة جامعية فالأدب الفرنسي فالجامعة د الدارالبيضاء.

أعمال

مقالات




#Article 379: كمال الودغيري (241 words)


كمال الودغيري ( تزاد عام 1968 ف فاس) هو موهنديس تيصالات، عالم و باحت مغريبي خدام ف وكالة لفضاء لميريكانية نازا،أصلو من مدينة فيڭيڭ، كان هو لمسؤول على لهبوط ديال جوج مركبات، سبيريت spirit و أوبورتيونيتي opportunity على سطح د لمريخ، و شارك ف عملية إنزال مختبر علوم لمريخ Mars Science Laboratory، و تكلف حتا ب لمهمة ديال تتبع لإشارات لي كايصدرها الروبو كيريوزيتي curiosity فوق سطح د لمريخ.

تزاد كمال الودغيري ف مدينة فاس عام 1968، بقا فيها حتى ولات عندو 10 سنين عاد رحل مع عائلتو لدار لبيضا و تما فين بقا حتى خدا لباك، و من بعد غايمشي يكمل قرايتو ف لوس أنجليس ف ميريكان.
كان كمال كيعجبو داكشي ديال لفضاء من صغرو، ملي كان كايمشي مع عائلتو لبحر ف لمحمدية كان كايبقا متكي ليل كلو كايشوف ف سما.
من بعد ما سافر لميريكان كمل قرايتو ف جاميعة كاليفورنيا لجنوبية، تخرج منها ب ديپلوم موهنديس د تيصالات لفضائية.

من بعد ما خدا ديپلوم ديالو ف وسط تسعينات، دفع كمال لكونكور د نازا لي كان فيه 1000 مترشح غايتهزو منهوم 3 ولا 4، كمال كان عندو زهر حيت ف لمتيحان تحط ليهوم موضوع لي كان ديجا خادمو و قدر ينجح هو و 30 وحدين أخرين باش يدوزو متيحان شفوي، و فهاد لمتيحان شفوي سولوه علاش بغيتي تخدم ف نازا و جاوبهوم بلي قطع لبحر على قبل هاد لهدف و لي عاونو بزاف هو أنه كان كايخدم بزاف معا لفراقي لعلمية ف لجاميعة و حتى من بعد ما خدا ديپلوم.




#Article 380: لويس إيناسيو لولا دا سيلڤا (157 words)


لويس إيناسيو لولا دا سيلڤا (ب لبرتغالية: Luiz Inácio Lula da Silva) (تولد نهار 27 أكتوبر 1945 ف كاييطيس)، ولمعروف ب لولا، هو سياسي ونقابي بريزيلي. كان هو الرئيس 35 د لبريزيل وحكم لبلاد من يناير 2003 لدجنبر 2010. لولا واحد من لمؤسسين ديال حزب لعمال لبريزيلي، اللي كان أول حزب اشتراكي فتاريخ لبريزيل ف 1980، وترشح ثلاثة د لمرات للينتيخابات الرئاسية مع هاد لحزب وخسر فيها، قبل ما يربح ف 2002، ويعاود يربح موراها ف 2006. فلوقت اللي حكم فيه لولا، تعرف عليه باللي دار بزاف د لبرامج د لإصلاحات ليجتيماعية باش يحارب لفقر.

تختار لولا الشخصية د لعام 2009 من لجريدة د لو موند لفرانساوية، و ف 2010 ختارتو لمجلة د تايم لميريكيانية الزعيم لأكثر تأتير فلعالم.

نهار 12 يوليوز 2017، تحكم على لولا بلحبس تسع سنين ونص بالتهمة د لفساد ولغسيل د لفلوس، ولكن خرج منو مورا عام ونص (ف 9 نونبر 2019) من بعد ما حكمات لمحكمة لعليا د لبلاد ليه باش يخرج.




#Article 381: متلية (362 words)


لمتلية هي لانجداب رومانسيا ولا جنسيا، ولا أي تصرف جنسي بين جوج د ناس من نفس لجنس. كميول جنسي، لمتلية كتعرف بالانجداب بالمشاعر أو/ولا جنسيا بطريقة دايمة لناس لي من نفس لجنس.

لمتلية كتمتل مع لمغايرة وليزديواجية لجنسية، توجهات لجنسية لمهمة. لعلماء مزال ما عرفوش بضبط شنو لي كيسبب ميول جنسي، ولكن كيقولو بلي هدشي عندو علاقة ببزاف ديال لحوايج مع بعضهم: لجينات، لهورمونات وتأتير ديال لمحيط ديال كل واحد، وما كا يشوفوش لميول لجنسي كاختيار. واخا ما كاين حتى دراسة على شنو كيسبب لميول لجنسي لي مقبولة من بزاف، لعلماء كيفضلو نضريات لي مبنية على لبيولوجيا. وكاين أدلة كترعلى تأتير لعوامل لي بيولوجية وماشي جتيماعية على لميول لجنسي، خصوصا عند رجال. ومن جهة خرا ما كاينش أدلة كافية على تأتير لعلاقة مع لوليدين ولا تجارب ديال صغر على لميول لجنسي. واخا كاين ناس كيعتابرو لمتلية شي حاجة ماشي طبيعية، لبحوت لعلمية كتبين بلي لمتلية تغير عادي وطبيعي د لميول لجنسي د بنادم، وبللي لمتلية ف حد داتها ما عندهاش تأتير سلبي پسيكولوجي على شخص لمتلي. وواخا كاينين علاجات پسيكولجية باش لواحد يغير لميول ديالو، لجدوا ديالهم ما متبوتاش علميا.

ناس لمتليين كيتلقبو ببزاف ديال لمصطلحات. مصطلح ڭاي لراجل وليزبيان للبنت هما لي متداولين بزاف، واخا ڭاي تقدر تستعمل للبنات حتى هما. صعيب بزاف تقدير شحال كاين ديال لمتليين، ولا شحال د ناس ف علاقة حب مع شخص من نفس لجنس ولا شحال د ناس فايت دارو سكس مع شخص من نفس لجنس، خصوصا كاين بزاف ديال لمتليين كيخبيو ميولهم لجنسي حيت كيخافو يجبد عليهم لحڭرة ولا تمييز وحتى رفض من محيطهم ولا شي تصرف عنيف من ناس خرين إلا عرفو. ومن لفوق، لمتلية كيعاقب عليها لقانون ف بزاف ديال دول. ولمتلية كاينة حتى ف لحيوانات.

بزاف ديال لمتليين كيعيشو ف علاقة متلية معقولة، واخا حتى لعشر سنين لي فاتت عاد ولا شوية ممكن هاد ضاهرة تقدر، وضروف سياسية خلات بعض منهم يعلن لمتلية ديالو. هاد لعلاقات بحالهم بحال لعلاقات لمغايرة ف لجوانب لپسيكولوجية. ولعلاقات لمتلية كتجبد يا لإعجاب يا رفض وسبان، على حساب تقافة فين كتكون. من لخر ديال لقرن 19، بدات حركة باش لمتليين يعيشو لمتلية ديالهم بحرية ومساواة، ويكونو متلا لبراهش لمتليين محميين من ضسارة ولعنف ف لمدرسة، ويكون عند لمتليين لحق يدخلو للعسكر، ولحق يتجوجو، وتبناو ويكونو وليدين.




#Article 382: تفرڭيعات د لمرصا د بيروت 2020 (423 words)


تفرڭيعات د لمرصا د بيروت 2020، هي تتابع، فـ4 غشت 2020 جوايه 6 د لعشية، ديال جوج تفرڭيعات وقعو ف لمرصا د بيروت ف لوبنان. تفرڭيعة تانية تسببات ف ضرر بشري ؤمادي كبير.

قبل تفرڭيعات كان لقتيصاد لوبناني ف حالة د لأزمة، حيت لحوكومة مقدراتش تخلص لكريديات لي عليها، ؤطاحت لقيمة د ليرة، ؤ طلع معدل لفقر ب كتر من 50%.

فـ23 شتنبر 2013 ، واحد لباطو د سلعة، إم ڤي غوسوس، بضراپو د مولدوڤا كان غادي من باتومي (جورجيا) ل بيرا (موزامبيق)، ؤ هاز معاه 2750 طن من نترات لأمونيوم. ف طريق ديالو، ضطر يوقف ف لمرصا د بيروت ب سباب مشاكل ف لموطور. مورما قلبوه ناس د لمرصا، لقاو بيلا غوسوس ماصالحش باش يمشي ف لبحر، ؤ منعوه باش يكمل طريقو. لباطو كان فيه تمنية د لؤكرانيين ؤ روسي واحد، ؤ مورما تدخل لقنصل د ؤكرانيا، خمسة د لؤكرانيين رجعو لبلادهم، ؤ خلاو ربعا منهوم معا لباطو.

مول لباطو، بزناس روسي عايش ف قبرص إڭور ڭريشوشكين، طاح ف لإفلاس، ؤ هادوك لي كانو كاريينو مابقاوش مهتمين بيه، داكشي علاش لباطو تخلا عليه مولاه.

صافط بزاف د لمسؤولين ديال ديوانة رسائل لقضاة كيطالبو فيها باش تحل هاد لقضية د سلعة لي حجزو عليها، ؤ قتارحو إما يصدرو نترات لأمونيوم للخاريج ولا تعطا للجيش لوبناني ولا تباع لشاريكة ديال لمتفجرات لوبنانية. هاد رسائل تصافطو ف 27 يونيو ؤ 5 دجنبر 2014 ؤ 6 ماي 2015 ؤ 20 ماي ؤ 13 أكتوبر 2016 ؤ 27 أكتوبر 2017. وحدا من رسائل لي تصافطات ف 2016 مكتوب فيها بلي لقضاة ما رضوش على طلبات لقديمة.

ف لعشية د 4 غشت 2020، تشعلات لعافية ف واحد ديپو حدا لباطيمة د زرع ف لمرصا د بيروت. تصافط موراها فرقة د تسعود د لبومبيا ؤ فرملي واحد واحد باش يطفيو لعافية؛ قال ليهم واحد من سيكيريتي د لمرصا بلي هاداك راه غير هانڭار ديال لعاب د لعافية. ملي وصلو لبومبيا لقاو بيلا لعافية كبيرة بزاف. تفرڭيعة لولة كانت صغيرة ؤ دارت سحابة ديال دخان فوق لعافية معاها شعايلات د ضو قالو كاتشبه لعاب د لعافية. تفرڭيعة تانية كانت كبر بزاف ؤ وقعات جوايه 18:08. هزات وسط بيروت وصافطات سحابة حمرا-ليمونية ف لهوا. تفرڭيعة تانية حسو بيها ف شمال إسرائيل ؤ قبرص على بعد 240 كيلومطر. قالت هيئة د لمسح جيولوجي لميريكانية بلي تفرڭيعة تحسبات بحال شي زلزال بقوة 3.3، ف لوقت لي لمرصد د زلازل لؤردوني قال بلي راه بقوة 4.5.

ساباب ما تحددش ديك ساعة، واخا وسائل لإعلام د لحوكومة قالت ف لول بلي داكشي وقع ف واحد ديپو ديال لعاب د لعافية، ف لوقت لي وحدين خرين قالو بلي راه مخزن ديال لبترول ولا ديال شي مواد د شيمي.




#Article 383: ياسر عرفات (156 words)


ياسر عرفات (تولد ف 4 ولا 24 غشت 1929 ف لقاهرة - مات ف 11 نونبر 2004 ف باريز) كان سياسي فلسطيني وواحد من الرموز د لحركة د النضال باش تستاقل فلسطين. سميتو د بصًح هي محمد عبد الرؤوف عرفات القدوة الحسيني، وكانو الناس تيعرفوه تا بسميت أبو عمًار، اللي كانت هي السمية النضالية ديالو.

عرفات كان من لمؤسسين د لحركة د فتح ف 1959 وكان لقائد لعام ديالها. ف 1969، ولاً الرئيس دلمنضمة د التحرير لفلسطينية، و ف 1996 كان هو الرئيس د السلطة لفلسطينية، اللي هو منصب بحال الرئيس ديال فلسطين. فاللول كان عرفات ضد لوجود د إسرائيل، ولكن مورا 1967 اتًافق مع منضمة التحرير لفلسطينية على لحل ديال جوج دولات وبداو تيديرو مفاوضات بالتخبية. شارك عرفات فبزاف د لمفاوضات مع إسرائيل بحال مؤتمر مدريد (1991)، مفاوضات أوسلو (1994) و كامپ ديڤيد (2000).

ف 1994، خدا ياسر عرفات لجايزة نوبل د السلام هو وإسحاق رابين وشمعون پيريز مورا ما شاركو فمفاوضات أوسلو فنفس لعام.




#Article 384: لميتولوجيا لأمازيغية (937 words)


لميتولوجيا لأمازيغية هي مجموعة من لمعتقدات و لألهة لقديمة لي عبدوها لأمازيغ، سكان لأصليين ديال شمال افريقيا. بزاف من هاد لمعتقدات تطورات محليا، بينما معتقدات خرا جات ك نتيجة ل تواصل لحضاري عبر تاريخ، مع لأديان لإفريقية تقليدية، و ديانة لمصرية لقديمة، أولا تخدات من عصور قديمة من ديانة لبونية ديال قرطاج، ديانة ليهودية، لميتولوجيا لأيبيرية، و ديانة لهيلينيستية. آخر ما تأترات بيه لمعتقدات لأمازيغية هو لإسلام و ديانات لقديمة ديال لجزيرة العربية قبل لإسلام. بعض من هاد لمعتقدات لأمازيغية باقي حاضر ليوم ف تقافة شعبية و لعادات ديال لأمازيع. و بعض تأتيرات لأمازيغية حاضرة ف لمعتقدات ديال شعوب خرا.

لبحت لأركيولوجي ف لمقابر لقديمة ف لمغريب لكبير، بين بلي لجتت ديال ناس لميتين كانو مصبوغين ب أوكسيد رصاص. ب رغم من أن هاد لممارسة تعرفات عند لإيبيروموريسيين، هاد تقافة كانت صناعة ديال لحضارة لقبصية. لموتى بعض لمرات كانو كايتدفنو مع لقشور ديال بيض نعام، لمجوهرات، و لأسلحة. لجتت كانو غالبا كايتدفنو ف لوضعية ديال لجنين.

لڭوانش، لي هوما لأمازيغ ديال جزر لكناري، و خلافا لباقي لأمازيغ لي ف لبر رئيس، كانو كايحنطو لموتى. ف 1958، لبروفيسور فابريزيو موري (1925-2010) من جامعة روما، كتاشف واحد لمومياء لي عمرها 5000 عام تقريبا، يعني تقريبا ألف عام قبل من أي مومياء مصرية قديمة.

ف واحد لكتاب سميتو البربر، دكرو لمؤلفين بلي لعبادة ديال لموتى كانت وحدا من سمات لمميزة ديال لأمازيغ ف لعصور لقديمة. لجغرافي روماني پومپونيوس ميلا قال بلي واحد لمنطقة ف شرق ليبيا لحالية سميتها أوجلة، عتابرو بلي لأرواح ديال لأجداد ديالهم آلهة. كانو كايحلفو بيهم و كايستاشروهوم. و بعد ما كايطلبوهم ف شي حاجة، كاينعسو حدا لقبور ديالهم باش يتسناو رد ف لأحلام ديالهم.

لمؤرخ ليوناني هيرودوت ( 484 ق.م -425 ق.م تقريبا) هضر على نفس هاد لممارسات عند ناسامونس، لي هوما أمازيغ نوميديين سكنو صحاري ديال أوجلة، و لي حدا واحة سيوة ف مصر لحالية. كيقول هيرودوت:

[..] كانو كايحلفو ب رجال ديالهم لي كانو شجعان و مزيانين. كانو كايحطو يديهم على لقبور ديالهم، و كايديرو طقوس ديال تقديس و دعاء، و من بعد كاينعسو حداهم، و أي حاجة كايشوفها لواحد ف لحلم ديالو كايقبلها.

لأمازيغ عبدو حتى لملوك ديالهم. لقبور ديال لملوك نوميديين، هوما من أبرز لمعالم لأترية لي خلاوها لأمازيغ لقدام.

لقبور ديال ناس لّولين و لأجداد ديالهم، كايبين بلي لأمازيغ و لأسلاف ديالهم (نوميديين و لموريطانيين) آمنو ب لحياة بعد لموت.  ناس لي عاشو قبل تاريخ ف شمال لغربي د افريقيا دفنو لموتى ديالهم ف حفر صغيرة، و فاش عرفو بلي لحيوانات كاتقدر تجبد دوك لجتت من تحت لأرض و تاكلهم، بداو كايدفنو لجتت ف حفر عميقة، و من بعد، ولاو يدفنو ف لكهوف، ولا تحت تلال صغيرة من تراب ولا لحجر.

هاد لقبور تطورو من واحد شكل بدائي حتا ولاو أشكال دقيقة و مدروسة، بحال لأهرامات لي منتاشرين ف شمال إفريقيا. شرف ديال دفن ف بحال هاد لأهرامات هو ل ناس لي كانت عندهم مكانة كبيرة ف لمجتمعات ديالهم.

هاد لأهرامات تارو لهتيمام ديال بزاف د لعلماء، بحال محمد شفيق، لي كتب واحد لكتاب كايدوي فيه على تاريخ ديال هاد لقبور، لي قدرو يصمدو حتال ليوم. حاول أنه يربط بين لأهرامات لأمازيغية و لأهرامات لمصرية، من واحد لأساس تاريخي. أشهر هاد لأهرامات لأمازيغية هوما واحد لهرم ف منطقة إيمدغاسن ف دزاير، فيه 19 ميترو من لفترة نوميدية قبل رومانية، و هرم لقبر لملكي لموريطاني، لي كاين ف تيبازة ف دزاير.  هاد لهرم تدفن فيه لملك جوبا تاني، و لملكة كليوباترا سيليني تانية.

لقديس أوڭسطين دكر بلي لأفارقة لي كايآمنو ب بزاف د لآلهة عبدو لحجر. أپوليوس حتا هو هضر على هاد لممارسات، و ڭال بلي ناس كانو كايعبدو لحجر ف لقرن تاني. هاد تقافة يمكن كانت جزء من لعبادة د لموتى و لعبادة د نجوم.

لمعلمة ديال مسورة هي أشهر معلمة أترية صخرية ف شمال لغربي د إفريقيا، كاتكوّن من دائرة من لحجر، و وسطها كاين واحد لقبر على شكل هضبة. أعلى حجرة ف هاد دائرة طولها كتر من 5 ميترو. و على حساب ما ڭالت لأسطورة، هاد لقبر هو ديال لملك لأسطوري أنتي. واحد لمعلمة صخرية تكتاشفات ف لجنوب د كازا ف 1926، و لقاوها منقوشة ب عبارات جنائزية ب تيفيناغ.

هيرودوت ڭال بلي لأمازيغ لقدام عبدو شمس و لقمر، و دارو طقوس د تضحية من أجلهم. ڭال:

كايبداو ب لودن ديال ضحية، لي كايقطعوها و كايلوحوها على ديورهم. كايقتلو لحبوان من لعنق. كايضحيو من أجل شمس و لقمر، و ماشي لأي اله اخر. هاد لعبادة معروفة عند كاع ليبيين.

لخطيب روماني سيسيرو (105 ق.م – 43 ق.م) هضر على نفس طقوس ف كتابو في الجمهورية (لحلمة ديال سكيبيو)

فاش (لمتكلم هو سكيپيو) تعرفت عليه، راجل لكبير ف لعمر (ماسينيسا، لملك ديال لماسيل) عنقني، و بكا، و من بعد شاف ف سما، و ڭال، كنشكرك أ سما، و كنشكر ڭاع لكائنات سماوية، أنني و قبل ما نودّع هاد لحياة، كانستقبل ف لمملكة ديالي، و ف لقصر ديالي، سكيپيو 

كاينين بعض نقوش ب لاتينية تلقاو ف شمال لغربي د إفريقيا، مهداة ل لإله ديال شمس. متال على هاد نقوش كاين ف سوق أهراس (لبلاصة فين تزاد أوڭستين) ف دزاير، مكتوب فيه  ب لاتينية.

لمصريين لقدام كانو جيران ديال لأمازيغ، ب تالي من طبيعي أن بعض لآلهة تعبدو من قبل شعبين ب جوج. لآلهة لمصرية ليبية يمكن تصنف على حسب لأصل ديالها.

هيرودوت ڭال بلي لأمازيغ شرقيين لقدام عبدو إيزيس و ست. ڭال

لّيبيين لقدام عمرهوم كلاو لحم ديال لبڭر، ل نفس سبب لي خلا لمصريين ماياكلوهش، و ماكانوش كايربّيرو لخنازير، و حتا ف سيرين (منطقة ف شرق ليبيا)، لعيالات كانو كايشوفو بلي خايب لواحد ياكل لبڭري، و بهادشي تايكرمو الالهة لمصرية ايزيس، لي تايعبدوها عن طريق صيام و لإحتفالات. لعيالات د مدينة برقة حرمو على ريوسهم ماشي غير لحم د لبڭري، و لكن حتا لحم د لخنزير.

هاد لّيبيين لي ماكانوش تاياكلو لحم د لخنزير حيت رتابط مع لإله ست، و ماكانوش تاياكلو لحم د لبڭري، حيت مرتابط ب الالهة ايزيس 




#Article 385: جاپونية (2267 words)


جّاپونية (日本語 ، نيهونڭو | نيهون = جّاپون، ڭو = لغة) واحد لّغة شرق آسيوية كايهدرو بيها شي 128 مليون، أغلبهوم ف جّاپون، لّي تمّا هي لّغة د لبلاد، كاتّكتب من ليسر ل ليمن ولّا من لفوق لتحت.

مامعروفش بزّاف فوقاش أوّل مرة بانت ف جاپّون. لوتائيق شّينوية من لقرن تّالت مسجّلة شي كليمات ب جّاپونية، ولكن نّصوص د بصّح ما بانو حتا لقرن تّامن ف لوقيتة د هييان (794 – 1185)، شّينوية عندها تأتير كبير علا لكلمات ؤ لفونولوجي ديال جّاپونية لقديمة. جّاپونية لوسطانية لمعطّلة (1185 – 1600) مبدّلة واحد شّوية ؤ قرب ل ديال دابا، ؤ فيها بداو يبانو لكلمات لّي موخودين من لّغات د ؤروپا. لّهجة سطوندار تبدّلات من لّهجة د كانساي ل لّهجة د إيدو (فين كاينة طوكيو دابا) ف لوقيتة د جّاپونية لموديرن ديال بكري (لبدية د لقرن 17 – لوسط د لقرن 19). من بعد ما تحيّد لعَزل لّي كانت دايراه جّاپون ل راسها ف 1853، ل كلمات لّي موخودين من لّغات د ؤروپا تزادو بزاف، بحال لكلمات لّي لأصل ديالهوم هو لونڭلي متلا.

واخّا جّاپونية ماكاتجيش ل شّينوية، ولكن كاتخدم ب رّموز شّينوية ف لكتبة ديالها، ولّا: لكانجي (漢字)، لّي لأغلبية ديال لكلمات ديالو جايين من شّينوية. سيسطيم د لكتبة د جّاپونية خدّام ب لكانجي ؤ لهيراڭانا (ひらがな ولّا 平仮名) ؤ لكاطاكانا (カタカナ ولّا 片仮名). لكتبة لّاتينية كاتستعمل مرة مرة، بحال ف لختيصارات، ؤ ف سيسطيم د لأرقام كاتخدم غالبا ب لأرقام د لعربية ؤ حتا لأرقام د شّينوية.

جّاپونية لبدائية، لّغة لأصل ديال جّاپونية ؤ لّغات ريوكيوانية، كايڭولو بلّي جابوها نّاس لّي جاو ل جّاپون من لقارّة د آسيا ولّا لجزر لقراب د لمحيط لهادي من قبل لقرن 2 قبل لميلاد (لوقيتة د يايوي)، بلاصات لّغات دّوريجين ديال جومون لي كانو عايشين تماك، ؤ حتا لّغة لأصل د لأينو. مامعروفش بزاف علا جّاپونية فهاد لوقيتة، حيت كانو مازال ما جابو لكتابة من شّينوا.

هي أقدم ڤيرسيو عندنا علا جّاپونية، سيسطيم د لكتبة د شّينوية جا ل جّاپون مع لإنتيشار د لبودية. نّصوص لقدام لّي تلقاو ف جّاپون كانو مكتوبين ب شّينوية لكلاسيكية، لّي يقدر يكونو كايتّقراو ب طّريقة د كانبون، شي نصوص كان عندهوم تأتير على لڭرامّير ديال جّاپونية، بحال تّرتيب د لكلمات (متلا، لفيعل مورا لمفعول به). ف هاد نّصوص لهجينة، رّموز شّينوية كانو مرة مرة كايتستاعملو باش يعبّرو علا صّوت ديال شي حرف جّاپوني. نّصوص لقدام، لكوجيكي، لّي لوقت ديالهوم كايرجع لقرن 8، كانو مكتوبين كاملين ب رّموز د شّينوية. نّهاية د جّاپونية لقديمة جات مع نّهاية د لوقيتة د نارا ف 794. جّاپونية لقديمة كاتستعمل سيسطيم د لكتابة مانيوڭانا.

جّاپونية لوسطانية د بكري هي جّاپونية ف لوقيتة د هييان، من 794 حتال 1185. جّاپونية لوسطانية د بكري كان عليها تأتير كبير ديال شّينوية من ناحية د لفونولوجي ديالها.

جّاپونية لوسطانية لمعطّلة كانت من 1185 تال 1600، تقدر تقسّمها علا جوج، لوقيتة د كاماكورا، ؤ لوقيتة د موروماتشي.

لفورمة لّخرانية د جّاپونية لوسطانية لمعطّلة كانت هي لّولا لّي توصفات من مصادر ماشي جّاپونية.

جّاپونية لوسطانية لمعطّلة فيها أوّل لكلمات لّي موخودين من لّغات د ؤروپا بحال پان (لخبز) ؤ طاباكو (طّابا) بجوج من لبرطقيزية.

جّاپونية لموديرن ديال بكري كانت لّهجة لي تستعملات مورا لإصلاح د ميجي. جّاپونية لموديرن ديال بكري طّورات بشوية بشوية ف لقرن 19 ل جّاپونية لموديرن. غير من بعد 1945، منين سالات لحرب لعالمية تّانية، عاد ولّات جّاپونية لموديرن سطوندار، ؤ ولّا كايبان لستيعمال ديالها ف أغلب لتيصالات رّسمية. ف هاد لوقيتة كانو كايستعملو ف لكتابة ل هيراڭانا ؤ لكاطاكانا ؤ رّموز د شّينوية تقليدية لي كايتسمّاو هان لّي من بعد تطورات ل لكانجي.

جّاپونية لموديرن بدات مع لوقيتة د إيدو، لّي دوّزات من 1603 تال 1868. من يّامات جّاپونية لقديمة جّاپونية سّطوندار كانت هي لّهجة د كانساي، خصوصا ديال كيوطو. ولكن ف لوقيتة د إيدو، إيدو (لّي هي طوكيو دابا) تطورات ولّات أكبر مدينة ف جّاپون، ؤ ولّات لّهجة ديال ديك لبلاصة هي لّهجة سّطوندار. ملّي حيدات جّاپون لحصار لي كانت دايراه علا راسها ف 1853، تزادو بزاف لكلمات لّي موخودين من لّغات د ؤروپا، بحال لألمانية، لبرطقيزية ؤ لونڭلي. بزاف د لكلمات لّي موخودين من لونڭلي عندهوم علاقة ب طيكنولوجيا، بحال pasokon - باسوكون (ختيصار ل personal computer - لحاسوب شّخصي)، intānetto - إينطانيطّو (internet - لانطيرنيط)، ؤ kamera - كاميرا (camera - لكاميرا).

واخّا جّاپونية كايهدرو بيها تقريبا غير ف جّاپون، كانو كايهدرو بيها حتا برّا، ف لوقيتة د لحرب لعالمية تّانية ؤ قبل منّها. ملّي جّاپون كانت شادّة طّايوان ؤ كوريا، ؤ شي بلايص من شّينوا ؤ لفيليپّين، ؤ شي جزر من لمحيط لهادي، نّاس لي ف هاد لبلدان تعلمو جّاپونية حيت هي لّغة د لإمبراطورية، حتال دابا نّاس لكبار ف هاد لبلايص مازالين كايهدرو بيها.

جّاپونيين لّي ف لخاريج (أكبر نسبة كانلقاوها ف لبريزيل، ما بين 1.4 مليون ؤ 1.5 مليون جاپّوني زماڭري ؤ لّي كابرين تمّا، علا حساب لمعلومات د لـ IBGE، ؤ كتار من 1.2 مليون ف ميريكان) بعض لمرّات كايخدّمو جّاپونية هي لّغة لأساسية. تقريبا 12% ديال سكّان د هاواي كايهدرو ب جّاپونية، حيت تقريبا 12.6% من سكّان أصلهوم من جّاپون ف2008. تقدر تلقا زماڭرية د جّاپون حتا ف پيرو، لارجنتين، ؤسطراليا (خصوصا لولايات د شّرق)، كاندا، (خصوصا ف ڤانكوڤر لّي 1.4 من سكّان ديالها لأصل ديالهوم جاپّوني)، ميريكان (خصوصا ف هاواي، لّي 16.7 من سكّان ديالها لأصل ديالهوم جاپّوني، ؤ كاليفورنيا)، ؤ لفيليپين (شوية من لمنطقة ديال داڤاو ؤ لجهة د لاڭونا).

جاپّونية ماشي رسمية ف تّا دولة، ولكن هي لّغة د لبلاد لّي معمول بيها ف جاپّون. كاينة لفورمة سطوندار ديال جّاپونية: هيوجونڭو (標準語)، زعما جّاپونية سطوندار، ولّا كيوتسوڭو (共通語)، زعما لّغة لعامّية. تقريبا هاد لكلمات بجوج عندهوم نفس لمعنى. هاد لّغة تولدات مورا لإصلاح د ميجي (明治維新، مِيْجِي إشين، 1868) من لّغة لّي كانو كايهدرو بيها لبلايص ديال طّبقة لعاليا ف طوكيو (يامانوطي). هيوجونڭو كاتّقرّا ف لمدارس ؤ كاتستعمل ف تّلفازة ؤ ف تّواصل رّسمي. ؤ هي جّاپونية لّي داويين عليها ف هاد لارتيكل.

كانت لكتابة سطوندار د جّاپونية (文語، بونڭو، لّغة لحرفية) مبدّلة على لعامّية (口語، كوڭو). هاد سّيسطيمات بجوج كان عندهوم تّراكيب مبدّل ؤ حتا شي ختيلاف ف لكلمات. بونڭو كانت هي طّريقة لأساسية د لكتابة ب جّاپونية حتال جوايه 1900؛ من تمّا كوڭو بدات كاتعطي تأتير بشّوية بشوية ؤ بقاو كايتستاعملو سيسطيمات بجوج حتال رّبعينات د لقرن لّي فات. بونڭو باقي كايحتاجوها نّاس د لآداب، لمؤرّخين ؤ حتا لمحاميين ؤ نّاس د لقانون (بزاف د لقوانين د جّاپون لّي باقا من قبل لحرب لعالمية تّانية مازالا مكتوبة ب لـ بونڭو، واخّا كايدّارو مجهودات باش يردّوهوم مكتوبين ب لغة موديرن). كوڭو هي طّريقة د لكتابة ؤ لهدرة لّي خدّامة بيها جّاپونية د ليوم، واخّا هاكّاك تّراكيب ؤ لكلمات ديال ل بونڭو كايتستاعملو مرة مرة ف جّاپونية لموديرن.

كاينين بزاف د لّهجات ف جّاپون. هادشّي راجع ل بزاف د لعوامل، بحال طّول د لمدة لّي تسكن فيها لأرخبيل د جّاپون، كترة جّبال ف لجزر ديالو، ؤ تّاريخ طّويل ديال لعزل دّاخلي ؤ لخارجي د جّاپون.

أهمّ ختيلاف ف لّهجات د جّاپون هي لّي كاين ما بين لفورمة ديال طوكيو (東京式، طوكيو-شيكي) ؤ لفورمة د كيوطو-ؤساكا (京 式، كيْهان-شيكي). لّي كل وحدة ف هاد جّوج حتا هي فيها أنواع. لّهجات ديال لفورمة د كيوطو-ؤساكا كاينين ف لمنطقة لوسطانية، لّي مكوّنة من كانساي، شيكوكو، ؤ لمناطق لغربية ديال هوكوريكو.

لّهجات ديال لمناطق لّي جاو ف لقنات، بحال طوهوكو ولّا كاڭوشيما، يقدرو ڭاع ما يفهموهم نّاس لّي من لبلايص لوخرا د لبلاد.

كاينين شي جزر د لّغات ف لڤيلاجات لّي ف جّبال ولّا ف لجزر لمهجورة بحال لجزيرة د هاتشيجو-جيما لّي لّهجات ديالها جايّة من لّهجات شّرقية د جّاپونية لقديمة. لّهجات ديال لمنطقة د كانساي معروفين ولّا كايهدرو بيهوم بزاف د جّاپونيين، ؤ لّهجة د ؤساكا بضّبط مرتابطة ب لكوميديا. لّهجات ديال طوهوكو ؤ شّمال د كانطو مرتابطين ب لفلّاحة.

لّغات ريوكيوانية لّي كايهدرو بيهوم ف ؤكيناوا ؤ لجزر د أمامي (لي راهوم جزء من كاڭوشيما)، مبدّلين بشكل كافي باش يتحسبو برونش بوحدها ف لعائلة د لّغات جاپّونيكية؛ حيت ماشي غير مامفهومينش لنّاس لّي كايهدرو ب جّاپونية، ولكن مامفهومينش حتا لّي كايهدرو ب لّغات رّيوكيوانية لخرا. وخّا هكاك، بزاف د نّاس كايعتابرو هاد لّغات ريوكيانية لهجات د جّاپونية. نّاس لّي كايهدرو لّغات رّيوكيوانية هوما نّاس لكبار لّي لعدد ديالهوم غادي ؤ كاينقص، حتا ليونيسكو كلاساتهوم مهدَّدين، حيت يقدرو مايبقاوش ف 2050. ؤ نّاس صّغار ف لعمر كايستاعملو غير جّاپونية ؤ ماكايفهموش لّغات ريوكيوانية. جّاپونية د ؤكيناوان جايّة من جّاپونية سّطوندار ؤ متأترا ب لّغات ريوكيوانية. ؤ هي لّهجة لّي كايهدرو بيها نّاس صّغار ف لجزر د ريوكيو.

جّاپونية لموديرن ولّات طاغية ف ڭاع لبلاد (حتا ف لجزر د ريوكيو) بسباب تّعليم، لميديا، ؤ لرتيفاع ديال تّنقل ف جّاپون، ؤ حتا لإدماج ليقتيصادي.

جّاپونية من لعائلة د لّغات جّاپونيكية، لّي فيها حتا لّغات لّي كاينين ف لجزر د ريوكيو. حيت هاد لّغات قراب لبعضياتهوم، غالبا كايتعاملو معاهوم علا أساس لهجات ديال لغة وحدة، جّاپونية كاتعتابر غالبا لغة معزولة.

علا حساب مارتين إيرما روبيتس، كانت بزاف د لمحاولات باش يبيّنو لعلاقة د جّاپونية مع لغات وحداخرا ف لعالم.

لهتيمام د لعلماء د لّسانيات ب جّاپونية بدا ف لّخر د لقرن 19، من ديك سّاعة شي محاولات دّارو باش يشوفو لعلاقة د جاپونية ب لغات اخرا ولّا عائلة د لّغات بحال متلا أينو، لكورية، شّينوية، تّيبيتية-لبورمية، لؤرالية-لألطائية، لألطائية، لؤرالية، لأسترو-أسيوية، لمالايو-پولينيزية ؤ ريوكيوانية. غير بزّز، شي علماء د لّسانيات قتارحو يربطوها مع لّغات لهندية-لؤروپية، ولكن ف لّخر غير ربط مع رّيوكيوانية لّي كان عندها دعم كبير.

نّضريات جديدة كاتحاول تربط جّاپونية من جهة ب لّغات د شمال آسيا، بحال لكورية ولّا لعائلة لكبيرة د لّغات لألطائية، ؤ من جهة اخرا ب شي لغات د لجنوب شّرقي د آسيا، خصوصا لؤسطرالونيزية. حتا وحدا من هاد لقتيراحات ما كان عندها قبول كبير، ؤ لّغات لالطائية براسهوم باقي عليهوم لهضرا.

نضريات اخرا كاتشوف جاپونية يا إمّا واحد لّغة كريولية قديمة بانت ب تأتير ديال عل لأقل د شي جوج لغات مبدلين علا بعضياتهوم ولّا جوج مجموعة د لّغات، ولّا لغة بوحدها مختالفة لّي تأترات ب لّغات لّي حداها.

ؤ دابا، جّاپونية مصنفة مع لّغات جّاپونيكية ولّا لغة معزولة، بلا مامعروف واش رّيوكيوانية محسوبة لهجة ولّا لّا.

لكتابة بانت ف جّاپون على شكل د سيسطيم د لكتابة د شّينوية، من عند بايكجي قبل لقرن لخامس. لملك د جاپبون بو كان كتب عريضة ل لإمبراطور شون د صونڭ ف عام 478. مورا لإنهيار د بايكجي، جّاپون عرضات علا لمختصّين شّناوا يجيو باش تعلّم كتار على سيسطيم د لكتابة د شّينوية. لأباطرة د جّاپون رسّمو لمختصّين شّناوا ؤ نشرو لستعمال د رّموز شّينوية من لقرن سّابع حتا لقرن تّامن.

ف لبدية، جّاپونية تكتبات ب شّينوية لكلاسيكية، ؤ سّميات جّاپونية تكتبو برّموز لّي عندهوم نفس لمعنى مع سّمية ماشي لّي كايتنطقو بحالها. من بعد ف لقرن سّابع، جّاپونية كانت كاتّكتب ب رّمز علا حساب كيفاش كاتنطق، ؤ شي كلمات كانو مازالين كايتكتبو علا حساب لمعنى ماشي نّطق. من هنا بدات لكتابة ب جّاپبونية تمشي ف طريق بوحدو. ؤ فهاد لوقت، جّاپونية كانت ديجا مبدلة بزاف علا لّغات رّيوكيوانية لخرا.

مع لوقت، بان واحد سيسطيم د لكتابة جديد، رّموز شّينوية (لكانجي) كانو كايتستاعملو يا إما باش يتكتبو لكلمات لّي موخودين من شّينوية، ولا لكلمات جّاپونية لّي عندهوم معني قريب ولّا هو نّيت. ؤ كان كايتّكتب ب هاد رّموز حتا لعناصر ديال تّراكيب، لّي من بعد تبسّطو ؤ ولّاو كلمات صغار: هيراڭانا ؤ كاطاكانا لّي بازاوهوم علا لمانيوڭانا من بايكجي. ولكن هاد لفتيراض د مانيوڭانا من بايكجي كايرفضوه شي مختصّين.

لهيراڭانا ؤ لكاطاكانا ف لّول تبسطو من لكانجي، ؤ لهيراڭانا ف جوايه لقرن تّاسع كانو كايتبو بيهوم لعيالات. لهيراڭانا كانت كاتعتابر كتابة ماشي رسمية، ؤ لكانجي ؤ لكاطاكانا كانو كايتعتابرو رسميين كتر، كانو كاكتبو بيهوم رّجال ؤ ف لحاجات رّسمية. ولكن لهيراڭانا من بعد ف لقرن 10، ولّا كلشي كايكتب بيها.

جّاپونية ديال ديال دابا كاتكاتب ب تّخليطة ديالهوم ب تلاتة: لكانجي، لّي جاي من رّموز شّينوية كايتكتبو بيهوم لكلمات لّي موخودين من شّينوية ؤ عدد ديال لمورفيمات لّي أصلا جاپونية؛ ؤ لهيراڭانا ؤ لكاطاكانا.

لكتبة لّاتينية (ب جّاپونية: روماجي) كايتستخدم مرة مرة، بحال لختيصارات لّي جايّين من برّا ولّا باش يعرفو نّاس لّي ماكايهدروش ب جّاپونية كيفاش كاتنطق شي كلمة. لأرقام د لعربية كايتخدّمو كتار من لكانجي بزاف ف لحساب، ولكن لأرقام د لكانجي باقي كايتستاعملو فلكلمات لمركّبة، بحال متلا 統一 طويتسو (تّيحاد).

تاريخيا، لمحاولات باش ينقصو لعدد د لكانجي بداو ف وسط لقرن 19، ولكن هادشي ماتدخلاتش فيه لحكومة حتا خسرات جّاپون ف لحرب لعالمية تّانية. ف لوقيتة مور لحرب، تقتارح يتحيّد لكانجي ڭاع ؤ يتّكتب غير ب رّوماجي. ولكن لقتيراح د جويو كانجي (لكانجي لمتداول بزاف) دّار بيه كـ حل وسط.

تّلاميد جّاپونيين كايبداو يتعلّمو لكانجي من لبيت لّول ف لپتيدائي. لوزارة ديال تّعليم د جّاپون دايرة واحد دّليل د لإرشاد، لّيسطة ديال لكيوئكو كانجي (لكانجي تّعليمي)، فيه 1006 ديال رّموز لبساط لّي خص تّلميد يكون تعلّمهوم ملّي يسالي بيت سّادس. دّراري صّغار كايقراو 1130 رمز وحداخر ف لإعدادي، باش يكون كمّلو 2136 جويو كانجي. لّيسطة رّسمية ديال جويو كانجي تراجعات شي مرات، ولكن لعدد ديال رموز بقا هو هاداك.

أمّا بنّسبة لـ كانجي لّي كايتستخدم ف لكتابة د سّميات، لقضية شوية معقدة، جويو كانجي ؤ جينمييو كانجي (زيادة د رموز اخرا لـ سّميات) معتارفين بيهوم ف تّسجيل د سّميات. سّميات لّي فيهوم شي رموز ڭاع ما معترف بيها ماكايتقبلوش ف تّسجيل. ولكن لّيسطة د جويو كانجي، لمعايير ديال لقبول غالبا تعسفية ؤ ردّات بزاف د رّموز لمتداولة ؤ شّائعة أنها ترفض. تحت ضّغط د نّاس ؤ متابعة قضائية، لّيسطة ديال جينمييو كانجي تزادت من 92 ف 1951 لـ 983 ف 2004.

لهيراڭانا كايتكتبو بيهوم لكلمات لّي ماعندهوم حتا كتبة ب لكانجي، ؤ لـ كلمات لّي مابقاوش كايتكتبو ب لكانجي، ؤ مورا لكانجي باش يبيّنو تّصريف د لكلمة. حيت طّريقة باش لأفعال (ؤ صِّفات) كايتصرّفو ف جّاپونية، لكانجي بوحدو ماكافيش باش تعبّر على تّصريف، حيت لكانجي مايمكنش تبدّل طّريقة د لكتابة ديالو بلا مايتبدّليه لمعنى. هاد طّريقة د ليستيخدام ديال لهيراڭانا كاتسمّى ؤكوريڭانا.

لهيراڭانا تقدر تلقاها مكتوبة كتبة صغيورة فوق ولّا حدا لكانجي باش تورّي طريقة صّحيحة باش كايتّقرا، هاد لّعيبة سميتها فوريڭانا. ؤ كاتدّار باش تسهّل تّعليم، ؤ باش توضّح لكتابة لّي قديمة ولّا مامفهوماش (ولّا بعض لمرّات مصاوبة).

لكاطاكانا، كايكتبو بيهوم لكلمات لبرّانية، سّميات د نّباتات ؤ لحيوانات، ولّا لتّوكيد.

متلا، ؤسطراليا لّي هي ؤوسوطوراريا (オーストラリア)، ؤ سوپّيرمارشي لّي هي سوپّا (スーパー).




#Article 386: أدولف هيطلر (240 words)


أدولف هيطلر (بلألمانية: Adolf Hitler) (تولد ف 20 أبريل 1889 ف باناو آم إين - نتاحر ف 30 أبريل 1945 ف برلين) كان سياسي ألماني و لقايد ولمؤسس ديال لحزب د لعمًال لألماني ليشتيراكي، اللي معروف تا بسميت لحزب النازي. هيطلر حكم ألمانيا ما بين 1933 و 1945 وكانت لمناصب ديالو هي مستشار الدولة (1933 - 1945) و لقايد (فوهرر 1934 -1945). ختارتو لمجلة ديال التايم واحد ما بين 100 د الناس اللي خلاو أكبر أثر فالتاريخ د بنادم فلقرن لعشرين.

شارك هيطلر مع ألمانيا فلحرب لعالمية اللًولا وخدا عليها أوسمة. ف 1920 دخل للحزب النًازي و ولاً الشاف ديالو ف 1921. ف 1923 دار محاولة د لينقيلاب اللي مانجحاتش ودخل موراها للحبس. مورا ما خرج من لحبس لقا راسو ولاً معروف و بزاف د الناس تيشجعوه وتاتعجبهم لأفكار ديالو.

ف 1933، ربح هيطلر لينتيخابات و ولاً لمستشار د ألمانيا و دار سياسة شمولية ودكتاتورية وفاشية. ف 1939، هاجمات ألمانيا اللي حاكمها هيطلر على پًولونيا، وبدات لحرب لعالمية التانية. فاللول د لحرب، حتلات ألمانيا تقريبا أوروپا كاملة و بزاف د لأراضي فإفريقيا و آسيا، و التلت د لأراضي د ليتيحاد السوڤياتي. ولكن الدول د لحلفاء أترجع و هي اللي أتربح لحرب. من مورا ما خسرات ألمانيا لحرب، نتاحر هيطلر ومراتو نهار 30 أبريل 1945 وتحرقات لجتة ديالو فبرلين.

لأغلبية د الناس فلعالم تيعتابرو هيطلر و داكشي اللي دار خايبين وماشي أخلاقيين. تيتعتابر واحد من اللي تسببو فلموت د عدد كبير د الناس مدنيين و عسكر فلوقت د لحرب لعالمية التانية.




#Article 387: جهة الداخلة وادي الذهب (431 words)


جهة الداخلة وادي الذهب (بلأمازيغية: ⵜⴰⵙⴳⴰ ⵏ ⴷⴰⵅⵍⴰ ⴰⵙⵉⴼ ⵏ ⵡⵓⵔⵖ، بالفرانساوية: Dakhla-Oued Eddahab) وحدة من لجيهات ديال لمغريب اللي تصايبو عام 2015، من مورا ما نقصو عدد لجيهات من 16 لـ 12. لجيهة كاينة فأقصى لجانوب ديال البلاد، و لعاصيمة ديالها هي الداخلة، و مابين لمدون اللي كاينين فلجيهة: إيمليلي وتيشلا وأوسرد ولعرگوب وأم ضرايگا وبيرانزاران. عدد السكان على حساب لإحصاء اللي تدار فـ2014 وصل فهاد لجيهة لـ142,955. لميساحة ديال لجيهة هي 130,898 كم².

كتكون لجهة ديال الداخلة وادي الذهب من جوج ديال لأقاليم: إقليم وادي الذهب، و إقليم أوسرد. هاد لجدوال كايبين لأقاليم ديال لجيهة والسكان ديالها:

على حساب إحصاء 2004 كان ساكن ف لجهة 99.367 نسمة، ولكن ف آخر إحصاء لي دّار ف 2014 ولا عدد سّكان 142.955 نسمة.

جهة الداخلة وادي الذهب محاديها من الشمال جهة العيون الساقية الحمراء ومن لجانوب والشرق بلاد موريطانيا ومن لغرب لمحيط لأطلسي. هاد لجيهة فيها بزاف ديال لخصائص لجغرافية بحال أنه دايز منها ويدان ناشفين كيعمرو فاش كاتطيح الشتا لموسمية وسهول وسهوب صحراوية. كاينة سلسلة جبلية صغيرة فلطول وليرتيفاع دايزة فالشرق ديال لجيهة قريب من گلتة زمور. لميساحة ديال لجيهة واصلة لـ130,898 كم². هاد لجدوال كيعطي لمعلومات على لحرارة والشتا فمدينة الداخلة اللي هي لعاصيمة ديال لجيهة.

مطار الداخلة الدولي هو مطار كاين فمدينة الداخلة وكايسيرڤي لجيهة ديال الداخلة وادي الذهب. جا لمطار تقريبا حدا الصونطرڤيل ديال الداخلة. كيتعتابر تامن أكبر مطار فلمغريب من ناحية عدد لمسافرين، وكايقدر يهز 300.000 مسافر.

لدابا ماكاينيش أوطوروطات اللي كايديو أولا كايدوزو من جيهة الداخلة وادي الذهب، ولاكين دايزين طرقان وطنية واصلة لدرجة الطرقان السريعة، بحال الطريق لوطنية 1، وكاينة طرقان وطنية عادية بحال الطريق لوطنية 3 اللي شادّة مابين لعرگوب وأگوينيت ودايزة من أوسرد، أولا الطريق لوطنية 17 بالتفروعات ديالها فميجيك وأگوينيت.

النشاط الرعوي هو الشي لفلاحي اللي معروف فجيهة الداخلة وادي الذهب، حيتاش هاد لجيهة فيها لموناخ الصحراوي. كاينة مبادارات كتشجعها الدولة ولمستثميرين باش تصلح لأراضي اللي كاينة قريبة من لبحر، وليوم لجيهة فيها زيراعة ديال الدلاح بـ20 ألف طن فلعام وماطيشا سوريز بـ66 ألف طن. هادشي كامل من غير لينتاج ديال لحوت ولموارد السمكية ديال لجيهة، حيتاش عندها بحر الطول ديالو واصل لـ667 كيلوميتر. لإنتاج ديال لجيهة من تربية لأحياء ديال لبحر وصل لـ60% من لينتاج ديال لبلاد، بليمارة 50 مليون محارة و10 دلمليون ديال لميعة دوروپا تربّات فهاد لجيهة.

فجيهة الداخلة وادي الذهب كاينة واحد لقاعيدة صيناعية متوسطة. لجيهة كاتخطط باش تصاوب منطقة صيناعية فلعاصيمة ديالها، واللي غاتكون تابعة للمخطط ديال لمرسى لاطلسي الجديد.

لقطاع ديال السياحة كايعطي قيمة كبيرة للناتج ديال لجيهة، اللي كاتوفر بزاف ديال لمقومات بحال لخيام وسط الرملة ديال الصحرا والرياضة ديال لبحر وحتى اليوݣا فالطبيعة. لجيهة ستاقبلات بزاف ديال التضاهورات بحال كرانس مونتانا ومهرجان لموضة لافريقية.




#Article 388: زيمبومباح (655 words)


زيمبومباح ؤلا زبح ؤلا زينبومباح ؤلا زديمبومباح ؤلا زدينبونباح (ب لعربية: ورقة-حجر-مقص) هي واحد اللعبة كاتلعب ب اليدّين، غالبا كايلعبوها جوج د الناس بيناتهوم، اللي بجوجهوم (ولّا شحال مّا كانو) كايديرو فدقّة وحدة شي فورمة من تلاتة د الفورمات ب يدّيهوم. هاد الفورمات هوما حجرة (علا شكل بّونية)، ورقة (علا شكل يد مسرّحة) ولّا مقص (بحالا داير بيدّك رقم جوج)، غير هوما كادّيرهوم ؤ يدّك ناعسة، ماشي واقفة ولّا مهزوزة ف السما. هي واحد اللعبة ديال دقة وحدة، ؤ د المجموع زيرو، اللي فيها غير جوج نتائج: يا إما تعادل، ولّا واحد كايربح و لاخر كايخسر.

إيلا شي واحد فيهوم عزل يدير حجرة كايغلب لاخر إلا عزل يدير مقص (كانڭولو الحجرة هرّسات المقص)، ولّا كايخسر إلا لاخر عزل يدير ورقة (كانڭولو الورقة غطّات الحجرة)؛ ؤ إيلا شي واحد عزل يدير ورقة كايخسر إيلا لاخر عزل يدير مقص (كانڭولو المقص قطّع الورقة). ؤ إيلا بجوجهوم عزلو نفس الحاجة كايكونو تعادلو، ؤ غالبا ديك سّاعة كايعاودو يلعبو عاوتاني حتا كايربح شيواحد.

بحال التاج ولّا راس، ولّا ضريب العود، كايلعبو الناس الزيمبومباح غالبا إيلا ماتّافقوش علا شي حاجة ؤ اللي ربح كايختار. ولّا بعض المرّات كايلعبوها بّوحدها ؤ صافي. الزيمبومباح ماشي بحال الطرق د العزيل الزهراوية لخرا، حيت تقدر تقلّع ؤ تعيق ب شنو غايدير اللي ضدك من التصرّفات ديالو.

هاد لكلمة ف دّاريجة غالبا مركبة من  ڭزم (بمعنى قطّع) + بون (من بونية) + ؤ باح (بمعنى والو، لخوا).

اللي لاعبين قبل ما كايديرو ب يدّيهوم الفورمة اللي ختارو، يا إما كايحسبو واحد جوج تلاتة ب الجّهد ولّا كايڭولو سّمية د اللعبة (زيمبومباح، ولّا الزبح)، باش يورّيو ف دقّة يدّيهوم. بعض المرّات كايلعبوها ب السكات إيلا كانو متأكّدين غايورّيو يدّهوم ف دقّة. ملّي كايبغيو يورّيو يدّيهوم (ب الفورمة لّي عزلو)، كايسيفطوها جيهت هاداك اللي لاعب ضدّهوم، ديك الساعة بجوج كايشوفو ف دقّة شنو عزل لاخر، ؤ كايعرفو النتيجة.

أوّل بلاصة تدكر فيها الزيمبومباح كان الكتاب ووزازو ديال الكاتب سيي تجاوتجي اللي كان ف الوقيتة ديال سلالة مينڭ، اللي كتب بلّي هاد اللعبة من الوقيتة د سلالة هان. ف هاد الكتاب اللعبة كان سميتها شوشيلينڭ (手勢令).

مدكور بزّاف د المرّات ف التاريخ د الجاپون سانسوكومي-كين (三すくみ拳)، زعما اللُعاب د كين (بّونية)، سانسوكومي (تّلاتة اللي خايفين من بعضيّاتهوم). هاد النوع د اللعاب كانو بانو ف الشينوا ؤ من بعد خداوهوم الجاپون ؤ ولّاو شعبيين عندهوم.

أقدم لعبة جاپونية د سانسوكومي-كين كانت معروفة ب موشي-كين (虫拳)، كانو جابوها من الشينوا. ف هاد موشي-كين الجرانة (ب الصبع الكبير) كاتغلب الببّوشة (ب الصبع الصغير)، اللي كاتغلب الحنش (ب الصبع ديال التسبيح)، اللي كايغلب الجرانة. واخا هاد اللعبة جايّة من الشينوا، الحيوانات اللي ف الڤيرسيون الجاپونية مبدّلين علا الحيوانات الدوريجين.

أشهر لعبة د سانسوكومي-كين ف الجاپون كانت هي كيتسوني-كين (狐拳)، ف هاد اللعبة، واحد التّعلب خارق سميتو كيتسوني (狐) كايغلب شيخ الدوار، شيخ الدوار (庄屋) كايغلب الصياد، ؤ الصياد (猟師) كايغلب التعلب. هاد كيتسوني-كين باش مبدلة علا الزيمبومباح ولّا موشي-كين، الفورمات ديالها كايدّارو بجوج يدّين ماشي غير وحدة.

اليوم، أكتر سانسوكومي-كين معروف هو جان-كين (じゃんけん)، اللي جاي من شّينوا ف القرن 17، جان-كين فيها حجرة، ورقة، مقص. ؤ هي اللي جايّة منّها الزيمبومباح اللي كاينة ف العالم دابا.

مايمكنش تعيق بشي واحد إيلا كان كايلوح يدّو غي عالله، ولكن تقدر تقلّع الفورمة اللي غايعزل إلا العزلة ديالو ماكانتش غير زهراوية، ديك الساعة تقدر تّاخد عليه أڤونطاج، أصلا، بنادم كايميل ل أنّو مايلوحش يدّو غير ب زّهر.

ف التورنوّات، شي لعّابا كايديرو شي حوايج باش يتلّفو ولّا يقولبو لّي ضدّهوم، بحال متلا يڭولو السمية د شي فورمة ب الغوات ؤ يديرو بيدّيهوم فورمة وحداخا ؤ لاخر كايتلف.

الفورمة د الحجرة، معا هي غير بّونية - اللي غالبا اللعّابا ملّي كايكونو كايحسبو باش يعزلو شي فورمة كايكونو جامعين يدّهوم علا شكل بّونية - إلا بغيتي تقلّع واش هاداك اللي ضدّك غادي يعزل الحجرة خصّك ب الزربة ملّي تكونو كاتلوحو يدّيكوم، شوف واش كايحرك صباعو باش يبدّل الفورمة ديال يدّو، إلا ما تحركوش راه غالبا غايلعب ب الحجرة، حيت الورقة ؤ المقص بجوجهوم كايخص تبدّل الفورمة د يدّك باش دّيرهوم. غير هو يقدر يبغي يقولبك ؤ يخلّي يدّو مجموعة حتا لـ آخر لحضة ممكنة.

__لصق_فهرس__
__فهرسة__




#Article 389: قرآن (126 words)


لقرآن ولّا القرَاناللي كيتسما تا لقرآن لكريم، هو لكتاب لمقدًس فالدين د لإسلام. بالنسبة للمسلمين، لقرآن هو لكلام ديال الله اللي نزل على الرسول محمد، واللي فرًقه على الناس كاملين. فلإسلام تيتعتابر لقرآن هو آخر كتاب سماوي مورا الصحف د براهيم والزابور والتوارة ولإنجيل. تيآمنو لمسلمين باللي لقرآن معجزة د النبي محمد حيت تيتحدا ڭاع الناس باش يجيبو شي حاجة بحالو من الناحية د لبلاغة ولفصاحة.

لقرآن هو أقدم كتاب مكتوب بلعربية، وتيتعتابر هو الساس د لقواعد د لعربية ولبلاغة ديالها. فيه 114 سورة مقسومة ما بين مكية ومدنية. بقا الوحي د لقرآن 23 عام كان النبي محمد تيعاود فيها كل شوية على لآيات الجداد. تجمع لقرآن مورا ما مات النبي من الصحابة اللي كانوا تابعينو، وهوما اللي نضًمو الترتيب والسميات د لآيات اللي كانعرفو دابا.




#Article 390: إسلام (168 words)


لإسلام ولاً ليسلام، هو واحد الدين براهيمي، أو كيما كايسميوه لي كايهدرو بلعربية سماوي، توحيدي، تيقول باللي كاين إله واحد فلعالم هو الله، و عندو رسول ديالو هو محمد. لإسلام هو تاني أكبر دين فلعالم من حيت شحال من واحد متبًعو، واللي عددهم 1.8 مليار د الناس (24.1% من السكان د لعالم). الناس اللي متبعين لإسلام تيتسمًاو مسلمين، وهوما أغلبية د السكان ف 49 بلاد. لكتاب لمقدًس فلإسلام هو لقرآن، و اللي تيآمنو لمسلمين باللي هو لهضرة د الله اللي تنزلات على النبي باش يقولها للناس.

بدا لإسلام فلقرن 7 ميلادي فمكة، و معا لقرن 8 ميلادي، لخلافة لأموية توسعات من إيبيريا ولا لأندلس فلغرب تال واد السند فشّرق. لعصر ذّهبي د لإسلام كايشير لواحد لحقبة لي تقليديا كاتبدا من لقرن 8 للقرن 13 ميلادي، فلوقيتة د لخلافة لعبّاسية، منين كان لأغلبية د لعالم لي تاريخيا كان إسلامي كان كايعيش ازدهار علمي واقتصادي وثقافي.

لإسلام عنده خمس اركان؛ و اللي هما: الشهادة و الصلا و الزكا و صوم رمضان و الحج (اِلا كانت عند الواحد الصحة والفلوس ليه).




#Article 391: مسيحية (121 words)


لمسيحية هو واحد الدين ابراهيمي توحيدي الساس ديالو هو لعيشة وداكشي اللي علًمو ليسوع، حسب ما تفسّر من لعهد لجديد. لكتاب لمقدس فلمسيحية هو لكتاب لمقدس. لمنتمين، لي كايتعرفو بلمسيحيين، كايآمنو بلّي ليسوع هو لمسيح لي علنو عليه لأنبياء ديال لعهد لقديم. لإيمان بإعادة لبعث ديال ليسوع كاينا فلجوهر ديال لمسيحية حيت كاتعني لبداية ديال لأمل فواحد لحياة أبدية مافيهاش شّر.

لمسيحية هي أكبر دين فلعالم ومتبعها تقريبا 2.4 مليار د الناس، اللي هي التلت ديال الناس د لعالم. لمسيحية هي الدين د لأغلبية ف 126 بلاد فلعالم. الناس اللي متبعين هاد الدين كيتسمًاو لمسيحيين. تّسمية لي معروفة عند ناس لي كايهدرو بلعربية هي نصرانية، اولا بالدارجة دين النصارا. لمسيحية منتاشرة فلعالم كامل وعندها بزاف د لفروع بحال: لكاطوليكية، لأورطودوكسية، لپروطيسطانطية.




#Article 392: قنيطرة (101 words)


قنيطرة (كانت سميتها فعهد لحماية د فرانسا للمغريب پور ليوطي، ب لفرونصي Port Lyautey) هي مدينة مغربية، كتطل على لمحيط لأطلسي، بعيدة ب 40 كلم على العاصمة الرباط من جيهة الشمال.

لقنيطرة وحدة من أهم المدن د المملكة، ساكيننها تقريبا 400 الف دالبشار. بناوها الفرانصيس وبناو فيها ميريكان من بعد الحرب العالمية التانية قاعدة ديال المارينز (لاباز). مزال باقي فيها بزاف د لآتار ديال لفرانصيس وميريكان، متلا البيران و القهاوي والسينيمات واخا بزاف منهوم تهدمو وطلعو فبلاصتهم العمارات. ماشي بعيد من قصبة مهدية كاين القبر ديال الجندي المجهول.

لجماعة لحضرية د قنيطرة ساكنين فيها 423890 واحد، على حسب لإحصاء لعام 2014.




#Article 393: عيطة (124 words)


لعيطة هو فن مغريبي قديم كيتغنا فلعروبيات. تطوًر بزاف هاد لفن فلوقت د ليستسعمار لفرانساوي حيت كانوا تيخدًموه لفنانة باش يصيفطو معاني ضد ليستيعمار فلأغاني ديالهم.

لكلمة د لعيطة هي كلمة بالدارجة كاتخدًم ملي شي واحد تيبغي لاخرين يسمعوه (تيعيًط). تاتغنًا لموسيقا د لعيطة مع بزاف د لآلات بحال لكمانجة والطًر ولڭنبري، وعاد تيكون مغنًي ولا مغنًية اللي تيعيًطو ويغنًيو الشعر اللي يقدر يكون على بزاف د لمواضيع بحال لعيشة و لحب و الزين و الطبيعة و التاريخ و السياسة. الناس اللي تيغنًيو لعيطة تيتسمًاو شيوخ لا كانو رجال، و شيخات لا كانو عيالات.

لعيطة كاتًغنا بالدارجة وفيها بزاف د لأنواع على حساب لبلاصة اللي كاتغنا فيها. من بين لأنواع لمعروفين د لعيطة كاين:

من لمغنيين لمعروفين د لعيطة اللي دازو فتاريخ لمغريب كاين:




#Article 394: أندلسي (133 words)


لأندلسي ولا لموسيقى لأندلسية، ولاً لآلة هي واحد النوع د لموسيقا كلاسيكية بانت فلأندلس فلعصر لوسيط (ما بين لقرن 9 و 15) ودازت للدول لمغاربية مورا ما ستاقرًو لأندلسيين فيها. دابا لبلدان اللي معروفة بلأندلسي هي لمغريب و لجزائر و تونس و ليبيا.

فاللول كانت لموسيقى لأندلسية مجموعة فواحد لكتاب سميتو الديوان. الديوان كان مقسوم على 24 طرف كل واحد فيهم سميتو نوبة. ضاعو 13 نوبة مع لوقت، والناس اللي حافضو على هاد لموسيقا قدرو يوتقو غي 11 لنوبة، و هي نوبة رمل لماية، نوبة لماية، نوبة الرصد، نوبة رصد الديل، نوبة لحڭاز لكبير، نوبة لحجاز لمشرقي، نوبة عراق لعجم، نوبة لأصبهان، نوبة لعشاق، نوبة ليستيهلال، نوبة غريبة لحسين.

كل نوبة مقسومة لخمسة د لميزانات، اللي هي: لبسيط، لبطايحي، لقائم ونص، لقداًم و الدرج.

دازو بزاف د لفنانا معروفين ديال لأندلسي فالتاريخ. منهم:




#Article 395: معاهدة سًّلام لإماراتية لإسرائيلية (103 words)


معاهدة سَّلام لإماراتية لإسرائيلية هي معاهدة سلام تدارت مابين إسرائيل ولإمارات لعربية لمتحدة ف 13 غشت 2020، وغي غاتسنا هاد لإتفاقية، غاتولي لإمارات تالت دولة عربية من بعد مصر ف 1979 والأردن عام 1994 تاتوقع تيفاقية سلام مع إسرائيل، وحتا أول دولة خليجية عربية تديرها. لمعاهدة غاتخدم علا تسوية لعلاقات بين لبلدان بجوج. وعلا ما جا ف شروط لتِّفاق، إسرائيل غاتعلق لقتراح ديالها لضم غور لأردن ف ضفة لغربية.

إسرائيل كاتسمي هاد لمعاهدة تيفاقيات إبراهيم ولا تيفاقيات أڤراهام (ب لعبرية: הסכם אברהם)، كنسبة ل إبراهيم، بكونو شخصية مهمة ف لأديان سماوية لي منتاشرة ب لأكترية ف لعالم، ولي هي لإسلام، لمسيحية و ليهودية.




#Article 396: بوطولا 1 (130 words)


لبطولة لوطنية لحتيرافية هي تورنوا ديال كرة لقدم بين لفراقي ديال لمغريب. سميتو حتى لمجموعة لوطنية لحتيرافية وتأسسات رسميا فـ 1956، وعوضات لمسابقات وتورنوايات لي كانت بداتهم فرانسا فـ1916 والصبليون فـ1931 فلمغريب. كتعتابر بوطولا برو أحسن تورنوا فلبلاد، وفيه 16 فرقة كتلعب كل وحدة ضد لخرى جوج مرات فلألي والروتور. لفرقة لي جات مع نهاية التورنوا فالرتبة 15 و16 كتهبط لدوزيام سيري أولا بوطولا 2، وكايطلع منها، أي بوطولا 2، لي جا مكلاسي فالرتبة 1 و2، وهكدا كيتم تعويض لفرق كل عام بجوج فراقي جداد. لبطل ديال آخر دورة ولي هيا دورة 2019-2020 هو الرجاء البيضاوي، ولفرقة اللي كاتعتابر أكتر وحدة كتوج بلكاس ديال هاد التورنوا بواقع 20 كاس هي الوداد البيضاوي.

تدار تحديت لهاد لجدوال نهار: 7 يناير 2021

لبطولة ديال لمغريب واللي نضماتها الجامعة الملكية المغربية لكرة القدم:




#Article 397: بوطولا 2 (113 words)


بوطولا 2 أولا لبطولة لحتيرافية التانية هي تاني أعلى بطولة فلمغريب من ناحية لأهمية وكتنضمها الجامعة الملكية المغربية لكرة القدم، وكتعتبر أدنى بطولة فلمغريب من ناحية لإحتيرافية ديالتها. كتلعب لبوطولة على نضام لمنافسة على الترتيب، يعني لفرقة اللي تكلاصات اللولة والتانية كتطلع للبوطولة لحتيرافية اللولة، ولفرقة لي جات فالترتيب 15 أولا 16 كتنزل للقيسم لوطني لكبير دلهواة.

تأسسات هاد لبطولة على يد فرانسا فـ1916 تحت السمية ديال لقيسم شيبه الشرافي وبطولة لمغريب للتأهل حتى لعام 1956 ملي تولات الجامعة الملكية المغربية لكرة القدم زمام التسيير والتنضيم ديالها، بعدما تنضم كأس ليستيقلال لي عزل لفراقي على حساب اللعب ديالها إما فلقيسم اللول أولا التاني.

هادو هوما لفراقي اللي مشاركين فلبوطولا برو 2 موسم 2020-2021: 




#Article 398: طريقة د لفروق لمنتهية (140 words)


فتَّحليل لعددي، طريقة لفروق لمنتهية هي تقطيعات كاتستعمل باش تحل لمعادلات تفاضلية من خلال تّقريب ديالهم بمعادلات لفروق، بحيت كاتكون لفروق لمنتهية كاتقرّب لمشتقَّات.

طريقة لفروق لمنتهية كاتحول معادلة تفاضلية عادية (م.ت.ع.) أولا معادلة تفاضلية جزئية (م.ت.ج.) لنظمة ديال لمعادلات لي ممكن يتحلو بطرق ديال جبر ديال لماتريس. تبسيط ديال لمعادلة تفاضلية لنظمة معادلات جبرية كاتخلي لمسألة ديال تقلاب علا حل ل (م.ت.ع.) أولا ل (م.ت.ج.) مناسبة للحواسيب، شيء لي خلا هاد طريقة هي لي خدامة لأكثرية ف تحليل لعددي لمعاصر.

فلول، نفتارضو بلي دالة لي باغين نقربو لشتقاق ديالها عادية، يعني متاصلة وقابلة لشتقاق شحال ما بغينا. يمكننا نصايبو واحد لمتسلسلة دطايلور بهاد شكل:

بحيت  هي لفاكتورييل د  و  هي لباقي، يعني هي لفرق مابين لبولينوم د طايلور بدرجة  ودالة لي بدينا بيها .

باش نخرجو واحد تقريب ديال لشتقاق لول ديال دالة ، غادي نقطعو لبولينوم د طايلور:




#Article 399: قيسم لهواة اللول (لمغريب) (101 words)


قيسم لهواة اللول أولا لقيسم الرابع هو المستوى الرابع من لهيكلة لهرمية ديال لبوطولات لكورية ف لمغريب والمستوى التاني من مستويات لهواة. قبل 2004، كانت هاد البطولة كاتسمى الرابطة لكروية للهواة 2، ومن موراها ولات كتسمى لمجموعة الرسمية لوطنية للهواة 2 حتى لـ2015 فاش تصاوب الدوري لوطني لكوروي للهواة. كيتكون هاد الدوري من جوج جداول ديال الترتيب، واحد ديال شطر الشمال وواحد ديال شطر لجانوب. من كل جدوال كتطلع فرقة للبوطولا لوطنية للهواة (لمجموع 2) وكيهبطو جوج فرقات لقيسم الهواة التاني (4 فلمجموع كيتفرقو على جداول الترتيب فلقيسم لخامس واللي لعدد ديالهوم 4).

لفراقي لي مشاركة هاد لموسم  ولمدون لي كيمتلوها:




#Article 400: روسية (118 words)


الروسية (بالروسية: русский язык) هي لغة سلاڤية شرقية. هي اللغة السلاڤية اللي تاتهضر بزاف ڭاع فلعالم. على حساب لإحصائيات د 2012، كاين تقريا 260 مليون د الناس فلعالم اللي تيهضرو الروسية، 150 مليون منهم هي اللغة لأم ديالهم، و 110 مليون تعلًموها لغة تانية.

الروسية لغة رسمية ف روسيا، بيلاروسيا، كازاخستان و كيرڭيستان، و تاتًهضر بزاف فبلدان خرا واخا ماشي رسمية فيها بحال أوكرانيا ولبلدان د آسيا لوسطانية و لقوقاز و لبلطيق. الروسية وحدا من اللغات الرسمية الستة ديال لأمم لمتحدة.

اللغة الروسية فيها 33 حرف، منهم جوج ماتيتنطقوش بوحدهم. لحروفا لاخرين كلهم فيهم لمينيسكيل و لماجيسكيل. لحرف اللول فلكلمة اللولا د كل جملة تيكون ديما ماجيسكيل. الروسية تاتكتب من ليمن ل ليصر، و من ل فوق لتحت.




#Article 401: يوبا تاني (889 words)


يوبا تّاني ؤلا يوبا لموري ؤلا جوبا (ب نڭليزية Juba ؤ ب لاتينية IVBA ؤلا IUBA)، هو يوبا بن يوبا (يوبا لّول) بن هيمبسال (تّاني) بن گوضا بن مستنبعل بن ماسّنيسا بن گايا بن زيلالسن، ماليك أمازيغي موري من أصل نوميدي حكم مملكة موريطانيا شي نص قرن تقريبا، و كان عالم مهم لدرجة أن شي كتّاب داروه من أفضل علماء الإغريق، و كيما گال ستيفن گسيل فيوبا شخصية مميزة ساهمات فيه بزاف تاع شّخصيات من شعوب مختلفة و عطاتنا شخصية يوبا المحبوبة، فهو أمازيغي الدم، إغريقي الهوية، روماني التربية، لموروث تاعو بوني، و ممكن نزيدو حتا مصري-مقدوني و حيت تزوج كيليوباطرا سيليني المصرية و ، و كيسميه گسيل الأفريقي الطيب .

تّاريخ زّيادة نتاع يوبا ممضبوطش مزيان ،ولكن كيتقدر بعام 50 قبل الميلاد، و هادشي حيت عارفين أن يوبا كان صغير بزاف فعام 46 قبل الميلاد، غاتكون عندو شي 5سنين أولا 7سنين فوسط فوضى الحرب.
و ملي كان لواليد تاعو يوبا لّول كيتقاتل مع جيوش الرومان بقيادة قيصر خلاّ لفاميلة نتاعو فمدينة زاما و مشا لّْحرب، ولكن مقدرش يرجع حيتاش ملي نهازم قدّام رّومان قرر ينتاحر، و ملي ربح قيصر الحرب و دخل لمدينة زاما، قلب على لفاميلة نتاع يوبا لّول ،و واخّا معرفناش آش دار بولاد يوبا لاخرين ولكن لّي كنعرفو هو أن قيصر خدا معاه يوبا الولد لروما و دوزو فموكب رّْباح لي تّْدار لقيصر.
ملي وصل يوبا وهو باقي غير دري للقصر فروما كان غير واحد من بزاف تاع دْراري لي كان أغلبهم مشارقة جابوهوم للقصر باش يزرعو فيهم روح المواطنة رُمانية باش يكونو واجدين لخدمة رّومان ملّي غادي يولّيو حكام لبلاداتهم الأصليين، و من بين العتقاء لي كانو فلقصر رّوماني كانت كيليوباطرا سيليني لي تربات مع يوبا فنفس لقصر و غادي تولي مراتو فالسنوات الجّايّا إلى جانب مراتو لوخرة گلافيرا .
يوبا ملي كان فلقصر كان أوكتاف هو لْمكلّف بتّربية تاعو و تهلّا فيه وعطاه سمية جديدة هي كايوس يوليوس Caius Julius و لكن هاد السمية غادي يحيدها يوبا ملّي غايولي ماليك و غادي يسمي راسو ريكس يوبا REX IVBA بمعنى: الملك يوبا.

دوز يوبا طفولة عامرة بالعلم و الفن و القيم، ولّا شبعان بتّقافة اليونانية و روح لمواطنة رّومانية، و تحت عينين أوكتاف تعلم يوبا اللغة الإغريقية و اللاتينية.

و ملي ولا يوبا فعمر 19 عام تقريبا، مشا مع أوكتاف للشرق فرْبيع تاع عام 31 ق.م و شارك فالحرب تماك فجنب رّومان ضد أنتوني و كيليوباطرا و رجع بعد تلت سنين تقريبا فشهر غشت من عام 29 ق.م.

و معروف بللّي يوبا أيضا شارك فلحرب لي وقعات فإسبانيا، فاش مشا مع الإمبراطور أغسطس و بقاو فإسبانيا عامين هوما عام 26 ق.م و 25 ق.م ، فاش حارب لعسكر رّوماني جيوش الآشتوريين و الكنطبريين ، ومن بعد ما كملات لحرب فإسبانيا، أغسطس عطا واحد الطرف من أرض الجيتول ليوبا باش يحكمها و هادشي باش يعوض ليه الأراضي لّي كان لواليد تاع يوبا حاكمها، و محبسش هنا و لكن بعد ما مات لماليك بوگود على يد أگريبا ، و حتا لماليك بوكوس الثاني مات بعدما وصى باش تْعطا المملكة الموريطانية -لي كانت شادّا أقصى توسع ليها- للرّومان، قرر الإمبراطور يعطي دوك جّوج ممالك ليوبا باش يحكمهم، وهكدا و هكدا و فالخريف تاع سنة 25 ق.م يوبا غادي يولّي ماليك رسمي على مملكة بوغود و مملكة بوكوس الثاني و مملكة يوبا لّول .

بعدما ولى يوبا هو لماليك نتاع رقعة جغرافية واسعة من شمال إفريقيا، كانت لحاجة لّولة لي دارها هي أنه يوحد قبايل موريطانيا من تحت دولة وحدة بضفتين لي هوما موريطانيا الطنجية ، و أحيانا خدم القوة باش يتمكن من إخضاع القبايل، و رجع شرشال هي عاصمة طّرف الشرقي من المملكة و وليلي هي عاصمة طّرف الغربي، و بشكل عام حكم من لبحر لبيض لمتوسط حتا تفوت جنوب-غرب الصويرة بشوية، و كان حاكم حتا شي طروفا من لارض تاع الگيتول و حتا شوية من لارض قبايل الأطولول، وهادشي كامل كان تحت لْحضية تاع رّومان.
من خلال لخريطة تاع أگريبا ، غادي نقدروا نجبدو واحد ليست تاع شي مدن موريطانية كانو معروفين عند الرومان و من المرجح أنهم كانو تحت حكم يوبا و لي منهم:

كان نظام كيشبه لتاع رّومان، كان يوبا هو لماليك لي عندو السلطة المطلقة، ولكن هادشي مكيمنعش أن الحكم كان ديمقراطي و تمثيلي-نيابي، بحيث كان مجلس بلدي كيتم لينتيخاب تاع الأعضاء من بين لمواطنين الأحرار و هكدا كل مجلس كيتكلف بتسيير مدينة وحدة.

مكاينش شك أن يوبا غادي يبني أقوى اقتصاد عرفاتو مملكة موريطانيا فگاع التاريخ نتاعها لّي كيرجع للنص لّول من الألفية لّولا قبل الميلاد، والدليل على هادشي هو عدد الفلوس لي سكْها يوبا و لي كيتعتابر عدد هائل مقارنة بالملوك السابقين، و كثرة سك الفلوس كاتعني بلي المملكة فهاد لوقيتة عرفات رخاء اقتصادي مهم، وكان يوبا كل عام كيعطي أوامر باش تتسك عملة جديدة فيها رقم الحكم لي وصل ليها، و أكبر رقم بينات عليه الكشوفات الأثرية بحال كنز بناصا هو 48، يعني أن يوبا على الأقل حكم لمدة 48 عام.
و بحكم لعلاقة صْحيحة لي كانت بين روما و شرشال و وليلي، فكانت موريطانيا هي المزود الرئيسي لروما ببزاف د المنتوجات منهم:

لا شك أن يوبا كان مشهور بالمؤلفات و البحوث العلمية لي دار، حيت كان عالم موسوعي ماخلا حتا علم مكتبش فيه، لدرجة أن المؤرخ بيلينيوس الأكبر گال عليه:

  لا شك أن شّوهرة نتاع يوبا كعالم فاتت شوهرة نتاعو كماليك 

،وكانو لكتّاب لي كانو فزمانو و لي بعد منو كيعتابروه من أعظم علماء الإغريق بحال المؤرخ بلوتارك ، واخا المؤلفات تاعو ضاعت للأسف و أغلب المؤرخين كيلوحو السبة على الحروب لي وقعات أثناء ثورة إيديمون بين الأمازيغ و الديكتاتور كاليگولا،ومن الإنجازات العلمية لي كنلقاو آثار تاعها فالكتابات الرومانية:




#Article 402: قيسم لهواة التاني (لمغريب) (122 words)


قيسم لهواة التاني أولا لقيسم الخامس هو المستوى الخامس من لهيكلة لهرمية ديال لبوطولات لكورية ف لمغريب والمستوى التاني من مستويات لهواة. قبل 2004، كانت هاد البطولة كاتسمى الرابطة لكروية للهواة 2، ومن موراها ولات كتسمى لمجموعة الرسمية لوطنية للهواة 2 حتى لـ2015 فاش تصاوب الدوري لوطني لكوروي للهواة. كيتكون هاد الدوري من ربعة ديال لجداول ديال الترتيب، واحد ديال شطر الشمال الشرقي وواحد ديال شطر الشمال لغربي، واحد ديال لجانوب وواحد ديال الصحرا. من كل جدوال كتطلع فرقة لقيسم لهواة اللول (لمجموع 4، جوج لشطر الشمال وجوج لشطر لجانوب) وكيهبطو جوج حتى لتلاتة دلفرقات لقيسم الهواة التالت (8 حتال 12 فلمجموع كيتفرقو على جداول الترتيب فلقيسم السادس واللي كيتفرقو على حساب لعصبة اللي كاتنتامي ليها لفرقة).

لفراقي لي مشاركة هاد لموسم:




#Article 403: پاو دونيس (258 words)


پاو دونيس (ب لكاطالان: Pau Donés Cirera)، خلاق ف بارسيلونا ف 11 أكتوبر 1966 و مات ف ليريدا ف 9 جوان 2020) مغني و گيطاريست و ملحن سپانيولي تشهر ب لگروپ لّي كان من لمؤسسين ديالو خارابي دي پالو.

پاو خلاق ف بارسيلونا و كان هو لكبير من بين خّوتو ب ربعة. فاش كانت عندو سطاش لعام نتاحرات لواليدة ديالو و صدماتو بزاف هاد لموصيبة و كان خاصو يتكلف ب خوتو صّغار. ما كانش عندو معا لقراية بزاف، كان كايعاني من مرض الديسليكسي (صّعوبة باش يقرا) و جراو عليه 6 د لمرات من لمدرسة.

قدر يضبّر على أول گيطار فاش كانت عندو 12 لعام و فاش دار 15 لعام أسس هو وخوه مارك گروپ سماوه Jay.  Company Band. بداو تايغينيو ف قاعات صغيرة ف بارسيلونا و نّواحي ديالها، پاو خدم بزّاف ديال لخدامي (سرباي، مانكان، مسؤول ف شركة د لإشهار) و عاوناتو لخدمة ديالو باش يضبّر لمصاريف ديال لگروپ و قدر يشري لماطريال باش يخدم (سينطيتيزور، بواط د ميكساج و گيطار إلكتريك).

قرا پاو ف لجاميعة د بارسيلونا و خدا لّيصونص ف لقتيصاد.

ف 1995، أسس لگروب خارابي دي پالو و لّي كان بدا ب نجاح عالمي ب أغنية لافلاكا لّي كتبها پاو على ود واحد لمرا لّي كان تعرف عليها ف كوبا.

ف لمجموع خارابي دي پالو صدرو 12 ألبوم بين 1996 و 2020.

پاو مرض ب كونسير د لكولون ف 2015 و بقا كايتضارب معاه حتا مات ف 9 جوان 2020.

كتب أوطوبيوگرافيا ديالو سماها 50 صدمة... و مازال كانحلم و نجحات ب شكل كبير بحيت باعت علاين 10 لاف نسخة ف سّيمانة لّولة باش خرجات.




#Article 404: موسوعة (133 words)


لموسوعة هي تّجميع د لمعارف، لّي يمكن يكون ف كتاب أو مجموعة د لكتوبة ب شّكل لورقي أو نيميريك، ب شكل منضم على حساب لمواضيع و ب طريقة كاتسهل لقراية د لمعلومات و تّفصيل ديالها ل نّاس كاملين.

من شحال هادي و لبشرية كاتحاول تجمّع لمعارف ديالها ف موسوعات و لمحاولات لّولة كانت من لعهد سّومري (4000 عام قبل لميلاد) بحيت كانو كايجمّعو و يكتبو لمعارف لّي عندهوم على لحيوانات و نّباتات ف لواح د لحجر مرتبين على حساب نّواع و لمواضيع. هاد لمفهوم ديال لموسوعة تطور مع تّطور ديال لكتابة و دّور ديال لعلم و لمعرفة ف تاريخ دّول و تحدّد شّكل ديالها ب صّورة لّي كانفهموها بيها دابا ف عصر لأنوار ف لقرن 18 فاش صدرات ف فرانسا لموسوعة ولا دّيكصيونير لعقلاني د لعولوم، لفونون و لخدامي بين 1751 و 1772.




#Article 405: جوزي ساراماڭو (268 words)


جوزي ساراماڭو (ب لبرتغالية: José Saramago)، خلاق ف 16 نونبر 1922 و توفا ف 18 جوان 2010، كاتب و أديب برطقيزي دّا جايزة نوبل د لأداب ف 1988. كايتعتابر من أهم لأدباء د لقرن لعشرين و من أشهر لأعمال ديالو العمى (1995) و انقطاعات الموت (2005) و قابيل (2009).

ساراماڭو قدر يفرض راسو ك أديب إنساني و موتقّاف فاعل ف لحياة سّياسية ف بلادو و ف لعالم، تميز ب لفهم لخاصّ ديالو ل تّاريخ و لأخلاق و تّقافة و ب لبصمة لجمالية لخاصة ديالو ف لكتابة لّي كا تثور على أشكال لكتابة تّقليدية ف لأدب.

جوزي ساراماڭو خلاق ف آزينياگا ف لبرطقيز و تحولات لعائيلة ديالو لواحد لمدة باش يعيشو ف لارجونتين قبل ما يرجعو يعيشو ف ليشبونة.

أو رواية ديالو نشرها ف 1947، و كانت سميتها أرض الذنب و كانت لقات تشجيع من عند نّقاد، واخا هاكاك ساراماگو ما نشر تا رواية من بعد منها ل مدة 20 عام، حيت خدم ف صّحافة و ب سباب لعضوية ديالو ف لحزب شّيوعي لبرطقيزي ما كانتش ظروف لبرتغال مزيانة من ناحية حرية النشر و صّحافة تحت لحكم دّيكتاتوري ديال سالازار.

شارك ساراماڭو ف ثورة لقرنفل لّي ردّات دّيموقراطية ل لبرتغال ف 1974.

كان أول أديب برتغالي كايفوز ب جايزة نوبل ف 1988 و تمنحات لي دّوكتورا لفخرية من عند بزّاف د لجامعات لمرموقة ف لعالم (طورينوّ، إشبيلية، مانشستر، كاستيا لامانشا، برازيليا).

ف 1992، تحدفات رّواية ديالو لإنجيل على حساب ليسوع لمسيح من لّيستا د رّوايات لّي مرشحين ف واحد لجائزة أدبية حكومية بسباب لمحتوى ديالها لّي عتابروه كايسيء ل دّين.

ساراماڭو دوز لعوام لخّرة د حياتو ف لجزيرة د لانثاروطي (ف جزر لكناري) مع رّفيقة ديالو پيلار ديل روبيو.




#Article 406: واد سبو (139 words)


واد سبو ،(بالشلحة:ⴰⵙⵉⴼ ⵏ ⵙⴱⵓ ولا ⴰⵙⵉⴼ ⵏ ⴳⵉⴳⵓ) واد مغريبي طّول ديالو 614 كلم  و لميساحة د لحوض لمائي ديالو  40000 كلم². لمنبع ديالو ف لأطلس لمتوسط ف إقليم تازة و كايصب ف لمحيط لأطلسي ف مهدية.

الطول دياله 614 كلم، و مياهه كاتجي من الريف (واد اللبن و واد اِناون، واد وارغةومن الاطلس ( واد ڭيڭو، واد زلوح، واد ميكاسمورا ما كايدوز من الدير الريفي، واد سبو كايوصل لسهل الغرب، فين كايتلقى مع واد بحت و مع واد الردوم.

كايوصل سبو للبحر الاطلسي حدا القنيطرة و المهدية، الديبي المتوسط دياله هو 137 م3/ت; فالشتا، كايوصل لاكبر ديبي فالعام (350 م3/ت)، و يقدر يوصل تال 6000 م3/ت فيامات الرعدة.

سبو واحد من اهم المجالب ديال الما فالمغرب؛ و واخا هكاك، كايتعتابر من اكتر الويدان وسخ فالجهة، علاحقاش كايتلاح فيه بزاف ديال المياه الموسخة ديال الديور و ديال الوزينات




#Article 407: نجيب لمختاري (115 words)


نجيب لمختاري (تولد نهار 3 يونيو 1981 ف طنجة) هو مهندس د لإتصالات و يوتوبر مغريبي معروف بلڤيديويات اللي تيدير على تبسيط لعلوم بالدارجة.

بدا نجيب لقناة ديالو د تبسيط لعلوم ف يوتوب ف فبراير 2015 و كان تينشر لڤيديويات اللي تيدير تا فالصفحة ديالو ف فيسبوك. ف 2016، ربح لجائزة د الشخصية د لعام ف النسخة التاسعة د لمسابقة د ماروك ويب أواردس التي تيربحو فيها أحسن صنًاع لمحتوى د أنترنت ف لمغريب.

داز نجيب لمختاري فبزاف د لإداعات و التلفازات ف لمغريب و فالدول اللي كيهضرو لعربية، و شارك فاللجان د التحكيم د بزاف د لمسابقات بحال لمسابقة د السباق إلى الفضاء اللي كيشاركو فيها شباب مغاربة باش يمشيو لمخيم مع النازا فميريكان.




#Article 408: مصطفى سوينڭا (142 words)


مصطفى الفكاك (إمينتانوت - 1986)، و اللي معروف ب سميت مصطفى سوينڭا، هو يوتوبر مغريبي، معروف بلبرنامج اللي كيدير ب دّارجة، و اللي سميتو أجي تفهم. ف 2014، ربح سوينڭا لجائزة د الشخصية د لعام ف النسخة السابعة د لمسابقة د ماروك ويب أواردس ف لفئة ديال لإبداع.

تولد مصطفى سوينڭا ف إيمينتانوت ف 1986، ولكن ملًي كان صغير رحلو دارهم للدار لبيضا وتمًا فين كبر تا خدا لباك و موراها الشهادة د تقني متخصص فلمعلوميات. خدم مصطفى عام و نص ولكن من بعد خرج من لخدمة حيت ماعجبوش لحال يبقا خدًام غي موظف و ماعندو تا أحلام.

مشا مصطفى ل سلا وتمًا قرا السيرك تلت سنين، و تخرًج فنان د السيرك مؤدي، ومخرج مسرحي متخصص ف السيرك.

بدا سوينڭا ف ليوتوب مع عبد الله أبو جاد، قبل ما يولًي تيخدم لراسو و دار لبرنامج ديال أجي تفهم و تا الشركة ديالو.




#Article 409: محمد عابد الجابري (654 words)


محمد عابد الجابري (خلاق ف فيگيگ ف 27 دجنبر 1935 و توفا ف 3 ماي 2010 ف دّار لبيضا)، كاتب و مفكر و فيلسوف مغريبي لّي كايتعتابر من سّميات لكبار د لفلسفة و لفكر ف لمغريب و لعالم لعربي. أهم لأعمال ديالو كانت على لفهم ديال كيفاش تكون لفكر و لعقل لعربي ديال دابا.

لجابري ولد لمنطقة د فيگيگ و ب ضّبط ف لمنطقة د زناگة. لواليدين ديالو كانو مطلقين و تربّا مع لواليدة ديالو و معا خوالو. عابد كبر ف عائيلة متدينة و عندها مع لقراية و طلب لعلم، حفض ثلث لقرآن ف لمسيد و تجوجات من بعد لواليدة ديالو ب شّيخ لّي كان كايقريه ف لمسيد. من بعد دخل لمدرسة بتيدائية فرانساوية دوز فيها غير عاماين قبل ما يحولوه عائيلتو ل مدرسة وطنية ف فيگيگ، حيت ف ديك لوقت كانو لّي كايقراو ف مدارس فرانساوية كايتعتابرو خونة. خدا لجابري شّهادة لبتيدائية ف 1949.

لجابري حكى من بعد أن داك لنتيقال من لمدرسة لفرنساوية ل لمدرسة لمغريبية ماركاه بزاف فحياتو و هو لّي حل عندو لباب ديال سوالات لحضارية و لفكرية و لمقارنات بين لختيارات لفكرية.

لجابري دخل ف شّباب ديالو ف لحركة لوطنية و كان ناشط ف خلايا ضد لحماية لفرانساوية ف لمنطقة ديالو.

من بعد ما شد لباك ديالو ف 1957، مشا لجابري ل ديمشق ف سوريا و قرا تما عام واحد خدا فيه واحد شّهادة سميتها الثقافة العامة. من بعد ما رجع ل لمغريب، تقيد ف لافاك د لآداب و لعولوم لإنسانية ديال جامعة محمد لخاميس ف رّباط، ف شعبة د لفلسفة.

بدا لخدمة ب لموازاة معا لقراية ف تّعليم، خدم معلم و من بعد أستاد و من بعد ناظر ديال ليسي ف 1962 و كان بين 1965 و 1967 مراقب و موجه تربوي ديال لأساتيدة د لفلسفة ف تّانوي.

و مشا مزيان ف قرايتو تا خدا ليصونص و DEA (شهادة الدراسات المعمقة) و دوكتورا دّولة ف 1970. لأطروحة ديالو كان لموضوع ديالها العصبية والدولة، معالم النظرية الخلدونية في التاريخ الإسلامي.

خدم من بعد أستاد ف نفس لكلّية (كلية الآداب - جامعة محمد الخامس - الرباط) ديال لفلسفة و لفكر لعربي لإسلامي بين 1.

لجابري كان عضو د لمجليس لوطني د حزب لتّيحاد لشتيراكي د لقوات شّعبية و كان عضو ل مدة طويلة ف لمكتب سياسي ديالو و كان من أهم لمنظرين لكبار ديال لحزب لّي كان عمود ديال لمعارضة يامات لحسن تّاني، مع سميات كبار خرين بحال محمد گسوس.

غير هو من تمانينات بدا كايرجع لّور و تفرغ كتر ل لمشروع لفكري ديالو و تّاليف و لبحت لعيلمي.

لجابري خدم بزاف ف صّحافة لمغريبية و لعربية. كتب ف جورنان العلم ديال حزب لستيقلال و ف جورنانات لتّيحاد لشتيراكي المحرر و الاتحاد الاشتراكي و ف لمجلات أقلام و الأهداف و كان عندو مقال أسبوعي ف مجلة المجلة لعربية.

لجابري من لمفكرين لعرب لقلال لّي خصّصو حياتهوم لفكرية ولعلمية باش يبنيو مشروع فكري متكامل لّي كان كايدور على فهم التراث و كيفاش تكون الفكر و العقل العربي المعاصر. لكتوبة ولأفكار د لجابري كيف ما أثرو على بزاف ديال لمفكرين لعرب لمعاصرين كيف ما كانو كاينوضو بزاف ديال لپوليميك و لنتيقاد و رّفض و وصلات لدرجة أن مفكرين كبار خرين كانو كايواجهو كتوباتو و مشاريعو لفكرية ب أطروحات مضادة و ب كتوبة كايهدمو لأفكار ديالو و ف هاد لباب كانلقاو ب دّات لأعمال ديال لفيلسوف لمغريبي طه عبد الرحمن و جورج طرابيشي.

لجابري خلا مكتبة عملاقة ديال لكتوبا لمهمين لّي كايشكلو مرجع مهم ل بزاف ديال لمواضيع بحال لفكر لعربي و لأخلاق و الدين. صدر أيضا بزاف ديال لكتوبا لّي عندهوم قيمة كبيرة ف محاولات لفهم لمعاصر ديال تّراث لفلسفي و لفكري لعربي لإسلامي.

لكتوبة ديال لجابري كان و باقي عندهوم نتيشار كبير ماشي غير ف دّول لعربية و لكن حتا ب لوغات خرين حيت تترجمو ل كتر من 25 لوغة بحال نگليزية و لفرانساوية و سپانيولية و لكوردية و تّوركية.

لجابري كان كايتميز تّا ب لعدد لكبير ديال طّبعات د لكتوبا ديالو لّي كانو كايوصلو ل 10 د طّبعات و كان ف كل طبعة كايضيف أو كاينقّح لمضمون د لكتوبا ديالو. لّيستا لّي جاية كاتجمع لكتوبة و لإصدارات لكاملة ديال لجابري:




#Article 410: تيست شاپيرو ويلك (141 words)


تّيست د شاپيرو ويلك Shapiro-Wilk هو تيست إحصائي لفرضية زيرو ديالو هي : سّاكنة لإحصائية موزّعة على شكل قانون طبيعي (گاوسي).

تّيست د شاپيرو ويلك كايتخدم ف لحالات لّي كاتكون فيها لعيّنة لمدروسة صغيرة (قلّ من 50). هاد تّيست تعرّف أول مرة من عند لإحصائيين صمويل شاپيرو (ميريكاني) و مارتن ويلك (كانادي) ف 1965.

يلا عتابرنا عينة فيها  عنصر ب لبيانات ديالهوم ب واحد لڤاريابل كمّية  ،سّطاتيستيك د تّيست  هي:

 معا

سّطاتيستيك يمكن تقرا بحال معامل تحديد واحد لموديل د لنحيدار ما بين 2 ديال سّيريات: ديال لكوانتيلات نّظرية أو كوانتيلات لعينة لمدروسة. . كولما كانت  عالية، كاتكون لفرضية ديال تّوزيع طّبيعي قريبة باش تكون صحيحة.

لعتبة باش كانطيحو لفرضية كاتكون على حساب لقيمة لحتيمالية  و تّاقيدّة د لعينة . يلا كانت  كانعتابرو لفرضية د تّوزيع طّبيعي مامقبولاش.

يلا خدمنا ب ل (p-value) و شي عتبة  (كاتكون ف لغاليب كاتساوي 0.05):




#Article 411: لعواليم لمدفونة (311 words)


لعواليم لمدفونة (ب لفرانساوية: Les mondes engloutis) مسلسل د رّوسوم فرانساوي كان تّعرض ل أول مرة ف تّلفزة لفرانساوية بين 1985 و 1987. لمسلسل كتبات سّيناريو و لحيوار ديالو نينا وولمارك، رّوسوم و تّصميم د شّخصيات كان دارهوم رّسام لفرانساوي پاتريك كلايس.

لمسلسل كان داز ف لمغريب ف لبدو د تّسعينات ف تّلفزة لمغريبية.

لقصة د لمسلسل كاتدوز تحت لأرض و كاتبدا ف واحد لمدينة لّي كاينة ف قلب لأرض سميتها آركاديا (Arkadia) كاتضويها واحد شّمس صطيناعية سميتها شاگما (Shagma). هاد الشّاگما كاتمرض و غاتكون كاتهدد باش تّفرگع و تفنّي لمدينة د آركاديا. لوليدات صّغار ديال لمدينة غادي يبغيو يعتقو مدينتهوم و شّعب ديالهوم و غادي يزعمو يدخلو لواحد لمتحف لّي ممنوع على نّاس. غادي يعاونهوم شاگ شاگ باش يدخلو, هاد شاگ شاگ هو واحد سّفينة قديمة ب عقلها و عندها قدرات كبيرة.

فاش غادي يوصلو ل لأرشيف سّري لّي كاين ف لمتحف غادي يعرفو لقصة ديال مدينتهوم و كيفاش جدودهوم كانو كايعيشو فوق لأرض و ضرباتهوم واحد لقيامة لّي خسفات لحضارة ديالهوم و دفناتهوم تحت لأرض.

لوليدات د أركاديا غادي يخلقو واحد لمرا لّي شّكل ديالها قريب ل لباشار لّي عايشين لفوق (نّاس د أركاديا ما كايشبهوش ف شّكل ديالهوم ل لباشار د فوق لأرض) و غادي يكلفوها هي و شاگ شاگ و واحد جوج مخلوقات خرين بيك و باك Bic  Bac باش يطلعو ل فوق لأرض و يطلبو لعوين باش يعتقو شّمش ديالهوم و لمدينة ديالهوم من لفنا.

فاش غادي يقربو من سطح لرض، غادي يتزادو عليهوم شخصيات خرين: جوج وليدات من لباشار د لفوق سميتهوم بوب و ختو صّغيرة ريبيكا و سپارتاكوس لّي هو واحد رّحالة كايعيش بوحدو بين طّبقات د لأرض.

هاكدا غادي يدخلو كاملين ف رحلة راكبين ف شاگ شاگ بين طّبقات د لأرض باش يقلبو على شي وسيلة باش يعتقو آركاديا. لموغامرات ديالهوم غادي تلاقيهوم مع شعوب و شخصيات كتار و غادي يكونو ديما مهددين ب لقراصنة لّي تايگريسيو الناس تّحتانيين بين طّبقات د لأرض.




#Article 412: نياندرطال (320 words)


نّياندرطال (سّمية لعلمية Homo neanderthalensis أولا Homo sapiens neanderthalensis) هي نوع أولا نويّع منقارض د لإنسان لبدائي لي عاش ف أوراسيا تال هادي 40،000 عام. نقارضو واقيلا بسباب تّنافس أولا لإبادة لي تسببو فيها لمهاجرين لباشار لأوروبيين لّولين لحديتين، أولا بتغيير مناخي قوي، أولا شي مزيج من هاد لأسباب.

تسما هاكدا ب نّسبة ل لبلاصة لّي تكتاشف فيها أول شانتيو ديالو، ف واحد لكاريان د لحجر سميتو نياندر ف ألمانيا) هو واحد لگنس د لقرودا لفوقانيين لّي عاشو بين هادي 500 ألف و 30 ألف عام. هو من أقرب لگنوس ل بنادم لّي كاين دابا (لهومو سابيانس) و تعايشو مدة طويلة و سكنو متقاربين. و كانو گاع كايتوالدو بيناتهوم، ب حيت أن لعولاما كايقدرو أننا (حنا لهوموسابيانس) فينا تقريبا شي 4 ف لمية منو على لمستوى لوراتي و لجيني.

بنادم نّيانديرطال كانو عندو نفس لمهارات و لمعارف ديال سّابيانس ب حيت كان كايعرف يخدم لعافية و يصاوب دوزان و أدوات معقدة نسبيا (ب دّات ف دّوزان د صّيادة). كان خبير ف لعشوب و نباتات (وصل گاع باش يخدمهوم باش يداوا). كانو عندو طقوس دينية (كان كايدفن الموتى ديالو و كايعلم لقبورا ديالهوم) و كان عندو مع لفنون (رّسم ف لحيوط د لغيران).

ب نّسبة ل لهدرة، ما كانتش عندو مطّورة بزاف و وقف عند لحد ديال تّبلبيل بلا ما يقدر يوصل ل مستوى سّابيانس لّي قدر يفوت لمستوى د لأصوات لبدائية ل نّيفو ديال لغة كايتواصل بيها و كايختارع كلمات باش يوصف لعالم لّي داير بيه و حتا شي أفكار و مفاهيم مجردة (ما ملموساش) بحال لموت و لفرحة و لكعية و لخوف. كاينين نظريات لّي كاتقول أن نّيانديرطال نقارض بسباب هاد لبلوكاج د لهدرة.

ف 2010 تدار أول تخطيط كامل ل لآديئين ديالو.

نّيانديرطال گنس أوروبي ب لأساس، كان منتاشر ف أوروبا كاملة و غرب آسيا ف سّيكتور د شّام و لعراق و تركيا و إيران، و هادشي على حساب لعضوما و لحفريات ديالو لّي تلقاو.

كانت فومتو مقوسة و لبشرة ديالو مفتوحة و شعرو شهب كايميل ل لحمورية.




#Article 413: شمش (168 words)


شّمش هي نّجمة لي لوسط ديال لمجموعة شّمسية. هي واحد لفلكة تقريبا مثالية د لپلازما سخونة. فلداخل ديالها كاين حركة لحمل لحراري لي كاتولد مجال مغناطيسي عن طاريق عملية دّينامو. حتا لدبا هي أهم مصدر د طّاقة ديال لحياة ف لأرض. لقطر ديالها تقريبا هو 1.39 مليون كيلومتر، أولا 109 ديال لأقطار ديال لأرض. لكتلة ديالها تقريبا هي 330،000 مرة لكتلة د لأرض. لكتلة ديالها كاتمتل 99.86% ديال لكتلة د لمجموعة شّمسية.

شّمش كاتنطق حتا شمس ولّا سمش. شّمش داخل ف لجمهرة I، ولا نجمة عامرة ب لعناصر تّقيلة. تّشكيل ديال شّمش يقد يكون تفعّل ب موجات صدمية من وحدة ولا بزاف د سوپرنوڨات. هاتشي ممكن يتقتارح من لوفرة ديال لعناصر تّقيلة ف نّظام شّمسي، بحال دّهب ولا ليورانيوم، ب لمقارنة مع لوفرة د هاد لمعادن ف لّي كايتسمى لجمهرة II، ولي هي نّجوم لي قليلة فيها لمعادن تّقيلة. تقدر تكون لعناصر تّقيلة نتجات من تفاعلات نووية كاتمص لحرارة منين كان شي سوپرنوڨا كايتصايب، أولا ب تّحول من لمتصاص د نّيوترونات داخل شي نجمة كبيرة من لجيل ثّاني.




#Article 414: بني ملال (168 words)


بني ملال (بالأمازيغية: ⴰⵢⵜ ⵎⵍⵍⴰⵍ) هي مدينة مغريبية وعاصمة ديال إقليم بني ملال جات ف جهة بني ملال خنيفرة، بعيدة على مدينة الدار البيضا بـ 210 كلم (إلا شديتي لوطوروط). كيحبسها ف شرق جماعة فم لعنصر، و ف غرب جماعة أولاد امبارك، وف الشمال الشرقي أولاد يعيش وتاغزيرت، وفي الشمال الغربي فم اودي. مساحتها الحضرية كتوصل ل 85% على سهل تادلا واخا كتوسع أحيائها لاخرا على الجبال الأطلسية المتكية على المدينة، بحال أوربيع، بوعشوش، وآيت ورير، ايث تيسليت وعين الغازي. وهي جات بين المدن التاريخية فاس و مراكش.

بني ملال مدينة قديمة بزاف مذكورة فعدد كبير ديال لمصادر التاريخية بحال مثلا كتاب المسالك و الممالك ديال أبو عبيد البكري، و كتاب الروض المعطار في خبر الأقطار ديال الحميري. كانت كتسمى ف لقرون الوسطى مدينة داي او حصن داي. عرفت لمدينة نمو دمغرافي سريع مبعد الاستقلال.

بني ملّال عندها مطار محلي: مطار بني ملال.

جامعة السلطان مولاي سليمان كاينة فبني ملال.

بني ملال فيها قصبة مصنفة من وزارة التقافة معروفة ب قصبة أولا برج راس العين أولا قصبة بلكوش.




#Article 415: لعلوة (484 words)


لعلوة ولا العلوة، سميت قصيدة ديال لعيطة ، لّي مامعروفش ب ضّبط لّي كتبها، و كايرجع لأصل ديالها ل منطقة مزاب ف نّواحي د بن احمد. قصيدة لعلوة هي، ف لاصل ديالها، من نّوع صّوفي دّيني لّي معروف ب سّواكن، و هوما لعيوط لّي كايتغنّاو ب سّادات ديال شي منطقة و كايدكرو لحوايج و لكرامات لّي كانو معروفين بيها، زايدون على شي أحداث ولا شي شخصيات تاريخية ديال لمناطق لّي مدكورة ف لقصيدة.

لعلوة غنية مشهورة بزّاف ف لمغريب و كاتعتابر من لخالدات ديال فنّ لعيطة و غنّاوها بزّاف ديال لمغنّيين لمغاربة، واخّا تخلط لكلام ديالها ب شي قصايد و عيوط خرين.

أشهر واحد غنّا لعلوة هو شّيخ احمد ولد قدّور لّي دار أول تسجيل معروف د هاد لعيطة ف لقرن لعشرين. غنّاوها من بعد منّو بزّاف ديال شّيوخ و شّيخات لكبار د لعيطة ف لمغريب بحال الشيخ الصاحب بلمعطي، فاطنة بنت لحوسين، لحامونية، خديجة لبيضاوية، حجيب و زيد عليهوم عدد من لمغنّيين و لگروپات شّعبيين لمغاربة بحال: عبد العزيز الستاتي، سعيد صّنهاجي، عبد الله الدّاودي، الزّيتوني بورگون، سعيد لهنا...

لعلوة عندها قيمة تقافية و روحية فنّية كبيرة ف لموسيقا شّعبية لمغريبية و ب دّات ف لمناطق د شّاوية، دكّالة، عبدة، لغرب و تادلة. هي من أكتر لعيوط لّي تغنّاو و تعاودو و صعيب ما تكونش حاضرة ف أي حفلة موسيقية شعبية مغريبية. ف لحلاقي شّعبية لمغريبية لوجيبات د لمغنّيين و عبيدات رّما ديما كاتبدا ب لعلوة حيت لمغنّيين كايآمنو ب أن فيها لبركة لّي كاتجيب لجمهور.

هي من نوع لعيوط سّواكن و كاتدلّ على تّقديس لكبير لّي عند لمغاربة ل سّادات و لشي بلايص محددة لّي فيها لأضرحة ديالهوم ولا وقعو ولا عاشو فيها شخصيات كانو كايكبّروهوم نّاس، بحال سّادات و شّيوخ ديال تّصوف.

لعلوة ف دّاريجا لمغريبية كاتعني لبلاصة لعالية (ب لعربية: الهضبة) و هي كاتشير لواحد لبلاصة ف لإقليم د بن احمد ف لمنطقة د مزاب.

لعلوة ف لاصل ديالها كاتّغنا ف لمقام لموسيقي د لباياتي و كانت كاتّغنّا ب لبندير و لوتار. وقعو فيها بزّاف ديال تغييرات ب لمقارنة مع طّريقة لأصلية على مستوى لمقامات: لّوالا لّي غيرو فيهوم كانو الشيخ الصاحب بلمعطي و الشيوخ الطّاهر و لمكّي. لقصيدة لموعاصرة كاتّغنا ب آلات خرين و ب توزيعات موسيقية مختلفة.

بسم الله باش بديت على النبي صليت

أماتوصليو عليه قد البحر وما فيه

بغايت نمجد “القبة” نذكر عزري العلوة

جيتي في راكوبة باقي قيك النوبة

جاء عندي حبيبي ما لقيت ما نعطيه نفرش ليه الزرابي الحباب دايرين بيه

يا لغادي نوصيك بعدا إيلا وصلتي تأدب وتوضا

يا لغادي عيب عليك وياالجاي عيب عليك

تبعتي صحاب المال ونسيتي واليديك

الواد الواد الواد بربيعو

حقي فيك يا فاضل ما نرهنو ما نبيعو

لعيطة د لعلوة تزاد فيها كلام موخود من عيوط خرين بحال عيطة الزاوية لّي تشهرات بيها فاطمة الزّحافة و بدّات فاش كايتدكرو ولاد حريز و لمنطقة د برشيد:نتوما أولاد حريز جدكوم شريف عزيز و بعض لمرات كاين لّي كايبدا لعلوة ب مقطع ديال عيطة الزاوية:الزاوية مانا ساخي بيك... سخاك الزمان عليا شّي لّي ما عندو علاقة ب لعيطة لأصلية د لعلوة.




#Article 416: جوپيتر (106 words)


جوپيتر ولا لمشتري، هو لكوكب لخامس ف ترتيب ديال لكواكب من حيت لبعد ديالو علا شمش، وأكبر واحد ف لمجموعة شّمسية. هو عملاق غازي ولكتلة ديالو هي واحد من لألف ديال شّمش، ولاكن كاتسوا جوج مرّات ونص لكتلة ديال ݣاع لكواكب لوخرين مجموعين. جوپيتر من بين لأجرام لي ف سّما لي كتبان كاضّوي بجّهد ف لّيل وكان معروف من عند لحضارات لقدام من قبال تّاريخ لمسجّل. سّمية ديالو جايا من لإله رّوماني جوپيتر (بنݣليزية Jupiter). منين تايتشاف من لأرض، جوپيتر يمكنلو يتسبب ف ظّل لي كايتشاف من ضّو ديالو، وهو ف لمعدّل تالت جسم طبيعي ف جّهد ديال ضّو ف سّما ف لّيل مورا لقمر وڨينوس.




#Article 417: توريا جبران (406 words)


توريا جبران ولا ثريا جبران، و سميتها لحقيقية السّعدية قريطيف (خلاقت ف دّار لبيضا ف 16 أكتوبر 1952 و توفّات ف دّار لبيضا ف 24 غشت 2020)، كانت فنّانة مسرحية و ممتّيلة و مرا سياسية مغريبية. سبقليها كانت وزيرة تّقافة بين 2007 و 2009، وكانت أول مرا فنّانة كاتّاخود لباليزة د هاد لقيطاع.

السّعدية قريطيف خلاقت ف دّار لبيضا و كبرات ف حي عين الشّق. كنية جبران خداتها من عند راجل ختها لّي هو لّي تكلّف بيها و كبّرها من بعد ما توفّا لواليد ديالها. لواليدة ديالها كانت خدّامة مربّية ف دار لأطفال د عين الشّق و هو شّي لّي خلا السّعدية تدوز وقت كبير د صغرها فيها، و داكشّي لّي كبّر فيها روح تّضامن مع لمهمّشين و نّاس ضّعاف ف لمجتمع.

السّعدية بدات لمسرح و هي بنت عشر سنين و لعبات و هي صغيرة فوق لخشبة د لمسرح لبلدي د كازا و كان راجل ختها كايشجعها بزاف على لمسرح و عليها خدات كنيتو ف سميتها لفنّية. كانت أول فرقة لعبات معاها هي الأخوة العربية لّي كان كايسيرها عبد العظيم الشناوي، وكانت أول مسرحية ديالها سميتها أولاد اليوم.

السّعدية قرات لبتيدائي و لّيسي ف كازا و كانت من نّسا لمغريبيات لّوالا لّي خداو شّهادة لبتيدائية ف لستيقلال.

من بعد لباك، تسجلات ف لمعهد د لمسرح لوطني د رّباط و خدات منّو ديبلوم التخصص المسرحي. كانت عندها ميولات سياسية و كاتلعب أدوار ف مسرحيات لّي كانو كايخلقو ليها مشاكيل مع لبوليس سّياسي د يامات لحسن تّاني. كانت محسوبة على حزب لتّيحاد لشتيراكي، يّامات كان حزب موعاريض، و وصل حد لمضايقات ل درجة أنها تخطفات فاش كانت غادية تشارك ف برنامج حواري سياسي ديال دّوزيم، هادوك لّي خطفوها تكرفسو عليها و قرّعو ليها شعرها.

ف 2007 تعيّنات وزيرة د تّقافة، مع لتّيحاد لشتيراكي، و فلعهد ديالها تدارو بزّاف د لحوايج مزيانة ل لفنانين لمغاربة بحال قانون لفنّان، لاكارط د لفنّان و تّغطية صّحية د لفنانين. ماكملاتش ف لوزارة بسباب لمرض ديالها.

تورّيا لعبات ف بزّاف د لأعمال ف لمسرح و تّلفزة و سّينيما.

كانت من رّواد د مسرح الهواة ف المغريب و لعبات مع بزّاف ديال لفراقي بحال الشهاب، المعمورة، القناع الصغير و لفرقة ديال لمسرحي لكبير الطيب الصّديقي لّي لعبات معاه مسرحية ديوان عبد الرحمن المجذوب ف 1980 و ابو نواس ف 1984 و الف حكاية و حكاية في سوق عكاظ ف 1985.

ف 1987 أسسات لفرقة د مسرح اليوم و كانت أول مسرحية ديالهوم حكايات بلا حدود لّي خرجها راجلها لمسرجي و لكاتب عبد الواحد عوزري و قتابس نّص ديالها من قصايد شّاعر سّوري محمد الماغوط.




#Article 418: الكافرون (رواية) (142 words)


الكافرون (عنوان أصلي ب لعربية)،  رواية مغريبية ب لعربية صدرات عام 2019، و كتبها لكاتيب لمغريبي ادريس الگنبوري. لكتاب خرجاتو دار نّشر  دار إفريقيا الشرق - الدار لبيضا.

رّيواية كاتدخل ف باب أدب لحباسات وهي رّيواية تالتة ديال الگنبوري. رّيواية كاتأرّخ لواحد لفترة ف تاريخ لمغريب (بين 2003 و 2008) لّي عرفات قمع كبير ل لحركات لإسلامية و نتيهاكات كبيرة د حقوق لإينسان ف حق سّلفيين لّي تشدّو ف لحملة لكبيرة لّي تلات عمليات 16 ماي ف دّار لبيضا.

رّيواية كاتعاود لقصّة ديال واحد لمسجون كان مع سّلفية لجيهادية ف لمغريب، سميتو ابراهيم الصّروخ و لّي كايحكي، على شكل فلاش باك، كيفاش تطورات حياتو حتا لقا راسو ف وسط جماعة إسلامية سلفية متشدّدة و كيفاش غادي يعاني ف وسط لحبس، ف لّول من لقمع و تّعديب و من بعد من لأسئلة و تّخمام لّي غايخليه يفكّر بزّاف ف لمعتقدات و لإيديولوجية ديالو.




#Article 419: تركية (141 words)


التركية (بالتركية: Türkçe)، ولمعروفة تا بالتركية د إسطنبول، هي أكثر لغة د الترك كاتهضر فلعالم، خاصة ف تركيا. تيهضرو التركية تقريبا 90 مليون واحد فلعالم، منهم 75 مليون اللي هي اللغة لأم ديالهم.

التركية لغة رسمية ف تركيا و قبرص، و تاتًهضر ف بزاف د لبلدان خرا ف لعالم بحال ألمانيا و ليونان و بلغاريا و رومانيا و مقدونيا الشمالية و لعراق.

لأصول د اللغة التركية تاترجع لهادي 1300 عام ف وسط آسيا، فين تلقاو شي مخطوطات و نقوشا مكتوبين بيها. ف وقت الدولة لعتمانية كانت اللغة لعتمانية (اللي هي أصل التركية) لغة مهمة و تاتخدًم لغة رسمية. ف 1928، بدل الرئيس د تركيا مصطفى كمال أتاتورك بزاف د لحوايج فاللغة لعتمانية، بحال لحرف اللي بدلو من لحرف لعربي للحرف اللاتيني، و زوًل بزاف د لكلمات لعربية و عوَصها بكلمات تركية أصيلة، و هو اللي عطا التركية لحديتة اللي كاتخدًم دابا.




#Article 420: 1Q84 (رواية) (143 words)


رّيواية محكية من جوج د شّوفات: ديال لأبطال رّئيسيين طينگو Tengo (لّي ف عمرو 29 عام) و آومامي Aomamé (لّي عندها 30 عام). ف جوج د لأجزاء لّوالا، كل فصل كايتبدل بين لمسار د آومامي و ديال طينگو. ف لجزء تّالت كايتزاد واحد لمنضور آخور ديال واحد شّخصية خرا لّي هي أوشيكاوا. لمسارات كايبانو بحال يلا منفاصلين و كايبداو يتقاربو شوية ب شوية مع لفصول د رّيواية.

بحال گاع رّيوايات د موراكامي، لإشارات ل أعمال موسيقية حاضرة ب شكل كبير ف رّيواية. نّجاح لكبير د لكتاب شمل حتا بزّاف ديال دّياسك و لمعزوفات لّي حياو من جديد و تزادو نسب لمشاهدة و لستيماع ديالهوم ف لمواقع و لمنصّات د لموسيقا:

موراكامي كايشير ف رّيواية ديالو ل بزّاف د لأعمال لأدبية لخرا، و بحالها بحال لإشارات لموسيقية، لكتوبا و لأودابا لمدكورين ف رّيواية عندهوم دور كبير ف رّسم ديال شّخصيات و لأحدات د رّيواية:




#Article 421: ليسطة د المغالطات (357 words)


ملّي كايتعطاو حٌجج علا شي دّيعاء، المغالطة هي واحد التبرير اللي ب اللوجيك كايتعتابر ماشي صحيح، ؤ ماواصلش يكون دايز كـ حُجّة، ؤ يمكن تحسبو ماشي سَليم. ڭاع الطّرق ؤ الأساليب د الهضرة يقدرو يكون فيهوم مغالطات.

المغالطات صعيب تستّفهوم، حيت متنوّعين ف الشكل ؤ التطبيق ديالهوم. تقدر ب الزز تستّفهوم ب يا إمّا الشكل ديالهوم (مغالطات ف الفورمة) ولّا ب باش كايتكوّنو (مغالطات ماشي ف الفورمة). التستيفة ديال المغالطات اللي ماشي ف الفورمة تقدر تزيد تقسّمها لـ اللي عندهوم علاقة ب اللغة، لـ اللي عندهوم علاقة ب الغفلة، لـ اللي عندهوم علاقة ب التبرڭيڭ، ؤ لـ اللي عندهوم علاقة ب الفتيراض. من جيهة اخرا المغالطات تقدر تستّفهوم علا حساب كيفاش كايوقعو، بحال المغالطات المادية، المغالطات اللفضية، ؤ عاوتاني المغالطات اللي ف الفورمة (غالاط ف الستينتاج). المغالطات المادية تقدر تحطّهوم ف الطبقة العريضة د المغالطات اللي ماشي ف الفورمة، أمّا المغالطات اللي ف الفورمة تقدر تحطهوم ف واحد الطبقة دقيقة كتار د المغالطات (الختيزالية) د اللوجيك. ؤ المغالطات المادية تقدر تحطّهوم ياإمّا معا التستيفة د المغالطات اللي ماشي ف الفورمة ولّا معا الختيزالية.

المغالطة ف الفورمة هي واحد الغالاط ف الحُجّة اللي كايبان ف الفورمة ديالها. الأنواع ديالها:

المغالطة القتيراحية هي واحد الغالاط ف الحُجّة اللي فيها قتيراحات مركّبة. الأنواع ديالها:

المغالطة د العبار هي واحد الغالاط ف الحُجّة ملّي العبار د الساس متعارض مع العبار د النتيجة. الأنواع ديالها:

المغالطات اللي ماشي ف الفورمة هي غالاط ف الحُجّة حيت السّاس مامڭادش.

تعميمات غالطة – توصل ل شي ستينتاج من ساس راشي، حتا كاتوصل ل واحد التعميم غالط.

سباب فيه الشك هو نوع عام من الغالاط فيه بزاف د المتغيرات، البلان فيه هوا التخليطة بين السباب ؤ الرتيباط، ياإما حيت وصلتي ل شي ستينتاج ب طريقة عيانة (ولّا رفضتيه ڭاع) ولّا تفشل ف التحقيق على السباب ديال شي تأتير باين.

مغالطة د الهارينڭ الحمر، واحد الغالاط ف اللوجيك، ملّي كايكون القتيراح، و المقصود منو، كايتلّف باش تعطي ستينتاجات لاعلاقة ولّا غالطة. أولا بشكل عام، أي ستيدلال د اللوجيك مبني على حجج مزورة، باش يجيو بلاصت الحجج د بصّح إلا ماكانوش، ولّا باش يهرف على الموضوع د النقاش.

الهارينڭ الحمر – تعطي حجة تانية باش تجاوب الحجة اللولا اللي لا علاقة ب الموضوع باش تلّف على الموضوع الدوريجين.




#Article 422: العربية (قناة إخبارية) (126 words)


العربية (Al Arabiya) هي قناة د لأخبار تابعة لشبكة تيليفيزيونية إم بي سي ديال السعودية، و سيَاج (siège) ديالها كاين ف مدينة دبي، ف لإمارات.

مين كان قناة الجزيرة لقناة لإخبارية لأول ف لعالم لعربي، و هم بقات كي قولوا انتقادات و حاجات خايبين عن عائلة آل سعود ديال لسعودية، لأفراد من آل سعود هم دَسيداو بيش بدا قناة ديالوم. سميت لقناة لجديد: العربية، و بدات بث تلفزيوني ديالها ف عام 2003. شعار ديال لقتاة هو أن تعرف أكثر (بالدارجة: بيش تعرف كثر).

ف عام 2009، لرئيس ديال لميريكان باراك أوباما طاع أول إنتيرڤيو (interview) ديالو ف قناة العربية.

كاين سيت ديال لقناة ب لوغة لينڭليزيا (من عام 2007)، فين كاين لأخبار مترجمة بهاد لغات، و كين سيت تا ب لوغة لفارسية، و ب لوغة لأردية.




#Article 423: هندية (لغة) (103 words)


اللغة لهندية (بلهندية: हिन्दी)، اللي كاتسمًا تا لهيندي، هي لغة هندو أوروپية من لفرع د اللغات لهندو إيرانية. لهندية هي لغة رسمية ف لهند، هي و لينڭليزية.

على حساب لإحصاء د 2011، تقريبا 320 مليون واحد قالو باللي تيهضرو لهندية لغة أم ديالهم، و 270 مليون واحد تعلًموها و تيهضروها لغة تانية.

إلا تجمعو ڭاع التفرعات ديالها، كاتكون لهندية هي اللغة الرابعة اللي تاتًهضر فلعالم من ناحية عدد الناس، مورا الشينوية و الصبليونية و لينڭليزية. لهندية قريبة بزاف من اللغة لأوردو اللي تاتًهضر ف پاكيستان، و الناس اللي تيهضروهم بجوج تيتفاهمو بيناتهم. لأوردو تاتًكتب ب لحرف لعربي، و لهندية تاتكتب ب لحرف الديڤاناڭري.




#Article 424: ميڭيل دي سيرڤانطيس (813 words)


ميڭيل دي سيرڤانتس ساڤيدرا (ب الصبنيولية: Miguel de Cervantes Saavedra) كان عسكري و كاتب مسرحي و روائي و شاعر صبنيولي تولد ف ألكالا دي إيناريس، حدا مدريد، الصبنيول، ف 29 شتنبر 1547 (افتراض). كيتعتابر واحد من الشخصيات المهمة ف الأدب الصبنيولي على المستوى ديال العالم كامل، و تّشهر بزاف ف العالم من بعد ما كتب الرواية المعروفة ديالو دون كيخوطي دي لا مانتشا ف عشر سنين مابين 1605 و 1615. هاد الرواية كاتعتابر واحدة من بين أفضل الأعمال الروائية المكتوبة، و بزاف ديال النقاد الأدبيين كيعتابروها هي أول رواية أوروپية و واحدة من بين الأعمال المخيرة ف الأدب العالمي. الصبنيول دارت ليه تكريم كبير من بعد ما دارت تصويرة ديالو على العملة ديال 50 سنتيم. سيرڤانطيس كان عندو تأتير كبير على اللغة الصبنيولية حتى تسمات اللغة ديال سيرڤانطيس.

واخا مشهور بزاف، جزء كبير بزاف من الحياة ديال سيرڤانطيس ما معروفش مزيان. سميتو، الخلفية ديالو، و حتى كيف كان داير هما حوايج اللي ما مأكدينش مزيان. واخا هو كان كيسينيي سميتو على الشكل ديال Cerbantes، الرسام ديالو خدّم السمية Cervantes و اللي ولات هي السمية الرسمية ديالو. من بعد، سيرڤانطيس خدّم السمية ديال ساڤيدرا، سمية ديال واحد الشخص من الفاميلة البعيدة، فعوض كورطيناس (السمية ديال مّو) اللي كان من المفروض تكون داخلة ف السمية ديالو على حساب الأعراف ديال التسمية ف الصبنيول.

مجال اخر فيه خلاف هو التوجه الديني ديال سيرڤانطيس. ف القرن 16، بزاف ديال الصبنيول كانو عندهم أسلاف موريسكيين (المسلمين اللي بقاو مور الغزوة ديال ڭرانادا ف 1492) ولا أسلاف من الكونڤيرسوس (اليهود اللي عتانقو الكاطوليكية ف الوقت ديال الطرد ديال اليهود ف 1492). ضونك ما معروفش واش سيرڤانطيس كان كاطوليكي ولا كان واحد من هاد الناس.

كاين قبول دابا على التاريخ ديال الزيادة د سيرڤانطيس، و اللي كيحددوه ف 29 شتنبر، و حتال القرن 18 عاد تعتارف ب شكل رسمي ب ألكالا دي إينارس كا المدينة اللي تزاد فيها سيرڤانطيس. ميڭيل دي سيرڤانطيس هو الابن ديال رودريڭو سيرڤانطيس و ليونور دي كورطيناس. الأصل ديال رودريڭو من كوردوبا (الأندلس) فين الواليد ديالو، خوان دي سيرڤانطيس، كان محامي معروف من أصل يهودي. و الأصل ديالو من جهة مّو مازال ما مأكدش، بلحاق بزاف ديال المؤرخين كيقولو بيلا حتى هي كان أصلها يهودي.

رودريڭو كان ف الأغلبية ديال المرات عليه دين ولا كيقلب على خدمة. و كان كينتاقل دابا و ساعة من دار ل دار. ليونور جات من أرڭاندا ديل ري (Arganda del Rey) و ماتت ف أكتوبر 1593 ملي كانت عندها 73 عام. كانو عندها وراق كيبينو بيلا عندها سبعة د الولاد و كانت مرا قارية. ملي رودريڭو كان ف الحبس من أكتوبر 1553 حتال أبريل 1554، هي اللي تكلفات ب الفاميلة.

الخوت ديالو كانو هما أندريس (تزاد ف 1543)، أندريا (تزادت ف 1544)، لويسا (تزادت ف 1546)، رودريڭو (تزاد ف 1550)، ماڭدالينا (تزادت ف 1554)، و خوان. عاشو كاملين ف كوردوبا حتال 1556 ملي مات جدهم. ل شي أسباب ما واضحاش، رودريڭو ما ستافدش من الوصية و الفاميلة غبرات و ما بقاتش كاتبان حتال 1564 ملي رودريڭو قرر يدير شكاية ف سيڤييا. سيڤييا كانت ف داك الوقت كاتعرف واحد الازدهار اقتصادي كبير. و رودريڭو قدر يكري المباتة ل خوه الكبير اللي كان ماجسطير. ف 1566، الفاميلة رحلات ل مدريد.

ف القرن 19، واحد الباحت كتاشف واحد المدكرة ديال البحت ديال البوليس على ميڭيل دي سيرڤانطيس ب التاريخ ديال 15 شتنبر 1569، اللي كيتّاهموه فيها ب جرح أنطونيو دي سيڭورا. كاين قبول كبير دابا عند المؤرخين بيلا هاد المدكرة هي السباب علاش سيڤانطيس خلّا مدريد.

من بعد رحلة طويلة بزاف، وصل ل روما اللي لقى فيها خدمة بسيطة ف الدار ديال جوليو أكواڤيڤا، سقايفي اللي كان دوّز عام ف مدريد، و تعيّن كاردينال ف 1570. ملي بدات الحرب مابين ڤينيسيا و العتمانيين ف 1570، الصبنيول تّاحدو مع ڤينيسيا ف العصبة المقدسة، تحالف تدار باش يدعم ڤينيسيا ضد العتمانيين. سيرڤانطيس، ملي شاف بيلا المدكرة ديال البحت د البوليس غاتكون ضعافت، قرر يسافر ل ناپولي، اللي ف داك الوقت كانت تابعة ل التاج ديال الأراڭون. القايد العسكري ديال ناپولي كان هو أرڤارو دي ساندي، اللي كان صديق ديال الفاميلة، و اللي من بعد عطا بلاصة ل سيرڤانطيس ف الماركيس ديال سانطا كروز. ف شتنبر 1571، سيرڤانطيس مشا مع الأسطول ديال جون د النمسة، و غلبو العتمانيين ف المعركة ديال ليپانطو.

سيرڤانطيس كيقول بيلا كتب تقريبا 20 مسرحية، من هاد المسرحيات بقاو غير جوج اللي هما الكونطرا ديال الدزاير، مسرحية مبنية على الحبس ديالو ف الدزاير، و الحصار ديال نومانسيا. من غير هادشي، و شي قصايد شعرية، سيرڤانطيس دوّز 20 عام ما نشر فيها والو. ملي جا يكتب دون كيخوطي، الهدف ديالو كان هو يتحدى الطريقة ديال الكتابة الراقية و كان باغي يطيّح من القيمة ديال الروايات ديال الفرسان. الاستعمال ديالو ل الوصف ديال الحياة الحقيقة و الاستعمال ديال اللغة ديال ديما كانو حوايج جداد على الناس ف داك الوقت و دغيا ولاو شعبيين.

الأجزاء الجوج ديال دون كيخوطي مختالفين ف العمق ديالهم، بلحاق بحال بعضياتهم ف الوضوح و الرياليزم. الجزء اللول كان كوميدي و عجب الناس بزاف. و الجزء التاني كان معقد كتر و فيه تركيز كبير على الشخصيات و على الجانب الفلسفي ف القصة.




#Article 425: ريتشارد دوكينز (224 words)


ريتشارد دوكينز (تزاد ب سّمية كلينتون ريتشارد دوكينز نهار 26 مارس 1941) هو عالم د سّلوك لحيواني وبيولوجي تطوري وكاتب. هو زميل فخري ف نيو كولّيج، وكان أستاذ ديال لفهامة لعامة د لعلوم من 1995 ل 2008.

داوكينز تعرف أول مرة ب لكتاب ديالو ف 1976 لجين لأناني (بنݣليزية The Selfish Gene)، لي شهر رّؤيا تّطورية من لمفهوم لجيني وقدّم لمصطلح ديال لميم. بلكتاب ديالو نّمط ظّاهري لموسع (1982)، قدّم ف لبيولوجيا تّطورية لمفهوم لّي كان عندو تأثير ولي كايقول بلي تّاثيرات لمظهرية ديال لجين ماكاتخصش غي لجسم ديال لكائن لحي، بل ممكن تمشي بعيد تال لبيئة. ف 2006، أسس مؤسسة ريتشارد دوكينز د لمنطق ولعلوم.

دوكينز معروف علا أنّو ملحد صريح. هو مشهور ب لنتقاد ديالو ل لخلقية وتّصميم ذّكي. ف لكتاب (1986) صّناع د سّاعات لعور (بنݣليزية The Blind Watchmaker)، كايقدم حجج ضد تّشبيه ديال صّناع د سّاعات، لي هو واحد لحجة ديال لوجود د واحد لخالق مادايرش مبنية علا تّعقيد ديال لكائنات لحية. بلمقابل، كايوصف لعمليات تّطورية بلي راها كاتشبه ل واحد صّناع د سّاعات عور، لي فيها كايكون تّوالد وطّفرات ولنتخاب مامݣيدي ب تّاشي مصمم. ف وهم لإله (2006) (بنݣليزية The God Delusion) دوكينز كايأكد بلّي واحد لخالق مادايرش تقريبا ماكاينش وبلّي لإيمان دّيني غي وهم.

دوكينز حصّل علا جوائز أكاديمية وكتابية، وكايبان ف تلفازة ورّاديو ولانطرنيت، فلغالبية وهو كايناقش على لكتوبة ديالو ولإلحاد ولأفكار ديالو ولآراء ك مفكر عام.




#Article 426: طوماس إيديسون (116 words)


 طوماس ألڤا إيديسون (ب لينڭليزية: Thomas Alva Edison) (تولد ف 11 فبراير 1847 ف ميلان ف لميريكان - مات ف 18 أكتوبر 1931) كان مخترع و رجل أعمال ميريكاني، و كيتعتابر من بين لمخترعين لمعروفين ڭاع ف التاريخ.

ختارع إيديسون فحياتو بزاف د لمًاكن اللي كانت مهمة بزاف فالتاريخ د بنادم بحال لفنونڭراف، لمصوًرة ديال السينيما، لبولا ديال الضو، و طوًر بزاف ديال لحوايج بحال لجينيراطور ديال الضو و التسجيل ديال الصوت و التصاور اللي كاتحرًك. إيديسون كان من لمساهمين اللي أسسًوا أول مختبر د لأبحات الصناعية فلعالم.

إيديسون عندو 1093 بروڤي د ليختيراع ف لميريكان، و عاد عندو وحداخرين فبلدان خرا بحال فرانسا و ألمانيا. مات ف 1931 من بعد ما جاه لمرض ديال السكًار.




#Article 427: نعيمة لبزاز (113 words)


نعيمة لبزًاز (مكناس، 3 مارس 1974 - آلفن آن د راين، هولاندا، 7 غشت 2020) كانت كاتبة مغريبة و هولاندية، مُحاضرة و كاتبة د لمقالات.

بدات لبزاز لكتابة ديالها ف 1995 بلكتاب الطريق للشمال، اللي ربحات بيه جوائز محلية ف هولاندا. من مورا ما كتبات كتابها التاني عشيقة الشيطان ف 2002، و التالت لمنبوذة ف 2006، بداو تينتاقدوها بزاف د الناس حيت كانت تاتنتاقد فيهم بزاف الدين و التقاليد. ف 2010، واحد من الجيران ديالها هجم عليها ب قنبولة مولوطوڤ حيت كان تيتاهما باللي تاتكتب عليه و تاتعايرو ف كتوباتها.

لبزاز كانت تاتعاني من ليكتيئاب لحاد، و نهار 7 غشت 2020 نتاحرات و كان عمرها 46 عام. لأسباب ديال لينتيحار ديالها ڭاعما تعرفو.




#Article 428: ييمن متطرّف (191 words)


ليمن لمتطرّف (ب لعربية يمين متطرّف) ولا ليمن لقاصح هو مفهوم ف سّياسة لّي يمكن يكونو عندو بزّاف ديال لمعاني. ف لغالب د لحالات كايشير ل لمجموعات (أحزاب، عصابات، جْماعات) لّي عندها نتيقاد كبير ل لمفهوم ديال دّيموقراطية و كاتكون عندها إيديولوجية شومولية و يمكن تكون حتّا كاتنكر أن شي جزء من لمجتمع خاص تكون عندهوم حقوق لمواطنة و يمكن گاع تعتابر أنهوم خاصّهوم يتحيّدو من لبلاد.

ليمن لمتطرّف يمكن نلقاو فيه إيديولوجيات بحال نّازية جّديدة، لفاشية جّديدة و جّماعات دّينية لمتطرّفة ولا لأوصولية. لمفهوم كايشمل ف لعصر ديال ليوم حتّا جّماعات سّياسية شّعبوية و سّيادية.

من بين لحوايج لمشروكة ما بين جّماعات د ليمن لمتطرّف كانلقاو أنّهم كاينتاقدو لنحيطاط لّي فيه لمجتمع ديال لعصر ديالهوم و ديما كايقارنوه ب شي عصر ذهبي ب نّسبة ليهوم هو لمعيار ديال لقوة ديال دّولة ولا جّماعة ديالهوم. من بين لأفكار لمشروكة بيناتهوم كاين حتا تّمجيد ديالهوم ل مجتمع فيه طبقة ديال سّياد (ولا شّرفا و نّبلاء) و تّمجيد ديالهوم ل رّوجولة و لكره ديالهوم ل تّحرر د لمرا و لحرّيات لفردية (لميتلية متلا)، و زيد عليها لخوف ديالهوم من تّخلاط د لأعراق (و ف شي حالات لعونصورية و تّمجيد ولا تّحقير د لأعراق).




#Article 429: تشلحيت (1243 words)


تشلحيت (بتيفيناغ: ⵜⴰⵛⵍⵃⵉⵜ، بلحرف لامازيغي لاتيني: Taclḥit) أولا الشلحة أولا تسوسيت أولا السوسية هي لوغة أمازيغية من لعائيلة ديال لوغات لأفروأسيوية. كاتنتاشر تشلحيت فجنوب المغرب صورتو ف جوايه سوس و حاحا و الحوز و جبال الاطلس الكبير و الصغير و نواحي ديال طاطا و ايت باعمران، وحتى ف مدن الكبار بحال كازا و رباط و القنيطرة و بين لمغاربة د وروپا.

تشلحيت هي الوغة الامازيغية لي فيها اكبر عدد ديال الناطقين ، عاد كاتجي موراها القبايلية و اللهجات لخرين بحال ريفية، شاوية وتوارڭية.

كاتستعمل تشلحيت أساسا ف المملكة المغربية ف رقعة جغرافية كايحدها محور دمنات - الصويرة ف شمال. والمحيط الأطلسي ف لغرب ومحور ورزازات - تاڭونيت ف شرق ومحور سلسلة باني - واد نون ف لجنوب، هادشي و داخل معاهم حتى جّيها لغربية ديال الأطلس الكبير والأطلس الصغير وسهل سوس حتى واد نون ف لجنوب، ومن أهم لمدونا ولا المراكز الحضرية لي داخلا ف الرقعة هي وورزازات، الصويرة، أڭادير، تارودانت، تزنيت وڭلميم، بطبيعت لحال كاينا ف بزاف دلمدن كبار ديال لبلاد و هادشي سبابو هو أن الناس ديال سوس كايهاجرو بزاف، كاتعتابر كازا والرباط خصوصاً جوج مدونا فاش كايشكل الناطقون بتشلحيت نسبة مهمة من سكانها. بلا مانساو ناس ديال لخاريج و خصيصا فرانسا حيت كاتشكل تشلحيت و تاقبايليت أكثر اللغات الأمازيغية إنتشارا فيها.

كاتميز تشلحيت بتجانس كبير فلمناطق باش كايدويو بيها عكس بعض اللغات الأمازيغية حيث أنه واخا بقات غير شفوية (مانساوش بلي تشلحيت من أكثر اللغات الأمازيغية لي تكتبات فتاريخ و كانت كاتكتب بلحرف لعربي، ولكن واخا هكاك داكشي كايبقا قليل مقارنة معا لغات خرين) و ماتطوراتش لواحد لمودّا، ف راه كاين تفاهم تام بين ڭاع لي كايدويو بها. و حتا لفرق لي كاين من بلاصا لبلاصا كايتمتل غي فشي تغير بسيط تاع شي حرف ولا شي كليمات و هادشي ماكايءترش على لفهم كيما ڭاع لوغات. و هاد لإهتمام لي وقع مؤخرا مور لإستعمار من روايس لي نتاشرو و تعرفو ،ولبرامج ليكانت كادوز ف راديو، و سينيما د تشلحيت لي كانت واحد لوقيتا كاتنتج شي أفلام هاربين و لهجرة دناس للمدن عاون وخدم على سطونداغيزاسيو ولا معيرة ديال تشلحيت بطريقة غير مباشرة حتى ولاو لي كايدويو ب تشلحيت مايقدروش إفرقو بين لهضرا دكولا بلاصا بحال كي واقع فداريجا.

عدد الناطقين ديال تشلحيت كايختالف من مصدر لمصدر، ولكن ڭاع المصادر متافقة بلي هي أكتر لغة أمازيغية من ناحية عدد الناطقين لي كايدويو بها، كاينين مصادر غربية كاتقول 8 تال 10 د لملاين د ناس ف لمغريب و لكن حسب الإحصاء المندوبية السامية للتخطيط فعدد الناطقين هو 5 د لمليون (أي 14.1 فلمية من سكان د لمغريب) ، ولكن الكثير من الناس شككات فهاد لمعلومات كونها لا تمثل الواقع المغربي و بلي العدد اكثر من هذا بكثير.

تشلحيت دابا عندها 3 د لأبجديات د لكتبا، أكتر وحدا منتاشرا هي لكتابة لعربية موراها كاتجي لاتينية عاد تيفيناغ لي كايتعتابر لحرف رسمي ديال لغات لأمازيغية لمغربية. تكتبات تشلحيت فتاريخها أساسا بلحرف لعربي، وكنلقاو مجموعة من لخطوطات لقدام (بتشلحيت كانقولو لهم أرّاتن) مكتوبين بلحرف لعربي، تكتبات حتى بلحروف لعبرية خصيصا عند ليهود شلوح ولكن داكشي لي تكتب بهاد لحرف قليل داكشي علاش فهادشي لي جاي هانحاولو ندويو غير على هاد 3 د لأبجديات لي معروفين.

لحروف لعربية هي أكتر وحدا منتاشرا عند ناطقين بتشلحيت، تكتبات بها هاد لوغا من شحال هادي و باقي بنادم كايكتب بها دابا. كاتنقاسم لكتبا بلعربية لجوج دلأنواع لي هي:

لكتابا ديال دابا بحالها بحال ديال داريجا نيت ماكايينش فرق بتاتا يعني ڭاع لحروف كايتكتبو كيما كايتكتبو فداريجا. غي من ناحيت لقواعد راه ماكاينينش و هادشي كايخلي كولا واحد إكتب كيما رشقات ليه واخا هكاك هادشي ماكايشكلش عائق لفهم داكشي لي مكتوب.هاد لكتبا كاتميز على لي كانت قبل بإستعمال لحروف بحال لألف ا و لواو و و لياء ي، كيما أن شدة تاهيا قليل فين كاتخدّم. و حتى طريقة باش كايتقسمو لكلمات ولات باينا كتر.

هاد لكتبا خرجو بها بزاف دلكتوبا و من أهمهم تيفاوت ف تيفاوت لي هي ترجمة كاملة للقرآن لكريم ديال جمادي الحسين البعمراني لتشلحيت. بلا مانساو لكتوبا ديال مختار سوسي و بزاف دلكتاب كبار لي كتبو بتشلحيت قبل مايتصيب لمعهد لملكي.

كاتنقاسم لكتبا بلاتيني لجوج دلأنواع لي هي:

كيما كانلقاو لي كايكتب داريجا فلي غيزو صيسيو ولا وسائل تواصل الإجتماعي بلحروف لاتينية، فنفس لبلان كاين حتا فتشلحيت خصوصا فلڭروبات دلفايسبوك و سيتات ديال شلوح، هاد نوع دلكتبا كايعتامد على طريقا دلكربا ديال لحروف فلفرونسي فمثلا كانلقاو حرف غ كايتكتب على شكل gh ، و حرف خ كايتكتب على شكل kh ، و مني ماكايكونش لحرف فلفرونسي كايستعملو لأرقام باش إعنيو بيه لحرف فمثلا كانلقاو 3 كاتعني حرف ع، و 7 كاتعني حرف ح.

هاد نوع دلكتبا نقدرو نڭولو بلي منتاشرا كتر من لحرف لاتيني لأمازيغي و ذلك حيت لمغاربا مولفين هاد نوع دلكتبا.

الأبجدية اللاتينية الأمازيغية (بلأمازيغية: Agmmay amaziɣ alatin) هي نسخة معدلة من لكتابة اللاتينية، فيها 23 حرف لاتيني عادي و10 حروف زايدا، هاد نوع دلكتبا دارو واحد سيد جزائري قاري لانڭويستيك سميتو مولود معمري في ستينيات، و صيبها خصيصا باش تولي تكتب بها لوغات لأمازيغية.

هي باش مكتوبين لكتوبا لي فيهم مقاطع بتشلحيت ولا ليديكسيونير لي خرجات فرانسا مني كانت مستعمرا لمغريب. هاد لكتبا هي لي كاتستعمل فكتابة لكتب و الروايات ديال تشلحيت و هي لي كايخدمو ناس لي عندهم دراية بالشأن الأمازيغي ولا كايهتمو بللغات الأمازيغية و حتى صحاب لافاك لي كايقراو لأمازيغية. و هي باش مكتوبة ويكيپيديا تشلحيت.

بنسبة لتشلحيت حرف ǧ و حرف č ماكايتخدموش حيت أصلا قلال فهاد لوغا دونك كايتعوضو ب dj و tc. بنسبة لحرف e فتاهوا ماكايتخدمش إلا فبعض لحالات ولي هما مني تايكون عنك نفس جوج حروف متابعين فنطق، مثلا ناخدو كلمة تِيلْلِّي لي هاتكتب tilelli عوض tilli حيت مني كاتديرو جوج حروف متابعين كاتقرا بشدة، فهاد لحالا هاتقرى تِيلّي. دونك ضروري استعمال e فبحال هاد لكلمات.

مؤخرا عدلت الحكومة المغربية تيفيناغ كأبجدية رسمية لكتابة اللغة الأمازيغية والتي كانت كاتكتب إما بالحروف العربية أو اللاتينية، و هادشي من مور ما تصيب المعهد الملكي للثقافة الأمازيغية عام 2001 م. و تزادو حروف لتيفيناغ التقليدية باش تمثل لحروف لمتحركة، وكذلك باش تعبر على أصوات ماكايناش فلكتبا لأصلية لي عند طوارق، تبدل فيها حتى اتجاه دلكتابة باش تولي تكتب من ليصر ليمن، كاتسمى هاد لكتبا نيوتيفيناغ ولا بتيفيناغ المحدثة. ومن عام 2003 م بدا تعليمها للدراري صغار ف المدارس الابتدائية المغربية باش كتابة اللغة الأمازيغية.

بما أن تشلحيت لوغا من لوغات لأمازيغية لمغربية، ف حتى هي كاين لي كايكتبها ب تيفيناغ خصوصا أن كاينين شي ناس لي بنسبا ليهم تيفيناغ شي حاجة ضرورية. هاد نوع دلكتبا كاين خصوصا فلكتوبا لي كاتخرج ليركام، و كايخدموها ناس لي عندهم دراية بالشأن الأمازيغي ولا كايهتمو بللغات الأمازيغية و حتى صحاب لافاك لي كايقراو لأمازيغية، غير هو لمشكل ديالها أن الناطقين بتشلحيت أغلبيتهم ماكايقشعو فيها والو، هادشي بسباب قلة لمدارس فاش كايتقرا هاد لحرف، هادشي كايخلي لحرف نطاق استعمالو محدود عند ناس لي مهتمين بالأمازيغية.

على حساب دستور لي تصوت عليه ف 2011 ف لمغريب، لأمازيغية لوغة رسمية مع لعربية. ف 1994، قال لحسن التاني بلي لهجات لأمازيغية غادي يولي عندها وضع رسمي؛ تلفازا بدات كتدوز برامج بللهجات ب تلاتة (تمازيغت ديال وسط لمغريب، ريفية، و سوسية) تلاتة د لمرات ف نهار؛ وبداو كيطورو كتوبة للتدريس ديالها. ف 17 ؤكتوبر 2001 وقع لماليك محمد ساديس ضهير 299-01-1 لي حدت و نضم بيه لمعهد لملكي للتقافة لأمازيغية، ليركام. هاد لمعهد مسيرو مجلس فيه خبراء، فنانين و ناشطين أمازيغ كلهم كيعينهوم لماليك. لمعهد لي لمقر ديالو ف رباط، لعب دور مهم باش تقنن وترسم لكتابة ديال تيفيناغ. لمعهد ما كيخدمش باش يعوض للهجات ديال تمازيغت بلوغة أمازيغية موحدة. ولكن لمعيرة كتحافض على لخصوصية ديال لهجات بتلاتة، وغير كتعوض لمصطلحات لي موخودة من لعربية ولا لفرونسي بمصطلحات أمازيغية، وكتزيد لمصطلحات لي هما ناقصين. متلا ف لمعجم رسمي ديال لمعهد، لكلمة ديال بلاد كترجم تامازيرت، لي هو لمصطلح لي متداول ف سوس لأطلس، وتامورت، لي هو لمصطلح لمتداول ف ريف.




#Article 430: أورانوس (157 words)


أورانوس هو لكوكب سّابع من شّمش. سميتو جايا من لإله ليوناني ديال سّما، أورانوس، لّي، بحساب لميثولوجيا ليونانية، كان هو جد زّوس (جوپيتر) ولأب ديال كرونوس (ساتورن). عندو تالت أكبر شعاع كوكبي ورابع أكبر كتلة كوكبية ف لمجموعة شمسية. أورانوس كايشبه ف تّركيبة لنيپتون، وبجوج عندهوم مجموعة د لمكونات شيميك لي مبدلة على عمالقة لغاز لي كبر منو ولي هوما جوپيتر وساتورن. لهاد سّباب لعولاما غالبا ما كايصنفو أورانوس ونپتون ك عمالقة تّلج باش يفرقوهوم علا عمالقة لغاز لوخرين. لجو ديال أورانوس كايشبه لديال جوپيتر وساتورن ف تّركيبة لأساسية ديال لهيدروجين ولهيليوم، بلحاق عنو تلوجا كتر بحال لما ولآمونيا ولميتان، معا آتار ديال هيدروكاربورات آخرين. عندو أبرد جو كوكبي ف لمجموعة شّمسية، ولحرارة طّايحة ݣاع هي 49 كيلڨين (224- °سيلزيوس؛ 371- °فاهرنهايت)، وعندو تركيبة معقدة وبطبقات ديال لجو لي فيه لما لي كايضنو لعولاما بلّي كاين ف سّحاب لتحتاني ولميتان ف سّحاب لفوقاني ݣاع name=Lunine, Jonathan I. 1993/ لداخل د أورانوس متكون ب لأساس من تلوجا ولحجر.




#Article 431: مملكة سيكيم (102 words)


مملكة سيكيم كانت مملكة قديمة من 1642 تال 16 ماي 1975.

ف 1861 سيكيم رجعت محمية ديال لمملكة لمتحدة. وبعد، مين لهند رجاعت بلد ديالا ف 1947، سيكيم دابا رجعت محمية ديال لهند.

ف 1975، لجيش لهندي دخال ف لعاصمة ديال سيكيم (گانگتوك) وأخاطوا لقصر ديال لتشوگيال (ملك ديال سيكيم). بعد هذا، ف ريفيرَندُم (referendum) على لملكية، 97% ديال لشعب صوتوا بيش تسالي لملكية. وبعد، سيكيم رجعت دولة ديال لهند.

ف لثقافة و لدين، سيكيم كانت مكونيكطي بزاف مع لتبت (فين جات منه لملك لأول)، و بوتان. حيتش كان عدد كبير د لسكان لنيپالي، سيكيم كانت عندا تا لكونيكسيون لثقافية مع نيپًال.




#Article 432: طوكيو (178 words)


طوكيو (ب جّاپونيّة: 東京, Tōkyō و كاتعني لعاصيمة د شّرق) هي لعاصيمة د جّاپون. كايسكنو فيها 13 مليون و 800 ألف واحد (على حساب لإحصائيات د 2018) و 42 مليون و 794 ألف يلا حسبنا لميطروپول لكبيرة ديالها.

طوكيو جات ف سّاحل شّرقي د أكبر دزيرة جاپونية هونتشو، و هي من لقرن 17 أهم مركز سياسي و تقافي و قتيصادي د جّاپون و كاينين فيها لمؤسسات لكبار ديال لبلاد بحال لقصر ديال إمبراطور د جّاپون، لبرلمان و لحوكومة.

ف لبدو، كانت طوكيو غير قرية صغيرة د صّيادة سميتها إيدو و بدات شوية ب شوية كاتكبر ب شكل دائري على واحد لغابة كبيرة سميتها شيودا. ف 1603، ولات لقصبة لعسكرية رّئيسية ديال طوكوگاوا لياسو، لّي ردّها من بعد عاصيمة ديال لحوكومة لإقطاعية ديالو. بين 1603 و 1886 كبرات لمدينة ب واحد شّكل سريع و صبحات من أكتر لمدون لمزاحمة ف لعالم: ف لّخر د لقرن 18، كانو ساكنين فيها مليون واحد.

من بعد من ترجّعات لإمبراطورية ف 1868 تبّتات لمدينة بلاصتها ديال لقلب سّياسي و تقافي د جّاپون و لقصر د إيدو ولا هو لإقامة ديال لإمبراطور لميجي كوكيو.




#Article 433: مصطفى أزموري (إسطيبانيكو) (864 words)


مصطفى أزموري (1501 - 1539)، و المعروف ب السمية ديال إسطيبانيكو (ستيڤن الصغير) كان مكتشف مغربي من أزمور، خدّام عند الصبنيول، اللي ولا المكتشف الافريقي اللول ديال أمريكا الشمالية. تقال عليه بيلا هو الراجل الافريقي العضيم ف أمريكا. معروف ب السميات ديال إسطيبان دي دورانطيس (Esteban de Dorantes)، إسطيبانيكو، و إسطيبان الموري. تباع ل واحد النبيل صبنيولي ف 1521، و مشا ف 1527 ف الرحلة الاستكشافية الصبنيولية ديال نارڤايز باش يأسس مستعمرة ف لا فلوريدا، اللي ف داك الوقت كانت مكونة من فلوريدا ديال دابا، و الأراضي اللي ما تكتاشفوش ف الشمال و الغرب.

مصطفى أزموري تسجل ف التاريخ ب بزاف ديال السميات ف اللغات البرطقيزية، الصبنيولية، النڭليزية، و العربية. السميات اللي شايعين بزاف هما إسطيبانيكو، ستيڤن الكحل، إسطيبان، إسطيبان الموري، و ستيڤن (دي) دورانطيس على ود المالك ديالو أندريس دورانطيس. السمية ديال إسطيبانيكو هي تصغير ديال إسطيبان على حساب القواعد ديال التصغير ف اللغة الصبنيولية، و اللي الصبنيول كيخدموه فاش كيعيطو على دري صغير ولا على عبد.

مصطفى أزموري تباع مع العبيد ف 1522 ف المدينة ديال أزمور اللي ف داك الوقت كانت تحت الحكم ديال البرطقيز. شراه أندريس دورانطيس دي كارّانزا، من الطبقة ديال النبلاء ف الصبنيول. بلا شك، غادي يكون تربى على الإسلام، بلحاق حيتاش صبانيا ما كانتش كاتسمح ل الناس اللي ماشي كاطوليكيين يسافرو ل العالم الجديد، بزاف ديال المؤرخين كيقولو بيلا مصطفى أزموري عتانق المسيحية باش يشارك ف الرحلة، و السمية ديال إسطيبان تقدر تكون دليل على هاد الكلام. المسألة ديال واش بقا مسلم ف السر ولا لا ما يمكنش ليها تتعرف من السجلات التاريخية.

الرحلة الاستكشافية اللي قادها الأديلانطادو (المحافض) الجديد ديال لا فلوريدا خرجات من كوبا ف فبراير 1528 باش تمشي ل الجزيرة ديال لاس پالماس حدا طامپيكو، المكسيك. الهدف ديال هاد الرحلة كان هو التأسيس ديال جوج مستعمرات. العواصف و الأرياح القويين جعلو الأسطول يتّاجه ل الضفة الغربية ديال فلوريدا. الرحلة وقفات ف المنطقة اللي هي دابا سان پيترسبورڭ، فلوريدا. الرحالة نارڤايز (اللي تسمات عليه الرحلة) أمر 100 د الرجال و 10 د النسا يتّاجهو ل الشمال و يقلّبو على واحد المرصى كبيرة اللي الپيلوط كان أكد ليهم الوجود ديالها. قاد 300 راجل ب 42 عود حتى هو ف الاتجاه ديال الشمال باش يعاودو يتلاقاو الاخرين ف المرصى الكبيرة. المشكلة هو ما كانت كاينة حتى مرصى كبيرة، و نارڤايز ما عمرو عاود شاف الرجال ديالو. ملي تمشّاو 500 كيلومتر تقريباً، بداو كيبنبو باطويات باش يمشيو ل الغرب و يوصلو ل پانوكو و ل الواد ديال لاس پالماس. ف الطريق، واحد العاصفة قوية غرّقاتهم ملي كانو حدا الجزيرة ديال ڭالڤسطون، طيكساس. تقريباً 80 واحد نجا من هاد العاصفة ملي دّاهم البحر ل الضفة ديال الجزيرة د ڭالڤسطون. مور 1529، مصطفى أزموري و جوج ديال الناجين اخرين ولاو عبيد عند الهنود الكواهويلتيك. و ف 1532، تجمع معاهم الناجي الرابع، اللي هو كابيسا دي باكا.

الرجال ب ربعة بيهم (كابيسا دي باكا، أندريس دورانطيس دي كارانزا، ألونسو ديل كاسطييّو مالدونادو، و مصطفى أزموري) هربو من العبودية ف 1534 و سافرو ف الغرب ديال طيكساس و الشمال ديال المكسيك. كانو هما أول أوروپيين و أول أفريقي وصلو ل الغرب الميريكاني. ملي تمشاو كتر من 3000 كيلومتر، وصلو ل واحد المستوطنة صبنيولية ف سينالوا و موراها سافرو ل مكسيكو سيتي، 1600 كيلومتر ل الجنوب.

ما كناش غادين نعرفو بزاف على مصطفى أزموري لو ما كانش الكتاب ديال كابيسا دي باكا (واحد من الرجال الناجين) اللي كيهضر فيه على رحلة النجاة ديال 8 سنين و اللي عنونو ب العلاقة (La Relación). هاد الكتاب هو الكتاب اللول اللي كيوصف شمال أمريكا ب الناس ديالها، الحياة البرية اللي فيها، الفونة، و الفلورة ديالها. ف هاد الكتاب، كابيسا دي باكا سمّا مصطفى أزموري ب الكحل و قال عليه بيلا كان ديما ف المقدمة حيتاش كان هو أفضل واحد كيعرف يهضر مع الهنود مزيان.

تلت سنين من بعد، مصطفى أزموري ولّى هو الڭيد الرسمي ديال نايب الملك ديال صبانيا الجديدة (المكسيك) ف 1539 باش يرجعو ل الجنوب الغربي ب القيادة ديال فراي ماركوس دي نيزا. الهدف ديالهم كان هو يلقاو المدن السبعة ديال سيبولا اللي كانو مدكورين ف الأساطير. مصطفى كان ديما ف المقدمة و كان كيتواصل مع الفريق غير ب الرموز اللي كان كيخلّي من وراه. الرمز اللي كيصيفط وراه كيكون على الشكل ديال صليب اللي الحجم ديالو كيعبر على الحجم ديال التروة اللي مصطفى كان كيلقى. واحد النهار، دي نيزا (القايد ديال الرحلة) لقى واحد الصليب طويل قد بنادم، الشي اللي جعلو يتحمس. مصطفى، على ما كيبان، كان وصل ل الڤيلاج الأشيوي ديال هاويكوه (ف نيو مكسيكو ديال دابا). القصص ديال اللقاء مابين مصطفى و هاد الڤيلاج كاملين مبنيين على أساطير، و حتى واحد ما عارف ب الضبط شنو وقع. دي نيزا كيقول بيلا وصل ليه الخبار بلي الناس ديال الڤيلاج قتلو مصطفى، و ملي سمع هادشي هرب من الطريق اللي جا منها و رجع ل صبانيا الجديدة.

ما كاين حتى تأكيد على السبب ولا الطريقة اللي مات بيها مصطفى أزموري. القصص كاملين مبنيين على أساطير ولا على توقعات. كاين اللي كيقول بيلا الناس ديال الڤيلاج قتلوه حيتاش طلب ليهم الفيروز و النسا. و كاين اللي كيقول بيلا قتلوه حيتاش كان كيشبه ل السحّار القبيح شايكوانا اللي كاين ف الديانة الزونية. خوان فرانسيسكو ماورا كيقول بيلا الناس ديال الڤيلاج ما قتلوهش، سينو صيفطو الخبار ديال الموت ديالو باش يقدرو يحرروه من العبودية. و كاينة أساطير اللي كاتقول بيلا الوجه التمتيلي ديال السحّار شايكوانا ف الديانة الزونية ديال دابا مبني على المضهر ديال مصطفى أزموري.




#Article 434: تيران أدرار (120 words)


التيران لكبير دأدرار أولا التيران الكبير دأݣادير هو تيران ديال لكورة كاين فمدينة أݣادير لمغريبية وتحلو بيبانو نهار 11 شهر 10، 2013. كاين هاد التيران فلملكية ديال وزارة الشباب والرياضة وكتسيرو الشركة لوطنية ديال إنشاء وتسيير التيرانات (SONARGES). كيستقبل هاد التيران دابا لميتشان ديال لفرقة دلمدينة، حسنية أݣادير ومرة مرة دياول أولمبيك الدشيرة.

بدات لخدمة فلبني ديال التيران نهر 4 شهر 6، 2004 بواحد التمن اللي وصل لـ860 مليون درهم مغريبي. كانت لخطط كتوقع باللي لبني غايسالي والتيران غايوجد فـ2007، باش إتنضم كاس لعالم فلمغريب فعام 2010. من ديك لوقت والتمويل ديال لمشروع غادي وكايتفرق على السنين حتى سالا لبني ديالو فشهر 8 ديال 2013. من ديك لوقيتة والتيران كيستقبل لميتشان ديال حسنية أݣادير وهو التيران لحالي ديال لمنتخب لوطني.




#Article 435: وعد بلفور (361 words)


الوعد د بَلفور ولا الإعلان د بَلفور، واحد البيان عام دارتو الحكومة البريطانية ف 1917 ف الوقيتة د الحرب العالمية اللولا علنات بلّي غايعاونو ف التأسيس ديال بلاد وطنية ل الشعب ليهودي ف فلسطين، اللي كانت واحد المنطقة عتمانية فيها أقلية صغيرة د ليهود. هاد الإعلان جا ف واحد الرسالة ف تاريخ 2، شهر 11، 1917 من الوزير د الخارجية د المملكة المتحدة أرتر بلفور، ل اللورد روتشيلد، واحد الزعيم د المجتمع الليهودي البريطاني، باش يعطيها ل التيحاد الصهيوني د بريطانيا العضمى ؤ إيرلاندا. النص د الإعلان نشراتو الصحافة ف 9، شهر 11، 1917.

ديك الساعة مور الإعلان د الحرب على الامبراطورية العتمانية ف شهر 11، 1914، الكابينة د الحرب البريطانية بدات كاتفكر ف المستقبال د فلسطين؛ ف شهراين واحد المدكرة كانت كاتدور تما ف الكابينة، ديال واحد العضو صهيوني، سميتو هيربرت صمويل، كايقتارح فيها الدعم ديال الطموحات الصهيونية باش يربحو الدعم د ليهود ف الحرب. الرئيس د الوزارا ه. ه. أسكويت دار واحد اللجنة ف 1915 باش يعزلو السياسة ديالهوم معا الامبراطوية العتمانية اللي فيها حتا فلسطين. أسكويت اللي كان معا الإصلاح د الامبراطورية العتمانية مورا الحرب، استقل ف 1916، ديڤيد لويد جورج اللي جا موراه كان معا التقسيم ديالها، المفاوضات اللولا بين البريطانيين ؤ الصهيونيين كانت ف المؤتمر د 7 شهر 2، 1917 اللي كان فيها السير مارك سايكس ؤ القيادة د الصهيونيين. المناقشات اللي موراها جا واحد الطلب د بلفور، ف 19 شهر 6، ل روتشيلد ؤ تشيم ويزمان باش يحطّو واحد المسودة د الإعلان العام. مسودّات وحداخرا تناقشات ف مجلس الوزارا البريطاني ف شهر 9 ؤ 10، كانو شي مداخلات د ليهود الصهيونيين ؤ اللي ضد الصهيونية ولكن ماكانش حتا تمتيل د السكّان المحليين د فلسطين.

ف اللخر د 1917 ، قبل الإعلان د بلفور ، وصلت الحرب لواحد الطريق مسدود ، كان باقي ماشاركو فيها مزيان جوج من الحلفاء د بريطانيا: ميريكان كان باقي ماعندها حتا خساير ، ؤ الرواسا كانت عندهوم التورة حيت البلاشڤة كانو شادّين الحكومة. الجميد ف الجنوب د فلسطين تهرّس بسباب المعركة د بير السبع في 31 شهر 10، 1917. توافق باش يخرج البيان اللخراني ف 31 شهر 10. المناقشة د مجلس الوزرا اللي فاتت بينات الفايدة د الپروپّاڭاندا وسط المجتمع د ليهود ف ڭاع العالام ل الجهود د الحلفاء د الحرب.




#Article 436: عبد لجبّار لوزير (294 words)


عبد لجبّار لوزير (خلاق ف مراكش ف 1932و توفّا ف 2 شتنبر 2020 ف مراكش) ممتّيل مسرحي مغريبي كان من رّواد د لمسرح ف لمغريب و من نّاس لّي وضعو سّاس ديال بزّاف ديال لفراقي د لمسرح ف مراكش مع سميات خرين بحال محمد بلقاس.

عبد لجبار لوزير متل حتا ف بزاف د لأعمال ف تّلفازا و سّينيما. كان لعمل لّخر ديالو لّي لقا نجاح كبير ف لمغريب هو مسلسل دار الورثة لّي داز ف لقناة لمغريبية لّولا ف 2010.

عبد لجبار ولد درب لگزا ف رياض لعروس ف مراكش. كبر ف عائيلة على قدّها بحيت بّاه كان كايخدم خرّاز و من بعد خدم ف لفلاحة و تاكسّابت. كبر عبد الجبار ف لمدينة لقديمة د مرّاكش و ما كمّلش قرايتو، بدا صّنعة بكري و خدم ف دّباغة و تانجّارت.

فاش وصل ل 15 لعام تقيّد ف لكوكاب لمرّاكشي (ف نفس لعام لّي تأسّسات فيه لفرقة ف 1948) و لعب گارديان ديال لفرقة د جونيور.

عبد الجبار بدا لمسرح مع لفرقة د الأطلس الشعبي لّي كان كايسيرها مولاي عبد الواحد حسنين. أول مسرحية ديالو كانت هي الفاطمي و الضاوية ف 1951 لّي لعبها معا محمد بلقاس، و هي لمسرحية كانت تعرضات قدام لماليك محمد لخاميس ف قصر لباهية ف مراكش ف 1957.

عبد الجبار لوزير كان ناشط ف لحركة لوطنية يامات لستيعمار و تحبس من بعد ما تّنفا محمد لخاميس ف 1953. كان تّحبس ف حبس لعلو ف رّباط و تمّا تعلّم لقراية و لكتابة على يد مقاومين كانو معاه ف لحبس. من بعد لستيقلال خدم مردة ف لقوات لموساعيدة ل مدة 4 سنسن قبل ما يخرج منها و يتفرّغ ل لكاريير ديالو ف لمسرح و تّمتيل.

مع بلقاس، شكّلو بجوج تونائي فوكاهي و كانو كايقدّمو عروض تونائية كوميدية.

عبد الجبار توفا ف 2 شتنبر 2020 من بعد ما قاسا عوام طويلة مع مرض سّكار.




#Article 437: موركاب محمد الخامس (149 words)


لموركاب الرياضي محمد الخامس أولا تيران محمد الخامس، كيتسمى حتى ستاد دونور هو موركاب كاين فوسط مدينة الدار البيضا لمغريبية، فمنطقة لمعاريف. التيران فيه 67.000 كرسي وقدر يهز حتال 95.000 مشجع. واخا كيكونو فيه بزاف ديال لميتشان ديال لمنتخب لوطني، فراه التيران ديال محمد الخامس كيشهد لميتشان ديال جوج من أكبر لفراقي فلبلاد، واللي هوما الوداد البيضاوي والرجاء البيضاوي. جا التيران فسونطرڤيل ديال الدار البيضا، بعيد على لمطار الدولي بشي 25 كيلوميتر و5 كيلوميتر على لمحطة ديال كازا دالتران دلمسافرين.

لموركاب اليوم فيه إلى جانب التيران، واحد لقاعة متعددة الرياضات كتهز 15.000 متفرج، پيسين أولمبي مفتوح، قاعة ديال الندوات، مركز إعلامي فيه 650m²، قاعة ديال لجتيماعات، مركز ديال لعلاجات ومركز ديال محاربة لمنشيطات.

حل هاد التيران بيبانو نهار 6 شهر 3، 1955 تحت مسمى ستاد مارسيل سيردان، من موراها بعام تبدلات سميتو للملعب الشرفي. من مورا ليصلاحات ديال 1983 باش تنضم فيه ألعاب لبحر لمتوسط، خدا التيران سميتو لحالية.




#Article 438: لخو لكبير (276 words)


لخو لكبير ولا لبيگ براظر (من نگليزية Big Brother) هو ف لاصل ديالو شخصية متخيّلة ف رّيواية دّيسطوپية 1984 د جورج أورويل و لّي كاتشير ل دّيكتاتور د دّولة د أوصيانيا و شّاف د لحيزب لوحيد لّي مسيطر على كولّشي فيها. لمفهوم د لخو لكبير كايتستعمل حتا باش يوصف لمؤسسات (دول، شركات، مؤسسات حوكومية بحال لموخابرات) لّي ما كاتحتارمش حقوق لإنسان لأساسية و لحياة لخاصّة د لمواطنين.

شّخصية د لخو لكبير ف رواية 1984 هي ديال واحد دّيكتاتور د واحد لبلاد متخيّلة سميتها أوصيانيا ف واحد لعالم مستقبلي دّيسطوپي. هاد دّيكتاتور فارض عبادة شّخصية على لمجتمع ديالو و شّعار لّي كايتعاود بزّاف ف دّولة هو Big Brother is watching you يعني لخو لكبير راه حاضيك و على حساب سّياسة د لپروپاگاندا لّي داير، كاتلقاه معمّر لّافيتات ف شّوارع ديال لبلاد.

لخو لكبير كايحضي لمواطنين كاملين و عارف آش كايديرو حتّا ف لبلايص لحميمية و لخاصّة ديالهوم: دّيور كاملين معمّرين ب أجهزة د لمراقبة و لحضية.

لخو لكبير عمّرو ما كايبان و ديما كايتصوّر ب وجه راجل عندو 45 عام ب شّلاغم و كايشوف ف لعينين نيشان ب واحد شّكل لّي كايرهب.

على حساب رّيواية رّسمية لخو لكبير هو لّي أسّس لحيزب لوحيد د لبلاد و عندو بزّاف لبوطولات و لإنجازات الثورية و لحربية.

لقضية ديال أنه كايبقا ديما صغير ب نّسبة لداكشي لّي كايتقال عليه كايخلي نّاس تشكّ واش بصّاح كاين و بأنه يقدر يكون غير ختيراع ديال لماكينة د لپروپاگاندا د لحوكومة د أوصيانيا.

لخو لكبير ولّا من بعد ما تشهرات رّيواية د أورويل رمز باش كايتوصفو دّول ولا لمنظمات لّي فيهوم تفرعين كبير ديال لبوليس ولا لموخابرات ولا لأنظمة لأمنية لّي فيها لمراقبة لمعيّقة ديال كولشي و كتيرشي فاش ماكاتحتارمش لحياة لخاصّة د نّاس.




#Article 439: كونڤيرسوس (174 words)


الكونڤيرسوس (من الصبنيولية و البرطقيزية conversos اللي كاتعني المعتنقين ولا المتحولين، و اللي اليهود كيفضلو السمية ديال الأنوسيم من العبرية אנוסים اللي كاتعني المكرهين) هما اليهود اللي تحولو ل الكاطوليكية ف صبانيا و البرطقيز، خصوصاً ف القرون 14 و 15، و حتى ولادهم و الحفايد ديالهم. الأغلبية ديال اليهود تحولو ل المسيحية ب سباب البوػروم ف 1391. باش الصبنيول يتأكدو بيلا الكونڤيرسوس ولاو مسيحيين حقيقيين و ما كيمارسوش الديانة ديالهم ب التخبية، تأسس المكتب المقدس ديال المحاكم د التفتيش ف صبانيا ف 1481. الملوك الكاطوليك فيردينان و إيسابيلا كانو طردو اليهود اللي ما بغاوش يرجعو مسيحيين ب مرسوم ديال ألامبرا ف 1492، من مور الريكونكيسطا. الأغلبية ديال هاد اليهود هربو ل الطاليان و المغرب. عليها، بزاف ديال اليهود فضلو باش يدخلو ف المسيحية باش ما يتطردوش.

الكونڤيرسوس اللي بقاو كيمارسو اليهودية ب التخبية كانو كيتسمّاو Judaizantes (المتهودين) و ب شكل قبيح، كانو كيسمّيوهم marranos (الحلالف).

الكونڤيرسوس لعبو دور كبير و مهم ف التورة ديال الكومونيروس (1520-1521) اللي كانت انتفاضة شعبية تسببات ف حرب أهلية ف المنطقة ديال كاسطييا ضد النوايا الامپريالية ديال الملك الصبنيولي.




#Article 440: تيران بن بطوطة (120 words)


تيران بن بطوطة أولا سطاد بن بطوطة هو سطاد ديال لكورة ولألعاب الرياضية جا فجنوب غرب مدينة طنجة لمغريبية. تسمى على الرحالة لمغريبي لمشهور ابن بطوطة، وفيه شي 45.000 بلاصة. لبني ديال هاد التيران خدا 844 مليون درهم مغريبية، كتلعب فيه اتحاد طنجة لميتشان ديالها وكتدعمو الدولة.

كيهز هاد التيران شي 60.000 متفريج، مابينها 7.150 بلاصة للصحافة و550 بلاصة VIP، مع امكانية التوسيعة فلڤيراج الشمالي والجنوبي. التيران بعيد على الصونطرڤيل بـ10 كيلوميتر، نفس لمسافة باش بعيد على محطة طنجة لمدينة وبعيد على لمطار ديال طنجة بـ4 كيلوميتر. الدخول كيكون من 17 باب مع واحد الدخلة أساسية بمنضر زوين. كاين تما واحد لمركز إعلامي على مساحة 600m²، واحد لمصحة وپاركينݣ منظم كايهز 7.500 طوموبيلة. كيتعتابر هاد السطاد من أكبر التيرانات فلمغريب.




#Article 441: جورج أورويل (339 words)


جورج أورويل (ب نڭليزية: George Orwell)، و هي غير سميّة د شّهرة: سميتو لحقيقية إيريك آرثر بلير Eric Arthur Blair، خلاق ف موتيهاري ف لهيند ف 25 يونيو 1903 و مات ف 21 يناير 1950 ف لوندون، هو كاتيب و صحافي بريطاني.

جورج أورويل خلاق ف لهيند لبريطانية ف 1903. قرا ف بريطانيا و مشا مزيان ف دّراسة ديالو تا تخرّج من لكوليج د إيطون.

فـ1922، ختار يدخل ل لعسكر و خدم سارجان ف لجيش لستيعماري لبريطاني ف بيرمانيا. ما حملش تمّا تّصوفيج ديال لستيعمار لبريطاني و ديميسيونا من لعسكر ف 1927 و قرّر باش يتفرّغ ل لكتابة. بقا كايصور طرف د لخبز ديالو ب خدامي صغار و ضعاف بزّاف ف صحتو ب سباب مرض صّدر. واخّا هاكداك قدر يبدا ينشر رّيوايات ديالو.

فـ1936، مشا ل سپانيا و گاجا مع لقوّات لجمهورية، مع لحيزب لعمّالي د لوحدة لماركسية POUM، لّي كانت كاتحارب ضد فرانكو و كتب بزّاف على لحرب لأهلية سپانيولية. تبليسا ف لحرب و رجع ل لوندون و صدر لكتاب ديالو ف خاطر كاطالونيا (Homage to Catalonia)، و لّي عاود فيه على نّيضال ديالو مع ل POUM، و كيفاش تّيار سّطاليني فرع هاد لحيزب ف سپانيا.

فـ1938، ريوائي ليو مييرز خلص بتخبية لأورويل تصافيرة للمغريب لست شهور باش يتشافا من سل و من جرحة ف لحلق لي تصاب بيها ف لحرب. هو و عائيلتو شدو طريق ف شتنبر 1938 من جبل طر و طانجا باش يتجنبو شمال لمغريب لي حاكماه صبنيول؛ وصلو ل مراكش فـ11 شتنبر و كراو فيها ڤيلا على طريق دارلبيضا. ف ديك لوقيتة، كتب أورويل ريواية طلوع لهوا (Coming Up for Air)، و حتا واحد لمقالة ب سميت مراكش فين هضر علا ستيعمار و لحالة ديال سكان لمغاربة.

ف لحرب لعالمية تّانية خدم صحافي معا ل بي بي سي BBC و فديك لمرحلة كتب رّيواية لمشهورة ديالو لفيرما د لبهايم و لّي دارها على شكل حكاية و معنا فيها بزّاف على نّيضام د سطالين.

من بعد مرض ب سّل و هو لمرض لّي بقا كايعاني منو تال لموت ديالو ف 1950.

لعوام لّخرة د حياتو هي لّي كتب فيها أكبر و أشهر ريواية ديالو 1984.




#Article 442: البيرة ف المغريب (132 words)


الإنتاج د البيرة ف المغريب دخّلوه الفرانصاويين ف القرن 20. Société des Brasseries du Maroc (الشركة د البراسريات د المغريب) اللي هي جزء من الڭروپ د كاسطل، مكلّفة ب الإنتاج ؤ التوزيع د البيرّة. الماركات المعروفة د البيرة فيهوم سپّيسيال فلاڭ (Spéciale Flag) من نوع پيلسنر ؤ سطورك (Stork) من نوع پال ليجي. البيرّة الكلاس ف المغريب هي كازابلانكا (Casablanca) حيت غالية على الجوج لاخرين. كازابلانكا كاتصدّر ؤ كاتباع ف الجيهة د المغريب ف إپكوت ف العالام د والت ديزني، ف أورلاندو، فلوريدا.

الوزينات د الشركة د البراسريات د المغريب كاينين ف فاس، طنجة ؤ كازا، ؤ كاين واحد الوحدة ديال التعمار د القراعي ف مراكش.

أكتر بيرّة عالمية كاتباع ف المغريب هي هينيكين (Heineken)، اللي كاتخمرها شركة مشروبات المغريب (الشركة د البراسريات د المغريب سابقا) محلّيا تحت الإشراف د هينيكين العالامية.




#Article 443: موركاب مولاي عبد الله (108 words)


لموركاب الرياضي مولاي عبد الله هو مركب متعديد الرياضات تدشن نهار 29 شهر 1، 1983. التيران كاين فجنوب غرب مدينة الرباط وقريب من لبدال دلوطوروت. هاد لموركاب كيتبع للوكالة لحضرية ديال الرباط وكيمتل معقل لفرقة ديال الجيش الملكي ولمنتخب لوطني لمغريبي. كيهز هاد التيران 53.000 متفريج ما بينها 10.000 بلاصة مغطاة.

لموركاب فيه تيران ديال لكورة وقاعة مغطاة ديال 10.000 متفريج، پيسين وقاعة ديال الرياضة. هاد الصطاد هو لكبير ݣاع فلمغريب، داكشي لاش كيتلعب فيه بزاف ديال لميتشان ديال لمنتخاب لوطني. فلمجمل كيهز الصطاد 68.000 بلاصة مرقمة بلكراسة، ما بينها 30.000 مغطية، 1.500 للـVIP والشخصيات الرفيعة، 5.000 للصحافة و500 لذوي لحتياجات لخاصة.

بنسبة للمرافيق ديال لإعلام، لموركاب فيه:




#Article 444: حزام د كويپر (124 words)


لحزام د كويپر ولي مرا مرا كايتسمى حزام إدجوورث، هو قرص نجمي دوّار ف نّظام شّمسي لبرّاني، وشاد من لوربيط د نپتون (ف 30 وحدة فضائية) تال تقريبا 50 وحدة فضائية من شّمش. كايشبه للحزام د لآسطرويد، غي هو كبر بزاف ـ 20 مرة وسع و20 تال 200 مرة تقل. بحال لحزام ديال لآسطرويد، كايتكون بلأساس من أجسام صغيرة أولا بقايا ملّي كان نّظام شّمشي كايتكون. فلوقيتة لي بزاف د لآسطرويد كايتكونو بلأساس من لحجر، لأغلب لأجسام لّي ف لحزام د كويپر كاتكون من مواد متطايرة جليدية (ولي كاتسما تلوجا)، بحال لميتان ولآمونيا ولما. ف لحزام د كويپر كاينين تلاتة د لكواكب لقزمة بحال پلوتو وهوميا وماكيماكي. بعد لأقمار ديال لنظام شّمسي، بحال تريتون ديال نپتون وفيبي ديال ساتورن يقدرو يكونو تكونو ف لحزام.




#Article 445: سبع (122 words)


سبع، حيوان من تدييات من فصيلة القططيات، و هو واحد من القططيات الكبار الربعة، كاينتاميو لڭنس النمر (باللاتينية:Panthera) ،و هو تاني اكبر واحد فيهم مورا النمر د آسيا، السبع الدكر كايوزن كتر من 250 كيلوڭرام. كتيرة السبوعة اللي باقية فالخلا فهاد الوقت عايشة فاِفريقية جنوب الصحراوية، و باقة فرقة صغيرة منهم عايشة فآسيا، بالضبط ولاية الڭوجارات فالشمال غرب الهند،

شحال هدا, كانت موطن السبع كبير بزاف، حيت كان يتلڭى فالمغرب الكبير و الشرق الاوسط و آسيا الغربية ، و بداو كاينقارضو غير بعض قرون هادِه، و غير حتى لبدية العصر الحديت (الهولوسين، جوايه 10،000 سنة) كانو السبوعة كايتعتابرو تاني التدييات فنتشار مورا بنادم، حيت كانت كانت فكتيرة البلايص فاِفريقيا و شلّا بلايص فيوراسيا من يوروبّا الغربية تالهند و فميريكا من يوكون تالبّيرو.




#Article 446: جهة مراكش آسفي (490 words)


جهة مراكش آسفي (بلأمازيغية: ⵜⴰⵙⴳⴰ ⵏ ⵎⵕⵕⴰⴽⵛ ⴰⵙⴼⵉ، بالفرانساوية: Marrakech-Safi) وحدة من لجيهات ديال لمغريب اللي تصايبو عام 2015، من مورا ما نقصو عدد لجيهات من 16 لـ 12. لجيهة كاينة فلوسط الشمالي ديال البلاد، ولعاصيمة ديالها هي مراكش، و مابين لمدون اللي كاينين فلجيهة: آسفي والصويرة وشيشاوة وقلعة السراغنة وليوسوفية. عدد السكان على حساب لإحصاء اللي تدار فـ2014 وصل فهاد لجيهة لـ4.520.569. لميساحة ديال لجيهة هي 39,167 كم².

هاد لجدوال كايبين لأقاليم ديال لجيهة والسكان ديالها:

جهة مراكش محاديها من الشمال جيهة كازا سطات ومن لجانوب جيهة سوس ماسة ومن الشمال الشرقي جيهة بني ملال خنيفرة ومن لجانوب الشرقي جيهة درعة تافيلالت. هاد لجيهة فيها بزاف ديال لخصائص لجغرافية بحال أنه دايز منها جبال لأطلس لكبير وراس جبل توبقال ؤويدان بحال واد نفيس، زيادة على شلّة سهول وتلال. لميساحة ديال لجيهة واصلة لـ39,167 كم². هاد لجدوال كيعطي لمعلومات على لحرارة والشتا فمدينة مراكش اللي هي لعاصيمة ديال لجيهة.

مطار مراكش الدولي (مطار مراكش لمنارة) هو مطار كاين فمدينة مراكش وكايسيرڤي لجيهة ديال مراكش آسفي. كيبعد لمطار على الصونطرڤيل ديال مراكش بـ9 دلكيلوميتر وكيتعتابر تاني أكبر مطار فلمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج. تفتاتح لمطار فعهد ليستيعمار وتجدد بزاف دلمرات وكايقدر يهز 9 دلملاين دلمسافرين.

كاين مطار آخور فجيهة مراكش آسفي واللي هو لمطار ديال الصويرة الدولي (مطار الصويرة موݣادور) وكيبعد لمطار على الصونطرڤيل ديال الصويرة بـ16 كيلوميتر. كيتعتابر عاشر أكبر مطار فلمغريب من ناحية عدد لمسافرين، وكايقدر يهز 300.000 مسافر.

فلمجال ديال الطرقان كاينين جوج أوطوروطات اللي دايزين فلجيهة ديال مراكش آسفي واللي هوما لوطوروت ديال الرباط - آسفي و لوطوروت ديال الدار البيضا - أݣادير. الطرقان لوطنية اللي دايزين فلجيهة هوما الطريق لوطنية 1 و الطريق لوطنية 7 و الطريق لوطنية 8 و الطريق لوطنية 9 و الطريق لوطنية 11.

واخا لمواريد ديال لما قليلة بالنسبة للسقي مقارنة مع لارض ديال لبور، جهة مراكش آسفي عطات 72 مليون نهار ديال لخدمة فلعام. لميساحة ديال الزراعة فلجيهة واصلة لـ 2 دلمليون دلهكتار، ولمساحة اللي كاتسقى من هاد لارض واصلة لـ351 ألف هكتار. وصل لينتاج ديال الزيتون للعام فلجيهة لـ300 ألف طن، وكاينين غراس فلاحية خرى بحال لمشماش ولبطيخ اللي كاتشد لميساحة ديالهوم 1.800 هكتار والزيت ولعسل ولخضرة والديسير ولغلة واللحم.

جيهة مراكش آسفي معروفة بالصيناعة التقليدية اللي فيها، واللي كاتعطي واحد لقيمة زايدة ليقتيصاد دلجيهة. لجيهة عطات 11.4% من لقيمة ديال لبلاد فهاد لمجال فعام 2015، وخدّمات فهاد لقطاع 8.9% من الشغيلة ديال لبلاد (حرايفية وصناع تقليديين). هاد الصناعة فيها الدباغة ديال الجلود ولحديد لمطروگ ولخزف. لجيهة جاتها 10 دلمليار ديال الدرهم من ليستيثمارات فلبلاد. كاينين بزاف ديال لمناطق الصيناعية فجيهة مراكش آسفي فمدون مراكش، آسفي، الصويرة وقلعة السراغنة. مدينة آسفي فيها بزاف ديال لمصانع ديال تعليب السرديل، ومقاليع ديال لحجر، لكاياس والرملة.

قطاع لخدمات فجهة مراكش آسفي كايعطي 65.3% ديال لقيمة الزايدة فلجيهة و12.6% فلبلاد. هادشي عندو علاقة بجيهة مراكش حيتاش كاتهز لجيهة من ناحية السياحة. كاينة مساهمة ديال مدينة الصويرة بنفس لحاجة، غير أوكان لمساهمة ديالها متعلقة لخدمات اللي ماشي تيجارية أولا اللي هي تيجارية ولاكين خارج لمجال ديال السياحة.




#Article 447: طوماس پيلو (459 words)


طوماس پيلو (بنڭليزية:Thomas Pellow)، تولد فـ1704 و مات فـ1745. توماس بن توماس پيلو و بن اليزابيت، هو كاتب نڭليزي كورني (من كورنوال، المملكة المتحدة) معروف بالكتاب المغرب، طراو ليه شلا تجارب وخدم فشلا صنايع اللي حكى عليهم فكتابه، و داكشي علاش كايتعتابر مصدر مخيّْر علا المغرب فعهد العلويين اللولين.

توماس پيلو تزاد فمدينة پينرين، فاِقليم كورنوال، فبلاد النڭليز. و فاش كان فعمره حضاشر عام، خرج مع عمو للبحر يتاجرو، و هما فطريقهم لمدينة جنوة فالطاليان، شدوهم القراصنة السلاويين، و داوهم للدولة العلوية فين عطاوهم عبيد للسلطان مولاي اسماعين،

فاش السلطان تعطاه توماس، عينه مع بعض دراري اخرين فتنقية السلاح ديال القشلة، و عين عم توماس فالبني ديال سوار مكناس، ولكن ماطولش فهاد الخدمة علاحقاش عطاه السلطان لولده، مولاي الصفا،لي كان سلڭوط و قاسي مع توماس، و فاش مابغاش يسلم (توماس) بدا المير كايسوط فيه ويعطيه الفلقة لبعض سيمانات حتى شهد (سلم بطريقة صورية حيت بقا نصراني فنفسه ). مورا ما دوز شي وقت مع مولاي صفا، السلطان آمر ولده يرد ليه توماس، ولكن المير رفض، وهادشي خلّا مولاي اسماعين يقتله قدّام توماس، معا لوقت، توماس تعين فڭيش عبيد البخاري، و شوية بشوية بدا كايطلع فالڭراد، و تعطاته فرقة دياله يدربها فاش كان عنده 14 عام، ودوز حتى شي وقت و هو حارس دار لالّة حليمة العزيزة، وحدة من عيالات السلطان. و فهاد الوقت فين عز على السلطان بخدمته المتقونة فالعسكر.

فاش كبر شوية، رقّاه السلطان قايد على شي قصبة فقبيلة زعير، وقبل ما يصيفطو جوجو بواحد الصبليونية، و ولد معها ولد وبنت.

توماس فهاد الفقرة من كتابه، عاود بزاف على حياته و هو قايد، كيفاش كان كايخرج يصيد الوحش (الحلّوف، النمر، السبع، الغزال)، اللي كان موجود، و كيفاش شارك فجوج مدابزات مع بعض القبايل دياول الجبال، و مشا فقافلة لبلاد شنقيط (دابا كاينة فالصحرا ديال موريتانيا) باش يجيبو الضرايب ديال صحراوة.

مورا ما مات السلطان مولاي اسماعين، طلع فالحكم مولاي احمد الدهبي، اللي كان ولي العهد، ولكن مورا عامين بداو الخوت اللاخرين كايطمعو فالعرش، و ناضت بيناتهم شلّا حروب، و فهاد لوقات فاش توماس حاول يهرب من المغرب، فاللول خدم طبيب، باش يصور شي بركة باش يعيش بينما يلقى كيفاش يدير يهرب، ومن بعد خدم رقاص (كايوصل البراوات من بلاصة لبلاصة) لبعد التجار بين آسفي و شنتا كروز(اڭادير)، و فاش استقر فآسفي خدم طرجمان بين النڭالزة و المسفيويين.

النڭليزي المسكين حاول يهرب تلت مرات، المرة اللولة من سلا، ولكن ماقدرش علحقاش غدر بيه واحد من الناس اللي كان بغا يهرب معاهم، المرة التانية من مازاڭان (الجديدة) ولكن شدوه المخازنية ديال ازمّور قبل مايقدر يوصل لمقصوده، و المرة التالتة، و اللي هي فين قدر يهرب، من آسفي، حيت لقى واحد التاجر بحار نڭليزي، و اللي دّاه معاه و وصلو تال لوندرة، فاش وصل توماس لبلاد النڭليز، دوز شي ايام فلوندرة، فين تلاقى مع اخت هداك اللي غدرو فالمحاولة اللولة،  و فين تلاقى مع عبد القادر بيريز، السفير ديال السلطان للنڭليز.




#Article 448: هوكّايدو (348 words)


هوكّايدو (ب جاپونية:北海道,hokːaidoː)، وكاتعني الطريق ديال بحر الشمال، و كانت كاتسمى زمان اِزو ولّا ييزو، هي الجزيرة الشماليةما بين الجزاير الربعة الكبار ديال جاپون، و رسميًا، هوكايدو كاتشكل فنفس الوقت عمالة و جهة، عاصمتها هي مدينة صاپّورو، و فالجزيرة عايشين بعض الناس من الآينو، اللي هما السكان اللولين ديال كتيرة جزاير جاپون.

 
هوكايدو كاينة فالشمال ديال الجبّان، قريبة من سيبيريا، و ضاير بها البحر الهادي من الشرق و بحر الجبّان من الغرب و بحر اوخوتسك من الشمال، ومفارقة مع جزيرة هونشو بالبوغاز ديال تسوڭارو.

عمالة هوكايدو داخلة فيها بزاف ديال الجزاير آخرى بحال ريشيري و اوكوشيري و ريبون.

هوكايدو معروفة بصيافها الباردين و الجافّين (حاجة اللي كاتخلّي بزاف ديال السياح يزورو) و شتاواتها الصعاب، الحرارة المتوسطة فشهر غشت كاتكون فجوايه 22 °C ، و فشهر يناير كاتكون ما بين -4 °C  و -12 °C،على حساب خط العرض و العلو ديال كل بلاصة.

الجزيرة فيها شلا رعدات دياول التلج اللي كايجيو من سيبيريا.

هوكايدو فلاصل كانت ارض شعب الاينوو لدابا مازلنا نقدرو نلقاو الاتر ديال لغتهم فسميّات بعض البلايص فالجزيرة، و بزاف ديال المدن، و فشلا انواع ديال الشجر و الحيوان ( بحال يزوماتسو، واللي كاتعني تايدا الصنوبر ديال هوكايدو).

هوكايدو هي فنفس الوقت عمالة (هوكايدو) و جهة جبّانية (هوكايدوكين؛ واخا هاد اللقب قليل اِلا تستعمل، و كايتستعمل غير فاش المفارقة كاتكون ضرورية). عاصمة العمالة هي مدينة صاپورو.

اهم مدن فالعمالة هما صاپورو و هاكوداتي و اَساهيكاوا.

واخا كاينة شوية ديال الصناعة (الكاغيط، البيرّة، الماكلة)، كتيرة الصنايع كاينة فالمجال ديال السرابس(الخدمات). السياحة مهمة بزاف للعمالة و بالخصوص فالصيف اللي كايكون فيه الحال بارد، عكس الجزاير اللاخرى اللي كاتكون سخونة.

هوكايدو هي العمالة اللي عندها اكتر غلّات ديال الفلاحة فالجبّانوبالخصوص الروز و الحوت. كتيرت المجال ديال الفلاحة متطور بزاف: تربية البهايم، الزرع، الصيد. الربُع ديال الارض المحروتة فالبلاد كاينا فهاد العمالة. اهم الغلّات هما: القمح (65%)، باطاطا (79.5%)، الباربا (100%).

بلاصة السياحة مهمة فاقتصاد ديال جزيرة هوكايدو. عام 2014، جا للجبّان كتر من 13 مليون سايح برّاني، و هاد العدد كايتزاد عام على عام، كتيرة هاد السياح اصلهم من آسيا، و بالخصوص من الشينوا، طايوان، و كوريا الجنوبية.

عيد التلج ديال صاپورو (النحت على التلج).

مسابقات على العودان.

منازه وطنية:




#Article 449: أناس السدراتي (380 words)


أناس السدراتي ( بلأمازيغية: ⴰⵏⴰⵙ ⵙⴷⵕⴰⵜⵉ- تولد ف 20 أكتوبر 1989 ف سلا) هو مهندس اتصالات ومدير مشاريع و بودكاسطر وويكيپيدي مغريبي وواحد من لمؤسسين د ويكيميديا لمغريب و ويكيپيديا بالدارجة ومن الناس اللي حطًوا لقواعد ديالها وكتبو فيها بزاف د لمقالات.
أناس هو أول مغريبي خدم مع لمؤسسة د ويكيميدياو داكشي ف مارس 2019، ملًي خدم منسق ستراتيجي ديال ستراتيجية ويكيميديا 2030 بلعربية.

تولد أناس السدراتي نهار 20 أكتوبر 1989 ف سلا. هو لكبير ما بين تلاتة د لخًوت. كبر فمدينتو و قرا ما بينها و بين الرباط فين قرا فالثانوية د مولاي يوسف فشعبة لعلوم الرياضية ب. خدا أناس لباك على 16 لعام وكمُل لأقسام التحضيرية د مدارس لمهندسين (لپريپا) فالرباط، و نجح فلمباراة ديال ل-مين ف 2008، اللي دخًلاتو للمدراسة د طيليكوم بًاري.من مورا عاماين ف باريز مشا أناس للسويد و دار ديبلوم مزدوج مع لمعهد لملكي ف سطوكهولم، و ف 2012 خدا جوج ديبلومات د مهندس دولة، واحد من فرانساوالتاني من السويد.
من بعد ما تخرًج، خدم أناس فشراكات د الطكنولوجيا، منها شركات د لخدمات و فاعلين د لإتصالات، فبزاف د لأدوار منها أدوار تقنية و إدارة لمشاريع. ف 2016، بلموازاة مع لخدمة ديالو بدا دكتورا على لحكامة و لأمن د انترنت لحوايج و لبلوكشيين.ف 2018 كان واحد من لممثلين د إفريقيا فمجموعات لخدمة د ستراتيجية لعالمية د ويكيميديا 2030 (مجموعة المرافعة)، و ف 2019 خدم مع لمؤسسة د ويكيميديا منسق ديال الستراتيجية ديالها بلعربية.
دخل أناس لعالم د ويكيبيديا ف 2013، و كتب فاللول فويكيبيديا بلعربية و لينكليزية، و شارك فبزاف د لمؤتمرات إقليمية و عالمية عرًفاتو كتر على لحركة. ف أكتوبر 2015، أسس هو و رضا بنخضرة و سماعيل زنيبر لمجموعة د ويكيميديا لمغريباللي نضمات مؤتمر ويكي عربية 2019 ف مراكش. ف 2020، كان من لمؤسسين د ويكيبيديا بالدارجة، ومن الناس اللي وجدولها من اللول. هو دابا واحد من لمديرين ديالها.

أناس خدم على بزاف د لمواضيع عندها علاقة بلمغريب و اللغات ديالو فانترنت، منها ورقة بحثية على تيفيناغ فانترنتأطروحة على لوضع د يوتوب ف لمغريبورقة بحثية على لوضع د ويكيبيديا بالدارجة.من غير لأبحاث شارك أناس فبزاف د لمؤتمرات د ويكيميديا فلعالم و دار فيها عروض على مواضيع بحال ويكيبيديا لمهضورةوالتقوية د لمحتوى لمحلي و التطوير د ويكيبيديا لأمازيغية.
أناس عندو بودكاسط بالدارجة سميتو علاش و كيفاش، تيبسط فيه بزاف د لمفاهيم د لحياة و تيعطي ليها بعد فلسفي باش الناس يتعمقو فيها كتر.




#Article 450: سحابة أوورت (168 words)


سّحابة أوورت، وصفها أول مرّة لفلكي لهولندي يان أوورت ف 1950، هي سحابة نظرية ديال كواكب مصغّرة تلجية ومقتارحة بلّي راها كاتحيط ب شّمش ف واحد لمسافة مابين 2000 تال 200000 وحدة فلكية (0.03 تال 3.2 عام ضوئي). سحابة أوورت مفرقة لجوج مناطق: سحابة دخلانية ب شّكل د قرص (أولا سحابة هيلز) وسحابة كروية أوورت خرجانية. لمناطق بجوج جاو برا من لهيليوسفير وف لفضاء بين نجمي. لحزام كويپر ودّيسك لمفرّق، رّيزيڨوارات لوخرين ديال لأجسام مورا نپتونية، راها قل من ألف مرة بعد من شّمش ب لمقارنة مع سّحابة أوورت.

لحد لخرجاني ديال سّحابة أوورت كايعرّف لحدود لكوسموغرافية ديال لمجموعة شّمسية وفين واصل لمجال د هيل د شّمش. سّحابة أوورت لخرجانية مامرتابطاش ب جّهد معا لمجموعة شّمسية، وداكشي علاش دغيا كاتأتر ب نجوم لي دايزين ولا ب مجرّة تبانة براسها. هاد لقوى كايخرجو لمدنّبات من لوربيط ديالهوم وكاتسيفطهوم ل لداخل ديال نّظام شّمسي. من لوربيط ديالهم، أغلب لمدنبات لي عندها دور صغير ممكن تكون جات من دّيسك لمفرّق، بلحاق شي وحدين يمكن مازال يكون لأصل ديالهم من سّحابة أوورت.




#Article 451: الجزيرة (قناة إخبارية) (226 words)


الجزيرة (Al Jazeera) هي قناة د لأخبار تابعة لشبكة الجزيرة الإعلامية، ديال قطر. ف لأول كانت وحد قناة فضائية د لأخبار بلوغة لعربية، ودابا هي عندا شبكة ديالها ب قنوات إخبارية ف لوغة لنڭليزية (الجزيرة إنڭليش)، و لوغة لصربية لكرواتية (الجزيرة بالكانس)، و قناة قديمة مسبِشياليزي (spécialisé) نلميريكان (الجزيرة أمريكا)، و شبكة ديال لقنوات لرياضية (بي إن سبورتس).

قبل خلق الجزيرة، كانت قناة د لشبكة بي بي سي بلوغة لعربية، بمشترك مع لشبكة أوربيت (دابا OSN). بحق ف أبريل 1996، لحكومة لسعودية شد لقناة مين بي بي سي بقيت كتعمل انتقادات منهم ف برنامج وثائقية. وبعد، لأمير ديال قطر الشيخ حمد بن خليفة بدات شبكة د لخبر ديالو الي كت هذرعلى لمسألة لسياسية ديال لعالم لعربي ب حرية، مشي فحل لقتوات لوطني (فحل الي كاين ف مصر، السعودية، لإمارات). بدات لبث ديال الجزيرة لعربية ف 1 نونبر 1996.

مين لحرب ف أفغانستان بدات ف 2001، الجزيرة كانت لقناة لواحدة الي نعملت لأخبار لمباشر ديال لحرب من البلد (هي كانت عندا مراسل ديالها ف كابول)، و هم كانت تا لقناة لواحدة الي نعملت لفيديو ديال أسامة بن لادن ف لبت ديالها. حيتش هم نعملت ديك شي، دابا الجزيرة بدات عندا لمهمة لدولي.

ف مارس 2003، الجزيرة بدات سيت ديالها بلنڭليزية، و ف يوليوز 2005 لشبكة قالت هم مش بداو قناة جديدة بلنڭليزية، ولقناة لجديدة سميتها الجزيرة إنڭليش (Al Jazeera English). بدات لبث ديالها ف 15 نونبر 2006.




#Article 452: نينتندو (121 words)


نينتندو (Nintendo، بالجاپونية: 任天堂) ؤلا نينتندو كو، ليميتد (.Nintendo Co., Ltd، بالجاپونية: 任天堂株式会社، نينتندو كابوشيكي ڭايشا) هي شركة جاپونية الي دابا كت عمل لكونسولات ولألعاب فيديو. بداية ديالا كانت ف عام 1889، و هي كانت كت عمل لكارتا د لعبة د هانافودا. وبعد، ف 1977، حراج أول كونسول ديال نينتندو (كولور تي في ڭايم). لشركة جماعت كثر د لمتابعين لدولي مين حراج لكونسول نينتندو إنترتايمنت سيستيم (Nintendo Entertainment System ؤلا NES)، وللعب سوبر ماريو بروس.

دابا نينتندو نعملت لمهمة بزاف ف لمركز ديال لألعاب فيديو، بالكونسولات فحل لنينتندو إنترتايمنت سيستيم، لسوبر نينتندو إنترتايمنت سيستيم، لنينتندو دي أس، لنينتندو سويتش، ولنينتندو وي. عندا تا لمسلسلات ديال لألعاب فيديو الي عندهم متابعين بزاف، فحل سوبر ماريو، كيربي، دونكي كونڭ، سبلاتون، بوكيمون، و ميترويد.




#Article 453: صقلية (106 words)


صقلية ولا سيسيلية (بالطاليانية:Sicilia) هي اكبر جزيرة فالبحر البيض، و تابعة لجهة صقلية فالطاليان، هاد الجهة داخلين فيها (من غير صقلية) الجزاير اليولية و الجزاير العڭادية و الجزاير البلاجية و أوستيكة و قوصرة.

الجزيرة فيها 25.708 كلم مربع، و هي اكبر جهة طاليانية، و هي الجهة الوحيدة اللي فيها جوج من اكبر عشر مدن فالبلاد: بَلَرم و قطانية، عاصمة الجهة هي بلرم، و لغتها الرسمية هي الطاليانية، ولكن عندها لغتها و اللي هي الصقلية.

الراية و الرمز دياول جهة صقلية هو الڭرڭونة مولات تلت رجلين، و المقصود بها تلت ريوس دياول الجزيرة: راس مسينة فالشمال الشرقي و راس سرقوسة فالجنوب الشرقي و راس طرابنش-مرسى علي فالغرب




#Article 454: جيوسياسة (256 words)


الجيوسياسة ولا الجيوپوليتيك (من اليونانية γῆ - ڭي لارض ؤ πολιτική - پوليتيك سياسة) هي القراية ديال التأتيرات د الجغرافيا (البلاصة ؤ الناس) على السياسة ؤ العلاقات الدولية. واخا غالبا كانعنيو ب الجيوسياسة البلدان ؤ العلاقات بيناتهوم، نقدرو نقصدو بيها حتا على جوج د النواع ديال الدول: الدول المستقلة بحكم الواقع اللي عندها عتيراف دولي محدود ؤ العلاقات معا شي قسم جيوسياسي من شي بلاد، بحال الدول د الفيديراليات اللي فيها فيديراليات ولا كونفيديراليات ولا سيسطيم شبه فيديرالي.

ف النيڤو د العلاقات الدولية، الجيوسياسة هي الطريقة د القراية د السياسة البرانية باش تفهم، تشرح ؤ تنبأ ب التصرفات السياسية الدولية من متغيرات جغرافية. اللي فيها القراية د المنطقة، الكليما، الطوپوغرافيا، الديموغرافيا، التروة الطبيعية، ؤ العلوم التطبيقية ديال ديك البلاصة.

الجيوسياسة كاتركز على القوة السياسية ؤ العلاقة ديالها معا المساحة الجغرافية. خصوصا، البلايص د الما، ؤ الطريطوار د لارض معا التاريخ الديپلوماسي. المواضيع د الجيوسياسة فيها العلاقات معا المصالح د الفاعلين السياسيين الدوليين ف شي منطقة، مساحة، ولا شي عنصر جغرافي؛ العلاقات اللي كاتصاوب شي سيسطيم جيوسياسي. الجيوسياسة المستعجلة كاتفرتت النضريات الجيوسياسية الكلاسيكية، حيت كاتوري الدور السياسي/الأيديولوجي ديالها ل القوات العظمى. كاين شي شغل كاتناقش فيه الجيوسياسة ديال الطاقة المتجددة.

على حساب كريسطوفر ڭوڭويلت ؤ شي باحتين وحداخرين، عاد المصطلح كايتخدم ف بزاف د المعاني، ف معنى عام كايخدم كي سينونيم ل العلاقات السياسية الدولية، ؤ ب الضبط باش تمعني على الشكل الكامل ديال هاد العلاقات؛ هاد المعنى كايعتامد على واحد المصطلح من البداية د القرن 20 ديال واحد العلم مزور ديال السياسة الجغرافية ؤ على نضريات د العلم المزور وحداخرا ديال الحتمية الجغرافية ؤ التاريخية.

__فهرسة__




#Article 455: عبد الرحمان آيت علي (221 words)


عبد الرحمان آيت علي (بلأمازيغية: ⵄⴱⴷⵕⵃⵎⴰⵏ ⴰⵢⵜ ⵄⵍⵉ - تولد ف 6 مارس 1991 ف آيت ملول) هو باحث وويكيپيدي مغريبي وواحد من لمؤسسين د ويكيپيديا بالدارجة ومن الناس اللي حطًوا لقواعد ديالها وكتبو فيها بزاف د لمقالات.

عبد الرحمان تيخدم دابا باحث ف لمعهد لوطني د لبحث على الطرقان و لمركوب ف سطوكهولم ف السويد.

تولد عبد الرحمان ف 6 مارس 1991 ف آيت ملول و كبر فيها. قرا التعليم لأساسي ديالو كامل تما تال 2009 فين خدا لباك و مشا لأڭادير باش يقرا لأقسام التحضيرية د مدارس لمهندسين (لپريپا). من مورا عاماين تقبل ف لمدراسة ديال إنسيماڭ ف ڭرونوبل و قرا فيها. ف لعام اللخر ديالو د لقراية مشا عبد الرحمان للسويد و دار ديبلوم مزدوج مع لمعهد لملكي ف سطوكهولم، و ف 2015 خدا جوج ديبلومات د مهندس دولة، واحد من فرانسا، والتاني من السويد.

ف 2016 بدا عبد الرحمان الدكتورا ديالو ما بين لمعهد لملكي ف سطوكهولم و لجامعة د لينشوپين على لمركوب و الطرانات ف السويد، و كيفاش تقدر تخدًم لماط و لبرمجة باش يتحسًن لستيغلال ديال لبلايص اللي تيتعطاو للطرانات.

دار عبد الرحمان حساب ديالو فويكيپيديا ف 2013 و دخل لمجموعة لمستخدمين ديال لمغريب ف 2016. شارك مع لمجموعة ف بزاف د لأنشطة و نظم مسابقات بزاف بحال ويكي تهوى لمعالم. ف 2020، كان من لمؤسسين د ويكيبيديا بالدارجة، ومن الناس اللي وجدولها من اللول.




#Article 456: محمد جبرون (244 words)


محمد جبرون، خلاق ف 3 غشت 1971 ف تاونات، لمغريب. كاتيب و مؤرّخ مغريبي تخصّص ف جوج مواضيع أساسية: تطور لفكر سّياسي د لحركات لإسلامية و تّاريخ د لمغريب و لأندلس من لبدية ديال لفترة لإسلامية. من أهم لكتوبة ديالو تاريخ المغرب الأقصى من الفتح الإسلامي إلى الاحتلال و مفهوم الدولة الإسلامية.

هو من لمؤسسين ديال حيزب لعدالة و تّنمية ف 1996 و كان من لمنظّرين لكبار ديالو، قبل ما يستاقل منّو ف 2017.

محمد جبرون ولد تاونات و هو دكتور ف تّاريخ من جامعة عبد المالك السعدي. حاليا خدّام أوستاد جاميعي ف لمركز لجهوي لمهن التربية و التكوين د طنجة.

جبرون تّوج ب الجائزة العربية للعلوم الاجتماعية والإنسانية ف 2012 و جائزة المغرب للكتاب ف 2016 على كتابو نشأة الفكر السياسي الإسلامي وتطوره.

جبرون دخل مع لحركات لإسلامية ف لّخر د تّمانينات و كان من أعضاء حركة تّوحيد و لإيصلاح ف طنجة لّي دخل ليها ف 1992. كان لمؤسسين د حيزب لعدالة و تّنمية ف 1996 و كان من أهمّ لأعضاء لأكاديميين د لحيزب.

ف 2017 ديميسيونا من لعدالة و تّنمية و كانت رسالة لستيقالة ديالو لقات صدى كبير ف صّحافة لمغريبية ف وقتها.

ف 2019 صدر سلسلة على تاريخ لمغريب موجّهة ل دّراري صّغار من 10 د لأجزاء. ف نفس لعام خرّج كتابو تاريخ المغرب الأقصى: من الفتح الإسلامي إلى الاحتلال و لّي كايقدّم فيه لعوامل لقتيصادية و تّقافية لّي ساهمات ف تشكيل لكيان سّياسي د لمغريب و دّور لكبير و لحاسم ديال لإسلام ف تّشكيل ديال لمغريب لأقصى سياسيا و حضاريا.




#Article 457: راضي بن عبدسلام (316 words)


راضي بن عبدسلام ولا عبد السلام الرّاضي (خلاق ف ظهر سّوق، إقليم تاونات ف 28 فبراير 1929 - توفّا ف 4 أكتوبر 2000 ف فاس) جرّاي مغريبي كان متخصّص ف لمسافات نصف طّويلة (ضّومي فون). هو أول مغريبي دّا ميدالية ف لألعاب لأولمپية (روما - 1960).

الراضي ف يّامات لحيماية كان خدّام ف لجيش لفرانصاوي، لّي تطوع فيه ف 1950، و تمّا فين بانت لميولات رّياضية ديالو ب حيت كان كان كايقدر يجري مسافات طويلة بزّاف.

الراضي كان يمكنليه يلعب ب الراية د فرانسا ولا بلجيكا ف لألعاب لأولمپية د 1956 ف ميلبورن - أوستراليا، غير هو ختار يلعب ب تّوني د المغريب.

الراضي شارك ف لألعاب لأولمپية د روما ف 1960 و كان دّا ميدالية فضّية ف لماراطون. لّي كان دّا دّهبية هو جّراي لأسطوري لإيتيوپي أبيبي بيكيلا.

ف فرانسا كانت صّحافة رياضية كاتلقبو ب رّياضي مول 5 كيلو د لميداليات ب سباب لألقاب لكتيرة ديالو.

ف 1960 كان فاز ب بطولة العالم د العدو الريفي ف گلاسگو، سكوتلاندا.

الراضي كان بقا شادّ أغلبية لأرقام لقياسية لمغريبية ديال ضومي فون و لمسافات طّويلة ( لعشرالاف متر و لماراطون) تّال فاش حطّموهوم ف تّمانينات لجيل د سعيد عويطة، خالد السكاح، ابراهيم بوطيب و من بعد منهوم صلاح حيسّو و لخوت بولامي (ابراهيم ؤ خالد).

الراضي قاسا بزّاف ف حياتو و مانفعو ب والو لإنجاز ديالو. من بعد ما حبسات لانتريت ديالو لّي كانت كاتجيه من عند لعسكر د فرانسا (1300 درهم ف تلت شهور)، خدم ف الإنعاش الوطني ب صالير ديال 900 درهم ف الشهر، و خدّموه شاوش ف الولاية ديال فاس (مكلف ب التّوجاد د أتاي). لفقر و تّنحسيرة لمادّية رغموه باش يبيع لميدالية لفضّية ديالو . خدم تا عساس د طوموبيلات ف واحد لفترة.

ف لّخر د حياتو قدر لوالي ديال فاس محمد الظريف يضبر ليه ف ڭريمة ديال طاكسي صغير.

سالا حياتو عايش كتيئاب ل مدة طويلة و عانى من لكونسير. مات ب سّدان د شرايين د لقلب و هو عندو 71 عام.




#Article 458: ضمير ابلة حكمت (122 words)


ضمير أبلة حكمت مسلسل درامي ميصري تّنتج ف عام 1991. لمسلسل نتجو تّلفيزيون لميصري و كتب سّيناريو و لحوار ديالو أسامة أنور عكاشة و دارت لإخراج ديالو إنعام محمد علي. هاد لمسلسل هو أول مسلسل متّلاتو لممتلة لمصرية فاتن حمامة و كان دار لموسيقا ديالو لموسيقار عمر خيرت.

لمسلسل زيادة على فاتن حمامة متّلو فيه أحمد مظهر، جميل راتب، عبلة كامل، صلاح قابيل، إبراهيم يسري و ممتلين خرين.

لمسلسل كايعاود لقيصّة د مديرة د مدرسة د لبنات (أبلة حكمت هاشم، لّي متّلاتها فاتن حمامة) لّي قدرات تحقّق معجيزة فاش ردّات لمدرسة ديالها ميتال ل لمداريس د ميصر. هاد لقضية غادي تجرّ عليها بزّاف د لمشاكيل من عند نّاس لّي حاسدينها ولا ماشي ف مصلاحتهوم يتحسّن تّعليم (مّالين شكارة، لأساتيدة لّي كايزيدو سّوايع...).




#Article 459: مطار محمد الخامس الدولي (165 words)


مطار محمد الخامس الدولي أولا مطار الدار لبيضا الدولي (IATA:CMN ،ICAO:GMMN ) هو مطار كاين فمدينة الدار البيضاء لمغريبية وكايسيرڤي جهة الدار البيضاء سطات. كيبعد لمطار على الصونطرڤيل ديال الدار البيضاء بـ31 كيلوميتر، وقريب من لوطوروت ديال الرباط-كازا وكازا-أݣادير . كيتعتابر أكبر مطار فلمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج. تفتاتح لمطار فـ1943 وبناوه لميريكان وكايقدر يهز 14 دلملاين ديال لمسافرين.

لمطار فيه 3 ديال لمحطات لجوية. اللولة فيها 76.000m² وپاركينݣ فيه 2.075 بلاصة ديال الطوموبيلات. فـ2019 دار لماليك محمد السادس تحديث للمحطة ودابا ولات كاتهز 14 مليون ديال لمسافرين فلعام عوض 7 دلملاين. هاد لمحطة فيها تكنولوجيا طالعة فالنيڤو كتخلي لمسافرين يسجلو لباݣاج ديالهوم لراسهوم.

لمحطة التانية فيها 66.000m² وپاركينݣ فيه 2.000 بلاصة ديال الطوموبيلات. لمحطة التالتة فيها 4.000m² وكاتهز 400.000 مسافر، وهي خاصة بالرحلات ديال لحج ولعمرة. واخا لمطار مكايخدموش بيه لعسكر ولقوات لمسلحة لملكية، ولكن فيه مركز ديال لعمليات وبلاصة فيه كيهبطو ليكوپتيرات ديال لبحرية لملكية. وكيخدمو بيه الطيارات ديال لعسكر لي كاتهز لويزارا والشخصيات لمهمة.




#Article 460: مطار مراكش الدولي (138 words)


مطار مراكش الدولي أولا مطار مراكش لمنارة (IATA:RAK ، ICAO:GMMX ) هو مطار كاين فمدينة مراكش لمغريبية وكايسيرڤي جهة مراكش آسفي. كيبعد لمطار على الصونطرڤيل ديال مراكش بـ9 دلكيلوميتر، وقريب من لوطوروت ديال الدار البيضاء - أݣادير . كيتعتابر تاني أكبر مطار فلمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج. تفتاتح لمطار فعهد ليستيعمار وتجدد بزاف دلمرات وكايقدر يهز 9 دلملاين دلمسافرين.

لمطار فيه 3 دلمحطات لجوية. اللولة تجددات عام 2008 والتانية خدمات من 2005. لمحطة لجوية التالتة عطا لينطيلاقة ديالها لملك محمد السادس فعام 2016 وتبنات بمليار و220 مليون درهم مغريبية فـ57.000m². هاد لمحطة الجديدة فيها طبقة أرضية ديال لوصول، الطبقة اللولة ديال إنزال الركاب والتالتة ديال الرواق ديال التجارة. لمطار فيه محطات ديال الطاكسي الصغير ديما خدامة وعندو خط ديال الطوبيس كايدي منو حتى لوسط لمدينة فنص ساعة تقريبا.

لحركة دلمسافرين:




#Article 461: درب التبانة (133 words)


درب تّبانة هي لمجرّة لي فيها لمجموعة شّمسية ديالنا، ب سّمية لي كاتوصف لمظهر ديال لمجرّة منين كاتّشاف من لأرض: فرقة مضبّة ديال ضّو كاتبان ف لّيل ومشكلة من نجوم لي مايمكنش يتشافو ب لعين نيشان. سّمية جايا من لعربية درب التبانة ولّي كاتعني بلي لعرب شبّهو لمجرة ب تّبن لي كان كايطيح ليهم من لماشية وكان كايبان لأتر ديالو ف لأرض بحال ل يدّين ديال لمجرة. أما سّمية نكليزية The Milky Way ف جات من تّعبير لإغريقي Kikilod Galaxias ولّي كايعني دوّارة د لّبن. كاتبان درب تّبانة من لأرض بحال شي شريط حيت لهيكل ديالها لي بحال شي ديسك كايتشاف من لداخل. أول مرة شاف ݣاليليو ݣاليلي شّريط بلي راه نجوما ف 1610. حتال لعشرينات لّولين ديال لقرن لي فات، كان كايسحاب لأغلب لفلكيّين بلّي درب تّبانة فيها ݣاع نّجوما د لكون.




#Article 462: مطار فاس الدولي (158 words)


مطار فاس الدولي أولا مطار فاس سايس (IATA: FEZ ، ICAO:GMFF) هو مطار كاين فمدينة فاس لمغريبية وكايسيرڤي جهة فاس مكناس. كيبعد لمطار على الصونطرڤيل ديال فاس بـ 11 كيلوميتر، وقريب من لوطوروت ديال الرباط-وجدة. كيتعتابر رابع أكبر مطار فلمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج. تفتاتح لمطار فـ1960 فعهد محمد الخامس بلحضور ديال ملك الأردن الحسين بن طلال وكايقدر يهز 2.500.000 مسافر.

كتهز لمحطة لجوية اللولة 500.000 مسافر فلعام ولوسع ديالها 5.000m². وهاد لمحطة خاصة بالرحلات ديال الداخيل. لمحطة لجوية التانية كاتهز 2.500.000 مسافر فلعام فمساحة 28.000m². هاد لمحطة فيها بزاف ديال التجهيزات التكنولوجية اللي متطورة بزاف، ولافاصاد ديالها اللي من الزاج كتضمن الضو ديال الشمش يضوي لمطار بالنهار. لمطار ديال فاس كايعكس الترات لمغريبي لأصيل بالديكورات ديالو ولمنحوتات ديال الزليج والݣبص. كاين خط ديال الطوبيس كايهز من لمطار حتى لمحطة ديال التران ديال فاس. هاد الريحلة كاتشد 40 دقيقة ديال لوقت. كاينين حتى طاكسيات صغار فلخرجة ديال لمطار.

لحركة دلمسافرين:




#Article 463: محمد بن عرفة (349 words)


محمد بن عرفة (خلاق ف 1886 ف فاس - توفا ف 17 يوليوز 1976 ف نيس، فرانسا) كان سلطان علوي د المغريب نصّباتو السلطات د لحيماية لفرانساوية ف 1953، من بعد ما كانت نفات محمد لخاميس برّا لمغريب (ل مداگاسكار). كان بقا ف لحكم غير عاماين، تال 1955فاش رجع محمد الخاميس ل لعرش ديالو.

بن عرفة كان عضو ف لأسرة لعلوية: هو ولد مولاي عرفة لّي كان ولد السلطان محمد بن عبد الرحمان بن هشام. محمد بن عرفة كان عمّ السلاطن لخّوت عبد العزيز و عبد الحفيظ ويوسف.

فاش شبكات بين الحركة الوطنية و لحيماية لفرانساوية، قرّرات فرانسا باش تنفي محمد لخاميس و تحيّدو من لحكم. بداو يقلّبو على شي واحد من لأسرة لعلوية باش يعوضو، لّي كان قتارح بن عرفة هو لباشا لگلاوي ديال مراكش، و هاكدا ولّا بن عرفة سلطان ف 21 غشت 1953 و ف عمرو 67 عام.

كان مرفوض من عند لحركة لوطنية و كانو لمغاربة كايكنّيو عليه سلطان لفرانسيس. لعلما د الدّين كان جزء منّهوم بايعو و جزء كبير رفض و منّهوم شيخ الإسلام محمد بن العربي العلوي لّي كان خرّج فتوى كاتلزم باش يتّقتل السلطان الجديد.

ف 11 شتنبر 1953، تعرّض ل محاولة د لغتيال كان نفّذها لمقاوم علال بن عبد الله (لّي تقتل ف لعملية). كانو من بعد محاولات خرين باش يقتلوه لمقاومين و لكن بن عرفة فلت منّهوم كاملين.

لفترة د لحكم ديالو كان فيها لمغريب مروّن بزّاف ب سباب لعمليات لّي كانت لمقاومة و لحركة لوطنية كايديروهوم ضدّ لفرانساويين. هاد لمقاومة دفعات باش تبدا مفاوضات بين فرانسا و الحركة الوطنية لّي كان أول قرار فيها كان باش محمد لخاميس يرجع ل لعرش ديالو.

هاكدا سالا لحكم د بن عرفة لّي خرّجاتو من بعد فرانسا ل طنجة (لّي كانت منطقة دولية) و من بعد مشا ل فرانسا ف لمدينة د نيس لّي بقا فيها تا مات ف 1976.

كان بقا مدفون ف نيس تال وسط تّمانينات قبل ما يقبل لحسن التّاني باش التّراب ديالو يتحول ل لمغريب و يعاود يتّدفن ف فاس. لقبر ديالو ف فاس كاين ف الرّوضة د باب لمكينة لقديمة، و كان الدفن ديالو تدار حسّي مسّي و كان تكلّف بيه وزير الداخلية ف ديك لوقت ادريس البصري.




#Article 464: مطار طنجة الدولي (116 words)


مطار طنجة الدولي أولا مطار طنجة بن بطوطة (IATA:TNG ، ICAO:GMTT) هو مطار كاين فمدينة طنجة لمغريبية وكايسيرڤي جهة طنجة تطوان الحسيمة. كيبعد لمطار على الصونطرڤيل ديال طنجة بـ15 كيلوميتر، وقريب من لوطوروت ديال طنجة -الرباط. كيتعتابر خامس أكبر مطار فلمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج، وكايقدر يهز 1.250.000 مسافر.

لمحطة لجوية ديال هاد لمطار شادة لوسع ديال 12.000m² وكاتقدر تهز 1.250.000 مسافر فلعام. لبلاصة ديال لباݣاج فيها 529m². لمطار مجهز بأحدت التيكنولوجيا باش لمسافرين يحسو براحتهم وهوما فلمطار. كاينة بلاصة خاصة ديال الطاكسيات ومميمكنش للطاكسي لعادي الصغير يركب من لمطار، ولكن إمكن ليه يهبط تما. مكاينش شي خط ديال الطوبيس اللي غايدي من لمطار لوسط لمدينة.

لحركة دلمسافرين:




#Article 465: مطار الرباط سلا الدولي (176 words)


مطار الرباط سلا الدولي (IATA:RBA ، ICAO:GMME) هو مطار كاين فمدينة سلا لمغريبية وكايسيرڤي جهة الرباط سلا القنيطرة. كيبعد لمطار على الصونطرڤيل ديال الرباط بـ8 كيلوميتر. كيتعتابر سادس أكبر مطار فلمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج، وكايقدر يهز 3.500.000 مسافر ومتوقع تزيد تالين 4 دلمليون.

لمحطة لجوية اللولة فيها 16.000m²، والتانية فيها 3.500m². فـ20 شهر 1، 2012 تفتحات لمحطة اللولة وعندها قدرة باش تهز 3.500.000 مسافر فلعام، يعني كتر من الضوبل ديال داكشي اللي كان فلمحطة لقديمة (اللي ديما كانت سميتها لمحطة لجوية 2).

فلبلاصة لعمومية كاينين وكالات ديال لكري دالطوموبيلات، بنكات، ݣيشيات، كافي-بار بكيوسك صغير وخدمة ديال التيليفون ولفاكس. لبلاصة دلمغادرة فيها حتى هي كافي-بار ومحلات حرة، تيليفونات وبلايص ديال لكمي. لولوج للمطار كاين بالطاكسي أولا الطوبيس أولا بالطوموبيلة پريڤي، وكاينين حتى بلايص ديال لپاركينݣ.

بالنسبة للپارتية ديال لعسكر فراها مجهزة مزيان وكايكونو فيها لقوات لمسلحة لملكية، حيتاش لمطار قريب للرباط لعاصمة ديال لمغريب. كاين مركز ديال لعمليات كبير خاص فيه لأسطول ديال طيارات جدارمية اللي كاتطفي لعافية، وفيه حتى ديپو كبير ديال الطيارات دلملك ولحوكومة.

لحركة دلمسافرين:




#Article 466: مطار الناظور العروي الدولي (148 words)


مطار الناظور العروي الدولي (IATA:NDR ، ICAO:GMMW ) هو مطار كاين فمدينة لعروي لمغريبية وكايسيرڤي جهة الشرق. كيبعد لمطار على الصونطرڤيل ديال الناظور بـ30 كيلوميتر، وقريب من الطريق لوطنية 2 و15 و19. كيتعتابر سابع أكبر مطار فلمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج.

لمطار ديال الناضور عندو محطة جوية وحدة ببزاف ديال بلايص الدخول ولخروج فالطابق السفلاني. ماكاينش نقل عمومي للمطار. كاين واحد لپاركينݣ كبير وبالطاريفة. كاينين طاكسيات كبار كايهزو واحد أولا مجموعة ديال لمسافرين وكايديو لمدون لكبار فجهة الشرق، ولكن ماكاينش طاكسي صغير حيتاش لمطار بعيد بزاف على شي مدينة اللي فيها هاد السيرڤيس.

قرر لمكتب لوطني ديال لمطارات يرييب لمطار ديال الناضور ويعاود يبنيه أزيرو، حيتاش مكايناش أرض كافية فين يوسعوه. دابا كاينين حضائر مؤقتة ديال ليستيقبال. لمكتب ناوي إزيد لقدرة ديال لمطار باش يهز 2.000.000 مسافر فلعام، وغايتزادو فهاد لمشروع حتى لميساحات ديال لبپاركينݣ ديال الطيارات والطوموبيلات.

لحركة دلمسافرين:




#Article 467: مطار وجدة أنݣاد الدولي (100 words)


مطار وجدة أنݣاد الدولي (IATA:OUD، ICAO:GMFO) هو مطار كاين فمدينة وجدة لمغريبية وكايسيرڤي جهة الشرق. كيبعد لمطار على الصونطرڤيل ديال وجدة بـ14 كيلوميتر، وقريب من لوطوروت ديال الرباط-وجدة. كيتعتابر ثامن أكبر مطار فلمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج وكايقدر يهز 3.200.000 مسافر.

لمطار فيه جوج ديال لمحطات لجوية. لمحطة اللولة كاتقدر تهز 500.000 مسافر فلعام، والتانية اللي تبنات فلعام د2010 كاتهز تالين 2.700.000 مسافر فلعام. لمساحة ديال هاد لمحطة لجوية واصلة 28.000m². لمطار قريب من لوطوروت رقم 2 اللي كتربط مابين كازا أو وجدة، وقريب بزاف من لحدود مابين لمغريب والجزائر.

لحركة دلمسافرين:




#Article 468: مطار الداخلة الدولي (122 words)


مطار الداخلة الدولي (IATA:VIL ،ICAO:GMMH) هو مطار كاين فمدينة الداخلة لمغريبية وكايسيرڤي جهة الداخلة وادي الذهب. جا لمطار تقريبا حدا الصونطرڤيل ديال الداخلة. كيتعتابر تامن أكبر مطار فلمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج وكايقدر يهز 300.000 مسافر.

لمحطة لجوية ديال مطار الداخلة تحلات فعام 2010 وقادرة تهز تالين 310.000 مسافر فلعام. لمطار داير بيه سور فيه 12,5 كيلوميتر وشانطي دايرة بيه فيها نفس الطول. مساحة لمحطة لجوية لقديمة فيها 2.600m². فيها مرفق تكنيك فيه 1.000m² ولپاركينݣ كايهز 180 طوموبيلة، وفيه حتى مرافق جوية ولإتصال بالساتيليت. لمطار فيه جزء ديال لعسكر دايرين فيه الطيارات ديال جدارمية اللي كاتراقب لبحر والطيارات ديال لقوات لمسلحة لملكية اللي كاتشارجي لمونة ولعتاد ولعسكر اللي خدام فلقشلات ديال لجنوب.

لحركة دلمسافرين:




#Article 469: مطار العيون الدولي (148 words)


مطار العيون الدولي أولا مطار لعيون لحسن اللول (IATA:EUN ،ICAO:GMML) هو مطار كاين فمدينة لعيون لمغريبية وكايسيرڤي جهة العيون الساقية الحمراء. كيبعد لمطار على الصونطرڤيل ديال لعيون بـ2 دلكيلوميتر، وقريب من الطريق لوطنية اللولة. كيتعتابر تاسع أكبر مطار فلمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج، وكايقدر يهز 300.000 مسافر.

فتاتحلت لخطوط لملكية لمغربية ولحد لمحطة جوية ديالها فلمطار، وزادت خطوط جوية من لعيون إلى كلميم، مراكش، والسمارة، ووزادت الرحلات من كازا، أكادير، الداخلة ولاس بالماس، لجيهة العيون.

زيادة على ليستيعمال لمدني لهاد لمطار، لقوات لمسلحة لملكية عندها واحد لاباز فهاد لبلاصة سميتها لاباز الرابعة، واللي فيها طيارات مقاتلة ديال لعسكر وطيارات ديال الشارجمون لعسكري ديال لمونة. لأمم لمتحدة حتى هي كاتخدم بهاد لمطار باش تصيفت لمراقبين اللي مقابلين لوضع فالصحرا لمغريبية. لمطار فيه حتى طيارات ديال جدارمية اللي كتقابل لبحر وليكوبتيرات ديال وزارة الصحة اللي كاتدي لمرضى اللي حالتهم مستعجلة.

لحركة دلمسافرين:




#Article 470: مطار الحسيمة الدولي (116 words)


مطار الحسيمة الدولي أولا مطار الحسيمة الشريف لإدريسي (IATA:AHU ،ICAO:GMTA ) هو مطار كاين فمدينة الحسيمة لمغريبية وكايسيرڤي جهة طنجة تطوان الحسيمة. كيبعد لمطار على الصونطرڤيل ديال الحسيمة بـ17 كيلوميتر. كيتعتابر رقم 12 فترتيب مطارات لمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج، وكايقدر يهز 300.000 مسافر.

فعام 2010 دشن لماليك محمد السادس واحد لمحطة جوية جديدة فلمطار. هاد لمحطة فيها 4.000m² وبسبابها ولا لمطار كايهز 300.000 مسافر فلعام. لفاكتورة باش تصاوبات هاد لمحطة وصلات لـ 77 مليون درهم مغريبية. الشراجم ديال الزاج اللي دارو فيها كايخليو الضو ديال الشمش فلمرافيق ديال لمطار. فعام 2017، طلقات لخطوط لملكية لمغريبية خطوط جوية ما بين الحسيمة والدار البيضاء، ومابين الحسيمة وطنجة.

لحركة دلمسافرين:




#Article 471: مطار الراشيدية الدولي (102 words)


مطار الراشيدية مولاي علي الشريف الدولي (IATA:ERH ،ICAO:GMFK) هو مطار كاين فمدينة الراشيدية لمغريبية وكايسيرڤي جهة درعة تافيلالت. كيبعد لمطار على الصونطرڤيل ديال الراشيدية بـ2 دكيلوميتر. كيتعتابر رقم 13 فترتيب أكبر مطارات لمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج، كايقدر يهز 300.000 مسافر.

تبنات محطة جوية جديدة وبدات لخدمة ديالها فعام 2019 على ميساحة 3.500m²، وتزاد ليها پاركينݣ فيه 375 بلاصة للطوموبيلات. تدارت لأشغال على الشانطي اللي كاتوصل للمطار بحيت تزاد فلوسع ديالها، وتفورصا السور اللي كان ضاير بلمطار وتزاد الضو اللي كايضوي پاركينݣ الطيارات. وصلات لفاكتورة ديال هادشي كامل لـ83 مليون درهم مغريبية.

لحركة دلمسافرين:




#Article 472: مطار بني ملال الدولي (120 words)


مطار بني ملال الدولي (IATA:BEM  ،ICAO:GMMD) هو مطار كاين فمدينة بني ملال لمغريبية وكايسيرڤي جهة بني ملال خنيفرة. كيبعد لمطار على الصونطرڤيل ديال بني ملال بـ10 كيلوميتر، وقريب من لوطوروت ديال الدار البيضاء - بني ملال. كايمشيو بزاف ديال الرحلات فالداخل وحتى فلخارج من هاد لمطار اللي عرف تدهور كبير بزاف من ناحية لأرقام اللي بدات كاطيح حتى وصلات لقريب من 800 مسافر صافي فعام 2019. تفتاتح لمطار فـ2014 من مورا ماكان مطار ديال لپاراشيتاج وكايقدر يهز حتال 150.000 مسافر فلعام.

لمحطة لجوية ديال هاد لمطار كاتهز 150.000 مسافر فلعام وفيها تكنولوجيا مطورة، ومصمم باش ݣاع لميساحة ديالو تكون مستغلة من شي مرفيق. هاد لمحطة فيها بهو كبير عمومي وبلاصة ديال لمغادرة فيها لجماريك وصالة ديال الضيوف لكبار.

حركة المسافرين:




#Article 473: قصر آيت بن حدو (275 words)


قصر آيت بن حدو ولا قصبة آيت بن حدو هو ݣصر و موقع أركيولوجي كاين ف جماعة آيت زينب، إقليم وارزازات ف لمغريب. هاد لݣصر هو من أهم لمعاليم التاريخية و التقافية د إقليم وارزازات و هو مصنّف ف لّيستا د تراث لعالمي د ليونيسكو من 1987.

لݣصر د آيت بن حدو ميتال ديال لهندسة لمعمارية التقليدية ف لمجال لقبل صحراوي، ب حيت هو تجمّع ديال بنايات كاتّستغل ب شكل جماعي و دايرين بيها تحصينات دفاعية.

واخّا لݣصر، ب شّكل ديالو لحالي غادي يكون ف لغالب تّبنا ف لقرن 17، لبلاصة لّي كاين فيها كانت من لقديم فيها نشاط بشري، بحيت كانت من أهم لحطّات ديال لݣافلات التّيجارية لّي كاتربط بين مرّاكش و بلاد السودان و لّي كانت كاتدوز على واد درعة و التيزي د تلويت.

لݣصر د آيت بن حدّو جا ف لوطيات لجنوبيين د جّبال د لأطلس لكبير.

بحال أي ݣصر مغريبي د لمنطقة د درعة تافيلالت، آيت حدّو مكوّن من مجموعة د دّيور لمبنية ب الطّين و مزاحمة بيناتها و لّي لعلو ديالها غادي كايكبر من برّا ل لمركز ديال لݣصر، باش تعطيه شكل ديال كدية ولا جبل صغير. هاد لهندسة عندها دور دفاعي.

لݣصر محمي ب سوار عاليين فيهوم بروج ف رّكاني ديالهوم.

لݣصر فيه مرافق مشروكة بحال الجّامع، ساحة، رحبة ديال الزّرع، فندق و مخزن د زّرع (إڭودار) ف وسط الدّوار و لّي هو أعلى بناية ف لݣصر.

فيه جوج روضات، وحدة ل لمسلمين و تّانية د ليهود.

لݣصر د آيت بن حدو فيه ضريح ديال السيد سيدي علي أوعامر.

ݣصر آيت بن حدو تخدّم ف بزّاف د لمرّات ستوديو سينيمائي طبيعي ل عدد كبير من لأعمال السّينيمائية و التّلفزيونية لعالمية. لهتيمام د السينيمائيين ب لموقع بدا من عوام 1940:




#Article 474: جامع (131 words)


الجّامع ولا لمسجيد (بلأمازيغية: ⵜⵉⵎⵣⴳⵉⴷⴰ, تيمزكيدا) هو سميّت لبلاصة د لعبادة رّئيسية عند لمسلمين. الجّامع عندو قيمة كبيرة عند لمسلمين ماشي غير ف لعبادة: من لقديم، كان عندو دور مهم ف لحياة السياسية والثقافية والعلمية وحتّا لعسكرية ديال الدّول لمسلمة.

أول جامع تّبنا ف التاريخ كان هو مسجيد قباء ف لمدينة لمنورة، لّي كان بناه الرسول محمد من بعد مّا هاجر من مكّة.

أكبر جامع ف لعالم من حيت الطّاقة لستيعابية هو لمسجيد لحرام ف مكّة، لّي يمكن يصلّيو فيه كتر من 2 د لميون د النّاس.

أول جامع تّبنا ف لمغريب كان بناه عقبة بن نافع لفهري ف جوايه عام 681 م، ف لمنطقة د ترغة ف بني زيات، و هو بعيد على تطوان ب 60 كلم.

كاينين تلاتة ديال نّواع ف لمغريب، على حساب التعريف د وزارة لأوقاف لمغريبية:




#Article 475: ميݣيل پريمو دي ريبيرا (316 words)


ميݣيل پريمو دي ريبيرا ولا غير پريمو دي ريبيرا و سميتو لكاملة ميݣيل پريمو دي ريبيرا إي أوربانيخا (ب سّبليونية: Miguel Primo de Rivera y Orbaneja)، (خلاق ف خيريث دي لافرونطيرا ف 8 يناير 1870 - مات ف باريز ف 16 مارس 1930) هو جينيرال و سياسي سپانيولي. سبقليه كان رئيس لحكومة د سپانيا بين 1923 و 1930. كان طلع ل لحكم من بعد ما تزّعّم لنقيلاب لعسكري د 13 شتنبر 1923، و لّي كان لماليك د سپانيا ف ديك لفترة آلفونصو 13 راضي عليه. كان أول قرار ديالو التعليق ديال الدستور د 1876 و التنصيب د مجلس عسكري بين 1923 و 1925 اللي ردّ سپانيا دولة ديكتاتورية، و اللي تحوّل ل مجلس مدني بين 1925 و 1930.

ف لعهد ديالو عرفات سپانيا تقدم قتيصادي كبير و طبقات فيه لحكومة د پريمو دي ريبيرا سياسات قتيصادية حيمائية و تدخّلية ودارت ستيتمارات كبيرة ف لبنيات التحتية.

پريمو دي ريبيرا كبر ف عائلة كبيرة و كان عندو بزّاف ديال لخّوت. التربية ديالو من الصّغر كانت كاتوجّدو باش يدير كاريير عسكرية. دخل ل لأكاديمية لعسكرية فاش كانت عندو 14 لعام. تعيّن ف مليلية و تمّا بان مزيان و طلع ل ݣراد د كاپيتان و عطاوه ل وسام د سان فيرناندو ف 1893.

من بعد السّربيس ف الشمال د لمغريب سيفطوه ل كوبا ف 1895 و فيها ترقّا ل كوماندار. ف 1897 تحوّل ل لفيليپين لّي كان لقايد لعسكري لعام ديالها هو عمّو فيرناندو پريمو دي ريبيرا.

ف مدة صغيرة قدر پريمو دي ريبيرا يدوز ف أهم لمستعمرات لّي كانت باقية ف لإمبراطورية سپانيولية و حضر على لمشاكيل و لأسباب لّي سبقات الضّياع د هاد لمستعمرات، و هاد التجربة غادي تماركي مزيان الشخصية السياسية ديالو.

تجوج ف 1902 ب كاسيلدا ساينث دي إيريديا و هي لمرا لّي غادي يولد معاها ستة د دّراري، لكبير فيهوم كان هو خوصي آنطونيو پريمو دي ريبيرا لّي غادي يأسّس من بعد لكتائب سپانيولية، لحيزب لّي غادي يكون عندو دور كبير ف لحرب لأهلية سپانيولية.




#Article 476: لموميا (فيلم 1999) (127 words)


لموميا (فيلم 1999) (The Mummy)، فيلم ميريكاني ديال لمغامرات لغرائبية، لّي دار لإخراج ديالو ستيفن سومرز. لفيلم متلو فيه لأدوار رّئيسية بريندان فريزر و ريتشيل ڤايس و دجون هاناه.

لفيلم هو معاودة Remake د واحد لفيلم ميريكاني د 1932 عندو نفس السمية. ف 1920، ف ميصر، واحد لعلما أركيولوجيين غادي يجبدو موميا ديال راهب مصري قديم. ب لغالاط، غادي تعاود تحيا هاد لموميا و لّي غادي تبدا تبع لأركيولوجيين واحد ب واحد باش تصفّيهوم و تزيد تّقوّا ب لحياة لّي كاتّاخد منّهوم. هاد لموميا غادي تولّي كاتشكّل خطر على لعالم كامل و تمّا غادي يتشكّل فريق د لمغامرين فيهوم لمغامر ريك أوكونيل (بريندان فريزر) و لكتبيّة إيڤلين كارناهان (ريتشيل ڤايس)، لّي غادي يدخلو ف حرب مع لموميا و معا لوقت باش يقضيو على لموميا و يعتقو لعالم.




#Article 477: ݣلادياتور (فيلم) (147 words)


ݣلادياتور (فيلم) (Gladiator)، فيلم ميريكاني بريطاني ديال لپيپلوم و درامي تاريخي. دار لإخراج ديالو ريدلي سكوت. لفيلم متلو فيه لأدوار رّئيسية راسل كرو و جواكين فينيكس و كوني نيلسن.

ف يامات لإمبراطورية الرومانية، غادي يكون واحد لجينيرال روماني ماكسيموس ديسيموس غادي مزيان باش يخلف لإمبراطور ماركوس أوريليوس، لّي عزيز عليه لجينيرال ماكسيموس و كايعزّو بحال ولدو. ولد لإمبراطور كومودوس ما غايقبلش هاد لقضية و غادي يقتل بّاه لإمبراطور و غادي يولّي إمبراطور ب السيف.

كومودوس غادي يبغي يصفّي ماكسيموس و عائيلتو و غادي ينجح باش يقتلّيه مراتو و ولدو. ماكسيموس غادي يقدر يهرب من لإعدام و ف لهربة ديالو غادي يشدّوه سمسارة د لعبيد و غادي يدّيوه ل لجنوب د لإمبراطورية. تمّا غادي يبيعوه ل واحد لبزناس كايخدّم لعبيد الصّحاح ف لمدابزات د لݣلادياتورات. بشوية بشوية غادي يولّي ماكسيموس ݣلادياتور مشهور و غادي توصل الشّهرة ديالو ل روما، بلا ما يعرف تا شي حدّ لهوية لحقيقية ديالو.




#Article 478: ليسطة د الدول اللي عندها عتيراف محدود (443 words)


شحال من تنضيم سياسي ديكلاراو الستيقلال ديالهوم ؤ بغاو يضبّرو ف عتيراف ديپلوماسي من المجتمع الدولي بلّي عندهوم سيادة بحكم القانون، ولكن ماشي كلشي عتارف بيهوم. غالبا هاد التنضيمات عندهوم سيطرة بحكم الواقع على الطريطوار ديالهوم. كاينين بحال هاد التنضيمات اللي كانو ف الماضي.

كاين جوج ديال المبادئ التقليدية اللي كاتعطي إشارات على كيفاش شي دولة تقدر تولّي عندها سيادة بحكم القانون. النضرية التصريحية كاتعرّف الدولة بلّي راها شخص ف القانون الدولي إيلا وفّات هاد المعايير:

على حساب النضرية التصريحية، تادوّالت د شي تنضيم ما عندهاش علاقة ب العتيراف ديال الدول لخرا. ؤ العكس معا النضرية التأسيسية، اللي كاتحسب شي تنضيم شخص ف القانون الدولي غير إيلا عتارفو بيهوم الدول اللي ديجا كاينين ف المجتمع الدولي.

هاد التنضيمات اللي باقي ما ولّات دول كاتخدّم وحدة منهوم ولّا بجوج باش تبيّن الشرعية ديالها ف المطاليب ديالها، كاينين متلا اللي موفّيين الشروط التصريحية (عندهوم سيطرة بحكم الواقع على طرف من الطريطوار ديالهوم ولّا عليه كامل، عندهوم حكومة ؤ سكّان دايمين)، ولكن حتا دولة مامعتارفة بيهوم، هاد عدم-العتيراف هو غالبا نتيجة ديال نزاع معا دول اخرا اللي كاتدّعي بلّي هادوك الأراضي طرف منّها. ف حالات اخرا، تقد تطلب جوج ديال الدول ولّا كتار معتاراف بيعهوم جزئيا ب نفس الطريطوار، معا سيطرة بحكم الواقع ديال كل وحدة منهوم على شي طرف منّو، (بحال ف حالة الجمهورية د الشينوا (اللي معروفة ب 'الطايوان') ؤ الجمهورية الشينوية د الشعب ؤ كوريا الشمالية ؤ الجنوبية). غالبا التنضيمات اللي عندها عتيراف غير من أقلية من الدول د العالام كاتخدّم المبدأ التصريحي باش تبيّن الشرعية د الدّيعاء ديالها.

ف بزاف د الحالات، عدم-العتيراف كايكون مأتّر إلا كانو قوات برّانية د العسكر ف الأرض د البلاصة اللي متنازعين عليها، الشي اللي كايخلي الوصف د ديك البلاد مشكل بحكم الواقع. يقدر المجتمع الدولي يحكم على هاداك التواجد د العسكر بلّي راه معيّق ف التدخّل، حيت كايرد ديك البلاصة دولة مونيكة فين السيادة د بصّح كاتكون عند القوة البرانية.

كاين عاوتاني تنضيمات اللي ما شادّين حتا طريطوار ولّا بلا شكّ ماموفيينش المعايير التصريحية ديال تادوّالت ولكن عندهوم عتيراف بحكم القانون من شي دولة وحدة عل' الأقل بلّي عندوم سيادة. شوف حكومات ف المنفى.

المعايير د التضمين يعني هاد التنضيم خسو يدّعي السيادة، ؤ عل' الأقل دولة وحدة من الأمم المتحدة ماتكونش معتارفة بيه، ؤ ياإمّا:

كاينة 193 دولة ف الأمم المتحدة، ؤ كاين فلسطين ؤ الكرسي المقدس بجوج عندهوم حالة ديال دولة مراقبة ف الأمم المتحدة. دول اخرين اللي موفيين المعايير التصريحية، معتارفين بيهوم الأغلبية د الدول لاخرا الأعضاء ف الأمم المتحدة، واخّا هاكّاك كاينين ف هاد الليسطة حيت شي دولة ولّا كتار مامعتارفاش ب تادوّالت ديالها، ب سباب الدّيعاءات ديال الطريطوار ديالها ولّا شي نزاعات اخرا.

شي دول مخلّية علاقات ماشي رسمية (رسميا ماشي ديپلوماسية) معا الدول اللي مامعتارفاش بيها بحال الطايوان متلا.

__فهرسة__




#Article 479: إڭودار (107 words)


إڭودار (جمع أڭادير) هو مخزن جماعي معروف فالنواحي د سوس ف الجنوب د المغرب. كل قرية عندها مخزن ديالها للي تايستافد منو السكان.

أڭادير هي واحد الكلمة من لأمازيغية للي تتعني المخزن.

تايتبناو إڭودار عادة ب الحجر أو تاتكون طريق ف الوسط أو بعض المرات تاتكون ساحة كبيرة. ف إڭودار تايكون الدروج باش الناس إطلعو لطاجات د الفوق. كل بيت عندها الباب ديالها للي تايكون من الخشب.

إڭودار تايدارو عادة ف شي بلاصة عالية ف شي جبل على حساب الحماية.

إڭودار كاينين حتا ف منطقة الأوراس ف الجزائر، أو شي بلايص ف الجنوب د تونس، أو ليبيا أو جزر الكناري أو مصر أو النيجر أو حتا مالي.




#Article 480: طنݣ (190 words)


الطّنݣ (من نݣليزية: tank و لّّي كاتعني سيتيرنة) هو السّمية لّي كاتّعطا ل مجموعة د لمركبات لمدرّعة لّي كاتّستعمل ف لعمليات لحربية و لّي كايكونو مسلّحين ب مدفع مركّب معاهوم و كايتحرّكو يا ب نضام د الرّوايض مسنسلين ولا ب نضام د الرّوايض خفاف. ف لحالة اللخرا كايكونو هاد النّوع د الطّنوݣا خفاف ف لوزن ديالهوم.

ف لحرب لعالمية اللولا، كانت لجيوش عندها مشكل باش تختارق لخطوط د الدفاع اللي كانت أساسا مشكلة من كيلوميترات كتيرة ديال لخنادق و لخطوط د الزّرب. لبريطانيين كانو هوما اللوالا اللّي طوّرو هاد السلاح و لفكرة اللولا جاتهوم من التّراكتورات (اللي كانو ف ديك لوقت كايروليو ب روايض مسنسلين) اللّي شافو أنهم كاينفعو باش يتقبو لخطوط ديال الزّرب.

لپروطوتيپات اللوالا كانو على شكل سيتيرنة كبيرة مدرّعة مركّب فيها مدفع مسودي مع لكسدة ديالها، و هادشّي لّي كايفسر السّمية ديال tank.

الطّنوݣا اللوالا اللّي دخلو ل السربيس كانو ف 1916 و كان عندهوم دور كبير ف التّبدال ديال الستراتيجيات د لحرب ف التيران. دغيا دغيا، الدّول لخرا لّي كانت داخلة ف لحرب طورّات تاهيا طّنوݣا ديالها (ألمانيا و فرانسا ب دّات) و ف مدة قصيرة بانو بزّاف ديال الشّكال و كبرات التّكنولوجيا ديالهوم ب الزربة.




#Article 481: قصبة تاوريرت (190 words)


قصبة تاوريرت، هي قصبة كاينة ف مدينة وارزازات ف لمغريب.

لقصبة تبنات ف لقرن 17 ف واحد لهضبة بين لواد درعة و لواد د ورزازات، و كان سميتها ف لوْل إمغرم ن تاسيارت (لي كاتعني بشلحة لقصر د ساڭية)، و كانت تابعة لجماعة د لقبايل د أيت واوزڭيت حاكمها أمغار عبو، لي كانو كيختاروه ناس ديال لبلاصة. حتا جاو لڭلاوة و جراو علا أيت واوزڭيت من لقصبة – مورما قتلو أمغار عبو–، و حتا أمغار علي د قصر آيت بن حدو، هادشي لي خلاهم يحكمو لبلاد جنوب شرقي د لمغريب.

لباشا د مراكش تهامي لڭلاوي حط خوه حمادي خليفة ف لقصبة، و لقبايل د أيت ورزازات تارو ؤ حتلو لقصبة لمدة د عاماين حتا قضاو عليهم لڭلاوة لي جاو من تلوات، خصوصا لمدني لڭلاوي لي كان معاونو سلطان مولاي لحسن، لي عطاه مدافع و سلاح ف لحرْكة ديالو لتافيلالت فـ1893.

فـ1972، لقصبة شراتها لبلدية د وارزازات.

لقصبة دابا مقسمة لربعة ديال طرافي: لجيهة جنوب-شرقية فيها لمقر ديال لمركز ترميم و توضيف ترات لمعماري ف لبلايص لأطلسية و لي موراها (CERKAS)، لجيهة شمال-جنوبية تصلحات فـ1996 و تحلات لزوار، لجيهة شرقية لي مسمية بسطارة ساكنين فيها ناس، و لجيهة لوسطانية ولات خربة.




#Article 482: الطريق الوطنية رقم 1 (لمغريب) (263 words)


الطريق لوطنية رقم 1 أولا  هي طريق وطنية فلمغريب الطول ديالها واصل لـ 2.379 كيلوميتر وكاتربط ما بين طنجة فجهة طنجة تطوان الحسيمة والݣرݣرات فجهة الداخلة وادي الذهب قريب ملحدود مع موريطانيا. وهاد الطريق عندها دور مهم بزاف حيتاش كاتكونيكطي لأغلبية ديال لمدون لكبار دلبلاد. الطريق كلها مزفتة من طنجة للݣرݣرات. من أهم لمدون اللي كادوز منها هاد الطريق: طنجة، لعرايش، الرباط، كازا، آسفي، الصويرة، أݣادير، تيزنيت، لعيون وحتى للحدود مع موريطانيا فالݣرݣرات. كاينة واحد الطريق كاتفرع من هادي وكاتوصل لمدينة الداخلة.

طنجة - گزناية - أصيلة - سيدي لياماني - ريصانة الشمالية - ريصانة لجنوبية - السواكن - ولاد أوشيح - لقصر لكبير.

عرباوة - قرية بن عودة - سوق لاربع - سوق تلات لغرب - سيدي علال التازي - ولاد سلامة - قنيطرة - سيدي الطيبي - سيدي بوقنادل - الرباط - هرهورة - عين عتيگ - الصخيرات.

بوزنيقة - لمنصورية - لمحمدية - الدار البيضاء - ولاد عزوز - حد سوالم - ساحل ولاد حريز - شتوكة - أزمور - الجديدة - سيدي سماعيل - سانية برگيگ - الزمامرة - لعگاگشة.

جمعة سحيم - سبت گزولة - تالمست - حد الدرى - سيدي حماد أوحامد - سميمو - تامانار - إيدا أوڭلول.

إيمسوان - تامري - تغازوت - أورير - أݣادير - الدشيرة الجهادية - آيت ملول - سيدي بيبي - آيت عميرة - تيزنيت.

رگادة - سيدي حساين أوعلي - لخصاص - بويزاكارن - تاگانت - گلميم - لبيار - راس أومليل - طان طان - بن خليل - لوطية - شبيكة.

أخفنير - طرفاية - الطاح - لعيون - فم لواد - لمسيد - بوجدور - جرايفية.

لعرگوب.




#Article 483: اللعب د لعروش (123 words)


اللعب د لعروش ولا المطايفة دلعروش(بلونڭلي: Game of Throne) هو مسلسل ميريكاني دلفانتازيا ؤالدراما دار التأليف ديالو  ديفيد بينيوف ؤ دانيال وايز ،لمسلسل من إنتاج وتمويل قناة HBO(اتش بي او )لفكرة ديالو ؤحتى السيناريو مبنية على واحد  الرواية  عندها نفس السمية ديال لمسلسل.ؤتابعة لسلسةديال الرويات لوغنية ديال لاكلاس ؤلعافية (English: A Song of Ice and Fire)لي لكاتب ديالها جورج آر. آر مارتن.

ف فواحد لقارة خيالية  سميتها  ويستروس ، كيتحاربو بزاف دلفميلات لي عندها واحد لقوة كبيرة ؤ معارف صحيحة  باش إحكمو  لمملكات السبعة.ؤلحرب ؤلقتيلة  دايرة بين هاد الناس ، بان واحد لعدو قديم بزاف ؤلي غيهددهوم كاملين. ؤفبلاصة أخرى من مورا لبحر لوريثة دلمليك  لحقيقي  ديال لمملكات السبعة دنيرس تارجارين كتجمع لعدة ؤالعسكر لي إعونها باش ترجع لعرش لي دباها لي من حقها.




#Article 484: إتش بي أو (113 words)


اتش بي او أولا هوم بوكس أوفيس  (بلونڭلي: HBO) هي واحد  لقناة دتيليفيزيون تابعة للشركة لكبيرة دالإعلام  تايم وارنر، كتقدم السرفيس دتلفزيون بلفلوس لكثر من 40 مليون مشتارك ميريكاني، ومن بين السيرفسات أولا لخدمات لي كتقدمها الشركة لخدمة دلفيديو على حساب الطلب ديال لمشتركين. وهي كتبيع سلسلة ديال لبرامج دالتلفزا لكثر من 150 دولة فالعالم. كتنتج شركة ديال HBO لأفلام ؤلمسلسلات ؤلبرامج دالتلفزا خاصين بيها مكلفة بيهم من اللول حتى لخر. ومن بين لمسلسلات لمشهورة ديالها ؤلي كديرهم فلقناة ديالها اللعب د لعروش ولمسلسل ستة ترجلين تحت لارض ومسلسل آل سوبرانو ؤ مسلسل تشيرنوبيل ... هاد لقناة معروفة  بالإنتاجات  لي عندهاواحد الزعامة كبيرة بزاف ؤموجهة بلخصوص لناس لي كبار.

آل سوبرانو

شيرنوبيل

صراع العروش




#Article 485: الطريق الوطنية رقم 8 (لمغريب) (121 words)


الطريق لوطنية رقم 8 أولا  هي طريق وطنية فلمغريب الطول ديالها واصل لـ862 كيلوميتر وكاتربط ما بين الصويرة فجهة مراكش آسفي وتارگيست فجهة طنجة تطوان الحسيمة. وهاد الطريق عندها دور مهم بزاف حيتاش كاتكونيكطي لبعض من أهم لمدون ديال الجبال وبالضبط جبال لأطلس لمتوسط. مابين هاد لمدون: شيشاوة، مراكش، قلعة السراغنة، بني ملال، قصبة تادلة، زاوية شّيخ، خنيفرة، مريرت، آزرو، إيفران، إيموزار كندر، فاس، تاونات وتارگيست.

الصويرة - أهديل - ولاد صباح - شيشاوة - لمزوضية - مراكش - تاملالت - قلعة السراغنة

بني ملال - لفقيه بنصالح - قصبة تادلة - زاوية الشيخ - مريرت

إيموزّار كندر - خنيفرة - آزرو - إيفران - فاس - سيدي حرازم - تاونات - زريزر

بني بونصر - تارگيست - كالا إيريس (الحسيمة).




#Article 486: دونكي كونڭ (سلسلة د ألعاب) (225 words)


دونكي كونڭ (Donkey Kong) هي سلسلة د ألعاب فيديو من نينتندو الي كت راكونتي لمغامرات ديال لپيرسوناج دونكي كونڭ، لكرياسون ديال شينڭيرو مياموتو. لألعاب ف هد لسلسلة هم كت كون د لنوع پلاتفورم، بحق كاين تا لألعاب د لپازل، لرايسين و لإديكاسيون. للعبة لأولى خراج ف 1981. ف 1994، لشركة لبريطانية راير عدلت للعبة دونكي كونڭ كونتري (Donkey Kong Country) وبعد من ديك الساعة بديت لسلسلة لجديدة ديال لألعاب پلاتفورم بلنفس لإسم.

دونكي كونڭ كان ف للعب لأول ف 1981 فحل لأنتاڭونيست، و لپيرسوناج ديال للاعِب كان سميتو جامپمان (Jumpman)، دابا ماريو، الي حسو تسوڤي صحب ديالو، پولين (Pauline). دونكي كونڭ جونيور كان لبطل ديال للعب لثاني ف 1982، فين هو كان حسو تسوڤي بابا ديالو، دونكي كونڭ، من جامپمان، دابا لأنتاڭونيست. من لألعاب ديال راير تال دابا، كرانكي كونڭ هو دونكي كونڭ لأول، جدو ديال دونكي كونڭ لجديد، و هو كت بقا تكريتيكي لجينيراسيون لشعبي د لأبطال. ف لألعاب دونكي كونڭ كونتري كين تا ديدي كونڭ (Diddy Kong)، ديكسي كونڭ (Dixie Kong)، فونكي كونڭ (Funky Kong)، و بزاف ديال لأخر. كاين تا بزاف ديال لأنتاڭونيستات، فحل لكرَملينڭس (Kremlings)، مجموعة د لكروكوديلات، و لرئيس ديالوم الي هو سميتو لملك ك. رُول (King K. Rool)، بحق كاين تا لتيكي تاك ترايب (Tiki Tak Tribe)، ف للعبة دونكي كونڭ كونتري ريتورنس (2010)، و لمجموعة ديال لڤايكينڭس سميتهم لسنَومادس (Snowmads)، ف للعبة دونكي كونڭ كونتري: تروبيكال فريز (2014).




#Article 487: عبد الفتاح السيسي (141 words)


عبد الفتاح سعيد حسين خليل السيسي هو الرئيس السادس ديال مصر، من 2014 تال دابا. هو كان تا جينيرال، وزير ديال الدفاع، مدير لمخابرات لعسكرية، و بين 10 فبراير 2019 و 10 فبراير 2020، رئيس لإتحاد لإفريقي.

خلق السيسي ف لقاهرة، و بعد هو دخال ف لجيش لمصري. ف 1992، السيسي نعمل لتراينينڭ ف واتشفيلد، ف لمملكة لمتحدة، و بعد ف 2006 عاوتاني ف كارليل ف لميريكان. السيسي رجع مدير دلمخابرات لعسكرية، و بعد لثورة ف 2011، لرئيس لجديد محمد مرسي نعمل السيسي وزير لدفاع لجديد ف 2012.

السيسي و لجيش لمصري عندهم لحكم لأوطوقراطي ف مصر. لإنتخابات مشي معقولة، ولنظام نعمل بزاف ديال لتعذيب، لإختفاء و لڤيولونس لجنسي ضد لنقاد د لحكومة و لأنصار ديال لإخوان لمسلمين. لإنتخابات لرئاسية ف 2018 ماكانتشي ديموكراطية، و ف لنهاية السيسي كان عندو لأوبوسيسيون غير ف لإسم (موسى مصطفى موسى، ف لرياليطي مؤيد للرئيس).




#Article 488: الطريق الوطنية رقم 9 (لمغريب) (106 words)


الطريق لوطنية رقم 9 أولا  هي طريق وطنية فلمغريب الطول ديالها واصل لـ694 كيلوميتر وكاتربط ما بين لمحمدية فجهة الدار البيضاء سطات ومحاميد لغزلان فجهة درعة تافيلالت. وهاد الطريق كاتكونيكطي بزاف دلمدون واللي مابينها: الدار البيضا، برشيد، سطات، بنڭرير، مراكش، وارزازات وزاڭورة.

لمحمدية - عين حرودة - الدار البيضا - تيط مليل - مديونة - النواصر - برشيد - سيدي لعايدي - سطات - سيدي محمد بن رحال.

مشرع بن عبو - صخور الرحامنة - بنڭرير - سيدي بوعثمان - واحة سيدي براهيم - مراكش - آيت ورير.

إيغرم ن أوگدال - تيزگزاوين - وارزازات - آگدز - زاڭورة - تامگروت - تاڭونيت - محاميد لغزلان.




#Article 489: الطريق الوطنية رقم 10 (لمغريب) (102 words)


الطريق لوطنية رقم 10 أولا  هي طريق وطنية فلمغريب الطول ديالها واصل لـ653 كيلوميتر وكاتربط ما بين أݣادير فجهة سوس ماسة والراشيدية فجهة درعة تافيلالت. وهاد الطريق كاتكونيكطي أغلب لمدون لكبار ديال لوسط دلمغريب، واللي مابينها: آيت ملول، تارودانت، وارزازات وتينغير.

أݣادير - إينزگان - الدشيرة الجهادية - آيت ملول - تمسية - ولاد دحو - ولاد تايمة - لخنافيف - تارودانت - آيت إيعزة - ولاد برحيل - أولوز - تاليوين - تاسوسفي.

تازناخت - وارزازات - إيدلسان - سكورة أهل لوسط - آيت سدرات - قلعة مڭونة - بومالن دادس - إيميضر - تينغير - تينجداد - گولميمة - الراشيدية.




#Article 490: الطريق الوطنية رقم 17 (لمغريب) (126 words)


الطريق لوطنية رقم 17 أولا  هي طريق وطنية فلمغريب الطول ديالها واصل لـ2877 كيلوميتر وكاتربط ما بين السعيدية فجهة الشرق ولگويرة فجهة الداخلة وادي الذهب. والطريق كاتكونيكطي بزاف دلمدون دلجانوب الشرقي ولأقاليم الصحراوية واللي منها: أحفير، وجدة، الراشيدية، أرفود، زاڭورة، طاطا، السمارة، ڭلتة زمور وبير گندوز.

السعيدية - أحفير - بني درار - وجدة - سيدي موسى لمهاية - عين بني مطهر - تيندرارة - بوعرفة - عين الشعير - بوعنان.

بودنيب - أوفوس - أرفود - الريصاني - ألنيف - تازارين - زاگورة.

فم زگيد - تيسينت - طاطا - أقا - تيزوين - فم الحصن.

أسا - الزاڭ - لمحبس.

جديرية - السمارة - بوگراع - گلتة زمور.

ميجّيك - أگوينيت - تيشلا - بير ڭندوز - لگويرة.

هاد الطريق عندها بزاف ديال التفروعات:




#Article 491: إدي پايسر (119 words)


إدي پايسر (ب نڭليزية: Eddie Pacer)، لي هي سمية فنية، هو يوتوبر و كاتيب مغريبي عايش ف لندن (لينڭليز).

إدي پايسر، لي سميتو لحقيقية هي أحمد، قرا ف لافاك د لقنيطرة؛ و رحل فـ2010 لنڭليز فين كمل قرايتو و بدا كيكتب ليوميات ديالو ف بلوڭ ب دارجة.

كان إدي من ناس لولين لي تعاطاو ل پودكاستين ف أنتيرنيت (خصوصا فيسبوك) ف لمغريب، و تشهر ب لمحتوى لي كان كيدير لي فيه لفلسفة و لعب د لڭيطار. لڤيديوات ديال تفلسيف يمكن ندخلوهوم ف تيار د سايكدلية.

تعرض لكونط ديالو لحملة د سينيال بزاف لمرات بسباب لمواضيع لي جبدها و عندها علاقة ب لعدمية، سريالية، ميطافيزيقا.

كتب إدي واحد ريواية مسموعة ب لعربية بسميت ستراوس إسفرادسكي سميتها جدران باردة (حيوطا باردين).




#Article 492: إنزال لحسيمة (138 words)


إنزال لحسيمة (ب سّپانيولية: Desembarco de Alhucemas) كان أول إنزال بحري و جوي ف التاريخ لعسكري ف لعالم. كانت قامت بيه سپانيا (و ب الضبط لحوكومة د پريمو دي ريبيرا) ف 8 شتنبر 1925، و كانت عاوناتها فيه فرانسا و بريطانيا (اللي عطات دعم لوجيستيكي ل لعملية من لقاعدة ديالها ف جبل الطّرّ) و زيد عليهو السلطان د لمغريب مولاي يوسف اللي كان ضد لمقاومة د الريف. هاد لإنزال كان لهدف ديالو يسالي ب مرّة مع لحرب د الريف و معا لجمهورية د الريف لّي كان أسسها محمد بن عبد الكريم الخطابي.

لإنزال كان موبيليزا 13 ألف عسكري سپانيولي و 24 طنگ و 160 طيارة حربية.

لجينيرال سّپانيولي سانخورخو هو لّي كان كايقود لعمليات و هو لّي خلّا السمية ديالو ل مدينة لحسيمة لّي كانت كاتّسما بيا سانخورخو و بقات محافضة على هاد السّمية تال لستيقلال د لمغريب.




#Article 493: روتيني اليومي (174 words)


روتيني اليومي (كلمة روتين ف بزّاف د لّوغات كاتعني لحاجة ولا لحوايج لّي كايتعاودو ب نفس الشكل) هي السمية لّي كاتعطا ف الدول لعربية ل واحد النوع د لمحتوى كاين ف يوتيوب و لّي لغالبية ديال ليوتوبرز لّي كايديروه كايكونو نسا و كايصوروه من ديورهوم و كايكون فيه تصوير د لأنشطة ديالهوم د كل يوم بحال شغالات الدار و الطياب و التّقضية ولا كايكونو فيه نصائح ولا توصيات على لمسائل لمنزلية و لحياة ليومية (ف اللباس، الصحة، التغدية...).

الربح لمالي لّي كايعطي هاد لمحتوى لماليه، و زيد عليه نسب لمشاهدة لكبيرة ديالو و لمشاكيل و لإشكاليات اللي كايطرحها على مستوى قضايا بحال الصورة د لمرا، الحرية الفردية و لحرية د لمحتوى ف إنترنت، خلاتو يكون موضوع نقاش عمومي ف بلدان بحال لمغريب.

هاد النوع د لمحتوى كاين، من بين لمنتقدين ديالو، لّي كايشوف أنه كايطرح موشكيل أخلاقي و كايصنفو محتوى جنساني ولا تافه و حتّا دعارة مخبّية و كايعتابر أنه خاصّو يتحارب و يتعاقبو مّاليه. ف الجيهة لخرا، لمدافعين على لبقاء ديال هاد لمحتوى كايعتابرو أنه كايدخل ف باب لحرية لفردية و حرية التعبير.




#Article 494: جان جوني (103 words)


جان جوني (ب لفرانساوية: Jean Genet) (خلاق ف 19 دجنبر 1910 ف باريز - توفا ف 15 أبريل 1986 ف باريز) كاتب فرانساوي متخصص ف الرواية و الشعر و لمسرح. كان عندو ارتباط كبير ب لعالم لعربي، ب لقضية لفلسطينية و ب لمغريب لّي دوز فيه بزاف و ختار يتدفن فيه ف مدينة لعرايش.

لكتابة ديالو كانت كاتقيس لمواضيع د لجنسانية و لمتلية زيادة على لقضايا لإنسانية لكبيرة و كايتميز لأليوب ديالو ب شاعرية كبيرة. جوني كان مثقف ملتازم ب لقضايا لعالمية لكبيرة و كان حاضر ف لأرض ف بزّاف ديال لأزمات بحال لغزو لإسرائيلي ل لبنان و التضاهرات ضدّ لعنصرية ف فرانسا.




#Article 495: عقدة (أدب) (123 words)


لعقدة، ف الرواية ب شكل خاص، و ف أعمال إبداعية آخرا، لّي فيها بنية ديال لحكي، بحال لمسرح و سّينيما، هي تلخيص ل لحكاية ب شكل كايبين النقطة (ولا النقط) اللي فيهوم لمشاكيل ولا لأحدات لكبيرة و كيفاش الشخصيات غادي يحلّوها ولا يسيرو ب الرواية ل النهاية ديالها.

مفهوم العقدة عرف تطور كبير ف النقد الأدبي، و مرتابط بزّاف ب لمفهوم د الحبكة، لّي كايتسما ب لفرانساوية Intrigue، و لّي هي نّيت جاية من الطاليانية Intrigo، اللي كاتعني شي حاجة مفشكلة ولا مخبّلة. غير هوما هاد جوج مفاهيم، لعقدة و لحبكة، تطورو ف النظريات الأدبية بشكل اللي خلا لحبكة كاتفوت التعريف د لعقدة ب الزيادة د البنية و الهيكلة ديال لعمل لإبداعي و الطريقة اللي كايتفاعلو بيها الشخصيات و الأحدات باش تتحلّ لعقدة.




#Article 496: عبد العزيز العبدي (147 words)


عبد العزيز العبدي (خلاق ف وزان ف 1 نونبر 1969)، كاتب و إعلامي مغريبي. العبدي كايكتب ف صنف الرواية و القصة القصيرة ب اللوغة لعربية و كانت عندو تجارب إعلامية ف مواقع مغربية و محتويات صحفية (كرونيكات ساخرة) ف ليوتيوب. العبدي كايتميز ب الطريقة د النشر ديالو و اللي كاتمّ ب شكل ذاتي عبر البريد و ف شبكات التواصل لجتيماعي.

عبد العزيز العبدي ولد مدينة وزان. من بعد ما شد الباك ديالو ف 1987 ف الشعبة د ليكونومي كمل الدراسة الجامعية ديالة ف لمجال د لقتيصاد لقياسي (ليكونوميتري) اللي خدا فيه شهادة الليسونس.

خدم مدة ف القطاع البنكي و من بعد ف شركة د الرخام ف سلا و هو حاليا خدام ب شكل مستقل ف لمجال د أشغال لبني و التركيب.

العبدي سبقليه كان ناشط ف الجمعية المغربية د حقوق الإنسان ف 1994.

لهتيمام ديالو ب لأدب و لكتابة خلاه يعاود لباك ف شعبة أدبية ف 1999.




#Article 497: الطريق الوطنية رقم 25 (لمغريب) (100 words)


الطريق لوطنية رقم 25 أولا  هي طريق وطنية فلمغريب الطول ديالها واصل لـ362 كيلوميتر وكاتربط ما بين الرباط فجهة الرباط سلا القنيطرة و دمنات فجهة بني ملال خنيفرة. من أهم لمدون اللي كادوز منها هاد الطريق: الرماني، الزحيليگة، واد زم، لفقيه بنصالح وأزيلال.

الرباط - سيدي يحيى زعير - عين لعودة - براشوة - الرماني - الزحيليگة.

ولاد فتاتة - ولاد بوغادي - آيت عمار - واد زم - عين قيشر - لفقيه بنصالح - ولاد زمام - ولاد مراح - سوق سبت ولاد النمة - أفورار - بين لويدان - أزيلال - تامدا نومرسيد - آيت تاگلا - دمنات.




#Article 498: شاروخان (250 words)


شاروخان، و سميتو كاتكتب ب لأوردو شاه روخ خان (خلاق ف 2 نونبر 1956 ف ديلهي - لهيند)، ممتل و منتج د سّينيما هيندي. هو من أكبر و أشهر لممتلين ف تاريخ السينيما لهندية.

شاروخان مسلم و كبر ف عائيلة من الطبقة لمتوسطة ف لعاصمة د لهند. قرا لقتيصاد و التواصل ف الجامعة و فيها بدا كايلعب ف فراقي د لمسرح. بدا التمتيل ف مسلسلات د التلفزة و بان فيهوم، الشي اللي خلا منتجين ف بومباي (لعاصمة د السينما ف لهند) يعيطوليه باش يلعب أفلام ف السينيما.

أول فيلم لعب فيه كان ديڤانا ف 1992 اللي حقق نجاح كبير و خدا بيه جائزة أحسن ممتل طالع. ف ظرف عوام قليلة، قدر شاروخان يولي أكبر نجم ف بوليود و وصلات الشهرة ديالو ل بلدان آخرا ف لعالم و ب الدات ف الدول لعربية.

لأدوار اللولة ديالو كانت مختالفة على لأدوار اللي تعرف بيها من بعد: كان كايلعب بزاف أدوار ديال لبطل لخايب/الشرير بحال ف لفيلم د رام جاني. من بعد رسخ النمط ديال البطل لمحبوب عند لجمهور و قدر يبان ب شكل مختالف ف كل فيلم واخا لعدد لكتير د لأفلام اللي متل.

من أهم لأفلام ديالو ف تسعينات لقرن 20 كانت بازيگار، دارّ و ب الدات ديلڤالي دولهانيا لي جايينگي، اللي تّعرف عند لجمهور لمغريبي ب سميت عودة العاشق المجنون و اللي ولّا من الخالدات د السينيما الهندية و تّدارو بزّاف د التلميحات ليه ف لأفلام لّي جات من بعد د الشاروخان.

من بعد جات لمرحلة ديال الكوميديات الرومنسية لعالمية بحال موهابّاطين، كوتش كوتش هوطاهي و كابي كوشي كابي غام.




#Article 499: خدام الدولة (428 words)


خدام الدولة هو مصطلح بان ف الساحة د الصحافة و السياسة ف لمغريب ف 2016 و كايعني واحد لمجموعة د الناس اللي هوما موظفين كبار ولا رجال دولة ف المغريب (مستشارين، وزرا، سياسيين) و فيهوم حتا ناس مقرّبين من لقصر لملكي ف لمغريب لّي ستافدو من بقاعي د لأرض ف الرباط ب تمن رخيص بزّاف و قل من التمن د لميترو لحقيقي. هاد لبقاعي كانو ف ملكية الدولة المغربية و تعطاو ب شكل مباشر بلا طلب عروض.

هاد القضية كانت تفجرات من بعد تحقيقات صحفية، كان موراها الصحفي عمر الراضي و نشروها و بحتو فيها مؤسسات إعلامية مغريبية بحال أخبار اليوم و السيت د لكوم.

القضية كاين اللي عتابرها فضيحة أخلاقية و شكل ديال الرشوة و شرا ديال الولاءات وكاتخلق مشكل ديال شبهة عندو خالتو ف العرس (Délit d'initié). ف الجيهة ياخرا لّي ستافدو دافعو على هاد لحقّ و عتابرو أن لّي خاصّو يتلام هو القانون اللي كاين اللي كايعطي ل الدولة الحق تدير بحال هادشي.

القضية خلقات حتا نقاش عمومي ف المغريب على قانون الوصول للمعلومة و الحماية د الصحافيين اللي كايديرو صحافة التحقيق.

سوا الصحافيين اللي خدمو على الضوسي ولا لمؤسسات لإعلامية اللي نشرات التفاصيل كاملين من بعد عوام قليلة تعرضو ل متابعات قضائية ف ملفات آخرا ولا تقطع عليهوم لإشهار و سدّو (ولا قرّبو يسدو)، و كاينين منظمات حقوقية لّي كايعتابرو هادشي شكل ديال لنتيقام على التحقيقات الصحفية ديالهوم.

لقضية بدات ف 23 يوليوز 2016 فاش نشرو جرائد و مواقع مغريبية (منهوم أخبار اليوم و لكوم) تحقيقات صحفية فيهوم وتائيق كاتشير أن عبد لوافي لفتيت (لّي كان ف ديك لوقت والي على الرباط-سلا-قنيطرة) شرا من عند الدولة بقعة د 3755 ميترو ب تمن 348 درهم/م² ف طريق زعير ف الرباط، و هي لبلاصة اللي لميترو فيها واصل ل 10 لاف درهم ل لميترو لمربع.

من بعد دارت الداخلية و المالية بلاغ كايقولو فيه أن العملية قانونية و داخلة ف عملية د تفويت عقارات ل خدام الدولة، على حساب التعبير اللي جا ف البلاغ.

ف 26 يوليوز 2016 لموقع د لكوم قدر يدبّر على الليستا كاملة و تنشرات ف مؤسسات صحافية مغريبية بحال أخبار اليوم. الليستا بانو فيها سميات من النّواع التالية:

سميت خدام الدولة نتاشرات ف اللول بزّاف ف مواقع التواصل لجتيماعي و تدارو هاشتاگات خدام الدولة ك شكل د لنتيقاد و السخرية من الجملة اللي تخدمات ف البلاغ اللي خرجوه لوزارات د المالية و الداخلية و اللي جا فيه:إن القطعة الأرضية التي اشتراها والي جهة الرباط سلا القنيطرة، عبد الوافي لفتيت، جزء من تجزئة سكنية مخصصة لموظفي وخدام الدولة منذ عهد المغفور له جلالة الملك الحسن الثانيلنتيقادات شارت ل كون خدام الدولة مصطلح ما كاين لا ف لقانون ولا ف لمساطر د لإدارة لمغريبية.




#Article 500: كوڤيد-19 (1250 words)


المرض ديال ڤيروس كورونا 2019 (كوڤيد-19، من الاختصار ديالو ب النڭليزية Coronavirus Disease 2019) هو واحد المرض معدي كيسبّبو الڤيروس ديال كورونا 2 المتعلق ب المتلازمة التنفسية الحادة القوية (سارس-كوڤ-2)، و اللي كان معروف ف البدو ديال الانتشار ديالو ب فيروس كورونا الجديد (nCoV-2019). هاد المرض بان أول مرة ف ووهان، ف الوسط ديال الشينوة، و سبّب واحد الجايحة مستامرّة. حتى ل 23 شتنبر 2020، كتر من 31 مليون واحد تعادى ب المرض ف 188 دولة، منهم كتر من 971 ألف واحد اللي مات، و كتر من 21 مليون واحد اللي برا.

الأعراض الشايعة ديال هاد المرض كاتشمل السخانة، الكحبة، العيا، النقص ف التنفس ولا صعوبات تنفسية، و الفقدان ديال الحاسة د الشمان و الدوق. ف الوقت اللي الأغلبية ديال الناس عندهم أعراض خفيفة، كاين اللي كيطوّر المتلازمة ديال الضيقة التنفسية الحادة (ARDS). الفترة ديال الحضانة ديال المرض يمكن تكون مابين يوم واحد حتى ل 14 يوم.

المرض كينتاشر مابين الناس ب شكل قوي ملي كيكونو قراب جسدياً. كينتاشر ب شكل ساهل بزاف ف الهوا، سيرتو ف الرداد التنفسي الصغير ملي المريض كيتنفس، كيكحب، كيعطس، كيهضر، ولا كيغني. المرض يقدر ينتاشر من السطوحا الملوتين واخا هاد المسألة ما عليهاش إتبات استنتاجي قوي. الڤيروس كيبدا الانتشار ديالو يوماين قبل ما الأعراض تبدا تضهر، و الناس اللي ما كاتضهرش عليهم أعراض حتى هما يقدرو يعاديو ناس اخرين. الناس كيبقاو معاديين ل واحد المدة ديال 7-14 يوم ف الحالات الخفيفة، و حتى ل جوج سيمانات ف الحالات الخطيرة. الطريقة المعيارية ديال الكشف هي التفاعل ديال الپوليمراز المتسلسل ديال النسخ المعكوس (RT-PCR) من مسحة بلعومية ف النيف. التصوير المقطعي ديال الصدر حتى هو يقدر يعاون بزاف ف الكشف، بلحاق التوجيهات الصحية ما كاتنصحش ب هاد النوع ديال الكشف يلا كان غادي يتستعمل ب شكل روتيني.

الإجراءات ديال الوقاية ضد العدوى كاتشمل الغسيل ديال اليدين ب شكل متكرر، التباعد الاجتماعي، الحجر الصحي، التغطية ديال الكحبة، و التأكد بيلا اليدين اللي ما مغسولينش يبقاو بعاد على الوجه. الاستعمال ديال الكمامات (ولا أي حاجة كاتقدر تدير الخدمة ديال الكمامات، بحال الزيف، الوشاح ديال الراس ... إلخ) منصوح بيه من طرف بزاف ديال الخبراء ديال الصحة ف البلايص العموميين، و كاينين بلدان اللي فرضو الاستعمال ديال الكمامة باش ينقّصو من الاحتمال ديال العدوى. الخبراء ديال الصحة كيقولو عوتاني بيلا الكمامات الطبية، بحال من النوع ديال ن-95، خاصهم يبقاو خاصين ب الخدّاما ف المجال ديال الصحة و ب الناس اللي كيعتانيو ب المراضين.

مازال ما كاين حتى ڤاكسان ولا شي علاج معين ديال كوڤيد-19، واخا كاينين بزاف اللي مازالة عليهم الخدمة. المنضمة العالمية ديال الصحة (WHO) علنات ف 30 يناير 2020 بيلا التفشي ديال كوڤيد-19 ولات حالة طوارئ صحية عالمية، و ف 11 مارس 2020 ولات جايحة عالمية.

كاين تنوع على المستوى ديال الأعراض ديال كوڤيد-19، بلحاق ف الأغلبية د المرات كاتكون السخانة و الكحبة. الناس المراضين ب هاد الڤيروس يقدرو يطوّرو أعراض مختالفة، و هاد الأعراض يمكن ليها تتبدّل مع الوقت. متلاً، واحد الشخص يمكن تجيه السخانة بزاف، الكحبة، و العيا، و ف نفس الوقت، شخص اخر تقدر تجيه شوية د السخانة ف البدو ديال المرض و مع الوقت تجيه مشاكل ديال التنفس من مور سيمانة. الأعراض ديال كوڤيد-19 كلها ماشي خاصة؛ يعني نقدرو نلقاوها ف أمراض اخرين.

السخانة هي العلامة الشايعة ديال كوڤيد-19، و تقدر تكون طالعة بزاف ولا هابطة. الأغلبية ديال الناس المراضين ب كوڤيد-19 كاتجيهم السخانة ف شي مرحلة من المراحل، و كاتجيهم الكحبة، اللي تقدر تكون إيما يابسة ولا فازڭة.

أعراض اخرين شايعين هما العيا، صعوبات ف التنفس، و حريق ديال العضلات و المفاصل. أعراض بحال المشاكل ديال التنفس كيكونو شايعين بزاف عند الناس اللي كيحتاجو العناية ف السبيطار. المشاكل ديال التنفس كاتجي عادةً ف مرحلة معطّلة من التطوّر ديال المرض.

تقريباً 40% من الناس كاتجيهم الأنوسميا، يعني كاتمشي ليهم الحاسة ديال الشمّان، و الديسڭوسيا، يعني كيلاحضو اختلافات على المستوى ديال الحاسة د الدوق. هاد العلامات يلا كانو غادين يبانو، كيبانو بكري. هاد النوع ديال الأعراض شايع كتر عند الشباب، و يمكن على هادشي، كيعني بيلا الحالة ما غاداش تتعقد بزاف. واخا الأغلبية ديال الناس المراضين ما كاتجيهمش هاد العلامة، هاد العلامة صعيب نلقاوها ف أمراض تنفسية اخرى.

كاينين أعراض اخرين ماشي شايعين بزاف ديال كوڤيد-19. كاينين ناس اللي كاتجيهم أعراض على المستوى ديال الجهاز الهضمي بحال الفقدان ديال الشهية، الكرش الجارية، الڭانة ديال القي. كاينين ناس اللي كايجيهم الڭراجم، حريق الراس و الدوخة.

بحال ما كيوقع مع ڤيروسات اخرين، كاينة واحد المدة كاتسمى ب المدة ديال الحضانة، كاتبدا ف اللحضة ملي الشخص كيتعادى و كاتسالي ملي كيبداو الأعراض يضهرو. هاد الفترة ديال الحضانة ب النسبة ل كوڤيد-19 كا معدل تقدر تكون مابين 4 و 5 أيام. الناس اللي كيضهرو عليهم بزاف ديال الأعراض كيبداو يحسّو ب هاد الاضطرابات من يوماين حتى ل 7 أيام من مور العدوى، و الأغلبية ديال الناس اللي كيضهرو عليهم الأعراض ب شي علامة قبل اليوم 12. كاينين أعراض كيبانو قبل اخرين. ف غشت 2020، العلماء ديال الجامعة ديال كاليفورنيا الجنوبية أكدو بيلا الترتيب المحتمل ديال الأعراض اللولية ديال كوڤيد-19 هو السخانة، متبوعة ب الكحبة و الحريق ديال العضلات، و الڭانة ديال القي (و شي مرات حتى القي) كاتجي قبل الكرش الجارية. هاد الترتيب كيختالف على الترتيب ديال الأعراض ديال الانفلونزا اللي فيها الكحبة كاتجي قبل السخانة.

شي د الناس واخا كيكون فيهم الڤيروس ما كيبيّنو حتى شي علامة. هاد الناس عادةً ما كيحسّو ب والو و يقدر ما يكونوش عارفين ريوسهم مراضين يلا ما دوّزوش الطيسط ديال الكشف. واخا هكداك، هاد الناس يقدرو ينشرو الڤيروس. كاينين ناس اخرين اللي الأعراض عندهم كاتجي معطلة بزاف، و كاينين اللي كاتجيهم أعراض خفيفة. هادو كاملين يقدرو ينشرو العدوى.

كوڤيد-19 كيجي ب سباب العدوى ب الڤيروس ديال كورونا 2 المتعلق ب المتلازمة التنفسية الحادة القوية (سارس-كوڤ-2)

كوڤيد-19 مرض جديد و مازال تحت البحت. كينتاقل من شخص ل شخص ملي كيكونو قرابين ل بعضياتهم، بلحاق واخا ما يكونوش قراب يلا كانو ف بلاصة مسدودة. ملي الشخص المعادي كيتنفس، كيكحب، كيعطس، كيهضر ولا كيغني، كينتج واحد الرداد ملوّت اللي كيمشي ف الهوا و كيعادي أي واحد ستنشقو. كل واحد مريض يقدر يعادي 2 حتى ل 3 ديال الناس (كتر من الانفلونزا، و قل من بوحمرون). هاد النوع من الانتقال ف الهوا كيوقع بزاف ف البلايص المسدودة اللي فيها الزحام و ما مهوّياش مزيان، بحال ما يقدر يكون الحال ف المطاعم، الديسكوطيكات، النقل العمومي، و التجمعات بحال العراسات و الڭنازات.

الناس يقدرو يتعاداو عوتاني يلا قاسو شي حاجة ملوتة ب الڤيروس و وراها قاسو عينيهم، نيفهم ولا فمهم بلا ما يكونو غسلو يديهم مزيان، واخا هاد المسألة ما كاينش عليها شي دليل استنتاجي قوي. الڤيروس كيكون ضعيف ملي كيكون برا الجسم ديال بنادم و كيموت ف مدة محدودة، و يقدر يتّقتل ب المعقمات ديال الدار. هاد المعقمات ما صالحينش ل الاستعمال يلا الڤيروس دخل ل الجسم ديال بنادم.

البزاق كيهز كمية كبيرة ديال الڤيروس. واخا كوڤيد-19 ماشي مرض اللي كينتاقل مع الممارسة الجنسية، الكونطاكط المباشر، بحال البوسان ولا شي ممارسات حميمية بحال الكونطاكط الفموي-الشرجي، مشكوك بيلا تكون عندهم القدرة ديال نقل العدوى. الڤيروس يقدر يكون موجود ف الحليب ديال البزولة، بلحاق السؤال ديال واش ممكن يدوز من البزولة ل البيبي مازال ما معروفش. المنضمة العالمية ديال الصحة كاتنصح المّيمات اللي فيهم الڤيروس ما يوقفوش الرضاعة ديال البيبي ديالهم.

الڤيروس ديال كورونا 2 المتعلق ب المتلازمة التنفسية الحادة القوية (سارس-كوڤ-2) هو ڤيروس جديد، ف البدو تستأصل من 3 ديال الناس عندهم مشاكل ف الرية متعلقة ب مرض تنفسي حاد ف ووهان. الخصائص ديال SARS-CoV-2 كلها كاتطرى حتى مع الڤيروسات ديال كورونا الاخرين.

هاد الڤيروس الجديد راه قريب بزاف ل الڤيروس الأصلي (سارس-كوڤ-1). العلماء كيعتاقدو بيلا الأصل ديالو جاي من الحيوان. التحاليل الجينية كشفات بيلا ڤيروس كورونا كيتجمّع ب شكل جيني مع الجنس ديال بيطاكوروناڤيروس، مع الفرع ديال ساربيكوڤيروس (السلالة ب)، مع جوج ديال السلالات ڤيروسية مشتقة من الخفاش. هاد الڤيروس مطابق ب 96% على المستوى ديال الجينوم مع العينات ديال ڤيروس كورونا ديال الخفاش (BatCov RaTG13)




#Article 501: خوصصة (179 words)


الخوصصة (و كاتّسما الخصخصة ف لعربية د لمشرق) ف لقتيصاد و السياسات لعمومية هي لعملية اللي كاتدوز فيها الدولة لملكية ديال شي حاجة ديالها، يمكن تكون شركة ولا مؤسسة عمومية د الصناعة ولا التجارة و يمكن تكون حتّا نشاط قتيصادي ولا خدمة عمومية كانت كاتحتاكرها، ل عند القطاع الخاص (لپريڤي). هاد التفويت يمكن يكون كامل ولا غير جزئي.

العملية العكسية، لّي كاتكون الدولة هي اللي كاتشري ولا كاتّاخد ب السيف شي نشاط قتيصادي كان عند الخواصّ، كاتّسما التأميم.

لخوصصة مفهوم قتيصادي لّي خلق بزّاف د النقاش ف لعالم و ف لقتيصادات ديال لعالم التالت. ف لمغريب، لخوصصة، من اللخر ديال التمانينات د لقرن العشرين ولّات سياسة قتيصادية هيكلية ديال الدولة، و تخصّصو ليها قطاعات وزارية ديالها و مساطر و صنادق ف لميزانية ديال الدولة اللي كاتسير لمداخيل ديالها.

أكبر عملية د لخوصصة ف التاريخ د لمغريب كانت ف 2001 فاش باعت الدولة 35 ف لميا د لأسهم ديالها ف اتصالات لمغريب ب 23.34 مليار درهم.

بين 1993و 2008 الدولة لمغريبية دخلات 100 مليار درهم من 107 عملية د لخوصصة ديال شركات و مؤسسات عمومية ب شكل كامل ولا جزئي.




#Article 502: ادريس البصري (132 words)


ادريس البصري (تزاد ف 8 نونبر 1938 ف سطات - مات ف 27 غشت 2007 ف باريز). سياسي مغريبي، كان وزير د الداخلية د لمغريب يّامات الحسن التاني و ل مدة قصيرة ف لبدو د محمد الساديس. كان من الشخصيات لقوية د لمرحلة د الحسن التاني و كان من الرموز ديال لعوام د الرصاص ف لمغريب. بحيت كانو تقريبا 600 سياسي تقتلو.

ف ياماتو كبرات بزاف لقوة ديال وزارة الداخلية ف لمغريب ل درجة أنها ولات كاتّسما أم الوزارات و ولات كاتّحكم ف كل الأجهزة التنفيذية و لأمنية د لبلاد و حتا ف لحياة السياسية بحيت كانت كاتّدخل بزاف ف التسيير د لأحزاب و تا لنتيخابات.

و ف 1999, لملك محمد السادس حيدو من المنصب لي كان فيه. وتم النفي ديالو وصردوه لباريس وبقا تما حتى مات ب السرطان ف عام 2007.




#Article 503: لمدينة لقديمة ديال فاس (143 words)


لمدينة لقديمة د فاس هي أقدم أثر عمراني د لمدينة د فاس. تبنات ف يامات الدولة لإدريسية، بين789 و 808 ميلادية. لمدينة عرفات توسع كبير ف لقرن 9 و فيها كينة أقدم جاميعة ف لعالم، لجامعة د لقرويين اللي بناتها فاطمة لفهرية.

لمدينة لقديمة د فاس كبرات ب شكل كبير يامات الدولة لمرينية ل درجة أنها فاتت مراكش ف لكبر و رجعات هي لعاصمة د لمغريب و من أكبر لمدون ف لعالم، و عمرات ب لمدارس و لفنادق و لقصورة و الجوامع، و كانت من لمدون لّوالا لي كان عندهوم نظام د التوزيع د لما ب فضل السبيلات و الخصّات اللي كانو ف لمدينة.

بقات عاصمة د لمغريب من يامات لوطاسيين تال 1912 (من غير لفترة اللي كانت فيها مكناس عاصمة يامات مولاي اسماعيل).

لمدينة لقديمة د فاس، اللي لمساحة ديالها 280 هكتار، مسجلة ف الليستا د التراث العالمي د ليونيسكو من 1981.




#Article 504: لمدينة لقديمة ديال تطوان (170 words)


لمدينة لقديمة د تطوان هو أقدم تجمع عمراني كاين ف مدينة تطوان و اللي تبنات دايرة على جبل درسة. لمدينة لقديمة داير بيها سور د 5 كلم و عندها سبعة د لبيبان. هاد لبيبان هوما اللي محددين لهندسة د الطرقان و الدروبا ديالها ب شكل كايربط بين البيبان السبعة و البلايص لمفتوحين اللي ف وسط لمدينة بحال الساحات و السواق.

لمدينة لقديمة د تطوان فيها فنادق، زاويات و جوامع زيادة على حومات مسميين على حساب الصناعي اللي معروفة بيهوم.

تطوان كانت من ديما عندها أهمية كبيرة ف التاريخ د لمغريب لإسلامي حيت كانت محطة ف التحركات بين لمغريب لإسلامي و لأندلس. من بعد ما سالا لوجود لإسلامي ف لأندلس، ولات مركز ديال لأندلسيين اللي لجؤو ل لمغريب و هادشي اللي عطا ل لمدينة روح أندلسية ف لمعمار و لبني ديالها.

لمدينة لقديمة د تطوان واخا صغيرة ب لمقارنة مع مدون قدام د لمغريب غير هيا بقات محمية كتر منهوم من التأثيرات لعمرانية د لقرن لعشرين.

لمدينة لقديمة د تطوان دخلات ل لّيستا د معاليم التراث العالمي د ليونيسكو ف 1997.




#Article 505: لمدينة لقديمة ديال مراكش (135 words)


لمدينة لقديمة د مراكش هي أقدم تجمع عمراني كاين ف مراكش و فيها عدد كبير من أهم لمعاليم د لمغريب. لمساحة ديالها 1107 هكتار و دخلات ف الليستا د التراث العالمي د ليونيسكو ف 1985.

مراكش بناوها لمورابطين بين 1070 و 1072 و كانت هي لعاصمة ديالهوم ف بين 1056 و 1147 و كانت لعاصمة تا ديال الموحدين، بين 1147 و 1269، و السعديين. مراكش كانت من أهم المراكز الحضرية والسياسية و الثقافية ف لعالم ف لعصور لوسطى و ف لمنطقة د الغرب لإسلامي ب شكل خاص.

لمدينة لقديمة د مراكش فيها بزاف ديال لمعاليم لمهمة بحال الجامع د لكتبية، لقصبة، السّوار د لمدينة و لبيبان ديالها، لقبور د السعديين، لقصورة بحال لبديع و بزاف ديال لمداريس بحال لمدرسة د بن يوسف. فيها كاينة الساحة د جامع لفنا اللي داخلة تا هي ف التراث الإنساني.




#Article 506: شامة الزاز (119 words)


شامة الزاز، لي سميتها لحقيقية شامة الحمّومي، خلاقت ف 1953 ف دوار الروف (جماعة سيدي مخفي) توفات نهار 28 شتنبر 2020 ف تاونات، كانت مغنية مغريبية ديال فن لعيطة لجبلية (أعيوع) و الطقطوقة لجبلية. هي من أهم لأصوات لغنائية النسوية ف هاد النوع د لغنا.

شامة تعرفات بزاف ب لأعمال ديالها مع قطب الطقطوقة الجبلية محمد لعروسي و بجوج بيهوم ساهمو ف لنتيشار ديال هاد النوع لموسيقي د الشمال د لمغريب ف لبلاد كاملة.

شامة واخا تشهرات بقات عايشة ف الجبل و لبادية د تاونات و كان عندها وليد عندو إعاقة جسدية.

ف اللخر دحياتها عانات بزاف من مرض لقلب و كان تكلف ب لمداوية ديالها لماليك محمد السادس. توفات ف السبيطار لإقليمي د تاونات نهار 28 شتنبر 2020.




#Article 507: طريقة لعناصر لمنتهية (162 words)


طريقة لعناصر لمنتهية (ط.ع.م.) هي طّريقة لي مخدمة ب لأكثرية ف لحل ديال لمسائل د لهندسة ونّماذج د لماط. لمجالات ديال لمسائل غالبا كاتكون علا تّحليل لإنشائي ونتيقال لحرارة وجريان لموائع ولجهد إيليكترومانيتيك. طريقة لعناصر لمنتهية هي طريقة عددية خاصة ديال لحل ديال لمعادلات تّفاضلية لجزئية ف فضاء ديال جوج ولا تلاتة د لمتغيرات (بحال مسائل لقيمة لحدّية). باش واحد لمسألة تّحل، ط.ع.م. كاتقسم واحد نّظمة كبيرة ل أجزائ صغيرة وساهلة كايتسماو عناصر منتهية. هاتشي كايدار بواحد تّقطيع خاص ف لأبعاد د لفضاء، ولي كاتنفد ب لبني د شبكة ديال لجسم: دّومين لعددي ديال لحل، ولّي فيه عدد منتهي ديال نّقط. صّياغة ديال ط.ع.م. ديال شي مسألة د لقيمة لحدية كاتعطي ف لخر نظمة ديال معادلات جبرية. طّريقة كاتقرّب دّالة لمجهولة ف دّومين. لمعادلات سّاهلة لي كاتموديليزي هاد لعناصر لمنتهية كاتجمّع ف واحد نّظمة كبر منها ولي كاتموديليزي لمسألة كاملة. من بعد ل ط.ع.م. كاتخدم طرق من حساب لمتغيرات باش تقرّب شي حل من خيلال تقليل دالة لخطأ لي مرتابطة مع طّريقة.




#Article 508: كريسطوف كولومبوس (153 words)


كريسطوف كولومبوس (باللاتينية: Christophorus Columbus - بالطاليانية: Cristoforo Colombo - بالصبليونية: Cristóbal Colón) (31 أكتوبر 1451 - 20 ماي 1506) كان رحّالة و مستكشف طالياني، كيتعتابر هو أول أوروپي دار سفرة وصلات للكاريبي، و أمريكا لوسطانية، و أمريكا لجنوبية. كاين ناس اللي كيعتابرو كولومبوس هو اللي كتاشف لقارة ديال أمريكا، واخا كانو ساكنين فيها ناس قبل، و واخا كانو لفايكينڭ وصلو ليها قبل منو بقرون.

أول مرّة وصلات شي سفرة كان فيها كولومبوس للقارة ديال أمريكا كانت نهار 12 أكتوبر 1492، و اللي وصل فيها للجزر د لكاريبي. من موراها دار 3 د السفرات آخرين من أوروپا لأمريكا من لمحيط لأطلسي. هاد السفرات وصلو للكاريبي، أمريكا لوسطانبة، و أمريكا لجنوبية، و خلّصات عليها لعائلة لملكية ديال صبانيا.

لبلاد ديال كولومبيا خدات سميّتها من كولومبوس، و لميريكان عندهم نهار ديال لعطلة سميتو نهار كولومبوس (نهار التنين التاني ف كل شهر أكتوبر).

تولد كريسطوف كولومبوس ف لمدينة د جينوفا ف الطاليان نهار 31 أكتوبر 1451.




#Article 509: تلفزيون لصين لمركزي (169 words)


تلفزيون لصين لمركزي (بالشينوية: 中国中央电视台) ؤلا CCTV هي لشبكة لرسمية ديال الشينوا للإذاعة و لتلفازا. لشبكة عندا علاين 50 قنوات و كت تبث ن كتر من 1 مليار ديال لسبيكتاتور ف 6 لوغات.

ف 1954، لرئيس د لحزب لشيوعي ماو زيدونڭ كَنحسو لشينوا بيش تكون عندا قناة د لتلفازا ديالها. ف 1 ماي 1958، بدات لبث ديال لأول لقناة د لتلفازا ف الشينوا، و هي كان سميتها بَيجينڭ تلفزيون (Beijing Television). لشبكة اطلقت قناة ثانية ديالها ف 1963، و قناة ثالث ف 1969. ف 1973، بدات لبث ديالها بلكولور.

ف بداية د 1978، بدات لبرامج لرئيسية ديال لأخبار، و بعد من ديك الساعة ف ماي 1978 رجعت اسم ديالها CCTV (تلفزيون لصين لمركزي).

ف لبداية، لقسم د لدعاية د لجنة لمركزية د لحزب لشيوعي نعمل لسينيور لديريكت (censure directe) ف لبرامج. ف لسنوات د 1990، لحزب نعمل ريݣلات جديدة، بحق لبرامج و لقنوات ديال لشبكة باقي تال دابا مقدرش تعمل لحاجات خايبين ؤلا تقول انتقادات على لحزب لشيوعي. لسيَاج لجديد ديال تلفزيون لصين لمركزي فتح ف 2 شتنبر 2008.




#Article 510: محمد الطود (211 words)


محمد الطود (تولد ف 1928 ف لقصر لكبير - مات ف 7 نونبر 2007 ف سلا) كان موسيقار و منشد مغريبي ديال لموسيقا لأندلسية، اللي كاتسمًا تا لموسيقا د لآلة. محمد الطود كان من الناس اللّي وتّقو وطوّرو هاد لموسيقا ف لقرن 20، مع فنانا آخرين بحال مولاي أحمد لوكيلي و عبد الكريم الرايس و محمد العربي التمسماني.

تولد محمد ين عبد السلام الطود عام 1928 ف لقصر لكبير، ف عائلة محافظة. كان بّاه حافض لقرآن و علّمو التجويد من صغرو.

ف 1951 دخل مع لإذاعة ديال الرباط و كان تيجوّد فيها لقرآن كل نهار ربع ساعة، حتا تلاقا مع محمد مبيركو، اللي كان لمدير د لجوق لأندلسي د لإذاعة، و دخّلو معاه منشد للجوق. بقا الطود مع لجوق، و ف 1989، ملّي مات لأستاد ديالو مولاي أحمد لوكيلي، ولاّ هو الرئيس د لجوق.

من ماي 1989 ل فبراير 1992 شارك محمد الطود ف لمشروع د أنطلوجية الآلة، اللي دارتو وزارة التقافة مع دار ثقافات العالم بباريس، و شاركات فيه 5 د لمجموعات د لأندلسي وطنية، باش يوتّقو ڭاع النويات اللي كانت باقا محفوظة ديال لآلة.

كان محمد الطود مجوّج مع لفنانة لعالية مجاهد، و عتازل لموسيقى ف 1998. نهار 7 نونبر 2007 مات ف سلا، لمدينة اللي كان تيسكن فيها، و تدفن ف لمقبرة د باب معلقة ف نفس لمدينة.




#Article 511: أوديت نارايان (198 words)


أوديت نارايان (خلاق ف بهاراداه - النيپال ف 1 دجنبر 1955) مغني هيندي متخصّص ف تقنية لپلايباك ف لأفلام لهيندية. ربح 5 د لمرات لجائزة د Filmfare Awards لهيندية على لأعمال لغنائية ديالو ف لألافم د بوليود. أوديت نارايان هو لمن بين أكتر لمغنيين اللي كايخدمو ف لپلايباك د لأغاني د لأفلام د شاروخان.

أوديت خلاق ف النيپال، بلاد لواليد ديالو. لواليدة ديالو هندية أصلها من بيهار، اللي هي ولاية ف الشمال لغربي د لهيند.

ف 1987 دبّر على منحة باش يمشي يقرا لموسيقا لهندية ف بومباي و دوز 6 سنين د لقراية لجامعية على لموسيقا. لكاريير ديالو ف بوليود بدات ف 1980 فاش عيطليه لمنتج راجيش روجان باش يخدم ف فيلم Unees Bees.

غادي يبقا خدام ف أفلام بوليود بلا ما يحقق شي شهرة كبيرة. التحول لكبير غادي يطرا ف 1988 فاش غادي يغني ف فيلم Qayamat Se Qayamat Tak و غادي يدي بيه جائزة د Filmfare Awards، اللي هي بحال لأوسكار ف لهيند.

هاداك لفيلم غادي يكون هو لبدية لفنية ديال سميات خرين بحال لممتلة جوهي شاولا و لممتل أمير خان و زيد عليهوم لمغنية آلكا ياگنيك، اللي غادي تخدم من بعد بزّاف مع أوديت نارايان ف أعمال ياخرا و ب الدات اللي كايكون فيها شاروخان.




#Article 512: جهة سوس ماسة (779 words)


جهة سوس ماسة (بلأمازيغية: ⵜⴰⵙⴳⴰ ⵏ ⵙⵓⵙ ⵎⴰⵙⵙⴰ، بالفرانساوية: Souss-Massa) وحدة من لجيهات ديال لمغريب اللي تصايبو عام 2015، من مورا ما نقصو عدد لجيهات من 16 لـ 12. لجيهة كاينة فلوسط ديال البلاد، و لعاصيمة ديالها هي أݣادير، و مابين لمدون اللي كاينين فلجيهة: آيت ملول وتارودانت وطاطا وتيزنيت وآيت باها. عدد السكان على حساب لإحصاء اللي تدار فـ2014 وصل فهاد لجيهة لـ2,676,847. لميساحة ديال لجيهة هي 53,789 كم².

هاد لجدوال كايبين لأقاليم ديال لجيهة والسكان ديالها:

جهة سوس ماسة محاديها من الشمال جهة مراكش آسفي ومن لجانوب جهة ݣلميم واد نون ومن الشرق جهة درعة تافيلالت. هاد لجيهة فيها بزاف ديال لخصائص لجغرافية بحال أنه دايز منها جبال لأطلس لكبير ولأطلس الصغير وجبال باني وجبال وركزيز، وفيها لقيمّة ديال جبل توبقال ؤويدان بحال واد سوس اللي دايز من سهل سوس لكبير. سوس ماسة معروفة بلغابات ديال شجر أرݣان وعوموما لميساحة ديال لغابات فلجيهة عاطية حتال 19% من لغابات ديال لمغريب. لميساحة ديال لجيهة واصلة لـ53,789 كم². لموناخ ديال لجيهة قاري فالداخل ونورمال حدا لبحر، الشتا ماكاطيحش فهاد لجيهة بنتيضام. مرا مرا كايضرب لجفاف اللي يقدر يوصل لمدة ديالو حتال ستة دالسنين. هاد لجدوال كيعطي لمعلومات على لحرارة والشتا فمدينة أݣادير اللي هي لعاصيمة ديال لجيهة.

مطار أڭادير الدولي (مطار أڭادير لمسيرة) هو مطار كاين فمدينة أݣادير لمغريبية وكايسيرڤي لجيهة دسوس ماسة. كيبعد لمطار على الصونطرڤيل ديال لمدينة بـ20 كيلوميتر (حدا تمسية)، وقريب من الطريق لوطنية 10. كيتعتابر هو تالت أكبر مطار فلمغريب من ناحية عدد لمسافرين. تفتاتح لمطار فعام 1991 وكايقدر يهز 3 دلملاين ديال لمسافرين.

لجيهة دايز فيها غير واحد لوطوروت اللي هو لوطوروت ديال الدار لبيضا - أݣادير. الطرقان الوطنية اللي كاينة فلجيهة هي الطريق لوطنية 1، الطريق لوطنية 7، الطريق لوطنية 10، الطريق لوطنية 11 والطريق لوطنية 17.

التيران لكبير دأدرار (التيران الكبير دأݣادير) هو تيران ديال لكورة كاين فمدينة أݣادير وتحلو بيبانو نهار 11 شهر 10، 2013. كاين هاد التيران فلملكية ديال وزارة الشباب والرياضة وكتسيرو الشركة لوطنية ديال إنشاء وتسيير التيرانات (SONARGES). كيستقبل هاد التيران دابا لميتشان ديال لفرقة دلمدينة، حسنية أݣادير، ومرة مرة دياول أولمبيك الدشيرة.

جهة سوس ماسة هي أول جهة كاتصدر لحواميض (الليمون ولمانضارين والناڤيل ولحامض) ولبواكير مابين لجيهات ديال لمغريب. 85% من لبواكير و65% من لحواميض و15% من لحليب ولموشتقات ديالو و86% من لمنتاجات ديال أرݣان اللي كاتصدر من لمغريب لبرّا كاتجي من لجيهة ديال سوس ماسة، فيها 650.000 طن ديال لحواميض و1.2 مليون طن ديال لخضرا اللي تصدرات، اللي مابينها ماطيشا ولݣرعة ولبطاطا ولبصلة. سوس ماسة فيها 5.371.000 هيكتار ديال لارض اللي صالحة لفلاحة وكاتستعمل فيها غير 475.000 هيكتار وكاتسقى فيها 158.433 هيكتار. لينتاج ليجمالي ديال لحواميض وصل لـ700.000 طن و1.665.000 طن ديال لخضرا و28.086 طن ديال اللحم لحمر و223.5 مليون إيطرو ديال لحليب، هادشي كامل فـ33 مليون نهار ديال لخدمة. لجيهة ديال سوس ماسة فيها 180 كيلوميتر ديال لبحر، اللي كايتصدر من لمتنجات ديالو 137.830 طن، واللي كايجيبها 1450 باطو تقليدي و465 ساحيلي و223 ديال لبحر لفوقاني. كاتصدر جهة سوس ماسة بوحدها 50% ديال لمنتوجات لبحرية فلبواطات دلمغريب كاتخدم لجيهة فهاد لقيطاع 490.000 واحد من لبلاد كاملة (ديريكت وغير مباشير) مابينها 72.000 من لجيهة.

فجيهة سوس ماسة كاينة 440 وحادة صيناعية، غالبيتها إما متعلقة بلماكلة أولا لماواد لكيماوية أولا لبني دلباطوات. فمدينة أݣادير كاينة مينطقة حورة بدات لخدمة ديالها فلعام ديال 2019 بـ64 هيكتار، وكايتوقعو أنها توصل لـ300 هيكتار. كاينة مناطيق صيناعية وحدين خرين فأنزا وتاسيلا وولاد تايمة وسيدي بيبي وتيزنيت وتارودانت وإينزگان، وكاينة مينطقة لوجيستية وحدة فآيت ملول ولاخرا فتݣاديرت. لجيهة فيها تيكنوپارك ومدينة ديال ليبتيكار تابعة للجامعة ديال بنو زهر. الصيناعة التقليدية عندها دور كبير بزاف، حيتاش خدام فيها 40.000 واحد وكاتصدر 15 مليون ديال الدرهم. كاينين 5 دلمراكيز ديال التكوين لميهاني و120 تعاونية ديال الصيناعة التقليدية كاتصاوب الجلد ولخياطو والتواب ولخشب ولمجوهارات ولفخار والسلّات والزرابي وتطراݣ لمعادين ولبلاغي. من أشهر لأنواع ديال الصيناعة التقليدية كانلقاو لبلغة ديال إيدوكان والزربية لواوزݣيتية وتيزرزاي اللي هي موجوهارات ديال النقرة على شكل متلات.

لجيهة ديال سوس ماسة كايجي ليها كتر من مليون دالسياح فلعام، اللي كايجيو إنعسو 5 دلمليون ليلة فلمجموع ف31 ألف فراش تقريبا. هاد لقيطاع كايخدّم 120.000 واحد (ديريكت وغير مباشير) وكايدخل على لجيهة 20 ديال لمليار ديال الدرهم فلعام. السياحة الدخلانية شادة 43% واللي بقا دالسياح كايجيو من فرانسا (21%)، ألمانيا (14.5%)، النݣليز (12%) وهولاندا (2%). كاين بزاف مايدار فجيهة سوس ماسة، بحال التبحار فأݣادير، إيمسوان، تغازوت أولا تامري، السياحة ديال الجبال إما بالتسلوق أولا بلپيكالات، السياحة ديال التقافة فتارودانت، تيزنيت وتفراوت، الزيارة ديال لواحات ديال طاطا اللي قديمة بزاف، لغطس ولعومان فلبحر أولا واحد الدورة فلمنتازاه ديال سوس ماسة. السياح اللي كايجيو لسوس ماسة إقدر إمشيو لسوق لحد، لمتحف لأمازيغي، مارينا، لمنتزه لوطني أولا لقصبة دأݣادير أوفلّا، لپارك ديال التيمساح أولا لپارك ديال الضوفان (الدلفين) فمدينة أݣادير، إڭودار ديال شتوكة آيت باها، واد پاراديس فإيموزار إيداوتنان، السوار ديال تارودانت، الجاردات دالنخيل فتيوت، الزوايا ولقصور لقدام، النوقوش لقدام ولكوهوف ديال طاطا ولحجار الزرقين فتفراوت.




#Article 513: كارل ماركس (125 words)


كارل هاينريش ماركس (ب لألمانية: Karl Heinrich Marx) (تولد نهار 5 ماي 1818 ف ترير ف ألمانيا - مات ف 14 مارس 1883 ف لندن ف لينڭليز) كان فيلسوف و اقتصادي و عالم اجتماعي و مؤرخ و صحافي و اشتراكي توري ألماني.

لأفكار ديال ماركس أتّرات على لعالم كامل و طوّرات لعلم ديال لإجتماع و لمفهوم ديال لإشتراكية. تيتعتابر كارل ماركس من أشهر لقتصاديين اللي دازو فتاريخ لعالم، و ولاّت لأفكار ديالو كاتسمّا لماركسية ولاّ لفكر لماركسي. أهم لأفكار ديال ماركس كانت كادّور على التورة ديال لعمّال و الطبقات لمهلوكة و لمحڭورة، على لبورجاوزية اللي كاتستاغل فيهم. خدم بزاف مع فيلسوف ألماني وحداخور كان صاحبو، هو فرايدريش إينڭيلز.

كتب كارل ماركس بزاف د لكتوبا معروفة بحال لبيان د لحزب الشيوعي (1848) و راس لمال (1867).




#Article 514: لبيسلاما (251 words)


لبيسلاما (Bislama) ؤلا لغة بيسلاما هي لغة كريول، و وحد ديال للوغات لرسمية ديال ڤانواتو. هي للغة لاول ديال لڤانواتوين ف لمدينات د پور ڤيلا و لوڭانڤيل، و للغة لثانية ديال بزاف ديال لمواطنين د لبلد. لكلمات د لنشيد لوطني ديال ڤانواتو، يُومِي، يُومِي، يُومِي (Yumi Yumi Yumi)، هم مكتوب بالبيسلاما.

كتر من 95% د لكلمات ديال لبيسلاما هم جات من لنڭليزية، و كاين تا كلمات من لفرانساوية و من بزاف د للوغات لأخر ديال ڤانواتو. لأنفليوانس ديال للوغات هو صغير ف لڨوكابيولاير، بحق هو كبير بزاف ف لمورفوسينتاكس. لبيسلاما هي تقدر تكون دسكريبي فحل لوغة ب ڨوكابيولاير نڭليزية و ڭرامار و فونولوجي أوكيانوسية.

ف لسنوات د 1870 و 1880، بزاف د لناس من لجزر لمحيط لهادي هم كانو مضطرين يخدمو ف للابور د لمزرعة ف كوينسلاند ف ؤسطراليا، و تا ف فيدجي. حيتش هم كان كي هذرو ب بزاف د لوغات، هم بداو كي عادل وحد لوغة پيدجين، اللي كت كومبيني لڨوكابيولاير لنڭليزية بالڭرامار من للوغات ديالهم. هذي هي كيفاش صبحت مشي غير لبيسلاما، بحق تا للوغات د توك پيسين ف پاپوا غينيا الجديدة و لپيجين ديال جزر صالومون. هذ لكريول بديت كت جي ن لأرشيپيل ديال ڤانواتو مين لناس اللي كان كي يخدمو ف لمزرعة رجع ن لجزر ديالهم.

الديكسيوناير الأول ديال لبيسلاما خراج ف 1995.

لإسم د لبيسلاما جات من لكلمة بيتش-لا-مار (Beach-la-Mar)، من لكلمة لفرانساوية د لخيارة دلبحر، بيش دي مير (biche de mer ؤلا bêche de mer)، اللي جات بحدو من لكلمة لبرتغالية بيشو دو مار (bicho do mar). لإسم د للغة بالفرانساوية هو لبيشيللامار (Bichelamar).




#Article 515: جوزيف سطالين (177 words)


جوزيف ڤيساريونوڤيتش سطالين (ب لجورجية: იოსებ ბესარიონის ძე სტალინი - ب الروسية: Иосиф Виссарионович Сталин)، و اللي كانت سميتو لأصلية يوسيب باساريونيس دزي يوغاشڤيلي (تولد نهار 18 دجنبر 1878 ف ڭوري، لإمبراطورية الروسية - مات نهار 5 مارس 1953 ف موسكو ف لإتحاد السوڤياتي) كان توري جورجي و سياسي سوڤياتي، و كان هو الشاف ديال لإتحاد السوڤياتي من اللول د لعشرينيات تا مات ف 1953. سطالين كان هو لأمين لعام د اللجنة لمركزية د لحزب الشيوعي السوڤياتي من 1922 ل 1952، و الرئيس ديال الدولة من 1941 ل 1953.

سطالين كان تيتعتابر ديكتاتور و واحد من الناس اللي أتّرو بزاف على لعالم ف لقرن لعشرين. بزاف د الناس عتابرو لوقت اللي حكم فيه وقت ديال لقمع لجماعي و التطهير لعرقي و الترحيل الجماعي و لقتيل ديال لملاين د الناس، ولكن اللي كيدافعو عليه كيقولو باللي كان بطل و هو اللي ردّ لإتحاد السوڤياتي واعر و عندو الجهد اللي كان عندو.

سطالين كان كيتبّع لأفكار لماركسية اللينينية (اللي هوما لمجموع د لأفكار ديال ماركس و لينين)، و لكن دار سياسات ديالو بوحدّو، اللي تعرفو من بعد ب السطالينية.




#Article 516: جهة درعة تافيلالت (507 words)


جهة درعة تافيلالت (بلأمازيغية: ⵜⴰⵎⵏⴰⴹⵜ ⵏ ⴹⵕⵄⴰ ⵜⴰⴼⵉⵍⴰⵍⵜ، بالفرانساوية: Draa Tafilalet) وحدة من لجيهات ديال لمغريب اللي تصايبو عام 2015، من مورا ما نقصو عدد لجيهات من 16 لـ 12. لجيهة كاينة فلجانوب الشرقي ديال البلاد، و لعاصيمة ديالها هي الراشيدية، و مابين لمدون اللي كاينين فلجيهة: وارزازات وتينغير وميدلت وزاگورة وأرفود. عدد السكان على حساب لإحصاء اللي تدار فـ2014 وصل فهاد لجيهة لـ1,635,008. لميساحة ديال لجيهة هي 132,167 كم².

هاد لجدوال كايبين لأقاليم ديال لجيهة والسكان ديالها:

جهة درعة تافيلالت محاديها من الشمال جهة فاس مكناس وجهة الشرق ومن لغرب جهة سوس ماسة وجهة مراكش آسفي وجهة بني ملال خنيفرة. هاد لجيهة فيها بزاف ديال لخصائص لجغرافية بحال أنه دايز منها جبال لأطلس لكبير ولأطلس لمتوسط ؤويدان بحال واد درعة وسهول وصحاري بحال الرملة ديال مرزوڭة. لميساحة ديال لجيهة واصلة لـ115,592 كم². لموناخ ديال هاد لجيهة غالب عليه الطابع الصحراوي والناشف. هاد لجدوال كيعطي لمعلومات على لحرارة والشتا فمدينة الراشيدية اللي هي لعاصيمة ديال لجيهة.

مطار ورزازات الدولي هو مطار كاين فمدينة وارزازات وكايسيرڤي لجيهة ديال درعة تافيلالت. كيبعد لمطار على الصونطرڤيل ديال لمدينة بـ2 دلكيلوميتر. كيتعتابر رقم 11 فترتيب مطار فلمغريب من ناحية عدد لمسافرين، وكايقدر يهز حتال 260.000 مسافر. مطار الراشيدية الدولي أولا مطار مولاي علي الشريف هو مطار كاين فمدينة الراشيدية وكيبعد لمطار على الصونطرڤيل ديال لمدينة حتاهو بـ2 دكيلوميتر. كيتعتابر رقم 13 فترتيب أكبر مطارات لمغريب من ناحية عدد لمسافرين، وكايقدر يهز حتال 300.000 مسافر.

كاينين تسعود ديال الطرقان لوطنية اللي دايزة من أولا كاتسالي فجيهة درعة تافيلالت، واللي هي: الطريق لوطنية 4 والطريق لوطنية 9 والطريق لوطنية 10 والطريق لوطنية 12 والطريق لوطنية 13 والطريق لوطنية 15 والطريق لوطنية 17 والطريق لوطنية 23 والطريق لوطنية 29.

جيهة درعة تافيلالت فيها مواريد ديال لفلاحة مهيمّة بزاف، وكاتنتج هاد لجيهة التمر (فلواحات، 100 ألف طن)، التفاح (206.450 طن)، الزيتون (32.000 طن)، لورد (ربعالاف طن)، لحنّا (تلتالاف طن) ولݣمح (1400 طن)، وحتا الزيراعات ديال لمعيشة كاينين فلجيهة كايتنتجو بكميات قليلة. درعة تافيلالت فيها 241 ألف هيكتار ديال لارض اللي 64% ديالها مسقية. كاينة كتر من 150 ألف فيرمة. لجيهة كاتنتج حتى اللحم ولحليب.

الصيناعة فجيهة درعة تافيلالت واقفة على الطاقات ولمعادين. لجيهة فيها 3 دلمحطات ديال توليد التريسينتي بالشمش فمدينة وارزازات، وكاينين بلانات ديال لبني دوحدين خرين فمدون بحال تافيلالت وميدلت، من غير لمحطات ديال توليد التريسينتي بلعجاج فميدلت وبلما فأڭدز. وبلا مانحسبو لمينات ديال لفوسفاط، كاين 5.413 منجم ديال لمعادين فلجيهة (40% ديال لمناجيم فلمغريب). هاد لمينات كاتنتج الدهب والنقرة والرصاص ولحديد ولكوبالت والنيكل.

لجيهة ديال درعة تافيلالت كاتسمي راسها متحف فلهاوا الطلق. ݣاع لمآتير ديالها تقريبا كاينين على برّا. من غير التمر والزيتون لبنين ديالها، لجهة فيها كتبان ديال الرملة فمرزوݣة وشݣاݣة. لجيهة كيما يقدرو السياح يشوفو فيها الصحرا والتقافة اللي متعلقة بيها (لخيام والجمال...) يقدرو يشوفو حتى التلج ولخضورية والضايات فالجبال دياول لأطلس (ميدلت). فلجيهة كاينين حامات ديال لما السخون (الريش) ولواحات (بودنيب، الراشيدية، تينجداد ومحاميد لغزلان)، ولفيرمات ديال لورد (بومالن دادس وقلعة مڭونة). فلجيهة كاينة حتى التورات لمبني فبلايص بحال قلعة مڭونة وتينغير، وكاينين محميات فألنيف وإيميلشيل. من غير هادشي لجهة معروفة عليها السمية ديال هوليود أفريقيا، داكشي حيتاش فيها بزاف ديال ليستيديوهات ديال التسجيل دلافلام فوارزازات وزاگورة والراشيدية وألنيف.




#Article 517: قصة قصيرة (109 words)


لقصة لقصيرة هو نوع د لأدب اللي كايكون فيه النص قصير بزاف (ب لمقارنة مع الرواية) و اللي كاتّميز ب التركيز لكبير د لحبكة ديالها و ب الطريقة اللي كاتسالي بيها اللي ف لغالب كاتكون مفاجئة ل لقارئ.

هاد النوع لأدبي لأصول ديالو عربية و فارسية و وصل ل أوروپا ف لعصور لوسطى (لقرن 12) و تطور تا ولّا نوع أدبي بوحدو. لقصص لقصيرة ف لغالب كاتّنشر مجموعة ف كتوبة كايتسماو مجموعات قصصية و يمكن يتنشرو كل قصة بوحدها ف لمجلات لأدبية.

أول لكتاب د لقصة لقصيرة ب لعربية كانو المنفلوطي و محمود تيمور. من أهم لكتاب د لقصة لقصيرة ف لمغريب: محمد زفزاف، ادريس لخوري و محمد شكري.




#Article 518: مصطفى لطفي المنفلوطي (197 words)


مصطفى لطفي المنفلوطي (خلاق ف 30 دجنبر 1876 ف منفلوط - مصر، توفا ف 25 يوليوز 1924 ف لقاهيرة - مصر) كاتب و أديب مصري ف الريواية والشعر و الترجمة. كان من لأدباء لعرب اللوالا اللي بناو الرواية لعربية لمعاصرة و كايتميز لأسلوب لأدبي ب بلاغة كبيرة ف اللوغة لعربية و شاعرية كبيرة.

لكتوبة ديالو النظرات و العبرات كايتعتابرو من أجمل ما تّكتب ب لعربية ف لعصر لحديث و كايتعتابرو مرجع د لبلاغة لعربية د لقرن لعشرين.

المنفلوطي كان من التلاميذ ديال الشيخ محمد عبده ف لأزهر.

لأعمال د لمنفلوطي كانت مبنية على اقتباسات ولا ترجمات ديال أعمال أدبية فرانساوية من لأدب لفرانساوي الرومنسي ولا لكلاسيكي د لقرون 18 و 19، و اللي كان كايعاودها ب لاسلوب اللغوي ديالو (بحال روايات ماجدولين، پول و فيرجيني، في سبيل التاج،

المنفلوطي كان لإنتاج ديالو لأدبي غزير بزاف و نشر بزاف د لكتوبة و لقصص لقصيرة ف لمجلات ولجرائد لأدبية.

لمنفلوطي خلا كتوبة خرين مهمين ف النوع د لمقالة بحال النظرات و كتاب التراحم و محاضرات المنفلوطي و اللي دوا فيهوم على التاريخ د لأدب لعربي و لأخلاق و حتا الشوفة ديالو ل لحياة بحال ف كتاب النظرات اللي كانت فيه مجموعة د لمقالات لمرتبطة ب السياسة، لفلسفة و لإسلاميات.




#Article 519: جهة ݣلميم واد نون (510 words)


جهة ݣلميم واد نون (بلأمازيغية: ⵜⴰⵙⴳⴰ ⵏ ⴳⵓⵍⵎⵉⵎ ⴰⵙⵉⴼ ⵏ ⵏⵓⵏ، بالفرانساوية: Guelmim-Oued Noun) وحدة من لجيهات ديال لمغريب اللي تصايبو عام 2015، من مورا ما نقصو عدد لجيهات من 16 لـ 12. لجيهة كاينة فشمال لأقاليم لجانوبية ديال البلاد، و لعاصيمة ديالها هي ݣلميم، و مابين لمدون اللي كاينين فلجيهة: سيدي إيفني وطان طان وأسا-الزاݣ ولخصاص وبويزاكارن. عدد السكان على حساب لإحصاء اللي تدار فـ2014 وصل فهاد لجيهة لـ433,755. لميساحة ديال لجيهة هي 46,108 كم².

هاد لجدوال كايبين لأقاليم ديال لجيهة والسكان ديالها:

هاد لجدوال كايعطي التطور ديال شحال دالسكان فلجيهة:

جهة ݣلميم واد نون محاديها من الشمال جهة سوس ماسة ومن لجانوب جهة العيون الساقية الحمراء. هاد لجيهة فيها بزاف ديال لخصائص لجغرافية بحال أنه دايز منها جبال لأطلس الصغير ؤويدان بحال واد نون وواد درعة و وسهول خصبة وسهول صحراوية. لميساحة ديال لجيهة واصلة لـ46,108 كم². لجيهة ديال ݣلميم واد نون غالب عليها لمووناخ الصحراوي، بحيت أغلب لأراضي ديالها ماكاتفوتش التساقوطات فيها 120 ملم، وزيادة على الريح ديال الشرݣي اللي كايجي من الصحرا لكبيرة. هاد لجدوال كيعطي لمعلومات على لحرارة والشتا فمدينة ݣلميم اللي هي لعاصيمة ديال لجيهة.

مطار ݣلميم الداخلي هو مطار كاين فمدينة ݣلميم وكايسيرڤي لجيهة ديال ݣلميم واد نون. كيبعد لمطار على الصونطرڤيل ديال ݣلميم بـ4.2 كيلوميتر، وقريب من الطريق لوطنية 1 و الطريق لوطنية 21. كيتعتابر هاد لمطار فلمغريب مطار داخلي، ومنو كايمشيو بزاف ديال الرحلات فالداخل مدنيا وحتى على مستوى لعسكر وكايقدر يهز 700.000 مسافر.

مطار طانطان الداخلي (مطار طانطان الشاطي لبيض) هو مطار كاين فمدينة طان طان. كيبعد لمطار على الصونطرڤيل ديال طان طان بـ8 كيلوميتر، وقريب من لملاݣية ديال الطريق لوطنية 1 والطريق لوطنية 14. كيتعتابر مطار مغريبي داخيلي، ومنو كايمشيو بزاف ديال الرحلات فالداخل اللي إيما مدنية أولا ديال لعسكر، وكايخدم بزاف فوقيتة لموسم ديال طانطان.

ماكاينش شي أوطوروت كادّوز فلجيهة، والاكين كاينين 4 ديال الطرقان لوطنية اللي دايزة وهي الطريق لوطنية 1 والطريق لوطنية 1 والطريق لوطنية 17 والطريق لوطنية 21.

كاينة 200 ألف هيكتار فلجيهة ديال ݣلميم واد نون صالحة للزيراعة، زيادة على هادشي كاينة 4 دلمليون هيكتار ديال لكسيب ديال الجمال ولماعز ولبݣر ولغنم. كاين فلجيهة الشجر ديال أرݣان والنخيل وحتى لكرموس. الصيد لبحري مزيان فلجيهة وكاين فلبحورة ديال سيدي إيفني (11.669 طن فـ2013) وطان طان (79.989 طن فـ2013)، واللي فيهوم واحد التروة كبيرة ديال لحوت.

لقطاب ديال الصيناعة لكبار فلجيهة هوما لمرسى ديال طان طان ولمدينة ديال ݣلميم، أما باقي لأقاليم فمافيهومش بزاف ديال الصيناعة بسباب ليستيتمارات اللي ماكاينينش. لينتاج ديال زيت لحوت والدݣيݣ هوما باش معروفة طان طان. مدينة سيدي إيفني معروفة بلمصانيع ديال لمواد دلبني. كاينة 33 وحدة صيناعية فلجيهة اللي مخدمة 3.104 دلپيرصونيل.

التنوع ديال الطبيعة والتقافة هو اللي مخلي لجيهة تولي قبلة ديال السياح سوا من لمغريب أولا من برّا ديالو. فـ2016 جات 20.206 ديال السياح لجيهة، وتسجلات 34.576 ليلة ديال لمبيت. الناس ديال برّا جات من فرانسا والصبليون وبلايص خرة من أوروپا. لعادات والتقاليد ديال لجيهة والسوق ديال امحيريش ولموسم ديال طانطان كايجيبو السياح، ومع واحد لبحر اللي فيه 200 كيلوميتر فالطول بالرملة ديالو خصوصا فسيدي إيفني. لجيهة فيها لعيون اللي جارية وسط لواحات ولهضاب ديال الصحرا، ولكهوف ولحجر اللي تنقش هادي تلتالاف عام ولحامات اللي كاينين فجوايه ݣلميم وأسا-الزاݣ.




#Article 520: مطار ݣلميم الداخلي (128 words)


مطار ݣلميم الداخلي (IATA:GLN ،ICAO:GMAG) هو مطار كاين فمدينة ݣلميم لمغريبية وكايسيرڤي جهة ݣلميم واد نون. كيبعد لمطار على الصونطرڤيل ديال ݣلميم بـ4.2 كيلوميتر، وقريب من الطريق لوطنية رقم 1 والطريق لوطنية رقم 21. كيتعتابر هاد لمطار فلمغريب مطار داخلي، ومنو كايمشيو بزاف ديال الرحلات فالداخل مدنيا وحتى على مستوى لعسكرن وكايقدر يهز 700.000 مسافر.

فـ2018 سالات لأشغال اللي عاودات قادّات لمطار ديال ݣلميم بتمن وصل ل273.5 مليون درهم عطاها لمكتب لوطني للمطارات كاملة. من مورا هادشي ولاّ لمطار كايهز 700.000 مسافر فلعام. لمحطة لجوية ديال لمطار وصلات لـ 7.000m² فلميساحة، مع واحد 2.000m² خرة اللي فوق منها تبناو شي وحدات تقنية ومصلحة ضد لعوافي وإدارات. وتبنات حتى ݣنطرة فوݣ واد لعشار وپاركينݣ فيه 290 بلاصة ديال الطوموبيلات.

لحركة دلمسافرين فيمطار ݣلميم، حسب ليحصائيات ديال لمكتب لوطني للمطارات:




#Article 521: هيليوم (657 words)


لهيليوم (ب نڭليزية Helium من ليونانية ἥλιος هيليوس بمعنى شمش) هوّا عنصر كيماوي أساسي، رّمز ديالو هو He ؤ نّمرة دّرية ديالو 2 ف طّابلو دوري، هاد لعنصر مستّف ف سّطر (دّورة) 1 ؤ لعمود (لمجموعة) 18. هاد لعنصر داخل ف لݣروپ ديال لغازات النبيلة. ف ضروف لمعيارية د ضغط و لحرارة، هاد لعنصر كايكون ف لحالة د ڭاز.

ف 1868، پيير جانسن سافر ل لْهند باش يحسب سپيكتر د شّمش ف لوقت ديال لكوسوف لْكامل، ؤ لاحض واحد لخط صفر ف سپيكتر لّي كيدل علا عنصر جديد. جوزيف نورمان لوكاير سجل نفس لْخط ملي راقب شمش من تحت ضبابة د لندن، ؤ فتارض أن لعنصر جّديد هوّا فلز لّي سماه هيليوم.

ف 1882، لعاليم طّالياني لويجي پالمييري شاف نفس لبلان ف سپيكتر ديال لڭازات لّي خارجة من بركان ڤيسوڤيوس، ؤ نفس لحاجة طرات ملي درس لعاليم لميريكاني ويليام هيلبراند لڭاز لّي كيخرج من تاني أوكسيد ليورانيوم فاش كيدوب ف لاسّيد.

مي پير تيودور كليڤ ؤ نيلز أبراهام لانڭليت هوما أول وحدين عاودو هاد تّجربة ؤ أكدو لكتيشاف ديال لهيليوم ف 1895 ف أوپصالا ف سويد، ؤ حسبو لكتلة درية ديالو.

لهيليوم هوّا تاني أكتر عنصر كيماوي متناشر ف لكون ب نسبة ديال 25%، ؤ كينتج من تفاعل د لنديماج نّووي ديال لهيدروجين ف نّْجوم، ؤ كيتلقا ف نّْجوم كاملين.

ف لأرض لهيليوم كيتنتج ب شكل طبيعي من تّهراس د جسيمات ألفا ديال لعناصر رّاديواكتيڤة بحال لأورانيوم ؤ طّوريوم. واحد طّرف من هاد لهيليوم كيدوز ل لجو، لّي نّسبة د لهيليوم فيه 5 علا مليون. هاد لعملية كتم ف إطار ديال توازن ديناميكي، حيت لفايض ديال لهيليوم كيفلت ل لفضا لخرجاني. لستيخراج د لهيليوم من لجو عملية ماشي قتيصادية. لإنتاج ديال لهيليوم كيتم ب لستيخراج ديالو من لڭاز طّبيعي لّي كيحتاوي علا 7% د لهيليوم.

أكبر تلاتة د لمنتيجين ديال لهيليوم هوما لميريكان، دزاير ؤ روسيا، ؤ أكبر حتياط كاين عند لميريكان، قطر ؤ دزاير.

لهيليوم كيكون علا شكل ڭاز ماعندوش لون ؤلا ريحة ف درجة لحرارة لعادية، ؤ ماكيتفاعل معا حتا شي مادة معروفة. ف ضّروف لعادية ديال ضّغط، لهيليوم ماعمرو كيولي قاسح كيفما كانت لحرارة، مي كيولي سايل ف 268.93- سيلسيوس. فاش كيدوز تيار د تريسينتي ف لهيليوم، كيضوّي ب لون خوخي باهت.

لْخاصّيات لْفيزيكية ديال لهيليوم-4 هيّا كتّالي:

لهيليوم كيتستعمل كا وْسْط تبريدي، متلا ف زّدّاح لْكبير د لْهادرونات، ف دوزان بحال لمغناطيسات سوپردوّازة ديال سكانير د تّصوير ب صّونيط لمغناطيسي ؤ سپيكتروميتر د صّونيط نّووي لمغناطيسي. ؤ تستعمل أيضا ف تّبريد ديال دّوزان ديال صاطليتات ؤ ف تّبريد ديال لأوكسيجين ؤ لهيدروجين سّايلين لّي تستعملو كا فيول ف صّاروخ د أپولو.

حيت لهيليوم عندو كتافة ضعيفة، كيتستعمل ف تّعمار ديال لبالونات د دّيكور، ؤلا لبالونات د طقس ؤ لمنطادات. لهيدروجين حتا هوّا كان عندو هاد لستيعمال مي بسباب تّفاعلية لكبيرة ديالو، حبسات هاد لقضية.

ؤ حيت لهيليوم عندو تفاعلية ضعيفة، كيتستعمل كمناخ حامي ؤ ساقل فين كيتصاوبو لْخيوط لْأوپتيكية ؤ سّوپردوّازات. لهيليوم كيتستعمل أيضا ف تّعمار ديال لإيرباڭ د طّونوبيلات.
تخليطة ديال 80% هيليوم ؤ 20% أوكسيجين كتستعمل كا جو صطيناعي ف لغطيس لغارق، ؤ حالات خرين فين بنادم كيخدم ف ضروف عالية ديال ضّغط.

لّيزر د لهيليوم ؤ نّيون كيتستعمل ف سّكانير د لباركود ف سوپرمارشيات. ؤ كاين دابا ستيعمال جديد ديال لهيليوم ف لميكروسكوپ د لهيليوم لإيوني لّي كيعطي صورة حسن من لميكروسكوپ ليليكتروني.

لهيليوم عندو جوج إيزوطوپات مستاقرين هوما هيليوم-3 ؤ هيليوم-4. هاد ليزوطوپات بجوج ضهرو من لبدية ديال لكون، تقريبا 100 تانية مورا لبيڭ بانڭ، عن طريق هاد تّفاعلات:

D + D ➔ 3He + n

D + D ➔ 4He + γ

T + D ➔ 4He + n

D = دوتيريوم، n = نيوطرون، γ = شعا د ڭاما، T = تريسيوم، p = پروطون.

راصيو ديال لهيليوم-3 ب نّسبة ل لهيليوم-4 هوّا تقريبا 8x10-5 حيت لهيليوم-4 مستاقر كتر بزاف من لهيليوم-3. هاد رّاصيو تطور معا تّفاعلات لّي كتوقع ف لعمق ديال نّجوم بحال شمش، حيت بجوج كينتجو ف تّفاعل لْمسلسل پروطون-پروطون ب شّكل تّالي:

p + p ➔ D + β+ + ν

D + p ➔ 3He + γ

+β = پوزيطرون، ν = نوترينو.




#Article 522: كريپتون (434 words)


لكريپتون (ب نّݣليزية: Krypton من لْيونانية κρυπτός كريپتوس ب معنى مْخفي) هو عنصر كيماوي أساسي ، رّمز ديالو هو Kr و نمرة درية ديالو 36
ف طّابلو دّوري، هاد لعنصر مستّف ف سّطر (دّورة) 4 و لعمود (لمجموعة) 18. هاد لعنصر داخل ف لݣروپ ديال لغازات النبيلة
. ف ضروف لمعيارية د ضغط و لحرارة، هاد لعنصر كايكون ف لحالة د غاز ماعندوش لون ؤلا ريحة، ؤ ماكيتفاعل معا حتا شي حاجة خرة من غير عنصر لْفليور ف حالات ستتنائية باش كيعطيو تاني فلوريد لكريپتون KrF2. هاد لعنصر كتاشفوه جوج عولاما هوما سير ويليام رامزي ؤ موريس تراڤرس ف 30 ماي 1898.

سير ويليام رامزي ؤ موريس ويليام تراڤرس، من بعد ما كتاشفو لارڭون، ب ليستيخراج ديالو من لهْوا، كانو متأكدين أن هاد لغاز ما هوّا غير واحد من مجموعة جديدة ديال لعناصر ف لجدول دّوري. فَ قررو أنهم يكملو عملية د تّسييل ؤ تّبخير، باش يلقاو شي عنصر عندو كتلة درية كبر. ف 30 ماي 1898 صدقات ليهم لْقضية ؤ قدرو يعزلو 25 سنتيميتر مكعب ديال لكريپتون. ملي دارو لفحص ب سپيكتروميتر، ؤ شافو طّيف دّري ديال هاد لغاز، عرفو أنه عنصر كيماوي جديد.

لكريپتون كيكون علا شكل غاز ف درجة لحرارة لْعادية، ؤ ماعندوش لون ؤلا ريحة. كيولي سايل ف 153.415- درجة سيلسيوس، ؤ كيتجمد ف 157.37- درجة سيلسيوس.

لخاصيات لفيزيكية ديال لكريپتون-84، لّي هوّا أكتر نضير د لكريپتون متوفر ف طّبيعة هيّا كتّالي:

لكريپتون كيتستعمل ف لْبولات لفلورية لّي كتحفض طّاقة، ؤ ف لْبولات د لْفلاش ديال لْكاميرات ديال تّصوير سّريع. لْمُركّب لكيماوي لّي ناتج عليه، تاني فلوريد لْكريپتون، كليتستعمل ف لإنتاج ديال بعض نّواع ديال لّيزر.

لكريپتون لْمُشِع تستعمل ف لْحرب لْباردة من طرف دّول لْغربية باش يقدّرو لإنتاج ديال طّاقة نّووية ديال لْتّحاد سّوڤياتي. حيت هاد لغاز كيتنتج ف تّفاعلات لكيماوية كولها، حسبو لكمية لّي كاينة ف لْجو، نقصو منها لكمية لّي معروف راها جاية من لْمفاعلات لْغربية، ؤ داكشي لّي بقا ستنتجو منو شحال ديال طّاقة لّي نتجاتها دّول ديال لْتّحاد سّوڤياتي.

من 1960 حتال 1983 كانو لعولاما كيستعملو نّضير كريپتون-86 باش يبنيو تّعريف ديال طّول ف لفيزيك. ميترو واحد كان تّعريف ديالو هو ب تّحديد 1650763.73 طول موجي ف طيف دّري ديال هاد نّضير. ف 1983 غادي يولّي تّعريف ديال لميترو معتامد علا سّرعة ديال ضّو ف لْفراغ.

لكريپتون ماعندوش شي دور بيولوجي معروف، ؤ نّسبة ديالو ف لْجو ديال لْأرض قليلة بزاف كتقدّر ب واحد ف لْمليون. باش يتستخرج كيتم تّبريد ديال لْهوا حتا كيولي سايل، ؤ من بعد كتّم عملية ديال تّقطير.

لإيزوطوپات ؤلا نضاير ديال لكريپتون كاين منهم لكريپتون-78 لّي نص لحياة ديالو فايتة 1.5 ألف مليار مليار عام. ؤ كاينين إيزوطوپات خرين بحال لكريپتون 79، 80، 81، 82، 83، 84، 85، ؤ 86.




#Article 523: بّا احماد (114 words)


حمد بن موسى، المعروف ببّا احماد، كان الصدر الاعضم و الحاكم ديال المغرب ما بين 1894 و 1900. ولّى حاكم البلاد فاش طلع ولد اخته مولاي عبد العزيز للعرش، اللي كان باقي درّي،  واخا كانو عنده اخوته اكبر منه. الحكم ديال بّا احماد، بحال الحكم ديال مولاي الحسن قبل منه، بقى كايوحل المغرب فحزّات مالية و سياسية بشلّا ضرايب جديدة، اللي ماقبلهاش الشعب، واللي خلّات المخزن يولي معول اكتر و اكتر على بلدان النصارى باش يخلص الجيش و الخدامة باش يحارب بلدان السيبة اللي تشكلو, و هادشي اللي من بعد غايخلي المغرب يطيح فالستعمار

تڭال عليه باللي كان قصير و غليض، و كان من الناس اللي ساهمو فالبني و التوسيع ديال قصر الباهية فمراكش




#Article 524: ڤلاديمير لينين (120 words)


ڤلاديمير إلييتش أوليانوڤ (ب الروسية: Владимир Ильич Ульянов) (تولد ف 22 أبريل 1870 ف أوليانوڤسك - مات نهار 21 يناير 1924 ف موسكو)، اللي كان معروف بسميت ڤلاديمير لينين كان توري و ماركسي و سياسي روسي، و لقايد ديال لحزب لبلشوڤي و التورة لبولشوڤية، و رئيس لحكومة د روسيا السوڤياتية من 1917 ل 1924، و ديال لإتحاد السوڤياتي من 1922 ل 1924.

ف لوقت اللي حكم فيه لإتحاد السوڤياتي، ردّو بلاد فيها حزب واحد هو لحزب الشيوعي السوڤياتي. لإيديولوجيا ديالو كانت شيوعية، و هي اللي طوّر منها مذهب ديالو سميتو اللينينية، و اللي هو نوع من لأنواع د لماركسية، الشعار ديالو هو لأرض و لخبر و السّلام.

ملّي مات لينين ف 1924 حكم موراه جوزيف سطالين لإتحاد السوڤياتي تال 1953.




#Article 525: جهة العيون الساقية الحمراء (498 words)


جهة العيون الساقية الحمراء (بلأمازيغية: ⵜⴰⵙⴳⴰ ⵏ ⵍⵄⵢⵓⵏ ⵜⴰⵔⴳⴰ ⵜⴰⵣⴳⴳⵯⴰⵖⵜ، بالفرانساوية: Laâyoune-Sakia El Hamra) وحدة من لجيهات ديال لمغريب اللي تصايبو عام 2015، من مورا ما نقصو عدد لجيهات من 16 لـ 12. لجيهة كاينة ف ديال البلاد، و لعاصيمة ديالها هي لعيون، و مابين لمدون اللي كاينين فلجيهة: طرفاية وبوجدور والسمارة وبوگراع وگلتة زمور. عدد السكان على حساب لإحصاء اللي تدار فـ2014 وصل فهاد لجيهة لـ367,758. لميساحة ديال لجيهة هي 140,018 كم².

هاد لجدوال كايبين لأقاليم ديال لجيهة والسكان ديالها:

جدول كايعطي التطور ديال شحال دالسكان فلجيهة.

جهة العيون الساقية الحمراء محاديها من الشمال جهة ݣلميم واد نون ومن لجانوب جهة الداخلة وادي الذهب. هاد لجيهة فيها خصائص لجغرافية بحال أنها كاتميز بلميساحة الصحراوية لكبيرة، مع شوية دلغابات ديال لحلفا والربيع الصحراوي. لميساحة ديال لجيهة واصلة لـ140,018 كم². لموناخ ديال لجيهة بارد ومعتادل فلمناطيق حدا لبحر، وسخون وبعض لمرات بالشرݣي فالداخل. هاد لجدوال كيعطي لمعلومات على لحرارة والشتا فمدينة لعيون اللي هي لعاصيمة ديال لجيهة.

مطار العيون الدولي (مطار لعيون لحسن اللول) هو مطار كاين فمدينة لعيون لجيهة ديال العيون الساقية الحمراء. كيبعد لمطار على الصونطرڤيل ديال لمدينة بـ2 دلكيلوميتر، وقريب من الطريق لوطنية اللولة. كيتعتابر تاسع أكبر مطار فلمغريب من ناحية عدد لمسافرين، وكايقدر يهز 300.000 مسافر.

ماكاينينش أوطوروطات فهاد لجيهة، ولاكين دايزين فيها بزاف ديال الطرقان لوطنية:

لفلاحة فلجيهة ديال لعيون الساقية لحمرا ماشي موهيمة حيتاش لميساحة اللي صالحة ليها مافايتاش 7500 هيكتار أولا 0.054% ديال لميساحة دلجيهة، ؤواحد 100 هيكتار هي اللي كاتسقى وكايتزرع فيها لعلف، اللي وصل لينتاج ديالو ل365 طن ف2016 فإقليم لعيون، وشي شوية ديال لخضرة بحال لقزبور ولمعدنوس ولكرافس وخيزّو ولفجل ولخرشوف. فلكسيبة كانت فلعام د2016 شي 302 ألف ديال لمعيز و206 آلاف راس دلغنم و105 آلاف دالجمال و1847 راس دلبݣر. فنفس لعام تنتجات مليون و722 ألف إيطرو ديال لحليب و5 دلمليون و127 ألف إيطرو ديال اللبن و67 ألف و350 كيلو ديال الزبدة. كاينة فلجيهة 575 كيلوميتر ديال لبحر، وفيه تلاتة ديال لمراسي فطرفاية ولعيون وبوجدور. تنتجات 464 ألف طن ديال لحوت اللي لقيمة ديالو وصلات ل727 مليون درهم، زيادة على الطحالب اللي تجمعات منها 260 طن واللي وصلات لقيمة ديالها لـ2 دلمليون ديال الدرهم.

وصلات لارقام ديال لوحادات الصيناعية فلجيهة ديال لعيون الساقية لحمرا لـ395 لأغلبية ديالها فلعيون اللي فيه 72.4% ديال لوحادات، عاد باش بوجدور بـ16.2%، وعاد باش السمارة اللي فيها%، ومن موراهوم طرفاية اللي فيها 14.8% ديال هاد لوحدات. الصيناعة هنايا واقفة على الصيناعة التحويلية (لوزينات ديال السرديل)، الصيناعة ليستيخراجية (لوزينات ديال لفوصفاط)، لبني والطرابوبليك وحتى ليسيرڤيس. هاد لجدوال كايعطي كيفاش مفرقة هاد لوحادات على حساب لإقليم ولمجال:

كاين بزاف ديال لمواقيع اللي إيقدرو يجيبو السياح لجيهة لعيون الساقية لحمرا، بحال لبحر ديال لعيون وضاية النعيلة اللي هي محمية طبيعية، واحة لمسيد اللي جات مابين لعيون والسمارة، اللي فيها بزاف ديال النخيل، سبخة الطاح اللي كاينة فمدينة الطاح واللي كاينة 55 ميترو تحت لمستاوى ديال لبحر، وفيها طبقات ديال لملحة ولغيس لمرمّل. فلبحر ديال طرفاية كاينة واحد لقصبة بناها تاجر نݣليزي سميتو روبرت ماكينزي فـ1880. فهاد لجيهة كاينة 35 أوطيل مصنف بـ1996 فراش و14 أوطيل مامصنفش بـ306 دلفراش. فـ2016 جات 41 ألف سايح تقريبا و77% منهوم مغاربة.




#Article 526: سهل سوس (142 words)


سهل سوس (بتشلحيت: أزاغار ن سوس) هي واحد المنطقة كاينا ف واحد السهل ف الجنوب الغربي د المغريب. هاد السهل عندو نفس السمية و جا ف الجنوب د الأطلس الكبير و ف الغرب د الأطلس الصغير.هولاندا والنڭليز.

كانت أڭادير فديك الوقيتا واحد المركز كبير ديال التجارة مع الخارج.

الأغلبية د الناس ديال سوس من لأمازيغ الشلوح و تايهضرو بزاف ب الشلحة. الناس ديال سوس تايتسماو ف لمغريب ب السوسيين ولا السواسة.

بزاف ديال الناس ساكنين حدا المدينة ديال أڭادير و للي تاتلقب ب العاصمة ديال سوس. كاين مدن كبيرة ف سوس بحال تارودانت، تيزنيت، إينزڭان، أيت ملول و الدشيرة.

كتب لمختار سوسي على الناس للي سكنو ف سوس من لعرب اللي جاو من الشرق و كيفاش عاشو مع الشلوح.

المنطقة ديال سوس معروفة ب الطبيعة ديالها. فيها البحر و الجبال و الخضورية و الوديان. المنطقة معروفة ب الغابات ديال أرڭان و الفلاحة.

 




#Article 527: جهة الشرق (623 words)


جهة الشرق (بلأمازيغية: ⵜⴰⵎⵏⴰⴹⵜ ⵜⴰⴳⵎⵓⴹⴰⵏⵜ، بالفرانساوية: Oriental) وحدة من لجيهات ديال لمغريب اللي تصايبو عام 2015، من مورا ما نقصو عدد لجيهات من 16 لـ 12. لجيهة كاينة فالشرق ديال البلاد، و لعاصيمة ديالها هي وجدة، و مابين لمدون اللي كاينين فلجيهة: بركان وتاوريرت والناظور وجرادة وفيگيگ. عدد السكان على حساب لإحصاء اللي تدار فـ2014 وصل فهاد لجيهة لـ2,314,346. لميساحة ديال لجيهة هي 36,241 كم².

هاد لجدوال كايبين لأقاليم ديال لجيهة والسكان ديالها:

جهة الشرق محاديها من لجانوب جهة درعة تافيلالت ومن الشمال لغربي جهة طنجة تطوان الحسيمة ومن لغرب جهة فاس مكناس. هاد لجيهة فيها بزاف ديال لخصائص لجغرافية بحال أنه دايز منها سلسلة لهيضاب لعالية، تلال لعيون وسهول أنݣاد، ؤويدان بحال واد كورت وواد ملوية وواد زا. لميساحة ديال لجيهة واصلة لـ49,266 كم². لموناخ فجيهة الشرق متنوع، ولاكين على لعوموم فالصيف سخون وناشف ؤفالشتا منتاعش وكاطيح فيه الشتا، أوبعض لمرات كايطيح التلج فالريوسا دالجبال والتلال لعاليين. هاد لجدوال كيعطي لمعلومات على لحرارة والشتا فمدينة وجدة اللي هي لعاصيمة ديال لجيهة.

مطار الناظور العروي الدولي هو مطار كاين فمدينة لعروي وكايسيرڤي لجيهة دالشرق. كيبعد لمطار على الصونطرڤيل ديال الناظور بـ30 كيلوميتر، وقريب من الطريق لوطنية 2 والطريق لوطنية 15 والطريق لوطنية 19. كيتعتابر سابع أكبر مطار فلمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج.

مطار وجدة أنݣاد الدولي هو مطار كاين فمدينة وجدة. كيبعد لمطار على الصونطرڤيل ديال لمدينة بـ14 كيلوميتر، وقريب من لوطوروت ديال الرباط-وجدة. كيتعتابر ثامن أكبر مطار فلمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج وكايقدر يهز 3.200.000 مسافر. كاين حتى مطار بوعرفة الداخلي ؤهو مطار كاين فمدينة بوعرفة. كيبعد لمطار على الصونطرڤيل ديال بوعرفة بـ2.7 كيلوميتر، وقريب من الطريق لوطنية 4 والطريق لوطنية 17. كيتعتابر هاد لمطار فلمغريب مطار داخيلي، وكايقدر يهز 100.000 مسافر فلعام.

لوطوروت لوحيدة اللي دايزة من جيهة الشرق هي لوطوروت التانية اللي كاتبدا فيها من مسون (قريب من گرسيف) حتال مدينة وجدة. الطرقان لوطنية اللي دايزة من لجيهة هي: الطريق الوطنية رقم 2 (لمغريب)| و الطريق الوطنية رقم 4 (لمغريب)| و الطريق الوطنية رقم 6 (لمغريب)| و الطريق الوطنية رقم 15 (لمغريب)| و الطريق الوطنية رقم 16 (لمغريب)| و الطريق الوطنية رقم 17 (لمغريب)| و الطريق الوطنية رقم 19 (لمغريب)|. (ورّك على الطريق إلى بغيتي تمشي للمقالة ديالها!)

لميساحة اللي ممكين تفلح فجيهة الشرق واصلة لـ892 ألف هيكتار (10% ديال لارض اللي صالحة للفلاحة فلمغريب). لميساحة لمسقية واصلة 111 ألف هيكتار. التلتاين ديال لينتاج دلحبوب فلمينطاقة كايجي من الشعير، من موراه لݣمح الطري وعاد لݣمح لقاصح ولينتاج ديال الدرة فلمينطقة ضعيف. لمينطاقة فيها بزاف دلمرارك دلغلة، واللي طاغي هو الليمون. التربية دلبهايم عندها بلاصة كبيرة فليقتيصاد دلجيهة. كاين تقريبا 3 دلمليون دالراس ديال لبهايم. الصيد لبحري فلجيهة وصل لينتاج ديالو فـ2012 لـ11 ألف طن بقيمة ديال 134 مليون ديال الدرهم.

كاينين بزاف ديال لمناطيق الصيناعية فلجيهة ديال الشرق، فمدون بحال وجدة وتاوريرت وجرادة وبركان وزايو. ف2011 وصل لعدد ديال لمؤسسات دالصيناعة لـ401 اللي خدّمو تقريبا تسعالاف دلپيرصونيل لمدة دايمة. لجهة معروفة حتى بلمجال ديال الطاقة ولمعادين، ولجيهة كاتنتج بزاف من هادشي بحال شاربون ولحديد والزنك والرصاص فأقاليم جرادة وفيگيگ. لمحطة لحرارية ديال الضو فجرادة نتجات ف2012 شي 608 دلمليون كيلوواط/ساعة.

وصل لعدد ديال لوطيلات فجيهة الشرق فعام 2012 لـ65 أوطيل اللي جا ليهوم 533 ألف سايح. لبحر ديال السعيدية فيه 15 كيلوميتر وكاين قبالة لبحر لبيض لمتوسط وقريب من أوروبا. فليام لعادية كايسكن فلمدينة قريب من 9000 واحد، ولكن فالصيف يقدر يوصل عدد السكان ل250 ألف. الضاية ديال مارتشيكا (شادة من بني نصار حتال أركمان وكادوز من الناظور) فيها 120 كلم² وفيها 25 كيلوميتر فالطول. لواحات ديال مدينة فيݣيݣ هما جغرافيا أكتر واحات قراب لأوروبا، وفيهوم واحد لكنز ميعماري كايتجلى فلقصور. كاينين بزاف ديال لعيون ولحامات فلجيهة، بحال لحامة دفزوان فبركان، وحامة بنقاشور فوجدة وعين مسعودة فالناظور. الرݣادة ديال بني يزناسن والرݣصات ديالها كايتعتابرو من الترات لمغريبي اللي كايجيو السياح على ودّيتو باش إيشوفوه.




#Article 528: فرانكلين روزڤيلت (105 words)


فرانكلين ديلانو روزڤيلت (ب لينڭليزية: Franklin Delano Roosevelt) (تولد ف نيو يورك ف 30 يناير 1882 - مات ف وورم سپرينڭس ف 12 أبريل 1945) كان سياسي ميريكاني، و كان هو الرئيس رقم 32 ديال لميريكان من عام 1932 تا مات ف 1945.

روزڤيلت كان تابع للحزب الديموقراطي ديال ميريكان، و عندو الرقم لقياسي ديال رئيس ربح 4 د لمرّات متابعة ف نتيخابات. كان عندو دور مهم بزاف فالنص اللول د لقرن 20، حيت هو اللي قاد لميريكان مورا لأزمة لإقتصادية، و تا ف وقت لحرب لعالمية تانية. فرانكلين روزڤيلت هو من لعائلة ديال طيودور روزڤيلت، اللي كان الرئيس د ميريكان من 1901 ل 1909.




#Article 529: جهة طنجة تطوان الحسيمة (705 words)


جهة طنجة تطوان الحسيمة (بلأمازيغية: ⵜⴰⵎⵏⴰⴹⵜ ⵜⴰⵏⵊⴰ ⵜⵉⵟⵟⴰⵡⵉⵏ ⵍⵃⵓⵙⵉⵎⴰ، بالفرانساوية: Tanger-Tétouan-Al Hoceïma) وحدة من لجيهات ديال لمغريب اللي تصايبو عام 2015، من مورا ما نقصو عدد لجيهات من 16 لـ 12. لجيهة كاينة فالشمال ديال البلاد، و لعاصيمة ديالها هي طنجة، و مابين لمدون اللي كاينين فلجيهة: تطوان ولحسيمة ولعرايش وشفشاون ولمضيق وأصيلة. عدد السكان على حساب لإحصاء اللي تدار فـ2014 وصل فهاد لجيهة لـ3,556,729. لميساحة ديال لجيهة هي 13,712 كم².

هاد لجدوال كايبين لأقاليم ديال لجيهة والسكان ديالها:

جهة طنجة تطوان الحسيمة محاديها من لجانوب جهة فاس مكناس وجهة الرباط سلا القنيطرة ومن الشرق جهة الشرق. هاد لجيهة فيها بزاف ديال لخصائص لجغرافية بحال أنه دايز منها جبال الريف ؤويدان بحال واد لوكوس وسهول بحال السهل الطنجي اللي كاين مابين لمضيق دجبل طارق ولمحيط لأطلسي وسهل اللوكوس. لميساحة ديال لجيهة واصلة لـ17,262 كم². لموناخ ديال لجيهة متنوع. لمينطقة اللي ما بين لعرايش ومارتيل تقدر تطيح فيها 700 ملم ديال الشتا فلعام. لمينطقة اللي كاينة فالشرق ديال لجيهة كاتطيح فيها 400 ملم فلعام. فجبال الريف تقدر توصل هاد لكميات حتالين 1800 ملم فلعام فلغرب وماكاتفوتش 600 ملم فالتلال شرق واد أورينݣا. لحرارة كاتبقى دافية فالصيف ومعتادلة فالشتا. هاد لجدوال كيعطي لمعلومات على لحرارة والشتا فمدينة طنجة اللي هي لعاصيمة ديال لجيهة.

مطار طنجة الدولي أولا مطار طنجة بن بطوطة هو مطار كاين فمدينة طنجة وكايسيرڤي لجيهة ديال جهة طنجة تطوان الحسيمة. كيبعد لمطار على الصونطرڤيل ديال طنجة بـ15 كيلوميتر، وقريب من لوطوروت ديال طنجة -الرباط. كيتعتابر خامس أكبر مطار فلمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج، وكايقدر يهز 1.250.000 مسافر.

مطار تطوان الدولي أولا مطار تطوان سانية الرمل هو مطار كاين فمدينة تطوان وكايسيرڤي لجيهة. كيبعد لمطار على الصونطرڤيل ديال لمدينة بـ4 دلكيلوميتر، وقريب من لوطوروت ديال تطوان - لفنيدق. كيتعتابر رقم 14 فتلرتيب أكبر لمطارات فلمغريب من ناحية عدد لمسافرين، وكايقدر يهز 50.000 مسافر.

لوطوروتات اللي دايزين من لجيهة هوما لوطوروت لخامس اللي كايدي من طنجة للرباط وكايدوز من بزاف دلمدون فلجيهة اللي ما بينها لقصر الصغير وملوسة وأصيلة ولعرايش، ولوطوروت السابع اللي صغير فالطول ديالو (28 كيلوميتر)، كايبدا من تطوان وكايدوز من لملاليين ولمضيق وكايسالي فلفنيدق. الطرقان لوطنية اللي دايزة من لجيهة هي: الطريق الوطنية رقم 1 (لمغريب)| والطريق الوطنية رقم 2 (لمغريب)| و الطريق الوطنية رقم 8 (لمغريب)| و الطريق الوطنية رقم 13 (لمغريب)| و الطريق الوطنية رقم 16 (لمغريب)| و الطريق الوطنية رقم 29 (لمغريب)|.(ورّك على الطريق إلى بغيتي تمشي للمقالة ديالها!)

لميسحة اللي صاحة للزيراعة فجيهة طنجة تطوان لحسيمة وصلات لـ705 ألف ديال لهيكتار واللي نتجات ف2015 قريب من 7دلمليون دلقنطار دلحبوب (لݣمح والشعير والدرة). فلجيهة كايتزرعو بزاف ديال لمنتوجات لفيلاحية ولأغلبية ديالها فسهل اللوكوس بحال الزيتون ولكرموس واللوز، زيادة على أنواع ديال لخضرة والديسير ولعلف ولفصة، اللي كاتعطى لـ400 ألف راس ديال لبݣر و918 ألف ديال لغنم و583 ألف ديال لمعاز. الصيد لبحري عندو إينتاجية متوسطة واللي عطات ف2015 51 ألف طن، واللي وصلات لقيمة ديالها لكتر من 700 مليون ديال الدرهم.

الصيناعة فلجيهة عندها دور كبير فلقتيصاد ديالها وديال لبلاد. مينطقة طنجة بوحدها عندها 25% ديال ليستيتمارات و20% ديال لپيرصونيل. لجيهة ف2013 كان عندها 905 ديال لوزينات ولمؤسسات ديال الصيناعة، اللي وصلات لقيمة ديالها فنفس لعام لـ55 مليار درهم مغريبية، واللي تصدرات منها 28 مليار ديال الدرهم، بعضها من لمرسى دطنجة لمتوسط. الصيناعة التقليدية فلجيهة عندها دور كبير فالتنمية ديال لجيهة. 23 ألف معلّم ف2013 خدمو فمجالات ديال الجلد والتوب ولحديد لمطروݣ والنجارة التقليدية. لمينات فلجيهة كاينتجو بزاف ديال لمعادين اللي كاينين فقلب جبال الريف، واللي منها الدهب ولحديد. منطقة لحسيمة فيها 29% ديال لمينات فلجيهة، تابعاها لفحص-أنجرة (27%) وطنجة-أصيلة (11%).

السياحة عندها حتا هي دور كبير فالتنمية ديال هاد لجيهة. ف2015 وصل لعدد ديال لوطيلات لمكلاصيين ل168 أوطيل فيهوم 17 ألف فراش، اللي ستاقبلو 606 ألاف ديال السياح من برا، واللي دوزو كتر من مليون و29 ألف ليلة سياحية. الناس ديال الصبليون هوما اللولين فترتيب عدد السياح (102 ألف و76 صبليوني) وعاد باش لفرانصيص (109.423 ديال السياح). عدد السياح لمغاربة اللي مشاو للجيهة وصل لعدد ديالهوم ل632 ألف. كاين بزاف مايتشاف فجهة طنجة تطوان لحسيمة، اللي مابينو: لمدينة لقديمة ديال تطوان ومدينة طنجة وأصيلة ولحسيمة. لبحر دلمحيط لأطلسي كايتمارس فيه الرياضة ديال السورف، والساحل ديال لبحر لبيض لمتوسط كايتدار فيه رياضة لعومان ولغوص. لمآتير التاريخية فلجيهة كتار، بحال لمغارة دهيراقل ومدينة ݣطّة ولقبور الرومانية ولمدينة لأترية ديال ليكسوس. كاينين منتجعات ديال الطبيعة بحال أقشور فمدينة شفشاون وتهدارت فطنجة ومنتجاع الزرقة فتطوان.




#Article 530: جهة بني ملال خنيفرة (686 words)


جهة جهة بني ملال خنيفرة (بلأمازيغية: ⵜⴰⵏⴱⴰⴹⵜ ⵏ ⴰⵢⵜ ⵎⵍⵍⴰⵍ ⵅⵏⵉⴼⵔⴰ، بالفرانساوية: Béni Mellal-Khénifra) وحدة من لجيهات ديال لمغريب اللي تصايبو عام 2015، من مورا ما نقصو عدد لجيهات من 16 لـ 12. لجيهة كاينة فالشمال لوسطاني ديال البلاد، و لعاصيمة ديالها هي بني ملال، و مابين لمدون اللي كاينين فلجيهة: خنيفرة وخريبگة ولفقيه بنصالح وأزيلال وخنيفرة. عدد السكان على حساب لإحصاء اللي تدار فـ2014 وصل فهاد لجيهة لـ2,520,776. لميساحة ديال لجيهة هي 41,033 كم².

هاد لجدوال كايبين لأقاليم ديال لجيهة والسكان ديالها:

جهة بني ملال خنيفرة محاديها من الشمال جهة الرباط سلا القنيطرة ومن لجانوب جهة درعة تافيلالت ومن الشرق جهة فاس مكناس ومن لغرب جهة الدار البيضاء سطات وجهة مراكش آسفي. هاد لجيهة فيها بزاف ديال لخصائص لجغرافية بحال أنه دايز منها جبال لأطلس لمتوسط ولأطلس لكبير ؤويدان بحال واد أم الربيع وسهول تادلة وهضاب لفوصفاط قريب من خريبگة. لميساحة ديال لجيهة واصلة لـ41,033 كم². لموناخ ديال لجيهة جبلي وقاري. التساقوطات وصلات ل291 ملم فعام 2012 وبزاف دلمناطيق كايطيح فيها التلج فعلو فوق 900 ميترو. الريح اللي معروفة بيه لجيهة فوقت الصيف هو الشرݣي. لحارارة كاتراوح لمعدّالات ديالها ما بين 2 ديال الدرجات فأزيلال فالشتا و40 درجة فبني ملال فالصيف. هاد لجدوال كيعطي لمعلومات على لحرارة والشتا فمدينة بني ملال اللي هي لعاصيمة ديال لجيهة.

مطار بني ملال الدولي مطار كاين فمدينة بني ملال كايسيرڤي لجيهة دبني ملال خنيفرة. كيبعد لمطار على الصونطرڤيل ديال لمدينة بـ10 كيلوميتر، وقريب من لوطوروت ديال برشيد - بني ملال. كايمشيو بزاف ديال الرحلات فالداخل وحتى فلخارج من هاد لمطار اللي عرف تدهور كبير بزاف من ناحية لأرقام اللي بدات كاطيح حتى وصلات لقريب من 800 مسافر صافي فعام 2019. تفتاتح لمطار فـ2014 من مورا ماكان مطار ديال لپاراشيتاج وكايقدر يهز حتال 150.000 مسافر فلعام.

لوطوروت الرابعة  هي أوطوروت الطول ديالها واصل لـ173 كيلوميتر وكاتربط ما بين برشيد فجهة الدار البيضاء سطات و بني ملال. الطريق كلها مزفتة ومقادة وفيها الرموز بالتشوير. من أهم لمدون اللي كادوز منها هاد الطريق فلجيهة: خريبگة، واد زم، بجعد وقصبة تادلة. الطرقان لوطنية اللي دايزة من لجيهة هي: الطريق الوطنية رقم 12 (لمغريب)| و الطريق الوطنية رقم 25 (لمغريب)|. (ورّك على الطريق إلى بغيتي تمشي للمقالة ديالها!)

لميساحة اللي صاحة للفلاح فلجيهة واصلة ل948 ألف هيكتار. واللي مسقي منها هو 187 ألف هيكتار. لينتاج ديال لحبوب فلجيهة وصل فلعام د2017 لـ9 دلمليون و399 ألف قنطار. وصل لينتاج دلقطاني فنفس لعام لـ83 ألف قنطار. لجيهة كاتنتج حتى لخضرة (3.488.720 قنطار فـ2017)، زيادة على الشمندر والزيت ولحواميض ولورديات (التفاح، بوعويد، السفرجل، اللوز ولمشماش). فلمجال ديال تربية لبهايم، ف2016 سجلات لمديرية لجيهاوية ديال لفلاحة مليون و11 ألف راس ديال لمعاز، 3 دلمليون 332 ألف راس دلغنم و395 ألف راس ديال لبݣر.

الصيناعة فجيهة بني ملال خنيفرة شي حاجة اللي جديدة، يعني بدات فيعليا غير فالتسعينات. ف2011 وصل عدد لمؤسسات ديال الصيناعة ولوزينات ل325 وحادة. لينتاج الصيناعي ديال لجيهة كايتكون بلأساس من التحويل ديال لمنتاجات لفيلاحية. 56% ديال لموقاولات الصيناعية كاينة فبني ملال، من موراها خريبگة ب31%. لمينات ديال لفوصفاط اللي كاينين فلمينطقة ديال ولاد عبدون، زيادة على وحدين خرين هوما اللي كايخليو لمغريب ياخد بلاصة الصدارة فشحال ديال لفوصفاط عندو. ولاد عبدون فيها 28 مليار ميتر مكعاب ديال هاد لمادة، سوا لخموساين ديال ليحطيات دلبلاد. فلجيهة ماكاينش غير لفوصفاط بوحدو. فأزيلال كاين منجم ديال لملحة والزنك. فلجيهة على لعوموم مشتتين مناجيم ديال الرصاص ولحديد والنقرة والنحاس ولمنݣنيز. ف2012 تسجلات 259 منجم اللي كاتجيب لمواد لأولية وكاتصايبهوم بحال ديال لبني (لابريك والزليج) ولفخار.

السياحة فهاد لجيهة كاتميز بلأساس بالسياحة الجبلية. لمنطقة ديال لأطلس لمتوسط كاتجيب ليها بزاف ديال السياح اللي كايبغيو الطبيعة ولخضورية. كاين حتى السياحة اللي عندها علاقة بالصيد. فلافان ديال 2016 حصات لجيهة 160 أوطيل مكلاصي (واللي ما بينها لإقامات ديال السياح، ديور الضيافة، لوبيرجات...). 35 من هادو كاينين فبني ملال و99 كاينين فأزيلال. هاد لوطيلات فيهوم كتر من 3000 فراش. ف2012 سجلات لجيهة 161 ألف ليلة مبيت. كاين بزاف مايتشاف فجيهة بني ملال خنيفرة. من الشلالات والضايات لكبار بحال ضاية بين لويدان وأݣلمام أزݣزا وعيون واد أم الربيع، والشلالات ديال زاوية الشيخ وأفورار وخنيفرة. لمدون ولڤيلاجات اللي يقدر لواحد إيمشي ليهوم هوما أزيلال وبني ملال وخريبگة بلقصور ديالهوم، زيادة على زاوية أحنصال ومريرت وبجعد وتابانت للسياحة اللي باغين يتعرفو على جبال لأطلس لمتوسط ويتسلقوهوم، ولا كاين حتى مدون خرين بحال واد زم ودمنات ولقصيبة.




#Article 531: ناپوليون بوناپارت (191 words)


ناپوليون بوناپارت (ب لفرانساوية: Napoléon Bonaparte) ولا ناپوليون اللّول (ب لفرانساوية: Napoléon Ier)، (تولد ف أجاكسيو ف كورسيكا ف فرانسا نهار 15 غشت 1769 - مات ف لونڭوود ف لمملكة لمتحدة نهار 5 ماي 1821)، سميتو لأصلية ناپليوني دي بوونا پارطي ( ب الطاليانية: Napoleone di Buonaparte)، و اللي كان معروف تا ب لكورسيكي، و لا لكابرال الصّغير كان قائد عسكري و سياسي فرانساوي أصلو طالياني.

تعرف ناپوليون بوناپارت مورا التورة لفرانساوية حيت كان داخل مع لعسكر و ساند التورة. بقا طالع مع لعسكر ف وقت لجمهورية لفرانساوية اللّولا (ولاّ جينيرال ملّي كانت عندو 24 عام) و قاد بزاف د لحملات عسكرية ربحها كاملة. ف 1798 قاد حملة عسكرية على مصر باش يسدّ الطريق د لهند على بريطانيا، اللي كانت معادية مع فرانسا ديك لوقت. ف 1804 علن على راسو لإمبراطور د فرانسا و سمّا راسو ناپوليون اللّول. ف لوقت اللي حكم فيه وسّع فرانسا بزاف و حتل بزاف د لبلايص و ربح بزاف د لحروب.

ف 1815 تحالفو ضدو بزاف د لبلدان أوروپية و غلبوه ف لمعركة ديال واطيرلو ف بلجيكا. موراها غادي يقبطوه لبريطانيين و ينفيوه للجزيرة د سانت هيلينا فوسط لمحيط لأطلسي. أيبقا تما تا أيموت ف 1821.




#Article 532: جهة الرباط سلا القنيطرة (668 words)


جهة الرباط سلا القنيطرة (بلأمازيغية: ⵜⴰⵎⵏⴰⴹⵜ ⵏ ⵕⵕⴱⴰⵟ ⵙⵍⴰ ⵇⵏⵉⵟⵔⴰ، بالفرانساوية: Rabat-Salé-Kénitra) وحدة من لجيهات ديال لمغريب اللي تصايبو عام 2015، من مورا ما نقصو عدد لجيهات من 16 لـ 12. لجيهة كاينة فالشمال لغربي ديال البلاد، و لعاصيمة ديالها هي الرباط، و مابين لمدون اللي كاينين فلجيهة: سلا وقنيطرة وتمارة وسيدي قاسم ولخميسات. عدد السكان على حساب لإحصاء اللي تدار فـ2014 وصل فهاد لجيهة لـ4,580,866. لميساحة ديال لجيهة هي 18,194 كم².

هاد لجدوال كايبين لأقاليم ديال لجيهة والسكان ديالها:

جدوال كايعطي التطور ديال سكان لجيهة:

جهة الرباط سلا القنيطرة محاديها من الشمال جهة طنجة تطوان الحسيمة ومن لجانوب جهة بني ملال خنيفرة ومن لجانوب لغربي جهة الدار البيضاء سطات ومن الشرق جهة فاس مكناس. هاد لجيهة فيها خصائص جغرافية كيف أنه دايز منها ويدان بحال واد سبو وواد بورڭراڭ وسهول لغرب ووالماس وزعير ولهضاب قبل-الريفية، زيادة على لبحر اللي واصل طول دلاكوط دلجيهة ل165 كيلوميتر. لميساحة ديال لجيهة واصلة لـ18,194 كم². لقرب ديال لجيهة للمحيط لأطلسي خلا لموناخ ديالها إيكون محيطي حدا لبحر وكايولّي قارّي كلما كيفوت لواحد للداخل. التساقوطات فلجيهة كاتراوح مابين 300 و900 ملم، ولحرارة ما بين 4 ديال الدرجات فالشتا كأقل درجة و40 درجة فالصيف وتقدر تفوتها ݣاع، ولاكين كاتبقى هاد لحالة ستيتناء وصافي. هاد لجدوال كيعطي لمعلومات على لحرارة والشتا فمدينة الرباط اللي هي لعاصيمة ديال لجيهة.

مطار الرباط سلا الدولي هو مطار كاين فمدينة سلا وكايسيرڤي لجيهة دالرباط سلا القنيطرة. كيبعد لمطار على الصونطرڤيل ديال الرباط بـ8 كيلوميتر. كيتعتابر سادس أكبر مطار فلمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج، وكايقدر يهز 3.500.000 مسافر ومتوقع تزيد تالين 4 دلمليون.

فهاد لجيهة دايزين تلاتة ديال لوطوروتات: لوطوروت اللولة  ولوطوروت التانية  ولوطوروت لخامسة . الطرقان لوطنية اللي دايزة من لجيهة هي: الطريق الوطنية رقم 1 (لمغريب)| و الطريق الوطنية رقم 4 (لمغريب)| و الطريق الوطنية رقم 6 (لمغريب)| و الطريق الوطنية رقم 25 (لمغريب)| و الطريق الوطنية رقم 27 (لمغريب)| و الطريق الوطنية رقم 29 (لمغريب)|. (ورّك على الطريق إلى بغيتي تمشي للمقالة ديالها!)

لميساحة ديال لارض اللي صالحة للفلاحة هي مليون 19 ألف هيكتار. 15 مليون قنطار ديال لݣمح تنتج فلجيهة فعام 2013، أولا 15.7% ديال لينتاج دلمغريب. 12 مليون قنطار ديال لݣمح الرطب تنتجات فلجيهة فنفس لعام. لينتاج دياللحبوب كتير بزاف فلمينطقة ديال لغرب (لخميسات وسيدي قاسم). التربية ديال لبهايم واخدة حقها فلفلاحة ديال لجيهة، وهي عطات 139 ألف راس ديال لمعاز ومليون و584 ألف راس ديال لغنم و519 ألف راس ديال لبݣر فـ2013. لمراسي لكبار ديال مهدية وقنيطرة وبلايص عندها أهمية إيكولوجية بحرية بحال مولاي بوسلهام والساحل الطويل ديال لجيهة خلاها تنتج ف2013 شي 10 آلاف طن ديال لحوت بلقيمة ديال 98 مليون ديال الدرهم، واخا هاد لأرقام كاتبقى ضعيفة (لينتاج ديال لجيهة واصل غير 1% ديال لينتاج لوطني).

لجيهة عندها باع كبير فليقتيصاد والشيفر دافّير ديالو فالتصدير فيها وصل 27 مليار ديال الدرهم، حيتاش لعاصيمة دلجيهة، الرباط، هي لعاصيمة دلمغريب، وحيتاش لجيهة قريبة من لقوطب ليقتيصادي دلبلاد واللي هو مدينة كازا، ولاحقّاش لبينية التحتانية ديالها مزيانة وكل إقليم فيها عندو ݣيشي وحيد ديال ليستيتمار. الصيناعات اللي كاينة فلجيهة هي الصيناعات ديال لماكلة والدوا وتصنيع لمعادين، واللي كاتديرها 802 شركة مع لافّان د2012. قيمة لينتاج فهاد لجيهة وصلات 21 مليار ديال الدرهم ف2011. التركيز ديال لمعادين فتحت لرض ديال لجيهة عطاها مؤهيلات كبيرة فلمجال ديال لمينات. بعض لمعادين تحبس لينتاج ديالها حيتاش لمردود لمالي ديالها ولّا ضعيف. مينطقة لخميسات فيها بزاف ديال لمقاليع اللي كتنتج الرّملة ولحصى والرخام.

لجيهة ديال الرباط سلا لقنيطرة عندها واحد الجهد سياحي كبير، اللي خلاها تكلاصا الروتبة 6 فلمغريب من مورا مراكش، أݣادير، كازا، فاس وطنجة. لجيهة جات ليها ف2012 شي 485 ألف ديال السياح لبرّانيين، اللي باتت ف74 أوطيل اللي فيهوم 3904 دلبيوت و7937 فراش، ودوّزو 602 ألف ليلة سياحية. السياح ديال لبرّا جاو من فرانسا والصبليون والنڭليز وألمانيا والطاليان وميريكان. لجيهة ديال الرباط سلا لقنيطرة فيها بزاف ديال مايتشاف. التوريست ملّي كايمشي ليها كايلقى صومعة حسان وقصبة لوداية فالرباط، بزاف ديال لمآتير التاريخية وحتى لفونون دلخزف فسلا، لبحر وليكوط ديال تمارة ومهدية ومولاي بوسلهام فين كايتمارسو الرياضات ديال لعومان ولغطس، لمدون الجديدة ولعصرية بحال هرهورة وقنيطرة وتيفلت والطبيعة بالضايات ولويدان ديالها فوالماس ولخميسات وسيدي يحيى لغرب وغابات لمعمورة ووالماس.




#Article 533: جهة الدار البيضاء سطات (795 words)


جهة الدار البيضاء سطات (بلأمازيغية: ⵜⴰⵏⴱⴰⴹⵜ ⵏ ⴰⵏⴼⴰ ⴰⵥⵟⵟⴰⴹ، بالفرانساوية: Casablanca-Settat) وحدة من لجيهات ديال لمغريب اللي تصايبو عام 2015، من مورا ما نقصو عدد لجيهات من 16 لـ 12. لجيهة كاينة فالشمال لغربي ديال البلاد، و لعاصيمة ديالها هي الدار لبيضا، و مابين لمدون اللي كاينين فلجيهة: لمحمدية وسطات والجديدة وبرشيد وبنسليمان. عدد السكان على حساب لإحصاء اللي تدار فـ2014 وصل فهاد لجيهة لـ6,861,739. لميساحة ديال لجيهة هي 19,448 كم².

هاد لجدوال كايبين لأقاليم ديال لجيهة والسكان ديالها:

جدوال كايعطي التطور ديال سكان لجيهة:

جهة الدار البيضاء سطات محاديها من الشمال الشرقي جهة الرباط سلا القنيطرة ومن لجانوب الشرقي جهة بني ملال خنيفرة ومن لجانوب جهة مراكش آسفي. هاد لجيهة فيها خصائص جغرافية بحال أنه دايز منها واد أم الربيع وواد لمالح وسهول الشاوية ودكالة وتادلة، وهضاب فلرض مابين كازا والجديدة. لميساحة ديال لجيهة واصلة لـ19.448 كم². لموناخ فهاد لجيهة تقريبا بحال لموناخ ديال جارتها اللي فالشمال واخا كاين فرق صغير: لقرب ديال لجيهة للمحيط لأطلسي خلا لموناخ ديالها إيكون محيطي حدا لبحر وكايولّي قارّي كلما كيفوت لواحد للداخل. التساقوطات فلجيهة كاتراوح مابين 220 و760 ملم، ولحرارة ما بين 7 ديال الدرجات فالشتا كأقل درجة و38-40 درجة فالصيف وتقدر تفوتها ݣاع، والاكين هاد لحارارة كاتبقى غير بعض ليام فلعام. هاد لجدوال كيعطي لمعلومات على لحرارة والشتا فمدينة الدار لبيضا اللي هي لعاصيمة ديال لجيهة.

مطار محمد الخامس الدولي أولا مطار الدار لبيضا الدولي هو مطار كاين فمدينة الدار البيضاء كايسيرڤي لجيهة ديال الدار البيضاء سطات. كيبعد لمطار على الصونطرڤيل ديال لمدينة بـ31 كيلوميتر، وقريب من لوطوروت ديال لوطوروت ديال الرباط - آسفي ولوطوروت ديال الدار البيضا - أݣادير. كيتعتابر أكبر مطار فلمغريب من ناحية عدد لمسافرين، ومنو كايمشيو بزاف ديال الرحلات فالداخل وحتى فلخارج. تفتاتح لمطار فـ1943 وبناوه لميريكان وكايقدر يهز 14 دلملاين ديال لمسافرين.

لوطوروت اللولة أولا لوطوروت ديال الرباط - آسفي أولا  هي أوطوروت كاتربط ما بين الرباط فجهة الرباط سلا القنيطرة و آسفي فجهة مراكش آسفي، ودايزة من لجيهة ديال كازا سطات فبوزنيقة ولمحمدية. لوطوروت التالتة أولا لوطوروت ديال الدار البيضا - أݣادير أولا  هي أوطوروت كاتربط ما بين الدار البيضا ودايزة فلمدون ديال النواصر، برشيد وسطات وغادة حتال أݣادير فجهة سوس ماسة.

لوطوروت الرابعة أولا لوطوروت ديال برشيد - خنيفرة أولا  هي أوطوروت وكاتربط ما بين برشيد فجهة الدار البيضاء سطات ودايزة من بن أحمد و غادة حتال بني ملال فجهة بني ملال خنيفرة. الطرقان لوطنية اللي دايزة من لجيهة هي: الطريق الوطنية رقم 1 (لمغريب)| و الطريق الوطنية رقم 7 (لمغريب)| و الطريق الوطنية رقم 9 (لمغريب)| و الطريق الوطنية رقم 11 (لمغريب)| و الطريق الوطنية رقم 12 (لمغريب)| و الطريق الوطنية رقم 23 (لمغريب)|.(ورّك على الطريق إلى بغيتي تمشي للمقالة ديالها!)

لفيلاحة فلجيهة ديال كازا سطات مخدمة 53% ديال السكان لخدّامين، على ميساحة ديال لفلاحة كاتوصل 13% من لرض ديال لفلاحة فلبلاد، وهي واصلة ل1.335.639 هيكتار و95% ديال هاد لرض كاينة فالجديدة وسطات. لميساحة ديال لرض اللي كاتسقى واصلة ل8% فلجيهة (84 ألف هيكتار). لجيهة كاتنتج جميع لحوبوب اللي معروفة فلبلاد، وفعام 2012 وصل لينتاج ل8.5 مليون دلقنطار. فتربية لبهايم وصل لعدد ديال الريوس دلبݣر 549 ألف راس، ولعدد ديال لمعاز وصل ل47 ألف راس ولعدد ديال لغنم وصل ل2 دلمليون و420 ألف راس. فالصيد لبحري سجلات لجيهة ديال كازا سطات ف2012 واحد لكمية اللي ما فايتاش 8% من لينتاج لوطني، حيتاش الطريقة ديال الصيد مازال تقليدية ومامجهزاش. لكمية ديال الصيد فداك لعام وصلات ل32 ألف طن، و15 ألف منها تصيدات وتخوات فلمرسى ديال الدار لبيضا، وكتر من 3500 تخوات فلمرسى ديال الجديدة، واللي بقا شي فالجرف الصفر ولاخر فلمحمدية.

الصيناعة فلمغريب بيضاوية بمتياز. لجيهة ديال كازا سطات فيها 3113 وحادة صيناعية اللي كاتصدر 53% ديال لينتاج دلمغريب، واللي فيها 64% ديال لينتاج فلمغريب و48% ديال ليستيتمارات. لقيطاع اللي مخدّم بزاف ديال الناس هو لقيطاع ديال تحويل لمونتاجات ديال لماكلة، واللي كايخدم 41% ديال الشغيلة الدايمة و86% ديال لپيرصونيل لموسمي. لمواريد لمعدينية ديال لجيهة كتيرة، ولكن التنوع ديالها محدود، حيتاش كاين بزاف غير لحديد ولملحة ولباريتين، ولكين هاد لقيطاع كايعاني من السدّان ديال لوزينات حيتاش هادشي ما بقاش منو مدخول كتير كيما كان قبل. هاد لجدوال كايقارن لمعطايات ليقتيصادية ديال لجيهة ديال لجيهة مع لمعطيات ديال لمغريب:

فلجيهة كاينين 115 أوطيل مكلاصين (6% من لوطيلات دلبلاد)، اللي فيهوم قريب من 20 ألف فراش، واللي كاينين فقريب من 10 آلاف بيت. ف2012 تسجلات 2 دلمليون ليلة سياحية أغلبيتها فكازا والجديدة. الناس كاتجي بزاف من فرانسا، الصبليون، النڭليز، الطاليان وميريكان. كاين بزاف مايتشاف ومايدر فجيهة الدار البيضا سطات، اللي عزيز عليه لمدون لقدام يقدر إيمشي للمدينة لقديمة ديال الجديدة أولا ديال كازا. كاين بحورة زوينين وأنشطة سياحية معاهوم (السورف ولغطس....) فلواليدية ولمحمدية وبوزنيقة والصخيرات، وزيد عليهوم طاماريس وسيدي بوزيد وسيدي رحال الشاطئ وسيدي عابد. كايكون موسم ديال لخيول ولفروسية فمولاي عبدالله، ولواحد إيقدر إيمشي للطبيعة فبولعوان وبن أحمد وسيدي بنور وبنسليمان. لغابة ديال بوسكورة فيها شجر لكاليپتوس ومدينة سطات معروفة بالطبيعة ولفلاحة ديالها. مدينة أزمور دايز منها واد أم الربيع بالضايات ديالو لواعرين واللي فيهوم حياوانات وطيور كاينين غير فلمغريب.




#Article 534: روما (185 words)


روما, (ب الطاليانية: Roma) هي لعاصمة ديال الطاليان و أكبر مدينة فيها من ناحية السكان، و وحدا من أكبر لمدون ف أوروپا. كيسكنو فيها تقريبا 2.8 مليون ديال الناس. لمدينة جات ف لغرب ديال وسط الطاليان، ف لمنطقة ديال لاتسيو، و تاطّل على لواد ديال التيبر. روما كاتميّز باللي هي لمدينة لوحيدة ف لعالم، اللي ف لداخل ديالها كاينة بلاد، واللي هي لڤاتيكان. هادشي علاش بزاف د الناس كيسمّيو روما ب لعاصمة ديال جوج بلدان.

روما عندها تاريخ قديم تيوصل ل 28 قرن، و تلقاو فيها آتار اللي ف عمرهم كتر من 700 عام قبل لميلاد. تعرفات روما بزاف حيت كانت هي لأصل و لعاصمة ديال الدولة الرومانية، اللي كانت وحدا من أكبر لإمبراطوريات ف لعالم. ف 1871، ولاّت روما هي لعاصمة ديال لمملكة ديال الطاليان، و ف 1946 ولاّت لعاصمة ديال لجمهورية ديال الطاليان.

عام 2007 كانت روما لمدينة رقم 11 ف أكتر لمدون السياحية ف لعالم، و التالتة ف لإتحاد لأوروپي. لوسط ديال لمدينة لقديمة داخل فالليسطة ديال موافع الترات لعالمي ديال ليونيسكو. روما عندها جوج فراقي كبار د كورة هوما آ إس روما و لاتسيو، و فيها 3 د لمطارات و ميطرو.




#Article 535: وهران (115 words)


وهران, (بالدارجة د لجزائر: وهرن - ب لأمازيغية: ⵡⴰⵀⵔⴻⵏ) و اللي معروفة تا ب الباهية، هي مدينة جات فالشمال لغربي د الجزائر، و هي تاني أكبر مدينة ف لبلاد مورا لجزائر لعاصمة. وهران تاتطل على لبحر لبيض لمتوسط و تيسكنو فيها تقريبا مليون و نص د الناس.

دازو على وهران بزاف د لحضارات منها لأمازيغية و لعربية و لأتراك لعتمانيين و الصبليون و لفرانساويين. كل وحدا من هاد لحضارات خلات أتر ديالها ف لمدينة، و خلاها تولي مدينة كبيرة و مهمة ف ليقتيصاد ديال لجزائر كتيرشي ب لميناء ديالها.

وهران معروفة بزاف ب لموسيقى، بحال لملحون، اللي كانو عندو بزاف د الشيوخ لوهرانيين، ولاّ الراي، اللي عطا فنانة كبار خلاّو لمدينة تتعرف ف لعالم كامل.




#Article 536: نيو يورك (138 words)


نيو يورك ولاّ نيويورك ( ب لينڭليزية:New York) هي أكبر مدينة من ناحية السكان ف لميريكان. جات نيو يورك فالشمال الشرقي ديال لبلاد، و تيسكنو فيها تقريبا 20 مليون د الناس.

نيو يورك تاتعتابر لعاصمة التقافية و لقتصادية و لإعلامية ديال لعالم، حيت أكبر لمؤسسات ف لعالم اللي كاينين ف هاد لميادين كاينين فيها. نيو يورك فيها لمقر ديال لأمم لمتحدة و الجوج ديال أكبر بورصات ف لعالم: بورصة نيو يورك و النازداك. كاين كتر من 120 جامعة ف لمدينة و لميطرو ديالها تيخدم 24 ساعة كل نهار، و عليها كاتسمّا لمدينة اللي ما كاتنعسش.

لأصل ديال نيو يورك بدا ف 1624 ملّي أسسو لمستوطنين لهولانديين مركز تجاري سمّاوه ديك الساعة أمسطردام الجديدة. ف 1664 خداو لينڭليز لمدينة و سمّاوها نيويورك. من 1785 تال 1790، كانت نيو يورك هي لعاصمة ديال ميريكان، قبل ما تولّي لعاصمة هي واشينطون.




#Article 537: عبد الله ڭنون (132 words)


عبد الله بن عبد الصمد ڭنون الحسني، اللي معروف ب عبد الله ڭنون (تولد ف 16 شتنبر 1908 ف فاس - مات ف 9 يوليوز 1989 ف طنجة) كان فقي و كاتب و مؤرخ و شاعر و أكاديمي و صحافي مغريبي. ڭنون كان أمين عام قديم ديال رابطة علماء لمغريب واحد من الناس اللي ساهمو باش يديرو لقواعد ديال النهضة لأدبية و التقافية و لعلمية ف لمغريب، من النص د لقرن 20 حتا مات.

عبد الله ڭنون معروف باللي كتب النبوغ المغربي في الأدب العربي، اللي كان كتاب فيه تلاتة د لأجزاء على لأدب لمغريبي ب لعربية، و اللي منعو لستيعمار لفرانساوي ملّي خرج.

خدا عبد الله ڭنون بزاف د لمناصب لغوية و تعليمية و إسلامية ف بزاف د لبلايص ف لعالم بحال الرباط و لقاهرة و دمشق و بغداد و عمّان.




#Article 538: لمختار السوسي (123 words)


محمد لمختار بن علي بن حمد السوسي لإليغي، لمعروف ب لمختار السوسي (ب لأمازيغية: ⵍⵎⵅⵜⴰⵔ ⴰⵙⵓⵙⵉ) (تولد ف 1900 ف إيليغ - مات ف 15 نونبر 1963 ف الرباط) كان مؤرخ و كاتب و فقي و شاعر و مقاوم و سياسي مغريبي. ما بين 1956 و 1963 كان لمختار السوسي هو لوزير د الشؤون لإسلامية، و كان عضو ديال مجلس لوصاية على لعرش (اللي كان كيتسمّا ديك الساعة مجلس التاج).

لمختار السوسي كان مقاوم للستيعمار لفرانساوي ف لمغريب، و ف 1937 غادي تنفيه فرانسا من مراكش (اللي كان كيقرّي فيها) لإيليغ، و غايبقا فيها 8 سنين تال 1945.

مات لمختار السوسي نهار 15 نونبر 1963 من مورا كسيدة ف الطريق.

كتب لمختار السوسي بزاف د لكتوبا و لمؤلفات ب لعربية و بتاشلحيت، منها:




#Article 539: جيهة (مستوى إداري) (428 words)


لجيهة هي سمية كاينة فلمجال ديال السياسة وليدارة وليقتيصاد معروف باللي هو طرف من التراب اللي فيه مميزات طبيعية وبشرية ديالو كاتخليه كايبان على لجيهات اللي مجاورين ليه أولا فلمجموعة اللي تابع ليها. لجيهة فلمفهوم ديالها اللي معروف كاتعني لمينطقة أولا الناحية. لكلمة ديال لجيهة تقدر تعني بلاد أولا ݣروب ديال لبلدان أولا قارة أولا طرف من قارة، أما فالناحية ديال لعملية: الجهة كايجي معاها شي صفات كايميزوها بحال إما تكون بحرية أولا صيناعية أولا حضرية أولا قتيصادية.

هي طرف ديال لرض (صغير أولا كبير) اللي الضواهير ديالو الطبيعية مشابكة فما بينها، الشي اللي كايعطي واحد لجغرافيّة اللي طبيعيا واحدة وكاينة بوحدها ما كاتشابه معاها حتى شي بلاصة خرة، وعندها التضاريس ديالها ولموناخ ديالها ولحاياة لبرية فيها. الجبولة متالا كاتحدد كيفاش غايكون لموناخ والشجر والزرع فيها ونوع لحياوانات اللي يقدرو يعيشو تما، ومن تما كايجي التشكيل ديال كيفاش الناس ديال ديك لجيهة غادي يعيشو.

هي جيهة فيها بزاف ديال ليپول أولا لأقطاب (مدون أولا مراكز) اللي مترابطة بيناتها ودايرة التواصول وفيها مراكيز ديال لينتاج والتوزيع.

كاتختالف لجيهات على حساب لماعايير وليختيارات اللي حاطّاهوم الدولة، والاكين ممكين نفرقو بين جوج مرارك على حساب الناشاط اللي هاد لجيهات كايديروه، واللي هوما:

هاد النوع ديال لجيهات كايجمع بزاف دلمناطيق اللي متقاربين وعندهوم سياسات وقتيصاد مشارك فواحد التقسيم ليداري، وكاتعني التحكوم ديال واحد لݣروپ دلباشار متقاربين كايستاغلو لمواريد ديال لرض اللي حاكمينها. وهي كاتكون فاش كايتصاوب سيستيم ديال ليدارة عندو صلاحيات ديال النموداج دالدولة، حيتاش عندو سلطة كاتشبه داكشي اللي عند الدولة بحال السلطة التشريعية ولقضائية كيما دارت الدانمارك وفرانسا اللي عطاو لجماعات واحد ليستيقلالية فالتسيير ديال ديك لارض تقريبا فكولشي.

يمكن لينا نهضرو على هاد النوع ديال لجيهات فاش كاتعطيهوم الدولة باش إيديرو شي حوايج على قبالت يقادو التنمية ديال ليقتيصاد ولمجتماع محليا ووطنيا بلا ما يوصلو لجيهات هادو للنيڤو ديال لجيهة السياسية، كيما كاين فلمملكة لمتحدة والسويد اللي دارو جيهات قتيصادية اللي حقيقية باش إيعاونو فالتفعيل ديال ليقتيصاد لماحلّي ديالهوم.

لجيهة فلمغريب عرفات واحد التطور اللي كبير حيتاش تقسمات لبلاد إيداريا ل40 إقليم و9 دلعمالات و2 دلولايات ؤولا التقسيم ديال وزارة الداخلية وهادشي ف1989. من موراها ف1990 وصلات التقسيمات ل16 جيهة و45 إقليم و26 عمالة و10 دلولايات. ومن مورا هاد التقسيم بان مفهوم جديد اللي هو لجيهة ليقتيصادية اللي كاتمتل السلطة ديال لمركز واللي حطات فبالها فاش كانت كاتقسم لبلاد لحقائيق ديال ليقتيصاد ولبشر. ف2015 تدار تقسيم جديد اللي نقص عدد لجيهات من 16 ل12. هاد لجيهات هوما: جهة الداخلة وادي الذهب، جهة الدار البيضاء سطات، جهة الرباط سلا القنيطرة، جهة الشرق، جهة العيون الساقية الحمراء، جهة بني ملال خنيفرة، جهة درعة تافيلالت، جهة سوس ماسة، جهة طنجة تطوان الحسيمة، جهة فاس مكناس، جهة مراكش آسفي وجهة ݣلميم واد نون.




#Article 540: عمالة (مستوى إداري) (306 words)


لعمالة ولا لعامالة (بالنڭليزية: Prefecture من اللاتينية: Praefectura بريفيكتورا) هي إيدارة قضائية ولا تقسيم ف بزاف ديال لبلدان ولا حتى مابين بعض لكنائيس ف لعالام. ف لعصور لقديمة عند الرومان لعمالة هي منطقة كايحكمها بريفيكتوس (باللاتينية: praefectus).

لعمالة ف لمغريب هي طرف ديال لرض كاين غير ف لمدون وكايترأسها عامل. لجيهة مقادّة ف لمستوى مع لإقليم و كولهوم كاينتاميو ل تقسيم التاني ديال لبلاد. لجيهة هي اللي كاتمتل لمستوى اللول (لفوقاني). لمهيمّة ديال هاد لعمالة هي أنها تنوض ب تنمية ليجتيماعية و ليقتيصادية و خاصة ف لمناطيق ديال لبادية اللي دايرين ب لمدينة، زيادة على لمدينة براسها، و خاصها تهز و تساهم ف لمعاونة عند لجماعات الترابية بيناتهوم. لعمالة كاتخدم على أنها توفر التجهيزات خصوصا ل لعالم ديال لقرية و تحارب التهميش و ف نفس لوقت كاتراعي الستراتيجيات و لخوطاط ديال الدولة. ليختيصاصات الداتية ديال لجماعة هي أنها كاتدير الطرونسپور ل دراري و دريات د لمدراسة ف لبلاد و كاتصاوب الطرقان ليهوم، و كاتنمي الصحة و السكنى و التعليم و لأمن و التقافة و الرياضة. من 2009 ولاّ ف لمغريب 13 عمالة. هاد لعمالات هوما: عمالة أݣادير إداوتنان، عمالة إينزݣان آيت ملول، عمالة مراكش، عمالة الدار البيضا، عمالة لمحمدية، عمالة الرباط، عمالة سلا، عمالة الصخيرات تمارة، عمالة فاس، عمالة مكناس، عمالة وجدة أنݣاد، عمالة طنجة أصيلة وعمالة لمضيق لفنيدق.

ف لبريزيل لعمالة (بلبرتغالية: prefeitura) هي إدارة كاتنوب على لحوكومة ف التنفيد ديال لقرارات ف لبلديّات. لمصطلح ديال لعمالة ف لبرازيل كايعني حتى لبيرو ديال لعمدة.

ف فرانسا لعمالة (بلفرانساوية: préfecture) هي لعاصيمة ديال لإقليم (بلفرانساوية: département). لبلاد فيها 101 إقليم، هادشي كايعني أنه كاين 101 عمالة. لعمالة ديال لجيهة ف فرانسا هي لمدينة اللي هي عاصيمة ديال لجيهة. هادي كاتكون لمدينة اللي كايسكن فيها لمحافض، اللي هو لممتيل ديال لحوكومة ف لجيهة.

لعمالات ف مونڭوليا تدارو ف لحوكم ديال سلالة كينݣ وهوما التقسبم اللول ديال لبلاد وكاين منهوم 21، و هاد لعمالات كايتسماو أيماݣ (بلمنݣولية: аймаг).




#Article 541: جايزة نوبل د لأدب (112 words)


الجائزة د نوبل د لأدب (ب السويدية: Nobelpriset i litteratur) هي جائزة كاتّعطا كل عام، من 1901، ل لأدباء و الكتاب اللي نفعو البشرية ب الأعمال الأدبية ديالهوم. الجائزة كاتعطيها الأكاديمية السويدية، و القيمة ديالها واصلة اليوم ل 10 د لمليون كرونة سويدية (مليون أورو).

هي أكبر و أهم جائزة أدبية ف العالم و كايحدد الفائز بيها لجنة نوبل، اللي كاتشكلها الأكاديمية السويدية من الأعضاء ديالها و كاتزيد عليهوم متخصصين ياخرين من منظمات و جمعيات أدبية عالمية.

الجائزة ماكاتعطاش غير ل الأدباء، بحال الروائيين و الشعراء: سبقليها تمنحات ل فلاسفة بحال ألبير كامي، أونري بيرݣسون و بيرتراند راسل. تعطات حتّا ل سياسي بحال وينستون تشورشيل و ل مغني-مؤلف موسيقي بحال بوب ديلان.




#Article 542: حمادي التونسي (105 words)


حمّادي التونسي (خلاق ف فاس ف 1934 - توفا ف الرباط ف 11 أكتوبر 2020) ممتل و زجّال مغربي.

بدات المسيرة الفنية ديالو ف 1954، فاش كان دخل ف الفرقة المسرحية د الإذاعة و التلفزة المغربية. حمادي التونسي دخل من بعد ف بزاف د الفرق المسرحية الوطنية بحال فرقة المعمورة اللي كانت من اللرواد د المسرح ف المغرب و الفرقة د المسرح الوطني محمد الخامس اللي نشط فيها مع جيل من الممتلين المسرحيين لمغاربة لكبار بحال محمد الجم، عزيز موهوب و مليكة العمري.

حمادي التونسي كان زجّال كبير و كتب الكلمات د 152 أغنية مغربية ل فنانين بحال عبد الوهاب الدكالي و عبد الهادي بلخياط.




#Article 543: لجمهورية لعربية لمتحدة (108 words)


الجمهورية العربية المتحدة كانت دولة تكونات بين 1958 و1961 من بعد ما تّاحدو مصر و سوريا، وكانت دخلات معاهوم تا اليمن ل واحد المدة قصيرة. هاد الاتحاد كان سالا ف 1961 من بعد ما وقع انقلاب ف سوريا. مصر بقات محافضة على هاد السمية تال 1971، العام اللي ولات فيه سميتها الرسمية جمهورية مصر العربية.

هاد الدولة كان القرار ديال التأسيس ديالها داروه الرئيس لمصري جمال عبد الناصر و الرئيس السوري شكري القوتلي. كانت العاصمة ديالها هي القاهرة، العاصمة د مصر. ف 1960 تحول الاتحاد ل بحال استعمار د مصر ل سوريا بحيت تّلغاو الوزارات ف سوريا و البرلمان و تحولات السلطات التنفيذية و التشريعية كاملة ل القاهرة.




#Article 544: جامع لحسن التاني (107 words)


جامع الحسن التاني هو جامع و معلمة دينية و تقافية كاين ف مدينة الدار البيضا ف المغرب. الجّامع تبنا بين 1986 و 1993 و تكلّف لبني ديالو 3.8 مليار درهم.

الجّامع كان مشروع ديال الملك الحسن التاني اللي كان دعا ل اكتتاب باش يتجمعو لفلوس د لبني ديالو. كان تكلف ب المشروع المهندس المعماري لفرانساوي ميشال پانسو و قامت ب التنفيذ د لبني شركة بويݣ لفرانساوية.

الجّامع مبني، ف النص د المساحة ديالو، فوق لبحر، و الصّمعة ديالو الطول ديالها 210 ميترو و يمكن يستقبل أكتر من 100 ألف مصلي.

المركّب د جامع الحسن التاني فيه مدرسة قرآنية، مكتبة، متحف و مدرسة د الصّنعة التقليدية ف لبني.




#Article 545: ميشال پانسو (142 words)


ميشال پانسو، تولد فـ8 فبراير 1926 ف موريز ؤ مات فـ15 شتنبر 1999 ف باريز، كان موهنديس فرانصاوي.

تشهر بلي صاوب أكبر صمعة ف لعالام (ف ديك لوقيتة)، ف جامع لحسن التاني ف الدار البيضا (لمغريب).

تخرج ميشال پانسو من لمدراسة لوطنية لعليا د لفنون لجميلة د باريز ف 1956، ؤ خدم موراها ف بزاف د لمشاريع د لعاصيمة لفرانصاوية، خصوصا ف نواحي د شونزيليزي.

تشهر پانسو بلي راه هو لمهنديس د لماليك لحسن تاني، لي كان تلاقاه ف سبعينات ؤ من تما ؤ هو كيخدم علا مشاريع ف لمغريب؛ بحال لقصر لملكي د أڭادير، جاميعة لأخوين د إفران، لمدينة د سلا جديدة و زيد عليها جامع لحسن تاني.

ف لخر د حياتو، صاوب پانسو لجناح د لمغريب ف لمعريض د سيڤيا (صبانيا) ف 1992، ؤ جاتو من بعد غضبة ملكية ؤ عاش مأزم حتا توفا نهار 15 شتنبر 1999 ف باريز




#Article 546: محمد الرباع (124 words)


محمد الرباع (تولد ف برشيد نهار 8 مارس 1941) سياسي هولاندي أصلو مغريبي. الرباع كان هو اول مغريبي دخل للبرلمان ديال هولاندا، و داكشي ف 1994 ملّي طلع للبرلمان مع لحزب ديال لخوضر.

تولد محمد الرباع ف 1941 ف برشيد و كبر فيها. قرا قرايتو كلها ف لمغريب، تال لعام ديال 1966 اللي كان تيقرا فيه لفلسفة ف لجامعة، و هرب ل هولاندا باش ما يدخلش للحبس ف وقت سنوات الرصاص. ف هولاندا دخل للعالم ديال النضال و ولاّ كيدافع على لأوضاع د لمهاجرين، تا ولاّ لمدير ديال لمركز لهولاندي د لأجانب من 1983 ل 1994. الرباع معروف باللي كيناضل ف بزاف د لقضايا بحال القضية الفلسطينية و لملفات د لعنصرية و لحروب د لإستعمار، و ساند تا لحركة د 20 فبراير ف لمغريب.




#Article 547: لالة فاطمة (111 words)


مسلسل لالة فاطمة هو مسلسال مغريبي كوميدي درامي واجتيماعي فيه تلاتة دلمواسيم كاتعاود لقصة ديال فاميلة مغريبية (فاميلة بنزيزي) بلماشاكيل ولافراح ولحزان ديالها.

بدات لالة فاطمة كاتصاوب لحلوة ديال الدار وكاتبيعها للمعارف ديالها وشوية بشوية كبرو الطموحات ديال هاد لمرة، وكبر حتى لمشروع ديالها، ؤولات كاتبيع لحلوة اللي كاتصاوب للعراسات ولحفلات لكبار. وحيتاش لالة فاطمة كان خاصها شي محل فاش تبين لحلاوي اللي كاتصاوب، ردّات لمحل ديال لكاسيطات اللي كان خدّام فيه جبّور لپاتيسري مقابلها الجنجلان. من بعد ولّات عند فاميلة بنزيزي جارة جديدة هي لالة نادية اللي كانت ديما ممّحناهوم بلماشاكيل ديالها والصيفات ديالها اللي ماشي جتيماعيين. حتى واحد ماكان كيحمل هاديك السيدة وواخّا هكاك ديما داخلة خارجة من دارهوم.




#Article 548: مشهد ف الجردة د راوندهاي (120 words)


مشهد ف الجردة د راوندهاي (ب النݣليزية: Roundhay Garden Scene) هو أول محاولة د عرض فيلم سينيمائي ف التاريخ، و اللي كان دارها المخترع لفرانساوي لوي لوپرانس ف 1888 ف ليدز ف بريطانيا.

هاد الفيلم البدائي كانت المدة ديالو يالّاه 2 ثواني و كان دارو ب تقنية لكرونوفوطوݣرافي Chronophotographie، اللي كاتدوز بزاف ديال التصاور ب الزّربة ب شكل كايخليها تبان بحال فيلم مصوّر.

المؤرخين د السينيما كايعتابروه أول عرض سينيمائي ف التاريخ، واخّا ف الحقيقة لوپرانس ما كانتش صدقاتليه التجربة ف 1888 و بقا الفيلم تال 1930 عاد قدر يتشاف ب الاستعمال د الماكينة د البانتيتر (Banc-titre) اللي كاتخدّم ف الرسوم المتحرّكة. حتا العنوان دالفيلم كان تحطّ ف 1930 حيت لوپرانس ما كان كتب حتا شي سمية فوق الفيلم ديالو.




#Article 549: بوبكر لجامعي (108 words)


بوبكر لجامعي (تولد ف الرباط ف 1968) هو صحافي وخبير بنكي مغريبي. لجامعي كان هو لمدير د النشر د الصحيفة لأسبوعية (ب لعربية - بقات من 1998 ل 2000) و لوجورنال إبدومادير (بلفرانساوية - بدات ف 1997 و سدّات ف 29 يناير 2010). ف 2003 ربح بوبكر لجامعي لجائزة الدولية د حرية الصحافة اللي كاتعطيها لجنة جماية الصحافيين اللي كاين لمقر ديالها ف نيو يورك.

بوبكر لجامعي تعرف ف عام 2000 حيت هو الصحافي لوحيد ف لمغريب اللي دار لقاء مع الرئيس د لپوليزاريو ديال ديك لوقيتة، عبد لعزيز لمراكشي.

بوبكر لجامعي ساكن من 2014 ف لجنوب د فرانسا، و خدام بروفيسور ف لجامعة د إيكس أون پروڤونس.




#Article 550: جويس كومپانس (105 words)


جويس كومپانس إي جوڤير (ب الكاطالونية: Lluís Companys i Jover) (خلاق ف 21 يونيو 1882 طورنابوس، إقليم ليريدا - سپانيا - توفا ف 15 أكتوبر 1940 ف بارسيلونا) محامي و سياسي كاطالوني. كان رئيس د الجينيراليطاط د كاطالونيا (المقاطعة المستقلة) بين 1934 تال البدية د الحرب الأهلية السپانيولية. كان هو الزعيم د حزب اليسار الجمهوري الكاطالوني و كان هرب ل فرانسا فاش بدات الحرب الأهلية، و تمّا شدّوه الݣيستاپو (البوليس السياسي د ألمانيا النازية) و سلّموه ل سپانيا الفرانكاوية اللي عدماتو.

جويس كومپانس كايتعتابر من الرموز د القومية الكاطالونية و هو اللي مسمي عليه الملعب الأولمپي د بارسيلونا اللي تلعبات فيه الألعاب الأولمپبية د 1992.




#Article 551: عبد الله بن عيشة (192 words)


عبدالله بن عيشة ولا عبدالله بن عائشة، كان أميرال و قرصان و ديپلوماسي مغريبي.

كان سفير د لمغريب ف فرانصا ؤ نڭليز ف لقرن 17. عبدالله مشا ل فرانصا ف 11 نونبر 1698 باش يفاوض واحد تيفاقية. كان كيهضر صبليونية ؤ نڭليزية ب طريقة مطلوقة والاكين لفرانصاوية لا. سفارة ديالو جات من بعد لمجية د فرونصوا پيدو دو سان ؤلون ل لمغريب ف 1689. 

بن عيشة طلاقا ب لوي ربعطاش ف 16 فبراير 1699. ستقبلوه مزيان ف باريز ؤ تسارا بزاف د لبلايص. كان طلاقا حتا ب لماليك نڭليزي لي حييدوه جيمس تاني، لي كان ف داك لوقت منفي ف فرانصا، لي كيبان بلي كان كيعرفو من يامات شباب فاش كان مشدود ف نڭليز.

وحدا من لمهمات د بن عيشة كانت ياخد تيفاق بلي لباطوات لفرانصاويين مايشدوش لمسلمين، وحتا باش يرد لقراصنة لمغاربة لي فايت شدوهوم لباطوات د لفرانصاويين. والاكين لوي ربعطاش ما أكدش بلي كاينة تيفاقية، وبلعكس بدا كيفوح ب سلطة ديالو علا سلطان لمغريبي. 

ملي بن عيشة رجع لمغريب، بقاو براوات كيتبادلو معا فرانصا، ؤ سلطان لمغريبي مولاي سماعيل قتارح يعاون جيمس تاني ب لعسكر باش يرجع ل لعرش د نڭليز، بشرط يولي مسلم ولا عل أقل يتحول ل پروطيستانتية.




#Article 552: باب:تيكنولوجيا (508 words)


مرحبا بيك ف لقيسارية د تيكنولوجيا...

التيكنولوجيا هي التّخمام فالدّوزان و الحيلات لي تايسهلو على بنادم الخدمة، فيها الفن التقليدي و العلوم و شلاّ صنايع و معارف.

 
كلمة الميكانيك جايّة من الإغريقية القديمة (Μηχανική) لي تاتعني فن البني ديال المّاكن  والغرض من الميكانيك هو التّخمام فالتحراك تالحوايج والمساوية تاع الثقل. و تايضهر بلّي تاميكانيكت  بدات تاتبان فيّامات الإغريق فالبداية د القرن الخامس، و دازت هاد تاميكانيكت من الشرق الوسطاني لعند الإغريق.

السّاس ديال تاميكانيكت هو الحيلات، و من الحيلات اللولانيين  لي صاوبهوم بنادم كاين الدردوبة، العكّاز، اللوّاية و الرويضة، ومن أقدم الماكن لي صاوبهوم بنادم هوما المّينيكات لّي تايتحركو. وهادي تقريبا ألف عام قبل الزيادة ديال عيسى، صاوبو الفراعنة الماسك تاع الله د الموت أنوبيس لي تايتحرّك فيه الطرف التحتاني ديال الفم
.

الضّو ولّ التريسينتي هو التّخمام فالدّوزان و الحيلات لي بيهوم تيتبدّل التحراك تاع الفرتيت المعمّر لي تايكون فالسلك, هاد الفرتيت تايكون خلوق فالحوايج. وخّا يكونو هاد الحوايج حيّين، جامدين، سايلين ولّ هواويّين، نفس الفرتيت د الضّو غادي يتساقل فيهوم.

فيّامات مابين 1791 و 1800 ڤولطة و غالڤاني تخاصمو
 على واش كاين ضو واحد ولّ كاين جوج نواع د الضّو، غالڤاني تايقول كاين الضّو د البهايم و الضّو د المعدن، و ڤولطة تايقول كاين نوع واحد د الضّو. وبسباب هاد المخاصمة صاوب ڤولطة التستيفة د الضّو ولّ الحجرة د الضّو و بيّن بيها أنه كاين ضو واحد، نفس الضّو كاين فالبهايم، المعدن وشلاّ حوايج.

يمكن يخرج من الضّو
 التّحراك، بحال الموتور د الضّو، و يمكن يخرج من الضّو المسقية (المغناطيس)، بحال الساقتة د الضّو، ويمكن يخرج من الضّو المّاج، بحال لانطير لي تيشد المّاج د الراديو، ويمكن يخرج من الضّو السخونية، بحال الفران والثلاجة، ويمكن يخرج من الضّو الشيمي بحال تشلال المّاعن بالنقرة ولّ الذهب (الپلاكي أور).

الأنفورماتيك هو التّخمام فالدّوزان و الحيلات لي تاتضرب بيهوم الحساب، سميّت هاد الحيلات الخوارزميات، فاللوّل كان بنادم هو لي تايضرب الحساب، من بعد المّاكن هما لي كانو تايضربو الحساب بحال ماكينة جاكار، ودابا الحساسبية ولّ التيليفونات ولّ التّركيبات تاع الإلكترونيك هما لي تايضربو الحساب.

محمد الخُوارزمي جاب من عند الهنود الحروف تاع الحساب ولي كانت سميتهوم حروف الغبار، و لي بيهوم أي حد يقدر يحسب الجمع، النقصان، الضرب والقسمة. الخُوارزمية د الجمع هي لي تايتعلموها الصغار فالإبتدائي، دخّلها فيبوناتشي الطاليان يامات 1170 من تمّا بدات أوروپا كاملة تتضرب الحساب بهاد الحروف و بالخوارزميات ديال الخُوارزمي.

من الماكينات ديال الحساب كاين ماكينة الأڤيكيثيرا، الأسطرلاب، الحسّاب الشينوي، الپاسكالية و دابا الكالكيلاتريس.

البني هو التّخمام فالدّوزان و الحيلات لي بيهوم يقدر بنادم يصاوب الديور، البطيمات، القْناطر، القوادس، الطرقان، السكّات، المراصي، البارجات، الخطّارات و شلاّ حوايج آخرى.

الدّوزان و الحيلات لي بيهوم يقدر بنادم يبني تانسمّيوهوم المعمار ولّ الهندسة المعمارية، الناس لي تايبنيو الدشور ولّ الديور تانسميوهوم البنّاية، و لي تايكون عارف الحيلات تانسمّيوه العريف ديال البنّاية. من الحيلات ديال البني المعرفين عندنا الحفرة، الغار، الخيمة، الحيط، الضّالة و التقويسة، أمّا البغلي (المادة) باش تانبنيو، راه كاين الحجر، الياجور، الڭبص، العود و الزليج.

البني المعروف والمشهور، كاين برج بابل ف العراق، أهرام المصريين ف مصر، ضريح أرتيميس ف توركيا، كوليزي ف روما، كاتيدرال سان ماركو ف ڤينيتسيا (البندقية)، كاتيدرال سپاير ف لاليمان(ألمانيا)، نوطخ ضام ف برناطة (باريس)، الكتبية ف مرّاكش، مانهاتن ف الميريكان.




#Article 553: تيرينتيوس لإفريقي (154 words)


تيرينتيوس لإفريقي (مزيود ف 195 ؤلا 185 ق.م. ف قرطاج - مات ف 159 ؤلا 158 ق.م. ف ليونان)، ب لّاتينية Publius Terentius Afer، هوّا شاعر ؤ كاتب مسرحي أمازيغي كان كيكتب ب لّاتينية، ؤ كيتعتابر من بين أعضم جوج كُتّاب ف لأدب لّاتيني لقديم (لكاتب لاخور هوّا تيتوس پلاوتوس).

مامعروفش بزاف علا لحياة ديالو، ؤ حتا سميتو لحقيقية مادكروهاش لمؤرخين.
سّمية پوبليوس تيرينتيوس تسمات عليه حيت كان تباع ك عبد ؤ شراه سيناتور روماني سميتو پوبليوس تيرينتيوس لوكانوس. هاد لأخير فاش شاف لقدرات لإبداعية ديالو حررو، ؤ عطاه صلاحيات باش يتلاقا معا شخصيات مهمة ف روما، بحال لجنرال ڭايوس لايليوس، ؤ لجنرال سكيپيو لإفريقي لأصغر.
لكتابات لمسرحية ديالو أترات بشكل كبير علا لأدب ف ؤروپا ف عصر نّهضة، خصوصا ف فرانسا ؤ نّڭليز.

تيرينتيوس ستلهم من لأدب ليوناني باش يوصف لحياة ليومية ديال نّاس د روما بشكل ساخر. من بين لأعمال ديالو يالله 6 لّي بقاو حتال دابا، هوما

من لمقولات لمشهورة ديالو:




#Article 554: دموع الغولة (مجموعة قصصية) (147 words)


دموع لغولة هي مجموعة ديال لقيصاص اللي كتبها لكاتب لمغريبي أحمد الدغرني فعام 1983.

بلعربية: “ووضعت الغولة ما تبقى لديها من حطب وازدادت إنارة المكان فرأت اليتيمين يعانق أحدهما للآخر، فصارت تندب وتمزق أثوابها وتنتف شعر رأسها، باكية، بينما تسرب لهيب النار إلى الغول الذي صرع واشتعلت ألسنة اللهب في شعر لحيته وامتدت إلى كل جسمه الذي احترق، وفقأت الغولة عينيها، وتاهت في الغابة تولول وتبكي إلى أن ماتت ندما على غلطتها، ونام الطفلان هادئين إلى الصباح...”

طرجامة بالدارجة: “وحطات لغولة داك الشوية اللي بقا ليها من لحطب وزاد الضو فديك لبلاصة، ديك الساع شافت دوك الجوج يتامى واحد كايعنق لاخر، على قبالت داكشي بدات كاتندب وتقطع فحوايجها وتنتف شعرها، ودازت لعافية للغول اللي تصدم وشعلات لعافية فلحيتو ودازت لداتو كاملها اللي من بعد تحرݣات، وتقبات لغولة عينيها، وتجلات فلغابة كاتبكي وكاتولول حتى ماتت وهي ندمانة على لافوط اللي دارت، ودوك الجوج دراري نعسو مرتاحين تالين الصباح...”




#Article 555: قتيلة د صامويل پاتي (174 words)


لقتيلة د صامويل پاتي، أستاد فرانساوي د تاريخ وجغارفية ف لكوليج، وقعات ف 16 أكتوبر ف كونفلان سانت أونورين، ضاحية د باريس. پاتي تقتل وتقطعلو راسو ب موس د 30 سانتيم ف إطار عملية إرهابية إسلامية. لبوليس تيراو ف لقاتل، عبد الله أنزوروف وقتلوه دقايق مورا لحادتة. دّافع ديال لقاتل كان هو بلي پاتي كان ورّا كاريكاتورات د محمد، نّبي د لإسلام، د شارلي إيبدو ف لقسم ف إطار كور د حرية تّعبير.

رّئيس د فرانسا إيمانويل مكاخون قال بلي لحادثة هي هجوم إرهابي إسلامي نمودجي، وبلي لمواطن ديالنا تقتل حيت كان كايقرّي دّراري صغار حرية تّعبير. هاد لقتيلة كانت وحدة من بزاف د لهجومات ف فرانسا ف هاد سّنين لأخيرة، وصنعات نقاش ف لمجتمع لفرنسي وف سياسة.

صامويل پاتي تزاد ف 1973. هو أستاد د تاريخ و جغرافيا والتربية لمدنية ف لكوليج بوا د أولن، جا ف كونفلان سانت أونورين ف فرانسا، واحد ضّاحية 30 كيلومتر شمال غرب باريس، لمدة خمس سنين. كان ساكن 10 دقايق من لكوليج، ف لمدينة صّغيرة إيغاني، فال دواز. كان مزوج وأب د دري صغير د خمس سنين.




#Article 556: عالم غامبول الواعر (181 words)


عالم غامبول الواعر (بلفرونسي: Le Monde Incroyable de Gumball) هو كرتون مريكاني بريطاني من تأليف بن بوكيليت. داز أول مرة فقناة كرتون نتورك ديال مريكان نهار 2 ماي 2011. و داز أول مرةبلعربية نهار 6 أكتوبر 2011. تصنف هاد البرنامج ب TV - Y7 (موجه للي عندو كثر من 7 سنين حيت فيه عنف خيالي).و تصنف PG - TV (ما مناسبش لقل من 10 سنين بلا توجيه من والديه) .

بعدما تنشأ استوديو كرتون نتورك ف ؤروپا عام 2007، توظف بن بوكيليت باش يعاون الناس ف انتاج المشاريع ديالهم ف الشبكة. ولكن، قرر الأستوديو يجعل غاع لمواظفين عندهم لأفكار ديالهم لخاصة، و يخد الشخصيات و يجمعهم ف سلسلة وحدا. دانيال لينارد، نائب ديال رئيس تنمية ف ميريكان تيرنر لبث، عجباتو الفكرة و عطاهم الضو الخضر لهاد السلسلة. و كان قدامو 20 ساعة و نص باش يكتب لحلقة للّولا من لموسم للّول، ولكن دار غير 18 حلقة، عاد دار الموسم الثاني ف 17 مارس 2011، و قرر يدير 20 حلقة فكل حلقة نص ساعة.

لاري هو لي خدام فكولشي. واخا هكاك حتا واحد ماعطاه أهمية و ذكرت لأهمية ديالو فبزاف د لحلقات.




#Article 557: لملك شكير (121 words)


لملك شكير (بتركية : Kral Şakir) هو مسلسل انميشن تركي من انتاج Grafi2000،خدم عليه فارول ياشارُغلو، برك توكاي و هلوك كان دزدارُغلو. كان أول عرض نهار 23 أبريل 2016 فقناة كرتون نتورك التركية و داز فقناة كرتون نتورك لعربية ف 2018 و كان فيه اختلاط بين بزاف د لهجات لعربيا .

لبرنامج كيهضر علا لمغامرات ديال شكير فمدينت لحيوانات، مع عائلتو و صحابو. هو أسد صغير و مو مشا. ختو كانان هي مشا بحال مها و عندها جدها سلحفا. و باهم سميتو رامزي و عندو صاحبو سميتو نيكاتي و هو فيل. هو ديما داخل دارهم، و ديما كيبقا ياكل و لعب، و هو حارس لمدرسة. كاين واحد لكلب سميتو تانجو ماعندوش دار، هو عايش غير فطارو د زبل و كايكل الزبل.




#Article 558: كرتون نتورك (728 words)


كرتون نتورك (بلونجلي: Cartoon Network) ، وهي شبكة تلفزيونية كبيرة، و كتدوز برامج كرتون ديال صغار و لكبار في غاع لعالم، و عندها كثر من 10 لغات، لي فيها لعربيا، تأست شركة فعام 1992 و لمقر ديالها كاين فأمريكا.

لقناة كدوز بزاف ديال مسلسلات انميشن من أكشن ل كوميديا. بدات السلسلة لأصلية لي نتجاتها لقناة ف عام 1994 مع Space Ghost Coast to Coast، و من بعد مسلسلات خرا بحال مختبر دكستر، كليو و شيكو، سي وياسيل، بنات لقوة،اد ادد و ادي، جوني برافو، كوردج لكلب لحمق، وقت لادفنتر، عالم غامبول لواعر ، روبوت بوي، لعم جدي، بن 10 و لعرض لعادي. ف عام 2009، ولات كدوز مسلسلات حركية حية، لي منهم أفلام وارنر بروس و نيو لاين سينما. من غشت 2013، ولات لقناة ف أكثر من 98،671،000 أسرة فميريكان (86.4 ٪ من الأسر لي عندهم تلفازة) .

فعام 1991، شرات شركة تيرنر استوديوات ديال هانا-باربيرا ب 320 مليون دولار. ف 18 فبراير 1992، تيرنر دارت اعلان بلي غادي تحل قناة جديدة سميتها

كرتون نتورك ف 1 أكتوبر 1992، و لي غادي تدوز لكرتون ل تيرنر3. أول بث كان فيه غير رسوم كاريكاتوري كلاسيكي لي نتجاتها وارنر بروس في لخمسينات من لقرن لي داز، و حلقات باباي ديال 1957، و رسوم ديال MGM، و رسوم هانا باربيرا 3. فلبدية، كانت لقناة ف نيويورك وفيلادلفيا وواشنطن وديترويت. أول حلقة دازت فقناة كرتون نتورك هي Rhapsody Rabbit من برنامج باغز باني 1946، مكانتش كرتون نتورك لوحيدا لكدوز رسوم فداك لوقت كانت حتى نيكلوديون لي بدات من ثمانينات. ف 11 غشت 1991، دوزات نيكلوديون ثلاثة رسومات ناجحين بزاف:Doug, Ren, Stimpy,Razmoket، لي بينات لأهمية ديال رسوم لكاريكاتوري فلقناة. ديزني و شركات لي تابعين ليها حيدو رسوم لكاريكاتوري شويا بشويا، بحال شبكة مريكان لي ولات كلها كارتون إكسبريس لي عندها شهرة كبيرة.

ف 1 أبريل 2000، طلقات كرتون نتورك قناة جديدة سميتها بوميرانغ (Boomerang)، هي قناة كدوز برامج قديما ديال ثمانينات. و من بعد طلقو Adult Swim مع حلقة من Home Movies ف 2 شتنبر 2001. كدوز لفقرة عشية كل سبت و كيعادو ليه كل خميس. Adult Swim كدوز حتا Harvey Birdman: Attorney at Law و Sealab 2021 و Aqua Teen Hunger Force. كرتون نتورك دارت أول فيلم ليها لي سميتو بنات لقوة (The Powerpuff Girls) ف 3 يوليوز 2002. نهار 14 يونيو 2004 مع 6 صباح، بدلات كرتون نتورك شعار ديالها و حيدات رسوم لكاريكاتوري لكلاسيكي و داتو ل قناة بوميرانغ (Boomerang). ف عام 2006 بدلات كرتون نتورك شعار ديالها لشعارCN ثلاثي لأبعاد.

ستقل جيم سامبل لمدير للول ديال لقناة، ف 1 شتنبر 2007، تغير شعار ديال لقناة، و تيم لموسيقي ديال لقناة ولا بأغنية Fall is Just Something That Grown-Ups لي داروها The Hives. من أكتوبر 2007، دوزات كرتون نتورك 40 حلقة من برنامج Fox Kids لي كيتسمى Goosebumps.

فعام 2006، حيدات لقناة بزاف ديال لبرامج لي كيرجع تاريخ ديالها ل تسعينات (مختبر دكستر ، وليه سوبرز ناناس ، و بزاف). ف 20 شتنبر 2008 احتفلت قناة Toonami ب 11 عام ديال لبث، و هي قناة تابعا لكرتون نتورك.

ف 29 ماي 2010 مع 6 صباح، تبدل شعار لقناة و دوزات رسومات جداد Code Lyoko و Regular Show و Sym-Biontic Titan و Ben 10: Ultimate Alien و Adventure Time و Generator Rex و Robotomie. ف 27 دجنبر 2010، ولات فقرة Adult Swim كتعرض ساعة فنهار، و كتبدا من 9:27 د لعشية. ف صيف 2010، دوزات لقناة جوج د لبرامج لجداد : كوردج لكلب لحمق و ولاد جيران، لي دازو فقناة بوميرانغ هو للول. ف أكتوبر 2010، رجعات لقناةبيلي و ماندي، لمغامرون لي مورا لبحر بعدما غابو على لقناة عماين. ف 8 نونبر 2010، رجعات لقناة مختبر دكستر بعدما داز ف بوميرانغ. ف 6 ديسمبر 2010، رجعات لقناة بنات لقوة بعد ربع سنين و نص ديال لغياب على لقناة. في عام 2011، دوزات لقناة برنامج عالم غامبول لواعر، دارت هاد سلسلة ضجة حيت هي أول رسوم أصلي أنتجوه كاملو ف استوديو Cartoon Network Europe.

ف 2012، دارت كرتون نتورك اعلان على لبرامج لجداد لي غادي يبداو فلقناة عام 2013 لي منهم انكل جراندبا، تين تايتنز زيدو، ستيفن يونيفرس (هو أول كرتون دارتو مراة)، أي هيرت تويسداي، كلارنس، تحديات صعيبة، غروجباند،بيوارد باتمان، توم و جيري شو، أساطير تشيما و بنات لقوة.

كرتون نتورك، من بديتها و هي تتحل فروع ديالها فبلدان خرين و ولاو عندها فروع بلغات مختلفة : كانادا ، العالم العربي ، شينوا ، الجاپون ، روسيا ، الطاليان ، فرانسا ، ألمانيا ، البرازيل ... واخا كان فلقمر لاصطناعي و لا من كابل. فأغلب لبلدان كرتون نتورك كتكون مدفوعة .




#Article 559: هشام أرازي (136 words)


هشام أرازي (تولد فالدار لبيضا ف 19 أكتوبر 1973) لعاب قديم ديال الطينيس مغريبي، كان كيتسمّا السحّار لمغريبي د الطينيس و لاّ السحّار د التيرانات حيت كانت عندو طريقة د اللعب فيها لفراجة بزاف.

بدا هشام أرازي لحتيراف ديال الطينيس ف 1993، و لكن ما تعرف مزيان تال 1997، ملّي ربح لبطولة د لحسن التاني فالدار لبيضا، و اللي كانت هي لبطولة لوحيدة اللي ربح ف لمسيرة لاحترافية ديالو. أحسن ترتيب كان عندو هو الترتيب 22 ف لعالم، و كان ف لعام 2001.

أرازي دار بزاف د النتائج مزيانة فأحسن لبطولات، و لعب جوج مرات ربع النهاية د رولان ڭاروس (1997، 1998) و جوج مرات الربع نهاية ديال بطولة أسطراليا (2000، 2004). أرازي ربح فلمسيرة ديالو بزاف د اللعّابة اللي كانو مرتبين هوما اللول ف لعالم، بحال روجي فيديرير و أوندي آڭاسي و خوان كارلوس فيريرو.




#Article 560: فجر (455 words)


لفجر (فلأرض) هو لوقت اللي كايبدا فيه الشفق قبل الطلوع دالشمس. كايتعرف الشفق فاش كايبان الشعة ديال الشمش بواحد الطريقة ماشي ديريكت وكايتشتت فلغلاف لجوي ديال لأرض، فاش الصونطر ديال لقرص دالشمش كايوصل ل18 درجة تحت لأفق ديال داك اللي كايشوف. هاد لفترة فالصباح كاتبقى حتال الطلوع دالشمس (لوقت اللي لفوݣ ديال لقرص دالشمس كايبان)، والضو اللي داي من الشمش ديريكت كايكون مجهد على الضو لمشتت فلجو.

لفجر كايبدا من مورا ماكايتشاف الضو اللول ديال الصباح وكايكمل حتى كاتبان الشمش فالسما. هاد الشفق ديال الصباح قبل طلوع الشمش كايتقسم لتلاتة ديال لفترات على حساب شحال ديال الضو دالشمس اللي كاين فالسما، واللي كايتحكم فيه الزاوية ديال لقرص دالشمس تحت لأفق فالصباح. هاد لفترات كايتسماو: لفجر لفلكي ولفجر لبحري ولفجر لمدني.

كايبدا لفجر لفلكي فاش الشمس كاتكون 18 درجة تحت لأفق فالصباح. هاداك هو اللي كايتسمى الضو اللول. هاد لفجر كايكمل حتى كاتوصل الشمس ل12 درجة تحت لأفق. فهاد لوقت غير شوية ديال ضو الشمس هو اللي كايضوي السما والنجوم لباهتة كاتبدا تغبر وماكاتبقاش تشاف. صعيب بزاف على لواحد يفرّق ما بين لفترة ديال الليل ولفجر لفلكي، وبزاف فلبلايص اللي فيهوم التلوت بالضو. لفجر لفلكي هو لبدية ديال الشفق لفلكي، هادا مكايساليش حتال لفجر لبحري.

كايبدا الشفق لمدني فاش كايكون الضو كافي باش أغلبية لحوايج يتشافو، نفس لحاجة للأنشطة فبرّا، ولاكين ماشي كولشي يقد إيبدا. كايبدا لفجر لمدني فالتعريف الرسمي فاش كاتكون الشمس بزاوية 6 درجات تحت لأفق. إلى كانت السما صافية، كاتكون السما فديك لوقيتة زرقة، وإلا كان فيها السحاب أولا الدحاس، إقدر إيكون اللون ديالها ليموني، صفر أولا لݣري. بعض النجوم أولا لكواكيب بحال الزهرة والمشتري يقدر إيتشافو بلعين فهاد لوقيتة. هاد لفجر كايتبعو الشفق لمدني اللي كايبقى حتال الطلوع ديال الشمس.

لمدة ديال الشفق (أولا لوقت مابين لفجر لفلكي والطلوع دالشمس) كايختالف بزاف مابين خط لعرض ديال اللي كايشوف: ما بين 70 دقيقة فخط ليستيواء وبزاف ديال السوايع فلمناطيق لقطبية.

لفترة ديال الشفق كاتكون قصيرة فخط ليستيواء فاش الشمس ديال ليعتيدال كاتطلع فالشرق نيشان وتاتغرب فلغرب نيشان وفواحد الزاوية قايمة على لأفق. كل فترة ديال لفجر (لفلكي، لبحري ولمدني) كاتكون فيها غير 24 دقيقة. فأي قنت فوق لأرض كايكون لفجر قصير فوقت ليعتيدال وطويل فوقت لينقيلاب.

كايولي وقت ضو النهار طويل كلما كايقرب لينقيلاب دالصيف، وكاتولي لمدة ديال الليل طويلة كلما كايقرب لينقيلاب دالشتا. هادشي كايكون عندو تأتير طويل على الطول ديال لفجر ؤلغسق. هاد التأتير كايبان مزيان فاش كايقرب لواحد للأقطاب اللي فيهوم كاتطلع الشمس فليعتيدال دالربيع وكاتغرب فليعتيدال دلخريف. لمدة ديال لفجر فهاد لبلايص تقدر توصل لبزاف ديال الصيمانات.

فلإسلام لفجر لفلكي كايتسمى لفجر لكداب بينما لفجر لبحري كايتسمى السحر أولا لاسحار أولا لفجر الصادق وهادا هو لوقت اللي كايصليو فيه لمسلمين لفجر أولا كايبداو فيه صيامهوم فرمضان. فلمسيحية لفجر اللول هو لوقت اللي كايقراو فيه الرهبان دلكنيسة لپرايم واللي هي الصلاة اللولة من سبعة دالصلوات اللي لمسيحي لكاتوليكي كايقراها فليوم.




#Article 561: تران لي مكايتسالاش (159 words)


تران لي مكايتسلاش (بلونجلي : Infinty Train) هو رسوم ميريكان ألفو أوين دينيس و هو كان خدم على برنامج لعرض لعادي على كرتون نتورك، دازت لحلقة تجريبية نهار 1 نونبر 2016 و بدا لبرنامج بعد ما حصلات لحلقة تجريبة على اعجاب كبير ف 5 غشت 2019 و حتال دابا يلاه عندو ثلاثا د لمواسم و سلسلة من لحلقات لقصار لبداو ف أواخر 2019.

لمسلسل كيهدر على قطار ما عندوش نهاية و لي كتمشي ل بلايص مسطحين مافيهم والو، كل موسم (فلبرنامج كيقولو كتاب) كيهدر على شخصيات مختالفة لي كيحاولو اهربو من لقطار، فلموسم للول كيهدر على بنت سميتها توليب لي كتحاول تهرب مع روبوت ديالها وان-وان و كلبها لي كيهدر اتيكوس، و فلموسم ثاني كيهدر على ام.تي مع صاحبها جيسي و جوج لغزلات لي كيسميوهوم آلان دراكولا.

فللول، حصل لبرنامج على دعم مادي للقصة و شخصيات و لأصوات، و فللول كان غادي اكون مسلسل قصير ولكن بعد ماسلا لموسم للول، اعلنو بلي هاد سلسلة مازال غادي تستمر فمواسم جداد.




#Article 562: شفق (801 words)


الشفق فلكوكب ديال لأرض هو الضو فالطبقات السفلانية ديال لجو فلوقت اللي الشمش مضرّݣة مورا لأفق وماكاتشافش بطريقة ديريكت. كايوقع الشفق فاش كاتضرب الشعة ديال الشمش الطبقات لفوقانيين ديال لجو وكاتشتت، وبهاكدا كايضوا لتحت ديال لجو وكايولي السطح ديال لرض مامضويش مزيان ومامضلّمش. لكلمة ديال الشفق كانسميوها حتى على لفترات ديال لوقت اللي كايطرا فيهوم هاد الضو.

كلما كانت الشمش بعد على لأفق كلما كان الضو باهت والضلمة كحلة، وبالتالي الشفق ماكايبانش. فاش كاتهبط الشمش لـ18 درجة تحت لأفق كايسالي الشفق وكايبدا الليل. عاوتاني فاش كاتطلع الشمش وكاتوصل ل18 درجة، كايسالي الليل وكايبدا الشفق ديال الصباح. لمصوّيرين كايعجبهوم لوقت ديال الشفق حيتاش كايبيّن لمجسمات أولا داكشي اللي بغاو إيصوروه بواحد الضو خافت، وكايسميو هاد لوقت بالساعة لحلوّة، أولا الرسامين اللي كايسميوها الساعة الزرقة واللي جات من لفرانساوية (l'heure bleue). هاد النوع ديال الشفق ماخاصوش يتخالط مع الشفق لقطبي اللي يمكن إيكونو عندو نفس لخاصيات فالليل فلخطوط ديال لعرض لعاليين.
 

كايتعرّف الشفق فلهنداسة على حساب لرتيفاع ديال الزاوية دالشمش (θs)، واللي هي لموقع ديال لمركز لهنداسي دلقرص دالشمش بالنسبة للأفق. كاينين تلاتة ديال لأنواع دالشفق واللي مقبولين بشكل كبير: الشفق لمدني (قريب من لأفق)، الشفق لبحري والشفق لفلكي (بعيد من لأفق).

تلاتة دلأنواع ديال الشفق هوما اللي معروفين ومقبولين بشكل كبير واللي هوما: الشفق لمدني (لمضوّي بيناتهوم) والشفق لبحري والشفق لفلكي (لمضلّم بيناتهوم).

الشفق لمدني هو لوقت اللي كاين ضو طبيعي كافي باش لأضواء الصيناعية (ديال الزنقة متلا) مايبقاش خدّام.
كايبدا الشفق لمدني ديال الصباح ملّي كايكون لمركز ديال لقرص دالشمش فستة ديال الدرجات تحت من لأفق وكايسالي مع الطلوع دالشمس. كايبدا الشفق لمدني ديال لعشية فاش كاتغرب الشمش وكايسالي ملّي كايكون لمركز ديال لقرص دالشمش فستة ديال الدرجات تحت من لأفق.

فاش كايكون لجو صافي ومزيان كايكون الشفق لمدني هو لحدّ اللي الضو ديال الشمس كايكون كافي باش لعين ديال بنادم تقدر تفرّق مابين لحوايج اللي فلأرض. الضو لكافي كايخلّي لبشري مامحتاجش للضو الصيناعي فبزاف ديال لانشيطة اللي كايدير. فلفجر لمدني ولغساق لمدني كايكون ضو الشمش طاغي فلأفق والنجوم ولكواكيب كايقدرو يبانو. الناس اللي كاتراقب السما تقدر تقشع الزهرة لكوكب المضوّي (نجمة الصباح أولا نجمة لعشية كيما كايتسمى) حيتاش كايقدرو يشوفوه فوقت الشفق لمدني، على حساب كيفاش كايتشاف من لأرض والضو اللي كايعكسو من الشمش.

كايبدا الشفق لبحري ديال الصباح ملّي كايكون لمركز ديال لقرص دالشمش ف12 ددرجة تحت من لأفق، وكايسالي ملّي كايكون لمركز ديال لقرص دالشمش فستة ديال الدرجات تحت لأفق. كايبدا الشفق لبحري ديال لعشية ملّي كايكون لمركز ديال لقرص دالشمش فستة ديال الدرجات تحت لأفق، وكايسالي ملّي كايكون لمركز ديال لقرص دالشمش ف12 ددرجة تحت من لأفق.

لفجر لبحري هو لوقيتة فاش كايكون لمركز ديال لقرص دالشمس ف12 درجة تحت لأفق فالصباح. كايجي قبل من هاد اللحضة لفترة ديال الشفق لفلكي ديال الصباح وكايتبعها الشفق لمدني دالصباح. لغساق لبحري هو لوقيتة فاش كايكون لمركز ديال لقرص دالشمس ف12 درجة تحت لأفق فلعشية. فهاد اللحضة كايسالي الشفق لمدني ديال لعشية وكايبدا الشفق لفلكي. البحّارة مايقدروش يبحرو جيهة لفق قبل من لفجر لبحري ومورا لغسق لبحري حيتاش الضو ماكايكونش كافي فالسما ولأفق ماكايبانش مزيان. كايكون صعيب بزاف أولا مستاحيل ݣاع على لعين دبنادم باش تشوف أولا تلقى آتار تاع الضو فالنقطة اللي كاتطلع أولا كاتغرب فيها الشمش. فهاد لحالة لبحّارة كايعتامدو على نجوم معروفين فلوقت ديال الشفق لبحري فاش يقدرو إيشوفو لأفق بطريقة باينة. فجو صافي ومزيان ؤواخّا ماكاينش ضو صيناعي لعين دبنادم تقدر يبان ليها لأجسام بطريقة مزيانة ولايني مايقدرش لواحد يدير أنشيطة على برّا.

كايبدا الشفق لفلكي ديال الصباح ملّي كايكون لمركز ديال لقرص دالشمش ف18 ددرجة تحت من لأفق، وكايسالي ملّي كايكون لمركز ديال لقرص دالشمش ف12 درجة تحت لأفق. كايبدا الشفق لفلكي ديال لعشية ملّي كايكون لمركز ديال لقرص دالشمش ف12 درجة تحت لأفق، وكايسالي ملّي كايكون لمركز ديال لقرص دالشمش ف18 درجة تحت لأفق.

لفجر لفلكي هو لوقيتة فاش كايكون لمركز ديال لقرص دالشمس ف18 درجة تحت لأفق فالصباح. كايجي قبل من هاد اللحضة لفترة دالليل وكايتبعها الشفق لبحري دالصباح. لغساق لفلكي هو لوقيتة فاش كايكون لمركز ديال لقرص دالشمس ف18 درجة تحت لأفق فلعشية. فهاد اللحضة كايسالي الشفق لفلكي ديال لعشية وكايبدا الليل. فبعض لبلايص (بعيد على التلوت ديال الضو، ضو لݣمرة أولا الشفق لقطبي ومصادير خرين ديال الضو)، واللي فيهوم كاتكون السما كحلة بالجهد باش يدّارو لملاحضات ولمشاهادات لفلكية، لعولاما ديال لفلك كايقدرو يرصدو لماصير النقطية ديال الضو بحال النجوم أولا لكواكيب قبل وفالشفق لفلكي دلعشية ؤفالشفق لفلكي دالصباح ومن بعدو. واخا هاكاك لأجسام لفلكية لباهتة بحال لمجرات كايخصها ضلام زايد باش تشاف، داكشي لاش الرصد ديالها كايتدار بالليل. نضريا النجوم لباهتة كاتولي تبان من مورا ماكايسالي لغساق لفلكي دلعشية وكايولي مستحيل تشاف من مورا ماكايسالي لفجر لفلكي دالصباح.

فبعض لبلايص الشفق لفلكي كايكون ماباينش مع الليل بسباب التلوت الضوئي، بزاف ديال الناس غادي يحساب ليهوم السما مضلمة بحال الليل إلا تسولو فلعشية واخّا سالا الشفق لفلكي أولا فالصباح ؤواخّا بدا الشفق لفلكي. بسباب هاد التلوت الناس اللي فالتجمعات لكبيرة ديال السكان أولا فلمدون لكبار ماكاتّاحش ليهوم لفرصة باش إيشوفو النجوم لباهتين، خلّي يادلّي يشوفو السما مضلمة بزاف كيما هي على طبيعتها.




#Article 563: يونس لعيناوي (120 words)


يونس لعيناوي (تولد ف الرباط نهار 12 شتنبر 1972) لعّاب مغريبي قديم ديال الطينيس حتارف هاد الرياضة ف 1990 و عتازل ف 2017. ربح لعيناوي ف لمسيرة ديالو 5 د لبطولات احترافية (آ طي پّي) و أحسن ترتيب وصل ليه كان هو 14 ف لعالم، ف مارس 2003.

أحسن النتائج اللي دار يونس لعيناوي ف لبطولات ديال ڭرون شليم هي ربع النهاية، و وصل ليها جوج مرات ف لبطولة د أسطراليا لمحلولة (2000، 2003) و جوج مرات ف لبطولة د ميريكان لمحلولة (2002، 2003).

لعيناوي تعرف بزاف من مورا لماتش ديال ربع النهاية د لبطولة د أسطراليا لمحلولة، ضد لميريكاني آندي روديك، اللي كان واحد من أطول لماتشات د الطينيس ف التاريخ، و ربح فيه روديك السيط لخامس ب 21-19.




#Article 564: منضمة التعاون لإسلامي (106 words)


لمنضمة د التعاون لإسلامي ، و اللي كانت تاتعرف قبل ب منضمة لمؤتمر لإسلامي هي منضمة إسلامية عالمية تأسسات ف 1969 تاتجمع 57 دولة مسلمة ف لعالم. تاتوصف لمنضمة راسها باللي هي الصوت الجماعي د لعالم لإسلامي و باللي تاتهدف باش تحمي لمصالح لحيوية ديال لمسلمين. منضمة التعاون لإسلامي عندها عضوية دايمة ف لأمم لمتحدة.

تأسسات لمنضمة د التعاون لإسلامي ف الرباط نهار 25 شتنبر 1969، و تجمعوا فيها الزعما ديال لعالم لإسلامي من مورا ما تّحرق الجامع لأقصى ف 21 غشت 1969. لمقر ديال لمنضمة كاين دابا ف جدة ف السعودية، ولكن لميثاق ديال لمنضمة تيقول باللي لمقر غادي يولّي ق لقدس نهار غادي تتحرر.




#Article 565: ديسي سوبر هيرو غيرلز (199 words)


ديسي سوبر هيرو غيرلز (بلونجلي : DC Super Hero Girls) هو مسلسل انميشن لي ألفاتو لورن فوست (Lauren Faust) هي نفسها لي خدمات على دار فوستر، بنات لقوة، ولاد جيران و ماي ليتل بوني. لبرنامج هو تطوير و ريبوت ل ديسي سوبر هيرو غيرلز (2015) لي نتجو وارنر بروس. أول مرا داز لبرنامج فتلفازا نهار 8 مارس 2019 فقناة كرتون نتورك ديال ميريكان.

كيهدر لمسلسل علا مغامرات ستات لبنات مراهقات ف ثانوية متروبوليس : بايلي جوردون ، ديانا برينس ، زي زاتارا ، جيسيكا كروز ، كارين بيتشر وكارا دانفرز. لخصوصيا ديالهم؟ عندهم كاملين هوية سرية ليهيا أبطال خارقين : باتجيرل ، ووندر ومان ، وزاتانا ، وجرين لانترن ، وبامبل بي ، وسوبر جيرل.

أول حلقة خرجات سميتها #TheLateBatsby صدر هاد لفيلم لقصير مع فيلم تين تايتنز زيدو : لفيلم فنفس لوقت .

كاينين حتال دابا 52 حلقة ديال 11 دقيقا

هضرات ناتيلي وبتزيج، مخرجة ديسي سوبر هيرو غيرلز، علا لموسم ثاني فمقابلة ف حفلة توزيع جوائز Annie لعام 2020. و من بعد غالت بلي هي كانت غير كتهضر علا نصف ثاني من لموسم للول، لحلقات من 27 تال 52. اما لمنتجة تنفيذية أماندا ريندا بلي راه فلموسم ثاني غادي اكون فيه أشرار جداد و قصة جديدة !




#Article 566: منضمة التعاون د شانڭاي (186 words)


لمنضمة د التعاون د شانڭاي هي منضمة دولية سياسية و قتصادية و أمنية تأسسات نهار 15 يونيو 2001 ف شانڭاي من 6 د لبلدان هي الشينوا و كازاخستان و كيرڭيستان و روسيا و طادجيكيستان و أوزباكستان. هاد لبلدان كاملة من غير أوزباكستان كانت داخلة مع مجموعة شانڭاي لخماسية اللي تأسسات ف 26 أبريل 1996 ف شانڭاي نيت.

من 2001 ل دابا، تزادو جوج بلدان للمنضمة د التعاون د شانڭاي، هوما لهند و پاكيستان، و اللي ولات عندهم عضوية كاملة من مورا لقمة ديال أسطانا ف 9 يونيو 2017. هادشي خلا عدد لأعضاء ديال لمنضمة يكونو 8 ف لمجموع.

تاتقول لمنضمة د التعاون د شانڭاي باللي تأسسات باش تحسّن الجورة ما بين لبلدان لأعضاء فيها، و تحارب لإرهاب الجريمة و لمخدرات و لحركات د لإنفصال و التطرف. تاتقول حتا باللي لهدف ديالها هو تزيد لمعاونة فالسياسة و التجارة و لقتيصاد و التعليم وجماية لبيئة، و تزيد من لأمن و السلام فلمنطقة اللي فيها لأعضاء ديالها. الناس اللي كينتاقدو لمنضمة د التعاون د شانڭاي كيقولو عليها باللي تأسسات باش لأعضاء ديالها يتحاماو و يدافعو على بعضياتهم من لنتقادات الدولية اللي تقدر تكون ضدهم ف لمجال ديال حقوق لإنسان.




#Article 567: غاز نبيل (121 words)


لغازات نّبيلة (ب نڭليزية Noble gases) هيّا نوع ديال لعناصر لكيماوية كتكون ف ضّروف لعادية ديال لحرارة ؤ ضّغط علا شكل غاز ماعندوش ريحة ؤ عندو تفاعلية ضعيفة بزاف. كاينين ستة ديال لغازات نّبيلة لّي موجودة ف طّبيعة، هيّا لهيليوم، نّيون، لارڭون، لكريپتون، لݣزينون، ؤ رّادون. لوڭانيسون لّي هوّا عنصر كيماوي صطيناعي ب نمرة درية كتساوي 118، متوقع أنه يكون حتا هوّا يكون غاز نبيل، مي باقين لخاصيات لكيماوية ديالو ما تدرسوش مزيان. كاين حتيمال أن لمفعولات رّيلاتيڤية تعطي ل هاد لعنصر خاصيات مختالفة علا لخاصيات ديال غاز نبيل.

تاريخيا، لڭازات نّبيلة كانو كيتسماو أيضا لڭازات سّاقلة ولاكين هاد لستيعمال ولّا تعمم باش يشمل حتا لڭازات لّي مركبة ؤلا لّي ماكاتفاعلش تحت ضروف محددة، ماشي غير لعناصر سّاسية ؤلا لغازات نّبيلة.




#Article 568: ناطو (120 words)


لحلف د الشمال د لأطلسي ولاّ الناطو ( بلفرانساوية: Organisation du traité de l'Atlantique nord - OTAN - بلينڭليزية: North Atlantic Treaty Organization - NATO) هو منضمة عسكرية دولية تأسسات ف 1949 من مورا لمعاهدة د شمال لأطلسي اللي تسينات ف واشينطون.

الناطو داخلة فيه 30 بلاد من أوروپا و أمريكا الشمالية، و عاد فيه 21 بلاد اللي داخلة مع برنامج الشراكة للسلام، اللي تا هو تابع للحلف. الناطو تأسس باش لأعضاء اللي فيه تدافع على بعضياتها إلا شي وحدا فيها جاها شي هجوم. تلاتة من لأعضاء ديال الناطو (لميريكان، فرانسا و لمملكة لمتحدة) هوما أعضاء دايمين ف مجلس لأمن د لأمم لمتحدة و عندهم حق لڤيطو، و عندهم تا السلاح النووي.

لمقر ديال الناطو جا ف بريكسيل ف بلجيكا.




#Article 569: حنا دببة (237 words)


حنا دببة (بلونجلي : We Bare Bears) هو مسلسل روسوم ديال ميريكان الي أنتجاتو كرتون نتورك و بدا ف 27 يوليوز 2015 على كرتون نتورك ديال ميريكان و سالا ف 7 شتنبر 2020 بعد ما داز لفيلم ديالو ف 30 يونيو 2020 . لمسلسل كيهدر على ثلاثا ديال دببة كيعيشو مع لبشر فمدينت سان فرانسيسكو ف كاليفورنيا و كيدوزو فمغامرات و تجارب جديدا . لملسلسل فيه 4 لمواسم و 140 حلقة

ف 30 ماي 2019، كرتون نتورك دارت اعلان على فيلم حنا الدببة لي غادي صدر ف لمنتصف ديال لعام 2020 و بلي غادي تكون واحد سلسلة جديد سميتها حنا دببة صغار (We Baby Bears) لي غادي تهضر على دببة ثلاثا ملي كانو صغار و حتال دابا مازال كتنتج و غادي يصدر ف ربيع ديال عام 2021. و من بعد صدر لفيلم ديال حنا دببة ف 30 يونيو 2020 و ف كرتون نتورك ف 7 شتنبر 2020، و هي بمثابة للخر ديال لمسلسل .

كيهضر لمسلسل على ثلاثة دببة صحاب لدرجة أخوة : غريزلي (باندا كيقول ليه غريز)، باندا (كلشي كيقول ليه بان-بان) و دب ثلج. كتحاول دببة يندامجو مع الناس، بحال ياكلو ماكلتهم و يتصاحبو مع ناس يشريين و يكونو مشهورين فلانترنيت، و ديما كتشارك دببة فمغامرات مع صحابهم بحال، طفل لمعجزا كلو بارك، بيغ فوت تشارلي، مشهور لأنترنيت كوالا نام نام، لحارسا ديال لغابة تيبس، و لبائعا لوسي. و فبعض لحلقات كتكون فلاش باك ملي كانو صغار و هوما كيقلبو على دار فين اسكنو .




#Article 570: التورة الروسية (139 words)


التورة الروسية ولاّ التورة لبولشوڤية (بالروسية: русская революция)، هي واحد السلسلة ديال لأحدات السياسية و لإجتماعية اللي وقعات فلإمبراطورية د روسيا ما بين 1917 و 1923. أترات التورة د روسيا بزاف ف لعالم ف لقرن 20، و كانت من النتائج ديالها باللي طاحت لإمبراطورية د روسيا و معاها التسار نيكولا التاني، و تأسس لإتحاد السوڤياتي، اللي كان أول واحد حكمو هو ڤلاديمير لينين، و كان مطبّق نضام د لحكيم شيوعي.

التورة الروسية بدات فاللخر د لحرب لعالمية اللولا، علاود لمشاكيل بزاف اللي كانو ف روسيا، منها لقمع د السلطة، و لفقر، و لخسارة د لحرب، اللي خلات الشعب ينوض ينتافض، حتا وصلات لبلاد للحرب لأهلية، ما بين لقوات د التورة (لبولشيڤيك - ولا لجيش لحمر) و لجيش لبيض و قوات آخرا اللي كانت ضد الشيوعية. من مورا لحرب ربح لجيش لحمر و تأسس لإتحاد السوڤياتي، اللي بقا تال 1991.




#Article 571: التورة لفرانساوية (155 words)


التورة لفرانساوية (ب لفرانساوية: Révolution française) هي واحد لوقيتة ف التاريخ ديال فرانسا (بدات ف ماي 1789 و سالات ف نونبر 1799) اللي أترات بزاف ف لبلاد مبعد و كانو عليها نتائج كبار لا على فرانسا و لا على لعالم. من أهم النتائج ديال هاد التورة هي باللي ما بقاتش لملكية لمطلقة (تعدم لماليك لويس 16 ف 1793) و ولاّت فرانسا جمهورية علمانية. التورة لفرانساوية سالات ف 1799 ملّي ناپوليون بوناپارت حكم فرانسا و ردّها إمبراطورية عسكرية.

التورة لفرانساوية كانو عندها بزاف د لأسباب ولكن لأغلبية د لمؤرخين متافقين باللي جات حيت فرانسا ديك لوقت كان فيها لفساد و لإستبداد و التفاوت الطبقي و لمشاكل ديال لقتيصاد اللي ماقدراتش الدولة تصلحها.

من أهم لأحدات د التورة لفرانساوية هو ملّي دخلو الناس للحبس ديال لباستيي و خرّجو منو لحبّاسا اللي كانو فيه. هاد لحدت بيّن لانهيار ديال الدولة و كان الشرارة ديال التورة. موراه بشهر تدار لإعلان ديال حقوق لإنسان و لمواطن و حبس النضام لفيودالي.




#Article 572: لإتحاد السوڤياتي (179 words)


لإتحاد د لجمهوريات السوڤياتية لإشتراكية، اللي معروف تا ب لإتحاد السوڤياتي (ب الروسية: Союз Советских Социалистических Республик - CCCP) كانت دولة شيوعية قديمة ف لمنطقة د أوراسيا، بقات من 1922 تال 1991. لعاصمة د لإتحاد السوڤياتي كانت هي موسكو، واللي كانت تا لعاصمة د أكبر جمهورية فيه، لجمهورية السوڤياتية د روسيا. لإتحاد السوڤياتي كان أكبر بلاد ف لعالم و مقسوم على 11 نطاق ديال لوقت.

تأسس لإتحاد السوڤياتي من مورا التورة الروسية، اللي طيّحو فيها لبولشوڤيك (اللي كان الشاف ديالهم ڤلاديمير لينين) لحكومة لمؤقتة و النظام لملكي اللي كان فلإمبراطورية د روسيا. ملّي ربحو لبولشوڤيك لحرب لأهلية ف روسيا أسسوا لجمهورية السوڤياتية د روسيا و موراها بداو تيدخّلو جمهوريات آخرا للإتحاد. ف 1922 كانو 4 د لجمهوريات ف لإتحاد السوڤياتي (روسيا، أوكرانيا، بيلاروسيا و لقوقاز)، و بقا تيتوسع كتر كتيرشي ف لوقت ديال سطالين. ف 1956، كان لإتحاد السوڤياتي قيه 15 لجمهورية.

من 1945 ل 1991 كان لإتحاد السوڤياتي هو اللي منافس لميريكان على شكون أتكون أقوى بلاد ف لعالم، لا من الناحية د ليقتيصاد ولا النووي ولا لعلم وحتى الرياضة بحال لألعاب لأولمپية و لا لبطولات د لعالم.




#Article 573: قصبة أكادير أوفلا (125 words)


قصبة أڭادير أوفلا هي معلمة تاريخية كاينة في مدينة أڭادير كانت فيها المدينة القديمة. او هي الاصل والبداية ديال مدينة أكادير، جزء كبير منها تخرب بسبب الزلزال ديال 1960 لي ضرب لمدينة.

سمية قصبة أكادير المحلية هي أكادير أوفلا. كلمة أكادير كاتعني بالأمازيغية حصن وأوفلا كاتعني الفوق. هذا علاش التسمية كاتشير للحصن الموجود فوق الجبل.

تأسست قصبة أڭادير أوفلا عام 1540م على يد السلطان محمد الشيخ السعدي بغرض التحكم في ضرب البرتغاليين اللي إستقروا تحت الجبل عام 1470 م فاش كانو تايقلبو عن طريق للهند، بناو فالساحل قرب عين فونتي حصن، أو بناو على سفح الجبل برج آخر باش يحضيوه، الشيئ لي دفع السعديين يبنيو قصبة على قمة نفس الجبل.

تبنات القصبة بشكل أساسي لأسباب عسكرية باش تحمي لمدينة والمرسة ديالها من الهجومات الأجنبية المحتملة.




#Article 574: تيليفون (122 words)


التيليفون ولاّ لهاتف، هو واحد لماكينة كاتتخدّم باش تدوّز الصوت نيشان مابين جوج د الناس ولا كتر ماشي فنفس لبلاصة ويقدرو يهضرو مع بعضياتهم بحالا ڭالسين مجموعين. أول تيليفون تّختارع ف 1854 من الطالياني أنطونيو ميوتشي، ولكن ما تسجّلش لختيراع بسميتو، و خدا منو لميريكاني آليكساندر ڭراهام بيل لفكرة و سجّلها بسميتو ف 1876 كبراءة ختراع ف لميريكان و تعرف رسميّا باللي هو اللي ختارع التيليفون.

لحوايج لمهمّّة ف التيليفون هوما لميكروفون (اللي تيهضر بيه لواحد) و السمّاعات (اللي تيسمع منّهم)، و هوما بجوج اللي تيدوّزو الصوت د الناس من بلاصة لخرا. لأغلبية د التيليفونات فيها حوايج زايدة بحال السرسار اللي تاتعرف بيه باللي شي واحد دوّرليك. التليفونات الجداد عاد فيهم حوايج كتر بحال الساعة ولمصوّرة و لانترنيت و تيتسمّاو تيليفونات مطوّرة.




#Article 575: تلفازة (145 words)


التلفازة ولاّ الطيليڤيزيون هي واحد لماكينة اللي تاتورّي الصوت و التصويرة ف دقّة وحدا، يا إما بلكحل و لبيض، ولاّ باللّوان. التلفازة خدات بلاصة كبيرة ف لعيشة د بنادم فالنص التاني د لقرن لعشرين، و كانت وسيلة مهمة باش تدوز فيها لخبار بالزربة. التلفازة كيدوزو فيها بزاف د لأنواع د لحوايج على حساب لقناة و لوقت، و تقدر تكون حاجة إخبارية، و لاّ ترفيهية بحال لأفلام و لا لموسيقا.

أول تلفازة ف لعالم ختارعا الصكوطلاندي جون بيرد نهار 26 يناير 1926 و كانت خدّامة بلأشعة تحت لحمرا. تطوّرات بزاف التلفازة من داك لوقت و تزادو بزاف د لقنوات ف لعالم كلّو. أول قناة د التلفازة ف لمغريب تدارت وقت ليستيعمار لفرانساوي و بقات عام (من 28 فبراير 1954 ل 20 ماي 1955) و كان سميتها تيلما. أقدم قناة باقا خدّامة ف لمغريب هي لقناة اللّولا، و اللي بدات 6 سنين مورا لإستقلال ( ف 1962).




#Article 576: شروق (371 words)


الشروق أولا الطلوع ديال الشمش هو لوقيتة اللي الطرف لفوقاني ديال الضوّيرة دالشمش كاتبان فالصباح فوق لأفق ديال داك اللي كايشوف فيه. لكلمة تقدر تعني لعملية كاملها ديال لعبور دلقرص ديال الشمش لفوق لأفق زيادة على التأتيرات لجوية اللي كاتبع لهاد الضاهيرة.

لحركة ديال لأرض هي اللي كاتخلي الضاهيرة ديال الشروق تطرى واخّا كايبان بلّي الشمش هي اللي كاتحرك وكاتطلع فلأفق. لوهم ديال الشمش اللي كاتحرك جاي من لمرجع ديال الشوف (فهاد لحالة لأرض اللي كاتدور على راسها). هاد لحركة لوهمية ديال الشمش كانت مقنعة لبزّاف ديال الناس وخلات بزّاف ديال التقافات تكون عندها ميطولوجيات وخرايف وحكايات مبنية على نمودج ديال لأرض اللي لوسط والشمش هي اللي كاتدور عليها، حتى جا نيكولاس كوپيرنيكوس فلقرن 16 وبدّل هاد لقضية لنمودج اللي الشمش فيه هي اللي فلوسط.

الشروق فالتعريف لفلكي كايطرا فواحد اللحضة اللي فيها لفوق ديال لقرص دالشمش كايكون مماس للأفق. لكلمة ديال الشروق واخّا هاكاك كاتعني عند الناس لفترة قبل وبعد هاد اللحضة:

الشروق كايطرا فلحقيقة قبل ماتوصل الشمس للأفق حيتاش لغلاف لجوي ديال لأرض كايهرّس الصورة ديال الشمش فلجو. لمعدال ديال التهراس هو 34 دقيقة قوسية فالسما، واخا هاد لقياس كايتبدل على حساب الضروف دلجو.

لوقيتة ديال الشروق كاتبدل على حساب لوقت من لعام وحتى لموقع ديال اللي كايشوف فوق لأرض (خط الطول، خط لعرض ولعلو)، زيادة على التوقيت. هاد التغيرات سبابها هو لمحور اللي كاتدور عليه لأرض، الدوران ليومي ديال لكوكب على راسو وعلى الشمش ولبلاصة ديال لقمر ولأرض والدوران على بعضياتهم.

فاللخر ديال الشتا ولبدية ديال الربيع كايتشاف الشروق فخطوط لعرض لوسطانية (مابين 30° و50°) كل نهار مبكر على اللي قبل منو حتال شي يامات قبل لينقيلاب دالصيف (غالبا نهار 20 يونيو فالشمال دلأرض و21 دجنبر فلجانوب ديالها)، والتاريخ لمضبوط ديال هاد لحدت كايكون على حساب خط لعرض. من مورا هاد التاريخ كايبدا الشروق يجي معطل نهار مورا خوه حتال لينقيلاب ديال الشتا (غالبا نهار 21 دجنبر فالشمال دلأرض و20 يونيو فلجانوب ديالها). التغيرات فالتهراس اللي كايديرو لجو كايبدلو لوقت ديال الشروق حيتاش كايتبدل لبلاصة اللي كاتشاف كاتطلع منها.

إلا تجاهلنا التأتير ديال التهراس دالتصويرة ديال الشمش بسباب لجو وبلّي الشمش ماشي نقطة فالسما، فراه ديما الشروق فلبلايص مابين 30° و50° كايتشاف فجيهة الشمال الشرقي ما بين أبريل وغشت، وفجيهة لجانوب الشرقي مابين أكتوبر وفبراير. الشروق كايتشاف فالشرق غير فالشهورة ديال مارس وشتنبر لݣاع الناس فوق لكرة لأرضية.




#Article 577: قصبة ڭناوة (159 words)


قصبة ڭناوة ولا لقصبة لإسماعيلية ولاّ قصبة لحريشي، هي قصبة جات ف سلا، و هي لقصبة لوحيدة اللي جات ف الجيهة الشمالية د لواد د بورڭراڭ.

تبنات لقصبة د ڭناوة ف وقت السلطان مولاي سماعيل ف 1709، و تمّا فين كانو ساكنين لعبيد اللي كان كيخدّمهم للحرب (اللي كانت سميتهم عبيد لبخاري) و باش يدافعو على سلا و الرباط من لهجومات اللي كاتجي من لخاريج. لقصبة كان فيها جامع و دار لقايد و لبلايص فين تيسكنو لعسكر.

تنسات لقصبة لواحد لوقت، و ماعاود بانت تا بدا لإستعمار لفرانساوي، فين بدات كاتخدّم باش يڭلسو فيها لعسكر لمغاربة اللي شاركو ف لحرب لعالمية اللّولا، و لعسكر لفرانساويين اللي كانو كيمشيو منها باش يهاجمو على لمنطقة د لغرب.

تقيدات قصبة ڭناوة ف اللائحة د لمعالم لوطنية د لمغريب ف 1948 ب ظهير.

دابا كاينة ف قصبة ڭناوة مدرسة وطنية د السيرك سميتها مدرسة شمسي، اللي هي لمدرسة د السيرك لوحيدة ف إفريقيا، و تيتنضّم فيها لمهرجان ديال قراصنة اللي بدا ف 2006.




#Article 578: صباح (وقت) (310 words)


الصباح أولا النبّوري هو وقت ديال ليوم اللي كايشد من الشروق حتال الضهر. ماكاينش وقت محدد لفوقاش كايبدا الصباح (نفس لحاجة لعشية أولا الليل)، حيتاش هاد التعريف كايختالف على حساب كيفاش كولا واحد عايش حياتو وشحال دالساعات ديال ضو النهار كاينين فليوم لكولّا وقيتة فلعام. واخا هاكاك الصباح كايسالي إلزاميا وقت الضهر، ومن تما كاتبدا لفترة ديال مورا الضهر. كاينة ناس خرا كاتعرف الصباح بلّي كايبدا من وسط الليل وكايسالي فالضهر. الصباح كايسبق مورا الضهر، لعشية والليل فالتسلسول ديال ليوم، وفلأصل هاد لكلمة كاتعني الشروق.

بعض اللوغات اللي كاتخدّم لوقت ديال النهار فالسلام ديالها عندها تحيّة خاصة ديال الصباح، بحال فلعربية (صباح الخير) أولا النڭليزية (Good morning). كايعتماد لوقت اللي كايكون مناسب باش تعطى فيه هاد التحية على التقافة ديال لواحد وكيفاش كاتحدد الصباح أولا لمفهوم اللي عند لواحد على الصباح. ليستيعمال ديال لعيبارة دصباح لخير فالدارجة كايكون واسع شي شوية، على حساب إمتا فاق داك اللي ݣالها. كقاعيدة شاملة الناس كاتݣول صباح لخير مابين التلاتة دالصباح والطناش دالنهار. الناس وخصوصا الشباب ولّاو كايݣولو صباحو عوض صباح لخير. يمكن للتحية دالصباح تعطى بواحد الطريقة محتارمة بحال الشكل ديال صباح لخير السي/لالة فلان(ة) أولا مسعد الصباح السي/لالة فلان(ة).

لأنشيطة ديال الصباح غالبا كايكون فيها الدوش، لفطور (فبعض لمناطيق كايكون حتى لفطور التاني، بزاف فلبادية) واللباس. بعض الناس كايخططو للنهار ديالهوم، كايتريضو أولا كايقراو الجرنان دالصباح.

الصباح عند بعض الناس هو لوقت اللي كايجي من مورا لفياق ديالهوم، فأي وقت ماكايهمش. لمعنى ديال لكلمة دالصباح جاي من لينتيشار لكبير ديال التريسينتي والضو، وليستيقلال ديال الناس على الضو الطبيعي ديال الشمش.

بنادم فالصباح كايقدر يكون إما مجهد وناشط أولا عيّان ومهلوك. هاد لقدرة ديال لواحد باش إيفيق ناشط إقدر يكون كايأتر فيها واحد لجين سميتو پيريود 3 (Period 3). هاد لجين كايجي فجوج شكال: إما طويل أولا قصير. هاد لجين كايأتر على واش الناس كاتبغي الصباح أولا لعشية. الناس اللي عندهوم الشكل الطويل كايعجبهوم الصباح. أما هادوك اللي عندهوم النوع لقصير كايفضلو لعشية.




#Article 579: لمدراسة لمرينية (سلا) (125 words)


لمدراسة لمرينية د سلا، و لاّ لمدراسة د أبو لحسن لمريني، و لاّ لمدراسة د الطالعة هي مدراسة كاينة ف سلا أسسها السلطان أبو لحسن لمريني ف عام 1341.

كانت لمدراسة تاتقرّي لفقه و لآداب و اللغة لعربية و لفلسفة و الطب و شي صنعات. دازو منها بزاف د لعلما و الشيوخ بحال لسان الدين بن لخطيب و عبد الله مغيت و أحمد بنعاشر. لمدراسة لمرينية صغيرة فلمساحة، فيها غي 180 ميطرو، و لكن واحد لوقت كانو تيقرّيو فيها 100 أستاد دقّة وحدا.

حافضات لمدراسة لمرينية على لأصالة ديالها و تدارو عليها بزّاف د الترميمات و لإصلاحات ف وقت لإستعمار و مورا لإستقلال. دابا ما بقاتش لقراية ف لمدراسة لمرينية، اللي ولاّت متحف و أي واحد يقدر يدخل ليه (تمن الدخلة هو 10 د الدراهم).




#Article 580: لمارستان لقديم (سلا) (158 words)


لمارستان لقديم د سلا، و لاّ لمدراسة لبوعنانية، اللي معروف تا بفندف أسكور، ولاّ دار لقاضي، كانت مدرسة طبيّة ف سلا ف لمغريب. تبنا لمارستان ف وقت لمرينيين ف لوسط د لقرن 14، و كان واجد ف 1345. فاللول ملّي تبنا لمارستان كان مدراسة دينية، و موراها مارستان، و مبعد فندق، و ف اللّخر ولاّ متحف د لموسيقا التقليدية. لمارستان داخل فاللائحة ديال الترات لوطني ديال لمغريب بظهير ديال 2 دجنبر 1924.

لأصل ديال لكلمة د مارستان هي من لفارسية، و تاتعني السبيطار.

تبنا لمارستان ديال سلا ف وقت السلطان لمريني بوعنان فارس (و عليها تيتسمّا تا لمدراسة لبوعنانية)، و كمل لبني ديالو ف وقت ولدو أبو لحسن بن عتمان ف 1345. لمارستان، مع الجامع لكبير و لمدراسة لمرينية، غادي يردّو سلا مركز تقافي كانو تيجيولو لعولما من لأندلس و من الشرق.

من مورا ما طاحت الدولة لمرينية ولاّ لمارستان فندق (كانت سميتو أسكور)، و من بعد محكمة شرعية ف لوقت د الربعينيات، و عليها تسمّا دار لقاضي.




#Article 581: لقواس د سلا (156 words)


لقواس د سلا، اللي معروفين تا ب السور د لقواس، ولاّ لقواس هو واحد السّور تاريخي كاين ف لمدينة د سلا. تبنا السور د لقواس ف لوقت د لموحدين ما بين 1130 و 1269، قبل ما يتعاود يتقاد ف وقت السلطان أبو لحسن لمريني ف 1333، و كان الطول ديالو كامل هو 14 كيلوميطر.

السور د لقواس كيتعتابر حالة خاصة ما بين لسوار ديال سلا و تا ديال لمغريب، حيت هو ماشي سور عادي، و إنما تبنا باش يبقا يدوّز لما من لغابة د لمعمورة تال باب شعفة ف لمدينة لقديمة، و من بعد كان تيتفرق لما على لمدينة كلها بواحد الشيكة د لمجاري تحت لأرض.

تبنا السور د لقواس ما بين لعوامات د 1130 و 1269 باش يجيب لما لسلا من لغابة د لمعمورة. ف ديك لوقت كان هاداك النوع د لبني جديد و متطور، و كان تيبيّن شحال الدولة كانت قوية و متطورة.

ف التاريخ ديالو، تصلح السور د لقواس بزاف د لمرات، منها:




#Article 582: تأمين معبر لڭرڭرات 2020 (730 words)


دارت لمملكة لمغربية صباح د نهار جمعة 13 نونبر 2020 تدخل عسكري بدون نية قتالية وبشكل سلمي فمنطقة الكركرات بهدف تطهيرها من ميليشيات البوليساريو وفتح الطريق أمام عبور المدنيين بين المغرب وموريتانيا بعد إغلاقها لمدة 15 يوم من طرف البوليساريو.

جات هاد لعملية بعدما خرج بلاغ د وزارة الخارجية المغربية تذكر فيه بللي ”المغرب قرر التحرك في احترام تام للسلطات المخولة ليه، حيت التحركات لي كتقوم بها البوليساريو كتشكل أعمال متعمدة لزعزعة الاستقرار وتغيير الوضع بالمنطقة، وكتمثل انتهاك للاتفاقيات العسكرية، وتهديد حقيقي لاستدامة وقف إطلاق النار، كما أن هاد التحركات كتقوض أية فرص لإعادة إطلاق العملية السياسية المنشودة من قبل المجتمع الدولي“، إضافة لأن هاد العملية ”كتقوم على تجنب أي احتكاك مع أشخاص مدنيين وعدم اللجوء لاستعمال السلاح إلا في حالة الدفاع الشرعي“.

بدات البوليساريو رسميا يوم 21 أكتوبر 2020 بعميلة غلق معبر الكركرات بهدف الضغط على المغرب وإثبات وجودها قبل موعد صدور تقرير مجلس الأمن الدولي الخاص بقضية الصحراء، وقام 60 شخص تابع ليها بوضع الأحجار والإطارات المطاطية وتخريب الممرات ديال المنطقة الحدودية شي لي فرض حصار اقتصادي على موريتانيا وعطل الحركة التجارية ما بين المغرب وغرب أفريقيا وخلا بزاف ديال السائقين المغاربة واحلين فموريتانيا.

أيام قليلة من بعد قطع الطريق قامت البوليساريو بإرسال قواتها للمنطقة تحت ذريعة حماية مواطنيها، الأمر لي اعتابرو المغرب استفزاز، خصوصاً أن المنطقة عازلة ومنزوعة السلاح بمقتضى اتفاق وقف إطلاق النار 1991.

طالب الأمين العام للأمم المتحدة أنطونيو غوتيريش يوم السبت 26 شتنبر 2020، انفصاليي البوليساريو، بعدم عرقلة حركة السير المدنية والتجارة المنتظمة فالكركرات، والامتناع على أي إجراء إقدر يشكل تغيير فالوضع القائم فالمنطقة العازلة.

دعا سفير الولايات المتحدة الأمريكية المعتمد لدى المملكة المغربية دايفيد فيشر لعدم عرقلة حركة السير المدنية والتجارية المنتظمة عبر معبر الكركرات الحدودي.

قال نيكولاس دي ريفيير السفير الممثل الدائم لفرنسا لدى الأمم المتحدة، فتفسيرو للتصويت على قرار مجلس الأمن الدولي 2548 بلي فرنسا كتؤيد دعوة المتحدث باسم الأمين العام للأمم المتحدة لعدم عرقلة حركة السير المدنية والتجارية وعدم تغيير الوضع القائم فالمنطقة العازلة، وبلي فرنسا كتدعم فهاد الصدد جهود بعثة المينورسو.

انساحبات عناصر جبهة البوليساريو من معبر الكركرات الحدودي مع موريتانيا من بعد تدخل الجيش المغربي. وگالت وزارة الشؤون الخارجية والتعاون الإفريقي والمغاربة المقيمين بالخارج بلي التحرك المغربي تم بشكل سلمي ودون اشتباك أو تهديد لسلامة المدنيين وبدون إراقة دماء أو تسجيل ضحايا. وأفاد بلاغ للقيادة العامة للقوات المسلحة الملكية من بعد ساعات قليلة على التدخل بأن معبر الكركرات بين المغرب وموريتانيا ولا مؤمن بشكل كامل من خلال إقامة حزام أمني بتعليمات سامية من الملك محمد السادس القائد الأعلى ورئيس أركان الحرب العامة للقوات المسلحة الملكية.

من بعد نجاح العملية باشرات الفرق الهندسية العسكرية والمدنية تعبيد الطريق الرابط ما بين نقطة الكركرات والنقطة 55 بالحدود الموريتانية، وبناء جدار عازل لحماية مستخدمي الطريق من أي استفزاز محتمل للبوليساريو.

عقد سعد الدين العثماني رئيس الحكومة المغربية، نهار 13 نونبر 2020 اجتماع مع زعماء الأحزاب السياسية الوطنية لإطلاعهم على آخر المستجدات المتعلقة بالتحرك لي باشرتو المملكة بالمنطقة العازلة للكركرات، وأعرب زعماء الأحزاب السياسية المغربية خلال هلظ الاجتماع على تقديرهم الرفيع للمبادرات والتوجيهات الملكية الهادفة للدفاع على الوحدة الترابية للمملكة وترسيخ مغربية الصحراء بشكل لا رجعة فيه، ودعاو المشاركين خلال هاد الاجتماع للتعبئة الشاملة واليقظة المتواصلة لكل القوى الحية للذود على وحدة المملكة وسلامة أراضيها.

أعلن البرلمان المغربي لدعمو لعملية التطهير وجا فبلاغ رسمي: ”كيؤكد ممثلو الأمة تثمينهم ودعمهم للخطوات المسؤولة والشجاعة لي كتقوم بها قواتنا المسلحة الملكية بقيادة جلالة الملك محمد السادس“.

أكدات الهيئات المنتخبة والغرف المهنية بمدينة العيون تأييدها التام والمطلق واللامشروط لتدخل القوات المسلحة الملكية لتأمين معبر الكركارات، وضمان تدفق السلع وتنقل الأفراد المدنيين العزل.

تافقات بزافت الدول العربية والأفريقية على وجاهة وشرعية التحرك المغربي فالمعبر الحدودي ديال الكركرات، بعدما طردات القوات المسلحة الملكية المغربية مرتزقة البوليساريو من بعد ثلاثة أسابيع من الاستفزاز وإغلاق المعبر فوجه البضائع والأشخاص. وهادو كانو أبرز الردود:

نفس الشيء كنتلاقاو هيئات دولية دعمات الموقف المغربي وأكدات على أهمية فتح المعبر، بحال البرلمان العربي، منظمة التعاون الإسلامي، مجلس التعاون الخليجي، والاتحاد الأوروبي

قال أوليڤر فاريلي المفوض الأوروبي للجوار والتوسع فتغريدة ليه على تويتر بلي كيرحب بالتزام المغرب باتفاق وقف إطلاق النار، وقال بلي ضمان حرية تنقل الأفراد والسلع أساسية، وبلي الحفاظ على الاستقرار السياسي والاقتصادي لدول الجوار أمر لا رجعة فيه.

وصفات حركة البناء الوطني فالجزائر عملية تطهير المعبر الحدودي للكركرات باعتداء عسكري دنيء ووصفات القوات المسلحة الملكية بالجيش المحتل، وتم نشر هاد التصريحات فمقالتين مختلفتين على موقع وكالة الأنباء الجزائرية (الذراع الرسمي للإعلام الجزائري) يومي 13 و14 نونبر 2020.

قال إبراهيم غالي الأمين العام لجبهة البوليساريو بلي الأخيرة نساحبات من اتفاق وقف إطلاق النار وبلي ”المعارك بدات وأن الحرب اندلعات ومعها ولجنا مرحلة جديدة وحاسمة.“




#Article 583: أورديناطور (102 words)


لورديناطور ولاّ لحاسوب، ولأّ پي سي، هو واحد لماكينة مطوّرة تاتستقبل لبيانات ولمعلومات و تقراها وتخزنها و تخدم بيها باش تعطي بزّاف د النتائج. لورديناطورات ديال دابا تيقدرو يديرو لملاين د لعمليات و لحسابات غي ف تواني قلال.

لحواسيب تيخدمو بأوامر اللي تاتجيهم من خوارزميات، و هي اللي تاتقوليهم شنو يديرو و كيفاش بطريقة أوطوماتيكية.

السمية د لورديناطور بڭاع اللغات اللي مسمّي بيها تاتعني: هاداك اللي تيحسب. السباب هو باللي لخدمة اللّولا و لعمليات كاملة اللي كيدير هي لحساب: لجمع ولا الناقص ولا الضرب و لا لقسيم. ملّي تيتجمعو بزاف ديال هاد لعمليات تقدر لخدمة تتطور و تتعقد و تيوليو نتائج كبار.




#Article 584: لندن (173 words)


لندن, (ب لينڭليزية: London), هي العاصمة د لمملكة لمتحدة د بريطانيا لعظمى وإيرلاندا الشمالية و د لينڭليز وأكبر مدينة فيهم بجوج. هي من أكبر المدن د أوروپا, و كايسكن فيها و ف النواحي ديالها كثر من 14 لمليون د الناس. لمدينة جات على لواد ديال الطيمز و بعيدة بتقريبا 80 كلم على لبحر ديال لمانش.

لندن من لمدن لمهمة و اللي كاتأتر بزاف ف لعالم، و وحدا من أهم لمراكز لمالية. لمطارات ديالها من المطارات اللي فيها أكبر رواج ف لعالم، و كاين فيها عدد كبير ديال الشركات و لمستثمرين من لعالم كلّو. ف 2012، تنضّمات لألعاب لأولمپية ف لندن، و ولاّت هي لمدينة لوحيدة ف لعالم اللي تنضّمات فيها هاد لألعاب 3 د لمرّات.

لندن مدينة كبيرة و مخلّطة، تيتهضرو فيها كتر من 300 لغة من الناس اللي جاو ليها من لعالم كلّو. التاريخ د لمدينة تا هو كبير و دازو فيها بزاف د لأحدات اللي كانو مهمّين للعالم. لندن فيها 4 د لمواقع د الترات لعالمي ديال ليونيسكو، و لميطرو ديالها هو أقدم ميطرو كاين ف لعالم ( تبنا ف 1863).




#Article 585: لإمبراطورية الرومانية (147 words)


لإمبراطورية الرومانية، (باللاتينية: Imperium Rōmānum) كانت إمبراطورية كبيرة فالتاريخ، لا من الناحية د لبلايص اللي حكمات، لا من ناحية لوقت اللي بقات دايمة فيه، لا من ناحية التأتير اللي دارت على لعالم. دامت لإمبراطورية الورمانية من لعام د 27 قبل لميلاد تال لعالم 476، ولكن تقسمات ف 395. لإمبراطورية الرومانية لغربية حبسات ما بين 476 و 480، أما لإمبراطورية الرومانية الشرقية (اللي تسمّات تا لمبراطورية لبيزانطية) ف را بقات من 395 تال لعام 1453، اللي هو لعام اللي دخلو فيه لمسلمين لإسطنبول.

ف لعام 117، كان لإمبراطورية ف لأوج ديالها، و كانت حاكمة ڭاع لبلايص اللي كاطل على لبحر لبيض لمتوسط، من شمال إفريقيا لجنوب أوروبا و تا لينڭليز و لغرب د آسيا.

لإمبراطورية الرومانية خدات سميتها من لمدينة د روما، اللي كانت هي لأصل ديال لبلاد و لعاصمة ديالها. من بين الناس لمعروفين اللي حكمو لإمبراطورية الرومانية كاين يوليوس قيصر، اللي عطا سميتو للشهر د يوليوز.




#Article 586: لألعاب لأولمپية (177 words)


لألعاب لأولمپية ولاّ لأولمپياد، هي واحد لمسابقات ديال الرياضة كيشاركو فيها الرياضيين من بزاف د الرياضات من لعالم كلّو باش يتنافسو بيناتهم و يشوفو شكون أيربح. تاتنضّم لألعاب لأولمپية مرّة كل عاماين و تيتناوبو فيها الصيف مع الشتوا. قبل من 1992 كانو لألعاب ديال الصيف و ديال الشتوا تيتنضّمو فنفس العام، و لكن من بعد ولاّو كيتناوبو، ديال الصيف كاتكون كل 4 سنين، و ديال الشتوا تا هي، و كاتكون بيناتهم عاماين.

جابت لألعاب لأولمپية سميتها من لمدينة ديال أولمپيا ف ليونان، اللي كات أول بلاصة ف التاريخ تنضّمات فيها هاد لمسابقات، من لقرن 8 قبل لميلاد، تال لقرن لخامس ميلادي.

لألعاب لأولمپية اللي كانعرفو دابا، و اللّي كاتسمّا لألعاب لأولمپية لحديتة، بدات ف 1896 فأتينا، لعاصمة ديال ليونان، و كانو فيها 300 رياضي جاو من 15 لبلاد و تنافسو ف 43 مسابقة د 9 د الرياضات. فلألعاب ديال أتينا د 2004، شاركو 10.000 رياضي من 202 بلاد، و تنافسو ف 28 رياضة مختالفة.

أول مغريبي ربح ميدالية فلألعاب لأولمپية كان هو راضي بن عبدسلام، اللي خدا ميدالية فضية فلأولمپياد ديال روما ف 1960، فالسباق ديال لماراطون.




#Article 587: كاس لعالم (207 words)


كاس لعالم ديال كورة ديال الرجال، اللي معروفة بكاس لعالم، هي أكبر مسابقة ديال لكورة ف لعالم، و تيتضمها لإتحاد الدولي ديال لكورة (فيفا). كاس لعالم تاتنضم كل 4 سنين و تنضمات أول مرّة ف 1930. تحبسات كاس لعالم جوج مرّات فالتاريخ (1942 و 1946) علاود لحرب لعالمية التانية. من 1998، ولاّو تيشاركو 32 بلاد فكاس لعالم، مقسومين على تمنية د لمجموعات، و تيتنافسو كاملين على شكون أيربح لكاس.

تنضمات تال دابا كاس لعالم 21 مرّة و ربحوها 8 د لبدان، هوما: لبريزيل (5 د لمرات: 1958 - 1962 - 1970 -1994 - 2002)، الطاليان (4 د لمرات: 1934 - 1938 - 1982 - 2006)، ألمانيا ( 4 د لمرات: 1954 - 1974 - 1990 - 2014)، لارجونتين (1978 - 1986)، لوروڭواي (1930 - 1950)، فرانسا (1998 - 2018)، لينڭليز (1966) و صبانيا (2010).

آخر بلاد ربحات كاس لعالم كانت هي فرانسا ف لبطولة د روسيا 2018، و اللي غلبات كرواتيا ف النهاية ب 4 ل 2.

تأهل لمغريب خمسة د لمرات لكأس لعالم (1970 - 1986 - 1994 - 1998 - 2018). تقصا ربعة د لمرّات من الدور اللول، و تأهل مرّة وحدا للدور التاني ( ف 1986). كان هاداك إنجاز تاريخي حيت كان لمغريب هو أول بلاد إفريقي اللي وصل لتمن النهاية د كاس لعالم.




#Article 588: إيديث وارتن (100 words)


إيديث وارتن (بلونڭلي: Edith Wharton) (تزادت ف 24 يناير 1862 ف نيو يورك - وماتت ف 11 غشت 1937 ف فرانسا) هي روائية, كاتبة ديال لقصص لقصيرة, ومصممة. بفضل لخلفية لأرستقراطية ديالها قدرات باش انها تورينا كيفاش كانت ديك لفترة لمدهبة لي عاشت فيها. ف 1912 ستاطعات باش انها تولي اول مرا غاتربح لجائزة ديال بوليتزر لي كاتعطا فلأدب, هاد لجائزة ربحاتها على الرواية ديالها لي سميتها زمان النية (بلونڭلي: The Age of Innocence). ف 1992 دخلات ل بيت الشهرة لوطني ديال النسا. من بين اعمالها لمعروفة كاين دار لبهجة (بلونڭلي: The House of Mirth) وإيثان فروم (بلونڭلي: Ethan Frome).




#Article 589: فاطمة مرنيسي (186 words)


فاطمة مرنيسي (تزادت ف 27 سبتمبر 1940 - ماتت ف 30 نوفمبر 2015) هي كاتبة وفيمينيست وسوسيولوجيست مغربية.

تزادت فاطمة مرنيسي ف فاس بتاريخ 27 سبتمبر 1940. كبرات هي وشي خدامات وشي دريات كايجيوها فلحريم ديال جداها لي لباس عليها. قرات لإبتدائي فواحد لمدراسة دارتها لحركة لقومية، والتانوي فمدرسة غير ديال لبنات تابعة للمستعمر لفرانساوي. ف 1957، قرات لعلوم السياسة فلافاك ديال السوربون وبرانديز، وتما فين شدات الدكتورة ديالها. فاش رجعات للمغريب خدمات استادة فلافاك ديال محمد لخامس للآداب، بالضبط فلفترة بين 1974 و 1981. وقرات مواد مختالفة بحال لميطودولوجي، السوسيولوجي والسايكولوجي. لمرنيسي معروفة بلمقاربة السوسيوسياسية فاش كتبغي تدرس لجندر ولهوية لجنسانية، وتركيزها كيكون بلمجمل على لمغريب. لحاجة لي خلاتها تعرف برا لبلاد هي كونها فيمينيست مسلمة.

كانت لمرنيسي محاضرة فلافاك ديال محمد لخامس فالرباط وباحتة فلمعهد لجامعي ديال لبحت لعلمي لي كاين فالرباط نيت. مورا النڭاب هي دراسة كانت دارتها عام 1975 باش تشد الدكتورة ديالها، ولكن من بعد تحولا لكتاب لي تنشر فبريطانيا فعام 1985 وفميريكان عام 1987. لمرنيسي هي من اهم لفيمينيست لمغريبيات لي خلاو لبصمة ديالهم حيت نجحات كاستادة، كاتبة، وسوسيولوجيست. ف 30 نوفمبر 2015 غادراتنا لمرنيسي وخلات وراها بزاف ديال لأعمال.




#Article 590: في انتظار عطيل (933 words)


مسرحية في انتظار عطيل (خرجات فعام 2018) هي وحدة من أهم المسرحيات لي تعرضو فتاريخ المسرح المغربي واخا القصة موخودة من مسرحية شكسپير باسم اوتيلو و لا عطيل باللغة لعربية. لمسرحية تلعبات فبزاف ديال لقاعات فلمغريب و لي خلا الناس تمشي تشوفها من غير القصة لي كتقيص مشاكل فالمجتمع المغربي هي الفرقة المسرحية برآسة عبد المجيد الهواس كمخرج و كاتب مسرحي.

عبد المجيد الهواس هو مخرج و كاتب سنمائي و مسرحي مغربي معروف بأعمالو لي فيها طابع فيلسوفي و سياسي و اجتماعي. الهواس ديما كيطرح سؤال أو فكرة فأعمالو و كيحاول يجاوب عليها بطريقة ذكية و فنية داكشي علاش كيتاجه لشكسپير و أعمال يونانية و رومانية و كيتلهم منهم و هدشي خلاه يأسس فرقة مسرحية برآستو باش يحول أفكارو لمسرحيات فيها ممثلين شباب لي كيقومو بأدوار داز عليها قرون و زيادة.

فرقة أفروديت هي فرقة أسسها عبد المجيد الهواس باش يحول الأفكار ديالو إلى حقيقة. كاينين بزاف ديال الأعمال لي الغرض منها هو التشجيع على فن المسرح لي مبقاوش الناس كيمشيو ليه بسباب تقدم التكنولوجيا لي ڭاع الناس كتلاها فيها. عبد المجيد الهواس بغا يقرب الآداب الشكسپيري من الجمهور و فنفس الوقت يتطرق لمشاكل لي كاينة و كيعاني منها الشعب المغربي، داكشي علاش الشعار ديال الفرقة هو 'الفن هو التعلم'. مسرحية في انتظار عطيل عندها البطل لي هو عطيل لي لعب الدور ديالو محمد بوتخريز، شاب مغربي كبر فوسط لي خلاه يآمن بلي راه قاد على كلشي حيت راه ولد و يقدر يتحكم فدنيا كيف بغا. عطيل مع غير راه منتوج ديال مجتمع مغربي، هو كيتعتابر مثال للرجل الشرقي بصفة عامة حيت كيفما القصة كقول، كاينين عند عاطيل مشاكيل مدفونة و هي عبارة عن عقد لي المجتمع الشرقي و المغربي كيشوفها حاجة عادية و رمز من رموز الهوية العربية. من الحوايج لي كتطرقهم شخصية عاطيل هوما الهوية المغربية ولون البشرة ديالو، و معنى الشرف و مكبوتات متعمقة فالداخل ديالو، و هادشي عندو علاقة مع مراتو دزدمونة لي تجسدات الدور زهرة الحواوي. هاد الشخصية بالذات ماركزش عليها الهواس حيت الجمهور عارف المصرع ديالها و لكن الطريقة و لا العلاقة لي كانت بينها و بين عطيل مختالفة على النسخة الشكسپيرية لي كتبين بلي كان حب قبل الزواج، هادشي علاش الهواس بدل شوية فمسار القصة حيت بغا يبين بلي فالمجتمع المغربي ماكاينش الحب بمعنى الغرام و المودة و لكن حب الامتلاك و الهوس بمعنى الشرف و الغريرة بدون سبب. تالث شخصية هي شخصية لي هي اكاسيو لي لعبها رضا بنعيم، لي كتجسد عشيق ديزدمونة المفترض و حتى هو كان مختلف فنسخة الهواس حيت كمل فنفس مسار ان الحب ماكاينش و هادشي كامل داير على الرغبات صافي. هاد تلاتة ديال الشخصيات هم المهمين في القصة و هما لي كيكونو حاضرين فوق الخشبة كتر من لاخرين.

قصة كتدور على عطيل، شاب مغربي اسود اللون لي غادي يبغي بنت بايضة واخا بابها مابغاش هاد العلاقة لي اللون فيها كان هو سبب هاد الرفض. فلول كاين شعور متبادل و لكن من بعد كلشي تبدل، هنا فين الهواس بغا يرجع بينا اللور لوقت شكسپير و فنفس الوقت يورينا الحاضر لي مزال فحال الماضي حيت المجتمع متبدلش. من هنا ناقدرو نفهمو علاش المسرحية عندها عنوان قريب لمسرحية سمويل بكيت، حيت كيفما غودو عمرو ماجا، عطيل لي كيحب من قلبو في نسخة شكسپير حتى هو عمرو ماغادي يبان فنسخة الهواس. الهواس ركز على غيرة عطيل من اياغو لي هو معاونه فالجيش و العشيق المفترض ديال مراتو ديزدمونة، فهاد النسخة اياغو كيتعتابر هو مركز الشر و هو لي كيربح كل مرة، و مع طبيعة عطيل الشرقية و معانته مع الهوية. ديزدمونة كانت كتبقى تسمع على بطولات عطيل فالراديو و هادشي كيخليها تبغيه كثر و وصل بيها حتى لدرجة عصات باباها و تزوجات بعطيل بتخبية منو هادشي شعل العافية فالعلاقة مابين عطيل و باباها و هنا فين القصة غادي تكفس حيت واحد من الناس لي كيحسدو عطيل على إنجازاتو لي هو اياغو غادي يدمر علاقهم و يكون سباب فقتل عطيل لديزدمونة. و غادي يدخل مراتو فهادشي كامل و يصيفطها تشفر الزيف لي عطيل هداه لديزدمونة حيت هو نيت عطاتو ليه ماماه و كيعتابرو أحسن هدية و لكن للأسف من بعد ماغدي يتشفرغادي يحطو اياغو فبيتو و يخلي عطيل يلقاه تما باش يشك فحب و وفاء ديزدمونة و الغيرة على الشرف لي عندو خلاتو يقتلها بلاما يفكر. وهادشي كيبين التراجدية و الشكسپيرية ديال المسرحية.الهواس دار كورس فاللول و الخر باش يشرح الخبايا لي يقدر المتفرج ميردش ليهوم البال، و كانت حتى الموسيقى داخلة فالاداء باش الناس يتأثرو و يعيشو المأساة، و أخيرا في العرض كانو مؤثرات بصرية حديثة لي عاونات كل ممثل يتقن دورو و نعيشوه معاه.

الموضوع اللول لي كاي يثير الجدل فڭاع المجتمعات هو العرق و لون البشرة هو موضوع شائك فالمغرب كيفما في أروبا، إيوا و فالقصة الشكسپيرية عطيل هو شاب اسود اللون بغا و تزوج ببنت بيضة و حتى فنسخسة الهواس عطيل مغربي اسود اللون تزوج ببنت مغربية بيضة و وخا المغرب بلد أفريقي الهواس بغا يورينا بلي كاينة العنصرية ضد السود حتى في افريقيا و هاد التناقض هو نفاق اجتماعي تطرقات ليه المسرحية.

الموضوع التاني هو الغيرة المفرطة لي كانت فنسخة شكسپير ناتجة على حب و لكن فنسخة الهواس كانت عبارة على هوس قاتل و قضية مجتمع دفع عطيل باش يآمن بلي الغيرة هي الحب و بلي بلا بيها واحد فالعلاقة كيكون عندو مشكيل فالمشاعر ديالو. الهواس بغا يبين في نسختو بلي الغيرة المغربية زايدة نغزة حيت جايا من حب الالمتلاك كتر من الحب لي كنعرفو.

الموضوع التالت و الاخير هو مشكل كبير فالثقافة المغربية العربية حيت جريمة الشرف و لا فكرة الشرف تستوردات من الشرق حيت عندها جذور شرقية. بغض النضر على منين جات، الشرف ولا حديت الساعة و فالمسرحية مركزين عليه بزاف حيت كيفما عطيل قتل ديزدمونة بزاف ديال الرجال كيقتلو عيالاتهم بدافع الشرف و هادشي خالق جدل كبير في الجتمعات الشرقية. الهواس كان داقيق فالاختيار ديالو للقصة و المواضيع لي ركز عليهم باش يكون هدف فني و سياسي.




#Article 591: الضريح د سيدي موسى (160 words)


الضريح د سيدي موسى الدكالي، اللّي معروف تا ب سيدي موسى، هو ضريح ديال لولي الصالح سيدي موسى الدكالي، كيطل على لمحيط لأطلسي، و جا ف لمدينة د سلا، ف لمغريب.

كيتعتابر هاد الضريح من لبنايات التاريخية، و اللي داخلة فلآثار ديال لمدينة د سلا، و داخلة تا مع التراث لوطني د لمغريب، على حساب قرار وزاري خرج ف 16 أكتوبر 1948، و بان ف الجريدة الرسمية المغربية رقم 1882 نهار 19 نونبر 1948.

تبنا الضريح باش يكرّم سيدي موسى الدكالي، اللي كان ولي صالح عاش بوحدو معزول فلمنطقة، كيعيش من لحوت اللي كيصيّد من لبحر و من لبقّولة اللي فلأرض، تا مات ف عام 580 هجرية.

ملّي مات سيدي موسى، تدفن خارج السور ديال سلا، و تبنات على لقبر ديالو قبّة كبيرة، تصلحات من مورا 500 عام، فلعهد ديال لمولى سماعيل، و هي اللي عطات هاد الضريح اللي كانشوفو ليوما.

دابا كاتسمّا ڭاع لحومة اللي ف لخارج ديال السور ديال سلا من جيهت الشمال سيدي موسى، ماشي غي الضريح.




#Article 592: بو لقاسم الشابي (177 words)


بو لقاسم الشابي (ب لعربية: أبو القاسم الشابي؛ 24 فبراير 1909 – 9 اكتوبر 1934) هو شاعر تونسي. معروف بزاف بسباب السطورة اللخرين ديال النشيد لوطني التونسي، لي كتبو فلأصل الشاعر لمصري مصطافى صادق الرافعي (بتاعرابت: مصطفى صادق الرافعي).

تزاد الشابي ف توزر، تونس، 24 فبراير 1909. شد شهادة التطويع (لمقابل ديال لباك) عام 1928. وف 1930 شد ديپلوم ديال لقانون من جامعة الزيتونة. فداك لعام نيت تزوج، وموراها تزادو عندو جوج ديال الدراري، محمد لي ولا كولونيل فلجيش ديال تونس، وجلال لي ولا مهندس.

كان عزيز عليه لأدب الجديد (Modern Literature) عامتاً، وكان كيطرجم لأعمال الرومنسية. لموهبة ديالو فالشعر بانت فاش كان مزال صغير. وكان كيدوي على مواضيع مختالفة بحال وصف الطبيعة ولا حب لوطن.

فاالخر ديال 2010 وف 2011، القصائد ديال ولاو كايموتيڤيو المتضاهرين(ات) فشمال افريقيا والشرق الأوسط فلفترة لي تسمات ب الربيع لعربي. من تم بدا عاوتاني لإهتمام بلأعمال ديالو.

إلى طغات العالم (ل طغات لعالم )

أغاني الحياة (اغاني ديال لحياة)

مذكرات (دكريات)

رسائل (تجميعة ديال الرسائل)

صديقي (شي ندوات كان تايقدمها للخرجين ديال لكلّية، نوضات بزاف ديال الصضاع بين لمجموعات لأدبية المحافضة)




#Article 593: أوقيانوسيا (166 words)


أوقيانوسيا ولاّ أوسيانيا، هي قارة و منطقة جغرافية جات ف لجنوب د لمحيط لهادي، و تاتجمع لجزر و لبلدان اللي جاو تمّا. أوقيانوسيا هي أصغر قارة ف لعالم من الناحية د لمساحة، و تاني أصغر وحدا من ناحية السكان (41 مليون د الناس) من مورا آنطارتيكا (لقارة د لقطب لجنوبي).

كاين 14 دولة ف أوقيانوسيا، مخلطين ما بين دول متقدمة بزاف بحال ؤسطراليا و نيوزيلاندا، و دول باقا ف طريق النمو بحال كيريباتي و ڤانواتو و توڤالو. أكبر بلاد ف أوقيانوسيا لا من ناحية لكبر ولا السكان هي ؤسطراليا، و أكبر مدينة ف لقارة هي سيدني.

لخبار على أول ناس سكنو ف أوقيانوسيا كاتقول باللي كانو فيها سكان هادي 60.000 عام، و لكن اللي تكتب عليهم بزاف هوما لأوروپيين، اللي بداو كيوصلو للمنطقة من لقرن 16، و تقاسمو لإحتلال ديالها بزاف د لبلدان منها لبرتغال و فرانسا و بريطانيا.

السمية ديال أوسيانيا خرّجها لعالم د لجغرافيا كونارد مالت - برون ف 1812، و هي كلمة شتقها من لكلمة ليونانية (ὠκεανός)، اللي تاتّنطق أوكيانوس، و تاتعني لمحيط.




#Article 594: محمد أبرهون (255 words)


محمد أبرهون، تولد ف 3 ماي 1989 ف تطوان ؤ مات ف 2 دجنبر 2020 ف تركيا، كان كوايري مغريبي.

ملي كان معا شايكور ريزسپور، أبرهون لقاو عندو كونسير د لمعدة مورما حس براسو عيان قبل من لماتش ضد طرابزون سپور ف فبراير 2020. ف لخر ديال لموسم طلقاتو لفرقة، والاكين بقا كياخد دعم لمادي من عندهوم بسباب لحالة ديالو. توفا أبرهون ف 2 دجنبر 2020 بسباب هاد لمرض، ؤ ف عمرو 31 عام.

تكون ف لفرقة د مدينتو، لمغريب تطواني، ؤ مشا مسلف ف 2010 لشباب ريف لحسيمة حيت ماكانش كيلعب أساسي. عاود رجع موراها لتطوان ف لموسم 2010-2011 ؤلعب فيه تسعود د لماتشات. لموسم لي موراه، 2011-2012، لعبو كامل أساسي حدا مرتضى فال ؤ لخر داو لبوطولا لمرة لولا ف تاريخ لفرقة.

أبرهون مشا لفرقة لبرتغالية موريرينسي ف 2017. لعب أول ماتش ديالو ف 30 يوليوز 2017 ف لكاس ضد ديسپورتيڤو أفيس. شهر لي موراه، أبرهون لعب ماتش ديالو لول ف لبوطولة ليڭا نوس ضد ڤيطوريا سيطوبال. ف 10 شتنبر 2017، ماركا بيت براس ضد إستوريل ف أول ربحة ديال لفرقة ف لبوطولة.

ف لميركاطو د شتوة 2019، أبرهون سنا معا لفرقة تركية شايكور ريزسپور. يوماين مورما جا، لعب أول ماتش ديالو ف سوپر ليڭ ضد قاسيم باشا. ف 8 أبريل، ماركا أبرهوم بيت لول ديالو ف لبوطولة والاكين فرقتو خسرات ب7 ل 2 ضد بيشيكطاش.

تختار أبرهون لأول مرة ف لمونتخاب لؤلمپي ف 2010، ؤ وصل ل فينال ديال لبطولة د إفريقيا قل من 23 عام ف 2011، و أهل لمغريب للألعاب لأولمپية د 2012.

 المغرب التطواني

 لمغريب قل من 23 عام




#Article 595: دجنبر (157 words)


دجنبر (بلونجلي : December) (بلعربيا : ديسمبر) هو شهر 12 ولخر ف لعام الميلادي، وهو واحد من سبعا ديال لأشهر فلعام لي فيهم 31 يوم. كيتستعمل كلمة دجنبر ف المغرب بوحدو،و كيتسما ب كانون الأول فسوريا، لأردن، لبنان، فلسطين،إسرائيل ولعراق،أما ف مصر والخليج العربي والمغريب العربي (دزاير، تونس و ليبيا) كيسميوه ديسيمبر، و فموريطانيا كيسميوه دجمبر .

كيبدا شهر ف نفس ليوم لي كيبدا فيه شهر شتنبر، غادي امشي تشابه الا ولا شهر دجنبر فيه غا 30 يوم .

كيكون شهر دجنبر بارد بزاف فنص الكرة لأرضية الشمالية، و كيكون فيه تبروري و رياح قويين و هكا علاش كيسميوه لبعض ديال الناس شهر لبرد ولا شهر تبروري.

كيتميز هاد شهر بشكل خاص ب لقديس نيكولاس نهار 6، و كيبدا تجهيزات لكريسماس فنهار 24، وكيبدا فنهار 25 ، و ليلة لبون أني لعام لجديد نهار 31.

ثاني حد ف شهر هو ليوم لعالمي ديال لأطفال و دعم لإذاعة وتلفزيون (اليونيسف). جمعة ثالثة فشهر هو اليوم العالمي لرمز الكريسماس.




#Article 596: التستيفة د الضّو (838 words)


الحجرة د الضّو ولّ التستيفة تاع ڤولطة هي أوّل حجرة تاتعطي الضّو، صاوبها أليساندرو ڤولطة لي تزاد عام 1745 فمدينة كومو فإقليم لومباردِيّا. قبل من التستيفة تاع ڤولطة، البقشاشة د القديم (الباحثين فالأركيولوجي) جبرو واحد الڭولّة د الضّو  فبغداد لي كانو تايشلّلو بيها الماعن بالذهب ولّ النقرة. إنّما البقشاشة د القديم باقي ما متأكدينش واش هاد الڭولّة نيت بالصّح كانو تايشلّلو بيها الماعن، واش نيت نقدرو نخرجو بيها بزّاف تاع الفرتيت د الضّو باش نشللو بيه الماعن .

قبل من المخاصمة لي وقعات مابين ڤولطة و غالڤاني، كانو الناس متيّقين أنه كاين جوج نواع د الضّو، الضّو د البهايم و الضّو د المعدن. الضّو د البهايم هو الضّو لي تايصاوبوه البهايم بالكسدة تاعتهوم، و الضّو د المعدن هو الضّو لي تانصاوبوه بالتّقراب ولّ بالحكّان ديال جوج صفيحات تاع المعدن.

الضّو د المعدن

فديك الوقت كان يمكن نصاوبو الضّو بواحد القرعة سميّتها قرعة لايد ولّ بماكينة سميّتها ماكينة ويمزهورست. بقرعة لايد يمكن تصاوب الضّو بالتقراب ديال جوج صفيحات، هاد الحيلة هي السّاس ديال الكونداساتور. و بماكينة ويمزهورست يمكن تصاوب الضّو بالحكّان ديال واحد الصفيحة، هاد الحيلة هي السّاس ديال لاندوي د الموتور.

هاد الحيلة ديال التقراب و الحكّان تايعرفوها مزيان الصغار، كان الصغير تيشد الستيلو و تايحكو مع التريكو ولّ السروال، و من بعد تايقرّب الستيلو لطريّف صغير ديال الورقة، غي تايكون قريب بزّاف من هاد الطريّف د الورقة (بلا ما يقيسو) تايبان بلّي الطريّف د الورقة تايتجرّ لعند الستيلو.

الضّو د البهايم

من يّامات الإغريق و الناس تايخمّمو فالتّحراك ديال العضالات، كان يتسحاب ليهوم أن المخ هو لي تايسيفط العضالات سايل بحال ليدام ولّ البلول وبيه تاينفخ العضالة . بقاو البقشاشة (الباحثين) تايقلبو على كيفاش تاتحرّك العضالة، و مع الوقت بداو تايفهمو حسن هاد التّحراك ديال العضالة. مثلا، البقشاشة فالشيمي جبرو أنه باش تحرّك العضالة خصّها تاكل الأوكسيجين و تخرّج أوكسيد الكاربون المضوبل، و البقشاشة فالضّو جبرو أنه القرعة د لايد تاتقدر تحرّك العضالة.

غالڤاني كان من البقشاشة ف السليخ، و كان تايسلخ الجرانات و تايشوف آش تايوقع الفخض تاع الجرانة فاش تانلاقيوها مع القرعة د لايد، وجبر أن الضّو تاع القرعة د لايد تايحرّك الفخض تاع الجرانة. واحد النهار، غالڤاني جبر أن العضالة د الفخض تاع الجرانة لي معلّقة فالبالكون تاتحرّك بّوحدها بلا القرعة د لايد. من تمّا قال أن الضّو راه جاي من العضالة د الفخض وخّا الجرانة ماشي حيّة، وسمّا داك الضّو : الضّو د البهايم.

فاللوّل ڤولطة كان شاك فهاد الضّو د البهايم، مشى جرّب حتاهوا وسلخ الجرانات و كان تايجرّب حثّى على البهايم الميتين و الحيّين. واحد اللوقيتة تيّق أنه الضّو د البهايم كاين، خصوصا نهار جبر أنه الفخض تاع الجرانة تايتحرّك ملّي تايلاقى العصبة مع العضالة بسلك, وبما أنه السلك ما فيه ضو، يعني الضّو كاين فالفخض.

غي هوا ڤولطة زاد نوّع فالتّجراب، وجبر أنه ماشي لابد تلاقي العصبة مع العضالة باش يتحرّك الفخض، إنّما وخّا تلاقي العصبة مع العصبة ولّ العضالة مع العضالة راه الفخض غادي يتحرّك. وزاد جبر أنه السلك لي شاد فالقنت اللوّل ديال العضالة خص يكون من معدن مغاير على المعدن د السلك لي شاد فالقنت الثاني ديال العضالة.

فاللخّر قال ڤولطة أنه الضّو د البهايم ماكاينش، والضّو لي تايحرّك الفخض جاي من السلوكة المغايرين، لأنه لابد كلّ سلك يكون من معدن مغاير على الاخر وإلاّ مايتحرّكش الفخض. و الغلط لي دار ڤولطة هو أنه يتسحاب ليه العضالة و العصبة ماشي مهمّين، و البقشاشة فالشيمي لي جاو من موراه جبرو لاش لايقة العضالة و العصبة فالتصاويب ديال الضّو.

غالڤاني ماسكتش، مشى تايجرّب على حوتة الرّاية ولّ حنش الما الرعّاد لي تايضرب بالضّو،  مشى غالڤاني سلخ الرّاية و فرتك العضالات باش الرّاية تاتصاوب الضّو، و لقى أنها تاتصاوب الضّو بالعصبات وشي عضلات مستّفين فلاكي فلاكي، وبيّن أنّ ڤولطة غلط، وبيّن بالرّاية أنه لابد من العصبة و العضالة باش يتصاوب الضّو.

ڤولطة ماسكتش، مشى صاوب الضّو بنفس الحيلة باش الرّاية تاتصاوب الضّو، إنّما بدّل العضلات و العصبة بالمعدن، و بيّن أن التستيفة ديال المعدن المغاير هي السّر ديال تصاويب الضّو فالراية براسها.

الضّو د المعدن و الشيمي

فولطة هو لّي عاق أنه بالشيمي نقدرو نخرّجو الضّو، و باش يبيّن هاد القاضية، صاوب واحد التستيفة تاع صفايح د المعدن و صفايح د التوب فاسڭ لي سمّاهوم الپيل لي تاتعني بالاثينية  السارية ولّ العمود وبالفرانساوية التستيفة.

فولطة قطّع النحاس فلاكي فلاكي بحال الشكل ديال الرّاية لي تاتضرب بالضّو، و قطّع الزّنڭ فلاكي فلاكي، و قطّع الثوب فلاكي فلاكي وفسڭو بالخل. حطّ صفيحة ديال الزّنڭ و فوق منها طرف ديال الثوب فازڭ وفوق منّو صفيحة ديال النحاس، و عاود هاد الشكل بزاف ديال المرات حثى وصل شي ميترو ونص .

فعام 1801 حضر ناپوليون بوناپاخت الدلالة (التقديم) ديال الحجرة فالمعهد تاع فرانسا، و فسّر ڤولطة فالدلالة كيفاش صاوب الحجرة و كيفاش قدر يرتّب المعادن من الزنڭ لي ما تايخرّجش الضّو بزاف حثّى النقرة لي تاتخرّجش الضّو بزاف.

باش يمكن نصاوبو حجرة د الضّو فالدار مع الصغار، يمكن نصاوبو تستيفة فيها ببياسات د الفلوس و صفيحات د الألمونيوم و طريفات د الكارطون. بعشرة د الصفيحات يمكن نخرّجو ربعة ڤولط، و الناس تافقو على واحد العبرة باش تايعبرو القدر ديال الضّو وسمّاوه الڤولط.

كاين ربعة د النواع تاع الحجر  لي مشهورين :

إل تقادات الحجرة ما خصهاش تلاح فالزبل العادي إنّما خصّها ترجع البيّاع ديال الماطيريال تاع الضّو باش تّعاود وتولّي حجرة د الضّو عاوتاني.




#Article 597: العرض العادي (232 words)


لعرض لعادي هو مسلسل دالرسوم المتحركة ميريكاني صيبو جاي جي كوينتيل لكارتون نتورك كرتون نيتورك وتعرض لأول مرة ف ميريكان بتاريخ 6 سبتمبر 2010. المسلسل تيدوي على جوج عشران، قيق أزرق سميتو موردكاي وراكون سميتو ريجبي خدامين بجوج ف متنزه محلي تيديرو مهام متعددة. المحاولات ديالهم العادية باش يتكاسلو وميديروا والو ديما تتسالي بشي حاجة غريبة وهاربة . خلال هدشي لي تيدوزو منو ، ريغبي وموردكاي تيتحاكو ويتفاعلو مع غيرهم من شخصيات المسلسل الرئيسية: بينسون، بوبس ، ماسل مان، شبح هاي-فايف، سكيبس، توماس، مارغريت، ايلين وسي جاي.

بزاف دالشخصيات من هاد المسلسل استاندات وتبازات على افلام لطلاب كوينتيل في معهد كاليفورنيا للفنون ولي هي الرجل الساذج من لوليلاند والثانية صباحا ومساءا، المسلسل كان من الفائزين في مهرجان نيكتونز السينمائي لعام 2005 وخذا اهتمام دولي بعدما تعرض على شبكة نيكتونز نيتورك.

فماي 2013، البرنامج تفرج فيه مايقرب جوج دالمليون وجوج المليون ونص واحد اسبوعيا .المسلسل خذا مراجعات إيجابية من عند النقاد والعرض العادي أتر عل بزاف دالشرائح من المشاهدين من جميع الفئات العمرية. و ترشح العرض العادي لبزاف الجوائز من بينها جوج جوائز آني وربعةجوائز إيمي برايم تايم وحدة منهم فازت عن حلقة Eggscellent من الموسم الثالث الحلقة الثامنة عشر.

قررات كارتون نيتورك تنهي المسلسل فالموسم الثامن ديالو لي بدا ف 26 سبتمبر 2016 (حرق) لي مات فيه بوبس ف الحلقة اللخرة. ف العالم العربي المسلسل تدبلج للعربية من قبل أستديو مصرية ميديا وتعرض على كرتون نتورك العربية لأول مرة في اغسطس 2016




#Article 598: نهار (330 words)


النهار فكوكب لأرض هي فترة ديال ليوم اللي فيها كاتكون واحد بلاصة منورة بضو النهار من الشعة اللي جاية ديريكت من الشمش. كايكون النهار فاش كاتكون الشمش فوق لأفق، يعني أي بلاصة (أي نص) من لكوكب اللي مقابل لعندها. يمكن نسجلو لحركة ديال الشمش اللي كاتبان باللي كاتحرّك بشوية فالنهار بستيعمال الساعة الشمشية. كاتشهد لكواكيب ولأقمار اللي كادّور على راسها وعلى جسم سماوي أساسي، بحال النجوم، الضاهيرة ديال النهار.

النص ديال لأرض كايكون ديما مضوّي بالشعة ديال الشمش. لبلاصة ديال لأرض اللي مقابلة مع الشمش ديما كاتكون النص، والاكين حيتاش لغيلاف لجوي كايشتت الضو فلميساحة ديال لأرض اللي كاتكون مضوية كاتفوت النص بواحد الشوية. البلاصة اللي فيها النهار كايتبدّل ديما حيتاش لأرض واحد لكوكب اللي كيدور على راصو. هاد لمحور لوهمي اللي كاتدور عليه لأرض مايل واحد الشوية وماشي عمودي على لمدار ديالها على الشمش، داكشي لاش لمدة ديال النهار كاتبدل من بلاصة لوحدة خرة. التعريف ديال النهار بالنسبة لواحد لموراقيب هي لفترة ما بين الطلوع دالشمش فاش كاتدور لأرض لجيهة الشرق باش كاتبان الضويرة ديال الشمش فوق لأفق، وحتال لغروب وماحد لارض كادّور على راسها حتّى كاتغبر الشمش تحت لأفق.

لمحور اللي كادّور عليه لأرض مايل ب23,5 درجة على لمحور لعامودي دلأرض على لمدار ديالها على الشمش، داكشي علاش الطول ديال النهار كايتبدل من نهار لنهار ومن بلاصة لبلاصة على كوكب لأرض، على حساب خط لعرض اللي واقف عليه لموراقيب. من هادشي لبلايص اللي فيها الصيف كاتكون مايلة لجيهة الشمش، داكشي لاش كايكون فهاد نص لأرض (إما الشمالي أولا لجانوبي) النهار طول من 12 ساعة والسخونية نسبيا طالعة. ماشي طول النهار هو اللي كايتحكم فالسخونية ديالو فهاد لفصل، ولاكين هادشي كايطرا غير حيتاش الشعة ديال الشمش فهاد لفصل كاتكون هابطة ديريكت.

واخّا ديما كاتكون لمدة ديال النهار هي 12 ساعة فخط ليستيواء فݣاع ليام دلعام، فلبلايص لخرين كاتختالف لمدة على حساب خط لعرض ولفصل. فصل الشتا كايكون لمدة ديال النهار قّل من 12 ساعة، أما فالصيف كاتكون لفترة ديال كبر من 12 ساعة. إلا كان الصيف فالنص الشمالي ديال لأرض، كايكون الشتا فالنص لجانوبي، وهادشي فنفس لوقت، ولعكس صحيح.




#Article 599: عشية (179 words)


لعشية هو وقت ديال ليوم اللي كايشد من الضهر حتال لغروب. ماكاينش وقت محدد لفوقاش كاتبدا لعشية (نفس لحاجة للصباح أولا الليل)، حيتاش هاد التعريف كايختالف على حساب كيفاش كولا واحد عايش حياتو وفينا بلاصة وشحال دالساعات ديال ضو النهار كاينين فليوم لكولّا وقيتة فلعام. واخا هاكاك لعشية كاتسالي إلزاميا مورا الشفق، ومن تما كاتبدا لفترة ديال الليل. ماكايناش شي وقت بحساب لماݣانة اللي تقدر نبداو فيها لعشية، غير إنما بزاف ديال الناس تّافقو بلّي وقت لعشية كاينطالق قريب من 6 دلعشية.

بعض اللوغات اللي كاتخدّم لوقت ديال النهار فالسلام ديالها عندها تحيّة خاصة ديال لعشية، بحال فلعربية (مساء الخير) أولا النڭليزية (Good evening). كايعتماد لوقت اللي كايكون مناسب باش تعطى فيه هاد التحية على التقافة ديال لواحد وكيفاش كاتحدد لعشية أولا لمفهوم اللي عند لواحد على لعشية. ليستيعمال ديال لعيبارة دمسا لخير فالدارجة كايكون واسع شي شوية، على حساب إمتا فاق داك اللي ݣالها. كقاعيدة شاملة الناس كاتݣول مسا لخير أولا مس لخير مابين التلاتة مور الضهر والطناش دالليل. يمكن للتحية دلعشية تعطى بواحد الطريقة محتارمة بحال الشكل ديال مسا لخير السي/لالة فلان(ة) أولا مسعد لمسا السي/لالة فلان(ة).




#Article 600: غروب (507 words)


لغروب أولا لهبوط ديال الشمش هو لوقيتة اللي الطرف لفوقاني ديال الضوّيرة دالشمش كاتغبر فلعشية تحت لأفق ديال لمراقيب اللي كايشوف فيه. لكلمة تقدر تعني لعملية كاملها ديال لعبور دلقرص ديال الشمش لتحت لأفق زيادة على التأتيرات لجوية اللي كاتبع لهاد الضاهيرة.

لحركة ديال لأرض هي اللي كاتخلي الضاهيرة ديال لغروب تطرى واخّا كايبان بلّي الشمش هي اللي كاتحرك وكاتهبط للأفق. لوهم ديال الشمش اللي كاتحرك جاي من لمرجع ديال الشوف (فهاد لحالة لأرض اللي كاتدور على راسها). هاد لحركة لوهمية ديال الشمش كانت مقنعة لبزّاف ديال الناس وخلات بزّاف ديال التقافات تكون عندها ميطولوجيات وخرايف وحكايات مبنية على نمودج ديال لأرض اللي لوسط والشمش هي اللي كاتدور عليها، حتى جا نيكولاس كوپيرنيكوس فلقرن 16 وبدّل هاد لقضية لنمودج اللي الشمش فيه هي اللي فلوسط.

لغروب فالتعريف لفلكي كايطرا فواحد اللحضة اللي فيها لتحت ديال لقرص دالشمش كايكون مماس للأفق. لكلمة ديال لغروب واخّا هاكاك كاتعني عند الناس لفترة قبل وبعد هاد اللحضة:

لغروب كايطرا فلحقيقة حتى من مورا ماوصلات الشمس لتحت لأفق حيتاش لغلاف لجوي ديال لأرض كايهرّس الصورة ديال الشمش فلجو. لمعدال ديال التهراس هو 34 دقيقة قوسية فالسما، واخا هاد لقياس كايتبدل على حساب الضروف دلجو.

لوقيتة ديال لغروب كاتبدل على حساب لوقت من لعام وحتى لموقع ديال اللي كايشوف فوق لأرض (خط الطول، خط لعرض ولعلو)، زيادة على التوقيت. هاد التغيرات سبابها هو لمحور اللي كاتدور عليه لأرض، الدوران ليومي ديال لكوكب على راسو وعلى الشمش ولبلاصة ديال لقمر ولأرض والدوران على بعضياتهم.

فاللخر ديال الشتا ولبدية ديال الربيع كايتشاف لغروب فخطوط لعرض لوسطانية (مابين 30° و50°) كل نهار معطل على اللي قبل منو حتال شي يامات قبل لينقيلاب دالصيف (غالبا نهار 20 يونيو فالشمال دلأرض و21 دجنبر فلجانوب ديالها)، والتاريخ لمضبوط ديال هاد لحدت كايكون على حساب خط لعرض. من مورا هاد التاريخ كايبدا لغروب يجي مبكّر نهار مورا خوه حتال لينقيلاب ديال الشتا (غالبا نهار 21 دجنبر فالشمال دلأرض و20 يونيو فلجانوب ديالها). التغيرات فالتهراس اللي كايديرو لجو كايبدلو لوقت ديال لغروب حيتاش كايتبدل لبلاصة اللي كاتشاف الشمس كاتهبط لجيهتها.

إلا تجاهلنا التأتير ديال التهراس دالتصويرة ديال الشمش بسباب لجو وبلّي الشمش ماشي نقطة فالسما، فراه ديما لغروب فلبلايص مابين 30° و50° كايتشاف فجيهة الشمال لغربي ما بين أبريل وغشت، وفجيهة لجانوب لغربي مابين أكتوبر وفبراير. لغروب كايتشاف فلغرب غير فالشهورة ديال مارس وشتنبر ولݣاع الناس فوق لكرة لأرضية.

لغروب فلكواكيب لخرين كايبان مختالف بسباب ليختيلاف فلمسافة ما بين لكوكب والنجمة اللي كايدور عليها، وحتى بسباب الضروف لجوية اللي مختالفة على لأرض أولا اللي ماكايناش ݣاع.

لحجم ديال لقرص دالشمش كايبان فلمريخ بحجم التلتاين ديال كيما كايبان من فوق لأرض، حيتاش لمريخ بعيد على الشمش كتر من لأرض. لألوان ديال لغروب فلمريخ كاتكون غالبا زرقة، ولكن بعض لمرات لغروب فداك لكوكب كايبان حمر بزاف وكاياخد وقت طويل. لألوان ديال لغروب فلمريخ كايختالفو على دياول لغروب فلأرض. لمريخ عندو غلاف جوي رقيق مافيهش لأزوت أولا لأوكسيجين، داكشي علاش التشتوت ديال الضو ماطاغيش عليه الضاهرة ديال تشتت رايلي. والاكين، لهوا عامر بغبّارية حمرة كانتاشر فلجو بسباب لعجاج تما. واحد الدراسة أكدات باللي لغبرة ديال لمريخ كاتطلع للطبقات ديال لجو لفوقانيين وكاتعكس ضو الشمش فلغروب لمدّة طويلة كاتوصل حتال ساعتين من مورا لغروب دبصّح.




#Article 601: غساق (352 words)


كايطرا لغساق فواحد لوقيتة مضلمة ديال الشفق، أولا فالنيهاية ديال الالشفق لفلكي من مورا لغروب وغير شوية قبل لبدية دالليل. فلوقيتة اللي قبل لغساق، يعني فلمراحيل اللولة ولوسطانية ديال الشفق دلعشية، كايكون واحد شوية ديال الضو فاش كاتكون السما صافية. هاد الضو كافي للعين ديال بنادم باش تشوف لأجسام بلا ضو صطيناعي وبالتالي بنادم يقدّ إيدير أنشيطة خرجانية. والاكين، ومعا النيهاية ديال الشفق لمدني فاش لأرض كاتدور لواحد لوقت اللي الشمش كاتولي ف6 درجات تحت لأفق، كاتولي لإضاءة ليصطيناعية ضرورية للشوف. لغساق عامة كايعني الشفق لفلكي، أولا لفترات لمضلّمة ديال الشفق دلعشية قبل من لبدية تاع الليل.

وقت لغساق هو لوقيتة لمضلمة من الشفق لفلكي، قبل ما يجي الضلام لكامل ديال الليل، ويقدر إيكون أضلم وقت ديال الشفق دلعشية. تيقنيا كاينين 3 ديال لمراحيل دلغساق:

لغساق لمدني: كايبدا فاش كايكون الضو كافي باش أغلبية لحوايج يتشافو، نفس لحاجة للأنشطة فبرّا، ولاكين ماشي كولشي يقد إيبدا. كايبدا لفجر لمدني فالتعريف الرسمي فاش كاتكون الشمس بزاوية 6 درجات تحت لأفق. إلى كانت السما صافية، كاتكون السما فديك لوقيتة زرقة، وإلا كان فيها السحاب أولا الدحاس، إقدر إيكون اللون ديالها ليموني، صفر أولا لݣري. بعض النجوم أولا لكواكيب بحال الزهرة والمشتري يقدر إيتشافو بلعين فهاد لوقيتة. هاد لفجر كايتبعو لوقيتة ديال الشفق لمدني.

لغساق لبحري: كايبدا فاش كايكون الضو باقي كافي للبحارا باش يفرقو السما على لبحر ولكن السما كاتكون مضلمة بزاف ومايمكنش للناس يديرو اللي بغاو على برّا بلا مايكون الضو ديال الزنقة متلا. كايبدا لفجر لبحري فالتعريف الرسمي فاش كاتكون الشمش 12 درجة تحت لأفق فلعشية. كاتكون السما مضوية بشكل كافي باش يفرّق لواحد مابين لأرض ولما (ضاية، بحر... ). من مورا لغساق لبحري كايبدا لغساق لفلكي.

لغساق لفلكي: كايبدا لغساق لفلكي فاش الشمس كاتكون 18 درجة تحت لأفق فلعشية. هاداك هو اللي كايتسمى الضو اللخر أولا وقيتة لعشا عند لمغاربة. هاد لفجر كايبدا وماكايسالي حتى كاتوصل الشمس ل18 درجة تحت لأفق. فهاد لوقت غير شوية ديال ضو الشمس هو اللي كايضوي السما والنجوم لباهتة كاتبدا تبان وكاتولّي تشاف. صعيب بزاف على لواحد يفرّق ما بين لفترة ديال الليل ولغساق لفلكي، وبزاف فلبلايص اللي فيهوم التلوت بالضو. لغساق لفلكي هو لبدية ديال الشفق لفلكي، هادا مكايساليش حتال للفجر لفلكي اللي كايجي من موراه.




#Article 602: كرتون نتورك العربية (263 words)


كرتون نتورك العربية أو كرتون نتورك بالعربية هي قناة فتفازة ديال دراري صغار و لمراهقين و هي قناة كدوز فابور و تابعة لشركة كرتون نيتورك، هي قناة عربية و موجها للجمهور العربي (الشرق الأوسط و شمال افريقيا). شركة تيرنر برودكاستيج هي لي مالكة لقناة، لي تابعة لشركة تايم وارنر. بدات لقناة ف 10 أكتوبر 2010 ف لإمارات العربية ف الساعة 10:10 د صباح بتوقيت السعودية.

لقناة كدوز فقمر عرب سات (بدر 6) و نايل سات و ياسات، كتعتابر كرتون نتورك العربية قناة مجانية بديلة على قناة كرتون نتورك مينا لي كتكون بالاشتراك ف شبكة بي إن.

لبرامج لي كايدوز ف كرتون نتورك العربية

انتجات كرتون نتورك العربية أول أغنية ديالها عام 2012 باسم كرتون نتورك حياتي فيها متحركة وكانت فيها لقطات من لبرامج ديال كرتون نتورك القديمة وغناء مغنين ودازت ف قناة كرتون نتورك بالعربية ف التلفاز

انتجات كرتون نتورك العربية هاد الأغنية عام 2016 باسم كرتون نتورك هي العنوان وكانت فيها شخصيات ديال كرتون نتورك كيغنيو لي هما لعم جدو، السيد غاس، بن 10 (أومنيفرس)، غريزلي، دب ثلج، غامبول) وكانت الأغنية من أداء أستوديو ايمدج برودكشن هاوس اللبناني و مصرية ميديا المصري وتلاقات لأغنية اعجاب كبير من المتابعين و وصلات الأغنية 11 مليون مشاهدة فليوتيوب فعام 2020 ودازت ف قناة كرتون نتورك بالعربية ف التلفاز

انتجات كرتون نتورك العربية أغنية جديدة عام 2020 باسم كرتون نتورك الان في الحال وكانت فيها لقطات من لبرامج ديال كرتون نتورك الجديدة وغناء مغنيين (قصي و عمار) ودازت ف قناة كرتون نتورك بالعربية ف التلفاز

في مارس 2012 خرجات واحد لقناة عربية باسم كرتون نتورك مينا من نفس إدارة كرتون نتورك العربية، الاختلاف هاد لقناتين :




#Article 603: ليل (186 words)


الليل بصفة عامّة هو لفترة اللي ماكاتكونش فيها الشمش فالسما. كايجي الليل مورا لغساق وقبل لفجر، لعكس ديال الليل هو النهار. لبدية ولافّان ديال الليل كايختالفو على حساب كيفاش كولا واحد عايش حياتو وفينا بلاصة وشحال دالساعات ديال الضلام كاينين فليوم لكولّا وقيتة فلعام. كايكون ختيلاف فلمدة ديال الليل على حساب خط لعرض ولفصل اللي كاين فيه لمراقيب. إلا تخاد الليل كفترة كاتبدا من مورا لغساق يمكن نحددو لبدية ولافّان ديالو بوقات لماݣانة من 9 دلعشية حتال 4 دلفجر.
 
الضلام لكامل أولا الليل لفلكي هو لفترة مابين لغساق لفلكي ولفجر لفلكي فاش كاتكون الشمش مابين 18 و90 درجة تحت لأفق وماكاتضوّيش السما. فخطوط لعرض مابين 48.56 و 65.73 درجة (شمال أولا جانوب) ماكايجيش الضلام فالصيف لهاد لبلايص، حيتاش واخّا كاتغرب الشمش فهي عمّرها كاتوصل 18 درجة تحت لأفق.

الضو الطبيعي كايكون بالليل وكايجي من تخليطة ديال الضو دلقمر ولكواكيب وضو النجوم ولفجر لكدّاب ولوهج دالليل. فبعض لحالات يمكن للشفق لقطبي أولا لبرق أولا الضو اللي خارج من بعض لحيوانات ولحشرات أنه يضوي لمكان فالليل. داك الضباب اللي كايديرو الشعة ديال الضو دالزنقة كايتسمى التلوت بالضو، ويقدر هاد التلوت يدير مشاكيل ويتداخل مع الرصد لفلكي ولأنضمة لبيئية.




#Article 604: وقت لادفنتر (200 words)


وقت المغامرة (وقت المغامرة مع فين وجايك) هو مسلسل دروسوم ميريكاني عندو عشرة الأجزاء صايبو بيندليتون وارد لكرتون نتورك. المسلسل تيتبع مغامرات فين (صوت جيريمي شادا) وهو دري بشري، في عالم ما بعد الحرب النووية، وعشيرو الملب وخوه بالتبني جايك (صوت جون ديماغيو)، وهو كلب سخري تيغيير الشكل والحجم ديالو ، فين وجايك تيعيشو ف «أرض أوو». المسلسل مبازي على فيلم قصير من إنتاج فريديراتور ستوديوز لنكلوديون. بعد فترة قصيرة المسلسل انتاشر كالـفيروس على شبكة الإنترنت، كرتون نتورك اختارت تدير سلسلة كاملة اللي تم المعاينة في 11 مارس، 2010 وأول مرة رسميا في 5 أبريل 2010 وتعرضات آخر الحلقات ديالو نهار 3 سبتمبر عام 2018. تصنفات السلسلة TV - PG ( يشوفوه لي ما فوق 12 سنة وتحتوي على مشاهد عنف خيالي).

السلسلة نجحات تجاريًا بالنسبة لكرتون نتورك من ناحية المشاهدات وعندها قاعدة جماهيرية كبيرة من المعجبين والمشاهدين لي وصل عدد مشاهدين فبعض الحلقات في النسخة الإنجليزية إلى الثلاثة مليون وليهو رقم قياسي بالنسبة لسلسة موّجهة بصورة أساسية للأطفال خيت السلسلة تابعوها المراهقين والبالغين ، وخدات السلسلة مراجعات إيجابية عموماً من قبل النقاد وربحات بزاف من الجوائز ومنها ثمانية جوائز إيمي برايم تايم وثلاثة جوائز آني وجائزة بيبودي وجائزتي أكاديمية بريطانية تلفزيونية للأطفال وجائزة بيكسل وجائزة مجلة كيرانغ! وبزاف اخرين.




#Article 605: ستيفن يونيفرس (220 words)


ستيفن لبطل هو روسوم صيباتو ريبيكا شوغر ومن لإنتاج ديال استوديوهات كرتون نتورك. داز فقناة كرتون نتورك لأول مرة في 4 نونبر 2013 وعلى كرتون نتورك العربية في 3 غشت 2014 ولكن توقف العرض ديالو نهائيا فيها نهار 10 أكتوبر 2016.

الشخصية دستيڤن مبنية على خو ريبيكا شوغر الصغير ستيفن شوغر،اللي هو واحد من لفنانين دلخلفية ديال لمسلسال.

ستيفن يونيفرس طفل تيحاول يعيش مغامرات و يحمي العالم من التهديدات الشريرة بمساعدة الكريستال جيمز لي هو جزء منهم جزء ، والكريستال جيمز الثلاثة مجموعة من المقاتلات ( لي معندهمش جنس محدد ولكن شكلهم تيشبه الإنات ) بين المجرات الذين تيستخدمو قوة دالأحجار ديالهم الخاصة باش يستدعيوا أسلحة سحرية. والأعضاء الأربعة هما غارنت، أميڤيست، بيرل وستيفن. ستيفن هو الدري لي عندو 14 عاما(كما تكال فالمسلسل حلقة العيد ميلاد) ورت الحجر دالام ديالو (بعبارة اخرى مو تحولات ليه )، روز كوارتز. ,بعدما تولد ستيفن ، كان نص انسان ونص جيمز حيث مو تخلات روزعن مظهرها الخارجي باش يتولد ستيفن وهو تيعيش مع الجيمز وتيمشي عند باه غريك من وقت لآخر...تيحاول ستيفن معرفة أسرار أستخدام الحجر ديالو ، وهو عايش ف بيتش سيتي بالقيام بأنشطة مع الكريستال جيمز الأخريات، سواء مساعدة على إنقاذ الكون أو لا فقط يتسركلو وتمر الاحداث والقصص في المسلسل لينضم المزيد من الاعضاء في فريق الكريستال جيمز، هادشي لي غيدير تهديد لحكام(بلو ،وايت ،ييلو) دالكوكب الام ديال الجيمز.

الأصوات:-

ّّ




#Article 606: ووندر بارك (120 words)


ووندر بارك (Wonder Park) هو فيلم روسوم ديال مغامرات لي تصدر عام 2019 و لي أنتجاتو شركة باراماونت أنيميشن و نيكولوديون موفيس، مع تعاون استوديوهات إليون أنميشن .

كيهدر لفيلم على بنت صغيرة سميتها جون بيلي، لي كتمنى تدير مدينة ألعاب سحرية لي خدامين فيه حيوانات كيهدرو : بومر دب زرق كبير لي كيستقبل الضيوف، جريتا خنزير، جوس وكوبر جوج ديال لخوت سمور، ستيف قنفد وهو مدير لبارك، و Peanut قرد الشمبانزي و هو زعيم فلبارك. و مها كتعاونها باش تحقق لحلم ديالها .

صدر ستيفن برايس لموسيقا ديال فيلم ووندر بارك ف مارس 2019.

سجلات جريس فاندروال أغنية هايدأواي للفيلم .

قبل ما يتصدر لفيلم، صدرات شركة بيكسُول لعبة فتيليفونات باسم وندر بارك ماجيك رايدز (لبارك لعجيب ركوب سحري).




#Article 607: تين تايتنز زيدو! (136 words)


تين تايتنز زيدو ولا تين التايتنز غو (لونجلي: Teen Titans Go!) هو مسلسل رسوم ميريكاني بدا العرض ديالو فشهر أبريل عام 2013 على قناة كرتون نتورك الميريكانية المسلسل هو ريبوت (سلسلة جديدة من عمل تدار قبل تتجي بفكرة جديدة واحدات جداد وتقدر تكون تتختالف مع السلسلة القديمة فبزاف الحوايج كاين فرق بينها وبين الريميك لهو انتاج نفس السلسلة بطريقة حسن. وتصحيح الاخطاء مع الحفاظ على الشخصيات عل نفس الفكرة والشخصيات والاحدات) ديال مسلسل مراهقو التايتانز الي تعرض قبل لكن بواحد طابع كوميدي كوميدي ، المسلسل تيدوي على روبين وريفين و بيست بوي وسايبورغ و ستار فاير يتألف المسلسل من 216 حلقة بدات قناة ام بي سي 3 بعرض الموسم اللول بدبلجة عربية في شهر مايو 2015 ومن موراه تعاود تدبلج وتعرض على كرتون نتوورك بالعربية وتعرض جزء من الموسم اللول في السادس من مارس 2016

رييفن:




#Article 608: بن 10 ضد الكون (209 words)


بن 10: ضد الكون هو فيلم داز ف كرتون نتورك ف 10 أكتوبر 2020. و دار ليه إعلان لأول مرة ف 19 فبراير 2020. لفيلم هو جزء من لموسم لخامس ديال بن 10 (2016).

ركز بن على انفجار ترا ف لماضي وتضاعف ضرر ف لعالم. و خاص بن يسافر ف لفضاء باش إنقاذ لعالم. فداك لوقت، جتمع جوين ولجد ماكس باش يعاونو فإنقاذ لعالم بعد مامشا بن. ولكن لبطل ديالنا شدوه لأشرار. باش ينقذ بن لعالم ، خاصو يكون قادر باش يلاقي طريقة باش يرجع للعالم ديالو.

داز لفيلم لأول مرة ف غاع قنوات كرتون نتورك فلعالم ف 10 أكتوبر 2020 وف كرتون نتورك مينا ف 6 دجنبر 2020.

تصدر فيلم بن 10: ضد الكون رقميًا ف 11 أكتوبر 2020، بعد يوم واحد من لعرض لأول ديال لفيلم رسمي، صدرات وارنر بروس ف ديفيدي ف 27 أكتوبر 2020.

ف 11 أكتوبر 2020 الساعة 10:00 ف تركيا تنشر لفيلم ف قناة كرتون نتورك تركية ف ليوتوب.

حصل لفيلم على عرض فسينما ف دولة لإمارات العربية.

ف 19 فبراير 2020، دارت كرتون نتورك إعلان رسمي بلي غادي يبدا تصوير فيلم بن 10 جديد. تعرض لإعلان رسمي ديال لفيلم رسميًا ف كوميك كون ف 23 يوليوز 2020.

لموسيقى ديال بن 10 ضد الكون ألفها كيفن مانتاي وهي متوفرة ف ساوند كلاود .




#Article 609: غرافيتي فولز (121 words)


غرافيتي فولز (بلونجلي: Gravitys) هو مسلسل دروسوم مغامرة رعب كوميدي ميريكاني مكون من جوج دالمواسم 40 حلقة مع مجموعة من الحلقات القصيرة (اتلقاها فيوتيوب *دليل ديبر نحو المجهول*)من تأليف أليكس هيرش لي خدم على عدة أعمال شحال هادي، وعمل على لوحات قصص مسلسل مغامرات فلاب جاك وكان مؤدي دالأصوات في مسلسل فارس وفادي. وإنتاج والت ديزني تيليفشن أنيمايشن. تعرض عام 2012 وإنتهى رسميًا مورا الموسم الثاني فبراير 2016، تعرضات الحلقة الأولى فالشرق الأوسط لمرة لولة ف19 أكتوبر، 2012، وتعرض المسلسل رسمياً في 10 نوفمبر، 2012 على ديزني الشرق الأوسط. تم عرض الموسم اللول 29 يونيو، 2012. وتأكيد عرض الموسم الثاني في 14 يونيو، 2014. وبعدما كمل الموسم الأول كامل قررت شركة ديزني تنقل المسلسل إلى ديزني أكس دي بداية من أغسطس2014.




#Article 610: لاتينية (180 words)


اللاتينية (باللاتينية: Lingua Latīna) هي لغة هندو-أوروپية لأصل ديالها من الطاليان، و بالضبط من النواحي د لمدينة د روما. اللاتينية كان هي اللغة اللي حاكمة لعالم ف لوقت ديال لإمبراطورية الرومانية، اللي نشرات هاد اللغة ف لأغلبية ديال أوروپا و شمال إفريقيا. ملّي دخلات لمسيحية للإمبراطورية الرومانية، ولاّت اللاتينية مرتابطة بيها، و باقا تال دابا هي اللغة ديال لكنيسة الرومانية لكاطوليكية، و هي اللغة الرسمية ديال لبابا ديال لڤاتيكان.

ف لعصور لوسطانية، كانت اللاتينية هي اللغة د لعلم و لقراية ف أوروپا، و هي اللغة اللي كانوا كيكتبو بيها لكتّاب و لعولاما تال لقرن 17. من مورا ديك لوقت، ولاّت كل بلاد كاتبان فيها اللغة ديالها اللي بداو كيكتبو بيها الناس دبالها.

اللاتينية هي لأصل ديال بزاف د اللغات ف أوروپا، منها الطاليانية و لفرانساوية و الصبليونية و لبرتغالية و الرومانية. و هي لغة أترات بزاف تا ف لينڭليزية، اللي فيها بزاف د لكلمات أصلهم لاتيني.

على حساب معلومة من واحد من لقادة د لڤاتيكان، كاين تقريبا شي 100 واحد ف لعالم اللي كيهضرو اللاتينية بطلاقة، و عاد كاين لملاين اللي كيتعلّموها ف لمدراسة ف بزاف د لبلدان ف لعالم.




#Article 611: ماركو پولو (161 words)


ماركو پولو (بالطاليانية: Marco Polo - تولد و مات ف ڤونيز - 15 شتنبر 1254 - 8 يناير 1324) كان تاجر، كاتب و مستكشف من ڤونيز اللي سافر ف الطريق ديال لحرير ف الشرق د آسيا. تعرف ماركو پولو ف التاريخ بلكتاب ديالو لكتاب د لعجايب، اللي تعرف تا ب السّفرات د ماركو پولو. هاداك لكتاب (اللي تكتب جوايه لعام 1300)، تشهر بزاف ف أوروپا، و كان كيعاود على مونڭوليا و الشينوا و بزاف د لمدون ف الشرق د آسيا، و لعيشة فيهم.

تولد ماركو پولو عام 1254 ف ڤونيز ف عائلة غنية د التجار. كانو ابّاه و عمّو هوما أول غربيين مشاو يبيعو و يشريو ف الطريق د لحرير ف الشينوا، و تعرّثو على قوبلاي خان، اللي كان أكبر ملك ف مونڭوليا، و كان لحفيد د جينكيز خان.

ف 1270 رجع عمّو و ابّاه و عاودو على السفر ديالهم، و ف عام 1272 عاودو سافرو و مشا معاهم ماركو، اللي غادي يبقا 17 لعام تما قبل ما يعاود يرجع لبلادو.




#Article 612: هيروهيطو (145 words)


هيروهيطو (بالجاپونية: 裕仁) (تولد ف 29 أبريل 1901 - مات ف 7 يناير 1989) كان هو لإمبراطور رقم 124 ديال الجاپون على حساب الترتيب التقليدي د لخلاقة، و حكم لبلاد من 1926 ل 1989. ف لوقت اللي حكم فيه، وقعو بزاف د لأحدات ف لبلاد، أهم وحدا فيها هي ملّي شاركات الجاپون ف لحرب لعالمية التانية، و خسرات من مورا ما تصيفطو عليها جوج قنابل نووية. واخا لأغلبية ديال اللي كانو كياخدو لقرارات مشاوليهم بلايصهم و تحاكمو بجرائم حرب، هيروهيطو بقا ف بلاصتو، و كمل لحكيم ديال لبلاد كتر من 50 عام آخرا، حتا ولاّت تاني أحسن قتيصاد ف لعالم و بلاد متقدمة بزاف ف لوقت اللي مات فيه.

هيروهوطو هو لإمبراطور اللي حكم الجاپون لأكبر وقت ف التاريخ، و واحد من لملوك اللي حكمو أكبر وقت ف لعالم كامل. من 1979، ولاّ هيروهيطو هو لماليك لوحيد ف لعالم اللي كان عندو اللقت ديال إمبراطور.




#Article 613: جيهات لمغريب (164 words)


ف2015 تدار تقسيم جديد للمغريب واقف على لجيهاوية لمتقدمة واللامركازية، وتدار برنامج ديال لحوكومة باش تعطى واحد سّتيقلالية لكلّا وحدة من لجيهات ديال لمغريب. تقسمات لارض ديال لبلاد ل12 جيهة. قبل ومن 1971 حتال 1997 لمغريب كانو فيه 7 ديال لجيهات، من موراها وفلفترة مابين 1997 و2015 كانو فيه 16 جيهة. كل جيهة عندها واحد لوالي كايعينو لماليك فمجليس ويزاري، وكايتنتاخب الرئيس ديالها فمجليس عام.

هاد لجيهات ب12 مقسمين ل13 عمالة و62 إقليم، يعني 75 تقسيم تاني. لكل واحد من ديك التقسيمات كاينين جماعات ترابية حضرية وقروية، وكاينين حتى لبلديات ولمقاطعات والدّوائر. عمالة الدار البيضا عندها ستيتناء، حيتاش مقسمة لعمالات لمقاطعات. أكبر جيهة فلمغريب من ناحية لميساحة هي جهة العيون الساقية الحمراء وأصغر وحدة هي جهة طنجة تطوان الحسيمة. من ناحية السكّان، لجيهة اللي عامرة بزاف هي جهة الدار البيضاء سطات وفيها كتر من 6 دلمليون نسمة، أمّا لجيهة اللي فيها أقل عدد ديال السكان هي تحسب فيها قل من 150 ألف دلبشار ف2014.

ما بين 1997 و2015 لمغريب كانو فيه 16 ديال لجيهات:




#Article 614: جينكيز خان (122 words)


تيموجين بوريڭين، لمعروف ب جينكيز خان (بلمونڭولية: Чингис Хаан) (تولد ف 1158 - مات نهار 18 غشت 1227) كان هو لمؤسس و أول إمبراطور ديال لإمبراطورية لمونڭولية، اللي كانت أكبر بلاد ف لعالم ف لوقت ديالو. جينكيز خان كان عسكري واعر، و داكشي علاش قدر يجمع بزاف د الناس و لقبايل عليه، و يكون جيش مجهد اللي غزا طرف كبير من آسيا و وصل تال بغداد ف لعراق. بفضل هاد النجاحات لعسكرية، كاين ناس كسعتابرو جينكيز خان أوعر واحد دار لغزو فالتاريخ، و لكن كان ناس تينتاقدوه و تيقولو باللي كان سفاح و قتال و حرق لمدون و دار بزاف د لجرائم و لمجازر.

الناس ديال مونڭوليا تيحتارمو بزاف جينكيز خان تال دابا، و تيعتابروه هو لأب لمؤسس ديال الدولة د مونڭوليا.




#Article 615: فرناندو ماجلان (145 words)


فرناندو دي ماجلان (بلبرتغالية: Fernão de Magalhães) (تولد ف 1480 ف سابروزا ف لبرتغال - مات ف 27 أبريل 1521 ف لفيليپين) كان بحّار و مستكشف و قايد برتغالي، تعرف باللي كان أول واحد قاد سفرة د لبحر دازت من أوروپا لأسيا من لغرب، و اللي ضرب فيها لمحيط لأطلسي كامل، و داز للمحيط لهادي، من لمضيق اللي تسمّا دابا بسميتو: لمضيق د ماجلان. ماجلان هو أول واحد ضرب نص دورة على لكرة لأرضية (من صبانيا للفيليپبن). كان باغي يكمّل الضورة كاملة ولكن تحاربو مع السكان ديال واحد لجزيرة سميتهاماكتان، و تمّا فين تقتل.

من بين 237 بحار ف لباطويات لخمسة اللي مشاو مع ماجلان فاللول د السفرة، بقاو غي 18 لواحد اللي ضربو ضورة كاملة على لكرة لأرضية (مشاو و رجعو لصبانيا). من مورا ما مات ماجلان (اللي ما كملش الضورة)، لبحّار لباسكي خوان سيباستيان إل كانو هو اللي كمّل السفرة تا رجعو لبلادهم.




#Article 616: لمضيق د بيرينڭ (133 words)


لمضيق د بيرينڭ هو مضيق ف لبحر كيفرّق ما بين لقارات ديال آسيا و أمريكا، و بالضبط ما بين آلاسكا ف لميريكان، و سيبيريا ف روسيا. تسمّا هاد لمضيق على سميت لبحار الدانماركي ڤيتوس بيرينڭ، اللي كان خدّام ف لبحرية د لإمبراطورية الروسية.

أضيق بلاصة ف لمضيق لعرض ديالها 83 كيلوميطر، و أغرق بلاصة فيه هي 90 ميطرو. كاين واحد لعدد د لجزر ف لمضيق، منهم جوج اللّي معروفين، و هوما: ديوميد لكبيرة (ديال روسيا)، و ديوميد الصغيرة (ديال لميريكان)، و اللي بيناتهم غي 4 كيلوميطر، و لكن مفرّقهوم لخط ديال لوقت، و هو اللي تيخلّي بيناتهم ديما تهار (23 ساعة) ديال لفرق.

كاينة نظرية علمية تاتقول باللي أول بنادم سكنو لقارة د أمريكا كانو دخلولها من آسيا من هاد لمضيق، ملّي كانت شي بلايص ماغارقاش بزاف، و كانو الناس يقدرو يتمشّاو فيها.




#Article 617: دييڭو مارادونا (158 words)


دييڭو أرماندو مارادونا فرانكو (30 أكتوبر 1960 - 25 نونبر 2020) كان كوايري ومدرّيب أرجنتيني. كانو كايسمّيو عليه إل دييز، پيلوسا وإل دييݣو. ربح كاس لعالام ديال لمكسيك فعام 1986.

هاد لكوايري معروف عليه أنه أحسن كوايري داز فالتاريخ ديال كورة. هو اللي كان السباب أن لفرقة دبلادو تدّي كاس لعالام ف1986، وهو يالّاه عندو 25 عام. لحركات ديالو ولموهيبة ديالو خلّاوه يكون واحد من أحسن لكوايرية فالتاريخ. واحد لمرّة كونطرولا كورة لكتر من نص التيران، دخل فلمدافعين النݣالزة، وشيّر كورة برجلو ليسرية لجيهة لمرمى وماركا ݣول. كاس لعالام خلّا مارادونا يولّي أشهر كوايري من مورا پيلي ديال لبريزيل.

مارادونا كان كايدّاوا نهار 2 نونبر 2020 فواحد الصبيطار فلاپلاتا فلارجنتين بسباب أمراض عقلية عندو. دار عمليّة جراحية النهار اللي من موراه باش يحيّد ورم خايب فدماغو. خرج من الصبيطار نهار 12 نونبر من مورا مانجحات لعملية اللي تدارت ليه.

فنهار 20 نونبر 2020 مات مارادونا بسباب سكتة قلبية جاتو فدارو فمدينة بوينوس آيريس فلارجونتين وعمرو 60 عام.

الملاحظات




#Article 618: ميطورولوجيا (116 words)


لميطورولوجيا ؤلا تاطقسيت (ب نڭليزية Meteorology) هوّا مجال ف صيونص كيدرس لجو ديال لأرض، ؤ كيركّز سيرتو علا تّغيرات ديال طّقس ؤ تّنبو ب شنو غايطرا فيه. ضاهرات لْميطورولوجية ؤلا تّاطقسية هي أحدات ف طّقس لّي كانقدرو نشوفوها، ؤ هاد لمجال كيخلّينا نفهموها.
ؤ كاينين متبدلات فيزيكية ف لجو هوما لّي كيتحكمو ف هاد لأحدات، بحال لحرارة، ضّغط لْجوي، لكمية ديال بخار لما، ؤ تفاعلات ديالهم معا بعضياتهم. لأغلبية ديال تّغيرات د طّقس لّي كنشوفو كيوقعو ف طروپوسفير.
وخّا لميطورولوجيين كيخدمو دابا بزّاف ب لأورديناتور ؤ كيطورو فيه نماديج ديالهم (تنبو رقمي ب طقس)، باقين بزاف كيخدمو حتا ب تقنيات ؤ نماديج قدام لّي تدّارو قبل ما يكونو لأورديناتورات منتاشرين ؤلا عندهم قدرة كبيرة د لحساب.




#Article 619: النادي المكناسي (207 words)


النادي الرياضي المكناسي واللي معروف بCODM (لكوديم)، هو كلوب عندو بزّاف لفروع كاين فمدينة مكناس لمغريبية. لفرع ديال كورة وحتا هو عندو نفس السمية. تيلعب دابا فلبوطولة لوطنية للهواة. لفرع ديال كورة فايتلو دّا كأس العرش عام 1996 ولبوطولة عام 1966.

تترجع لأصول دالنادي المكناسي لعام 1913 فين أسس لمستعمير دفرانصيص نادي الاتحاد الرياضي المكناسي. هاد لكلوب غادي يتفكك من مورا ليستيقلال ياش تعوضو لفرقة ديال رشاد مكناس. هاد اللخراني ماغديش يحقق نتائج زوينة بزاف وغادي يتدمج عام 1962 مع جوج فراقي خرين من مكناس اللي هوما لفرقة دلجمعية الرياضية طنجة-فاس و لفرقة ديال دفاع بني محمد باش يصاوبو النادي المكناسي.

النادي المكناسي غادي يربح كاس لعرش لأول مرة فالتاريخ نتاعو عام 1966. من بعد ما غادي يغلب فلفينال لغريم ديالو التقليدي المغرب الفاسي..

من بعد غادي يوصل النادي المكناسي للفينال دكاس العرش عام 1981 فين غادي يخسر ضد الوداد البيضاوي ب 1-2. و ف1982 غادي يكون هو لوصيف دلبطل دلبوطولة اللي داها النادي القنيطري.

أول و آخير بطولة عند النادي المكناسي داها عام 1995. و فعام 2011 غادي يوصل للنهائي دكاس لعرش للي غادي يخسرو ضد المغرب الفاسي ب 0-1. هادي غادي تكون بداية لأزمة ديال هاد لفرقة اللي غادي تهبط لبوطولا 2 فلعام اللي من موراه، و يهبط من بعد لبوطولة لوطنية للهواة سنة 2016.




#Article 620: مولاي سماعيل (209 words)


مولاي سماعيل بن الشريف. سلطان للي حكم المغرب ما بين سنة 1672 سنة 1727. من بعد ما خلف خوه مولاي رشيد. مولاي اسماعيل تولد سنة 1645 ف سجلماسة. باه هو الشريف بن علي حاكم تافيلالت. للي كان تيدعي انه تينحدر من حسن الداخل (واحد من احفاد الرسول للي جا المغريب فالقرن 13 ميلادي). مولاي اسماعيل كان والي دمكناس عهد خوه مولاي رشيد. من بعد هاد الاخير عينو كحاكم لشمال المغرب فاش مولاي رشيد هبط يرجع الجنوب خصوصا مراكش للي كانت تحت حكم السعديين.

مولاي اسماعيل تولا الحكم من بعد وفاة مولاي رشيد. فالبداية واجه مجموعة من التمردات خصوصا من عند ولد خوه محمد بن محرز. لكن قدر بحبس هاد تمردات و يرجع عدد من الثغور المغربية من حكم الاروبيين منهم طنجة, لعرايش و لمهدية.مولاي اسماعيل قدر يقوي السلطة المركزية ديالو من خلال انشاء جيش عبيد البخاري و تطوير الكيش للي هي جيش القبائل العسكرية التابعة للسلطان. ايضا حول العاصمة ديالو من فاس ل مكناس للي وسعها. و بنا فيها القصر ديالو دورها بالسور للي مازال دابا سميتو الاسوار الاسماعيلية.

مولاي اسماعيل حكم المغرب لمدة 55 عام من للي كان عندو 26 عام حتى الوفاة ديالو فعمر 81 عام. الوفاة ديالو غادي دخل المغرب لازمة سياسة لعقود بسبب صراع مابين ولادو على الحكم و تدخل جيش عبيد لبخاري ف سياسة.




#Article 621: لحسن التاني (382 words)


لحسن تاني ؤلا لحسن بن محمد (ب لأمازيغية: ⵍⵃⴰⵙⴰⵏ ⵡⵉⵙ 2) لماليك ديال لمغريب، حكم بين عام 1961 ؤ 1999. ساهم مع باه لماليك محمد لخاميس ف تحرير لمغريب من لإحتلال لفرانسوي ؤ صبنيولي، تعرف ب ذكاء ؤ شطارة ديالو ف ضومين د سياسة، كيتلقب ب أب لمغريب لحديث ؤ باني دولة لحديثة، قدر يصوݣ ب لمغريب ب قوة ل واحد لإستقرار مقدروش عليه دول اخرى حتال دبا، توجه ب بلادو ل معسكر رأسمالي ف لوقت لي كان اغلب دول لمنطقة تابعة للمعسكر شتيراكي، لحسن تاني من بين ابرز ملوك لمغريب حيث قدر اوحد لبلاد ؤ يحرر صحرا من لإستعمار صبليوني ب لمسيرة لخضرا د 1975.

تولد لحسن تاني ف القصر ديال السلطان ف الرباط مابين الظهر و العصر نهار التلات 9 يوليوز/ جويي 1929 . ذخل ل السياسة فاش مات باه محمد الخامس ولي كان ملك المغرب نهار 26 فبراير / فيفرييه 1961 وتما فين ولا لحسن 2 ماليك . قرا القانون ف الرباط و خدا الذيبلوم ف بوردو ففرانسا .

كان عندو بزاف ديال المهمات فاش كان ولي العهد و حتا هو تنفى مع محمد الخامس من طرف الفرانسيس ل كورسيكا و مدغشقر هادشي لي خلا الشعب يدير لي ف جهدو باش يطيح الإستعمار، خصوصا فاش دارو بن عرفة ماليك على المغريب و لي كان غاذي يتقتل على يد علال بن عبدالله ليكان مقاوم و داكشي علاش تسمات ثورة الملك و الشعب ، لحسن تاني كان هو لي كيترجم ويكتب الميساجات ديال باه ف المنفى .

رجع محمد الخامس هو و ولي العهد لحسن تاني من مدغشقر ل المغرب و خذا المغريب الإستقلال ديالو ف  1956 .

ف 9 يوليوز/ جويي ولا لحسن 2 رسميا ولي العهد من بعد ما دار القسم قدام باه ف القصر ديال الرباط.

جمع شمل لمغاربة

بناء اقتصاد عصري

سياسة السدود

أهم حاجة دارها احسن تاني هي لمسيرة لخضرا ولي كان طالب فيها المغرب ف البدية ديال السبعينات من السبنيول/إسبانيا يرجعو ليه الصحرا، وطلب لحسن تاني من الشعب ديالو باش يديرو مسيرة ل الصحرا . داكشي لي خلا 350 ألف مغربي و مغربية يخرجو هازين القرآن و الراية المغربية ب القيادة ديال لحسن تاني . هادشي خلا السبنيول/ إسبانيا تخرج من الصحرا من مور ما تقسمات ف معاهدة مدريد ولي عطات الساقية الحمراء ل المغريب و واذي الذهب ل موريطانيا باش ميوقع تا شي مشكيل بينهم بزوج .

 شخصيات : الحسن الثاني - موقع (الجزيرة.نيت)




#Article 622: محمد الخامس بن يوسف (183 words)


محمد الخامس بن يوسف هو سلطان المغرب من 1927 لنفي ديالو فعام 1953. و من بعد ما رجع من المنفى من 1955 حتي الوفاة ديالو 1961.

محمد الخامس هو ولد السلطان مولاي يوسف للي تولا العرش سنة 1912. ورت العرش ديال باه سنة 1927 و كان عمرو غير 17 سنة. الفرنسيس حطوه فالعرش حيت اعتابرو انه غادي يكون ساهل التحكم فيه. و لكن من بعد محمد الخامس غادي يولي عندو موقف داعم للحركة الوطنية. فسنة 1944 غادي يتلاقا فمؤتمر كازا بالرئيس د ميريكان زوزفلت و ياخد منو وعد باستقلال المغرب...

محمد الخامس لعب دور فلمقاومة داضهاد حكومة فيشي فالحرب العالمية التانية لليهود. هادشي خلاه محبوب عندهوم و من اسباب تسمك ليهود من اصول مغربية فاسرائيل بتمغرابيت. 

محمد الخامس غادي يدعم ايضا المقاومة المغربية. فعام 1947 غادي يلقي خطاب فطنجة غادي يطالب فيه باستقلال المغرب. و سنة 1953 غادي يتنفى لمدغشقر. من بعد و بضغط من المقاومة الفرنسيس غادي يرجعوه ف1955. و المغرب غادي ياخد الاستقلال ف1956. محمد الخامس غادي يرجع اللقب الرسمي ديالو من سلطان لملك ف1957. و غادي يبقى يحكم حتى ل1961 من بعد غادي يورت ولدو لحسن التاني العرش من بعدو.




#Article 623: عبد الحفيظ بن الحسن (156 words)


عبد الحفيظ هو سلطان للي حكم المغرب مابين 1908 فين خدا العرش د خزه عبد العزيز و 1912 فين تنازل على العرش لمولاي يوسف.

عبد الحفيظ تزاد ففاس سنة 1876. و باع عة لحسن الأول. كان امير للي مهتم بعلوم الدين و كان تيكتب الشعر. عينو خوه عبد العزيز خليفة على مراكش.
فالبداية كان من المعارضين لتدخل الفرنسيس فالمغريب. هادشي خلاه يتمرد على خوه و يعلن راسو سلطان فمراكش ف1907. و 1908 غادي ياخد العرش د خوه. لكن من بعد غادي يلقا ان السلطى ديالو ضعيفة. فغادي يتحاصر ففاس من قبايل للي تمردات علبه سنة 1911 و غادي يطلب دعم الفرنسيس. ومن عد غادي يسني معاهدة فاس ف1912. و المغاربة غادي يبداو يسميوه سلطان الفرنسيس. من بغد غادي يتنازل على العرش لخوه مولاي يوسف. سنة 1912

عبد الحفيظ غادي يخوي المغرب. غادي يعيش شوية ففرنسا و فطنجة و من بعد فاسبانيا ففترة الحرب العالمية اللولا. من بعد غادي يرجع لفرنسا للي غادي يموت فيها عام 1937.




#Article 624: عبد العزيز بن الحسن (177 words)


سلطان المغرب ما بين 1894 و 1908. تزاد ف1878 ففاس. تولا العرش بعدالوفاة دباه لحسن للول و عمرو غير 16 عام. حتا ل1900 كان الحاكم الفعلي د المغرب هو با حماد بن موسى. الوزير الاعظم.

الفترة للولا د الحكم ديالو ما بين 1894 و 1900 كان باحماد هو لحاكم الفعلي و قدر يضمن واخد الاستقرار النسبي فالمغرب.من بعد الوفاة دباحماد عبد العزيز خدا السلطة الفعلية. عبد العزيز حاول يقوي الدولة ديالو من خلال الزيادة فالضرائب لكن هاد القضية لقات معارضة كبيرة و مقدرش ينفذها. و بسباب هادشي ولا تيتسلف بزاف من الاروبيين للي زاد من حجم التدخل ديالهم فالمغرب. تدخل الاروبيين خلا الشعبية ديالو ضعيفة بزاف.
عام 1906 الدول الاروبية غادي تجمع فالجزيرة الخضرا فاسبانيا مع المغرب و عبد العزيز غادي يوافق على تدخلها فادارة موانئ المغرب, و تفرض عليه انشاء بنك مغربي للي تيتحكمو فيه اروبيين و يبقا يسلف المخزن.
مؤتمر الجزيرة الخضرا غادي يكون بداية النهاية ديال الحكم ديالو حيت غادي يلقا معارضة كبيرة من طرف المغاربة و يكون السبب فانقلاب خو عبد العزيز مولاي عبد الحفيظ عليه.

عبد العزيز غادي يتوفى فطنجة سنة 1943.




#Article 625: الحسن الأول بن محمد (210 words)


الحسن الاول بن محمد هو سلطان للي حكم المغريب ما بين 1873 و 1894 من ما خلف باه محمد الرابع. هو ايضا الواليد ديال 3 سلاطين للي حكمو المغرب هما عبد العزيز و عبد الحفيظ و يوسف بن الحسن. تولد عام 1836 فتادلة و توفة عام 1894.

فترة لحكم ديالو كانت فترة للي الاطماع الاروبية زادت على المغرب و كانت فرنسا و بريطانيا تيفكرو يفرضو الحماية على المغرب كيما دارو فمصر و تونس. لكن هاد الفكرة لقات معارضة من دول اروبية خرا بخال المانيا و اسبانيا. فعام 1880 فالعهد ديالو غادي يكون مؤتمر مدريد للي غادي تشارك فيه 12 جولة اوروبية و المغريب. هاد المؤتمر غادي يؤكد على استقلال المغرب و لكن غادي يعطي امتيازات كبيرة الاروبيين. فمثلا الاروبيين و المحميين غادي يتعفاو من عدد من الضرائب الحاجة للي غادي تخوي خزينة الدولة. لحسن الاول ايضا غادي يدير واحد سياسة ديال التقشف باش ميضطرش يتسلف من الاروبيين و لكن النتيجة ديال هادشي هي ان الجيش غادي يضعاف قدام القبائل للي ممكن تمرد فاي لحظة. باش الحسن الاول يضمن ولاء هاد القبائل غادي يدير عدد من الرحالات فكاع نواحي البلاد اهماها رحلة للي غادي دوز من فاس لتفيلالت لمراكش لكلميم.

لحسن الاول غادي يعين موحا اوحم الزياني قايد قايد فخنيفرة . مزحا اوحمو غادي يولي من اهم المقاومين للستعمار فالقرن العشرين.




#Article 626: محمد الرابع (133 words)


محمد الرابع بن عبد الرحمان هو سلطان للي حكم المغريب ما بين 1859 و 1873. تولد ففاس سنة 1803.

محمد الرابع كان هو قائد الجيش فايسلي المعركة للي خسرها المغريب مع الفرنسيس فالحدود مع الجزائر. من بعد الهزيمة خاول انه يصلح الجيش و يردو شوية عصري.

محمد الرابع تولى الحكم من بعد الموت جباه عبد الرحمان. فعام 1860 السبليون قصفو طنجة و العرايش و احتلو تطوان. من بعد ماالمغرب خسر هاد الحرب مع السبليون محمد الرابع اضطر انه يوقع معاهم معاهدة واد راس. فهاد المعاهدة السبليون خداو سيدي افني و فرضو على المغرب انه يخلص 100 مليون فرنك. هاد الفلوس للي خواو خزينة الدولة حيت بداو تتيتخلصو من الضرائب د الموانئ و بالتالي حرموها من مصدر مهم للفلوس.
محمد الرابع ايضا كان سلطان مهتم بالعلوم و قرا كتابات اقليد و نيوتون و لوجوندر.




#Article 627: عبد الرحمن بن هشام (197 words)


عبد الرحمن بن هشام هو سلطان للي حكم المغريب ما بين 1822 و 1859. تولا الحكم من بعد الموت د عمو السلطان سليمان.

عبد الرحمان تولد ففاس سنة 1778. و تولا الحكم مور عمو سليمان. عبد الرحمان بدا تيرجع العلاقة مع الدول الاروبية من بعد ما كان قطعها عمو سليمان. حيت ماكانش قادر يفرض بزاف د الضرائب على القبايل.فكر انه يعمر خزينة الدولة من الضرائب على التجارة و من القرصنة. حيت حاول يرجع القرصنة د السفن الاروبية لكن النكليز و النمساويين هجمو على المراكز ج هاد القرصنة فالمغرب. بحال تطوان و طنجة و سلا.
اهم حدت و قع فالعهد د عبد الرحمان هو معركة ايسلي. فاش الفرنسيس دخلو الجزائر ف1830 عبد الرحمان بدا تيعاون المقاومة د الامير عبد القادر. بسبب هادشي الفرنسيس علنو الحرب على المغرب و قصفو طنجة و الصويرة و تفرضات على المغرب معاهدة لالة مغنية للي سطرات الحدود بين المغرب و الجزاير قريب من ود ملوية و فرضات على المغرب يقلص من الجيش على الحدود.
عبد الرحمان واجه عدد كبير من الثورات خصوصا بعد لالة مغنية و العهد ديالو كان بداية ضعف السلطة المركزية و دخول الدول الاروبية فشؤون د المغرب.
توفى عبد الرحمان عام 1859 و ورت العرش من بعدو ولدو محمد الرابع.




#Article 628: التقويسة (573 words)


التقويسة هي من الحيلات اللولانين لي قدر بيهوم بنادم يحل باب فالحيط ولّ يهز الضّالة، الغرض من هاد الحيلة هو أن الثقل ديال الضّالة ما يكونش هابط كولّو التحت إنّما يتفرّق على الجناب  . قبل من الحيلة ديال التقويسة كان بنادم تايهز الضّالة ب العتبة، المشكل تاع العتبة هو أنه ماندقروش نديرو حلّة فالباب ولّ تيساع ما بين الحيوط يكون واسع بزاف لأنه يمكن تاتعوّج ولّ وتاتهرّس العتبة.

المصريين القدام ( يامات الفراعنة) كانو تايخلطو هاد الحيلات بجوج (العتبة و التقويسة) باش يهزّو الضّالة، و كانو تايزوقو العتبة بالرسوم لي كانو تايكتبو بيها ديك الساع. من بعدهوم الإغريقيين و الرومانيين بداو تايخدمو بزاف بهاد الحيلات، ومن بعدهوم المغاربة (ليي جاو فالغرب : إفريقيا د الشمال و إسبانيا) زادو نوّعو فالتقويسات و الزواق.

التقويسة القديمة المعروفة هي تقويسة د الدروج بالياجور، هاد التقويسة تايسميوها الاليمان قوس الحجر الطالع (Kragsteinbogen) و تايسميوها النڭالزة قوس الغراب ( و تايسميوها المالطيين الحْنية تالقشرة ولّ تالكليّب ( ħnejja tal-qoxra ).

الحيلة لي مبنية بيها التقويسة د الدروج هي يكونو الياجور مبنيين طالعين كي الدروج، ويكونو دروج مقابلين، وكل ياجورة تاتكون خارجة على ختها بشوية، و فالقمقومة ديال التقويسة تايتلاقاو الدروج المقابلين فياجورة مشروكة.

بعض المرات تانسميو هاد التقويسة بالپوخت أ فّاو لي هي بالفرانساوية (Porte à faux)، و المشكل ديال هاد القوس هو أنه ما تايحوّلش مزيان الثقل لي هابط التحت لجيهة الجناب، والقوس لي غادي يحوّل مزيان الثقل ويفرّقو شوية لجيهة الجناب هي التقويسة ديال الناقوس.

صحاب الستاتيك ولّ المساوية تايشرحو التقويسة د الدروج هاكا :

باش يكون القوس شاد خص يكون طرف من الياجورة خارج لبرّا و طرف آخر داخل و معفوس، الطرف المعفوس خص يكون مثقّل باش ما تاتقلبش الياجورة، والطّول ديال الطرف لي خارج لبرّا خص يكون صغر من الطرف المعفوس. وآخر حاجة هي أنه خص الياجورة تكون قادرة تهز الثقل بلا ماتهرّس، يعني البغلي (المادّة) مناش مصاوبة يقدر يصبر على واحد القدر تاع اللّوي لي تايوقع ليها بسباب الثقل، و هاد الجنان ديال التخمام فالتهراس ديال البغلي تايتسمّى الصبر د البغلي بالفرانساوية La résistance des matériaux (RDM).

يمكن نلقاو هاد التقويسة فشلاّ بلايص، بحال الديور القدام فاخفيخكونصونبل فمدينة هان لّي فألمانيا، و بحال مسيد الشمش تاع كونارك لّي فالهند، و بحال مملكة الشامپا لّي فالڤييطنام.

التقويسة ديال الناقوس

تانسميوها التقويسة الرومانية ولّ التقويسة د الناقوس، هي التقويسة لي تاتكون بالياجور، البيطون ولّ السيمة، و تاتكون دايما مهزوزة فوق جوج ساريات ولّ جوج صمعات. الرومانين كانو معروفين بهاد التقويسة وكانو تايبنيو بيها واحد القوس تايسميوه قوس الغلبان، كانو تايبنيوه الرومانين باش يدخلو منّو القيّاد الكبار ديال الجيش .

كاين قوس الغلبان فالمغرب، فمدينة وليلي، سميتو قوس كاركالاّ، بناوه الوليليين في خاطر القيصر كاركالاّ، فالجناب ديال هاد القوس، فالصمعات لي هازين القوس كاين جوج تقويسات على شكل تقويسات الدروج. المشكل ديال تقويسة الناقوس هو أنها ما تقدرش تهز الضّالة بوحدها إنّما خصّ الحيط يكون عامر و غليض باش يعاون التقويسة فالهزّان, 

التقويسة ديال الكتف

الڤيزيڭوط يعني الڭوطيّين د الغرب هوما واحد القوم أصلهوم من لاليمان، و حكمو فرانسا د الجنوب، الصبليون و الشمال ديال إفريقيا (المغرب، الجزاير، تونس و ليبيا). هاد الڤيزيڭوط نوّعو فالبني و تّعرفو بواحد القوس سميّتو قوس كثف  عند الصنايعية  المغاربة وسميّتو القوس المكالي عند الصنايعية  الصبليون و الفرانسيس.

هاد القوس تايهزّ الضّالة و بيه يمكن يكون بزاف ديال الخوى فالحيط حيثاش هو لي تايكالي على الخوى، بهاد الحيلة باش قدرو  الڭوطيّين د الغرب أنهم يدخّلو بزاف ديال الشّعى الكنيسات و الكاتيدرالات الكبار. قبل كان بالقوس الروماني بزّز يكون الحيط عامر، و داكشي علاش الكنيسات بالقوس الروماني  تايكوني مضلّمين حيثاش الحيط تبيحبس الشّعى يدخل.

التقويسة ديال النعل

التقويسة ديال كتف و درج




#Article 629: سليمان بن محمد (101 words)


هو سلطان للي حكم المغريب من بعد خوه يزيد بن محمد.حكم مابين 1792 و 1822.

تولد فعام 1766 و باه هو السلطان محمد التالت. كان دخل فصداع مع خوتو على السلطة و تبايع ففاس من بعد الموت ديال خوه مولاي يزيد و لكن ما بدا يحكم المغرب كامل حتا لديك 1778 فاش سالالت الحرب ديالو مع خوتو.
مولاي سليمان كان متاتر يحال خوه يزيد بالوهابة بسباب هادشي قرر ان يحد من القرصنة و يقطع علاقتو مع الاروبيين. و فالداخل بدا تيضيق على الزوايا و يحد من علاقتهم مع المخزن.
توفا عام 1822 و ورتو و لد خوه عبد الرحمان بن هشام.




#Article 630: يزيد بن محمد (126 words)


سلطان للي حكم المغرب مابين 1790 و 1792. ورت باه محمد التالت بن عبد الله.

تولد فعام 1750. وباه هو محمد التالت و و كانت اوروبية. فعهد باه كان تمرد ضدو و نفاه باه للشرق و عاود رجع و تمرد ضدو. وم بعد مامات باه ف1790 بايعوه سلطان ففاس و لاكن خوه مولاي هشام ناض ضدو و علن راسو سلطان فالجنوب بدعم من قبايل دكالة و الحوز. واجه خوه فمعركة زاكورة و انتصر عليه و لكن توفا من بعد مقتول فالمعركة. من بعد الموت ديالو الناس دفاس بايعو خوه مولاي سليمان.

يزيد كان سلطان عنيف و متيحملش ليهود فكان قتل ليهود للي عندهوم خدمة مع المخزن و هجم على الملاح ففاس و مكناس و جرا على اليهود منو. حتا جا خوه مولاي سليمان هو للي رجعهوم.




#Article 631: يوغرطن (111 words)


يوغرطن ؤلا يوغرطة ؤلا يوڭارثن (مزيود ف 160 ق.م - مات ف 104 ق.م) هوّا ماليك ديال مملكة نوميديا مابين 118 ؤ 105 ق.م.
يوغرطن معروف ب لحرب ديالو ضد لإمبراطورية رّومانية لّي تسمات لحروب د يوغرطن، ؤ شاركو فيها لمور ب لقيادة ديال لماليك بوكوس لول كا حولافا ديال نّوميديين.
هاد لحرب تسالات ب لنهيزام ديال لحلف نوميدي لموري، ؤ معاهدة د صلح لّي دار بوكوس لّول معا رّومان، ؤ موراها تشد يوغرطن ؤ تصيفط ب سّلاسل ل روما، ؤ تماك فين مات.
يوغرطن كان شد لحكم من مورا عمو ميكيپسا لّي كان ربّاه بحال ولدو، ؤ من بعد قتل خوتو ب تّبني أدربال ؤ هييمپصال باش يولّي حاكم بوحدو.




#Article 632: لقاهرة (141 words)


لقاهرة هي لعاصمة ديال مصر و أكبر مدينة فيها، و أكبر مدينة تا فلبلدان اللي كيهضرو لعربية كاملين. على حساب لإحصائيات د 2018، تيسكنو ف لقاهرة 9.7 مليون د الناس، و هي تاني أكبر مدينة ف إفريقيا من ناحية السكان (مورا لاڭوس)، و مرتّبة 17 ف لعالم.

تأسسات لقاهرة ف عام 969 على يد لفاطميين، و لكن لبلاصة فين تأسسات كان عندها تاريخ قدم من داكشي، و هي قريبة من فين كاين لأهرامات لكبار ديال مصر، اللي هي لأهرامات ديال لڭيزة. تيدوز من لقاهرة لواد ديال النيل، اللي هو أطول واد ف لعالم، و اللي مهم بزاف ف لقتيصاد و لفلاحة ديال مصر.

لقاهرة مدينة فيها لمقرات ديال بزاف د لمؤسسات مهمة و مؤثرة ق لعالم بحال لجامعة د الدول لعربية و لجامعة د لأزهر. و هي من لمدون لقلال ف إفريقيا اللي عندها ميطرو، و كان بدا فيها ف 1987.




#Article 633: غيثة بن عبد السلام (160 words)


غيثة بن عبد السلام اللي معروفة بغيتا (26 يونيو 1960، سلا - ) هي مغنية مغريبية وهي بنت لملحّين محمد بن عبد السلام. بدات لغنا من كانت عندها 15 عام، وتشهرات بسباب صوتها فالسبعينات والتمانينات حتال لافّان دالتسعينات كوحدة من أحسن الأصوات دلعيالات فلمغريب.

كانت هاد السيدة ممتيلة شاركات فبزّاف ديال لأعمال دالدراما والسينيما بحال لفيلم لمغريبي الروماني « Les bras d'Aphrodite » ولفيلم لمغريبي لقنفودي ديال نبيل لحلو وجرحة فلحيط ديال الجيلالي فرحاتي واللي خرج فعام 1977، وشاركات فبزاف تاع لملاحيم دلغنا.

قررات غيتة بن عبد السلام تعتازل وواعدات لجمهور ديالها باللي غاترجع ولايني ماعطاتش وقت محدد إيمتا، وقالت باللي لعتيزال ديالها جا باش تعطي فورصة لراسها فين تربّي ولادها. دابا ساكنة هاد السيّدة فمدينة بوزنيقة من مورا مارجعات من لندن فلمملكة لمتحدة مع فاميلتها الصغيرة فخطرة وحدة.

خدات غيتة بن عبد السلام بزاف ديال لجوائيز والتكريمات فحياتها، ودّار ليها تكريم فقناة دوزيم فبرنامج توحّشناك اللي دّوز بزاف من داكشي اللي عاشتو وشهادات ديال ناس اللي كانو وخدمو معاها.




#Article 634: أوم (100 words)


أم الغيت بنت الصحراوي أولا أوم (18 أبريل 1978، الدار البيضا - ) هي مغنية مغريبية كاتعتابر سفيرة التقافة ولأغنية لمغريبية فلخاريج. كاتخلّط فلغنا ديالها مابين لحسّانية والدجاز والسول ولأفروبيت ولموسيقى الصوفية.

نضمّات أوم فعمر صغير بزاف لجوق دموسيقى لݣوسپل ودارت أول لأغاني لمنفاردة ديالها بواحد الصوت زوين. من موراها باش ولّات عندها 17 عام، دارت أغنية سماتها هادا قلبك (بالنڭليزية: This is your heart) إهداء لحملة ديال التبرّوع للناس اللي مراض بلقلب. دخلات ف1996 للمدراسة لوطنية دلهنداسة فالرباط وتخرجات ف2002. شاركات فبزّاف ديال لمهرجانات فلعالم وف2012 جاتها دعوة من لليونيسكو اللي فباريز باش تغني فكونسير بمناسبة النهار لعالمي دلعيالات.




#Article 635: سعيدة فكري (119 words)


سعيدة فكري (28 نونبر 1971، الدار البيضا - ) هي مغنية مغريبية. بدات كاتغني ملّي كانت عندها تمن سنين، وغنات لعبد الهادي بلخياط لأغنية دفي قلبي جرح قديم. بدات كاتسمع لأغاني دلكاونتري دلميريكان، ومنها خرجات أول ألبوم ديالها وسمّاتو كية الغايب. هاجرات سعيدة فكري لميريكان ف1997 وتمنعات من الرجوع بسباب لأغاني ديالها اللي كايهضرو على السياسة. خدات سعيدة فكري لجنسية دلميريكان ف1998. رجعات فعام 2008 للمغريب باش تكمّل لميشوار ديالها من مورا ماترفع عليها لمنع.

كاتهضر سعيدة فكري فلأغاني ديالها على لهموم ديال الشباب وداكشي اللي باغين يوصلو ليه، وعلى لحوب والسالام ولعنصورية ولفساد. وكاتهضر حتى على لفاميلة والصداقة ولحريّة. الستيل ديال سعيدة فكري مبني على اللي كايعيشو لمغريبي فنهارو، وكاتغني بالدارجة وتاريفيت ولعربية، وكاتخلط معاهوم لفرانساوية وحتى النڭليزية.




#Article 636: نواكشوط (164 words)


نواكشوط هي لعاصمة لإدارية و لقتيصادية ديال موريطانيا و أكبر مدينة فيها. تاتعتابر وحدا من لمدون لكبار ف لمنطقة ديال الساحل، و تيسكنو فيها تقريبا مليون ديال الناس.

نواكشوط مدينة جديدة، كانت دوّار صغير تيسكنو فيه ما بين 200 و 300 واحد، و ف 1958 اتّختارت ديك لبلاصة باش تتبنا فيها لعاصمة د الدولة الجديدة د موريطانيا. ف 5 مارس 1958، حطّ لمختار ولد داداه (أول رئيس د موريطانيا) و شارل دو ڭول (الرئيس د فرانسا ديك لوقت)، حطّو لحجر د السّاس د لمدينة اللي كانت ف وسط الصحرا.

مع لعوامات د لجفاف ف السبعينيات، و الزيادة ديال التصحّر، ولاّت بزاف د لهجرة لنواكشوط، اللي كانت لفكرة فاللول يسكنو فيها 15.000 د الناس، و لكن دابا ولاو فيها تقريبا مليون.

نواكشوط فيها مطار دولي، و هو واحد من جوج اللي كاينين ف موريطانيا، و فيها أكبر جامعة ف لبلاد (لجامعة د نواكشوط) و مرسى كبير سميتو ميناء الصداقة، تبنا ب لمعاونة ديال الشينوا.

كاين بزاف ديال النظريات على شنو لأصل ديال السمية ديال نواكشوط.




#Article 637: عبد السلام وادو (217 words)


عبد السلام وادو، لي سميتو لحقيقية عبد السلام أوعدو، تولد فـ1 نونبر 1978 ف ألنيف، كان كوايري مغريبي محتارف اللي لعب صونطر ودفاع، ودابا هو مدرّيب دكورة.

تزاد عبد السلام أوعدو ف مدينة ألنيف، إقليم تينغير وبدا لميشوار الرياضي ديالو معطل بزاف، فاش كانت عندو 21 عام. ف الصيف ديال 2001 سنا كونطرة مع لفرقة د فولهام اللي عاد طلعات ديك الساعات ل لقيسم اللول د النݣليز، ب قيمة 2 د لمليون جنيه نݣليزي ل ربع سنين. واخّا هكاك دوز لأغلبية دلوقت ديالو معا لفرقة درين لفرانساوية (عامين) وكمّل معاهوم منين سالات لكونطرة.

سنا ف الصيف ديال 2006 ل فرقة د أوليمپياكوس اللي ف ليونان. من مورا مابقاش كيلعب مزيان رجع لكراسا د ليحتياط، و ف نهار 7 دجنبر 2006 طلب أوعدو من لمدريب باش يخلّيه يمشي بسباب مشاكيل د لفاميلة، وفيعلا خلاه وعبد السلام رجع لفرانسا.

لعب عبد السلام مع بزاف ديال لفراقي برّا بحال ڤالينسيين (فرانسا)، الدحيل والنادي لقطري (قطر). فواحد لمرّة ف2013 نتاقد لخدمة فديك الدولة وݣاليهوم: فاش كاتخدم فقطر راك خدّام عند شي واحد. نتا ماشي حر، نتا عبد.

ف1 يناير 2013 وقّع عبد السلام أوعدو مع النادي اللول ديالو أس نانسي باش يسالي لكاريير ديالو، ومن مورا جوج سيمانات علن بلّي راه قرر يسالي لميشوار ديالو فكورة.

ما بين 2000 و2009 بان عبد السلام أوعدو ف58 ماطش معا لمنتخاب وسجل تلاتة دلأهداف.




#Article 638: موزار (120 words)


ڤولفڭونڭ آماديوس موزارت (بلألمانية: Wolfgang Amadeus Mozart)، لمعروف ب موزار، و لا موتسارت (تولد ف 27 يناير 1756 ف سالسبورڭ - مات ف 5 دجنبر 1791 ف ڤيينا) كان موسيقار ديال لموسيقا لكلاسيكية، و واحد من لعباقرة ديال لموسيقا اللي بقاو فالتاريخ.

تعرف موزار من صغرو باللي كان عبقري، و بدا تيعزف لپيانو و لكمانجة ملّي كانت عندو تلت سنين. ملّي دار خمس سنين خرّج أول معزوفة ديالو، و دخل مع فرقة و شارك معاهم ف حفلات كادور ف أوروپا, ملّي دار 13 لعام، خرّج أول أوپيرا ديالو كاملة.

عاش موزار عيشة قصيرة (35 عام)، و لكن دار فيها بزّاف و أتّر ف لموسيقا د لعالم. خرّج ف حياتو 626 عمل موسيقي، منها معزوفات و سمفونيات (41) و أوپيرات (22).




#Article 639: محمد الثالث بن عبد الله (122 words)


هو سلطان للي حكم المغريب ما بين 1757 و 1790. باه هو عبد الله بن سماعيل بن علي الشريف. الفترة د الحكم ديالو عرفات شوية د الاستقرار من بعد سنوات د الصداع على الحكم د المغريب من طرف ولاد مولاي اسماعيل.

تولد فمكناس ف 1710. ووكان باه عينو والي د مراكش. من بعد ورت الحكم ديالو موراه. محمد التالت معروف بسياسة ديالو د الانفتاح حيت دار علاقات دبلوماسية مع بزاف د الدول منها ميريكان للي كان المغريب من اول الدول للي عترفو بيها.
فالداخل قدر يحمي سواحا المغرب حيت رجع مازاغان من البرتغال و بنا الصويرة. كيما حاول انه يطور القوة البحرية د المغريب.
كان ولدو يزيد بن محمد تمرد ضدو و نفاه برا المغريب. من بعد رجع.
مات ف1790 فجوايه الرباط.




#Article 640: عزيزة جلال (303 words)


عزيزة جلال (15 دجنبر 1958، مكناس - ) هي مغنية مغريبية كاتغني بلعربية لفوصحة ولمصرية.

عزيزة جلال هي أيقونة فنّية ديال لمغريب، ودابا كاتعيش فالسعودية وعندها جنسية تمّا. قبل الزواج والشوهرة، قرات عزيزة لفن ولموسيقى فمكناس. شاركات فواحد لبرنامج ديال لغنا سميتو مواهيب ودارو لفنان عبد النبي الجيراري ف1975. غنّات عزيزة جلال فهاد لمنافسة أغاني ديال الطرب لعربي بحال دياول شادية وأسمهان.

ما بين 1975 و1985، ولّات عزيزة جلال مغنية ديال لأغاني لكلاسيكية اللي معروفة بزّاف، هادشي قبل ماتزوّج من راجل سعودي. كان معروف عليها باللي هي لمغنية اللي كانت ݣاع كاتعجب لماليك لحسن التاني، وكانت ديما كاتبان فالتلفازة لمغريبية ولمناسبات اللي كانت كاتنضمها الدولة وكانت كاتغنّي بزّاف لأغاني لوطنية، ولأغاني دلقومية لعربية ولإسلامية.

ف1985 قرّرات عزيزة جلال باش تغادر لواجيهة لفنية. تزوجات هاد السيدة واحد رجل دلأعمال سعودي اللي عطاها الحق باش تقرر واش تبقى ولّا تمشي من الساحة لفنية. قالت باللي مافكراتش فيها بزّاف وقررات ما تبقاش تغنّي. قالت باللي ماكانتش ندمانة على لقرار اللي خدات. لقرار دغيا سالا لمكانة ديالها فالصيناعة دلموسيقى، الشي اللي خلا لجمهور ديالها يتقلق، حيتاش كان عارف باللي كون بثات، كانت غاتزيد بزّاف للأغاني دياولها اللي كانت أصلا زوينة.

فنهار 22 ماي 2019 دارت عزيزة جلال مفاجئة للعالم لعربي. كان هاداك هو النهار اللي لمغاربة ولمعجبين من لعالم لعربي تلاقاو فيه لفنانة عزيزة جلال، اللي كانت غايبة على الساحة لفنية لكتر من 34 عام. لمغنية دارت أول ضهور ليها من 1985 فواحد لبرنامج ديال إم بي سي سميتو لقاء من الصفر.

رجعات عزيزة جلال للمنصات ف26 دجنبر 2019 فشتاء طنطورة، وهو مهرجان فالسعودية. بدات السهرة ديالها مع لعشرة دالليل. الناس عجبهوم لحال حيتاش أجيال كانت كاتستمتع بالصوت ولأغاني ديالها. داك النهار شكرات لجمهور ديالها وݣالت: شكرا حيتاش جيتو تشوفوني من مورا غياب كبير. ماعمّركوم كنت بعيدة عليكوم، كنتو ديما فقلبي. أنا رجعت ليكوم حيتاش نتوما اللي بغيتوني. قررت نرجع باش نشارك فلحفلات اللي غادي تدار فبلادنا.




#Article 641: لوغة أمازيغية بديانية (210 words)


اللوغة لأمازيغية لبديانية أولا لأمازيغية لقبلانية (بالنڭليزية: Proto-Berber) هي لوغة قديمة تركّبات واللي منها جايّين اللوغات لأمازيغية ديال دابا. لأمازيغية لبديانية كانت لوغة أفريقية آسيوية، داكشي لاش اللوغات لأمازيغية اللي جايين منها هوما بنات عم اللوغة لمصرية واللوغات الكوشية واللوغات السامية واللوغات التشادية واللوغات لأوموطية.

اللوغة لأمازيغية لبديانية عندها خاصيات اللي كاتفرقها على اللوغات لأفريقية لآسيوية لاخرين، ولاكين اللوغات لأمازيغية ديال دابا متجانسة نسبيا. لأمازيغية لبديانية بانت غير ف3000 عام هادي واخّا التفريقة على اللغات لأفريقية لأسيوية طرات مابين تسعالاف وعشرالاف عام هادي، على حساب ماكايݣول لعيلم دلمقارنة داللوغة والتاريخ. لوالي وفيليپسون (ف2003) قتارحو، على حساب لمعجم دلكسيبة اللي قدرو يخرّجوه من هاد اللوغة، باللي راها دازت من جوج دلمراحيل ديال التطور:

فلقرن 30 قبل لميلاد تفرقو الناس اللي كايهضرو بلأمازيغية لبديانية فلمينطاقة مابين مصر ولمغريب. وفلقرن 10 قبل لميلاد طرا توسع أمازيغي واحد آخر وهو اللي خلق لينا الشعوب دلأمازيغ اللي مقيّدين عند الرومان. طرا التوسع اللخر فلألفية اللولة من مورا لميلاد، فاش تحركو التوارݣ اللي عندهوم دابا الجمال لوسط الصحرا لكبيرة، حيتاش الشمال ديال الصحرا فديك لوقت كان يمكن للناس تسكن فيه، عكس دابا اللي راهو ناشف. لفيكرة ديال لبني الجديد ديال اللوغة لأمازيغية لبديانية جبد السميات ديال بزاف دلحيوانات لمجترة (لكسيبة) من غير الجمال كايورّي باللي الناس اللي كانت كاتهضر بهاد اللوغة كانو كاينتجو لبهايم وماكانوش رحل.




#Article 642: أمسطردام (169 words)


أمسطردام (ب لهولاندية : Amsterdam) هي لعاصمة ديال هولاندا و أكبر مدينة فيها، تسيكنو فيها تقريبا 800.000 ديال الناس. جات أمستردام ف لمنطقة ديال شمال هولاندا، و تاتّعرف تا بسميّت ڤونيز ديال الشمال، بقوة لمجاري د لما اللي فيها، و اللي دخلو مع الترات لعالمي ديال ليونيسكو.

لأصل ديال أمسطردام بدا ف لقرن 12، ملي كانت قرية صغيرة. ف لعصر الذهبي ديال هولاندا (اللي بدا ف لقرن 17)، كبرات أمسطردام و لمرسى ديالها، و ولاّت وحدا من أكبر لموانئ ف لعالم. التطور د لبيع و الشرا تمّا رجّع أمسطردام مركز مالي و تجاري كبير ف أوروپا و ف لعالم. أمسطردام فيها أقدم بورصة ف لعالم، و تأسسات ف عام 1602.

أمشطردام فيها خامس أكبر مرسى و تالت أكبر مطار ف أوروپا (مطار شخيپول)، و عاد فيها عدد ديال امآتر و لمتاحف اللي تاتخلّي عدد كبير من السياح يجيو ليها (كانو شويا كتر من 5 د لمليون ف 2009).

تسمّات أمسطردام على لواد ديال أمسطيل اللي تيدوز منها. السمية د أمسطردام قريبة للمعنى ديال السّد اللي جا على أمسطيل بلهولاندية.




#Article 643: بريكسيل (100 words)


بريكسيل (ب لهولاندية : Brussel، بلفرانساوية:Bruxelles)، رسميا لإقليم د بريكسيل لعاصمة، هي لعاصمة ديال بلجيكا و أكبر مدينة فيها. تسيكنو فيها تقريبا مليون ديال الناس. جات لمدينة ف لمنطقة د بريكسيل لعاصمة، اللي تاريخيا هي منطقة كانت كاتهضر فيها لهولاندية، و لكن تزادت فيها لفرانساوية بزاف من لقرن 19. حيت هي لعاصمة ديال لبلاد، و باش تجمع كلشي، دارت لمنطقة د بروكسيل اللغات لفرانساوية و لهولاندية بجوج لغات رسمية، واخا دابا تقريبا 90% ديال السكان قالو باللي كيعرفو يهضرو لفرونسي.

بريكسيل هي لعاصمة الرسمية ديال لاتحاد لأوروپي و فيها لمقرات د بزاف د لمؤسسات لأوروپية، و لمقر الرئيسي ديال الناطو.




#Article 644: پيكين (121 words)


پيكين و لا بيجينڭ (ب الشينوية : 北京)، هي لعاصمة ديال الشينوا و تاني أكبر مدينة فيها مورا شانڭهاي. پيكين هي أكبر عاصمة ف لعالم من الناحية د عدد السكان، و تيسكنو فيها تقريبا 21 مليون ديال الناس.

پيكين من أقدم لمدن ف لعالم، و عندها تاريخ فايت 3000 عام، و هي لعاصمة د لبلاد من كتر من 800 عام. فيها 7 ديال لمواقع ديال الترات لعالمي ديال ليونيسكو (منها لمدينة لمحرّمة و طراف من السور لكبير د الشينوا) و 91 جامعة. فيها أطول ميطرو ف لعالم و أكبر واحد من ناحية الرواج، و فيها تاني أكبر مطار ف لعالم، اللي هو لمطار ديال پيكين الدولي.

لألعاب لأولمپية ديال 2008 تنضّمات ف پيكين.

السمية ديال پيكين تاتعني بالشينوية لعاصمة ديال الشمال.




#Article 645: لحماية لفرانساوية على لمغريب (108 words)


لحماية لفرانساوية على لمغريب (ب لفرانساوية: Protectorat français au Maroc)، اللي تسما تا لإستعمار لفرانساوي على لمغريب، كان هو النظام اللي طبقاتو فرانسا على لبلايص د لمغريب اللي حتلاّتهم من 30 مارس 1912 ل 2 مارس 1956.

بدات لحماية لفرانساوية على لمغريب نيشان ما بين ما تسينات لمعاهدة د لحماية ما بين السلطان مولاي حفيظ ولحكومة د فرانسا ف 1912. قسّمات هاد لمعاهدة لمغريب لبزّاف ديال الطراف، و عطات لفرانسا لحق باش تحكم لوسط د لمغريب (من لمنطقة د عرباوة ف الشمال تال حدا طرفاية ف لجنوب). الجوايه لاخرين كانو تابعين للحماية الصبليونية، إلا لمدينة ديال طنجة، اللي كان عندها وضع دولي، و كانو تيسيّروها 7 د لبلدان.




#Article 646: لحماية الصبليونية على لمغريب (188 words)


لحماية الصبليونية على لمغريب (ب الصبليونية: Protectorado español de Marruecos)، اللي تسما تا لإستعمار الصبليوني على لمغريب، كان هو النظام اللي طبقاتو صبانيا على لبلايص د لمغريب اللي حتلاّتهم من 1912 ل 1975.

بدات لحماية الصبليونية على لمغريب من بعد ما اتّافقات صبانيا مع فرانسا على كيفاش أيتقاسمو لأراضي د لمغريب ف لمعاهدة اللي كانت بيناتهم ف 27 نونبر 1912. من مورا هاد لمعاهدة، حكمات صبانيا لمنطقة ديال الشمال (جبالة و الريف)، و سيدي إيفني و طرفاية و الصحرا. لعاصمة ديال هاد لمناطق كاملة كانت هي لمدينة ديال تطوان، و فيها فين كان كيسكن لخليفة السلطاني.

لإستقلال ديال لمناطق د لمغريب اللي حتلاتها صبانيا ماكانش ف وقت واحد، كل وحدا و قتاش ستاقلات.

ستاقل الشمال نهار 7 أبريل 1956، فنفس لعام اللي ستاقل فيه لوسط اللي كان تابع للحماية لفرانساوية.

مورا حرب بداها جيش التحرير ديال لجنوب، تلاقاو لووزارا د لخارجية د لمغريب و صبانيا و سيناو لإتفاقية ديال سينطرا ف 1 أبريل 1958، اللي رجعات بيها طرفاية و لمنطقة ديالها للمغريب.

رجعات سيدي إيفني للمغريب نهار 5 يناير 1969 مورا ما حكماتها صبانيا 108 د لعوامات.

خرجات صبانيا من الصحرا ف نونبر 1975، من مورا لمسيرة لخضرا.




#Article 647: رشيد بن الشريف (291 words)


هو اول سلطان من العلويين. قدر انه يوحد المغرب فالوقيتة للي كان مقسم فيها. تولد فتافيلالت فعام 1631.

باه هو مولاي علي الشريف للي كانو بايعوه الناس ديال تافيلالت امير عليهم. فديك الوقت كانت الدولة السعدية ولات ضعيفة و النفود ديالها مابقاش فايت مراكش. و المغرب ولا مقسم لدويلات صغيرة بحال الزاوية الدلائية للي كانت حاكمة فاس و زاوية اليغ للي شادة سوس. و عدد من المدم الساحلية د المغريب ولاو حاكمينا السبليون ولا البرطقيز بحال الجديدة (مازاغان) و الصويرة (موغادور).
مب بعد الموت د مولاي علي الشريف ورتو محمد بن الشريف الاخ الكبير ديال مولاي رشيد و مولاي اسماعيل.
من بعد ما خوه ولا حاكم تافيالات مولاي رشيد خواها و مشا للاطلس. ومن بعد سافر لفاس و منها لتازة و وجدة. و يقدر يجمع و يتخالف مع عدد من قبائل د الشرق بحال بني يزاسن. بهاد الجيش قدر يتواجه مع خوه محمد بن الشريف و للي مات فمعركة ضدو. من بعد الموت ديال محمد الاتباع ديالو فتافيلالت بايعو مولاي رشيد.
من بعد مولاي رشيد رجع لتازة و من تما كان علن على نيتو ديال توحيد المغريب لكن ولد خوه محمد الصغير تمرد ضدو فسجلماسة فرجع تما و رجع تافيلالت للسلطة ديالو. مب بعد بايعوه قبائل الريف من بعد ما انتاصر عليهم. و خدا فاس ف1667 من محمد الحاج الدلائي و بالتالي حيد السلطة للزاوية الدلائية و من فاس تبايع كسلطان للمغرب.
من بعد مولاي رشيد عين خوه مولاي اسماعيل خليفة ديالو ففاس و هبط للجنوب باش ياخد مراكش من ابو بكر كروم الحاج و سوس من زاوية اليغ.
مولاي رشيد توفا من بعد ما طاح من على العود يالو. من بعد ما قدر يوحد المغرب من غير عدد من المدن الساحلية للي بقات تحت الحكم ج الاروبيين قبل ما يجي خوه و يرجع عدد منها من غير سبتة و مليلية.




#Article 648: ريال مدريد (106 words)


ريال مدريد (ب الصيليونية: Real Madrid Club de Fútbol)، ولاّ الريّال، هي فرقة د لكورة صبليونية، من لمدينة د مدريد، و تاتنافس ف لبطولة ديال الليڭا، اللي هي أعلى بطولة ديال لكورة ف صبانيا. ريال مدريد هي لفرقة اللي ربحات أكبر عدد ديال تشومپيونس ليڭ أوروپية ف التاريخ (ربحاتها 13 لمرّة).

تأسسات لفرقة ديال ريال مدريد نهار 6 مارس 1902، و كانت سميتها ديك لوقت: لفرقة د مدريد د لكورة (Madrid Football Club). اللي أسسو لفرقة كانو أساتذة و طلبة قراو ف لينڭليز. ملّي رجعو لمدريد بغاو يلعبو لكورة، اللي كانت رياصة تعلّموها تمّا.

ربحات ريال مدريد بزاف د لجوائر و لبطولات ف لمسيرة ديالها، منها:




#Article 649: سعيد عويطة (106 words)


سعيد عويطة، (بتمازيغت: ⵙⴰⵄⵉⴼ ⵄⵡⵉⵜⴰ)، تولد ف 2 نونبر 1959 ف قنيطرة، هو جرّاي مغريبي معتازل ديال لمسافات لمتوسطا.

سعيد عويطة من لأساطير ديال الجرا ف لمغريب، و بقوة ما كان كيجرّي بالزربة، تسمّا عليه الطران اللي ما بين الرباط و الدار لبيضا. عويطة عندو بزاف د لإنجازات ف لمسيرة ديالو، منّها باللي ربح ميدالية ذهبية فلألعاب لأولمپية ديال لوس أنجلوس 1984، و بطولة لعالم ديال 1987. كانوا عندو ستة د لأرقام لقياسية لعالمية (اللي تحطّمو من بعد)، و هي: 1500 ميطرو، 2000 ميطرو، 3000 ميطرو، 2 ميل، و 5000 ميطرو (حطّمو 2 مرّات - أول واحد فالتاريخ جرّا 5 كلم ف قل من 13 دقيقة).




#Article 650: أنترنيت (136 words)


أنترنت (بلينڭليزية: Internet)، ولاّ الشبكة لعنكبوتية، ولاّ لويب، هو النضام لعالمي اللي تيربط ما بين الشبكات ديال لحواسيب باش تقدر تتواصل مع بعضياتها. لانترنيت هو شبكة ديال الشبكات فيها اللي عمومية و اللي خصوصية، تاتخدم كلّها بنفس النضام، و اللي كيتسمّا لپروطوكول ديال أنترنت.

لأصل ديال أنترنت بدا ف لميريكان، ملّي لعسكر ديالهم خرّجو تكنولوجيا د آرپانيط ف 1969، و اللي هي أوّل مرة ف لعالم رتابطو فيها بزاف ديال لورديناطورات بيناتهم. تطورات هاد التكنولوجيا، و لكن بقات مخدّمة غي عند لعسكر، تال التمانينات فين ولاّو كيخدّموها تا لجامعات. السميّة تبدّلات و ولاّت هي أنترنت ف 1 يناير 1983.

التخدام د أنترنت من الناس كاملين ولاّ مسموح فاللول ديال التسعينيات، و أول موقع تدار ف لويب كان ف 1991، و موراها بدا تيتزاد لعدد د الناس اللي تيخدّموه ف لعالم كامل. لمغريب دخّل لأنترنت ف 1994.




#Article 651: رضا بنخضرة (100 words)


رضا بنخضرة ( بلأمازيغية: ⵔⴻⴷⴰ ⴱⵏⵅⴷⵔⴰ - تولد ف 14 ماي 1998 ف الرباط) وويكيپيدي مغريبي وواحد من لمؤسسين ويكيپيديا بالدارجة ومن الناس اللي حطًوا لقواعد ديالها وكتبو فيها بزاف د لمقالات. رضا واحد تا من لمؤسسين ديال ويكيميديا لمغريب ف 6 أكتوبر 2015، و هو الرئيس ديال لمجموعة.

قرا رضا بنخضرة ف لجامعة د لأخوين ف إفران، و متّل لمجتمع د ويكيميديا لمغريبي ف بزاف د لمؤتمرات، منها مؤتمر ويكيميديا 2016 ف برلين، اللي خلق فيه لمفاجأة حيت كان أصغر مشارك فيه، و تلاقا فيه مع جيمي وييلز (لمؤسس د ويكيپيديا) و كاترين ماهر (لمديرة د مؤسسة د ويكيميديا).




#Article 652: أميريكا (201 words)


أميريكا، اللي معروفة تا بلعالم الجديد هي الطرف ديال لأرض اللي كيجمع ما بين أمريكا الشمالية و أمريكا لجنوية. شحال هادي، كانت أميريكا محسوبة قارة، ولكن دابا الشمال و لوسط قارة بوحدهم، و لجنوب تا هو قارّة. لأراضي ديال أميريكا واخدة 8% من لمساحة د لكرة لأرضية، و 24.8% من ڭاع لمساحات اللي هوما أرض (و ماشي بحر).

أميريكا فيها طبيعة مبدلة بزّاف، بحال التلج و التوندرا، الصحرا، الجبال (الروكيز، لأنديز)، لوديان لكبار (أمازون، ميسيسيپي) و لغابات لإستوائية. ما كاينش تاريخ معروف بالضبط ديال قتاش بنادم سكن أول مرّة ف أميريكا، و لكن التقديرات تاتقول باللي أول سكان أميريكا جاو من آسيا (و دازو على آلاسكا) ما بين هادي 42.000 و 17.000 عام. أوّل أوروپيين سكنو فأمريكا كانو هوما النرويجيين اللي جاو مع لييف إيريكسون، و لكن ما كانوش ساكنين ديما تمّا. أمّا أوّل أوروپيين ستوطنو أميريكان و بقاو فيها هوما الناس اللي جاو مع كريسطوف كولومبوس.

تيسكنو ف أميريكا كلها تقريبا مليار ديال الناس، مفرّقين ما بين 35 بلاد. لبلدان التلاتة اللولا اللي فيها الناس بزاف هي لميريكان، لبريزيل و لمكسيك، اللي بتلاتة ساكنين فيهم 2/3 ديال السكان د أميريكا. كاين بزاف د لمدن كبار ف أميريكا منها: نيو يورك، ميكسيكو، ساو پاولو، لوس أنجليس، بوينوس آيريس، ريو دي جانيرو.




#Article 653: فاطمة زهرا أبو فارس (136 words)


فاطمة زهرا أبو فارس، تولدات فـ28 فبراير 2002 ف لفقي بنصالح، هي لعابة د تيكواندو مغريبية.

ف 2018، ف لعاب لؤلامپية د شباب لي تنضمات ف بوينس أيرس، لارجونتين، ربحات لميدالية دهبية ف لمسابقة د كتر من 63 كيلو، مورما ربحات ف لفينال لعابة لإرانية كيميا حماتي.

ف 2019، متلات لمغريب ف لعاب لإفريقية لي تلعبات ف رباط ؤ ربحات لميدالية دهبية ف لمسابقة د كتر من 73 كيلو.

ف 2020، قبل من تصفيات د إفريقيا ل لعاب لؤلامپية د طوكيو، لمدير تيقني د لجاميعة حيد فاطمة زهرا من ليسطا د لعابة لي غادي يشاركو ف تصفيات بسباب لإصابة. موراها طالبات باش تدار تحليلة مضادة والاكين لجامعية بقات قابطة لقرار ديالها. ف لخر، دارت فاطمة زهرا هي ؤ لمدريب ديالها ندوة صحافية بينات فيها بلي ماعندها حتا إصابة ؤ طالبات باش يتدخل لماليك ف هاد لقضية.




#Article 654: عبد الله زاڭور (148 words)


عبد الله زاڭور أوعبل (ب تشلحيت : أمغار ڭو عبلا) مناضل ومقاوم سوسي مغريبي أمازيغي ضد لإستعمار لفرنساوي فلمغريب، تزاد عام 1885م و مات ف 1972م. كاتعتبر معركة أيت عبد الله من أهم المعارك لي قادها هاذ لمقاوم.و هو مول لقولة لكفاحية لمشهورة ءيتما لقرطاس ءيتما واوال زعما تقادا الرصاص وتقادا معاه حتى الهضرة.

تولد شيخ عبد الله زاڭور ف 1885 ف زغنغين ف منطقة ايت عبلا (ايت عبد الله) ف لأطلس صغير، منطقة تابعة اداريا لمدينة إيغرم ف إقليم تارودانت، تعرفات لمنطقة ب لعولاما ولفقها لي دكرات خبارهم ف كتاب المعسول وسوس العالمة د لعلامة محمد مختار سوسي. عاشت قبيلتو تاريخ حافل بالامجاد والبطولات، قاومو ستيعمار لفرانصاوي ف منطقة و كان عبد الله زاڭور هو أمغار ديالهم ديك ساعة بحال لبلان ديال الشيخ ماء العينين و أحمد الهيبة وزايد اوحما و عسو أوباسلام و موحا أوحمو الزياني و وحدين خرين . وناضل بشجاعة وحارب الاستعمار بحر جهدو.




#Article 655: آسيا (163 words)


آسيا هي أكبر قارة ف لأرض و اللي فيها أكبر عدد ديال السّكان. لأرض ديال آسيا واخدة 8.7% من لمساحة ديال لكرة لأرضية و 30% د ڭاع لمساحات اللي هوما أرض (و ماشي بحر). آسيا محدودة من الشرق ب لمحيط لمهدّن، من لجنوب لمحيط لهندي، من الشمال لمحيط لمجمّد الشمالي، و من لغرب جبال لأورال و مضيق لبوصفور (اللي تايفارقوها مع أوروپا) و قناة السويس (اللي تاتفارقها مع إفريقيا).

لقارة ديال آسيا أترات بزاف ف التاريخ ديال بنادم، و بداو فيها حضارات كبار بحال لحضارة لبابلية و لفارسية و الشينوية و لهنديّة. بزاف د لأديان لكبار ف لعالم بداو ف آسيا، بحال لمسيحية، لإسلام، ليهودية، لهندوسية، لبودية، السيخية.

تيسكنو ف آسيا تقريبا 4.7 مليار د الناس، و اللي هي 61% د بنادم ف لعالم. السكان ديال آسيا تزادو بزّاف ف لقرن 20 (تضوبلو 4 د لمرّات). آسيا فيها 49 بلاد داخلين مع لأمم لمتحدة، و بزاف من لمدن لكبار ف لعالم كاينين ف آسيا: طوكيو، پيكين، نيو ديلهي، جاكارطا، دبي، شانڭهاي، طهران، إسطنبول.




#Article 656: لاڭريما (241 words)


ڭريما أولا لاڭريمات (بالعربية: مأذونية النقل) هي الرخصة للي خاصا أي واحد باش يستغل الطاكسيات فلمغريب. هاد الرخصة تاتحتاج حتا فلمركوب لي ماشي عمومي بحال لكار.

تايرجع التاريخ ديال هاد الرخصة لمورا لاستقلال د لبلاد عام 1956. هاد الرخصة تدارت باش يتقنن لمركوب ف لمدونا و ما بين الجيهات. هاد الرخصة ما زال تاتخلي الريع ف لاقتصاد د لمغريب.

ف لخمسينات والستينات مورا لاستقلال من فرنسا، قرر لمخزن يدير مركوب عصري ف شي مدونا د لمغريب. من غير لمركوب للي كان موجود ف الدار البيضاء، الرباط، فاس، مراكش، مكناس، طنجة ووجدة، تقرر يددار واحد النوع اخر د لمركوب ديال لخواص بحال الطاكسيات صغار و لكبار و حتا لكيران ما بين لجيهات. ف للول تفرقات هاد لاڭريمات على الناس للي كانو ف لجيش د التحرير والناس لموعاقين.

في السبعينات والتمانينات، كان ف المغرب واحد النوع د لمخاصمة مابين لمخزن ولمعارضة. داكشي علاش خدمات السلطة هاد لاڭريمات باش تعطي لشي ناس لحق باش تستغل لمركوب وحتا لمعادين. هادش للي خلا بزاف ديال صحاب هاد لاڭريمات من لمخزن بحال لأعيان ولفنانين والرياضيين وحتا رجال الدين. كاينين شي ناس شددو هاد لاڭريمات حيت ما فحالهومش وشي ناس حيت زاوڭو لماليك نيشان مللي زار مدينتهوم.

كاين واحد لقانون ف لمغريب للي تاينضم هاد الرخصة للي تايقول بللي هي هبة ماش حق. تاتعتبر ف المغرب إكرامية اجتماعية تاددوم 6 سنين تقدر التجدد. هاد الرخصة ما تاتحييدش لمولاها وتقدر تكرا أولا تورت وتقدر حتا تباع.

كاين ف لمغريب 9 ديال لاكريمات ديال لمركوب للي مشروحا ف طابلو لتحت:




#Article 657: محمد زيان (260 words)


محمد زيان، تولد فـ14 فبراير 1943 ف مالاڭا، هو محامي ؤ سياسي مغريبي.

ف 1982، دافع علا زعيم د لعدل ؤ لإحسان شيخ عبدسلام ياسين.

ف 1992، دافع علا لحوكومة ضد نقابي نوبير لأموي لي كان عايرها بشفارة ف جورنال صبليوني إل پاييس، ف لخر تحكم عليه ب عاماين د لحبس.

ف 1998، دافع علا لبرلاماني د تيحاد دوستوري حسن لياماني ف لقضية ديالو معا لبانكا د سياش لي كانت كاتسالو 70 مليون درهم.

ف 2006، دافع علا لجازائيري عبدرحمان عاشور ف لقضية د ختيلاس لفلوس من لبانكا لوطنية لجازائيرية، مورما دارت لجازائير مدكرة بحت ؤ طالبات لمغريب تسلمو ليها؛ لي ف لخر تحكم عليه ب 4 سنين د لحبس.

ف 2017، دافع علا ناصر زفزافي ؤ لمعتقلين د حراك ريف، قبل مايسحبو منو توكيل ف نونبر ف نفس لعام.

ف 2018، كان من بين لمحاميين لي دافعو علا صحافي توفيق بوعشرين.

ف 27 فبراير 1995، تعين زيان وزير منتدب ل لوزير لول مكلف ب حقوق لإنسان ف حوكومة لفيلالي تانية. ف فبراير 1996، قدم ستيقالتو مباشرة ف دوزيم بسباب حملة تطهير لي كان داير وزير داخيلية دريس لبصري.

ف نتيخابات تشريعية د 1997، خسر زيان لمقعد ديالو د برلاماني ف دائرة د طانجا ب سميت حيزب لعمل.

فـ فبراير 2001، علن زيان أنه غادي يحل حيزب جديد ب سميت لحيزب لمغريبي ليبيرالي، ؤ غادي يدير لمؤتمر تأسيسي ديالو ف 27 أبريل ف ناضور

ف يونيو 2020، ف جايحة د ڤيروس كورونا، دار زيان تصريح كي قول فيه بلي كاين غير 15 لحالة لي كاينة ف لمغريب ؤ 700 كيتعالجو بلا دوا [ؤ] علاودهوم 35 مليون مغريبي ف حالة حصر.




#Article 658: لحسين لمانوزي (180 words)


لحسين لمانوزي (بالشلحة: ⵍⵃⵓⵙⵉⵏ ⵍⵎⴰⵏⵓⵣⵉ) (تولد عام 1943 ف تفراوت - تخطّف نهار 29 أكتوبر 1972 ف تونس لعاصمة) كان مناضل ونقابي مغريبي داخل مع لإتحاد لوطني د لقوّات الشعبية. ختافا لحسين لمانوزي نهار 29 أكتوبر 1972 ف لمطار ديال تونس ملّي كان مسافر للمغريب.

لحسين لمانوزي كان من الناس اللي أسسو الشبيبة ديال لإتحاد لوطني للقوات الشعبية، و كان عندو نشاط نقابي كبير. ف 1964، جرات عليه الشركة اللي كان خدّام فيها (لخطوط لملكية لمغربية) علاود النشاط النقابي ديالو، و مشا لبلجيكا.

عاش لحسين ما بين بلجيكا و فرانسا و لمغريب، و من بعد مشا لليبيا، و تمّا كان من الناس اللي خدمو فلبرنامج ديال صوت التحرير، اللي كان برنامج ضد النضام د لمغريب، و تيدوز مباشرة ف الراديو ديال ليبيا. نهار 29 أكتوبر 1972، فالذكرى السابعة ديال لخطيف ديال لمهدي بن بركة، كان لحسين غادي يمشي ف طيارة من تونس للمغريب، و تمّا فين اتّخطف و ما بقا تا حد ما عارف شي خبار عليه.

لمصير ديال لحسين لمانوزي باقي ما اتّعرف تال دابا، و كاينة سميتو فاللائحة ديال الناس اللي لمصير ديالهم مجهول من لعوامات د الرصاص.




#Article 659: الشريف بن علي (103 words)


الشريف بن علي هو الجد د العلويين ولدو محمد حكم ن بعد تافيلالت و ولادو رشيد و اسماعيل ولاو سلاطين دالمغرب.

الشريف بن علي تولد ف1589 فتافيلالت. باه هو مولاي علي الشريف للي تينحدر النسب ديالو للحسن الداخل واحد من سلالة الحسن بن علي. فحياتو كانت الدولة السعدية ضعافت و بانو دويلات للي بداو تيتقاتلو على حكم المغرب. منهم الزاوية الدلائية للي خدات فاس. الناس د تافيلالت خافو ان الدلائيين يهجمو عليهم فناضو بايعو الشريف حاكم عليهم. الشريف قدر انه يوقف الزاوية الدلائية للي كان الزعيم ديالها محمد الحاج الدلائي. و من بعد تنازل على الحكم و الناس ديال سجلماسة بايعو ولدو محمد.




#Article 660: كاس إفريقيا (120 words)


كاس إفريقيا ديال كورة ديال الرجال، (ب لفرانساوية: Coupe d'Afrique des Nations - CAN)، اللي معروفة بكاس إفريقيا، هي أكبر مسابقة ديال لكورة ف إفريقيا، و تيتضمها لإتحاد لإفريقي ديال لكورة (لكان). كاس إفريقيا تلعبات أول مرة ف 1957. من 1968، بدات تاتّلعب مرة كل عاماين. من 2013، ولاّت تا تّلعب ف لعوامات لفردية بلاصة لعوامات الزوجية، باش ما تكونش ف نفس لعام ديال كاس لعالم. من 2017، ولاّو تيشاركو 24 فرقة ف كاس إفريقيا، مقسومين على 6 د لمجموعات.

أكتر بلاد ربحات كاس إفريقيا هي مصر (ربحاتها د 7 لمرّات) و آخر بلاد ربحاتها هي لجزائر (ربحاتها ف 2019). لمغريب ربح كاس إفريقيا مرّة وحدا ف التاريخ ديالو (لكاس د 1976 ف إتيوپيا)، و نضّمها مرة وحدا ف 1988.




#Article 661: لواد د لأمازون (154 words)


لأمازون (بالصبليونية: Río Amazonas - بلبرتغالية: Rio Amazonas) هو واحد لواد ف أمريكا لجنوبية. لأمازون هو أكبر واد ف لعالم من الناحية د التدفق ديالو. هاد التدفق كبير لدرجة أنه واخا يتجمعو لمعدّلات د لوديان التمنية اللي موراه ف الترتيب، أيبقا فايتهم (تعطي تقريبا 20% من لما لحلو د لعالم). من ناحية الطول، لأمازون هو تاني أطول واد ف لعالم من مورا لواد د النيل، و من ناحية لغرق، هو التاني ف لعالم من مورا لواد د لكونڭو. لأمازون تينبع من بزاف د الجبال ف لأنديز، كاينا ف لپيرو و لإكواطًور، و تيصب ف لمحيط لأطلسي.

لأمازون واد ما تادوز عليه تا قنطرة، ماشي حيت واسع، و لكن حيت ما تيدوزش على مدن كبار، و لأغلبية د لبلايص اللي تيدوز منها هي غابات و فيها أصلا طرقان قلال.

لأمازون تيدوز من بزاف د لبلدان ف أمريكا لجنوبية، و هي: لبريزيل، لپيرو، لإكواطًور، ڤينيزويلا، كولومبيا و بوليڤيا. بقوة ما لأمازون كبير، كيتسمّا تا لواد لبحر.




#Article 662: لغابة د لأمازون (124 words)


لغابة د لأمازون هي غابة استوائية جات ف أمريكا لجنوبية، و محسوبة أكبر غابة ف لأرض (فيها كتر من 5.5 مليون كم مربع). بقوة ما لغابة د لأمازون كبيرة، تاتسمّا الرّية ديال لأرض، حيت تاتنتج بزّاف ديال لأوكسيجين اللي مهم للعيشة ديالنا.

لأغلبية د لغابة د لأمازون جات ف لبريزيل (60%)، و عاد كاين بلايص آخرا جات ف لپيرو (13%)، و كولومبيا (10%) و بوليڤيا و لإكواطًور و ڭويانا و سورينام و ڤينيزويلا. لأمازيون فيها تقريبا 390 مليار شجرة مقسومة على 16.000 نوع.

تيعيشو ف لغابة د لأمازون كتر من 30 مليون د الناس، مقسومين على 350 إثنية، و 9 ديال لبلدان. 9% من هاد الناس معتارف بيهم باللي هوما سكّان أصليين، و منهم 60 مجموعة اللي معزولين و ساكنين ف لداخل د لغابة.




#Article 663: ألفريد نوبل (126 words)


ألفريد نوبل (ب السويدية : Alfred Nobel) (تولد ف 21 أكتوبر 1833 ف سطوكهولم - مات ف 10 دجنبر 1896 ف سان ريمو ف الطاليان) كان مهندس و مخترع و كيميائي سويدي. نوبل معروف ف لعالم حيت هو اللي ختارع الديناميت ف 1867. ملّي شاف باللي لاختراع ديالو تخدّم ف حوايج خايبة، و باللي ولاّ تيربح لفلوس من الصناعة د السلاح، ندم، و وصّا باش لفلوس اللي عندو تتفرّق على جائزة بسميتو، اللي تا هي ولاّت معروفة، و هي جايزة نوبل.

نوبل عندو 355 براءة ديال لإختراع، و كانو عندو بزاف د الشركات عندها علاقة ب الشيمي و الصناعات اللي تادّور عليها. باقين شي شركات أسسهوم نوبل خدامين تال دابا، بحال ديناميت نوبل، و أكزونوبل. كاين حتا عنصر كيماوي أساسي تسمّا بسميت نوبل، و هو النوبيليوم.




#Article 664: پولي (134 words)


إدسون أرانتيس دو ناسيمنطو (بلبرتغالية: Edson Arantes do Nascimento)، لمعروف ب پولي، و لا بيليه (بلبرتغالية: Pelé) (تولد ف 23 أكتوبر 1940 ف طريس كوراساوس) كواري بريزيلي عتازل كان تيلعب ف لهجوم. بزاف د الناس تيعتابرو پولي أحسن لعّاب ف التاريخ ديال لكورة.

ف 1999، تختار پولي أحسن لعّاب د لقرن لعشرين من فرونس فوطبول، و عطاتو اللجنة لأولمپية الدولية اللقب د الرياضي د لقرن، و رشّحاتو لمجلة ديال تايم مع أكتر الناس لمهمين ديال لقرن 20. پولي مقيّد ف لموسوعة ديال ڭينيس ديال لأرقام لقياسية حيت هو اللعاب اللي ماركا أكبر عدد د لبيوتا ف التاريخ (1281 بيت ف 1363 ماتش)، و هو اللعاب د كورة لوحيد ف التاريخ اللي ربح كاس لعالم تلاتة د لمرّات.

پولي كانو عندو بزاف د السميّات اللي كان مشهور بيها، منها: لملك ديال كورة، و لجوهرة لكحلا.




#Article 665: فرانز بيكنباور (105 words)


فرانز بيكنباور (بلألمانية: Franz Beckenbauer)، (تولد ف 11 شتنبر 1945 ف ميونيخ) لعّاب د لكورة ومدرّب ألماني قديم. بيكنباور كان تيلعب ف الدفاع و كان تيتسمّا لقيصر حيت كان تيلعب بطريقة أنيقة، و كان هو الشّاف ف لفراقي اللي لعب فيهم. بيكنباور كيتحسب واحد من أحسن اللعابة ف التاريخ ديال كورة، و كاين اللي تيقول عليه باللي كان أحسن مدافع ف التاريخ.

بيكنباور ربح كاس لعالم مع ألمانيا لغربية ف 1974 ملي كان لعّاب، و مع ألمانيا ف 1990 ملّي كان مدرّب. هو واحد من تلاتة د الناس ف لعالم اللي ربحو كاس لعالم لعّاب و مدرب. الجوج لاخرين هوما ديدي ديشون و ماريو زاڭالو.




#Total Article count: 665
#Total Word count: 150526